ಕವಿತಾकविताPoem

ರುಂದ್ ಆನಿ ಅಶಿರ್ ದಾರ್ (- ವಿನ್ಸಿ ಕ್ವಾಡ್ರೊಸ್)

[ಕವಿತಾ] ರುಂದ್ ಆನಿ ಅಶಿರ್ ದಾರ್ (- ವಿನ್ಸಿ ಕ್ವಾಡ್ರೊಸ್)

ಮನಿಸ್ ಹ್ಯಾ ಸಂಸಾರಾಂತ್ ಜಿಯೆತಾಸ್ತಾಂ ಜಾಯತೆಂ ಶಿಕತಾ. ಕಾಂಯ್ ಥೊಡೆಂ ವ್ಹಡಿಲಾಂ ಥಾವ್ನ್, ಕಾಂಯ್ ಥೊಡೆಂ ಇಸ್ಕೊಲಾಂತ್, ಕಾಂಯ್ ಥೊಡೆಂ ವಾಚುನ್ ತರ್ ಜಾಯತೆಂ ಸ್ವತಾಚ್ಯಾ ಜಿವಿತಾಂತ್. ಆನಿ ಬರಿ, ಜಯತಾಚಿ ವಾಟ್ ಕೆದ್ನಾಂಯ್ ಅಶೀರ್ ಆಸ್ತಾ. ಹ್ಯಾ ಕವಿತೆಂತ್ ಸಯ್ತ್ ಏಕ್ ಕಾಣಿಂಚ್ ಆಸಾ ಆನಿ ಕವಿತಾ ವಾಚುನ್ ಗೆಲ್ಲೆಪರಿಂಚ್ ವೆವೆಗಳ್ಯೊ ಕಾಣ್ಯೊ ಮತಿಂತ್ ಉದೆತಾತ್.

ಬಾಬ್ ವಿನ್ಸಿ ಕ್ವಾಡ್ರೊಸಾಚ್ಯೊ ಚಡತಾವ್ ಕವಿತೆಂನಿ ನಯ್ತಿಕ್ ಮೊಲಾಂ ಪಾರಕುಂಕ್ ಮೆಳತಾತ್. ಹ್ಯಾ ಕವಿತೆಂಚ್ ಸಯ್ತ್ ಆಸ್ಚೆಂ ಅಸಲೆಂಚ್ ಚಿಂತಪ್ ಪಾರಕುಂಕ್ ತುಕಾ ಸೊಡತಾಂ.

[ಕವಿತಾ] ರುಂದ್ ಆನಿ ಅಶಿರ್ ದಾರ್ (- ವಿನ್ಸಿ ಕ್ವಾಡ್ರೊಸ್)

ರುಂದ್ ಆನಿ ಅಶಿರ್ ದಾರ್

ಮ್ಹಜ್ಯಾ ತರ್ನ್ಯಾ ಜಿವಿತಾಂತ್

ಆಯುಶ್ಯಾಚಿ ನವಿಚ್ ಕಂರಿ ಫುಲಿ'ಲಿ ತೆದ್ನಾಂ

ಮ್ಹಜ್ಯಾ ದಯ್ವತಾಚೆಂ ದರ್ಶನ್ ಘಡ್ಲೆಂ

ಸಟಿಯೆ ರಾತಿ ಬರಯ್ಲ್ಲಿಯೆ ಪರ್ಮಾಣೆಂ

ಚ್ಯಾರ್ ಅಳಿಂಚೊ ಎಕ್ ಪ್ರವಚೆವ್ನ್ ದಿಲ್ಲೆಂ

ಪುತಾ, ಮ್ಹಜೆ ಕಡೆಂ ಆಸಾತ್ ದನ್ ದಾರಾಂ

ಎಕ್ ರುಂದ್, ದುಡುಗಿರೆಸ್ತ್ಕಾಯೆನ್ ಭರ್ಲಲೆಂ

ಸಂವ್ಸಾರಾಂತ್ಲ್ಯಾ ಸಗ್ಳ್ಯಾ ಸುಖಾಂಚೆಂ

ದುಸ್ರೆಂ ದಾರ್ ಅಶಿರ್, ಅತ್ಮಿಕ್ ಗಿರೆಸ್ತ್ಕಾಯೆಚೆಂ

‘Choice is yours', ಪ್ರವಚೆವ್ನ್ ಸಂಪಯ್ಲ್ಲೆಂ

ಹಾಂವೆಂ ಕೆಲೆಂ ದುರ್ಲಕ್ಶ್ ಪ್ರವಚೆವ್ನ್ಾಚೆರ್

ಚಲತ್ ರಾವ್ಲಂ ರಸ್ತೊ ಸುಖಾಚೊ

ಆವಯ್-ಬಾಪಾಯ್ ಕುಸ್ತಾರ್ಚ್ಯಾ ಫಲ್ಗಾಚೊ

ಮಾಡಯ್ತ್ ಸಂವ್ಸಾರ್ ಚ್ಯಾರ್ ದಿಸಾಂಚೊ

ಆನಂದುಚ್ ಆನಂದ್ ಮೆಳಯ್ತ್ ಜಿವಿತಾಚೊ

ಮ್ಹಜೆಂ ಸರ್ವಸ್ತ್ ಅಂಪ್ಲೆಂ ತ್ಯಾ ರುಂದ್ ದಾರಾಕ್

ಚ್ಯಾರಿತ್ರ್ಯಾಚೆಂ ಮ್ಹಾಕಾ ನಾಸ್ಲೆಂ ಭಾನ್

ಗಿರೆಸ್ತ್ಕಾಯೆಚ್ಯಾ ಪಾಖಾಂನಿ ಉಡತ್

ಮಾರ್ಲೆಂ ಶೆವ್ಟುನ್ ಮನಿಸ್ಪಣ್

ದಾಖಯ್ಲೆಂ ಧನಿಪಣ್, ಥಡೆಂ ದಾದ್ಲೆಪಣ್

ಹಾತ್ ಹಾಲಯ್, ಯೆತಾಲೊ ಸಂವ್ಸಾರ್ ಮ್ಹಜಿಯೆ ಫಾಟ್ಲ್ಯಾನ್

ಸ್ತ್ರೆೆ ಲಿಂಗಾಕ್ ದಿಲೊ ನಾಂ ಕೆದ್ನಾಂಚ್ ರೆಸ್ಪೆತ್

ಸದಾಂಚ್ ಹಾಂವ್ಪಣಾನ್ ಜಿಯೆಲಂ

ಕಿತ್ಯಾಕ್ ಮ್ಹಜೆ ಕಡೆಂ ದಯ್ವತ್ ಆಸ್ಲೆಂ

ರುಂದ್ ದಾರ್ ಆನಿಕ್ ಝಗ್ಝಗ್ಪಾಕ್ ಲಾಗ್ಲೆಂ

ಎಕ್ ದಿಸ್ ಮ್ಹಾಕಾ ಹಲ್ಮಲೆಂ ಜಾಣ್ಟೆಪಣ್

ಬಂಧನ್ ಆಯ್ಲೆಂ ಮ್ಹಜ್ಯಾ ಹಾಲ್ಚಾಲಿಂಚೆರ್

ಸಲ್ಲೊ ದಿವ್ಪಾಕ್ ನಾಂ ಆವಯ್-ಬಾಪಾಯ್, ನಾಂ ಕೊಣ್

ವ್ಹಾಂವನ್ ಗೆಲಿ ಹಾತಾಂತ್ಲಿ ರಾಂಪಣ್

ಕೆಲೆಂ ತಿಜರಿಯೆಚಿ ಚಾವಿಯೆನುಯ್ ಲಚ್ಯಾಣ್

ಘಡ್ಲೆಂ ಪರ್ಥುನ್ ತ್ಯಾಚ್ ದಯ್ವತಾಚೆಂ ದರ್ಶನ್

ತಾಣೆಂ ಆಯ್ಜ್ ಮ್ಹಾಕಾ ದಿಲೆಂ ನಾಂ ಪ್ರವಚೆವ್ನ್

ಪುಣ್ ಆಪಯ್ಲೊ ಭಿತರ್ ಅಶಿರ್ ದಾರಾಂತ್ಲ್ಯಾನ್

ಖುಶಾಲ್ಕಾಯೆನ್ ಕೆಲಿ ತಯಾರಿ ನವ್ಸರ್ಣಿಯೆಚ್ಯಾ ಮನಾನ್

ಜಾಯ್ನಾಂ ಜಾಲೆಂ ಮ್ಹಜೆ ಕಡೆಂ ವಚಂಕ್ ಉಠನ್

ಚಿಂತ್ಲೆಂ, ತಾಚ್ಯಾಚ್ ಹಾತಾಕ್ ಧರುಂಕ್

ಮನ್ ಪಾವ್ತಾಲೆಂ ಪುಣ್ ಹಾತ್ ಕಶ್ಟತಾಲೆ

ಗಿರೆಸ್ತ್ಕಾಯೆಚೊ ಜಾಯ್ನಾಸ್ಲೊ ಕಾಯಂಚ್ ಫಾಯ್ದೊ

ಯೆನಾಸ್ಲೊ ಕೊಣುಚ್ ಮ್ಹಜ್ಯಾ ಆಧಾರಾಕ್

ಸಯ್ರಾಣಾವ್ಿ ನಾಸ್ಲೆಂ ಮ್ಹಜ್ಯಾ ಸಾಂಗಾತಾಕ್

ದಯ್ವತಾನ್ ಅಶಿರ್ ದಾರ್ ಧಾಂಪುಂಕ್ ಸುರು ಕೆಲೆಂ

ಥಡ್ಯಾ ವೆಳಾನ್ ತೆಂ ಬಂದುಯ್ ಜಾಲೆಂ

ತ್ಯಾಚ್ ಖಿಣಾಕ್ ರುಂದ್ ದಾರಾಂತ್ಲ್ಯಾನ್ ಎಕ್ ಕಿಳಾಂಚ್

ಕಾನ್ ಫಡ್ಟಾಲೆ ತರಿ ಥಂಯ್ ಕಣುಚ್ ನಾಸ್ಲೊ

ಅರ್ನತಲ್ಯಾ ಗಳ್ಯಾಂತ್ ಘಾಲುಂಕ್ ಉದ್ಕಾಚೊ ಥೆಂಬಯ್ ನಾಸ್ಲೊ

ಕೊಣಾಕ್ ತರಿ ಆಪವಂಕ್ ಹಾಂವೆಂ ಹಾತ್ ಹಾಲಯ್ಲೊ

ಮ್ಹಜೆಂ ಕೊಣಾಕ್ ಆಯ್ಕಂಕ್ ಯೆನಾಸ್ಲೆಂ

ಆರ್ಡಪಾಚೊ ಯತ್ನ್ ಕರ್ತಾಲಂ ಪುಣ್ ನಿರ್ಫಳ್

ರಗ್ತಾಚೊ ದಾಬ್ ವಾಡ್ಲೊ, ಆಂಗ್ ಶಿರ್ಶಿರ್ಲೆಂ

ಕೊಣಾಚಚ್ ಆಧಾರ್ ನಾಸ್ತಾನಾಂ ಮಾಥೆಂ ಭಿರ್ಭಿರ್ಲೆಂ

ಖುಯಂ ಗೆಲೆಂ ಮ್ಹಜೆಂ ತರ್ನಾಟೆಪಣ್?

ಮ್ಹಜಿಯೆ ಭಿತರ್ಲೆಂ ತೆಜ್ ಆನಿ ಹಾಂವ್ಪಣ್?

ಧನಿಪಣ್ ಆನಿ ತೆಂ ದಯ್ವತ್?

ಬಂದ್ ಕರುನ್ ಅಶಿರ್ ಶಾಸ್ವತ್ ದಾರ್?

ಉಗ್ತೆಂ ಸಡುನ್ ಪಲ್ಕೆಂ ರುಂದ್ ದಾರ್?

- ವಿನ್ಸಿ ಕ್ವಾಡ್ರೊಸ್. [ಮಾರ್ಚ್, 2020]