ನಾಕಾ ಜಾಲ್ಯಾರ್ [ಎಚ್ಚೆಮ್]

ನಾಕಾ ಮ್ಹಳ್ಯಾರ್ ನಾಕಾ (NO means NO), ಆಯ್ಲೆವಾರ್ ಫಾಮಾದ್ ’ಪಿಂಕ್’ ಪಿಂತುರಾಚೊ ಸಾರ್, ದಾದ್ಲೊ ಪ್ರಧಾನ್ ಸಮಾಜೆಂತ್ ಬಾಯ್ಲ್ ಆಪ್ಣಾಚೆರ್ ಜಾಲ್ಲೊ ಅನ್ನ್ಯಾಯ್ ಸೊಸುನ್ ವರುನ್ ಜಿಯೆಂವ್ಚೆಂ ಚಿಂತಪ್ ಥಾಪ್ತೆಲ್ಯಾಂಚೆರ್ ಕಾಯ್ದೆ-ಕಾನುನಾನ್ ದಿಲ್ಲೆಂ ಫರ್ಮಾಣ್. ಪುಣ್ ಹ್ಯಾ ಕವಿತೆಂತ್ ಆಸ್ಚೆಂ ’ನಾಕಾ’ ವೆಗ್ಳೆಚ್ ಚಿಂತ್ಪಾಚೆಂ, ಸ್ವಪ್ಣಾಂಚೆಂ, ತಶೆಂಚ್ ಉಮಾಳ್ಯಾಂಚೆಂ. ಕವಿತೆಚಿ ಸೊಭಾಯ್ ಚಾಕುಂಕ್ ತುಕಾಚ್ ಸೊಡ್ತಾಂ.

ಎಚ್ಚೆಮ್ ಕೊಂಕ್ಣಿ ಕವಿತಾಶೆತಾಂತ್, ಪ್ರತ್ಯೇಕ್ ಜಾವ್ನ್ ನವ್ಯೋತ್ತರ್ ಕವಿತೆಂನಿ ಮಹತ್ತರಾಚಿ ಬದ್ಲಾವಣ್ ಅಪ್ಲ್ಯಾ ಕವಿತೆಂನಿ ಘೆವ್ನ್ ಆಯಿಲ್ಲೊ ಚಿಂತ್ಪಿ, ಕಾಣ್ಯೆಗಾರ್, ವಿಮರ್ಶಕ್, ಪತ್ರಿಕೋಧ್ಯಮಿ ತಶೆಂಚ್ ಏಕ್ ಸಂವೇದನಾತ್ಮಕ್ ಕವಿ ಸಯ್ತ್. 2007 ಇಸ್ವೆಚೊ ’ದಾಯ್ಜ್ ವರ್ಸಾಚೊ ಕವಿ’ ಸವೆಂ, ಸಭಾರ್ ಸಾಹಿತಿಕ್ ಸ್ಪರ್ಧ್ಯಾಂನಿ ಇನಾಮಾಂ ಆಪ್ಣಾಯಿಲ್ಲೊ ಎಚ್ಚೆಮ್ ’ಕಿಟಾಳ್.ಕೊಮ್’ ಜಾಳಿಜಾಗ್ಯಾಚೊ ಸಂಪಾದಕ್ ಜಾವ್ನ್ ವಾವ್ರ್ ಕರುನ್ ಆಸಾ. ತಾಚ್ಯಾ ಹರೇಕಾ ಕವಿತೆಪರಿಂ, ಹ್ಯಾ ಕವಿತೆಂತ್ ಸಯ್ತ್ ಆಸ್ಚೆಂ ಕಾವ್ಯಾಳ್ ಆಮಾಲ್ ಸೆಂವ್ಕ್ ತುಕಾಯ್ ಆಪವ್ಣೆಂ ದಿತಾಂ.

[ಕವಿತಾ] ನಾಕಾ ಜಾಲ್ಯಾರ್ [ಎಚ್ಚೆಮ್]

ನಾಕಾ ಜಾಲ್ಯಾರ್

ನಾಕಾ ಜಾಲ್ಯಾರ್

ನಾಕಾ ಮ್ಹಣ್

ಅಶೆಂ ವೊಗೆಂ

ರಾವಾನಾಕಾ

ಉಬೊನ್ ಯೆತಾಂ

ಮೋಡ್ ಜಾವ್ನ್

ವೊತುನ್ ವೆತಾಂ

ಪಾವ್ಸ್ ಜಾವ್ನ್

ಭರುನ್ ಘೆ

ವೊಂಟಿಯೆಂತ್

ಏಕ್ ಥೆಂಬೊ

ನಾಕಾ ಜಾಲ್ಯಾರ್

ನಾಕಾ ಮ್ಹಣ್

ರಾವಾನಾಕಾ ವೊಗೆಂ

ಅಶೆಂಯ್....

- ಎಚ್ಚೆಮ್ [ಅಗೊಸ್ತ್ 2018]

ಎಚ್ಚೆಮ್: ಕೊಂಕಣಿ, ಕಾನಡಿಂತ್ ’ಕವಿ’, ’ಕಾಣ್ಯೆಗಾರ್’, ’ವಿಮರ್ಶಕ್/ವಿಶ್ಲೇಷಣ್‌ಕಾರ್’, ತಶೆಂಚ್ ಸಂಪಾದಕ್/ಪ್ರಕಾಶಕ್. ’ಚಲ್ಯಾಂಕ್ ಚತ್ರಾಯ್’, ’ಕಯ್ದ್ಯಾಚ್ಯೊ ಕವಿತಾ’, ’ಬಾಮುಣಾಂಚೆಂ ಚೆಡುಂ’ ಹಾಚೆ ಯೆದೊಳ್ ಪರ್ಗಟ್‌ಲ್ಲೆ ಕವಿತಾಜಮೆ. ಜಾಯ್ತ್ಯಾ ಸಭಾರ್ ಕವಿತಾಜಮ್ಯಾಂನಿ ತಶೆಂಚ್ ಹೆರ್ ಬುಕಾಂನಿ ಪ್ರಸ್ತಾವನ್ ಬರಯ್ಲಾಂ. ಕವಿಗೋಶ್ಟಿ ತಶೆಂಚ್ ಕಾಮಾಸಾಳಾಂ ಚಲವ್ನ್ ವೆಲ್ಯಾಂತ್. ಪ್ರಸ್ತುತ್ ಕಿಟಾಳ್.ಕೊಮ್ ಜಾಳಿಜಾಗ್ಯಾಚೊ ಸಂಪಾದಕ್ ತಶೆಂಚ್ ಪ್ರಕಾಶಕ್.