ಮಾತ್ತಿ

’ಧುಳಿಥಾವ್ನ್ ಆಯಿಲ್ಲೊಯ್ ತುಂ ಧುಳಿಕ್ ವೆತಲೊಯ್’ ಹೆಂಚ್ ತತ್ವ್ ಹರ್ಯೆಕಾ ವರ್ಸಾ ಆಮಿ ಸಿಂಜಿಚ್ಯಾ ಬುಧ್ವಾರಾ ಆಯ್ಕುನ್ ಆಯ್ಲ್ಯಾಂವ್, ತರ್‌ಯೀ ಹೆಂ ಸಮ್ಜುಂಕ್ ವಾ ಸಮ್ಜುಂಕ್ ಪ್ರೇತನ್ ಕೆಲ್ಲೆಂ ತರ್, ಹ್ಯಾ ಸಂಸಾರಾಂತ್ ವೀದ್-ವಾವ್ಳಿ ಆಸ್ತಿನಾ, ಭಾವ್ ಭಾವಾಚೆರ್, ಪೂತ್ ಬಾಪಾಯ್ಚೆರ್ ಎಕಾಮೆಕಾಚ್ಯಾ ರಗ್ತಾಕ್ ತಾನೆತೊನಾ. ಹೆಚ್ಚ್ ಮಾತಿಯೆಚೆರ್ ಜಿಯೆತಲೊ ಮನಿಸ್ ಕೆದಿಂಚ್ ಹ್ಯಾ ಮಾತಿಯೆಚ್ಯಾ ತತ್ವಾಂಕ್ ಸಮ್ಜುಂಕ್ ಸಕ್‌ಲ್ಲೊ ನಾ, ಮಾತಿಯೆಕ್ ಜಾತ್ ನಾ, ಕುಳಿ ನಾ, ಧರ್ಮ್ ನಾ, ದೇವ್ ನಾ.

ಸಂತೋಷ್ ಅಲೆಕ್ಸ್ ಮಲಯಾಳಂ ಮುಳಾಚೊ ಕವಿ ತರ್‌ಯೀ ಹಿಂದಿ ಭಾಸೆಂತ್ ಆಪ್ಲ್ಯಾ ಬರ್ಪಾಂಕ್ ಲಾಗೊನ್ ವ್ಹಳ್ಕೆಚೊ ಜಾಲಾ. ಆನಿ ಹಾಚೆಂ ಏಕ್ ವಿಂಚ್ಣಾರ್ ಕವಿತಾ ಹಾಂಗಾಸರ್ ಘೆವ್ನ್ ಆಯ್ಲ್ಯಾ ಬಾಯ್ ಶೀಲಾ ಭಂಡಾರ್‌ಕರ್. ಆಯ್ಲೆವಾರ್‌ಚ್ಯಾ ದಿಸಾಂನಿ ಬಾಯ್ ಶೀಲಾನ್ ಕರುನ್ ಆಸ್ಚೊ ಸಾಹಿತಿಕ್ ವಾವ್ರ್ ಭೋವ್ ಮಹತ್ವಾಚೊ, ಕೊಂಕ್ಣಿ ಸಾಹಿತ್ಯಾಕ್ ಗ್ರೇಸ್ತ್ ಕರ್ಚ್ಯಾಕ್ ತಿಣೆ ಕರುನ್ ಆಸ್ಚಿ ಮಿನತ್ ಉಲ್ಲೇಕ್ ಕರ್ಚೆತಸಲಿ.

ಮಾತ್ತಿ

ಗಾಂವಾ ತುಲೆನ ಶಹರಾಕ

ಪಾವ್ಚೆ ಭಿತ್ತರಿ ಬದಲ್ ಜಾತ್ತಾ ಮಾತ್ತಿ.

ಚಿಕ್ಲಾನ ಭರ್ಲೆಲಿ ಆಸ್ತಾ

ಶಹರ್ ಚಿ ಮಾತ್ತಿ.

ಗಾಂವ್ಚಿ ಮಾತ್ತಿ ಚಾಬ್ಬುನ ಬಸ್ತಾ

ಮೆಗೆಲೆ ಹಾತ್ತಾಕ ಆನಿ ಪಾಯ್ಯಾಕ.

ಮಾತ್ತಿ ಧುಲ್ಲೇರಿ ತಾಯ್

ತಾಜ್ಜೊ ಪೊರಂಬೋಳ ವಚ್ಚೆ ನಂಯಿ.

ಮಾತ್ತಿ ಶ್ವಾಸು ಮೆಗೆಲಿ

ಮಾತ್ತಿ ಮೆಗೆಲಿ ಶಕ್ತಿ.

ಮಾತ್ತಿ ಮೆಗೆಲ್ ಒಳೋಕ ಜಾವ್ನಸ.

ಮೆಗೆಲೆ ಪಾವ್ಲಾ ಪಂದಾಚಿ ಮಾತ್ತಿ

ಹಾಂವೆ ವರಸ ತುಲೆನ ರಾಕ್ಕುನು ದವರ್ಲೆ.

ಮಾತ್ತಿ ಚಿ ನಾ ಖಂಚಿಯಿ ಜಾತ್

ನಾ ಖಂಚೋಯ್ ಧರ್ಮು.

ಹಾಂವ , ತು

ತೊ, ತೇ....

ಕೋಣ ಪಳ್ಳೆರಿಯಿ ಮಾತ್ತಿ

ಆಪ್ಣೆಲೆ ವೇಂಗೇಂತ್ ಘೆತ್ತಾ.

ಆವ್ಸುನ್ ಆಪ್ಣೇಲೆ ಚೆರ್ಡಾಕ

ಘೆತ್ತಿಲ್ ವರಿ.

[ಹಿಂದಿ ಮೂಳ್: ಸಂತೋಷ್ ಅಲೆಕ್ಸ್. ಕೊಂಕ್ಣೆಕ್: ಶೀಲಾ ಭಂಡಾರ್‌ಕರ್]

ಸಂತೋಷ್ ಅಲೆಕ್ಸ್: 1971 ಇಸ್ವೆಂತ್ ಕೇರಳಾಂತ್ ಜಲ್ಮಲ್ಲೊ ಸಂತೋಶ್ ಅಲೆಕ್ಸ್ ಮಲಯಾಳಂ ತಶೆಂಚ್ ಹಿಂದಿ ಭಾಸೆಂನಿ ಕವಿತಾ ಬರಂವ್ಚೊ ಕವಿ, ಅಣ್ಕಾರ್‌ಕಾರ್. ಎದೊಳ್‌ಚ್ಚ್ ಸ್ವತಾಚೆ ಭಾರಾ ಬೂಕ್ ತಶೆಂಚ್ ಹೆರಾಂಚ್ಯಾ ಅನುವಾದಾಚೆ ಸ ಬೂಕ್ ಪರ್ಗಟ್ ಕೆಲ್ಯಾತ್. ವೃತ್ತೆನ್ ಸೀನಿಯರ್ ಟೆಕ್ನಿಕಲ್ ಆಫಿಸರ್ ಜಾವ್ನ್ ವಾವ್ರ್ ಕರ್ಚ್ಯಾ ಹಾಕಾ ’ಪಂಡಿತ್ ನಾರಾಯಣ್ ದೇವ್ ಪುರಸ್ಕಾರ್’, ’ಧಿವಗೀಶ್ ಪುರಸ್ಕಾರ್’ ಅಸಲೆ ಸಭಾರ್ ಪುರಸ್ಕಾರ್ ತಶೆಂಚ್ ಇನಾಮಾಂ ಫಾವೊ ಜಾಲ್ಯಾಂತ್.