ಸುರಯೊ ಉದೆತಾ (ಡಿಜಿಟಲ್ ಬೂಕ್ - 2)
ಸುರಯೊ ಉದೆತಾ - ಕೊಂಕಣಿ ಸಾಹಿತ್ಯಾಚೆಂ ಅಧ್ಯಯನ್ ಕರುಂಕ್ ಮನ್ ಆಸಲ್ಲ್ಯಾಂಕ್ ತೆಂ ತಿತ್ಲೆಂ ಸಲೀಸಾಯೆಚೆಂ ಕಾಮ್ ನ್ಹಯ್. ಕೊಂಕಣಿ ಚ್ಯಾರ್ ರಾಜ್ಯಾಂನಿ, ಪಾಂಚ್ ಲಿಪಿಯಾಂನಿ ಆಸಾ. ಜಶೆಂ ಹೆರ್ ಸಮಕಾಳೀನ್ ಭಾಶೆಂತ್ಲೆಂ ಸಾಹಿತ್ಯ್ ಅಭ್ಯಾಸ್ ಕರುಂಕ್ ಹೊ ಸಮಸ್ಸೊ ನಾ ಪುಣ್ ಕೊಂಕಣಿಕ್ ಹೊ ಸಮಸ್ಸೊ ಆಸಾ. ಅಸುಂಕ್ ಕೊಂಕಣಿ ಭಾಶೆಕ್ ಸಾಹಿತ್ಯ್ ಅಕಾಡೆಮಿ ಆಸಾ, ಸಗಳೆಂ ಅಸಾ ಪುಣ್ ರಾಶ್ಟ್ರೀಯ್ ಕೊಂಕಣಿ ಮಟ್ಟಾರ್ ಆಸ್ಚೆಂ ಸಾಹಿತ್ಯ್, ತೆಂಯ್ ಮಟ್ವ್ಯೊ ಕಾಣಿಯೊ ಪರ್ಗಟ್ ಜಾಲ್ಲೆ ಬೂಕ್ ನಾಂತ್.
2006 ಇಸ್ವೆಂತ್ ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚ್ಯಾ ಅಧ್ಯಕ್ಷ್ ಬಾಬ್ ಎರಿಕ್ ಒಝೇರಾನ್ ಹ್ಯಾ ಚಿಂತಪಾಚಿ ಸುರವಾತ್ ಕೆಲ್ಲಿ. ತ್ಯಾ ಚಿಂತಪಾಚೊ ಫಳ್ ಜಾವ್ನ್ ರಾಶ್ಟ್ರೀಯ್ ಮಟ್ಟಾಚ್ಯಾ ಕೊಂಕಣಿ ಮಟ್ವ್ಯಾ ಕಾಣಿಯೆಗಾರಾಂಚ್ಯಾ ಕಾಣಿಯಾಂಕ್ ಎಕಾ ಬುಕಾರುಪಾರ್ ಸಂಪಾದನ್ ಕರ್ಚಿ ಜವಾಭ್ದಾರಿ ಮ್ಹಾಕಾ ದಿಲ್ಲಿ ಆನಿ ’20ವ್ಯಾ ಶೆಕಡ್ಯಾಚ್ಯೊ ಕೊಂಕಣಿ ಮಟ್ವ್ಯೊ ಕಾಣಿಯೊ’ ಮ್ಹಳ್ಳೊ ಬೂಕ್ ಕನ್ನಡ ಲಿಪಿಯೆಂತಲ್ಯಾನ್ ಪರ್ಗಟ್ ಜಾಲೊ. ಹ್ಯಾ ಬುಕಾಂತ್ ಗೊಂಯ್, ಕೇರಳ, ಮಹಾರಾಶ್ಟ್ರ ತಶೆಂಚ್ ಕರ್ನಾಟಕಾಂತಲ್ಯೊ 125 ಮಟ್ವ್ಯೊ ಕಾಣಿಯೊ ಆಸಾತ್.
2018 ಇಸ್ವೆಂತ್ ಗೊಂಯ್ಚ್ಯಾ ಯುನಿವರ್ಸಿಟಿಚ್ಯಾ ಕೊಂಕಣಿ ವಿಭಾಗಾಚೊ ಮುಖೇಸ್ತ್ ಬಾಬ್ ಪ್ರಕಾಶ್ ಪೆರ್ಯಂಕರ್ ಹಾಂಚೆಸವೆಂ ಎಕಾ ರಾಶ್ಟ್ರೀಯ್ ಮಟ್ಟಾಚ್ಯಾ ಮಟ್ವ್ಯಾ ಕಾಣಿಯಾಂಚ್ಯಾ ಬುಕಾಚೆಂ ಚಿಂತಪ್ ಸುರು ಜಾಲೆಂ, ಆನಿ ಚ್ಯಾರ್ ರಾಜ್ಯಾಂತಲ್ಯಾ ಕಾಂಯ್ ೩೦ ವಯ್ರ್ ಮಟ್ವ್ಯಾ ಕಾಣಿಯೆಗಾರಾಂಕ್ ಸಂಪರ್ಕ್ ಕೆಲೊ. ಪುಣ್ ತಾಂಚ್ಯೊ ಕಾಣಿಯೊ ಸಂಗ್ರಹ್ ಕರ್ಚೆಂ ಕಾಮ್ ತಿತ್ಲೆಂ ಸಲೀಸ್ ನಾತ್ಲೆಂ. ಪುಣ್ ಬೇತಾಳಾಚ್ಯಾ ಪಾಟಿಕ್ ಪಡ್ಲ್ಲ್ಯಾ ವಿಕ್ರಮಾದಿತ್ಯಪರಿಂ ಹಾಂವೆಂಯ್ ಹ್ಯಾ ಕಾಣಿಯೆಗಾರಾಂಚ್ಯಾ ಪಾಟಿಕ್ ಪಡುಂಕ್ ಪಡ್ಲೆಂ. ಹ್ಯೇ ಪಾಸತ್ ದೋನ್ ಪಾವ್ಟಿಂ ಮ್ಹಾಕಾ ಖುದ್ ಮುಂಬಯ್ ಥಾವ್ನ್ ಗೊಂಯಾಂ ಡ್ರಾಯ್ವ್ ಕರ್ನ್ ಯೆವ್ಪಾಕ್ ಪಡ್ಲೆಂ ಪುಣ್ ಹ್ಯಾ ಮಿನತೆಚೊ ಫಳ್ ಜಾವ್ನ್ ’ಸುರಯೊ ಉದೆತಾ’ ಮ್ಹಳ್ಳ್ಯಾ ದೋನ್ ಲಿಪಿಯೆಂತಲ್ಯಾ ಬುಕಾಕ್ ಲಾಗುನ್ 27 ಕಾಣಿಯೊ ಜಮೊ ಕೆಲ್ಯೊ. ಗೊಂಯ್ ಕೊಂಕಣಿ ಅಕಾಡೆಮಿಚ್ಯಾ ’ಅನನ್ಯ’ ಪತ್ರಾಚಿ ಸಂಪಾದಕಿ ಬಾಯ್ ದೊ|ಜಯಂತಿ ನಾಯ್ಕ್ ಹಿಚೊ ಪಾಟಿಂಬೊ ಸಯ್ತ್ ಮೆಳ್ಳೊ ದೆಕುನ್ ಹೊ ಬೂಕ್ ತಯಾರ್ ಕರುಂಕ್ ಮ್ಹಜ್ಯಾನ್ ಜಾಲೆಂ.
ದೋನ್ ಲಿಪಿಂತಲ್ಯಾ ಹ್ಯಾ ಬುಕಾಕ್ ಪರ್ಗಟುಂಚೆಂ ಕಾಮ್ ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿನ್ ೨೦೧೯ ಇಸ್ವೆಂತ್ ಕೆಲೆಂ. ಪುಣ್ ಹೊ ಬೂಕ್ ರಾಜ್ಯ್/ಪ್ರಾಂತ್ಯಾಚ್ಯೊ, ಬೊಲಿ/ಲಿಪಿಚ್ಯೊ ಗಡಿ ಉತ್ರೊನ್ ವೆಚಿ ಗರ್ಜ್ ಆಸಾ ದೆಕುನ್ ಡಿಜಿಟಲ್ ಕರ್ಚಿ ಯೆವ್ಜಣ್ ಘಾಲಿ ಆನಿ ಹೆಂ ಕಾಮ್ ಪೊಂತಾಕ್ ಪಾವಂವ್ಕ್ ಗೊಂಯ್ಚೆ ತಶೆಂಚ್ ಮಂಗ್ಳುರ್ಚೆ ಮಾತ್ರ್ ನ್ಹಯ್ ವಿದೇಶಾಂತ್ಲೆ ಕೊಂಕಣಿ ಮೊಗಿಂನಿ ಪಾಟಿಂಬೊ ದಿಲೊ ಆನಿ ಎಕೇಕ್ ಕಾಣಿ ಭೋವ್ ಬರೆ ರಿತಿನ್ ಸಾದರ್ ಕರುನ್ ಮ್ಹಾಕಾ ಧಾಡ್ಲಿ. ಹ್ಯಾ ಬುಕಾಂತ್ಲ್ಯೊ 27 ಕಾಣಿಯೊ ವೆವೆಗಳ್ಯೊ; ಕಥಾವಸ್ತುಂತ್, ಭಾಂದಾವಳೆಂತ್, ತಾಂತ್ರಿಕತೆಂತ್ ತಶೆಂಚ್ ವ್ಹಾಪಾರ್ ಜಾಲ್ಲ್ಯಾ ಭಾಸೆಂತ್ ಸಯ್ತ್ ವಿವಿಧತಾ ಆಸಾ ಆನಿ ಖೂಪ್ ಆಯ್ಕೊವ್ಪ್ಯಾಂಕ್ ಹ್ಯೊ ಕಥಾ ಆವಡ್ತಾತ್ ಮ್ಹಳ್ಳೆಂ ತಾಣಿಂ ಆಮ್ಕಾಂ ಧಾಡಚ್ಯಾ ಸಂಧೇಶಾಂನಿ ಕಳುನ್ ಯೆತಾ. ’ಸುರಯೊ ಉದೆತಾ’ ಏಕ್ ಸುರವಾತ್ ಮಾತ್ರ್. ಕೊಂಕಣಿಂತ್ ಅನಿಕ್ಯೀ ಸಭಾರ್ ಉತ್ತೀಮ್ ಕಾಣಿಯೆಕಾರ್ ಆಸಾತ್, ದುಸರ್ಯಾ ಬುಕಾಂತ್ ತಾಂಚ್ಯೊಯ್ ಕಥಾ ಫುಡಿಲ್ಯಾ ದಿಸಾಂನಿ ತುಮಕಾಂ ವಾಚುಂಕ್/ಆಯ್ಕುಂಕ್ ಮೆಳತಲ್ಯೊ.
