ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ತವಳ್ತವಳ್
ಹೆಂ ವಾರ್ಜಿಕ್ ಹರ್ಶೆಂಚೆಂ, ಕಾಲ್ಚೆಂ, ಆಯ್ಚೆಂ, ಫಾಲ್ಯಾಂಚೆಂ, ತವಳ್ತವಳ್ ಮತಿಚಾ ಪಡ್ದ್ಯಾಚೆರ್
ಖಂಚೊನ್ ಯೆಂವ್ಚೆಂ ಲಿಸಾಂವ್, ಬೆಸಾಂವ್ ಯಾ ತೆಸಾಂವ್...
ತವಳ್ತವಳ್ - 4 . ಧಾಂವ್
ಮೆಲ್ವಿನ್ ಜೆ. ವಾಸ್
ಧಾಂವ್ಚ್ಯಾ ಘೊಡ್ಯಾ ದೊಳ್ಯಾಂಕ್ ಕೇವಲ್ ಮುಕ್ಲಿ, ಆಪ್ಣಾಕ್ ಪಾವೊಂಕ್ ಜಾಯ್ ಆಸ್ಲ್ಲಿ ದಿಶಾ ಮಾತ್ರ್ ದಿಸ್ಚ್ಯಾ ಖಾತಿರ್, ಸ್ವಾರ್ಥಿ ಕೋಣ್ ಬಾವ್ಡೊ ಘೊಡ್ಯಾಚಾ ದೊಳ್ಯಾಂಚಾ ದೋನಿಯ್ ಕುಶಿಂನ್ ಘೊಡ್ಯಾಕ್ ಹೆಂವ್ಶಿ ತೆಂವ್ಶಿಲೆಂ ಕಾಂಯ್ಚ್ ದಿಸಾನಾತ್ಲ್ಲ್ಯಾ ಪರಿಂ ಪಟ್ಟೆ ಬಾಂದ್ತಾ. ಉಪ್ರಾಂತ್ ಆಪ್ಲ್ಯಾ ಲಾಚಾರ್ ಹಾತಾ ಪಾಂವ್ಯಾನಿ ತ್ಯಾ ಬಳಿಷ್ಟ್ ಘೊಡ್ಯಾಕ್ ಧಾಂವ್ಡಾಯ್ತಾ, ಧಾಂವ್ಡಾಯ್ತಾ, ಧಾಂವ್ಡಾಯ್ತಾ, ಧಾಂವ್ಡಾಯ್ತಾ ಆನಿ ಖಂಯ್ಸರ್....?
ಘೊಡೊ ಜಿಕ್ತಾ ಯಾ ತೊ ಲಾಚಾರ್ ಮನಿಸ್ ಘೊಡ್ಯಾಕ್ ಧಾಂವ್ಡಾಂವ್ಚೊ ಜಿಕ್ತಾ....? ಬಳಿಷ್ಟ್ ಆನಿ ಲಾಚಾರ್ ಅಶೆಂ ಎಕಾಮೆಕಾ ಸದಾಂತ್ ಕಶೆಂ ಸಾಂಗಾತ್ ದಿತಾತ್? ಹೊ ಸಾಂಗಾತ್ಯ್ ಕೆದ್ನಾಂ ವರೇಗ್? ಜಯ್ತಾಕ್ ಯಾ ಸಲ್ವಣೆಕ್? ಜಯ್ತ್ ತೆಂ ಹಾವೆಂ ಪಳಂವ್ಕ್ ನಾಂ....! ಬೋವ್ಶಾ ಸಲ್ವಣೆಕ್....!!!
ತರ್ ಸಲ್ವಣೆಕ್ ವೆಂಗುಂಕ್ ಹಿ ಧಾಂವ್.....? ಮನಿಸ್ ಧಾಂವ್ತಾ... ಕೋಣ್ ಕೊಣಾಚಾ ಪಾಟ್ಲ್ಯಾನ್.... ಕೋಣ್ ಕೊಣಾಚಾ ಮುಖ್ಲ್ಯಾನ್... ಕೋಣ್ ಕೊಣಾಚಾ ಪಾಟಿರ್..... ಕೋಣ್ ಕೊಣಾಚಾ ಪೊಟಾರ್...!
ಮಾರೆಕಾರ್ ಧಾಂವ್......!
ಜಶೆಂ ಘೊಡ್ಯಾಕ್ ಧಾಂವ್ತಾನಾ ಹೆಂವ್ಶಿ ತೆಂವ್ಶಿ ಪಳಂವ್ಚೆಂ ಹಕ್ಕ್ ನಾಂ ತಶೆಂ ಹಾಂಗಾಸರ್ ಧಾಂವ್ಚಾ ಮನ್ಶ್ಯಾಕ್ ಹೆವ್ಶಿಂ ತೆವ್ಶಿಂ ಪಳಂವ್ಚಿ ದೀಷ್ಟ್ ನಾಂ. ಕುಡ್ಡೆ.....!
ಕೋಣ್ ಆಪ್ಣಾಕ್ಚ್ ಕುಡ್ಡೊ ಕರ್ತಾ ತರ್ ಕೋಣ್ ದುಸ್ರ್ಯಾಕ್ ಕುಡ್ಡೊ ಕರಯ್ತಾ. ಆನಿ ಧಾಂವ್ತಾ...... ಕೋಣ್ ಝೆಲ್ಯಾಂಚಾ ತುರ್ಯಾಕ್ ತರ್ ಕೋಣ್ ಭಾಂಗಾರಾಚಾ ಮುಡ್ಯಾಕ್.... ಕೋಣ್ ನಾಂವಾಚಾ ಪಟ್ಟ್ಯೆಕ್ ತರ್ ಕೋಣ್ ನೋಟಾಂಚಾ ಆಟ್ಟ್ಯೆಕ್......!
ಹಿ ಸೈಂಭಿಕ್ ಧಾಂವ್ ಖಂಡಿತ್ ನ್ಹಂಯ್....!
ಅಶೆಂ ಸಾಂಗೊಂಕ್ ಹಾಂವೆ ಕಾರಾಣ್ಯ್ ಆಸಾ. ಪಾಸ್ಕಾಲಾಬಾಚಾ ಗಾದಿಂತ್ ಶೆಂಬರ್ ಘೊಟುನ್ ಒಂಟಾರ್ ಚುರುಟ್ ಚಡಯ್ತಾನಾ ’ಧಿಂ...’ ಕರುನ್ ಚಡ್ಲ್ಲ್ಯಾ ಅಮಾಲಾಕ್ ಝಳ್ಕಾಲ್ಲ್ಯಾ ಕೊಣ್ಯ್ ಏಕ್ ಭಿಕಾರ್ಯಾ ಬಾವ್ಡ್ಯಾಚೆಂ ಜಿವಿತ್ ಪಾನಾನಿಂ ಲಿಖ್ಲ್ಲ್ಯಾ ಪರಿಂ ಹೆಂ ಭಿಲ್ಕುಲ್ ನ್ಹಂಯ್. ದೊಳ್ಯಾಂಕ್ ಕುಡ್ಕೆ ಭಾಂದ್ಲ್ಲೆ ಮಾತ್ರ್ ಸಪ್ಣಾಂನಿ ಜಿಯೆಂವ್ಚೆ ಪ್ರಯತ್ನ್ ಕರ್ತಾತ್. ಹೆಂ ಪ್ರಯತ್ನ್ ಕೆದ್ನಾಂ ವರೇಗ್ ತೆಂ ಹಾಂವ್ ಸಾಂಗಿನಾಂ. ಬೋವ್ಶಾ ಮರ್ಣಾ ಪೆಟೆರ್ ಪುಲಾಂ ತುರೊ ಉಣೊ ಪಡ್ತಾ ವರೇಗ್ ಜಾಂವ್ಕ್ ಪುರೊ. ತೆಂ ಆಸೊಂ. ಹಾವೆಂ ಸಾಂಗ್ಚಿ ಧಾಂವ್ಣಿ ಮನ್ಶ್ಯಾಚಿ ಸೈಂಭಿಕ್ ಧಾಂವ್ಣಿ ಖಂಡಿತ್ ನ್ಹಂಯ್. ಸಂಯ್ಭಾನ್ ಧಾಂವ್ಚಾ ಮನ್ಶ್ಯಾಕ್ ಗಾಂವ್ ಸೊಡ್ಚಿ ಗರ್ಜ್ ಪಡಾನಾ. ಗಾಂವ್ ಸೊಡ್ಲೆಲ್ಯಾಕ್ ಧಾಂವಾನಾಸ್ತಾನಾ ಉಪಾಯ್ ನಾಂ....!
ಹಿ ಧಾಂವ್ ಕಿತ್ಯಾಕ್....?
ಮನಿಸ್ ಧಾಂವ್ಚೆ ಖಾತಿರ್ ಜಲ್ಮಾತಾ?
ಜಲ್ಮೊಂಚಾ ಪಯ್ಲೆಂ ಮನಿಸ್ ಧಾಂವಾನಾ ಕಿತ್ಯಾಕ್?
ತಾಕಾ ಭಾಂದುನ್ ಘಾಲ್ಲೊಲೊ ಆಸ್ತಾಂ ತ್ಯಾ ಪಾಸೊನ್?
ಆಪ್ಲೆ ಹಾತ್ ಪಾಂವ್ ಸುಟ್ಲೆ ಮ್ಹಣ್ತಾನಾ ಜಲ್ಮ್ ಘೆತ್ಲ್ಲ್ಯಾ ಥಾವ್ನ್ಯ್ ಧಾಂವ್ತಾ. ಆತಾಂ ಹೊ ಮನಿಸ್ ಇತ್ಲೊ ಮುಕಾರ್ ಧಾಂವ್ಲಾಕೀ ಪ್ರಾಯ್ವಂತಾಚಾ ಘರಾಂಕ್ ಸಬಾರ್ ಕಡೆನ್ ಸಬಾರ್ ಜಾಗ್ಯಾಂನಿ ಮುಲ್ಯಾ ಫಾತರ್ ಘಾಲುಂಕ್ ಲಾಗ್ಲಾ......!
ಆಪ್ಲ್ಯಾಚ್ ಆವಯ್ ಬಾಪಯ್ಕ್ ಉತರ್ಪಣಾಂತ್ ಕುಡಾಂವ್ಚೆ ಖಾತಿರ್.......!
ಆಪ್ಲ್ಯಾ ಧಾಂವ್ಣೆರ್ ಆಪ್ಣೆಂ ಹೊಗ್ಡಾಯಿಲ್ಲಿಂ ತಿಂ ಮೊಗಾ ಮಯ್ಪಾಸಾಚಿಂ ಸುತಾಂ.... ಮನ್ಶ್ಯಾ ಜಿವಿತಾಕ್ ಆತಾಂ ಜಾಂವ್ಕ್ ಪಾವ್ಲ್ಯಾಂತ್ ಖತಾಂ. ಹಳ್ದುವಿಂ ಯಾ ತಾಂಬ್ಡಿ... ರಂಗ್ ತೊ ಆಪಾಪ್ಲ್ಯಾ ಹಾತಾಂನಿ ವೊಡ್ಲಲೊ, ಪೊಶೆಂವ್ಕ್ಯ್ ಆಪಾಪ್ಲ್ಯಾ ಕಾಳ್ಜಾನಿಂಚ್ ಪಡ್ತಲೊ. ಆಪ್ಲ್ಯಾ ಧಾಂವ್ಣೆಚಾ ವಾಟೆರ್ ಕೆಲ್ಲೊ ಆನಾವಶ್ಯಕ್ ಆಡಂಭರ್, ಪಿಸೊ ನಾಚ್, ದಳ್ದಿರಿ ಮಜಾ, ಖಂಯ್ಚಾ ಧಾಂವ್ಣೆಚಾ ಖಂಯ್ಚಾ ಜಿಕ್ಣೆಚೆಂ ಲಕ್ಷಣ್ ತೆಂ ತಾಂಕಾಚ್ ಖಬಾರ್ ನಾಂ. ಭೆಷ್ಟೆಂ ಪಿಶೆಂಪಣ್.
ರಸ್ತ್ಯಾರ್ ಕೋಣ್ ಎಕ್ಲೊ ಧಾಂವ್ತಾ ತರ್ ಆಪುಣ್ಯ್ ಧಾಂವ್ಲೆ. ಪಾಪ್ ತೊ ಭಿಕಾರಿ ಪೊಟಾಚಾ ಭುಕೆ ಖಾತಿರ್ ಧಾಂವ್ತಾಲೊ ಕಾಂಯ್ ತರ್ಯ್ ಭುಕ್ ಥಾಂಬಂವ್ಕ್ ಮೆಳ್ತೆಲೆಂ ಮ್ಹಣೊನ್. ತಾಚ್ಯಾ ಕಟ್ಟ್ಯೆಂತ್ಲೆಂಯ್ ಹಾಣಿಂ ಧಾಂವ್ಲ್ಲ್ಯಾನಿಂ ಬೊಖಾಯ್ಲೆಂ. ಆನಿ ತ್ಯಾ ಭಿಕಾರ್ಯಾಕ್ ಮುಕಾರ್ ಧಾಂವ್ಡಾಯ್ಲೊ. ತೊ ಧಾಂವ್ತಾ...... ಧಾಂವ್ತಾ... ಆನಿ ಧಾಂವ್ತಾ ಗಳೊ ಸುಕವ್ನ್, ಪೊಲೊ ಭಿಜವ್ನ್, ಪಾಯಾಂಚಾ ಖೊಟೆ ಥಾವ್ನ್ ರಗ್ತಾಚ್ಯಾ ಥೆಂಬ್ಯಾಂಕ್ ವಾಳಯಿತ್ತ್.....!
ಹ್ಯಾ ಖಾಡಿ ಗಾಂವಾಂನಿ ಧಾಂವ್ ಮಾರುನ್ ಆಯಿಲ್ಲೊ ಲೋಕ್, ಆಪ್ಣೆಂ ಆಯಿಲ್ಲ್ಯಾ ವಾಟೆಕ್, ಕಾಡ್ಲೆಲ್ಲ್ಯಾ ಪಾವ್ಲಾಂಕ್ ಕಿತ್ಲೆಂ ಆಜ್ ವಳ್ಕಾತಾ? ವಾಟ್ ತಿ ಆಜೂನ್ಯ್ ತಶಿಚ್ ಆಸಾ. ತಾಚ್ಯೆ ವಯ್ಲಿಂ ತಿ ಪೊಕೊಳ್ ಪಾವ್ಲಾಂ ಮಾತ್ರ್ ವಾರ್ಯಾರ್ ಉಬೊನ್ ಗೆಲ್ಯಾಂತ್ ಆನಿ ದುಸ್ರ್ಯಾಂ ಬಾವ್ಡ್ಯಾಂಕ್ ತ್ಯಾ ವಾಟೆರ್ ತಿಂಚ್ ಪೊಕೊಳ್ ಪಾವ್ಲಾಂ ಕಾಡುಂಕ್ ಕಾರಾಣ್ ಕರ್ತಾತ್. ಖಾಡಿ ಗಾಂವಾನಿಂ ನಶೀಬ್ ಉಘಡ್ತಾ ಮ್ಹಣ್ಚಾಕ್ ಕಾಂಯ್ಚ್ ದುಬಾವ್ ನಾಂ. ತೆಂ ಖಂಯ್ಚಾ ನಮುನ್ಯಾಚಾ ವಾಟೆನಿಂ ಉಘಡ್ತಾ ಮ್ಹಣೊನ್ ವಿಚಾರ್ಚೆಂ ನ್ಹಯ್. ವಾಟೊ ಆಪ್ಣೆಂಚ್ ಸೊಧುನ್ ಕಾಡ್ಚೆಂ. ಆಪ್ಣೆಂಚ್ ರಚ್ಲ್ಲ್ಯಾ ನಶೀಬಾಕ್ ಪುಲಾಂ ಝೆಲ್ಯಾಂನಿ ವಿಣುನ್ ಗಾಂವಾಂತ್ ಮರ್ನೆಮಿಚೊ ವೇಸ್ ಖೆಳ್ತಾನ್ ಹೆಂ ಪಳೆಲ್ಲೊ ನೆಂಟೊ ಲೋಕ್, ತಿ ನೆಂಟಿ ವಿಧವ್, ತಿಂ ನೆಂಟಿ ಚಲಿ ಆನಿ ತೊ ನೆಂಟೊ ಬಾಪಯ್ ಪಾಸೊನ್ ಹ್ಯಾ ಖಾಡಿ ಗಾಂವ್ಚಾ ವಾಟೆಕ್ ಸಪ್ಣೆಂವ್ಕ್ ಲಾಗ್ತಾತ್. ಹ್ಯಾ ಸಪ್ಣಾನಿಂ ದುಃಖ್ ಕಿತ್ಲೆಂ? ಬಲಿದಾನ್ ಕಿತ್ಲೆ?
ತೆಂ ಆಯ್ಕೊನ್ ಫಾಂತ್ಯಾಫಾರಾಚಿ ಮ್ಹಜಿ ನೀದ್ ಪಾಸೊನ್ ಗಳ್ಗಳ್ಯಾಂ ರಡೊಂಕ್ ಲಾಗ್ಲ್ಯಾ. ಹೊ ದಳ್ದಿರ್ ಧಾಂವ್ಚೊ ಮನಿಸ್ ಹ್ಯಾ ದುಃಖಾಂಚೆಂ ಮೋಲ್ ಕೆದ್ನಾಂ ದಿತಲೊ? ಕರೆಜ್ಮಾತಿಕ್ ಭೆಟೆರ್ ಹಾತ್ ಉಭಾರುನ್ ಡ್ಯಾನ್ಸ್ ಕರ್ತಾನಾ? ಯಾ ಪಾದ್ರಿನ್ ಇಗರ್ಜೆಂತ್ ಉಂಡೊ ಆನಿ ವಾಯ್ನ್ ದೆವಾಕ್ ಸಮರ್ಪಿತಾನಾ ಆಪ್ಲ್ಯಾ ಬೊಲ್ಸಾಂತ್ ಯಾ ಹ್ಯಾಂಡ್ ಬ್ಯಾಗಾಂತ್ ಮೊಬಾಯ್ಲ್ ಪೋನ್ ವಾಜ್ತಾನಾ?
ಫೆಸ್ತಾಂ ವ್ಹಡ್ಲಿಂ...!
ನಾಂವ್ ವ್ಹಡ್ಲೆಂ....!
ಇಗರ್ಜೆಚಾ ಫಾತ್ರಾರ್ ನಾಂವ್ ಪಯ್ಲೆಂ....!
ಆಜ್ಕಾಲ್ ಇಗರ್ಜೆಚೊ ಕಾಯ್ದೊ ಕಾನೂನ್ಯ್ ಹ್ಯಾ ಧಾಂವ್ಚಾ ಮನ್ಶ್ಯಾಂನಿ ಬದ್ಲಿಲಾಂ ಆಪ್ಣಾಕ್ ಜಾಯ್ ಜಾಲ್ಲ್ಯಾ ಪರಿಂ. ಕಿತ್ಯಾಕ್ ಮ್ಹಳ್ಯಾರ್ ಹಾಂಚೆ ಥಾವ್ನ್ಯ್ ಗಾಂವಾಂತ್ ಭಕ್ತಿಕ್ ಕಾರ್ಯಿಂ ಚಲ್ತಾತ್ ಮ್ಹಳ್ಳೆಂಯ್ ಸತ್. ಭಿಕಾರಿ ಬಾವ್ಡೊ ಕಿತೆಂ ದಿತಲೊ? ದಿಸ್ಪಡ್ತ್ಯಾ ನೀಸ್ ಪೆಜೆಕ್ ತಾಕಾ ಚಿಂತುಂಕ್ ಪಡ್ತಾನಾ ಇಗರ್ಜೆ, ಇಸ್ಕೊಲಾಚೆಂ, ಸಾಲಾಚೆಂ ಚಿಂತಾಪ್ ತಾಕಾ ಯೆತಲೆಂ ತರ್ಯ್ ಕಶೆಂ? ತ್ಯಾ ಬಾವ್ಡ್ಯಾಕ್ ದೀಸ್ಭರ್ ಖೊರೆಂ ಆನಿ ಪಿಕ್ಕಾಸ್ ಉಕಲ್ಲ್ಯಾಕ್ ಕರೆಜ್ಮಾತಿಕ್ ಸಾಂಜೆರ್ ಹಾತ್ ಉಭಾರುಂಕ್ ಸಕತ್ ಖಂಯ್ ಮೆಳ್ತಾ? ತೆಂ ದೀಸ್ಭರ್ ಬಿಡಿ ವೊಳಾಯಿಲ್ಲೆಂ ಬಾಯ್ಲ್ ಎಕಾ ಕುಶಿಂನ್ ಭುರ್ಗೆಂ ಚಿವೊ ವೊಡುನ್ ವೊಡುನ್ ಆಪ್ಲಿ ಸಕತ್ ಚಿಂವ್ತಾನಾ ತೆಂಯ್ ಕಶೆಂ ಮಾಗ್ಣ್ಯಾ ರಜಾರಾಕ್ ದಿಂಬಿ ಮಾರ್ತೆಲೆಂ? ಹಾಕಾ ಜಾಯ್ ಬೊಕ್ರೊ, ಕೊಂಬಿ, ಪುಲಾವ್ ಖಾವ್ನ್ ವಾಡ್ಲ್ಲೆ ಸಕ್ತೆಭರಿತ್ ಹಾತ್. ಹೆ ಹಾತ್ ಹ್ಯಾ ಖಾಡಿ ಗಾಂವಾಂತ್ ನ್ಹಂಯ್ ಆಸ್ತಾನಾ ಆನಿ ಖಂಯ್ ಮೆಳ್ತೆಲೆ? ಅಶೆಂ ಆಸ್ತಾನಾ ಗಾಂವ್ಚಾ ಬಾಯ್ಲೆನ್ ಆಪ್ಲ್ಯಾ ಘೊವಾಕ್ ಪರ್ಗಾಂವಾಕ್ ಧಾಡ್ಚಾಂತ್ ಯಾ ಘೊವಾನ್ ಬಾಯ್ಲೆಕ್ ಪರ್ಗಾಂವಾಕ್ ಧಾಡ್ಚಾಂತ್ ಬಹುಶ: ಕಾಂಯ್ ಚೂಕ್ ಆಸ್ಚಿ ನಾಂ. ಚೂಕ್ ಆಸ್ಲ್ಯಾರ್ ತಾಂಚಿ... ಪರ್ಗಾಂವಾಕ್ ಪಾವೊಂನ್ ತಾಣಿಂ ವಿಸ್ರಾಲ್ಯಾ ತಾಂಚಾ ಪಾವ್ಲಾಂಚಿ. ತ್ಯಾ ವಾಟೆರ್ ನ್ಹಂಯ್...!
ತಿ ವಾಟ್ ಸಾಸ್ಣಾಕ್ ತಶಿಚ್ ಉರ್ತೆಲಿ ಜೆದ್ನಾಂ ಚ್ಯಾರ್ ಖಾಂದ್ಯಾರ್ ಸಾಸ್ಣಾಚಾ ವಿಶೆವಾಕ್ ವೆತಾ ತೆದ್ನಾಂ ಪರ್ಯಾಂತ್. ಹ್ಯಾ ವಾಟೆರ್ ಆನಿಂ ಕಿತ್ಲೆಂ ದೂಖ್ ಗಳಾತ್? ಆನಿ ಕಿತ್ಲೆ ಆತ್ಮೆ ರಡ್ತಿತ್? ಹ್ಯಾ ವಾಟೆರ್ ಕಿತ್ಲ್ಯಾ ಪಾಂವ್ಯಾಂಚಿ ದಿಶಾ ಚುಕಾತ್? ಕಿತ್ಲ್ಯಾ ಕಾಳ್ಜಾಂಚೊ ಶಿರೊ ತುಟ್ತಿತ್? ಉಗ್ಡಾಸ್ ದವರ್ ಮನ್ಶ್ಯಾ ಧಾಂವ್ತಾನಾ. ತುಂ ಧಾಂವ್, ಫಕತ್ತ್ ಧಾಂವ್...., ಪರ್ವಾನಾಂ.
ತ್ಯಾ ವಾಟೆನ್ ಲಜ್ ಸಾಂಡಿನಾಕಾ.... ಆಯಿಲ್ಲ್ಯಾ ವಾಟೆರ್ ಆತ್ಮ್ಯಾಕ್ ಹೊಗ್ಡಾಯ್ನಾಕಾ. ಖರ್ಶೆವ್ನ್ ಖರ್ಶೆವ್ನ್ ಧಾಂವೊನ್ ತುಂ ಜಿಕೊನ್ ಕೊಸಾಳ್ಚಾ ವಗ್ತಾ.... ತುಜ್ಯಾ ಗಳ್ಯಾಕ್ ಪುಲಾಂ ಝೆಲೊ ನೆಟಂವ್ಚಾ ವಗ್ತಾ.... ತುಜೆಂ ನಾಂವ್ ದುದಾಚ್ಯಾ ಫಾತ್ರಾರ್ ಕಾಂತಂವ್ಚಾ ವಗ್ತಾ ಜರ್ತರ್ ತುಜ್ಯಾ ಆತ್ಮ್ಯಾನ್ ಸಾಂಗಾತ್ ಸೊಡ್ಲೊ, ಇತ್ಲೆಂ ತುವೆಂ ಧಾಂವೊನ್ ಕಿತೆಂ ಉಪ್ಕಾರ್ಲೆಂ?
ಸೊಂಶ್ಯಾಚಾ ವೇಗಾನ್ ಧಾಂವೊನ್ ಸಲ್ವೊನ್ ಯೆಂವ್ಚಾಕ್ಯ್ ಕಾಸ್ವಾಚಾ ಚಾಲಿಂತ್ ಚಲೊನ್ ಜಿಕ್ಚೆಂ ಹ್ಯಾ ವಾಟೆರ್ ಚಡ್ ಶಾಭಿತಾಯೆಚೆಂ. ಹ್ಯಾಚ್ ಪರಿಂ ಆಪ್ಲ್ಯಾ ಧಾಂವ್ಣೆವರ್ವಿಂ ದುಸ್ರ್ಯಾ ಪಾವ್ಲಾಂಕ್ ಪೊಕೊಳ್ ಕರ್ಚಾಕ್ಯ್ ಆಪ್ಲ್ಯಾಚ್ ಪೊಕೊಳ್ ಪಾವ್ಲಾಂನಿ ಘಟಾಯ್ ಭರ್ಚೆಂ ಚಡ್ ಗರ್ಜೆಚೆಂ....!
ಹ್ಯಾ ತುಜ್ಯಾ ಪೊಕೊಳ್ ಪಾವ್ಲಾಂ ವರ್ವಿಂ ಆನಿ ಕಿತ್ಲೆಂ ದೂಃಖ್ ವ್ಹಾಳ್ತಾಲೆಂ? ಕಿತ್ಲಿಂ ಕಾಳ್ಜಾಂ ಕಡ್ತೆಲಿಂ? ಮ್ಹಜ್ಯಾ ಲ್ಹಾನಾಂಕ್ ಭುಜಂವ್ಕ್ ಹಾಂವೆ ಆನಿ ಕಿತ್ಲೆ ಶೆಕ್ಡೆ ಆಶೆಚ್ಚ್ ಮಧ್ಯಾನ್ ಪಾಸೊನ್ ಜಾಗೆಂ ರಾಂವ್ಚೆಂ ಪಡ್ತೆಲೆಂ?
ತವಳ್ ತವಳ್ ಹಾಚಾಧ್ಲೆ ಅಂಕ್ಡೆ: 1, 2, 3
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
