ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 50. ಬಾಯ್ಬಲ್
ಸ್ಟೇನ್ರೊ, ಅಜೆಕಾರ್: ವೆವೆಗ್ಳ್ಯಾ ವಿಶ್ಯಾಂಚೆರ್ ಕಾಣ್ಯೊ ಬರಂವ್ಚೊ ಸ್ಟೇನ್ರೊ ಏಕ್ ಕಾದಂಬರಿಕಾರ್ ಸಯ್ತ್. ಲಗ್ಬಗ್ ಶೆಂಭೊರಾಂವಯ್ರ್ ಕಾಣ್ಯೊ ಬರಯಿಲ್ಲ್ಯಾ ಹಾಚ್ಯಾ ಮಟ್ವ್ಯಾ ಕಾಣ್ಯಾಂಚೊ ಬೂಕ್ ’ವಾದಾಳ್’ ಪರ್ಗಟ್ ಜಾಲಾ. ಚಡಾವತ್ ಸಾಮಾಜಿಕ್ ಚಿಂತ್ಪಾಚ್ಯೊ, ಸಾದ್ಯೊ ಕಾಣ್ಯೊ ಬರಂವ್ಚಾ ಹಾಣೆಂ ಥೊಡ್ಯೊ ಪತ್ತೇದಾರಿ ಆನಿ ಮನರಂಜನಾಚ್ಯೊ ಕಾಣ್ಯೊಯ್ ಬರಯ್ಲ್ಯಾತ್.
ಸ್ಟೇನ್ರೊ
ಫಾಲ್ಯಾ ಮೊಂತಿ ಫೆಸ್ತ್. ಸಂಸಾರ್ಭರ್ ದಬಾಜೊ ಚಲ್ತಾಲೊ. ಫೆಸ್ತಾಚೆಂ ಆಚರಣ್ ಕರುಂಕ್ ಹರ್ಎಕಾ ಕ್ರಿಸ್ತಾಂವ್ ಘರಾಂನಿ ತಯಾರಾಯ್ ಚಲ್ತಾಲಿ.
ಪುಣ್!
ರವಿಹಳ್ಳೆಂತ್ಲ್ಯಾ ಕ್ರಿಸ್ತಾಂವ್ ಲೊಕಾಕ್ ತೆಂ ಭಾಗ್ ನಾತ್ಲ್ಲೆಂ.
ಕಾರಾಣ್ ಸಾದೆಂ ನ್ಹಯ್.... ಭಿರಾಂಕುಳ್..... ಫಾಲ್ಯಾಂ ಸಂಸಾರ್ ಜಾಗ್ತಾನಾ ಸಂಸಾರಾಂತ್ಲ್ಯಾ ಕೊನ್ಶ್ಯಾ ಕೊನ್ಶ್ಯಾಂನಿ ಬೊಬಾಟ್ ಉಟ್ತೆಲಿ. ದುಖಿಚೆ ಸುಸ್ಕಾರ್ ಆಯ್ಕೊನ್ ಯೆತೆಲೆ. ಕಾಳ್ಜಾಂ ರಡ್ತೆಲಿಂ ಕಿತ್ಯಾಕ್ ರವಿ ಹಳ್ಳೆಂತ್ಲ್ಯಾ ಚಡುಣೆಂ ಹರ್ಯೆಕಾ ಕ್ರಿಸ್ತಾಂವಾಂಕ್ ಆಯ್ಚಿ ರಾತ್ ಅಖೇರಿಚಿ ಜಾಲ್ಲಿ!
ಕಾಳೊಕ್. ಪುಣ್ ಭುಂಯ್ಚೆರ್ ಭಾರೀಕ್ ಚಾಂದ್ನ್ಯಾಚೊ ಪ್ರಕಾಸ್ ರಾಜ್ವಟ್ತಾಲೊ. ಆನಿ ಹ್ಯಾ ಚಾಂದ್ನ್ಯಾ ಉಜ್ವಾಡಾಂತ್ ಮ್ಹಜೆಂ ಸಾಯ್ಕಲ್ ಡಾಯ್ನಮೊ ಚಾಲು ನಾಸ್ತಾನಾ ಘರ್ಚೆ ದಿಶೆನ್ ವೇಗ್ ಆರಾವ್ನ್ ದಾಂವ್ತಾಲೆಂ. ಸಾಯ್ಕಲಾರ್ ಬಸ್ಲ್ಲೊಂ ಹಾಂವ್ ಧಮ್ ದೀವ್ನ್ ಪೆದಲ್ ಮಾರ್ತಾಲೊಂ. ಘರಾ ವೆಗಿಂಚ್ ಪಾಂವ್ಚೊ ಇರಾದೊ.
ವೊರಾಂ ಫಾಂತ್ಯಾಚಿಂ ಕಾಂಯ್ ಸಾಡೆ ತೀನ್ ವಾ ಚಾರ್. ವಿಚಿತ್ರ್ ನ್ಹಯ್? ವೇಳ್ ನಿಸಾರ್ಲ್ಲ್ಯಾಪರಿಂ ವೊರಾಂಯ್ ಘುಂವ್ತಾತ್. ಪುಣ್ ಹ್ಯೆ ಘಡಿಯೆ ಖಿಣಾಚೊ ವೇಳ್ಯ್ ಮ್ಹಾಕಾ ಮೊಲಾಧೀಕ್. ಕಾರಾಣ್ ಸೊಂಪೆಂನ್ಹಯ್. ಘರಾ ಪಾಂವ್ಚೆ ಫುಡೆಂ ಹಾಮ್ವ್ ಕೊಣಾಯ್ಚೆ ನದ್ರೆಕ್ ಪಡೊಂಕ್ ತಯಾರ್ ನಾತ್ಲ್ಲೊ. ನಾಂವಾ ತೆಕಿದ್ ಹಳ್ಳಿ ಜಾಲ್ಲ್ಯಾನ್ ಹ್ಯಾ ವೆಳಾರ್ ರಸ್ತ್ಯಾಂನಿ ಬಯ್ಲಾಗಾಡಿಯೊ ಧಾಂವ್ಚೊ ಸಂಭವ್ ಆಸ್ಲ್ಲೊ. ಬಯ್ಲಾ ಘಾಡಿಯೊ ಆಸ್ಲ್ಲ್ಯಾ ಮನ್ಶ್ಯಾಂಚೆ ಕಾಮ್ ಫಾಂತ್ಯಾ ಫಾಂತ್ಯಾರ್ ಸುರು ಜಾತಾಲೆಂ. ಕಾಂಯ್ ಹ್ಯಾ ವೆಳಿಂ ಕೊಣೆಂಯ್ ಮ್ಹಜಿ ವ್ಹಳೊಕ್ ದರ್ಲಿ ತರ್ ಆಯ್ಚೆ ರಾತ್ಚೆ ಖಬ್ರೆಕ್ ಫಾಲ್ಯಾಂ ಬರೀಕ್ ದುಬಾವ್ ಮ್ಹಜ್ಯೆರ್ಯ್ ಉಟ್ಚೊ ಸಂಭವ್ ಖಂಡಿತ್ ಆಸ್ಲ್ಲೊ.
ಕಾರಾಂ!
ಮ್ಹಜ್ಯಾ ಆಂಗಾ ಪಾಂಗಾ ವಯ್ಲೆಂ ರಗಾತ್!
ಗರ್ಮೆ ದೀಸ್. ಸಾಯ್ಕಲ್ ಘುಡ್ಡಾಂವ್ಚೆ ಪುರಾಸಣೆನ್ ಕೂಡ್ ಘಾಮ್ ವೊಂಕ್ತಾಲಿ ಆನಿ ತ್ಯಾ ಘಾಮಾಂತ್ ಮನ್ಶಾ ರಗಾತ್ಮ್ಹಾಳೊನ್ ಆಸ್ಲ್ಲೆಂ! ಫಕತ್ತ್ ಮ್ಹಜೆಂ ನ್ಹಯ್. ಕುಡಿರ್ ಥಂಯ್ ಹಾಂಗಾ ಬಾರಿಕಾಯೆನ್ ರಗಾತ್ ಮ್ಹಜೆಂಯ್ ಪಾಜಾರ್ತಾಲೆಂ. ಪುಣ್ ಆಂಗ್ಭರ್ ಹೆರಾಂಚೆಂಚ್ ರಗಾತ್ ಚಡಿತ್ ರಿತಿನ್ ದಾಟೊನ್ ಆಸ್ಲ್ಲೆಂ.
ಹೆರಾಂಚೆಂ ಗಜಾಲ್ ಭೋವ್ ಭಿರಾಂಕುಳ್!
ರವಿ ಹಳ್ಳೆಂತ್ ರಾತ್ಚ್ಯಾ ರಾತಿಂ ಹಲ್ಲೊ ಚಲ್ಲ್ಲೊ. ಜಾಯ್ತ್ಯಾಂಚೆ ಹಾತ್ ಪಾಂಯ್ ಮೊಡುನ್ ಪಡ್ಲ್ಲೆ. ಕಾಂಯ್ ಥೊಡೆ ಕಡೆನ್ ಖುನಿಯೊಂಯ್ ಜಾಲ್ಲ್ಯೊ. ಚಡುಣೆಂ ಪಂಚ್ವೀಸ್-ತೀಸ್ ಜಣಾಂಚ್ಯಾ ಎಕಾ ಪಂಗ್ಡಾ ಥಾವ್ನ್!
ಪರಿಗತ್ ಆಯ್ಚೆ ಸಾಕಾಳಿಂ ವಯ್ರ್ ಪಡ್ತೆಲಿ. ಹಳ್ಳೆಂತ್ಲಿ ಗೂಂಡಾಗಿರಿ ಸಕಾಳಿಂ ಸಂಸಾರ್ಭರ್ ಗಾಜೊಂಕ್ ಲಾಗ್ತೆಲಿ. ಸಂಸಾರ್ ಸಗ್ಳೊ ಥೊಡ್ಯಾ ಖಿಣಾಂಕ್ ತಟಸ್ಥ್ ಉರ್ತಲೊ. ಪ್ರತ್ಯೇಕ್ ಜಾವ್ನ್ ಕ್ರಿಸ್ತಾಂವ್ ಲೋಕ್ ದುಖಿನ್ ಹಾಕ್-ಬೋಬ್ ಮಾರ್ತಲೊ.
ಕ್ರಿಸ್ತಾಂವ್ ಯೇಸುಕ್ ಪಾತ್ಯೆಂವ್ಚಿ ಜಾತ್. ತಾಚೊ ಧರ್ಮ್ ಪಾಳ್ಚೊ ಲೋಕ್.
ವ್ಹಯ್, ಹ್ಯಾಚ್ ಧರ್ಮಾಕ್ ಲಾಗೊನ್ ಆಯ್ಚೆ ರಾತಿಂ ಭಿರಾಂಕುಳ್ ಹಂಗಾಮ್! ಸತ್ ಉಚಾರುಂ ತರ್, ಹ್ಯಾ ಸರ್ವ್ ಕರ್ನ್ಯಾಂಕ್ ಹಾಂವ್ಚ್ ಮುಕೆಲಿ. ಪಂಗಡ್ ಹಾವೆಂಚ್ ಬಾಂದ್ಲ್ಲೊ. ನಿರ್ದಾರ್ ಹಾವೆಂಚ್ ಘೆತ್ಲ್ಲೊ. ಆನಿ ಮ್ಹಜ್ಯಾ ತಸಲ್ಯಾ ಹೆರಾಂಕ್ ಹಾವೆಂಚ್ ಶಿಕ್ಶಿತ್ ಕೆಲ್ಲೆಂ.
ಮ್ಹಜೆ ತಸಲೊ!
ಹಾಂವ್ ಹಿಂದು, ಏಕ್ ಹಿಂದುತ್ವ್ವಾದಿ. ಉಗ್ತೆಂ ಉಲಂವ್ ತರ್, ಹಾಂವ್ ಕ್ರಿಸ್ತಾಂವಾಂಕ್ ಬದ್ದ್ ವಿರೋದ್. ಕಾಂಯ್ ಕ್ರಿಸ್ತಾಂವಾನಿ ಕೋಮುವಾದಿ ಮ್ಹಣ್ಚೆ ತಸಲೊಂ. ಹಾಂ ಕ್ರಿಸ್ತಾಂವ್ ಮ್ಹಣ್ತಾನಾ ಮ್ಹಜೆಂ ಆಂಗ್ ಜಳ್ತಾಲೆಂ. ತಾಂಚಿ ಜಾತ್ಚ್ ಕಾಂಟಾಳ್ತಾಲೊಂ ಹಾಂವ್. ತಾಂಚಾ ಉಪ್ಕಾರಾಕ್ ಮ್ಹಜ್ಯಾ ಕಾಳ್ಜಾ ಮನಿ ಕಾಂಯ್ಚ್ ಮೋಲ್ ನಾತ್ಲ್ಲೆಂ. ತಾಣಿ ಕರ್ಚ್ಯಾ ಬರ್ಯಾ ಕರ್ನ್ಯಾಂ ಥಂಯ್ ಮ್ಹಾಕಾ ಕುಸ್ಕುಟಾಚೊ ಸಂತೊಸ್ ನಾತ್ಲ್ಲೊ. ಎಕಾ ಉತ್ರಾನ್ ತಾಂಚ್ಯಾ ಹರ್ಯೆಕಾ ಬರ್ಯಾಪಣಾ ಥಂಯ್ ಹಾಂವ್ ಜಾಳ್ಚ್ ವೊಂಕ್ತಾಲೊಂ. ಪ್ರತ್ಯೇಕ್ ಜಾವ್ನ್ ’ಪಾದ್ರಿ’ ಮ್ಹಣ್ಚ್ಯಾ ತಾಂಚಾ ಗುರುಂಚೆರ್.
ಎಕಾ ಕಾರಾಣಾನ್!
ತೆ ಹೆರಾಂಕ್ ಆಪ್ಲೆ ಜಾತ್-ಧರ್ಮ್ನಾಕ್ ಕನ್ವಡ್ತರ್ ಕರ್ತಾತ್ ಮ್ಹಳ್ಳೆಮ್ ಚಿಂತಾಪ್ ಮ್ಹಜೆಂ. ಹ್ಯಾಚ್ ಕಾರಾಣಾನ್ ಕಾಂಯ್ ಹಾಂವ್ ಕೋಮುವಾದಿ ವಾ ಧರ್ಮಾಂದ್ಳೊ ಜಾಲ್ಲೊಂ. ಪುಣ್ ಮ್ಹಜೊ ಹೊ ತಿರಸ್ಕಾರ್ ಆನಿಕ್ಯ್ ಗೂಂಡ್ ರಿತಿನ್ ಪಾಳಾಂ ರೊಂಬೊಂಕ್ ಕಾರಾಣ್ ಮ್ಹಜಿ ಆವಯ್!
ಆವಯ್?
ನಾಂವಾನ್ ವನಜಾ. ತಿ ಕ್ರಿಸ್ತಾಂವಾಕ್ ಮಾಂದ್ತಾಲಿ. ತಾಂಚೆಂ ಬರೆಂ ಮನ್ ವಾಖಣ್ತಾಲಿ. ಆತಾಂ ಘರಾಂತ್ಲೆಂ ಭಾಯ್ರ್ ಸರೊಂಕ್ ಜಿವಾಂತ್ ತಿತ್ಲೆಂ ತ್ರಾಣ್ ನಾತ್ಲ್ಯಾರ್ಯ್ ಪಯ್ಲೆಂ ತೆದ್ನಾಂ ತೆದ್ನಾಂ ತಿ ಇಗರ್ಜಾಂಕ್ ಭೆಟ್ ದಿತಾಲಿ. ಹಾಂಗಾಚ್ ಮನ್ ಮ್ಹಜೆಂ ವಿಕಾರ್ಲ್ಲೆಂ. ಕಶೆಂಗೀ ಕೊಣೆಂಗೀ ಕ್ರಿಸ್ತಾಂವ್ ಜಾತಿ ಧರ್ಮಾ ವಿಶಿಂ ಅತ್ವೆಂಚ್ ಚಿಂತಾಪ್ ಮ್ಹಜ್ಯಾ ಮತಿಂತ್ ರಿಗಯಿಲ್ಲೆಂ.
ಕ್ರಿಸ್ತಾಮ್ವ್ ಲೋಕ್ ಆಪ್ಲೊ ಧರ್ಮ್ ವಿಸ್ತಾರಾವ್ನ್ ಭದ್ರ್ ಕರುಂಕ್ ಆಂವ್ಡೆತಾ. ಹೆರ್ ಧರ್ಮಾಚ್ಯಾ ಲೊಕಾಕ್ ಆಪ್ಲ್ಯಾ ಧರ್ಮಾಕ್ ಕನ್ವೆಡ್ತರ್ ಕರುನ್ ಆಪ್ಲೊಚ್ ಧರ್ಮ್ ಹ್ಯಾ ಹಿಂದು ರಾಶ್ಟ್ರಾಂತ್ ಬಾಂದುನ್ ಹಾಡುಂಕ್ ಪೆಚಾಡ್ತಾ.....
ಹಿ ಸಂಗತ್ ಮ್ಹಜ್ಯಾ ಕಾಳ್ಜಾ ಮನಾಂತ್ ಘಟ್ ರೊಂಬ್ಲ್ಲಿ. ಆನಿ ಹ್ಯಾ ಖಾತಿರ್ ಮ್ಹಜೆಂ ರಗರ್ ಕ್ರಿಸ್ತಾಂವ್ ಲೊಕಾಚ್ಯಾ ಹಗ್ಯಾನ್ ಖತ್ಕತ್ತಾಲೆಂ.
ಪುಣ್?
ಮ್ಹಜೆ ಆವಯ್ಕ್ ವಿರೊಧ್ ಕರುಂಕ್ ಸಕ್ಲೊಂ ನಾ.! ತಿಚ್ಯಾ ಮುಕಾರ್ ಕ್ರಿಸ್ತಾಂವಾಂ ವಿರೊಧ್ ಉಲಂವ್ಕ್ ಹಾಮ್ವ್ ಸಕ್ಲ್ಲೊಂಚ್ ನಾ ಕಾರಾಣ್, ತಿಕಾ ದಿಂವ್ಚೊ ಅಪರಿಮಿತ್ ಗವ್ರವ್..... ತಿಕಾ ಹಾಂವ್ ಮಾಂದ್ತಾಲೊಂ. ಮ್ಹಜ್ಯಾ ಜಿವಾವರ್ತೊ ಹಾಂವ್ ತಿಚೊ ಮೋಗ್ ಕರ್ತಾಲೊಂ.
ಎಕಾ ಕಾರಾಣಾನ್.....
ತಿಣೆ ಮ್ಹಾಕಾ ಭಾರಿಚ್ ಕಶ್ಟಾಂನಿ ವಾಗಯ್ಲಾ.
ವ್ಹಯ್, ಮ್ಹಾಕಾ ಶಿಕಾಪ್ ದೀವ್ನ್ ವಾಗಂವ್ಕ್ ತಿಣೆ ಬೋವ್ ಕಶ್ಟ್-ವಾಂವ್ಟ್ ಕಾಡ್ಲ್ಯಾ. ಮ್ಹಾಕಾ ಬರೆಂ ಜಿವಿತ್ ದಿಂವ್ಚ್ಯಾಕ್ ಆಪ್ಲೆಂ ಜಿವಿತ್ಚ್ ಜರಯ್ಲಾಂ ತಿಣೆ. ಕಿತ್ಯಾಕ್, ಮ್ಹಜೆ ನೆಣ್ತೆ ಪ್ರಾಯೆರ್ಚ್ ಮ್ಹಜ್ಯಾ ಬಾಪಾಯ್ಚೆಂ ಅಕಾಲಿಕ್ ಮರಣ್. ತ್ಯಾ ಉಪ್ರಾಂತ್ ಮ್ಹಜೊ ಫುಡಾರ್ ಭದ್ರ್ ಕರುಂಕ್ ತಿಣೆ ಕಾಡ್ಲ್ಲಿ ವಾಂವ್ಟ್ ಮ್ಹಾಕಾ ವರ್ಣುಂಕ್ ಅಸಾದ್ಯ್. ವರ್ತ್ಯಾ ತ್ರಾಸಾನ್ ತರ್ಯ್ ಮ್ಹಾಕಾ ಬರೆಂ ಶಿಕಾಪ್ ದಿಲ್ಲೆಂ ತಿಣೆ. ಹಾಂವ್ಯ್ ಚೀತ್ ದೀವ್ನ್ ಬರೆಮ್ಚ್ ಶಿಕೊನ್ ಇಗರ್ಜೆಚ್ಯಾ ಇಸ್ಕೊಲಾಂತ್ ಕಾಲೇಜ್ ಕರುನ್ ಭಾಯ್ರ್ ಪಡ್ಲ್ಲೊಂ.
ಗಜಾಲ್ ಖರಿಚ್.
ಮ್ಹಜೆ ಆವಯ್ನ್, ಮ್ಹಾಕಾ ಇಗರ್ಜೆಚ್ಯಾ ಇಸ್ಕೊಲಾಕ್ ಭರ್ತಿಕೆಲ್ಲೊ. ಹಾಕಾ ಕಾರಾನ್, ಕ್ರಿಸ್ತಾಂವ್ಚೊ ಪಾದ್ರಿ ಮ್ಹಣೊ ಹೆ ಹಳ್ಳೆ ಇಗರ್ಜೆಚೊ ತಾಂಚೊ ಆದ್ಲೊ ಗುರು. ತಾಣೆ ನಿರ್ಗತಿಕ್ ಜಾಲ್ಲ್ಯಾ ಮ್ಹಜೆ ಆವಯ್ಕ್ ಆದಾರ್ ದಿಲ್ಲೊ. ಧಯ್ರ್ ದೀವ್ನ್ ಸುಗಮಾಯೆಚೆ ಜಿಣಿಯೆಕ್ ಭರ್ವಸೊ ದಿಲ್ಲೊ. ಮ್ಹಾಕಾ ಶಿಕ್ಪಾ-ಪೊಸ್ಪಾಕ್ ಸರ್ವ್ ರಿತಿನ್ ಕುಮ್ಕೆಚೊ ಪಾಟಿಂಬೊ ದಿಲ್ಲೊ. ದೆಕುನ್ ಮ್ಹಜಿ ಆವಯ್ ಕ್ರಿಸ್ತಾಂವಾಂಕ್ ಮಾಂದ್ತಾಲಿ, ವಾಖಣ್ತಾಲಿ, ತಾಂಚ್ಯಾ ಬರ್ಯಾ ಮನಾ ಥಂಯ್ ಭೊಗ್ಣಾಂನಿ ಪಿಗಳ್ತಾಲಿ.
ಆನಿ ಹಾಂವ್?
ಮ್ಹಜ್ಯಾ ಬರ್ಯಾ ಫುಡಾರಾಕ್ ಆಧಾರ್ ದಿಲ್ಲ್ಯಾ ತಸಲ್ಯಾ ಪಾದ್ರಿಂಚೆರ್ಚ್ ವೀಕ್ ವೊಂಕ್ಲೊ. ತಾಂಚ್ಯಾ ಧರ್ಮಾಚ್ಯಾ ಲೊಕಾಂಚೆಂ ನಿರ್ನಾಮ್ ಕರುನ್ ಸಂತೊಸ್ ಪಾವ್ಲೊಂ. ಕಾರಾಣ್ ಎದೊಳ್ ಕಳಯಿಲ್ಲೆಂಚ್, ಆಂದ್ಳೆಂ ಚಿಂತಾಪ್..... ತೆ ಹಿಂದು ಧರ್ಮ್ ನಾಸ್ ಕರುನ್ ಆಪ್ಲೊಚ್ ಧರ್ಮ್ ರುತಾ ಕರ್ತಾತ್ ಮ್ಹಳ್ಳಿ ಮ್ಹಜಿ ಪಾತ್ಯೆಣಿ! ಆನಿ ಹಾಕಾ ಲಾಗೊನ್ ಎಕಾಚ್ ರಾತಿ ಭಿತರ್ ಹ್ಯಾ ರವಿ ಹಳ್ಳೆಂತ್ ಮಾರಾಫಾರ್ ಖುನಿಯೊ!
ಪುಣ್ ! ಹೆಂ ಇತ್ಲೆ ತೀವೃತೆಕ್ ಪಾವೊಂಕ್ ಕಾರಾಣ್ ಮ್ಹಜಿ ಆವಯ್.
ಆವಯ್!
ಸತ್. ತಿಣೆ ಮ್ಹಾಕಾ ಕಾಲ್ಚ್ಯಾ ದಿಸಾ ಹಾಂವ್ ಆಫೀಸಾಕ್ ಭಾಯ್ರ್ ಸರ್ತಾನಾ ಕ್ರಿಸ್ತಾಂವ್ಚೊ ಏಕ್ ಬಾಯ್ಬಲ್ ಘರಾ ಹಾಡುಂಕ್ ಫರ್ಮಾಯಿಲ್ಲೆಂ!
ಬಾಯ್ಬಲ್!
ಮ್ಹಜಿ ಅಡಿಚ್ ಹಾಲ್ಲ್ಲಿ. ಅಂತರ್ಮಳಾಂಚ್ ಉಡ್ಲ್ಲಿಂ.
ಮ್ಹಜ್ಯಾ ಘರಾಂತ್ ಕ್ರಿಸ್ತಾಂವ್ಚೊ ಬಾಯ್ಬಲ್?
ದೊಳೆಚ್ ಭಾಯ್ರ್ ಆಯಿಲ್ಲೆ ಮ್ಹಜೆ. ಖರೆಂಚ್ ಹಾಂವ್ ಆಟಾಪುಂಕ್ ಸಕ್ಲೊಂ ನಾ. ಹರ್ದ್ಯಾ ಘುಡಾಂತ್ ಏಕ್ ಬಳಿಶ್ಟ್ ಪಾಜೆಫಾತೊರ್ ಫುಟ್ಲ್ಲೊ ಆನ್ಬೋಗ್ ಜಾಲ್ಲೊ! ಕಿತ್ಯಾಕ್ ತಿಚ್ಯಾ ಫರ್ಮಾವ್ಣೆ ವಿರೋದ್ ತಿಚೆ ಮುಕಾರ್ ಕಸಲಿಚ್ ಜಾಪ್ ಕಾಡುಂಕ್ ಮ್ಹಜೆ ಜಿಬೆರ್ ಉತ್ರಾಂ ಜಮ್ಲಿಂನಾಂತ್. ಹಾಂವ್ ತಿಕಾ ಜಾಯ್ತಿಂ ಖಿಣಾಂ ದೆಖ್ಚ್ಯಾಕ್ ಪಡ್ಲೊಂ.
ಕ್ರಿಸ್ತಾಂವ್ ಧರ್ಮಾಕ್ಚ್ ಕಾಂಟಾಳ್ಚೊ ಹಾಂವ್ ತಾಂಚ್ಯಾ ಪವಿತ್ರ್ ಗ್ರಂಥಾಕ್ ಮಾನ್ ತರ್ಯ್ ಕಶೆಂ ದೀನ್?
ತಿಕಾ ಜಾಪ್ ದೀನಾಸ್ತಾನಾಚ್ ಹಾಂವ್ ಘೆಂವ್ಲೊ. ಉಪ್ರಾಂತ್ ಮ್ಹಜಿ ಮತ್ ಥ್ರ್ಯಾರ್ ನಾತ್ಲ್ಲಿ. ಹೆವಿಶಿಂ ಜಬರ್ದಸ್ತೆನ್ ಆಟಂವ್ಕ್ ಲಾಗ್ಲಿ.
"ಕ್ರಿಸ್ತಾಂವ್ಚೊ ಬಾಯ್ಬಲ್ ಮ್ಹಜ್ಯಾ ಘರಾಂತ್ ರಿಗೊಂಕ್ ಭಿಲ್ಕುಲ್ ಫಾವೊ ನ್ಹಯ್ " ಮುಟಿ ಆಂರ್ದಿಲ್ಯೊ ಹಾವೆಂ. ಮ್ಹಜೆ ಆವಯ್ಕ್ ಹ್ಯಾ ವಿಶಿಂ ವಿರೋದ್ ದಾಕಂವ್ಕ್ ಸಕ್ಲೊಂ ನಾ. ದೆಕುನ್ ಮ್ಹಜ್ಯಾ ಘರಾಂತ್ ಬಾಯ್ಬಲ್ ಪಾವಾನಾತ್ಲ್ಲ್ಯಾ ಭಾಶೆನ್ ಉಪಾಯ್ ಸೊಧುಂಕ್ ಜಾಯ್. ನಿರ್ದಾರ್ಚ್ ಘೆತ್ಲ್ಲೊ ಹಾವೆಂ....
ಆಬ್ಳೆ! ಆನಿ ಕಿತೆಂ? ನಿರ್ದಾರ್ ಉಪಾವಾನ್ ಎಕೆಚ್ ರಾತಿ ಭಿತರ್ ಪೊಂತಾಕ್ ಪಾವ್ಲ್ಲೊ. ಕಾಲ್ಚ್ಯಾ ಎಕಾಚ್ ದಿಸಾಭಿತರ್ ಮ್ಹಜೆ ತಸಲ್ಯಾ ಥೊಡ್ಯಾ ಕೋಮುವಾದಿಂಕ್ ಜಮವ್ನ್ ಏಕ್ ಪಂಗಡ್ ಬಾಂದ್ಲೊ ಹಾವೆಂ. ತಾಂಕಾಂ ಗಜಾಲ್ ಕಳವ್ನ್ ಹರ್ಯೆಕಾ ರಿತಿನ್ ಆಮ್ಸೊರಿ ಶಿಕ್ಶಿತ್ ಕೆಲೆಂ ಹಾವೆಂ.
ಶಿಕಾಪ್ ಭಿರಾಂಕುಳ್ ರಿತಿಚೆಂ......
ದೀಸ್ ಉಜ್ವಾಡ್ಚೆ ಆದಿಂ ರವಿಹಳ್ಳೆಂತ್ಲ್ಯಾ ಹರ್ಯೆಕಾ ಕ್ರಿಸ್ತಾಂವ್ಚಾ ಘರಾಂತ್ಲೆ ಬಾಯ್ಬಲ್ ಹುಲ್ಪಾವ್ನ್ ಉಡಂವ್ಚೆ.! ಶಿವಾಯ್, ತಾಂಚ್ಯಾ ಸಾಂತಾ-ಭಕ್ತಾಂಚ್ಯೊ ಇಮಾಜಿ, ಎಕಾ ಉತ್ರಾನ್ ತಾಂಚ್ಯಾ ದೆವಾಸ್ಪಣಾಚಿ ಹರ್ಯೆಕ್ ಕ್ಹುರು ನಾಸ್ ನಾಸ್ ಕರ್ಚಿ! ಆನಿ ಆಡಾಂವ್ಕ್ ಆಯಿಲ್ಲ್ಯಾಂಕ್ ದಯಾ ದಾಕ್ಶೆಣ್ ನಾಸ್ತಾಂ ಮಾರ್ನ್, ಬಡವ್ನ್ ಧಾಂವ್ಡಾಂವ್ಚೆಂ.
ಮಾರೆಕಾರ್ ಯೆವ್ಜಣ್! ಬೋವ್ಶಾ ತೆಯ್ ಹಾಕಾಚ್ ರಾಕೊನ್ ಆಸ್ಲ್ಲೆ. ತಾಣಿ ಮ್ಹಾಕಾ ಬರೊಚ್ ಸಾಂಗಾತ್ ದಿಲೊ.
ಹಾ! ಕಟಾ ಕಟಾ!
ಘೆತ್ಲ್ಲೊ ನಿರ್ದಾರ್ ಪಳ್ಸಾಲ್ಲೊ. ಪುಣ್ ಚುಕಾಮುಕಿ ಆನಿ ಖುನಿಯೊಯ್ ಘದೊನ್ ಗೆಲ್ಲ್ಯೊ. ಆಡಾಂವ್ಕ್ ಆಯಿಲ್ಲ್ಯಾಂಕ್ ಮಾರ್ನ್ ಬಡಾಯ್ತಾನಾ ಜಾಯ್ತ್ಯಾ ಕ್ರೀಸ್ತಾಂವಾಂಚಿ ಮೊಡಿಂಯ್ ಪಡ್ಲ್ಲಿಂ.
ರಾತ್ಚ್ಯಾ ಇಕ್ರಾ ಉಪ್ರಾಂತ್ ಸಾಯ್ಕಾಲಾರ್ಚ್ ಸವಾರಿ ಚಲಯಿಲ್ಲಿ ಆಮಿ. ಪಯ್ಲೆಂ ಆಮಿ ಇಗರ್ಜೆಕ್ ರಿಗ್ಲ್ಲ್ಯಾಂವ್. ಇಗರ್ಜೆಂತ್ಲ್ಯೊ ಇಮಾಜಿ, ಬಾಯ್ಬಲ್, ಆನಿ ದೆವಾಸ್ಪನಾಚೆ ಜಿತ್ಲೆ ಬೂಕ್ ಆಸಾತ್ ತಿತ್ಲೆ ಸರ್ವ್ ನಾಸ್ ಕೆಲೆ. ತ್ಯಾ ಆದಿಂ ಜಾಗ್ಲ್ಲೊ ಪಾದ್ರಿ ವಿಶಯ್ ಕಳೊನ್ ಆಮ್ಚ್ಯಾ ವಾವ್ರಾಕ್ ಆಡ್ ಆಯಿಲ್ಲೊ. ಬಡಯ್ಲೊ ತಾಕಾ. ತರ್ಯ್ ತೊ ಆಯ್ಕಾನಾತ್ಲೆಲ್ಯಾ ವಗ್ತಾ, ಖುನಿಯೆಕ್ ಬಲಿ ಜಾಲೊ.
ಉಪ್ರಾಂತ್ ಆಮಿ ಫಾಸಾಳ್ಳ್ಯಾಂವ್, ಚಾರ್ ಪಂಗಡ್ ಜಾವ್ನ್. ತೀಸ್ ಜಣಾಂಚಾ ಎಕಾ ಪಂಗ್ಡಾಚೆ ಚಾರ್ ವಾಂಟೆ ಕೆಲ್ಲೆ ಹಾವೆಂ. ಆನಿ ಸುರ್ವೆರ್ಚ್ ಎಕೆಕಾ ಪಂಗ್ಡಾಕ್ ವಿಂಚುನ್ ದಿಲ್ಲ್ಯಾ ಕ್ರಿಸ್ತಾಂವಾಚಾ ಘರಾ ಕುಶಿನ್ ಧಾಡ್ಲೆಂ ತಾಂಕಾಂ. ತೆ ಗೆಲೆ. ಹಾಂವ್ ಮ್ಹಜ್ಯಾ ಪಂಗ್ದಾಕ್ ಗೆವ್ನ್ ಹಾವೆಂ ವಿಂಚ್ಲ್ಲ್ಯಾ ಘರಾಂನಿ ಗುಸ್ಲೊಂ.
ಹಳ್ಳಿ ಚಡುಣೆಂ ಲ್ಹಾನ್ಚ್. ಕ್ರೀಸ್ತಾಂವಾಂಚಿ ಕುಟ್ಮಾಂ ಉಣಿಂಚ್ ಮ್ಹಣ್ಯೆತ್. ಚಡ್ ಮ್ಹಳ್ಯಾರ್ ಶೆಂಭರ್ ಕುಟ್ಮಾಂ. ರವಿ ಹಳ್ಳೆಂತ್ಲ್ಯಾ ಖಂಯ್ಚಾಚ್ ಕುಟ್ಮಾಕ್ ಬಾಕಿ ದವರಿನಾಯೆ ಮ್ಹಳ್ಳ್ಯಾ ಹಟಾನ್ ಸಕಾಳಿಂಚ್ ಮ್ಹಜೆಸಂಗಿಂ ಗುಪಿತ್ ಜಮ್ಲ್ಲ್ಯಾ ಪಂಗ್ಡಾಂತ್ಲ್ಯಾ ಥೊಡ್ಯಾಂಸಂಗಿಂ ಬಸೊನ್ ಕ್ರಿಸಾಂವ್ ಘರಾಂಚಿ ಕಾನೆಸ್ಮಾರಿ ಕಾಡ್ಲ್ಲಿ. ತ್ಯಾ ಪ್ರಕಾರ್ ಎಕೆಕಾ ಪಂಗ್ಡಾಕ್ ನಿಯಮಿತ್ ಘರಾಂ ವಾಂಟುನ್ ದಿಲ್ಲಿಂ. ಆಶೆಂ ಮ್ಹಜೊ ವಾವ್ರ್ ಸಲಿಸಾಯೆನ್ ಜಾಲ್ಲೊ. ಚಡುಣೆಂ ಪಂಗ್ಡಾಂತ್ಲ್ಯಾ ಎಕ್ಲ್ಯಾಕ್ ವಾ ಅನ್ಯೆಕ್ಲ್ಯಾಕ್ ಕ್ರಿಸ್ತಾಂವ್ ಘರಾಂಚಿ ವಾಟ್ ಕಳಿತ್ ಆಸ್ಲ್ಲಿ. ಮ್ಹಜೊ ಪಂಗಡ್ ಜಿತ್ಲ್ಯಾ ಘರಾಂನಿ ಗುಸ್ಲೊ, ತ್ಯಾ ಘರಾಂನಿ ಚಡಾವತ್ ಮೊಡಿಂಚ್ ಪಡ್ಲ್ಲಿಂ. ಬಾಯ್ಬಲ್ ಹುಲ್ಪಾಯ್ತಾನಾ, ಇಮಾಜಿ ದೆಸ್ವಾಟಾಯ್ತಾನಾ ಆಡಾಂವ್ಕ್ ಆಯಿಲ್ಲ್ಯಾಂಚೆರ್ ದಯಾ ದಾಕ್ಶೆಣ್ ದಾಕಯ್ಲಿಚ್ ನಾ.
ಪುಣ್ ಪಯ್ಲೆ ಸುವಾತೆರ್, ಆಮ್ಚೆ ಬಚಾವೆಚಿ ವಾಟ್ ಜಾವ್ನ್ ಜ್ಯಾ ಘರಾಂನಿ ಟೆಲಿಪೋನ್ ಆಸಾ, ತಾಅಚ್ಯೊ ಲಾಯ್ನಿಚ್ ಕುಡ್ಕೆ ಕರುನ್ ಉಡಯ್ಲ್ಯೊ. ಪಯ್ಲಿಚ್ ಚತ್ರಾಯ್ ಘೆತ್ಲ್ಲಿ ಆಮಿ.
ಹರ್ಯೆಕಾ ಕ್ರಿಸ್ತಾಂವ್ ಘರಾಂತ್ಲೆ ಬಾಯ್ಬಲ್ ನಾಸ್ ಕೆಲೆ. ತಾಂಚ್ಯೊ ಇಮಾಜಿ ಪೂಡ್ ಕೆಲ್ಯೊ. ಆಮ್ಚಿ ವ್ಹಳಕ್ ಕೊಣಾಯ್ಕ್ಯ್ ಮೆಳೊಂಕ್ ನಾ. ಮೆಳೊಂಕ್ಯ್ ಸಾದ್ಯ್ ನಾತ್ಲ್ಲಿ. ಚತ್ರ್ಫಾಯ್ ಜಾವ್ನ್ ಆಮ್ಚಿ ಕೂಡ್ ಆಮಿ ಕಾಳ್ಯಾ ವಸ್ತುರಾಂತ್ ಗುಟ್ಲಾಯಿಲ್ಲಿ. ದೊಳ್ಯಾಂ ಶಿವಾಯ್ ಕಿತೆಂಚ್ ಭಾಯ್ರ್ ದಿಸಾನಾತ್ಲ್ಲೆಂ. ಹಾತಾಂಕ್ ಲುವಾಂ ಶಿರ್ಕಾಯಿಲ್ಲಿಂ.
ಅಬ್ಳೆ! ಮ್ಹಜಿ ಭಿರಾಂಕುಳ್ ಯೆವ್ಜಣ್ ಜ್ಯಾರಿ ಜಾಲ್ಲಿ. ಹಲ್ಲ್ಯಾ-ಖುನಿಯೆಚಿ ಕಸಲಿಚ್ ಕ್ಹುರು ಸಾಂಡಿನಾಸ್ತಾನಾ ಆತಾಂ ಆಮಿ ಆಪಾಪ್ಲೆ ಘರ್ಚೆ ವಾಟೆಕ್ ಲಾಗ್ಲ್ಲ್ಯಾಂವ್.
ಖರೆಂಚ್ ಭಿರಾಂಕುಳ್ ಘಡಿತ್!
ಗರ್ಜ್ ಆಸ್ಲ್ಲೆಂ?
ಮ್ಹಜ್ಯಾ ವಾಂಟ್ಯಾಕ್ ವ್ಹಯ್. ನ್ಹಯ್ ತರ್ ಮ್ಹಜ್ಯಾ ಘರಾಂತ್ ಬಾಯ್ಬಲ್ ರಿಗ್ಚೊ ಪುರ್ತೊ ಸಂಭವ್ ಆಸ್ಲ್ಲೊ. ಮ್ಹಜ್ಯಾ ಆವಯ್ಕ್ ವಿರೋದ್ ಕರುಂಕ್ ಸಕಾನಾಸ್ತಾನಾ, ಕಾಂಯ್ ಮ್ಹಜ್ಯಾಚ್ ಹಾತಾಂನಿ ಬಾಯ್ಬಲ್ ಗೆವ್ನ್ ಘರಾ ಹಾಡ್ತೊಂ.
ಆತಾಂ?
ತಿ ಭಿರಾಂತೆಕ್ ಉಂಡಿ ಜಾತೆಲಿ. ಫಾಂತ್ಯಾ-ಫಾಂತ್ಯಾರ್ ಗಾಂವ್ಚಿ ವಿಕಾಳ್ ಖಬಾರ್ ಮೆಳೊನ್ ಥರ್ತರೊನ್ ವೆತೆಲಿ. ಕ್ರಿಸ್ತಾಂವ್ಚೊ ಬಾಯ್ಬಲ್ ಘರಾಂತ್ ಹಾಡ್ಲ್ಯಾರ್ ಮುಕಾರ್ ಆಪ್ಣಾಕ್ಯ್ ಆಪಾಯ್ ಆಸ್ತಲೊ ಮ್ಹಣ್ ತಿಕಾ ಖಾತ್ರಿ ಜಾತೆಲೆಂ. ಆನಿ ಮ್ಹಾಕಾ ಬಾಯ್ಬಲ್ ಹಾಡುಂಕ್ ಸಾಂಗ್ಲ್ಲೆಂ ಉತಾರ್ ತಿ ಖಂಡಿತ್ ಪಾಟಿಂ ಕಾಡ್ತೆಲಿ.
ಹಾಂವ್ ಪುರ್ತೊ ಭರ್ವಸ್ಲ್ಲೊಂ. ದೆಕುನ್ಚ್ ಹಾವೆಂ ಹಿ ವಾಟ್ ದರ್ಲ್ಲಿ. ಕ್ರಿಸ್ತಾಂವ್ ಸಮಡ್ತಿಚೆರ್ ಹಗೆಂ ತಿರ್ಸುಂಚೆಂ ಏಕ್ ಕಾರಾಣ್ ತರ್, ಮ್ಹಜ್ಯಾ ಘ್ರಾಂತ್ ಬಾಯ್ಬಲ್ ರಿಗಾನಾತ್ಲ್ಲ್ಯಾ ಪರಿಂ ಆವಯ್ಚಾ ಕಾಳ್ಜಾಕ್ ಸಾಸ್ಣಾಕ್ ಭಿರಾಂತ್ ರಿಗಂವ್ಚೆಂ ಅನ್ಯೇಕ್ ಪ್ರಮುಕ್ ಕಾರಾಣ್.
ಒಟ್ಟಾರೆ, ಮ್ಹಜೊ ಇರಾದೊ ಪೊಂತಾಕ್ ಪಾವ್ಲ್ಲೊ. ಚಿಂತ್ಲ್ಲೆಂ ಜ್ಯಾರಿ ಜಾಲ್ಲೆಂ. ಮ್ಹಜಿ ಆವಯ್ ಫಾಲ್ಯಾಂ ಥಾವ್ನ್ ಬಾಯ್ಬಲಾಚಿ ಖಬಾರ್ ಕಾಡ್ಚಿ ನಾ ಮ್ಹಳ್ಳೆಂ ಮ್ಹಾಕಾ ಖಾತ್ರಿ ಜಾಲ್ಲೆಂ.
ಆತಾಂ ಘರ್ಚೆ ವಾಟೆರ್ ಆಸ್ಲ್ಲೊಂ. ಹಳ್ಳೆ ಸುವಾತ್ ಜಾಲ್ಲ್ಯಾನ್ ವಾಟ್ ಬೋವ್ಚ್ ಲಾಂಬ್ ಆಸ್ಲ್ಲಿ. ಪೆಂಟೆ ಥಾವ್ನ್ ಸಾಯ್ಕಲಾರ್ ಗರಾ ಪಾವೊಂಕ್ ಸುಮಾರ್ ಅರ್ಧೆಂ ವೋರ್ ತರ್ಯ್ ಲಾಗ್ತಾಲೆಂ. ಎದೊಳ್ಚ್ ಕುಡಿವಯ್ಲಿ ಕಾಳಿ ಮುಸ್ತಾಯ್ಕಿ ನಿಕ್ಳಾವ್ನ್, ಹಾತಾಂತ್ಲಿಂ ಲುವಾಂ ನಿಸ್ರಾವ್ನ್ ಎಕೆ ಪ್ಲಾಸ್ಟಿಕ್ ಪೊತಿಯೆಂತ್ ಘಾಲ್ನ್ ಸಾಯ್ಕಲಾರ್ ಉಮ್ಕಾಳಾಯಿಲ್ಲೆಂ. ಹೆಣೆ ತೆಣೆ ಘಾಮಾಂತ್ ಮಿಸ್ಳಾಲ್ಲೆಂ ರಗಾತ್ಯ್ ಪುಸುನ್ ಕಾಡ್ಲ್ಲೆಂ. ಪುಣ್ ಥೊಡ್ಯಾ ಘರಾಂನಿ, ಭಕ್ತಿಕ್ ವಸ್ತುಂಚೊ ನಾಸ್ ಆಡಾಂವ್ಕ್ ಆಯಿಲ್ಲ್ಯಾ ಥೊಡ್ಯಾ ಕ್ರಿಸ್ತಾಂವ್ ಮನ್ಶಾಂಲಾಗಿಂ ಉಡ್ಡಾತಾನಾ, ಮ್ಹಜೆ ಕುಡಿರ್ ಥಂಯ್ ಥಂಯ್ ಜಾಲ್ಲೆ ಘಾಯ್ ಅಜೂನ್ಯ್ ರಗಾತ್ ಪಾಜ್ರಾಯ್ತಾಲೆ.ಥೊಡ್ಯಾ ಮನ್ಶಾಂನಿ ಭಕ್ತಿಕ್ ವಸ್ತುಂಚೊ ನಾಸ್ ಸೊಸುಂಕ್ ಜಾಯ್ನಾಸ್ತಾನಾ ಖುದ್ ಮ್ಹಜ್ಯಾ ಆಂಗಾರ್ ಉಡೊನ್ ಮ್ಹಜೆಂ ವದನ್ ನಾಕ್ಶ್ಯಾಂನಿ ಬೊಕುರ್ಲ್ಲೆಂ. ವದನ್ ಕಾಳ್ಯಾ ವಸ್ತ್ರಾನ್ ಲಿಪ್ಲ್ಲೆಂ ತರ್ಯ್ ತಾಂಚಾ ಬೊಕಾರ್ಣೆಕ್ ಮುಖಮಳಾರ್ ಘಾಯ್ ಜಾಲ್ಲೆ.
ಕಿತೆಂಯ್ ಜಾಂವ್, ಒಟ್ಟಾರೆ ಆತಾಂ ಕೊಣೆಂಯ್ ದೆಖ್ಚೆ ಆದಿಂ ಘರಾ ಪಾವೊಂಕ್ ಜಾಯ್ ಆಸ್ಲ್ಲೆಂ.
ಏಕ್ ಗಜಾಲ್... ಹ್ಯಾ ಮಧೆಂ ಕೊಣಾಕ್ಯ್ ಏಕ್ ದುಬಾವ್ ಧೊಸುಂಕ್ ಪುರೊ. ರಾತ್ ಕಾಬಾರ್ ಜಾವ್ನ್ ಯೆತಾ. ಮ್ಹಜಿ ಆವಯ್ ’ಪೂತ್ ಖಂಯ್ ಪಾವ್ಲೊ’ ಮ್ಹಣ್ ಭಿರಾಂತೆನ್ ಮುರ್ಗಟ್ಚಿ ನಾ?
ನಾ! ಕಾಮ್ ಸಂಪವ್ನ್ ಕಾಲ್ಚೆ ಸಾಂಜೆರ್ ಘರಾ ಪಾವ್ಲ್ಲೊಂ ಹಾಂವ್, ಸುಮಾರ್ ರಾತ್ಚ್ಯಾ ಆಟಾಂಕ್ ಪರತ್ ಭಾಯ್ರ್ ಸರ್ಲ್ಲೊಂ. ’ಆಮ್ಕ್ಯಾ ಕಡೆನ್ ಏಕ್ ಪಾರ್ಟಿ ಆಸಾ. ಪಾಟಿಂ ಯೆತಾನಾ ಕಿತ್ಲಿ ವೇಳ್ ಜಾತಲೊ ಮ್ಹಳ್ಳೆಂ ನೆಣಾಂ, ತುಂ ನಿದೆ’ ಮ್ಹಣೊನ್ ತಿಕಾ ಫಟ್ ಮಾರ್ನ್ ಘರಾಂತ್ಲೊಂ ಭಾಯ್ರ್ ಪಡ್ಲ್ಲೊಂ. ದೆಕುನ್ ತಿ ಆತಾಂ ನಿದೆನ್ ಘೊರೆತಾ ಆಸ್ತೆಲಿ.
ಆತಾಂ ಸುಮಾರ್ ಅರ್ಧೆ ವಾಟೆಕ್ ಪಾವ್ಲ್ಲೊಂ ಹಾಂವ್. ಹಳ್ತಾಚಿ ಏಕ್ ಘುಂವ್ಡಿ ತಿ. ವೆಗಾನ್ಚ್ ಘುಂವ್ತಾಲೊಂ. ಆನಿ ತ್ಯಾಚ್ ಘಡಿಯೆ! ಚಾಂದ್ನ್ಯಾ ಉಜ್ವಾಡಾಕ್ ಮುಕ್ಲ್ಯಾನ್ ಸಾಯ್ಕಾಲಾರ್ ಯೆಂವ್ಚೆ ಚವ್ಗ್ ಜಣ್ ದಿಸ್ಲೆ.
ಕಾಳ್ಜಾಂತ್ ’ಕಲ್ಲ್’ ಜಾಲೆಂ ಮ್ಹಜೆಂ ಸಾಯ್ಕಲ್ ಘರ್ಚೆ ದಿಶೆನ್ ಕಿತ್ಲ್ಯಾ ವೆಗಾನ್ ಉಸ್ಳಾಯ್ಲೆಂ ತರ್ಯ್ ಚಿಂತ್ಲ್ಲೆಪರಿಂ ಕೊಣಾಯ್ಚಾ ನದ್ರೆಕ್ ಪಡ್ಚಿ ಘಡಿ ಆಯಿಲ್ಲಿ. ಲಿಪೊಂಕ್ ಆವ್ಕಾಸ್ಚ್ ನಾತ್ಲ್ಲೊ. ತೆ ಭಿಲ್ಕುಲ್ ಲಾಗಿಂ ಪಾವ್ಲ್ಲೆ.
ಆಬ್ಳೆ, ಮ್ಹಜ್ಯಾ ಕಾಳ್ಜಾಂತ್...... ಬಾರೀಕ್ ಕಾವ್ಜೆಣಿ ಉಟೊನ್ ಯೆತಾನಾ.....
"ರಮೇಶ್!" ತಾಂಚೆ ಪಯ್ಕಿಂತ್ಲ್ಯಾ ಎಕ್ಲ್ಯಾಚೊ ತಾಳೊ ಆಯ್ಕಾಲೊ!
ಉಡೊನ್ ಪಡ್ಲೊಂ ಹಾಂವ್.
ತಾಂಣಿ ಮ್ಹಜಿ ವ್ಹಳಕ್ಧರುನ್ ಜಾಲ್ಲಿ. ಆನಿ ಹಾವೆಂಯ್ ತಾಂಚಿ! ಖರೆಂ ಸಾಂಗೊಂ ತರ್ ಭಿಯೆಂವ್ಚಿ ಗರ್ಜ್ ನಾತ್ಲ್ಲಿ. ಕಾರಾಣ್?
ತೆ ಬೊಲ್ತೆ ನ್ಹಯ್. ತೆ ಮ್ಹಜೆಚ್ ಮನಿಸ್. ಕೋಮುವಾದಿ..... ಮ್ಹಜ್ಯಾ ಚೊವ್ತ್ಯಾ ಪಂಗ್ಡಾಂತ್ಲೆ.
ಭಿರಾಂಕುಳ್ ಯೆವ್ಜಣ್ ಪೊಂತಾಕ್ ಪಾವ್ಲ್ಲಿಚ್ ಆಮ್ಕ್ಯಾ ವೆಳಾರ್ ಫಲಾಣ್ಯಾ ಜಾಗ್ಯಾರ್ ಆಮಿ ಸರ್ವಾಂನಿ ಮೆಳ್ಚೆಂ ಮ್ಹಣೊನ್ ಠರಾಯಿಲ್ಲೆಂ. ತ್ಯಾ ಪ್ರಕಾರ್ ಮೆಳ್ಲ್ಲ್ಯಾಂವ್. ಆಮ್ಚೆ ತೀನ್ ಪಂಗಡ್ ಸಾರ್ಕ್ಯಾ ವೆಳಾರ್ ಭೆಟ್ಲೆ ತರ್ಯ್ ಹ್ಯಾ ಚೊವ್ತ್ಯಾ ಪಂಗ್ಡಾಚೊ ಪಾತ್ತೊಚ್ ನಾತ್ಲ್ಲೊ. ಚಡಿತ್ ವೇಳ್ ರಾಕೊನ್ ರಾವೊಂಯ್ ಸಾದ್ಯ್ ನಾತ್ಲ್ಲೆಂ. ದೀಸ್ ಉಜ್ವಾಡ್ಚೆ ಆದಿ ಅಮಿ ಘರಾ ಪಾವೊಂಕ್ ಜಾಯ್ ಆಸ್ಲ್ಲೆಂ. ನ್ಹಯ್ ತರ್ ಖಂಚೆಯ್ ಗಡ್ಯೆ ಶಿರ್ಕೊನ್ ಪಡ್ಚೊ ಆವ್ಕಾಸ್ ಆಸ್ಲ್ಲೊ. ದೆಕುನ್ ಅಮಿ ಆಪಾಪ್ಲ್ಯಾ ಘರ್ಚೆ ವಾಟೆಕ್ ಲಾಗ್ಲ್ಲ್ಯಾಂವ್.
ಆತಾಂ, ಸಾಮ್ಕಾರ್ ಮ್ಹಜ್ಯಾ, ಅರ್ಧೆ ವಾಟೆರ್ ಚೊವ್ತ್ಯಾ ಪಂಗ್ಡಾಂತ್ಲೆ!
"ಕಿತೆಂ ತಡವ್? ಚೊವ್ಗ್ಚ್ ತುಮಿ. ತುಮ್ಚಾ ಪಂಗ್ಡಾಂತ್ಲೆ ಉರ್ಲ್ಲೆ ಮನಿಸ್ ಖಂಯ್ ಆಸಾತ್? ಆನಿ ತುಮಿ ಹ್ಯಾ ರಸ್ತ್ಯಾರ್?" ಸಾಯ್ಕಲ್ ಥಾಂಬವ್ನ್ ಎಕಾಚ್ ಧಮ್ಮಾನ್ ಮ್ಹಳ್ಳೆಪರಿಂ ಪುಸ್ಪುಸ್ಯಾಂನಿ ವಿಚಾರ್ಲೆಂ ಹಾವೆಂ.
"ಆಮಿ ಪ್ರಮುಖ್ ರಸ್ತ್ಯಾನ್ ಯೆಂವ್ಚೆ ಆಸ್ಲ್ಲ್ಯಾಂವ್" ತಾಂಚೆ ಪಯ್ಕಿಂತ್ಲೊ ಎಕ್ಲೊ ಉಲಯ್ಲೊ. "ಪುಣ್ ತಡವ್ ಜಾವ್ನ್ ತುಮಿ ಚುಕ್ತೆಲ್ಯಾತ್ ಮ್ಹಣೊನ್ ಆಡ್ವೆ ವಾಟೆನ್ ಹ್ಯಾ ರಸ್ತ್ಯಾಕ್ ಪಾವೊನ್ ತುಮ್ಚೆ ಸರ್ಶಿಂ ಭಾಯ್ರ್ ಸರ್ಲ್ಯಾಂವ್. ಆಮ್ಕಾಂ ಒಪ್ಸಿಲ್ಲ್ಯಾ ಸರ್ವ್ ಘರಾಂತ್ಲ್ಯೊ ಭಕ್ತಿಕ್ ವಸ್ತು ನಾಸ್ ಕರುನ್ ಉಡಯ್ಲ್ಯೊ. ಪುಣ್ ಏಕ್ ಘರ್ ಆಮ್ಚ್ಯಾ ಘಾಸಾಂತ್ಲೆಂ ಬಚಾವ್ ಜಾಲೆಂ"
"ಕೊಣಾಚೆಂ?" ಆಸ್ಡ್ಯೊ ವಯ್ರ್ ಕೆಲ್ಯೊ ಹಾವೆಂ
"ಅಕೇರಿಚೆಂ ಘರ್ ತೆಂ... ಆಂತೊನಿ ಡೆಸಾಚೆಂ" ದುಸ್ರೊ ಮ್ಹಣಾಲೊ. ಆಮ್ಚೊ ಇರಾಅದೊ ಕಳ್ಲ್ಲೊಚ್ ಆಂತೊನಿ ಆಪ್ಲೊ ಬಾಯ್ಬಲ್ ಘೆವ್ನ್ ಘರಾಂತ್ಲೊ ಭಾಯ್ರ್ ಪಡೊನ್ ಖಂಯ್ಚರ್ಗೀ ಕಾಳೊಕಾಂತ್ ಲಿಪ್ಲೊ. ಸುಮಾರ್ ಅರ್ಧೆಂ ವೋರ್ ರಾಕ್ಲ್ಯಾಂವ್. ತೊ ಯೇಂವ್ಕ್ಚ್ ನಾ. ದೆಕುನ್, ತುಮಿ ಆಮ್ಚಿ ವಾಟ್ ರಾಕ್ತೆಲ್ಯಾತ್ ಮ್ಹಣೊನ್ ಆಮಿ ಆಯ್ಲ್ಯಾಂವ್. ಉರ್ಲ್ಲೆ ತೇಗ್ ಜಣ್ ತೆಣೆಚ್ ಆಂತೊನಿಚ್ಯಾ ಘರಾ ಭಂವ್ತಣಿ ಲಿಪೊನ್ ರಾವೊನ್ ತಾಚ್ಯಾ ಯೆಣ್ಯಾಕ್ ರಾಕೊನ್ ಆಸಾತ್" ಕಳಯ್ಲೆಂ ತಾಣೆ.
ಆಂತೊನ್ ಡೆಸಾ! ರಗಾತ್ ಖತ್ಕತ್ಲೆಂ ಮ್ಹಜೆಂ
ರವಿ ಹಳ್ಳೆಂತ್ಲೊ ಭಾರಿಚ್ ದೆವಾಸ್ಪಣಾಚೊ ಮನಿಸ್ ಮ್ಹಣೊನ್ ಹೊ ನಾಂವಾಡ್ಲಾ. ಇಗರ್ಜೆಂತ್ ಹರ್ಯೆಕ್ ಸಂಗ್ತಿನಿಂ ಎಕ್ದಮ್ ಮುಕಾರ್ ಮ್ಹಣೊನ್ ಆಯ್ಕಾಲಾಂ ಹಾವೆಂ. ಘರಾಂತ್ ತಾಚ್ಯಾ ಎಕ್ಸುರೊಚ್ ಜಿಯೆತಾ. ಬಾಯ್ಲ್ ಭುರ್ಗಿಂ ವಾ ಕುಟಾಮ್ ತಾಕಾ ನಾ. ಕಾರಾಣ್ ತೊ ಆಜೂನ್ ಆಂಕ್ವಾರ್. ಪುಣ್ ಆತಾಂ ಮ್ಹಾತಾರೊ ಜಾಲಾ. ಪ್ರಾಯ್ ಸಾಟಾಂಕ್ ಲಾಗಿಂ ಜಾಲ್ಯಾ. ತರ್ನಾಟ್ಪಣಾರ್ ತೊ ಕಾಜಾರ್ ಜಾಲ್ಲೊ ನಾ. ಕಾರಾಣ್ ಕಿತೆಂಗೀ? ಮಾತ್ಸೊ ಪಯ್ಶಾಂವಾಲೊ ದೆಕುನ್ ಜಿಯೆಂವ್ಚಿ ಖಂತ್ ನಾತ್ಲ್ಲಿ. ಕಾಮ್ ಕರ್ಚಿ ಗರ್ಜ್ ನಾತ್ಲ್ಲಿ. ದೆಕುನ್ ಬೋವ್ಶಾ ಸಗ್ಳೊ ದೀಸ್ ಘರಾ ಬಸೊಂಕ್ ಉಬ್ಗೊಣ್ ಭೊಗ್ತಾ ಮ್ಹಳ್ಳೆ ಖಾತಿರ್ ತೊ ಬಾಯ್ಬಲ್ ಘೆವ್ನ್ ಘರಾನ್ ಘರಾ ಭೊಂವ್ತಾಲೊ ಆನಿ ಯೇಸುಚಿ ಬರಿ ಖಬಾರ್ ಪರ್ಗಾಟ್ತಾಲೊ. ಪುಣ್ ತಾಚಿ ಭೆಟ್ ಫಕತ್ತ್ ಕ್ರಿಸ್ತಾಂವ್ ಘರಾಂಕ್ ಮಾತ್ರ್ ಸೀಮಿತ್ ಜಾಲ್ಲಿ ತರ್ ಮ್ಹಜಿ ತಕ್ಲಿ ತಿತ್ಲಿ ಪಿರ್ವಾತಿನಾ. ತೊ ಮ್ಹಜ್ಯಾಯ್ ಜಾತಿಚ್ಯಾ ಘರಾಂನಿ ಭೊಂವೊನ್ ಬಾಯ್ಬಲಾ ವಿಶಿಂ ಶಿಕವ್ಣ್ ದಿತಾಲೊ!
ಪಾಟ್ಲ್ಯಾ ಥೊಡ್ಯಾ ದಿಸಾಂ ಆದಿಂ ಹಾಂವ್ ನಾತ್ಲ್ಲೆವೆಳಿಂ ಬಾಯ್ಬಲ್ ಘೆವ್ನ್ ಮ್ಹಜ್ಯಾ ಘರಾಂತ್ ತೊ ರಿಗ್ಲ್ಲೊ. ತ್ಯಾ ವೆಳಿಂ ಸಗ್ಳೊಚ್ ವಾಗ್ ಜಾಲ್ಲೊಂ ಹಾಮ್ವ್. ದುಸ್ರೆ ಪಾವ್ಟಿಂ ಮ್ಹಜ್ಯಾ ಘರ್ಚೆಂ ಮೇಟ್ ಚಡ್ಲ್ಲಿ ಖಬಾರ್ ಮಳಾತ್ ತರ್ ತಾಚಿ ಗೊಮ್ಟಿಚ್ ಲುಂವ್ತಲೊಂ ಮ್ಹಣೊನ್ ಆಪ್ಲೆಸ್ತಕಿಂ ಸೊಪುತ್ ಘಾಲ್ಲೊ ಹಾವೆಂ. ಪುನ್ಯಾನ್ ತ್ಯಾ ಉಪ್ರಾಂತ್ ತೊ ಘರಾ ಬಾಗ್ಲಾರ್ ದಿಶ್ಟಿಕ್ ಪಡ್ಲ್ಲೊ ನಾ.
ಪುಣ್!
ಮ್ಹಜೆ ಆವಯ್ಚಿ ಮತ್ ಹ್ಯಾ ಉಪ್ರಾಂತ್ಚ್ ಘುಂವ್ಲ್ಲಿ. ತೊ ಯೇವ್ನ್ ತಿಕಾ ಬಾಯ್ಬಲಾ ವಿಶಿಂ ಶಿಕವ್ಣ್ ದೀವ್ನ್ ಗೆಲ್ಯಾ ಉಪ್ರಾಂತ್ಚ್ ಮ್ಹಾಕಾ ತಿಣೆ ಬಾಯ್ಬಲ್ ಹಾಡ್ಚ್ಯಾಕ್ ಫರ್ಮಾಯಿಲ್ಲೆಂ!
ದಾಂತ್ ಕಟ್ಕಟಾಯ್ಲೆ ಹಾವೆಂ.
"ವೆತಾಂವ್ ಆಮಿ" ಮ್ಹಣಾಲೆ ತೆ. ಉಪ್ರಾಂತ್ ಥಂಯ್ಚರ್ ರಾವ್ಲೆನಾಂತ್ ತೆ. ಸಾಯ್ಕಲ್ ಗುಡ್ಡಾಂವ್ನ್ ಚಲ್ಲೆ.
ಹಾಂವ್ಯ್ ಘರ್ಚೆ ವಾಟೆಕ್ ಲಾಗ್ಲೊಂ.
ತರ್! ಅಂತೊನಿ ಬಾಯ್ಬಲ್ ಘೆವ್ನ್ ಕಾಳೊಕಾಂತ್ ಲಿಪ್ಲಾ ಜಾಲ್ಯಾರ್ ರವಿ ಹಳ್ಳೆಂತ್ಲೊ ಏಕ್ ಬಾಯ್ಬಲ್ ನಾಸ್ ಜಾಯ್ನಾಂಸ್ತಾಂ ಉರ್ಲೊ?
ದಾಡಾಮಾಂ ಆಡ್ಚಾಲಿಂ ಮ್ಹಜಿಂ. ರವಿ ಹಳ್ಳೆಂತ್ಲ್ಯಾ ಹರ್ಯೆಕಾ ಕ್ರಿಸ್ತಾಂವ್ ಘರಾಂತ್ಲೆ ಬಾಯ್ಬಲ್ ಏಕ್ಚ್ ಏಕ್ ಉರಯ್ನಾಸ್ತಾನಾ ನಾಸ್ ಕರುನ್ ಉಡಯ್ಜಾಯ್ ಮ್ಹಣೊನ್ ಹಾವೆಂ ಕಮರ್ ಬಾಂದ್ಲ್ಲೆಂ.
ಆತಾಂ? ಆಂತೊನಿ ದ್ವಾರಿಂ ಏಕ್ ಬಾಯ್ಬಲ್ ಬಚಾವ್ ಜಾಲೊ?
ಕಟೀಣ್ ನಿರಾಅಶೆನ್ ಹಾತ್ ಸಾಯ್ಕಾಲಾಕ್ ಮಾರ್ನ್ ಘೆತ್ಲೆ ಹಾವೆಂ. ಹ್ಯಾಚ್ ನಿರಾಶಿ ಭೊಗ್ಣಾಂನಿ ಥೊಡ್ಯಾ ಮಿನುಟಾಂನಿ ಘರಾಕ್ ಲಾಗಿಂ ಜಾಲೊಂ ಹಾಂವ್.
ತಿತ್ಲ್ಯಾರ್! ಚೊವ್ತ್ಯಾ ಪಂಗ್ಡಂತ್ಲೆ, ಜೆ ಆಂತೊನಿಕ್ ರಾಕೊನ್ ರಾವ್ಲ್ಲೆ ತೇಗ್ ಜಣ್ ಅಚಾನಕ್ ಮ್ಹಜ್ಯಾಚ್ ಘರ್ಚ್ಯಾ ರಸ್ತ್ಯಾರ್ ನದ್ರೆಕ್ ಪಡ್ಲೆ.ಮ್ಹಜಿ ವಳೊಕ್ ಧರ್ಲ್ಲಿಚ್ ತೆ ತಕ್ಶಣ್ ಲಾಗಿಂ ಸರ್ಲೆ.
ಹಾವೆಂ ಸಾಯ್ಕಲ್ ಥಂಬಯ್ಲೆಂ.
"ರಮೇಶ್!" ತಾಂಚೆ ಪಯ್ಕಿಂತ್ಲೊ ಎಕ್ಲೊ ಎದ್ಗಾರ್ಲೊ. "ಆಮ್ಚೆಂ ಮಿಸಾಂವ್ ಪೂರ್ಣ್ ಜಾಲೆಂ ನಾ" ಭಿವ್ಕುರ್ಯಾ ವದಾನಾರ್ ತೊಚ್ ಉಲಯ್ಲೊ. "ರವಿ ಹಳ್ಳೆಂತ್ ದೆವಾಸ್ಪಣಾಕ್ ನಾಂವಾಡ್ಲ್ಲೊ ಆಂತೊನಿ ಡೆಸಾ, ಆಮ್ಚೊ ಇರಾದೊ ಕಳ್ಲ್ಲೊಚ್ ಬಾಯ್ಬಲ್ ಘೆವ್ನ್ ಕಾಳೊಕಾಂತ್ ಉಸಾಳ್ಳೊ. ಆಮಿ ರಾಕೊನ್ಚ್ ರಾವ್ಲ್ಯಾಂವ್. ಸುಮಾರ್ ವೆಳಾ ಉಪ್ರಾಂತ್ ಪಾಟಿಂ ಘರಾ ಪರ್ತಾಲ್ಲ್ಯಾ ತಾಚೆ ಹಾತಿಂ ಬಾಯ್ಬಲ್ ನಾತ್ಲ್ಲೊ. ತಾಣೆ ಖಂಯ್ ತರ್ಯ್ ಝಡಾ-ಬೊಲ್ಯಾಂನಿ ಲಿಪವ್ನ್ ದವರ್ಲಾ. ಅಖೇರಿಕ್ ತೋಂಡ್ ಸೊಡುಂಕ್ ಆಯ್ಕಾನಾತ್ಲೆಲ್ಯಾ ತಾಚಿಯ್ ಕಾಣಿ ಸಾಸ್ಣಾಕ್ ಮುಗ್ದಿಲಿ ಆಮಿ" ಕಳಯ್ಲೆಂ ತಾಣೆ.
ಲಾಂಬ್ ಉಸ್ವಾಸ್ ಸೊಡ್ಲೊ ಹಾವೆಂ.
ಆಂತೊನಿಚೆಂ ಆಖೇರ್ ಜಾಲೆಂ! ಆನಿ ತಾಚೊ ಬಾಯ್ಬಲ್ ಎಕಾ ಗುಪಿತ್ ಜಾಗ್ಯಾರ್ ಲಿಪೊನ್ ಉರ್ಲೊ!
ತರ್?
ಮ್ಹಜ್ಯಾ ವೊಂಟಾರ್ ಹಾಸೊ ಚರೊನ್ ಆಯ್ಲ್ಯೊ. ಜಯ್ತಾಚ್ಯೊ ಹಾಸೊ!
"ಕಾಂಯ್ ನಜೊ" ಉದ್ಗಾರ್ಲೊಂ ಹಾಂವ್. "ತಾಣೆ ಬಾಯ್ಬಲ್ ಝಡಾಂ-ಬೊಲ್ಯಾಂನಿ ಲಿಪವ್ನ್ ದವರ್ಲಾ ತರ್ ಆಮ್ಚೆಂ ಮಿಸಾಂವ್ ಪೂರ್ಣ್ ಜಾಲೆಂ ಮ್ಹಣ್ ಚಿಂತಾಂ. ಕಿತ್ಯಾಕ್, ಬೊಲ್ಯಾಂತ್ ಲಿಪ್ಲ್ಲೊ ಬಾಯ್ಬಲ್ ಸ್ವ್ಕಾಸ್ ಮಾತಿ ಖಾವ್ನ್ ವೆತಲೊ" ವೆಕ್ತ್ ರಿತಿನ್ ಜಯ್ತಾಚ್ಯೊ ಹಾಸೊ ಹಾಸ್ಲೊಂ ಹಾಂವ್.
ಹಾಂಗಾಚರ್ ಮ್ಹಜೆಂ ಮಿಸಾಂವ್ ಪೂರ್ಣ್ ಜಾಲ್ಲೆಂ. ಕ್ರಿಸ್ತಾಂವ್ ದೆವಾಸ್ಪಣಾಚೆಂ ಪುರ್ತೆಂ ನಾಸ್ ಜಾಲ್ಲೆಂ. ಎಕಾಚ್ ಎಕಾ ಕ್ರಿಸ್ತಾಂವ್ ಘರಾಂನಿ ತಾಂಚ್ಯೊ ಭಕ್ತಿಕ್ ವಸ್ತು ಉರ್ಲ್ಯೊ ನಾಂತ್. ಸರ್ವ್ ದೆಸ್ವಾಟೊನ್ ಗೆಲ್ಯೊ. ಎಕಾ ಉತ್ರಾನ್, ತಾಣಿ ಉಲಂವ್ಚಿ ಕೊಂಕ್ಣಿ ಭಾಸ್ ಏಕ್ ಸೊಡ್ಲ್ಯಾರ್, ರವಿ ಹಳ್ಳೆಂತ್ ಕ್ರಿಸ್ತಾಂವ್ ಜಿಯೆತಾತ್ ಮ್ಹಳ್ಳಿ ನಿಶಾನಿಚ್ ಪುಸುನ್ ಗೆಲ್ಲಿ.
ಮ್ಹಜ್ಯಾ ಕಾಳ್ಜಾಕ್ ಸಮಾಧಾನ್ ಜಾಲ್ಲೆಂ. ಮ್ಹಜಿ ಆವಯ್, ಫಾಂತ್ಯಾ ಫರಾರ್ ಮೆಳ್ಚೆ ಭಿರಾಂಕುಳ್ ಖಬ್ರ್ರೆನ್ ಥರ್ಥರೊನ್, ಘರಾಂತ್ ಬಾಯ್ಬಲ್ ಹಾಡ್ಚ್ಯಾಕ್ ಇನ್ಕಾರ್ ಕರ್ತೆಲಿ ಮ್ಹಳ್ಳಿಚ್ ಖುಶಿ ಮ್ಹಾಕಾ ಆತಾಂ ಒಟ್ಟಾರೆ ಜಯ್ತ್ ಮ್ಹಾಕಾಚ್ ಲಾಬ್ಲ್ಲೆಂ.
ತೆ ಚಲ್ಲೆ ಆಪಾಪ್ಲ್ಯಾ ಘರ್ಚ್ಯಾ ವಾಟೆನ್.
ಹಾಂವ್ ಘರ್ಚ್ಯಾ ಮುಕ್ಲ್ಯಾ ಬಾಗ್ಲಾರ್ ಉಭೊ ಜಾಲೊಂ. ಬಾಗ್ಲಾರ್ ವೀಜ್ ದಿವೊ ಜಳೊನ್ ಆಸ್ಲ್ಲೊ. ರಾತ್ಚೆಂ ಜಳವ್ನ್ ದವರ್ಚಿ ಸದಾಂಚಿ ಸವಯ್. ಮ್ಹಜಿ ಆವಯ್ ಬೋವ್ಶಾ ಗೂಂಡ್ ನಿದೆಂತ್ ಆಸಾ. ತಿ ಚಡಾವತ್ ಸಾಲಾಂತ್ಚ್ ನಿದ್ತಾಲಿ ಜಾಲ್ಲ್ಯಾನ್ ದಾರಾಚೆ ಖಿಳಿಚೊ ಲ್ಹಾನ್ ಆವಾಜ್ಯ್ ತಿಕಾ ಜಾಗಂವ್ಕ್ ಅಕ್ತಾಲೊ. ದೆಕುನ್ ಹಳ್ತಾರ್ ದಾರಾಕ್ ಚಾವಿ ರಿಗವ್ನ್ ದಾರ್ ಉಗಡ್ಲೆಂ ಹಾವೆಂ. ಪುಣ್ ಕಿತ್ಲೆಂ ಸಾಂಬಾಳ್ಳೆಂ ತರ್ಯ್ ದಾರಾ ಆವಾಜ್ ಜ್ಯೋರಾನ್ಚ್ ಸಾದ್ಲೊ.
ತಿಕಾ ಜಾಗ್ ಜಾಲಿ.
"ಆಯ್ಲೊಯೇ ಪುತಾ?" ಉಗ್ತ್ಯಾ ದಾರಾಂತ್ಲ್ಯಾನ್ ಭಿತರ್ ಸರ್ತಾನಾ ತಿಚೊ ತಾಳೊ ಆಯ್ಕಾಲೊ.
ಕಾವ್ಜೆಲೊಂ ಹಾಂವ್. ಕಾಳಿಜ್ ಬಾರಿಕಾಯೆನ್ ದಡ್ದಡ್ಲೆಂ. ಕಾರಾಣ್, ಎದೊಳ್ಚ್ ಕಳಯಿಲ್ಲೆಪರಿಂ ಮ್ಹಜ್ಯಾ ಆಂಗಾಪಾಂಗಾರ್ ದಾಟ್ಲ್ಲೆಂ ರಗಾತ್! ತಿ ಹೆಂ ದೆಕೊನ್ ಘಡ್ಬಡೊನ್ ವಿಚಾರಿತ್ ತರ್ ತಿಕಾ ಕಿತೆಂ ಜಾಪ್ ದೀಂವ್? ಕಾಂಯ್ ಚುಕೊನ್ ತಿಣೆ ಉಟ್ಚೆ ಆದಿಂ ಆಂಗ್ ನಿತಳ್ ಕರುಂಕ್ ಆಶೆಲೊಂ ಹಾಂವ್. ಪುಣ್ ನ್ಹಾಣಿ ಘರಾ ಭಿತರ್ಚ್ ಆಸ್ಲ್ಲಿ. ತರ್ಯ್ ಹಳೂ ಭಿತರ್ ಸರೊನ್ ವೀಜ್ ದಿವೊ ಪೆಟಯ್ನಾಸ್ತಾನಾಚ್ ನ್ಹಾಣಿಯೆಕ್ ರಿಗ್ಚಿ ಆಲೋಚನ್ ಮ್ಹಜಿ.
ಪುಣ್! ತಿತ್ಲೆ ಭಿತರ್ ತಿ ಉಟ್ಲಿ ಆನಿ ಹಾತಾಕ್ ಮೆಳ್ಲ್ಲೊ ಬಗ್ಲೆಕ್ಚ್ ಆಸ್ಲ್ಲೊ ಸಾಲಾಂತ್ಲ್ಯಾ ವೀಜ್ ದಿವ್ಯಾಚೊ ಬುತಾಂವ್ ತಿಣೆ ದಾಂಬ್ಲೊ.
ದಿವೊ ಜಳ್ಳೊ.
ಹಾವೆಂ ಥಿಂಪಿ ಗಿಳ್ಳಿ. ಕುಡಿವಯ್ಲೆಂ ರಗಾತ್ ಲಿಪಂವ್ಕ್ ಕಸಲೊಚ್ ಆವ್ಕಾಸ್ ನಾತ್ಲ್ಲೊ.
ತಿಣೆ ಪಳವ್ನ್ ಜಾಲ್ಲೆಂ!
"ಪುತಾ ಹೆಂ ಕಿತೆಂ?" ಮಾಂದ್ರೆ ವಯ್ಲಿ ಗಡ್ಬಡೊನ್ ರಗತ್ ಪಳವ್ನ್ ಬೋವ್ಶಾ ತಿಚೆಂ ಕಾಳಿಜ್ಚ್ ಹಾಲ್ಲೆಂ.
ಮ್ಹಾಕಾಚಿಂತುಂಕ್ಯ್ ಆವ್ಕಾಸ್ ನಾತ್ಲ್ಲೊ. ತಿಕಾ ಕಾಂಯ್ ತರ್ಯ್ ಸಾಂಗಾಜಾಯ್ ಆಸ್ಲ್ಲೆಂ ಹಾವೆಂ. ಹಾಂವ್ ಚುರುಕ್ ಜಾಲೊಂ.
"ಮಾಂಯ್" ಪಾದ್ದೆವ್ನ್ ಉಸ್ವಾಸ್ಲೊಂ ಹಾಂವ್ ಆನಿ ತಿಕಾ ಲಾಗಿಂ ಸರ್ಲೊಂ. "ಆಮ್ಚೆ ರವಿಹಳ್ಳೆಂತ್ ಭಿರಾಂಕುಳ್ ಘೊಟಾಳೊ ಉಬ್ಜಾಲಾ. ರಾತಾ-ರಾತಿಂ ಸರ್ವ್ ಕ್ರಿಸ್ತಾಂವಾಂಚಾ ಘರಾಂನಿ ಏಕ್ ಕೋಮುವಾದ್ ಪಂಗಡ್ ರಿಗೊನ್ ಕ್ರಿಸ್ತಾಂವಾಂಚಿ ಮೊಡಿಂ ನಿದಾವ್ನ್ ಆಸಾತ್. ತಾಂಚ್ಯಾ ಸಾಂತಾಂ-ಭಕ್ತಾಂಚ್ಯೊ ಇಮಾಜಿ ನಾಸ್ ಕರುನ್ ಆಸಾತ್. ಪಾರ್ಟಿ ಸಂಪವ್ನ್ ಘಾರಾ ಯೆತಾನಾ ವಾಟೆರ್ ತಾಂಚ್ಯಾ ಘಾಸಾಕ್ ಹಾಂವ್ ಅವ್ಚಿತ್ತ್ ಸಾಂಪಡ್ಲೊಂ. ತಾಣಿ ಮ್ಹಾಕಾಯ್ ಕ್ರಿಸ್ತಾಂವ್ ಮ್ಹಣ್ ಲೆಕುನ್ ಸರ್ಸ್ರೀತ್ ಬಡಯ್ಲೊ. ಪುಣ್ ದೆವಾಚೆ ದಯೆನ್ ಅಖೇರಿಕ್ ತರ್ಯ್ ಹಾಂವ್ ಕ್ರಿಸ್ತಾಂವ್ ನ್ಹಯ್ ಮ್ಹಣೊನ್ ಕಳ್ತಾನಾ ತಾಣಿಂ ಮ್ಹಾಕಾ ಸೊಡ್ಲೊ. ಮಾಂಯ್ ಕಾಲ್ಚ್ ತುಂ ಕ್ರಿಸ್ತಾಂವ್ಚೊ ಪವಿತ್ರ್ ಗ್ರಂಥ್ ಬಾಯ್ಬಲ್ ಘರಾ ಹಾಡುನ್ ದವರ್ಚೆ ವಿಶಿಂ ಉಲಯಿಲ್ಲಿಯ್. ಎಕಾದಾವೆಳಾರ್ ತಾಂಚೊ ಬಾಯ್ಬಲ್ ಹಾಡ್ನ್ ಆಮ್ಚ್ಯಾ ಘರಾಂತ್ ದವರ್ಲೊ ತರ್ ಮುಕಾರ್ ಆಮ್ಕಾಂಯ್ ಹ್ಯಾ ಕೋಮುವಾದಿ ಪಂಗ್ಡಾ ಥಾವ್ನ್ ವಾಂದೆ ಆಸ್ತೆಲೆ." ಎಕಾಚ್ ಧಮ್ಮಾನ್ ಮ್ಹಳ್ಳೆಪರಿಂ ಉಲಯ್ಲೊಂ ಹಾಂವ್. ಚಿಂತಿನಾತ್ಲ್ಲೆಪರಿಂ ಮ್ಹಜಿ ಜೀಬ್ ಘುಂವ್ಲ್ಲಿ. ತಿಚೆ ಮುಕಾರ್ ಬಾಯ್ಬಲಾವಿಶಿಂ ಇತ್ಲೆ ವೆಗಿಂ ಉಲಯ್ನ್ ಮ್ಹಣ್ ಮ್ಹಾಕಾ ಭೊಗ್ಲ್ಲೆಂಚ್ ನಾ. ಜೊಕ್ತ್ಯಾ ಉತ್ರಾಂನಿ, ತಿಚ್ಯಾ ಕಾಳ್ಜಾಕ್ ಬಾಯ್ಬಲಾವಿಶಿಂ ಕಠೀಣ್ ಭಿರಾಂತೆಚೊ ತೀರ್ ಸೊಡ್ಲೊ.
ಕಾಂಯ್ ಲಾಗ್ಲೊಚ್ ತಿಕಾ!
"ಜಣಾಂ ಹಾಂವ್" ತಿಣೆ ತೋಂಡ್ ಉಗಡ್ಲೆಂ.
ದೊಳೆ ರೂಂದಾಲೆ ಮ್ಹಜೆ.
"ಪುತಾ" ತಿಣೆ ಮುಕಾರುನ್ ಮ್ಹಳೆಂ, "ತೊಚ್ ಕೋಮುವಾದ್ ಪಂಗಡ್ ತ್ಯಾ ಆಂತೊನ್ ಡೆಸಾಚ್ಯಾ ಘರಾಯ್ ರಿಗ್ಲೊ ಖಂಯ್. ತಾಂಚ್ಯಾ ಘಾಸಾಂತ್ಲೊ ಚುಕವ್ನ್ ಘೆವ್ನ್ ಹಾಂಗಾಚರ್ ಧಾಂವೊನ್ ಆಯಿಲ್ಲೊ ತೊ ಆನಿ ಆಮ್ಚೆ ರವಿ ಹಳ್ಳೆಂತ್ಲೊ ಎಕ್ ಪುಣ್ಯ್ ಬಾಯ್ಬಲ್ ನಾಸ್ ಜಾಯ್ನಾಸ್ತಾಂ ರಾಕ್ಚ್ಯಾಕ್ ತಾಚೊ ಬಾಯ್ಬಲ್ ಮ್ಹಜೆ ಹಾತಿಂ ದೀವ್ನ್ ಚಲ್ಲೊ. ಬಾವ್ಡ್ಯಾಕ್ ಕಿತೆಂಯ್ ಘಡಾನಾ ಜಾಲ್ಯಾರ್ ಪುರೊ. ಆನಿ ಹಾಂವ್, ಕೊಣೆಯ್ ಮ್ಹಜೊ ಜೀವ್ ಕಾಡ್ಲ್ಯಾ ಶಿವಾಯ್, ಹೊ ಬಾಯ್ಬಲ್ ಖಂಚೆಚ್ ಘಡಿಯೆ ನಾಸ್ ಜಾಂವ್ಕ್ ಸೊಡ್ಚಿಂ ನಾ" ತಿಣೆ ಜೊಗಾಸಾಣೆನ್ ಆಪ್ಲ್ಯಾ ಆಡೊಸಾಕ್ ಲಿಪಯಿಲ್ಲೊ ಬಾಯ್ಬಲ್ ಭಾಯ್ರ್ ಕಾಡ್ಲೊ!
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
