ಮಾಡ್ ಏಕ್ ಲಕ್ಲಾ

ಹೊ ಮಾಡ್ ಫಕತ್ತ್ ’ಮಾಡ್’ ನ್ಹಯ್, ಪಾರ್ಕುನ್ ಪಳೆಲೆಂ ತರ್ ಆಮ್ಚ್ಯಾ ಸಮಾಜೆಚೆಂ ಏಕ್ ಸಂಯ್ಬ್/ವೆಕ್ತಿತ್ವ್. ಹಾಂಗಾಸರ್ ಭರ್‌ಲ್ಲೆ ಕೊಳ್ಶೆ ಆವಾಜ್ ಕರಿನಾಸ್ಚೆ ವೆಳಾರ್, ಅರ್ಧೆಕುರೆ ಕೊಳ್ಶೆ ಕಶೆಂ ಆವಾಜ್ ಕರ್ತಾತ್, ಜಶೆಂ ಕಾಜುಲೆ ಸುರ್ಯಾಕ್ ಪರ್ಜಳುಂಕ್ ಶಿಕಂವ್ಚೆಪರಿಂ, ಬಾಂಯ್ತ್‌ಲೆ ಮಾಣ್ಕೆ ಮಾಸ್ಯಾಕ್ ಉಪ್ಯೆಂವ್ಕ್ ಶಿಕಂವ್ಚೆಪರಿಂ.

ಸುನಿಲ್ ಕ್ರಾಸ್ತಾ ಬಳ್ಕುಂಜೆ ಅಪ್ರೂಪ್ ಕವಿತಾ ಬರಯ್ತಾ, ಪುಣ್ ತಾಚ್ಯಾ ಕವಿತೆಂನಿ ಜಿಣ್ಯೆ ಅನ್ಭೋಗಾಚೊ ಸಾರ್ ಉಟೊನ್ ದಿಸ್ತಾ ದೆಕುನ್ ಮ್ಹಾಕಾ ಹಾಚಿಂ ಕವಿತಾ ಭೋವ್ ಆಂವಡ್ತಾತ್. ಎಕಾ ಕವಿಥಂಯ್ ಅಸಲೆಂ ಸ್ಪಂದನ್ ಕರ್ಚಿ ಶ್ಯಾಥಿ ಆಸ್ಚಿ ಭೋವ್ ಗರ್ಜೆಚಿ. ಆನಿ ಹಿ ಕವಿತಾ ಭೋವ್ ಸಂಪ್ಯಾ ಉತ್ರಾಂನಿ ಆಸಾ ಪುಣ್ ಗುಂಡಾಯೆಕ್ ವೆಚಿ ಶ್ಯಾಥಿ ತ್ಯಾ ತ್ಯಾ ವಾಚ್ಪ್ಯಾಚೆರ್ ಹೊಂದ್ವೊನ್ ಆಸಾ ದೆಕುನ್ ತುಕಾಚ್ ಹ್ಯಾ ಕವಿತೆಚಿ ಗುಂಡಾಯ್ ಮೆಜ್ಚೆಂ ಕಾಮ್ ಅರ್ಪಿತಾಂ.

ಮಾಡ್ ಏಕ್ ಲಕ್ಲಾ

ತೊಟಾಂತ್

ಜಶೆಂ ಆಮಾಲಾರ್...

ಕೋಂಬಾಂ ಕೊಂಬಾಂನಿ

ಭರ್‌ಲ್ಲಿ ಸುರ್

ಭರ್‌ಲ್ಲೆಪರಿಂ ಹಾಚ್ಯಾಚ್ಚ್

ಪೊಟಾಂತ್...!!

ಮಾಡ್ ಏಕ್ ಲಕ್ಲಾ

ಕಾಟಾ ಮೆರೆರ್...

ಜಶೆಂ ಮೆರೆರ್ ಪಾಂಯ್

ನಿಸ್ರಲ್ಲೆಪರಿಂ..

ಕೊಣೇಂಯ್ ಚಿಂತಿಜಯ್

ತೊಟಾಂತ್ಲ್ಯಾ ಮಾಡಾಚೆ

ಸಗ್ಳೆ ನಾರ್ಲ್

ಜಮ್ಲ್ಯಾತ್ ಮ್ಹಣ್

ಹಾಚ್ಯಾಚ್ಚ್ ಶಿಮ್ಟ್ಯಾರ್...!

ಮಾಡ್ ಏಕ್ ಲಕ್ಲಾ

ಹಿತ್ಲಾಂತ್

ಜಶೆಂ ಭುಲ್‌ಲ್ಲೆಬರಿಂ

ತರ್ನ್ಯಾ ಮಾಡಿಯೆಕ್...

ಮೊಡ್ಲಾಂ ಶೆವ್ಣ್ಯಾಂನಿ ಹಾತ್ ಮೆಳಂವ್ಚೆಂ

ಪ್ರೇತನ್ ಪಳಯ್ತಾನಾ..

ಕೊಣೆಂಯ್ ಚಿಂತಿಜಯ್..

ಹಾಣಿಂಚ್ ದೊಗಾಂಯ್ನೀ

ರಾಕ್ಚೆಂ ಮ್ಹಣ್ ಕಾಳಾ ಥಾವ್ನ್

ಬರ್‍ಯಾ

ವೇಳ್ ಘಡಿಯೆಕ್...!

- ಸುನಿಲ್ ಕ್ರಾಸ್ತಾ ಬಳ್ಕುಂಜೆ [ಎಪ್ರಿಲ್, 2016]

ಸುನಿಲ್ ಕ್ರಾಸ್ತಾ ಬಳ್ಕುಂಜೆ: ಸುನಿಲ್ ಕ್ರಾಸ್ತಾಚ್ಯಾ ಚಡ್ತಾವ್ ಬರ್ಪಾಂನಿ ಜಿಣ್ಯೆಅನ್ಭೋಗ್ ಮಿಸ್ತತಾ, ಆನಿ ಅಶೆಂ ಭಗ್ತಾ, ಆಪ್ಣಾನ್ ಭಗ್‌ಲ್ಲೆಂಚ್ ಹೊಯೀ ಭಗ್ತಾ. ಆನಿ ಹೆಂ ಸ್ಪಂದನ್ ಎಕಾ ಕವಿಥಂಯ್ ಆಸ್ಚಿ ಭೋವ್ ಗರ್ಜ್ ಆಸಾ. ದುಭಯಾಂತ್ ವಾವ್ರ್ ಕರ್ನ್ ಆಸ್ಚೊ ಸುನಿಲ್ ಕ್ರಾಸ್ತಾ ಕೊಂಕ್ಣೆಚೊ ಏಕ್ ಭರ್ವಶ್ಯಾಚೊ ಕವಿ ಮ್ಹಣುಂಕ್ ಧಯ್ರ್ ಘೆತಾಂ.