ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
[2006 ಇಸ್ವೆಚಾ ಸಪ್ತೆಂಬರ್ 23 ತಾರಿಕೆರ್ ಅಪ್ಲೊ 41ವೊ ಜಲ್ಮಾದಿವಸ್ ಆಚರಣ್ ಕರ್ಚಾ ಆಂಡ್ರು ತುಕಾ ಹೆಂ ಅಂಕಣ್ ಅರ್ಪಣ್]
ಸತಾಂ ಆನಿ ಖತಾಂ - 9. ಪೆಟೊ ಆನಿ ಶಿಸ್ತ್
ಹೆಂ ಅಂಕಣ್ ’ರಾಕ್ಣೊ’ ಚೆರ್ ತಶೆಂಚ್ ಆಶಾವಾದಿ ಪ್ರಕಾಶನಾಚಾ ಬುಕಾರುಪಾರ್ ಪರ್ಗಟ್ ಜಾಲಾಂ.
ಏಕ್ ಪಾವ್ಟಿಂ ಎಕ್ಲ್ಯಾಚ್ಯಾ ಮತಿಂತ್ ಏಕ್ ನವೆಂಚ್ಚ್ ಚಿಂತಾಪ್ ಆಯ್ಲೆಂ. ಮನಿಸ್ ಕಸೊಯ್ ಶಿಕ್ತಾ ಪುಣ್ ಕಶೆಂ ಪುಣೀಂ ಕರ್ನ್ ಎಕಾ ಮನ್ಜಾತಿಕ್ ವಿಧ್ಯಾ/ಶಿಸ್ತ್ ಶಿಕಯ್ಜಾಯ್ ಮ್ಹಣ್ ಚಿಂತುನ್, ತೇಂಯ್ ಎಕಾ ಪೆಟ್ಯಾಕ್ ಶಿಸ್ತ್ ಮ್ಹಳ್ಳಿ ಶಿಕಂವ್ಕ್ ಕಠೀಣ್ ಮನ್ ಜಾಲೆಂ. ಆನಿಂ ಹೆಂ ಚಿಂತಾಪ್ ತಾಣೆ ಕಾರ್ಯಗತ್ ಕರುಂಕ್ ಪೆಂಟೆಕ್ ವಚೊನ್ ಏಕ್ ಸೊಭಿತ್ ಸುಣ್ಯಾಚೆಂ ಪೀಲ್ ಹಾಡ್ಲೆಂ. ಆನಿಂ ಪಯ್ಲ್ಯಾ ದಿಸಾ ಥಾವ್ನ್೦ಚ್ ತ್ಯಾ ಪಿಲಾಕ್ ಶಿಸ್ತ್, ಸಂಸ್ಕಾರ್ ಶಿಕಂವ್ಕ್ ಸುರು ಕೆಲೆಂ.
ಸುಮಾರ್ ದೀಸ್ ತ್ಯಾ ಮಾನೆಸ್ತಾನ್ ಖರ್ಚಿಲೆ ಆನಿಂ ಪೆಟ್ಯಾಕ್ ಸರ್ವ್ ಥರಾಂಚಿ ಶಿಸ್ತ್ ಶಿಕಯ್ಲಿ.
ಅಶೆಂಚ್ಚ್ ದೀಸ್ ಪಾಶಾರ್ ಜಾಲೆ ಆನಿಂ ಏಕ್ ದೀಸ್ ಪೆಟ್ಯಾಚಿ ಶಿಸ್ತ್ ಪಾರ್ಕುಂಕ್ ತಾಣೆಂ ಆಪ್ಲ್ಯಾ ಇಶ್ಟಾಂಕ್ ಹಾಡ್ಲೆಂ ಆನಿಂ ಪೆಟ್ಯಾಚಿ ಪರಿಕ್ಶಾ ಸುರು ಜಾಲಿಚ್ಚ್.
’ಕಮ್’ ಮಾನೆಸ್ತಾನ್ ಆಪಯ್ಲೆಂ ಆನಿಂ ಪೆಟೊ ಆಯ್ಲೊ,
’ಸಿಟ್’ ಮಾನೆಸ್ತಾನ್ ಸಾಂಗ್ಲೆಂ ಆನಿಂ ಪೆಟೊ ಬಸ್ಲೊ,
’ಸ್ಟ್ಯಾಂಡ್’ ಮಾನೆಸ್ತಾನ್ ಸಾಂಗ್ಲೆಂ ಆನಿಂ ಪೆಟೊ ಉಭೊ ಜಾಲೊ,
’ಡ್ಯಾನ್ಸ್’ ಮಾನೆಸ್ತಾನ್ ಸಾಂಗ್ಲೆಂ ಆನಿಂ ಪೆಟೊ ನಾಚ್ಲೊ,
ಪೆಟ್ಯಾಚ್ಯಾ ಧನ್ಯಾಚೆ ಈಶ್ಟ್ ಸಗ್ಳೆ ಅಜ್ಯಾಪ್ಲೆ ಆನಿಂ ಪೆಟ್ಯಾಕ್ ಇತ್ಲಿ ಆಪುರ್ಬಾಯೆನ್ ಶಿಸ್ತ್ ಶಿಕಯಿಲ್ಲ್ಯಾ ಇಶ್ಟಾಕ್ ಹೊಗಳ್ಸುಂಕ್ ಲಾಗ್ಲೆ.
ಇಲ್ಲ್ಯಾ ವೆಳಾರ್ ಥಕ್ಲಲೊ ಪೆಟೊ ಉಟ್ಲೊ ಆನಿಂ ಲಾಗಿಂಚ್ ಆಸ್ಲೆಲ್ಯಾ ವೊಣೊದಿಚೆರ್ ಆಪ್ಲೆ ಪಾಂಯ್ ಉಭಾರ್ನ್ ಸುಸು ಕರಿಲಾಗ್ಲೊ.
ಸಂದೇಶ್: ಮನಿಸ್ ಯಾ ಮನ್ಜಾತ್ ಕಿತ್ಲಿ ಶಿಸ್ತ್/ಸಂಸ್ಕಾರಾಚೊ ಡೋಂಗ್ ಕೆಲ್ಯಾರೀ ಆಪ್ಲ್ಯಾ ಸಂಯ್ಬಾಚಾ ಗುಣಾ ಥಾವುನ್ ಸುಟ್ಕಾ ಘೆಂವ್ಕ್ ಮೊಸ್ತ್ ಕಶ್ಟ್. ತ್ಯಾ ಖಾತಿರ್ ಕಠೀಣ್ ಪರಿಶ್ರಮ್ ಘೆಂವ್ಚಿ ಗರ್ಜ್. ಆಪ್ಲೆ ಥಂಯ್ ಜರ್ ಮನಿಸ್ ಬದ್ಲಾವಣ್ ಆಶೆತಾ ತರ್ ಖಂಡಿತ್ ಜಾವುನ್ ತಾಣೆಂ ಪಯ್ಲೆಂ ಆಪ್ಲ್ಯಾ ಆಂತರಿಕ್ ಬದ್ಲಾವಣಾಕ್ ಚಡ್ ಮಹತ್ವ್ ದೀಜಾಯ್ ಶಿವಾಯ್ ಭಾಯ್ಲ್ಯಾ ದಾಖವ್ಣೆಕ್ ನ್ಹಂಯ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
