ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಆದಿಂ ಕಾಜಾರಾಂ ಮ್ಹಳ್ಯಾರ್ ಜನ್ಮಾಚೊ ಭಾಂಧ್. ಬರೆಂ ಯಾ ಪಾಡ್ ತೆಂ ಸಾಸ್ಣಿಕ್ ಸಂಬಂಧ್. ಆತಾಂ ತಸೆಂ ನ್ಹಂಯ್ ಸೊಮಿಯಾಂ. ಕಾಜಾರ್ ಜಾಂವ್ನ್ - ಭಾರಿ ಗಮ್ಮತಾಯೆಚೆಂ ಕಾಜಾರ್ ಜಾವ್ನ್, ವ್ಹಕಾಲ್ ನೊವ್ರೊ ಕಾಜು ಆನಿ ಭಿ ಲಾಗ್ಲೆಲ್ಯಾಬರಿ ಕಾಜಾರಾ ಆಧಿಂ ಯಾ ಕಾಜಾರಾ ದಿಸಾ ಉಪ್ರಾಂತ್ - ಲೊಕಾಕ್ "ಹೆಂ ಜಾಲ್ಯಾರ್ ಜೊಡೆಂ" ಮ್ಹಳ್ಳೆಂ ಉತಾರ್ ಸಾಂಗ್ಲೆಲ್ಯಾಂಕ್ ಉಪ್ರಾಂತ್ ಕಳಿತ್ ಜಾಲೆಂ. ಕಾಜಾರಾಂ ಉಪ್ರಾಂತ್ ವ್ಹಕಾಲ್ ಆನಿ ನೊವ್ರೊ ವಿಂಗಡ್ ಜಾಲ್ಯಾಂತ್. ಕಾರಣ್? ತೊ ಮ್ಹಾಕಾ ಸಾಂಗ್ಲೊಲೊ ನ್ಹಂಯ್!

Placeholder: the original page gave this picture no description, and none has been written yet. It came from daaiz\daaiz\column\sv\sv14.asp.

ಸತಾಂತ್ಲಿಂ ವಿಚಿತ್ರಾಂ - 14. ಕಾಜಾರ್

ಜೆಮ್ಮಾ ಪಡೀಲ್

ದೆವಾ ತುವೆಂ ತುಕಾ ಬರೆಂ ದಿಸ್ಲೆಂ ದೆಕುನ್ ಹೊ ಸಂಸಾರ್ ಘಡ್ಲೊಯ್. ಹ್ಯಾ ಆದಿಂ ತುಕಾ ಕಿತೆಂಯ್ ವಾವ್ರ್ ನಾತ್‌ಲ್ಲೊ ಜಾವ್ಯೆತ್. ದೆಕುನ್, ತುವೆಂ ಸರ್ವ್ ಬರೆಂ ಚಿಂತುನ್ ಹೊ ಸಂಸಾರ್ ರಚುನ್ ಮ್ಹಾಕಾ, ತಾಕಾ ಆನಿ ಹೆರಾಂಕ್ ತುಜ್ಯಾ ಸಂಸರಾಂತ್ ಯೇಂವ್ಕ್ ಸಾಧ್ಯ್ ಜಾಲೆಂ.

ತುವೆಂ ರಚ್‌ಲ್ಲ್ಯಾ ’ತ್ಯಾ’ ಸಂಸಾರಾಂತ್ ತುವೆಂ ರಚಿತ್ ಕೆಲೆಂಯ್ - ತುವೆಂ ಉದಾಕ್ ದಿಲೆಂಯ್. ಉದ್ಕಾ ಭಿತರ್ ಮಾಸ್ಳ್ಯೊ ಆನಿ ಮಾಸೊ ತಯಾರ್ ಕೆಲೆಂಯ್. ತುವೆಂ ಝಡಾಂಕ್ ಜೀವ್ ದಿಲೊಯ್. ತ್ಯಾ ಝಡಾಂನಿ ಫುಲಾಂ ಆನಿ ಫಳಾಂ ದಿಲಿಂ. ತುವೆಂ ರುಕ್ ದಿಲೆಯ್. ತೆ ರುಕ್ ವಾಡೊನ್ ವಿಸ್ತಾರೊನ್ ರಾನ್ ಜಾಲೆ. ತ್ಯಾ ರಾನಾಂತ್ ವಾಗ್, ಸಿಂಹ್ ಆನಿ ಇತರ್ ರಾನ್ವಟಿ ತ್ಯಾ ರಾನಾಂತ್ ರಾಜ್ ಕರುಂಕ್ ಪಾವ್ಲೆಂ. ತುವೆಂ ರಚಿತ್ ಕೆಲ್ಲ್ಯಾ ಸೌರ್‍ಯವ್ಯೂಹಾಂತ್ ಸುರ್ಯೊ, ಚಂದ್ರ್ ಆನಿ ಹೆರ್ ಸಭಾರ್ ನೆಕೆತ್ರಾಂ ಉದೆಲಿಂ. ತಸಲ್ಯಾ ಪರಿಸರಾಂತ್ ವೋತ್ ಉದೆಲೆಂ. ಪಾವ್ಸ್ ಆಯ್ಲೊ. ಕೀರ್ ಉಲಯ್ಲೊ. ಕೊಗುಳ್ ಗಾಂವ್ಕ್ ಲಾಗ್ಲೊ. ತುವೆಂ ಎಕಾ ಉತ್ರಾನ್ ಸೊಭಿತ್ ಸಂಸಾರ್ ರಚ್ಲೊಯ್.

ತುವೆಂ ರಚ್ಲೆಲ್ಯಾ ಸೊಭಿತ್ ಸಂಸರಾಂತ್ ರಾಜ್ ಕರುಂಕ್ ಆದಾಂವ್ಕ್ ರಚ್ಲೆಂಯ್. ತಾಕಾ ಎಕ್ಸುರಿ ಜಿಣಿ ಕಷ್ಟ್ ಜಾಲೆ. ರಾತಿಂ ನೀದ್ ಪಡ್ಲಿನಾ. ಪೊಟಾಕ್ ಜೆವಾಣ್ ರುಚ್ಲೆಂನಾ. ಮೊನ್ಯಾ ಮ್ಹನ್ಜಾತಿಲಾಗಿಂ ಸಹವಾಸ್ ಬರೊ ಜಾಲೊನಾ. ತಾಕಾ ಕರ್ಕರ್ ಜಾಲೆ. ದೆಕುನ್ ತಾಣೆಂ ತುಕಾ ಏಕ್ ಅಸ್ಕತ್ಕಾಯ್ ಆಸಾ - ತುಜ್ಯೆಲಾಗಿಂ ಕಂಡಾಪಟ್ಟೆ ಮಾಗ್ಲ್ಯಾರ್, ಮಾಗೊನ್ ಮಾಗೊನ್ ತುಕಾ ಕರ್ಕರೆ ಜಾತಾನಾ ತಾಣಿಂ ಮಾಗ್ಲೆಲೆಂ ದಿತಾಂಯ್ - ಗರ್ಜೆ ಭಿತರ್, ಗರ್ಜೆ ಭಾಯ್ರ್ - ಸರ್ವ್!

ಆದಾಂವ್ಕ್ ತುವೆಂ ಏವ್ ದಿಲಿ. ತಿಂ ಏಕ್ ಕುಟಾಮ್ ಜಾಲೆಂ. ತುವೆಂ ತಾಂಕಾಂ ಎಕಾಮೆಕಾಕ್ ಒಪ್ಸಿತಾನಾ, ತಾಂಕಾಂ ತಾಂಚೊ ಸಾಂಗಾತ್ ಉಭೊ ಕರ್ತಾನಾ ತಾಂಕಾಂ ಏಕ್ ಕೆಲೊಯ್, ಹಾಕಾ ಆಮಿ ಕಾಜಾರ್ ಮ್ಹಣ್ತಾಂವ್. ತುವೆಂ ತೆದ್ನಾಂ ಕಿತೆಂ ನಾಂವ್ ದಿಲ್ಲೆಂಯ್ ತೆಂ ಕಳಿತ್ ನಾ!

ಕಾಜಾರ್.. ದೋನ್ ಮನ್ಶ್ಯಾಂ - ದಾದ್ಲೊ ಆನಿ ಬಾಯ್ಲ್ ಏಕ್ ಕುಟಾಮ್ ಜಾತಾತ್. ವಿವಿಧ್ ಆಂಗಾಂಚಿಂ ತಾಂಚೊ ಮುಖ್ಯ ಎಕ್ವಟಾಚೊ ಬಾಂಧ್ - ಮೊಗಾಚೊ ಸಾಕ್ರಿಫಿಸಾಚೊ. ಆಜ್‌ಕಾಲ್ ಸಲಿಂಗಾಚೆಂ ಏಕ್ ಕುಟಾಮ್ ಜಾಂವ್ಕ್ ಸುರು ಜಾಲಾಂ - ತಾಂಕಾಂ ಕಾಜಾರ್ ಆಸಾ!

ತುವೆಂ ಆದಾಂವ್ ಎವೆಕ್ ರಚಿತ್ ಕೆಲ್ಲ್ಯಾ ಕಾಜಾರ್ ಆನಿ ಆತಾಂಚೆಂ ಕಾಜಾರ್ ಚಿಂತೂನ್ ತುಂ ಕಾಂಯ್ ತುಜೆ ದೊನೀ ಹಾತ್ ತಕ್ಲೆರ್ ದವರ್ತಾಯ್ ಮ್ಹಳ್ಳೊ ದುಭಾವ್ ಮ್ಹಾಕಾ!

ಆದಿಂ ಕಾಜಾರಾಂ ಮ್ಹಳ್ಯಾರ್ ಜನ್ಮಾಚೊ ಭಾಂಧ್. ಬರೆಂ ಯಾ ಪಾಡ್ ತೆಂ ಸಾಸ್ಣಿಕ್ ಸಂಬಂಧ್. ಆತಾಂ ತಸೆಂ ನ್ಹಂಯ್ ಸೊಮಿಯಾಂ. ಕಾಜಾರ್ ಜಾಂವ್ನ್ - ಭಾರಿ ಗಮ್ಮತಾಯೆಚೆಂ ಕಾಜಾರ್ ಜಾವ್ನ್, ವ್ಹಕಾಲ್ ನೊವ್ರೊ ಕಾಜು ಆನಿ ಭಿ ಲಾಗ್ಲೆಲ್ಯಾಬರಿ ಕಾಜಾರಾ ಆಧಿಂ ಯಾ ಕಾಜಾರಾ ದಿಸಾ ಉಪ್ರಾಂತ್ - ಲೊಕಾಕ್ "ಹೆಂ ಜಾಲ್ಯಾರ್ ಜೊಡೆಂ" ಮ್ಹಳ್ಳೆಂ ಉತಾರ್ ಸಾಂಗ್ಲೆಲ್ಯಾಂಕ್ ಉಪ್ರಾಂತ್ ಕಳಿತ್ ಜಾಲೆಂ. ಕಾಜಾರಾಂ ಉಪ್ರಾಂತ್ ವ್ಹಕಾಲ್ ಆನಿ ನೊವ್ರೊ ವಿಂಗಡ್ ಜಾಲ್ಯಾಂತ್. ಕಾರಣ್?

* ತೊ ಮ್ಹಾಕಾ ಸಾಂಗ್ಲೊಲೊ ನ್ಹಂಯ್!

* ತೆಂ ಮ್ಹಾಕಾ ತಶೆಂ ಮ್ಹಣ್ ಕಳಿತ್ ನಾತ್ಲೆಲೆಂ.

* ತಾಣೆಂ ವ್ಹಡ್ಲೆಂ ವ್ಹಡ್ಲೆಂ ಸಾಂಗ್ಲೆಲೆಂ ಪುರಾ ಫಟಿ!

* ತಾಕಾ ಕಾಜಾರಾಚೆಂ ನೀತ್ ನೇಮಾಂ ಕಳಿತ್ ನಾಂತ್ ಯಾ ಇತರ್...

ಸೊಮಿಯಾಂ ಹೆಂ ಪುರಾ ತುಕಾ ಪಳೆತಾನಾ ಕಶೆಂ ಲಾಗ್ತಾ? ವ್ಹಡ್ಲೆಂ ವ್ಹಡ್ಲೆಂ ಧಾಟ್ ಪುಸ್ತಕ್ ವಾಚುನ್ ಕಾಜಾರ್ ಜೀವನಾವಯ್ರ್ ಲಾಂಬ್ ದೀಗ್ ಭಾಶಣಾಂ, ಶಿಕವ್ಣ್ ದಿಲ್ಲೆ ಆನಿ ದಿಂವ್ಚ್ಯಾ ತುಜ್ಯಾ ಮಣಿಯಾರ್‍ಯಾಂಕ್ ’ಕಾಜಾರ್’ ಮ್ಹಳ್ಯಾರ್ ಕಿತೆಂ ತೆಂ ಕಳಿತ್ ಆಸಾ? ಪುಸ್ತಕ್ ವಾಚುನ್ ಆಮಿಂ ಹೆರಾಂಕ್ ಬೂದ್ ಬಾಳ್ ಸಾಂಗ್ಚೆಂ ಕಿತ್ಲೆಂ ಖರೆಂ ಯಾ ಬರೆಂ? ಖರ್‍ಯಾ ಜೀವನಾಕ್ ಆನಿ ಪುಸ್ತಕಾಂತ್ ಲಿಖ್ಲೆಲೆಂ ವಾಚುನ್ ಜಿರವ್ನ್ ಬೂದ್ ಸಾಂಗ್ಚ್ಯಾಂತ್ ಕಾಂಯ್ ಉಪ್ಕಾರಾಕ್ ಪಡಾತ್?.

ಆಜ್‌ಕಾಲ್ ಖಂಯ್ ಗೆಲ್ಯಾರ್ ಕಾಜಾರ್ ವಿಚ್ಚೇದನಾಚಿ ಖಬಾರ್. ಹೆಂ ತಕ್ಲೆಕ್ ವಚೊನ್ ಆಜ್‌ಕಾಲ್ ಕಾಜಾರ್ ಜಾಂವ್ಕ್ ತೀನ್ ಮಯ್ನ್ಯಾಚಿ ’ಲಾಂಭ್ ಆವ್ದಿ’ ದಿಲ್ಯಾ. ಖರಾರಾ ಉಪ್ರಾಂತ್ ಎಕಾಮೆಕಾ ಸಮ್ಜೊಂಕ್; ಎಕಾಮೆಕಾಚಿ ವಳೊಕ್ ಜಾಂವ್ಕ್. ಎಕಾಮೆಕಾಚಿ ಚುಕಿ ವಳ್ಕೊನ್ ತಾಚಿ ವಾಟ್ ನಿತಳ್ ಕರುಂಕ್. ಹೆಂ ಕಿತೆಂ ಸೊಮಿಯಾಂ? ತೀನ್ ಮಯ್ನ್ಯಾಂನಿ ನ್ಹಂಯ್ ತೀನ್ ವರ್ಸಾಂಚಿ ಆವ್ದಿ ದಿಲ್ಯಾರೀ ಕಾಜಾರಾಂ ಪಯ್ಲೆಂ - ವ್ಹಕಾಲ್ ಆನಿ ನೊವ್ರೊ ಕಿತೆಂ ಕರ್ತಾತ್? ತಾಂಕಾಂ ಸರ್ವ್ ಬರೆಂ ದಿಸ್ತಾ - ಹಾಸ್‌ಲ್ಲೆಂ, ಉಲಯಿಲ್ಲೆಂ, ಪುರ್ಪುರ್ಲೆಂ ಯಾ ರಾಗಾರ್ ಜಾಲ್ಲೆಂ. ಸರ್ವ್, ನೀಜ್ ರೂಪ್ ಆನಿ ನೀಜ್ ಸಂಸಾರ್ ಕಳಿತ್ ಜಾತಾ ಸಾಂಗಾತಾ ರಾವ್ತಾನಾ! ತುಜ್ಯಾ ಮಣಿಯಾರ್‍ಯಾಂಕ್ ಹೆಂ ಕಿತೆಂ ಸಮ್ಜನಾ? ತೀನ್ ಮಯ್ನ್ಯಾಂಚಿ ಆವ್ದಿ ತಯಾರ್ ಕೆಲ್ಯಾ ನಂತರ್ ಕಾಜಾರಾಂ ವಿಚ್ಚೇದನ್ ಜಾಂವ್ಕ್ ನಾಂತ್?

ಆಮಿಂ ನೀಜ್ ಸಂಸಾರಾಕ್ ಕೆದಾಳಾ ಯೆಂವ್ಚೆಂ? ಪುಸ್ತಕಾಚೆಂ ಲಿಸಾಂವ್ ಕಾಜಾರಾ ಜೀವನಾಂತ್ ಕಿತ್ಯಾಕ್ ಲಾಗು ಜಾಯ್ನಾಂ?

ಕಾಜಾರಿ ಜೊಡಿಂ ಸಾಂಗಾತಾ ರಾವ್ತಾನಾ ಎಕಾಮೆಕಾಕ್ ಭೋವ್ ಲಾಗ್ಶಿಲ್ಯಾನ್ ದೆಕ್ತಾನಾ ಸರ್ವ್ ದಿಸ್ತಾ - ಧವೆಂ, ಕಾಳೆಂ, ಪಾಡ್, ಬರೆಂ, ಮೆಳೆಂ ಆನಿ ನಿತಳ್ ಮನ್. ತರ್ ಕಿತ್ಯಾಕ್ ಹೊ ತಮಾಸೊ? ಕಾಜಾರ್ ಜಾಂವ್ಕ್ ನಾತ್ಲೆಲ್ಯಾಂನಿ ಕಾಜಾರಾವಿಶಿಂ ಕಿತೆಂ ಸಾಂಗ್ಯೆತ್?

ಹಾತಾಕ್ ಉಜೊ ಲಾಗ್ಲೆಲ್ಯಾನ್ ಉಜ್ಯಾಚಿ ಧಾವೆವಿಶಿಂ ಸಾಂಗ್ಯೆತ್. ಉಜೊ ಪಯ್ಶಿಲ್ಯಾನ್ ಪಳಯಿಲ್ಲ್ಯಾಂನಿ ನ್ಹಂಯ್!. ಹೆಂ ಸತ್ ನ್ಹಂಯ್‌ಗೀ ಸೊಮಿಯಾಂ?

ತುವೆಂ ಆದಾಂವ್ - ಎವೆಕ್ ರಚ್ತಾನಾ ಕಸಲಿ ಜಾತ್ ತಾಂಕಾಂ ದಿಲ್ಲಿಯ್ ಮ್ಹಳ್ಳ್ಯಾ ಸವಾಲಾಕ್ ಯೆದೊಳ್ ಪರ್ಯಾಂತ್ ಮ್ಹಾಕಾ ಜವಾಬ್ ದೀಂವ್ಕ್ ನಾಂಯ್. ಆತಾಂ ಪಳೆ - ತುವೆಂ ರಚ್ಲೆಲ್ಯಾ ಹ್ಯಾ ಸಂಸಾರಾಂತ್ ಸಭಾರ್ ಜಾತಿ.

ಅಂತರ್ ಜಾತಿಚೆಂ ಕಾಜಾರ್ ಆಜ್‌ಕಾಲ್ ನವಾಲ್ ನ್ಹಂಯ್. ದಾದ್ಲೊ ಆನಿ ಸ್ತ್ರೀ ಜಾಲ್ಯಾರ್ ಜಾಲೆಂ. ತುವೆಂ ದಿಲ್ಲ್ಯಾ ಮತಿಚ್ಯಾ ವಿಕಾಸಾನ್ ತುಜ್ಯಾ ಮನ್ಶ್ಯಾಂನಿ ತಾಂಚಿಂ ವಿಂಚವ್ಣ್ ಕೆಲ್ಯಾ.

"ಮೊಗಾಕ್ ಜಾತ್ ನಾ. ಆಮಿ ಎಕಾಮೆಕಾ ಮೋಗ್ ಕರ್ತಾಂವ್"

"ಆಮಿಂ ಮೊರೊಂಕ್ ತಯಾರ್ ಆಸಾಂವ್!"

"ಜಾತ್ ಆಮ್ಕಾಂ ವಿಂಗಡ್ ಕರುಂಕ್ ಸಕ್ಚಿನಾ!"

ತಿಂ ಕಾಜಾರ್ ಜಾತಾತ್. ತಾಂಕಾಂ ಭುರ್ಗಿಂ ಜಾತಾತ್. ತಾಂಚಿಂ ಭುರ್ಗಿಂ Cocktail ಪರಿಂ. ದೊನಿಂಯೀ ಪಾಡ್ತಿಚಿಂ ನಾಂವ್ ಏಕ್; ಚಾಲ್ ಏಕ್; ಸಂಸ್ಕೃತಿ ಅನ್ಯೇಕ್! ಮುಕಾರ್ ತ್ಯಾ ಭುರ್ಗ್ಯಾಂಚಿ ಗತ್ ಕಸಲಿ?

ತಾಂಕಾಂ ಕಾಜಾರ್ ಜಾಂವ್ಚಿ ಪ್ರಾಯ್ ಯೆತಾನಾ ಯೆತಾ ಸವಾಲ್ -

ತೊ "ಖಂಯ್ಚೊ?"

ತೆಂ "ಖಂಯ್ಚೆಂ?"

ಹ್ಯಾ Cocktail ಭುರ್ಗ್ಯಾಂಕ್ ದೆವಾ ತುವೆಂ Cocktail ಭುರ್ಗೆಂ ಉಭೆಂ ಕರಿನಾ ತರ್.. ಮುಕಾರ್ ಕಿತೆಂ ಜಾತೆಲೆಂ? ಚಿಂತುಂಕ್ ಜಾಯ್ನಾ ಮ್ಹಾಕಾ. ತುಂವೆಂ ಅಶೆಂ ಜಾತಾ ಮ್ಹಣ್ ಚಿಂತ್‌ಲ್ಲೆಂಯ್? ತುವೆಂ ಎಕಾ ತೆಂಪಾರ್ ಘಡ್ಲಲೆಂ ಕುಟಾಮ್ ಆನಿ ತೆಂ ಕಾಜಾರ್ ಕಸಲ್ಯಾ ಅಂತರಾರ್ ಆನಿ ವಿವಿಧ್ ಹಂತಾಕ್ ಪಾವ್ಲಾಂ?

ಮುಕಾರ್ ಕಸೆಂ ಜಾಯ್ತ್ ಸೊಮಿಯಾಂ? ತುವೆಂ ವ್ಹಗೊಚ್ಚ್ ಬಸ್ಲ್ಯಾರ್ ಹಾಂಗಾ ಕಾಜಾರ್‌ಚ್ಚ್ ಆಸ್ಚೆಂ ನಾ. ಸಕ್ಕಡೀ Live in Companion ಕ್ ಸೆರ್ವಲ್ಯಾರ್ ಹಾಂಗಾ ತುಜ್ಯಾ ಲೊಕಾಚ್ಯಾ ಮಣಿಯಾರ್‍ಯಾಂಚಿ ಗಜಾಲ್ ಕಿತೆಂ ಜಾಯ್ತ್? ತುಕಾ ಹಜಾರ್ ರಾಟಾವಳಿ ಆಸಾತ್. ತೆಂ ತಿಕ್ಕೆ ಕುಶಿನ್ ದವರ್ ಆನಿ ’ಹ್ಯಾ’ ಕಾಜಾರಾ ವಿಶ್ಯಾಂತ್ ಬರೆಂಪಣ್ ಕರುಂಕ್ ಪಳೆ.

ತುಂ ಸರ್ವ್ ಜಾಣಾರ್. ತುಕಾ ಹೆಂ ಮುಂಗಡ್ ತಿಳ್ಸಿಲ್ಲ್ಯಾಕ್ ಮ್ಹಜೆರ್ ರಾಗ್ ಕರಿನಾಕಾ - ತುಜೆ ಮಣಿಯಾರಿ ಕರ್ಚ್ಯಾಪರಿಂ.

ಆಧ್ಲೆ ಆಂಕ್ಡೆ: ಸಂವಾದ್, 1, 2, 3, 4, 5, 6, 7, 8, 9, 10, 11, 12, 13

ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications