ಮೂಳ್: ಸಾರಾ ಅಬೂಬಕರ್ ತರ್ಜುಮೊ: ಉಬ್ಬ, ಮೂಡ್ ಬಿದ್ರಿ
ಆಜ್ಯೆ ಥಾವ್ನ್ ಕಾಣಿಯೊ ಆಯ್ಕೊನ್ ಆಪ್ಣೆಂಯ್ ಬರಯ್ಜಾಯ್ ಮ್ಹಣ್ ಲ್ಹಾನ್ಪಣಾರ್ ಚ್ ಹಿಣೆಂ ನಿರ್ಧಾರ್ ಕೆಲ್ಲೊ. ಕಾಜಾರ್ ಜಾಲೆಂ ದೆಖುನ್ ಶಿಕ್ಪಾಕ್ ಆದೇವ್ಸ್ ಕರ್ಚೆಂ ಪಡ್ಲೆಂ. ಇಸ್ಲಾಂ ಧರ್ಮ್ ಆನಿ ಮುಸ್ಲಿಂ ಸಮುದಾಯೆಕ್ ಆಪ್ಲ್ಯಾ ಸಭಾರ್ ಕೃತಿಯಾನಿ ಹಿಣೆಂ ವಿಷಯ್ ಘೆವ್ನ್ ವಿಸ್ತಾರ್ ಸಾಹಿತ್ಯ್ ರಚ್ಲಾಂ. ಸಭಾರ್ ಪ್ರಶಸ್ತ್ಯೊ ಹಿಕಾ ಮೆಳ್ಳ್ಯಾತ್.
[ಮಟ್ವಿ ಕಥಾ]: ಆವಾಜ್ ನಾತ್ಲೆಲೆಂ ದೂಖ್
ತ್ಯಾ ದಿಸಾ ಸದಾಂಚ್ಯೆ ಬರಿ ಇಕ್ರಾ ವರಾಕ್ ಜರೀನಾ ಘರ್ಚಾ ಮುಖ್ಲ್ಯಾ ದಾರಾಲಾಗಿಂ ಪಾವ್ತಾನಾ, ಪಯ್ಸ್ ಥಾವ್ನ್ ಗಾದ್ಯಾಚ್ಯೆ ಮೆರೆ ವಯ್ಲ್ಯಾನ್ ಪೋಸ್ಟ್ ಮ್ಯಾನ್ ಯೆಂವ್ಚೊ ಪಳೆಲೆಂ. ಏಕ್ ಘಡಿ ತಾಚೆಂ ಕಾಳಿಜ್ ಜೊರಾನ್ ಅವಾಜ್ಲೆಂ. ಫಾಲ್ಯಾಣ್ಯಾ ದಿಸಾ ಯೇವ್ನ್ ಪಾವ್ತೊಲೊಂ ಮ್ಹಣ್ ಆಪ್ಲ್ಯಾ ಘೊವಾನ್ ಟೆಲಿಗ್ರಾಂ ಧಾಡ್ಲಾಸ್ತೆಲೆಂ. ಪೋಸ್ಟ್ ಮ್ಯಾನ್ ಗೇಟಿ ಲಾಗಿಂ ಪಾವ್ತಾ ಮ್ಹಣಾಸರ್ ತೆಂ ದಾರಾರ್ ಚ್ ಉಭೆಂ ರಾವ್ಲೆಂ. ತೊ ಗೇಟ್ ಉಗ್ತಿ ಕರ್ನ್ ಭಿತರ್ ಯೆತಾಸ್ತಾನಾ ಜರೀನಾ ಭಿತರ್ ದಾರಾ ಪಾಟ್ಲ್ಯಾನ್ ಲಿಪ್ಲೆಂ.
"ಪೋಸ್ಟ್ ಬಾಯೆ" ಮ್ಹಣ್ ತಾಣೆಂ ಆಪಯ್ತಾನಾ ಭಿತರ್ ಥಾವ್ಣ್ಂಚ್ ಹಾತ್ ಭಾಯ್ರ್ ಘಾಲ್ನ್ ಪತ್ರ್ ಕಾಣ್ಘೆಲೆಂ.
"ದಾಟ್ಟೂ, ಕಾಗಾತ್ ಆಯ್ಲಾಂ"
ತೆಂ ಕಾಗಾತ್ ಹಾತಿಂ ಧರ್ನ್ ಸಂತೊಸ್ ತಡ್ವುಂಕ್ ಜಾಯ್ನಾತ್ಲೆ ಬರಿ ದೊಳೆ ದಿವೆ ಕರ್ನ್ ಹಾಸೊನ್ಂಚ್ ಭಾವಾ ಸಮ್ಕಾರ್ ಆಯ್ಲೆಂ.
"ಫೆಸ್ತಾಕ್ ಅನಿಕೀ ತೀನ್ ಚಾರ್ ದೀಸ್ ಆಸಾತ್!" ಮ್ಹಣಾತ್ತ್ ಲಕೊಟ್ಯಾಕ್ ಭಾವಾಚ್ಯಾ ಹಾತಿಂ ದಿಲೆಂ.
ಲಕೊಟೊ ಉಗ್ತೊ ಕರ್ನ್ ಪಳೆತಾನಾ ಭಿತರ್ ದೋನ್ ಪತ್ರಾಂ ಆಸ್ ಲ್ಲಿಂ. ಹಾತಾಕ್ ಪಯ್ಲೆಂ ಮೆಳ್ಲೆಲೆಂ ಧಾಕ್ಟೆಂ ಪತ್ರ್ ಚ್ ಕಾಡ್ನ್ ತೊ ವಾಚುಂಕ್ ಲಾಗ್ಲೊ.
"ಅಬ್ಧುಲ್ ಖಾದಿರಾಚಿ ಧುವ್ ಜರೀನಾಕ್ ತೀನ್ ತಲ್ಲಾಖ್ ಹಾಂವೆ ಧಾಡ್ಲ್ಯಾಂತ್"
ಸಹಿ,
"ಮುಸ್ತಫಾ"
ಸಾಂಗಾತಾ ಚಾರ್ ಜಣಾಂಚ್ಯೊ ಸಹಿ ಸಯ್ತ್ ಆಸ್ ಲ್ಲ್ಯೊ. ತಾಕಾ ದೊಳ್ಯಾಂಕ್ ಕಾಳೊಕ್ ಆಯ್ಲೆಲ್ಯಾ ಬರಿ ಜಾಲೆಂ. ದಾಟ್ಟುನ್ ಕಿತೆಂ ವಾಚ್ಲೆಂ ಮ್ಹಣ್ ಜರೀನಾಕ್ ಕಳ್ಳೆಂಚ್ ನಾ!
"ಉಮ್ಮಾ..." ಭಾಯ್ಲ್ಯಾ ಕೂಡಾ ಥಾವ್ನ್ಂಚ್ ಮೌಲ್ವಿ ಪೂತಾನ್ ಆವಯ್ಕ್ ಉಲೊ ದಿಲೊ.ರಾತಿಚ್ಯಾ ಜೆವ್ಣಾಕ್ ಮಾಸಾಚೆಂ ರಾಂದಪ್ ಕರ್ನ್ ಆಸ್ಚಿ ಆವಯ್ ಸಕ್ಕಡ್ ತಸೆಂಚ್ ಸೊಡ್ನ್ ಭಾಯ್ರ್ ಆಯ್ಲಿ.
"ಕಿತೆಂ ಪೂತಾ, ಕಿತೆಂ ಜಾಲೆಂ?" ಗಾಬ್ರೆವ್ನ್ ತಿಣೆಂ ವಿಚಾರ್ಲೆಂ.
ಮುಸ್ತಫಾನ್ ಜರೀನಾಕ್ ತಲಾಖ್ ಧಾಡ್ಲಾಂ"
"ಹ್ನಾಂ...! " ಥೈಂಚ್ ಆಸ್ಲೆಲ್ಯಾ ಜರೀನಾಚ್ಯೆ ತೊಂಡಾಂತ್ಲ್ಯಾನ್ ತಾಕಾಚ್ ಕಳನಾಸ್ತಾನಾ ಕಿಂಕ್ರಾಟ್ ಭಾಯ್ರ್ ಪಡ್ಲಿ.
ಆವಯ್ ರಾಂದ್ಪಾ ಕೂಡಾಚ್ಯೆ ದಾರಾ ಲಾಗಿಂಚ್ ಬಸೊನ್ ವ್ಹಡ್ಲ್ಯಾನ್ ರಡಾಲಾಗ್ಲಿ.
"ಪಾಪ್ಯಾ. ಮ್ಹಜ್ಯಾ ಧುವೆಕ್ ಅಸಲಿ ಶಿಕ್ಷಾ ದಿಲಿಯ್ಗೀ? ತಾಣೆಂ ತುಕಾ ಕಸಲೊ ಅನ್ಯಾಯ್ ಕೆಲಾ?" ಹುಸ್ಕಾರುನುಂಚ್ ತಿ ಉಲಯ್ಲಿ.
"ತಾಣೆಂ ದುಸ್ರೆಂ ಕಿತೆಂಚ್ ಬರಂವ್ಕ್ ನಾಂಗೀ?"
"ಮೊಗಾಚ್ಯಾ ಭಾವೊಜೆ, ಅಸ್ಸಾಲಂ ಅಲೈಕುಂ. ಹೆಂ ಪತ್ರ್ ವಾಚುನ್ ತುಮ್ಕಾಂ ಮೊಸ್ತು ಬೆಜಾರ್ ಜಾಂವ್ಕ್ ಪುರೊ. ಹೆಂ ಪತ್ರ್ ಧಾಡುಂಕ್ ಮ್ಹಾಕಾಯ್ ಬೆಜಾರ್ ಜಾತಾ. ಪೂಣ್ ಅಸೆಂ ಕರಿನಾಸ್ತಾನಾ ದುಸ್ರಿ ವಾಟ್ ಚ್ ನಾ. ಕಿತ್ಯಾಕ್ ಮ್ಹಣ್ ವಿಚಾರಿನಾಕಾತ್. ತುಜ್ಯಾ ಭಯ್ಣಿಕ್ ದುಸ್ರ್ಯಾಕಡೆ ಕಾಜಾರ್ ಕರ್ನ್ ದಿಯಾ. ದೋತ್ ದಿಂವ್ಚಿ ಗರ್ಜ್ ಪಡ್ಲ್ಯಾರ್ ಹಾಂವ್ ಹಜಾರ್ ರುಪಯ್ ಧಾಡ್ತಾಂ. ಸಲಾಂ"
"ಹುಂ..." ಮೌಲ್ವಿ ಹೂಂಕಾರ್ಲೊ.
"ತಾಕಾ ದುಸ್ರೆಂ ಕಾಜಾರ್ ಕರಿಜಾಯ್ ಖೈಂ. ಹಜಾರ್ ರುಪಯ್ ಧಾಡ್ತಾ ಖೈಂ. ತೀನ್ ಕಾಸಾಂಚೊ. ಏಕಾ ಚಲಿಯೆ ಸಾಂಗಾತಾ ಸೀದಾ ಜಿಯೆಂವ್ಕ್ ಜಾಯ್ನಾತ್ ಲ್ಲೊ ಪೆಟೊ.... ತಳೆಂ ಉತ್ರೊನ್ ಜಾಲೆಂ ನೇ, ಆನಿ ನಾವಿಕಾಚಿ ಗರ್ಜ್ ನಾ. ಆನಿ ಹಾಂವ್ ಕಿತ್ಯಾಕ್ ಜಾಯ್? ಮ್ಹಜಿ ಭಯ್ಣ್ ಕಿತ್ಯಾಕ್ ಜಾಯ್? ಅಸಲ್ಯಾಕ್ ವಾಟೆ ಮಧೆಂ ರಾವವ್ನ್ ವಾಣ್ಯಾನಿ ಮಾರ್ನ್ ಚಾಮ್ಡೆಂ ಸೊಲಿಜಾಯ್!"
ಆಪ್ಲ್ಯಾ ಹರ್ಧ್ಯಾಂತ್ ಕೊತ ಕೊತ ಮ್ಹಣ್ ಶಿಜೊನ್ ಭಾಯ್ರ್ ಯೆಂವ್ಚಾ ದೂಖಿಕ್ ತಾಣೆಂ ಉತ್ರಾನಿ ಭಾಯ್ರ್ ಘಾಲೆಂ.
"ದಾಟ್ಟೂ.. ದೇಡ್ ವರ್ಸಾಂ ಥಾವ್ನ್ ಏಕ್ ಪಾವ್ಟಿಂ ಸಯ್ತ್ ಮ್ಹಜೆಂ ತೋಂಡ್ ಪಳೆನಾಸ್ತಾನಾ, ರಿಗ್ಗಾರ್ ಆಸ್ಲೆಲ್ಯಾ ತಾಣೆಂ ಮ್ಹಜಿ ಕಸಲಿಚ್ ಚೂಕ್ ನಾತ್ಲ್ಯಾರೀ, ನ್ಯಾಯ್, ವಿಚಾರಣ್ ಸಯ್ತ್ ಕರಿನಾಸ್ತಾನಾ, ಮ್ಹಾಕಾ ಉಲಂವ್ಕ್ ಏಕ್ ಆವ್ಕಾಸ್ ಸಯ್ತ್ ದೀನಾಸ್ತಾನಾ ಏಕ್ಚ್ ಪಾವ್ಟಿಂ ಹ್ಯಾ ಪರಿಂ ತೀನ್ ತಲಾಖ್ ಮ್ಹಣೊನ್ ಸುಟ್ಕಾ ಜೊಡ್ಯೆತ್ ಮ್ಹಣ್ ಖುರಾನ್ ಸಾಂಗ್ತಾಗೀ?"
ಭಯ್ಣಿಚ್ಯಾ ಸವಾಲಾಂಕ್ ಜಾಪ್ ದೀಂವ್ಕ್ ಜಾಯ್ನಾಸ್ತಾನಾ ಭಾವ್ ಮೌನ್ ಜಾಲೊ.
"ಜರೀನಾ ಪೂತಾ.... ಮೆಹೆಂದಿ ಹಾಡ್ಲ್ಯಾ. ಪರ್ನೆಂ ಏಕ್ ಕಾಪಾಡ್ ದೀ ಪುರೊ" ಮ್ಹಣ್ ಮೆಹೆಂದಿವಾಲಿ ಬಾಯ್ಲ್ ಮನ್ಶ್ಯಾನ್ ಆಪಯ್ತಾನಾ , ಜರೀನಾಚಿ ಆವಯ್ ಭಾಯ್ರ್ ಆಯ್ಲಿ.
"ಮ್ಹಜೊ ಜಾಂವಯ್ ಮೊರೊನ್ ಗೆಲೊಗೇ ಬಾಯೆ. ಜರೀನಾಕ್ ಮೆಹೆಂದಿ ನಾಕಾ..."
ದುಖಾಂ ಪುಸೀತ್ತ್ ತಿ ಮ್ಹಣಾಲಿ.
[ಸಪ್ತೆಂಬರ್, 2022]
ಉಬ್ಬ ಮೂಡ್ಬಿದ್ರಿ: ಲಿಖ್ಣೆನಾಂವಾಖಾಲ್ ಬರಂವ್ಚೊ ಉರ್ಬನ್ ಡಿ’ಸೋಜ್, ಪ್ರಸ್ತುತ್ ಮಂಡ್ಯಂತ್ ಶಿಕ್ಷಕ್ ಜಾವ್ನ್ ವಾವ್ರ್ ಕರುನ್ ಆಸಾ. ಕಾದಂಬರಿ, ಕಾಣಿಯೊ, ಕವಿತಾ, ಲೇಖನಾಂಶಿವಾಯ್ ತರ್ಜಣ್ ಆನಿ ವಿಮರ್ಸೊ ಸಯ್ತ್ ತೊ ಕರುನ್ ಆಯ್ಲಾ. ತಾಚ್ಯಾ ಮಟ್ವ್ಯಾಕಾಣಿಯಾಂಚೊ ಏಕ್ ಜಮೊ ಪರ್ಗಟ್ ಜಾಲಾ. ಅಜೀಕ್ ಕಾಂಯ್ ಪಾಂತೀಸ್ ವರ್ಸಾಧಿಂ ಕೊಂಕ್ಣೆಂತ್ಲ್ಯಾ ಚಡಾವತ್ ಪತ್ರಾಂನಿ ಸರಾಗ್ ಬರವ್ನ್ ಆಯಿಲ್ಲೊ ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂನಿ ಅಪ್ಲೆಂ ಶಿಕಪ್ ಆನಿ ವಾಚಪ್ ಮುಖಾರುನ್ ಗೆಲ್ಲೊ ಆತಾಂ ಪರತ್ ಬರಂವ್ಕ್ ಲಾಗ್ಲಾ ಮ್ಹಳ್ಳೆಂ ಕೊಂಕಣಿಚ್ಯಾ ಮಟ್ಟಾಕ್ ಸಾಂಗ್ಚೆಂ ತರ್ ಬರಿ ಖಬರ್.
ಆಧ್ಲಿ ಕಥಾ
