ನಾರಿಚೊ ಆವಾಜ್..! (- ಪ್ರಸನ್ನ ನಿಡ್ಡೋಡಿ)

[ಕವಿತಾ] ನಾರಿಚೊ ಆವಾಜ್..!  (- ಪ್ರಸನ್ನ ನಿಡ್ಡೋಡಿ)

ಆಮ್ಚೊ ದೇಸ್ ಎಕಾ ಅರ್ಥಾನ್ ಪಳೆಲ್ಯಾರ್ ತಮಾಸೊಚ್ ಮ್ಹಣ್ಯೆತಾ. ಕಾಯ್ದೆ ಕಾನೂನಾಂಚೊ ದೇಸ್ ಪುಣ್ ಕಾನೂನಾಂಚೊ ಬಜಾರ್ ದಿಸ್ತಾ. ಸಂಸ್ರಾಂತ್ಲೆ ಸರ್ವ್ ರಿತಿಚ್ಯಾ ಧರ್ಮಾಂಚೊ ದೇಸ್ ಪುಣ್ ದೆವಾಂಚೊ ಬಜಾರ್ ದಿಸ್ತಾ. ನ್ಹಂಯಾಂಕ್ ಸಯ್ತ್ ದೇವಿಂಚಿಂ ನಾಂವಾಂ ಪುಣ್ ದಿಸಾಚ್ಯಾ ಉಜ್ವಾಡಾಕ್‌ಚ್ ಅಸ್ತುರೆಂಚೆರ್ ಜಾಂವ್ಚೊ ಅನ್ನ್ಯಾಯ್ ಆನಿ ಜುಲುಮ್ ಚಡೊನ್‍ಚ್ ವೆತಾ. ಹ್ಯಾ ವೆವಸ್ತೆಚೊ ಫಾಯ್ದೊ ಜೊಡ್ಚೆಂ ಕಾಮ್ ವೆವಸ್ತಿತ್ ರಿತಿನ್ ಜೊಡ್ಚೆ ಸಭಾರ್. ಹ್ಯಾ ಪರಿಗತೆಂತ್ ಆಮ್ಚೆ ರಾಜಕೀಯ್ ಫುಡಾರಿ ಮೊನೆ, ಆಮಿ ಮೊನಿಂ.

ಬಾಬ್ ಪ್ರಸನ್ನ್ ನಿಡ್ಡೊಡಿಚಿ ಅಸ್ತುರಿ ಸಂವೇದನಾಂಚಿಂ ಸೊಂಪಿ ಕವಿತಾ ಪುಣ್ ಹಾಂತ್ಲ್ಯಾ ವಳಿಂನಿ ದಿಸ್ಚಿಂ ಸತಾಂ ಸೊಂಪಿಂ ನ್ಹಯ್. ಹ್ಯಾ ಸತಾಂತ್ ಸಮ್ಜುಂಚೆಂ ಕಾಮ್ ತುಜೆರ್ ಸೊಡ್ತಾಂ.

[ಕವಿತಾ] ನಾರಿಚೊ ಆವಾಜ್..!  (- ಪ್ರಸನ್ನ ನಿಡ್ಡೋಡಿ)

ನಾರಿಚೊ ಆವಾಜ್..!

ಹಾಂವ್ ರಡ್ಲಿಂ

ಮ್ಹಜೆಂ ರಗಾತ್ ವ್ಹಾಳ್ತಾನಾ

ಹಾಂವ್ ದೊಡ್ಲಿಂ

ಮ್ಹಾಕಾ ನಾಗ್ಡೆಂ ಕರ್ತಾನಾ

ಹಾಂವ್ ಚಡ್ಪಡ್ಲಿಂ

ಮ್ಹಜೆರ್ ಅತ್ಯಾಚಾರ್ ಜಾತಾನಾ

ಹಾಂವ್ ಕಡ್ಲಿಂ

ಮ್ಹಾಕಾ ಜಿವೆಂ ಹುಲ್ಪಾಯ್ತಾನಾ!

ಸಭಾರ್ ಆಯ್ಲೆ

ಮೊಬಾಯ್ಲಾಂನಿಂ ಫಿಚಾರ್ ಕರುಂಕ್

ಸಭಾರ್ ಪಾವ್ಲೆ

ಮಾಧ್ಯಮಾನಿಂ ಪ್ರಸಾರ್ ಭಾಸಾಂವ್ಕ್

ಸಭಾರ್ ಜಮ್ಲೆ

ಮ್ಹಾಕಾ ಭುಜಾವಣ್ ಪಾಟಾಂವ್ಕ್

ಶೆವ್ಟಿಂ ತೆ ಗೆಲೆ

ಮ್ಹಾಕಾ ಧರ್ಣಿರ್ ಉಡವ್ನ್!

ರಗತ್ ಮ್ಹಜೆಂ ವ್ಹಾಳ್ಳೆಂ

ದುಕಾಂ ಮ್ಹಜಿ ಜಿರ್ಲಿಂ

ಲಜ್ ಮ್ಹಜಿ ಉಭ್ಲಿ

ಪುಣ್ -

ಕಾಳಿಜ್ ತಾಂಚೆಂ ಕಡ್ಲೆನಾಂ

ಹಾತ್ ತಾಂಚೆ ವೊಳ್ಳೆನಾಂತ್

ಜೀಬ್ ತಿ ಬಂದ್ ಜಾಲಿನಾ

ಶೋಷಣ್ ಮ್ಹಜೆರ್ ಥಾಂಬ್ಲೆನಾ!

ದಾದ್ಲ್ಯಾಂಚ್ಯಾ ಮುಟಿ ಭಿತರ್

ಚಿರ್ಡೊನ್ ಆಸಾಂ ಮೂಟ್ ಆಂರ್ದುನ್

ನೆತಾಂಚ್ಯಾ ಖೆಳಾ ಮಧ್ಗಾತ್

ಪಿಸುಡ್ಲೆಲೆಂ ಮುಖೊಟೆಂ ಜಾವ್ನ್

ಸಭಾರಾಂಚ್ಯಾ ಭಾಸಾವ್ಣೆ ಉತ್ರಾಂಕ್

ದೇಶಾಚೊ ಪ್ರಭಲ್ ಆವಾಜ್ ಹಾಂವ್

ತರೀ - ಅಕ್ರೇಕ್

ಏಕ್ ಅಬಲ್ ನಾರಿ ಹಾಂವ್ ..!

ಸಮಾನತಾ ಏಕ್ ಮುದ್ದೊ ಮಾತ್ರ್

ಸ್ವಾರ್ಥಿ ನೆತಾಂಕ್ ವೊಟಾಚೊ ಖೆಳ್

ಕಾನೂನಿ ಆರಕ್ಷಣ್ ಆಸ್ಚ್ಯಾ ಕಾಳಾರಿ

ದೇಶಾಕ್ ಜಾಲ್ಯಾಂ ಭಾರಿ

ಆವಾಜ್ ಮ್ಹಜೊ ಉಸ್ಕತಾ ವೊಂಟಾರಿ

ಕಾಲ್ ಆಸ್ಲೊ ಆಜ್ ಆಸಾ ಫಾಲ್ಯಾಂಯ್ ಉರ್ತಲೊ

ಕಿತ್ಯಾಕ್ -

ಹಾಂವ್ ಸದಾಂ ಏಕ್ ಅಬಲ್ ನಾರಿ..?!

- ಪ್ರಸನ್ನ ನಿಡ್ಡೋಡಿ. [ಮಾರ್ಚ್, 2023]

ಪ್ರಸನ್ನ ನಿಡ್ಡೋಡಿ: ಲಿಖ್ಣೆಂ ನಾಂವಾರ್ ಬರಂವ್ಚೊ ಹಿಲರಿ ಡಿ’ಸಿಲ್ವಾ, ಪ್ರಸ್ತುತ್ ಮುಂಬಂಯ್ಚ್ಯಾ ಮಿರಾರೊಡಾಂತ್ ಅಪ್ಲ್ಯಾ ಕುಟ್ಮಾಸವೆಂ ವಸ್ತಿ ಕರುನ್ ಆಸಾ. ಕಾಂಯ್ ಶೆಂಭೊರಾಂವಯ್ರ್ ಕವಿತಾ ಬರಯಿಲ್ಲ್ಯಾ ಹಾಚಿಂ ದೋನ್ ಕವಿತೆಂಚಿಂ ಪುಸ್ತಕಾಂ ಆಶಾವಾದಿ ಪ್ರಕಾಶನಾನ್ ಪ್ರಕಾಶಿತ್ ಕೆಲ್ಯಾಂತ್; ತಾನ್ (2018), ಆಪ್ಲೊ ಪರ್ಕಿ (2021) ಡಿಜಿಟಲ್ ಪುಸ್ತಕ್. ಸಭಾರ್ ಕವಿತಾಸರ್ತೆಂನಿ ಇನಾಮಾಂ ಜೊಡ್ಲ್ಯಾಂತ್.