ಯಾದಿಂಚೊ ಪೊಸೊ (- ಗೌರಾಂಗ್ ಬಾಬುರಾವ್ ಭಾಂಡೀಯೆ)

[ಕವಿತಾ] ಯಾದಿಂಚೊ ಪೊಸೊ (- ಗೌರಾಂಗ್ ಬಾಬುರಾವ್ ಭಾಂಡೀಯೆ)

ದರೇಕಾ ಮನ್ಶ್ಯಾಕ್ ಭುರಗೆಂಪಣ್ ಹಂತ್ ಉತ್ರುನ್ ಯೆವ್ಪಾಕ್ ಪಡ್ತಾಚ್. ಭುರಗೆಂಪಣ್ ಏಕ್ ಅಸಲೆಂ ಹಂತ್; ಜೆಂ ಕಿತ್ಲೊ ಜಾಣ್ತೊ ಜಾಲ್ಯಾರಿ ಯಾದಿಂತ್ ಉರ್ಚೆ ತಸಲ್ಯೊ ಖೂಪ್ ಕಾಣಿಯೊ ಆಸ್ತಾತ್. ಕೆದ್ನಾಂಯ್ ತ್ಯಾ ಎಕೆಕಾ ಕಾಣಿಯಾಂಕ್ ಯಾದ್ ಕರುಂಕ್ ಲಾಗ್ತಾನಾ ಮತಿಂತ್ ಉಲ್ಲಾಸ್, ಆನಂದ್ ಉಮಾಳುನ್ ಯೆಂವ್ಚೆಂ ಸಹಜ್.

ಬಾಬ್ ಗೌರಂಗ್ ಭಾಂಡ್ಯೆ ಏಕ್ ಯುವಕವಿ, ಅಪ್ಲ್ಯಾ ಭುರಗ್ಯಾಪಣಾಲ್ಯೊ ಯಾದಿ ಕಿತ್ಲ್ಯೊ ಸೊಂಪ್ಯಾ ರಿತಿನ್ ಯಾದ್ ಕರ್ಚಿ ಪಳಯ್ತಾನಾ ಆಮ್ಕಾಂ ತ್ಯೊ ವಾಚುನ್ ಗೆಲ್ಲೆಪರಿಂಚ್ ಆಮ್ಚ್ಯಾ ಯಾದಿಂಚ್ಯಾ ಸಂಸಾರಾಕ್ ಪಾವಯ್ತಾತ್.

[ಕವಿತಾ] ಯಾದಿಂಚೊ ಪೊಸೊ (- ಗೌರಾಂಗ್ ಬಾಬುರಾವ್ ಭಾಂಡೀಯೆ)

 ಯಾದಿಂಚೊ ಪೊಸೊ

ಭುರ್ಗೆಪಣಾಂತ್ಲ್ಯೊ ಯಾದಿ ಉಸ್ಪೂಂಕ್

ಭುರ್ಗೊ ಜಾವ್ನ್ ಗೆಲೊಂ ಹಾಂವ್,

ರಿತೊ ಜಾವ್ಪಿ ಯಾದಿಂಚೊ ಪೊಸೊ

ಆಯ್ಲೊ ಮ್ಹಜೊ ಜೀವ್ ಖಾಂವ್ಕ್.

ಭಾಂಗ್ರಾಳೆ ದೀಸ್ ತೆ

ಭಾಂಗ್ರಾಳ್ಯಾ ಮನ್ಶಾಂನಿ ಭರಿಲ್ಲೆ,

ಆಪ್ಲೆಪಣಾಚ್ಯಾ ನಾತ್ಯಾನ್

ಶೆಜಾರ್ ಶೆಜಾರ್ ಜೊಡಿಲ್ಲೆಂ.

ಅನಂತಾಚ್ಯಾ ಫುಲಾಂನಿ ಆಮ್ಚೆಂ

ಆಂಗಣ್ ಶಿವ್ರಿಲ್ಲೆಂ ಆಸ್ತಾಲೆಂ,

ರತನಆಬೊಲೆಂ ಕಿತ್ಯಾಕ್ ಕೊಣ್ ಜಾಣಾ

ಹಳೂಚ್ ಲಜೂನ್ ಫುಲ್ತಾಲೆಂ.

ಪೊರ್ಸಾಂತಲಿ ಜಾಣ್ಟಿ ದಸಣ್

ನೆಣಾರಪಣ್ ಮಿರಯ್ತಾಲಿ

ಲಯ್ರಾಈಚ್ಯಾ ಜಾತ್ರೆಚಿ ಸುಲೂಸ್

ಜುಸ್ತ್ ಮೊಗ್ರೆಕ್ ಚಡ್ಟಾಲಿ.

ವಯ್ಣೆವೆಲ್ಯಾ ಚುಡ್ಟಾಂಚೆರ್ ನ್ಹಿದ್ಪಾಚಿ

ಒಡೂಚ್ ಆಗ್ಳಿ ಆಶಿಲ್ಲಿ

ಖಳಾವೆಲ್ಯಾ ಬೆಡ್ಯಾಂಚೆರ್ ಲೊಳ್ಪಾಚಿ

ಮಜಾಚ್ ವೆಗ್ಳಿ ಆಶಿಲ್ಲಿ.

ಖಾಣೊಣೆಂತಲೆ ಮಾಗ್ ಆತಾಂ

ಶಿಂಪ್ಪಾ ಖಾತೀರ್ ಉರುಂಕ್ ನಾ

ಕಲ್ಲ್ಯಾಚೊ ಆದ್ಲೊ ಝೆತ್

ಆಯ್ಚ್ಯಾ ಸ್ಪ್ರಿಂಕ್ಲರಾಂನಿ ನಾ.

ಗಾರ್ಫಾಂ, ಆಮುಲ್ಲ್ಯೊ, ತೆಫ್ಳಿ ಆತಾಂ

ಆದ್ಲೆ ಬಶೆನ್ ಲಾಗ್ನಾತ್,

ಪರ್ಮಳ್ ಆಪ್ಲೊ ಫಾಂಕೊವ್ನ್

ಆಪೂಣ್ ಲಾಗಿಲ್ಲ್ಯಾಚೆಂ ಸಾಂಗ್ನಾತ್.

ಆಪ್ಣಾಲ್ಯಾ ಪರಸ್ ಹೆರಾಂಲ್ಯಾ ಭಾಟಾಂತಲಿಂ

ಆಡ್ಸರಾಂ ರುಚೀಕ್ ಲಾಗ್ತಾಲಿಂ,

ಸೂಕತ್ ಘಾಲ್ಲೆ ಪಣ್ಸಾಚೆ ಪಾಪಡ್

ಕುರು ಕುರು ಕರೂನ್ ಖಾತಾಲಿಂ.

ಪಿರಾಡ್ಯಾಚ್ಯಾ ಬೆಟಾನ್ ಆಮಿ

ಕಿತ್ಲಿಂ ಶತ್ಕಾಂ ಮಾರ್ತಾಲೆ,

ಬಾೆಲ್ ಶೆಟ್ಲೊ ಜಾಲ್ಯಾರ್ ಆಮ್ಕಾಂ

ತೊರ್ಗಾಂ ಧಡೆ ಸುಧ್ದಾಂ ಚಲ್ತಾಲೆ.

ಅನ್ಶಿ ಆತಾಂ ಆಳ್ಶಿ ಜಾಲ್ಯಾ

ಮಾಡಾಕ್ ಲೆಗೀತ್ ಮೊಠೆಂಪಣ್ ಆಯ್ಲಾಂ,

ಕಾವ್ಥೆನ್ ಆಪ್ಣೆಂ ಮಾಡಿ ಜಾವ್ಪಾಚೆಂ

ಸಪನ್ ಲೆಗೀತ್ ಉದ್ಕಾಂತ್ ಪಾಯ್ಲಾಂ.

ಶೆಣ್ಯಾವಯಲೊ ಪಣಸ್ ಆತಾಂ

ಆದ್ಲೆ ಬಶೆನ್ ಲಾಗ್ನಾ,

ಕಳ್ಸೊ ಭರ್ ಉದಕ್ ಸೊಡೂನ್

ಮಿರ್ವೆಲ್ ಕಾಂಯ್ ಮಾಗಿನಾ.

ಭಾತ್ಯೊ, ಪಾಲೊ ಖಾವ್ಪಿ ಮಾಯೆಸ್ತ್

ಗೊರ್ವಾಂ ಆತಾಂ ಗೊಠ್ಯಾಂತ್ ನಾ,

ಮಾಕ್ಡಾಂಕ್ ಆಮುಡಪಾಚಿ ತಾಂಕ್ ಆಯ್ಚ್ಯಾ

ಪಗ್, ಜರ್ಮನ್ ಪೆಟ್ಯಾಂತ್ ನಾ.

ಪೂಣ್ ಥೊಡೆಂ ಭೊವ್ ಉರ್ಲಾಂ ನದ್ರೆ ಸಾಮ್ಕಾರ್

ಬಾಕಿ ಸಗ್ಳೆಂ ಇತಿಹಾಸಜಮಾ,

ಆತಾಂ ಘರಾಂ, ಮನ್ಶಾಂ ಕೊಣ್ ನಾ ಹಾಂಗಾ

ಮ್ಹಜ್ಯೊ ಯಾದಿ ತರಿ ಕಸ್ಲ್ಯಾ ಕಾಮಾ?

- ಗೌರಾಂಗ್ ಬಾಬುರಾವ್ ಭಾಂಡೀಯೆ  [ಮಾಯ್, 2023]

ಗೌರಾಂಗ್ ಬಾಬುರಾವ್ ಭಾಂಡೀಯೆ: ಸಾವಯ್-ವೆರೆಂ ರಾವ್ತಾ. ಸದ್ಯಾಕ್ ಧೆಂಪೆ ಮಹಾವಿದ್ಯಾಲಯಾಂತ್ ಕೊಂಕ್ಣಿ ವಿಶ್ಯಾಚೊ ಸಹಾಯಕ್ ಪ್ರಾಧ್ಯಾಪಕ್ ಮ್ಹಣುನ್ ಅಧ್ಯಾಪನ್ ಕರ್ತಾ. ಕಥಾ, ಕವಿತಾ ಬರೊವ್ಪಾಚಿ ಆವಡ್ ಆಸಾ. ಜಾಯ್ತ್ಯೊ ಕಥಾ, ಕವಿತಾ ಪ್ರಕಾಶೀತ್ ಜಾಲ್ಯಾತ್ ಆನಿ ಸರ್ತೀಂನಿ ಇನಾಮಾಂ ಫಾವ್ ಜಾಲ್ಯಾಂತ್. ಕೊಂಕ್ಣಿ ಸಾಹಿತ್ಯ್ ಸರಿತೆಚಿ ಸಾಧ್ನಾ ಅದೀಕ್ ಪ್ರಗಾಲ್ಪ್‌ಪಣಾನ್ ಕರೀತ್ ಆಸಾ.