ಕವಿತಾकविताPoem
ತಿಂತೆರಾಂತ್ ಪಿಂತುರ್ - 1. ವಿಶಯ್: ಭುಕ್ ಆನಿ ಸೊಧ್ನಾಂ
ಕೊಂಕಣಿಂತ್ಲೊ ಪಯ್ಲೊ ಮಯ್ನ್ಯಾಳೊ ಕವಿತಾ ಸ್ಪರ್ಧೊ
ತಿಂತೆರಾಂತ್ ಪಿಂತುರ್ : ಪಿಂತುರ್ - 1


ವಿಶಯ್: ಭುಕ್ ಆನಿ ಸೊಧ್ನಾಂ
ಪಿಂತುರ್, ತಿಂತೆರ್ ಆನಿ ಪ್ರೇರಣಾಂ
ಸಂಸಾರಾಂತ್ ವೆವೆಗ್ಳ್ಯಾ ರಿತಿಚೆ ದಿವಸಾಂಚೆಂ ಆಚರಣ್ ಚಲ್ತಾ, ಆವಯಾಂಚೊ ದೀಸ್, ಬಾಪಾಯ್ಚೊ ದೀಸ್, ಮೋಗ್ ಕರ್ಣಾರಾಂಚೊ ದೀಸ್, ಪಿಡೆಸ್ತಾಂಚೊ ದೀಸ್, ಕಾಮೆಲ್ಯಾಂಚೊ ದೀಸ್, ಧುಂವ್ರಾಪಾನಾಚೊ ದೀಸ್, ಏಡ್ಸ್ ದೀಸ್ ಇತ್ಯಾದಿ, ಇತ್ಯಾದಿ. ಹಾಂಚೊ ಮಹತ್ವ್ ಕಸಲೊ?
ಸಂಸಾರಿಂ ರಾಟಾವಳೆಮಧೆಂ ಆಮಿಂ ವೆಗಿಂ ಥಕ್ತಾಂವ್, ಆಮಿಂ ವೆಗಿಂ ಪಿಕ್ತಾಂವ್ ದೆಕುನ್ ಆಮ್ಕಾಂ ಚಿಂತುಂಕ್ ಜಾಯ್ನಾ, ಚಿಂತಿಶೆಂ ಕರಿಜಾಯ್ ಆಸ್ಲ್ಲೆ ಘಾಡ್ ನಿದೆಂತ್ ಘೊರೆತಾತ್ ಆನಿ ಹೆರ್ ತೆಚ್ಚ್ ಕಾಜುಲೆ, ಪಿಸೊಳಿಂ, ಚಲಿ, ಚಲೊ, ಮೋಗ್, ದೇವ್-ಅತ್ಮೊ ಸಾಲ್ವಾಸಾಂವಾಚಾ ಭಂವ್ತೊಣಿಂಚ್ ಭಂವೊನ್ ಆಸಾತ್. ಹಾಂಚಾ ಘರ್ಚಾ ಕುಶಿನ್ಂಚ್ ಬೊಂಬ್ ಫುಟೊನ್ ರಗ್ತಾಚ್ಯೊ ವ್ಹಾಳ್ ಜಾಯ್ತ್ ತರ್ಯ್ ತಾಂಕಾ ತೆಂ ದಿಸ್ಚೆಂನಾ.
ಆತಾಂ ಹ್ಯಾ ದಿಸಾಂಚೆಂ ಆಚರಣ್ ಕೆಲೆಂ ಮ್ಹಣ್ತಚ್ ಕಾಂಯ್ ಸಂಸಾರ್ ಖಿಣಾನ್ ಬದಲ್ತಾ ಮ್ಹಣ್ ಭಿಲ್ಕುಲ್ ನ್ಹಯ್. ಜಶೆಂ ಪಿಡೆಸ್ತಾಂಚೊ ದಿವಸ್ ಆಚರಣ್ ಕರ್ತಚ್ ಸಂಸಾರಾಂತ್ಲೆ ಸರ್ವ್ ಪಿಡೇಸ್ತ್ ಜೆಜುನ್ ಲಾಜಾರಸಾಕ್ ಉಟಯಿಲ್ಲೆಪರಿಂ ಬರೆ ಜಾವ್ನ್ ಉಟ್ತಾತ್ ಮ್ಹಣ್ ನ್ಹಯ್, ಆವಯಾಂಚೊ ದಿವಸ್ ಆಚರಣ್ ಕರ್ತಚ್ ವಾಟೆರ್ ಪಡ್ಲ್ಲಿಂ ಆವಯಾಂ ಪಾಟಿಂ ಘರಾ ಪಾವ್ತಾತ್ ಮ್ಹಣ್ ನ್ಹಯ್, ಏಡ್ಸ್ ದಿವಸ್ ಆಚರಣ್ ಕರ್ತಚ್ ಸಂಸಾರಾಂತ್ ಜಿತ್ಲಿಂ ಏಡ್ಸ್ ಪಿಡೆಸ್ತಾಂ ಆಸಾತ್ ತಿಂ ಸಗ್ಳಿಂ ಬರಿಂ ಜಾತಾತ್ ಮ್ಹಣ್ ನ್ಹಯ್. ಅಸಲೆಂ ಅಣ್ವೆಂ ಚಿಂತಾಪ್ ಕೊಣ್ಯ್ ಚಿಂತಾತ್ ತರ್ ಮ್ಹಜೆಪ್ರಕಾರ್ ತಿಂ ಪಿಸಾಂಟಾಂಚ್ ಸಯ್.
ಸಮಾಜೆಚೊ ಆರ್ಸೊ ಧರ್ಚೊ ಕೊಣೆ? ಬರವ್ಪ್ಯಾಂನಿ, ಚಿಂತ್ಪ್ಯಾಂನಿ. ತರ್ ಹೆಚ್ಚ್ ಬರವ್ಪಿ ಆಜ್ಕಾಲ್ ಕುರ್ವೊನ್ ಬೊಸ್ಲ್ಯಾರ್, ರೊಂವಾಣೆಚ್ಯಾ ಕೊಂಬಿಯೆಕ್ ಕುಂಕುಡ್ಸೊ ಲಾಗ್ಲ್ಲೆಪರಿಂ ತಾಂಚಾ ಮತಿಕ್ ಲಾಗ್ಲ್ಲ್ಯಾ ಚಿಂತ್ಪಾಚಾ ಆಳ್ಸಾಯೆಕ್ ಕೊಣೆಂ ಜಾಗಂವ್ಚೆಂ? ತಾಂಕಾಂಯ್ ತರ್ ಫಕತ್ತ್ ಕೊಣಾಕ್ ಧುಂಪಂವ್ಚೆಂ ಕೊಣಾಚೊ ತಾರಿಫೊ ಕರ್ಚೆಂ, ಕೊಣಾಚೊ ಖೆಬ್ಡಾಯೊ ಕರ್ಚೆಂ ಸೊಡ್ಲ್ಯಾರ್ ಹೆರ್ ಸಂಗ್ತ್ಯಾಂಚೆರ್ ತಾಂಚಿ ಮಾತ್ ವರ್ಚಿಂ ವಿಧಾನಾಂ ತರ್ಯ್ ಕಸಲಿಂ?
’ಭುಕ್ ಆನಿ ಸೊಧ್ನಾಂ’ ಅಸಲೊಚ್ ಏಕ್ ಪ್ರಯೋಗ್, ಹಾಂತುಂ ಕೊಣ್, ಕಿತ್ಲೆಶಿಂ, ಕಸಲಿಂ ಕವಿತಾ ಬರಯ್ತಾತ್ ಮ್ಹಳ್ಳೆಂ ಯಾ ಹಿಂ ಕವಿತಾ ವಾಚುನ್ ಸಂಸಾರಾಚಿ ಭುಕ್ ವೆತಾ ಮ್ಹಣ್ ಚಿಂತ್ಚೆಂ ಉಣೆಂ ಚಿಂತಾಪ್ ಆಮ್ಚಾ ಮತಿಕ್ ಯೆಂವ್ಚೆಂಚ್ ನಾಕಾ. ಹೆಂ ಚಿಂತಾಪ್ ಯೆಂವ್ಚಾನಿ ಅಪುಣ್ ಜಾವ್ನ್ ಪಯ್ಲೆಂ ಕಿತೆಂ ಕರುಂಕ್ ಸಕನ್ ಮ್ಹಣ್ ಪರ್ಗಟ್ಲ್ಯಾರ್ ಭೋವ್ ಬರೆಂ. ಕವಿಚಿ ನದರ್ ವಯ್ಲೆಭಾರ್ ಮಾತ್ರ್ ಆಸಾನಾಯೆ, ಬಗಾರ್ ತಿ ಭೋವ್ ಗುಂಡಾಯೆನ್ ವೆಚಿ ಗರ್ಜ್. ಮ್ಹಜಾ ಚಿಂತ್ಪಾಪ್ರಕಾರ್ ಹ್ಯಾ ಮಯ್ನ್ಯಾಚೊ ಕವಿ ’ಎಚ್ಚೆಮ್’ ಹಾಂತುಂ ಜಿಕ್ಲಾ. ತಾಚಿ ನದ್ರೆನ್ ಉಚಾರ್ಚೆಪರಿಂ ಹೆಂ ಪಿಂತುರ್ ಪ್ರಸ್ತುತ್ ಸಮಾಜೆಚೆರ್ ಅರ್ಸೊ ಧರ್ತಾ. ಸಂಸಾರಾಂತ್ ಆಸ್ಚಿ ಆಮಿಂ ಸರ್ವಾಂ ಭುಕಿಂ, ಕೊಣಾಕ್ ನಾಂವಾಚಿ ಭುಕ್, ಕೊಣಾಕ್ ಮಾನಾಚಿ ಭುಕ್, ಕೊಣಾಕ್ ದುಡ್ವಾಚಿ ಭುಕ್, ಕೊಣಾಕ್ ಚೆಡ್ವಾಂಚಿ ಭುಕ್, ಕೊಣಾಕ್ ಆಸ್ತ್-ಬದ್ಕಾಚಿ ಭುಕ್, ಕೊಣಾಕ್ ಪದ್ವೆಚಿ ಭುಕ್, ಕೊಣಾಕ್ ಪೊಟಾಚಿ ಭುಕ್. ಉಲ್ಲಾಸ್ ತುಕಾ ’ಎಚ್ಚೆಮ್’.
ಪಿಂತುರಾಚಾ ನಾಂವಾಚೆರ್ಚ್ ಕವಿತಾ ಬರಯ್ಜಾಯ್ ಮ್ಹಣ್ ನಾ, ಪಿಂತುರ್ ಏಕ್ ಸಾಂಕೇತಿಕ್ ಪ್ರೇರಣ್ ಮಾತ್ರ್ ಶಿವಾಯ್, ಹ್ಯಾ ಪಿಂತುರಾಂತ್ ದಿಸ್ಚ್ಯಾ ಸಂಗ್ತ್ಯಾಂಚೆಂಚ್ ಉಲ್ಲೇಕ್ ಕರಿಜಾಯ್ ಮ್ಹಣ್ಯ್ ನಾ. ದಾಖ್ಲೊ - ಅನಿಲ್ ಪೆರ್ನಾಲ್ ಹಾಚೆಂ ’ಆಶಾವಾದಿ’ ಕವಿತಾ. ಕವಿಕ್ ಹ್ಯಾ ಪಿಂತುರಾಂತ್ ದಿಸ್ಚೆಪರಿಂ ’ಖಚ್ರ್ಯಾಂತ್ಲೆಂ ಉಸ್ತುಂವ್ಚೆಂ’ ಏಕ್ ಪಿಂಜ್ಕರ್ ವಸ್ತುರ್ ನೆಸ್ಲ್ಲೆಂ ಲ್ಹಾನ್ ಭುರ್ಗೆಂ ಎಕಾ ಆಶಾವಾದಿಪರಿಂ ದಿಸ್ತಾ ಆನಿ ನಿಜಾಯ್ಕೀ ಹೆಂ ಏಕ್ ಉತ್ತಿಮ್ ಕವಿತಾ ಜಾವ್ನ್ ರುತಾಂ ಜಾತಾ.
ಆಮ್ಚಾ ಉಲ್ಯಾಕ್ ಪಾಳೊ ದೀವ್ನ್ ಆಮ್ಕಾಂ ಧಾಡ್ಲ್ಲ್ಯಾ ಕವಿತಾಂ ಪಯ್ಕಿ ವಿಂಚ್ಣಾರ್ ಕವಿತಾಂಕ್ ಮಾತ್ರ್ ಹಾಂಗಾಸರ್ ಪರ್ಗಟ್ ಕೆಲ್ಯಾಂತ್, ಹಾಂಚಾ ಕವಿಂಕ್ ಉಲ್ಲಾಸ್. ತಶೆಂಚ್ ’ಮಯ್ನ್ಯಾಚೊ ಕವಿ’ ಜಾವ್ನ್ ವಿಂಚೊನ್ ಆಯಿಲ್ಲ್ಯಾ ’ಎಚ್ಚೆಮ್’ ಹಾಕಾ, ತಶೆಂಚ್ ಭಾಗ್ ಘೆತ್ಲ್ಲ್ಯಾ ಸರ್ವ್ ಕವಿಂಕ್ ಅಭಿನಂದನ್ ಪಾಟಯ್ತಾಸ್ತಾನಾ ಮುಖಾರ್ ತಾಂಚೆಥಾವ್ನ್ ಅನಿಕ್ಯ್ ಉಂಚ್ಲ್ಯೊ ಕವಿತಾ ವ್ಹಾಳೊಂದಿ ಮ್ಹಣ್ ಆಶೆತಾಂವ್.
[ವಾಂಟೆಲಿ ಜಾಲ್ಲಿಂ]
3. ಆಸ್ಟಿನ್ ಡಿ’ಸೊಜ್ ಪ್ರಭು ನಂತೂರ್/ಅಮೆರಿಕಾ
4. ವಾಯ್ಲೆಟ್ ಜೆ. ಪಿರೇರಾ, ದುಭಾಯ್
5. ಪ್ರಿಯಾ ಸಿಕ್ವೇರಾ, ಫೆರಾರ್/ಕುವೇಯ್ಟ್
9. ವಲ್ಲಿ ಕ್ವಾಡ್ರಸ್ ಅಜೆಕಾರ್/ಕುವೇಯ್ಟ್
ವಯ್ಕುಂಟಾಂತ್ಲೊ ವೆಪಾರ್ [ಮಯ್ನಾಚೆಂ ಕವಿತಾ]ಎಚ್ಚೆಮ್,

ಮುಂಬಯ್ [ಮಯ್ನ್ಯಾಚೊ ಕವಿ]
ಕೊಣಾ ಆದಾಂವ್ಚ್ಯಾ ಜಾಂಗೆ ಭುಕೆಕ್
ಪಾರ್ತೇನಿಯಮ್ ಜಾಲಿಂ ಶಿತಾ ಖಣಾಂ
ಬೆವಾರೀಸಾಂಚಾ ಶೆರಾಂತ್ ವಾಡೊನ್ ರಾನಾಂ
ಚಿರ್ಮುಟೊನ್ ಗೆಲಿಂ ದುದಾ ಥನಾಂ
ಕೊಣಾ ಎವೆಚಾ ಕಾತಿ ಭುಕೆಕ್
ಉದ್ಕಾಂತ್ ಖಿರ್ಲೊನ್ ಮಿಟಾಖಣಾಂ
ಉಗ್ತ್ಯಾ ನಾಲ್ಯಾಕ್ ಕಾತರ್ನ್ ಪೊಟಾಂ
ವಾಳೊನ್ ಗೆಲಿಂ ಪಿಂಪ್ರಿಂ ಕಿರ್ಣಾಂ.
ಸೊಮ್ಯಾ ತುಜಾ ವಯ್ಕುಂಟಾಂತ್, ಭುಕ್ ಅಶಿ
ಕೊಣಾಕ್ ಶಿತಾಚಿ - ಕೊಣಾಕ್ ಮಾಸಾಚಿ
ಪೊಟಾ ಭುಕೆಕ್ ವಿಕುನ್ ವೆತಾತ್ ರಗ್ತಾಂ
ಶಿತಾ ಚರಬ್ ಜಿರಂವ್ಕ್ ಘಾಸ್ತಾತ್ ಮಾಸಾಂ.
2. ಭುಕ್ ಅನಿ ಸೊಧ್ನಾಂ

ಸಿರಿಲ್ ವಾಸ್, ಬೆಂಗ್ಳುರ್
ಭುಕ್ ಮಳ್ಯಾರ್ ಕಿತೆಂ? ಕೊಣ್ ಜಾಣಾ ಜಾಪ್ ಪೊಟ್ ಉರೊನ್ ರಿತೆಂ ಪೆಟ್ತಾ ಆಂಗಾರ್ ತಾಪ್ ನ್ಹಯ್ ತುಂ ನ್ಹಯ್ ಹಾಂವ್ ಆಮಿ ನೆಣಾಂವ್ ಭುಕ್ ಉತ್ರಾಂ ಆಮ್ಚಿಂ ಮೊಂವ್ ಬೊಗ್ತಾಂವ್ ಆಮಿಂ ಸುಕ್ ಭುಕೆ ವಿಶ್ಯಾಂತ್ ಕವನಾಂ ಲಿಖ್ಣಿ ಕರಿತ್ ಸವಾಲಾಂ ಆನಿ ತಾಕಾ ಇನಾಮಾಂ ಕಿತೆಂ ಆಮ್ಚಿಂ ನವಲಾಂ ಆಮ್ಕಾಂ ಆಸಾ ದುಡು ದುಡ್ವಾಕ್ ಆಸಾ ಸಕತ್ ಜೊಡುಂಕ್ ಆನಿ ಮೊಡುಂಕ್ ಪಿಡೆಕ್ ಆಸಾ ವಕಾತ್ ಖಾಣಾ ಖಾತಿರ್ ಜಿಣ್ಯೆಂತ್ ಸೊಧ್ನಾಂ ಕೆಲ್ಯಾಂತ್ ಆಮಿ? ಪಡ್ಲಾ ಭುರ್ಗೊ ಕಣ್ಯೆಂತ್ ಕಿತ್ಲಿ ಕ್ರೂರ್ ಭುಮಿ ಭುಕೆಕ್ ಕಾರಣ್ ಕೊಣ್? ವಾಂಟಿನಾತ್ಲಿಂ ಆಮಿ ನ್ಹಯ್ಗಿ ಅಸಮಾನ್ಪಣ್? ಪಯ್ಸ್ ಸರಾ ತುಮಿ! ಖಾಣ್ ದವ್ರುಂಕ್ ಜಾಗೊ ನಾ ಗ್ರೇಸ್ತಾ ಮೆಜಾರ್ ಖಾಣ್ ನಾಸ್ತಾಂ ವೊಗೊ ದುಬ್ಳೊ ಜಾಲಾ ಬೆಜಾರ್ ರಸ್ತ್ಯಾರ್, ಗಲ್ಲೆಂತ್, ಕಚ್ರ್ಯಾಂತ್ ಸೊದ್ತಾತ್ ಬಾವ್ಡಿಂ ಭುರ್ಗಿಂ ಮನ್ಶಾ ಹಗ್ಯಾ ಮೊಸ್ರಾಂತ್ ಪಾವ್ತಿತ್ ಭುಖೆವ್ನ್ ಸರ್ಗಿಂ ಭುಕ್ ಆನಿ ತಾನ್ ಥೊಡ್ಯಾಂಕ್ ಜಿಣಿಭರ್ ಮರ್ಯಾದ್ ಆನಿ ಮಾನ್ ಹೊಗ್ಡಾವ್ನ್ ಪೊಟ್ ಭರ್! ಉಡಯ್ನಾಕಾತ್ ನೋಟ್ ನಾಣಿಂ ನಾಕಾ ವಸ್ತುರ್ ಪರ್ನೆಂ ದಿಯಾ ಕಾಳ್ಜಾ ದೆಣಿಂ ಮೊವಾಳ್ ಮನಿಂ ತರ್ನೆಂ ಸೊದಾ ತುಮ್ಕಾಂ ಮೆಳ್ತೆಲೆಂ ಸಾಂಗ್ಲಾಂ ಸೊಮ್ಯಾ ಜೆಜುನ್ ಉದಾರ್ ಮನ್ ಬಾಳ್ತೆಲೆಂ ದಿಲ್ಯಾರ್ ನಾ ಮೆಜುನ್ ಮೆಳ್ಳಾಂ ಆಮ್ಕಾಂ ಸೊದ್ತಾನಾ ದಿಲ್ಲೆಂ ಸೊಮ್ಯಾನ್ ಬರ್ಯಾ ಮೆಳೊಂ ದುಬ್ಳ್ಯಾಂಕ್ ಮಾಗ್ತಾನಾ ದಿವ್ಯಾಂ ಮನಾನ್ ಖರ್ಯಾ
3. ಭುಕ್ ಅನಿ ಸೊಧ್ನಾಂ

ಆಸ್ಟಿನ್ ಡಿ’ಸೋಜ್ ಪ್ರಭು, ನಂತೂರ್
ಕಾಳಿಜ್ ಮ್ಹಜೆಂ ಕಡ್ಟಾ ಮನ್ ಮ್ಹಜೆಂ ವೊಡ್ಟಾ ತಿ ಕಚ್ರ್ಯಾಚಿ ರಾಸ್ ಪಳೆತಾನಾ ಮ್ಹಜಿ ತಾನ್ ಸರ್ತಾ, ಮ್ಹಜೆಂ ಪೋಟ್ ಭರ್ತಾ ತಾಂತ್ಲೆಂ ವಿಂಚುನ್ ಖಾತಾಸ್ತಾನಾ ಮ್ಹಾಕಾ ನಾ ಮಾಂಯ್ ಮ್ಹಾಕಾ ನಾ ಬಾಬ್ ಕೋಣ್ಂಚ್ ನಾಂತ್ ಭಾವ್-ಭಯ್ಣಿ ಮ್ಹಾಕಾ ನಾ ಘರ್ ಮ್ಹಾಕಾ ನಾ ಮಾಂದ್ರಿ ರಸ್ತೊಚ್ ಮ್ಹಜ್ಯಾ ಜೀವನಾಚಿ ರಾವ್ಣಿ ತಿ ಪ್ಲಾಸ್ಟಿಕಾಚಿ ಗೊಣಿಂಚ್ ಮ್ಹಜೆಂ ಗ್ರೇಸ್ತ್ ಖಜಾನ್ ನಿರಂತರ್ ಪಾಟಿರ್ ವ್ಹಾವಂವ್ಚೆಂ ವಜಾನ್ ಹಾಂವ್ ಸೊಧ್ತಾಂ, ಸೊಧ್ತಾಂ ಮೆಳ್ತಾ ಮ್ಹಜ್ಯಾ ಹಾತಾಂಕ್ ತೆ ಫುಂರ್ಗೆಲ್ಲೆ ಉಂಡ್ಯಾ ಕುಡ್ಕೆ ಮಾತ್ರ್ ಪಾಂಯಾಂಕ್ ತೊಪ್ತಾತ್ ಕೊಂವ್ಚಿ ಥೊಡ್ಯೊ ಖಾಲಿ ಹಾಡಾಂ ರಾಶಿ ಬಾಂದುಂಕ್ ಮೆಳ್ತಾ ಪರ್ನ್ಯಾ ವಸ್ತ್ರಾ ಚಿಂದಿ ಕಚ್ರ್ಯಾ ರಾಸ್ಚ್ ಮ್ಹಜೆಂ ಸರ್ಗ್ ಆವಯ್-ಬಾಪಯ್ ನಾಸ್ಚೆಂ ಖರ್ಗ್ ಕೋಣಾಕ್ ಹಾಂವೆಂ ವಾಯ್ಟ್ ಕೆಲ್ಲೆಂ ದೆವಾ? ತುಂ ಆಮ್ಚೊ ರಚ್ಣಾರ್ ತುಂ ಆಮ್ಚೊ ದಾತಾರ್ ಮ್ಹಾಕಾಯೀ ಖರೊ ಮನಿಸ್ ಕರ್ ಬಾಪಾ!
4.ಭುಕ್ ಅನಿ ಸೊಧ್ನಾಂ

ವಾಯ್ಲೆಟ್ ಜೆ. ಪಿರೇರಾ, ಬೆಂದುರ್/ದುಭಾಯ್
ಕಾಳಿಜ್ ಕಡ್ಲೆಂ ಪಿಂತುರ್ ಹೆಂ ಚೊಯ್ತಾನಾ ಎಕ್ ಬಾಳ್ ಗೊಣಿ ಖಾಂದ್ಯಾರ್ ಘಾಲ್ನ್ ರಾವ್ತಾನಾ ಭಂವ್ತಣಿಂ ಕಚ್ರೊ, ಆಸಾಂ ಕೊಣಾಕ್ ಹುಸ್ಕೊ ಹೆಂ ನೆಂಟೆ ಚೊಯ್ತಾ, ಮೆಳಾತ್ಗೀ ಕಾಂಯ್ ಉಸ್ಣೆಂ ಪಾಲ್ವೊಂಕ್ ತ್ಯಾ ಪೊಟಾಚೊ ಉಜೊ ಭುಕೆ ಮುಖಾಂತ್ರ್ ತ್ಯಾ ಬಾಳಾಕ್ ಲಾಸ್ಚೊರಚ್ತಾನಾ ತುವೆಂ ಕಿತ್ಯಾ ರಚ್ಲಾಯ್ ಆಶೆಂ?ಗ್ರೇಸ್ತಾಕ್ ಸರ್ವ್, ದುಬ್ಳ್ಯಾಕ್ ಕಾಂಯ್ ನಾ ಕಶೆಂ?ಹ್ಯಾ ನೆಂಟ್ಯಾಚಿ ಚೂಕ್ ತರೀ ಕಿತೆಂಗೊಣಿ ಖಾಂದ್ಯಾರ್ ಘಾಲ್ನ್ ಸೊಧ್ತಾ ತರೀ ಕಿತೆಂಖೈಂ ಆಸಾತ್ ತಾಚಿ ಜಲ್ಮ್ದಾತಾರಾಂಮತಿಂತ್ ಮ್ಹಜ್ಯಾ ಹಜಾರ್ ಚಿಂತ್ನಾಂ ಲ್ಹಾರಾಂ ದೆವಾನ್ ಥೊಡ್ಯಾಂಕ್ ದಿಲಾಂ ಧಾರಾಳ್ ಥೊಡ್ಯಾಂಚಿ ಜಿಣಿಂ ಜಾಲ್ಯಾ ಕರಾಳ್ ದೀವ್ನಾ ವಸ್ತಿ ಕರುಂಕ್ ಪುರ್ತೆಂ ಏಕ್ ಥಳ್ ಹೆಂ ಸರ್ವ್ ರಚ್ನಾರಾಚ್ಯಾ ರಚ್ನೆಚೊ ಖೆಳ್ ಮನ್ಶ್ಯಾ ಜಿಣ್ಯೆಂತ್ ಭುಕೆಚೊ ತಾಂಡವ್ ಕಿತ್ಲ್ಯೊ ಕುಡಿ ಜಾಲ್ಯೊ ನಿರ್ಜೀವ್ನೆಂಟೆ ಹೆಂ ಬಾಳ್, ಕಚ್ರ್ಯಾಂ ಭಂವಾರ್ ಉಬೆಂಜಾಣಾಂಗೀ ತೆಂ ಕಿತೆಂ ಬರೆಂ ಆನಿ ಕಿತೆಂ ಖೊಟೆಂಜಲ್ಮಾಲ್ಲ್ಯಾ ಚುಕಿಕ್ ಭೊಗ್ತಾ ಕಶ್ಟ್ ಖರೆಂಪೋಟ್ ಭರುಂಕ್ ಸದಾಂ ಉಸ್ತಿತಾ ಸಾರೆಂ
5.ತುಂ ತರ್ಯೀ ಭಿರ್ಮತ್ ಪಾವ್

ಪ್ರಿಯಾ ಸಿಕ್ವೇರಾ, ಫೆರಾರ್/ಕುವೇಯ್ಟ್
ಯೇ ಸುರ್ಯಾ, ಪಳೆ ತ್ಯಾ ಪಾಪ್ ಬಾಂವ್ಡಾಕ್ ತೊಂಡಾ ತಿಂ ಬಾವ್ಲ್ಯಾಂತ್, ಅಂಗ್ ತೆಂ ಕರ್ಪಾಲಾಂ ಲಜ್ ಮಾನ್ ಬಾಡ್ಯಾಕ್ ದಿಲ್ಯಾರೀ ಗ್ರೇಸ್ತಾ ತಿಂ ವೇಸ್ ಪಾಂಗುರ್ತಾತ್; ಮೊಲಾಧಿಕ್ ವಸ್ತುರಾಂನಿ. ಮಾನ್ ಮರ್ಯಾದೆಕ್ ಜೀವ್ ದಿಂವ್ಚಿ ದುಬ್ಳಿ ತಿಂ ಮಾನ್ ದಾಂಪುಂಕ್ ಆಶೆತಾತ್; ಘಾಣ್ಚಾ ಬಾಣ್ಶಿರ್ಯಾಂನಿ ಮನಿಸ್ ಜಾಲ್ಲ್ಯಾಂಕ್ ನಾ ಆಸ್ಚೆಂ ತೆಂ ಮನ್ಶಾಪಣ್ ಸುರ್ಯಾ ತುಂ ತರೀ ದಾಕಯ್ ಲಾಸ್ ತುಜ್ಯಾ ತೀಕ್ಷ್ಣ್ ಕಿರ್ಣಾಂನಿ ತ್ಯಾ ಘಾತ್ಕಿ ಯೆಮ್ಕುಳ್ಯಾಂಕ್ ಥಾಂಬಯ್ ತುಜ್ಯಾ ಮೊವಾಳ್ ಕಿರ್ಣಾಂನಿ ತ್ಯಾ ದುಬ್ಳ್ಯಾ ದಾಕ್ಟ್ಯಾಂಕ್
6.ಭುಕ್ ಅನಿ ಸೊಧ್ನಾಂ

ರೋನಿ ಸುವಾರಿಸ್, ಕೆನಡಾ
ಹಾಯ್ ಹಾಯ್ ಭುಕೆನ್ ಮಾರ್ತಾಂ ಹಾಂವ್ ಹಾಕ್ನಾ ಮ್ಹಜ್ಯಾ ಪೊಟಾಕ್ ಘಡಿಯೆಚೆಂ ಸುಖ್ಪಳೆತಾತ್ ಆಶೆನ್ ದೊಳೆ ಕಸ್ರ್ಯಾ ರಾಶಿಕ್ಪುಣ್ ಝಳ್ಕಾನಾ ಕಾಂಯಿಚ್ಚ್ ಭುಕೆಚ್ಯಾ ದೊಶಿಂಕ್ಜಾಯ್ನಾ ಸೊಮಿಯಾ ಮ್ಹಜ್ಯಾನ್ ಸೊಸುಂಕ್ ಹಿ ಭುಕ್ನಾ ಬಳ್ ಹಾತಾಂನಿ ಭುಕೆಚೆಂ ಮಾಗೊಂಕ್ ಭಿಕ್ದಯಾ ದಾಕಯ್ ಮೂಟ್ಭರ್ ಶಿತಾಕ್ಬೊಗ್ಸಿ ಕಾಂಯ್ ಅಸಾ ತರ್ ಪಾತಾಕ್ದೆಕ್ತಾನಾ ಯಾ ಭಂವಾರಿಂಚ್ಯಾ ವ್ಹಡ್ ಮನ್ಶ್ಯಾಂಕ್ವೊಡ್ತಾ ಮನ್ ಕಾಂಯ್ ತರೀ ಮಾಗೊಂಕ್ಪುಣ್ನಾ ತಾಂಚ್ಯಾ ಮುಖಾಮಳಾರ್ ಮಯ್ಪಾಸಾಚಿ ವಳೊಕ್ಚಿಂತಾನಾ ನಪಂಯ್ಚ್ ಜಾತಾ ಭುಕೆಚಿ ಝಳಕ್ಭುಕೆಲ್ಲ್ಯಾಂಕ್ ದೀಂವ್ಕ್ ದಿಸ್ತಾ ತಾಂಕಾ ದೂಕ್ದೆಸ್ವಾಟ್ ಕರ್ನ್ ಉಡಯ್ತಾನಾ ಕಾಂಯ್ ಭೊಗಾನಾ ಚೂಕ್ಸತ್ ಯೆ ಪುಣ್ ಲಾಗಾನಾ ತಾಂಕಾ ಆಡೂಕ್ದೆಕುನ್ ಮೆಳ್ತಾ ತಾಂಕಾ ಧಾರಾಳ್ ದೆಸ್ವಾಟೊನ್ ಉಡಂವ್ಕ್ದೀ ಸೊಮ್ಯಾ ದೀ ಧಾರಾಳ್ ಹ್ಯಾ ಗ್ರೇಸ್ತಾಂಕ್ಪೊಟಾಂ ಭರ್ಪೂರ್ ಭರ್ನ್ ವಿಭಾಡುಂಕ್ವಿಭಾಡ್ಲೆಲೆಂ ಥೊಡೆಂ ಯೆವ್ನ್ ಯಾ ಕಸ್ರ್ಯಾಕ್ ಪಡೊಂಕ್ಅನಿ ತಾಂತ್ಲೆ ಥೊಡೆಂ ಮ್ಹಜ್ಯಾ ಪೊಟಾಕ್ ಪಾವೊಂಕ್
7.ಕೊಣ್ ಉಪಾಶಿ ಆನಿಂ ಕೋಣ್ ಪೊಟಾರಿ?

ಜೊಮೆಲ್ ಬೊಂದೆಲ್/ಕುವೇಯ್ಟ್
ಏಕ್ ದೀಸ್ ಬಾವಾ ಹಾಂವ್ ಸಾಂಜೆಚೆಂ ಭಂವ್ಡೆಕ್ ಬಾಯ್ರ್ ಸರ್ಲ್ಲೊಂ ಲಾಗ್ಸಾರ್ ಏಕ್ ವಿಚಿತ್ರ್ ಘಟನ್ ಪಳೆವ್ನ್ ಸಗ್ಳೊಚ್ ಶೆರ್ಮೆವ್ನ್ ಗೆಲೊಂ ತೆಂ ಪಳೆವ್ನ್ ಜೀವ್ ಮ್ಹಜೊ ಕಾಂಪೊಂಕ್ ಲಾಗ್ಲೊ ತೊಂಡ್ ವೊಳಾವ್ನ್ ಬೆಜೊ ಮ್ಹಜೊ ತಾಪೊಂಕ್ ಲಾಗ್ಲೊ ತುಮಿಂಯ್ ತರೀ ಹೆಂ ಆಯ್ಕಾಶ್ಯಾತ್ ಖಂಡಿತ್ ಚುರ್ಚುರೆ ಬೊಗ್ತೆಲ್ಯಾತ್.ಏಕ್ ಲ್ಹಾನ್ ಭುರ್ಗೆಂ ಖಚ್ರ್ಯಾ ಡಬ್ಬ್ಯಾಂತ್ಲೆ ಖಾಣ್ ವಿಂಚುನ್ಭುಕ್ ಥಾಂಬಂವ್ಕ್ ಆಯ್ತೆಂ ಜಾತಾನಾಪಯ್ಸ್ ಉಭೊ ಆಸ್ಲ್ಲೊ ಏಕ್ ಪೆಟೊಭುರ್ಗ್ಯಾಚ್ಯಾ ಜೆವ್ಣಾಕ್ ಲಾಳ್ ಗಳಯ್ತಾಲೊ.ಪಯ್ಲಿ ಉಂಡಿ ತೊಂಡಾಕ್ ದವರ್ಚೆಂ ಫುಡೆಂತಾಂತ್ಲೆಂ ಥೊಡೆಂ ಸುಣ್ಯಾಕೀ ದೀವ್ನ್ ಭುರ್ಗೆಂ ಹಾಸೊನ್ ಚಲ್ತೆಚ್ ರಾವ್ಲೆಂ ಹೆಂ ಪಳೊಂವ್ಚೆ ಧುರ್ಬಾಗ್ ಮ್ಹಜೆ ದೊಳೆ ಉಗ್ತೆ ಕರುಂಕ್ ಲಾಗ್ಲೆ. ಹೆಂ ಪೊಳೆಂವ್ಚೆ ಸುಭಾಗ್ ಅತ್ಬ್ಯಾಚಿ ಭುಕ್ ತಾಸುಂಕ್ ಲಾಗ್ಲೆಂಪೊಟಾ ಭುಕ್ ಥಾಂಬ್ಚ್ಯಾಕ್ ಥೊಡಿಂ ಬಾರಾಂತ್ ನಾಚ್ತಾತ್ಪುಣ್ ಕುಡಿ ಭುಕೆಚೆ ಪೊಟಾರಿ ತಾಂಕಾ ಮೊಲಾಕ್ ಘೆತಾತ್.ತೆದ್ನಾ ತಾಂಚ್ಯಾ ಖರ್ಶೆವ್ಣೆನ್ ಜಾಲ್ಲಿ ಚೂಕ್, ಖಚ್ರ್ಯಾ ಡಬ್ಬ್ಯಾಂತ್ಲೆ ಖಾಣ್ ವಿಂಚುನ್ ಖಾತಾಘರ್ ಉರಂವ್ಚಿಂ ಥೊಡಿಂ ತಾಂಬ್ಡ್ಯಾ ದಿವ್ಯಾಚಾ ಗಲ್ಲ್ಯಾಂನಿ ಭಂವ್ತಾತ್ಪುಣ್ ಘರ್ ಕೊಸ್ಳಾಂವ್ಚೆ ಅಂಗಲಾಪಿ ಹಾಂಕಾ ಸೊಧುನ್ ಯೆತಾತ್ಆತಾ ತುಮಿಂಚ್ ಸಾಂಗಾ, ಹ್ಯಾ ಸಂಸರಾಂತ್ಕೊಣ್ ಉಪಾಶಿ ಆನಿಂ ಕೋಣ್ ಪೊಟಾರಿ?
8.ಆಶಾವಾದಿ

ಅನಿಲ್ ಪೆರ್ನಾಲ್, ಮಸ್ಕತ್
ಭ್ರಮಿದೆಚ್ಯಾ ಪಾಲ್ವಾಂತ್ ಲಿಪ್ಲ್ಯಾಂತ್ ಭವಿಶ್ಯಾಚಿಂ ಸ್ವಪ್ಣಾಂ ಮ್ಹಜಿಂ ಆಕಾಸಾರ್ ಪಾಂವ್ಚಿಂ ಸುರ್ಯಾಕ್ ವೆಂಗ್ಚಿಂ ಚಂದ್ರಾಕ್ ದೆಖ್ಚಿಂ ಜಾತಿತ್ ಕೆದ್ನಾಂ ಸತ್ ನೆಣಾಂ ಭರ್ವಸೊ ಸಂಗಿಂಚ್ಚ್ ಆಸಾ ಹುಮೆದಿಚಿ ವಾತ್ ಕಾಳ್ಜಾಂತ್ ಝಳ್ತಾ ಹುಮೆದಿಚಿ ವಾತ್ ಝಳ್ತಾಪರ್ಯಾಂತ್ ಭರ್ವಸ್ಯಾಚೊ ಉಜ್ವಾಡ್ ಆಸ್ತಲೊ ಆನಿಂ ಹ್ಯಾ ಉಜ್ವಾಡಾಂತ್ ಭವಿಶ್ಯಾಚಿ ವಾಟ್ ಸೊಧ್ತಲೊಂ. ಹುಮೆದ್ ಆನಿಂ ಭರ್ವಾಶ್ಯಾಚ್ಯಾ ಮೆಳಿಂತ್ ಆತ್ಮ್-ವಿಶ್ವಾಸಾಚೆಂ ಬಾಳ್ ಜಲ್ಮಾತೆಲೆಂ ಕ್ರಮೇಣ್ ಸ್ವ-ಪಾತ್ಯೆಣೆಚೆಂ ನಾತ್ ಜಾತೆಲೆಂ ಸರ್ವ್ ಕುಟಾಂಬ್ ಸಂಗಿಂ ಮೆಳೊನ್ ಮ್ಹಾಕಾ ವಯ್ರ್ ಪಾಯ್ತೆಲೆಂ ಹ್ಯಾ ಕುಟ್ಮಾಚ್ಯಾ ಸಹಕಾರಾನ್ ಏಕ್ ದೀಸ್.... ಹಾಂವ್ ಜರೂರ್ ಭ್ರಮಿದೆಚೊ ಪಾಲಂವ್ ಉಭಯ್ತಲೊಂ ಆಕಾಸಾರ್ ಪಾವ್ತಲೊಂ ಸುರ್ಯಾಚೆರ್ ರಾವೊನ್ ಚಂದ್ರಾಕ್ ದೆಖ್ತೊಲೊಂ...!!!!
9.ಕಿತೆಂ ಉಸ್ತಿತಾಯ್?

ವಲ್ಲಿ ಕ್ವಾಡ್ರಸ್, ಅಜೆಕಾರ್/ಕುವೇಯ್ಟ್
ಕಿತ್ಯಾಕ್ ಉಸ್ತಿತಾಯ್ ಕಿತೆಂ ಸೊಧ್ತಾಯ್ ಹ್ಯಾ ಕಸ್ತಳಾಂತ್ ಹ್ಯಾ ಸುಡ್ಕಾಡಾಂತ್ ಕುಸ್ಲೆಲ್ಯಾ ಘಾಣೆರ್ಯಾ ಸಂಸಾರಾಚಾ ಚಿಕೊಲಾಮಧೆಂ ತೆಂ ಕಿತೆಂ ಸೊಧ್ತಾಯ್ ಕಿತ್ಯಾಕ್ ಉಸ್ತಿತಾಯ್ ಪೊಟ್ ಭರುಂಕ್ ಪೊಟ್ ಭರ್ಲೆಲ್ಯಾಂನಿ ದೆಂಖ್ ಕಾಡ್ನ್ ಉಸ್ಟ್ಯಾ ಹಾತಾನ್ ಚಿಂವೊನ್ ಲೆಂವೊನ್ ಉಡಯಿಲ್ಲ್ಯಾ ಕಾಲ್ಚಾ ಪೊರ್ಚಾ ಬೆಳ್ಶೆಲ್ಲ್ಯಾ ಖಾಣಾಕ್ ತುಂ ಕಿತ್ಯಾಕ್ ಸೊಧ್ತಾಯ್ ಹೊ ಮಾನ್ ಜಾಗೊ ಸಮ್ಮಾನಿತಾಂಚೊ ತುಂ ಮಾನ್ ಸಾಂಭಾಳ್ ಪಿಂಜ್ಕರ್ ವಸ್ತ್ರಾಂತ್ ಮಾನ್ ತುಜೊ ರೊಕ್ಡೊಚ್ ಉಭ್ತಲೊ ಬಾಳ್ಶೆಂ ತುಂ, ತುಜಾ ಲಾವಾರಿಸ್ ಬಾಳ್ಶಾಕ್ ಹಾಂಗಾಚ್ ಉಡವ್ನ್ ತುಕಾ ಧಾಂವೊಂಕ್ ಪಡ್ತೆಲೆಂ ಕಿತ್ಯಾಕ್ ಉಸ್ತಿತಾಯ್ ಕೊಣೆ ಉಡಯಿಲ್ಲ್ಯೊ ಕೊಣೆ ಪಡಯಿಲ್ಲ್ಯೊ ಪೊಟ್ಲ್ಯೊ ಗುಡ್ಡಾವ್ನ್ ಕಾಲ್ಚೆ ದಿಸಾಚಾ ರಂಗಾಳ್ ಫಿಂತಾಂಕ್ ಅಶೆಂಯ್ ಮಸ್ತುನ್ ಕಿತೆಂ ಸೊಧ್ತಾಯ್ ದೆವಾನ್ ಕಾಂಯ್ ತುಜೆಂ ನಶಿಬ್ ಹಾಂತುಂ ಪುರ್ಲಾಂ?
© 2006 ದಾಯ್ಜ್ · ಆಶಾವಾದಿ ಪ್ರಕಾಶನ್ ಸರ್ವ್ ಹಕ್ಕಾಂ ರಾಕೊನ್ ದವರ್ಲ್ಯಾಂತ್.
ಕಥಾಪಾಠ್कथापाठWorkshop May 2008
ದಾಯ್ಜ್ ಮಿಸಾಂವಾಕ್ ಪಾಂಚ್ವೆಂ ವರಸ್
ಖಬರ್खबरNews Apr 2006
ಅಖಿಲ್ ಭಾರತೀಯ್ ಬರವ್ಪ್ಯಾಂಚಾ ಎಕ್ತಾರಾಚೆ 2006-08 ಇಸ್ವೆಚೆ ಹುದ್ದೆದಾರ್
ಕಥಾಪಾಠ್कथापाठWorkshop May 2006
ಕಾರ್ಕಳಾಂತ್ ದಾಯ್ಜ್-ಮಿತ್ರ್ ಸಾಹಿತಿಕ್ ಶಿಭಿರ್ 2006
More in Daaiz
ಕವಿತಾकविताPoem 31 Dec 2006
ತಿಂತೆರಾಂತ್ ಪಿಂತುರ್ : 2006 ವರ್ಸಾಚೊ ದಾಯ್ಜ್ ಕವಿ ಪುರಸ್ಕಾರ್
ಕವಿತಾकविताPoem Nov 2006
ಪರತ್ ಆಯ್ಲ್ಯಾರೇ ದಿವಾಳಿ
ಕವಿತಾकविताPoem Nov 2006
ಕಿತ್ಲೆ ವೇಸ್?
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.
Comments
No comments yet. Be the first to say what you thought of it.
Leave a comment