ಸಂವ್ಣೆ ನ್ಹಾಯತ್ ಗೆಲೆಂ [ಸಂಜೀವ್ ವೆರೆಂಕರ್]

ಹೆಂ ಸಂವ್ಣೆಂ (ಸುಕಣೆಂ) ಮೊಗಾಚೆಂ ಸಂವ್ಣೆಂ ದೆಕುನ್ ಮೊಗಾಚಿಂ ಲ್ಹಾರಾಂ ಘೆವ್ನ್ ಕಾಳ್ಜಾತಡಿಕ್ ಆಪ್ಟಾಶೆಂ ಕರ್ತಾನಾ ಕವಿತಾರಸಿಕಾಚೆಂ ಮನ್ ಉಲ್ಲಾಸಾನ್ ಭರ್ತಾ. ಪುಣ್ ಹ್ಯಾ ಸಂವ್ಣ್ಯಾನ್ ಶಿಡ್ಶಿಡ್ ಪಾವ್ಸಾಂತ್ ನ್ಹಾಂವ್ಚೆಂ ಕವಿಕ್ ಜರ್ ಅಪ್ಲ್ಯಾ ಕಾಳ್ಜಾಂತ್ಲ್ಯಾ ಪ್ರೇಮಿಚಿ ಯಾದ್ ಹಾಡುನ್ ದಿತಾ ಆನಿ ಭಗ್ಣಾಂಚೊ ಕಾಟ್ ತುಟಂವ್ಕ್ ಸಕ್ತಾ ತರ್ ತ್ಯಾ ಸಂವ್ಣ್ಯಾವಿಶಿಂ ಮಾತ್ಶಿ ಖೊಲಾಯೆನ್ ಚಿಂತ್ಪಾಚಿ ಗರಜ್ ಆಸಾ.

ಬಾಬ್ ಸಂಜೀವ್ ವೆರೆಂಕರ್ ಗೊಂಯ್ಚೊ ಏಕ್ ನಾಮಣೆಚೊ ಪತ್ರ್‌ಕರ್ತ್, ಕವಿ, ವಾವ್ರಾಡಿ ಆನಿ ಮಯ್ಪಾಸಿ ಮನಿಸ್. ವಿಮಲಾ ಪೈ ಪುರಸ್ಕಾರ್, ಟಿ.ಎಮ್.ಎ.ಪೈ ಪುರಸ್ಕಾರ್, ಕೊಂಕಣಿ ಭಾಶಾ ಮಂಡಳ್ (ಗೊಂಯಾಂ) ಪುರಸ್ಕಾರ್ ಹಾಕಾ ಲಾಭ್‌ಲ್ಲೆ ಪ್ರಮುಕ್ ಪುರಸ್ಕಾರ್. ಸಾದಿಂ ಉತ್ರಾಂ ವ್ಹಾಪಾರುನ್ ರಚ್‌ಲ್ಲಿ ಹಿ ಕವಿತಾ ಸಾದಿ ದಿಸೊಂಕ್ ಪುರೊ ಪುಣ್ ಸಮ್ಜತೆಲ್ಯಾಂಕ್ ಹಿಶಾರೊಚ್ ಪಾವ್ತಾ ಮ್ಹಳ್ಳೆ ಸಾಂಗಣೆಪರಿಂ, ಹ್ಯಾ ಕವಿತೆಚ್ಯಾ ಗುಂಡಾಯೆಕ್ ದೆಂವೊಂಕ್ ತುಕಾಚ್ ಸೊಡತಾಂ

[ಕವಿತಾ] ಸಂವ್ಣೆ ನ್ಹಾಯತ್ ಗೆಲೆಂ [ಸಂಜೀವ್ ವೆರೆಂಕರ್]

ಸಂವ್ಣೆ ನ್ಹಾಯತ್ ಗೆಲೆಂ

ಶಿಡ್ಶಿಡ್ ಶಿಡ್ ಪಾವ್ಸಾಂತ್ಲ್ಯಾನ್

ಸಂವ್ಣೆ ನ್ಹಾಯತ್ ಗೆಲೆಂ

ಮನಾತ್ ಮ್ಹಜ್ಯಾ ಘೊಟೆರ್ ಕರುನ್

ಖಂಯ್ಚಗೊ ತುಂ ಪಾವ್ಲೆಂ

ಕುಡು ಕುಡು ಜಾತಾ ಮ್ಹುಣ್

ಝಾಡಾರ್ ಹಾಂವ್ ಲಿಪ್ಲೆಂ

ಪಾನಾಂಚಿ ಕಾಮಳ್ ಕರುನ್

ಸುಸ್ಥ್ ಹಾಂವ್ ನ್ಹಿದ್ಲೆಂ

ಫುಲಾಂಚಿ ಸಪ್ನಾ ಪಳೊವ್ನ್

ಫಾತ್ಯಾ ಪಾರಾರ್ ಉಟ್ಲೆಂ

ಫಡ್ಫಡ್ ಪಾಖಾಂ ಹಾಲೊವ್ನ್

ಉಜ್ವಾಡ್ ನ್ಹಾಯತ್ ರಾವ್ಲೆಂ

ತುಜ್ಯಾ ಮನಾತ್ಲ್ಯಾ ಘೊಟೆರಾಚೆ

ಕರು ನಾಕಾ ದಾರ್ ಉಗ್ಡೆಂ

ಸೊಬೀತ್ ಮ್ಹಜೆಂ ಸಂವ್ಣೆ ಮೊಗಾಚೆಂ

ಸಾಂಗೂಕ್ ಮ್ಹಾಕಾ ಲಾಗ್ಲೆಂ

ಖಂಯ್ ಗೊ ತುಂ

- ಸಂಜೀವ್ ವೆರೆಂಕರ್ [ಜನೆರ್, 2019]