ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ಏಕ್
ಜಿವಿತ್ ತುಕಾ ಆಪಯ್ತಾ
ಆವಸ್ವರ್ ತೀನ್: ಮಿಶೇಲ್
"ಸಪಾಣ್....!"
"ಏಕ್ ಸೊಭಿತ್ ಸಪಾಣ್....!!"
"ಮ್ಯಾಂಚೆಸ್ಟಾರಾಚಾ ಪಾಳ್ಣ್ಯಾಂತ್ ಆಜ್ ಸಪಾಣ್ ಜಲ್ಮಾಲಾಂ.....!!!"
ಚಾರ್ಲ್ಸಾಚಾ ಸಂತೊಸಾಕ್ ಆಜ್ ಗಡ್ ನಾತ್ಲ್ಲಿ. ನೋವ್ ಮಹಿನ್ಯಾಂ ಥಾವ್ನ್ ತಾಣೆಂ ಪಳೆಲ್ಲೆಂ ಸಪಾಣ್ ಆಜ್ ತಾಚೆ ಮುಖಾರ್ ಜಿವೆಂ ಜಿವೆಂ ವಿವಿಯಾನಾಚಾ ಬಗ್ಲೆಕ್ ನಿದ್ಲ್ಲೆಂ. ವಿವಿಯಾನಾಕ್ ಪ್ರಸೂತ್ ಜಾಂವ್ಕ್ ಕಷ್ಟ್ ಜಾಲ್ಲೆ ಜಾಲ್ಯಾರ್ಯ್ ತೆಂ ಸಾದೆಂಚ್ ಪ್ರಸೂತ್ ಜಾಲೆಂ.
"ತುಕಾ ಹಾವೆಂ ಕಶೆಂ ಥ್ಯಾಂಕ್ಸ್ ಮ್ಹಣೊನ್ ಸಾಂಗ್ಚೆಂ ವಿವಿ? ಕಾಂಗ್ರಾಜುಲೇಶನ್ಸ್......!" ಆಪ್ಲ್ಯಾ ಭುರ್ಗ್ಯಾಕ್ ಪಳವ್ನ್ ಸಂತೊಸಾನ್ ಸಗ್ಳೊಚ್ ಸಂಸಾರಾಕ್ ವಿಸ್ರಾಲ್ಲ್ಯಾ ಚಾರ್ಲ್ಸಾನ್ ಆಪ್ಲ್ಯಾ ಬಾಯ್ಲೆಚಾ ತೆಂವ್ಶಿಂ ಬಾಗ್ವೊನ್ ತಾಚಾ ಪೊಲ್ಯಾಕ್ ಏಕ್ ಉಮೊ ದಿಲೊ.
"ಇಟ್ಸ್ ಅ ಬೇಬಿ ಗರ್ಲ್!"
ವಸ್ತುರಾಂತ್ ಗುಟ್ಲಾವ್ನ್ ಆಪ್ಣಾಚಾ ಬಗ್ಲೆಕ್ ನಿದಾಯಿಲ್ಲ್ಯಾ ಆಪ್ಲ್ಯಾ ಭುರ್ಗ್ಯಾಕ್ ಏಕ್ ಪಾವ್ಟಿಂ ಪಳೆಲ್ಲೆಂ ವಿವಿಯಾನಾ ಆಪ್ಲ್ಯಾ ಸಂತೊಸ್ಭರಿತ್ ದೊಳ್ಯಾಂನಿ ಚಾರ್ಲ್ಸಾಕ್ ಪಳಂವ್ಕ್ ಲಾಗ್ಲೆಂ.
"ಸೊ...! ಎಟ್ ಲಾಟ್ ಎ ಇಂಡಿಯನ್ ಬ್ಯೂಟಿ.....!" ವೊಂಟಾರ್ ಹಾಸೊ ಹಾಡ್ಲೆಲ್ಯಾ ಚಾರ್ಲ್ಸಾನ್ ಆಪ್ಲ್ಯಾ ಭುರ್ಗ್ಯಾ ತೆವ್ಶಿಂ ಪಳೆಲೆಂ.
"ತೆಂ ತುಕಾ ಇಂಡಿಯಾನಾ ಪರಿಂ ದಿಸ್ತಾ?" ವೋಂಟ್ ರೂಂದಾವ್ನ್ ಹಾಸ್ಲ್ಲೆಂ ವಿವಿಯಾನಾ ಆಪ್ಲ್ಯಾ ದಾವ್ಯಾ ಹಾತಾನ್ ಬಾಳ್ಶ್ಯಾಚಾ ಮಾತ್ಯಾ ವಯ್ರ್ ಹಾತ್ ಚರವ್ನ್,
"ಶಿ ಇಸ್ ಎ ಸ್ಕಾಟಿಶ್ ಮೇಯ್ಡನ್....!" ವಿವಿಯಾನಾಚಾ ಉದ್ಗಾರಾಂತ್ ಆಪ್ಲೆಂ ಜಯ್ತ್ ಝಳ್ಕಾತಾಲೆಂ.
ಆಜ್ ನಿಜಾಯ್ಕ್ಯ್ ಚಾರ್ಲ್ಸ್ ಆನಿ ವಿವಿಯಾನಾ ಖುಶ್ ಆಸ್ಲ್ಲಿಂ. ತಾಂಚೊ ಮೋಗ್ ಆಜ್ ತಾಂಚ್ಯಾ ದೊಳ್ಯಾಂ ಮುಕಾರ್ ತಾಂಚ್ಯಾಚ್ ರಗ್ತಾ ಮಾಸಾಕ್ ಘೆವ್ನ್ ತಾಂಚ್ಯಾ ಸಂಭಂಧಾಚಿ ಜಿವಿ ಸಾಕ್ಸ್ ಜಾವ್ನ್ ಸಂಸಾರಾಕ್ ಆಯಿಲ್ಲೊ. ಆಜ್ ಹ್ಯಾ ಸಂಸಾರಾಂತ್ ವಿವಿಯಾನಾ ಆನಿ ಚಾರ್ಲ್ಸಾಚಾ ಸಂಭಂಧಾಕ್ ಏಕ್ ಗಾಂಚ್, ಬಾಳ್ಶ್ಯಾ ರುಪಿಂ ತಾಂಚಾ ಕಾಜಾರಿ ಬೆಸಾಚೊ ದಾಗೊ ಜಾವ್ನ್ ಜಲ್ಮೊನ್ ಆಯಿಲ್ಲೊ! ಆಜ್ ಏಕ್ ಕಾಜಾರಿ ಜಿವಿತ್ ಸಂಪೂರ್ಣ್ ರಿತಿನ್ ಪರಿಪೂರ್ಣ್ ಜಾಲ್ಲೆಂ.
ಆಜ್ ಎಕಾಚ್ ಘಡಿತಾಂತ್ ತೀನ್ ಸಂಗ್ತ್ಯೊ ಪರಿಪೂರ್ಣಾತಾಯೆಕ್ ಪಾವ್ಲ್ಲ್ಯೊ. ಪಯ್ಲೆಂಚೆಂ ಜಾವ್ನ್ ಚಾರ್ಲ್ಸ್ ಆನಿ ವಿವಿಯಾನಾ ಮನ್ಶ್ಯಾ ಜಿವಿತಾಚಾ ಬುನ್ಯಾದೆಂತ್ ಸಂಪೂರ್ಣ್ ಥರಾನ್ ಪರಿಪೂರ್ಣಾತೆಕ್ ಪಾವ್ಲ್ಲಿಂ ಜಾಲ್ಯಾರ್ ದುಸ್ರೆಂ ಜಾವ್ನ್ ಚಾರ್ಲ್ಸ್ ಆನಿ ವಿವಿಯಾನಾನ್ ವಿಶ್ವಾಸಾನ್ ಬಾಂದ್ಲ್ಲ್ಯಾ ತಾಂಚಾ ಭೆಸಾಚ್ಯಾ ಪವಿತ್ರ್ಪಣಾಚಿ ಸಾಕ್ಸ್ ಪರಿಪೂರ್ಣ್ ಜಾಲ್ಲಿ. ತಿಸ್ರೆಂ ಜಾವ್ನ್ ಸಾಸ್ಣಾಚಾ ಸಾಸ್ಣಾಕ್ ಆಜ್ ಕಿರ್ಲಾಲ್ಲ್ಯಾ ಜಿವಾನ್ ಚಾರ್ಲ್ಸ್ ಆನಿ ವಿವಿಯಾನಾಕ್ ಘೊವ್ ಆನಿ ಬಾಯ್ಲೆ ಥಾವ್ನ್ ಆವಯ್ ಆನಿ ಬಾಪಯ್ ಕರುನ್, ಹ್ಯಾ ಸಂಭಂಧಾಚಾ ಸಾಕ್ಶೆಕ್ ಸರ್ಗಿಂ ಸಂಸಾರಿಂ ಪಾತಾಳಿಂ ಕೊಣೆಂಚ್ ಕೆದ್ನಾಂಚ್ ಮೊಡುಂಕ್ ಸಕಾನಾಸ್ಲಲೊ ಗಾಂಚ್ ಜಾವ್ನ್ ಪರಿಪೂರ್ಣ್ ಥರಾನ್ ಘುಂತ್ಲ್ಲೊ.
ಮನ್ಶ್ಯಾಚೆಂ ಜಿವಿತ್ ಖರೆಂಚ್ ಕೆದ್ನಾಂ ಸಾರ್ಥಕ್ ಜಾತಾ? ಜೆದ್ನಾಂ ಲಾಚಾರ್ ಮನಿಸ್ ಆಪ್ಲ್ಯಾ ತಾಬೆಂತ್ ನಾತ್ಲೆಲ್ಯಾ ಸಂಗ್ತೆಕ್, ದೊಳ್ಯಾಂ ದಿಶ್ಟೆಕ್ ದಿಸಾನಾತ್ಲೆಲ್ಯಾ ತ್ಯಾ ಅಗೋಚರ್ ಸಕ್ತೆಚಾ ದಯೆನ್ ಫಳಾಭರಿತ್ ಕರ್ಚಾಂತ್ ಯಶಸ್ವಿ ಜಾತಾ, ತೆದ್ನಾಂ ತೊ ಆಂತರಿಕ್ ಪಣಿಂ ಮನ್ಶಾ ಜಿವಿತಾಚೆಂ ಸಾರ್ಥಕ್ ಜಿಣೆಂ ಅನುಭವಿಸಿತಾ ಆನಿ ಆಪ್ಲೆಂ ಜಿವಿತ್ ಸಾರ್ಥಕ್ ಜಾಲೆಂ ಮ್ಹಣೊನ್ ಆಪ್ಣಾಕ್ಚ್ ಶಭಾಸ್ಕಿ ದಿತಾ.
ತಶೆಂಚ್ ಆಜ್ ವಿವಿಯಾನಾ ಆನಿ ಚಾರ್ಲ್ಸ್.....!
ಮನ್ಶಾ ರುಪಿಂ ತಿಂ ಲಾಚಾರ್ ನ್ಹಯ್! ಸಂಸಾರಾಂತ್ ತಾಂಕಾ ಕಿತೆಂ ಜಾಯ್, ಕಸಲೆಂ ಸುಖ್ ಜಾಯ್ ತೆಂ ಅನುಭವಿಸುಂಚ್ಯೊ ವಾಟೊ ತಿಂ ಸೊಧುಂಕ್ ಸಕ್ತಾತ್. ಪುಣ್ ಕಾಂಯ್ಚ್ ನಾತ್ಲ್ಲ್ಯಾ ಕಡೆನ್ ಏಕ್ ಸುಂದರ್ ಜೀವ್ ಮನಿಸ್ ರಚುಂಕ್ ಸಕ್ತಾ? ಎಕೇಕ್ ಪಾವ್ಟಿಂ ಮನಿಸ್ ಆಪ್ಣಾಲಾಗಿಂ ಸಗ್ಳೆಂ ಆಸಾ ಮ್ಹಣೊನ್ ಆಪ್ಣಾಕ್ಚ್ ಶಭಾಸ್ಕಿ ದಿತಾ ಜಾಲ್ಯಾರ್ಯ್ ತ್ಯಾ ಮನ್ಶ್ಯಾ ಥಂಯ್ ಕಾಂಯ್ಚ್ ಆಸಾನಾ. ಭೋವ್ಶ್ಯಾ ಹ್ಯಾಚ್ ಖಾತಿರ್ ಸಂಸಾರಾಂತ್ಲೆಂ ಅತೀ ಊಂಚ್ ಸುಖ್ ಭೊಗ್ತಾನಾ ಪಾಸೊನ್ ಮನಿಸ್ ಸಂಪೂರ್ಣ್ ಪರಿಪೂರ್ಣಾತಾಯೆಕ್ ಪಾವಾನಾ ಜಿತ್ಲೆಂ ಎಕಾ ಜಿವಾಕ್ ಜಲ್ಮ್ ದಿತಾನಾ ತಾಕಾ ಮೆಳ್ಚೆಂ ತೆಂ ಸುಖ್ ತಾಕಾ ಪರಿಪೂರ್ಣಾತಾಯೆಚಾ ಅನಂತಾಕ್
ಪಾವಯ್ತಾ!
ಹ್ಯಾಚ್ ಖಾತಿರ್ ಚಾರ್ಲ್ಸ್ ಆನಿ ವಿವಿಯಾನಾ ತಾಂಕಾಚ್ ತಿಂ ಆಜ್ ಸಂಸಾರಾಂತ್ಲಿಂ ಚಡ್ ಸುಖಿ ಮನ್ಶ್ಯಾಂ ಮ್ಹಣೊನ್ ಚಿಂತಾಲಿಂ. ತ್ಯಾ ನೋವ್ ಮಹಿನ್ಯಾಂ ಮಧೆಂ ತಾಣಿಂ ಪಳೆಲ್ಲಿಂ ಸಪ್ಣಾಂ, ತಾಣಿಂ ಘುಂತ್ಲ್ಲಿಂ ಭೊಗ್ಣಾಂ ಆಜ್ ಏಕ್ ನವೆಂ ರೂಪ್ ಘೆವ್ನ್ ತಾಂಚಾ ದೊಳ್ಯಾಂ ಮುಖಾರ್ ಹಾಜರ್ ಜಾಲ್ಲಿಂ. ಆಜ್ ದೊಗಾಂಯ್ ಖುಶ್ ಆಸ್ಲ್ಲಿಂ ವ್ಹಯ್.... ಪುಣ್ ಆಟ್ ಮಹಿನ್ಯಾಂ ಆದಿಂ.....! ತಾಂಚೆಂ ಕಾಜಾರ್ ಜಾವ್ನ್ ತಿಸ್ರ್ಯಾಚ್ ಮಹಿನ್ಯಾಂತ್ ವಿವಿಯಾನಾ ಗುರ್ವಾರ್ ಜಾಲ್ಲ್ಯಾ ವೆಳಿಂ...?
ಚಾರ್ಲ್ಸ್ ಆನಿ ವಿವಿಯಾನಾಚೆಂ ಕಾಜಾರ್ ಜಾಲ್ಯಾ ಉಪ್ರಾಂತ್ ಸಗ್ಳ್ಯಾಂ ಪ್ರಾಸ್ ಪಯ್ಲೆಂ, ಮ್ಯಾಂಚೆಸ್ಟರಾಂತ್ ಆಪ್ಣಾಕ್ ಏಕ್ ಲ್ಹಾನ್ ಸೊಭಿತ್ ಘರ್ ಕರುಂಕ್ ಜಾಯ್ ಮ್ಹಣೊನ್ ತಾಣಿಂ ದೊಗಾಂಯ್ನಿ ಚಿಂತ್ಲ್ಲೆಂ. ಘರಾಚೆಂ ಜಾತಾ ವರೇಗ್ ಭುರ್ಗ್ಯಾಂ ವಿಶಿಂ ಚಿಂತ್ಚೆಂ ನಾಕಾ ಮ್ಹಣೊನ್ ದೊಗಾಂಯ್ ಮಧೆಂ ಸಹಮತಿ ಜಾಲ್ಲಿ ಜಾಲ್ಯಾರ್ಯ್ ಕಾಜಾರ್ ಜಾವ್ನ್ ತೀನ್ಚ್ ಮಹಿನ್ಯಾನಿಂ ವಿವಿಯಾಯಾನಾ ಗುರ್ವಾರ್ ಜಾಲೆಂ.
"ಹೊ ಕಾಂಯ್ ವ್ಹಡ್ಲೊ ವಿಶಯ್ ನ್ಹಯ್ ಚಾರ್ಲ್ಸ್. ಆಮ್ಕಾಂ ಭುರ್ಗೆಂ ನಾಕಾ ಜಾಲ್ಯಾರ್ ಆಮಿಂ ತೆಂ ಕಾಡವ್ಯೆತ್. ಎದೊಳ್ಚ್ ಕ್ರಿಸ್ಟಿನಾನ್ ತೀನ್ ಪಾವ್ಟಿಂ ಕಾಡಯ್ಲ್ಯಾಂತ್....!" ಆಪುಣ್ ಗುರ್ವಾರ್ ಜಾಲ್ಯಾಂ ತೆಂ ಆಯ್ಕೊನ್ ಚಾರ್ಲ್ಸಾಚೆಂ ಬಾವ್ಲೆಲೆಂ ತೋಂಡ್ ಪಳವ್ನ್ ವಿವಿಯಾನಾನ್ ಆಪ್ಲ್ಯಾ ಘೊವಾಕ್ ಸಾಂಗ್ಲೆಂ. ದೊಗಾಂಯ್ ಮಧೆಂ ತಾಣಿಂ ಆಶೆನಾತ್ಲ್ಲೆಂ ಘಡ್ಲ್ಲೆಂ. "ಆಮಿಂ ಜರ್ತರ್ ಭುರ್ಗ್ಯಾಕ್ ಜಲ್ಮ್ ದೀಂವ್ಕ್ ಯೋಗ್ಯ್ ನಾಂವ್ ಜಾಲ್ಯಾರ್ ತೆಂ ಕಾಡಂವ್ಚಾಂತ್ ಕಾಂಯ್ ವಾಯ್ಟ್ ನಾ.
ಹಾಂತುಂ ಚಿಂತುನ್ ಬಸ್ಚೆಂ ಕಿತೆಂ ಆಸಾ?" ಆಪ್ಲ್ಯಾ ಘೊವಾಚ್ಯಾ ಬೆಜಾರಾಯೆಕ್ ಆಪುಣ್ ಕಾರಾಣ್ ಜಾಲ್ಯಾಂ ಮ್ಹಳ್ಳೆಂ ಕಳೊನ್ ವಿವಿಯಾನಾ ಪರ್ತ್ಯಾಕ್ ಉಲಯ್ಲೆಂ.
ವಿವಿಯಾನಾಚಿಂ ಉತ್ರಾಂ ಆಯ್ಕಾಲ್ಲೊ ಚಾರ್ಲ್ಸ್ ಕಾಂಯ್ ಉಲಯ್ಲೊ ನಾ. ವಿವಿಯಾನಾನ್ ಉಚಾರ್ಲ್ಲ್ಯಾ ನಿರ್ಧಾರಾಕ್ ಆಪುಣ್ಯ್ ಕಾರಾಣ್ ಜಾವ್ನ್ ಆಸಾಂ ಮ್ಹಳ್ಳೆಂ ತಾಕಾ ಸಮ್ಜಾಲೆಂ. ಹಾಂವ್ ಆಶೆಂ ಚಿಂತೇಸ್ತ್ ಜಾಂವ್ಕ್ ನಾತ್ಲಲೊಂ ಜಾಲ್ಯಾರ್ ಭೋವ್ಶ್ಯಾ ವಿವಿಯಾನಾ ಅಸಲ್ಯಾ ಇತ್ಲ್ಯಾ ವ್ಹಡ್ಲ್ಯಾ ನಿರ್ಧಾರಾಕ್ ಆಪ್ಣಾ ಮುಕಾರ್ ದವರ್ತೆಂ ನಾ. ಹೆಂ ಕಳಿತ್ ಜಾಲ್ಲೊ ಚಾರ್ಲ್ಸ್,
"ಜರ್ತರ್ ತುಜ್ಯಾ ಆನಿ ಮ್ಹಜ್ಯಾ ಆವಯ್ನ್ಯ್ ಆಶೆಂಚ್ ಕೆಲ್ಲೆಂ ಜಾಲ್ಯಾರ್.....?" ಚಾರ್ಲ್ಸಾನ್ ತದೇಕ್ ನದ್ರೆನ್ ವಿವಿಯಾನಾಕ್ಚ್ ಪಳೆಲೆಂ.
ತಿತ್ಲೆಂಚ್!
ವಿವಿಯಾನಾ ಆಪ್ಣಾಕ್ ವೀಜ್ ಸಕ್ತೆನ್ ವೆಡೊ ಮಾರ್ಲೆಲ್ಯಾಪರಿಂ ಜಾವ್ನ್ ಉಡೊನ್ ಪಡ್ಲೆಂ. ತಾಣೆಂ ತಶೆಂಚ್ ಆಪ್ಲ್ಯಾ ಘೊವಾನ್ ಪಳೆಲೆಂ. ತಾಣೆಂ ಆಪ್ಲ್ಯಾ ಘೊವಾಚ್ಯಾ ಖಂತಿಕ್ ಆನಿ ಬೆಜಾರಾಯೆಕ್ ಪಯ್ಸ್ ಕರ್ಚಿ ಏಕ್ ವಾಟ್ ಮಾತ್ರ್ ತಾಚ್ಯಾ ಘೊವಾಚಾ ಮುಕಾರ್ ದವರ್ಲ್ಲಿ. ಪುಣ್ ಚಾರ್ಲ್ಸಾನ್.....?
ಅಚಾನಕ್ ಚಾರ್ಲ್ಸಾನ್ ಆಪ್ಲ್ಯಾ ಆವಯ್ಚೊ ಉಡಾಸ್ ಹಾಡಯ್ತಾನಾ ಎಕಾ ಕ್ಷಣಾಕ್ ವಿವಿಯಾನಾ ಪಾಟಿಂ ಮಸ್ತ್ ಪಾಟಿಂ ಗಯ್ರೆಂ ಗಯ್ರೆಂ ದಿಸ್ಚಾ ತ್ಯಾ ತಾಚ್ಯಾ ಭುರ್ಗ್ಯಾಪಣಾಕ್ ಪಾವ್ಲೆಂ.
ಆಪ್ಲೆಂಪಣ್ ಆಜ್ ಚಾರ್ಲ್ಸಾನ್ ಉಡಾಸ್ ಹಾಡಯ್ತಾನಾ ಖಂಯ್ಸರ್ಗೀ ಗಯ್ರಿಂ ಗಯ್ರಿಂ ರುಪಾಂ ದಿಸ್ಲ್ಲ್ಯಾ ಪರಿಂ ತಾಕಾ ಜಾಲಿಂ ಜಾಲ್ಯಾರ್ಯ್ ವಿವಿಯಾನಾಚಾ ದೊಳ್ಯಾಂ ಮುಖಾರ್ ಕಾಂಯ್ ಸ್ಪಶ್ಟ್ ದಿಸ್ಲೆಂ ನಾ.
ಆಪ್ಣಾಚಾ ಜವಾಬೆಂತ್ಲ್ಯಾ ಸವಾಲಾ ಥಾವ್ನ್ ವಿವಿಯಾನಾಕ್ ಆಪ್ಣೆಂ ಚಿಂತುಂಕ್ ಕಾರಾಣ್ ದಿಲೆಂ ತೆಂ ಕಳ್ಲ್ಲೊ ಚಾರ್ಲ್ಸ್ ಸವ್ಕಾಸ್ ಬಾಯ್ಲೆಚ್ಯಾ ಲಾಗಿಂ ಯೇವ್ನ್,
"ಪಳೆ ವಿವಿ..., ಆಮ್ಚೆಂ ಪ್ರಯತ್ನ್ ಆಮಿಂ ಕೆಲಾಂ. ಜಾಂವ್ ತೆಂ ಕಸಲ್ಯಾಯ್ ಆಮ್ಚಾ ಖಾಸ್ಗಿ ಕಾರಾಣಾಕ್ ಲಾಗೊನ್. ಪುಣ್ ಜೆಂ ಕಿತೆಂ ಆತಾಂ ತುಜ್ಯಾ ಥಂಯ್ ಜಾಲಾಂ ತೆಂ ಸಮ್ಥಿಂಗ್ ನಿವ್! ಹಾಂಗಾಸರ್ ಮ್ಹಜ್ಯಾ ಆನಿ ತುಜ್ಯಾ ಮೊಗಾಚೊ ಭಾಂದ್ ಕಿರ್ಲಾಲಾ. ಕಿರ್ಲಾಲ್ಲ್ಯಾ ಜಿವಾಕ್ ಹುಮ್ಟುನ್ ಉಡಂವ್ಚೆಂ ಕಿತೆಂ ಬರೆಂ.....?"
"ಹಾಂವ್ ನೆಣಾಂ ಚಾರ್ಲ್ಸ್....!" ಆಪ್ಲ್ಯಾ ಘೊವಾಚಾ ದೊಳ್ಯಾಂಕ್ಚ್ ಪಳಂವ್ಚ್ಯಾ ವಿವಿಯಾನಾಚಾ ದೊಳ್ಯಾಂನಿ ನೆಣ್ತೆಂಪಣ್ ಆಸ್ಲ್ಲೆಂ. ".....ಹ್ಯಾ ವಿಶಿಂ ಹಾವೆಂ ಕೆದ್ನಾಂಯ್ ಚಿಂತುಂಕ್ ಪಾಸೊನ್ ನಾ. ಆನಿ ಆಯ್ಚಾ ಹ್ಯಾ ಸಮಾಜೆಂತ್ ತಿತ್ಲೆಂ ಚಿಂತುಂಕ್ ಕೋಣ್ ವೆತಾ?" ಸಮಾಧಾನೆಚಿ ಜಾಪ್ ತಾಚಿ.
"ಆಮಿಂ ಚಿಂತುಂಕ್ ಜಾಯ್ ವಿವಿ.... ಆಮಿಂ ಚಿಂತುಂಕ್ ಜಾಯ್.....! ಸಂಸಾರ್ ಆಸೊ ಆಸಾ, ಮ್ಯಾಂಚೆಸ್ಟರ್ ಆಜ್ ಆಶೆಂ ಚಲ್ತಾ ಮ್ಹಣೊನ್ ಆಮಿಂಯ್ ತಶೆಂ ವೆಚೆಂ ನ್ಹಯ್. ಮ್ಯಾಂಚೆಸ್ಟರ್ ಸಾಸ್ಣಾಕ್ ಹಾಂಗಾ ಆಶೆಂಚ್ ಉರ್ತೆಲೆಂ. ಭೋವ್ಶ್ಯಾ ತಾಚೆಂ ರೂಪ್ ಬದ್ಲಾತಲೆಂ. ಪುಣ್, ಹಿ ಮಾತಿ, ಹಿ ಧುಳ್, ತಿ ಸಾಸ್ಣಾಕ್ ಆಸಿಚ್ ಉರ್ತೆಲಿ. ಆಶೆಂ ಆಸ್ತಾನಾ ಆಮಿಂ ಸಾಸ್ಣಾಕ್ ಉರ್ಚಾ ಸಂಗ್ತಿಂಕ್ ಸೊಡುನ್ ನಾಸ್ ಜಾಂವ್ಚಾ ಸಂಗ್ತಿಂಕ್ ಚಡ್ ತಕ್ಲಿ ಆಟಯ್ಲ್ಯಾರ್ ಬರೆಂ ಆಸಾ!"
"ಆರ್ ಯು ಟಾಕಿಂಗ್ ಎಬೌಟ್ ಬುದ್ದಿಸಮ್...?" ಚಾರ್ಲ್ಸಾಚ್ಯಾ ಶೆರ್ಮಾಂವಾಂತ್ ವಿವಿಯಾನಾಕ್ ಥಿಯರಿ ಝಳ್ಕಾಲಿ.
" ಹಾಂಗಾ ಬುದ್ದಿಸಮ್ ಖಂಯ್ ಥಾವ್ನ್ ಆಯ್ಲೆಂ? ಆಮಿಂ ಮನ್ಶ್ಯಾಪಣಾಕ್ ಪಯ್ಲೆಂ ವಳ್ಕೊಂಕ್ ಜಾಯ್. ಮನ್ಶ್ಯಾಪಣಾಕ್ ಪಯ್ಲೆಂ ವಳ್ಕಾಲ್ಯಾರ್ ಮನ್ಶ್ಯಾಕ್ ಕಸಲ್ಯಾಯ್ ಥಿಯರಿಚಿ ಗರ್ಜ್ ನಾ. ಬಗಾರ್ ತೊಚ್ಚ್ ಏಕ್ ಥಿಯರಿ ಜಾತಾ. ತಾಚ್ಯಾಚ್ ಮನ್ಶ್ಯಾಕುಳಾಕ್!"
"ಐ ಡೋಂಟ್ ನೊ....... ವಾಟ್ ಆರ್ ಯು ಟಾಕಿಂಗ್ ಎಬೌಟ್....!" ವಿವಿಯಾನಾಕ್ ಚಾರ್ಲ್ಸಾಚೆಂ ಉಲೊಣೆಂ ಕಾಂಯ್ ಸಮ್ಜಾಲೆಂ ನಾ. ಜಶೆಂ ಮ್ಯಾಂಚೆಸ್ಟರ್ ಸಿಟಿ ಹರ್ಯೆಕ್ ರಾತ್ ಆಪ್ಲೊ ರಂಗ್ ಬದ್ಲಾವಣ್ ಕರ್ತಾ ತಶೆಂ ಹ್ಯಾ ಸಿಟಿಂತ್ ಜಿಯೆಂವ್ಚೊ ಲೋಕ್ಯ್ ಆಪ್ಲೊ ದಿಸ್ಪೊಡ್ತೊ ರಂಗ್ ಬದ್ಲಿ ಕರ್ತಾ. ಖಾವ್ನ್ ಪಿಯೆವ್ನ್ ಸುಖಾನ್ ದೀಸ್ ಕಾಡ್ಚಾ ಲೊಕಾಕ್ ಆಪ್ಲ್ಯಾ ಆಂತರಿಕ್ ಸುಖಾಕ್ ಸೊಧ್ಚ್ಯಾ ತಿತ್ಲೊ ವೇಳ್ಯ್ ನಾತ್ಲ್ಲೊ. ಮ್ಯಾಂಚೆಸ್ಟರಾಕ್ ಕೋಣ್ ದಿಶಾ ಸೊಧುನ್ ಯೆತಾ ತೊ ಮ್ಯಾಂಚೆಸ್ಟರಾಚೊ ಗುಲಾಮ್ ಜಾತಾಲೊ ಆನಿ ಆಪ್ಲೆ ದೀಸ್ ಕಾಡ್ತಾಲೊ.
ಆಪ್ಲ್ಯಾ ಗರ್ಬಾಂತ್ಲ್ಯಾ ಭುರ್ಗ್ಯಾಕ್ ನಾಸ್ ಕರ್ಚೊ ಮುಳಾವೊ ನಿರ್ಧಾರ್ ವಿವಿಯಾನಾಚೊ ಭಿಲ್ಕುಲ್ ನ್ಹಯ್ ಆಸ್ಲ್ಲೊ. ಘೊವಾಚಾ ಚಿಂತ್ನಾಂಕ್ ಪಳವ್ನ್ ತಾಣೆಂ ಘೊವಾಕ್ ಫಕತ್ತ್ ಸಲಹಾ ಮಾತ್ರ್ ದಿಲ್ಲಿ.
"ಪಳೆ ವಿವಿ...!" ಚಾರ್ಲ್ಸಾನ್ ವಿವಿಯಾನಾಚೊ ಹಾತ್ ಆಪ್ಲ್ಯಾ ಹಾತಾನಿಂ ಧರುನ್ ಉಕಲ್ಲೊ. ತೊ ಮೋವ್ ಮೋವ್ ಮೊವಾಳ್ ಹಾತ್ ಆಪ್ಲ್ಯಾ ಹಾತಾನ್ ಘೆವ್ನ್ ದಾವ್ಯಾ ಹಾತಾಚ್ಯಾ ಬೊಟಾನ್ ತ್ಯಾ ಹಾತಾಚಾ ತಾಳುವೆರ್ ಕಿತೆಂಗೀ ಬರಂವ್ಚಾ ಪರಿಂ ಕೆಲ್ಲೊ ತೊ,
"ಜಿವಿತಾಂತ್ ಮನಿಸ್ ಕಿತೆಂಯ್ ಕರ್ತಾ ಜಾಲ್ಯಾರ್ ತೆಂ ಕಿತ್ಯಾಕ್ ಕರ್ತಾ? " ಸವ್ಕಾಸ್ ಲೋವ್ ತಾಳ್ಯಾನ್ ತಾಣೆಂ ಆಪ್ಲ್ಯಾ ಬಾಯ್ಲೆಕ್ ಸವಾಲ್ ಕೆಲೆಂ. ಆತಾಂ ತಾಚಿ ದೀಷ್ಟ್ ವಿವಿಯಾನಾಚಾ ಪೊಟಾರ್ ಖಂಚ್ಲ್ಲಿ. ವಿವಿಯಾನಾಚಾ ಗರ್ಬಾಂತ್ ಕಿತೆಂಗೀ ಸೊಭಿತ್ ಏಕ್ ಕಿರ್ಲೊನ್ ಯೆತಾ ಜಶೆಂ ತಾಕಾ ದಿಸ್ಲೆಂ. ಆಪ್ಲ್ಯಾ ದೊಳ್ಯಾಂಚಾ ದಿಷ್ಟೆಚಾ ಗೂಂಡಾಯೆಂತ್ ಏಕ್ ಸ್ಪಶ್ಟ್ ಪಿಂತುರ್ ಉದೆವ್ನ್ ರಾವ್ಲ್ಲೆಂ ತೆಂ ತಾಕಾ ದಿಸ್ಲೆಂ. ಪಿಂತುರ್ ಸ್ಪಶ್ಟ್ ತರ್ಯ್ ತಾಂತ್ಲೆಂ ತೆಂ ರೂಪ್ ಕಸಲೆಂಗೀ ಕಾಲ್ಪನಿಕ್ ಮ್ಹಳ್ಳ್ಯಾ ಪರಿಂ ಜಾತಾನಾ ಸವ್ಕಾಸ್ ಚಾರ್ಲ್ಸಾಚಾ ತೊಂಡಾ ವಯ್ಲೊ ಬೆಜಾರಾಯೆಚೊ ಛಾರೊ ಬದ್ಲುನ್ ಆಯ್ಲೊ.
"ಮ್ಹಳ್ಯಾರ್.....?" ಆಪ್ಲ್ಯಾ ಘೊವಾನ್ ವಿಚಾರ್ಲ್ಲ್ಯಾ ಸವಾಲಾಕ್ ಆನಿ ಆಪ್ಣೆಂ ಅಚಾನಕ್ ಗರ್ಬೆಸ್ತ್ ಜಾಲ್ಲ್ಯಾಕ್ ಕಾಂಯ್ ಸಂಭಂಧ್ ನಾತ್ಲ್ಲೊ.
"ಹಾವೆಂ ವಿಚಾರ್ಲ್ಲೆಂ ಸವಾಲ್ ಭೋವ್ಶ್ಯಾ ತುಕಾ ಸಮ್ಜೊಂಕ್ ನಾ!" ವಿವಿಯಾನಾಚೊ ಹಾತ್ ಉಕ್ಲುನ್ ಆಪ್ಲ್ಯಾ ವೊಂಟಾನಿಂ ತ್ಯಾ ಹಾತಾಕ್ ಏಕ್ ಉಮೊ ದಿಲ್ಲ್ಯಾ ಚಾರ್ಲ್ಸಾನ್ ಪರ್ತ್ಯಾಕ್ ತೊ ಹಾತ್ ಪಾಟಿಂ ತಸೊಚ್ ವಿವಿಯಾನಾಚಾ ಉಸ್ಕ್ಯಾರ್ ದವರ್ಲೊ. " ತುಮಿಂ ಗೊರಿಂ ಮನ್ಶ್ಯಾಂ ತುಮ್ಕಾಂಚ್ ತುಮಿಂ ಇಂಟೆಲಿಜೆಂಟ್ ಮ್ಹಣೊನ್ ವೊಲಾಯ್ತಾತ್. ತುಮ್ಚೆಂ ಇಂಟೆಲಿಜೆನ್ಸ್ ತುಮ್ಚಾ ಭೊಂವಾರಿಂ ಮಾತ್ರ್ ಘುಂವ್ತಾ ಜಾಲ್ಲ್ಯಾನ್, ತುಮಿಂ, ಸೈಂಬಾನ್ ಜೆಂ ಕಿತೆಂ ತುಮ್ಕಾಂ ಸೈಂಟಿಫಿಕ್ ರಿತಿನ್ ಸಾರ್ಕೆಂ ಮ್ಹಣೊನ್ ದಿಸ್ತಾ ತಾಚ್ಯೆ ಪಾಟ್ಲ್ಯಾನ್ಚ್ ಧಾಂವ್ತಾತ್. ಹ್ಯಾಚ್ ಖಾತಿರ್ ತುಮ್ಕಾಂ ಥಿಯರಿ ಚಡ್ ಲಾಗಿಂ. ಪುಣ್ ಹಾವೆಂ ವಿಚಾರ್ಲೆಲ್ಯಾ ಲ್ಹಾನ್ ಸಿಂಪಲ್ ಸವಾಲಾಕ್ ಪ್ರಾಕ್ಟಿಕಲ್ ಜವಾಬ್ ತುಕಾ ಕಳೊಂಕ್ ನಾ!"
"ಡೋಂಟ್ ಯು ಥಿಂಕ್ ಇಂಡಿಯನ್ಸ್ ಆರ್ ಬಿಲೀವಿಂಗ್ ಇನ್ ನಥಿಂಗ್....?" ವಿವಿಯಾನಾಚೆಂ ಸವಾಲ್.
"ಮ್ಹಳ್ಯಾರ್....?"
"ಬಿಲೀವಿಂಗ್ ಇನ್ ಇಮಾಜಿನೇಶನ್.....!" ವಿವಿಯಾನಾನ್ ವ್ಹಳೂ ಚಾರ್ಲ್ಸಾಚಾ ದೊಳ್ಯಾಂಕ್ ಪಳೆಲೆಂ. ಚಾರ್ಲ್ಸಾನ್ಯ್ ಆಪ್ಲೆ ದೊಳೆ ಉಬಾರುನ್ ಆಪ್ಲ್ಯಾ ಬಾಯ್ಲೆಚಾ ದಿಷ್ಟಿಂತ್ ದೀಷ್ಟ್ ಮೆಳಯ್ಲಿ.
"ತುವೆಂ ಹೆಂ ಕಶೆಂ ಪಾರ್ಕಿಲೆಂಯ್?" ಥೊಡ್ಯಾಚ್ ವೆಳಾ ಪಯ್ಲೆಂ ಆಪ್ಲ್ಯಾ ದೊಳ್ಯಾಂನಿ ಪಳೆಲ್ಲೆಂ ತೆಂ ವಿವಿಯಾನಾಚಾ ಪೊಟಾಂತ್ಲ್ಯಾ ಭುರ್ಗ್ಯಾಚೆಂ ಸಪಾಣ್ ಮ್ಹಜ್ಯಾ ದೊಳ್ಯಾಂನಿಂ ವಿವಿಯಾನಾನ್ ಕಶೆಂ ಪಾರ್ಕಿಲೆಂ ತೆಂ ಚಾರ್ಲ್ಸಾಕ್ ಸಮ್ಜಾಲೆಂ ನಾ.
"ಪುಣ್ ಹೆಂ ಇಮಾಜಿನೇಶನ್ ನ್ಹಯ್ ವಿವಿ...!" ತಾಣೆಂ ಜವಾಬ್ ದಿಲಿ. "ತುಜ್ಯಾ ಪೊಟಾಂತ್ ಆಮ್ಚೊ ಮೋಗ್ ಕಿರ್ಲಾತಾ!"
"ವ್ಹಯ್....! ತೆಂ ತುಕಾ ಹಾವೆಂ ಸಾಂಗ್ಲ್ಲ್ಯಾನ್ ಕಳ್ಳೆಂ! ಹಾವೆಂ ಜರ್ ತುಕಾ ಸಾಂಗೊಂಕ್ ನಾತ್ಲ್ಲೆಂ ಜಾಲ್ಯಾರ್ ತುಕಾ ತೆಂ ಖಂಡಿತ್ ಕಳ್ತೆಂ ನಾತ್ಲ್ಲೆಂ ಆನಿ ತುಂ ಹ್ಯಾ ವಿಶಿಂ ನಿಜಾಯ್ಕ್ಯ್ ನೆಣಾಂಚ್ ಆಸ್ತೊಯ್. ತುಜ್ಯಾ ಮತಿಂತ್ ಹೆಂ ಇಮಾಜಿನೇಶನ್ ಉದೆತೆಂ ನಾ. ತ್ಯಾ ಪಯ್ಲೆಂ ತುಂ ಇತ್ಲೊ ಬೆಜಾರ್ಯ್ ಜಾತೊ ನಾಂಯ್. ತುಂ ಬೆಜಾರ್ ಜಾಂವ್ಕ್ ನಾತ್ಲ್ಲೊಯ್ ಜಾಲ್ಯಾರ್ ಹಾಂವ್ ತುಕಾ ಭುರ್ಗ್ಯಾಕ್ ಕಾಡಂವ್ಚಾ ವಿಶಿಂ ಸಾಂಗ್ತಿಂಚ್ ನಾತ್ಲ್ಲಿಂ!"
ವಿವಿಯಾನಾನ್ ಸಾಂಗ್ಚ್ಯಾಂತ್ಯ್ ಕಾಂಯ್ ದುಬಾವ್ ನಾತ್ಲ್ಲೊ.
"ಓ.ಕೆ....! ಆತಾಂ ಹಾಂಗಾ ಹ್ಯಾ ಇಮಾಜಿನೇಶನಾಕ್ ಆನಿ ಇಂಡಿಯನಾಕ್ ಸಂಭಂಧ್ ಕಿತೆಂ?" ಚಾರ್ಲ್ಸಾನ್ ವಿವಿಯಾನಾಕ್ಚ್ ಪಳೆಲೆಂ.
"ಇಮಾಜಿನೇಶನ್ ಇಸ್ ಎ ಶಾರ್ಟ್ಕಟ್ ಫಾರ್ ಸೆಂಟಿಮೆಂಟ್ಸ್.....!" ವಿವಿಯಾನಾ, ಮನ್ಶ್ಯಾ ಸಿಂತಿಮೆಂತಾಂ ವಿಶಿಂ ಜಾಣಾಂ ಆಸ್ಲ್ಲೆಂ. "ಸೆಂಟಿಮೆಂಟ್ಸಾಂಕ್ ಜಾಗವ್ನ್ ಎಕಾ ಇಂಡಿಯನಾ ಸಾಂಗಾತಾ ಕಿತೆಂಯ್ ಕರುಂಕ್ ಸಾದ್ಯ್ ಜಾತಾ!"
"ಮ್ಹಳ್ಯಾರ್ ಯು ಮೀನ್.....!?" ಆಶ್ಚರ್ಯಾನ್ ಚಾರ್ಲ್ಸಾಚಾ ಕಪಾಲಾರ್ ಮಿರಿಯೊ
ಉದೆಲ್ಯೊ.
ಮ್ಯಾಂಚೆಸ್ಟರಾಚಾ ಕಾಲೇಜಿಂತ್ ಶಿಕ್ತಾನಾ ವಿವಿಯಾನಾ ಸಭಾರ್ ಜಾತಿಂಚಾ, ಸಭಾರ್ ಕಾತಿಂಚಾ ವಿಧ್ಯಾರ್ಥಿಂ ಸವೆಂ ಭರ್ಸಾಲ್ಲೆಂ ತೆಂ ಸಾರ್ಕೆಂ. ತಾಂಕಾ ತೆಂ ವಳ್ಕಾಲ್ಲೆಂಯ್ ಸಾರ್ಕೆಂ. ಪುಣ್ ತಾಣೆಂ ಇಂಡಿಯನಾಂಕ್ ವಳ್ಕಾಲ್ಲೆ ವಿಚಾರ್.....?
"ಎಕಾ ಇಂಡಿಯಾನಾ ಥಾವ್ನ್ ವಿವಿಯಾನಾ ಕಿತೆಂ ಆಶೆತಾ....?" ಚಾರ್ಲ್ಸಾಚಾ ಮತಿಂತ್ ವಿಚಾರಾಂಕ್ ಧರುನ್ ಸವಾಲ್ ಉಭೆಂ ಜಾಲೆಂ. ಥೊಡಿಂ ಕ್ಷಣಾಂ ತಾಂಚಾ ದೊಗಾಂಯ್ಚಾ ಮಧೆಂ ಮೌನ್ ವೈಭವಾನ್ ರಾಜ್ವಟ್ಕಾಯ್ ಚಲಂವ್ಕ್ ಲಾಗ್ಲೆಂ. ವಿವಿಯಾನಾ ಕೆದ್ನಾಂಯ್ ಪಯ್ಶ್ಯಾಂಕ್ ಭುಲ್ಲ್ಲೆಂ ಚೆಡುಂ ನ್ಹಯ್. ಆಸ್ತಿಕ್ ಆನಿ ಅಂತಸ್ತೆಕ್ ತೆಂ ಆಶೆಲ್ಲೆಂ ನ್ಹಯ್. ಜೆಂ ಕಿತೆಂ ತಾಚ್ಯೆಲಾಗಿಂ ಆಸಾ, ತಾಕಾಚ್ ತೆಂ ಆಪ್ಣಾಚೆಂ ಮ್ಹಣ್ತಾಲೆಂ ಆನಿ ತಾಂತುಂಚ್ ತೆಂ ದಾಧೊಸ್ಕಾಯ್
ಜೊಡ್ತಾಲೆಂ.
ಹೆಂಯ್ ಏಕ್ ಸತ್ ಕೀ, ದೇವ್ ಅನಿ ಧರ್ಮಾ ವಿಶಿಂ ವಿವಿಯಾನಾ ಚಡ್ ತಕ್ಲಿ ಆಟಯ್ನಾತ್ಲ್ಲೆಂ. ಹಾಕಾ ಏಕ್ ಕಾರಾಣ್ ಹೆಂಯ್ ಜಾಂವ್ಕ್ ಸಕ್ತಾ ಕೀ ತೆಂ ಜಲ್ಮಾಲ್ಲ್ಯಾ ಪರಿಸರಾಂತ್, ದೇವ್ ಆನಿ ಧರ್ಮ್ ಆಸ್ಲ್ಲೊ ಜಾಲ್ಯಾರ್ಯ್, ತಾಣೆಂ ಜಿಯೆಂವ್ಚಾ ಸಮಾಜೆಂತ್, ಹ್ಯಾ ದೇವ್ ಆನಿ ಧರ್ಮಾಚೊ ಪ್ರಭಾವ್ ನಾತ್ಲ್ಲೊ.
ಆಶೆಂ ಮ್ಹಣೊನ್, ತಾಚ್ಯಾ ಸಮಾಜೆಂತ್ ಮನ್ಶ್ಯಾಪಣಾಚಾ ವಿಚಾರಾಂಚೊ ಆಭಾವ್ಯ್ ನಾತ್ಲ್ಲೊ. ಆಪ್ಲ್ಯಾ ಪೆಲ್ಯಾ ಥಂಯ್ ಮನಿಸ್ ಕಾಂಯ್ ವಾಯ್ಟ್ ಚಿಂತಿನಾತ್ಲ್ಲೊ ಜಾಲ್ಯಾರ್ಯ್ ಆಪ್ಲ್ಯಾ ಸುಖಾ ಖಾತಿರ್ ಕಸಲ್ಯಾಯ್ ಭಂದಡೆಕ್ ಪಸಂದ್ ಕರಿನಾತ್ಲ್ಲೊ.
ತಶೆಂಚ್ ವಿವಿಯಾನಾ!
ಪುಣ್ ವಿವಿಯಾನಾ ಆನಿ ತಾಚ್ಯಾ ಸಮಾಜೆ ಮಧೆಂ ಏಕ್ ಅಂತರ್ ಖಂಡಿತ್ ಆಸ್ಲ್ಲೊ. ತಾಚಿ ಸಮಾಜ್ ಆಪ್ಣೆಂ ಜಿಯೆಂವ್ಕ್ ಜಾಯ್ ಮ್ಹಳ್ಳ್ಯಾ ಇರಾದ್ಯಾನ್ ಜಿಯೆತಾಲಿ ಆನಿ ವಿವಿಯಾನಾ ಆಪುಣ್ ಜಲ್ಮಾಲ್ಲ್ಯಾ ಖಾತಿರ್ ಜಿಯೆತಾಲೆಂ!
ಹ್ಯಾ ದೋನ್ ಸಂಗ್ತಿಂಕ್ ವ್ಹಾರಾವ್ನ್ ಪಳೆಲ್ಯಾರ್ ಹ್ಯಾ ಸಮಾಜೆಕ್ ವೆಳಾಚೊ ಆಭಾವ್ ಆಸ್ಲ್ಲೊ. ಕಾರಾಣ್, ಮ್ಯಾಂಚೆಸ್ಟರ್ ಸಂಸಾರಾಂತ್ಲ್ಯಾ ಥೊಡ್ಯಾಂ ಶ್ಹೆರಾಂ ಪಯ್ಕಿ ಎಕ್ ಶ್ಹೆರ್ ಕೀ ತ್ಯಾ ಶ್ಹೆರಾಕ್ ಸುಶೆಗ್ ಮ್ಹಳ್ಳೊ ತೊ ನಾ. ಹಾಂಗಾಸರ್, ದೀಸ್ ಆನಿ ರಾತ್ ಫಕತ್ತ್ ಆಪ್ಲ್ಯಾ ಆಸ್ಥಿತ್ವಾಚಾ ರಂಗಾಂಕ್ ಮಾತ್ರ್ ಬದ್ಲಿತಾತ್ ಶಿವಾಯ್ ತ್ಯಾ ರಂಗಾಚಾ ಪಾಟ್ಲ್ಯಾನ್ ಘುಂವ್ಚೊ ತೊ ಅಮೂಲ್ಯ್ ವೇಳ್, ಕೊಣಾಯ್ಕ್ಯ್, ಆಪ್ಲೆಂ ಸೊಡ್ಲ್ಯಾರ್ ದುಸ್ರೆಂ ಕಿತೆಂಚ್ ಚಿಂತುಂಕ್ ಆವ್ಕಾಸ್ ಕರುನ್ ದೀನಾತ್ಲ್ಲೊ.
ಅಸಲ್ಯಾ ಪರಿಸರಾಂತ್, ಆಪ್ಲ್ಯಾ ತರ್ನಾಟ್ಪಣಾಕ್ ಘೆವ್ನ್ ಆಯಿಲ್ಲ್ಯಾ ವಿವಿಯಾನಾಕ್, ತಾಚ್ಯಾ ಪುಲ್ಚಾ ಕುಡಿಚೆ ಆಟೆವಿಟೆ ಆನಿ ಭಗ್ಣಾಂ ಕಿರ್ಲೊನ್ ಯೆತಾನಾಂಚ್ ಖಂಯ್ಸರ್ಗೀ ಇರೊನ್ ಗೆಲ್ಲ್ಯಾ ಪರಿಂ ಜಾಲ್ಲಿಂ.
ಮ್ಯಾಂಚೆಸ್ಟರಾಕ್ ಪಾಂಯ್ ದವರ್ತಾನಾ, ವಿವಿಯಾನಾಕ್ ಆಪ್ಣಾಕ್ಚ್ ಹ್ಯಾ ಸಮಾಜೆ ಮುಕಾರ್ ಪ್ರಸ್ತುತ್ ಕರುಂಕ್ ತಿತ್ಲೆಂ ಸುಲಭ್ ನಾತ್ಲ್ಲೆಂ. ಕಾಂಯ್ಚ್ ನೆಣಾಂ ಆಸ್ಲ್ಲ್ಯಾ ಕಡೆನ್ ತಾಣೆಂ ಪಯ್ಲೆಂ ಸಗ್ಳೆಂ ಜಾಣಾಂ ಜಾಂವ್ಕ್ ಆಸ್ಲ್ಲೆಂ. ಹ್ಯಾ ಜಾಣಾಂ ಜಾಂವ್ಚಾ ಪ್ರಯತ್ನಾಂತ್ ತೆಂ ಸಭಾರಾಂಕ್ ಮೆಳ್ಳೆಂ, ಸಭಾರಾಂ ಲಾಗಿಂ ಉಲಯ್ಲೆಂ ಆನಿ ಸಭಾರಾಂಕ್ ಸಮ್ಜಾಲೆಂ. ತಾಂತುಯ್ ತೆಂ ಚಲ್ಯಾಂಕ್ ಬರೆಂಚ್ ಸಮ್ಜಾಲೆಂ.
ಆಶೆಂ ಸಮ್ಜಾತಾನಾ, ಮನಿಸ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಏಕ್ ಸವಾಲ್ ಮಾತ್ರ್ ತಾಕಾ ದೊಸುಂಕ್ ಲಾಗ್ಲ್ಲೆಂ ಶಿವಾಯ್ ದುಸ್ರೆಂ ಕಾಂಯ್ಚ್ ನಾ.
ಹಾಂಗಸರ್, ಸಗ್ಳೆಂ ಆಡಂಬರ್. ಫಕತ್ತ್ ದೊಳ್ಯಾಂಚಾ ದೆಖಿಕ್ ಮಾತ್ರ್. ತಾಚ್ಯೆ ಭಾಯ್ರ್ ಕಾಂಯ್ ನಾ. ಭಾಯ್ರ್ ಸಗ್ಳೆಂ ಪೊಕೊಳ್. ಹ್ಯಾ ಪೊಕೊಳ್ಪಣಾಚಾ ಪಾಳ್ಣ್ಯಾಂತ್, ಹೊ ಮನಿಸ್ ಲಾಚಾರ್ಪಣಿಂ ಆಪ್ಲೆ ಪಾಂಯ್ ದಾಡಾಯ್ತಾ ಆನಿ ಆಪ್ಲೆಂ ಬಾಳ್ಶೆಂಪಣ್ ಸಾಂಡುಕ್ ಸಂಸಾರಾ ಮುಕಾರ್ ತೊ ಉಭೊ ರಾವೊಂಕ್ ಸೊಧ್ತಾ. ಹ್ಯಾ ಸೊಧ್ನೆಚಾ ಪ್ರಯತ್ನಾಂತ್, ಕೋಣ್ ಕಿತ್ಲೊ ಯಶಸ್ವಿ ಜಾಲಾ? ಹ್ಯಾ ಎಕಾ ಸವಾಲಾಕ್ ಜವಾಬ್ ಸೊಧ್ಚಾ ವಾಟೆರ್, ವಿವಿಯಾನಾನ್ ಸಂಸಾರ್, ಲೋಕ್, ಸಮಾಜ್, ಧರ್ಮ್, ಹ್ಯಾ ಸಗ್ಳ್ಯಾಂ ವಯ್ರ್ ಗೂಂಡಾಯೆನ್ ಆಧ್ಯಾಯನ್ ಚಲಯ್ತಾನಾ, ತಾಚ್ಯಾ ಅಧ್ಯಾಯನಾಂತ್ ತಾಕಾ ಸಗ್ಳೆಂ ಗಯ್ರೆಂ ಗಯ್ರೆಂ, ಅಸ್ಪಶ್ಟತಾ, ನಿಗೂಡ್, ಆನಿ ಮಿಸ್ತೆರ್ ಮಾತ್ರ್ ಸೊಡ್ಲ್ಯಾರ್, ಆಪ್ಲ್ಯಾ ಜಾಣ್ವಾಯೆಕ್ ಪಾಟಿಂಬೊ ದೀವ್ನ್, ಏಕ್ ಸ್ಪಶ್ಟ್ ನಿರ್ಧಾರ್ ಘೆಂವ್ಚಾ ತಸಲೆಂ ಕಾಂಯ್ಚ್ ತಾಕಾ ಝಳ್ಕಾಲೆಂ ನಾ.
"ಆತಾಂ ತುಂ ಖಂಯ್ ಪಾವ್ಲೊಯ್ ಚಾರ್ಲ್ಸ್....?" ವಿವಿಯಾನಾಚಾ ಸವಾಲಾ ಥಾವ್ನ್ ಚಾರ್ಲ್ಸ್ ಪರ್ತ್ಯಾಕ್ ಪಾಟಿಂ ಹ್ಯಾ ಪ್ರಸ್ತುತ್ಪಣಾಕ್ ಆಯ್ಲೊ. ತೊ ವಿವಿಯಾನಾಚಾ ವಿಶಿಂ ಚಿಂತಾಲೊ.
ವಿವಿಯಾನಾಲಾಗಿಂ ಕಾಜಾರ್ ಜಾಂವ್ಚಾ ಪಯ್ಲೆಂ, ತಾಣೆಂ, ಆಪ್ಲ್ಯಾ ಮುಕ್ಲ್ಯಾ ಬಾಯ್ಲೆಕ್ ಸಮ್ಜೊಂಚೆಂ ಖೂಬ್ ಪ್ರಯತ್ನ್ ಕೆಲ್ಲೆಂ. ಹಿ ಸಮ್ಜಣಿ ಖುದ್ದ್ ತಾಣೆಂ ತಾಚ್ಯಾ ಜಾಂವ್ಚಾ ಬಾಯ್ಲೆಚಾ ತೊಂಡಾ ಥಾವ್ನ್ ಆಯ್ಕೊನ್ ಘೆತ್ಲ್ಲಿ ಶಿವಾಯ್ ಭೋವ್ ಥೊಡ್ಯಾ ಜಾಣ್ವಾಯೆಕ್, ತೊ ಕ್ಯಾಥರೀನಾ ಥಾವ್ನ್ ಆಯ್ಕೊನ್ ಜಾಣಾಂ ಜಾಲ್ಲೊ.
"ಆಮಿಂ ಚಿಂತ್ಲ್ಲ್ಯಾ ಪರಿಂ ಕಾಂಯ್ ಜಾಯ್ನಾಂ ಚಾರ್ಲ್ಸ್. ಹಾವೆಂ ಕೆದ್ನಾಂಚ್ ಚಿಂತುಂಕ್ ಪಾಸೊನ್ ನಾತ್ಲ್ಲೆಂ ಕೀ ಎಕಾ ಇಂಡಿಯಾನಾ ಲಾಗಿಂ ಹಾಂವ್ ಕಾಜಾರ್ ಜಾತೆಲಿಂ ಆನಿ ಮ್ಹಜೆಂ ಮ್ಹಳ್ಳೆಂ ಕಿತೆಂ ತೆಂ ಜಾತೆಲೆಂ ಮ್ಹಣೊನ್. ಹಾಂವ್ ಬೆಷ್ಟೆಂ ಜಲ್ಮಾಲ್ಲ್ಯಾ ಖಾತಿರ್ ಜಿಯೆಂವ್ಕ್ ಜಾಯ್ ಮ್ಹಣೊನ್ ಜಿಯೆತಾಲಿಂ....!" ವಿವಿಯಾನಾ ಆತಾಂ ಬಾವುಕಾಯೆನ್ ಭರ್ಲೆಂ.
"ಐ ಯಾಮ್ ಸಾರ್ರಿ ವಿವಿ.....!" ಚಾರ್ಲ್ಸಾನ್ ವಿವಿಯಾನಾಕ್ ಸವ್ಕಾಸ್ ಆಪ್ಣಾ ಲಾಗಿಂ ವೊಡ್ಲೆಂ. "ವ್ಹಡ್ ನಾ....!" ತೊ ಉಲಯ್ಲೊ, "ಆಜ್ ಜೆಂ ಕಿತೆಂ ತುಜೆ ಥಂಯ್ ಜಾಲಾಂ ತೆಂ ಫಕತ್ತ್ ತುಕಾ ಲಾಗೊನ್ ನ್ಹಯ್ ಯಾ ತಾಕಾ ಫಕತ್ತ್ ತುಂಚ್ ಕಾರಾಣ್ ನ್ಹಯ್. ಆಮ್ಚಿಂ ಸಪ್ಣಾಂ ಕಿತೆಂಯ್ ಆಸೊಂದಿತ್. ತ್ಯಾ ಸಪ್ಣಾಂಕ್ ತುಜ್ಯಾ ಉದಾರಾ ಥಾವ್ನ್ ಜಲ್ಮೊಂಚೆಂ ಬಾಳ್ಶ್ಯೆಂ ಕಾಂಯ್ ವಾಯ್ಟ್ ಕರುಂಕ್ ಸಕಾನಾ ಮ್ಹಣ್ತಾನಾ ತ್ಯಾ ಬಾಳ್ಶ್ಯಾಕ್ ಜಲ್ಮೊಂಕ್ ವೇಳ್ ಠರಾಂವ್ಚಿ ಆಮ್ಚಿ ಮನ್ಶ್ಯಾ ಜಾತ್ಯ್ ಬೆಷ್ಟಿ ಪಿಶಿ ಜಾತ್! ಮ್ಹಾಕಾ ಕಾಂಯ್ ಬೆಜಾರ್ ನಾ ಬಗಾರ್ ಸಂತೊಸ್ಚ್. ತುಂ ಜಾಲ್ಯಾರ್ಯ್ ಕಾಂಯ್ ಬೆಜಾರ್ ಕರಿನಾಕಾ. ಮ್ಯಾಂಚೆಸ್ಟರಾಂತ್ ಆಜ್ ನಾ ಜಾಲ್ಯಾರ್ ಫಾಲ್ಯಾಂ ಆಮ್ಚೆಂ ಮ್ಹಳ್ಳೆಂ ಬಿಡಾರ್ ಖಂಡಿತ್ ಜಾತೆಲೆಂ. ತುಂ ಸಂತೊಸಾನ್ ರಾವ್. ಹಾಂವ್ ಸದಾಂ ತುಜ್ಯಾ ಸಾಂಗಾತಾ ಆಸಾಂ....!"
ಚಾರ್ಲ್ಸಾನ್ ವಿವಿಯಾನಾಕ್ ಧಯ್ರ್ ದಿತಾನಾ ಆಪ್ಲೊ ಘೊವ್ ಆಪ್ಣಾಚೆರ್ ಕಿತ್ಲೊ ಮೊವಾಳಾಯೆನ್ ಆಸಾ ತೆಂ ಸಮ್ಜಾಲ್ಲ್ಯಾ ವಿವಿಯಾನಾನ್ ಚಾರ್ಲ್ಸಾಕ್ ಥಂಯ್ಸ್ ಲಾಗಿಂ ವೊಡುನ್ ತಾಚ್ಯಾ ವೊಂಟಾಂಕ್ ಆಪ್ಲೆ ವೋಂಟ್ ಮೆಳಯ್ಲೆ.
ದಿಸಾ ವಯ್ರ್ ದೀಸ್ ಧಾಂವ್ತಾನಾ ನೋವ್ ಮಹಿನೆ ಕಶೆ ಪಾಶಾರ್ ಜಾಲೆ ತೆ ತಾಂಕಾಚ್ ಕಳೊಂಕ್ ನಾ. ಚಾರ್ಲ್ಸಾನ್ ದಾಖಯಿಲ್ಲ್ಯಾ ಮೊಗಾನ್ ಆನಿ ವಿವಿಯಾನಾನ್ ಪಾಟಯಿಲ್ಲ್ಯಾ ಮಯ್ಪಾಸಾನ್ ಆಜ್ ತಾಂಚೆ ಮಧೆಂ ಎಕಾ ಜಿವಾಕ್ ತಾಣಿಂ ಸಂಸಾರಿ ಉಜ್ವಾಡ್ ದಾಖಯಿಲ್ಲೊ.
ಮ್ಯಾಂಚೆಸ್ಟರಾಂತ್ ಆಪ್ಲೆಂ ಖುದ್ದ್ ಘರ್ ಕರ್ಚೆಂ, ತಿತ್ಲೆಂ ಕಾಂಯ್ ಸುಲಾಭಾಯೆಚೆಂ ನ್ಹಯ್ ಆಸ್ಲ್ಲೆಂ. ಹ್ಯಾ ಖಾತಿರ್ ಚಾರ್ಲ್ಸ್ ಆನಿ ವಿವಿಯಾನಾ ದೊಗಾಂಯ್ ವಾವುರ್ತಾಲಿಂ. ವಿವಿಯಾನಾ ಲಾಗಿಂ ತಾಚ್ಯಾ ಆವಯ್ ಬಾಪಯ್ಚಿ ಆಸ್ತ್ ಮ್ಹಣೊನ್, ಲಾರಾನ್, ಕ್ಯಾಥರೀನಾ ಲಾಗಿಂ ತಾಚ್ಯಾ ಮರ್ಣಾಚಾ ಪಯ್ಲೆಂ ಆಪ್ಲ್ಯಾ ಧುವೆಚಾ ಫುಡಾರಾಕ್ ಮ್ಹಣೊನ್ ದಿಲ್ಲೆ ಥೊಡೆ ಪಯ್ಶೆ ಆಸ್ಲ್ಲೆ ಜಾಲ್ಯಾರ್ಯ್ ನಾ ವಿವಿಯಾನಾನ್ ತೆ ಕಸಲ್ಯಾಕ್ಯ್ ಗಳ್ಸುಂಕ್ ಚಿಂತ್ಲ್ಲೆಂ ಯಾ ನಾ ಕ್ಯಾಥರೀನಾನ್ ತೆ ಕಸಲ್ಯಾಯ್ ಸಂಗ್ತಿಕ್ ಗಳ್ಸುಂಕ್ ಕಾಡ್ಲ್ಲೆ.
ಚಾರ್ಲ್ಸಾನ್ ಆಪ್ಲ್ಯಾ ಧುವೆಕ್ ಮಿಶೇಲ್ ಮ್ಹಣೊನ್ ವೊಲಾಯ್ಲೆಂ. ವಿವಿಯಾನಾಚಾ ಉದರಾಂತ್ ತೆಂ ಆಸ್ತಾನಾ, ಆಪ್ಣೆಂ ತಾಚೆ ವಿಶಿಂ ಪಳೆಲ್ಲ್ಯಾ ಸಪ್ಣಾಂಕ್ ಆನಿ ಮತಿಂತ್ ರಂಗಯೆಲ್ಲ್ಯಾ ತ್ಯಾ ಸೊಭಿತ್ ಸೊಭಿತ್ ಪಿಂತುರಾಂಕ್ ಉಡಾಸ್ ಕಾಡುನ್, ತಾಣೆಂ ಧುವೆಚೆಂ ನಾಂವ್ ಮಿಶೇಲ್ ಮ್ಹಣೊನ್ ದವರ್ಲೆಂ.
"ಚಾರ್ಲ್ಸ್.... ತೆಂ ಮ್ಹಜೆಂ ಧುವ್. ಶಿ ಇಸ್ ನಾಟ್ ಎ ಇಂಡಿಯನ್. ಶಿ ಇಸ್ ಎ ಸ್ಕಾಟಿಶ್ ಗರ್ಲ್.....!" ವಿವಿಯಾನಾ ಅಪ್ಲ್ಯಾ ಘೊವಾಕ್ ಚಿಡಾಯ್ತಾಲೆಂ. ತೆ ಜಾಣಾಂ ಆಸ್ಲ್ಲೆಂ ಮಿಶೇಲ್ ಆಪ್ಣಾಚಾ ಉದರಾಂತ್ ಆಸ್ತಾನಾ ಆಪ್ಣೆಂ ತಾಚಿ ಜತನ್ ಕೆಲ್ಲ್ಯಾ ಪ್ರಾಸ್ ಚಡ್ ಚಾರ್ಲ್ಸಾನ್ ತಾಚಿ ಜತನ್ ಕೆಲ್ಯಾ. ಮಿಶೇಲಾಕ್ ಗುರ್ವಾರ್ ಆಸ್ಲ್ಲ್ಯಾ ತ್ಯಾ ನೋವ್ ಮಹಿನ್ಯಾಂನಿ ಚಾರ್ಲ್ಸಾನ್ ಆಪ್ಣಾಕ್ ಬರ್ಯಾ ಮೊಗಾನ್ ಸಾಂಬಾಳ್ಳಾಂ. ಆಜ್ ಜರ್ತರ್ ಕೊಣಾಯ್ಕ್ಯ್ ಮಿಶೇಲಾ ವಯ್ರ್ ಹಕ್ಕ್ ಆಸಾ ಜಾಲ್ಯಾರ್ ತೆಂ ಆಪ್ಣಾಚ್ಯಾಕ್ಯ್ ಚಡ್ ಕರುನ್ ಚಾರ್ಲ್ಸಾಕ್! ವಿವಿಯಾನಾ ಮನಂತ್ಚ್ ಸಂತೊಸ್ ಭೊಗ್ತಾಲೆಂ. ಚಾರ್ಲ್ಸಾನ್ ಸಾಂಗ್ಚಾ ಪರ್ಮಾಣೆಂ ಮಿಶೇಲ್ ನಿಜಾಯ್ಕ್ಯ್ ತಾಂಚೆಂ ’ಡ್ರೀಮ್’ ಏಕ್ ಸುಂದರ್ ’ಸಪಾಣ್’ ಜಾವ್ನ್ ತಾಂಕಾ ಜಲ್ಮಾಲ್ಲೆಂ.
**************
ಮಿಶೇಲ್!
ವಿವಿಯಾನಾಚೆಂ ಬದಿಕ್ ಮಿಶೇಲ್!!
ಸೊಭಾಯ್ ಮಜ್ವಾಲ್ಲ್ಯಾ ಜಿವಿತಾಕ್ ಭಾಂಗ್ರಾಳ್ಯಾ ಚಾನ್ನ್ಯಾನ್ ನೆಟಯಿಲ್ಲೆಂ ಮಿಶೇಲ್!!!
ಮಿಶೇಲ್ ಜಲ್ಮಾಲ್ಲ್ಯಾ ದಿಸಾ ಥಾವ್ನ್ ವಿವಿಯಾನಾಚಾ ಜಿವಿತಾಂತ್ ಬದ್ಲಾವಣ್ ಜಾಂವ್ಕ್ ಶುರು ಜಾಲಿ. ಆಪ್ಲ್ಯಾ ಭುರ್ಗ್ಯಾ ಸಾಂಗಾತಾ ದೀಸ್ ರಾತ್ ತೆಂ ಭುರ್ಗೆಂ ಜಾಲೆಂ. ಎಕ್ಸುರ್ಪಣಿಂ ಆನಿ ಚಿಂತ್ನಾನಿಂ ಸಾರ್ಲೆಲ್ಯಾ ಜಿವಿತಾಕ್ ವಿವಿಯಾನಾ ಆತಾಂ ನವ್ಯಾನ್ ಜಿಯೆಂವ್ಕ್ ಲಾಗ್ಲೆಂ. ಆಪ್ಲ್ಯಾ ಬಾಯ್ಲೆಚಾ ಸಂತೊಸಾಕ್ ಪಳವ್ನ್ ಚಾರ್ಲ್ಸ್ಯ್ ಎಕಾ ರಿತಿಚಿ ದಾಧೊಸ್ಕಾಯ್ ಭೊಗ್ತಾಲೊ. ವಿವಿಯಾನಾ ಜಶೆಂ ಆತಾಂ ಆಸಾ, ತಶೆಂ, ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ಚಾರ್ಲ್ಸಾನ್, ಆಪ್ಲ್ಯಾ ಬಾಯ್ಲೆಕ್ ಹ್ಯಾ ರಿತಿರ್ ಪಳೆಲ್ಲೆಂ ನಾ. ವಿವಿಯಾನಾಚಾ ಜಿವಿತಾಚೆಂ ಧಾರುಣ್ ಘಡಿತ್, ಕಾಜಾರಾ ಪಯ್ಲೆಂಚ್ ಚಾರ್ಲ್ಸಾಕ್ ಕಳಿತ್ ಜಾಲ್ಲ್ಯಾನ್ ಆನಿ ಎಕಾ ಚಲಿಯೆಚಾ ಸಿಂತಿಮೆಂತಾಂಕ್ ತೊ ಪಾರ್ಕುಂಕ್ ಸಕ್ತಾಲೊ ಜಾಲ್ಲ್ಯಾನ್, ಆಪ್ಣಾಚೆಂ ಚಿಂತಿನಾಸ್ತಾನಾ, ತಾಣೆಂ, ತಾಚಾ ಬಾಯ್ಲೆಕ್ ಸದಾಂಚ್ ಖುಶ್ ದವರುಂಕ್ ಪ್ರಯತ್ನ್ ಕೆಲ್ಲೆಂ. ಹ್ಯಾ ತಾಚ್ಯಾ ಪ್ರಯತ್ನಾಂತ್, ಶೆಂಬರಾಂತ್ ಶೆಂಬರ್ ಠಕ್ಕೆ ತೊ ಜಿಕ್ಲ್ಲೊ ನಾ ಜಾಲ್ಯಾರ್ಯ್, ತೊ ಸಲ್ವಂಕ್ಯ್ ನಾತ್ಲ್ಲೊ.
"ತುಂ ಜಣಾಂಯ್ ಚಾರ್ಲ್ಸ್.....? ವಿವಿಯಾನಾ ಆತಾಂ ತುಜ್ಯಾ ಸಾಂಗಾತಾ ಕಿತ್ಲೆಂ ಖುಶಿ ಆಸಾ ಪಳೆ......, ತಿತ್ಲೆಂ ಖುಶಿ, ತಾಕಾ ಹಾವೆಂ ಹಾಚ್ಯಾ ಪಯ್ಲೆಂ ಪಳಂವ್ಕ್ ನಾ. ತಾಚ್ಯಾ ಪಾಟ್ಲ್ಯಾನ್......." ಉಲಯ್ತಾಲೆಂ ಕ್ಯಾಥರೀನ್. ".....ಹಾವೆಂಯ್ ಮಸ್ತ್ ಮ್ಹಿನತ್ ಕಾಡ್ಲ್ಯಾ. ವಿವಿಯಾನಾಕ್ ಆನಿ ಕ್ರಿಸ್ಟಿನಾಕ್ ಹಾವೆಂ ಕೆದ್ನಾಂಚ್ ವಿಂಗಡ್ ನದ್ರೆನ್ ಪಳಂವ್ಕ್ ನಾ. ಆಪ್ಲ್ಯಾ ಧುವೆ ಪರಿಂಚ್ ತಾಕಾ ಪಳೆಲಾಂ. ಪುಣ್ ತುಂ ಜಾಣಾಂಯ್.......! ಹಾಂಗಾ ಜಿವಿತ್ ಸಾರುಂಕ್ ಕಿತ್ಲೆ ಕಷ್ಟ್ ಆಸಾತ್ ತೆಂ. ಆಮ್ಚೆಂ ಘರಾಣೆಂ ಕಾಂಯ್ ವ್ಹಡ್ಲೆಂ ಘರಾಣೆಂ ನ್ಹಯ್. ಆಮಿಂ ಕಾಂಯ್ ತಿತ್ಲಿಂ ಗ್ರೇಸ್ತ್ಯ್ ನ್ಹಯ್. ತುಜೊ ಗಾಂವ್ ಸೊಡುನ್ ತುಂ ಮ್ಯಾಂಚೆಸ್ಟರಾಕ್ ಆಯ್ಲಾಯ್. ಹಾಂವ್ ಸ್ಕಾಟ್ಲ್ಯಾಂಡಾಕ್ ಸೊಡುನ್ ಹಾಂಗಾ ಆಯ್ಲ್ಯಾಂ. ಸೈಮನಾನ್ಯ್ ಮಸ್ತ್ ವಾಂವ್ಟ್ ಕಾಡ್ಲ್ಯಾ. ಪುಣ್, ಆಮಿಂ ವಿವಿಯಾನಾಕ್ ದೀಂವ್ಕ್ ಸಕೊಂಕ್ ನಾತ್ಲ್ಲಿ ಖುಶಿ, ಭೋವ್ಶ್ಯಾ ಆತಾಂ ತುವೆಂ ತಾಕಾ ದಿಲ್ಯಾಯ್........! ಶಿ ಇಸ್ ವೆರಿ ಹ್ಯಾಪ್ಪಿ.....! ತೆಂ ಮಸ್ತ್ ಖುಶಿ ಆಸಾ! ತುಮ್ಚೆಂ ಜಿವಿತ್ ಸದಾಂ ಆಶೆಂಚ್ ಫುಲೊಂದಿ!"
ವಿವಿಯಾನಾಚೆಂ ಆನಿ ಚಾರ್ಲ್ಸಾಚೆಂ ಕಾಜಾರ್ ಜಾಲ್ಯಾ ಉಪ್ರಾಂತ್ಲ್ಯಾ, ತ್ಯಾ ಪಯ್ಲ್ಯಾ ಕ್ರಿಸ್ಮಸಾಚಾ ರಾತಿಕ್, ಕ್ಯಾಥರೀನಾನ್ ಉಚಾರ್ಲ್ಲಿಂ ಉತ್ರಾಂ ಚಾರ್ಲ್ಸಾಕ್ ಅಜೂನ್ಯ್ ಉಡಾಸ್ ಆಸಾತ್.
"ಸತ್ ಸಾಂಗ್ಚೆಂ ಜಾಲ್ಯಾರ್ ಆಂಟಿ....., ಮ್ಹಾಕಾ ಮ್ಹಜೊ ಗಾಂವ್ ಸೊಡುನ್, ಹಾಂಗಾ, ಇತ್ಲ್ಯಾ ಪಯ್ಸ್ ಯೇಂವ್ಕ್ ಜಾಯ್ ಮ್ಹಳ್ಳಿ ಗರ್ಜ್ಚ್ ನಾತ್ಲ್ಲಿ. ಮ್ಹಜ್ಯಾ ಬಾಪಾಯ್ಚಾ ಘರಾ ಮ್ಹಾಕಾ ಕಿತೆಂ ಜಾಯ್ ತೆಂ ಸಗ್ಳೆಂ ಆಸಾ. ಮ್ಹಾಕಾ ಕಾಂಯ್ ಉಣೆಂಪಣ್ ಮ್ಹಳ್ಳೆಂ ನಾ. ತರ್ಯ್ ನೆಣಾಂ ಹಾಂವ್..... ತೆ ಸಗ್ಳೆಂ ಸೊಡುನ್ ಹಾಂಗಾ ಕಿತೆಂ ಸೊಧುನ್ ಆಯ್ಲಾಂ?" ಥೊಡ್ಯಾ ವೆಳಾಕ್ ಚಾರ್ಲ್ಸಾಕ್ ಆಪ್ಲ್ಯಾ ಗಾಂವಾಚೊ ಉಡಾಸ್ ಆಯ್ಲೊ. ಕ್ಯಾಥರೀನಾನ್ ಸಾಂಗ್ಚಾ ಪರ್ಮಾಣೆಂ, ಕ್ಯಾಥರೀನಾ ಲಾಗಿಂ ಜಾಲ್ಯಾರ್ ಸ್ಕಾಟ್ಲ್ಯಾಂಡಾಂತ್ ಬಸೊನ್ ಖಾಂವ್ಕ್ ತಿಚೆ ಲಾಗಿಂ ಕಾಂಯ್ ನಾತ್ಲ್ಲೆಂ. ಪುಣ್, ಚಾರ್ಲ್ಸಾಕ್ ಆಪ್ಲ್ಯಾ ಇಂಡಿಯಾಂತ್ ಕಾಂಯ್ ಉಣೆಂ ನಾತ್ಲ್ಲೆಂ. ಬಾಪಾಯ್ಚಾ ಗುಸ್ತಾರ್ ತಾಕಾ ಬಸೊನ್ ದೀಸ್ ಕಾಡ್ಯೆತೆ. ತೆಂ ಸಗ್ಳೆಂ ಸೊಡುನ್, ಆಪುಣ್ ಹಾಂಗಾ ಕಸಲೆಂ ಜಿವಿತ್ ಸೊಧುನ್ ಆಯ್ಲಾಂ? ಚಾರ್ಲ್ಸಾನ್ ಏಕ್ ಘಡಿಭರ್ ಚಿಂತ್ಲೆಂ. ಪುಣ್, ತಾಚ್ಯಾ ಮತಿಕ್ ಕಾಂಯ್ ಸಮ್ಜಾಲೆಂ ನಾ. "ಬೋವ್ಶ್ಯಾ ಹಾಂವ್ ಹಾಂಗಾ ಆಪ್ಣಾಚಿ ದಿಶಾ ಸೊಧುನ್ ಆಯ್ಲಾಂ!" ಆಪ್ಲ್ಯಾ ಮತಿಕ್ ತಾಣೆಂ ಸಮಾಧಾನ್ ಕೆಲೆಂ.
"ಜಿವಿತ್, ಕೊಣಾಕ್ ಖಂಯ್ ವರುನ್ ಪಾಯ್ತಾ ತೆಂ ಕೊಣಾಯ್ಕ್ಯ್ ಸಾಂಗೊಂಕ್ ಜಾಯ್ನಾ ಚಾರ್ಲ್ಸ್! ಆತಾಂ ಹ್ಯಾ ವಿವಿಯಾನಾಕ್ ಪಳೆ.....! ನಿಜಾಯ್ಕ್ಯ್ ಪಳಂವ್ಕ್ ಗೆಲ್ಯಾರ್ ವಿವಿಯಾನಾಕ್ ಜಿವಿತ್ ಜಿಯೆಂವ್ಚೆಂ ಕಾರಾಣ್ ಮ್ಹಳ್ಳೆಂಚ್ ನಾತ್ಲ್ಲೆಂ. ಆಪ್ಣೆಂ ಜಲ್ಮಾಲ್ಲ್ಯಾ ಕಾರಾಣಾಕ್ಚ್ ಲಾಗೊನ್ ತೆಂ ತಾಚೆಂ ಜಿವಿತ್ ಜಿಯೆತಾಲೆಂ. ತುಂ ಆಯ್ಲ್ಯಾ ಉಪ್ರಾಂತ್ ತಾಕಾಯ್ ಆಪ್ಲಿ ಜಿಣಿ ಜಿಯೆಂವ್ಕ್ ಏಕ್ ಕಾರಾಣ್ ಮೆಳ್ಳೆಂ! ತೆಂಚ್ ತುಂ ಕ್ರಿಸ್ಟಿನಾಕ್ ಪಳೆ....! ತಾಕಾ ಆನಿ ವಿವಿಯಾನಾಕ್ ಕಿತ್ಲೊ ಫರಕ್ ಆಸಾ.....!"
ವ್ಹಯ್! ಕ್ಯಾಥರೀನಾನ್ ಸಾಂಗ್ಚೆಂ ಖಂಡಿತ್ ಸಾರ್ಕೆಂ! ಪಳಂವ್ಕ್ ಗೆಲ್ಯಾರ್ ವಿವಿಯಾನಾಕ್ ಆನಿ ಕ್ಯಾಥರೀನಾಕ್ ಕಾಂಯ್ ಸಂಭಂಧ್ಚ್ ನಾತ್ಲ್ಲೊ. ವಿವಿಯಾನಾ ಫಕತ್ತ್ ಕ್ಯಾಥರೀನಾಚೆಂ ಇಷ್ಟಿಣ್ ಲಾರಾಚೆಂ ಧುವ್ ಮ್ಹಣ್ಚಾ ಶಿವಾಯ್ ತಾಂಚೆ ಮಧೆಂ ಕಸಲಿಯ್ ವಳಕ್ ನಾತ್ಲ್ಲಿ. ಲಾರಾಚಾ, ತ್ಯಾ ತಾಚ್ಯಾ ಪಿಡೆಂತ್ಲ್ಯಾ ದಿಸಾಂನಿ, ಲಾರಾಕ್ ಸಾಂಗಾತ್ ದೀಂವ್ಕ್ ಆಸ್ಲ್ಲಿಂ ಮ್ಹಳ್ಯಾರ್, ಫಕತ್ತ್ ಕ್ಯಾಥರೀನ್ ಆನಿ ಸೈಮನ್ ಮಾತ್ರ್! ಲಾರಾನ್ ಆಪ್ಲ್ಯಾ ಭುರ್ಗ್ಯಾ ಆಂಜೆಲೀನಾ ಸವೆಂ ಆತ್ಮಹತ್ಯಾ ಕರ್ತಾನಾ, ವಿವಿಯಾನಾಕ್ ಕ್ಯಾಥರೀನಾಚಾ ಹಾತಿಂ ಒಪ್ಸುನ್ ದಿಲ್ಲ್ಯಾ ಖಾತಿರ್ ಕ್ಯಾಥರೀನಾನ್ ವಿವಿಯಾನಾಕ್ ಆಪ್ಲ್ಯಾ ಧುವೆ ಪರಿಂಚ್ ಸಾಂಭಾಳ್ಲ್ಲೆಂ.
"ಕ್ಯಾಥಿ ಆಂಟಿ ಕಿತೆಂ ಸಾಂಗ್ತಾಲಿ? ಶಿ ಇಸ್ ವೆರ್ರಿ ನೈಸ್....! ತಿ ಮ್ಹಜಿ ಆವಯ್ ನ್ಹಯ್. ಪುಣ್ ಮ್ಹಜ್ಯಾ ಆವಯ್ ಪ್ರಾಸ್ ಚಡ್ಚ್ ಮ್ಹಣ್ಯೆತ್...!" ಕ್ಯಾಥರೀನಾಚಾ ಘರಾ ಕ್ರಿಸ್ಮಸಾಚೆಂ ರಾತಿಚೆಂ ಜೆವಾಣ್ ಜಾವ್ನ್ ಪಾಟಿಂ ಆಪ್ಲ್ಯಾ ಘರಾ ಪರ್ತಾತಾನಾ ವಿವಿಯಾನಾನ್ ಚಾರ್ಲ್ಸಾಕ್ ವಿಚಾರ್ಲೆಂ. ಕ್ಯಾಥರೀನಾಚಾ ಘರಾ ರಾತಿಕ್ ಚಾರ್ಲ್ಸ್ ಕ್ಯಾಥರೀನಾ ಸವೆಂ ಮಸ್ತ್ ಉಲವ್ನ್ ಆಸ್ಲ್ಲೊ ತೆಂ ತಾಣೆಂ ಪಳೆಲ್ಲೆಂ.
"ಶಿ ಇಸ್ ನಾಟ್ ಸಿಂಪ್ಲಿ ನೈಸ್..... ಶಿ ಇಸ್ ಗ್ರೇಟ್!" ಚಾರ್ಲ್ಸಾನ್ ವಿವಿಯಾನಾಕ್ ಆಪ್ಣಾ ತೆವ್ಶಿಂ ವೊಡುನ್ ಧರ್ಲೆಂ.
ಚಾರ್ಲ್ಸ್ ಆತಾಂ ಹ್ಯಾ ಕ್ಯಾಥರೀನಾಚಾ ವಿಶಿಂ ಸಂಪೂರ್ಣ್ ಜಾಣಾಂ ಜಾಲ್ಲೊ. ಆಜ್ ಆಪ್ಣಾಚೆಂ ಬಾಯ್ಲ್ ಜಾವ್ನ್ ಆಸ್ಲ್ಲ್ಯಾ ವಿವಿಯಾನಾಕ್ ಪೊಸ್ಲೆಲ್ಯಾ ಕ್ಯಾಥರೀನ್ ಆನಿ ಸೈಮನಾನ್ ತಾಂಚ್ಯಾ ಫಾಯ್ದ್ಯಾ ಖಾತಿರ್ ವಿವಿಯಾನಾನಾಕ್ ಪೊಸ್ಲ್ಲೆಂ ನಾ. ಹ್ಯಾ ವಿವಿಯಾನಾ ಥಾವ್ನ್ ತಾಣಿಂ ಕಸಲೊಯ್ ಮತ್ಲಾಬ್ ಆಶೆಲ್ಲೊ ನಾ. ಫಕತ್ತ್ ತಾಣಿಂ ತಾಂಚ್ಯಾ ಮನ್ಶ್ಯಾಪಣಾಚಿ ರುಜ್ವಾತ್ ಮಾತ್ರ್ ದಿಲ್ಲಿ.
ವಿವಿಯಾನಾಚಾ ಜಿವಿತಾಚಾ ಪಯ್ಲೆಂಚಾ ತ್ಯಾ ದಿಸಾಂನಿ ಕ್ಯಾಥರೀನ್ ಆನಿ ತಾಚೆಂ ಕುಟಾಮ್. ತ್ಯಾ ಉಪ್ರಾಂತ್ ಚಾರ್ಲ್ಸ್ ಆನಿ ಆತಾಂ ಮಿಶೇಲ್!
ಹ್ಯಾ ತೀನ್ ಹಂತಾಂಕ್ ಚಡ್ಲ್ಲೆಂ ವಿವಿಯಾನಾ ಆತಾಂ ಸಂಪೂರ್ಣ್ ಖುಶಿ ಆಸ್ಲ್ಲೆಂ.
ಎಡಿನ್ಬರ್ಗಾ ಥಾವ್ನ್ ಲಿವರ್ಪೂಲ್! ಲಿವರ್ಪೂಲಾ ಥಾವ್ನ್ ಮ್ಯಾಂಚೆಸ್ಟರ್!
ಜಶೆಂ ಎಡಿನ್ಬರ್ಗಾಂತ್ ಉದೆಲ್ಲೊ ದೀಸ್ ಲಿವರ್ಪೂಲಾಂತ್ ಬುಡ್ತಾ ತಶೆಂ ವಿವಿಯಾನಾಚೆಂ ಜಿವಿತ್ ಎಡಿನ್ಬರ್ಗಾಂತ್ ಉದೆವ್ನ್ ಲಿವರ್ಪೂಲಾಂತ್ ಬುಡ್ಲ್ಲೆಂ ಜಾಲ್ಯಾರ್ಯ್ ಮ್ಯಾಂಚೆಸ್ಟರಾಂತ್ ಉದೆವ್ಯ್ ನಾತ್ಲ್ಲೊ ಆಸ್ತಮ್ಯ್ ನಾತ್ಲ್ಲೊ. ಹಾಂಗಾ ತೆವ್ಶಿಂಲ್ಯಾ ಮೆಟ್ರೊ ಸ್ಟೇಶನಾ ಮದ್ಲ್ಯಾನ್ ಸುರ್ಯೊ ಉದೆವ್ನ್ ಆಯಿಲ್ಲ್ಯಾ ಪರಿಂ ದಿಸ್ತಾಲೊ ಆನಿ ಹೆವ್ಶಿಂಲ್ಯಾ ತ್ಯಾ ಪೂಟ್ಬಾಲ್ ಸ್ಟೇಡಿಯಮಾ ತೆವ್ಶಿಂ ತೊ ಖೆಳೊಂಕ್ ವೆತಾ ಜಶೆಂ ದಿಸ್ತಾಲೊ. ತಾಚ್ಯೆ ಸಾಂಗಾತಾ ವಿವಿಯಾನಾಯ್ ನೆಲ್ಸನ್ ಎಂಡ್ ವಿಯೋಲಾ ಥಾವ್ನ್ ತ್ಯಾ ರೆಸ್ಟೋರಂಟಾಕ್ ಪಾವ್ತಾಲೆಂ.
ಕಾಂಯ್ಚ್ ಫರಕ್ ನಾತ್ಲ್ಲೊ ತಾಚ್ಯಾ ಆನಿ ಹ್ಯಾ ಮ್ಯಾಂಚೆಸ್ಟರಾಕ್ ಉಜ್ವಾಡ್ ದಿಂವ್ಚಾ ಸುರ್ಯಾ ಮಧೆಂ!
ಜಶೆಂ ತೊ ಸುರ್ಯೊ ಉದೆವಾ ಥಾವ್ನ್ ಆಸ್ತಮಾ ಪಾಸೊನ್ ಎಕ್ಸುರೊಚ್ ಜಳೊನ್ ಆಸ್ತಾ ತಶೆಂ ವಿವಿಯಾನಾ ಎಕ್ಸುರೆಂಚ್ ಆಸ್ತಾಲೆಂ. ತಾಚ್ಯಾ ಮತಿಂತ್ ಚಿಂತ್ನಾ ಆಸ್ಲ್ಲಿಂ. ತೆಂ ಸಮಾಜೆ ವಿಶಿಂ ಚಿಂತಾಲೆಂ. ಕ್ರಿಸ್ಟಿನಾ ವಿಶಿಂ ಆಟಯ್ತಾಲೆಂ. ಆವಯ್ ಸಾರ್ಕ್ಯಾ ಆವಯ್ ಕ್ಯಾಥರೀನಾಕ್ ಸುದಾರ್ಸಿತಾಲೆಂ. ಪುಣ್ ತೊ ಸುರ್ಯೊ ಜಳ್ಚಾ ಪರಿಂ ತೆಂ ಜಳಾನಾತ್ಲ್ಲೆಂ. ಭಿಲ್ಕುಲ್ ಶಾಂತ್ ಆಸ್ತಾಲೆಂ.
ಎಕೇಕ್ ಪಾವ್ಟಿಂ ಪರಿಸ್ಥಿತಿ, ವಿವಿಯಾನಾಕ್ ತಾಚ್ಯಾ ತ್ಯಾ ಭುರ್ಗ್ಯಾಪಣಾಕ್ ವೊಡುನ್ ವರುನ್, ತಾಕಾ ಅಸಲ್ಯಾ ಉಜ್ಯಾಂತ್ ಜಳಯ್ತಾಲಿ ಕೀ ತ್ಯಾ ಉಜ್ಯಾಂತ್ ಫಕತ್ತ್ ತಾಚ್ಯಾ ಆವಯ್ಚೆಂ ರೂಪ್ ಆನಿ ತಾಚ್ಯಾ ಭಯ್ಣಿಚೆಂ ರೂಪ್ ಗಯ್ರೆಂ ಗಯ್ರೆಂ ದಿಸ್ತಾಲೆಂ.
ಹ್ಯಾ ಸಗ್ಳ್ಯಾಕ್ ಆತಾಂ ಮಿಶೇಲಾನ್ ನವೆಂ ರೂಪ್ ದಿಲಾಂ! ಏಕ್ ನವೆಂ ಜಿವಿತ್ ದಿಲಾಂ!
ಜಶೆಂ ದೀಸ್ ಧಾವೊಂಕ್ ಲಾಗ್ಲೆ ತಶೆಂ ಮಿಶೇಲಾಚೆಂ ರೂಪ್, ಮಿಶೇಲಾಚೆಂ ಸಾರ್ಕೆಂ ಉಟೊನ್ ದಿಸೊಂಕ್ ಲಾಗ್ಲೆಂ. ಜಲ್ಮಾಲ್ಲೆಂ ಬಾಳ್ಶೆಂ ಮಹಿನ್ಯಾ ವರೇಗ್ ತಾಚ್ಯಾ ರುಪಾಕ್ ಲಿಪಯ್ತಾ. ತಾಕಾ ಕೊಣಾಕ್ ಸರಿ ಕೆಲ್ಯಾರ್ಯ್ ತೆಂ ಘೆವ್ನ್ ಆಯಿಲ್ಲೆಂ ರೂಪ್ ತಾಕಾ ಸರಿ ಕೆಲ್ಲ್ಯಾಚಾ ಭಾಶೆನ್ಚ್ ದಿಸ್ತಾ. ಪುಣ್, ಮಹಿನೊ ಉತಾರ್ಲ್ಲೆಂ ಬಾಳ್ಶೆಂ ಆಪ್ಣೆಂ ಘೆವ್ನ್ ಆಯಿಲ್ಲ್ಯಾ ತಾಚಾ ಸಂತಾನ್ ಕುಟ್ಮಾಂಚಾಂಚಾ ರೂಪಾಕ್ ಸಂಸಾರಾ ಮುಖಾರ್ ಸಾರ್ಕೆಂ ದವರ್ತಾ.
ಪಯ್ಲೆಂ, ಮಿಶೇಲ್ ಜಲ್ಮಾಲ್ಲ್ಯಾ ತ್ಯಾ ಪಯ್ಲ್ಯಾ ಪಯ್ಲ್ಯಾ ದಿಸಾಂನಿಂ, ಮಿಶೇಲಾಕ್ ಆವಯ್ಚೆಂಚ್ ಪ್ರತಿರೂಪ್ ಆಯ್ಲಾಂ ತಶೆಂ ಸಗ್ಳಿಂ ಸಾಂಗ್ತಾಲಿಂ ಜಾಲ್ಯಾರ್ಯ್, ಆತಾಂ, ಚ್ಯಾರ್ ಮಹಿನೆ ವೀಸ್ ದೀಸ್ ಜಾಲ್ಲ್ಯಾ ಮಿಶೇಲಾಕ್ ಪಳವ್ನ್,
"ಶಿ ಇಸ್ ಸೇಮ್ ಲೈಕ್ ಯುವರ್ ಮದರ್.....!" ಉದ್ಗಾರ್ಲೊ ಸೈಮನ್. ".....ಯಾಮ್ ಐ ರೈಟ್ ಕ್ಯಾಥಿ? " ಮಿಶೇಲಾಕ್ ಆಪ್ಲ್ಯಾ ಬಾಯ್ಲೆಚಾ ತೆಂವ್ಶಿ ಘುಂವ್ಡಾವ್ನ್ ತಿಕಾ ತಾಣೆಂ ದಾಖಯ್ಲೆಂ.
"ತುಕಾ ಅಜೂನ್ಯ್ ಲಾರಾಚೊ ಉಡಾಸ್ ಆಸಾ?" ಕ್ಯಾಥರೀನಾಚ್ಯಾ ದೊಳ್ಯಾಂ ಮುಕಾರ್ ಆಪ್ಲ್ಯಾ ಲಾರಾಚೆಂ ಪ್ರತಿರೂಪ್ ಉದೆವ್ನ್ ಆಯ್ಲೆಂ.
"ಲಾರಾ...!" ಆಪ್ಲ್ಯೊ ಆಸ್ಡ್ಯೊ ವಯ್ರ್ ಕರುನ್ ವಿವಿಯಾನಾ ತೆವ್ಶಿಂ ಪಳೆಲ್ಲೊ ಸೈಮನ್, "ಲಾರಾ ಸ್ಕಾಟ್ಲ್ಯಾಂಡಾಚೆಂ ಪ್ರಿನ್ಸೆಸ್......! ಸ್ಕಾಟ್ಲ್ಯಾಂಡಾಚೆಂ ನೀಜ್ ಬ್ಯೂಟಿ........! ತಾಕಾ ಪಳೆಲ್ಲೊ ಕೊಣ್ಯ್ ತಾಕಾ ವಿಸ್ರೊಂಕ್ ಸಕ್ತಾ? ಪೂಣ್...." ಮತಿಂತ್ ಆಯಿಲ್ಲೆಂ ಕಿತೆಂಗೀ ಉಲಂವ್ಕ್ ವೆಚೆಂ ಪ್ರಯತ್ನ್ ಕರಿನಾಸ್ತಾನಾ ಸೈಮನಾನ್ ಆಪ್ಲ್ಯಾ ಜಿಬೆಕ್ ದಾಂಬುನ್ ಧರ್ಲೆಂ.
"ವಿವಿ ಚೆಂ ಆವಯ್ ತಿತ್ಲೆಂಯ್ ಸೊಭಿತ್ ಆಸ್ಲ್ಲೆಂ?" ಸೈಮನಾಚಿಂ ಉತ್ರಾಂ ಆಯ್ಕಾಲ್ಲೊ ಚಾರ್ಲ್ಸ್ ಉದ್ಗಾರ್ಲೊ.
"ತುಂ ಜಣಾಂಯ್ ಚಾರ್ಲ್ಸ್.....? ಸಗ್ಳ್ಯಾ ಎಡಿನ್ಬರ್ಗಾಚಾ ಯೂನಿವರ್ಸಿಟಿಂತ್, ಸೊಭಾಯೆಂತ್ ಪಳೆಲ್ಯಾರ್, ಲಾರಾಚಾ ಫುಡೆಂ ರಾಂವ್ಚೆಂ ತಸಲೆಂ ಸೊಭಿತ್ ಚಲಿ ದುಸ್ರೆಂ ನಾತ್ಲ್ಲೆಂ. ದೆವಾನ್ ತಾಕಾ ಸೊಭಾಯ್ ದಿಲ್ಲಿ. ಪುಣ್ ಸೊಭಾಯೆ ಸಾಂಗಾತಾ ಗರೀಬ್ಪಣ್ಯ್ ದಿಲ್ಲೆಂ. ಹ್ಯಾಚ್ ಖಾತಿರ್ ತಾಚ್ಯಾ ತ್ಯಾ ಸೊಭಾಯೆಕ್ ತಾಕಾ ಫಾವೊ ಜಾಯ್ ಜಾಲ್ಲೊ ತೊ ಮಾನ್ ಮೆಳ್ಳೊ ನಾ!" ಆಪ್ಲ್ಯಾ ಆವಯ್ಚಾ ಸೊಭಾಯೆಚಿ ಮಹಾನತಾ ಅಯ್ಕೊನ್ ವಿವಿಯಾನಾನ್ ಸೋಫಾ ಥಾವ್ನ್ ಉಟೊನ್ ಯೇವ್ನ್ ಆಪ್ಲ್ಯಾ ಮಿಶೇಲಾಕ್ ಆಪ್ಲ್ಯಾ ಹಾತಿಂ ಘೆತ್ಲೆಂ. ಸೈಮನಾನ್ ಆಜ್ ಹ್ಯಾ ಮಿಶೇಲಾಕ್ ಆನಿ ತಾಚ್ಯಾ ಆಜಿಯೆಕ್ ಲಾರಾಕ್ ಸರಿ ಕೆಲ್ಲೆಂ. ಲಾರಾ ಆಪ್ಣಾಚಿ ಆವಯ್! ಆಪ್ಣೆಂ ಆಪ್ಣಾಚಾ ಭುರ್ಗ್ಯಾಪಣಾರ್ಚ್ ಸಾಂಡ್ಲೆಲಿ ಆವಯ್! ಮ್ಹಜಿ ಆವಯ್ ಆಶಿ ಆಸ್ಲ್ಲಿ? ಮ್ಹಜಿ ಆವಯ್ ಮ್ಹಜ್ಯಾ ಮಿಶೇಲಾ ಪರಿಂ ಆಸ್ಲ್ಲಿ?
ವಿವಿಯಾನಾನ್ ಆಪ್ಲ್ಯಾ ಹಾತಾಂತ್ಲ್ಯಾ ಮಿಶೇಲಾಚಾ ತ್ಯಾ ನೆಣ್ತ್ಯಾ ದೊಳ್ಯಾಂಕ್ಚ್ ಪಳೆಲೆಂ.
ಥೊಡಿಂಚ್ ಕ್ಷಣಾಂ....!
ಹ್ಯಾ ಕ್ಷಣಾಂ ಮಧೆಂ ವಿವಿಯಾನಾಚಾ ದೊಳ್ಯಾಂಚಾ ದಿಷ್ಟಿಕ್ ಆನಿ ತಾಚ್ಯಾ ಆವಯ್ಚಾ ತ್ಯಾ ತಾಚಾ ದೊಳ್ಯಾಂನಿಂ ತೆದ್ನಾಂ ತೆದ್ನಾಂ ದಿಷ್ಟಿಕ್ ಪಡ್ಚಾ ಗಯ್ರ್ಯಾ ಗಯ್ರ್ಯಾ ರೂಪಾ ಮಧೆಂ ಏಕ್ ಭಯಾನಕ್ ಝುಜ್ ಚಲ್ಲೆಂ.
ಪಯ್ಸ್ ಖಂಯ್ಸರ್ಗೀ ಮೊಡಾಕ್ ಮೋಡ್ ಆದ್ಳಾಲ್ಲ್ಯಾ ಪರಿಂ.... ಮೊಳಾಬಾರ್ ನೆಕೆತ್ರಾಂ ಎಕಾಮೆಕಾ ಸ್ಪರ್ಧ್ಯಾಕ್ ರಾವ್ಲೆಲ್ಯಾ ಪರಿಂ...... ಪಾವ್ಸಾಚೆ ಥೆಂಬೆ ತ್ಯಾ ಫುಲಾಂಚಾ ಪಾಕ್ಳ್ಯಾಂಕ್ ಚಿರುನ್ ವೆತಾತ್ ತಶೆಂ...... ವಾರ್ಯಾರ್ ಉಟ್ಲ್ಲಿ ಧುಳ್ ತ್ಯಾ ಸುರ್ಯಾಕ್ ಲಿಪಯ್ತಾ ಜಶೆಂ......
ತಿತ್ಲೆಂಚ್!
ವಿವಿಯಾನಾನ್ ಮಿಶೇಲಾಕ್ ಆಪ್ಲ್ಯಾ ಹರ್ಧ್ಯಾಕ್ ದಾಂಬುನ್ ಧರ್ಲೆಂ. ತಾಚ್ಯಾ ಮತಿಂತ್ ತಾಕಾ ಕಳಿತ್ ನಾತ್ಲೆಲ್ಯಾ ಪರಿಂಚ್ ವಾದಾಳ್ ಉಭೆಂ ಜಾಲ್ಲೆಂ.
ಮಿಶೆಲಾಚೆಂ ನೆಣ್ತೆಂಪಣ್ ವಿವಿಯಾನಾಚಾ ದೊಳ್ಯಾನಿಂ ಚಡೊನ್ ತಾಂತ್ಲ್ಯಾ ಪಿಂತುರಾಂನಿ ಖೆಳೊನ್ ತಾಚ್ಯಾ ಕಾಳ್ಜಾಂತ್ ದೆಂವ್ತಾನಾ....
ಥೊಡ್ಯಾ ವೆಳಾನ್ ಸವ್ಕಾಸ್ ಸಗ್ಳೆಂ ಶಾಂತ್ ಜಾಲ್ಲ್ಯಾ ಪರಿಂ ವಿವಿಯಾನಾಚಿ ಮತ್ ಶಾಂತ್ ಜಾಲಿ.
ತಿತ್ಲ್ಯಾರ್!
ವಿವಿಯಾನಾಚಾ ದೊಳ್ಯಾಂ ಥಾವ್ನ್ ದೋನ್ ದುಖಾಂ ದೆಂವೊನ್, ತಿಂ ’ಟಪ್ಪ್’ ಕರುನ್ ತಾಣೆಂ ಹಾತಿಂ ದರ್ಲೆಲ್ಯಾ ತಾಚ್ಯಾ ಮಿಶೇಲಾಚಾ ಗಾಲಾಂಚೆರ್ ಪಡ್ತಾನಾ, ವಿವಿಯಾನಾಕ್ ಕಸಲಿಗೀ ಆಪ್ಲ್ಯಾ ದೊಳ್ಯಾಂಚಿ ಸಾಯ್ ದೆಂವೊನ್ ಗೆಲ್ಲ್ಯಾ ಪರಿಂ ಜಾಲಿ. ತಾಚ್ಯಾ ಮತಿಚ್ಯಾ ಪಡ್ದ್ಯಾರ್ ಆತಾಂ ತಾಚಾ ಆವಯ್ಚೆಂ ಆನಿ ಆಂಜೆಲೀನಾ ತಾಚೆಂ ಭಯ್ಣ್, ದೊಗಾಂಯ್ಚಿಂ ರುಪಾಂ ಸಾರ್ಕಿಂ ದಿಸೊಂಕ್ ಲಾಗ್ಲಿಂ.
ದೋನ್ ನೆಣ್ತಿಂ ಮುಖಮಳಾಂ!
ಮಿಶೇಲಾಚಾ ಸಾರ್ಕ್ಯಾಚಿಂ ದೋನ್ ಮುಖಮಳಾಂ!!
ಎಕಾಚ್ ರೂಪಾಚಿಂ ತೀನ್ ಪ್ರತಿರೂಪಾಂ!!!
ತಿತ್ಲೆಂಚ್!
ಪರ್ತ್ಯಾಕ್ ವಿವಿಯಾನಾನ್ ಮಿಶೇಲಾಕ್ ಆಪ್ಲ್ಯಾ ಹರ್ಧ್ಯಾಕ್ ದಾಂಬುನ್ ಧರ್ಲೆಂ.
ಕಿತ್ಲ್ಯಾಗೀ ವರ್ಸಾಂ ಉಪ್ರಾಂತ್ ಆಪ್ಲ್ಯಾ ಆವಯ್ಚೆಂ ರೂಪ್ ಆಜ್ ನೀಜ್ ಜಾವ್ನ್ ಆಪ್ಲ್ಯಾ ದೊಳ್ಯಾಂ ಫುಡೆಂ ಪಳೆಲ್ಲ್ಯಾ ಪರಿಂ ವಿವಿಯಾನಾಕ್ ಜಾಲೆಂ.
ಇತ್ಲ್ಯಾ ಥೆಂಪಾ ಉಪ್ರಾಂತ್, ಆಜ್, ಆಪ್ಲ್ಯಾ ಆವಯ್ಕ್ ವೆಂಗ್ಲ್ಲ್ಯಾ ಪರಿಂ ತಾಕಾ ಜಾಲೆಂ. ತಾಚೆ ಸಂಗಿಂ ಸಭಾರ್ ವರ್ಸಾಂಚಿ ತಾಚಿ ತಾನ್ ನಿಂವೊನ್ ಗೆಲ್ಲ್ಯಾ ಪರಿಂ ಜಾಲಿ.
ಹ್ಯಾ ದಿಸಾ ಥಾವ್ನ್ ವಿವಿಯಾನಾ, ಮಿಶೇಲಾಕ್, ಆಪ್ಲ್ಯಾ ಆವಯ್ಚಾ ಆನಿ ಆಪ್ಲ್ಯಾ ಭಯ್ಣಿಚಾ ರುಪಾನ್ಚ್ ವಳ್ಕೊಂಕ್ ಲಾಗ್ಲೆಂ.
ಮ್ಯಾಂಚೆಸ್ಟರಾಂತ್ ದೀಸ್ ಧಾಂವ್ತಾತ್ ತಶೆಂ ಮಿಶೇಲಾಕ್ ಪ್ರಾಯ್ ವಾಡೊನ್ ಯೇಂವ್ಕ್ ಲಾಗ್ಲಿ. ಮ್ಯಾಂಚೆಸ್ಟರಾಂತ್ ಚಾರ್ಲ್ಸಾಚೆಂ ಆನಿ ವಿವಿಯಾನಾಚೆಂ ಸ್ವತಾಚೆಂ ಘರ್ ಅಜೂನ್ ಜಾಂವ್ಕ್ ನಾತ್ಲ್ಲೆಂ ಜಾಲ್ಯಾರ್ಯ್ ಆಪ್ಣಾಚೆ ಮ್ಹಳ್ಳೆಂ ಏಕ್ ಘರ್ ಕರ್ಚಾ ವಾವ್ರಾಂತ್ ತಿಂ ಕಾಂಯ್ ಚಡ್ ಪಯ್ಸ್ ನಾತ್ಲ್ಲಿಂ.
ಮಿಶೇಲಾನ್ ತಾಂಚಾ ಜಿವಿತಾಂತ್ ಸಗ್ಳೆಂಚ್ ಹಾಡ್ಲ್ಲೆಂ. ಸುಖ್, ಶಾಂತಿ, ಸಮಾಧಾನ್!
ಹ್ಯಾ ಮಧೆಂ ಚಾರ್ಲ್ಸ್ ಆನಿ ವಿವಿಯಾನಾ, ಮಿಶೇಲಾಕ್ ಏಕ್ ವರಸ್ ಭರ್ತಾನಾ, ತ್ಯಾ ವರ್ಸಾಚಾ ಚೆಡ್ವಾಕ್ ಘೆವ್ನ್ ತಿಂ ಇಂಡಿಯಾಕ್ ಪಾವ್ಲಿಂ. ಗಾವಾಂತ್ ಜೆರೊಮಾಕ್ ಆನಿ ಎಸ್ತೆಲಾಕ್ ಆಪ್ಲ್ಯಾ ಪರ್ಗಾಂವ್ಚಾ ಸುನೆಕ್ ಆನಿ ಪರ್ಗಾಂವಾಕ್ಚ್ ಪುಸುನ್ ಹಾಡ್ಲೆಲ್ಯಾ ನಾತಿಕ್ ಪಳವ್ನ್ ಸಂತೊಸ್ ಉಮಾಳುನ್ ಆಯ್ಲೊ ಜಾಲ್ಯಾರ್ಯ್ ತ್ಯಾ ಸಂತೊಸಾ ಮಧೆಂಯ್, ಕಿತೆಂಗೀ ಭಾಯ್ಲೆಂ ಆನಿ ಭಿತರ್ಲೆಂ ಮ್ಹಳ್ಳೆಂ ಭೊಗಾಪ್ ಉದೆಲೆಂ. ಹಾಂತು ಕಾಂಯ್ ನವಾಲ್ಯ್ ನಾತ್ಲ್ಲೆಂ. ಮಿಶೇಲಾನ್ ಸಂಪೂರ್ಣ್ ರುಪಾನ್ ತಾಚ್ಯಾ ಆಜಿಯೆಕ್ಚ್ ಪುಸುನ್ ಹಾಡ್ಲ್ಲೆಂ ಶಿವಾಯ್ ತಾಚ್ಯಾ ಬಾಪಾಯ್ ಥಾವ್ನ್ ಯಾ ತಾಚ್ಯಾ ಬಾಪಾಯ್ಚಾ ಕುಟ್ಮಾ ಥಾವ್ನ್ ತಾಣೆಂ ಕಾಂಯ್ಚ್ ಹಾಡುಂಕ್ ನಾತ್ಲ್ಲೆಂ. ಶಿವಾಯ್ ಎಸ್ತೆಲಾಚಾ ಕಿರಾ ಬೊಂಚಿ ಸಾರ್ಕ್ಯಾ ನಾಕಾಕ್!
***************
ಸೃಷ್ಟೆಂತ್ಲೊ ಸುರ್ಯೊ ಉದೆವಾ ಥಾವ್ನ್ ಅಸ್ತಮೆಕ್ ದೆಂವ್ತಾನಾ ಸಗ್ಳ್ಯಾ ಪೃಥ್ವೆಕ್ಚ್ ಉಲ್ಲಾಸ್ ಆನಿ ಸಂತೊಸ್. ಹರ್ಯೇಕ್ ಜೀವಿ ವೆಳಾ ಮಧೆಂ ಆಡ್ಚಾಲ್ಲಿ ತಿ ಸಾಂಜೆಚಾ ಬುಡ್ಚಾ ಸುರ್ಯಾ ಸಾಂಗಾತಾ, ಸಗ್ಳ್ಯಾ ದಿಸಾಚಾ ಧಾಂವ್ಣೆಕ್ ಆದೇವ್ಸ್ ಬಾಸಾವ್ನ್, ಸುಶೆಗಾಕ್ ಮೊಗಾನ್ ಯೆವ್ಕಾರ್ ಮಾಗ್ತಾ. ಪುಣ್, ನವ್ಯಾ ಮಂಗ್ಳುರ್ಚಾ ಬೊಂದೆರಾಂತ್ ಉಪ್ಯೆಂವ್ಚಾ ದೋನ್ ತಾರ್ವಾಂ ಮದ್ಲ್ಯಾನ್ ಬುಡೊನ್ ವೆಚೊ ಆಯ್ಚೊ ಸುರ್ಯೊ, ಜೆರೊಮಾಕ್, ತಾಚ್ಯಾ ಕುಡಿಚೊ ವಿಶೆವ್ ಆನಿ ತಾಚ್ಯಾ ಮತಿಚೊ ಸುಶೆಗ್ ತಾಕಾ ದಾನ್ ದೀವ್ನ್ ಚಲ್ಚೆ ಪರಿಂ ದಿಸ್ಲೊ ನಾ.
ಒಮ್ಜೂರಾಚಾ ತೊಟಾಂಕ್, ಶೆತಾಂಕ್, ಜೆರೊಮ್ ಆತಾಂ ಪಯ್ಲೆಂಚಾ ಪರಿಂ ಭೆಟ್ ದೀನಾತ್ಲ್ಲೊ. ಪಯ್ಲೆಂ ದಿಸಾಂದೀಸ್ ಆಪ್ಲ್ಯಾ ತೊಟಾಂತ್ಲ್ಯಾ ಮಾಡಾಂ ಮಾಡಿಯಾಂ ಮಧೆಂ ತಾಚ್ಯಾ ಪೂರ್ವಜಾನಿಂ ರೊಯ್ಲೆಲೆಂ ದಿರ್ವೆಂ ಪಳವ್ನ್, ಉಸ್ತುನ್ ತಾಕಾ ಈಟ್ ಘಾಲುನ್, ತೆಂ ವ್ಹಾಡವ್ನ್ ಖುಶಿ ಪಾಂವ್ಚೊ ಜೆರೊಮ್, ಆತಾಂ ಆಪ್ಲ್ಯಾ ಹಾತಾ ಪಾಂಯಾ ಮದ್ಲಿ ಸಕತ್ ಉಣಿಂ ಜಾವ್ನ್ ಯೆತಾನಾ, ತೊಟಾಕ್ ಆನಿ ಶೆತಾಂಕ್ ಪಳಂವ್ಕ್ ಕಾಮಾಗಾರಾಂಕ್ ನೆಮ್ಯಾರುನ್ ಆಪ್ಲ್ಯಾ ಘರಾಚ್ ರಾವ್ತಾಲೊ. ಕಾಂಯ್ ಗರ್ಜ್ ಪಡ್ಲ್ಯಾರ್ ತೊ ಒಮ್ಜೂರ್ ವಚೊನ್ ಯೆತಾಲೊ ನ್ಹಯ್ ಜಾಲ್ಯಾರ್, ಫಕತ್ತ್ ಆಯ್ತಾರಾಚಾ ದಿಸಾ ಮಾತ್ರ್, ಎಸ್ತೆಲಾಕ್ ಘೆವ್ನ್, ಸಾಂಜೆರ್, ಆಪ್ಲಿ ಆಸ್ತ್ ಪಳವ್ನ್ ಪಾಟಿಂ ಮಂಗ್ಳುರಾಕ್ ಪಾಂಯ್ ಕಾಡ್ತಾಲೊ.
ಜೆರೊಮಾಚಾ ದೊಳ್ಯಾಂ ಮುಕಾರ್ ಹ್ಯಾ ದಿಸಾಂನಿಂ ಏಕ್ ಜಯ್ತ್ ಸವಾಲ್ ಉಭೆಂ ಜಾಲ್ಲೆಂ. ಪ್ರಾಯ್ ಧಾಂವ್ಲೆಲ್ಯಾ ಮನ್ಶ್ಯಾಕ್ ಕೆದಾಳಾ ಕಿತೆಂ ಜಾತಾ ತೆಂ ಕಾಂಯ್ ಸಾಂಗೊಂಕ್ ಜಾಯ್ನಾಂ. ಆಪ್ಣಾಚಾಚ್ ಪಿರಾಯೆಚಾ ಪಾಟ್ಲೆ ಮುಕ್ಲೆ, ಪಯ್ಲೆಂ ದಾವಿದ್, ಉಪ್ರಾಂತ್ ತೊ ತೊಮಾಸ್, ತ್ಯಾ ಇಗರ್ಜೆ ಪಾಟ್ಲೊ ಇನಾಸ್, ಎಕಾ ಪಾಟ್ಲ್ಯಾನ್ ಏಕ್ಲೆ ಹ್ಯಾ ಸಂಸಾರಾಕ್ ಸಾಂಡುನ್ ಗೆಲ್ಲೆ. ಹ್ಯಾ ಮಧೆಂ ಆಜ್ ನ್ಹಯ್ ತರ್ ಫಾಲ್ಯಾಂ, ಆಪ್ಣಾಚಿಯ್ ಸರ್ಥಿ ಖಂಡಿತ್ ಯೆತೆಲಿ. ಹ್ಯಾ ಸರ್ಥೆಂತ್ ಹಾಂವ್ ಮುಕಾರ್ ಪಾವ್ತಾನಾ ಆಪ್ಣಾಚಾ ಎಸ್ತೆಲಾಚೆಂ ಕಿತೆಂ ಜಾತೆಲೆಂ?
"ಎಸ್ತೆಲ್....! ಮ್ಹಜೊ ಹಾತ್ ದರ್ಲೆಲ್ಯಾ ಕರ್ಮಾಕ್ ಅಜೂನ್ ಆಪ್ಣಾಚೊ ಹಾತ್ ಧರುನ್ ಮ್ಹಾಕಾ ಸಾಂಬಾಳುನ್ ಆಸಾ. ಆಪ್ಣಾಚೆಂ ಮ್ಹಳ್ಯಾರ್ ಆತಾಂ ತೆಂ ಎಕ್ಲೆಂ ಮಾತ್ರ್. ಮ್ಹಜ್ಯಾ ನಂತರ್ ತಾಚೆಂ ಕಿತೆಂ ಜಾತೆಲೆಂ? ಜೆರೊಮಾಚಾ ಮತಿಂತ್ ಚಿಂತ್ನಾಂ ಧಾಂವ್ತಾಲಿಂ.
ವ್ಹಾಳೊನ್ ಯೆಂವ್ಚೆಂ ವಾರೆಂ, ಆಪ್ಲೆಂ ಆಸ್ಥಿತ್ವ್ ಮನ್ಶ್ಯಾ ದೊಳ್ಯಾಂಕ್ ದಾಖಂವ್ಚಾ ಖಾತಿರ್, ಭಂವ್ತಣಿಚಾ ರೂಕ್ ಝಡಾಂಕ್ ಹಾಲವ್ನ್ ವೆತಾ ತಶೆಂ, ಮರಣ್ಯ್ ಆಜ್ ಜೆರೊಮಾಚಾ ಮತಿಂತ್ಲ್ಯಾ ಚಿಂತ್ನಾಂಚಾ ಪಾನಾಂಕ್ ಹಾಲವ್ನ್, ಜೆರೊಮಾಕ್ ಫಾಲ್ಯಾಂಚೆಂ ಚಿಂತುಂಕ್ ಮಜ್ಬೂರ್ ಕರುಂಕ್ ಲಾಗ್ಲ್ಲೆಂ.
ಚಾರ್ಲ್ಸ್, ಆಪ್ಲ್ಯಾ ಬಾಯ್ಲೆ ಭುರ್ಗ್ಯಾಕ್ ಘೆವ್ನ್ ಆಯಿಲ್ಲೊ ತೊ, ಪರ್ತ್ಯಾಕ್ ಮ್ಯಾಂಚೆಸ್ಟರಾಕ್ ಪಾಟಿಂ ಗೆಲ್ಯಾ ಉಪ್ರಾಂತ್, ಜೆರೊಮಾಕ್ ಆತಾಂ ಆಪ್ಲ್ಯಾ ಭುರ್ಗ್ಯಾಂ ವಯ್ರ್ ಭರ್ವಸೊ ನಾತ್ಲ್ಲೊ. ಭುರ್ಗ್ಯಾಂಕ್ ಭಲಾತ್ಕಾರ್ ಕರುನ್ ಗಾಂವಾಂತ್ ರಾವಂವ್ಚಿ ವಾಟ್ಯ್ ತಾಚ್ಯಾ ಫುಡ್ಯಾನ್ ನಾತ್ಲ್ಲಿ. ತಾಚ್ಯಾಚ್ ಹಾತಾನಿಂ ತಾಣೆಂ ದಾಡುನ್ ದಿಲ್ಲ್ಯಾ ಭುರ್ಗ್ಯಾಂಕ್ ಆತಾಂ ತೊ ಆಡಾಯ್ತಲೊ ಜಾಲ್ಯಾರ್ಯ್ ಕಸೊ?
"ವ್ಹಯ್ಗೋ ಸೆಲ್ಲೇ.... ಬಾಯ್ ಖಂಯ್ ಆಸಾಗೋ?" ಧನ್ಫರಾಂ ಜೆವಾಣ್ ಜಾವ್ನ್ ನಿದ್ಲ್ಲೊ ಜೆರೊಮ್ ಆತಾಂ ಉಟ್ಲ್ಲೊ ತೊ, ತೋಂಡ್ ಧುವ್ನ್ ಯೇವ್ನ್ ಭಾಯ್ಲ್ಯಾ ಸೊಪ್ಯಾರ್ ಬಸ್ಲ್ಲೊ. ಆಪ್ಣೆಂ ಸೊಪ್ಯಾರ್ ಬಸ್ಲೆಲ್ಯಾ ಥೊಡ್ಯಾ ವೆಳಾನ್, ಆಪ್ಣಾಕ್ ಚ್ಹಾ ಹಾಡುನ್ ದಿಲ್ಲ್ಯಾ ಕಾಮಾಚಾ ಚೆಡ್ವಾಕ್ ಸೆಲ್ಲಿಕ್, ಆಪ್ಲಿ ಬಾಯ್ಲ್ ಖಂಯ್ಸರ್ಯ್ ದಿಸಾನಾತ್ಲ್ಲಿ ಪಳವ್ನ್ ತಾಕಾ ಸವಾಲ್ ಕೆಲೆಂ.
"ಬಾಯ್ ಪಾಟ್ಲ್ಯಾ ವಾಟೆನ್ ಝಡಾಂಕ್ ಉದಾಕ್ ಧರ್ತಾ!" ಆಪ್ಲ್ಯಾ ಹಾತಾಂತ್ಲಿ ಚ್ಹಾ ಜೆರೊಮಾಚ್ಯಾ ಹಾತಕ್ ದೀವ್ನ್ ಸೆಲ್ಲಿ ಭಿತರ್ ಚಲ್ಲೆಂ.
ಸೆಲ್ಲಿ ಜೆರೊಮಾಚಾ ಘರಾ ಘರ್ ಕಾಮ್ ಕರ್ಚೆಂ ಚೆಡುಂ. ಜೆರೊಮಾನ್ ತಾಕಾ ಆಪ್ಣಾಚಾ ಘರಾ ಘರ್ಕಾಮಾಕ್ ರಾವಯ್ತಾನಾ, ಸೆಲ್ಲಿಕ್ ತೆದ್ನಾಂ ಫಕತ್ತ್ ಇಕ್ರಾ ವರ್ಸಾಂ ಪ್ರಾಯ್. ಆತಾಂ ಸೆಲ್ಲಿಕ್ ಪ್ರಾಯ್ ಭರೊನ್ ತೆಂ ಹೊಕಾಲ್ ಜಾಲಾಂ. ತಾಚೊ ಬಾಪಯ್ ದುಜೆ, ಜೆರೊಮಾಚಾ ತೊಟಾಂತ್ಚ್ ಕಾಮ್ ಕರ್ತಾಲೊ. ಪುಣ್ ದಿಸಾಕ್ ಜೊಡ್ಲ್ಲೆಂ ತೆಂ ರಾತಿಕ್ ವರುನ್ ತ್ಯಾ ಸೇಸಪ್ಪಚಾ ಗಡಂಗಾಕ್ ದಾನ್ ಕರುನ್ ಘರಾ ಯೆತಾಲೊ. ಪಿಯೊಣ್ಯಾಚಾ ಆಮಾಲಾನ್ ದುಜೆಕ್ ಸಂಸಾರಾ ಥಾವ್ನ್ ಉಕೊಲ್ನ್ ವರ್ತಾನಾ, ತಾಚೆಂ ಮಾಲ್ಗಡೆಂ ಧುವ್ ಸೆಲ್ಲಿ ಫಕತ್ತ್ ಧಾ ವರ್ಸಾಂಚೆಂ ಚೆಡುಂ. ಏಕ್ ವರಸ್ ಕಷ್ಟಾನಿಂ ಇಸ್ಕೊಲ್ ಶಿಕ್ಲ್ಲ್ಯಾ ತಾಣೆಂ, ದುಸ್ರ್ಯಾ ವರ್ಸಾ ಥಾವ್ನ್ ಘರಾಕ್ ಆನಿ ಆಪ್ಲ್ಯಾ ಪಾಂಚ್ ಜಣಾಂ ಬಾಂವ್ಡಾಂಕ್ ಸಾಂಬಾಳ್ಚಾ ವಾವ್ರಾಂತ್ ಆಪ್ಲ್ಯಾ ಆವಯ್ಕ್ ಸಾಂಗಾತ್ ದೀಂವ್ಕ್ ಸೊಧ್ತಾನಾ, ಜೆರೊಮಾನ್ ಸೆಲ್ಲಿಕ್ ಹಾಡುನ್ ಆಪ್ಲ್ಯಾ ಘರಾ ದವರ್ಲೆಂ.
ಸೆಲ್ಲಿನ್ ಸಾಂಗ್ಲ್ಲೆಂ ಆಯ್ಕಾಲ್ಲೊ ಜೆರೊಮ್, ಚ್ಹಾಯೆಚೆಂ ಕಪ್ಪ್ ಆಪ್ಲ್ಯಾ ಹಾತಿಂ ಘೆವ್ನ್ ಸವ್ಕಾಸ್ ಘರಾಚಾ ಪಾಟ್ಲ್ಯಾ ಕುಶಿಂನ್ ಆಯ್ಲೊ.
" ತ್ಯಾ ಸೆಲ್ಲಿಕ್ ಸಾಂಗ್ಲ್ಯಾರ್ ತೆಂ ಉದಾಕ್ ದೀನಾ ತಾಕಾ........?" ಮೊಗ್ರೆ ಝಡಾಂಕ್ ಉದಾಕ್ ದಿಂವ್ಚ್ಯಾ ಎಸ್ತೆಲಾಕ್ ಪಳವ್ನ್ ಜೆರೊಮಾನ್ ವಿಚಾರ್ಲೆಂ.
"ಜೀವ್ ಹಾಲಯ್ನಾಸ್ತಾನಾ ಆತಾಂ ಹೆ ಉಪದ್ರ್ ಜಾಲೆ. ನಾ ಜಾಲ್ಯಾರ್ ತುಕಾ ಆಜ್ ಹಿ ಸಾಕ್ರಿ ವಿಣೆಂ ಚ್ಹಾ ಪಿಯೆಂವ್ಕ್ ಪಡ್ತಿ?" ಎಸ್ತೆಲಾಚಾ ಜವಾಬೆಕ್ ಕಾಂಯ್ ಸಾಂಗೊಂಕ್ ಕಳಾನಾಸ್ತಾನಾ ಸವ್ಕಾಸ್ ಥಂಯ್ಚ್ ಪಾಟ್ಲ್ಯಾ ಬಾಗ್ಲಾಚಾ ಸೊಪ್ಯಾರ್ ಬಸ್ಲ್ಲೊ ಜೆರೊಮ್ ಚ್ಹಾ ಪಿಯೆಂವ್ಕ್ ಲಾಗ್ಲೊ. ಥೊಡ್ಯಾ ವೆಳಾನ್ ಝಡಾಂಕ್ ಉದಾಕ್ ದೀವ್ನ್ ಸಂಪಯಿಲ್ಲಿ ಎಸ್ತೆಲ್ಯ್ ಸವ್ಕಾಸ್ ಯೇವ್ನ್ ಥಂಯ್ಚ್ ಪಾಟ್ಲ್ಯಾ ಸೊಪ್ಯಾಚಾ ಮೆಟಾರ್ ಬಸ್ಲಿ.
"ಸೆಲ್ಲೇ....? ಹೊ ಪೈಪ್ ತಿಕ್ಕೆ ಕೊವ್ಳುನ್ ಶೆಡ್ಡಾಂತ್ ದವರ್ಗೋ....!"
"ಹಾಂವ್ ದವರ್ತಾಂ ಬಾಯೆ....... ಆಸೊಂದಿ!" ಘರ್ಕಾರ್ನಿಚಾ ಫರ್ಮಾಣಾಕ್ ಸೆಲ್ಲಿನ್ ಭಿತರ್ ಕುಜ್ನಾ ಥಾವ್ನ್ಚ್ ಜವಾಬ್ ದಿಲಿ.
"ಸುಮಾರ್ ದೀಸ್ ಜಾಲೆ.... ಭುರ್ಗ್ಯಾಂಚಿ ಕಾಂಯ್ ಖಬಾರ್ ನಾ!" ಥೊಡ್ಯಾ ವೆಳಾ ಉಪ್ರಾಂತ್ ಜೆರೊಮಾನ್ ಆಪ್ಲ್ಯಾ ಭುರ್ಗ್ಯಾಂಚೊ ಉಡಾಸ್ ಕಾಡ್ಲೊ.
"ಆತಾಂ ತಾಂಕಾಂ ತಾಂಚೆಂ ಮ್ಹಳ್ಳೆಂ ಕುಟಾಮ್ ಆಸ್ತಾನಾ ಖಂಯ್ ಪುರ್ಸತ್ ಮೆಳ್ತಾ? ತೆಂಯ್ ತ್ಯಾ ಪರ್ಗಾಂವಾಂಚಾ ಶ್ಹೆರಾಂತ್? ಬೊಂಬಯ್ಚ್ ಆತಾಂ ಜಾಯ್ನಾಂ ಮ್ಹಣ್ತಾನಾ.... ಹೊ ತರ್ಯ್ ಆಮ್ಚೊ ಗಾಂವ್! ತರ್ ತ್ಯಾ ಪಿಂರ್ಗ್ಯಾಂಚಾ ಗಾಂವಾಂತ್ ಕಶೆಂ ಆಸ್ತೆಲೆಂ? ಆಸೊಂದಿತ್...... ಭುರ್ಗಿಂ ಕಶಿಂಯ್ ಬರಿಂ ಆಸೊಂದಿತ್. ತಿಂ ಬರ್ಯಾನ್ ಆಸ್ಲ್ಯಾರ್ ಜಾಲೆಂ. ಆಮ್ಕಾಂ ಆತಾಂ ಹೆವ್ಶಿಂ ಪಯ್ಸ್ ಜಾಲಾಂ ತೆವ್ಶಿಂ ಲಾಗಿಂ ಜಾಲಾಂ!" ಉಲಯಿಲ್ಲಿ ಎಸ್ತೆಲ್ ಹೆಂವ್ಶಿ ಘುಂವೊನ್ ಜೆರೊಮಾಕ್ ಪಳವ್ನ್ "ತೆಂ ಆಸೊಂದಿ.... ತುಕಾ ಹಾವೆಂ ಸೆಲ್ಲಿಚಾ ಸೈರಿಕೆಚಾ ವಿಶಿಂ ಸಾಂಗ್ಲ್ಲೆಂ! ಕಿತೆಂ ಚಿಂತ್ಲಾಂಯ್ ಹ್ಯಾ ವಿಶಿಂ?" ಎಸ್ತೆಲಾನ್ ಆಪ್ಲ್ಯಾ ಉಲವ್ಣ್ಯಾಚೊ ವಿಶಯ್ ಬದ್ಲಿಲೊ.
"ವ್ಹಯ್ಗೋ ಸೆಲ್ಲೇ..... ತುಕಾಯ್ ಆಮ್ಕಾಂ ಸೊಡುನ್ ವಚೊಂಕ್ ಜಾಯ್ಗೋ?" ಬಾಯ್ಲೆಚ್ಯಾ ಸವಾಲಾಕ್ ಜಾಪ್ ದಿಲ್ಲೊ ಜೆರೊಮ್, ಉದ್ಕಾಚೊ ಪೈಪ್ ಕೊವ್ಳುಂಕ್ ಭಾಯ್ರ್ ಆಯಿಲ್ಲ್ಯಾ ಸೆಲ್ಲಿಕ್ಚ್ ಪಳಂವ್ಕ್ ಲಾಗ್ಲೊ.
ಪೈಪ್ ಕೊವೊಳ್ತಾಂ ಕೊವೊಳ್ತಾಂ, ಆಪ್ಣಾಕ್ ವಿಚಾರ್ಲ್ಲ್ಯಾ ಸವಾಲಾಕ್ ಜವಾಬ್ ದೀನಾಸ್ತಾನಾ ಏಕ್ ಪಾವ್ಟಿಂ ಸೆಲ್ಲಿನ್ ಸೊಪ್ಯಾರ್ ಬಸ್ಲೆಲ್ಯಾ ಜೆರೊಮಾಕ್ ಆನಿ ಎಸ್ತೆಲಾಕ್ ಪಳೆಲೆಂ ಮಾತ್ರ್ ಶಿವಾಯ್ ತೆಂ ಕಾಂಯ್ ಉಲಯ್ಲೆಂ ನಾ.
"ಸೊರೊ ಪಿಯೆವ್ನ್ ರಾತಿಕ್ ಘರಾ ಯೆಂವ್ಚೊ ಆಪ್ಲೊ ಬಾಪಯ್ ಜಿವಂತ್ ಆಸ್ತಾ ಪಾಸೊನ್ ಆಪ್ಲ್ಯಾ ಬಾಪಯ್ಪಣಾಚೆಂ ಕರ್ತವ್ಯ್ ಪಾಳುಂಕ್ ಸಕಾನಾಸ್ತಾನಾ ಸಂಸಾರ್ ಸಾಂಡುನ್ ಗೆಲ್ಲ್ಯಾ ವೆಳಾರ್, ಆಪ್ಣಾಚೆ ಆನಿ ಆಪ್ಣಾಚಾ ಘರಚೆ ಸಭಾರ್ ಕಷ್ಟ್, ಆಜ್ ಆಪ್ಣೆ ಕಾಮ್ ಕರ್ಚಾ ಹ್ಯಾ ಘರಾ ಥಾವ್ನ್ ಪರಿಹಾರ್ ಜಾಲ್ಲೆ. ಜೆರೊಮ್ ಆಪ್ಣಾಚೊ ಬಾಪಯ್ ಸಾರ್ಕೊ ಬಾಪಯ್ ಜಾಲ್ಲೊ. ಆನಿ ಎಸ್ತೆಲ್ ಆಪ್ಣಾಚಿ ಆವಯ್ ಸಾರ್ಕಿ ಆವಯ್ ಜಾಲ್ಲಿ. ಜೆರೊಮಾಕ್ ಆನಿ ಎಸ್ತೆಲಾಕ್ಯ್ ಆಪುಣ್ ತಾಂಚಾ ಭುರ್ಗ್ಯಾ ಸಾರ್ಕೆ ಭುರ್ಗೆಂ ಜಾಲ್ಲೆಂ. ಆಶೆಂ ಆಸ್ತಾನಾ.....?" ಪೈಪ್ ಕೊವ್ಳುಂಚಾ ಸೆಲ್ಲಿಚಾ ಮತಿಂತ್ ಚಿಂತ್ನಾ ಕೊವ್ಳೊಂಕ್ ಲಾಗ್ಲಿಂ. "ಆಜ್ ಆಪುಣ್ ತರ್ನಾಟೆಂ ಹೊಕಾಲ್ ಜಾಲ್ಯಾಂ! ಆತಾಂ ಆಪ್ಣಾಕ್ಯ್ ಎಕಾ ಸಾಂಗಾತಾಚಿ ಗರ್ಜ್ ಆಸಾ! ಹ್ಯಾ ಗರ್ಜೆಕ್ ಎಸ್ತೆಲ್ ಬಾಯ್ ಸಮ್ಜಾಲ್ಲಿ ಆನಿ ಆಪ್ಣಾಚಾ ಕಾಜಾರಾಚೊ ವಿಶಯ್ ತಿ ಜೆರೊಮಾ ಲಾಗಿಂ ಉಲಯಿಲ್ಲಿ. ಪುಣ್....!" ಕೊವ್ಳುನ್ ಜಾಲ್ಲೊ ಪೈಪ್ ಉಕ್ಲುನ್ ವರುನ್ ಸೆಲ್ಲಿ ಶೆಡ್ಡಾ ತೆಂವ್ಶಿಂ ಚಮ್ಕಾಲೆಂ. ತಾಚ್ಯಾ ಮತಿಂತ್ ಪರ್ತ್ಯಾಕ್ ಚಿಂತ್ನಾಂ ಧಾಂವೊಂಕ್ ಲಾಗ್ಲಿಂ.
"ಹ್ಯಾ ಎದ್ಯಾ ವ್ಹಡ್ಲ್ಯಾ ಘರಾಂತ್ ಬಾಯ್ ಆನಿ ಧನಿಯಾಕ್ ಹಾಂವ್ ಸೊಡ್ಲ್ಯಾರ್ ದುಸ್ರೆಂ ಕೊಣ್ಯ್ ನಾ. ಆಪ್ಣಾಕ್ ತಾಣಿಂ ಕೆದ್ನಾಂಯ್ ಎಕಾ ಘರ್ ಕಾಮಾಚಾ ಚೆಡ್ವಾ ಪರಿಂ ಪಳಂವ್ಕ್ ನಾ. ತಾಂಚಾಚ್ ಭುರ್ಗ್ಯಾ ಪರಿಂ ಪಳೆಲಾಂ. ಆಪ್ಲ್ಯಾ ಬಾಪಯ್ ಥಾವ್ನ್ ಮೆಳಾನಾಸ್ಲಲೊ ಬಾಪಯ್ಪಣಾಚೊ ಮೋಗ್ ಆಪ್ಲ್ಯಾ ಧನಿಯಾ ಥಾವ್ನ್ ಆಪ್ಣಾಕ್ ಫಾವೊ ಜಾಲಾ. ಆಪ್ಣಾ ಶಿವಾಯ್ ತಾಂಕಾ ಪಳಂವ್ಚೆಂ ಆಜ್ ಕೊಣ್ಯ್ ನಾ. ಆಶೆಂ ಆಸ್ತಾನಾ ಆಪುಣ್ ಹಾಂಕಾಂ ಆಶೆಂ ಸೊಡುನ್......"
ಶೆಡ್ಡಾಂತ್ ಪೈಪ್ ಗಳಯಿಲ್ಲೆಂ ಸೆಲ್ಲಿ ಥೊಡೆಂ ಚಿಂತುಂಕ್ ಪಡ್ಲೆಂ. ಥೊಡ್ಯಾಚ್ ವೆಳಾ ಪಯ್ಲೆಂ ಧನಿಯಾನ್ ವಿಚಾರ್ಲ್ಲೆಂ ಸವಾಲ್ ಪರ್ತ್ಯಾಕ್ ತಾಚ್ಯಾ ಕಾನಾಂಕ್ ಆಯ್ಕಾತಾ ತಶೆಂ ತಾಕಾ ಭೊಗ್ಲೆಂ.
ಜಶೆಂ ಏಕ್ ನೆಣ್ತೆಂ ಭುರ್ಗೆಂ ಆಪ್ಲ್ಯಾ ಆವಯ್ಕ್ ವಿಚಾರ್ತಾ ತಶೆಂ!
ಜೆರೊಮಾನ್ ಆಪ್ಣಾಕ್ ಕೆಲ್ಲ್ಯಾ ಸವಾಲಾಂತ್ ಸೆಲ್ಲಿನ್ ತೆಂಚ್ ನೆಣ್ತೆಂಪಣ್ ಪಳೆಲ್ಲೆಂ.
ಕಾಂಯ್ಚ್ ಆಧಾರ್ ನಾತ್ಲೆಲ್ಯಾ ಮನ್ಶಾನ್ ದೀನ್ಪಣಿಂ ಆಧಾರ್ ಮಾಗ್ಚೆ ಪರಿಂ!
ಭೋವ್ಶ್ಯಾ ಜೆರೊಮಾನ್ ಆಪ್ಲ್ಯಾ ಭುರ್ಗ್ಯಾಂಕ್ ಪಾಸೊನ್ ಹೆಂ ಸವಾಲ್ ವಿಚಾರುಂಕ್ ನಾ ಆಸ್ತೆಲೆಂ.
ತರ್ ನಿಜಾಯ್ಕ್ಯ್ ಆಪ್ಲ್ಯಾ ಧನಿಯಾಂಕ್ ತಾಂಚಾ ಫುಡಾರಾಚೊ ಹಾಂವ್ಚ್ ಆಧಾರ್? ಸೆಲ್ಲಿಚಾ ಮತಿಂತ್ ಸವಾಲ್ ಉದೆಲೆಂ.
"ತ್ಯಾ ಆಪ್ಣಾಚಾ ಭುರ್ಗ್ಯಾಪಣಾರ್ ಆಪ್ಣಾಕ್ ಆಧಾರ್ ಜಾಲ್ಲ್ಯಾ ಹಾಂಕಾ ಆಜ್ ತಾಂಚಾ ಉತರ್ ಪ್ರಾಯೆರ್......"
ಸೆಲ್ಲಿಕ್, ಥೊಡ್ಯಾ ವೆಳಾ ಪಯ್ಲೆಂ ಜೆರೊಮಾನ್ ವಿಚಾರ್ಲೆಲ್ಯಾ ಸವಾಲಾಂತ್ ಆಟಾಪುನ್ ಆಸ್ಲೆಲ್ಯಾ ತ್ಯಾ ತಾಂಚಾ ಎಕ್ಸುರ್ಪಣಾಚಿಂ ಸಿಂತಿಮೆಂತಾ ದಿಸೊಂಕ್ ಲಾಗ್ಲಿಂ. "ಆಪ್ಣೆಂ ಭುರ್ಗೆಂ ಆಸ್ತಾನಾ ಆಪ್ಲಿಂ ಧನಿಯಾ ತರ್ನಾಟಿಂ ಆಸ್ಲ್ಲಿಂ. ತೆದ್ನಾಂ ತಾಣಿಂ ಮ್ಹಜಿ ಗರ್ಜ್ ಸಮ್ಜಾಲ್ಲಿ. ಆಜ್ ತಿಂ ಮಾತಾರಿಂ ಜಾಲ್ಯಾಂತ್. ಆಜ್ ತಾಂಚಿ ಗರ್ಜ್ ಹಾವೆಂ ಸಮ್ಜೊಂಕ್ ಆಸಾ!" ಸೆಲ್ಲಿಚಾ ಮತಿಂತ್ ಕಸಲೊಗೀ ಏಕ್ ನಿರ್ಧಾರ್ ರೂಪ್ ಘೆಂವ್ಕ್ ಲಾಗ್ಲೊ. ಹ್ಯಾ ರೂಪಾಚೆಂ ಸಾರ್ಕೆಂ ಗಯ್ರೆಂ ಗಯ್ರೆಂ ತರ್ಯ್ ತಾಚ್ಯಾ ನಿರ್ಧಾರಾ ಥಾವ್ನ್ ದೋನ್ ಜಿವಾಂಕ್ ಜಿಯೆಂವ್ಚೊ ಏಕ್ ಆಧಾರ್ ತಾಕಾ ಸ್ಪಷ್ಟ್ ದಿಸಾಲಾಗ್ಲೊ. ತೆಂ ಆತಾಂ ಆಪ್ಲ್ಯಾ ಮತಿಂತ್ ರೂಪ್ ಘೆತ್ಲ್ಲ್ಯಾ ನಿರ್ಧಾರಾಕ್ ಘೆವ್ನ್ ಆಪ್ಲ್ಯಾ ಧನಿಯಾಂ ತೆವ್ಶಿಂ ಚಮ್ಕಾಲೆಂ.
"ಬಾಯೆ, ಮ್ಹಾಕಾ ಇತ್ಲ್ಯಾ ವೆಗ್ಗಿಂ ಕಾಜಾರ್ ನಾಕಾ!" ಜೆರೊಮಾನ್ ಪಿಯೆವ್ನ್ ದವರ್ಲೆಲ್ಯಾ ಚ್ಹಾಯೆಚೆಂ ಕಪ್ಪ್ ಘೆವ್ನ್ ಸೆಲ್ಲಿ ಭಿತರ್ ವೆಚ್ಯಾ ಖಾತಿರ್ ಮೆಟಾಂ ಚಡೊಂಕ್ ಲಾಗ್ಲೆಂ.
"ಕಿತ್ಯಾಕ್ಗೋ? ತುಜಿ ಆತಾಂ ಪ್ರಾಯ್ ಪಳೆ.....! ತ್ಯಾ ತ್ಯಾ ವೆಳಾರ್ ಜಾಂವ್ಕ್ ಜಾಯ್ ಆಸ್ಚೆಂ ತೆಂ ತ್ಯಾ ತ್ಯಾ ವೆಳಾರ್ಚ್ ಜಾಂವ್ಕ್ ಜಾಯ್.!" ಆಪ್ಣಾ ಮುಕಾರ್ಚ್ ಮೇಟ್ ಚಡೊನ್ ಭಿತರ್ ಗೆಲ್ಲ್ಯಾ ಸೆಲ್ಲಿ ತೆವ್ಶಿಂ ಎಸ್ತೆಲಾನ್ ಘುಂವೊನ್ ಪಳೆಲೆಂ. ಸೆಲ್ಲಿ ಎದೊಳ್ಚ್ ಕುಜ್ನಾಕ್ ಪಾವ್ಲ್ಲೆಂ.
"ತಸಲೆಂ ನಶೀಬ್ ಆಮ್ಕಾಂ ಖಂಯ್ ಆಸಾ ಬಾಯೆ?" ಕುಜ್ನಾಂ ಥಾವ್ನ್ಚ್ ಸೆಲ್ಲಿಚೊ ತಾಳೊ ತಿಕಾ ಆಯ್ಕಾಲೊ.
"ಕಿತೆಂಗೋ? ತುಜ್ಯಾ ನಶೀಬಾಂತ್ ಕಿತೆಂ ಉಣೆಂ ಕೆಲಾಂಗೋ? ಆಮ್ಚಾ ಜ್ಯೂಲಿಕ್ ಆನಿ ಪ್ಲೇವಿಕ್ ಪಳೆಲ್ಲ್ಯಾ ಪರಿಂಚ್ ತುಕಾಯ್ ಪಳೆಲಾಂ!"
"ತಶೆಂ ನ್ಹಯ್ ಬಾಯೆ.....!"
"ಆನಿ ಕಶೆಂಗೋ?"
ಕುಜ್ನಾಂ ಥಾವ್ನ್ ಭಾಯ್ರ್ ಆಯಿಲ್ಲ್ಯಾ ಸೆಲ್ಲಿಕ್ ಪಳೆಲ್ಲ್ಯಾ ಎಸ್ತೆಲಾಚಾ ತಾಳ್ಯಾಂತ್ ಥೊಡೊ ರಾಗ್ ಆಸ್ಲ್ಲೊ.
"ಆಮ್ಚ್ಯಾ ಘರ್ಚಿ ಪರಿಸ್ಥಿತಿ ತುಮಿಂ ಜಾಣಾಂ ಆಸಾತ್. ತುಮಿಂ ಹಾತ್ ದಿಲ್ಲ್ಯಾನ್ ವಿಲ್ಫಿಚೆಂ ಆನಿ ಹೆರಿಚೆಂ ಶಿಕಾಪ್ ಚಲ್ತಾ. ಮೀನಾ ಆನಿ ಲೀನಾ ತುಮಿಂ ದಿಲ್ಲ್ಯಾ ಧಯ್ರಾ ವರ್ವಿಂ ಮಾತ್ರ್ ಆಜ್ ಕಾಲೇಜಿಚೆಂ ಮೇಟ್ ಚಡ್ಲ್ಯಾಂತ್. ನಾ ಜಾಲ್ಯಾರ್ ಕೊಣಾಚಾ ದಾರಾರ್ ಖಂಯ್ ಪಾವ್ತಿಂ ಕೋಣ್ ಜಾಣಾಂ? ಆಲ್ವಿನ್ ತರ್ಯ್ ಲ್ಹಾನ್. ಫಾಲ್ಯಾಂ ತಾಚೆಂಯ್ ಕಾಂಯ್ ಜಾಂವ್ಕ್ ಆಸಾ. ಆಶೆಂ ಆಸ್ತಾನಾ ಹಾವೆಂ ಎಕಾನ್ ಏಕ್ ಕಾಜಾರಾ ವಿಶಿಂ ಕಶೆಂ ಚಿಂತುಂಕ್ ಜಾತಾ?"
"ಕೊಣಾಯ್ಚಾ ಧಯ್ರಾಚೆರ್ ಕೊಣ್ಯ್ ನಾಂಗೊ ಪುತಾ. ತೆಂ ಸಗ್ಳೆಂ ಬೆಷ್ಟೆಂ. ಆಜ್ ಆಮ್ಚಿಂ ಭುರ್ಗಿಂ ಆಮ್ಚೆ ಸಾಂಗಾತಾ ಆಸ್ಲ್ಲಿಂ ಜಾಲ್ಯಾರ್ ತುಂ ಹಾಂಗಾ ಆಸ್ತೆಂಯ್? ತಶೆಂಚ್ ತೆಂ! ಘರ್ಚಾ ವಿಶಿಂ ತುಂ ಖಂತ್ ಕರಿನಾಕಾ!" ಎಸ್ತೆಲ್ ಸೆಲ್ಲಿನ್ ಉಲಯಿಲ್ಲ್ಯಾ ರಾಜಾಂವಾಕ್ ಸಮ್ಜಾಲಿ.
"ಮ್ಹಾಕಾ ಮ್ಹಜಿ ಯಾ ಮ್ಹಜ್ಯಾ ಘರ್ಚಿ ಖಂತ್ ನಾ ಬಾಯೆ. ಪುಣ್ ಮ್ಹಾಕಾ ತುಮ್ಚಿ ಖಂತ್ ಜಾತಾ. ಹಾಂವ್ ತುಮ್ಕಾಂ ಸೊಡುನ್ ಗೆಲ್ಯಾರ್....... ಉಪ್ರಾಂತ್ ತುಮ್ಕಾಂ........?" ಸೆಲ್ಲಿ ಮುಕಾರ್ ಉಲಯ್ಲೆಂ ನಾ.
"ತುಂ ಆಮ್ಚೆಂ ಚಿಂತಿನಾಕಾಗೊ. ಆಮ್ಚೆ ಆತಾಂ ದೀಸ್ ಮಾತ್ರ್ ಉರ್ಲ್ಯಾತ್. ತುಜಿಂ ವರ್ಸಾಂ ಆಸಾತ್. ವಚ್ ವಚ್! ರಾತಿಕ್ ಕಾಂಯ್ ಜೆವ್ಣಾಚೆಂ ಪಳೆ!" ಎಸ್ತೆಲಾನ್ ವಿಶಯ್ ಥಂಯ್ಚ್ ಬದ್ಲುನ್ ಸೆಲ್ಲಿಕ್ ಕುಜ್ನಾಕ್ ದಾಡ್ಲೆಂ.
ಆಪ್ಲ್ಯಾ ಬಾಯ್ಲೆ ಲಾಗಿಂಚ್ ಬಸೊನ್ ದೊಗಾಂಯ್ಚೆಂ ಸಂಭಾಷಣ್ ಆಯ್ಕೊಂವ್ಚೊ ಜೆರೊಮ್ ಸೆಲ್ಲಿಚಿಂ ಉತ್ರಾಂ ಆಯ್ಕೊನ್ ಸಿಂತಿಮೆಂತಾಂನಿ ಬುಡ್ಲೊ. ಆಪ್ಣಾಕ್ಯ್ ದೆವಾನ್ ಆಸಲೆಂಚ್ ಚೆಡುಂ ಧುವ್ ಜಾವ್ನ್ ಫಾವೊ ಕೆಲ್ಲೆಂ ಜಾಲ್ಯಾರ್.....?
ಥೊಡ್ಯಾ ವೆಳಾಕ್ ತಾಚಿಂ ಚಿಂತ್ನಾ ತಾಚ್ಯಾಚ್ ಧುವಾಂಕ್ ನಿಯಾಳುಂಕ್ ಲಾಗ್ಲಿಂ.
ಬಾಪಾಯ್ಕ್ ಆಪ್ಲ್ಯಾ ಧುವಾಂಚೆರ್ ಮೋಗ್ ಚಡ್ ಮ್ಹಣ್ತಾತ್. ಆಪ್ಣಾ ಸವೆಂಯ್ ಆಶೆಂಚ್ ಘಡ್ಲಾಂ....? ಜೆರೊಮಾನ್ ಆಪ್ಣಾಕ್ಚ್ ಸವಾಲ್ ಕೆಲೆಂ.
ಜಾಂವ್ಕ್ಯ್ ಪುರೊ. ಜಶೆಂ ಎಕಾ ಆವಯ್ಕ್ ಆಪ್ಲ್ಯಾ ಪುತಾಚೆಂ ಕಾಜಾರ್ ಕರ್ತಾಚ್ ತಿಕಾ ಪುತಾಚೆರ್ ದುಬಾವ್ ಆನಿ ಧುವೆಚೆರ್ ಭರ್ವಸೊ ಆಪಾಪಿಂಚ್ ಉದೆತಾ ತಶೆಂ ಆಪ್ಣಾಕ್ಯ್ ಆಪ್ಲಿಂ ಚೆಡ್ವಾಂ ಲ್ಹಾನ್ ಆಸ್ತಾನಾ ತಾಂಚೆರ್ ಚಡ್ ಮೋಗ್ ಆಸ್ಲ್ಲೊ. ಪುಣ್ ತಿಂ ವ್ಹಡ್ ಜಾಲ್ಯಾ ಉಪ್ರಾಂತ್ ತಾಂಕಾ ಆಪ್ಲ್ಯಾ ಬಾಪಯ್ಚೆರ್....?
ಜೆರೊಮ್ ಚಿಂತಾಲೊ.
ಕೆನಾಡಾ ಥಾವ್ನ್ ಆಯಿಲ್ಲೆಂ ಜ್ಯೂಲಿ ಆಪ್ಲಿ ತಿ ಕೆನಾಡಾಚಿ ಮರ್ಜಿ ದಾಖವ್ನ್ ಘೆಲ್ಲೆಂ. ಆಪ್ಲ್ಯಾ ಭುರ್ಗ್ಯಾಂಕ್ ತೆಂ ಖಾವ್ನ್ ಸವಯ್ ನಾ. ತಾಂಕಾ ತೆಂ ಜಾಯ್ನಾ. ತಾಂಕಾಂ ಹೆಂ ಜಾಯ್. ಕೆನಾಡಾಂತ್ ತಶೆಂ ಆಸಾ. ಕೆನಾಡಾಂತ್ ಆಶೆಂ ಜಾತಾ. ಉಟ್ಲ್ಲ್ಯಾ ಬಸ್ಲ್ಲ್ಯಾಕ್ ಕೆನಡಾ..... ಕೆನಡಾ... ಕೆನಡಾ...! ಕೆನಡಾಕ್ ಪಾಂಯ್ ಕಿತೆಂ ದವರ್ಲೆ.... ಆಪ್ಣೆಂ ಜಿವಿತ್ ಫುಲಯಿಲ್ಲ್ಯಾ ಹ್ಯಾ ಮಾತಿಯೆಕ್ಚ್ ವಿಸ್ರಾಲೆಂ.
ಆದ್ಲ್ಯಾ ಕ್ರಿಸ್ಮಸಾಕ್ ಗಾಂವಾಕ್ ಆಯಿಲ್ಲ್ಯಾ ಫ್ಲೇವಿಚೆಂ ಆಡಂಬರ್ ಪಳವ್ನ್, ಜೆರೊಮ್ ಕಾಂಟಾಳೊನ್ಚ್ ಗೆಲ್ಲೊ. ಪಯ್ಲೆಂಚ್ ತೆಂ ಜಲ್ಮಾ ಥಾವ್ನ್ ಮೊಟೆಂ. ಆತಾಂ ಕೆನಾಡಾ ಗೆಲ್ಯಾ ಉಪ್ರಾಂತ್ ಆನಿಕ್ಯ್ ಪುಗ್ಲ್ಲೆಂ. ತಾಚ್ಯಾ ವಯ್ರ್ ತಾಚೆಂ ತೆಂ ಫ್ಯಾಶನ್. ಆಯ್ತಾರಾ ಮಿಸಾಕ್ ಭಾಯ್ರ್ ಸರ್ತಾನಾ ಆವಯ್ನ್ ದೋನ್ ಸಬ್ದ್ ಸಾಂಗ್ಲೆಲ್ಯಾಕ್ ಆವಯ್ಕ್ಚ್ ಧುವೆನ್ ಥಂಡ್ ಕೆಲ್ಲೆಂ. ಆಮಿಂ ಆಮ್ಚೆಂ ಆದ್ಲೆಂ ಚಿಂತಾಪ್ ಬದ್ಲುಂಕ್ ಜಾಯ್ ಖಂಯ್. ಸಂಸಾರ್ ಮಂಗ್ಳುರಾಂತ್ ಆಸ್ಲ್ಲ್ಯಾ ಪರಿಂ ನಾ ಖಂಯ್. ಥುತ್.... ಹಾಂಚಾ ಹಣೆಬರಾಪಾಕ್...! ಹ್ಯಾ ಮಂಗ್ಳುರಾಚಾ ಮಾತಿಯೆಚಾ ಉದ್ಕಾಕ್ ಪಿಯೆವ್ನ್ಚ್ ತಾಚಾ ಜಿಬೆಕ್ ಉಲಂವ್ಚಿ ಸಕತ್ ಆಯ್ಲ್ಯಾ ಮ್ಹಣೊನ್ ತೆಂ ವಿಸ್ರೊನ್ಚ್ ಘೆಲ್ಲೆಂ.
ಆಪ್ಣೆ ಜಲ್ಮ್ ದಿಲ್ಲ್ಯಾ ತ್ಯಾ ಧುವಾಂ ಪ್ರಾಸ್...... ಹೆಂ ಸೆಲ್ಲಿ ಕಿತ್ಲ್ಯಾಕ್ಯ್ ಚಡ್ ಸಮ್ಜಣೆಚೆಂ!
ಜೆರೊಮಾಕ್ ಸೆಲ್ಲಿಚಿಂ ಉತ್ರಾಂ ಆಯ್ಕೊನ್ ತಾಚೆರ್ ಅಭಿಮಾನ್ ಭೊಗ್ಲೊ.
"ದುಬ್ಳ್ಯಾ ಮನ್ಶಾಲಾಗಿಂ ಆಸ್ಚಿ ಖರಿ ಗ್ರೇಸ್ತ್ಕಾಯ್ ಆಸಾ ಪಳೆ ಎಸ್ತೆಲಾ ತಿ ಭೋವ್ಶ್ಯಾ ರಾವ್ಳೆರಾಚಾ ದಾರ್ವಾಟ್ಯಾರ್ಯ್ ಆಸ್ಚಿ ನಾ. ಹಿ ಗ್ರೇಸ್ತ್ಕಾಯ್ ಪಳಂವ್ಚಿ ನದರ್ ಮಾತ್ರ್ ಮನ್ಶ್ಯಾಕ್ ಆಸೊಂಕ್ ಜಾಯ್. ಆಮ್ಚೆ ಲಾಗಿಂ ಆಜ್ ಸಗ್ಳೆಂ ಆಸೊನ್ಯ್ ಕಾಂಯ್ ನಾ! ಹ್ಯಾ ಸೆಲ್ಲಿಕ್, ತಾಚೆಲಾಗಿಂ ಕಾಂಯ್ಚ್ ನಾ ಆಸೊನ್ಯ್ ಸಗ್ಳೆಂ ಆಸಾ! ಕಿತ್ಲೆಂ ವಿಚಿತ್ರ್! ಹಾಕಾಚ್ ಸಂಸಾರ್ ಮ್ಹಣ್ತಾತ್? ಹೆಂಚ್, ಹಾವೆಂ ತುಕಾ, ಆನಿ ತುವೆಂ ಮ್ಹಾಕಾ ಭಾಸಾಯಿಲ್ಲೆಂ ಆಮ್ಚಾ ಎಕ್ವಟಾಚಾ ದಿಸಾ........? ಆಮ್ಚೊ ಜಿಣ್ಯೆ ಶೆವೊಟ್ ಹೊಚ್ಚ್ ಜಾವ್ನಾಸ್ಲ್ಲೊ?" ಸೆಲ್ಲಿ ಕುಜ್ನಾಕ್ ಗೆಲ್ಯಾ ಉಪ್ರಾಂತ್ ಆಪ್ಲ್ಯಾ ಚಿಂತ್ನಾಂ ಥಾವ್ನ್ ಭಾಯ್ರ್ ಆಯಿಲ್ಲೊ ಜೆರೊಮ್ ತಿರಸ್ಕಾರ್ ಭರ್ಲೆಲ್ಯಾ ತಾಳ್ಯಾನ್ ಉಲಯ್ಲೊ.
ನಿಜಾಯ್ಕ್ಯ್ ಜೆರೊಮಾನ್ ಸಾಂಗ್ಲ್ಲ್ಯಾ ಪರಿಂ ಆಜ್ ತಾಚೆಲಾಗಿಂ ಸಗ್ಳೆಂ ಆಸೊನ್ಯ್ ಕಾಂಯ್ಚ್ ನಾತ್ಲ್ಲ್ಯಾ ಪರಿಂ ಜಾಲ್ಲೆಂ. ತಾಚ್ಯಾ ಮುಖ್ಲ್ಯಾನ್ ಕೊಣ್ಯ್ ನಾತ್ಲ್ಲೆಂ ತೆಂ ವ್ಹಯ್, ಪುಣ್ ತಾಚ್ಯಾ ಪಾಟ್ಲ್ಯಾನ್ಯ್ ಆಜ್ ಕೊಣ್ಯ್ ನಾಂತ್ ತಶೆಂ ತಾಕಾ ದಿಸ್ತಾಲೆಂ. ಭುರ್ಗ್ಯಾಂಚಿ ಆಶಾ ಕರ್ಚಿ ತಾಣೆಂ ಸೊಡುನ್ ದಿಲ್ಲೆಂ. ಜ್ಯೂಲಿನ್ ಆನಿ ಫ್ಲೇವಿನ್ ಆಪ್ಲ್ಯಾ ಜಲ್ಮಾಲ್ಲ್ಯಾ ದೇಶಾಕ್ಚ್ ಪರ್ಗಾಂವ್ ಕೆಲ್ಲೊ ಜಾಲ್ಯಾರ್ ಫ್ರಾನ್ಸಿಸ್ ಗಾಂವಾ ಭಾಯ್ಲ್ಯಾಂ ಸಂಗಿಂ ಎಕ್ವಟೊನ್ ರಾವ್ಲ್ಲೊ ಆಸ್ತಾಂ ಚಾರ್ಲ್ಸ್ ಏಕ್ ಮೇಟ್ ಮುಕಾರ್ ವಚೊನ್ ದೇಶಾಚಾ ಭಾಯ್ಲ್ಯಾಂ ಲಾಗಿಂಚ್ ಎಕ್ವಟ್ಲ್ಲೊ. ಅಸಲ್ಯಾ ಭುರ್ಗ್ಯಾಂ ಥಾವ್ನ್ ಫುಡಾರಾಕ್ ತೊ ಕಿತೆಂ ಆಶೆಂವ್ಕ್ ಸಕ್ತಾಲೊ? ಭೋವ್ಶ್ಯಾ ಮಾತಾರ್ಯಾಂಚಾ ಆಸ್ರ್ಯಾಚಿ ಏಕ್ ಖಾಟ್!
"ಮನಿಸ್ ಶಿಜಯಿಲ್ಲೆಂ ಖಾತಾ ಆನಿ ವ್ಹಾಟ್ಲ್ಲೆಂ ಪಿಯೆತಾ!" ಎಸ್ತೆಲ್ ಸವ್ಕಾಸ್ ಪೆಂಕ್ಡಾಕ್ ಹಾತ್ ದೀವ್ನ್ ಉಟೊನ್ ಉಭಿ ರಾವ್ಲಿ. "..... ತುವೆಂ ಹೆಂಚ್ ಶಿಜಯಿಲ್ಲೆಂ ಜಾಲ್ಯಾರ್ ಆನಿ ಹಾವೆಂ ಹೆಂಚ್ ವ್ಹಾಟ್ಲ್ಲೆಂ ಜಾಲ್ಯಾರ್...... ಹೆಂಚ್ ಆತಾಂ ಆಮಿಂ ಖಾಂವ್ಕ್ ಜಾಯ್ ಆನಿ ಪಿಯೆಂವ್ಕ್ ಜಾಯ್ ಶಿವಾಯ್ ಬೊಲ್ತ್ಯಾನ್ ಶಿಜಯಿಲ್ಲೆಂ ಆನಿ ವ್ಹಾಟ್ಲ್ಲೆಂ ನ್ಹಯ್!" ಸಾಂಗ್ಲ್ಲಿ ತಿ, "ತುಂ ತಿಕ್ಕೆ ಆತಾಂ ಭಾಯ್ರ್ ಆಶೆಂಚ್ ಭೊಂವೊನ್ ಯೇ...... ಹಾತ್ ಪಾಂಯ್ ತಿಕ್ಕೆ ಸದಿಳ್ ಜಾಂವ್ದಿತ್. ಹಾಂವ್, ಹೆಂ ಸೆಲ್ಲಿ ಕುಜ್ನಾಂತ್ ಕಿತೆಂ ಕರ್ತಾ ತೆಂ ಪಳೆತಾಂ!" ಘೊವಾಕ್ ಸಾಂಗೊನ್ ತಿ ಕುಜ್ನಾ ತೆವ್ಶಿಂ ಭಿತರ್ ಚಮ್ಕಾಲಿ.
ಜೆರೊಮ್ ಆತಾಂ ಏಕ್ ಭರಾಧೀಕ್ ಶ್ವಾಸ್ ಸೊಡುನ್ ಉಟೊನ್ ಉಭೊ ಜಾಲೊ. ಉತರ್ ಪ್ರಾಯೆಕ್ ವೆಂಗ್ಲ್ಲ್ಯಾ ತಾಕಾ ಸಾಕ್ರಿಚಾ ಪಿಡೆನ್ಯ್ ವೆಂಗ್ಲ್ಲೆಂ. ತ್ಯಾ ವಯ್ರ್ ರಗ್ತಾಚೊ ಒತ್ತಡ್ಯ್ ಚಡ್ ಜಾಂವ್ಚೊ ಆಸ್ತಾಲೊ ಜಾಲ್ಲ್ಯಾನ್ ದಾಕ್ತೆರಾನ್ ಸಾಂಗ್ಲ್ಲ್ಯಾ ಪರಿಂ ಒಕ್ತಾಂ ಆನಿ ತ್ಯಾ ಒಕ್ತಾಂ ಸವೆಂ ಕುಡಿಚಾ ಎಕ್ಸರ್ಸೈಜಾಚಾ ವಿಶಿಂಯ್ ಚಡ್ ಗುಮಾನ್ ದೀಂವ್ಕ್ ಪಡ್ತಾಲೆಂ. ತಾಣೆಂ ಆತಾಂ ಫಕತ್ತ್ ತಾಚಾ ಭಲಾಯ್ಕೆಚಾ ವಿಶಿಂ ಚಿಂತುಂಕ್ ಜಾಯ್ ಆಸ್ಲ್ಲೆಂ. ಭುರ್ಗ್ಯಾಂ ವಿಶಿಂ ಆನಿ ಫುಡಾರಾ ವಿಶಿಂ ಚಿಂತುನ್ ಕಾಂಯ್ ಜಾಂವ್ಚೆಂ ನಾ ಮ್ಹಳ್ಳ್ಯಾ ದ್ರಡ್ ಪಾತ್ಯೆಣೆಕ್ ಪಾವ್ಲ್ಲೊ ಜೆರೊಮ್, ಆತಾಂ ಫಕತ್ತ್ ಆಪ್ಲ್ಯಾ ಆನಿ ಎಸ್ತೆಲಾಚಾ ಭಲಾಯ್ಕೆ ವಿಶಿಂ ಮಾತ್ರ್ ಚಿಂತಾಲೊ. ಪುಣ್ ಕಿತ್ಲೆಂ ಮ್ಹಳ್ಯಾರ್ಯ್ ಎಕೇಕ್ ಪಾವ್ಟಿಂ ತಾಚಿಂ ಚಿಂತ್ನಾ ತಾಚ್ಯಾ ಭಂದಡೆ ಥಾವ್ನ್ ಸುಟ್ಕಾ ಜೊಡುನ್, ಸಗ್ಳ್ಯಾ ತಾಚ್ಯಾ ಜಿವಿತಾಚಾ ವಿಶಿಂ ತಾಕಾ ಆಟವ್ ಕರಯ್ತಾಲಿಂ. ಕಿತ್ಲೆಂ ಮ್ಹಳ್ಯಾರ್ಯ್ ಚಿಂತ್ನಾಂ ತಿಂ. ಮನ್ಶ್ಯಾಕ್ ಕೆದ್ನಾಂಚ್ ಖಾಲ್ ಜಾಂವ್ಚಿ ಜಾತ್ ತಾಂಚಿ ನ್ಹಯ್!
ಬಾಯ್ಲೆನ್ ದಿಲ್ಲ್ಯಾ ಆದೇಶಾಕ್ ಪಾಳುಂಕ್ ಸವ್ಕಾಸ್ ಮೇಟ್ ದೆಂವ್ಲ್ಲೊ ಜೆರೊಮ್ ಮುಖಾರ್ ಚಲೊಂಕ್ ಲಾಗ್ಲೊ. ತಾಚ್ಯಾ ಸದಾಂಚಾ ಸಾಂಜೆಚಾ ವಾಕಿಂಗಾಕ್!
***************
ಮಿಶೇಲ್!
ಸಾಕಾಳಿಂಚಾ ಉದೆವ್ನ್ ಯೆಂವ್ಚಾ ಸುರ್ಯಾಚಿಂ ತಿಂ ಮೊವಾಳ್ ಕಿರ್ಣಾಂ, ಮಿಶೇಲ್ ನಿದ್ಲೆಲ್ಯಾ ಕುಡಾಚಾ ಜನೆಲಾ ಆರ್ಶ್ಯಾಂತ್ಲ್ಯಾನ್ ಭಿತರ್ ಯೇಂವ್ಕ್ ಸಕಾನಾಸ್ತಾನಾ, ತ್ಯಾ ಆರ್ಶ್ಯಾ ಆನಿ ಪರ್ದ್ಯಾ ಮಧೆಂ ಚೋರ್ ಪೊಲಿಸಾಂಚೊ ಖೆಳ್ ತಿಂ ಖೆಳೊಂಕ್ ಲಾಗ್ಲಿಂ ಆಸ್ತಾಂ, ಮಿಶೇಲ್ ಮಾತ್ರ್ ಖಾಟಿಯೆರ್ ಹೆವ್ಶಿಂ ತೆವ್ಶಿಂ ಲೊಳೊಂಕ್ ಲಾಗ್ಲೆಂ.
ಸಾಕಾಳಿಂಚಾ ಹಿಂವಾಕ್ ಆವಯ್ಚಿ ಊಭ್ ಚುಕೊನ್ ಗೆಲ್ಲ್ಯಾ ಪರಿಂ ಜಾವ್ನ್, ತೆಂ ಆಪ್ಲೆ ಹಾತ್ ಪಾಂಯ್ ಹೆವ್ಶಿಂ ತೆವ್ಶಿಂ ಲೊಳಯ್ತಾನಾ, ವಿವಿಯಾನಾನ್ ಆಪ್ಲ್ಯಾ ಧುವೆಚಾ ಆಂಗಾರ್ ವೊಡ್ಲೆಲಿ ತಿ ಮೋವ್ ಕಾಂಬೊಳ್, ಮಿಶೇಲಾಚಾ ದಡ್ಬಡ್ಣೆಕ್ ಲಾಗೊನ್ ಮಿಶೇಲಾಚಾ ಆಂಗಾ ವಯ್ಲಿ ನಿಸ್ರೊನ್, ತೆಂ ಆಪ್ಲ್ಯಾ ಕುಡಿಚ್ಯಾ ದಾವ್ಯಾ ಕುಶಿಂನ್ ಉಗ್ತೆಂ ಜಾಲೆಂ. ಉಗ್ತೆಂ ಜಾಲ್ಲ್ಯಾ ಆಂಗಾಕ್, ಥಂಡಾಯ್, ಮೊಗಾನ್ ಆಪ್ಲ್ಯಾ ಹಾತಾನಿಂ ಪೊಶೆವ್ನ್ ವೆತಾನಾ, ತ್ಯಾ ನೆಣ್ತ್ಯಾ ಕಾತಿ ಭಿತರ್ ರಿಗ್ಲ್ಲಿ ಥಂಡಾಯ್ ಮಿಶೇಲಾಚಾ ಶಿರಾಂ ಶಿರಾಂನಿಂ ರಿಗೊನ್ ತಾಚ್ಯಾ ರಾಗ್ತಾಕ್ ಆಂಬೊಟ್ ಕರುಂಕ್ ಲಾಗ್ಲಿ.
ತಿತ್ಲೆಂಚ್!
"ಊಂ....ಂ......"
ಪಿಂರ್ಗಾಲ್ಲ್ಯಾ ಮಿಶೇಲಾನ್ ’ಸಟ್ಟ್’ ಕರುನ್ ಆಪ್ಲೆ ದೊಳೆ ಸೊಡ್ಲೆ. ಉಗ್ತೆ ಜಾಲ್ಲ್ಯಾ ತಾಚ್ಯಾ ದೊಳ್ಯಾಂಕ್ ಆಪ್ಲ್ಯಾ ದಾವ್ಯಾ ಕುಶಿಂನ್ ಆಸ್ಲ್ಲಿ, ಆಪ್ಲ್ಯಾ ಆವಯ್ನ್ ಪಾಂಗುರ್ಚಿ ವೋಲ್ ದಿಷ್ಟಿಕ್ ಪಡ್ಲಿ. ತ್ಯಾ ವೋಲಿಕ್ಚ್ ತೆಂ ಪಳಂವ್ಚಾರ್ ಪಡ್ಲೆಂ.
ತಿತ್ಲ್ಯಾರ್!
"ಹ್ಯಾಪ್ಪಿ ಬರ್ತ್ಡೇ ಡಾರ್ಲಿಂಗ್....!"
ಆವಯ್ಚಾ ವೊಲಿ ವಯ್ರ್ ವಿಣ್ಲ್ಲ್ಯಾ ರಂಗ್ ರಂಗೀನ್ ಬಣಾಂಕ್ ಪಳೆವ್ನ್ ತ್ಯಾ ರಂಗಾಂಕ್ ಪಿಸ್ವಾಲ್ಲೆಂ ಮಿಶೇಲ್, ಆಪ್ಲ್ಯಾ ಮತಿಂತ್ಚ್ ತ್ಯಾ ಬಣಾಂ ಸಾಂಗಾತಾ ಖೆಳೊಂಕ್ ಲಾಗ್ತಾನಾ, ಆಚಾನಕ್ ಆಯ್ಕೊನ್ ಆಯಿಲ್ಲ್ಯಾ ತಾಳ್ಯಾಕ್ ಪಾರ್ಕಿಲ್ಲ್ಯಾ ಮಿಶೇಲಾನ್ ತಾಳೊ ಆಯ್ಕಾಲ್ಲ್ಯಾ ಕುಶಿಂನ್ ಪಳೆಲೆಂ. ಹೆವ್ಶಿಂ ಪಳೆಲ್ಲ್ಯಾ ಮಿಶೇಲಾಚಾ ದೊಳ್ಯಾಂಕ್ ದಿಸ್ಲ್ಲಿ ಆಕ್ರತಿ ಆನಿ ಹೆವ್ಶಿಂ ಪಳಂವ್ಚಾ ಪಯ್ಲೆಂ ಫಕತ್ತ್ ತಾಳೊ ಆಯ್ಕಾತಾನಾ ತಾಚಾ ಮತಿಚಾ ಪಡ್ದ್ಯಾರ್ ಉದೆಲ್ಲಿ ಆಕ್ರತಿ ದೊನ್ಯ್ ಎಕ್ಚ್ ಜಾವ್ನ್, ತಿ ಆಕ್ರತಿ ಆಪ್ಲ್ಯಾ ಆವಯ್ಚ್ಯಾ ರುಪಾನ್ ಆತಾಂ ತಾಚ್ಯಾ ದೊಳ್ಯಾಂ ಮುಕಾರ್ ರೂಪ್ ರೂಪ್ ದಿಸೊಂಕ್ ಲಾಗ್ತಾನಾ, ಮಿಶೇಲಾನ್ ಆಪ್ಲ್ಯಾ ವೊಂಟಾನಿಂ ಪೊಸೊ ಪೊಸೊ ಹಾಸೊ ಹಾಡ್ಲ್ಯೊ.
ವಿವಿಯಾನಾ....!
ಮಿಶೇಲಾಚಾ ದೊಳ್ಯಾಂ ಸಾಮ್ಕಾರ್ ಮುಕ್ಲ್ಯಾ ಬೆಡ್ರೂಮಾಕ್ ಯೆಂವ್ಚಾ ದಾರ್ವಾಟ್ಯಾರ್ ವಿವಿಯಾನಾ, ತಾಚೆಂ ಆವಯ್ ಉಭೆಂ ಆಸ್ಲ್ಲೆಂ. ನಿದೆಂತ್ಲೆಂ ಉಟ್ಚಾ ಆಪ್ಲ್ಯಾ ಧುವೆಕ್ಚ್ ರಾಕೊನ್ ರಾವ್ಲ್ಲೆಂ ತೆಂ ಸಂತೊಸಾನ್ ಭರ್ಲೆಂ.
"ಹ್ಯಾಪ್ಪಿ ಬರ್ತ್ಡೇ ಸ್ವೀಟ್ ಹಾರ್ಟ್!"
ಮಿಶೇಲಾಚಾ ಲಾಗಿಂ ಆಯಿಲ್ಲ್ಯಾ ವಿವಿಯಾನಾನ್, ಆಪ್ಲ್ಯಾ ಧುವೆಕ್ ಖಾಟಿಯೆ ವಯ್ಲೆಂ ಉಕ್ಲುನ್, ತಾಚಾ ಪೊಲ್ಯಾಕ್ ಉಮೊ ದಿಲೊ.
ವ್ಹಯ್! ಮಿಶೇಲಾಚೊ ಆಜ್ ಜಲ್ಮಾ ದೀಸ್....! ಮಿಶೇಲಾಕ್ ಆಜ್ ತೀನ್ ವರ್ಸಾಂ ಭರ್ಲ್ಲಿಂ. ಮಿಶೇಲ್, ಚಾರ್ಲ್ಸ್ ಆನಿ ವಿವಿಯಾನಾಚಾ ಜಿವಿತಾಂತ್ ಯೆವ್ನ್ ಆಜಿಕ್ ತೀನ್ ವರ್ಸಾಂ ಸಂಪ್ಲಿಂ. ಹ್ಯಾ ತೀನ್ ವರ್ಸಾಂಚಾ ಆವ್ದೆಂತ್ ಮಸ್ತ್ ಬದ್ಲಾವಣ್ ಜಾಲ್ಯಾ.
ಜಶೆಂ ಮ್ಯಾಂಚೆಸ್ಟರ್ ದಿಸಾಂದೀಸ್ ಬದ್ಲಾವಣೆಕ್ ವಳಗ್ ಜಾವ್ನ್ ವ್ಹಾಡ್ತಾಲೆಂ ತಶೆಂ ಮಿಶೇಲ್ಯ್ ದಿಸಾಂದೀಸ್ ವ್ಹಾಡೊನ್ ಯೆತಾಲೆಂ. ಆವಯ್ಚಾ ಫಾಸ್ಳೆ ಥಾವ್ನ್ ದೆಂವ್ಲ್ಲೆಂ ಮಿಶೇಲ್ ನೋವ್ ಮಹಿನ್ಯಾಂನಿಚ್ ಉಭೆಂ ಜಾಲ್ಲೆಂ. ಜಲ್ಮಾಗೂಣಾಕ್ ವಳಗ್ ಜಾವ್ನ್ ಚೆಡ್ವಾ ಭುರ್ಗ್ಯಾಂಚಿಂ ಸಗ್ಳಿಂ ಕಾರ್ಯಿಂ ಚೆಡ್ಯಾ ಭುರ್ಗ್ಯಾ ಪ್ರಾಸ್ ವೆಗ್ಗಿಂ ದಿಸೊನ್ ಯೆತಾತ್ ಜಾಲ್ಯಾರ್ಯ್ ಮಿಶೇಲ್ ಮಾತ್ರ್ ತಾಚ್ಯಾ ಕಾರ್ಯಾನಿಂ ಚಡ್ಚ್ ಮುಖಾರ್ ಆಸ್ಲ್ಲೆಂ. ತಶೆಂ ಪಳಂವ್ಕ್ ಗೆಲ್ಯಾರ್ ಮಿಶೇಲ್ ದಿಮ್ಕುರೆಂ ಚಲ್ಲ್ಲೆಂಚ್ ನಾ. ತ್ಯಾ ಶಿವಾಯ್ ತಾಚೆಂ ರಡ್ಣೆಂಯ್ ಭೊವ್ ಅಪ್ರೂಪ್.
ಕಸಲಿಯ್ ರಂಗೀನ್ ವಸ್ತ್ ಮ್ಹಳ್ಯಾರ್ ಮಿಶೇಲಾಕ್ ಚಡ್ ಆನಂದ್. ರಂಗಾಳ್ ವಸ್ತುಂ ಸಾಂಗಾತಾ ತೆಂ ಖೆಳ್ತಾಲೆಂ! ಹಾಸ್ತಾಲೆಂ! ತಾಚ್ಯಾ ದೊಳ್ಯಾಂಕ್ ಕಸಲೊಯ್ ರಂಗ್ ಜರ್ ತರ್ ಆವಡ್ಲೊ ಜಾಲ್ಯಾರ್, ತ್ಯಾ ರಂಗಾ ಸವೆಂ ತೆಂ ಮತಿಂತ್ಚ್ ಖೆಳ್ ಖೆಳ್ತಾಲೆಂ ಆನಿ ಆಪ್ಲ್ಯಾ ಖೆಳಾಂತ್ ಆನಂದ್ ಜೊಡುನ್ ಘೆಂವ್ಚಾ ತಾಕಾ ಸಂಸಾರಾಚಿ ವಿಸ್ರೊಣ್ ಪಡ್ತಾಲಿ.
ಸೊಭಿತ್ ಸುಂದರ್ ರಂಗ್!
ಪಿಸೊಳ್ಯಾಂ ರುಪಾರ್ ವಾರ್ಯಾರ್ ದಲ್ಚೆ ಸ್ವತಂತ್ರ್ ರಂಗ್!!
ಸಂಸಾರಾಚಾ ಕೊನ್ಶ್ಯಾ ಕೊನ್ಶ್ಯಾರ್ ಮೊಳಾಬಾ ಉಸ್ಕ್ಯಾ ಥಾವ್ನ್ ದೆಂವೊನ್ ಯೆಂವ್ಚ್ಯೊ ರಂಗಾಳ್ ಪಾಕ್ಳ್ಯೊ!!!
ಜಿವಿತಾಂತ್ಲ್ಯಾ ರಂಗಾಂಕ್ ಪಾರ್ಕುಂಚಾ ತಿತ್ಲಿ ಜಾಣ್ವಾಯ್ ಮಿಶೇಲಾಕ್ ಅಜೂನ್ ನಾತ್ಲ್ಲಿ ಜಾಲ್ಲ್ಯಾನ್, ದೊಳ್ಯಾಂಕ್ ದಿಸ್ಲ್ಲ್ಯಾ ಸೊಭಾಯೆಚಾ ರಂಗಾಂ ಸವೆಂ ತೆಂ ಮೆತೆರ್ ಜಾತಾಲೆಂ.
ಮಿಶೇಲಾಕ್ ದೋನ್ ವರ್ಸಾಂ ಚ್ಯಾರ್ ಮಹಿನೆ ಜಾತಾನಾ ತೆಂ ಎಕೇಕ್ಚ್ ಸಬ್ದ್ ಉಲೊಂಕ್ ಶಿಕ್ಲೆಂ. ತಾಚ್ಯಾ ತೊಂಡಾ ಥಾವ್ನ್ ಸುಡಾಳ್ ರಿತಿನ್ ಸಬ್ದ್ ಭಾಯ್ರ್ ಯೇನಾತ್ಲ್ಲೆ. ಗೊದ್ದ್ಯಾ ಭಾಶೆನ್ ಉಲಂವ್ಚೆಂ ತಾಚೆಂ ಉಲವ್ಣೆಂ, ನೆಣ್ತೆಂ ಉಲವ್ಣೆಂ ಸಗ್ಳ್ಯಾಂಕ್ ಚಡ್ಚ್ ಪಸಂದ್ ಜಾತಾಲೆಂ. ವಿವಿಯಾನಾ ತರ್ಯ್ ಮಿಶೇಲಾಚಾ ದೋನ್ ದೊಳ್ಯಾಂನಿ ದೋನ್ ರೂಪಾಂ ದೆಖ್ತಾಲೆಂ.
ಏಕ್, ಲಾರಾ ಆಪ್ಣಾಚಿ ಆವಯ್! ದುಸ್ರೆಂ, ಆಂಜೆಲೀನಾ ಆಪ್ಣಾಚೆಂ ಭಯ್ಣ್!
ಸಗ್ಳೆಂಚ್ ವಿವಿಯಾನಾಚಾ ಕುಟ್ಮಾಕ್ಚ್ ಆಪ್ಲ್ಯಾ ರುಪಾಂತ್ ಮಿಶೇಲಾನ್ ಪುಸುನ್ ಹಾಡ್ಲ್ಲೆಂ. ಫಕತ್ತ್ ಚಾರ್ಲ್ಸಾಚಾ ಆವಯ್ಚಾ ಎಸ್ತೆಲಾಚಾ ಕಿರಾ ಬೊಂಚಿ ಸಾರ್ಕ್ಯಾ ನಾಕಾಕ್ ಮಾತ್ರ್ ಚಾರ್ಲ್ಸಾಚಾ ಕುಟ್ಮಾ ತರ್ಪೆನ್ ತೆಂ ಘೆವ್ನ್ ಆಯಿಲ್ಲೆಂ. ಪುಣ್ ಮಿಶೇಲಾಚ್ಯಾ ಗೊರ್ಯಾ ರುಪಾಕ್ ಪಳೆತಾನಾ ತಾಚೆಂ ತೆಂ ಕಿರಾ ಬೊಂಚಿ ಸಾರ್ಕ್ಯಾಚೆಂ ನಾಕ್ ತಾಚ್ಯಾ ಆಜಿಯೆ ತರ್ಫೆನ್ ಕಾಂಯ್ಚ್ ಕರುಂಕ್ ಸಕಾನಾತ್ಲ್ಲೆಂ.
"ಆಜ್ ಆಮ್ಚಾ ಡಾರ್ಲಿಂಗಾಚೊ ಬರ್ತ್ಡೇ! ಆಮ್ಕಾಂ ಸೆಲೆಬ್ರೇಟ್ ಕರುಂಕ್ ಆಸಾ! ಮ್ಹಜೆಂ ಪ್ರಿನ್ಸೆಸ್ ಆಜ್ ಕೇಕ್ ಕಟ್ ಕರ್ತಾ! ಆನಿಂ.... ಆನಿ...... ವಾತಿ ಫುಂಕೊಂಕ್ ಆಸಾ! ಖಂಯ್ ಆಸಾ? ..... ಡಾಡಾ ಖಂಯ್ ಆಸಾ? ಚಾರ್ಲ್ಸ್....?" ಘೊವಾಕ್ ಸೊಧುನ್ ವಿವಿಯಾನಾ ಆಪ್ಲ್ಯಾ ಬೆಡ್ರೂಮಾ ಥಾವ್ನ್ ಭಾಯ್ರ್ ಆಯ್ಲೆಂ.
ಭಾಯ್ಲ್ಯಾ ಹಾಲಾಂತ್ ಬಸೊನ್ ದಿಸಾಳೆಂ ವಾಚುನ್ ಆಸ್ಲ್ಲೊ ಚಾರ್ಲ್ಸ್, ವಿವಿಯಾನಾನ್ ಆಪ್ಣಾಕ್ ಆಪಯಿಲ್ಲೆಂ ಆಯ್ಕೊನ್ ಆನಿ ಮಿಶೇಲ್ ನಿದೆಂತ್ಲೆಂ ಜಾಗೆಂ ಜಾಲಾಂ ತೆಂ ಕಳೊನ್, ಆಪ್ಲ್ಯಾ ಹಾತಾಂತ್ಲ್ಯಾ ದಿಸಾಳ್ಯಾಕ್ ತಶೆಂಚ್ ಸಕಯ್ಲ್ ದವರುನ್,
"ಮಿಶೇಲ್....! ಸ್ವೀಟ್ ಹಾರ್ಟ್.....! " ವಿವಿಯಾನಾಚಾ ಬಾವ್ಳ್ಯಾಂ ಮಧ್ಲ್ಯಾ ಮಿಶೇಲಾಕ್ ಥಂಯ್ಚ್ ಏಕ್ ಉಮೊ ದೀವ್ನ್,
"ಹ್ಯಾಪ್ಪಿ ಬರ್ತ್ಡೇ ಡಾರ್ಲಿಂಗ್!" ಧುವೆಕ್ ಬಾಯ್ಲೆಚಾ ಹಾತಾಂತ್ಲೆಂ ಘೆವ್ನ್ ತಾಚ್ಯಾ ಪೊಲ್ಯಾಕ್ ಅನ್ಯೇಕ್ ಉಮೊ ದೀವ್ನ್ ತಶೆಂಚ್ ರಾವ್ಲ್ಲ್ಯಾ ಕಡೆನ್ಚ್ ಚಾರ್ಲ್ಸಾನ್ ಏಕ್ ಭೊಂವಾಡೊ ಕಾಡ್ಲೊ.
ಆವಯ್ ಬಾಪಯ್ಚಾ ತೊಂಡಾ ವಯ್ಲಿ ಖುಶಿ ಆನಿ ತಾಂಚ್ಯೊ ಹಾಸೊ ಕಿತ್ಯಾಕ್ಗೀ ಮಿಶೇಲಾಕ್ ಆಜ್ ಮಸ್ತ್ ಸೊಭಿತ್ ದಿಸ್ಲ್ಯೊ. ತಾಂಚೆ ಸಾಂಗಾತಾ ತೆಂಯ್ ಹಾಸಾಲಾಗ್ಲೆಂ. ತೆಂ ಕಿತ್ಯಾಕ್ ಹಾಸ್ತಾಲೆಂ ತೆಂ ತೆಂಚ್ ನೆಣಾಂ! ಆಪ್ಲಿಂ ಆವಯ್ ಬಾಪಯ್ ಹಾಸ್ತಾಲಿಂ ದೆಕುನ್ ಖುಶಿಯೆನ್ ತೆಂಯ್ ಹಾಸ್ತಾಲೆಂ.
ತಿತ್ಲೆಂಚ್!
ಪಯ್ಶಿಲ್ಯಾ ಟೀಪಾಯಿ ವಯ್ಲೆಂ ಪೋನ್ ಆವಾಜುಂಕ್ ಲಾಗ್ತಾನಾ, ಟೆಲಿಪೋನಾ ತೆಂವ್ಶಿಂ ಪಳೆಲ್ಲ್ಯಾ ಚಾರ್ಲ್ಸಾನ್ ಮಿಶೇಲಾಕ್ ಸಕಯ್ಲ್ ದೆಂವಯ್ಲೆಂ.
"ಹಾಂವ್ ಪಳೆತಾಂ ಚಾರ್ಲ್ಸ್!" ಮ್ಹಳ್ಳೆಂ ವಿವಿಯಾನಾ ಪೋನಾ ತೆವ್ಶಿಂ ಚಮ್ಕಾಲ್ಲೆಂಚ್,
"ಹಲೋ....!"
"........."
"ಓಹ್....!, ಹಾಯ್ ಕ್ರಿಸ್ಟಿನಾ!"
"........."
"ವೇಯ್ಟ್ ವೇಯ್ಟ್! ಐ ವಿಲ್ ಆಸ್ಕ್ ಚಾರ್ಲ್ಸ್....!" ಮ್ಹಣೊನ್ ವಿವಿಯಾನಾ ಚಾರ್ಲ್ಸಾಚಾ ತೆವ್ಶಿಂ ಘುಂವ್ತಾನಾ, ಆಪ್ಣೆಂ ದರ್ಲೆಲೆಂ ಪೊನಾಚೆಂ ರಿಸೀವರ್ ಉಜ್ವ್ಯಾ ಕುಶಿಚ್ಯಾ ಕಾನಾಂ ಥಾವ್ನ್ ದಾವ್ಯಾ ಕುಶಿಚ್ಯಾ ಕಾನಾಕ್ ಬದ್ಲುನ್, "ಚಾರ್ಲ್ಸ್.....? ಮಿಶೇಲಾಚೊ ಬರ್ತ್ಡೇ ಸೆಲೆಬ್ರೇಟ್ ಕರುಂಕ್ ಆಂಟಿ ಕ್ಯಾಥಿನ್ ತುಕಾ ಸಾಂಗ್ಲ್ಲೆಂ.... ಕ್ರಿಸ್ಟಿನಾ ವಿಚಾರ್ತಾ.....!" ಟೆಲಿಪೊನಾರ್ ಕ್ರಿಸ್ಟಿನಾನ್ ಆಪ್ಣಾಕ್ ವಿಚಾರ್ಲ್ಲೊ ವಿಶಯ್ ವಿವಿಯಾನಾನ್ ಚಾರ್ಲ್ಸಾಚಾ ಮುಕಾರ್ ದವರ್ಲೊ.
"ಕೆದಾಳಾ? ಸಾಂಜೆರ್...?! ಹಾಂವ್ ಕ್ಯಾಥಿ ಆಂಟಿಕ್ ಮಾಗಿರ್ ಪೋನ್ ಕರ್ತಾಂ. ವ್ಹಡ್ಲೆಂ ಕಾಂಯ್ ನಾಕಾ. ಜಸ್ಟ್ ಮಿಶೇಲಾಕ್ ಖುಶಿ ಕರುಂಕ್ ಮಾತ್ರ್!" ಮಿಶೇಲಾಚಾ ಕೆಸಾಂ ವಯ್ರ್ ಚಾರ್ಲ್ಸಾನ್ ಮೊಗಾನ್ ಆಪ್ಲೆ ಹಾತ್ ಚರಯ್ಲೆ.
ದೋನ್ ಹಪ್ತ್ಯಾಂ ಪಯ್ಲೆಂಚ್ ಕ್ಯಾಥರೀನಾನ್ ಮಿಶೇಲಾಚೊ ಬರ್ತ್ಡೇ ಆಪ್ಣಾಚಾ ಘರಾ ಸೆಲೆಬ್ರೇಟ್ ಕರುಂಕ್ ಜಾಯ್ ಮ್ಹಣೊನ್ ಚಾರ್ಲ್ಸ್ ಆನಿ ವಿವಿಯಾನಾ ಥಾವ್ನ್ ಉತಾರ್ ಘೆತ್ಲ್ಲೆಂ. ಮಿಶೇಲಾಕ್ ಪಿಂಕ್ ರಂಗಾಚೆಂ ಸೊಭಿತ್ ಆಂಗ್ಲೆಂ ಆನಿ ತ್ಯಾಚ್ ಆಂಗ್ಲ್ಯಾಚಾ ರಂಗಾಚೆಂ ಮಾತ್ಯಾಕ್ ಚೆಪೆಂ ತಿಣೆಂ ಹಾಡ್ಲ್ಲೆಂ.
ಕ್ಯಾಥರೀನಾನ್ ಪಯ್ಲೆಂಚ್ ಸಾಂಗ್ಲ್ಲ್ಯಾ ಪರಿಂ, ಆನಿ ಚಾರ್ಲ್ಸ್ ವಿವಿಯಾನಾ ದೊಗಾಂಯ್ ಒಪ್ವಾಲ್ಲ್ಯಾ ಪರಿಂ, ಮಿಶೇಲಾಚಾ ಜಲ್ಮಾ ದಿಸಾಚೆಂ ಆಚರಣ್ ಕ್ಯಾಥರೀನಾಚಾ ಘರಾ ರಾತಿಕ್ ಆಚರ್ಸುಂಕ್ ಯೆವ್ಜಿಲ್ಲೆಂ. ಆಚರ್ಸುಂಕ್ ವಿಶೇಷ್ ಕಾಂಯ್ ನಾತ್ಲ್ಲೆಂ. ಪುಣ್ ಕ್ಯಾಥರೀನಾಚಿ ತಿ ಆಶಾ ಜಾಲ್ಲ್ಯಾನ್ ಚಾರ್ಲ್ಸಾನ್ ತಿಕಾ ಇನ್ಕಾರ್ ಕೆಲೆಂ ನಾ.
ಸಾಂಜೆರ್ ಕ್ಯಾಥರೀನ್ ಆಫೀಸಾ ಥಾವ್ನ್ ಆಯಿಲ್ಲಿ ತಿ, ಮಿಶೇಲಾಕ್ ಆಪ್ಣಾ ಬರಾಬರ್ ಘೆವ್ನ್, ಆಪ್ಲ್ಯಾ ಘರಾ ಚಮ್ಕಾಲಿ. ಚಾರ್ಲ್ಸ್ ಆನಿ ವಿವಿಯಾನಾ ಹಳ್ಟಾರ್ ಘರ್ಚೆಂ ಥೊಡೆಂ ಕಾಮ್ ತಿರ್ಸುನ್ ಯೆತಾಂವ್ ಮ್ಹಣೊನ್ ಪಾಟಿಂ ರಾವ್ಲಿಂ. ರಾತಿಚಾ ಜೆವ್ಣಾಕ್ ಸಗ್ಳೆಂ ಕ್ಯಾಥರೀನಾನ್ ಹೊಟೇಲಾಚೆಂ ಜೆವಾಣ್ ಸಾಂಗ್ಲ್ಲೆಂ. ತಶೆಂ ಕ್ಯಾಥರೀನಾಕ್ ಕಾಂಯ್ ಸುದಾರ್ಸುಂಚಿ ಗರ್ಜ್ಯ್ ಆಸಾ ಮ್ಹಣೊನ್ ವಿವಿಯಾನಾಕ್ ದಿಸ್ಲಿ ನಾ.
ಆಪ್ಲ್ಯಾ ಘರ್ಚಾ ಕಾಮಾಕ್ ಲಾಗ್ಲ್ಲೆಂ ವಿವಿಯಾನಾ ವೆವೆಗ್ಗಿಂ ಆಪ್ಲಿಂ ಕಾಮಾಂ ಸಂಪಂವ್ಕ್ ಲಾಗ್ಲೆಂ. ವಾಶಿಂಗ್ ಮೆಶಿನಾಂತ್ ಸಾಕಾಳಿಂ ಘಾಲುನ್ ಗೆಲ್ಲಿಂ ವಸ್ತುರಾಂ ಕಾಡುನ್ ತಿಂ ಚಾರ್ಲ್ಸ್ ಇಸ್ತ್ರಿ ಮಾರುಂಕ್ ಲಾಗ್ಲೊ. ಗರ್ಜೆಚಿಂ ಕಾಮಾ ಸಂಪವ್ನ್ ದೊಗಾಂಯ್ ನ್ಹೆಸೊನ್ ಕ್ಯಾಥರೀನಾಚಾ ಘರಾ ತೆವ್ಶಿಂ ಭಾಯ್ರ್ ಸರ್ಲಿಂ.
ವೊರಾಂ ಯೆದೊಳ್ಚ್ ಆಟ್ ಜಾವ್ನ್ ಧಾ ಮಿನುಟಾಂ ಜಾಲ್ಲಿಂ. ಭಂವ್ತಿಂ ಕಾಳೊಕ್ ಪಡ್ಲ್ಲೊ ಜಾಲ್ಯಾರ್ಯ್ ರಸ್ತ್ಯಾಚ್ಯಾ ವೀಜ್ ದಿವ್ಯಾಂ ಉಜ್ವಾಡಾಂತ್ ಕಾಳೊಕ್ ಪಯ್ಸ್ ಧಾಂವ್ತಾಲೊ.
"ವಿವಿ....!"
ರಸ್ತ್ಯಾರ್ ಚಲ್ತಾಂ ಚಲ್ತಾಂ ಚಾರ್ಲ್ಸಾನ್ ಆಪ್ಲ್ಯಾ ಬಾಯ್ಲೆಚೊ ಹಾತ್ ಧರ್ಲೊ.
"ಹುಂ....!" ವಿವಿಯಾನಾನ್ ಕಾಂಯ್ ಉಲಯ್ನಾಸ್ತಾನಾ ತಶೆಂಚ್ ಘೊವಾಚಾ ತೊಂಡಾಕ್ ಪಳೆಲೆಂ.
"ಆಜ್ ಸಾಕಾಳಿಂ ತುಂ ಮಸ್ತ್ ಖುಶಿ ಆಸ್ಲ್ಲೆಂಯ್ !" ಚಾರ್ಲ್ಸಾನ್ ಉತ್ರಾಂ ವಿಂಚ್ಲಿಂ.
"ಹಾಂ... ಆಜ್ ಮಿಶೇಲಾಚೊ ಬರ್ತ್ಡೇ ಪಳೆ ತಶೆಂ.....!"
"ತಶೆಂ ನ್ಹಯ್ ವಿವಿ! ಹಾಂವ್ ತುಕಾ ಸದಾಂ ಪಳೆತಾಂ. ಥೊಡೆ ಪಾವ್ಟಿಂ ತುಕಾ ಪಳೆತಾನಾ ಆಶೆಂ ದಿಸ್ತಾ ಕೀ.....!" ಚಾರ್ಲ್ಸಾಕ್ ಮುಕಾರ್ ಉಲಂವ್ಕ್ ಕಾಂಯ್ ಸುಸ್ತಾಲೆಂ ನಾ. ತೊ ಉತ್ರಾಂ ಸೊಧಿಲಾಗ್ಲೊ.
ತಿತ್ಲ್ಯಾರ್, ವಿವಿಯಾನಾನ್ ಪರ್ತ್ಯಾಕ್ ಚಾರ್ಲ್ಸಾಚಾ ತೊಂಡಾಕ್ ಪಳೆಲೆಂ. ಆಪ್ಲೊ ಘೊವ್ ಆಪ್ಣಾಕ್ ಕಿತೆಂ ತರ್ಯ್ ಸಾಂಗೊಂಕ್ ಆಶೆತಾ ಮ್ಹಳ್ಳೆಂ ತೆಂ ತಾಕಾ ಕಳ್ಳೆಂ.
"ವಿವಿ, .....ಆರ್ ಯು ಹ್ಯಾಪ್ಪಿ?"
"ಕಿತ್ಯಾಕ್? ........ಮ್ಹಾಕಾ ಪಳಯ್ತಾನಾ ತುಕಾ ದಿಸಾನಾ?" ಆಪ್ಲ್ಯಾ ಘೊವಾಚ್ಯಾ ಸವಾಲಾಚೊ ಮತ್ಲಾಬ್ ವಿವಿಯಾನಾಕ್ ಸಮ್ಜಾಲೊ ನಾ.
"ದಿಸ್ತಾ! ಪೂಣ್......, ತುಜ್ಯಾ ತೊಂಡಾ ಥಾವ್ನ್ ಅಯ್ಕೊಂಕ್ ಆಶೆತಾಂ!"
"ತೋಂಡ್ ಹರ್ಯೇಕ್ ಪಾವ್ಟಿಂ ಸತ್ಚ್ಚ್ ಉಚಾರಿನಾ ಚಾರ್ಲ್ಸ್!"
"ತೆಂ ವ್ಹಯ್!....ಪುಣ್ ಹಾಂವ್ ಜಾಣಾಂ ತುಂ ಮ್ಹಜ್ಯೆ ಸವೆಂ ಸತ್ಚ್ ಉಚಾರ್ತಾಯ್!"
"ಮ್ಹಜ್ಯೆರ್ ತುಕಾ ಇತ್ಲೊಯ್ ಭರ್ವಸೊ.....?"
"ಮ್ಹಜೊ ತುಜೊ ಸಂಭಂಧ್ಯ್ ಫಕತ್ತ್ ಹ್ಯಾ ಭರ್ವಸ್ಯಾಚೆರ್ ಹೊಂದೊನ್ ಆಸಾ ವಿವಿ! ಆಮ್ಚೆ ಮಧೆಂ ಭರ್ವಸೊ, ವಿಶ್ವಾಸ್ ನಾ ಜಾಲ್ಯಾರ್ ಆಮ್ಚ್ಯಾ ಸಂಭಂಧಾಕ್ ಅರ್ಥ್ ನಾ!"
"ಭರ್ವಸೊ ಆನಿ ವಿಶ್ವಾಸ್ ಖಂಯ್ ಥಾವ್ನ್ ಯೆತಾ?"
"ಪಾತ್ಯೆಣೆ ಥಾವ್ನ್....!"
"......ಆನಿ ಪಾತ್ಯೆಣಿಂ?"
ವಿವಿಯಾನಾಚಾ ಸವಾಲಾಕ್ ಚಾರ್ಲ್ಸ್ ಥೊಡೊ ಚಿಂತ್ಚಾರ್ ಪಡ್ಲೊ. ವಿವಿಯಾನಾನ್ ಬರೆಂಚ್ ಸವಾಲ್ ವಿಚಾರ್ಲ್ಲೆಂ. ಪಾತ್ಯೆಣಿ ಖಂಯ್ ಥಾವ್ನ್ ಯೆತಾ?
"ಹಾಂವ್ ಸಾಂಗೊಂ.....?" ವಿವಿಯಾನಾನ್ ಚಾರ್ಲ್ಸಾಚಾ ಹಾತಾಕ್ ಹಳ್ಟಾರ್ ಧರುನ್ ವೊಡ್ಲೆಂ.
"ಖಂಯ್ ಥಾವ್ನ್.....?" ಚಾರ್ಲ್ಸ್ ವಿವಿಯಾನಾ ತೆವ್ಶಿಂ ಘುಂವ್ಲೊ.
"ಜೆದ್ನಾಂ ಮನಿಸ್ ಲಾಚಾರ್ ಜಾತಾ....! ಜೆದ್ನಾಂ ತೊ ಖಂಯ್ಚಾ ವಿಶಯಾಂತ್ ಆಪ್ಣಾ ಥಾವ್ನ್ ಆನಿ ಕಾಂಯ್ಚ್ ಕರುಂಕ್ ಜಾಯ್ನಾ ಮ್ಹಣೊನ್ ಚಿಂತಾ, ತೆದ್ನಾಂ ತೊ ಹ್ಯಾ ಪಾತ್ಯೆಣಿ ಮ್ಹಳ್ಳ್ಯಾ ವಸ್ತುಚೊ ಗುಲಾಮ್ ಜಾತಾ. ಹ್ಯಾ ಪಾತ್ಯೆಣೆಂತ್ ತೊ ಆಪ್ಣಾಕ್ಚ್ ಧಯ್ರ್ ದಿತಾ. ಹ್ಯಾ ಧಯ್ರಾಂತ್ ತೊ ಕಿತ್ಲೊ ಜಿಕ್ತಾ ಆನಿ ತೊ ಕಿತ್ಲೊ ಸಲ್ವಾತಾ ತೆಂ ಭಿಲ್ಕುಲ್ ತಾಚ್ಯಾ ಹಾತಿಂ ನಾ. ವಾ ತಾಣೆಂ ಪಾತ್ಯೆಣಿ ದವರ್ಲೆಲ್ಯಾಚಾ ಹಾತಿಂಯ್ ನಾ. ತೊ ಜರ್ ಹ್ಯಾ ತಾಚ್ಯಾ ಪಾತ್ಯೆಣೆಂತ್ ಜಿಕ್ಲೊ ಜಾಲ್ಯಾರ್ ತೊ ತ್ಯಾ ಪಾತ್ಯೆಣೆಚೊ ಸಾಕ್ಶೆದಾರ್ ಜಾತಾ. ಜರ್ ತರ್ ತೊ ತ್ಯಾ ತಾಚ್ಯಾ ಪಾತ್ಯೆಣೆಂತ್ ಸಲ್ವಾಲೊ ಜಾಲ್ಯಾರ್.........!"
"ತಾಚ್ಯಾ ಪಾತ್ಯೆಣೆಚೊ ತೊಚ್ಚ್ ಖುನಿಗಾರ್ ಜಾತಾ.!" ವಿವಿಯಾನಾಚಿಂ ರಾಜಾಂವಾಚಿಂ ಉತ್ರಾಂ ಚಾರ್ಲ್ಸಾನ್ ಆಖೇರ್ ಕೆಲಿಂ. "ತರ್ ತುಜ್ಯಾ ಪರ್ಮಾಣೆಂ ಪಾತ್ಯೆಣಿ ಮ್ಹಳ್ಯಾರ್ ಫಕತ್ತ್ ಏಕ್ ಅಂಧ್ ವಿಶ್ವಾಸ್....?" ವಿವಿಯಾನಾಚಾ ಉತ್ರಾಂತ್ಲ್ಯಾ ರಾಜಾಂವಾಕ್ ಸಮ್ಜಾಲ್ಲೊ ಚಾರ್ಲ್ಸ್ ಆಪ್ಲ್ಯಾ ಬಾಯ್ಲೆಕ್ ಪಳಯಿತ್ತ್ ಉಲಯ್ಲೊ.
"ನ್ಹಯ್!"
"ಮಾಗಿರ್?"
"ತುಂ ಮ್ಹಜ್ಯೆರ್ ಕಿತ್ಯಾಕ್ ವಿಶ್ವಾಸ್ ವಾ ಪಾತ್ಯೆಣಿ ದವರ್ತಾಯ್?"
" ಸತ್ ಸಾಂಗೊ....? ತುಕಾ ಹಾಂವ್ ಖುಶ್ ದವರುಂಕ್ ಆಶೆತಾಂ!"
"...... ಆನಿ ಮ್ಹಜ್ಯೆ ಖುಶಿಯೆಂತ್ ತುಂ ಖುಶಿ ಜೊಡ್ತಾಯ್!" ವಿವಿಯಾನಾ ಉಲಯ್ತಾನಾ ಚಡ್ಚ್ ಗಂಭೀರ್ ದಿಸ್ತಾಲೆಂ. ತಾಚ್ಯಾ ರಾಜಾಂವಾಂತ್ ಸತ್ಯ್ ಆಸ್ಲ್ಲೆಂ.
" ....... ಮ್ಹಳ್ಯಾರ್ ಮನ್ಶ್ಯಾನ್ ಕರ್ಚೆಂ ಸಗ್ಳೆಂ ತಾಚ್ಯಾ ಖುಶಿಯೆ ಖಾತಿರ್. ತರ್ ಮನ್ಶ್ಯಾನ್ ಆಪ್ಲಿ ಮನ್ಶ್ಯಾ ಜಿಣಿ ಜಿಯೆಂವ್ಚೆಂ ಕಾರಾಣ್ ಭೋವ್ ಸುಲಭ್! ತುಂ ಜರ್ ತುಜ್ಯಾ ಜಿಣಿಯೆಂತ್ ಖುಶಿ ಸೊಧ್ತಾಯ್ ಜಾಲ್ಯಾರ್, ತ್ಯಾ ವಾಟೆರ್ ತುಂ ಹೆರಾಂಕ್ ಖುಶಿ ಕರ್. ತುಂಯ್ ಖುಶಿ. ಹಾಂವ್ಯ್ ಖುಶಿ!
"ತೆಂಚ್ ಹಾಂವ್ ತುಜ್ಯಾ ತೊಂಡಾ ಥಾವ್ನ್ ಆಯ್ಕೊಂಕ್ ಆಶೆತಾಂ ವಿವಿ!"
"ತುಕಾ ಸೊಡುನ್ ಮ್ಹಾಕಾ ದುಸ್ರೆಂ ಕೋಣ್ ಆಸಾ ಚಾರ್ಲ್ಸ್?" ವಿವಿಯಾನಾನ್ ಚಾರ್ಲ್ಸಾಚಾ ತೊಂಡಾಕ್ಚ್ ಪಳಂವ್ಚೆಂ ಪ್ರಯತ್ನ್ ಕೆಲೆಂ.
"ಹ್ಯಾಚ್ ಖಾತಿರ್ ಎಕೇಕ್ ಪಾವ್ಟಿಂ ಮ್ಹಾಕಾ ಭಿರಾಂತ್ ದಿಸ್ತಾ ವಿವಿ. ಮ್ಹಜ್ಯೆ ಥಾವ್ನ್ ತುಕಾ ಕಾಂಯ್ ಉಣೆಂಪಣ್ ಭೊಗಾತ್ ಜಾಲ್ಯಾರ್......?"
"ತುಂ ಮ್ಹಜೊ ಇತ್ಲೊ ಹುಸ್ಕೊ ಕರ್ತಾಯ್. ತುಂ ಮ್ಹಜೊ ಇತ್ಲೊ ಮೋಗ್ ಕರ್ತಾಯ್ ಆಸ್ತಾನಾ ಹಾವೆಂ.....?, ಹಾಂವ್ ಕಶೆಂ ಉಣೆಂಪಣ್ ಭೊಗುಂ? ತೆಂ ಆಸೊಂ! ತುಂ ಕಿತ್ಯಾಕ್ ಆಜ್ ಆಸೊ ಉಲಯ್ತಾಯ್?"
"ಆಶೆಂಚ್! ಆಜ್ ಆಫಿಸಾಂತ್ಯ್ ಕಾಂಯ್ ಮನ್ ಲಾಗೊಂಕ್ ನಾ. ತುಕಾಚ್ ಚಿಂತಾಲೊಂ!"
"ಮ್ಹಾಕಾ.....!? .... ಕಿತ್ಯಾಕ್?"
"ತೆಂಚ್! ಸಾಂಗ್ಲೆಂ ನೆ ತುಕಾ ಹಾವೆಂ...... ಸಾಕಾಳಿಂ ತುಕಾ ಪಳೆತಾನಾ ತುಂ....."
"ಡಾರ್ಲಿಂಗ್!" ವಿವಿಯಾನಾನ್ ಆತಾಂ ಆಪ್ಲೊ ದಾವೊ ಹಾತ್ ವಯ್ರ್ ಕಾಡುನ್, ತ್ಯಾ ಹಾತಾ ವಯ್ರ್, ಆಪ್ಲ್ಯಾ ದುಸ್ರ್ಯಾ ಹಾತಾನ್ ಚಾರ್ಲ್ಸಾಚಾ ಹಾತಾಕ್ ದವರುನ್, ತ್ಯಾ ಹಾತಾಕ್ಚ್ ಪಳವ್ನ್ ತೆಂ ಮೊಗಾನ್ ತ್ಯಾ ಹಾತಾಕ್ ಪೊಶೆಲಾಗ್ಲೆಂ. ಹೆಂ ಪಳೆಲ್ಲೊ ಚಾರ್ಲ್ಸ್,
"ಐ ಲವ್ ಯು ಸ್ವೀಟ್ ಹಾರ್ಟ್!" ವಿವಿಯಾನಾಚಾ ಹಾತಾ ಥಾವ್ನ್ ಆಪ್ಲೊ ಹಾತ್ ಸುಟವ್ನ್, ತ್ಯಾ ಹಾತಾನ್ ವಿವಿಯಾನಾಕ್ ಲಾಗಿಂ ವೊಡುನ್, "..... ತುಂ ಸಂತೊಸಾನ್ ಆಸ್ಲ್ಲೆಂ ಪಳೆತಾನಾ ಮ್ಹಾಕಾ ಮಸ್ತ್ ಖುಶಿ ಜಾತಾ. ತುಂ ಆತಾಂ ಪಯ್ಲೆಂಚಾ ವಿವಿಯಾನಾ ಪರಿಂ ನಾಂಯ್. ತೆಂಯ್...., ಮಿಶೇಲ್ ಜಲ್ಮಾಲ್ಲ್ಯಾ ಉಪ್ರಾಂತ್ ತುಂ ಮಸ್ತ್ ಬದ್ಲಾಲಾಂಯ್!"
"ಹಾಂ ಚಾರ್ಲ್ಸ್! ನಿಜಾಯ್ಕ್ಯ್ ತುವೆಂ ಮ್ಹಜೆಂ ಜಿವಿತ್ ಬದ್ಲಿಲಾಂಯ್. ತುವೆಂ ಮ್ಹಾಕಾ ಇತ್ಲೆಂ ಸಗ್ಳೆಂ ದಿಲಾಂಯ್.... ತರ್ಯ್ ಆಸ್ತಾಂ, ತುಂ ಮ್ಹಜ್ಯೆ ವಿಶಿಂ ಚಿಂತಾಯ್. ತುವೆಂ ಮ್ಹಾಕಾ ಜಿವಿತ್ ದಿಲಾಂಯ್. ಮಿಶೇಲಾನ್ ಮ್ಹಾಕಾ ಮ್ಹಜೆಂ ಜಿವಿತ್ ಜಿಯೆಂವ್ಕ್ ಕಾರಾಣ್ ದಿಲಾಂ. ಹ್ಯಾಚ್ ಖಾತಿರ್ ಹಾಂವ್ ಖುಶಿ ಆಸಾಂ! ಆನಿ....." ವ್ಹಳೂ ಆತಾಂ ವಿವಿಯಾನಾಚಾ ವೊಂಟಾನಿಂ ಸಂತೊಸಾಚ್ಯೊ ಮಂದ್ ಹಾಸೊ ಉದೆಲ್ಯೊ. ತಾಚ್ಯಾ ಕಾಳ್ಜಾಚಾ ಗುಂಡಾಯೆ ಥಾವ್ನ್ ಉದೆಲ್ಲ್ಯೊ ಹಾಸೊ! ಜ್ಯಾ ಹಾಸ್ಯಾಂಕ್ ಪಳವ್ನ್ ಚಾರ್ಲ್ಸ್ ತಾಕಾಚ್ ಸಾಂಗೊಂಕ್ ಜಾಯ್ನಾ ತಿತ್ಲೊ ಖುಶಿ ಜಾಲೊ. ತಶೆಂಚ್ ತಾಣೆಂ ಆಪ್ಲಿ ದೀಷ್ಟ್ ಮೊಳಾಬಾಕ್ ಉಭಾರ್ಲಿ.
"ಐ ಲವ್ ಯು ಸ್ವೀಟ್ ಹಾರ್ಟ್...!" ವಿವಿಯಾನಾಚೊ ಮಧುರ್ ತಾಳೊ ಚಾರ್ಲ್ಸಾಚಾ ಕಾಳ್ಜಾಂತ್ ಮೊಗಾಚೊ ಉಮಾಳೊ ಕಸೊ ಉಮಾಳುನ್ ಗೆಲೊ.
"ಐ ಲವ್ ಯು ಟೂ ಡಾರ್ಲಿಂಗ್...!" ಚಾರ್ಲ್ಸಾನ್ ವಿವಿಯಾನಾಕ್ ಪಯ್ಲೆಂಚಾ ಪ್ರಾಸ್ ಚಡ್ ಭಳಾನ್ ಆಪ್ಣಾ ತೆವ್ಶಿಂ ವೊಡುನ್ ಧರ್ಲೆಂ. ತಿಂ ಆತಾಂ ಚಲ್ತಾನಾ ತಾಂಚೆ ಪಾಂಯ್ ಎಕಾಮೆಕಾಕ್ ಆದ್ಳೊಂಕ್ ಲಾಗ್ಲೆ. ತಿಂ ತಶಿಂಚ್ ಚಲೊಂಕ್ ಲಾಗ್ಲಿಂ.
ತ್ಯಾ ರಾತಿಚಾ ಸೊಭಿತ್ ಮೌನಾಂತ್ ತಾಂಚೆಂ ಜೀವನ್ ಆನಿಕ್ಯ್ ಮಸ್ತ್ ಸೊಭಿತ್ ಮ್ಹಳ್ಳ್ಯಾಪರಿಂ ತಾಂಕಾ ದಿಸ್ಲೆಂ.
ಥೊಡ್ಯಾ ವೆಳಾಕ್ ಎಕಾಮೆಕಾಚಾ ಸಾಂಗಾತಾಂತ್ ತಿಂ ಸಂಸಾರಾಕ್ಚ್ ವಿಸ್ರಾಲಿಂ.
ಕ್ಯಾಥರೀನಾಚಾ ಘರಾಕ್ ಪಾವೊಂಕ್ ಆನಿ ಥೊಡಿಚ್ ವಾಟ್ ಉರ್ಲೆಲಿ.
ತಿತ್ಲ್ಯಾರ್!
ಎಕಾಚ್ಚ್ ಫರಾ ತಾಂಚಾ ಪಾಟ್ಲ್ಯಾನ್ ಥಾವ್ನ್ ಕಸಲ್ಯಾಗೀ ಮೊಟಾರಾಚೊ ಕರ್ಕಸ್ ಆವಾಜ್ ಆಯ್ಕೊನ್ ಯೇವ್ನ್ ಅಚಾನಕ್ ತಾಂಕಾ ಕಳಿತ್ ನಾತ್ಲೆಲ್ಯಾ ಪರಿಂಚ್ ವಿವಿಯಾನಾ ಆನಿ ಚಾರ್ಲ್ಸ್ ಪಾಟಿಂ ಘುಂವ್ಲಿಂ.
ತಿತ್ಲೆಂಚ್!
ತಾಂಚಾ ದೊಳ್ಯಾಂ ಮುಕಾರ್ ಭುತಾ ಪರಿಂ ಪ್ರತ್ಯಕ್ಷ್ ಜಾಲ್ಲೆಂ ಏಕ್ ಪರ್ನೆಂ ಚವರ್ಲೆಟ್ ಕಾರ್, ಹಾಲೊನ್ ಧಲೊನ್ ಆಯಿಲ್ಲೆಂ ತೆಂ, ತಾಂಕಾಂ ಕಾಂಯ್ಚ್ ಚಿಂತುಂಕ್ ಆವ್ಕಾಸ್ ದಿಂವ್ಚಾ ಪಯ್ಲೆಂಚ್, ದೊಗಾಂಯ್ಕ್ಯ್ ’ದಡ್ಡ್’ ಕರುನ್ ಆದಾಳ್ತಾನಾ, ಖಂಯ್? ಕೋಣ್? ಕಿತೆಂ ಜಾತಾ ತೆಂ ಕಳ್ಚಾ ಪಯ್ಲೆಂಚ್ ವಾರ್ಯಾರ್ ಉಡ್ಲ್ಲ್ಯೊ ಚಾರ್ಲ್ಸ್ ಆನಿ ವಿವಿಯಾನಾಚೊ ಕುಡಿ, ಉಸ್ಳೊನ್ ರಸ್ತ್ಯಾಚಾ ತೆಂವ್ಶಿಲ್ಯಾ ಕುಶಿನ್ ಪಡ್ಲ್ಯೊ. ತಾಚ್ಯೆ ಸವೆಂ ಮುಕ್ಲ್ಯಾ ಲೈಟ್ ಖಾಂಬ್ಯಾಕ್ ಮಾರ್ಲ್ಲೆಂ ಕಾರ್ ಫುಟ್ಪಾತಿಕ್ ಘಾಸುನ್, ರಾಸ್ತ್ಯಾ ದೆಗೆಚ್ಯಾ ರುಕಾಕ್ ’ದಡಲ್ಲ್’ ಕರುನ್ ಮಾರುನ್ ಸ್ತಬ್ದ್ ಜಾಲೆಂ.
************
ಆಜ್, ಸಾಕಾಳಿಂಚಾ ಸುರ್ಯಾ ಜಾಗೆಕ್ ನಿದೆಂತ್ಲೊ ಉಟ್ಲ್ಲ್ಯಾ ಜೆರೊಮಾಕ್, ತಾಚ್ಯಾ ಜಿವಾಂತ್, ಕಿತ್ಯಾಕ್ಗೀ ತಾಕಾ ಹರ್ಶೆಂಚಾ ತಿತ್ಲೆಂ ಬರೆಂಪಣ್ ದಿಸ್ಲೆಂ ನಾ. ಅಚಾನಕ್ ದೆಂವ್ಲ್ಲ್ಯಾ ರಗ್ತಾಚಾ ಒತ್ತಡಾಕ್ ಲಾಗೊನ್, ಕಾಲ್ಚೊ ದೀಸ್ ಸಾದಾರ್ನ್ ಜಾವ್ನ್, ತಾಣೆಂ ಆನಿ ಎಸ್ತೆಲಾನ್ ತ್ಯಾ ಆಸ್ಪತ್ರೆಂತ್ಚ್ ಕಾಡ್ಲ್ಲೊ. ಎಸ್ತೆಲ್ ಜಾಲ್ಯಾರ್ಯ್ ಘೊವಾಕ್ ಸೊಡುನ್ ಘರಾ ಎಕ್ಸುರಿ ರಾವಾನಾತ್ಲ್ಲಿ. ಪಯ್ಲೆಂಚೊ ತರ್ನಾಟ್ಪಣಾಚೊ ವಿಶಯ್ಚ್ ದುಸ್ರೊ ಆಸ್ಲ್ಲೊ. ಪುಣ್, ಆತಾಂ ಜೆರೊಮ್, ಎಕಾ ವಾಟೆನ್ ಸಾಕ್ರಿಚಾ ಪಿಡೆಕ್ ವಳಗ್ ಜಾವ್ನ್ ಕಠೀಣ್ ಪೊತಾಚೆರ್ ಆಸ್ಲ್ಲೊ ಜಾಲ್ಯಾರ್, ದುಸ್ರ್ಯಾ ಕುಶಿಂನ್, ಹ್ಯಾ ತೆದ್ನಾಂ ತೆದ್ನಾಂ ದೆಂವ್ಚಾ ರಗ್ತಾಚಾ ಒತ್ತಡಾಕ್ ಲಾಗೊನ್ ಕಷ್ಟಾತಾಲೊ.
ಪಿಡೆಂತ್ ಪಡ್ಲ್ಲ್ಯಾ ಮನ್ಶ್ಯಾಕ್, ತಾಕಾ ತಾಚಿ ಪಿಡಾ ವಿಸ್ರಾಂವ್ಚೆಂ ಎಕ್ಚ್ಚ್ ವಕಾತ್ ಮ್ಹಳ್ಯಾರ್, ತಾಚಾ ಮತಿಂತ್ಲ್ಯಾ ಚಿಂತ್ನಾಂಕ್, ತಾಚ್ಯಾ ಜಿವಿತಾಂತ್ಲ್ಯಾ ಪ್ರಸ್ತುತ್ ವೆಳಾಚಾ ಘಡಿತಾಂ ಥಾವ್ನ್ ಗುಪಿತ್ ದವರ್ಚೆಂ. "ಕೆದ್ನಾಂ ಭಾಯ್ಲಿಂ ಘಡಿತಾಂ ಮತಿಂತ್ ಘುಸ್ಪೊಡೊನ್ ಚಿಂತ್ನಾಂಕ್ ಆಟಯ್ತಾತ್ ತೆದ್ನಾಂ ಜಿವಾ ಭಿತರ್ಲಿಂ ಭೊಗ್ಣಾಂ ತಳ್ಮಳ್ಯಾನಿಂ ಉಮಾಳೊನ್ ಭಲಾಯ್ಕೆಕ್ ಖಡಾಯ್ತಾತ್!"
ಜೆರೊಮಾಕ್ಯ್ ಆಶೆಂಚ್. ಎಕಾ ಕುಶಿಂತ್ ಎಸ್ತೆಲಾಚಿ ಖಂತ್! ಎಕಾ ಕುಶಿಂತ್ ಸಾಂಗಾತ್ ದೀಂವ್ಕ್ ಸಲ್ವಾಲ್ಲ್ಯಾ ಭುರ್ಗ್ಯಾಂಚಿ ಖಂತ್! ಎಕಾ ಕುಶಿಂನ್ ಮಾಲ್ಗಡ್ಯಾಂ ಥಾವ್ನ್ ಆಯಿಲ್ಲ್ಯಾ ಆಸ್ತ್ ಬದಿಕೆಕ್ ಸಾಂಬಾಳ್ಚಿ ಖಂತ್! ಎಕಾ ಕುಶಿಂನ್ ಆಪ್ಣೆ ಆಪ್ಲ್ಯಾ ಬುದ್ವಂತ್ಕಾಯೆನ್ ಪೂಂಜಾಯಿಲ್ಲೆಂ ತೆಂ ಆಧಾರ್ ನಾಸ್ತಾನಾ ವೆತಾ ತಾಚಿ ಖಂತ್! ಎಕಾ ವಾಟೆನ್ ಆಪ್ಣಾಕ್ ವೇಂಗ್ ಮಾರುನ್ ರಾವ್ಲೆಲ್ಯಾ ಪಿಡೆಚಿ ಖಂತ್! ಎಕಾ ವಾಟೆನ್ ಆಪ್ಣೆಂ ಸಾಂಡುಂಕ್ ಆಸ್ಚಾ ಜಿವಿತಾಚಿ ಖಂತ್!
ಸಗ್ಳ್ಯಾ ಆಪ್ಲ್ಯಾ ಜಿವಿತಾಂತ್ಲಿಂ, ಭಾಯ್ಲಿಂ ಆನಿ ಭಿತರ್ಲಿಂ ಘಡಿತಾಂ, ಜೆರೊಮಾಕ್, ದೀಸ್ ವೆತಾಂ ವೆತಾಂ ಆಪ್ಲ್ಯಾ ಹಾತಾಂತ್ ತಾಕಾ ಭಂಧಿವಾನ್ ಕರ್ತಾಲಿಂ ಶಿವಾಯ್ ಖಂಯ್ಚಾಯ್ ದಿಶೆನ್ ಜಾಂವ್, ತ್ಯಾ ಘಡಿತಾಂಚಾ ಹಾತಾಂತ್ ಥಾವ್ನ್ ತಾಕಾ ಸುಟ್ಕಾ ಲಾಬ್ಚಾ ಪರಿಂ ದಿಸೊನ್ ಯೇನಾತ್ಲ್ಲಿಂ.
ಹ್ಯಾಚ್ ಚಿಂತ್ನಾನಿಂ ಬುಡೊನ್, ದಾಕ್ತೆರಾನ್ ಸಾಂಗ್ಲ್ಲಿಂ ಒಕ್ತಾಂ ಘೆವ್ನ್, ಭಾಯ್ಲ್ಯಾ ಸೊಪ್ಯಾರ್ ಬಸೊನ್, ಮುಕ್ಲ್ಯಾ ಜಾಲಾಚಾ ದೆಗೆನ್ ಎಸ್ತೆಲಾನ್ ಲಾಯಿಲ್ಲ್ಯಾ ತ್ಯಾ ಗುಲೊಬಾಂಚಾ ಝಡಾಂಚೆರ್ ಆಜ್ ಫುಲ್ಲ್ಲ್ಯಾ ಗುಲೊಬಾಂಕ್ ಪಳವ್ನ್, ಮತಿಂತ್ಚ್ ತ್ಯಾ ಫುಲಾಂಚಾ ಸೊಭಾಯೆಕ್ ಚಾಕೊನ್ ಆಸ್ಲ್ಲೊ ಜೆರೊಮ್, ಆಪ್ಲ್ಯಾ ಬೊಂಗ್ಲ್ಯಾಚಾ ಮುಕ್ಲ್ಯಾ ಗೇಟಿಚೆರ್ ಅಚಾನಕ್ ಉಭೊ ಜಾಲ್ಲ್ಯಾ ಪೋಸ್ಟ್ಮ್ಯಾನಾಕ್ ಪಳವ್ನ್ ಚಕಿತ್ ಜಾಲೊ.
ಫೆಸ್ತಾಂ ಪರ್ಬೆಕ್ ಭುರ್ಗ್ಯಾಂನಿಂ ಭಾಯ್ಲ್ಯಾ ಗಾಂವಾ ಥಾವ್ನ್ ಕಾರ್ಡಾಂ ದಾಡ್ಚಿಂ ಸೊಡ್ಲ್ಯಾರ್ ದುಸ್ರೆಂ ಕಾಂಯ್ ಟಪ್ಪಲಾರ್ ಯೇನಾತ್ಲ್ಲೆಂ. ತೆಂಯ್ ಹ್ಯಾ ಪಾವ್ಸಿಲ್ಯಾ ದಿಸಾಂನಿಂ ಕಸಲೆಂಯ್ ಫೆಸ್ತ್ ವಾ ಪರಬ್ಯ್ ನಾತ್ಲ್ಲಿ. ಮೊಂತಿ ಸಾಯ್ಬಿಣಿಚಾ ಫೆಸ್ತಾಕ್ ಆನಿಕ್ಯ್ ದೋನ್ ಮಹಿನೆ ಉರ್ಲೆಲೆ.
ಜೆರೊಮಾಚಾ ಮತಿಂತ್ ಚಿಂತ್ನಾಂ ಧಾಂವೊನ್ ಆಸ್ಲ್ಲ್ಯಾ ಪರಿಂಚ್ ತ್ಯಾ ಪೋಸ್ಟ್ಮ್ಯಾನಾನ್ ಜೆರೊಮಾಚಾ ಬೊಂಗ್ಲ್ಯಾಚಿ ಗೇಟ್ ಉಗ್ತಿ ಕರುನ್ ಮುಕ್ಲ್ಯಾ ಜಾಲಾಕ್ ಪಾಂಯ್ ದವರ್ಲೆ. ಆಪ್ಲ್ಯಾ ತೊಂಡಾರ್ ಹಳ್ತಾರ್ ಹಾಸೊ ಹಾಡ್ಲ್ಲೊ ತೊ ಬೊಂಗ್ಲ್ಯಾಚಾ ಸೊಪ್ಯಾ ಭಾಯ್ಲ್ಯಾ ಉಭಾರ್ ಗ್ರಾದಿಚಾ ದೆಗೆನ್ ಆಯ್ಲೊ. ಜೆರೊಮ್ ಥಂಯ್ಚ್ ತಾಚ್ಯಾ ಮುಕಾರ್ ತ್ಯಾ ಗ್ರಾದಿಚಾ ಭಿತರ್ಲ್ಯಾ ಕುಶಿಂನ್ ಉಭೊ ಜಾಲ್ಲೊ.
"ಆಪ್ಣಾಕ್ ಕೊಣಾಚೆಂ, ಕಿತೆಂ ಆಯ್ಲಾಂ ಜಾವ್ಯೆತ್?" ಚಿಂತುನ್ ಆಸ್ಲ್ಲ್ಯಾ ಜೆರೊಮಾಕ್ ಚಡಿತ್ ಚಿಂತುಂಕ್ ಆವ್ಕಾಸ್ ದೀನಾಸ್ತಾನಾ, ಪಾವ್ಸಾಕ್ ಲಾಗೊನ್ ಪಾಲಿತೀನಾಂತ್ ರೆವ್ಡಾಯಿಲ್ಲ್ಯಾ ತಾಚ್ಯಾ ಟಪ್ಪಲಾಚಾ ಭೊರ್ಯಾಕ್ ಸೊಡಯಿಲ್ಲ್ಯಾ ತಾಣೆಂ, ಏಕ್ ಟೆಲಿಗ್ರಾಮ್ ಕಾಡುನ್ ಜೆರೊಮಾಚಾ ಹಾತಿಂ ದಿಲೆಂ.
ಟೆಲಿಗ್ರಾಮಾಕ್ ಪಳಯಿಲ್ಲ್ಯಾ ಜೆರೊಮಾಚಿ ಝಿಂಟ್ ಉಡ್ಲಿ. ಹ್ಯಾ ದಿಸಾಂಚಾ ಫೆಸ್ತಾಂ ಪರ್ಭೆಂ ವಿಶಿಂ ಮತಿಂತ್ಚ್ ಚಿಂತುನ್, ಆಪ್ಲ್ಯಾ ಭುರ್ಗ್ಯಾಂ ಸರ್ಶಿಂನ್ ಪಾವ್ಲೆಲ್ಯಾ ಜೆರೊಮಾಕ್, ಅಚಾನಕ್ ಟಪ್ಪಾಲ್ ಪೆದ್ಯಾಚಾ ಹಾತಿಂ ಟೆಲಿಗ್ರಾಮ್ ಉಟೊನ್ ಆಯಿಲ್ಲೆಂ ಪಳವ್ನ್ ಜಿವಾಂತ್ ಕಿತೆಂಗೀ ’ಕಸ್ಕ್’ ಜಾಲ್ಲ್ಯಾ ಪರಿಂ ಜಾಲೆಂ ಜಾಲ್ಯಾರ್ಯ್, ತ್ಯಾ ಟಪ್ಪಾಲ್ ಪೆದ್ಯಾನ್ ಆಪ್ಣಾ ತೆವ್ಶಿಂ ವೊಡ್ಡಾಯಿಲ್ಲ್ಯಾ ಟೆಲಿಗ್ರಾಮಾಕ್ ತಾಣೆಂ ಯಾಂತ್ರಿಕ್ ರಿತಿನ್ ಮ್ಹಳ್ಳ್ಯಾಪರಿಂ ಘೆತ್ಲೆಂ. ಟೆಲಿಗ್ರಾಮಾಕ್ ಜೆರೊಮಾಚಾ ಹಾತಿಂ ದೀವ್ನ್, ಟಪ್ಪಲಾಚಾ ರಿಜಿಸ್ಟರಾರ್ ಜೆರೊಮಾಚಿ ದಸ್ಕತ್ ಘೆತ್ಲಲೊ ಟಪ್ಪಾಲ್ ಪೆದೊ ಆಪ್ಲಿ ವಾಟ್ ಧರುನ್ ಪಾಟಿಂ ಪರ್ತಾಲೊ. ಟೆಲಿಗ್ರಾಮ್ ಹಾತಿಂ ಧರ್ಲ್ಲ್ಯಾ ಜೆರೊಮಾಕ್ ಆಪ್ಣೆಂ ಕಿತೆಂಗೀ ಆಪ್ಣಾಚೆಂ ಜಾಂವ್ಕ್ ನ್ಹಯ್ ಆಸ್ಚಾಕ್ ಹಾತಿಂ ಧರ್ಲಾಂ ತಶೆಂ ಭೊಗ್ತಾನಾ, ಪಾಟಿಂ ಮುಕಾರ್ ಪಳೆಲ್ಲ್ಯಾ ತಾಣೆಂ,
"ಎಸ್ತೆಲಾ...!?" ಜೆರೊಮಾನ್ ಆಪ್ಲ್ಯಾ ಬಾಯ್ಲೆಕ್ ಆಪಯ್ಲೆಂ.
ಎಸ್ತೆಲ್ ಭಿತರ್ಲ್ಯಾ ಕುಡಾಂತ್ಲ್ಯಾ ಆಲ್ಮಾರಿಂತ್ ವಸ್ತುರಾಂ ಘಡಿ ಕರುನ್ ದವರ್ತಾಲಿ.
"ಕಿತೆಂ ಜಾಲೆ?" ಭಿತರ್ ಥಾವ್ನ್ಚ್ ತಿಣೆಂ ವಿಚಾರ್ಲೆಂ.
"ಭಾಯ್ರ್ ಯೇ ಪಳೆಯಾಂ....." ಜೆರೊಮಾಚಿ ನದರ್ ಆಪ್ಲ್ಯಾ ಹಾತಾಂತ್ಲ್ಯಾ ಟೆಲಿಗ್ರಾಮಾಚೆರ್ಚ್ ಕೇಂದ್ರೀಕ್ರತ್ ಜಾಲ್ಲಿ.
"ಆತಾಂ ಕಿತೆಂ ಜಾಲೆಂ? ಹಾಂವ್ ಹಾಂಗಾ ವಸ್ತುರ್ ಭಿತರ್ ದವರ್ತಾಂ....... ರಾವ್ ತಿಕ್ಕೆ........!" ಎಸ್ತೆಲ್ ಆಪ್ಲ್ಯಾ ಕಾಮಾಕ್ ಸೊಡುನ್ ಭಾಯ್ರ್ ಯೇಂವ್ಕ್ ತಯಾರ್ ಜಾಲಿ ನಾ.
"ಹಾಂವ್ ದವರ್ತಾಂ ಬಾಯೆ.... ತುಂ ಪಳವ್ನ್ ಯೇ!" ಲಾಗಿಂಚ್ ವಸ್ತುರಾಂ ಗಡಿ ಕರುನ್ ದಿಂವ್ಚಾ ಸೆಲ್ಲಿನ್ ಎಸ್ತೆಲಾಕ್ ಸಾಂಗ್ಲೆಂ.
"ತುವೆಂ ವಸ್ತುರ್ ಭಿತರ್ ದವರ್ಲ್ಯಾರ್ ಮಾಗಿರ್ ಮ್ಹಾಕಾ ಎಕಾ ವಸ್ತುರಾಕ್ ಲಾಗೊನ್ ಸಗ್ಳಿ ಆಲ್ಮಾರ್ ಉಸ್ತುಂಕ್ ಪಡ್ತಾ. ಹಾಂವ್ ಜಾಣಾಂ.... ಕೊಣಾಚೆಂ ವಸ್ತುರ್ ಖಂಯ್ ದವರುಂಕ್ ಜಾಯ್ ತೆಂ!"
ಬಾಯ್ಲ್ ಭಾಯ್ರ್ ಯೇನಾತ್ಲ್ಲೆಂ ಪಳವ್ನ್ ಸವ್ಕಾಸ್ ಜೆರೊಮಾನ್ ಟೆಲಿಗ್ರಾಮ್ ಉಗ್ತೆಂ ಕೆಲೆಂ. ತಾಕಾ ಉದ್ವೇಗ್ ತಡ್ವುಂಕ್ ಜಾಲೊ ನಾ.
"ಪಾಂಚ್ ಮಿನುಟಾಂ ರಾವ್ ..... ಆಯ್ಲಿಂ!" ಎಸ್ತೆಲಾನ್ ಭಿತರ್ ಥಾವ್ನ್ ಉಚಾರ್ಲ್ಲಿಂ ಉತ್ರಾಂ ಜೆರೊಮಾಚಾ ಕಾನಾಂಕ್ ಆಯ್ಕಾಲಿಂ ಜಾಲ್ಯಾರ್ ತ್ಯಾ ಉತ್ರಾಂಚ್ಯಾಕ್ಯ್ ಚಡ್ ಪ್ರಭಾವ್, ತಾಚ್ಯೆರ್, ತ್ಯಾ ತಾಣೆಂ ಉಗ್ತೆಂ ಕೆಲ್ಲ್ಯಾ ಟೆಲಿಗ್ರಾಮಾ ಭಿತರ್ಲ್ಯಾ ಉತ್ರಾಂನಿಂ ಘಾಲೊ.
"ಚಾರ್ಲ್ಸ್ ಆನಿ ವಿವಿಯಾನಾ ಕಾರ್ ಆವ್ಘಡಾಂತ್ ಅಂತರ್ಲ್ಯಾಂತ್. ಮಿಶೇಲ್ ಜಿವಂತ್ ಆಸಾ. ತುಮಿಂ ತಕ್ಶಣ್ ಮ್ಹಾಕಾ ಹ್ಯಾ ನಂಬ್ರಾಕ್ ಸಂಪರ್ಕ್ ಕರ್ಚೊ! ಕ್ಯಾಥರೀನ್...!"
ಟೆಲಿಗ್ರಾಮಾ ವಯ್ಲಿಂ ಉತ್ರಾಂ ವಾಚ್ಲ್ಲ್ಯಾ ಜೆರೊಮಾಕ್ ಆಪ್ಲ್ಯಾ ಕುಡಿಂತ್ ವ್ಹಾಳ್ಚೆಂ ರಾಗಾತ್ ಥಂಡ್ ಜಾಲ್ಲ್ಯಾ ಪರಿಂ ಜಾತಾನಾ ಮುಕಾರ್ ಬರಯ್ಲೆಲೆಂ ಟೆಲಿಫೋನ್ ನಂಬರ್ ವಾಚುಂಕ್ ತಾಚ್ಯೆ ದೊಳೆ ಸಕ್ಲೆ ನಾಂತ್.
"ಎಸ್ತೆಲಾ......!?" ಫಕತ್ತ್ ತಾಚ್ಯಾ ತೊಂಡಾ ಥಾವ್ನ್ ತಾಚ್ಯಾ ಬಾಯ್ಲೆಚೆಂ ನಾಂವ್ ಭಾಯ್ರ್ ಪಡೊಂಕ್ ಮಾತ್ರ್ ಸಕ್ಲೆಂ. ತಾಚ್ಯಾ ಸವೆಂ ತಾಚ್ಯಾ ಜಿವಾ ಭಿತರ್ ಕಿತೆಂಗೀ ಗಳೊನ್ ಗೆಲ್ಲ್ಯಾ ಪರಿಂ ಜಾತಾನಾ, ತಾಚ್ಯಾ ದೊಳ್ಯಾಂಕ್, ತಾಚ್ಯಾಚ್ ಹಾತಾಂತ್ಲೆಂ ಟೆಲಿಗ್ರಾಮ್ ಗಯ್ರೆಂ ಗಯ್ರೆಂ ದಿಸೊಂಕ್ ಲಾಗ್ಲೆಂ. ಹೆವ್ಶಿಂ ತೆವ್ಶಿಂ ಸಾಸ್ಪಲ್ಲ್ಯಾ ಜೆರೊಮಾನ್, ಹಾತಾಕ್ ಕಾಂಯ್ ತರ್ಯ್ ಆಧಾರಾಕ್ ದರುಂಕ್ ಮೆಳ್ತಾಗಾಯ್ ಮ್ಹಣೊನ್ ಹಾತ್ ಸಾಸ್ಪಿಲೆ ಜಾಲ್ಯಾರ್ಯ್ ಹಾತಾಕ್ ಕಾಂಯ್ಚ್ ಮೆಳಾನಾಸ್ತಾನಾ ವೆತಾನಾ, ಕುಡಿಚೆಂ ಸಂತುಲನ್ ಚುಕ್ಲ್ಲಿ ತಾಚಿ ಕೂಡ್ "ದಡ್ಡ್" ಆವಾಜಾನ್ ಧರ್ಣಿಕ್ ಗಳ್ಳಿ.
*********
ಎಕಾ ಮಹಿನ್ಯಾ ಉಪ್ರಾಂತ್......!
ಭಾಯ್ರ್ ಆಜ್ ಶಿರಾಂಧಾರಿ ಪಾವ್ಸ್ ವೊತ್ತಾಲೊ. ಸಾಕಾಳಿಂಚಾ ವಗ್ತಾರ್ಚ್ ಆರಂಭ್ ಜಾಲ್ಲೊ ಪಾವ್ಸ್, ಉಣೊ ಜಾಂವ್ಚೆಂ ಕಾಂಯ್ ಲಕ್ಷಣ್ ದಿಸ್ತಾಗಾಯ್ ಮ್ಹಣೊನ್ ಸೊಪ್ಯಾರ್ ಥಾವ್ನ್ಚ್ ಬಾಗ್ವೊನ್ ಜೆರೊಮಾನ್ ವಯ್ಲ್ಯಾ ಮೊಳಾಬಾಕ್ ಪಳೆಲೆಂ.
ನಾ! ಜೆರೊಮಾನ್ ತಶಿಚ್ ಆಪ್ಲಿ ತಕ್ಲಿ ಹಾಲಯ್ಲಿ.
ತಾಚ್ಯಾ ಮತಿಕ್ ದಾಧೊಸ್ಕಾಯ್ ದಿಂವ್ಚಿಂ ಕಸಲಿಂಯ್ ಖುಣಾಂ, ತಾಕಾ ತ್ಯಾ ಮೊಳಾಬಾರ್ ದಿಸ್ಲಿಂ ನಾಂತ್. ಬಗಾರ್, ತ್ಯಾ ಮೊಳಾಬಾರ್ ದಾಟ್ ದಾಟ್ ಮಾಂಡ್ಲ್ಲಿಂ ಕಾಳಿಂ ಮೊಡಾಂ ಪಡ್ಲಾ ಥಾವ್ನ್ ಮುಡ್ಲಾ ಕುಶಿಂನ್ ಸವ್ಕಾಸ್ ಚಲೊನ್ ಯೆಂವ್ಚಿಂ ದಿಸ್ಲಿಂ ಶಿವಾಯ್, ತಾಕಾ ತಿಂ ಮೊಡಾಂ ನಿತ್ಳೊನ್ ಯೆಂವ್ಚಾ ಪರಿಂ ಭೊಗ್ಲೆಂ ನಾ. ತ್ಯಾ ಸವೆಂ ಉಚಾಂಭಳ್ ವಾರ್ಯಾ ಸಾಂಗಾತಾ ಉಭೊನ್ ವೆಚೊ ಪಾವ್ಸ್!
ತಿತ್ಲ್ಯಾರ್!
’ದಡಾರ್ರ್’ ಆವಾಜಾನ್ ಮೊಳಾಬಾರ್ ಘಡ್ಗಡೊ ಉಟೊನ್ ಧಾಂವ್ತಾನಾ, ಭಾಯ್ಲ್ಯಾ ಮೊಳಾಬಾಕ್ ಪಳಂವ್ಚೊ ಜೆರೊಮ್ ತಸೊಚ್ ನೀಟ್ ಜಾಲೊ.
ಆಜ್ ಭಾಯ್ರ್ ಆನಿ ಭಿತರ್ ದೋನ್ಯ್ ಕುಶಿಂನಿ ಘಡ್ಗಡೊ ಮಾರ್ತಾ ತಶೆಂ ತಾಕಾ ಜಾಲೆಂ.
ತಸೊಚ್ಚ್ ಸೊಪ್ಯಾರ್ ಉಭೊ ಜಾವ್ನ್ ಭಾಯ್ಲ್ಯಾ ಪಾವ್ಸಾಕ್ ಪಳಂವ್ಚ್ಯಾ ತಾಚಿ ದೀಶ್ಟ್ ತಾಚ್ಯಾ ಬೊಂಗ್ಲ್ಯಾಚಾ ಗೇಟಿ ಮುಕಾರ್ ಧಾಂವ್ಲಿ.
ನಿರಾಶಾ!
ವಾರ್ಯಾಚಾ ಭಳಾಕ್ ಖಾಲ್ ಜಾಲ್ಲೊ ಪಾವ್ಸ್ ತ್ಯಾ ವಾರ್ಯಾ ಸಾಂಗಾತಾ ಉಭೊನ್ ವೆಚೊ ಮಾತ್ರ್ ತಾಕಾ ದಿಸ್ಲೊ ಶಿವಾಯ್ ತಾಣೆಂ ಆಶೆಲ್ಲೆಂ ಕಿತೆಂಯ್ ತಾಕಾ ದಿಸ್ಲೆಂ ನಾ. ಭಾಯ್ಲಿ ದೀಶ್ಟ್ ಪಾಟಿಂ ಕಾಡ್ಲ್ಲ್ಯಾ ತಾಣೆಂ, ಹೆಂವ್ಶಿಲ್ಯಾ ತ್ಯಾ ಆಪ್ಲ್ಯಾ ಘರಾ ಭಿತರ್ಲ್ಯಾ ಸೊಪ್ಯಾ ವಯ್ಲ್ಯಾ ಬೀಟಿಚಾ ರುಕಾಟಾಚಾ ಕಾಳ್ಯಾ ಬಾಂಕಾರ್ ತಿ ಭೊಂವ್ಡಾಯ್ಲಿ.
ವ್ಹಯ್!
ತ್ಯಾ ಬಾಂಕಾರ್ ಬಸೊನ್ ಆಸ್ಲ್ಲ್ಯಾ ತ್ಯಾ ಸತ್ರೆಕ್ಯ್ ಆಜ್ ಕೊಣಾಚಿಗೀ ರಾಕೊಣ್ ಆಸಾ ಮ್ಹಳ್ಳ್ಯಾಪರಿಂ ಜೆರೊಮಾಕ್ ದಿಸ್ಲೆಂ. ಹ್ಯಾಚ್ ಸತ್ರೆಚಾ ಬಗ್ಲೆಕ್ ಎದೊಳ್ ಪಾಸೊನ್ ಬಸೊನ್, ತ್ಯಾ ಆಪ್ಲ್ಯಾ ಬೊಂಗ್ಲ್ಯಾಚಾ ಗೇಟಿಕ್ಚ್ ಪಳವ್ನ್ ರಾವ್ಲೆಲಿ ಎಸ್ತೆಲ್ ಹ್ಯಾ ವೆಳಾರ್ ಭಿತರ್ ಗೆಲ್ಲಿ.
ಜೆರೊಮಾನ್ ಪರ್ತ್ಯಾಕ್ ಆಪ್ಲಿ ನದರ್, ತ್ಯಾ ಆಪ್ಲ್ಯಾ ಬೊಂಗ್ಲ್ಯಾಚಾ ಗೇಟಿ ವಯ್ರ್ ಖಂಚಯ್ಲಿ.
ತಿತ್ಲ್ಯಾರ್!
ಘರಾಚಾ ಪಾಟ್ಲ್ಯಾ ಕುಶಿಂನ್ ಥಾವ್ನ್ ಏಕ್ ಭಯಂಕರ್ ಸುರ್ಪಾಯೆಚೆಂ ಉದೆಲ್ಲೆಂ ಜಗ್ಲಾಣೆಂ, ಜೆರೊಮಾ ಮುಕಾರ್ ಫಕತ್ತ್ ತಾಚೊ ಉಜ್ವಾಡ್ ಮಾತ್ರ್ ದಾಖವ್ನ್ ಧಾಂವ್ಲೆಂ. ತಾಚ್ಯಾ ಪಾಟ್ಲ್ಯಾನ್ಚ್ ಆಯ್ಕೊನ್ ಆಯ್ಲೊ ಏಕ್ ಭಯಂಕರ್ ಘಡ್ಗಡೊ, ಪಾಟ್ಲ್ಯಾನ್ಚ್ ಆಪ್ಲ್ಯಾ ಘರಾಚಾ ಪಾಟ್ಲ್ಯಾನ್ ಫುಟ್ಲೆಲ್ಯಾ ಪರಿಂ ಜಾಲೊ ತರ್ಯ್, ಜೆರೊಮಾಚೆ ದೊಳೆ ಮಾತ್ರ್ ಮುಕ್ಲ್ಯಾ ಗೇಟಿ ಥಾವ್ನ್ ಪಯ್ಸ್ ದಿಸ್ಚಾ ತ್ಯಾ ರಸ್ತ್ಯಾಕ್ ಪಳೆತಾಲೆ.
ತಿತ್ಲ್ಯಾರ್!
ಭಾಯ್ರ್ ಪಳಂವ್ಚ್ಯಾ ಜೆರೊಮಾಚಾ ದೊಳ್ಯಾಂಕ್ ತ್ಯಾ ಭಯಂಕರ್ ಪಾವ್ಸಾ ಮಧೆಂ, ಮಂದ್ ಮಂದ್ ಮ್ಹಳ್ಳ್ಯಾಪರಿಂ, ಪಯ್ಸ್ ಥಾವ್ನ್ ಕಸಲೆಂಗೀ ವಾಹನ್ ಯೆಂವ್ಚೆಂ ದಿಸ್ಲೆಂ.
ತಿತ್ಲೆಂಚ್!
"ಎಸ್ತೆಲಾ....?" ಜೆರೊಮಾನ್ ಆಪ್ಲ್ಯಾ ಬಾಯ್ಲೆಕ್ ಬೋಬ್ ಮಾರ್ಲಿ.
ತೊ ಆತಾಂ ರಾವ್ಲೊ ನಾ. ಕಸಲ್ಯಾಗೀ ಸಕ್ತೆನ್ ಮ್ಹಳ್ಳ್ಯಾಪರಿಂ ವೆವೆಗ್ಗಿಂ ಹೆವ್ಶಿಂ ಆಯಿಲ್ಲ್ಯಾ ತಾಣೆಂ, ಎದೊಳ್ ಪಾಸೊನ್ ತ್ಯಾ ಬಾಂಕಾರ್ ನಿದೊನ್ ಆಸ್ಲ್ಲ್ಯಾ ಸತ್ರೆಕ್ ಆರಾವ್ನ್ ತಿ ಸೊಡಯ್ಲಿ. ತೊ ಆಪ್ಲ್ಯಾ ಬಾಯ್ಲೆಕ್ ರಾಕ್ಲೊ ನಾ.
ವೆವೆಗ್ಗಿಂ ಘರಾಚಿಂ ಮೆಟಾಂ ದೆಂವ್ಲ್ಲೊ ತೊ ಭಾಯ್ರ್ ಜಾಲಾಕ್ ಆಯ್ಲೊ. ಹೆವ್ಶಿಂ ತೆವ್ಶಿಂ ಆಪ್ಲ್ಯಾ ವ್ಹಾಣಾಂಕ್ ತಾಣೆಂ ದೀಶ್ಟ್ ಭೊಂವ್ಡಾಯ್ಲಿ. ಪುಣ್, ಆಮ್ಸೊರಾರ್ ಆಸ್ಲ್ಲ್ಯಾ ತಾಚ್ಯಾ ಮತಿಕ್ ತೆಂ ಪಸಂದ್ ಜಾಲೆಂ ನಾ.
ತಿತ್ಲೆಂಚ್!
ತಾಣೆಂ ಆಪ್ಲ್ಯೊ ವ್ಹಾಣೊ ತಶ್ಯೊಚ್ ಸೊಡ್ಲ್ಯೊ ಆನಿ ತೊ ಆಪ್ಲ್ಯಾ ಬೊಂಗ್ಲ್ಯಾಚಾ ಗೇಟಿ ತೆವ್ಶಿಂ ಧಾಂವೊಂಕ್ ಲಾಗ್ಲೊ.
ಪುಣ್.....!
ಎದೊಳ್ ತಾಣೆಂ ರಾಕೊನ್ ಆಸೊನ್ ತೆಂ ಆಪ್ಣಾಚೆಂಚ್ ಮ್ಹಣೊನ್ ಚಿಂತ್ಲ್ಲೆಂ ವಾಹನ್ ತಾಚ್ಯಾ ದೊಳ್ಯಾಂ ಮುಕಾರ್ಚ್ ತಾಚ್ಯಾ ಬೊಂಗ್ಲ್ಯಾಚಿ ಗೇಟ್ ಉತ್ರೊನ್ ಗೆಲೆಂ. ಜಶೆಂ ತಾಕಾ ಆನಿ ಹ್ಯಾ ಜೆರೊಮಾಕ್ ಕಾಂಯ್ಚ್ ಸಂಭಂಧ್ ನಾ ಮ್ಹಳ್ಳ್ಯಾಪರಿಂ!
ಆಪ್ಲ್ಯಾ ಗೇಟಿ ಮುಕಾರ್ ರಾವಾನಾಸ್ತಾನಾ ತಶೆಂಚ್ ಪಾಶಾರ್ ಜಾವ್ನ್ ಗೆಲ್ಲ್ಯಾ ತ್ಯಾ ಕಾರಾಕ್ ಪಳವ್ನ್ ರಾವ್ಲ್ಲೊ ಜೆರೊಮ್ ಝಡ್ ವಾರ್ಯಾಚಾ ಪಾವ್ಸಾಕ್ ಅರ್ಧೊ ಬಿಜ್ಲೊ. ಆಪ್ಲ್ಯಾ ಹಾತಾಂತ್ಲ್ಯಾ ಸತ್ರೆಕ್ ತೆಂ ಝಡ್ ವಾರೆಂ ವೊಡುನ್ ವರ್ತಾ ತಶೆಂ ತಾಕಾ ಜಾತಾನಾ, ತೊ ಪರ್ತ್ಯಾಕ್ ಆಪ್ಲ್ಯಾ ಬಿಡಾರಾಕ್ ಪಾಟಿಂ ಪರ್ತಾಲೊ.
ಘರಾಚಾ ಮೆಟಾಂ ಮುಕಾರ್ ರಾವೊನ್ ಆಪ್ಲ್ಯಾ ಹಾತಾಂತ್ಲಿ ಸತ್ರಿ ದೊಡ್ಲೆಲ್ಯಾ ಜೆರೊಮಾಚೆ ದೊಳೆ, ತ್ಯಾ ತಾಚ್ಯಾ ಘರಾಚ್ಯಾ ಪಯ್ಲ್ಯಾ ಮೆಟಾರ್ ರಾವೊನ್ ಆಪ್ಣಾ ತೆವ್ಶಿಂಚ್ ಪಳಂವ್ಚ್ಯಾ ಆಪ್ಲ್ಯಾ ಬಾಯ್ಲೆ ವಯ್ರ್ ಖಂಚ್ಲೆ. ದೆಗೆನ್ ಉಭೆಂ ಆಸ್ಲ್ಲೆಂ ಸೆಲ್ಲಿ ಜೆರೊಮಾಕ್ಚ್ ಪಳೆತಾಲೆಂ.
ಹ್ಯಾ ಥೊಡ್ಯಾ ವೆಳಾ ಭಿತರ್, ಹ್ಯಾ ಮೌನ್ ಘರಾಂತ್ಲ್ಯಾ ನಿಗೂಡ್ ಮೌನಾ ಮಧೆಂ, ತೀನ್ ಅಸಹಾಯಕ್ ಕುಡಿಂಚ್ಯಾ ದೊಳ್ಯಾಂ ಮಧೆಂ ಎಕಾ ವಿಚಿತ್ರ್ ಥರಾಚಿಂ, ಎಕಾಮೆಕಾಕ್ ಭುಜಂವ್ಚಿಂ ಉತ್ರಾಂ ಆಶಾರ್ ಪಾಶಾರ್ ಜಾಲಿಂ.
ಮೊನಿ ಸಕತ್! ಜಿಬೆಚ್ಯಾ ಸಕ್ತೆ ಪ್ರಾಸ್ ಚಡ್ ಊಂಚ್ ಸಕತ್!
ಥೊಡಿಂಚ್ ಖಿಣಾಂ!
ಆಪ್ಲ್ಯಾ ಹಾತಾಂತ್ಲಿ ಸತ್ರಿ ದೊಡುನ್ ತ್ಯಾ ಸತ್ರೆಕ್ ಥಂಯ್ಚ್ ಗ್ರಾದಿ ವಯ್ರ್ ದವರ್ಲ್ಲೊ ಜೆರೊಮ್ ಆತಾಂ ಭರಾಧೀಕ್ ಮೆಟಾಂ ಕಾಡುನ್ ಘರಾ ಭಿತರ್ ಸರ್ಲೊ. ಭಿತರ್ ಆಯಿಲ್ಲೊ ತೊ, ತ್ಯಾಚ್, ತಾಚಿ ಬಾಯ್ಲ್ ರಾವೊನ್ ಆಸ್ಲ್ಲ್ಯಾ ಪಯ್ಲ್ಯಾ ಮೆಟಾರ್ ಯೇವ್ನ್ ಆಪ್ಲ್ಯಾ ಬಾಯ್ಲೆ ಬರಾಬರ್ ರಾವ್ಲೊ.
ಎಕಾಮೆಕಾಲಾಗಿಂ ಉಲಂವ್ಕ್ ಕೊಣಾಯ್ಕ್ಯ್ ಸಾದ್ಯ್ಚ್ ನಾ ಮ್ಹಳ್ಳ್ಯಾಪರಿಂ ತಿಂ ಥಂಯ್ ಉಭಿಂ ಆಸ್ಲ್ಲಿ. ಪುಣ್, ತಾಂಚಾ ಮತಿಂತ್ ಆನಿಂ ತಾಂಚಾ ದೊಳ್ಯಾಂ ದಿಶ್ಟೆಂತ್ ತಿಂ ಎಕಾಮೆಕಾಲಾಗಿಂ ಉಲಯ್ತಾಲಿಂ ಆನಿ ಎಕಾಮೆಕಾಕ್ ಭುಜಯ್ತಾಲಿಂ.
"ಆಜ್ ಆಸೊಯ್ ಹೊ ಪಾವ್ಸ್ ಕಿತ್ಯಾಕ್ ವೊತ್ತಾಗಾಯ್?" ಮತಿಂತ್ಚ್ ಉಲಯಿಲ್ಲಿ ಎಸ್ತೆಲ್ ಆಪುಣ್ ರಾವ್ಲೆಲ್ಯಾ ಕಡೆಚ್ಚ್ ಹುಳ್ವುಳ್ತಾಲಿ. ಜೆರೊಮ್ ಎದೊಳ್ಚ್ ಅರ್ಧೊ ಭಿಜ್ಲ್ಲೊ. ತಾಕಾ ಆಪ್ಣೆ ಭಿಜ್ಲ್ಲ್ಯಾಚಿ ಪರ್ವಾ ನಾತ್ಲ್ಲಿ.
ತಾಕಾ ಪರ್ವಾ ಆಸ್ಲ್ಲಿ ಜಾಲ್ಯಾರ್ ಫಕತ್ತ್ ತಾಚ್ಯಾ ಆಯ್ಚ್ಯಾ ರಾಕೊಣೆಚಿ!
ಹ್ಯಾ ಶಿರಾಂಧಾರಿ ಪಾವ್ಸಾಂತ್ಯ್, ತ್ಯಾ ಗಯ್ರಿ ಗಯ್ರಿ ದಿಸ್ಚಾ ವಾಟೆಂತ್ ಆಜ್ ಜೆರೊಮಾಕ್ ಆನಿ ಎಸ್ತೆಲಾಕ್ ತಾಂಚೆ ವಯ್ರ್ ಮಹಿನ್ಯಾ ಪಯ್ಲೆಂ ಮಾರ್ಲೆಲ್ಯಾ ಘಡ್ಗಡ್ಯಾ ಜಗ್ಲಾಣ್ಯಾನ್ ಹಾಡಂವ್ಚಾ ಪಾವ್ಸಾಚಿ ರಾಕೊಣ್ ಆಸ್ಲ್ಲಿ.
ವ್ಹಯ್! ಜೆರೊಮಾಚಾ ಆನಿ ಎಸ್ತೆಲಾಚಾ ರಗ್ತಾಚೆಂ ರಗಾತ್ ಆಜ್ ತಾಂಚಾ ದಾರಾರ್ ಯೇವ್ನ್ ಪಾವೊಂಕ್ ಆಸ್ಲ್ಲೆಂ.
ಮಿಶೇಲ್!
ಆಯ್ಚಾ ಸಾಕಾಳಿಂಚಾ ಪ್ಲೈಟಾರ್ ಧಾ ವೊರಾಂಕ್ ಆಪುಣ್ ಮಿಶೇಲಾ ಸವೆಂ ಮಂಗ್ಳುರಾಕ್ ಪಾವ್ತಾಂ ಮ್ಹಣೊನ್ ಫ್ರಾನ್ಸಿಸಾನ್ ಕಳಿತ್ ಕೆಲ್ಲೆಂ.
"ಕಶೆಂಯ್ ತರ್ಯ್ ಆಪ್ಣಾಚಾ ನಾತಿಕ್ ಆಪ್ಣಾಚಾ ವೆಂಗೆಂತ್ ಹಾಡುನ್ ದೀ!" ಪುತಾ ಲಾಗಿಂ ಜೆರೊಮಾನ್ ಉಪ್ಕಾರ್ ಮಾಗ್ಲ್ಲೊ.
ಆಜ್, ಮಿಶೇಲ್, ಆಪ್ಲ್ಯಾ ಆವಯ್ ಬಾಪಾಯ್ಕ್ ಹೊಗ್ಡಾವ್ನ್ ಆನಾಥ್ ಜಾಲ್ಲೆಂ ತೆಂ ಮ್ಯಾಂಚೆಸ್ಟರಾಂತ್ಲ್ಯಾ ಕ್ಯಾಥರೀನ್ ಆನಿ ತಾಚ್ಯಾ ಕುಟ್ಮಾಕ್ ಸಾಂಡುನ್ ಆಪ್ಲ್ಯಾ ಹಕ್ಕಾಚಾ ಗಾಂವಾಕ್ ಯೇಂವ್ಕ್ ಆಸ್ಲ್ಲೆಂ.
ಮಿಶೇಲ್ ಮಂಗ್ಳುರಾಕ್ ಯೇಂವ್ಕ್ ಆಸ್ಲ್ಲೆಂ.
ಆಪ್ಲ್ಯಾ ಪುತಾ ವಯ್ರ್ ನಿಮಾಣಿ ಏಕ್ ದೀಷ್ಟ್ ಸಯ್ತ್ ಘಾಲುಂಕ್
ಸಕನಾತ್ಲ್ಲ್ಯಾ ಜೆರೊಮಾಕ್ ಆನಿ ಎಸ್ತೆಲಾಕ್ ತಾಂಚೆಂ ನಾತ್ ತಾಂಕಾ ಮೆಳೊಂಕ್ ಯೆತಾ ತೆಂ ಕಳ್ತಾನಾ ತಾಂಚಾ ಕಾಳ್ಜಾಂತ್ ಜಳ್ಚಾ ಉಜ್ಯಾ
ವಯ್ರ್ ಸಮಾಧಾನೆಚಿಂ ದುಖಾಂ ಗಳೊನ್ ಗೆಲ್ಲಿಂ. ಕಾರಾಣ್...., ಏಕ್ ಥೆಂಬೊ ರಾಗಾತ್ ಅಜೂನ್ ಜಿವಂತ್ ಆಸ್ಲ್ಲೆಂ. ತಾಂಚಾ
ಸಂತಾನಾಚೆಂ ಸಂತಾನ್ ಮಿಶೇಲಾಚಾ ರುಪಾರ್ ಅಜೂನ್ ಜಿವಂತ್ ಆಸ್ಲ್ಲೆಂ.
ಆನಿ ಆಜ್!
ಜೆರೊಮಾಕ್ ಆನಿ ಎಸ್ತೆಲಾಕ್ ತಾಂಚಾ ಸಂಭಂಧಾಚಿ ತಾನ್ ಲಾಗ್ಲ್ಲಿ.
ಭಾಯ್ರ್ ಶಿರಾಂಧಾರಿ ವೊತ್ಚ್ಯಾ ಪಾವ್ಸಾ ಥಾವ್ನ್ ಥಾಂಬಂವ್ಕ್
ಸಾದ್ಯ್ ನಾತ್ಲೆಲಿ ತಾನ್!
ಹ್ಯಾಚ್ ಖಾತಿರ್ ಬೋವ್ಶ್ಯಾ ತೊ ಪಾವ್ಸ್ಯ್ ಆಪ್ಲೆಂ ಹಟ್
ಸೊಡಿನಾತ್ಲ್ಲೊ.
ಭಾಯ್ಲ್ಯಾನ್ ಪಾವ್ಸಾಚೆಂ ಹಟ್! ಭಿತರ್ಲ್ಯಾನ್ ಸಂಭಂಧಾಚಿ ತಾನ್!
ಹೆಂ ದೊಗಾಂ ಮಧ್ಲೆಂ ಝುಜ್ ಚಲಾತ್ತ್ ಗೆಲೆಂ!
ದೊಗಾಂಯ್ನ್ಯ್ ಆಪಾಪ್ಲೆಂ ಹಟ್ ಸೊಡ್ಲೆಂ ನಾ.
ನಿಮಾಣೆಂ!
ಪಾವ್ಸಾನ್ಚ್ ಆಪ್ಲ್ಯಾ ಸಲ್ವಣೆಕ್ ಮಾಂದುನ್ ಘೆತ್ಲಿ.
ಜೆದ್ನಾಂ ಜೆರೊಮಾಚಾ ಬೊಂಗ್ಲ್ಯಾ ಸಾಮ್ಕಾರ್ ಏಕ್ ಅಂಬಾಸಿಡರ್ ಕಾರ್ ಯೇವ್ನ್ ರಾವ್ಲೆಂ ತೆದ್ನಾಂ!
*************
ಮಿಶೇಲ್!
ಮಂಗ್ಳುರ್ಚಾ ಆರ್ಬಿ ದರ್ಯಾಂತ್, ರಾತಿಚಾ ಸುಶೆಗಾಕ್ ವೆಂಗುನ್ ಗೆಲ್ಲೊ ತಾಂಬ್ಶ್ಯಾ ರಂಗಾಳ್ ಕಿರ್ಣಾಂಚೊ
ಸುರ್ಯೊ, ಒಮ್ಜೂರ್ಚಾ ಅಂತ್ರಳಾಕ್ ವೆಂಗ್ಲ್ಲ್ಯಾ ಮಾಡಿಯಾಂಚಾ ಖುಬ್ಯಾ
ಮದ್ಲ್ಯಾನ್ ಕಳೊ ಫುಲೊನ್ ಆಯಿಲ್ಲ್ಯಾ ಪರಿಂ ಫುಲೊನ್ ಯೆತಾಲೊ ತಶೆಂ,
ಮಿಶೇಲ್ ಆಪ್ಲ್ಯಾ ಜಿವಿತಾಚೆ ಎಕೇಕ್ಚ್ ದೀಸ್ ಸಾಂಡುನ್ ಕುಡಿನ್ ಆನಿ
ಮತಿನ್ ವ್ಹಾಡೊಂಕ್ ಲಾಗ್ತಾನಾ, ತಾಚ್ಯಾ ಮತಿಂತ್ಲಿಂ ತಿಂ ಮ್ಯಾಂಚೆಸ್ಟರಾಂತ್ಲಿಂ ಪಿಂತುರಾಂ
ಸವ್ಕಾಸ್ ಗಯ್ರಿಂ ಗಯ್ರಿಂ ಜಾವ್ನ್ ನಿಮಾಣೆಂ ಮಾಜ್ವೊನ್ ಯೇಂವ್ಕ್
ಲಾಗ್ಲಿಂ ಜಾಲ್ಯಾರ್ಯ್ ಕ್ಯಾಥರೀನಾನ್ ನಿಮಾಣ್ಯಾ ಘಡಿಯೆ
ಮಿಶೇಲಾಕ್ ಫ್ರಾನ್ಸಿಸಾ ಸವೆಂ ಮಂಗ್ಳುರಾಕ್ ದಾಡುನ್ ದಿತಾನಾ ತಾಚ್ಯಾ
ಹಾತಾಂತ್ ಚೆಪ್ಲ್ಲ್ಯಾ ತ್ಯಾ ಆಲ್ಬಮಾಂತ್ ಮ್ಯಾಂಚೆಸ್ಟರಾಚೊ ಉಡಾಸ್ ಅಜೂನ್ ಜಿವೊ ಆಸ್ಲ್ಲೊ.
ಚಾರ್ಲ್ಸ್ ಆನಿ ವಿವಿಯಾನಾಚಾ ಸಾಂಗಾತಾ, ಕ್ಯಾಥರೀನಾಚಾ ಘರಾ ತಾಂಚಾ
ಸುಖಾ ದುಖಾ ವೆಳಾರ್ ತಾಣಿಂ ಕಾಡ್ಲೆಲ್ಯೊ ತ್ಯೊ ಥೊಡ್ಯೊ ತಸ್ವೀರ್ಯೊ ತಾಂತುಂ ಆಸ್ಲ್ಲ್ಯೊ.
ಮಿಶೇಲಾಕ್ ಆತಾಂ ಪಾಂಚ್ ವರ್ಸಾಂ ಪ್ರಾಯ್ ಭರ್ಲ್ಲಿ. ಮ್ಯಾಂಚೆಸ್ಟರಾ ಥಾವ್ನ್
ಮಂಗ್ಳುರಾಕ್ ಆಯಿಲ್ಲ್ಯಾ ದೋನ್ ವರ್ಸಾಂ ಆವ್ದೆಂತ್ ಆಪ್ಲ್ಯಾ ಆವಯ್
ಬಾಪಯ್ಚೊ ಉಡಾಸ್ ತೆಂ ಸಂಪೂರ್ಣ್ ವಿಸ್ರೊನ್ ಫಕತ್ತ್ ತ್ಯಾ ಫೋಟೋ ಆಲ್ಬಮಾಂತ್
ಮಾತ್ರ್ ತಾಂಚೊ ಉಡಾಸ್ ಜಿವೊ ಆಸ್ಲ್ಲೊ. ತ್ಯಾ ಭಾಯ್ರ್ ವಿವಿಯಾನಾನ್
ಮಿಶೇಲಾ ಥಂಯ್ ಪಳೆಲ್ಲಿಂ ಸಪ್ಣಾಂ ತಾಣೆಂ ಉಲಯಿಲ್ಲಿಂ ಉತ್ರಾಂ, ತಾಣೆಂ ತಾಚೊ ಕೆಲ್ಲೊ ತೊ
ಮೋಗ್, ಉಭಾಳ್ ವೆಂಗೆಂತ್ ತಾಣೆಂ ತಾಕಾ ದಿಲ್ಲೊ ಸುಶೆಗ್, ತೊ
ಸಂತೊಸ್, ತೊ ಖೆಳ್, ತೆ ಉಮಾಳೆ, ತೆ ವಳ್ವಳೆ, ಮಿಶೇಲಾಚಾ
ಸ್ಮ್ರತಿ ಪಡ್ದ್ಯಾರ್ ಥಾವ್ನ್ ಸಗ್ಳೆಂ ಮಾಯಾಗ್ ಜಾವ್ನ್
ಮ್ಯಾಂಚೆಸ್ಟರ್ ಮ್ಹಳ್ಯಾರ್ ತಾಕಾ ಆತಾಂ ಫಕತ್ತ್ ಏಕ್ ತೊ ಆಲ್ಬಮ್ ಆನಿ
ವರ್ಸಾಕ್ ದೋನ್ ಪಾವ್ಟಿಂ ಫೋನ್ ಕರುನ್ ಆಪ್ಣಾಚೊ ಖಂತ್
ಹುಸ್ಕೊ ವ್ಯಕ್ತ್ ಕರ್ಚಿ ಕ್ಯಾಥರೀನ್ ಮಾತ್ರ್ ಜಾಂವ್ಕ್ ಪಾವ್ಲಿ.
"ಮಿಶೇಲ್ ಡಾರ್ಲಿಂಗ್.....! ತುಂ ಮ್ಹಜ್ಯಾ ಧುವೆಚೆಂ ಪ್ರಿನ್ಸೆಸ್! ತುಜ್ಯೆ ಥಂಯ್ ತಾಣೆಂ ಕಸಲೆಂಗೀ ಏಕ್ ರಾಣಿಯೆಪಣಾಚೆಂ ಲಕ್ಷಣ್ ಪಳೆಲ್ಲೆಂ. ......ಬಿ ಎ
ಪ್ರಿನ್ಸೆಸ್, ಬಿಕಾಸ್ ಯು ಹ್ಯಾವ್ ಟು....... ಟು ರೂಲ್ ದಿ ವರ್ಲ್ಡ್...!"
ಮಿಶೇಲಾಚಾ ಪಾಂಚ್ವ್ಯಾ ವರ್ಸಾಚಾ ಬರ್ತ್ಡೇ ಕ್ ಕ್ಯಾಥರೀನಾನ್
ಮಿಶೇಲಾಕ್ ಮ್ಯಾಂಚೆಸ್ಟರಾ ಥಾವ್ನ್ ಫೋನ್ ಕರುನ್ ತಾಕಾ ತಾಚ್ಯಾ ಜಲ್ಮಾ
ದಿಸಾಚೆ ಶುಭಾಶಯ್ ಪಾಟಯಿಲ್ಲೆ.
ಫೋನಾ ವಯ್ಲ್ಯಾ ಕ್ಯಾಥರೀನಾಚಾ ಉತ್ರಾಂ ಥಾವ್ನ್, ಪಯ್ಲ್ಯಾ
ಪಾವ್ಟಿಂ ಮಿಶೇಲಾಚಾ ತರ್ನ್ಯಾ ಮತಿಂತ್ ಸಿಂತಿಮೆಂತಾಂಕ್ ಜಾಗಯ್ಲೆಂ.
ಮಂಗ್ಳುರಾಕ್ ಮಿಶೇಲ್ ಪಾವ್ಲ್ಲ್ಯಾ ದಿಸಾ ಥಾವ್ನ್ ಜೆರೊಮಾನ್ ಆನಿ ಎಸ್ತೆಲಾನ್, ತಾಚ್ಯಾ ಆಜ್ಯಾ ಆಜಿಯೆನ್ ತಾಕಾ ಬರೆಂಚ್ ಸಾಂಬಾಳ್ಲ್ಲೆಂ. ತಾಚೊ ಬರೊಚ್
ಹುಸ್ಕೊ ಘೆತ್ಲ್ಲೊ. ಜೆರೊಮ್ ತರ್ಯ್ ಆಪ್ಲ್ಯಾ ಪಿಡೆಚೆಂ ಆನಿ ಭಲಾಯ್ಕೆಚೆಂ
ವಿಸ್ರೊನ್ ನಾತಿಕ್ ಖಂಯ್ಚಾಂಯ್ತ್ಯ್ ಉಣೆಂಪಣ್ ಜಾಯ್ನಾತ್ಲ್ಲೆ
ಪರಿಂ ಪಳೆತಾಲೊ.
ಮ್ಯಾಂಚೆಸ್ಟರಾ ಥಾವ್ನ್ ಮಂಗ್ಳುರಾಕ್ ಪಾವ್ಲೆಲೆಂ ಮಿಶೇಲ್, ಎಕ್ಸುರ್ಪಣಾಚಾ ಧಾವೆಂತ್ ಆಡ್ಚಾಲ್ಲ್ಯಾ ಜೆರೊಮಾಕ್ ಆನಿ ಎಸ್ತೆಲಾಕ್, ತಾಂಕಾಂ ತಾಂಚ್ಯಾ ಎಕ್ಸುರ್ಪಣಾಂತ್, ತಾಂಚ್ಯಾ ಫುಡಾರಾಚೊ ಭರ್ವಸೊ ಜಾವ್ನ್ ಉದೆಲ್ಲೆಂ. ಆಪ್ಲ್ಯಾ
ಪುತಾಕ್ ಆನಿ ಸುನೆಕ್ ಹೊಗ್ಡಾಯಿಲ್ಲಿ ದೂಖ್ ತಾಂಕಾಂ ಆಸ್ಲ್ಲಿ.
ಹ್ಯಾ ದುಖಿಕ್ ಮಿಶೇಲಾಚಾ ನೆಣ್ತ್ಯಾಂ ಹಾಸ್ಯಾಂ ಮುಕಾರ್ ತಿಂ
ವಿಸ್ರಾತಾಲಿಂ. ತಾಂಚಾ ಜಿವಿತಾಂತ್ ಜಾವ್ನ್ ಗೆಲ್ಲ್ಯಾ ಉಣ್ಯಾಪಣಾಕ್ ಭರ್ತಿ ಕರುಂಕ್ ಆತಾಂ ಫಕತ್ತ್
ಮಿಶೇಲ್ ತಾಂಚಾ ಮುಕಾರ್ ಹಾಜರ್ ಆಸ್ಲ್ಲೆಂ. ತಾಂಚಿಂ ಭುರ್ಗಿಂ ತಾಂಕಾಂ
ಸಾಂಡುನ್ ಗೆಲ್ಯಾ ಉಪ್ರಾಂತ್ ಆಧಾರ್ ಚುಕೊನ್ ಗೆಲ್ಲ್ಯಾ
ಪರಿಂ ಜಾಲ್ಲ್ಯಾ ತಾಂಕಾಂ ಮಿಶೇಲ್ ತಾಂಚೊ ಫುಡಾರಾಚೊ ಆಧಾರ್ ಜಾವ್ನ್ ಆಯಿಲ್ಲೆಂ.
ಮೌನತಾ ಭರ್ಲೆಲ್ಯಾ ತ್ಯಾ ತಾಂಚಾ ಘರಾಂತ್ ಪರ್ತ್ಯಾಕ್ ಭುರ್ಗ್ಯಾಂಚ್ಯೊ
ಹಾಸೊ, ಭುರ್ಗ್ಯಾಂಚೊ ಖೆಳ್, ಭುರ್ಗ್ಯಾಂಚೆಂ ರಡ್ಣೆಂ ಆಯ್ಕೊಂಕ್ ಆರಂಭ್ ಜಾಲ್ಲೆಂ.
ಮಿಶೇಲಾ ವರ್ವಿಂ ಪರ್ತ್ಯಾಕ್ ಜೆರೊಮಾಚೆಂ ಆನಿ ಎಸ್ತೆಲಾಚೆಂ ಘರ್, ಬಿಡಾರ್ ಜಾಂವ್ಕ್
ಪಾವ್ಲೆಂ.
"ಪಳೆಲೆಂಯ್ಮೂ ಎಸ್ತೆಲಾ....! ಮಿಶೇಲಾ ವರ್ವಿಂ ಆಜ್ ಆಮ್ಚೆಂ ಘರ್ ಕಿತ್ಲೆಂ
ಸೊಭಿತ್ ದಿಸ್ತಾ.......!"
ಜೆರೊಮಾಚಾ ಸಾಂಗ್ಣ್ಯಾಂತ್ ಖಂಡಿತ್ ಸತ್ ಆಸ್ಲ್ಲೆಂ. ಹ್ಯಾ ಸತಾಕ್ ಕಾರಾಣ್ ಖಂಡಿತ್ ’ಮಿಶೇಲ್’
ಮ್ಹಣೊನ್ಯ್ ಎಸ್ತೆಲ್ ಜಾಣಾಂ.
ಪುಣ್ ಮಿಶೇಲ್.....?
ಆಪ್ಣಾಚಾ ಫುಡಾರಾಕ್ ಭರ್ವಸೊ ಆನಿ ಆಧಾರ್ ಬಾಸಾಂವ್ಕ್, ಆಜ್, ಆಮ್ಕಾಂ ಆಪ್ಲ್ಯಾಚ್
ಪುತಾ ಆನಿ ಸುನೆಕ್ ಬಲಿ ದಿಂವ್ಚೆಂ ಪಡ್ಲೆಂ? ಎಸ್ತೆಲ್ ಚಿಂತಾಲಿ. ತಿಚಿಂ ಚಿಂತ್ನಾಂಯ್ ಕಾಂಯ್ ಫಟ್ಕಿರಿಂ
ನ್ಹಯ್! ಪುಣ್ ಹಾಕಾ ಕಾರಾಣ್ ಕೋಣ್? ಜಲ್ಮಾಲ್ಲ್ಯಾ ಬಾಳಾಕ್ ಕೋಣ್
ಮೋಗ್ ದಿತಾ ತಿಂಚ್ ತ್ಯಾ ಬಾಳಾಚೊ ಆಧಾರ್ ಜಾತಾತ್! ತಶೆಂಚ್ ಉತರ್
ಪ್ರಾಯೆಕ್ ಪಾವ್ಲೆಲ್ಯಾಂಕ್ ಕೋಣ್ ಭರ್ವಸೊ ದಿತಾ ತಿಂಚ್ ತಾಂಚೆಂ
ಸುಖ್ ಜಾತಾತ್. ಪುಣ್ ಎಕಾ ಬಾಳಾಚಾ ಆನಿ ಉತರ್ ಪ್ರಾಯೆಕ್
ಪಾವ್ಲೆಲ್ಯಾಂಚಾ ಮಧೆಂ ಆಸ್ಚೊ ವ್ಯತ್ಯಾಸ್ ಮ್ಹಳ್ಯಾರ್ ತೆಂ ಬಾಳ್ ಚಿಂತುಂಕ್
ಸಕಾನಾ ಆನಿ ಪ್ರಾಯ್ ಉತಾರ್ಲ್ಲಿಂ ಚಿಂತುಂಕ್ ಸಕ್ತಾತ್. ಬಾಳಾಕ್ ಆಪ್ಣಾಚೆಂ ಆನಿ
ಪೆಲೆಂ ಮ್ಹಳ್ಳೊ ವ್ಯತ್ಯಾಸ್ ಕಳಾನಾ ಪುಣ್ ಪ್ರಾಯ್ ಉತಾರ್ಲ್ಲ್ಯಾಂಕ್ ಕಳ್ತಾ. ಭೋವ್ಶ್ಯಾ
ಹ್ಯಾಚ್ ಖಾತಿರ್ ಎಸ್ತೆಲಾಕ್ ತಿಚ್ಯಾ ಮತಿಂತ್ಲ್ಯಾ ಕೊನ್ಶ್ಯಾಂತ್ ಏಕ್ ಖರ್ಗೊಣಿ
ಮಾತ್ರ್ ಆಸ್ಲ್ಲಿ ಕೀ "ಕಾಂಯ್ ಆಮ್ಚಾ ಆಶೆಕ್ ಲಾಗೊನ್ ಆಮಿಂಚ್ ಆಮ್ಚಾ ಭುರ್ಗ್ಯಾಂಕ್
ಮರ್ಣಾಕ್ ಒಪ್ಸಿಲೆಂ?"
ಹ್ಯಾಚ್ ಖರ್ಗೊವ್ಣೆಕ್ ಲಾಗೊನ್ ಎಸ್ತೆಲ್ ಮಿಶೇಲಾಕ್ ಖಂಯ್ಚಾಂಯ್ತ್ಯ್ ಕಾಂಯ್ಚ್ ಉಣೆಂ ಜಾಯ್ನಾತ್ಲೆಲ್ಯಾ ಪರಿಂ ಪಳೆತಾಲಿ. ಪ್ರತ್ಯೇಕ್ ಜಾವ್ನ್, ನಾತಿಚೆಂ ಸಗ್ಳೆಂ ಕಾಮ್ ಆಪ್ಣೆಂಚ್ ಕರುನ್ ಸೆಲ್ಲಿಕ್ ತಿ ಘರಾಚೆಂ ಕಾಮ್ ಸೊಡುನ್ ದಿತಾಲಿ.
ಮಿಶೇಲ್, ಜೆರೊಮಾಕ್ ಆನಿ ಎಸ್ತೆಲಾಕ್, ತಾಣಿಂ ತಾಕಾ ದಾಖಯಿಲ್ಲ್ಯಾ ಆನಿ ದಾಖಂವ್ಚಾ ಮೊಗಾ ಮುಖಾರ್ ಆಪ್ಣಾಕ್ ಸಂಪೂರ್ಣ್ ತಾಂಚೆ ಸ್ವಾದೀನ್ ಕರ್ತಾಲೆಂ. ಫೋಟೋ ಆಲ್ಬಮಾಂತ್ ಆಸ್ಲೆಲಿಂ ತಿಂ ಆಪ್ಣಾಚಿಂ ಆವಯ್ ಆನಿ ಬಾಪಯ್ ಮ್ಹಣೊನ್ ಮಾತ್ರ್ ತೆಂ ಜಾಣಾಂ. ತ್ಯಾ ಶಿವಾಯ್ ತಾಣಿಂ ದಿಲ್ಲೊ ಮೋಗ್ ಆನಿ ಆಪ್ಣಾಕ್ ತಾಣಿಂ ವಾಗಯಿಲ್ಲೆ ತೆ ದೀಸ್ ತಾಚ್ಯಾ ದೊಳ್ಯಾಂ ಫುಡ್ಯಾನ್ ಜಳ್ಕಾಲೆ ನಾಂತ್.
"ಬಿ ಎ ಪ್ರಿನ್ಸೆಸ್..... ಬಿಕಾಸ್ ಯು ಹ್ಯಾವ್ ಟು,.......ಟು ರೂಲ್ ದಿ ವರ್ಲ್ಡ್!" ಕ್ಯಾಥರೀನಾಚಿಂ ಉತ್ರಾಂ ಮಿಶೇಲಾಚಾ ಕಾನಾಂತ್ ಪರ್ತ್ಯಾಕ್ ಪರ್ತ್ಯಾಕ್ ಆಯ್ಕೊಕ್ ಯೆತಾಲಿಂ. ತೆಂ ಆತಾಂ ಪ್ರಿನ್ಸೆಸ್ ಮ್ಹಳ್ಳ್ಯಾ ಉತ್ರಾಚೊ ಮತ್ಲಬ್ ಸಮ್ಜೊಂಕ್ ಸಕ್ತಾಲೆಂ. "ಆಪುಣ್ ಮ್ಯಾಂಚೆಸ್ಟರಾಂತ್ ಜಲ್ಮಾಲ್ಲಿಂ ಆನಿ ಕ್ಯಾಥರೀನ್ ಆಪ್ಣಾಚಿ ಆಜಿ!" ಮ್ಹಣೊನ್ ತೆಂ ಆತಾಂ ಸಮ್ಜಾತಾಲೆಂ ಮಾತ್ರ್ ಶಿವಾಯ್ ತಾಚ್ಯಾ ಆವಯ್ಚಾ ಕುಟ್ಮಾಚಿ ಖರಿ ವ್ಹಳಕ್ ಸಂಪೂರ್ಣ್ ಥರಾನ್ ಮಂಗ್ಳುರಾಂತ್ ಕೋಣ್ಚ್ ನೆಣಾಂ ಆಸ್ಲ್ಲೆಂ.
ರಾಯ್ ಕುಂವರಿಚ್ಯೊ ಕಾಣಿಯೊಂ ತಾಣೆಂ ಸಭಾರ್ ಆಯ್ಕಾಲ್ಲ್ಯೊ. ಕಾಣಿಯೆಂತ್ಲ್ಯಾ ರಾಯ್ ಕುಂವರಿಚಿಂ ಆವಯ್ ಬಾಪಯ್ ರಾಯ್ ಆನಿ ರಾಣಿ ಜಾವ್ನ್ಚ್ ಆಸ್ತಾಲಿಂ. ಪುಣ್ ಹಾಂಗಾ ಆಪ್ಣಾಚೆಂ ಕೋಣ್ಯ್ ರಾಯ್ ಆನಿ ರಾಣಿ ನಾ ಮ್ಹಣ್ತಾನಾ ಆಪ್ಣೆಂ ರಾಯ್ ಕುಂವರಿ ಜಾಂವ್ಚೆಂ ಕಶೆಂ? ಮಿಶೇಲಾಚಾ ಮತಿಂತ್ ಸವಾಲ್ ದೊಸ್ತಾಲೆಂ.
"ಸಗ್ಳಿಂ ಆವಯ್ ಬಾಪಯ್ ತಾಂಚಾ ಭುರ್ಗ್ಯಾಂಕ್ ರಾಯ್ ಕುಂವರ್ ಆನಿ ರಾಯ್ ಕುಂವರಿಚ್ ಮ್ಹಣೊನ್ ಚಿಂತಾತ್. ಹಾಂತು ನವಾಲ್ ಕಾಂಯ್ ನಾ. ಸಂಸಾರಾಚೆರ್ ರಾಜ್ ಚಲಯ್ಲ್ಯಾರ್ ಮಾತ್ರ್ ರಾಯ್ ಆನಿ ರಾಣಿ ಜಾಯ್ನಾಂತ್!" ಮಿಶೇಲಾಚಾ ನೆಣ್ತ್ಯಾ ಸವಾಲಾಕ್ ಎಸ್ತೆಲ್ ಜವಾಬ್ ದಿತಾಲಿ.
"ತರ್.....!?"
"ಮನ್ಶ್ಯಾಂಚಾ ಕಾಳ್ಜಾಂತ್ ರಾಜ್ ಚಲಂವ್ಚೆಂ ಸಗ್ಳ್ಯಾ ವರ್ನಿಂ ವರ್ತೆಂ! ಹೆಂ ಚಡಾವತ್ ಸಗ್ಳ್ಯಾಂಕ್ ಆಸಾದ್ಯ್. ಹ್ಯಾ ಆಸಾದ್ಯಾಕ್ ಸಾದ್ಯ್ ಕೆಲ್ಲಿಂಚ್ ಖರೊ ರಾಯ್ ಆನಿ ರಾಣಿ. ಭೋವ್ಶ್ಯಾ ತುಜ್ಯಾ ಆವಯ್ನ್ ಆನಿ ಬಾಪಾಯ್ನ್ ಹೆಂಚ್ ಸಪಾಣ್ ತುಜ್ಯೆ ಥಂಯ್ ಪಳೆಲ್ಲೆಂ........!" ಎಸ್ತೆಲ್ ಜಾಲ್ಯಾರ್ಯ್ ಹ್ಯಾ ನೆಣ್ತ್ಯಾ ಮತಿಕ್ ಕಿತೆಂ ಸಮ್ಜಯ್ತೆಲಿ.
"ಸಪಾಣ್....?" ಮಿಶೇಲಾಚಾ ಮತಿಕ್ ಕಿತೆಂಗೀ ಝಳ್ಕಾಲೆಂ.
"ತುಂ ತುಜ್ಯಾ ಬಾಪಾಯ್ಚೆಂ ಸಪಾಣ್ ಮಿಶೇಲ್!" ಹರ್ಯೆಕ್ ಪಾವ್ಟಿಂ ಆಪುಣ್ ಆಜಿಯೆಲಾಗಿಂ ಉಲಯ್ತಾಂ ಉಲಯ್ತಾಂ ಕ್ಯಾಥರೀನಾನ್ ಆಪ್ಲ್ಯಾ ಬಾಪಯ್ ವಿಶಿಂ ಆಪ್ಣಾಕ್ ಜಾಗಯಿಲ್ಲೆಂ ಮಿಶೇಲಾಕ್ ಉಡಾಸ್ ಆಯ್ಲೆಂ.
"ಆಪುಣ್ ಆಪ್ಲ್ಯಾ ಬಾಪಾಯ್ಚೆಂ ಸಪಾಣ್ ಜಾವ್ನಾಸ್ಲ್ಲಿಂ ಆನಿ ಆಪ್ಲ್ಯಾ ಆವಯ್ಚೆಂ ರಾಯ್ ಕುಂವರಿ!" ಮಿಶೇಲಾಚಾ ಮತಿಂತ್ ಹೆಂ ದ್ರಡ್ ಜಾಲ್ಲೆಂ.
"ಪಳೆ ಪುತಾ.... ತು ಆತಾಂ ಪಯ್ಲೆಂಚಾ ಪರಿಂ ಲ್ಹಾನ್ ನೆಣ್ತೆಂ ಬಾಳ್ ನ್ಹಯ್! ತುಜ್ಯೆ ಥಾವ್ನ್ ಆಮಿಂ ಕಾಂಯ್ಚ್ ಲಿಪಂವ್ಕ್ ಸಕಾನಾಂವ್. ಕಿತ್ಯಾಕ್ ಮ್ಹಳ್ಯಾರ್ ಆಜ್ ನಾ ತರ್ ಫಾಲ್ಯಾಂ ಸಗ್ಳೆಂ ತುಜ್ಯಾ ಮತಿಕ್ ಸಮ್ಜಾತೆಲೆಂ. ತುವೆಂಯ್ ತುಜ್ಯಾ ಆವಯ್ ಬಾಪಯ್ ಪರಿಂ ಜಾಂವ್ಕ್ ಆಸಾ!" ಎಸ್ತೆಲ್ ಮಿಶೇಲಾಕ್ ಸಮ್ಜಾಯ್ತಾಲಿ.
ಆತಾಂ ಸೆಲ್ಲಿಚೆಂ ಕಾಜಾರ್ ಜಾಲ್ಲೆಂ. ಜೆರೊಮಾನ್ ತಾಕಾ ಏಕ್ ಬರಿ ಸಯ್ರಿಕ್ ಪಳವ್ನ್ ಕಾಜಾರ್ ಕರುನ್ ದಿಲ್ಲೆಂ. ತೆಂ ತಾಚ್ಯಾ ನೊವ್ರ್ಯಾಗೆರ್ ಗೆಲ್ಯಾ ಉಪ್ರಾಂತ್ ಜೆರೊಮಾನ್ ಆಪ್ಣಾಕ್ ಘರ್ ಕಾಮಾಕ್ ಮ್ಹಣೊನ್ ಕೊಣಾಯ್ಕ್ಯ್ ದವರ್ಲೆಂ ನಾ. ತಾಚ್ಯೆ ಬದ್ಲಾಕ್ ದಿಸಾಕ್ ಚ್ಯಾರ್ ವೊರಾಂ ಬೆಂದೂರ್ಚಿಚ್ ಎಕ್ಲಿ ಬಾಯ್ಲ್ ಘರ್ಚೆಂ ಕಾಮ್ ಕರುಂಕ್ ಯೆತಾಲಿ ಆನಿ ಆಪ್ಲೆಂ ಕಾಮ್ ಕರುನ್ ವೆತಾಲಿ. ಮಿಶೇಲ್ ಆತಾಂ ವ್ಹಡ್ ಜಾಲ್ಲೆಂ. ಕುಡಿಂತ್ ಆನಿ ರುಪಾಂತ್ ತಾಚ್ಯೆ ಥಂಯ್ ಮಸ್ತ್ ಬದ್ಲಾವಣ್ ಜಾಲ್ಲಿ. ಆವಯ್ ಆನಿ ಬಾಪಾಯ್ಚೆಂ ಸಾರ್ಕೆಂ ತಾಕಾ ತಿತ್ಲೆಂ ಯೇಂವ್ಕ್ ನಾತ್ಲ್ಲೆಂ ಜಾಲ್ಯಾರ್ಯ್ ತಾಚ್ಯಾ ನೀಜ್ ಆಜಿಯೆಚೆಂ ಲಾರಾಚೆಂ ಸಂಪೂರ್ಣ್ ರೂಪ್ ತಾಕಾ ಆಯಿಲ್ಲೆಂ. ಸೊಭಾಯೆಂತ್ ಸರಿ ಕೆಲ್ಯಾರ್ ಮಿಶೆಲ್ ಸಗ್ಳೆಂಚ್ ಲಾರಾ ಪರಿಂ ದಿಸ್ತಾಲೆಂ. ತಾಚ್ಯಾ ಮತಿಕ್ ಜಾಣ್ವಾಯ್ ಯೆತಾನಾ ಮಿಶೇಲ್ ಆಪ್ಣಾ ವಿಶಿಂ ಹರ್ಯೇಕ್ ಸಂಗ್ತಿ ಜಾಣಾಂ ಜಾಲೆಂ. ಹಾಚ್ಯೆ ಥಾವ್ನ್ ತಾಚ್ಯಾ ಮತಿ ಭಿತರ್ ತೀನ್ ಸಂಗ್ತ್ಯಾಂ ವಯ್ರ್ ಮಾತ್ರ್ ತೆಂ ಚಡ್ಚ್ ಪ್ರಭಾವಿತ್ ಜಾಲೆಂ.
ಪಯ್ಲೆಂ ಜಾವ್ನ್ ಅಪ್ಲ್ಯಾ ಜಲ್ಮಾಗೂಣಾ ಥಾವ್ನ್ ತೆಂ ಆಕರ್ಷಿತ್ ಜಾಲ್ಲೆ ತೆ ಸೊಭಿತ್ ರಂಗ್ ರಂಗೀನ್ ವಿವಿಧ್ ರೂಪಾಚೆ ರಂಗ್!
ದುಸ್ರೆಂ ಜಾವ್ನ್ ಆಪ್ಲ್ಯಾ ದೊಳ್ಯಾಂ ಮುಕಾರ್ ದಿಸ್ಚೆಂ ಆಪ್ಣಾಚೆಂಚ್ ರಾಯ್ ಕುಂವರಿಚೆಂ ಪಿಂತುರ್!!
ತಿಸ್ರೆಂ ಜಾವ್ನ್ ತ್ಯಾ ಮೊಳಾಬಾರ್ ಥಾವ್ನ್ ದೆಂವೊನ್ ಯೆಂವ್ಚಾ ರಂಗ್ ರಂಗೀನ್ ಪಾಕ್ಳ್ಯಾಂ ಮಧ್ಲೆಂ ತಾಚ್ಯಾ ಬಾಪಾಯ್ಚೆಂ ಸಪಾಣ್!!!
ಹ್ಯಾ ತೀನ್ ಸಂಗ್ತ್ಯಾಂಕ್ ಮಾತ್ರ್ ಮಿಶೇಲ್ ವಿಸ್ರೊಂಕ್ ಸಕ್ಲೆಂ ನಾ. ತಾಚ್ಯಾ ಮತಿಚಾ ಕೊನ್ಶಾಂತ್ ತಾಚೊಚ್ ಮ್ಹಳ್ಳೊ ಏಕ್ ಸೊಭಿತ್ ಸಂಸಾರ್ ತಾಚ್ಯಾ ಲ್ಹಾನ್ಪಣಾರ್ ಥಾವ್ನ್ ಫುಲೊನ್ ಪಾಲೆಲ್ಲೊ ತೊ ತಸೊಚ್ ಏಕ್ ಸುಂದರ್ ರೂಪ್ ಘೆವ್ನ್ ರಾವ್ಲೊ.
ಜಲ್ಮಾಚೆ ಗೂಣ್ ಆನಿ ಜಿವಿತಾಂತ್ಲ್ಯಾ ಆನ್ಭೊಗಾನ್ ಶಿಕಯಿಲ್ಲೆ ಶೆಗುಣ್ ಎಕಾಮೆಕಾ ತಾಳ್ ಪಡ್ತಾತ್ ತೆದ್ನಾಂ, ಜಿವಿತ್ ಸೊಭಿತ್ ಸುಂದರ್ ಜಾವ್ನ್ ಫುಲ್ತಾ. ಹೆಚ್ ಶೆಗುಣ್ ತ್ಯಾ ಜಲ್ಮಾಚಾ ಗೂಣಾಂಕ್ ತಾಳ್ ಪಡಾನಾಂತ್ ತೆದ್ನಾಂ, ಜಿವಿತಾಂತ್ ಏಕ್ ಕುರ್ಡೆಂ ಝುಜ್ ಚಾಲು ಜಾತಾ. ಹ್ಯಾ ಝುಜಾಕ್ ದೊಳೆ ನಾಂತ್. ದೊಳೆ ಆಸ್ಲ್ಯಾರ್ಯ್ ತ್ಯಾ ದೊಳ್ಯಾಂಕ್ ದೀಷ್ಟ್ ನಾ. ಕುರ್ಡೆಂ ಝುಜ್ ಫಕತ್ತ್ ಆಪ್ಲ್ಯಾ ನಶೀಬಾಕ್ ಮಾತ್ರ್ ಸಾಂಗಾತ್ ದಿತಾ ಶಿವಾಯ್ ನಶಿಬಾಕ್ ಬದ್ಲುಂಕ್ ಸಕಾನಾ. ನಶೀಬ್ಯ್ ಹ್ಯಾ ಝುಜಾಂತ್ ಕೊಣಾಯ್ಕ್ ಕಾಂಯ್ ದೀಂವ್ಕ್ ಸಕಾನಾ. ಫಕತ್ತ್ ಜಯ್ತಾಕ್ ಆನಿ ಸಲ್ವಣೆಕ್ ದೊನಾಂಯ್ಕ್ ಎಕಾಚ್ಚ್ ಮಾಫಾನ್ ಸ್ವೀಕಾರ್ ಕರುಂಕ್ ಮಾತ್ರ್ ಸಕ್ತಾ.
ಪ್ರಾಯೆಂತ್ ಭರೊನ್ ಯೆಂವ್ಚಾ ಮಿಶೇಲಾ ಥಂಯ್ ಆಶೆಂಚ್ ಘಡ್ಲೆಂ. ತಾಚ್ಯಾ ಸಮ್ಜಣೆಚಾ ಪಾಟ್ಲೆ ದೀಸ್, ಭಾಗಿಂತ್ಲ್ಯಾ ಝಡಾಂ ಮಧೆಂ ಫುಲೊನ್ ಬಾವೊನ್ ವೆಚಾ ಫುಲಾಂ ಪರಿಂ ಫುಲೊನ್ ಬಾವೊನ್ ಜಡೊನ್ ಗೆಲ್ಲೆ. ತ್ಯಾ ದಿಸಾಂನಿಂ ತಾಂಚ್ಯಾ ಆಸ್ಮಿತಾಯೆಕ್ ಮಿಶೇಲಾಚಾ ಮತಿಚಾ ಪಡ್ದ್ಯಾರ್ ಸಾಂಡ್ಲ್ಲೆಂ ನಾ ಯಾ ದೊಳ್ಯಾಂಚಾ ದೂರ್ದ್ರಷ್ಟಿಕ್ ತೆಂ ದಾಖಯಿಲ್ಲೆಂ ನಾ.
ಮಿಶೇಲ್ ಆತಾಂ ಖುದ್ದ್ ಜಾವ್ನ್ ಚಿಂತುಂಕ್ ಸಕ್ತಾಲೆಂ.
ಜೆರೊಮಾನ್ ಜಾಂವ್ ಎಸ್ತೆಲಾನ್ ಜಾಂವ್ ಮಿಶೇಲಾಕ್ ಖಂಯ್ಚಾಯ್ ವಿಶಯಾಂತ್ ಉಣೆಂಪಣ್ ಕೆಲ್ಲೆಂ ನಾ. ಹಾಚ್ಯಾ ಪಾಟ್ಲ್ಯಾನ್ ಭಳಾದೀಕ್ ಕಾರಾಣಾಂ ಆಸ್ಲ್ಲಿಂ. ಹ್ಯಾ ಕಾರಾಣಾಂ ಮಧೆಂ ತಾಂಚೊ ಸ್ವಾರ್ಥ್ಯ್ ಆಸ್ಲ್ಲೊ. ಹ್ಯಾ ಸ್ವಾರ್ಥಾಂತ್ ಕಾಂಯ್ ನವಾಲ್ ನಾತ್ಲ್ಲೆಂ. ಆಪ್ಲಿಂ ಭುರ್ಗಿಂ ಆಪ್ಣಾಕ್ ಎಕ್ಸುರೆಂ ಆನಿ ಎಕ್ಸುರೊ ಕರ್ತಾನಾ ಕೊಣಾಚಾ ನಶಿಬಾನ್ ಕೊಣಾಕ್ ಸಾಂಗಾತ್ ದಿಲ್ಲೊ ಆನಿ ಕೊಣಾಕ್ ಧಖೊ ದಿಲ್ಲೊ ತೊ ಕೊಣಾಯ್ ವರ್ವಿಂ ಸಾಂಗೊಂಕ್ ಸಾದ್ಯ್ ನಾ ಆಸ್ತಾಂ ಹ್ಯಾ ಕಾರಾಣಾಂಕ್ ಸ್ವಾರ್ಥಿ ಕಾರಾಣಾಂ ಮ್ಹಣೊಂಕ್ ಜಾಯ್ನಾ. ತಶೆಂಚ್ ನಿಸ್ವಾರ್ಥ್ ಮ್ಹಣೊಕ್ಯ್ ಸಾದ್ಯ್ ನಾ.
ಆಪ್ಲ್ಯಾ ಆಜ್ಯಾ ಆನಿ ಆಜಿಯೆ ಥಾವ್ನ್ ಆಪ್ಣಾಕ್ ಜಾಯ್ ತೆಂ ಮೆಳ್ತಾನಾ ಆನಿ ತ್ಯಾ ಆಪ್ಲ್ಯಾ ಭೋವ್ ನೆಣ್ತ್ಯಾ ಪ್ರಾಯೆರ್ ಆವಯ್ ಬಾಪಾಯ್ಚಾ ಮೊಗಾ ಸ್ಪಂದನಾ ಥಾವ್ನ್ ವೆಗ್ಳಾಚಾರ್ ಘೆತ್ಲ್ಲ್ಯಾ ಮಿಶೇಲಾಕ್, ಮೋಗ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ತೆಂ ಕಳ್ತಾನಾ, ತಾಚ್ಯಾ ಸಂಸಾರಾಂತ್ ತಾಚಿಂ ಆಜೊ ಆನಿ ಆಜಿ ಶಿವಾಯ್ ಪಯ್ಶಿಲ್ಯಾ ಮ್ಯಾಂಚೆಸ್ಟರಾ ಥಾವ್ನ್ ತೆದ್ನಾಂ ತೆದ್ನಾಂ ಆಪ್ಲ್ಯಾ ಸಂಭಂಧಾಕ್ ಜಿವೊ ದವರ್ಲೆಲಿ ಕ್ಯಾಥರೀನ್ ಸೊಡ್ಲ್ಯಾರ್, ದುಸ್ರೆಂ ಕೊಣ್ಯ್ ನಾತ್ಲ್ಲೆಂ.
ವಾಡ್ಯಾಂತ್ ತಶೆಂ ಇಸ್ಕೊಲಾಂತ್ ಮಿಶೇಲ್ ಪಿಂರ್ಗಿ ಚೆಡುಂ ಮ್ಹಣೊನ್ ಸಗ್ಳಿಂ ಜಾಣಾಂ ಆಸ್ಲ್ಲಿಂ. ಎಕಾ ವಾಟೆನ್ ಜೆರೊಮಾಕ್ ಆನಿ ಎಸ್ತೆಲಾಕ್ ತಾಂಚಾ ಪಿಂರ್ಗಿ ನಾತಿನ್ ವಾಡ್ಯಾ ಮಧೆಂ ಕಿತೆಂ, ಸಗ್ಳ್ಯಾ ಬೆಂದೂರ್ ಪಿರ್ಗಜೆಂತ್ಚ್ ನಾಂವ್ ಹಾಡಯಿಲ್ಲೆಂ. ಮಿಶೇಲಾಚಿ ಸೊಭಾಯ್ ಭುರ್ಗ್ಯಾಪಣಾ ಥಾವ್ನ್ಚ್ ತ್ಯಾ ಬಾವ್ಲೆ ಪರಿಂ. ಹಳ್ತ್ ಮಾತಿಯೆ ರ್ಂಗಾಚೆ ತಾಚೆ ನೀಟ್ ಕೇಸ್ ತಾಚ್ಯಾ ಮಾತ್ಯಾರ್ ಭಾಂಗ್ರಾಳಿಂ ಸುತಾಂ ದೆಂವಯಿಲ್ಲ್ಯಾ ಪರಿಂ ದಿಸ್ತಾಲೆ. ಇಸ್ಕೊಲಾಂತ್ ಭೋವ್ಶ್ಯಾ ತಾಚ್ಯಾ ಪಿಂರ್ಗಿಪಣಾಕ್ ಲಾಗೊನ್ ಖಂಯ್ಚಾಯ್ ಕಾರ್ಯಾ ಸಂಭ್ರಮಾಂತ್ ಇಸ್ಕೊಲಾಚಿಂ ವ್ಹಡಿಲಾಂ ಮಿಶೇಲಾಕ್ ಮುಕಾರ್ ದವರ್ತಾಲಿಂ.
ಆಶೆಂ ಮಿಶೇಲ್ ಸಗ್ಳ್ಯಾಂ ಫುಡ್ಲ್ಯಾನ್ ಪಯ್ಲೆಂ ಜಾಂವ್ಕ್ ಪಾವ್ಲೆಂ. ಆಶೆಂಚ್ ಮುಕಾರ್ ಚಲೊನ್ ವೆತಾನಾ ತೆಂ ಇಗರ್ಜೆಚಾ ಕಾರ್ಯಾವಳಿಂನಿಂಯ್ ಮೆತೆರ್ ಜಾಂವ್ಕ್ ಪಾವ್ಲೆಂ. "ಪಿಂರ್ಗಿ ನಾತ್ ಇಗರ್ಜೆ ಮಿಸಾಚಾ ಕೋಯಾರಾಂತ್ ಕೊಂಕ್ಣೆಂತ್ ಕಾಂತಾರಾಂ ಕರ್ತಾ!" ಸಭಾರ್ ಜಣಾಂಚಿ ಹಿ ಶಭಾಶ್ಕಿ ಜೆರೊಮಾಕ್ ಆನಿ ಎಸ್ತೆಲಾಕ್ ಸರ್ವಾಂ ಹುಜಿರ್ ತಾಂಕಾಂ ವಯ್ರ್ ದವರ್ತಾಲಿ. ಮಿಶೇಲಾನ್ ತಾಕಾ ಮೆಳ್ಲ್ಲ್ಯಾ ಆವ್ಕಾಸಾಕ್ ಬರೊಚ್ ಉಪ್ಯೋಗ್ ಕೆಲೊ.
ಸಮ್ಜಣಿ ಭರ್ಚಾ ಮಿಶೇಲಾಚಾ ಮತಿಂತ್ ಎಕೇಕ್ಚ್ ಸವಾಲ್ ಗುಪಿತ್ ಉಟೊನ್ ಯೇವ್ನ್ ತಾಕಾ ತಾಚ್ಯಾ ಜಿವಿತಾ ವಿಶಿಂ ಚಿಂತುಂಕ್ ಲಾಯ್ತಾಲೆಂ. ತಾಚ್ಯಾ ಪಿಂರ್ಗಿಪಣಾ ಥಾವ್ನ್ ಆರಂಭ್ ಜಾವ್ನ್ ತಾಣೆಂ ದೆಖೊಂಕ್ ಆಶೆಂವ್ಚಾ ತ್ಯಾ ವರ್ಣಾಳ್ ರಂಗಾಂಕ್ ಬಗ್ಲೆಕ್ ಘೆವ್ನ್, ತ್ಯಾ ಸಪಾಣಾ ಸಾಂಗಾತಾ ತ್ಯಾ ರಾಯ್ ಕುಂವರಿಚಾ ಪಿಂತುರಾ ಪಾಸೊನ್ ಎಕೇಕ್ಚ್ ಸವಾಲ್ ತಾಕಾ ತಾಚ್ಯಾ ಆಸ್ಥಿತ್ವಾಚಿಂ ಸೊದ್ನಾಂ ಕರ್ತಾಲೆಂ.
ಹ್ಯಾ ಸೊದ್ನೆಂತ್ ಪಯ್ಲ್ಯಾ ಪಾವ್ಟಿಂ ತೆಂ ಆಪ್ಲ್ಯಾ ಆವಯ್ ಬಾಪಯ್ ವಿಣೆಂ ಆಪುಣ್ ಆನಾಥ್ ಭುರ್ಗೆಂ ಮ್ಹಣೊನ್ ಸಮ್ಜೊನ್ ರಡೊನ್ ಬಸ್ತಾನಾ,
"ತುವೆಂ ಸಾಂಗ್ಚೆಂಯ್ ಸಾರ್ಕೆಂ ಪುತಾ... ಆನಿ ರಡ್ಚೆಂಯ್ ಸಾರ್ಕೆಂ! ಪುಣ್ ಆಮಿಂ ತುಕಾ ಆಮ್ಚಾ ಚಾರ್ಲಿಕ್ ದಿಲ್ಲ್ಯಾ ಪ್ರಾಸ್ ಚಡ್ ಮೋಗ್ ದಿಲಾ. ಆಮಿಂ ಜಾಣಾಂವ್.... ಭುರ್ಗ್ಯಾಂಕ್ ತಾಂಚಿ ಆವಯ್ ಬಾಪಯ್ ಕಿತ್ಲಿಂ ಮ್ಹಳ್ಯಾರ್ಯ್ ತಾಂಚಿಂ ಆವಯ್ ಆನಿ ಬಾಪಯ್ಚ್. ತಾಂಚಾ ಮೊಗಾ ಮುಕಾರ್ ಆಮ್ಚೊ ಮೋಗ್ ಸರಿ ಕರುಂಕ್ ಜಾಯ್ನಾಂ. ಜಾಲ್ಯಾರ್ಯ್.....!" ಎಸ್ತೆಲಾಕ್ ಮುಕಾರ್ ಚಡಿತ್ ಉಲಂವ್ಕ್ ಜಾಲೆಂ ನಾ. ಏಕ್ ಚಲಿ ಜಾವ್ನ್ ಮಿಶೇಲಾಚೆಂ ದೂಖ್ ತಿ ಸಮ್ಜೊಂಕ್ ಸಕ್ತಾಲಿ.
ಮಿಶೇಲಾನ್ ಆಪ್ಲೆ ಸುಸ್ಕಾರ್ ರಾವಯ್ಲೆ ನಾಂತ್. ಕಿತೆಂಗೀ ಚಿಂತುನ್ ಚಿಂತುನ್ ರಡ್ಲ್ಲ್ಯಾ ಪರಿಂ ರಡ್ತಾಲೆಂ ತೆಂ. ಹೆಂ ಪಳೆಲ್ಲೊ ಜೆರೊಮ್,
"ಮಿಶೇಲ್.....! ಪಳೆ ಪುತಾ...., ತುಜಿಂ ಆವಯ್ ಬಾಪಯ್ ಆಮ್ಚಿಂಯ್ ಭುರ್ಗಿಂ. ತುಂ ಜಾಲ್ಯಾರ್ಯ್ ತೆದ್ನಾಂ ನೆಣ್ತೆಂ ಆಸ್ಲ್ಲೆಂಯ್. ತುಕಾ ಕಾಂಯ್ ಕಳೊಂಕ್ ನಾ. ಆಮ್ಚಾ ಭುರ್ಗ್ಯಾಂಕ್ ಹೊಗ್ಡಾಯಿಲ್ಲ್ಯಾ ಆಮ್ಕಾಂ ಕಿತ್ಲೆಂ ದೂಖ್ ಭೊಗ್ಲಾಂ ತೆಂ ತುಂ ನೆಣಾಂಯ್. ಫಕತ್ತ್ ತುಜ್ಯಾ ಭರ್ವಸ್ಯಾಚೆರ್ ಆಮ್ಚೊ ಶ್ವಾಸ್ ಜಿವೊ ಉರ್ಲಾ......!" ಜೆರೊಮಾನ್ ನಾತಿಕ್ ಸಮ್ಜಂವ್ಚೆಂ ಪ್ರಯತ್ನ್ ಕೆಲೆಂ.
ಕೊಣೆಂ ಕಿತೆಂ ಸಮ್ಜಾಯ್ಲ್ಯಾರ್ಯ್ ಮಿಶೇಲ್ ಮಾತ್ರ್ ಕಾಳ್ಜಾಕ್ ಸಮಾಧಾನ್ ಜಾತಾ ವರೇಗ್ ರಡ್ಲೆಂ. ಕಾಳ್ಜಾಂತ್ಲೆ ಆತ್ರೆಗ್, ದೊಳ್ಯಾಂತ್ಲ್ಯಾ ಉಭಾಳ್ ದುಖಾಂನಿಂ ಜಿರೊನ್ ಗಳೊನ್ ವೆತಾನಾ ತಾಚ್ಯಾ ಮತಿಕ್ ಸಮಾಧಾನ್ ಜಾಲೆಂ. ಹ್ಯಾ ಉಪ್ರಾಂತ್ ತೆಂ ಸುಖಾಕ್ ಆನಿ ದುಖಾಕ್ ಕಶೆಂ ಗಳ್ಸುಂಚೆಂ ತೆಂ ಶಿಕ್ಲೆಂ. ಹಾಂಗಾ ಥಾವ್ನ್ ಮಿಶೇಲಾಚಾ ಜಿವಿತಾಂತ್ ಅಚಾನಕ್ ಬದ್ಲಾವಣ್ ಜಾಲಿ. ಹ್ಯಾ ಉಪ್ರಾಂತ್ ತಾಣೆಂ ತಾಚ್ಯಾ ಭಾಯ್ಲ್ಯಾ ಮನ್ಶ್ಯಾಂಕ್ ಜಾಣಾಂ ಜಾಂವ್ಚೆಂ ಪ್ರಯತ್ನ್ ಕೆಲೆಂ. ಪುಣ್ ಆಪ್ಲ್ಯಾ ಜಿವಿತಾಕ್ ಶೆವ್ಟಾಯಿಲ್ಲ್ಯಾ ತ್ಯಾ ಆಕ್ಸಿಡೆಂಟಾಕ್ ಚಿಂತುನ್ ಚಿಂತುನ್ ಮಿಶೇಲ್ ಜಿವಿತಾಂತ್ ಭಿಯೆಂವ್ಕ್ ಲಾಗ್ಲೆಂ. ಭ್ಯೆಂ, ಭಿರಾಂತ್ ತಾಚ್ಯಾ ಕಾಳ್ಜಾಂತ್ ರಿಗೊನ್ ರಾವ್ಲೆಂ. ಹ್ಯಾ ಭಿಯಾ ಥಾವ್ನ್ ತೆಂ ಭಾಯ್ರ್ ಯೇಂವ್ಕ್ ಸಕ್ಲೆಂ ನಾ. ಆಪ್ಣಾ ಭೊಂವಾರಿ ಅಚಾನಕ್ ಏಕ್ ಆವಾಜ್ ಜಾಲ್ಯಾರ್ ಪಾಸೊನ್ ಮಿಶೇಲ್ ಭಿಯೆಂವ್ಕ್ ಲಾಗ್ಲೆಂ. ತಾಚ್ಯಾ ಮತಿಂತ್ಲ್ಯಾ ಭಳಾಧೀಕ್ ಚಿಂತ್ನಾಂನಿ ತೆಂ ಪ್ರಭಲ್ ಆಸ್ಲ್ಲೆಂ ಜಾಲ್ಯಾರ್ಯ್ ಜಿವಿತಾಚ್ಯಾ ಮೆಟಾಂಕ್ ಕಾಡುಂಕ್ ತೆಂ ಕಶ್ಟೊಂಕ್ ಲಾಗ್ಲೆಂ.
ಮಿಶೇಲಾಕ್ ಪ್ರಾಯ್ ಭರ್ಚಾ ವೆಳಾರ್ ತಾಚ್ಯಾ ಚಿಂತ್ಪಾಂತ್ ಜಾಲ್ಲಿ ಹಿ ಬದ್ಲಾವಣ್ ತಾಚ್ಯಾ ವ್ಯಕ್ತಿತ್ವಾಚೆರ್ಯ್ ರಾಜ್ ಚಲಂವ್ಕ್ ಲಾಗ್ಲಿ. ಹ್ಯಾ ಬದ್ಲಾವಣೆಂತ್ ಮಿಶೇಲ್ ಪಯ್ಲೆಂಚಾ ಪ್ರಾಸ್ ಚಡ್ ಮೊವಾಳ್ ಜಾಲೆಂ. ಪಯ್ಲೆಂಚಾ ಪ್ರಾಸ್ ಚಡ್ ಮೊಗಾಳ್ ಆನಿ ಮಯ್ಪಾಸಿ ಜಾಲೆಂ. ತಾಚ್ಯಾ ಉಲೊಣ್ಯಾಂತ್ ತಶೆಂ ತಾಚ್ಯಾ ನಡ್ತ್ಯಾಂತ್ ತೆಂ ಚಡ್ಚ್ ನಾಜೂಕ್ ಜಾಲೆಂ ಜಶೆಂ ಉಲಯ್ತಾನಾ ಮ್ಹೊಂವ್ ಗಳ್ಲ್ಲ್ಯಾ ಪರಿಂ ಆನಿ ಚಲ್ತಾನಾ ಕಾಪುಸ್ ಉಬ್ಲೆಲ್ಯಾ ಪರಿಂ.
"ಆಪುಣ್ ಆಪ್ಲ್ಯಾ ಆವಯ್ ಬಾಪಯ್ ವಿಣೆಂ ಆನಾಥ್ ಜಾವ್ನ್ ಆಸ್ತಾಂ ಹ್ಯಾ ಸಂಸಾರಾನ್ ಆಪ್ಣಾಚೊ ಮೋಗ್ ಕರುಂಕ್ ಜಾಯ್ ನ್ಹಯ್....... ಬಗಾರ್ ಆಪ್ಣೆಂ ಹ್ಯಾ ಸಂಸಾರಾಚೊ ಹ್ಯಾ ಸಂಸಾರಾಂತ್ಲ್ಯಾ ಆನಾಥಾಂಚೊ ಮೋಗ್ ಕರುಂಕ್ ಜಾಯ್ ಆನಿ ಸಂಸಾರಾಕ್ ಜಿಕೊಂಕ್ ಜಾಯ್!" ಮ್ಹಣೊನ್ ಸ್ಪಷ್ಟ್ ಜಾಣಾಂ ಜಾಲ್ಲೆಂ ಮಿಶೇಲ್ ಆಪುಣ್ ಆಪ್ಣಾ ಖಾತಿರ್ ನ್ಹಯ್ ಬಗಾರ್ ಆಪುಣ್ ಹೆರಾಂ ಖಾತಿರ್ ಜಿಯೆಂವ್ಕ್ ಲಾಗ್ಲೆಂ. ತೆಂ ಆತಾಂ ತಾಚ್ಯಾ ಆವಯ್ಚ್ಯಾ ಆಶೆಕ್ ಆನಿ ತಾಚ್ಯಾ ಬಾಪಾಯ್ಚಾ ಸಪ್ಣಾಕ್ ಸಮ್ಜಾಲ್ಲೆಂ!
ಹ್ಯಾ ತಾಚ್ಯಾ ಎಕಾಚ್ ಸಮ್ಜಣೆಚ್ಯಾ ಚಿಂತ್ಪಾ ಥಾವ್ನ್ ತಾಚ್ಯೆ ಥಂಯ್ ಸಭಾರ್ ವಿವಿಧ್ ವಾಟೆನಿಂ ಬದ್ಲಾವಣ್ ದಿಸೊಂಕ್ ಲಾಗ್ಲಿ. ತಾಚ್ಯಾ ಚಾಲ್ ಚಮ್ಕಾಣೆಂತ್, ತಾಚ್ಯಾ ನ್ಹೆಸ್ಪಾಂತ್ ಆನಿ ಚಡ್ ಕರುನ್ ತಾಣೆಂ ಜಿಯೆಂವ್ಚಾ ರಿತಿಂತ್. ಮಿಶೇಲ್ ಸಂಪೂರ್ಣ್ ಬದ್ಲಾಲ್ಲೆಂ!
ಆಜ್ ಮಿಶೇಲ್ ಚೆಡ್ವಾಪಣಾ ಥಾವ್ನ್ ಉತ್ರೊನ್ ಚಲಿಯೆಪಣಾಕ್ ಪಾವ್ಲ್ಲೆಂ! ಮಿಶೇಲ್ ಆಜ್ ಸೊಭಾಯೆನ್ ಸೊಭ್ಚೆಂ ಹೊಕಾಲ್ ಜಾಲ್ಲೆಂ!
ತರ್ಯ್......
ಜಿವಿತಾಂತ್ ದಿಸೊನ್ ಯೆಂವ್ಚಾ ಹರ್ಯೇಕಾ ಘಡಿತಾಂಕ್ ಆಪ್ಲ್ಯಾ ಮತಿಂತ್ಲ್ಯಾ ವರ್ಣಾಳ್ ರಂಗಾಂಕ್ ಸರಿ ಕರುನ್ ಜಿಣಿ ಸೊಭಿತ್ ರಿತಿನ್ ಮಿಶೇಲ್ ಸೊಭಯ್ತಾಲೆಂ. ಆಪ್ಲ್ಯಾ ಬಾಪಾಯ್ನ್ ಪಳೆಲ್ಲೆಂ ಆನಿ ಪಿಂತ್ರಾಯಿಲ್ಲೆಂ ಸಪಾಣ್ ಖಂಯ್ಸರ್ಗೀ ಪಯ್ಸ್ ತ್ಯಾ ಸೊಭಿತ್ ಬಣಾಂ ಮಧೆಂ ತಾಕಾ ದಿಸೊನ್ ಯೆತಾಲೆಂ. ತ್ಯಾ ಸಪ್ಣಾಕ್ ಹಾವೆಂ ಮ್ಹಜ್ಯಾ ಹಾತಿಂ ಧರುಂಕ್ ಆಸಾ. ತಾಕಾ ವೆಂಗುನ್ ತ್ಯಾ ಬಣಾಂ ಮಧೆಂ ಆಪ್ಣೆಂ ಹೊ ಸಂಸಾರ್ ವಿಸ್ರೊಂಕ್ ಆಸಾ ಆನಿ ಆಪ್ಲ್ಯಾ ಆವಯ್ನ್ ಸಾಂಗ್ಲೆಲ್ಯಾ ಪರಿಂ ಆಪ್ಣೆ ಆಪ್ಲೆಂ ರಾಜ್ ಚಲಂವ್ಕ್ ಆಸಾ.
ವ್ಹಯ್! ಏಕ್ ದೀಸ್ ಹಾವೆಂ ರಾಯ್ ಕುಂವರಿ ಜಾಂವ್ಕ್ ಆಸಾ! ಮ್ಹಜ್ಯಾ ಆವಯ್ಚೆಂ ರಾಯ್ ಕುಂವರಿ ಜಾಂವ್ಕ್ ಆಸಾ!
ಚಿಂತ್ಚಾ ಮಿಶೇಲಾಕ್ ತೆ ಸೊಭಿತ್ ಬಣ್, ತೆಂ ಸಪಾಣ್, ತೆಂ ರಾಯ್ ಕುಂವರಿ ಸೊಡ್ಲ್ಯಾರ್ ದುಸ್ರೆಂ ಕಾಂಯ್ಚ್ ದಿಸೊನ್ ಯೆಂವ್ಚೊ ಸಂಭವ್ಚ್ ನಾತ್ಲ್ಲೊ.
[ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
ಕಾದಂಬರಿಕಾರಾಚಿಂ ಉತ್ರಾಂ: ಅವಸ್ವರ್ 1, ಅವಸ್ವರ್ 2,
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
