ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಬೂಕ್ ಸಮೀಕ್ಶಾ - 7
ವಾಟ್
ಬೂಕ್: ವಾಟ್
ಕವಿ: ಮೆಲ್ವಿನ್ ರೊಡ್ರಿಗಸ್
ಪ್ರಸ್ತಾವನ್: ಗೋಕುಲ್ದಾಸ್ ಪ್ರಭು
ಛಾಪ್ಲ್ಲಿ ಲಿಪಿ: ಕಾನಡಿ ಆನಿಂ ದೇವ್ನಾಗರಿ.
ಪಾನಾಂ: 92
ಮೋಲ್: ರು. 50
ಪ್ರಕಾಶಕ್: ಕವಿತಾ ಪ್ರಕಾಶನ್
ಪರ್ಗಟ್ ಜಾಲ್ಲಿ ಇಸ್ವಿ: 2003
ಸಮೀಕ್ಶಾ ಚಲಯ್ಣಾರ್: ಮೆಲ್ವಿನ್ ವಾಸ್ ಕೆಲರಾಯ್
ತಾರಿಕ್: 12 ಅಗೋಸ್ತ್ 2005
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ಮೆಲ್ವಿನ್ ಜೆ. ವಾಸ್
ಮೆಲ್ವಿನ್ ರೊಡ್ರಿಗಸ್
ಕವಿಚಿ ವ್ಹಳೊಕ್:
ಮೆಲ್ವಿನ್ ರೊಡ್ರಿಗಸ್, ಕೊಂಕ್ಣೆಂತ್ಲ್ಯಾ ಮ್ಹಾಲ್ಘಡ್ಯಾ ಕವಿಂಪಯ್ಕಿ ಎಕ್ಲೊ. ಕೊಂಕ್ಣಿ ಕವಿತಾಂಕ್ ನವೆಂ ರೂಪ್ ದಿಂವ್ಚಾಂತ್ ನವ್ಯಾ ವಾವ್ರಾಚಿ ಬುನ್ಯಾದ್ ಘಾಲ್ಲೊ. ತಾಚಾ ಫುಡಾರ್ಪಣಾಖಾಲ್, ದೆ|ಚಾ.ಫ್ರಾ.ದೆ’ಕೋಸ್ತಾಚಾ ಮಾರ್ಗ್ದರ್ಶನಾಖಾಲ್ ಅಜಿಕ್ ಅಟ್ರಾ-ವೀಸ್ ವರ್ಸಾಂಧಿಂಚ್ ’ಜಾಗೆ ಕವಿ’ ಪಂಗಡ್ ಉದೆಲ್ಲೊ ಆನಿಂ ಆಯ್ಚಾ ಕಾಳಾಚೆ ಭರ್ವಶ್ಯಾಚೆ ಕವಿ ಉದೆಲ್ಲೆ ತೆಚ್ಚ್ ವೆಳಾರ್. ಕವಿತಾ ಸಾಯ್ಟಾಚೊ ಸಂಪಾದಕ್ ಜಾವ್ನ್, ದುಭಾಂಯ್ತ್ ಕೊಂಕ್ಣಿ ಕವಿತಾಚಿಂ ಕಾಮಾಸಾಳಾಂ ಚಲವ್ನ್ ವರ್ಚೆ ಮುಖಾಂತ್ರ್, ತರ್ನ್ಯಾ ಕವಿಂಕ್ ತೊ ದೇಕ್ ದಿತಾ ಆನಿಂ ವಾಟ್ ಧಾಖಯ್ತಾ. ’ಮೊಗಾ ಪೆಳೊ’, ’ಫಿಂತಾಂ’ ಉಪ್ರಾಂತ್ ಪರ್ಗಟ್ ಜಾಲ್ಲೊ ಹೊ ತಾಚೊ ತಿಸ್ರೊ ಕವಿತಾಜಮೊ ಜಾವ್ನಾಸಾ.
ಸಮೀಕ್ಶಾ ಲೇಖನ್
ವಾಟೆ ವಯ್ಲಿಂ ಫಿಂತಾಂ....! - ಮೆಲ್ವಿನ್ ಜೆ.ವಾಸ್, ಕೆಲರಾಯ್
ಮ್ಹನ್ಶ್ಯಾಚೊ ಏಕ್ ಜಲ್ಮಾಗೂಣ್ ಆಸೊ ಆಸಾಕೀ ತೊ ಆಪ್ಣಾಕ್ ಪಸಂದ್ ಜಾಲ್ಲೆಂ ಫಿಂತ್ ಮಾತ್ರ್ ಉಭಯ್ತಾ. ಜಾಂವ್ ತೆಂ ಕಸಲ್ಯಾಯ್ ರಂಗಾಚೆಂ, ತ್ಯಾ ಫಿಂತಾಚಾ ಉಭವ್ಣೆಂತ್ ತೊ ಆಪ್ಲ್ಯಾ ಜಿವಿತಾಚಿ ರೂಚ್ ದೊಡ್ತಿ ಕರ್ನ್ ಘೆತಾ. ಹಾಂವ್ ಖಂಡಿತ್ ಚಿಂತಿನಾ ಆಪ್ಣಾಕ್ ಪಸಂದ್ ಜಾಲ್ಲೆಂ ಫಿಂತ್ ಉಭಂವ್ಕ್ ಆನ್ಬೋಗಾಚಿ ಗರ್ಜ್ ಆಸಾ ಮ್ಹಣೊನ್. ಕಾರಾಣ್ ಆನ್ಬೋಗಾನ್ ದಾಖಯಿಲ್ಲೆಂ ಫಿಂತ್ ಮನಿಸ್ ಚಡಾವತ್ ಜಾವ್ನ್ ಉಭಂವ್ಕ್ ವಚಾನಾ ಕಾರಾಣ್ ತಾಚಿ ರೂಚ್ ತಾಣೆಂ ಆಪ್ಲ್ಯಾ ಜಿವಿತಾಂತ್ ಚಾಕ್ಲ್ಲಿ ಆಸ್ತಾ.
ಮನಿಸ್ ಸೈಂಭಾನ್ "inventive" ಚಡ್ ಆನಿ "decisive" ಉಣೊ ಆಸ್ತಾ ಜಾಲ್ಲ್ಯಾನ್ ನವೆಂ ನವೆಂ ಚಡ್ಚ್ ಆಪ್ಣಾಯ್ತಾ ಯಾ ನವ್ಯಾಸಾಂವಾಕ್ ಚಡ್ ವೆಂಗುನ್ ರಾವ್ತಾ, ಶಿವಾಯ್ ಪರ್ನ್ಯಾಕ್ ಧರುನ್ ರಾವಾನಾ. ಹ್ಯಾಚ್ ಖಾತಿರ್ ಮನಿಸ್ ಜಲ್ಮಾನ್ ’ಆಶಾವಾದಿ’ ಚಡ್ ಆಸೊನ್ ’ನಿರಾಸ್ವಾದಿ’ ಉಣೊ ಆಸ್ತಾ. ಆಶಾವಾದಾಂತ್ ನಿರಾಶಾ, ನಿರಾಶೆಂತ್ ಕ್ರಾಂತಿ ಯಾ ಪಲಾಯನ್ ಎಕೇಕಾ ಪರಿಸ್ಥಿತೆಕ್ ಲಾಗೊನ್ ಹ್ಯಾ ಸಮಾಜೆಂತ್ಲ್ಯಾ ಮನ್ಶ್ಯಾಕ್ ವೆಂಗುನ್ ಯೆತಾ ಜಾಲ್ಯಾರ್ ಸಬಾರ್ ಆಪ್ಲ್ಯಾ ಸ್ವಭಾವಾನ್ಂಚ್ ಕ್ರಾಂತಿಕಾರಿ ಯಾ ನಿರಾಸ್ವಾದಿ ಜಾವ್ನ್ಯ್ ಆಸ್ತಾತ್. ಆಯ್ಚಾ ಮ್ಹಜ್ಯಾ ಹ್ಯಾ ಸಮೀಕ್ಷೆಂತ್, ಬಾಬ್ ಮೆಲ್ವಿನ್ ರೊಡ್ರಿಗಸಾಚಾ ’ವಾಟ್’ ಕವಿತಾ ಜಮ್ಯಾಚೆಂ ನಾಂವ್, ತ್ಯಾ ನಾಂವಾ ಪಂದ್ಲಿ ಅಂತ್ಯ್ ದಿಸಾನಾತ್ಲ್ಲಿ ವಾಟ್, ಭಿತರ್ಲ್ಯಾ ಪಾನಾಂನಿ ಕವಿತಾ ನಾಯಕಾಚೆಂ ಏಕ್ ಜಿವಿತ್ ಸಾರುನ್ ಆಯಿಲ್ಲಿ ವಾಟ್ ದಾಖಂವ್ಚಿ ಕವಿತಾ ’ವಾಟ್’.
ಹ್ಯಾ ವಾಟೆಕ್ ಬದ್ಲಿಲ್ಲೆ ವಿಚಾರ್, ಕ್ರಾಂತಿಕಾರಿ ಮೇಟ್, ಹ್ಯಾ ಮೆಟಾಂಕ್ ಪೂರಕ್ ಜಾವ್ನ್ ಜಿವಿತಾಚಾ ವಿಚಾರಾನಿಂ ಘುಂತ್ಲೆಲಿಂ ಪೂರಕ್ ಕವಿತಾಂ ಖಂಯ್ ನಾಂ ಖಂಯ್ ತರೀ ತ್ಯಾ ವಾಟ್ ಕವಿತೆಕ್ ಸಂಭಂದ್ ರಚ್ತಾತ್ ಜಾಲ್ಲ್ಯಾನ್ ಹಾಂವ್ ಹ್ಯಾ ಮ್ಹಜ್ಯಾ ಸಮೀಕ್ಷೆಂತ್ ವಾಟ್ ಕವಿತೆಕ್ ಮೂಳ್ ಕವಿತಾ ಕರುನ್ ಘೆತಾಂ. ಹ್ಯಾ ಮ್ಹಜ್ಯಾ ನಿರ್ಧಾರಾಕ್ ಹ್ಯಾಚ್ ಸಾಹಿತಿಕ್ ಬುಕಾಚೆಂ ಮುಖವಿನ್ಯಾಸ್ಯ್ ಏಕ್ ಕಾರಾಣ್ ಜಾವ್ನಾಸಾ. ಪುಸ್ತಕಾಚೆಂ ಮುಖವಿನ್ಯಾಸ್ ಪುಸ್ತಕಾಚಾ ಸಾಹಿತ್ಯಾಚೆಂ ಸ್ವಷ್ಟ್ ಚಿತ್ರಣ್ ದಿತಾ.
ಸಾಹಿತ್ಯ್ ಕೊಣ್ಯ್ ಮನೋರಂಜನಾ ಖಾತಿರ್ ರಚುಂದಿತ್ ಯಾ ಸಮಾಜೆಚಾ ಉದರ್ಗತೆ ಖಾತಿರ್. ತೊ ತಾಂತಾಂಚೊ ವೆಯಕ್ತಿಕ್ ವಿಚಾರ್. ಪೂಣ್ ರಚ್ಲ್ಲೆಂ ಸಾಹಿತ್ಯ್ universal ಚಿಂತ್ಪಾಚೆರ್ ಜಾಲ್ಯಾರ್ ತೆಂ ಹರ್ಯೆಕಾ ಸಮಾಜೆಚಾ ವರ್ಗಾಚಾಂಕ್ ಲಾಗು ಜಾತಾ. ಹ್ಯಾ ವಿಚಾರಾಂತ್ ಥೊಡೆಂ ಉಣೆಂಪಣ್ ಹ್ಯಾ ಜಮ್ಯಾಂತ್ ದಿಸೊನ್ ಯೇವ್ನ್ ಹ್ಯಾ ಜಮ್ಯಾಂತ್ಲ್ಯಾ ಕವಿತಾ ನಾಯಕಾಕ್ ತಾಚ್ಯಾ ವೆಯುಕ್ತಿಕ್ ಸಿಂತಿಮೆಂತಾಚಾ ಆನ್ಬೋಗಾಚೆಂ ಪಯ್ಣ್ ಕರಯ್ತಾ. ವೈಯುಕ್ತಿಕ್ ವಿಚಾರ್ ಮ್ಹಳ್ಯಾರ್ ಹ್ಯಾ ಜಮ್ಯಾಂತ್ ಕವಿಚೆ ವೈಯುಕ್ತಿಕ್ ವಿಚಾರ್ ನಹಿಂ ಬಗಾರ್ ಕವಿತಾ ನಾಯಕಾಚೆಂ ವೈಯುಕ್ತಿಕ್ ಜೀವನಾಕ್ ಲಗ್ತಿ ಜಾಲ್ಲೆ ವಿಚಾರ್.
ಹಾಂಗಾಸರ್ ಹೊ ಸಮೀಕ್ಷಾ ವಾಚ್ತೆಲ್ಯಾನ್ ಜಾಂವ್, ಯಾ ಖುದ್ದ್ ಕವಿನ್ ಜಾಂವ್ ಘಸ್ಪಡಾನಾ ಜಾಂವ್ಚೆಂ. ಸಾಹಿತ್ಯಾಚೆಂ ಗೂಂಡಾಯೆನ್ ಅಧ್ಯಾಯನ್ ಚಲಯ್ತೆಲ್ಯಾಕ್ ಸಾಹಿತ್ಯ್ ಕೇವಲ್ ಏಕ್ ಸಾಹಿತ್ಯ್ ಮಾತ್ರ್ ಜಾವ್ನ್ ಉರಾನಾಸ್ತಾನಾ ಜಾಣ್ವಾಯೆಚೊ ಪುಂಜೊ ಜಾವ್ನ್ ಹರ್ಯೆಕಾ ಮೆಟಾರ್ ಜಾಣ್ವಾಯ್ ವಾಡಯ್ತಾನಾ ಎಕಾ ವ್ಯಕ್ತಿನ್ ರಚ್ಲ್ಲ್ಯಾ ಸಾಹಿತ್ಯಾಂತ್ಲೆ ಬರೆಂ ವಾಯ್ಟ್ ಜರ್ತರ್ ಉಗ್ಡಾಪೆಂ ಕೆಲೆಂ ತರ್ ತೆಂ ವಾಯ್ಟ್ ಮ್ಹಣೊನ್ ಲೆಕ್ತಲೊ ನಿಜಾಯ್ಕ್ಯ್ ಸಾಹಿತ್ಯಾಚಾ ಸಂಭಂದಾಕ್ ವಳ್ಕಾನಾ ತಸಲೊ.
ಆಮ್ಚೊ ಕೊಂಕ್ಣಿ ಸಾಹಿತ್ಯಾಂತ್ ಹ್ಯಾ ವಿಚಾರಾಕ್ ಸ್ಪೀಕಾರ್ ಕರುಂಕ್ ಸಾಹಿತ್ಯಾಚೆಂ ಸಂಭಂದ್ ದವರ್ತೆಲ್ಯಾಂಕ್ ಭಾರಿಚ್ಚ್ ಕಷ್ಟಾಂಚೆಂ ಆನಿ ಸೊಸುಂಕ್ ಜಾಯ್ನಾ ತಸಲೆಂ. ಬಹುಶ: ಆಮ್ಚೊ ಸಾಹಿತಿ ಜೊ ಕೊಂಕ್ಣಿಂ ಶೆತಾಂತ್ಲೊ ಜಲ್ಮಾತಾನಾಂಚ್ ಪರಿಪೂರ್ಣತಾಯೆನ್ ಜಲ್ಮಾತಾ ಹೆಂ ಏಕ್ ಕಾರಾಣ್ಯ್ ಜಾಂವ್ಕ್ ಪುರೊ.
"Perfection leads to the End. End may not be a Perfection"
ಬಾಬ್ ಮೆಲ್ವಿನ್ ರೊಡ್ರಿಗಸಾಚೊ ಹೊ ವಾಟ್ ಕವಿತಾ ಜಮೊ ತಾಚ್ಯಾ ಆದ್ಲ್ಯಾ ಜಮ್ಯಾಂಕ್ ಮೆಳಯ್ಲ್ಯಾರ್ ಪರಿಪೂರ್ಣತಾಯೆಚಿಂ ಮೆಟಾಂ ಜಮ್ಯಾ ಥಾವ್ನ್ ಜಮ್ಯಾಕ್ ಸಾರ್ಕಿಂ ಝಳ್ಕಾತಾತ್. ಕವಿ ಹಾಂಗಾಸರ್ ಆಪ್ಲ್ಯಾ ಜಾಣ್ವಾಯೆಚಿಂ ಮೆಟಾಂ ಚಡ್ಲೆಲೆಂ ತಾಣೆಂ ವಿಂಚ್ಲ್ಲ್ಯಾ ವಾಟೆರ್ ಉದೆಲ್ಲ್ಯಾ ಕವಿತಾಂನಿಂ ಕವಿತಾಕ್ ವ್ಹಾಳಯಿಲ್ಲಿ ರೀತ್, ಉತ್ರಾಂಕ್ ಸೊಭಯಿಲ್ಲಿ ಸೊಭಾಯ್. ಪಂಕ್ತಿ ಥಾವ್ನ್ ಪಂಕ್ತಿಕ್ ಸಾಂಬಾಳ್ಲ್ಲೆಂ ಸಬ್ದಾಂ ಸಂಗೀತ್, ಗ್ರೇಸ್ತ್ಕಾಯೆಚಿಂ ಉತ್ರಾಂ.
ಬಾಬ್ ಮೆಲ್ವಿನಾಚಾ ಕವಿತಾಂಕ್ ತಾಚ್ಯಾಚ್ ಮ್ಹಳ್ಳ್ಯಾ ಸುರ್ವಾತೆಚಾ ಸಂಸಾರಾಚೆಂ ಪಯ್ಣ್ ಕರಯ್ತಾ ತೆಂ ಖಂಡಿತ್ ಸತ್ ಜಾಲ್ಲ್ಯಾರೀಯ್ ಕವಿತೆಂನಿ ವ್ಹಾಳಯಿಲ್ಲ್ಯಾ ಸೊಬಾಯೆಚಾ ಪಾಟ್ಲೆ ವಿಚಾರ್ ಹಾಂವೆ ಜಿಯೆಂವ್ಚಾ ಸಮಾಜೆಚಾ ಉದರ್ಗತೆಕ್ ಸವಾಲ್ ಉಡಂವ್ಚಾಂತ್ ಏಕ್ ಮೇಟ್ ಪಾಟಿಂ ದೆಂವ್ಲ್ಯಾತ್ ತೆಂಯ್ ಸತ್.
ವಾಟ್ ಕವಿತಾ ಜಮೊ "ಮ್ಹಜೆಂ ಘರ್" ಕವಿತೆ ಮಾರಿಫಾತ್ ಆರಂಭ್ ಕೆಲ್ಲ್ಯಾ ವಾಟೆರ್ ಹ್ಯಾ ರೆಂವೆಕ್ ದೆಂವೊನ್ ಬಾಳಾಲಾಗಿಂ ಖೆಳೊ ಉಡಾಸಾಚಾ ಸಕ್ತೆಂತ್ ವೆಳೆಕ್ ಪಾವ್ಲ್ಲ್ಯಾ ಲ್ಹಾರಾಂಕ್ ಸಂಭಂಧಾಚೊ ಅರ್ಥ್ ದಾಖವ್ನ್ ಝಜಾನ್ ನಶೀಬಾಚಾ ಭುಕೆಕ್ ವೆಂಗುನ್ ಗಳಾಯೆನ್ ತರೀ ಜಯ್ತೆವಂತ್ ಮೊಗಾಕ್ ಪಾಂವ್ಚಿ ವಾಟ್ ಆಪ್ಲ್ಯಾ ವಾಟೆರ್ ಹರ್ ಏಕ್ ರಂಗಾಚಿಂ ಫಿಂತಾಂ ವಾಚ್ಫ್ಯಾಂಚಾ ದೊಳ್ಯಾಂ ಮುಖಾರ್ ದವರ್ತಾ. ಆಸ್ಲ್ಯಾರ್ ಆಸೊ ಕಾಳಿಂ ಸದಾಂ ಮತಿಂತ್ ರಂಗಯ್ ತಿಂತಾ ದಿಷ್ಟಿ ತುಜೊ ಗಾಬ್ ಜಾತಿತ್ ದಿಸ್ತಿತ್ ರಂಗಾಳ್ ಫಿಂತಾ (ಫಿಂತಾ)
ಕವಿತಾ ನಾಯಕಾಚೆಂ ಹೆಂ ಏಕ್ ಆಶಾವಾದಾಚೆಂ ಲಿಸಾಂವ್ ವಾಸ್ತವಿಕ್ ಸಮಾಜೆಕ್ ಲಾಗು ಜಾತಾನಾ ತೆಂ ತ್ಯಾ ಸಮಾಜೆ ವಯ್ರ್ ಕಿತ್ಲೊ ಪರಿಣಾಮ್ ಹಾಡುಂಕ್ ಸಕ್ತಾ ತೆಂ ಪಳೆಂವ್ಕ್ ’ಮ್ಹಜ್ಯಾ ಘರಾಂತ್’ ಉಬ್ಚಾ ಕಾಳ್ಯಾ ಫಿಂತಾಂಕ್ ರಂಗಂವ್ಕ್ ಕ್ರಾಂತಿಕಾರಿ ಆಶಾವಾದಾನ್ ಕಾಡ್ಲ್ಲಿಂ ಮೆಟಾಂ ಜಿಕೊಂಕ್ ಪಾವ್ಲಿಂಚ್ ನಾಂತ್. ಆತಾಂ ನಿರಾಶಾ. ನಿರಾಶೆ ಥಾವ್ನ್ ಆಪ್ಲ್ಯಾಚ್ ಘರಾಂತ್ ಕಾಳಿಂಚ್ ಜಾವ್ನ್ ಉರೊನ್ ಮರ್ತಾ ಪರ್ಯಾಂತ್ ಸಲ್ವಣಿ. ಕ್ರಾಂತಿಕಾರಿ ನಿರಾಸ್ವಾದ್. ಕಾರಾಣ್ ವೈಯುಕ್ತಿಕ್ ವಿಚಾರ್. ವೈಯುಕ್ತಿಕ್ ವಿಚಾರ್ ಸಮಾಜೆಚಾ ಮುಖಾರ್ ಪೊಳಾಪಳ್ ಘೆಂವ್ಕ್ ಪಾವ್ಲಾ.
ದಾರಾರ್ ತುಮ್ಚಾ ಕಿತ್ಯಾ ನಾಚುಂ?
ಝಡಾರ್ ಮ್ಹಜ್ಯಾ ಉರ್ತಾಂ
ಮ್ಹಜ್ಯಾ ಘರಾಂತ್ ಪೇಜ್ ನಾಂ ತರ್
ಉಪಾಶಿಂಚ್ ಮೊರ್ತಾಂ (ಮ್ಹಜೆಂ ಘರ್)
ಹಾಂಗಾಸರ್ ಕವಿತಾ ನಾಯಕ್ ಆಪ್ಲ್ಯಾ ವಾಟೆರ್ ಕಾಳಿಂ ಫಿಂತಾ ಆಸ್ಲ್ಯಾರ್ಯ್ ಆಪ್ಲ್ಯಾ ಮತಿಂತ್ ರಂಗಾಳ್ ಫಿಂತಾ ಉಭಂವ್ಚಾಂತ್ ಯಶಸ್ವಿ ಜಾಲಾ ಜಾಲ್ಯಾರೀಯ್ ತ್ಯಾ ಫಿಂತಾಂಕ್ ಆಪ್ಲ್ಯಾ ವಾಟೆರ್ ಸೊಭಂವ್ಕ್ ಪಾವೊಂಕ್ ನಾಂ. ತೊ ಮರ್ಣಾಕ್ ತಯಾರ್ ಜಾಲಾ ನಹಿಂ ಆಸ್ತಾಂ ದೆವಾಕ್ ಹಾಕ್ ಬೋಬ್ ಮಾರುನ್ ಅಪ್ಲ್ಯಾ ವಾಟೆ ವಯ್ಲ್ಯಾ ಕ್ರಾಂತಿಕಾರಿ ಚಿಂತ್ಪಾಕ್ ಪಲಾಯನಾಂತ್ ಬದ್ಲುಂಕ್ ಪಾವ್ಲಾ (ದೆವಾ ಮ್ಹಜ್ಯಾ).
ದೇವ್ ಆನಿ ಆಮ್ಚಿ ಸಂಸ್ಕ್ರತಿ, ಹ್ಯಾ ಮಧೆಂ ಸಂಸ್ಕ್ರತಿಕ್ ಆಮಿಂ ದೀಸ್ ವೆತಾಂ ವೆತಾಂ ಬಗ್ಲೆಕ್ ಲೊಟ್ತಾಂವ್ ತರ್ ದೆವಾಕ್ ಉಲೊ ಖಂಡಿತ್ ಮಾರ್ತಾಂವ್. ಬಹುಶ: ಮನ್ಶ್ಯಾನ್ ಮಾರ್ಲ್ಲಿ ಸಗ್ಳಿಂ ಬೋಬ್ ದೇವ್ ಆಯ್ಕಾನಾ ಜಾಂವ್ಚೆಂಯ್ ಹಾಕಾ ಏಕ್ ಮುಖ್ಯ ಕಾರಾಣ್ ಜಾಂವ್ಕ್ ಪುರೊ. ಶಿರೆನ್ ಶಿರೊ ಎಕ್ಟಾಂವ್ನ್ ದೆವಾಕ್ ನಾರೊ ಘಾಲ್ಚೊ ಹೊ ಕವಿತಾ ನಾಯಕ್ ತಾಣೆಂ ಜಿಯೆಂವ್ಚಾ ಸಮಾಜೆಂತ್, ತ್ಯಾ ಸಮಾಜೆಂತ್ ಚಲ್ಚಾ ಅನೀತಿಕ್, ದೆವಾಕ್ ನಾರೊ ಘಾಲುಂಕ್ ಮಾತ್ರ್ ಸಕ್ತಾ ಶಿವಾಯ್ ಏಕ್ ಕ್ರಾಂತಿಚಿ ಬೋಬ್ ಮಾರುಂಕ್ ಸಕಾನಾ. ಅಶೆಂ ಕಿತ್ಯಾಕ್? ತೊ ನಿರಾಶೆಕ್ ವೆಂಗುನ್ ರಾವ್ಲಾ?
ನಿರಾಶೆಕ್ ವೆಂಗುನ್ ರಾವ್ಲ್ಲೊ ಕ್ರಾಂತಿಕ್ ಬೋಬ್ ಮಾರಿನಾ ತರ್ ಹೊ ಕವಿತಾ ನಾಯಕ್ ಹ್ಯಾ ವಾಸ್ತವಿಕ್ ಸಮಾಜೆ ಥಾವ್ನ್ ಪೊಳಾಪಳ್ ಘೆಂವ್ಕ್ ಆಶೆತಾ. ತರ್ ತಾಚ್ಯಾ ವಾಟೆ ವಯ್ಲೆಂ ಕ್ರಾಂತಿಕಾರಿ ಆಶಾವಾದಾಚೆಂ ಲಿಸಾಂವ್ ತಾಣೆಂಚ್ ರಚ್ಲ್ಲ್ಯಾ ವಾಟೆ ವಯ್ಲ್ಯಾ ಕ್ರಾಂತಿಕ್ ಪೊಕೊಳ್ಪಣಾಕ್ ಪಾವಯ್ತಾ?
ಹ್ಯೆ ರೆಂವೆನ್ ಸ್ವಾಸ್ ದಿಲಾ
ದಿತಾಂ ಗಳ್ಯಾ ಪಾಸ್ ಘಾಲಾ
ಹ್ಯೆ ರೆಂವೆನ್ ಮಾಸ್ ದಿಲಾಂ
ದಿತಾಂ ಕಾಳ್ಜಾ ಘಾಸ್ ಘಾಲಾ
ಹ್ಯೆ ಭುಂಯ್ಚೆ ಆಂಗಾಂತ್ ಮುಂಗಾ
ತೆಲಾ ಝರಿ ವಾಳ್ತಾತ್
ತಾಂತ್ಲೆ ಥೆಂಬೆ ಪುಂಜಾಂವ್ಕ್ ಗೆಲ್ಲ್ಯಾನ್
ಸದಾಂಚ್ ಕಾಂಟೆ ತೊಪ್ತಾತ್ (ಹ್ಯೆ ರೆಂವೆನ್)
ಪೆಲ್ಯಾಚಾ ಜಿವಿತಾಂತ್ಲಿ ಕಾಳಿಂ ಫಿಂತಾ ರಂಗಂವ್ಚಾಂತ್ ಯಶಸ್ವಿ ಜಾಂವ್ಚೊ ಕವಿತಾ ನಾಯಕ್ (ರಡುನಾಕಾ ಕವಿತಾ)
ಆಪ್ಲ್ಯಾ ವಾಟೆ ವಯ್ಲ್ಯಾ ತ್ಯಾ ರೆಂವೆಂತ್ ತಿಂ ರಂಗಂವ್ಕ್ ಕಷ್ಟಾತಾ. ಸ್ವಾಸ್ ಘೆಂವ್ಕ್ ಗಳ್ಯಾ ಪಾಸ್ ಘೆತ್ಲಾ ತರೀ, ಮಾಸ್ ಘೆಂವ್ಕ್ ಕಾಳಿಜ್ ದಿಲಾಂ ತರೀ ಆಪ್ಲ್ಯಾ ಸ್ವತಂತ್ರ್ಪಣಾಚಾ ವಿಚಾರಾಂಕ್ ವೆಂಗುಂಕ್ ಕವಿತಾ ನಾಯಕ್ ತಯಾರ್ ಜಾಂವ್ಕ್ ನಾಂ. ಹೆಂ ತಾಚ್ಯಾ ವಾಟೆ ವಯ್ಲೆಂ ಕಾಕುಳ್ತಿಕ್ ಬಗ್ಲೆಕ್ ಸಾರುನ್, ಬಗ್ಲೆಚಾ ಕರಾಡಾಕ್ ಉಜೊ ದಿಂವ್ಚಾ ಪಯ್ಲೆಂಚಿ ವಾಟ್ ಜಾಲ್ಯಾರ್ ಹ್ಯಾ ರೆಂವೆಂತ್ ತೊ ಆಪ್ಲೆಂ ಲಾಚಾರ್ಪಣ್ ವ್ಯಕ್ತ್ ಕರ್ತಾ ತರ್ ಕರಾಡಾಕ್ ಉಜೊ ದಿಲ್ಯಾ ಉಪ್ರಾಂತ್ ಪರಿಪಕ್ವ್ ಜಾಂವ್ಕ್ ಜಾಯ್ ಆಸ್ಲ್ಲ್ಯಾ ತಾಚ್ಯಾ ಮತಿಚಾ ವಾಡಾವಳೆಂತ್ ದುಭಾವಾಕ್ ಇಡೆಂ ದಿತಾ. ಹ್ಯಾ ವಿಚಾರಾಕ್ ಪೂರಕ್ ಸಾಕ್ಸ್ ದಿಂವ್ಚೆಂ "ಖುರಾ ವಯ್ಲೊ ಬುಡ್ಕುಲೊ’ ಕವಿತಾ ಪಳೆಯಾ.
ತಶೆಂಚ್...
ಹ್ಯೆ ರೆಂವೆನ್ ಸ್ವಾಸ್ ದಿಲಾ
ಗಾಂವ್ಚಾ ಮೊರ್ಚಾ ಬೊಡಾಂ
ಹ್ಯೆ ರೆಂವೆನ್ ಮಾಸ್ ದಿಲಾಂ
ಜಾಯ್ತ್ಯಾ ದುಬ್ಳ್ಯಾ ಹಾಡಾಂ.....
ತಾಂತ್ಲೆ ಥೆಂಬೆ ಪುಂಜಾಂವ್ಕ್ ಗೆಲ್ಲ್ಯಾನ್
ಗಾಂವಾಂತ್ ಗುಲೊಬ್ ಫುಲ್ತಾತ್ (ಹ್ಯೆ ರೆಂವೆನ್)
ರೆಂವೆಚಾ ಗಾಂವಾಂತ್ ಸಿಂತಿಮೆಂತಾಂಕ್ ಜಾಗಂವ್ಚೆ, ತೆಂಯ್ ಕಾಂಟೆ ತೊಪವ್ನ್ ಗುಲೊಬ್ ಪುಲಂವ್ಚೆಂ ಮ್ಹಳ್ಯಾರ್ ಮೊನ್ಯಾ ರುಪಾಚೆಂ ಸ್ವಶೋಷಣ್. ಸ್ವಶೋಷಿತ್ ಮೊನೊ ಜಾಲಾ ಮ್ಹಳ್ಯಾರ್ ತೊ ಅಜೂನ್ ಜeಛಿisive ಯಾ ನಿರ್ದಿಷ್ಟ್ ನಿರ್ಧಾರ್ ಘೆಂವ್ಚಾ ವಾಡಾವಳಿಕ್ ಪಾವೊಂಕ್ ನಾಂ. ಯಾ ತಾಚ್ಯಾ ವಾಡಾವಳಿಕ್ ಆಬ್ಲೆಸ್ಪಣ್ ಆಡ್ ಯೆತಾ ಜಾಂವ್ಕ್ಯ್ ಪುರೊ ಹಾಕಾ ಪೂರಕ್ ಜಾವ್ನ್ ತೊ ಗಳಾಯೆಕ್ ಪಡ್ಲಾ ಜಾಂವ್ಕ್ಯ್ ಪುರೊ (ಗಳಾಯ್ ಕವಿತಾ) ಆನ್ಬೋಗಾಚಾ ಸಿಂತಿಮೆಂತಾನಿಂ ರೆವ್ಡೊವ್ನ್ ಆಪ್ಲ್ಯಾ ಜಿವಿತಾಚಿ ವಾಟ್ ಸಾರ್ತಾನಾ ಸಿಂತಿಮೆಂತಾಂಕ್ ಚಡ್ ಜಾಗಂವ್ಚೆಂ ಮನ್ಶಾಪಣಾಕ್ ಸಾಂಗಾತ್ ದಿಂವ್ಚೆ ಧಾರ್ಮಿಕ್ ಉಪದೆಸ್ ಕವಿತಾ ನಾಯಕಾಕ್ ಮಿಸ್ತೆರ್ ಜಾಲ್ಯಾತ್. ’ತೆಲಾಚೊ ವೆಪಾರ್’ ಕವಿತಾ ಪಳೆಯಾ.
ಮನ್ಶ್ಯಾಪಣ್ ಜರ್ತರ್ ಸವಾಲ್ ಯಾ ಮಿಸ್ತೆರ್ ಜಾತಾ ತರ್ ಕವಿತಾ ನಾಯಕಾಚಾ ವಿಚಾರಾಂಚೆರ್ ವಾಡಾವಳ್ ಕಶಿ ದಿಸೊನ್ ಯೆತೆಲಿ? ಹ್ಯಾಚ್ ಖಾತಿರ್ ತೊ ಆಪ್ಲ್ಯಾ ವಾಟೆವಯ್ಲ್ಯಾ ಸಬಾರ್ ಕವಿತೆನಿಂ ಸಿಂತಿಮೆಂತಾಕ್ ಆನಿ ಮಾನವತಾವಾದಾಕ್ ಉಕ್ಲುನ್ ಧರುಂಕ್ ಮಾತ್ರ್ ಪೆಚಾಡ್ತಾ. ಹ್ಯಾಚ್ ಖಾತಿರ್ ’ತೆಲಾಚೊ ವೆಪಾರ್’ ಕವಿತೆಂತ್ ಎಕಾ ಮಹತ್ವಾಚಾ ಸವಾಲಾಕ್ ಜವಾಬ್ ಸೊಧುಂಕ್ ಕವಿತಾ ನಾಯಕ್ ಪಾವ್ಲೊನಾಂ ವಾ ನೊವೊದಾಂಚೊ ಶೆಜಾರಿ ತೇಲ್ ಹಾಡುಂಕ್ ಧಾಂವ್ತಾನಾಂಯ್ ತಾಚೆ ಪಾಂಯ್ ವೊಡುಂಕ್ ತೊ ಸಕ್ಲೊ ನಾಂ.
ಸಂಭಂಧಾಚೊ ಸೊಭಿತ್ ರೀತಿನ್ ಅರ್ಥ್ ದಾಖವ್ನ್ ದಿಂವ್ಚೊ ಕವಿತಾ ನಾಯಕ್ (’ಸಂಭಂದಾಚೊ ಅರ್ಥ್’ ಆನಿ ’ಉಡಾಸ್’ ಕವಿತಾ ಪಳೆಯಾ) ’ಬಾಳಾಲಾಗಿಂ’ ಕವಿತೆಂತ್ ನೆಣ್ತ್ಯಾ ಹಾಸ್ಯಾಂ ಮುಖಾರ್ ಸಂಸಾರಾಕ್ಚ್ ವಿಸ್ರಾತಾ ಜಾಲ್ಯಾರ್ ತೊ ತ್ಯಾ ರೆಂವೆಂತ್ ಭಾಯ್ರ್ ಭಿತರ್ ಶಿಜ್ತಾನಾ ಜಾಂವ್, ಆಪ್ಲ್ಯಾ ಖರ್ಯಾ ಗಾಂವಾಕ್ ವಾಟೆರ್ ಬೊಸೊನ್ ನಿಯಾಳ್ತಾನಾ ಜಾಂವ್, ಪರ್ಗವಾಂತ್ ಮಾಯ್ಭಾಸ್ ಸೊಂಪೆಪಣಾನ್ ಆಮ್ಶೆತಾನಾ ಜಾಂವ್, ಬೊಕುಲ್ ದೂದ್ ಪಿಯೆತಾನಾ ಜಾಂವ್, ನೊವೊದಾಂಚೊ ಶೆಜಾರಿ ತೇಲ್ ಹಾಡುಂಕ್ ಧಾಂವ್ತಾನಾ ಜಾಂವ್ ಏಕ್ ಕ್ರಾಂತಿಕಾರಿ ವಿಚಾರಾಚೆಂ ಸವಾಲ್ ಉಡಂವ್ಕ್ ಸಕಾನಾತ್ಲೆಲ್ಯಾನ್ ಹಾಂವೆ ಸಾಂಗ್ಲೆಲೆಂ ಹೊ ಕವಿತಾ ನಾಯಕ್ ಆಪ್ಲ್ಯಾ ಮತಿಚಾ ಸಾರ್ಕ್ಯಾ ವಾಡಾವಳೆಕ್ ಪಾವೊಂಕ್ ಗಳಾಯೆರ್ ಆಸಾ ಮ್ಹಣೊನ್. ಹ್ಯಾ ಖಾತಿರ್ ಮಾಫಿ ಆಸೊಂ.
ಪುಣ್ ಮ್ಹಜ್ಯಾ ಚಿಂತ್ಪಾ ಪರ್ಮಾಣೆಂ ಸಾಹಿತ್ಯ್ ಮ್ಹಳ್ಯಾರ್ ಕವಿತಾ ನಾಯಕಾಚಾ ವೈಯುಕ್ತಿಕ್ ವಿಚಾರಾಂಚಾ ವಾಟೆರ್ ವ್ಯಕ್ತಿಗತ್ ಪಯ್ಣ್ ಭಿಲ್ಕುಲ್ ನಹಿಂ. ಜರ್ತರ್ ಸಾಹಿತ್ಯ್ ಅಶೆಂ ತೆಂ ಸಾಹಿತ್ಯ್ ವೈಯುಕ್ತಿಕ್ ಜಾವ್ನ್ ಉರೊನ್ ಸಮಾಜೆಚಾ ವಿಚಾರಾಂಕ್ ಲಗ್ತಿ ಜಾಯ್ನಾಂ. ಸಮಾಜೆಚಾ ವಿಚಾರಾಂಕ್ ಲಾಗು ಜಾಂವ್ಚೆ ಸಾಹಿತ್ಯ್ universal ಚಿಂತ್ಪಾಚೆರ್ ಆಸೊನ್ ಏಕ್ ಜೆರಾಲ್ ಲಿಸಾಂವ್ ದಿಂವ್ಚೆ ಜಾವ್ನ್ ಆಸ್ತಾ ಜಾಲ್ಲ್ಯಾನ್ ಹಾಂವ್ ಹ್ಯಾ ವಾಟ್ ಕವಿತಾ ಜಮ್ಯಾಂತ್ಲ್ಯಾ ಕವಿತಾ ನಾಯಕಾರ್ ದುಬಾವ್ಲೊ. ಬಹುಶ: ಹಾಂವ್ ಚಿಂತಾ ಮ್ಹಜೊ ದುಬಾವ್ ಸಾರ್ಕೊ. ಜರ್ತರ್ ಹಾಕಾ ಆನೀಕ್ಯ್ ಸ್ವಶ್ಟ್ ಕರುಂ ಜಾಲ್ಯಾರ್ ’ನಶೀಬಾಚಿ ಭುಕ್’, ’ಝಜ್’ ಕವಿತಾಂ ಪಳೆಯಾ.
ಕವಿತೆನಿಂ ಮಾನವತಾವಾದ್ ಭರೊನ್ ವೊಮ್ತಾತಾನಾ ’ವಾಟ್’ ಕವಿತೆಂತ್ ಆನ್ಬೋಗಾಚ್ಯಾ ಅಸ್ಕತ್ಕಾಯೆಚೆಂ ಟಯರಾಂ ಪುಟೊನ್ ಟ್ಯಾಂಕರ್ ಝಿರಿಯೆಂತ್ ಪಡ್ಲ್ಲೊ ದಾಖ್ಲೊ ದೀವ್ನ್ ಆಪ್ಲ್ಯಾ ವಾಟೆಕ್ ಕ್ರಾಂತಿಕಾರಿ ಮೇಟ್ ಕವಿತಾ ನಾಯಕ್ ಆಪ್ಣಾಯ್ತಾ ತರ್, ಹ್ಯಾ ನಶೀಬಾಚಾ ಭುಕೆಕ್ ಯಾ ಝಜಾಕ್ ವಾಟ್ ಕಿತ್ಯಾಕ್ ದಾಖಯ್ನಾ? ಹ್ಯಾ ಭುಕೆಚೆಂ ಪಾಟ್ಲೆಂ ಭಯಾನಾಕ್ ರೂಪ್ ಪರ್ದ್ಯಾ ಪಾಟ್ಲ್ಯಾನ್ ಲಿಪ್ಲ್ಲೆಂ ಉಜ್ವಾಡಾಕ್ ಹಾಡುಂಕ್ ಕಿತ್ಯಾಕ್ ಸಕಾನಾಂ?
ನೆಣ್ತ್ಯಾ ಭುರ್ಗ್ಯಾಂಚೆಂ ಬಲಿ ಜಾಲ್ಲೆಂ ಜಿವಿತ್, ವಿಧವ್ ಬಾಯ್ಲಾಂಚೆ ರೂದಾನ್, ತಾಂಕಾ ನಶೀಬಾಚಾ ಭುಕೆಕ್ ಥಾಂಬಂವ್ಚಾ ಬೊಮಾಂ ಪಾಟ್ಲ್ಯಾನ್ ಧಾಂವ್ಡಾಯ್ತಾ ತಿ ಖರಿ ಗಜಾಲ್. ತಶೆಂಚ್ ತೆಂ ಝಜ್. ಆಮಿ ಉಕ್ಲುನ್ ದವರ್ಚಾ ಮಾನವತಾವಾದಾ ಮುಖಾರ್ ತ್ಯಾ ಬೊಂಮಾಚಾ ಪಾಟ್ಲಿ ಅಸ್ವಷ್ಟ್ ಕ್ರಾಂತಿ ಕಿತ್ಯಾಕ್ ಲಿಪ್ತಾ? ಬೊಮಾಂಚಾ ಝಜಾಕ್ ಕಾರಾಣ್ ಜಾಲ್ಲೆಂ ಪರ್ದ್ಯಾ ಪಾಟ್ಲೆಂ ಸಮಾಜೆಂತ್ಲೆಂ ನಾಗ್ಡೆಂ ಝಜ್ ಹಿ ಸಮಾಜ್ ಕಿತ್ಯಾಕ್ ಪಳೆಂವ್ಕ್ ಸಕಾನಾ? ಹೊ ವಿಚಾರ್ ಹಾಂಗಾಸರ್ ಕವಿತಾ ನಾಯಕಾಚಾ ಮಾನವತಾವಾದಾಕ್ ಸವಾಲ್ ಉಡಂವ್ಕ್ ಸಕ್ತಾ ತರೀ ತೆಂ ಸವಾಲ್ ಕವಿತಾ ನಾಯಕಾಚಾ ಮಾನವತಾವಾದಾಕ್ ಬಗ್ಲೆಕ್ ಲೊಟ್ತಾ ಮ್ಹಣೊನ್ ಹಾಂವ್ ಪಾತ್ಯೆತಾಂ.
ಏಕ್ ದೋನ್ ಕವಿತಾಂ ಕವಿಕ್ ವ್ಯಕ್ತಿಗತ್ ಜಾವ್ನಾಸೊನ್ ಸಾಹಿತ್ಯಾಚಾ ನದ್ರೆನ್ ತಾಂಚೆ ವಯ್ರ್ ಹಾಂವೆ ಅಧ್ಯಾಯನ್ ಚಲಯ್ಲಾಂ ತರೀಯ್ ಹ್ಯಾ ಮ್ಹಜ್ಯಾ ಸಮೀಕ್ಷೆಂತ್ ತೆ ಮೆಳಂವ್ಕ್ ಜಾಯ್ ಮ್ಹಣೊನ್ ಮ್ಹಾಕಾ ಭೊಗಾನಾಂ. ವಾಚ್ಪ್ಯಾನಿಂ ಹಾಂಗಾಸರ್ ಸುಧಾರ್ಸುಂಚೆಂ.
’ಉಡಾಸಾಚಿ ಸಕತ್’ ಆನಿ ’ಕಾಲ್ಚೆ ರಾತಿಂ’ ಕವಿತಾ ನಾಯಕ್ ಚಲೊನ್ ಆಯಿಲ್ಲ್ಯಾ ವಾಟೆರ್ ಸಿಂತಿಮೆಂತಾಂಚಿ ಪುಲಾಂ ಪುಲಯ್ತಾನಾ ’ಮ್ಹಜೊ ಗಾಂವ್’ ಕವಿತೆಂತ್ಲೊ ಕವಿತಾ ನಾಯಕ್ ತಾಚ್ಯಾ ಗಾಂವಾಕ್ ಆನಿ ತಾಣೆ ಚಲ್ಚಾ ವಾಟೆಕ್ ಬೋವ್ಚ್ ಲಾಗ್ಶಿಲ್ಯಾನ್ ಸಂಭಂದ್ ಜೊಡುಂಕ್ ಪಾವ್ಲಾ. ಪುಣ್ ಹ್ಯಾ ವಾಟೆವಯ್ರ್ ಘಸ್ಪೊಡ್ ದಿಸೊನ್ ಯೇವ್ನ್ ಎಕಾ ನಿರ್ಧಿಷ್ಟ್ ಚಿಂತ್ಪಾನ್ ಹೊ ಕವಿತಾ ನಾಯಕ್ ವಾಟ್ ಗುಡ್ಡಾಯ್ತಾ ತೆಂ ದಿಸೊನ್ ಯೇನಾ.
ಕವಿತೆಂಚಾ ಸಂಸಾರಾಂತ್ ಎಕಾಚ್ ವಿಚಾರಾಚಿಂ ಸಬಾರ್ ರುಪಾಂ ಘುಂತ್ಚಾಕ್ಯ್ ಸಬಾರ್ ರುಪಾಂಕ್ ಏಕ್ ವಿಚಾರ್ ಜರ್ತರ್ ಉಕ್ಲುನ್ ಧರ್ಲೊ ಜಾಲ್ಯಾರ್ ಜಯ್ತಾಕ್ ವೆಗಿಂಚ್ ಪಾವ್ಯೆತ್ ಮ್ಹಳ್ಳೆಂ ಮ್ಹಜೆಂ ಚಿಂತಾಪ್. ’ಮ್ಹಜೊ ಗಾಂವ್’ ಕವಿತೆಂತ್ ಹ್ಯಾ ವಿವಿಧ್ ರೂಪಾಂಕ್ ಪಳಯ್ಲೆಂ ತರ್
ತರ್ನ್ಯಾ ಫಾಂತ್ಯಾ ಕಿರ್ಣಾಳ್
ಸುರ್ಯೊ ಗೊಟ್ಯಾಂತುಲ್ಲೊ ದುದಾಳ್
ಗಾಯೊ ಧೊವಾಂತ್ ನಾಂವ್ಚಿ ಪಾಚ್ವಿಂ ಶೆತಾ
ಪಿಕಾನ್ ಪಿಕ್ಚಿಂ ಕಣ್ಶೆ ಭಾತಾಂ
ಪಾವ್ಸಾಂತ್ ಸೊಡ್ಚೆಂ ಕಾಗ್ದಾ ಹೊಡೆಂ
ಜೊಡಿ ಜಾಂವ್ಚೆ ಕುಂಕ್ಡಾ ಜೊಡೆಂ (ಮ್ಹಜೊ ಗಾಂವ್)
ಕವಿತಾ ನಾಯಕಾಚಾ ಗಾಂವ್ಚಿ ಸೊಭಾಯ್ ಸಿಂತಿಮೆಂತಾನಿಂ ಭರೊನ್ ವರ್ಣಿತಾನಾ ತಿಂಚ್ ಸಿಂತಿವೆಂತಾಚಿಂ ಫಿಂತಾ ಖಂಯ್ಸರ್ಗೀ ಹೊಚ್ ಕವಿತಾ ನಾಯಕ್ ಮ್ಹಾಕಾ ನಿರಾಸ್ಪಣಿ ಹ್ಯಾಚ್ ಗಾಂವಾಕ್ ಖೆಂಡುನ್ ’ಮ್ಹಜ್ಯಾ ಗಾಂವಾಂತ್ ಸಗ್ಳೆಂಚ್ ಬದ್ಲಾಲಾಂ ಸಾಯ್ಬಾ’ ಮ್ಹಣೊನ್ ರುದಾನ್ ಕರ್ಚೆಂ ಆಯ್ಕೊಂಕ್ ಯೆತಾ. ಆತಾಂ ಹ್ಯಾ ಕವಿತೆಚಿಂ ಮುಕ್ಲಿಂ ಮೆಟಾಂ ಕವಿತಾ ನಾಯಕಾನ್ ವೆಂಗ್ಲ್ಲ್ಯಾ ಪರ್ಕಿ ಗಾಂವಾಚೆಂ ದರ್ಶನ್ ದಿತಾತ್. ಹೊ ಪರ್ಕಿ ಗಾಂವ್ ಪಳಂವ್ಚೊ ತರ್
ಹ್ಯೆ ರೆಂವೆನ್ ಸ್ವಾಸ್ ದಿಲಾ
ಗಾಂವ್ಚಾ ಮೊರ್ಚಾ ಬೊಡಾಂ
ಹ್ಯಾ ಭುಂಯ್ಚಾ ಆಂಗಾತ್ಮುಂಗಾ
ತೆಲಾ ಝರಿ ವಾಳ್ತಾತ್
ತಾಂತ್ಲೆ ಥೆಂಬೆ ಪುಂಜಾಂವ್ಕ್ ಗೆಲ್ಲ್ಯಾನ್
ಗಾಂವಾಂತ್ ಗುಲೊಬ್ ಪುಲ್ತಾತ್ (ಹ್ಯೆ ರೆಂವೆನ್)
ಗಾಂವಾಂತ್ ಜಾಲ್ಲಿ ಬದ್ಲಾವಣ್ ಕವಿತಾ ನಾಯಕಾಕ್ ಪರ್ಕಿ ಗಾಂವಾಂಕ್ ಮ್ಹಳ್ಯಾರ್ ರೆಂವೆಚ್ಯಾ ಗಾಂವಾಂಕ್ ವೆಂಗುಂಕ್ ಮಜ್ಬೂರ್ ಕರ್ತಾನಾ ಹ್ಯಾ ವೆಂಗ್ಲ್ಲ್ಯಾ ಪರ್ಕಿ ಗಾಂವಾಂತ್ಯ್ ತೊ ನಿರಾಸ್ತಾ.
ದಾವೊ ಪಾಯ್ ಹೊಡ್ಯಾರ್ ಉರ್ಲಾ
ಉಜ್ವೊ ಪಾಯ್ ತಡಿಂತ್ ಪುರ್ಲಾ
ಪೆಂವ್ತಾ ಖಂಯ್ ಶೆವೊಟ್ ಮ್ಹಜೊ
ತಾಂಡು ಕಸೊ ಕಾಳ್ಜಾ ಉಜೊ
ದೋನ್ ಥಳಾ ಮ್ಹಜೆ ಪಾಂವ್
ನೆಣಾಂ ಹಾಂವ್ ಮ್ಹಜೊ ಗಾಂವ್ (ಮ್ಹಜೊ ಗಾಂವ್)
ಕವಿತಾ ನಾಯಕ್ ಆತಾಂ ನಿರಾಸ್ ಜಾಲಾ. ತಾಚ್ಯೆ ವಾಟೆರ್ ತೊ ಖಂಡಿತ್ ಜಾಣಾಂ ಜಾಲಾ ಕೀ ಎಕಾ ಶೆವೊಟಾಕ್ ದೋನ್ ವಾಟೊ ತಾಣೆಂ ಆಪ್ಣಾಯ್ಲ್ಯಾತ್. ಹ್ಯಾ ದೋನ್ ವಾಟಾನಿಂ ಆತಾಂ ತಾಚೊ ಖರೊ ಶೆವೊಟ್ಚ್ ಬದ್ಲುನ್ ನವ್ಯಾಚ್ ಗಾಂವ್ಚಿ ಮ್ಹಳ್ಯಾರ್ ’ಗೊಂಯ್ಚಿ ವೋಡ್’ ಹ್ಯಾ ಕವಿತಾ ನಾಯಕಾಕ್ ನಾಡ್ತಾಗಾಯ್ ಮ್ಹಣೊನ್ ದುಬಾವ್ ಮಾರ್ತಾ. ಪೂಣ್ ಹ್ಯಾ ಸರ್ವಾಂ ಮಧೆಂ ಅಚಾನಕ್ ಹಿಂದಿ ಫಿಲ್ಮಾಂತ್ ನಿಮಾಣೆಂ ಪ್ರತ್ಯಕ್ಷ್ ಜಾಂವ್ಚಾ ಪೊಲಿಸಾಂ ಪರಿಂ ಹ್ಯಾ ಕವಿತೆಚೊ ನಾಯಕ್ಯ್ ವಾಚ್ಫ್ಯಾಚಾ ಮತಿಕ್ ಖೊಡೊ ಘಾಲ್ತಾ. ತ್ಯಾಚ್ ಹಿಂದಿ ಫಿಲ್ಮಾಂ ಪರಿಂ ಅಚಾನಕ್....! ಜ್ಯಾ ಗಾಂವಾಂತ್ ಏಕ್ ಆವಯ್ ಪೋಟ್ ಮಾರುನ್ ಭುರ್ಗ್ಯಾಂಕ್ ಖಾವಯ್ ತೊಚ್ಚ್ ಖರೊ ಮ್ಹಜೊ ಗಾಂವ್ ತೆಚ್ ಕುಶೀನ್ ಮಾರ್ತಾಂ ಧಾಂವ್ (ಮ್ಹಜೊ ಗಾಂವ್)
ಕವಿತಾ ನಾಯಕಾಚಾ ವಿಚಾರಾಂ ಪರ್ಮಾಣೆಂ ತೊ ಆತಾಂ ಎಕಾ ವಿಂಚವ್ಣೆಕ್ ಪಾವ್ಲಾ. ಪೂಣ್ ಹ್ಯಾ ವಿಂಚವ್ಣೆಚಾ ಪಾಟ್ಲ್ಯಾನ್ ಆಸ್ಲ್ಲ್ಯಾ ಗಾಂವಾಂ ಪಯ್ಕಿ ಖಂಯ್ಚಾ ಗಾಂವಾಂತ್ ಮಾತ್ರ್ ಏಕ್ ಖರಿ ಭುರ್ಗ್ಯಾಂಕ್ ಪೊಸ್ಚಿ ಆವಯ್ ಜಿಯೆತಾ ಮ್ಹಣೊನ್ ಸಾಂಗೊ? ಜರ್ತರ್ ಕವಿತಾ ನಾಯಕ್ ಹಾಂಗಾಸರ್ ಆಪ್ಣಾಕ್ ಪೋಟ್ ಮಾರ್ನ್ ಪೊಸ್ಲೆಲ್ಯಾ ಖರ್ಯಾ ಆವಯ್ಚಾ ವಿಶಿಂ ಉಲಯ್ತಾ ತರ್ ಇತ್ಲಿ ಗಳಾಯ್ ಕಿತ್ಯಾಕ್ ಹ್ಯಾ ಪರ್ಕಿ ಗಾಂವಾಂತ್?
ತೆಲಾ ಥೆಂಬೆ ಪುಂಜಾಂವ್ಕ್ ಕಾಂಟೆ ತೊಪುನ್ ಘೆತಾನಾ ಕವಿತಾ ನಾಯಕ್ ಕಿತ್ಯಾಕ್ ಮೊನೊ ಜಾಲಾ? ಜರ್ತರ್ ಏಕ್ ಆವಯ್ ಪೋಟ್ ಮಾರುನ್ ಗಾಂವಾಂತ್ ಗುಲೊಬ್ ಪುಲಯ್ತಾ ತರ್ ಕವಿತಾ ನಾಯಕಾಕ್ ತೆಂ ಸಾಧ್ಯ್ ಜಾಂವ್ಕ್ ನಾಂ. ಸಗ್ಳ್ಯಾ ಕವಿತಾ ಜಮ್ಯಾಕ್ ಅಧ್ಯಾಯನ್ ಕರುನ್ ವಿಶಾಲ್ ಚಿಂತ್ಪಾಕ್ ಮ್ಹಜೆಂ ದಿಷ್ಟಿಕೋನ್ ದವರುನ್ ಹಾಂವ್ ಸಾಂಗೊಂಕ್ ಸಕ್ತಾಂ ಕೀ ’ವಾಟ್’ ಕವಿತಾ ಜಮೊ ಮನ್ಶಾಪಣಾಚಾ ಸಿಂತಿಮೆಂತಾ ವಯ್ರ್ ಆನಿ ಮಾನವತಾವಾದಾ ವಯ್ರ್ ತೆಂಕುನ್ ರಾವ್ಲಾ ಆನಿ ವೈಯುಕ್ತಿಕ್ ವಿಚಾರಾಂಕ್ ಚಡ್ ಮಹತ್ವ್ ದಿತಾ ಶಿವಾಯ್ ಸಾಹಿತ್ಯಾಕ್ ಗರ್ಜ್ ಆಸ್ಚಾ ಜೆರಾಲ್ ಯಾ universal ವಿಚಾರಾಂಕ್ ನಹಿಂ. ಹಾಂಗಾಸರ್ ವೈಯುಕ್ತಿಕ್ ಮ್ಹಳ್ಯಾರ್ ಕವಿಕ್ ನಹಿಂ ಬಗಾರ್ ಕವಿತಾ ನಾಯಕಾಚಾ ವೈಯುಕ್ತಿಕ್ ವಿಚಾರಾಂಕ್. ಸಬಾರ್ ಕವಿತೆನಿಂ ಕವಿತಾ ನಾಯಕ್ ಕ್ರಾಂತಿಕಾರಿ ಭೊಗ್ಣಾಂ ಘೆವ್ನ್ ಆಯ್ಲಾ ಜಾಲ್ಯಾರೀಯ್ ತಾಚೊ ಆಶಾವಾದ್ ನಿರಾಶಾಂತ್ ಬದ್ಲಾಲ್ಲೊ ಚಡ್ ವಿಶಾದ್ದಾಯಕ್ ಜಾಲ್ಯಾರ್ಯ್ ಕವಿತೆಂಚಾ ವಿಚಾರಾನಿಂ ಹ್ಯಾ ಸಮಾಜೆಚಾ ವಾಸ್ತಾವಾಕ್ ಆನಿ ಭಂಡಾವಾಳ್ಶಾಹಿ ವಾದಾಕ್ ಸವಾಲಾಂ ಉಡಂವ್ಚೆಂ ಪರ್ದ್ಯಾ ಪಾಟ್ಲ್ಯಾನ್ ಯಾ ಅಸ್ಪಷ್ಟ್ ರೂಪಾನಿಂ ದಿಸೊನ್ ಯೆಂವ್ಚೆಂ ಆಶಾದಾಯಕ್.
ಪುಣ್ ಗರ್ಜ್ ಆಸ್ಲ್ಲ್ಯಾ ವಿಚಾರಾಂಚಾ ಪ್ರಗತೆಕ್ ಏಕ್ ಸವಾಲ್ ಉಡಂವ್ಚೆಂ ಧಯ್ರ್ಯ್ ಘೆನಾಸ್ತಾಂ ರಾಂವ್ಚೆ ದುಖಾ:ಭರಿತ್ ಜಾವ್ನಾಸಾ. ಕವಿತಾ ಜಮ್ಯಾಂತ್ಲಿ ರಡುನಾಕಾ, ಬಾಳಾಲಾಗಿಂ, ಮೋಗ್, ವಾಗ್ ಯೆತಾ, ಎಕಾ ರೂಕಾಕ್ ವಿಭಿನ್ನ್ ಆಸೊನ್ ವಾಟೆಕ್ ಸೊಬಾಯ್ ದಿತಾ ಜಾಲ್ಯಾರ್, ವೆಳೆಕ್ ಪಾವ್ಲ್ಲಿಂ ಲ್ಹಾರಾಂ, ಘೆಟೆ ಜಾಂವ್ಚೆಂ ಜೋಗ್ ಫಾಲ್ಸ್ ಸಿಂತಿಮೆಂತಾಂಕ್ ಗೂಂಡ್ ಕರ್ತಾತ್. ವಾರೆಂ ಯೆತಾನಾ ರೆಂವೆಕಣಾಚಿ ಗತ್ ಕಿತೆಂ ಜಾತಾ ತೆಂ ದಾಖಯಿಲ್ಲೆಂ ಸುಡಾಳ್ ತರೀ ವಿಶೇಷತಾ.
ಸಗ್ಳ್ಯಾ ’ವಾಟ್’ ಕವಿತೆಕ್ ಮೂಳ್ ಕವಿತಾ ಜಾವ್ನ್ ಹೊ ಸಮೀಕ್ಷಾ ಮಾಂಡ್ಲೆಲ್ಯಾ ಮ್ಹಾಕಾ ಪರ್ತ್ಯಾಕ್ ವಾಟ್ ಕವಿತಾ ವಿಶಿಂ ವಿಚಾರ್ ಕರುಂಕ್ ಜಾಯ್ ಮ್ಹಣೊನ್ ಭೊಗಾನ್ ಜಾಲ್ಯಾರೀ ಹ್ಯಾ ಕವಿತೆಂತ್ಲೆಂ ನವೆಸಾಂವ್ ಸಾಂಗೊಂಕ್ ಆಶೆತಾಂ. ಕವಿತಾ ನಾಯಕಾನ್ ಚಲ್ಲ್ಲಿ ವಾಟ್ ವರ್ಣಿಲ್ಲಿ ರೀತ್ ಕಾಂಯ್ ನವಿ ನಹಿಂ ತರ್ಯ್ ತ್ಯಾ ವಾಟೆಕ್ ಬದ್ಲಿಲ್ಲಿ ರೀತ್ ವರ್ಣುಂಕ್ ಫಾವೊ ಜಾಲ್ಲಿ.
ಆಮ್ಚಾ ಕೊಂಕ್ಣಿ ಶೆತಾಂತ್ ಹ್ಯಾಚ್ ವಾಟೆ ವಯ್ಲ್ಯಾ ವಿಚಾರಾನಿಂ ಸಬಾರ್ ನಿರಾಸಾಕ್ ವೆಂಗ್ಚಿ ಕವಿತಾಂ ದಿಸೊನ್ ಯೆತಾಸ್ತಾನಾ ಹೆಂ ವಾಟ್ ಕವಿತಾ ಕ್ರಾಂತಿಕಾರಿ ಆಶಾವಾದಾಕ್ ವೆಂಗುನ್ ಆಯಿಲ್ಲೆಂ ಚಡ್ ಆಶಾದಾಯಕ್. ಕವಿತಾ ನಾಯಕಚೆಂ ಕ್ರಾಂತಿಕಾರಿ ಚಿಂತಾಪ್ ಸಾರ್ಕೆಂ ಉಟೊನ್ ದಿಸ್ತಾ. ದಿಸ್ಪಡ್ತ್ಯಾ ಸಮಾಜೆಕ್ ಧಯ್ರಾಧೀಕ್ ಲಿಸಾಂವ್ ದಿತಾ ವಾಟ್ ಕವಿತಾ.
ಹಿ ಮಾಟ್ ಪಡ್ಲ್ಲಿ ವಾಟ್
ಪಾಟ್ ಕರ್ನ್ ಸಾಟ್ ಸುಮಾನ್ ಸರ್ಲೆ.....
ಮ್ಹಜಿ ವಾಟ್ ಆತಾಂ ಹಾಂವೆಚ್ ರುತಾಂ ಕೆಲ್ಯಾ
ರೂಂದ್ ನಹಿಂ ಆಸ್ಯೆತ್ ಹಾಯ್ವೇಬರಿ
ಫಿಕಿರ್ ನಾಂ ಮುಕ್ಲ್ಯಾನ್ ದಾಂಟಾತಾ
ಪಾಟ್ಲ್ಯಾನ್ ಆಪ್ಟಾತಾ ಮ್ಹಳ್ಳ್ಯಾಚಿ
ಖಂತ್ ನಾಂ ಆತ್ತಾಂ ಪಾವ್ತಾಂ
ಖಿಣಾನ್ ಪಾವ್ತಾಂ ಮ್ಹಳ್ಳ್ಯಾ
ಧಯ್ರಾನ್ ಕಿರ್ಕಿರ್ನಾಸ್ತಾಂ (ವಾಟ್)
ಜಿವಿತಾಚಾ ವಾಟೆ ವಯ್ಲ್ಯಾ ಸಬಾರ್ ವಿಚಾರಾಂಕ್ ಏಕ್ ಕ್ರಾಂತಿಕಾರಿ ಧಯ್ರಾಚೆಂ ಮೇಟ್ ಕವಿತಾ ನಾಯಕಾಚೆಂ. ಹ್ಯಾ ಧಯ್ರಾಕ್ ಪಳಂವ್ಚೆಂ ತರ್ ಪಯ್ಲೆಂಚಾ ಕವಿತಾ ನಾಯಕಾಚಾ ಸಾರ್ಲ್ಲ್ಯಾ ವಾಟೆರ್ ಪರಿಪೂರ್ಣಾತಾಯೆಚಾ ಮತಿಚಾ ವಾಡಾವಳೆಕ್ ಪಾವೊಂಕ್ ನಾತ್ಲ್ಲೊ ಕವಿತಾ ನಾಯಕ್ ಆತಾಂ ಪರಿರ್ಪೂಣ್ ಜಾಲಾ. ಬಹುಶ: ತಾಚಾ ಫುಡಾರಾಚಾ ವಾಟೆಕ್.
ಆತಾಂ ಮ್ಹಜಿ ವಾಟ್ ಹಾವೆಂಚ್ ಕಾತರ್ಲ್ಯಾ
ಕಾಕುಳ್ತಿಕ್ ಬಗ್ಲೆಕ್ ಸಾರುನ್
ಬಗ್ಲೆಚಾ ಕರಡಾಕ್ ಉಜೊ ದೀವ್ನ್
ಉಭಾರಾಯೊ ಖೊಂಡುನ್ ಖಂದ್ಕಾಂ ಪುರುನ್" (ವಾಟ್)
ಸ್ವಷ್ಟ್ ವಿಂಸ್ಚಾ, ಹ್ಯಾ ವಿಂಚವ್ಣೆಕ್ ಪೂರಕ್ ಜಾವ್ನ್ ’ಆಮಾಲಾಚೆಂ ವಾಯ್ನ್’ ಪಿಯೆಂವ್ಕ್ ದಿತಾನಾ ಆಬೊಲ್ಯಾಂಚೆಂ ತಾಂಬ್ಡೆಂಪಣ್ಯ್ ದಾಖಯ್ತಾ. ಅಸಲಿ ಪರಿಪೂರ್ಣತಾ ಕೊಂಕ್ಣಿ ಕವಿತಾ ಶೆತಾಂತ್ ಏಕ್ ಕ್ರಾಂತಿ ಜಾಂವ್ಕ್ ಜಾಯ್. ಹ್ಯಾ ಜಮ್ಯಾಂತ್ಲ್ಯಾ ಸಬಾರ್ ಕ್ರಾಂತಿಕಾರಿ ಚಿಂತ್ಪಾಚಾ ಕವಿತೆನಿಂ ಕವಿತೆಂಚಾ ಸಿಂತಿಮೆಂತಾಂನಿ ಭರ್ಲೆಲ್ಯಾ ವಿಚಾರಾಂಕ್ ಲಾಗೊನ್ ಕವಿತೆಂಚೆಂ ಅಂತ್ಯ್ ನಿರಾಸಾಂತ್ ಆಖೇರ್ ಜಾಲಾಂ ತರೀ ಅಸ್ಪಷ್ಟ್ ರೂಪಾಚೊ ಆಶಾವಾದ್ ಪರ್ದ್ಯಾ ಪಾಟ್ಲೊ ಥಂಯ್ ಹಾಂಗಾ ಝಳ್ಕಾತಾ ತೆಂ ನೆಗಾರ್ ಕರುಂಕ್ ಜಾಯ್ನಾಂ.
ಕವಿತೆಂಚಾ ವ್ಹಾಳ್ಯಾಂತ್ ವ್ಹಾಳಯಿಲ್ಲಿ ಭಾಸ್ ಆನಿಂ ಸಬ್ದ್ ವಿನ್ಯಾಸ್, ಉತ್ರಾಂ ಆನಿ ತಿಂ ಘುಂತ್ಲ್ಲಿ ಸೊಬಾಯ್ ಕವಿತೆಂಚಾ ಮೂಳ್ ವಿಚಾರಾಂಕ್ ಬಗ್ಲೆಕ್ ಲೊಟುನ್ ಕವಿತೆಂಚಾ ಸೊಬಾಯೆಕ್ ಚಡ್ ಉಕ್ಲುನ್ ಧರ್ತಾ. ಕವಿತೆಂಚಾ ಚಿಂತ್ಪಾಚೆರ್ ಆನಿ ವಿಚಾರಾಂಚೆರ್ ಸಮಾಜಿಕ್ ವಿಶಾಲ್ಪಣಾಕ್ ಹಾಡುಂಕ್ ಪ್ರಯತ್ನ್ ಕರ್ಚೆಂ ಚಡ್ ಗರ್ಜೆಚೆಂ. ತಶೆಂಚ್ ಕವಿತೆಂಕ್ ವೈಯುಕ್ತಿಕ್ ರಿತಿನ್ ಪಳೆನಾಸ್ತಾನಾ ಸಾಹಿತ್ಯಾಕ್ ಪಳಂವ್ಚಾ ಜೆರಾಲ್ ರಿತಿನ್ ಪಳಂವ್ಚೆ ಚಡ್ ಮಹತ್ವಾಚೆಂ.
ವೈಯುಕ್ತಿಕ್ ಮ್ಹಳ್ಳ್ಯಾ ಸಬ್ದಾಕ್ ಹಾಂವೆ ಹ್ಯಾ ಸಮೀಕ್ಷೆಂತ್ ಉಪಯೋಗ್ಸಿಲ್ಲೆಂ ಕಾರಾಣ್ ಕಿತೆಂ ಮ್ಹಳ್ಯಾರ್ ವ್ಯಕ್ತಿಗತ್ ಸಿಂತಿಮೆಂತಾಕ್ ಪಾಟಿಂಬೊ ದಿಂವ್ಚೆ ನಿರಾಸ್ವಾದ್ ಯಾ ಭುಜ್ವಣ್ ದಿಂವ್ಚಿ ಸಹಾನುಭೂತಿ ಚಡ್ ಝಳ್ಕಾತಾ ಜಾಲ್ಲ್ಯಾನ್. ಸಗ್ಳಿಂ ಕವಿತಾಂ ಎಕಾಚ್ ವಾಟೆಕ್ ಲಾಗು ಕರುಂಕ್ ಜಾಯ್ನಾಂತ್ ತೆಂ ಸಾರ್ಕೆಂ. ಪೂಣ್ ಹ್ಯಾ ಜಮ್ಯಾಂತ್ ಸಬಾರ್ ವಿಚಾರ್ ಎಕಾಚ್ಚ್ ವಾಟೆಕ್ ಲಾಗು ಜಾಂವ್ಚೆಂ ದಿಸ್ಲೆ ಜಾಲ್ಲ್ಯಾನ್ ಹಾಂವೆ ಹಿ ವಾಟ್ ಧರ್ಲಿ.
ಸಾಹಿತ್ಯಾಕ್ ಆನಿ ತೆಂ ರಚ್ಲೆಲ್ಯಾ ವ್ಯಕ್ತಿಕ್ ಸರಿ ಕರ್ಚೆಂ ತೆಂ ನೆಣಾರ್ಪಣ್ ಹಾಂವ್ ಭಿಲ್ಕುಲ್ ಕರಿನಾಂ. ಏಕ್ ಸಾಹಿತ್ಯಾಚೊ ವಿಧ್ಯಾರ್ಥಿ ಜಾವ್ನ್ ಸಾಹಿತ್ಯಾಚಾ ವಿಚಾರಾಂಕ್ ಆನಿ ತೆಂ ಸಾಹಿತ್ಯ್ ಹಾಂವೆ ಜಿಯೆಂವ್ಚಾ ಸಮಾಜೆಂತ್ ಕಿತ್ಲೆಂ ಸುಧಾರಣ್ ಹಾಡುಂಕ್ ಪಾವ್ತಾ ಮ್ಹಳ್ಳ್ಯಾ ವಿಶಿಂ ಮಾತ್ರ್ ಹಾಂವ್ ಚಿಂತಾ. ಸಾಹಿತ್ಯ್ ತೆಂ ಖಂಯ್ಚಾಯ್ ಕಾಳಾಚೆಂ ಜಾಂವ್ ತೆಂ ತ್ಯಾಚ್ ಕಾಳಾಕ್ ಸರಿ ಕರಿನಾಸ್ತಾನಾ ಹಾಂವೆ ಜಿಯೆಂವ್ಚಾ ಹ್ಯಾ ಪ್ರಸ್ತುತ್ ಕಾಳಾಕ್ ಸರಿ ಕರ್ತಾಂ ಜಾಲ್ಲ್ಯಾನ್ ಬಾಬ್ ಮೆಲ್ವಿನ್ ರೊಡ್ರಿಗಸಾಚಾ ಆದ್ಲ್ಯಾ ಕವಿತಾ ಜಮ್ಯಾಚಾ ವಿಚಾರಾಂಕ್ ಹ್ಯಾ ಜಮ್ಯಾಚಾ ವಿಚಾರಾಂತ್ ಹಾಂವೆ ಮೆಳಯಿಲ್ಲೆಂ ಬಹುಶ: ವಾಚ್ಫ್ಯಾಕ್ ಯಾ ಖುದ್ದ್ ಕವಿಕ್ಚ್ ತೆಂ ಗರ್ಜೆ ಭಾಯ್ಲೆಂ ಮ್ಹಣೊನ್ ದಿಸ್ತಾ ಜಾಲ್ಯಾರ್ ಮಾಫಿ ಆಸೊಂ.
ಪುಣ್ ಮ್ಹಜ್ಯಾ ಚಿಂತ್ಪಾ ಪ್ರಕಾರ್ ಹಾಂವ್ ಸಾಹಿತ್ಯಾಕ್ ಪಯ್ಲೆಂ ಸ್ಥಾನ್ ದಿತಾಂ ಆನಿ ಕವಿಕ್ ಯಾ ವಾಚ್ಫ್ಯಾಕ್ ಬಗ್ಲೆಕ್ ಲೊಟ್ತಾಂ. ಕಾರಾಣ್, ಸಾಹಿತ್ಯಾನ್ ಘಾಲ್ಚಾ ಪ್ರಭಾವಾಂತ್ ಕವಿ ಗರ್ಜೆಚೊ ನಹಿಂ ಬಗಾರ್ ತಾಣೆಂ ರಚ್ಲೆಲೆಂ ಸಾಹಿತ್ಯ್ ಗರ್ಜೆಚೆಂ. ’ವಾಟ್’ ಕವಿತಾ ಜಮ್ಯಾಚಾ ಕವಿಚಾ ಚಿಂತ್ಪಾಕ್ ಆನಿ ಕವಿತಾ ನಾಯಕಾನ್ ಚಲ್ಲ್ಲ್ಯಾ ವಾಟೆಕ್ ವೆವೆಗ್ಳ್ಯಾ ದಿಷ್ಟಿನ್ ಹಾಂವೆ ಪಳಯಿಲ್ಲೆಂ ಕಾರಾಣ್ಯ್ ಬೋವ್ ಸೊಂಪೆ. ಹಾಂಗಾಸರ್ ಕವಿ ವೈಯುಕ್ತಿಕ್ ಚಿಂತ್ಪಾಚಾ ಸಿಂತಿಮೆಂತಾನಿ ಬುಡೊನ್ ಕವಿತಾ ನಾಯಕಾಚಾ ವಾಟೆರ್ ಕ್ರಾಂತಿ ಹಾಡುಂಕ್ ಗಳಾಯ್ ಕೆಲ್ಲ್ಯಾನ್ ಹ್ಯಾಚ್ ಕವಿಚಾ ಫಾಲ್ಯಾಂಚಾ ತಾಚ್ಯಾ ಕವಿತಾ ನಾಯಕಾಕ್ ಪ್ರಸ್ತುತ್ ಕರ್ತಾನಾ ಪರ್ತ್ಯಾಕ್ ತೊ ’ಮಧ್ಯಾನ್ ರಾತಿಚಾ ಖುರಾ ವಯ್ಲೊ ಬುಡ್ಕುಲೊ’ ಜಾಯ್ನಾಸ್ತಾನಾ ಬಗ್ಲೆಚಾ ಕರಡಾಕ್ ಉಜೊ ಲಾಯಿಲ್ಲೊ ಸಮಾಜ್ ಸುಧಾರಕ್ ಜಾವ್ನ್ ಉದೆಂವ್ಚಾ ಆಶಾವಾದಾನ್.
ಸಾಹಿತ್ಯ್ ಮನೋರಂಜನಾ ಖಾತಿರ್ ಹಾಂವ್ ವಾಚಿನಾಂ. ಆನಿ ಸಾಹಿತ್ಯ್ ಎಕಾಚ್ಚ್ ವರ್ಗಾಚಾ ಯಾ ಎಕಾಚ್ಚ್ ಪರಿಸ್ಥಿತೆಚಾ ಗಡಿ ಭಿತರ್ ಆಸ್ಚೆಂ ನಿಜಾಯ್ಕ್ಯ್ ದುರ್ಭಾಗ್ಯ್. ಆಮ್ಚೆಂ ಕೊಂಕಣಿ ಸಾಹಿತ್ಯ್ ಚಡ್ ಆನಿ ಚಡ್ ವಾಡ್ತಾ ಮಾತ್ರ್ ಶಿವಾಯ್ ತೆಂ ಗ್ರೇಸ್ತ್ ಜಾಯ್ನಾಂ. ಹೆಂ ಗ್ರೇಸ್ತ್ ಜಾಂವ್ಕ್ ಜಾಯ್ ತರ್ ಆಮ್ಚೆಂ ಸಾಹಿತ್ಯಾಚೆಂ ಚಿಂತಾಪ್ ಘುಂವ್ಚಾ ಆಮ್ಚಾಚ್ ವರ್ತುಲಾಂ ಥಾವ್ನ್ ಭಾಯ್ರ್ ಯೆಂವ್ಕ್ ಜಾಯ್. ಹ್ಯಾ ವಾಟೆರ್ ಬಾಬ್ ಮೆಲ್ವಿನ್ ರೊಡ್ರಿಗಸಾಚಾ ಸಾಹಿತ್ಯಾಂತ್ ನವಿಂ ಕಿರ್ಣಾಂ ದಿಸೊನ್ ಯೆತಾತ್ ಜಾಲ್ಯಾರೀ universal ಚಿಂತ್ಪಾಚೆಂ ಉಣೆಪಣ್ ಝಳ್ಕಾತಾ.
ಹ್ಯಾ ವಾಟೆರ್ ಕವಿನ್ ಥೊಡೆಂ ಧ್ಯಾನ್ ಚಡ್ ದಿಲೆಂ ಜಾಲ್ಯಾರ್ ನಿಜಾಯ್ಕ್ಯ್ ಕೊಂಕ್ಣೆಚಿ ಕೀರ್ತ್ ಸಾತ್ ದರ್ಯೊ ಉತ್ರೊನ್ ತ್ಯಾ ಪಯ್ಶಿಲ್ಯಾ ಆಮೇರಿಕಾಂತ್ ಘಾಜ್ತಾನಾ ’ಕೊಂಕಣ್ ಡೇ ಸೆಲೆಬ್ರೆಶನ್’ ಜಾಂವ್ಚಾ ಬದ್ಲಾಕ್ ’ಕೊಂಕಣ್ ಸಂಭ್ರಮ್ ದಿವಸ್’ ಜಾತಲೊ. ಬಾಬ್ ಮೆಲ್ವಿನ್ ರೊಡ್ರಿಗಸಾಕ್ ಹ್ಯಾ ವಾಟೆರ್ ಹಾಂವ್ ಸರ್ವ್ ಜಯ್ತ್ ಮಾಗ್ತಾನಾ ಪುಡಾರಾಕ್ ತಾಚೆ ಥಾವ್ನ್ ಆನೀಕಿ ಉಂಚ್ಲೆಂ ಸಾಹಿತ್ಯ್ ಆಂವ್ಡೆತಾಂ.
ದೇವ್ ಬರೆಂ ಕರುಂ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
