ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ದೆವಾ ಕಿತೆಂ ಹಾಂವ್ ಉಲಯ್ತಾಂ? ಮ್ಹಜೆಂ ಕೊಶೆಡ್ದ್ ಖಂಯ್ ಲಿಪೊನ್ ಗೆಲಾಂ ತೆಂ ಕಳಿತ್ ನಾ. ತೆಂ ಆಸಾಗಿ ಯಾ ಮಾಯಾಗ್ ಕೆಲಾಂ(?). ನಾಂ ತರ್ ಹಾವೆಂ ಹ್ಯಾ ಪರಿಂ? ದುಸ್ರ್ಯಾಂಕ್ ದೋಶಿ ಕರ್ಚೆಂ. ಮ್ಹಜ್ಯಾ ಹಾತಾ ಸಕಯ್ಲ್ಯಾಂಕ್ ಉಪಾದ್ರ್ ಕರ್ಚೆಂ. ಬರೆಂ ಉಲವ್ನ್, ಬರೆಂ ಭಾಸಾವ್ಣೆ ಪಾಡ್ ಯಾ ಉಲ್ಟೆಂ ಕರ್ಚೆಂ ಫಕತ್ತ್ ಆಪ್ಲ್ಯಾ ಪರಿಧಿಂತ್ ಮಾತ್ರ್ ಜೀವ್ ಯಾ ಅಸ್ತಿತ್ವ್ ಆಸಾ ಮ್ಹಳ್ಳೆಂ ಚಿಂತಾಪ್ ಬಗ್ಲೆಕ್ ದವರ್ನ್ ಹಾಂವ್ ಜಿಯೆತಾಂ. ಹಾಂವ್ ಜಿಯೆತಾಂ
ಸತಾಂತ್ಲಿಂ ವಿಚಿತ್ರಾಂ - 9. ಹಾಂವ್ ಕೊಣ್?
ಜೆಮ್ಮಾ ಪಡೀಲ್
ದೆವಾ ತುವೆಂ ಮ್ಹಾಕಾ ಜನಮ್ ದಿಲಾಂಯ್. ಏಕ್ ಕುಡ್, ಕುಡಿ ಭಿತರ್ ಆವಾಜ್ ಕರ್ಚೆಂ ಕಾಳಿಜ್ ಆನಿ ಕಾಳ್ಜಾಥಂಯ್ ಆನಿ ಥಾವ್ನ್ ಆಶಾರ್ ಪಾಶಾರ್ ಜಾಂವ್ಚೆಂ ತಾಂಬ್ಡೆಂ ತಾಂಬ್ಡೆಂ ರಗಾತ್.
ಮ್ಹಜೆಂ ರಗಾತ್ ತಾಂಬ್ಡೆಂ - ಸಕ್ಡಾಂಚ್ಯಾ ರಗ್ತಾಬರಿ. ಜಾಲ್ಯಾರೀ ಮ್ಹಜೆಂ ರಗಾತ್ ಮ್ಹಾಕಾ ಸವಾಲ್ ಕರ್ತಾ ತುಂ ಕಿತ್ಯಾಕ್ ಅಸೊ?
ಹಾಂವ್ ಕೊಣ್ ಸೊಮ್ಯಾಂ? ಮ್ಹಜೆಂ ಜನಮ್ ಜಾಲ್ಲ್ಯಾ ಘರಾಂತ್ ಮ್ಹಾಕಾ ಏಕ್ ಕುಟಾಮ್ ದಿಲಾಂ. ಮೊಗಾಚಿಂ ಆನಿ ಮೋಗ್ ಕರ್ಚಿಂ ಆವಯ್ ಬಾಪಯ್. ಎಕಾಮೆಕಾ ಸಮ್ಜಂವ್ಚೆಂ ಭಾವ್ ಆನಿ ಭಯ್ಣ್ ಹಾಸೊನ್ ಖೆಳೊನ್ ಥೊಡೆ ಪಾವ್ಟಿಂ ಲಡಾಯ್ ಕರ್ಚೆಂ ಆಸಾ.
ಮ್ಹಾಕಾ ಏಕ್ ನಾಂವ್ ಆಸಾ, ನಾಂವಾ ಉಪ್ರಾಂತ್ ಏಕ್ ಅಲ್ಕುಂಞ್ ಆಸಾ- ತೆಂ ಮ್ಹಜ್ಯಾ ಬಾಪಾಯ್ ಥಾವ್ನ್ ಲಾಗೊನ್ ಆಯ್ಲಾಂ. ಮ್ಹಾಕಾ ಮ್ಹಜ್ಯಾ ಬಾಪಾಯ್ಚಾ ಆಲ್ಕುಂಞಾ
ಸಂಗಿಂ ಮ್ಹಾಕಾ ತಾಚಿ ಜಾತ್ ಫಾವೊ ಕೆಲ್ಯಾ. ಮ್ಹಾಕಾ ಮ್ಹಜಿಚ್ಚ್ ವಳೊಕ್ ನಾ. ಮ್ಹಜೆಂ ಅಂತಸ್ಕರ್ನ್ ಕಾಂತಯ್ತಾನಾ ಮ್ಹಾಕಾ ಬರೆಂ ಲಾಗಾನಾ. ಹಾಂವ್ ತ್ಯಾ ಅಂತಸ್ಕರ್ನಾಕ್ ಆಯ್ಕಾನಾ. ಆಯ್ಕೊಂಚೆಂ ಮನ್ ನಾ ಮ್ಹಾಕಾ. ಹಾಂವ್ ವ್ಹಡ್ ಜಾಲಾಂ. ಪ್ರಾಯ್ ಜಾಲ್ಯಾ. ಜೀವನಾಂತ್ ಪ್ರಗತಿ ಕರ್ಚೆಂ "ಬರೆಂ" ಕಾಮ್ ಹಾವೆಂ ಕೆಲಾಂ. ಹಾವೆಂ ಕಾಮ್ ಕರ್ಚ್ಯಾ ದಫ್ತರಾಂತ್ - ಸರ್ಕಾರಿ ದಫ್ತರಾಂತ್ ಕಿತೆಂಯ್ ಕಾಗ್ದಾಂ ಮುಕಾರ್ ವಚಾಜಯ್ ತರ್ ಹಾವೆಂ ನೋಟ್ ಪಳೆವ್ನ್ ಕಾಮ್ ಕರ್ಚೆಂ. ಗರ್ಜೆವಂತಾಂಕ್ ಹಾವೆಂ ಭಾಯ್ರ್ ದವರ್ಲಾಂ. ಮ್ಹಾಕಾಯ್ ಏಕ್ "ಬರೆಂ" ಕುಟಾಮ್ ಬಾಂಧುಂಕ್ ಆಸಾ. ಹೆಂ ಬಾಂಧುಂಕ್ ಹಾವೆಂ ದುಸ್ರ್ಯಾಚೆಂ ಘರ್ ಮೊಡ್ಲ್ಯಾರೀ ಪರ್ವಾ ನಾ! ಹಾಂವ್ ಕೊಣಾಕೀ ವ್ಹಳ್ಕಾನಾ! ಹಾವೆಂ ಮಾಂದ್ಚೆಂ ಆನಿ ವಳ್ಕೊಂವ್ಚೆಂ ಪೊಯ್ಶ್ಯಾಂಕ್ ಮಾತ್ರ್. ದೆವಾ ಹಾಂವ್ ತುಕಾ ದುರ್ಸತಾಂ. ತುವೆಂ ದಾಕವ್ನ್ ದಿಲ್ಲ್ಯಾ ವಾಟೆರ್ ಮ್ಹಜಿ ವಾಟ್ - ಹೆಂ ಆಯ್ಕೊನ್ ತುಕಾ ರಾಗ್ ಆಯ್ಲೊ?
ಆಯ್ಕಾತೆಲ್ಯಾರ್ ಆಯ್ಕ್ - ತುವೆಂ ಲೊಕಾಂ ಮಧೆಂ ಪ್ರಗತಿ ಕರ್ತಾನಾ, ಮತ್ ವಿಕಾಸ್ ಕರ್ತಾನಾ, ಸಂಸಾರ್ ಮುಕಾರ್ ಮುಕಾರ್ ಭರ್ವಶ್ಯಾಚಿಂ ಮೆಟಾಂ ಕಾಡ್ತಾನಾ ತುವೆಂ ತುಜ್ಯಾ ಬುಧ್ವಂತ್ ಲೊಕಾಕ್ ತಕ್ಲಿ ದೀವ್ನ್ ಹೆಂ ಸರ್ವ್ ಕರುಂಕ್ ಸಕ್ಲೆ. ತುವೆಂ ತುಜ್ಯಾ ಲೊಕಾಕ್ ಆಧ್ಲ್ಯಾ ಲೊಕಾಂನಿ ಸಾಂಭಾಳ್ಳೆಲ್ಯಾಬರಿ ಬೊಕ್ರ್ಯಾಂಕ್, ಗೊವ್ಳ್ಯಾಂಕ್ ಅಪ್ಲಿ ಆಸ್ತ್ ಮ್ಹಣ್ ಲೆಕ್ಚೆಂ ಕಿತ್ಯಾಕ್ ಪಾಟಿಂ ಘಾಲೆಂಯ್? ತುವೆಂ ನೋಟ್ ಕರುಂಕ್ ತಕ್ಲಿ ದಿಂವ್ಚಾ ಬದ್ಲಾಕ್ ಫಾತೊರ್ ದಿಲ್ಲೆ ತರ್ ಆಜ್ ಫಾತೊರ್ ವ್ಹಾವಂವ್ಕ್ ಯಾ ದವರುಂಕ್ ಜಾಗೊ ಪಾವ್ತೊನಾ. ತುವೆಂ ಬೊಲ್ಸಾಂತ್ ಚೆಪುಂಕ್ ಸಕ್ಚೆ ನೋಟ್ ದಿಲೆಯ್. ಹ್ಯಾ ನೊಟಾ ಧರ್ಮಾನ್ ಸರ್ವ್ ಬದಲ್ತಾನಾ ಹಾಂವ್ಯೀ ಬದಲ್ಲಾಂ ಸೊಮಿಯಾಂ!
ಹಾಂವ್ ಕಿತ್ಯಾಕ್ ಅಸೊ? ಹಾಂವ್ ಹರ್ಯೆಕ್ಲ್ಯಾಬರಿ ಏಕ್ ಮನಿಸ್. ಆಶಾ, ಅತ್ರೆಗ್, ಉಮಾಳೊ, ಉದ್ವೇಗ್, ಆಕಾಂತ್ ಆನಿ ಕಳ್ವಳೆ, ಮೊಸೊರ್, ರಾಗ್ ಪೊಟ್ಕಾಣಿ ಆನಿ ಅಬ್ಲೇಸ್ ಆಸ್ಲ್ಲೊ ಮನಿಸ್. ಮ್ಹಜ್ಯಾ ಅತಿರೇಕ್ ಅಬ್ಲೇಸ್ಪಣಾನ್ ಮ್ಹಾಕಾ ಸರ್ವ್ ಜಾಯ್. ಆರಾಂವ್ಚೆಂ ಏಕ್ ಪಿಶೆಂ ಆಧರ್ಲಾಂ ಹಾವೆಂ. ಹೆಂ ಕರುಂಕ್ ಹಾಂವ್ ಸಕ್ತೊಂನಾ ತುವೆಂ ಮ್ಹಾಕಾ ವಾಟೊ ದಾಖಯ್ನಾತ್ಲ್ಲೊ ತರ್..
ಹಾವೆಂ ಥೊಡ್ಯಾ ಘರಾಂನಿ ಭುರ್ಗ್ಯಾಂನಿ ಆಪ್ಲ್ಯಾ ಆವಯ್ ಬಾಪಾಯ್ಕ್ ದುರ್ಸೊಂಚೆಂ ಆಯ್ಕಾಲಾಂ. "ತುಮಿಂ ಕಾರಾಣ್ ಸರ್ವಾಕ್! ತುಮ್ಚ್ಯಾ ಧರ್ಮಾನ್ ಹಾಂವ್ ಆಸೊ!"
ದೆವಾ ಕಿತೆಂ ಹಾಂವ್ ಉಲಯ್ತಾಂ? ಮ್ಹಜೆಂ ಕೊಶೆಡ್ದ್ ಖಂಯ್ ಲಿಪೊನ್ ಗೆಲಾಂ ತೆಂ ಕಳಿತ್ ನಾ. ತೆಂ ಆಸಾಗಿ ಯಾ ಮಾಯಾಗ್ ಕೆಲಾಂ(?). ನಾಂ ತರ್ ಹಾವೆಂ ಹ್ಯಾ ಪರಿಂ? ದುಸ್ರ್ಯಾಂಕ್ ದೋಶಿ ಕರ್ಚೆಂ. ಮ್ಹಜ್ಯಾ ಹಾತಾ ಸಕಯ್ಲ್ಯಾಂಕ್ ಉಪಾದ್ರ್ ಕರ್ಚೆಂ. ಬರೆಂ ಉಲವ್ನ್, ಬರೆಂ ಭಾಸಾವ್ಣೆ ಪಾಡ್ ಯಾ ಉಲ್ಟೆಂ ಕರ್ಚೆಂ ಫಕತ್ತ್ ಆಪ್ಲ್ಯಾ ಪರಿಧಿಂತ್
ಮಾತ್ರ್. ಜೀವ್ ಯಾ ಅಸ್ತಿತ್ವ್ ಆಸಾ ಮ್ಹಳ್ಳೆಂ ಚಿಂತಾಪ್ ಬಗ್ಲೆಕ್ ದವರ್ನ್ ಹಾಂವ್ ಜಿಯೆತಾಂ. ಹಾಂವ್ ಜಿಯೆತಾಂ. ಹಾವೆಂ ಜಿಯೆಜಾಯ್, ಹೊ ಸಂಸಾರ್ ಮ್ಹಜೊ; ಮ್ಹಾಕಾ ಮ್ಹಳ್ಳೆಂ ಮೂಳ್ ಚಿಂತಾಪ್ ಕಾಳ್ಜಾಂತ್ ರೊಂಬೊನ್ ಗೆಲಾಂ.
ಜೀವನ್ ಮ್ಹಳ್ಯಾರ್ ಹೆಂಚ್ಗಿ? ಹ್ಯಾ ಜೀವನಾಂತ್ ಕಮಾಯ್ ಕರ್ಚಿ, ಪೊಯ್ಶೆ ಕರ್ಚೆಂ ಕಾಮ್ ಸೊಡ್ನ್ ದುಸ್ರೆಂ ಕಾಮ್ ಯಾ ಕೃತ್ಯೆಂ ದೆವಾ ತುವೆಂ ತುಜ್ಯಾ ಲೊಕಾಕ್ ಕರುಂಕ್ ಸಾಂಗೊಂಕ್ ನಾಂಯ್.
ದಯಾಳ್ ಕರ್ನಿ, ಮಾಯಾಮೋಗ್, ಬರೆಂ ಕಾಳಿಜ್, ದುಸ್ರ್ಯಾಂ ಥಂಯ್ ಹುಸ್ಕೊ, ಉಲ್ಲಾಸಿ ಮನ್.. ಹೆಂ ಸರ್ವ್ ಖಂಯ್ ಗೆಲಾಂ ಸೊಮಿಯಾಂ? ಜಿವಿತಾಚ್ಯಾ ಧಾಂವ್ಣೆಂತ್ ಜೀವನಾಚಿಂ ಮೌಲ್ಯಾಂ ಖಂಯ್ ಮಾಟ್ಯಾಂತ್ ಲಿಪ್ಲ್ಯಾಂತ್? ಧರ್ಣಿಂ ಪಂದಾಂ ಗೂಂಡ್ ಪಂದಾ - ತುಜ್ಯಾ ಮ್ಹನ್ಶಾನಿಂ ಭಾಂಗಾರ್ ವಜ್ರಾಂ ಭಾಯ್ರ್ ಕಾಡ್ಲಿಂ. ತಸಲ್ಯಾಂ ತುಜ್ಯಾ ಲೊಕಾಂನಿ ತುವೆಂ ಸರ್ವಾಂಕ್ ಎಕಾ ಮಾಪಾನ್ ದಿಲ್ಲಿಂ ಮೌಲ್ಯಾಂ ತಾಣಿಂ ಭಾಯ್ರ್ ಧಾಡ್ಲ್ಯಾಂತ್ - ದೇಶಾಂತರ್!
ತಶೆಂ ಆಸ್ತಾನಾ ಹಾವೆಂ ಕೆಲ್ಲ್ಯಾಂತ್ ಚೂಕ್ ಆಸಾ? ಆದಿಂ ತುಕಾ ರಾಗ್ ಆಯ್ಲ್ಯಾರ್ ತುಂ ಬುಡ್ತ್ಗೋಲ್ ಧಾಡ್ತಾಲೊಯ್; ಉಜ್ಯಾಚೊ ಪಾವ್ಸ್.. ಆತಾಂ ತುಜ್ಯಾ ಲೊಕಾಂನಿ ಎಕಾ ನಾ ಎಕಾಕ್ ವಕಾತ್ ತಯಾರ್ ಕೆಲಾಂ. ಕೊಣ್ ಮ್ಹಣ್ತಾ - ದೆವಾನ್ ಹರ್ಯೆಕ್ಲ್ಯಾಕ್ ಆಪ್ಲ್ಯಾ ಸುರುಪಾಯೆನ್ ಕೆಲಾ ಮ್ಹಣ್? ತುಜ್ಯಾ ಲೊಕಾಂನಿ ’ಕ್ಲೋನ್’ ಮುಖಾಂತ್ರ್ ತಾಂಕಾಂ ಜಾಲ್ಲೊ "ದುಸ್ರೊ" ತಯಾರ್ ಕರ್ತಾನಾ ತುಕಾ ಬರೆಂ ಲಾಗ್ಲೆಂ? ತುಜ್ಯಾ ಲೊಕಾಕ್ ತಕ್ಲೆಕ್ ಪಿಶೆಂ ಚಡ್ಲಾಂ. ನಾಂತರ್ ಎಕಾ ಖಿಣಾಭಿತರ್ ತುವೆಂ ಸಾತ್ ದಿಸ್ ಪುರಾಸಾಣೆಂನ್ "ಉಭೊ" ಕೆಲ್ಲೊ ಹೊ ಸಂಸಾರ್, ’ಖಲಾಸ್’ ಕರುಂಕ್ ಥೊಡೆ ಹೈಡ್ರೋಜನ್ ಬೋಂಬ್ ಉಡಯ್ಲ್ಯಾರ್ ಜಾಲೆಂ.
ತುವೆಂ ಹೆಂ ಪುರಾ ಕರ್ಚ್ಯಾ ’ಪಿಶ್ಯಾ’ ಲೊಕಾಕ್ ವೊಗೊಚ್
ರಾವೊನ್ ಕಸೆಂ ಸೊಸ್ತಾಯ್?
ಮ್ಹಾಕಾ ನಾಂವ್ ಆಸಾ. ತ್ಯಾ ನಾಂವಾಕ್ ಅರ್ಥ್ ನಾ. ಮ್ಹಾಕಾ ಎಕ್ ಕಾಳಿಜ್ ಆಸಾ. ತ್ಯಾ ಕಾಳ್ಜಾಕ್ ಆಟೊಮ್ ಬಾಂಬ್ ಸಯ್ತ್ ಲಾಗಾನಾ - ಜರ್ಲ್ಯಾ ಕಾಸ್ತಾಚೊ! ತುವೆಂ ದಿಲ್ಲೊ ಮೆಂದು ಚಾರ್ಯೀ ವಾಟಾಂನಿ ಕಾಮ್ ಕರ್ತಾ! ತುಂ ವೊಗೊಚ್ಚ್ ಆಸಾಯ್ ನ್ಹಂಯ್? ಹಾವೆಂ ಕಿತೆಂಯ್ ಜಾಲಾಂ ತರ್ ತುಜೆಂ ವರ್ವಿಂ! ಹೆಂ ಮ್ಹಜೆಂ ಚಿಂತಾಪ್ ಆನಿ ಸಿದ್ದಾಂತ್!
ಹಾಂವ್ ಮನಿಸ್ ನ್ಹಂಯ್. ಶಿಂತಿದ್ ಗುಡ್ಯಾಕ್ ಗೆಲಾ. ಬರೆಂ ಚಿಂತಾಪ್ ಲಿಂಬಾಕ್ ಗೆಲಾಂ. ದುಸ್ರ್ಯಾಂಚ್ಯಾ ಹರ್ಧ್ಯಾಕ್ ಪಾಂಯ್ ದವರ್ನ್ ಬೊಬೊ ಘಾಲ್ಚ್ಯಾ ಮ್ಹಾಕಾ ಪಿಶೆಂ ಸುರು ಜಾಲಾಂ ದೆವಾ ಹಿ ಮ್ಹಜಿ ವಿನತಿ - ದುಸ್ರೆಂ ತುಂ ಪಳೆವ್ನ್ ವೊಗೊಚ್ಚ್ ರಾವಾನಾಕಾ, ದೊಳೆ ಧಾಂಪಿನಾಕಾ, ಅನ್ನ್ಯಾಯ್ ಅತ್ತ್ಯಾಚಾರ್ ಆನಿ ಸತ್ತ್ಯಾನಾಸ್ ಜಾಂವ್ಕ್ ತಯಾರ್ ಕರ್ಚ್ಯಾ ಸರ್ವಾಂಕ್ ಮತಿಭೃಶ್ಟ್ ಕರ್! ನಾಂತರ್ ತೆಂ ಉರ್ಲ್ಲ್ಯಾಂಕ್ ಪಿಶೆ ಕರ್ತೆಲೆ.
ದೆಖುನ್.. ಹೊ ಉಲೊ ತುಕಾ. ತುಂ ಸರ್ವ್ ಜಾಣಾಂಯ್ ತರ್ ಹೊ ನಾಟಕ್ ಕಸೊ ಚಲ್ತಾ ಆಜ್ ಹ್ಯಾ ಸಂಸಾರಾರ್?
ಆಧ್ಲೆ ಆಂಕ್ಡೆ: ಸಂವಾದ್, 1, 2, 3, 4, 5, 6, 7, 8
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
