ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ದೋನ್
ತುಜೆಂ ಜಿವಿತ್ ತುಜಿ ವಿಂಚವ್ಣ್
ನ್ಹಂಯ್
ಆವಸ್ವರ್ ತೆರಾ: ಮಿಶೇಲ್ ರಾಯನ್ ಆಲಿಯಾ
ಕ್ಯಾನರಿ ಐಲ್ಯಾಂಡ್ಸ್!
ಸಂಸಾರಾಂತ್ಲ್ಯಾ ಸೃಶ್ಟೆ ಪಯ್ಕಿ ಅತ್ಯುತ್ತಮ್ ಸೊಭಾಯೆಚಿ ಸೃಶ್ಟಿ!
’ಪೃಥ್ವೆ ವಯ್ಲೆಂ ವೈಕುಂಠ್!’
’ಲಾಸ್ ಪಾಲ್ಮಾಸ್ ದೆ ಗ್ರ್ಯಾನ್ ಕ್ಯಾನರಿಯಾ’ ಚ್ಯಾ ಏರ್ಪೊರ್ಟಾಂತ್ ದೆಂವೊಂಕ್ ಆಯ್ತೆಂ ಜಾಂವ್ಚ್ಯಾ ವಿಮಾನಾಚಾ ಆರ್ಶ್ಯಾ ಥಾವ್ನ್ ಭಾಯ್ರ್ ದೀಶ್ಟ್ ವರುನ್ ಸಕಯ್ಲ್ ಪಳೆಲ್ಲ್ಯಾ ಮಿಶೇಲಾಕ್ ಆಪುಣ್ ಹ್ಯಾ ನಿಳ್ಶ್ಯಾ ಉದ್ಕಾಂತ್ ಹ್ಯಾ ವಿಮಾನಾ ಸವೆಂ ಉಪ್ಯೆತಾಂ ತಶೆಂ ಜಾಲೆಂ. ಕ್ಯಾನರಿ ಐಲ್ಯಾಂಡ್ಸಾಂತ್ ಆಪ್ಲೆಂ ಹನಿಮೂನ್ ಸಾರ್ಚ್ಯಾ ಖಾತಿರ್ ರಾಯನಾ ಸವೆಂ ಭಾಯ್ರ್ ಸರ್ಲೆಲ್ಯಾ ತಾಕಾ ಮುಂಬಯಿಂತ್ ತಿಂ ದೊಗಾಂಯ್ ವಿಮಾನಾರ್ ಚಡ್ಚ್ಯಾ ವಗ್ತಾರ್ ಹ್ಯಾ ಕ್ಯಾನರಿ ಐಲ್ಯಾಂಡ್ಸಾಂಚಾ ವಿಶಿಂ ರಾಯನಾನ್ ಸಾಂಗ್ಲೆಲೆಂ ಉಡಾಸ್ ಆಯ್ಲೆಂ. ಥೊಡ್ಯಾಚ್ ವೆಳಾನ್ ವಿಮಾನ್ ರನ್ವೇ ವಯ್ರ್ ಧಾಂವೊಂಕ್ ಲಾಗ್ತಾನಾ ಆಪುಣ್ ಉದ್ಕಾಂತ್ ನ್ಹಯ್ ಬಗಾರ್ ಧರ್ಣಿಕ್ ತೆಂಕ್ಲ್ಯಾ ಮ್ಹಳ್ಳೆಂ ತೆಂ ಮಿಶೇಲಾಕ್ ಸ್ಪಶ್ಟ್ ಜಾಲೆಂ.
ಕಾಜಾರ್ ಜಾವ್ನ್ ರಾಯನ್ ಮಿಶೇಲಾಕ್ ಕ್ಯಾನರಿ ಐಲ್ಯಾಂಡ್ಸಾಂಕ್ ಹನಿಮೂನಾಕ್ ಘೆವ್ನ್ ಆಯಿಲ್ಲೊ!
ಹ್ಯಾ ಐಲ್ಯಾಂಡ್ಸಾಕ್ ಪಾವ್ಲ್ಲೊ ಪಯ್ಲೊ ದೀಸ್ ಪಯ್ಣಾಚ್ಯಾ ಪುರಾಸಣೆಕ್ ಲಾಗೊನ್ ಮಿಶೇಲಾಕ್ ಹೊಟೆಲಾಂತ್ಚ್ ಕಾಡುಂಕ್ ಪಡ್ಲೊ.
"ಜೆದ್ನಾಂ ಪಾಸೊನ್ ತುಕಾ ಮುಂಬಯಿಚೊ ಉಡಾಸ್ ಯೇನಾ ತೆದ್ನಾಂ ಪಾಸೊನ್ ತುಕಾ ಹಾಂವ್ ಪಾಟಿಂ ಮುಂಬಯಿಕ್ ಆಪವ್ನ್ ವರಿನಾ. ಬಿಕಾಸ್ ಐ ಲವ್ ಗ್ರ್ಯಾನ್ ಕ್ಯಾನಾರಿಯಾ!" ರಾಯನ್ ಉದ್ಗಾರ್ಲ್ಲೊ. ರಾಯನಾಚಾ ಉತ್ರಾಂ ಥಾವ್ನ್ ರಾಯನ್ ಹ್ಯಾ ಆದಿಂಯ್ ಹ್ಯಾ ಐಲ್ಯಾಂಡ್ಸಾಂಕ್ ಪಾವ್ಲಾ ಮ್ಹಳ್ಳೆಂ ಮಿಶೇಲಾಕ್ ಕಳಿತ್ ಜಾಲ್ಲೆಂ. ಕ್ಯಾನರಿಯಾಂತ್ ಪಾಂಯ್ ತೆಂಕ್ತಾನಾಚ್ ರಾಯನಾಚಿಂ ಉತ್ರಾಂ ಭಿಲ್ಕುಲ್ ಸತ್ ಮ್ಹಳ್ಳ್ಯಾಪರಿಂ ತಾಕಾ ಭೊಗ್ಲ್ಲೆಂ. ಕ್ಯಾನರಿಯಾ ನಿಜಾಯ್ಕ್ಯ್ ಏಕ್ ಸರ್ಗ್ ಮ್ಹಳ್ಳ್ಯಾಪರಿಂ. ಇತ್ಲಿ ಸೊಭಿತ್ ಆನಿ ಇತ್ಲಿ ನಿತಳ್ ಸೃಶ್ಟಿ.....?
ಮಿಶೇಲಾನ್ ಅಜೂನ್ ಹ್ಯಾ ಕ್ಯಾನರಿಯಾಕ್ ವಳ್ಕೊಂಕ್ ನಾತ್ಲ್ಲೆಂ. ಹ್ಯಾ ಸೃಶ್ಟೆಚಿ ಸೊಭಾಯ್ ತಾಣೆಂ ಚಾಕೊಂಕ್ ನಾತ್ಲ್ಲಿ. ತಾಣೆಂ ಕ್ಯಾನರಿಯಾಕ್ ಪಾಂಯ್ ದವರ್ಲ್ಲೆ ಮಾತ್ರ್! ಇತ್ಲ್ಯಾರ್ಚ್ ಇತ್ಲೊ ಫರಕ್ ಜಾಲ್ಯಾರ್ ಫುಡೆಂ?
ಗ್ರ್ಯಾನ್ ಕ್ಯಾನರಿಯಾ ಆನಿ ಮುಂಬಯಿ....!
ಆಕಾಸ್ ಆನಿ ಭುಂಯ್.....!
"ಇತ್ಲೊ ವ್ಯತ್ಯಾಸ್ ಹ್ಯಾ ಸೃಶ್ಟೆ ಮಧೆಂ?" ಆಪ್ಲ್ಯಾ ಹನಿಮೂನಾಚಾ ದುಸ್ರ್ಯಾ ದಿಸಾ ಗ್ರ್ಯಾನ್ ಕ್ಯಾನರಿಯಾಚಾ ರಸ್ತ್ಯಾರ್ ಟ್ಯಾಕ್ಸಿರ್ ಬಸೊನ್ ಭಾಯ್ಲಿ ಸೊಭಾಯ್ ಪಳೆತಾನಾ ಮಿಶೇಲ್ ವಿಜ್ಮಿತ್ ಜಾಲೆಂ.
ಸಂಪೂರ್ಣ್ ಶಾಂತ್! ಸರ್ವ್ ನಿತಳ್! ರೆಸ್ಪೆರಾಕ್ ಭಾಯ್ರ್ ಸರ್ಲೆಲ್ಯಾ ನವ್ಯಾ ಹೊಕ್ಲೆ ಪರಿಂ!
ಆಸಲಿ ಸೊಭಾಯ್ ಮಿಶೇಲಾನ್ ಆಪ್ಲ್ಯಾ ದೊಳ್ಯಾಂನಿ ಪಳಂವ್ಕ್ ನಾತ್ಲೆಲಿ.
ಬೋವ್ಶಾ ಮ್ಯಾಂಚೆಸ್ಟರ್ಯ್ ಆಶೆಂ ಆಸ್ಚೆಂ ನಾ! ಎಕಾ ಖಿಣಾಕ್ ತಾಚಿ ಮತ್ ಆಪ್ಲ್ಯಾ ಮತಿಂತ್ಲ್ಯಾ ಕಲ್ಪನಾಲೋಕಾಕ್ ಧಾಂವ್ಲಿ.
"ತುಕಾ ಪಸಂದ್ ಜಾಲೆಂ ಮಿಶೇಲ್?" ಮಿಶೇಲ್ ಕ್ಯಾನರಿಯಾಚಿ ಸೊಭಾಯ್ ಪಳವ್ನ್ ಆಜ್ಯಾಪ್ ಜಾತಾನಾ ಆಪ್ಲ್ಯಾ ಬಾಯ್ಲೆಕ್ ಹಾಂಗಾ ಯೇವ್ನ್ ಖುಶಿ ಜಾಲ್ಲಿ ಪಳವ್ನ್ ರಾಯನಾಚಾ ಮತಿಕ್ ತೃಪ್ತಿ ಜಾಲ್ಲಿ. ಕಾಜಾರಿ ಜಿವಿತ್ಯ್ ಹೆಂಚ್! ಆಪ್ಲ್ಯಾ ಸಾಂಗಾತ್ಯಾಚಾ ಸುಖಾಂತ್ಚ್ ಆಪ್ಲಿ ತೃಪ್ತಿ ಸೊಧ್ಚೆಂ!
"ಪಸಂದ್....?" ಥೊಡೊ ವೇಳ್ ಮೌನ್ ಜಾವ್ನ್ ಹೆವ್ಶಿಂ ತೆವ್ಶಿಂ ತ್ಯಾ ಸೊಭಿತ್ ರಸ್ತ್ಯಾ ದೆಗೆಚ್ಯಾ ಪಯ್ಸ್ ಪಯ್ಸ್ ದಿಸ್ಚಾ ಘರಾಂಕ್ ಆನಿ ತ್ಯಾ ಪ್ರಶಾಂತ್ ರಸ್ತ್ಯಾಕ್ ಪಳೆಲ್ಲೆಂ ಮಿಶೇಲ್ ರಾಯನಾಚಾ ಹಾತಾಕ್ ಧರುನ್ "ಹೊ ಸಂಸಾರಾಂತ್ಲೊ ಸರ್ಗ್ ರಾಯನ್!" ತ್ಯಾ ರಾಯನಾಚಾ ಹಾತಾಚಾ ಬೊಟಾಂ ಮಧೆಂ ಆಪ್ಲಿಂ ಬೊಟಾಂ ರಿಗವ್ನ್ ಹಾಸ್ಲೆಂ.
"ಜಶೆಂ....?"
"ಜಶೆಂ....!" ಮಿಶೇಲ್ ಚಿಂತುಂಕ್ ಪಡ್ಲೆಂ ಶಿವಾಯ್ ರಾಯನಾಚಾ ಸವಾಲಾಕ್ ಜವಾಬ್ ದೀಂವ್ಕ್ ತಾಕಾ ಕಾಂಯ್ ಉತಾರ್ ಮೆಳ್ಳೆಂ ನಾ. ಸರ್ಗ್ಚ್ ಸರ್ವ್ ಸುಂದರ್ ಮ್ಹಳ್ಯಾ ಉಪ್ರಾಂತ್ ತಾಚ್ಯಾ ವರ್ನಿಂ ವರ್ತೆಂ ಕಿತೆಂ ಆಸಾ?
"ಜಶೆಂ ತುಂ ಸ್ವೀಟ್ ಹಾರ್ಟ್!" ಆಪ್ಣಾಚೊ ಹಾತ್ ಆಪ್ಲ್ಯಾ ಹಾತಾಂತ್ ಧರ್ಲೆಲ್ಯಾ ಮಿಶೇಲಾಚಾ ಹಾತಾ ವಯ್ರ್ ರಾಯನಾನ್ ವ್ಹಳೂ ಆಪ್ಲು ದಾವೊ ಹಾತ್ ದವರುನ್ ತಶೆಂಚ್ ತ್ಯಾ ಹಾತಾನ್ ಮಿಶೇಲಾಚಾ ಹಾತಾಕ್ ದಾಂಬ್ಲೆಂ.
"ಮ್ಹಜೊ ಸಂಸಾರಾಂತ್ಲೊ ಸರ್ಗ್!" ತ್ಯಾ ಮಿಶೇಲಾಚಾ ಮೋವ್ ಮೋವ್ ಹಾತಾಕ್ ತಶೆಂಚ್ ಆಪ್ಲ್ಯಾ ಹಾತಾಂತ್ ರಾಯನಾನ್ ದಾಂಬುನ್ ಧರ್ಲೆಂ.
ರಾಯನಾ ಸಂಗಿಂ ಮಿಶೇಲಾಚೆಂ ಕಾಜಾರ್ ಜಾಲ್ಯಾ ಉಪ್ರಾಂತ್ ಮಿಶೇಲಾನ್ ಇತ್ಲೆ ದೀಸ್ ರಾಯನಾ ಸವೆಂ ಕಾಡ್ಲ್ಯಾತ್. ಹ್ಯಾ ದಿಸಾಂನಿ ಮಿಶೇಲ್ ರಾಯನಾಕ್ ಆಪ್ಣಾಕ್ ಜಾಯ್ ಪುರ್ತೆಂ ವಳ್ಕಾಲಾಂ.
ರಾಯನ್ ಸ್ವಭಾವಾನ್ ಸದಾಂಚ್ ಮೊವಾಳ್ ಆಸ್ತಾಲೊ. ಮಿಶೇಲಾಕ್ ಸದಾಂಚ್ ಖುಶ್ ದವರ್ಚ್ಯಾ ವಿಶಿಂಚ್ ಚಿಂತಾಲೊ. ತೊ ಮಿಶೇಲಾ ಸಂಗಿಂ ಇತ್ಲೊ ಬರ್ಸಾತಾಲೊ ಕೀ ಜಶೆಂ ತೊ ಮಿಶೇಲಾಕ್ ಸಭಾರ್ ವರ್ಸಾಂ ಥಾವ್ನ್ ವಳ್ಕಾತಾ ತಶೆಂ. ಥೊಡ್ಯಾಚ್ ದಿಸಾಂ ಭಿತರ್ ಮಿಶೇಲಾಚಿ ತಾಕಾ ಇತ್ಲಿ ಸವಯ್ ಪಡ್ಲ್ಲಿ ಕೀ ಮಿಶೇಲಾ ವಿಣೆ ರಾಯನ್ ಕಾಂಯ್ಚ್ ಚಿಂತುಂಕ್ ಸಯ್ತ್ ಸಕಾನಾತ್ಲ್ಲೊ. ರಾಯನಾಚೆಂ ಹೆಂ ವರ್ತನ್ ತಾಕಾ ಆಪ್ಣಾ ವಯ್ರ್ ಆಸ್ಲೆಲ್ಯಾ ಮೊಗಾಕ್ ಪ್ರಸ್ತುತ್ ಕರ್ತಾ ವಾ ರಾಯನಾಚೆಂ ಹೆಂ ಲಾಚಾರ್ಪಣ್? ಮಿಶೇಲಾಕ್ ಹೆಂ ಸಮ್ಜೊಂಕ್ ನಾತ್ಲ್ಲೆಂ. ಪುಣ್ ತೆಂ ಇತ್ಲೆಂ ಮಾತ್ರ್ ಜಾಣಾಂ ಜಾಲ್ಲೆಂ ಕೀ ರಾಯನ್ ತಾಚ್ಯಾ ಜಿವಿತಾಚಾ ಹರ್ಯೆಕಾ ಘಡಿಯೆ ತೊ ಆಪ್ಣಾಕ್ ಆಶೆತಾ. ತೊ ಆಪ್ಣಾಕ್ ಆಂವ್ಡೆತಾ. ತೊ ಆಪ್ಣಾಚೊ ಮೋಗ್ ಕರ್ತಾ. ರಾಯನ್ ಆಪ್ಣಾಕ್ ನೊವ್ರೊ ಜಾವ್ನ್ ಮೆಳ್ಲ್ಲೊ ನಿಜಾಯ್ಕ್ಯ್ ಆಪ್ಣಾಚೆಂ ನಶೀಬ್! ಮಿಶೇಲಾನ್ ಮಾಂದುನ್ ಘೆತ್ಲ್ಲೆಂ.
ಮಿಶೇಲಾಕ್ ಜರೀ ರಾಯನಾಚಾ ಬಿಜ್ನೆಸಾ ವಿಶಿಂ ಕಾಂಯ್ ಜಾಣಾಂ ಜಾಂವ್ಚಿ ಯಾ ತ್ಯಾ ತಾಚ್ಯಾ ಬಿಜ್ನೆಸಾಂತ್ ಮೆತೆರ್ ಜಾಂವ್ಚಿ ಉರ್ಬಾ ನಾತ್ಲ್ಲಿ. ಮಿಶೇಲ್ಯ್ ಹೆಂ ಖಂಡಿತ್ ಜಾಣಾಂ ಆಸ್ಲ್ಲೆಂ ಕೀ ಜರ್ ತರ್ ರಾಯನಾಕ್ ತಾಚೆಂ ಜೀವನ್ ಸಾಂಗಾತಿಣ್ ತಾಚ್ಯಾ ಬಿಜ್ನೆಸಾಂತ್ ಮೆತೆರ್ ಜಾಂವ್ಚೆಂ ತಸಲೆಂ ಜಾಯ್ ಜಾಲ್ಲೆಂ ಜಾಲ್ಯಾರ್ ರಾಯನಾಕ್ ಹ್ಯಾ ಮುಂಬಯಿಂಯ್ ಚೆಡ್ವಾಂಚೊ ಕಾಂಯ್ ಬರ್ಗಾಲ್ ನಾತ್ಲ್ಲೊ. ಆಪ್ಣಾಕ್ ಸೊಧುನ್ ಮಂಗ್ಳುರಾಕ್ ಯೇಂವ್ಕ್ ಜಾಯ್ ಮ್ಹಳ್ಳಿ ಗರ್ಜ್ ರಾಯನಾಕ್ ಭಿಲ್ಕುಲ್ ನಾತ್ಲ್ಲಿ. ತಾಣೆಂ ಆಶೆಂ ಕರುಂಕ್ ನಾ ಮ್ಹಳ್ಯಾರ್ ರಾಯನ್ ನಿಜಾಯ್ಕ್ಯ್ ಆಪ್ಣಾ ತಸಲ್ಯಾಚ್ ಎಕಾ ಚಲಿಯೆಕ್ ಆಶೆಲ್ಲೊ ಮ್ಹಳ್ಳೆಂ ಮಿಶೇಲಾಕ್ ಖಚಿತ್ ಜಾಲ್ಲೆಂ. ತ್ಯಾ ಶಿವಾಯ್ ಮಿಶೇಲಾಕ್ ಆಪ್ಲ್ಯಾ ಭುರ್ಗ್ಯಾಪಣಾರ್ ಥಾವ್ನ್ ಬಿಜ್ನೆಸಾ ವಿಶ್ಯಾಂತ್ ಕಾಂಯ್ ಉರ್ಭಾ ನಾತ್ಲ್ಲಿ. ತೆಂ ಆಪ್ಲ್ಯಾ ಆಜ್ಯಾ ಸವೆಂ ಹರ್ಯೆಕಾ ತಾಚ್ಯಾ ವಾಟೆರ್ ಆಜ್ಯಾಕ್ ಸಾಂಗಾತ್ ದಿತಾಲೆಂ ಜಾಲ್ಯಾರ್ಯ್ ತೆಂ ಆಪ್ಲ್ಯಾ ಆಜ್ಯಾಚಾ ಕಾಮಾಂತ್ ಮೆತೆರ್ ಜಾಯ್ನಾತ್ಲ್ಲೆಂ. ತಶೆಂಚ್ ಮಿಶೇಲಾಕ್ ಹೆಂ ಪಸಂದ್ ನಾತ್ಲ್ಲೆಂ. ಆತಾಂ ಮುಂಬಯಿಂತ್ ಜಾಲ್ಯಾರ್ಯ್ ತಶೆಂಚ್! ಮಿಶೇಲಾಕ್ ರಾಯನಾಚಾ ಕಸಲ್ಯಾಯ್ ಬಿಜ್ನೆಸಾ ವಿಶ್ಯಾಂತ್ ಜಾಣಾಂ ಜಾಂವ್ಚಿ ಯಾ ತ್ಯಾ ತಾಚ್ಯಾ ಸಂಸಾರಾಕ್ ಆಪ್ಣೆ ತಿಳುನ್ ಪಳಂವ್ಚಿ ಉರ್ಭಾ ತಾಕಾ ನಾತ್ಲ್ಲಿ. ತೆಂ ಆಪ್ಲ್ಯಾ ಸಂಸಾರಾಂತ್ಚ್ ಖುಶ್ ಆಸ್ಲ್ಲೆಂ. ಜಶೆಂ ಕಾಳ್ಜಾಂತ್ ಆಶಾ ನಾತ್ಲಲೊ ಮನಿಸ್ ಜಿವಿತಾಚಾ ಹರ್ಯೆಕ್ ವಾಟೆರ್ ಖುಶ್ ಆಸ್ತಾ ತಶೆಂ.
ಕಾಜಾರ್ ಜಾವ್ನ್ ದೋನ್ ಹಪ್ತ್ಯಾಂ ಉಪ್ರಾಂತ್ ರಾಯನ್ ಮಿಶೇಲಾಕ್ ಘೆವ್ನ್ ಹನಿಮೂನಾಕ್ ಭಾಯ್ರ್ ಸರ್ಲ್ಲೊ.
ಹ್ಯಾ ದೋನ್ ಹಪ್ತ್ಯಾಂಚಾ ಆವ್ದೆಂತ್ ಮಿಶೆಲಾನ್ ಕುಡಿ, ಮನಾ, ಆತ್ಮ್ಯಾನ್ ಪಾವೊಂಕ್ ನಾತ್ಲ್ಲೊ ಸರ್ಗ್ ನಾತ್ಲ್ಲೊ ಆನಿ ಭೊಗುಂಕ್ ನಾತ್ಲ್ಲೆಂ ಸುಖ್ ನಾತ್ಲ್ಲೆಂ.
ಮೊಗಾಚ್ಯಾ ಸಂಸಾರಾಂತ್ ಮಿಶೇಲಾಚ್ಯಾಕ್ಯ್ ರಾಯನ್ಚ್ ಚಡ್ ಭಳಿಶ್ಟ್. ರಾಯನಾಚಾ ತ್ಯಾ ಭಳಾಧೀಕ್ ವೆಂಗೆಂತ್ ತಾಚ್ಯಾ ತ್ಯಾ ಬಾವ್ಳ್ಯಾಂ ಮಧೆಂ ಆಪ್ಣಾಚೆಂ ಸಗ್ಳೆಂ ಅಂಗ್ ಅಂಗ್ ಪಿಟ್ಯಾನ್ ಪಿಟೊ ಜಾವ್ನ್ ವೆತಾ ಮ್ಹಣೊನ್ ಭಗ್ಲ್ಯಾರ್ಯ್ ತ್ಯಾ ಪಿಟ್ಯಾಂತ್ ಆಪ್ಣೆ ಖರ್ಗೊನ್ ವಚೊಂಕ್ ಜಾಯ್ ಮ್ಹಳ್ಳ್ಯಾ ಪರಿಂ ಮಿಶೆಲಾಕ್ ಭಗ್ತಾಲೆಂ.
ಕ್ಯಾನರಿಯಾಂತ್ಯ್ ತಶೆಂಚ್!
ಎಕಾ ಕುಶಿನ್ ಹ್ಯಾ ಉದ್ಕಾ ಮಧ್ಲ್ಯಾ ಲ್ಹಾನ್ ಲ್ಹಾನ್ ದ್ವೀಪಾಂಚಿ ಸೊಭಾಯ್! ದುಸ್ರೆ ಕುಶಿಂನ್ ತ್ಯಾ ದರ್ಯಾಚಾ ಸೊಭಿತ್ ನಿತಳ್ ಕ್ರಿಸ್ಟಲಾ ಸಾರ್ಕ್ಯಾ ಉದ್ಕಾಚಿ ಸೊಭಾಯ್! ನಿಳ್ಶೆಂ ನಿಳ್ಶೆಂ ಉದಾಕ್ ಮತಿಂತ್ಲ್ಯಾ ಸ್ತುಪ್ತ್ ಭಗ್ಣಾಂಕ್ ಜಾಗವ್ನ್ ಮೊಗಾಚ್ಯಾ ಸಂಸಾರಾಂತ್ ಉಪ್ಯೆಂವ್ಕ್ ಆಯ್ತೆಂ ಕರ್ತಾಲೆಂ ತರ್ ತ್ಯಾ ವೆಳೆ ವಯ್ಲಿ ಬಾರೀಕ್ ಧವಿ ಧವಿ ರೇಂವ್ ಆಂಗಾಕ್ ಚಿಡ್ಕೊನ್ ರಾಂವ್ಚಿ ತಿ ಮತಿಂತ್ಲ್ಯಾ ಸಂಸಾರಾಂತ್ ಸರ್ಗಾಕ್ ಏಕ್ಚ್ ಗೇಣ್ ಮ್ಹಳ್ಳ್ಯಾ ಪರಿಂ ದಿಸಯ್ತಾಲಿ.
ಎಕಾ ಐಲ್ಯಾಂಡಾ ಥಾವ್ನ್ ಎಕಾ ಐಲ್ಯಾಂಡಾಕ್, ಎಕಾ ವರ್ನಿಂ ಏಕ್ ಸಗ್ಳಿಂ ಸುಂದರ್ ದಿಸ್ತಾಲಿಂ.
ತಾಂತುಂಯ್ ’ಸಾಂತಾಕ್ರುಜ್ ದೆ ತೆನೆರೈಪ್’ ಪಳವ್ನ್ ಮಿಶೇಲ್ ಶಿರಿ ಚುಕ್ಲೆಂ.
ದೊಳ್ಯಾಂಕ್ ದಿಸ್ತಾ ವರೇಗ್ ಧವ್ಯಾ ರೆಂವೆಕ್ ಲಾಂಬಾಯೆಕ್ ಘೆವ್ನ್ ನಿದ್ಲ್ಲಿ ದರ್ಯಾ ವೆಳ್, ಶಾಂತ್ ಉದಾಕ್, ಆರ್ಶ್ಯಾ ಪರಿಂ ದಿಸ್ಚ್ಯಾ ಉದ್ಕಾಂತ್ ದರ್ಯಾ ಗೂಂಡಾಯೆಂತ್ಲೆಂ ಉಗ್ತ್ಯಾ ದೊಳ್ಯಾಂನಿ ಪಳವ್ಯೆತ್ ಜಾಲ್ಲೆಂ ಸೊಭಾಯೆಚೆಂ ದರ್ಶನ್, ಪಾಂಯಾಂಕ್ ಮೊಗಾನ್ ವೆಂಗ್ಚಿ ರೇಂವ್, ಹ್ಯಾ ದರ್ಯಾ ವೆಳೆಚಿ ಸೊಭಾಯ್ ಪಳಂವ್ಕ್ ದೋನ್ ದೊಳೆ ಪಾವಾನಾಂತ್ ಮ್ಹಳ್ಳ್ಯಾಪರಿಂ!
ಕ್ಯಾನರಿಯಾಂತ್ ಮಿಶೇಲ್ ಆಪ್ಣಾಕ್ಚ್ ಸಂಪೂರ್ಣ್ ವಿಸ್ರಾಲ್ಲೆಂ. ಹ್ಯಾ ಕ್ಯಾನರಿಯಾಚಾ ಭಾಯ್ರ್ಯ್ ಆಪ್ಣಾಚೊ ಆಪ್ಣೆ ಸಾಂಡುನ್ ಆಯ್ಲಲೊ ಸಂಸಾರ್ ಆಸಾ ಮ್ಹಳ್ಳೆಂ ತಾಚ್ಯಾ ಉಡಾಸಾಕ್ ಆಯಿಲ್ಲೆಂಚ್ ನಾ.
ರಾಯನಾಚೊ ಸಾಂಗಾತ್ ಜಾಲ್ಯಾರ್ಯ್ ತಸಲೊಚ್! ಎಕಾಚ್ ಎಕಾ ಘಡಿಯೆಕ್ ತೊ ಮಿಶೇಲಾಚಾ ಮತಿಕ್ ಬೆಜಾರಾಯ್ ವಾ ಖಂತ್ ದೀಂವ್ಕ್ ತಯಾರ್ ನಾತ್ಲ್ಲೊ. ಹರ್ಯೆಕ್ ಘಡಿ ತೊ ಮಿಶೇಲಾಚಾ ಸಾಂಗಾತಾ ಆಸೊನ್ ತಾಕಾ ಸಂಸಾರ್ ವಿಸ್ರಾಯ್ತಾಲೊ. ಮಿಶೇಲಾನ್ ಸಾಂಡುನ್ ಆಯಿಲ್ಲ್ಯಾ ತಾಚ್ಯಾ ಆಜ್ಯಾ ಆಜಿಯೆಚೊ ಪಾಸೊನ್ ಮಿಶೇಲಾಕ್ ಉಡಾಸ್ ಯೇನಾತ್ಲೆಲ್ಯಾ ಪರಿಂ ಪಳೆತಾಲೊ.
ಆಪ್ಲ್ಯಾ ಹನಿಮೂನಾಕ್ ಆಯಿಲ್ಲ್ಯಾ ಹ್ಯಾ ದಿಸಾಂನಿ ರಾಯನ್ ಸಗ್ಳೊಚ್ ತಾಚ್ಯಾ ಬಿಜ್ನೆಸಾ ಥಾವ್ನ್ ಪಯ್ಸ್ ಆಸ್ಲ್ಲೊ. ಕ್ಯಾನರಿಯಾಂತ್ ತೊ ಫಕತ್ತ್ ಮಿಶೇಲಾಚಾ ವಿಶಿಂ ಮಾತ್ರ್ ಚಿಂತಾಲೊ. ಮಿಶೇಲಾ ಖಾತಿರ್ ರಾಯನಾನ್ ಆಪ್ಲ್ಯಾ ಬಿಜ್ನೆಸಾಚಾ ಸಂಸಾರಾಕ್ಯ್ ಪಾಟಿಂ ಸಾಂಡ್ಲ್ಲೆಂ.
ಹ್ಯಾ ತಾಂಚ್ಯಾ ಎಕಾಮೆಕಾಕ್ ತಾಣಿಂ ದಿಂವ್ಚ್ಯಾ ಸಾಂಗಾತಾ ವರ್ವಿಂ ತಾಂಚಾ ಹನಿಮೂನಾಚೆ ಪಂದ್ರಾ ದೀಸ್ ಕಶೆಂ ಪಾಶಾರ್ ಜಾಲೆ ತೆ ತಾಂಕಾಚ್ ಕಳೊಂಕ್ ನಾ. ಪಂದ್ರಾ ದೀಸ್ ತಾಣಿಂ ಕ್ಯಾನೆರಿಯಾಂತ್ ಖರ್ಚಿಲ್ಲೆ.
ಆಯ್ಚಿ ರಾತ್ ತಾಂಚಾ ಹನಿಮೂನಾಚಿ ನಿಮಾಣಿ ರಾತ್!
ಫಾಂತ್ಯಾಚಾ ಪ್ಲೈಟಾರ್ ತಾಂಕಾಂ ಮಾಲಾಗಾ ವಚೊಂಕ್ ಆಸ್ಲ್ಲೆಂ. ಮಾಲಾಗಾ ಥಾವ್ನ್ ಮ್ಯಾಡ್ರಿಡ್ ಆನಿ ಮ್ಯಾಡ್ರಿಡಾ ಥಾವ್ನ್ ದುಬಾಯಿ ಜಾವ್ನ್ ಪಾಟಿಂ ಮುಂಬಯಿಕ್!
ಮಿಶೇಲ್ ಹ್ಯಾ ಐಲ್ಯಾಂಡ್ಸಾಂ ವಯ್ರ್ ಇತ್ಲೆಂ ಮೊಗಾರ್ ಪಡ್ಲ್ಲೆಂ ಕೀ ರಾಯನಾನ್ ಪಾಟಿಂ ಮುಂಬಯಿ ವೆಚೊ ಪ್ರಸ್ತಾಪ್ ಕಾಡ್ತಾನಾ ಮಿಶೇಲಾಚಾ ಮತಿಂತ್ ತೊ ಎದೊಳ್ ರಾಜ್ ಕರುನ್ ಆಸ್ಲ್ಲೊ ಉಲ್ಲಾಸ್ ಸಗ್ಳೊ ಜಿರೊನ್ ಗೆಲೊ. ಸೊಭಿತ್ ಸೃಶ್ಟೆಚ್ಯಾ ಹ್ಯಾ ಸೊಭಾಯೆಂತ್ ಆನಿ ರಾಯಾನಾಚ್ಯಾ ಉಭಾಳ್ ಮೋಗಾಂತ್ ಮಿಶೇಲಾನ್ ಆಪ್ಲ್ಯಾ ಭಾಯ್ಲ್ಯಾ ತ್ಯಾ ಸಂಸಾರಾಕ್ ಸೊಡುನ್ ದಿಲ್ಲೆಂ. ತೆಂ ಆಪ್ಣಾಕ್ಚ್ ವಿಸ್ರಾಲ್ಲೆಂ. ಹ್ಯಾ ಸಂಸಾರ್ ಭಾಯ್ರ್ಯ್ ಆಪ್ಲೊ ಸಂಸಾರ್ ಆಸಾ ಮ್ಹಳ್ಳೆಂ ಮಿಶೇಲಾಕ್ ಹ್ಯಾ ಪಂದ್ರಾ ದಿಸಾ ಉಪ್ರಾಂತ್ ಆಜ್ ಉಡಾಸ್ ಆಯ್ಲೆಂ.
"ಇತ್ಲೆ ದೀಸ್ ಆಪುಣ್ ಆಪ್ಣಾಕ್ಚ್ ಇತ್ಲೆಂ ವಿಸ್ರೊಂಕ್ ಕಶಿಂ ಸಕ್ಲಿಂ....?" ಆಪ್ಣಾಕ್ಚ್ ಮಿಶೇಲಾನ್ ಸವಾಲ್ ಉಡಯ್ಲೆಂ. ತಾಚಿ ಮತ್ ಆತಾಂ ಖಂತಿನ್ ಬುಡ್ಲಿ. ಜಶೆಂ ಮಿಶೇಲಾಕ್ ತೆ ಸೊಭಿತ್ ಸೊಭಿತ್ ರಂಗ್ ಚಡ್ಚ್ ಪಸಂದ್ ಜಾತಾಲೆ ಆನಿ ತೆಂ ತ್ಯಾ ರಂಗಾಂ ಮಧೆಂ ಸಂಸಾರಾಕ್ ವಿಸ್ರೊನ್ ಸೊಡ್ತಾಲೆಂ ತಶೆಂ ಹ್ಯಾ ನಿಳ್ಶ್ಯಾ ನಿಳ್ಶ್ಯಾ ಉದ್ಕಾತ್ ಪಿಶೆಂ ಜಾವ್ನ್ ಮಿಶೇಲ್ ಹ್ಯಾ ಉದ್ಕಾ ಭಾಯ್ಲ್ಯಾ ಸಂಸಾರಾಕ್ ವಿಸ್ರಾಲ್ಲೆಂ.
ಪುಣ್ ಅತಾಂ........?
ಆತಾಂ ತಾಕಾ ರಾಯನಾನ್ ಮುಂಬಯಿಚ್ಯಾ ತಾಚ್ಯಾ ಸಂಸಾರಾಚೊ ಉಡಾಸ್ ಹಾಡಯ್ತಾನಾ ಮಿಶೇಲಾಕ್ ಪರ್ತ್ಯಾಕ್ ಸಗ್ಳೆಂಚ್ ಉಡಾಸ್ ಆಯ್ಲೆಂ. ತಾಚೊ ಆಜೊ ಆನಿ ಆಜಿ ಉಡಾಸ್ ಯೆವ್ನ್ ತೆಂ ಆತಾಂ ತಾಂಕಾ ಚಿಂತುನ್ ಖಂತೀಶ್ಟ್ ಜಾಲೆಂ.
"ಕಿತೆಂ ಮಿಶೇಲ್ ಆಜ್ ತುಂ ಥೊಡೆಂ ಖಂತಿಶ್ಟ್ ಜಾಲ್ಲ್ಯಾ ಪರಿಂ ದಿಸ್ತಾಯ್....?" ಮಿಶೇಲ್ ಖಂತಿಶ್ಟ್ ಜಾಲ್ಲ್ಯಾಚೆಂ ಕಾರಾಣ್ ರಾಯನಾಕ್ ಸಮ್ಜಾಲೆಂ ನಾ.
"ಇತ್ಲೆ ದೀಸ್ ಆಮಿಂ ಸಾಂಗಾತಾ ರಾವ್ಲ್ಲ್ಯಾ ಹ್ಯಾ ಗಾಂವಾಕ್ ಆನಿ ಹ್ಯಾ ಗಾಂವಾಚಾ ಸಾಂಗಾತಾಕ್ ಆಜ್ ಆಮಿಂ ಸೊಡುನ್ ವಚೊಂಕ್ ಆಸಾ?" ಉದಾರೆಂ ನಿದ್ಲ್ಲೆಂ ಮಿಶೇಲ್ ಕುಶಿಕ್ ಪರ್ತೊನ್ ರಾಯನಾಕ್ ಪಳಂವ್ಕ್ ಲಾಗ್ಲೆಂ.
ರಾಯನ್ ಆತಾಂ ಆಪ್ಲ್ಯಾ ಬಾಯ್ಲೆ ತೆವ್ಶಿಂ ಪರ್ತಾಲೊ. ಸವ್ಕಾಸ್ ತಾಣೆಂ ಆಪ್ಲ್ಯಾ ಉಜ್ವ್ಯಾ ಹಾತಾಕ್ ಮಿಶೇಲಾ ವಯ್ರ್ ದವರ್ಲೆಂ. ತ್ಯಾ ಹಾತಾನ್ ವ್ಹಳೂ ಮಿಶೇಲಾಚಾ ಹಾತಾಕ್ ತೊ ಪೊಶೆಲಾಗ್ಲೊ.
"ಹ್ಯಾ ಸೊಭಿತ್ ಗಾಂವಾಕ್ ಸೊಡುನ್ ಗೆಲ್ಯಾರ್ಯ್ ಹ್ಯಾ ಗಾವಾಂತ್ ಆಮಿ ಸಾರ್ಲೆಲ್ಯಾ ಹ್ಯಾ ಆಮ್ಚ್ಯಾ ಸೊಭಿತ್ ಉಡಾಸಾಕ್ ಆಮಿಂ ವರುನ್ ವೆತಾಂವ್ ಡಾರ್ಲಿಂಗ್!"
"ಹಾಂ!" ಮಿಶೇಲ್ ರಾಯನಾಚಾ ಹರ್ಧ್ಯಾರ್ ಆಪ್ಲಿಂ ಬೊಟಾಂ ಚರಂವ್ಕ್ ಲಾಗ್ಲೆಂ.
ತಿತ್ಲ್ಯಾರ್ ರಾಯಾನ್ ಕಿತೆಂಗೀ ಚಿಂತ್ಲ್ಲ್ಯಾ ಪರಿಂ ಜಾವ್ನ್,
"ಆಮಿಂ ಮಾಲಾಗಾ ರಾವ್ಯಾಂ?" ತಾಕಾ ಮಿಶೇಲಾಚಿ ಖುಶಿ ಪಳಂವ್ಕ್ ಜಾಯ್ ಆಸ್ಲ್ಲಿ.
"ಮಾಲಾಗಾ ಕಿತ್ಯಾಕ್?"
"ಮಾಲಾಗಾ ಹ್ಯಾ ಗಾಂವಾ ಪರಿಂಚ್ ಮಸ್ತ್ ಸೊಭಿತ್! ತುಕಾ ಪಳಂವ್ಕ್ ಜಾಯ್ ಜಾಲ್ಯಾರ್ ರಾವ್ಯಾಂ! ಕಶೆಂಯ್ ಆಮ್ಕಾಂ ಮಾಲಾಗಾ ಜಾವ್ನ್ಚ್ ವಚೊಂಕ್ ಜಾಯ್!"
ಮಿಶೇಲ್ ಕಾಂಯ್ ಉಲಯ್ಲೆಂ ನಾ.
"ಮಾಲಾಗಾ ಥಾವ್ನ್ ಇಬಿಜ಼ಾಕ್ಯ್ ವಚ್ಯೆತ್!" ರಾಯನಾನ್ ಮುಂದರಿಲೆಂ.
ಮಿಶೆಲ್ ಆತಾಂ ಪರ್ತ್ಯಾಕ್ ಉದಾರೆಂ ಜಾಲೆಂ. ತಾಕಾಯ್ ಹ್ಯಾ ಸೊಭಿತ್ ಸೊಭಿತ್ ಗಾಂವಾಂಕ್ ಪಳಂವ್ಚೆಂ ಮನ್ ಆಸ್ಲ್ಲೆಂ. ಪುಣ್ ಆತಾಂ ಗಾಂವ್ಚೊ ಉಡಾಸ್ ಯೇವ್ನ್ ತಾಕಾ ಆತಾಂ ಹಾಂಗಾಸರ್ ಮನ್ ಲಾಗೊಂಕ್ ಆಯ್ಕಾಲೆಂ ನಾ.
"ಕ್ಯಾನೇರಿಯಾಂತ್ಚ್ ಮಸ್ತ್ ಜಾಲೆಂ ರಾಯನ್!" ಮಿಶೇಲ್ ಆಪ್ಲೆ ದೊಳೆ ಉಭಾರುನ್ ವಯ್ಲ್ಯಾ ಸೀಲಿಂಗಾಕ್ಚ್ ಪಳೆತಾಲೆಂ.
ಮಿಶೇಲಾಚಾ ಪಾಂಯಾರ್ ಆಪ್ಲೆ ಪಾಂಯ್ ವೊಡ್ಲೆಲ್ಯಾ ರಾಯನಾನ್ ಆಪ್ಲ್ಯಾ ಉಜ್ವ್ಯಾ ಹಾತಾನ್ ಮಿಶೇಲಾಚಾ ಪೊಲ್ಯಾಕ್ ಧರುನ್ ತಾಕಾ ಆಪ್ಣಾ ತೆವ್ಶಿಂ ಘುಂವ್ಡಾಯ್ಲೆಂ. "ಆಮಿಂ ಕಶೆಂಯ್ ಹಾಂಗಾ ಆಯ್ಲ್ಯಾಂವ್. ತುಕಾ ತರ್ ಮನ್ ಆಸಾ ಜಾಲ್ಯಾರ್ ಯಾ! ತುಕಾ ಖುಶಿ ನಾ ಜಾಲ್ಯಾರ್ ನಾಕಾ ಡಾರ್ಲಿಂಗ್. ಹಾವೆಂ ಫಕತ್ತ್ ತುಜ್ಯಾ ಖುಶಿಯೆಚೆಂ ಮಾತ್ರ್. ತುಂ ಸಂತೊಸಾನ್ ಆಸ್ಲ್ಯಾರ್ ಹಾಂವ್ಯ್ ಸಂತೊಸಾನ್ ಆಸ್ಲೆಲ್ಯಾಪರಿಂ!" ಆಪ್ಣಾ ತೆವ್ಶಿಂ ಪಳಂವ್ಚ್ಯಾ ಮಿಶೇಲಾಚಾ ದೊಳ್ಯಾಂ ದಿಶ್ಟೆಕ್ಚ್ ರಾಯನಾನ್ ಆಪ್ಲಿ ದೀಶ್ಟ್ ಜೊಕುನ್ ಪಳೆಲೆಂ.
"ಹಾಂವ್ ನೆಣಾಂ ರಾಯನ್! ತುಕಾ ವಚೊಂಕ್ ಜಾಯ್ ಮ್ಹಣೊನ್ ಜಾತಾ ಜಾಲ್ಯಾರ್ ಯಾ!"
"ಓ.ಕೆ. ಡನ್! ಮಾಲಾಗಾ ಥಾವ್ನ್ ತುಕಾ ಇಬಿಜ಼ಾಕ್ ಆಪವ್ನ್ ವರ್ತಾಂ!"
"ಏರ್ ಟಿಕೆಟ್?"
"ಮಾಲಾಗಾಂತ್ ಕರ್ಯಾಂ!"
ರಾಯನಾಚಾ ತೊಂಡಾರ್ ಸಂತೊಸ್ ಉಮಾಳ್ಲ್ಲೊ ಮಿಶೇಲಾಕ್ ದಿಸಾನಾಸ್ತಾನಾ ಗೆಲೊ ನಾ. ವ್ಹಳೂ ಮಿಶೇಲಾನ್ಯ್ ಆಪ್ಲ್ಯಾ ವೊಂಟಾನಿ ಹಾಸೊ ಹಾಡ್ಲ್ಯೊ.
"ಮ್ಹಾಕಾ ದಿಸ್ತಾ ತುಕಾ ಸ್ಪೇಯ್ನಾಕ್ ಸೊಡುನ್ ವಚೊಂಕ್ ಮನ್ ನಾ!" ಮಿಶೇಲ್ ಪರ್ತ್ಯಾಕ್ ರಾಯನಾ ತೆವ್ಶಿಂ ಪರ್ತಾಲೆಂ. ಆಪ್ಲ್ಯಾ ದಾವ್ಯಾ ಹಾತಾನ್ ತಾಣೆ ರಾಯಾನಾಕ್ ಆರಾವ್ನ್ ದರ್ಲೆಂ.
"ಸ್ಪೇಯ್ನ್....?" ರಾಯನ್ ಹಾಸ್ಲೊ. "ತುಂ ಮ್ಹಜ್ಯಾ ಸಾಂಗಾತಾ ನಾಂಯ್ ಜಾಲ್ಯಾರ್ ಹ್ಯಾ ಸ್ಪೇಯ್ನಾಂತ್ ಕಿತೆಂ ಆಸಾ ಡಾರ್ಲಿಂಗ್? ತುಜೆ ಶಿವಾಯ್ ಹಾವೆಂ ಹಾಂಗಾಚಾ ರಸ್ತ್ಯಾರ್ ಪಾಂಯ್ ದವರುಂಕ್ ಆಸಾ? ತುಜೆ ವಿಣೆ ಎಕ್ಸುರೊಂ......?" ರಾಯನಾನ್ ಮಿಶೇಲಾಕ್ ಲಾಗಿಂ ವೊಡುನ್ ದರ್ಲೆಂ. ತಾಂಚೊ ದೊಗಾಂಯ್ಚೊ ಶ್ವಾಸ್ ಆತಾಂ ಎಕಾಮೆಕಾ ಆದ್ಳೊಂಕ್ ಲಾಗ್ಲೊ.
"ಏಕ್ ಸವಾಲ್ ವಿಚಾರುಂ....?" ಮಿಶೇಲಾನ್ ರಾಯನಾಚಾ ದೊಳ್ಯಾಂಕ್ಚ್ ಪಳೆಲೆಂ.
"ಕಿತೆಂ?"
"ತ್ಯಾ ಬಾಲಿವುಡಾಂತ್ಲ್ಯಾ ಸೊಭಾಯೆಚ್ಯಾ ಬಾವ್ಲ್ಯಾಂಕ್ ಸೊಡುನ್ ಹೌ ಕಮ್ ಯು ....?" ಮಿಶೇಲ್ ಪುರ್ತೆಂ ಉಲಯ್ಲೆಂ ನಾ. ಪುಣ್ ರಾಯನ್ ಮಾತ್ರ್ ಸಮ್ಜಾಲ್ಲೊ ಮಿಶೇಲ್ ಕಿತೆಂ ವಿಚಾರುಂಕ್ ಆಶೆತಾ ತೆಂ.
"ಬಾಲಿವುಡಾಕ್ ತುಂ ಪಡ್ದ್ಯಾರ್ ಮಾತ್ರ್ ಪಳವ್ನ್ ಜಾಣಾಂಯ್ ಮಿಶೇಲ್! ಹಾಂವ್ ಬಾಲಿವುಡಾಕ್ ರೂಪ್ ರೂಪ್ ಪಳೆತಾಂ. ಬಾಲಿವುಡಾಚ್ಯೊ ಬಾವ್ಲ್ಯೊ ಆಸಾತ್ ಪಳೆ ತ್ಯೊ ಸಗ್ಳ್ಯೊ ಮೆಣಾಚ್ಯೊ! ಏಕ್ ಪಾವ್ಟಿಂ ಕರ್ಗಾಲ್ಯಾ ಉಪ್ರಾಂತ್ ತಾಂಚೆಂ ರೂಪ್ ದುಸ್ರೆಂಚ್ ಜಾತಾ!"
"ಆನಿ ಹಾಂವ್.....?" ಮಿಶೇಲ್ ಉತ್ಸಾಹಿಕ್ ಜಾಲೆಂ.
"ತುಂ ಬೇಲೂರಾಂತ್ಲಿ ಬಾವ್ಲಿ! ತ್ಯಾ ವೊತಾಕ್ ಜಾಂವ್ ತ್ಯಾ ಪಾವ್ಸಾಕ್ ಜಾಂವ್ ತುಂ ತುಂಚ್ ಜಾವ್ನ್ ಆಸ್ತಾಯ್. ಪುಣ್ ಹಾಂವ್ ತುಜೆ ಮುಕಾರ್ ಮೇಣ್ ಜಾವ್ನ್ ಕರ್ಗಾತಾಂ!"
ಮಿಶೇಲಾಕ್ ಏಕ್ ಪಾವ್ಟಿಂಚ್ಯಾಕ್ ಆಪ್ಣಾ ವಯ್ರ್ಚ್ ಲಜ್ ದಿಸ್ಲಿ. ಲಜೆನ್ ತಾಚ್ಯಾ ಪೊಲ್ಯಾಂಚೊ ರಂಗ್ ವೆಗ್ಳೊ ಜಾತಾನಾ ತಾಚ್ಯಾ ದೊಳ್ಯಾಂಚಿ ದೀಶ್ಟ್ ಎದೊಳ್ ಪಾಸೊನ್ ರಾಯನಾಕ್ ತದೇಕ್ ದಿಶ್ಟಿನ್ ಪಳವ್ನ್ ಆಸ್ಲ್ಲಿ ತಿ ಆಪ್ಲ್ಯಾ ಆಸ್ಡ್ಯಾಂ ಭಿತರ್ ಲಜೆಕ್ ಪಾಂಗ್ರುನ್ ರಾವ್ಲಿ.
"ತುಂ ಜಾಣಾಂಯ್ ಮಿಶೇಲ್?" ರಾಯನ್ಚ್ ಉಲಯ್ಲೊ. "ತುಂ ನಿಜಾಯ್ಕ್ಯ್ ಮಸ್ತ್ ಸೊಭಿತ್! ಮ್ಹಜ್ಯಾ ಜಿವಿತಾಂತ್ ಹಾವೆಂ ಮ್ಹಜ್ಯಾ ಖಾತಿರ್ ಆಶೆಲ್ಲೆಂ ಪಯ್ಲೆಂ ಚಲಿ ಮ್ಹಳ್ಯಾರ್ ತುಂ!"
ರಾಯನಾಚಿಂ ಉತ್ರಾಂ ಆಯ್ಕೊನ್ ಮಿಶೆಲಾಕ್ ನಿಜಾಯ್ಕ್ಯ್ ಆಪುಣ್ ಸರ್ಗಾರ್ ಆಸಾಂ ಮ್ಹಳ್ಳ್ಯಾ ಪರಿಂ ಜಾಲೆಂ. ತೆಂ ಕಾಂಯ್ ಉಲಯ್ಲೆಂ ನಾಂ. ಆಪ್ಲ್ಯಾ ದೊಡ್ಲೆಲ್ಯಾ ಆಸ್ಡ್ಯಾಂಕ್ ಫುಲವ್ನ್ ರಾಯನಾಕ್ ಪಳಂವ್ಕ್ ತಾಚ್ಯಾ ಲಜೆನ್ ತಾಕಾ ಆವ್ಕಾಸ್ ಕರುನ್ ದಿಲೊ ನಾ. ತೆಂ ತಶೆಂಚ್ ದಾಂಪ್ಲೆಲ್ಯಾ ದೊಳ್ಯಾಂನಿಚ್ ಆಪ್ಲ್ಯಾ ಮತಿಂತ್ ರಾಯನಾಕ್ ಆಶೆಂವ್ಕ್ ಲಾಗ್ಲೆಂ. ತೆಂ ಆತಾಂ ರಾಯನಾಕ್ ಆಪ್ಣಾಚಾ ಮಸ್ತ್ ಲಾಗಿಂ ಆಶೆಲೆಂ.
ತಿತ್ಲೆಂಚ್!
"ಐ ಲವ್ ಯು ಡಾರ್ಲಿಂಗ್!"
ರಾಯನಾನ್ ಮಿಶೇಲಾಕ್ ಭಳಾನ್ ಆಪ್ಣಾ ತೆಂವ್ಶಿ ವೊಡುನ್ ತೊ ಉದಾರೊ ಜಾಲೊ. ತಾಚೆ ಸಂಗಿಂ ಲೊಳ್ಲ್ಲೆಂ ಮಿಶೇಲ್ ಆತಾಂ ರಾಯನಾಚಾ ವಯ್ರ್ ವೊಮ್ತೆಂ ಜಾಲ್ಲೆಂ. ಥಂಯ್ಚ್ ಮಿಶೆಲಾಕ್ ರಾಯನಾನ್ ಘಟ್ ದರ್ಲೆಂ.
ಮಿಶೇಲಾಚೆ ತೆ ಭಾಂಗ್ರಾಳೆ ಕೇಸ್ ರಾಯನಾಚಾ ತೊಂಡಾರ್ ಪಡೊನ್ ತಾಕಾ ತೆ ಕೇಸ್ ರಸ್ಮಾಚ್ಯಾ ದಾಗ್ಯಾಂಚೊ ಆನ್ಬೋಗ್ ದಿಂವ್ಕ್ ಲಾಗ್ಲೆ. ತ್ಯಾ ಕೆಸಾಂಕ್ ರಾಯನಾನ್ ಜಾಂವ್ ಮಿಶೆಲಾನ್ ಜಾಂವ್ ಪಯ್ಸ್ ಕರ್ಚೆಂ ಪ್ರಯತ್ನ್ ಕೆಲೆಂ ನಾ. ಮಿಶೇಲ್ ಆತಾಂ ವ್ಹಳೂ ರಾಯನಾ ತೆಂವ್ಶಿ ಬಾಗ್ವಾಲೆಂ.
*************
ಫಾಂತ್ಯಾಚಾ ಫ್ಲೈಟಾರ್ ದೊಗಾಂಯ್ ಮಾಲಾಗಾ ಪಾವ್ಲಿಂ. ಮಾಲಾಗಾ ಗಾಂವ್ಚಿಯ್ ತಿಚ್ಚ್ ಸೊಭಾಯ್! ಜಶೆಂ ಸಾಂತಾಕ್ರ್ರುಜಾಚಾ ಸೊಭಾಯೆ ಪರಿಂ. ಪೃಕೃತೆಚಿ ಸೊಭಾಯ್, ದರ್ಯಾಚಿ ವೆಳ್, ಧವಿ ರೇಂವ್, ಸೊಭಿತ್ ಹೊಟೆಲಾಂ, ಶಾಪಿಂಗ್ ಕಾಂಪ್ಲೆಕ್ಸಾಂ, ನೆಟಯಿಲ್ಲೆಂ ಪಾಚ್ವೆಂಪಣ್, ರಾತಿಚ್ಯಾ ವೀಜ್ ದಿವ್ಯಾಂನಿ ಮಾಲಾಗಕ್ ದಿಂವ್ಚಿ ಸೊಭಾಯ್ಚ್ ಅಥ್ವಿ! ಮಿಶೇಲ್ ಆನಿ ರಾಯನ್ ಚಾರ್ ದೀಸ್ ಮಾಲಾಗಾ ರಾವ್ಲಿಂ.
ಮಾಲಾಗಾ ಥಾವ್ನ್ ತಿಂ ಇಬಿಜ಼ಾ ಆಯ್ಲಿಂ. ಇಬಿಜ಼ಾಚಿ ಸೊಭಾಯ್ ಪಳವ್ನ್ ಮಿಶೇಲ್ ಶಿರಿಂ ಚುಕ್ಲೆಂ. ಪುಣ್ ಮಸ್ತ್ ಶಾಂತ್! ಪಯ್ಸ್ ಪಯ್ಸ್ ವರೇಗ್ ಕಾಂಯ್ಸ್ ನಾ ಮ್ಹಳ್ಳ್ಯಾ ಪರಿಂ! ದೊಳ್ಯಾಂಕ್ ಚಾರ್ಯ್ ಕುಶಿಂನ್ ಫಕತ್ತ್ ರೇಂವ್ ಆನಿ ಉದಾಕ್ ಸೊಡ್ಲ್ಯಾರ್ ದುಸ್ರೆಂ ಕಾಂಯ್ಚ್ ನಾ. ಪೃಕೃತೆನ್ ವಿಶಿಶ್ಟ್ ಇರಾದ್ಯಾನ್ ಹ್ಯಾ ಸೃಶ್ಟೆಕ್ ರಚ್ಲಾಂ ಮ್ಹಳ್ಳ್ಯಾಪರಿಂ! ಥಂಡ್ ಆನಿ ಶಾಂತ್ ದರ್ಯಾವೆಳ್. ಸ್ಪೇಯ್ನ್ ಆನಿ ತಾಚ್ಯಾ ಐಲ್ಯಾಂಡ್ಸಾನಿ ಇತ್ಲಿ ಸೊಭಾಯ್ ಭರೊನ್ ಉಮಾಳ್ತಾ ಮ್ಹಳ್ಳೆಂ ಮಿಶೇಲ್ ಪಯ್ಲ್ಯಾ ಪಾವ್ಟಿಂ ಜಾಣಾಂ ಜಾಲೆಂ.
ಇಬಿಜ಼ಾಂತ್ ಚಡಾವತ್ ಜಾವ್ನ್ ರಾತಿಚೆಂ ಕಾರ್ಬಾರ್! ಚಡಾವತ್ ಹಾಂಗಾಚೊ ಲೋಕ್ ಪಯ್ಣಾರಿಚ್! ಚಡ್ತಾವ್ ಜಾವ್ನ್ ಹಪ್ತ್ಯಾಚಾ ರಜೆಕ್ ಸಂತೊಸಾನ್ ಸಾರುಂಕ್ ಯೆಂವ್ಚೊ! ಹಾಂಗಾಸರ್ ಲ್ಹಾನಾ ವ್ಹಡಾಂ, ತರ್ನಾಟಿಂ, ಪ್ರಾಯೆಚಿಂ ಮ್ಹಣಾನಾಸ್ತಾನಾ ಸಗ್ಳ್ಯಾಂಕ್ಯ್ ಖುಶಾಲ್ಕಾಯ್. ಲೇಟ್ ನೈಟ್ ಪಾರ್ಟಿ. ಮ್ಯೂಸಿಕ್ ಶೋ, ಬಾಲ್ ರೂಮ್ ಡ್ಯಾನ್ಸ್, ಡ್ಯಾನ್ಸ್ ಪಾರ್ಟಿ... ಆಶೆಂ ಹೊ ಏಕ್ ಲೊಕಾಂಕ್ ದುಸ್ರೊಚ್ ಸಂಸಾರ್!
ಇಬಿಜ಼ಾಂತ್ ರಾಯನ್ ಆನಿ ಮಿಶೇಲ್ ತೀನ್ ದೀಸ್ ರಾವ್ಲಿಂ. ಮಾಲಾಗಾಂತ್ಚ್ ರಾಯನಾನ್ ಆಪ್ಲಿ ಮುಕ್ಲಿ ಏರ್ ಟಿಕೆಟ್ ಕನ್ಫರ್ಮ್ ಕೆಲ್ಲಿ. ಇಬಿಜ಼ಾ ಥಾವ್ನ್ ವಲೆನ್ಸಿಯಾ! ವಲೆನ್ಸಿಯಾ ಥಾವ್ನ್ ಮ್ಯಾಡ್ರಿಡ್. ಮ್ಯಾಡ್ರಿಡಾ ಥಾವ್ನ್ ದುಬಾಯಿ ಜಾವ್ನ್ ಪಾಟಿಂ ಮುಂಬಯಿ!
ಇಬಿಜ಼ಾ ಥಾವ್ನ್ ವಲೆನ್ಸಿಯಾ ಆನಿ ವಲೆನ್ಸಿಯಾ ಥಾವ್ನ್ ಮ್ಯಾಡ್ರಿಡ್ ಪಾವ್ಲೆಲ್ಯಾ ಹ್ಯಾ ಲಾಂಬ್ ಪಯ್ಣಾ ಥಾವ್ನ್ ದೊಗಾಂಯ್ ಬರಿಂಚ್ ಥಕ್ಲ್ಲಿಂ. ಮ್ಯಾಡ್ರಿಡಾ ಥಾವ್ನ್ ಮುಕ್ಲೆಂ ಪಯ್ಣ್ ಕರುಂಕ್ ಆಸ್ಲ್ಲೆಂ.
ಮ್ಯಾಡ್ರಿಡಾಚಾ ಏರ್ಪೊರ್ಟಾಂತ್ ರಾಯನ್ ಆನಿ ಮಿಶೇಲ್ ದೊಗಾಂಯ್ ತಾಂಚಾ ಮುಕ್ಲ್ಯಾ ಪಯ್ಣಾಕ್ ವಿಮಾನಾಚಾ ವೆಳಾಕ್ ರಾಕೊನ್ ಆಸ್ಲ್ಲಿಂ. ವಿಮಾನ್ ಮ್ಯಾಡ್ರಿಡ್ ಸೊಡುನ್ ವಾರ್ಯಾರ್ ಉಭೊಂಕ್ ಹಾನಿಕ್ಯ್ ದೋನ್ ವೊರಾಂಚೊ ವೇಳ್ ಆಸ್ಲ್ಲೊ. ತಾಣಿಂ ಉಭೊಂಕ್ ಆಸ್ಚೆಂ ಪ್ಲೈಟ್ ಅಜೂನ್ ಮ್ಯಾಡ್ರಿಡಾಚಾ ಅರ್ರಾಯ್ವಲ್ ಬೋರ್ಡಾರ್ ಡಿಲೇ ದಾಖಯ್ತಾಲೆಂ.
ಏರ್ಪೊರ್ಟಾ ಭಿತರ್ಲ್ಯಾ ಥಂಡಾಯೆಕ್ ಆಂಕುಡ್ಚೆಂ ಮಿಶೇಲ್ ಆಪ್ಲ್ಯಾ ಆಂಗಾಕ್ ಸ್ವೆಟರ್ ವೊಡುನ್ಯ್ ತಾಕಾ ಹಿಂವ್ ತಡ್ವುಂಕ್ ತಾಂಕಾನಾಸ್ತಾನಾ ವೆತಾನಾ ರಾಯನಾಚಾ ಹಾತಾಕ್ ಆಪ್ಲ್ಯಾ ಹಾತಿಂ ಧರುನ್ ತಾಚ್ಯಾ ಬಾವ್ಳ್ಯಾರ್ ಆಪ್ಲಿ ತಕ್ಲಿ ತೆಂಕುನ್ ಜೆಮೆತಾಲೆಂ.
ತಿತ್ಲ್ಯಾರ್!
ಎದೊಳ್ ಮೌನ್ ಆಸ್ಲ್ಲೆಂ ರಾಯನಾಚೆಂ ಸೆಲ್ಪೋನ್ ಅಚಾನಕ್ ಆವಾಜುಂಕ್ ಲಾಗ್ಲೆಂ.
"ಮಿಶೇಲ್! ಏಕ್ ಮಿನಿಟ್....!" ರಾಯನಾನ್ ಸವ್ಕಾಸ್ ಆಪ್ಲ್ಯಾ ಉಜ್ವ್ಯಾ ಹಾತಾನ್ ಮಿಶೇಲಾಚಾ ತಕ್ಲೆಕ್ ಧರುನ್ ತಾಚಿ ತಕ್ಲಿ ನೀಟ್ ಕೆಲಿ. ತಶೆಂಚ್ ತಾಕಾ ಆಪ್ಲ್ಯಾ ಉಜ್ವ್ಯಾ ಹಾತಾಚಾ ಆಧಾರಾನ್ ಸಾಂಬಾಳುನ್ ಧರುನ್ ದಾವ್ಯಾ ಹಾತಾನ್ ಆಪ್ಲ್ಯಾ ಕೋಟಾಚಾ ಬೊಲ್ಸಾಂತ್ ಆಸ್ಲ್ಲೆಂ ಪೋನ್ ತಾಣೆಂ ಭಾಯ್ರ್ ಕಾಡ್ಲೆಂ.
ಅಪರಿಚಿತ್ ನಂಬರ್!
ಕೋಣ್ ಜಾವ್ಯೆತ್......?
ಪೊನಾಚಾ ಡಿಸ್ಪ್ಲೇ ವಯ್ರ್ ಪಳೆಲ್ಲ್ಯಾ ತಾಚ್ಯಾ ದೊಳ್ಯಾಂಕ್ ತ್ಯಾ ನಂಬ್ರಾಕ್ ಹ್ಯಾ ಆದಿಂ ಪಳೆಲ್ಲೊ ಉಡಾಸ್ ಆಯ್ಲೊ ನಾ.
"ಹಲೋ....?"
ರಾಯನಾನ್ ಪೋನ್ ಆನ್ ಕೆಲೆಂ.
"ಹಲೋ....?" ತ್ಯಾ ಕುಶಿನ್ ಚಲಿಯೆಚೊ ತಾಳೊ.
ಏಕಾ ಖಿಣಾಕ್ ರಾಯನಾಚಿ ಮತ್ ತಾಚ್ಯಾ ಉಡಾಸಾಚಿಂ ಪಾನಾಂ ಪರ್ತುಂಕ್ ಲಾಗ್ಲಿ. ನಾ ಹ್ಯಾ ಪೊನಾ ವಯ್ಲ್ಯಾ ತಾಳ್ಯಾಕ್ ಹಾಚ್ಯಾ ಪಯ್ಲೆಂ ಆಯ್ಕಾಲ್ಲೊ ಉಡಾಸ್ ತಾಕಾ ಆಯ್ಲೊ ನಾ. ತೊ ತಾಳೊ ಆಪ್ಲ್ಯಾ ಉಡಾಸಾ ಭಾಯ್ಲೊ ಮ್ಹಳ್ಳ್ಯಾ ಪರಿಂ ಜಾಲೆಂ.
"ಎಸ್.....?" ರಾಯನ್ ಉಲಯ್ಲೊ.
"ಇಸ್ ದಿಸ್ ಮಿಸ್ಟರ್ ರಾಯನ್.....?" ತ್ಯಾ ಕುಶಿನ್ ಥಾವ್ನ್ ಮರ್ಯಾದಿಚೊ ಮಯ್ಪಾಸಿ ತಾಳೊ. ಕೋಣ್ ಜಾವ್ಯೆತ್? ತಾಚಿ ಮತ್ ಚಿಂತಾಲಿ.
"ಎಸ್!"
"ಹಾವೆಂ ತುಕಾ ಡಿಸ್ಟರ್ಬ್ ಕರುಂಕ್ ನಾ.....?"
"ನಾ! ಖಂಡಿತ್ ನಾ....!" ರಾಯನಾಕ್ ಆಶ್ಚರ್ಯ್ ಜಾಲೆಂ. ತ್ಯಾ ತಾಳ್ಯಾಂತ್ ಉದೆಂವ್ಚ್ಯಾ ತರಂಗಾಂಕ್ ಆಯ್ಕಾತಾನಾ ರಾಯನಾಕ್ ಹ್ಯಾ ತಾಳ್ಯಾಕ್ ಆಪುಣ್ ವಳ್ಕಾತಾಂ ತಶೆಂ ಜಾಲೆಂ.
"ಹ್ಯಾ ವೆಳಾರ್ ಹಾಂವ್ ತುಜ್ಯೆ ಲಾಗಿಂ ಉಲಂವ್ಕ್ ಸಕ್ತಾಂ? ಇಫ್ ಯು ಡೋಂಟ್ ಮೈಂಡ್.....!"
"ಶೂವರ್! ವೈ ನಾಟ್.....?" ಹಿ ವಿನತಿ ರಾಯನಾನ್ ಹಾಚ್ಯಾ ಪಯ್ಲೆಂ ಆಪ್ಲ್ಯಾ ಕಾನಾನಿಂ ಆಯ್ಕಾಲ್ಯಾ. ವ್ಹಯ್! ಪುಣ್ ಹೆಂ ಕೋಣ್....?
"ತುಂ ಫ್ರೀ ಆಸಾಯ್ ಜಾಲ್ಯಾರ್....!?"
"ಮೇ ಐ ನೋ ಹು ಇಸ್ ಸ್ಪೀಕಿಂಗ್ ಪ್ಲೀಸ್....?" ರಾಯನ್ ಆಪ್ಲ್ಯಾ ಉಡಾಸಾಕ್ ಸೊಧುನ್ ಸಲ್ವಾಲೊ. ತಾಚ್ಯಾ ಮತಿನ್ ತಾಕಾ ಸಾಂಗಾತ್ ದಿಲೊ ನಾ. ಪುಣ್ ತೊ ಜಾಣಾಂ ಕೀ ಹೊ ತಾಳೊ ಹಾಚ್ಯಾ ಪಯ್ಲೆಂ ಆಪ್ಣೆ ಆಯ್ಕಾಲಾ.
"ಓಹ್.....! ಐ ಯಾಮ್ ಸಾರ್ರಿ! ಹಾವೆಂ ಚಿಂತ್ಲೆಂ ತುಕಾ ಮ್ಹಜೊ ಉಡಾಸ್ ಆಸಾ ಮ್ಹಣ್!"
"ಇಟ್ಸ್ ಓ.ಕೆ.!" ರಾಯನಾಚಿ ಮತ್ ಸಂಪೂರ್ಣ್ ಕದ್ವಳ್ಳಿ.
"ಹಾಂವ್ ಆಲಿಯಾ....! ಆಲಿಯಾ ಉಲಯ್ತಾಂ. ತೀನ್ ವರ್ಸಾಂ ಪಯ್ಲೆಂ ತುಕಾ ಮಹಾಬಲೇಶ್ವರಾಂತ್ ತುಜ್ಯಾ ಪಿಕ್ಚರ್ ಶೂಟಿಂಗಾ ವೆಳಾರ್ ಮೆಳ್ಲ್ಲಿಂ.... ತುವೆಂ ಮ್ಹಾಕಾ ನಂಬರ್ ದಿಲ್ಲೆಂ.....!"
"ಓಹ್ ತುಂ!" ರಾಯನಾನ್ ವಳಕ್ ಧರ್ಲಿ.
*****************
[ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
ಕಾದಂಬರಿಕಾರಾಚಿಂ ಉತ್ರಾಂ: 1, 2, 3, 4, 5, 6, 7, 8, 9, 10, 11, 12
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
