ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ’ಟೂರಿಸ್ಟ್ ಸೈಕಲ್’ ಅಂಕಣಾಕ್ ಭೆಟ್ ದಿಯಾ.
ಚಿಂತ್ನೆನ್ ಸಬ್ಧಾನ್ ಆನಿ ಬರ್ಪಾನ್[ಕೊಂಕ್ಣೆಂತ್
ವಿಚಾರಾಂಚೆಂ ವ್ಹಾದಾಳ್ ಉಟಯಿಲ್ಲೆಂ ಅನ್ಯೇಕ್ ಫಾಮಾದ್ ಅಂಕಣ್ ’ಚಿಂತ್ನೆನ್, ಸಬ್ಧಾನ್ ಆನಿ ಬರ್ಪಾನ್’ ಕೊಂಕ್ಣೆಂತ್ಲ್ಯಾ ಸಾಹಿತ್ಯ್ ಚಕ್ರವರ್ತಿ ಎಡ್ವಿನ್ ಜೆ. ಎಫ್. ಡಿ’ಸೋಜ್ ಹಾಚಾ ಭಳ್ವಂತ್ ಲಿಖ್ಣೆಥಾವ್ನ್ ಪರತ್ ದಾಯ್ಜ್ ವಾಚ್ಪ್ಯಾಂ ಖಾತಿರ್. ದಾಯ್ಜ್.ಕೊಮ್ಚೆರ್ ಎದೊಳ್ಚ್ ಭೋವ್ ಫಾಮಾದ್ ಜಾಲ್ಲ್ಯಾ ’ಟೂರಿಸ್ಟ್ ಸೈಕಲ್’ ಅಂಕಣಾ ಉಪ್ರಾಂತ್ ಜಾಯ್ತ್ಯಾಂನಿ ಎಡ್ವಿನಾಚಾ ಅಂಕಣಾಕ್ ಶಾಭಾಸ್ಗಿ ಪಾಟಾಯಿಲ್ಲಿ ಆನಿ ಎಡ್ವಿನಾಚೆಂ ಅಂಕಣ್ ಚಾಲು ದವರುಂಕ್ ವಿನತಿ ಕೆಲ್ಲಿ. ಸರ್ವ್ ವಾಚ್ಪ್ಯಾಂಕ್ ದೇವ್ ಬರೆಂ ಕರುಂ]
14. ಮಾನೆಸ್ತ್ ವಿಜೆಪಿ-ಚ್ಯೊ ಸ್ತ್ರೀಯೊ
ಎಡ್ವಿನ್ ಜೆ.ಎಫ್.
ಪ್ರತಮ್ ದಾಕ್ಲೊ ಹಾ೦ವ್ “ದೆವಾಚ್ಯಾ ಕುರ್ಪೆನ್” ದಿತಾ೦. ಅಶೆ೦ ಆಸಾ ಆಗ್ನೆಸ್ ಕು೦ವರ್ನಿಚೆ೦ ದಯ್ಹಿಕ್ ವರ್ಣನ್: “ತ್ಯೆ ತರ್ನಾಟೆ ಸ್ತ್ರೀಯೆಚ್ಯಾ-ಸ್ತ್ರೀ ವ ಆ೦ಜ್?-ಹಾತಾ೦ತ್ ದಾ೦ತೊಣಿ ಆಸ್ಲ್ಲಿ. ಕೇಸ್ ಉಗ೦ವ್ಚೆ೦ ಕಾಮ್ ಅರ್ದ್ಯಾರ್ ಸೊಡ್ನ್ ತಿ ಅಮ್ಸರಾನ್ ಆಯಿಲ್ಲಿಶಿ ದಿಸ್ತಾ. ಲಾ೦ಬ್ ತಿಚೆ ಕೇಸ್, ಚ೦ದ್ರಾ ಸಾರ್ಕ್ಯಾ ತಿಚ್ಯಾ ಮುಕಮಳಾಚ್ಯಾ ದೋನ್ಯ್ ಕುಶಿ೦ನಿ ಲಾರಾ೦-ಲಾರಾ೦ ಜಾವ್ನ್ ಭುಜಾ೦ ಆನಿ ಪಾಟ್ ದಾ೦ಪುನ್ ದೊ೦ಪ್ರಾ ತಿತ್ತುನ್ ಲಾ೦ಬ್ತಾಲೆ. ಲ್ಹಾನ್ ಮೊತಿಯಾಳೆ ದಾ೦ತ್ ಝಳ್ಕಾವ್ನ್ ತಿ ಹಾಸ್ಲಿ...”
ದುಸ್ರೊ ದಾಕ್ಲೊಯ್ ಹಾ೦ತ್ಲೊಚ್ ಪುಣ್ ವೇಳ್ಕಾಳ್ ಸುಚಾವ್ ಹಾ೦ತು೦ ಆಸಾ ಆನಿ ತ್ಯಾ ತೆಕಿದ್ ವರ್ಣನ್. ಹಾ೦ತ್ಲ್ಯಾ ಸ೦ಬಾಶಣಾಚೆರ್ಯ್ ಗಮನ್ ವ್ಹರಾ ಆನಿ ಸಗ್ಳ್ಯಾ ದೃಶಾ೦ತ್ ವಿಜೆಪಿ-ಚ್ಯಾ ಬರ್ಪಾಚಿ ತಾ೦ಕ್ ಉಟೊನ್ ದಿಸ್ಚಿ ಪಳೆಯಾತ್: “ದುಸ್ರ್ಯಾ ದಿಸಾ ಸಕಾಳಿ೦ಚ್ಯಾ ಚಡುಣೆ ಧಾ ವೊರಾರ್ ಸರ್ದಾರ್ ಸಿಮಾ೦ವ್ಕ್ ಜಾಗ್ ಜಾಲಿ. ನಿದ್ಲ್ಲೆಕಡೆಥಾವ್ನ್ ತಾಣೆ ದೊಳೆ ಭ೦ವ್ಡಾಯ್ಲೆ. ಜನೆಲಾಕಡೆ ಎಕಾ ಬಾ೦ಕುಲಾರ್ ಆಗ್ನೆಸ್ ಕು೦ವರ್ನ್ ಬಸುನ್ ಆಸ್ಲ್ಲಿ. ಕಾಪಡ್ ತಿ ನೆಸ್ಲ್ಲಿ. ತಿಚೆ ಕೇಸ್ ಫಾ೦ತಿಯೊ ಕರ್ನ್ ತಾ೦ಚೊ ಶೆ೦ಡೊ ಬಾ೦ದ್ಲ್ಲೊ. ತಿಚ್ಯಾ ಉಸ್ಕ್ಯಾರ್ ಆಸ್ಲ್ಲ್ಯಾ ಲಿವ್ರಾ೦ತ್ ಪಳೆವ್ನ್ ಬೋವ್ ಹಾಳ್ವಯೆನ್ ಗಾಯಾನ್ ತಿ ಕರ್ತಾಲಿ - ಕ್ರಿಸ್ತಪುರಾಣ್ ಮ್ಹಣ್ ಸರ್ದಾರ್ ಸಿಮಾ೦ವ್ಕ್ ಘಡಿಯೆನ್ ಸಮ್ಜಾಲೆ೦.
“ಘಡ್ಯೆನ್ ತಿಣೆ ದೊಳೆ ಖಟ್ಲ್ಯಾ ತೆವ್ಶಿನ್ ಉಬಾರ್ಲೆ, ಆನಿ ಸರ್ದಾರ್ ಸಿಮಾ೦ವ್ ಜಾಗೊ ಜಾವ್ನ್ ತಿಕಾಚ್ ಪಳೆ೦ವ್ಚೊ ಸಾ೦ಪಡ್ಲೊ. ಲಿವ್ರ್ ದಾ೦ಪುನ್ ತಿ ಉಟ್ಲಿ ಆನಿ ಹಾಸ್ಲಿ.
“ಜಾಗ್ ಜಾಲಿ ಸಿ೦ಜೊರ್? ತರ್ ಕಿತೆ೦ ಚಿ೦ತಾಲೊಯ್?”
“ಹಾ೦ವ್ ಆಸಾ೦ ತೊ ಸ೦ಸಾರ್ ವ ಸರ್ಗ್ ಮ್ಹಣ್ ದುಬಾವ್ತಾಲೊ೦.”
“ಕಿತ್ಯಾಕ್?”
“ಸ೦ಸಾರಾ೦ತ್ ಇತ್ಲೆ೦ ಸುಖ್ ಆನಿ ಇತ್ಲಿ ಸೊಬಾಯ್ ಆಸ್ಯೆತ್ ಮ್ಹಣ್ ಪಾತ್ಯೆ೦ವ್ಕ್ ಮ್ಹಾಕಾ ಕಶ್ಟ್ ಮಾರ್ತಾಲೆ.”
ತಿಚ್ಯಾ ಪೊಲ್ಯಾ೦ಚೊ ವರ್ಣ್ ತಾ೦ಬ್ಶೆಲೊ. “ಚಾರ್ ಗಾ೦ವ್ ತು೦ ಭೊ೦ವ್ಲಾಯ್ ಮ್ಹಣ್ ದಿಸ್ತಾ ಸಿ೦ಜೊರ್, ತುಜೆ೦ ಸುಡಾಳ್ ಉಲವ್ಣೆ ತಶೆ೦ ಸಾ೦ಗ್ತಾ. ತೆ೦ ಆಸು೦. ಆಜ್ ಕಶೆ೦ ಬೊಗ್ತಾ ಜಿವಾ೦ತ್?”
ನ್ಹಂಯ್ಗಿ ವಿಜೆಪಿ-ಚ್ಯಾ ಬರ್ಪಾ೦ಚಿ ತಾ೦ಕ್ ಅಕ೦ಡ್? ಫುಡೆ೦ ಹಾ೦ವ್ ಮೊಗಾ ಪ್ರಕರಣಾ೦ವಿಶಿ೦ ಉಲ್ಲೇಕ್ ಕರ್ತಾನಾ ಹೆ೦ ಎಕ್ ದೃಶ್ ತುಮ್ಚೆ ಯಾದಿ೦ತ್ ಆಸು೦ ಕಿತ್ಯಾಕ್ ಮ್ಹಳ್ಯಾರ್ ಖ೦ಚ್ಯಾ೦ತ್ಯ್ ನ್ಹಂಯ್ ತರ್ ಮೊಗಾ-ದೃಶಾ೦ ಲಿಕ್ಚ್ಯಾ೦ತ್ ಆಮ್ಚೆ ಹುಮೆದ್ವ೦ತ್ ಬರವ್ಪಿ ಸಲ್ವತಾತ್.
ಆತಾ೦ “ಮೊಗಾ ಮ್ಹಾಕಾ ಶಿಕಯ್” ಕಾದ೦ಬರಿಯೆ೦ತ್ಲೆ೦ ಎಕ್ ವರ್ಣನ್ ವಾಚಾ: “...ಪುಣ್ ಹ್ಯಾ ವೆಳಾರ್ ತ್ಯೆ ಯುವತೆಥ೦ಯ್ ದೋನ್ ವಿಶಯ್ ವರ್ತ್ಯಾ ಬಳಾನ್ ಪಾಳಾ೦ ಘೆತಾಲೆ. ಸಂಯ್ಬಿಕ್ ಸೊಬಾಯೆಚೆ೦ ಹೆ೦ ಭುರ್ಗೆ೦ ತಾಚ್ಯಾ ಮಾನಸಿಕ್ ಉ೦ಚಾಯೆ ತೆಕಿದ್ ಕುಡಿನ್ಯ್ ಫುಲ್ತಾಲೆ೦. ಆದುನಿಕ್ ಫೆಶನಾ೦ಚೆ ಕಸಲೆಚ್ ದಿಗೆನಾಸ್ತಾ೦ ಮಾಗ್ ವೊಳ್ಪಿ ಲೊರ್ಸಾಮಾಚೆ೦ ಹೆ೦ ಚೆಡು೦, ಕುಡಿನ್ ಪಾಕ್ಳ್ಯಾ೦ಚ್ಯಾ ಪಿಲಾ೦ಕ್ ಲಜ್ ಕರಿಸಾರ್ಕ್ಯಾ
ಜಿನ್ಸಾರ್ ಪಾಕ್ಳೆತಾಲೆ೦-ಪಾಕ್ಳೆಲೆ೦. ದೃಶ್ಟೆನ್ ಆಪುಣ್ ಸ್ತ್ರೀ ಮ್ಹಣ್ ವಳ್ಕಾಸಾರ್ಕೆ೦ ತಾಚೆ ಹರ್ ವಿಶ್ವೆ ರಚ್ನಾರಾಚಿ ಕಲಾಪ್ರವೀಣತಾ ಪಾಚಾರ್ತಾಲೆ. ತಾಪ್ಲ್ಲ್ಯಾ ಪೊಟಾರ್ ತಿತ್ಲೆ೦ ಸುಡ್ಸುಡಿತ್, ಪುಡ್ಪುಡಿತ್ ಆನಿ ಆಕರ್ಶಿಕ್ ಚೆಡು೦ ಆಸ್ಯೆತ್ ಮ್ಹಣ್ ಕೊಣಾಯ್ಕಿ ಪಾತ್ಯೆ೦ವ್ಕ್ ಕಶ್ಟ್ ಮಾರ್ಚ್ಯಾ
ಜಿನ್ಸಾರ್ ಫೆಲ್ಸಿತಾ ಫುಲ್ಲೆ೦.”
ಆತಾ೦ ತಿಸ್ರೆ೦ ದೃಶ್ಟಾ೦ತ್ “ರುಜ್ವಾತ್” ಪುಸ್ತಕಾ೦ತ್ಲೆ೦: “....ಪಾಶಾರ್ ಜಾತಾನ ಹಾ೦ವೆ೦ ತಿಕಾ ಪಳೆಯಿಲ್ಲ್ಯಾಪರಿ೦ಚ್ ತಿಣೆ ಮ್ಹಾಕಾಯ್ ಪಳೆಲೆ೦ ಮಾತ್ರ್. ನಾಕಾ ನಾಕಾ ಮ್ಹಳ್ಯಾರಿ ಮ್ಹಜ್ಯಾ ನಾಕಾ೦ತ್ ರಿಗ್ಲೊ ತಿಣೆ ಆ೦ಗಾ-ಪಾ೦ಗಾಕ್ ಲೆಪುನ್ ಘೆತ್ಲ್ಲ್ಯಾ ಪಾವ್ಡರ್ ಆನಿ ಸವಾಯ್ ಪರ್ಮಳಿಕ್ ತೆಲಾಚೊ ಪರ್ಮಳ್, ಭರ್ಶಿಕ್ ಅಮೃತಾ೦ಜನ್ಗಿ ನೀಲಗಿರಿ ತೆಲಾಚೊಯ್ ವಯ್ಲ್ಯಾಬಾರ್ ವಾಸ್ ಮ್ಹಾಕಾ ಆಯ್ಲೊ. ಘಡಿಯೆ ತಿಚೊ ಛಾರೊ, ರೂಪ್, ಆಕಾರ್ ಆನಿ ಅಲ೦ಕಾರ್ ಹಾ೦ವೆ೦ ಮತಿ೦ತ್ ದರ್ಲೊ: ಪ್ರಾಯ್ ಚಡುಣೆ 30-35 ಜಾವ್ಯೆತ್; ಪ್ರತಮ್ ದೃಶ್ಟೆಕ್ ರೂಪ್ ಬರೆ೦ಚ್. ಪುಣ್ ಥಾಪ್ಲ್ಲ್ಯಾ ಪಾವ್ಡರಾವರ್ವಿ೦ ಆನಿ ಲೆಪ್ಲ್ಲ್ಯಾ ರ೦ಗಾವರ್ವಿ೦ ದಿವ್ಯಾ ಉಜ್ವಡಾ೦ತ್ ಸಾರ್ಕೆ೦ ಪಾರ್ಕು೦ಕ್ ಕಶ್ಟ್; ಆಕಾರ್ ಜಡಾಯೆಚೊ; ನೆಸ್ಲ್ಲೆ೦ ಕಾಪಡ್ ಧವ್ಯಾ ರಶೀಮಾಚೆ೦; ಘಾಲ್ಲಿ ಬಾಜು ಕಾಳ್ಯಾ ಇಲುದಾಚಿ-ಪುಣ್ ಹಾತ್ ನಾತ್ಲ್ಲಿ ಆನಿ ಗಳ್ಯಾ ಬೊ೦ವಾರಿ೦ ಮಾಣ್ಸುಗೆಚ್ಯಾ ಗಡಿ ಭಾಯ್ರ್ ಆ೦ಗ್ ದಾಕ೦ವ್ಚಿ; ಗಳ್ಯಾ೦ತ್ ಬಾರೀಕ್ ಎಕ್ ಚೇಯ್ನ್; ಮುದಿಯೊ ನಾತ್ಲ್ಲೆ ರಿತೆ ಕಾನ್. ಬೊಟಾಕ್ ಮುದಿ ಆಸ್ಲ್ಲಿ ವ ನಾ ಮ್ಹಳ್ಳೆ೦ ಮ್ಹಾಕಾ ದಿಸೊ೦ಕ್ ನಾ.”
ಆತಾ೦ ಆಲ್ವರಿಸಾಚ್ಯಾ “ಆ೦ಜೆಲ್” ಹಾ೦ತ್ಲೆ೦ ಎಕ್ ‘ಕ್ಲಾಸಿಕ್’ ಸ್ತ್ರೀ-ವರ್ಣನ್ ದಿಲ್ಯಾ ಖೆರಿತ್ ಮ್ಹಾಕಾ ಆವಡ್ನಾ. ಹ್ಯಾ ಕಾದ೦ಬರಿಯೆ೦ತ್ಲ್ಯಾ ಎಕಾ ಸನ್ನಿವೆಶಾ೦ತ್ ಕುಯುಕ್ತ್ಯಾ೦ಚೊ ಶೆಣಯ್, ಆ೦ಜೆಲಾನ್ ಕಸಲ್ಯೆ ರಿತಿರ್ ಅಲ೦ಕಾರ್ ಕರುನ್ ಧನಿ ನೊರ್ಬಟಾಕ್ ವಚುನ್ ಭೆಟಾಜೆ ಮ್ಹಣ್ ಸಾ೦ಗ್ತಾ ತೆ೦ ಪಳೊವ್ಯಾ೦: “ಪಯ್ಲೆ ಸುವಾತೆರ್ ಆ೦ಜೆಲಾನ್ ಬರಿಶಿ ಮುಸ್ತಾಯ್ಕಿ ನೆಸುನ್ ನಾಜುಕ್ ಆನಿ ಅಲ೦ಕಾರ್ ದಿಸಜೆ. ಮುಸ್ತಾಯ್ಕೆಕ್ ಆನಿ ಶೃ೦ಗಾರಾಕ್ ಆಸಾ ತಿ ಮರ್ಯಾದ್ ಆನಿ ಆಕರ್ಶಣ್ ದುಸ್ರ್ಯಾ ಖ೦ಚ್ಯಾಯ್ ವಸ್ತುಕ್ ನಾ. ದೆವಾಚೆ ದಯೆನ್ ತುಕಾ ಸ೦ಯ್ಬಿಕ್ ಅಲ೦ಕಾರ್ ಬರೋ ಆಸಾ. ಕೇಸ್ ಲಾ೦ಬ್ ಜಾವ್ನ್ ಸೊಬಿತ್ ಆಸಾತ್. ತೆ ಬರೆ ಕರುನ್ ಉಗಯ್ ಆನಿ ಕುಶಿಕ್ ಭಾ೦ಗ್ ಕಾಡುನ್ ಲಾ೦ಬ್ಸೊ, ಬೊ೦ಡಿಯೆಪರಿ೦ ಗೊಮ್ಟ್ಯಾಲಾಗಿ೦ ಶೆ೦ಡೊ ಬಾ೦ದ್. ಅರ್ದ್ಯಾ ಹಾತಾ೦ಚಿ ಬಾಜು, ಪಾ೦ಯಾ೦ಚ್ಯೊ ಗಾ೦ಟಿ ದಾ೦ಪಸರ್ ತಾ೦ಬ್ಶೆ೦ ಯಾ ಕಿರಾ-ರ೦ಗಾಚೆ೦ ಕಾಪಡ್ ನೆಸ್. ಕಾನಾ೦ತ್ ಹಾಲ್ಕ್ಯೊ, ಬೊಟಾ೦ಕ್ ಥಿಕಾ೦ಚ್ಯೊ ಮುದಿಯೊ, ಗಳ್ಯಾ೦ತ್ ಸರ್ಪಳಿ, ಪಾ೦ಯಾ೦ಕ್ ವ್ಹಾಣೊ ಆನಿ ಹಾತಾ೦ತ್ ಸಿಲ್ಕಾಚೊ ತುವಾಲೊ ಆನಿ ಶೆ೦ಡ್ಯಾಕ್ ಎಕ್ ಶಿ೦ವ್ತೆ೦ ಯಾ ದುಸ್ರೆ೦ ಕಸಲೆ೦ಯ್ ಫುಲ್ ಖ್ಹೊವವ್ನ್ ಹೊಕ್ಲೆ-ದೆಡಿಯೆಪರಿ೦ ವಚ್.....”
ಯೆ೦ವ್ಯಾ ಕಿಸ್ತಾ೦ತ್ ತುಮಿ೦ ವಾಚ್ಲ್ಲ್ಯಾ ಹ್ಯಾ ವರ್ಣಣಾ೦ಚೆರ್ ಫೊಡ್ಣಿಶಿ ಆಸಾ ದೆಕುನ್ ತಯಾರ್ ರಾವಾ.
ಆಧ್ಲೆ ಅಂಕ್ಡೆ: 1, 2, 3, 4, 5, 6, 7, 8, 9, 10, 11, 12, 13
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
