ಜಿವಿತಾಚೆಂ ರೋದ್ (- ಅವಿಲ್ ರಸ್ಕೀನ್ಹಾ)

[ಕವಿತಾ] ಜಿವಿತಾಚೆಂ ರೋದ್ (- ಅವಿಲ್ ರಸ್ಕೀನ್ಹಾ)

ಹ್ಯಾ ಸಂಸಾರಾಂತ್ ಹರೇಕಾ ಸಂಗ್ತೆಂನಿ ಎಕಾಮೆಕಾ ಪೂರಕ್ ಜಾಂವ್ಚ್ಯೊ ಸಂಗ್ತ್ಯೊ ಆಸಾತ್ ಆನಿ ಜಿವಿತಾಚೆಂ ರೋದ್ ಮುಕಾರ್ ವರುಂಕ್ ಹ್ಯೊ ದೊನ್‌ಯೀ ಎಕಾ ನಾ ಎಕಾ ರಿತಿನ್ ಮಜತ್‌ದಾರ್ ಜಾತಾತ್. ಸತ್ ಆನಿ ಫಟ್, ದೀಸ್ ಆನಿ ರಾತ್, ಉಜ್ವಾಡ್ ಆನಿ ಕಾಳೊಕ್, ಭಲಾಯ್ಕಿ ಆನಿ ಪಿಡಾ, ಬರೆಂ ಆನಿ ವಾಯ್ಟ್, ಜಯ್ತ್ ಆನಿ ಸಲ್ವಣ್. ಪುಣ್ ಮನಿಸ್ ಜಿತ್ಲ್ಯೆ ಮಾಪಾನ್ ಜಯ್ತಾಕ್ ವೆಂಗ್ತಾ ತಿತ್ಲ್ಯೆಚ್ ಮಾಪಾನ್ ಸಲ್ವಣೆಕ್ ವೆಂಗಿನಾ. ಹೆಂ ಸಹಜ್ ಪುಣ್ ಫಕತ್ ಉಜ್ವಾಡಾಕ್, ದಿಸಾಕ್, ಸತಾಕ್ ಆಶೆಂವ್ಚೆಂಯ್ ಪಿಶೆಂಪಣ್. ಹ್ಯಾ ಸಂಸಾರಾಂತ್ ಆಯಿಲ್ಲೊ ಕೊಣ್‌ಯೀ ನಾ ಜೊ ಫಕತ್ ಎಕಾಚ್ ಸಂಗ್ತೆಚೊ ಅನ್ಭೋಗ್ ಕರುನ್ ಗೆಲ್ಲೊ. ಅಶೆಂ ಮ್ಹಣ್ತಾನಾ ಕವಿಚಿಂ ಉತ್ರಾಂ ಭೋವ್ ಸಹಜ್ ಆನಿ ಸೊಂಪಿಂ, ಜಿವಿತಾ ಆವ್ದೆಂತ್ ಜ್ಯೆ ಕಿತೆಂ ಆಮ್ಕಾಂ ಫುಡ್ ಕರುಂಕ್ ಮೆಳ್ತಾ ತೆಂ ಆಮ್ಕಾಂ ಎಕಾ ನಾ ಎಕಾ ರಿತಿರ್ ಪಾರ್ಕುಂಕ್ ಯೆತಾ ದೆಕುನ್ ತೆಂ ಸ್ವಿಕಾರ್ ಕರುನ್ ಅಪ್ಲ್ಯಾ ಜಿವಿತಾಚ್ಯಾ ರೋದಾಕ್ ಕಸ್ಲೆಂಚ್ ಭಾದಕ್ ಜಾಯ್ನಾಸ್ಚೆಪರಿಂ ಪಳೆಂವ್ಕ್ ಮನ್ಶ್ಯಾನ್ ಶಿಕುಂಕ್ ಜಾಯ್.

ಬಾಬ್ ಅವಿಲ್ ರಾಸ್ಕಿನ್ಹಾ ಏಕ್ ಶಿಕ್ಪಿ ತಶೆಂಚ್ ಕೊಂಕಣಿ ಸಾಹಿತ್ಯಿಕ್ ತಶೆಂಚ್ ಸಮಾಜಿಕ್ ಶೆತಾಂನಿ ಖೂಬ್ ವಾವ್ರ್ ಕೆಲ್ಲೊ ಸಂಪಾದಕ್. ತಾಚೆಂ ಚಡ್ತಾವ್ ಉಲವ್ಪ್ ಕಾಮಾಂತ್ ದೆಕುನ್ ತಾಣೆಂ ಬರಯಿಲ್ಲೆಂ ಉಣೆಂ ಪುಣ್ ತಾಣೆ ಕೆದ್ನಾಂಯ್ ಬರಯಿಲ್ಲೆಂ ಆಸಾ ತೆಂ ಸಗ್ಳಿಂ ಚೀತ್ ದಿವ್ನ್ ಆಯ್ಕತಾತ್ ಆನಿ ಹಿ ಕವಿತಾ ಸಯ್ತ್ ತೆಚ್ ವರ್ಗಾಚಿ. ಹ್ಯಾ ಕವಿತೆಂತ್ಲೆಂ ಬಾಕಿಚೆಂ ರಾಜಾಂವ್ ಪಾರ್ಕುಂಕ್ ತುಕಾಚ್ ಸೊಡ್ತಾಂ.

[ಕವಿತಾ] ಜಿವಿತಾಚೆಂ ರೋದ್ (- ಅವಿಲ್ ರಸ್ಕೀನ್ಹಾ)

ಜಿವಿತಾಚೆಂ ರೋದ್ 

ಕಶೆಂ ವೆಳಾಕಾಳಾಂತ್ ಬದ್ಲಾವಣ್ ಜಾತಾ

ತಶೆಂ ಮನ್ಶಾಜಿವಿತಾಂತ್‍ಯೀ ಬದ್ಲಾವಣ್ ಜಾತಾ

ದೀಸ್ ಪಾಶಾರ್ ಜಾತಾನಾ ರಾತ್ ಯೆತಾ

ರಾತ್ ಪಾಶಾರ್ ಜಾತಾನಾ ದೀಸ್ ಉದೆತಾ

ಮನ್ಶಾ ಜಿವಿತ್ ರೊದಾಪರಿಂ ಘುಂವೊನ್‍ಚ್ ಆಸ್ತಾ

ಹರ್ ಘಡಿತಾಂ ಮನ್ಶಾಜಿವಿತಾಂತ್ ಗಾಂಚ್ ಕಶಿಂ

ಹರ್ ಬದ್ಲಾವಣ್ ಹರ್ ಘಡಿತ್

ತುವೆಂ ಸ್ವಿಕಾರ್ ಕರುಂಕ್ ಜಾಯ್

ತೆಂ ಏಕ್ ಪಂಥಾಹ್ವಾನ್ ಜಾವ್ನ್ ಘೆಜಯ್

ಥೊಡ್ಯಾಂತ್ ಜೀಕ್ ತುಜಿ ಜಾತಲಿ

ಥೊಡ್ಯಾಂತ್ ಸಲ್ವಣಿ ತುಂ ದೆಖ್ತಲೊಯ್

ಜೀಕ್ ಲಾಭ್ತಾನಾ ಲೆಕಾವರ್ತೊ ಫುಲಾನಾಕಾ

ಸಲ್ವಣ್ ಆಪ್ಣಾಯ್ತಾನಾ ಕಂಗಾಲ್ ಜಾಯ್ನಾಕಾ

ಖಂಚ್ಯಾಯ್ ಸಮಯೆ ಆಶಾವಾದಿ ಜಾ

ನಿರಾಶೆಕ್ ತುಜೆರ್ ಸಾವ್ಳಿ ಘಾಲುಂಕ್ ದೀನಾಕಾ

ಆಕಾಂತಾಂತ್ ಥಿರಾಸಣ್ ಸಾಂಬಾಳ್ಶಿ ತರ್

ಅಂತಿಮ್ ಜೀಕ್ ತುಜಿ ಜಾತಲಿ

ಧಯ್ರಾನ್ ಜಿವಿತಾಕ್ ಫುಡ್ ಕರ್

ಆನಿ ತುಂ ಜಯ್ತೆವಂತ್ ಜಾತಲೊಯ್

- ಅವಿಲ್ ರಸ್ಕೀನ್ಹಾ  [ಎಪ್ರಿಲ್, 2023]

ಅವಿಲ್ ರಾಸ್ಕಿನ್ಹಾ: ಕಾಣಿಕ್ ನೇಮಾಳ್ಯಾಚೊ ಸಂಪಾದಕ್ ಜಾವ್ನ್ ವೀಸ್ ವರ್ಸಾಂ ವಾವ್ರ್ ಕೆಲಾ. ಸಾಂತಾಕ್ರೂಜ್ ಪ್ರಕಾಶನಾಖಾಲ್ ಚೊವ್ದಾ ಕೊಂಕಣಿ ಪುಸ್ತಕಾಂ ಪ್ರಕಾಶಿತ್ ಕೆಲ್ಯಾಂತ್. 2023 ಇಸ್ವೆಚೊ ಆಸ್ಟಿನ್ ಪ್ರಭು ನಾಂವಾಚೊ ಪತ್ರಿಕುಧ್ಯಮ್ ಪುರಸ್ಕಾರ್ ಜೊಡ್ಪಿ.