ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಮರ್ಶ್ಯಾ ಲೇಖನ್ - 8
ರಸಾಯನ್
ಮೆಲ್ವಿನ್ ಪಿಂಟೊ, ನೀರುಡೆ
ಕವಿ ಮ್ಹಳ್ಯಾರ್ ಕೊಣ್?
ಕೊಂಕ್ಣಿ ಕವಿತಾ ಶೆತಾಂತ್ ಆಯ್ಲೆವಾರ್ ವಿವಿದ್ ಠೀಕಾ, ವಿಮರ್ಸೊ ಚಲೊನ್ ಆಸಾ. ಕೋಣ್ ಕವಿ, ಕೋಣ್ ನ್ಹಂಯ್ ಮ್ಹಳ್ಳೆ ವಿಶಿಂ ವಾದ್-ವಿವಾದ್ ಜಾವ್ನ್ಂಚ್ ಆಸಾ. ಆಕ್ರೇಕ್ ಕವಿ ಮ್ಹಳ್ಯಾರ್ ಕೋಣ್? ವಿಶಾಲ್ ರಿತಿನ್ ಪಳೆಂವ್ಚೆಂ ತರ್ ’ಕವಿ’ ಮ್ಹಳ್ಳ್ಯಾ ಸಬ್ದಾಕ್ ನಮುನ್ಯಾವಾರ್ ಆರ್ಥ್ ದಿವ್ಯೆತ್. ತುಮಿ ಬ್ರಾಯನ್ ಲಾರಾಚೆಂ ಬ್ಯಾಟಿಂಗ್ ಪಳೆಲಾಂ ತರ್ ತಾಚ್ಯಾ ಒಟ್ಟಾರೆ ಬ್ಯಾಟಿಂಗ್ ಶಯ್ಲೆಂತ್ ಎಕಾ ರಿತಿಚೊ ನಾದ್, ನಾಚ್ ಆಸಾ. ಚಡ್ತಾವ್ ಕೊಮೆಂಟೇಟರ್ಸ್ ಲಾರಾಚೆಂ ಬ್ಯಾಟಿಂಗ್ ವಿವರಾವ್ನ್ sheer poetry (ಅದ್ಬುತ್ ಕಾವ್ಯ್!) ಮ್ಹಣ್ ಸಾಂಗ್ತಾತ್. ತಶೆಂ ಪಳೆಲ್ಯಾರ್ ಬ್ರಾಯನ್ ಲಾರಾ ಏಕ್ ಬ್ಯಾಟಿಂಗ್ ’ಕವಿ’ ಜಾತಾ.
ಆದಿಂ (ಆನಿ ಥೊಡೆ ಕಡೆ ಆಜೂನ್) ಗಾವಾಂತ್ ಬಾಯ್ಲಾಂ ಸುಮಾರ್ ಪಯ್ಸ್ ಥಾವ್ನ್ ಹಾಂಡಿಯೆರ್ ಶಿದಿ ದವರ್ನ್ ಉದಾಕ್ ವಾವವ್ನ್ ಹಾಡ್ತಾಲಿಂ. ದಾದ್ಲ್ಯಾಂಕ್ ಜಾಯ್ ಮ್ಹಳ್ಯಾರ್ಯೀ ಹಾಂಡಿಯೆರ್ ಕೊಳ್ಸೊ ಕೊವವ್ನ್ ಉದಾಕ್ ಹಾಡ್ಚೆಂ ಅಸಾದ್ಯ್. ತಿ ಕಲಾ ಬಾಯ್ಲಾಂಕ್ ಮಾತ್ರ್ ಸೀಮಿತ್. ತಶೆಂ ತಿಂ ಹಾಂಡಿಯೆರ್ ಉದಾಕ್ ಭರ್ಲ್ಲೊ ಕೊಳ್ಸೊ ಘೆವ್ನ್ ಹಾಲೊನ್, ಧಲೊನ್ ಯೆತಾನಾ ಥಂಯ್ಸರ್ಯೀ ಏಕ್ ಕಾವ್ಯ್ ಸೃಷ್ಟಿ ಜಾತಾ ಹಾಂಡಿಯೆಚೆಂ ಕಾವ್ಯ್.
ಗಾವಾಂತ್ ಮಾಡಾರ್ ಚಡೊನ್ ನಾರ್ಲ್ ಕಾಡ್ಚೆ ಮಾನಾಯ್ ಆಸಾತ್. ಮಾಡಾಕ್ ಕಿತೆಂಚ್ ದುಕಯ್ನಾಸ್ತಾಂ ಚಾಣಿಯೆಬರಿ ವಯ್ರ್, ವಯ್ರ್ ಚಡೊನ್ ಖುಬ್ಯಾರ್ ದೊರಿ ಬಾಂದುನ್ ಮಣಯೆರ್ ಬಸೊನ್ ಎಕೆಕ್ ನಾರ್ಲ್ ಕೊಯ್ತಿ ವಾಪರ್ನ್ ಶಿಮ್ಟ್ಯಾರ್ ಥಾವ್ನ್ ನಿಕ್ಳಾವ್ನ್ ಶೀದಾ ಮಾಡಾಚ್ಯಾ ಮುಳಾಂತ್ ಘಾಲ್ಚ್ಯಾ ಒಟ್ಟಾರೆ ಪ್ರಕ್ರಿಯೆಂತ್ ಏಕ್ ಅದ್ಬುತ್ ಕಾವ್ಯ್ ಆಸಾ. ಮಾಡಾರ್ ಚಡ್ಚೊ ತೊ ಇಂತ್ರು, ದುಜೆ, ನೀಲಯ, ಬಾಬು, ಎಂಕ್ಟಯೀ ಕವಿ ಜಾತಾ – ’ಮಾಡಾಚೊ ಕವಿ’.
ಹಿಂದ್ವಾಂಗೆರ್ ಸಾಕಾಳಿಂ ಫುಡೆಂ ಉಟೊನ್ ಘರ್ಚಿ ಯೆಜ್ಮಾನ್ ವೆವೆಗಿಂ ನಿತಳ್ ಜಾವ್ನ್ ಆಂಗಣ್ ಧುವ್ನ್, ತ್ಯಾ ಉಪ್ರಾಂತ್ ‘ರಂಗೋಲಿ’ ಸೊಡೊಂವ್ಕ್ ಬಸ್ತಾ. ಪಳೆತಾ ಪಳೆತಾನಾಂಚ್ ತಿಚ್ಯಾ ಅಸ್ಕತ್ ಬೊಟಾಂ ಇಡ್ಯಾಂತ್ಲ್ಯಾನ್ ಸೊಭಿತ್ ರಂಗೋಲಿ ಭಾಯ್ರ್ ಸರ್ತಾ ಆನಿ ಮಿನುಟಾಂನಿ ಸಗ್ಳ್ಯಾ ಆಂಗ್ಣಾಕ್, ಸಗ್ಳ್ಯಾ ಘರಾಕ್ ವಿಶೇಸ್ ಸೊಭಾಯ್ ದಿತಾ. ರಂಗೋಲಿ ಆನಿ ಸ್ತ್ರೀಯೆ ಮದ್ಲೊ ತೊ ಅಪೂರ್ವ್ ಸಂಬಂದ್ ಕಾವ್ಯ್ ಜಾತಾ ಆನಿ ತಿ ಸ್ತ್ರೀ ’ರಂಗೋಲಿ ಕವಯಿತ್ರಿ’ ಜಾತಾ.
ತಶೆಂ ಪಳೆಲ್ಯಾರ್ ಸಗ್ಳ್ಯಾ ಸೃಷ್ಟೆಚಿ ಸ್ವಾಬಾವಿಕ್ ಸ್ಥಿತಿ ಕಾವ್ಯ್. ಮನ್ಶಾ ಸಂಯ್ಬಾಚಿ ಸ್ವಾಬಾವಿಕ್ ಸ್ಥಿತಿಯೀ ಕಾವ್ಯ್. ಮೊವಾಳ್, ಮೊಗಾಳ್ ಕರ್ಣೆಂತ್, ಮೋಗ್-ಮಯ್ಪಾಸಾಂತ್, ಸೊಡ್-ದೊಡ್, ಸೊಸ್ಣಿಕಾಯೆಂತ್, ಪಾಪ್-ಭಿರ್ಮತೆಂತ್ ಆಸಾತ್ ಕಾವ್ಯಾಚಿಂ ಲಕ್ಷಣಾಂಚ್. ಪುಣ್ ದುರಂತ್ ಮ್ಹಳ್ಯಾರ್ ಆಜ್ ಮನಿಸ್ ಅಸಲಿಂ ಕಾವ್ಯಾಳ್ ಲಕ್ಷಣಾಂ ಸಾಂಡುನ್ ಚಡ್ ಆನಿ ಚಡ್ ಧಾರುಣ್ ಜಾವ್ನ್ಂಚ್ ಯೆತಾ ಆನಿ ಅಶೆಂ ತಾಚೆಂ ಕಾವ್ಯಾಳ್ ಸಂಯ್ಬ್ಯೀ ಅಸ್ಕತ್ ಜಾವ್ನ್ ಯೆತಾ.
ಸಗ್ಳ್ಯಾ ಸೃಷ್ಟೆಚಿ, ಸಗ್ಳ್ಯಾ ಮನ್ಶಾ ಸಂಯ್ಬಾಚಿ ಸ್ವಾಬಾವಿಕ್ ಸ್ಥಿತಿ ಕಾವ್ಯ್ ವ್ಹಯ್ ತರ್ಯೀ, ಹರ್-ಎಕ್ ವ್ಯಕ್ತಿ ಕವಿ ಜಾಯ್ನಾ. ತಶೆಂ ಜಾಲ್ಲೆಂ ತರ್ ಆಜ್ ಸಾಹಿತ್ಯ್ ಮಸ್ತು ಬೋರಿಂಗ್ ಜಾತೆಂ. ಹರ್ ಎಕ್ಲೊ ಕವಿ ಜಾಯ್ನಾ ಕಿತ್ಯಾಕ್ಗೀ ಮ್ಹಳ್ಯಾರ್ ಮನ್ಶಾ ಕಾಲೆತ್ಚ್ ತಶಿ. ಥೊಡೆ ವ್ಯಕ್ತಿ ಜಿಣ್ಯೆಂತ್ ಹರ್-ಎಕ್ ಸಂಗತ್ ಗುಂಡಾಯೆನ್ ಅನ್ಬೊಗ್ ಕರುಂಕ್ ಪೆಚಾಡ್ತಾತ್ ತರ್ ಮಾಗಿರ್ ಥೊಡೆ ಚಡ್ತಾವ್ ಸಂಗ್ತಿಂಕ್ ತಿತ್ಲೆಂ ಗುಮಾನ್ ದೀನಾಂತ್. ಮಾಗಿರ್ ಥೊಡೆ ಜಿಣಿ ಗುಂಡಾಯೆನ್ ಅನ್ಬೊಗ್ ಕರ್ತಾತ್ ಮಾತ್ರ್ ನ್ಹಂಯ್, ಅನ್ಬೊಗ್ ಕೆಲ್ಲೆಂ ತಿತ್ಲ್ಯಾಚ್ ಪ್ರಬಾವ್ಭರಿತ್ ರಿತಿಂ ವ್ಯಕ್ತ್ ಕರುಂಕ್ ಸಕ್ತಾತ್. ಆನಿ ಹಾಂಕಾಂ ಆಮಿ ಕವಿ ಮ್ಹಣ್ಯೆತ್. “ಕದಳಿಯೊಳ್ ಮದದಾನೆ ಪೊಕ್ಕಂತೆ ಪೊಕ್ಕನ್, ಮ್ಹಣ್ ಕುಮಾರವ್ಯಾಸ ಅಭಿಮನ್ಯುವಿಶಿಂ ಸಾಂಗ್ತಾ ತರ್ ಕೆಂಳ್ಬ್ಯಾ ತೊಟಾಂತ್ ಚರ್ಬೆಲ್ಲಿ ಹಸ್ತ್ ರಿಗ್ಚಿ ತಿ ಸ್ಥಿತಿ ಪಳೆವ್ನ್ ಕುಮಾರವ್ಯಾಸಾಕ್ ಅನ್ಬೊಗ್ ಜಾಲಾ. ’ರಸವೇ ಜನನ, ವಿರಸ ಮರಣ, ಸಮರಸವೇ ಜೀವನ’, ಮ್ಹಣ್ ಬೇಂದ್ರೆ ವಿವರಯ್ತಾನಾ ಜಿಣಿ ಆನಿ ಮ್ಹರಣ್, ಮೋಗ್ ಆನಿ ದ್ವೇಶ್ - ಹಾಂಚ್ಯಾ ಮದ್ಲೊ ವ್ಯತ್ಯಾಸ್ ಬೇಂದ್ರೆಕ್ ಅನ್ಬೊಗ್ ಕರ್ನ್ ಕಳಿತ್ ಆಸಾ. ದೆಕುನ್ಂಚ್ ಖರಿ ಜಿಣಿ ಮ್ಹಳ್ಯಾರ್ ದೊನಾಂಯ್ಚೆಂ ಸಮಾನ್ ಮೆಳಾಪ್ ಮ್ಹಣ್ ತೊ ಸಾಂಗ್ತಾ.
ಕೊಂಕ್ಣೆಂತ್ ಆಪ್ಲ್ಯಾ ಗಾಂವಾಚಿ ವ್ಹಡ್ವಿಕ್ ಉಚಾರ್ನ್ ಚಡ್ತಾವ್ ಕವಿಂನಿ ಕವಿತಾ ಲಿಕ್ಲ್ಲಿಂ ಪಳೆಂವ್ಕ್ ಮೆಳ್ತಾತ್. ಹಾಚೊ ಆರ್ಥ್, ಕವಿ ಜಾಲ್ಲೊ ಆಪ್ಲ್ಯಾ ಗಾಂವಾ ಸಾಂಗಾತಾ ಏಕ್ ವಿವರಾಂವ್ಕ್ ಅಸಾದ್ಯ್ ತಸಲೊ ಭಾವನಾತ್ಮಕ್ ಸಂಬಂದ್ ದವರ್ತಾ ಮ್ಹಳ್ಳೆಂ ನಕ್ಕಿ ಜಾತಾ. ಮ್ಹಳ್ಯಾರ್, ಆಪ್ಲ್ಯಾ ಗಾಂವಾಚೊ ಸ್ವಾದ್, ಮಾತ್ಯೆಚೊ ವಾಸ್, ವಾರ್ಯಾ ನಾದ್, ಮನ್ಶಾ ಸಂಬಂದ್, ಗಾಡ್ ರಿತಿನ್ ಕವಿನ್ ಅನ್ಬೊಗ್ ಕೆಲಾ ಮ್ಹಣ್ ಜಾಲೆಂ. ದೆಕುನ್ಂಚ್ ಕೊಂಕ್ಣೆಂತ್ ಆಪ್ಲೊ ಗಾಂವ್ ವಿವರುನ್ ಕವಿಂನಿ ಲಿಕ್ಲ್ಲಿಂ ಕವನಾಂ ನಿಜಾಕೀ ಸ್ವಾದಿಕ್. ಗಾಂವಾ ವಿಶಿಂ ಆಸ್ಚೊ ಬಾಂದ್ ವಿವರಾವ್ನ್ ಹಳೆಗನ್ನಡ ಕವಿ ಪಂಪ ಆಪ್ಲ್ಯಾ ಬನವಾಸಿ ಗಾಂವಾ ವಿಶಿಂ ಸಾಂಗ್ತಾ: ’ಆರಂಕುಶಮಿಟ್ಟೊಡಂ, ನೆನೆವುದೆನ್ನ ಮನಂ, ಬನವಾಸಿ ದೇಶಮಂ’ (ಕೊಣೆಂ ಅಂಕುಶ (ಧೊಮೊಸ್) ತೊಪ್ಲ್ಯಾರ್ಯೀ ಮ್ಹಜೆಂ ಕಾಳಿಜ್ ಚದಾಂಚ್ ಬನವಾಸಿ ಗಾಂವ್ಂಚ್ ನಿಯಾಳ್ತೆಲೆಂ!).
ಜಿಣ್ಯೆಚೊ, ಮನ್ಶಾಂಚೊ ಗುಂಡಾಯೆಚೊ ಅನ್ಬೊಗ್ ನಾ ತರ್ ಕವಿ, ನೀಜ್ ಕವಿ ಜಾತಾ ಮ್ಹಣ್ ಪಾತ್ಯೆಂವ್ಚೆಂ ಕಷ್ಟ್. ಪುಣ್ ಕೇವಲ್ ಅನ್ಬೊಗ್ ಮಾತ್ರ್ ಪಾವಾನಾ. ಮೆಳ್ಲ್ಲೊ ಅನ್ಬೊಗ್ ವ್ಯಕ್ತ್ ಕರ್ಚಿ ಕಲಾ ಕವಿ ಜಾಲ್ಲ್ಯಾನ್ ಕಷ್ಟ್ ಕಾಡ್ನ್ ಶಿಕೊಂಕ್ ಆಸಾ. ದೆಕುನ್ಂಚ್ ಆಮಿ ಸಮರ್ಥ್ ಕವಿ ಜಾಂವ್ಚೆಂ ತರ್ ಆಮ್ಚ್ಯಾ ಮಾಂಯ್ಭಾಶೆಂತ್ ಮಾತ್ರ್. ಗದ್ಯ್ ಆಮಿ ಶಿಕ್ಲ್ಲ್ಯಾ ಖಂಯ್ಚ್ಯಾ ಭಾಶೆಂತ್ಯೀ ಬರಂವ್ಕ್ ಸಾದ್ಯ್.
ಆಧ್ಲೆ ವಿಮರ್ಶೆ: 1, 2, 3, 4, 5, 6, 7
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
