ತಾರಿಕೆರ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಅಕ್ತೋಬರ್ 14 ತಾರಿಕೆರ್ ಅವ್ಚಿತ್ ಮೊರ್ನಾಂತ್ ಅಂತರ್‌ಲ್ಲ್ಯಾ ಬಾಳ್ ಮೆಲಿಸ್ಸಾಚ್ಯಾ ಉಡಾಸಾಚೆಂ ಹೆಂ ಪಾನ್

Placeholder: the original page gave this picture no description, and none has been written yet. It came from daaiz\daaiz\special\melissa.asp.

ಹಿಂ ಕಾಳ್ಜಾಂತ್ಲಿ ಭಗ್ಣಾಂ....

ಉಗ್ತ್ಯಾ ಹಾತಿಂ ತುಜ್ಯಾ ಹುಜಿರ್.....

ಗೊವಿಯಸ್ ಕುಟ್ಮಾ ವೊಡ್ತಾಂತ್ ದಾಧೊಸ್ಕಾಯೆಚೆಂ ಫುಲ್ ಜಾವ್ನ್ ಆಮ್ಚ್ಯಾ, ಮ್ಹಣ್ಜೆ, ಮ್ಹಜ್ಯಾ ಆನಿಂ ಮಾಯ್ಕಾಲಾಚ್ಯಾ ಮೊಗಾಕ್ ಸಂಪೂರ್‍ಣ್ ಕರ್‍ಚ್ಯಾ ಖಾತಿರ್ ಆಮ್ಚ್ಯಾ ಜಿವಿತಾ ಸಾಗೊರಾಂತ್ ಉದೆವ್ನ್ ಆಯಿಲ್ಲೆಂ, ದೆವಾಚ್ಯಾ ಕಾಕುಳ್ತಿನ್ ಆಮ್ಕಾಂ ಫಾವೊ ಕೆಲ್ಲೆಂ ಆಮ್ಚೆಂ ಮಾಲ್ಗಡೆಂ ಬಾಳ್ ಮೆಲಿಸ್ಸಾ, ಆಮ್ಚ್ಯಾ ಕಾಳ್ಜಾಂ ಮನಾನಿಂ ಸಂತೊಸಾಚಿಂ ಲ್ಹಾರಾಂ ಹಾಡುನ್, ತಾಚ್ಯಾ ಲ್ಹಾನ್ಶ್ಯಾ ಜಿಣಿಯೆಂತ್ ಮನ್ಶಾ ಜಿವಿತಾಚ್ಯಾ ಅನಂತ್ ಸುಖಾಚಿಂ ಆನಿಂ ಭಗ್ಣಾಂಚಿ ವಳೊಕ್ ಖರಿಚ್ಚ್ ದೀವ್ನ್ ರಚ್ನಾರಾಚ್ಯಾ ಉತ್ರಾಕ್ ಪಾಳೊ ದೀವ್ನ್ ಆಜ್ ಅಮ್ಚೆ ಸಂಗಿಂ ನಾತ್‌ಲ್ಲೆ ವೆಳಿಂ ಆಮ್ಚ್ಯಾ ಕಾಳ್ಜಾಚೆ ಉಮಾಳೆ ಉಚಾರುಂಕ್ ಮಾಯ್ಕಲಾ ಸಾಂಗಾತಾ ಹಾಂವ್ ತುಮ್ಚೆ ಮುಕಾರ್ ಆಸಾಂ.

ಮೊಗಾಚಾನೊಂ, ಮ್ಹಜ್ಯಾ ಕಾಳ್ಜಾಂತ್ಲಿ ಭಗ್ಣಾಂ ಖರಿಂಚ್ಚ್ ಸಾಂಗ್ಚೆಂ ತರ್ ಆಮ್ಚೆಂ ಬಾಳ್ ಮೆಲಿಸ್ಸಾ ಕುಟ್ಮಾಂತ್ ವಾಡೊನ್ ಯೆಂವ್ಚೆಂ ಏಕ್ ಭುರ್ಗೆಂ ಮಾತ್ರ್ ನ್ಹಯ್ ಬಗರ್ ಆಮ್ಚ್ಯಾ ಕುಟ್ಮಾಚಿ ಸಕತ್ ಜಾವ್ನಾಸ್‌ಲ್ಲೆಂ. ತಾಚ್ಯಾ ತರ್‍ನ್ಯಾ ಪ್ರಾಯೆಕ್ ಮಿರ್ವೊನ್ ವಿಚಿತ್ರ್ ಶೆಗುಣಾಚೆಂ ಭಂಡಾರ್ ತೆಂ ಜಾವ್ನಾಸ್‌ಲ್ಲೆಂ ಮ್ಹಳ್ಯಾರ್ ಕಾಂಯ್ ಚೂಕ್ ಜಾಂವ್ಚಿ ನಾ ಮ್ಹಣ್ ಮ್ಹಾಕಾ ಭಗ್ತಾ. ಜಲ್ಮಾಲ್ಲೆ ದೀಸ್ ಥಾವ್ನ್ ನೋವ್ ವರ್ಸಾಂ ಪರ್‍ಯಾಂತ್ ಆಮ್ಚ್ಯಾ ಜೀವನಾಂತ್ ಹರ್ಯೆಕಾ ಘಡಿಯೆ ಹರ್ಯೆಕಾ ದೀಸ್ ಸಂತೊಸಾಚೆಂ ತುಫಾನ್ ಹಾಡುನ್ ಅಯಿಲ್ಲೆಂ ಆಮ್ಚೆಂ ಮೆಲಿಸ್ಸಾ.

$Placeholder: the original page gave this picture no description, and none has been written yet. It came from daaiz\daaiz\special\melissa.asp.$ $Placeholder: the original page gave this picture no description, and none has been written yet. It came from daaiz\daaiz\special\melissa.asp.$

[ತೀನ್ ವರ್ಸಾಂಚೆಂ ಬಾಳ್ ಮೆಲಿಸ್ಸಾ]

1998 ವರ್ಸಾ ಜನೆರಾಚ್ಯಾ 12 ತಾರಿಕೆರ್ ಕೊಡ್ಯಾಳ್ಚ್ಯಾ ಕುಲಾಸೊ ಅಸ್ಪತ್ರೆಂತ್ ಜಲ್ಮೊನ್ ಪಯ್ಲೆ ಪಾವ್ಟಿಂ ತಾಚೆಂ ತೊಂಡ್ ಪಳೆಯ್ತಾನಾ ಸರ್ಗಿಂಚ್ಯಾ ದಳ್ಭಾರಾಚೊ ಆಂಜ್, ಸಂಸಾರಿ ಆಯಿಲ್ಲ್ಯಾ ಬರಿ ಮ್ಹಾಕಾ ಭಗ್‌ಲ್ಲೆಂ. ಗುಲೊಬಾ ಸಾರ್ಕ್ಯಾ ಸೊಭಾಯೆಚೆಂ ತೊಂಡ್, ನಾಜೂಕ್ ಮಾಣ್ಕುಳೆ ಹಾತ್, ಝಿಳ್ಮಿಳ್ಚೆ ದೊಳೆ ಮ್ಹಾಕಾ ಸರ್ವಯ್ ಕಾಳಾಚಿ ಧಾದೊಸ್ಕಾಯ್ ದಿಂವ್ಕ್ ಲಾಗ್‌ಲ್ಲೆ.

[ಪಯ್ಲೊ ಕುಮ್ಗಾರ್ ಘೆತ್‌ಲ್ಲ್ಯಾ ದಿಸಾ ಕಾಡ್‌ಲ್ಲಿ ತಸ್ವೀರ್]

ಬೆಂಗ್ಳುರ್‍ಚ್ಯಾ ಅಶೋಕ್‌ನಗರಿಂ ವಾಡೊನ್ ಯೆತಾನಾ, ಸರ್ವಾಂಚೆಂ ಗಮನ್ ತಾಚೆಶಿಂ ವೊಡ್‌ಲ್ಲೆಂ ತಾಣೆಂ. ಆಪ್ಲ್ಯಾ ನಡ್ತ್ಯಾನ್ ಸರ್ವಾಂಕ್ ದಾಧೊಸ್ಕಾಯ್ ದಿಂವ್ಚ್ಯಾಂತ್ ಯಶಸ್ವಿ ತೆಂ ಜಾಲ್ಲೆಂ.

[ಮೆಲಿಸ್ಸಾ ಆಪ್ಲಿಂ ತಾಲೆಂತಾಂ ವಾಪಾರ್ತಾನಾ, ತಶೆಂಚ್ ಪಯ್ಲೊ ಕುಮ್ಗಾರ್ ಸೆವ್ನ್, ಆಪ್ಲ್ಯಾ ಮೊಗಾಳ್ ಆವಯ್ ಬಾಪಯ್ ಆನಿ ಭಯ್ಣಿಸವೆಂ]

ಶಿಕ್ಪಾಂತ್ ತಾಚಿ ಆತುರಾಯ್ ಪಳೆವ್ನ್ ದೋನ್ ವರ್ಸಾಂಚೆರ್‌ಚ್ಚ್ ಖೆಳಾ ಇಸ್ಕೊಲಾಕ್ ತಾಕಾ ದಾಖಲ್ ಕೆಲೆಂ. ತೀನ್ ವರ್ಸಾಂಚ್ಯಾ ಪ್ರಾಯೆರ್ ಆಮಿಂ ಮಸ್ಕತ್ ಯೆತಚ್ಚ್, ತಾಕಾ ಕೆಜಿ ಏಕ್ ವರ್‍ಗಾಕ್ ಭರ್‍ತಿ ಕೆಲೆಂ ಆನಿಂ ಅಶೆಂ ವಾಡ್ತಾಂ ವಾಡ್ತಾಂ ವಿಚಿತ್ರ್ ಜಾಣ್ವಾಯೆನ್ ಆನಿಂ ತಾಲೆಂತಾನಿಂ ಭರೊನ್ ತೆಂ ಆಯಿಲ್ಲೆಂ.

[ಮೆಲಿಸ್ಸಾ ಶಿಕ್ಪಾಂತ್, ತಶೆಂಚ್ ಹೆರ್ ಸೃಜನಾತ್ಮಕ್ ಚಟುವಟಿಕಾಂನಿ]

ಸೊಭಾಯೆಚಿ ಬಾವ್ಲಿ ತಶೆಂಚ್ಚ್ ಅಕರ್ಶಿತ್ ಗುಣಾ ಶೆಗುಣಾಚೆಂ ಭಂಡಾರ್ ತೆಂ ಜಾವ್ನಾಸ್‌ಲ್ಲೆಂ. ವ್ಹಡಿಲಾಂಚ್ಯಾ ಶಿಕೊವ್ಣೆ ಪ್ರಮಾಣೆ ದಿಸಾಚಿಂ ಸೊಳಾ ವೊರಾಂಚೊ ಫಾವೊತೊ ಉಪ್ಯೋಗ್ ಕರ್‍ತಾಲೆಂ. ವಾಡೊನ್ ಯೆತಾಂ ಯೆತಾಂ ಆತ್ಮಿಕ್ ಸಂಗ್ತಿನಿಂ ತೆಂ ಬೋವ್ ಘಟ್ ಜಾಲ್ಲೆಂ. ದೆವಾಕ್ ಆಪ್ಲೆ ಜಿಣ್ಯೆಂತ್ ಪಯ್ಲೆಂ ಸ್ಥಾನ್ ತಶೆಂಚ್ಚ್ ಮಾಗ್ಣ್ಯಾಕ್ ಪ್ರಾಮುಖ್ಯತಾ ತಾಣೆಂ ದಿಲ್ಲಿ. ದೆವಾಚೆ ಧಾ ಉಪದೆಸ್ ಆಪ್ಲ್ಯಾ ಶಿಕ್ಪಾ ಮೇಜಾಚೆರ್ ಬರವ್ನ್ ದವರ್‍ನ್ ತಾಕಾ ಸಂಬಂಧ್ ಜಾಲ್ಲೆ ಉಪದೆಸ್ ತೆಂ ಸದಾಂ ಪಾಳ್ತಾಲೆಂ. ಸುಟಾವೆಂ ಸಾಂಗ್ಚೆಂ ತರ್ ತಾಚೆ ಬರೆ ಗೂಣ್ ಶೆಗುಣ್ ಜಾಯ್ತ್ಯಾ ವ್ಹಡಾಂಕ್ ಲಜೆಕ್ ಘಾಲ್ಚೆ ತಸಲೆ. ಅಪ್‌ಸ್ವಾರ್ಥ್, ಮೊಸ್ರಾಚೊ ಕಿಸೊರ್ ಸಯ್ತ್ ತಾಚ್ಯಾ ಥಂಯ್ ನಾತ್‌ಲ್ಲೊ. ಖೊಟ್ಯಾ ಸ್ಪಿರಿತಾಕ್ ತಾಚ್ಯಾ ಜೀವನಾಂತ್ ಇಡೆಂ ತಾಣೆಂ ಕೆದಿಂಚ್ಚ್ ದಿಲ್ಲೆಂನಾ. ಸಾಕ್ರಿಫಿಸ್ ಆನಿಂ ಭಗ್ಸಾಣ್ಯಾಂಚೊ ಸ್ಪಿರಿತ್ ಕೊಂತಾ ರುಪಾರ್ ತಾಣೆಂ ಸದಾಂಚ್ಚ್ ಪಾಂಗುರ್‌ಲ್ಲೊ. ಆಮಿಂ ಕಿತೆಂ ಸಾಂಗ್ಲ್ಯಾರಿ, ಕಿತ್ಲೊಯ್ ರಾಗ್ ತಾಚೆ ವಯ್ರ್ ದಾಕಯ್ಲ್ಯಾರಿ, ಶಾಂತ್ ಸ್ವಭಾವ್ ತಾಚೊ ಆಮ್ಕಾಂ ಲಜೆಕ್ ಘಾಲ್ತಾಲೊ. ವ್ಹಡಾನಿಂ ಕಿತೆಂ ಸಾಂಗ್ಲೆಂ ತೆಂ ಧ್ಯಾನ್ ದೀವ್ನ್ ಆಪ್ಲ್ಯಾ ಜಿಣ್ಯೆ ಚಾಲಿಂತ್ ಗಮನ್ ದೀವ್ನ್ ಆಪ್ಣಾಯ್ತಾಲೆಂ. ಜಾಂವ್ ಇಸ್ಕೊಲಾಂತ್ ಜಾಂವ್ ಇಗರ್ಜೆಂತ್, ಗರ್ಜೆವಂತಾಕ್ ಕುಮ್ಕೆಚೊ ಹಾತ್, ತಶೆಂಚ್ಚ್ ಆಪ್ಲ್ಯಾ ವಸ್ತುಂಚೊ ಸಾಕ್ರಿಫಿಸ್ ಕರ್‍ನ್ ಹೆರಾಂ ಥಂಯ್ ವಾಂಟುನ್ ಘೆಂವ್ಚೊ ಮಹಾನ್ ಸ್ವಭಾವ್ ತಾಚೊ.

[ಆಪ್ಲ್ಯಾ ಪ್ರಾಯೆಚ್ಯಾ ಹೆರ್ ಸಾಂಗಾತ್ಯಾಂ ಸವೆಂ]

ಘರಾ ಯೆತಚ್ಚ್ ತಾಚ್ಯಾ ಮೊಗಾಚ್ಯಾ ಮಾಲ್ಗಡ್ಯಾ ಬಾಪ್ಪು ಕಡೆ ಆಪ್ಣೆ ಕೆಲ್ಲ್ಯಾ ಸಾಕ್ರಿಫಿಸಾಂಚೆ ಸಭಾರ್ ಧಾಕ್ಲೆ ತಾಣೆ ದಿಲ್ಯಾತ್. "ದಿಲ್ಲ್ಯಾಂತ್ ಆಮಿಂ ಘೆತಾಂವ್ ಆನಿಂ ತ್ಯಾ ವೊರ್‍ವಿಂ ದೆವಾಚೆಂ ಬೆಸಾಂವ್ ಆಮ್ಚೆರ್" ಮ್ಹಳ್ಳೊ ಧ್ಯೇಯ್ ತಾಚೊ. ಸಂಸಾರಿ ವಸ್ತುಚಿಂ ಆಶಾ ಕೆದಿಂಚ್ಚ್ ತಾಣೆ ದಾಕಯಿಲ್ಲಿ ನಾ. ಆಸಾ ತ್ಯಾ ವಸ್ತುಂಚೊ ಪ್ರಯೋಗ್, ನಾ ತರ್ ಪರ್‍ವಾನಾ. "ತುಕಾ ಕಿತೆಂಯ್ ಜಾಯ್‌ಗಿ ಪುತಾ?" ಮ್ಹಣ್ ಹಾಂವ್ ವಿಸಾರಿನ್ ತರ್ "ವ್ಹಡ್ ನ್ಹಯ್... ಮಮ್ಮ ಆಸ್‌ಲ್ಲ್ಯಾಂತ್ ಹಾಂವ್ ಸುಧಾರ್‍ಸಿತಾಂ, ಪಯ್ಶೆ ವಿಭಾಡಿನಾಕಾ" ಮ್ಹಳ್ಳಿಂ ಖಾಲ್ತಿಂ ಉತ್ರಾಂ ತಾಚಿಂ. ಆನಿಂ ಪರತ್, ಕಿತೆಂಯ್ ಜಾಯ್‌ಗೀ ಮ್ಹಣ್ ವತ್ತಾಯ್ ಕರಿನ್ ತರ್, "ತುಜಿ ಖುಶಿ ಕಶಿ ಅಸಾ ತಶಿ ಕರ್....... ಮ್ಹಾಕಾ ಕಶೆಂಯ್ ಚಲ್ತಾ" ಮ್ಹಣ್ ಮ್ಹಣ್ತಾಲೆಂ.

[ಮೆಲಿಸ್ಸಾ ಗಾಯನ್ ಕರ್ಚೆ ವೆಳಾರ್ - ಬಗ್ಲೆಕ್ ಆಪ್ಲಿ ಮೊಗಾಳ್ ಆವಯ್ ನಿರ್ಮಲಾ]

ತಾಣೆಂ ಆಪ್ಣಾಕ್ ಜಾಯ್ ಮ್ಹಣ್ ಹಟ್ ಕರುನ್ ವಿಸಾರ್‌ಲ್ಲೆಂ ಏಕ್‌ಚ್ಚ್ ಏಕ್ ಸಂಗತ್ ಆಮ್ಕಾಂ ಕಳಿತ್ ನಾ. ಆಮ್ಕಾಂ ದುಸ್ರೆಂ ಭುರ್‍ಗೆಂ ಚೆಡುಂ ಆನಿಂ ತಾಕಾ ಭಯ್ಣ್ ಜಾಯ್ ಮ್ಹಣೊನ್ ತೆಂಚ್ಚ್ ಮಾಗ್ತಾಲೆಂ. ತಾಣೆಂ ಮಾಗ್‌ಲ್ಲೆಂಚ್ಚ್ ಆಮ್ಕಾಂ ದೆವಾನ್ ಫಾವೊ ಕೆಲೆಂ. ಮೆಲಿಸ್ಸಾ ಜಲ್ಮೊನ್ ಸಾತ್ ವರ್ಸಾಂ ಉಪ್ರಾಂತ್ ಮೆಲಿಸ್ಸಾ ಬರಿಚ್ಚ್ ಅಮ್ಕಾಂ ಜಲ್ಮಲ್ಲ್ಯಾ ಮೆಲಿನಾ ಮಾಣ್ಕುಳ್ಯಾಕ್, ವಾಡೊನ್ ಯೆತಾನಾ ಹಾಂಡಿಯೆರ್ ವಾವೊವ್ನ್ ವೊರ್‍ತೊ ಮೋಗ್ ತೆಂ ದಿತಾಲೆಂ. ಮೆಲಿನಾ, ಉಲೊವ್ಣ್ಯಾಂತ್ ಅನಿ ರುಪ್ಣ್ಯಾಂತ್ ಮೆಲಿಸ್ಸಾ ಬರಿಂಚ್ಚ್ ಅಸಾ.

[ನಾಚ್ ನಾಸ್ಚೆಂ ಬಾಳ್ ಮೆಲಿಸ್ಸಾ]

ಆಮ್ಚೆಂ ಗಮನ್ ಅನಿಂ ಧ್ಯಾನ್ ಮೆಲಿನಾ ವಯ್ರ್ ವಾಳ್ತಾಲೊ ಜಾಲ್ಯಾರಿ ತೆಂ ಮೊಸೊರ್ ಜಾಂವ್ ಬೆಜಾರ್ ಜಾಂವ್ ಪಾವೊಂಕ್‌ಚ್ಚ್ ನಾ.....ಹೆಂ ಪಳವ್ನ್ ವಿಜ್ಮಿತ್ ಜಾಲ್ಲ್ಯಾ ಹಾಂವೆಂ ತಾಕಾ ಸವಾಲ್ ವಿಚಾರ್‌ಲ್ಲೆಂ ಆಸಾ "ಬಾಳಾ, ಆಮಿಂ ಮೆಲಿನಾಚೊ ಇತ್ಲೊ ಮೋಗ್ ಕರ್ನ್ ತುಕಾ ಚಡ್ ಧ್ಯಾನ್ ದಿನಾತ್‌ಲ್ಲ್ಯಾ ವೇಳಾರ್ ತುಕಾ ಕಿತೆಂಚ್ಚ್ ಭಗಾನಾಂಗಿ????" ತಾಚಿ ಜಾಪ್ ಜಾವ್ನಾಸ್ತಾಲಿ..." ಮಮ್ಮ, ತುಮಿಂ ಮ್ಹಾಕಾ ಸಾತ್ ವರ್ಸಾಂ ಮೊಗಾನ್ ವೆಂಗ್ಲಾಂ ಆನಿಂ ದಾಧೊಶಿ ಕೆಲಾಂ ಆನಿಂ ಅತಾಂ ಮೆಲಿನಾ ಲ್ಹಾನ್, ತಾಕಾ ತುಮ್ಚೊ ಭರ್ಪೂರ್ ಮೋಗ್ ದಿಯಾ........" ಆಟ್ ವರ್ಸಾಂಚ್ಯಾ ಪ್ರಾಯೆರ್ ತಾಚಿಂ ಹಿಂ ಉತ್ರಾಂ ಆಯ್ಕೊನ್ ಹಾಂವ್ ಥಟಕ್ಕ್ ಜಾತಾಲಿಂ.

ಕಿತೆಂಯ್ ರಾಗ್ ಯೇವ್ನ್ ತಾಕಾ ಕಿತೆಂಯ್ ಮ್ಹಳ್ಳೆಂ ತರ್.....ಉಪ್ರಾಂತ್ ಏಕಾ ಮಿನುಟಾನ್ ತಾಚೆ ಲಾಗ್ಗಿಂ ಪರತ್ ಉಲಯಿಲ್ಲ್ಯಾ ವೇಳಾರ್ ತಾಚಿಂ ಆಮೂಲ್ಯ್ ಉತ್ರಾಂ ಹಿಂಚ್ಚ್ ಜಾವ್ನಾಸ್ತಾಲಿಂ " ಮಮ್ಮ, ಡಾಡಾ, ತುಮಿಂ ಮ್ಹಾಕಾ ಕಿತೆಂಯ್ ಮ್ಹಳ್ಯಾರೀ ವ್ಹಡ್ ನಾ ..ತುಮಿ ಮ್ಹಜಿಂಚ್ಚ್ ನ್ಹಯ್‌ವೇ?......ಮ್ಹಜ್ಯಾ ಬರ್‍ಯಾಕ್‌ಚ್ಚ್ ತುಮಿಂ ಮ್ಹಾಕಾ ಗೊಜಿ ಕರ್‍ತಾತ್ ನ್ಹಯ್‌ವೇ?" ಮ್ಹಳ್ಳಿಂ ಉಂಚ್ಲಿಂ ಉತ್ರಾಂ ಆಜ್ ನಿಯಾಳ್ತಾನಾ ಮ್ಹಜೆಂ ಕಾಳಿಜ್ ಶಿರ್ಶಿರ್‍ತಾ.

[ಆಪ್ಲ್ಯಾ ತಾಲೆಂತಾಂ ಖಾತಿರ್ ವೆವೆಗ್ಳಿಂ ಇನಾಮಾಂ ಆಪ್ಣಾಯ್ತಾಸ್ತಾನಾ]

ಘರಾಂತ್ ಬಾಪ್ಪು ಮೌಶಿ ಆಯ್ಲಿಂ ತರ್ ತಾಂಕಾ ವೊರ್‍ತೊ ಮೋಗ್ ದಿತಾಲೆಂ. ಆಯಿಲ್ಲ್ಯಾಂಕ್ ಪಾಟಿಂ ಘರಾ ವಚೊಂಕ್ ಸೊಡಿನಾತ್‌ಲ್ಲೆಂ. ಗಾವಾಂತ್ ಅಸ್ಚ್ಯಾ ಮಾಂಯ್ ಆಬಾಚೊ, ಪೊದೊರ್ನ್ ಮೊದೊರ್ನಿಚೊ, ಮೌಶಿ, ಅಕಯ್, ಬಾಪ್ಪು, ಮಾಮ್ ಆನಿಂ ಮಾಮಿ ಏಕಾ ರುಕಾಚಿಂ ಫಳಾಂ ಆಮಿಂ ಮ್ಹಣೊನ್ ಸರ್‍ವಾಂಚೊ ಉಡಾಸ್ ಕಾಡುನ್ ಮೊಗಾನ್ ವೆಂಗ್ತಾಲೆಂ. ಸರ್‍ವ್ ಇಷ್ಟಾಂ ಮಂತ್ರಾಂಕ್ ತೆಂ ವಳ್ಕಾತಾಲೆಂ. ಭರ್ಪೂರ್ ಮೋಗ್ ದಿತಾಲೆಂ. ಆಮ್ಚ್ಯಾ ಘರಾ ಕಾಮಾಕ್ ಅಸ್ಚ್ಯಾ ರೆಮೆದ್ ಬಾಯೆಕ್ ತೆಂ ಆಪ್ಲ್ಯಾ ಮ್ಹನ್ಶಾಂ ಬರಿಚ್ಚ್ ಲೆಕ್ತಾಲೆಂ. ತಿ ಆಮ್ಚಿಚ್ಚ್ ಆನಿಂ ಹಾಂವ್ ಆನಿಂ ಮೆಲಿನಾ ತಿಚ್ಯಾ ಭುರ್ಗ್ಯಾಂ ಬರಿಚ್ಚ್ ಮ್ಹಣ್ ತೆಂ ಸದಾಂಚ್ಚ್ ಮ್ಹಣ್ತಾಲೆಂ ಕಿತ್ಯಾಕ್ ದೆವಾ ಮುಕಾರ್ ಆಮಿಂ ಸರ್‍ವ್ ಏಕ್‌ಚ್ಚ್ ಮ್ಹಳ್ಳೆಂ ಸತ್ ತೆಂ ಜಾಣಾಸ್‌ಲ್ಲೆಂ.

"ಖಂಚಾಯ್ ಕಾರ್‍ಯಾನಿಂ ಮುಕಾರ್ ವೊಚ್ ಮಮ್ಮ, ತುಂ ಮುಕಾರ್ ಗೆಲ್ಯಾರ್ ಹಾಂವ್ ಮುಕಾರ್ ವೆತಾಂ" ಮ್ಹಳ್ಳಿಂ ಉತ್ತೇಜನಾಚಿಂ ಉತ್ರಾಂ ಕೆದ್ನಾಂಯ್ ಮ್ಹಾಕಾ ಸಾಂಗ್ತಾಲೆಂ. ಖಂಚಾಯ್ ಸ್ಪರ್ಧ್ಯಾಂತ್ ಭಾಗ್ ಘೆಂವ್ಕ್ ಆಮ್ಚೊ ದೊಗಾಂಯ್ಚೊ ಉಂಚ್ಲೊ ಹಾತ್. ಬಹುಮಾನ್ ನ್ಹಯ್ ಬಗರ್ ಪಾತ್ರ್ ಘೆಂವ್ಚೆಂ ಪ್ರಮುಖ್ ಮ್ಹಳ್ಳೆಂ ಉತರ್ ಗಮನಾಕ್ ಹಾಡುನ್, ಸಂಗೀತ್, ಗಾಯನ್, ನಾಚ್ ತಶೆಂಚ್ಚ್ ಚಿತ್ರ್‌ಕಲಾ ಸ್ಪರ್‍ಧ್ಯಾನಿಂ ನಾಂವ್ ತಾಣೆಂ ಆಪ್ಣಾಯ್ಲಾಂ ತರೀ, ಸಬಾರ್ ತಾಚ್ಯಾ ಸಾಂಗಾತ್ಯಾಂಕ್ ಹೆಂ ಕಳಿತ್ ಸಯ್ತ್ ನಾ..... ಕೆದಿಂಚ್ಚ್ ಆಪ್ಣಾ ವಿಶ್ಯಾಂತ್ ವ್ಹಡ್ಪಣ್ ತಾಣೆಂ ಉಚಾರುಂಕ್ ನಾ. ಶಿಕ್ಪಾಂತ್ ಪ್ರಾವಿಣ್ಯ್ ಆನಿಂ ಅಕ್ಶರಾಂ ಮೊತಿಯಾಂ ತರೀ, ಹೆರಾಂ ಲಾಗಿಂ, ಸಾಂಗ್ತಾನಾ, ಖಾಲ್ತ್ಯಾಪಣಾಚಾ ಶೆಗುಣಾಚೊ ಬಾವ್ಟೊ ತಾಣೆಂ ಸದಾಂಚ್ಚ್ ವಯ್ರ್ ಉಭಾರ್‌ಲ್ಲೊ. ನೋವ್ ವರ್‍ಸಾಂಚೆ ತರಿ ವೀಸ್ ವರ್‍ಸಾಂಚ್ಯಾ ತರ್ನಾಟ್ಯಾ ಬರಿ, ಏಕ್ ಖರಿ ಇಷ್ಟಿಣ್ ಜಾವ್ನ್ ಮ್ಹಜ್ಯಾ ಕಾಳ್ಜಾಚಿಂ ಭಗ್ಣಾಂ ತೆಂ ಸಮ್ಜತಾಲೆಂ. ಧೈರ್ ಮ್ಹಾಕಾ ದಿತಾಲೆಂ.

ಅಕ್ಟೋಬರಾಚ್ಯಾ ಚೊವ್ದಾ ತಾರಿಕೆರ್, ಸಂತೊಸಾಚ್ಯಾ ಉಮಾಳ್ಯಾನಿಂ ಭರೊನ್ ಆಮಿಂ ಜಬಲ್ ಅಕ್ದಾರ್ ಜಾಗ್ಯಾಕ್ ಪಯ್ಣಾರ್ ಆಸ್ತಾನಾ, ಏಕಾಚ್ಚಾಣೆಂ, ವಿಚಿತ್ರ್ ಆವ್ಗಡಾನ್ ಮೆಲಿಸ್ಸಾಚೆರ್ ಜೊ೦ಪೊಯ್ ಮಾರ್‌ಲ್ಲಿ...... ಆನಿಂ ತೆಂ ಜಿಣಿಯೆ ಆನಿಂ ಮೊರ್ಣಾ ಮಧೆಂ ಝುಜ್ ಕರುನ್ ಆಸ್ತಾನಾ ದುಖಾಚೆಂ ಕಟಿಣ್ ವಾದಾಳ್ ಆಮ್ಚೆ ಮಧೆಂ ಉಟ್‌ಲ್ಲೆಂ. ತ್ಯಾ ಸಾಂಜೆರ್ ತೆಂ ದೆವಾಧಿನ್ ಜಾಲೆಂ ಮ್ಹಳ್ಳಿ ಖಬರ್ ಕಾನಾಂನಿಂ ಆಮ್ಚ್ಯಾ ಪಡ್ತಾನಾ, ಆಕಾಂತಾಚೊ ಘಡ್ಘಡೊ ಆಮ್ಚ್ಯಾ ಘರಾಂತ್ ಮಾರ್‌ಲ್ಲೊ. ದುಖಾಚ್ಯಾ ವಾತಾವರಣಾಂತ್ ಆಮಿಂ ಬುಡೊನ್ ಆಸ್ತಾನಾ, ವಿಚಿತ್ರ್ ದೈವಿಕ್ ಸಕ್ತೆನ್ ಆಮ್ಕಾಂ ಭುಜವಣ್ ದಿಂವ್ಚೆಂ ಆಮ್ಕಾಂ ಭಗುಂಕ್ ಮೆಳ್‌ಲ್ಲೆಂ. ದುಸ್ರ್ಯಾ ದೀಸಾ ತಶೆಂಚ್ಚ್ ಮೆಲಿಸ್ಸಾಚಿ ನಿರ್ಜೀವ್ ಕೂಡ್ ಮಾತಿಯೆಕ್ ಪಾವಂವ್ಚ್ಯಾ ದೀಸಾ ಆಮ್ಕಾಂ ಸರ್‍ವಾಂಕ್ ತಿಚ್ಚ್ ಸಕತ್ ಸಾಂಬಾಳ್ತಾಲಿ ಮ್ಹಣ್ ಆಮ್ಕಾಂ ಖಾತ್ರಿ ಜಾತಾಲೆಂ. ಸತ್ ಸಾಂಗ್ಚೆಂ ತರ್ ತ್ಯಾಚ್ಚ್ ದೀಸಾ, ಭರ್‍ವಾಸ್ಯಾಚೆಂ ಸ್ವಾದಿಕ್ ನವೆಂ ಕೀರ್ಣ್ ಆಮ್ಚ್ಯಾ ಜಿವಿತಾ ಮೊಳ್ಬಾರ್ ಉದೆಲೆಂ ಮ್ಹಣ್ ಸಾಂಗೊಂಕ್ ಆಮ್ಕಾಂ ಧೈರ್ ಮೆಳ್ತಾ. ಹಿಚ್ಚ್ ಭುಜವಣ್ ಅನಿಂ ಹೊಚ್ಚ್ ಭರ್‍ವಸೊ ಮೆಲಿಸ್ಸಾಚ್ಯಾ ಮಾಗ್ಣ್ಯಾಚ್ಯಾ ಕುರ್‍ಪೆನ್ ರಚ್ನಾರಾ ಥಾವ್ನ್ ಆಮ್ಕಾಂ ಲಾಬ್ಲಾ ಮ್ಹಳ್ಳ್ಯಾಕ್ ಆಮಿಂಚ್ಚ್ ಜಿವಿ ಸಾಕ್ಸ್. ಆನ್ಯೇಕ್ ವಿಷಯ್ ಕಾಳ್ಜಾ ಗೊಪಾಂತ್ಲೊ ಖರೋಕರ್ ಸಾಂಗ್ಚೊ ತರ್ ಮೆಲಿಸ್ಸಾಚ್ಯಾ ಮರ್‍ಣಾ ಉಪ್ರಾಂತ್ ತೆಂ ಸಬಾರ್ ರೀತಿನ್ ಅಮ್ಕಾಂ ಬಾಪಾಚಿ ಮಹಿಮಾ ಕಳಯ್ತ್ ಆಯ್ಲಾಂ ಅನಿ ಬರ್‍ಯಾ ಜಿಣ್ಯೆಚಿ ವಾಟ್ ಚಮ್ಕೊಂಕ್ ಜಾಗ್ವಣ್ ದೀವ್ನ್ಂಚ್ಚ್ ಆಸಾ. ಹಾಕಾ ಸಭಾರ್ ಜಣ್ ರುಜ್ವಾತ್ ಜಾವ್ನ್ ಆಮ್ಚ್ಯಾ ಮಧೆಂಚ್ಚ್ ಆಸಾತ್. ಆಮಿಂ ಸರ್‍ವ್ ಮನ್ಶಾ ಸಂಯ್ಭಾಚೆ ಆನಿಂ ಅಸ್ಕತ್. ಹ್ಯಾ ವೊರ್ವಿಂ, ಥೊಡೆ ಪಾವ್ಟಿಂ ಪಡ್ತಾನಾ ದೂಕ್ ಪಾವ್ತಾನಾ, ವಿಚಿತ್ರ್ ಧೈರ್ ಮೆಲಿಸ್ಸಾ ರಚ್ನಾರಾ ಥಾವ್ನ್ ಹಾಡುನ್ ಯೆತಾ ಆನಿಂ ಮೊಗಾನ್ ಆಮ್ಕಾಂ ವೆಂಗ್ತಾ. ಹ್ಯಾ ವೆಳಿಂ, ಆಮ್ಕಾಂ ದೆವಾನ್ ಫಾವೊ ಕೆಲ್ಲ್ಯಾ ಬಾಳಾಕ್ ನೊವ್ ವೊರ್ಸಾಂ ವಾಡವ್ನ್, ದೆವಾಚ್ಯಾ ಹಾತಿಂ ಸಮರ್ಪುನ್ ಆಜ್ ವಿಶೇಸ್ ರೀತಿನ್ ದೆವಾ ಹುಜಿರ್ ಸೊಬ್ಚ್ಯಾ ಆನಿಂ ಸಾಂತಾ ಭಕ್ತಾಂಚ್ಯಾ ಮೇಳಿಂತ್ ಸಂತೊಸ್ಚ್ಯಾ ಆಂಜಾಕ್ ದೆಖೊನ್ ಆಸಾಂವ್ ಮ್ಹಣ್ ಗೌರವಾನ್ ಸಾಂಗೊಂಕ್ ಸಕ್ತಾಂವ್.

[ಆಪ್ಲ್ಯಾ ತಾಲೆಂತಾಂ ಖಾತಿರ್ ವೆವೆಗ್ಳಿಂ ಇನಾಮಾಂ ಆಪ್ಣಾಯ್ತಾಸ್ತಾನಾ]

ಮೆಲಿಸ್ಸಾಚ್ಯಾ ಮೊರ್‍ಣಾ ದೀಸಾ ಥಾವ್ನ್ ಆಜ್ ಮ್ಹಣಾಸರ್ ದೈವಿಕ್ ಸಕ್ತೆಚೊ ಸಾಂಗಾತ್ ಆಮ್ಕಾಂ ಆಸ್‌ಲ್ಲೊ ತರ್‌ಯ್ ಆಮ್ಚ್ಯಾ ಮೊಗಾಚ್ಯಾಂನಿ, ಇಷ್ಟಾಂನಿ, ಸೈರ್‍ಯಾ ಧೈರ್‍ಯಾಂನಿ ಆನಿಂ ಕುಟ್ಮಾದಾರಾನಿಂ ಆಮ್ಕಾಂ ದಿಲ್ಲೊ ಮೊಗಾ ಮಯ್ಪಾಸಾಚೊ ಸಾಂಗಾತ್ ಆಮಿಂ ಕೆದಿಂಚ್ಚ್ ವಿಸ್ರೊಂಕ್ ಸಕ್ಚೆನಾಂವ್. ಕಳ್ವಳ್ಯಾಂನಿ ಭರ್‌ಲ್ಲ್ಯಾ ಆಮ್ಚ್ಯಾ ಕುಟ್ಮಾಕ್ ತುಮಿಂ ಸರ್‍ವಾಂನಿಂ ತಾಂಕಿ ವೊರ್‍ತಿ ಕುಮಕ್ ಕೆಲ್ಯಾ. ಆಧಾರ್ ದಿಲಾ. ಭರ್‍ವಸೊ ದಿಲಾ. ಜಾಯ್ತಿಂ ಜಣಾಂ ಆಮಿಂ ರಡ್ತಾನಾ ತುಮಿಂಯ್ ರಡ್ಲ್ಯಾತ್. ತುಮ್ಚಿ ಹರ್‌ಏಕ್ಲ್ಯಾಚಿಂ ನಾಂವಾಂ ಮ್ಹಜ್ಯಾ ಆನಿಂ ಮಾಯ್ಕಾಲಾಚ್ಯಾ ಕಾಳ್ಜಾ ಪಾನಾನಿಂ ಸದಾಂಚ್ಚ್ ಖಾಂತಂವ್ನ್ ಉರ್‍ತೆಲಿಂ ಮ್ಹಣ್ ಆಮಿಂ ತುಮ್ಕಾಂ ಸಾಂಗ್ತಾಂವ್. ದೆವಾಚಿಂ ಉದಂಡ್ ಆಶೀರ್‍ವಾದಾಂ ಮೆಲಿಸ್ಸಾ ಮಾಗೊನ್ ದಾಡ್ತೆಲೆಂ ಮ್ಹಣ್ ಆಮ್ಕಾಂ ಭರ್‍ವಾಸೊ ಆಸಾ.

ಮೆಲಿಸ್ಸಾಚಿಂ ತಾಲೆಂತಾಂ, ತಾಕಾ ಸಮರ್ಪುನ್ ಘಡ್‌ಲ್ಲಿಂ ಪೊದಾಂ ಅನಿ ಕವನಾ, ತಶೆಂಚ್ಚ್ ತಾಚೆ ಥಂಯ್ ಆಮ್ಚ್ಯಾ ಮನಾಂತ್ಲೆ ಉಮಾಳೆ ಡಿ.ವಿ.ಡಿ. ರುಪಾರ್ ಉಜ್ವಾಡಾಕ್ ಹಾಡುಂಕ್ ಜಾಯ್ತ್ಯಾನಿ ವೊರ್‍ತಿ ಮಿನತ್ ಘೆತ್ಲ್ಯಾ. ತಾಂತು ಪ್ರಮುಕ್ ಜಾವ್ನ್ ಅಸಾತ್ ಮಟ್ವ್ಯಾ ಕಾಣಿಯೆಚೊ ರಾಯ್ ಮ್ಹಣ್ ನಾಂವ್ ವೆಲ್ಲೊ ಕೊಂಕಣ್ ಪ್ರೇಮಿ "ಶ್ರೀಮಾನ್ ಕ್ಲೆರೆನ್ಸ್, ಕೈಕಂಬ", ಸಾಲ್ಮಾಂವ್ ರಾಯಾಚಾ ಕುಳಿಯೆಚೊ ಸಂಗೀತ್ ಸರ್ಧಾರ್ ಮ್ಹಣ್ ನಾಂವ್ ವೆಲ್ಲೊ ಶ್ರೀಮಾನ್ ಅಪೊಲಿನಾರಿಸ್ ಸೋಜ್, ತಶೆಂಚ್ಚ್ ಗ್ಲೆನ್ ಕೊರೆಯಾ, ಬರ್‍ಟಿ ಪಿರೇರಾ, ಜೆರಿ ಡಿ ಮೆಲ್ಲೊ, ಒಝಿ ಸೋಜ್ ಅನಿ ಹೆರ್ ಗಾವ್ಪಿ, ಆಂತೊನ್ ಕ್ರಾಸ್ತಾ, ಹುಬರ್ಟ್ ಡಿಸೊಜ಼ಾ, ಡೆನಿಸ್ ಮಸ್ಕರೆನಸ್, ಹಾಂಕಾ ಸರ್‍ವಾಂಕ್ ಆಮಿಂ ಋಣಿ. ಹ್ಯಾ ವಾವ್ರಾಕ್ ಮೆಲಿಸ್ಸಾ, ರಚ್ನಾರಾ ಲಾಗಿಂ ಮಾಗೊನ್ ಉದಂಡ್ ಆಶೀರ್ವಾದಾಂ ಸರ್‍ವಾಂಚೆರ್ ವೊತುಂದಿ ಮ್ಹಣ್ ಅಮ್ಚೆಂ ಮಾಗ್ಣೆಂ.

ಆಖೇರ್ ಕರ್‍ಚ್ಯಾ ಪುಡೆಂ, ಮೆಲಿಸ್ಸಾ ದೆವಾನ್ ದಿಲ್ಲೆಂ ಮೊಗಾಚೆಂ ದಾಯ್ಜ್, ಆಮಿಂ ನೋವ್ ವರ್ಸಾಂ ಸಾಂಬಾಳುನ್ ತಾಚ್ಯಾ ಹಾತಿಂ ಪಾಟಿಂ ದಿಲಾಂ. ಆನಿಂ ಆತಾಂ, ಭರ್‍ವಸ್ಯಾಚಿ ಮುಖ್ಲಿ ಜೀಣ್ ಆಮಿಂ ಜಿಯೆತಾನಾ ಆಮ್ಚ್ಯಾ ಜಿವಿತಾಚ್ಯಾ ಹರ್ ಏಕಾ ಘಡಿತಾನಿಂ ಸರ್ವಾಂಚ್ಯಾ ಮೊಗಾ ಮಯ್ಪಸಾಚೊ ಸಾಂಗಾತ್ ಆಮ್ಕಾಂ ಜಾಯ್.... ಸರ್ವಾಂಚಾ ಮಾಗ್ಣ್ಯಾಚೆಂ ಬಳ್ ಆಮ್ಕಾಂ ಗರ್‍ಜೆಚೆಂ.... ಆಮಿಂ ತುಮ್ಚ್ಯಾ ಖಾತಿರ್ ಮಾಗ್ತೆಲ್ಯಾಂವ್.. ಆನಿಂ ತುಮ್ಚ್ಯಾ ಮಾಗ್ಣ್ಯಾಂತ್ ಆಮ್ಚೊ ಉಡಾಸ್ ದವರಾ....