ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಬೂಕ್ ಸಮೀಕ್ಶಾ - 10
ಕವಿತಾಪಾಠ್ ಭಾಗ್-1
ಬೂಕ್: ಕವಿತಾಪಾಠ್ ಪಯ್ಲೊ ಭಾಗ್
ಕವಿ: ದಾಯ್ಜ್ ಪಂಗಡ್, ಕುವೇಯ್ಟ್
ಪ್ರಸ್ತಾವನ್: ಮೆಲ್ವಿನ್ ರೊಡ್ರಿಗ್ಸ್, ಹೇಮಾಚಾರ್ಯ, ಎಚ್ಚೆಮ್
ಛಾಪ್ಲ್ಲಿ ಲಿಪಿ: ಕಾನಡಿ.
ಪಾನಾಂ: 66+4
ಮೋಲ್: ರು. 50
ಪ್ರಕಾಶಕ್: ಆಶಾವಾದಿ ಪ್ರಕಾಶನ್
ಪರ್ಗಟ್ ಜಾಲ್ಲಿ ಇಸ್ವಿ: 2005
ಸಮೀಕ್ಶಾ ಚಲಯ್ಣಾರ್: ವಲ್ಲಿ ಕ್ವಾಡ್ರಸ್
ತಾರಿಕ್: 13 ಜನೆರ್ 2006
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ವಲ್ಲಿ ಕ್ವಾಡ್ರಸ್
ಕವಿಂಚಿ ವ್ಹಳೊಕ್:
ಹ್ಯಾ ಬುಕಾಂತ್ ದಾಯ್ಜ್ ಪಂಗ್ಡಾಚಾ ಸರ್ವ್ ಸಾಂದ್ಯಾಂನಿ ಆಪಾಪ್ಲೆ ವಿಚಾರ್-ಪ್ರಭಂಧ್ ವೆಕ್ತ್ ಕೆಲ್ಯಾತ್. ಚಡ್ತಾವಾಂಕ್ ಅಸಲೊ ಆವ್ಕಾಸ್ ಲಾಭ್ಚೊ ಪಯ್ಲೊ ತರ್ಯ್ ಜಾಯ್ತಿ ಮಿನತ್ ಕರುನ್ ತಾಣಿಂ ಪ್ರಾಮಾಣಿಕ್ ಥರಾನ್ ಎಕೆಕಾ ಕವಿತಾಚೆರ್ ಅಧ್ಯಯನ್ ಕರುನ್ ಕವಿತಾಪಾಠ್ಚೆರ್ ಪ್ರಸ್ತುತ್ ಕೆಲ್ಲೆ ಪ್ರಭಂಧ್ ಹ್ಯಾ ಬುಕಾಂತ್ ಪರ್ಗಟ್ಲ್ಯಾತ್. ಹಾಂತುಂ ಖಂಯ್ಸರ್ಯ್, ಖಂಯ್ಚಾಯ್ ವೆಕ್ತಿಚಿ ನಿಂದಾ ಜಾಂವ್, ಯಾ ಆಣ್ಕಣ್ ಜಾಂವ್ ನಾ. ಫಕತ್ತ್ ವಿಚಾರ್ ಮಾತ್ರ್. ಹೆಂ ಅಧ್ಯಯನ್ ಮಾತ್ರ್ ಶಿವಾಯ್ ವಿಮರ್ಶ್ಯಾಚೆಂ ಕಾಮಾಸಾಳ್ ನ್ಹಯ್.
ಸಮೀಕ್ಶಾ ಲೇಖನ್
ವಿಮರ್ಸೊ, ಕವಿತಾ, ಪಾಠ್ ಆನಿ ಬೊಬಾಟ್ [ - ವಲ್ಲಿ ಕ್ವಾಡ್ರಸ್, ಅಜೆಕಾರ್]
ಹೊ ಸಗ್ಳೊ ಬೂಕ್ಭರ್ ವಿಮರ್ಸೊ, ಸಂವಾದ್, ಸಮೀಕ್ಶಾ ಭರ್ಲಾ ದೆಕುನ್ ಪರತ್ ತೆಚ್ಚ್ ವಿಮರ್ಶ್ಯಾಚೆರ್ ಹಾಂವ್ ಸಂವಾದ್ ಚಲಂವ್ಕ್ ವಚಾನಾ, ಬಗಾರ್ ಕವಿತಾಪಾಠ್ ಕಾಮಾಸಾಳಾವಿಶ್ಯಾಂತ್, ಪ್ರಸ್ತುತ್ ಪರಿಗತೆಂತ್ ಅಸಲ್ಯಾ ಸಾಹಿತಿಕ್ ವಿಚಾರ್ಸಾತ್ಯಾಚಾ ಗರ್ಜೆವಿಶ್ಯಾಂತ್, ವಿಮರ್ಶ್ಯಾಚಾ ಸಾಹಿತ್ಯಾವಿಶ್ಯಾಂತ್ ಉಲ್ಲೇಕ್ ಕರುಂಕ್ ಆಶೆತಾಂ.
ಮಂಗ್ಳುರಿ ಕ್ರಿಸ್ತಾಂವ್ ಕೊಂಕ್ಣಿ ಸಾಹಿತ್ಯಾಂತ್ ಪಾಟ್ಲ್ಯಾ ವೀಸ್ ವರ್ಸಾಂ ಥಾವ್ನ್ ಸೊಧ್ನಾಂ/ಅಧ್ಯಯನ್ ಕರ್ನ್ ಆಯಿಲ್ಲ್ಯಾ ಮ್ಹಾಕಾ, ವಿಮರ್ಶ್ಯಾ ಸಾಹಿತ್ಯಾವಿಶಿಂ ವಾಚುಂಕ್ ಮೆಳ್ಲ್ಲೆಂ ಚಿಮ್ಟಿಭರ್, ಆನಿ ಹ್ಯಾ ಚಿಮ್ಟಿಭರ್ ವಿಮರ್ಶ್ಯಾಂನಿ ಸಾಹಿತಿಕ್ ಪ್ರಕಾರಾಂಕ್ ಮೆಳ್ಚೆ ಆನಿ
ಕೊಣೆಂಯ್ ಆಪ್ಲ್ಯಾ ಸಾಹಿತಿಕ್ ವ್ಹಾಡಾವಳೆಕ್ ಗಳ್ಸಿಯೆತ್ ಜಾಲ್ಲೆ ವಿಮರ್ಶೆ ಭೋವ್ ಉಣೆಂ. ’ಪ್ರಗತಿ ಪ್ರಕಾಶನ್’ ಶಿವಾಯ್ ಹೆರ್ ಖಂಚಾಯ್
ಪ್ರಕಾಶನಾನ್ ವ ಪತ್ರಾನ್ ಅಸಲೆಂ ಕಾಮ್ ಕೆಲ್ಲೆವಿಶಿಂ
ಹಾಂವ್ ನೆಣಾಂ ತರ್ಯ್ ಹ್ಯಾ ಚಡ್ತಾವ್ ವಿಮರ್ಶ್ಯಾಂನಿ ಆಯ್ಕೊಂಕ್ ಮೆಳ್ಲ್ಲೆಂ/ಮೆಳ್ಚೆಂ ಉತಾರ್ ಎಕ್ಚ್;
"ಮಂಗ್ಳುರಿ ಕ್ರಿಸ್ತಾಂವ್ ಕೊಂಕ್ಣಿ ವಾಚ್ಪ್ಯಾಂಕ್ ವಿಮರ್ಸೊ/ಕವಿತಾ ವೊಂಬಾನಾಂತ್".
ಖಂಡಿತ್ ಜಾವ್ನ್ಯ್ ಹೆಂ ಸತ್ಚ್. ಹಾಚಿಂ ಕಾರಾಣಾಂ ಕಿತ್ಲಿಂಯ್ ಆಸ್ಯೆತಾ ಪುಣ್ ಏಕ್ ಸತ್ ಮಾತ್ರ್ ಆಮಿ ಕಾಳ್ಜಾಮನಾಂತ್ ಮಾಂದುನ್ ಘೆಜಾಯ್ ಜಾಲ್ಲೆಂ ಜಾವ್ನಾಸಾ - ಆಮ್ಚೆ ವಾಚ್ಪಿ ಮಾತ್ರ್ ಹಾಂತುಂ ಭಾಗಿದಾರ್ ನ್ಹಯ್, ಆಮ್ಚೆ ಬರವ್ಪಿಯ್ ಭಾಗಿದಾರ್ ಜಾವ್ನಾಸಾತ್. ಆಮ್ಚೆ ಬರವ್ಪಿ ಪ್ಜಕತ್ ’ಹಾಂವ್, ಮ್ಹಜಿ ಕಾಣಿ, ಮ್ಹಜೆಂ ಕವಿತಾ, ಮ್ಹಜೊ ಬೂಕ್’ ಹೆಚ್ಚ್ ಬಾಂಯ್ಚಾ ಚಿಂತ್ಪಾಂತ್ ಲೊಳೊನ್ ಆಸ್ತಾನಾ ಆಮ್ಚಾ ಭಾಂಯ್ಚಾ ಭಾಯ್ರ್ ಏಕ್ ’ತಳೆಂ’ ಆಸ್ಯೆತ್, ಏಕ್ ’ನ್ಹಂಯ್’ ಆಸ್ಯೆತ್, ಏಕ್ ’ದರ್ಯೊ’ ಆಸ್ಯೆತ್ ಮ್ಹಳ್ಳೆಂ
ಚಿಂತಾಪ್ ತಾಂಕಾಂ, ಜೀವ್ ಗೆಲ್ಯಾರ್ಯ್ ಚಿಂತುಂಕ್ಚ್ ನಾಕಾ. ಹ್ಯಾ ಪರಿಗತೆಂತ್ ಆಮಿಂಚ್ ದಿಸಾಕ್ ಪಳೆಲ್ಲ್ಯಾ ಬಾಂಯ್ತ್ ರಾತಿಕ್ ಪಡ್ಚಾಂತ್ ನವಾಲ್ ಆಸಾ?
ಆಸೊಂ!
ಪಾಟ್ಲ್ಯಾ ಎಕಾ ವರ್ಸಾಥಾವ್ನ್ ಕಿತ್ಲೆ ಕಶ್ಟ್-ಸಂಕಷ್ಟ್ ಆಯ್ಲ್ಯಾರ್ಯ್ ಖಳಾನಾಸ್ತಾಂ ಮಾಂಡುನ್ ಹಾಡ್ಲ್ಲ್ಯಾ ಕವಿತಾಪಾಠ್ ಕಾಮಾಸಾಳಾಚಾ ಸುರ್ವಾತೆರ್ ಮ್ಹಜಾ ಮತಿಂತ್ ಆಸ್ಲ್ಲೆಂ ಚಿಂತಾಪ್ ಇತ್ಲೆಂಚ್; ಕಾಂಯ್ ಆಮ್ಚೆ ಪಯ್ಕಿಂತ್ ಎಕ್ಲಿಂ-ದೊಗಾಂ ಕವಿ ಜಾವ್ನ್ ಉದೆತಿತ್ ತರ್, ಕಾಂಯ್ ಎಕ್ಲಿಂ-ದೊಗಾ ವಿಮರ್ಶಕ್ ಜಾವ್ನ್ ಉದೆತಿತ್ ತರ್ ತೆಂಚ್ ಪುರೊ. ಪುಣ್ ಆವ್ಕಾಸ್, ವೇಳ್ ಹಾಂತುಂ ಭಾಗ್ ಘೆತ್ಲ್ಲ್ಯಾ ಹರ್ಯೆಕ್ಲ್ಯಾಂಕ್ ಸಮಾಸಮ್ ದಿಲ್ಲೊ. ಕೊಣಾಕ್ ವ್ಹಾಡೊಂಕ್ ಆಸಾ, ಕೊಣಾಕ್ ವೊಡುಂಕ್ ಆಸಾ, ಕೊಣಾಕ್ ಉಡಂವ್ಕ್ ಆಸಾ ತೆಂ ತಾಂತಾಂಚಾ ಖುಶೆಪರ್ಮಾಣೆ. ಆಜ್ ಎಕಾ ವರ್ಸಾಂತ್ ಜ್ಯೆ ಕಿತೆಂ ಹಾವೆಂ ಚಿಂತ್ಲ್ಲೆಂ ಜಾಂವ್ಚಿಂ ಭಳ್ವಂತ್ ಲಕ್ಶಣಾಂ ದಿಸೊನ್ ಯೆತಾನಾ ಮ್ಹಜೆಂ ಕಾಳಿಜ್ ನಿಜಾಯ್ಕಿ ಮೊರಾಚಿಂ ಪಾಕಾಂ ಭಾಂದುನ್ ನಾಚ್ತಾ. ನ್ಹಯ್ ಹಾಂತ್ಲಿ ಸಗ್ಳಿಂ ಕವಿ/ವಿಮರ್ಶಕ್ ಜಾಲಿಂ ಮ್ಹಣ್, ಬಗಾರ್ ಥೊಡಿಂ ತರ್ಯ್ ಹಾವೆಂ ಚಿಂತ್ಲ್ಲ್ಯಾ ಮೆಳಿಂತ್ ಆಸಾತ್ ಮ್ಹಣ್.
ಪುಣ್ ಜಶೆಂ ಹಾವೆಂ ಹಾಚಾದಿಂಯ್ ಹೆಂ ಸಾಂಗ್ಲಾಂ, ಕವಿತಾಪಾಠಾಂತ್ ಹಾಂವ್ ಏಕ್ ಸಾಂದೊ, ಜಿತ್ಲೊಚ್ ಗರ್ಜೆಚೊಂಕಿ ತಿತ್ಲೊ ಹೆರ್ ಕೊಣ್ಯ್ ಗರ್ಜೆಚೊ. ಹಾಂಗಾಸರ್ ಫಕತ್ತ್ ಮ್ಹಜಾ ಬರ್ಪಾಂಕ್ ಮಾತ್ರ್ ಆವ್ಕಾಸ್ ನ್ಹಯ್. ಸರ್ವಾಂಚಾ ಬರ್ಪಾಂಕ್ ಆವ್ಕಾಸ್ ಆಸಾ, ದೆಕುನ್ ಬೂಕ್ ಸಮೀಕ್ಶಾಚೆಂ ಲೇಖನ್ ಪ್ರಸ್ತುತ್ ಕರುಂಕ್ ಮ್ಹಾಕಾ ಆವ್ಕಾಸ್ ಲಾಭ್ಲ್ಲೊ ಹ್ಯಾ ವರ್ಸಾಚಾ ಅಖ್ರೇಕ್. ಬರೆಂ!
ಯೆಂವ್ಚಾ ವರ್ಸಾ ಆಮ್ಚಾ ವಿಚಾರಾಂಚಿ, ಚಿಂತ್ನಾಚಿ ಗಡ್ ಗುಂಡಾಯೆಕ್ ವರುಂಕ್ ಆಮಿ ಸಾಧನ್ ಕರಿಜಾಯ್, ಆಮ್ಚಿ ತಾನ್ ಚಡಯ್ಜಾಯ್. ಚಡಿತ್ ಪರಿಶ್ರಮ್ ಕರುಜಾಯ್, ಆಮ್ಚಾ ಸಾಹಿತಿಕ್ ವ್ಹಾಡಾವಳೆಕ್ ಪ್ರಾಮಾಣಿಕ್ ಮಿನತ್ ಕರಿಜಾಯ್. ಆಮಿಂ ಜರ್ ಹ್ಯಾ ’ಬಾಂಯ್ಚಾ’ ಚಿಂತ್ಪಾಂತ್ ಆಸಾಂವ್ ತರ್, ಪಯ್ಲೆಂ ಆಮಿಂ
ಭಾಯ್ರ್ ಯೇಜಾಯ್, ಹೆರಾಂಚೆಂ ಸಾಹಿತ್ಯ್ ವಾಚುಂಕ್, ಸಮ್ಜೊಂಕ್, ಹೆರಾಂಚೆಂ ಚಿಂತಾಪ್ ಗೌರವಾನ್ ಸಮ್ಜೊಂಕ್ ಪ್ರೇತನ್ ಕರಿಜಾಯ್. ತೆಚ್ಚ್ ಇರಾದ್ಯಾನ್ ಹಾಂಗಾಸರ್ ಮ್ಹಾಕಾ ವಾಚುಂಕ್ ಮೆಳ್ಲ್ಲ್ಯಾ ಬರ್ಯಾಂತ್ಲಿಂ ಬರಿಂ ವಾಚ್ಪಾಂತ್ಲೆಂ ಥೊಡೆಂ ವಿಂಚ್ಲಾಂ.
ಕೊಂಕ್ಣಿ ಭಾಶಾತಜ್ನ್, ವಿಮರ್ಶಕ್, ಸಾಹಿತ್ಯ್ ಪಂಡಿತ್ ದೊ|ವಿಲ್ಲಿ ಡಿ’ಸಿಲ್ವಾಚಾ ಉತ್ರಾಂನಿ ಕೊಂಕ್ಣಿ ಸಾಹಿತ್ಯಾಂತ್ ಕವಿತಾಂಚಿ ಪರಿಗತ್ ಸಮ್ಜೊಂವ್ಚಿ ತರ್;
ಕವಿತಾ ಆನಿ ಪದಾಂ
ಹಿ ಸಮ್ಜಣಿ ಮಂಗ್ಳುರಿ ಕೊಂಕಣಿ ಕ್ರಿಸ್ತಾಂವಾಂಕ್ ಕೆದ್ನಾಂಯ್ ಆಯಿಲ್ಲಿ ನಾ. ತಾಂಕಾ ಕವಿತಾ, ಪದಾಂ, ಕಾಂತಾರಾಂ, ಗಿತಾಂ ಪುರಾಯ್ ಎಕಾ ತಾಳಾಚಿಂ, ಎಕಾ ಮುಳಾಚಿಂ, ಎಕಾ ರುಪಾಚಿಂ, ಎಕಾ ರಂಗಾಚಿಂ. ದೆಕುನ್ಂಚ್ ಜಾವ್ಯೆತ್, ಚಾ.ಫ್ರಾಚಾ ಕವಿತಾ ಪುಂಜ್ಯಾಕ್ ಬಹುಮಾನ್ ಆಯಿಲ್ಲೊಚ್ ತಾಣಿ ’ಆಮ್ಚಾ ಮನ್ಶಾಕ್’ ಇನಾಮ್ ಮೆಳ್ಳೆಂ ಮ್ಹಳ್ಳೆಂ ಅಶೀರ್, ಕೋಮು ಮನ್ ಪರ್ಗಟ್ ಕೆಲ್ಲೆಂ ಸೊಡ್ಲ್ಯಾರ್, ಆಮ್ಚ್ಯಾ ಕೊಂಕಣಿ ಸಾಹಿತ್ಯಾಕ್ ಮಾನ್ ಜಾಲೊ, ಮರ್ಯಾದ್ ಜಾಲಿ ಆನಿ ತೆಂ ಸಾಹಿತ್ಯ್ ವ್ಹಡಾಂತ್ ಕಾಡ್ಲೆಂ ಮ್ಹಣ್ ವ್ಹಡ್ಪಣ್ ಲೆಕ್ಲೆಂ ನಾ. ’ಕಾನಡಿ’, ’ರೊಮಿ’, ಆನಿ ’ನಾಗರಿ’ ಮ್ಹಳ್ಳೆ ನಾರೆ ಉಭೆ ದವರ್ಲೆ, ತಾಂತ್ಲೆಂ ಚೂನ್ ಖಾಂವ್ಚಿ ಮಾಂಡ್ಣಿ ಕೆಲಿ ನಾ. ಲೆಂವ್ಟೆಪಣಾಂ ದಾಖಯ್ಲಿಂ. ಉಮೇದ್ ಫುಲಯ್ಲಿ ನಾ. ನಾ ಜಾಲ್ಯಾರ್, ಆಮ್ಚೆಂ, ಆಮ್ಚೆಂ, ಆಮ್ಚೆಂ ಮ್ಹಣ್ ಲೆಂಬೆತೆಲ್ಯಾಂಕ್ ’ಸೊಂಶ್ಯಾಚ್ಯಾ ಕಾನಾಂಚೆರ್ ಏಕ್ ಸಾರ್ಥಕಾಯೆಚೆಂ ಲೇಖನ್, ಏಕ್ ಸಮ್ಜಣೆಚೊ ವಿಮರ್ಸೊ, ಏಕ್ ಭಿತರ್ಲಿ ದೀಶ್ಟ್ ಘಾಲ್ಚೆಂ ಬರಾಪ್ ಆಪ್ಲ್ಯಾ ಪತ್ರಾಂನಿ ಪಾತ್ಳಾಂವ್ಕ್ ಅಜೂನ್ ವರ್ಗಾಲೆಂ ನಾ. ಬಹುಮಾನಾಂ ಮ್ಹಳ್ಯಾರ್ ಅಪಲ್ಯಾ ಮಾಲ್ಘಡ್ಯಾಂನಿ ಫುಡ್ಲ್ಯಾ ಪಿಳ್ಗೆಕ್ ಭಾಂದುನ್ ದವರ್ಲೆಲಿ ಗಾಂಟ್. ಸೊಮ್ಯಾಚೆ ದಯೆನ್ ದೆಂವೊನ್ ಯೆಂವ್ಚಿ ಮ್ಹಣ್ ಲಡಾಯೆಕ್ ಪೆಟ್ಟೆನಾಂತ್. ಗೊಂಯಾಂಚ್ಯಾ ಸಾಹಿತ್ಯಾಚೊ ಅನುಭವ್ ನಾಸ್ತಾನಾ ಗೊಂಯಾಂಕಾರ್ ಪುರಾಯ್ ಚೊರ್ತಾತ್ ಮ್ಹಣ್ ನಿಸ್ಕುಚಾರಾಚೆಂ ಉಲವ್ಣೆಂ ಪಾಚಾರ್ತೆನಾಂತ್. ಚರ್ಚಾ ಉಭಾರ್ತೆ, ಸವಾಲಾಂ ಉಡಯ್ತೆ, ಉಗ್ತ್ಯಾ ದಯ್ರಾನ್ ಸವಾಲಾಂ ಘಾಲ್ತೆ. ಕೊಂಕಣಿ ಲೇಖಕ್ ಸಮ್ಮೇಳನಾವೆಳಾರ್ ಪೆಡನ್ಯಾಂತ್, ಮಂಗ್ಳುರ್ಕಾರಾಂನಿ ಮಿರಯಿಲ್ಲಿ ದೇಕ್ ಮ್ಹಜ್ಯಾ ದೊಳ್ಯಾಂ ಮುಖ್ಲಿ ಅಜೂನ್ ಮಾಜ್ವೊಂಕ್ ನಾ. ಹಾಂತುಂ ಕೊಂಕಣಿ ಆನಿ ಕ್ರಿಸ್ತಾಂವ್ ಎಕಾಚ್ ಕಾಸ್ತಾಚೆ, ಎಕಾಚ್ ಥರಾಚಾ ಲ್ಹಾನ್ಪಣಾಂತ್ ರೆವೊಡ್ಲ್ಯಾತ್.
ಪೇಂಡ್ ಮ್ಹಣ್ತೆಲ್ಯಾಕ್ ನಾರ್ಲ್ ಆನಿ ತಿಳಾಚಿ ಮ್ಹಣೊಂಕ್ ಆನಿ ಎಕಾಚಿ ರೂಚ್ ಅನ್ಯೆಕಾಚೆ ರುಚಿಥಾವ್ನ್ ಮೆಕ್ಳಿ ಕರುಂಕ್ ಕಳ್ಲ್ಲೆಪರಿಂ ಸಾಹಿತ್ಯಾಂತ್ ಆಮ್ಕಾಂ ’ಪದಾಂ’ ಆನಿ ’ಕವಿತಾ’ ಮೆಕ್ಳಿಂ ಕರುಂಕ್ ಕಳಾಜೆ. ಕಳಾನಾ ಪರ್ಯಾಂತ್ ಆಮ್ಕಾಂ ’ಸೊಂಶ್ಯಾಚ್ಯಾ
ಕಾನ್’ ಕವಿತಾಪುಸ್ತಕಾಚೆಂ ಮೋಲ್ ಸುಸ್ತಾ ನಾ. ತೆಂ ಶ್ರೀ ಕೇಳೆಕಾರಾಕ್ ಸುಸ್ತಾಲ್ಲೆಂ. ತೆಂ ಹೆರಾಂ ಗೊಂಯಾಂಕಾರಾಕ್ ಸುಸ್ತಾಲ್ಲೆಂ. ದೆಖುನ್ ತಾಣಿಂ ಚಾ.ಫ್ರಾ.ಚ್ಯಾ ಪುಸ್ತಕಾಬಾಬ್ತಿನ್ ’ಸಂಪಾದಕೀ’ ಉತರಾಂ ಜೊಕುನ್ ಆನಿ ತುಕುನ್ ಬರಯಿಲ್ಲೆಂ, ತಶೆಂಚ್ ಸಾಹಿತ್ಯಾಭಾರ್ ಆಸ್ಚೆಂ ಸಗ್ಳೆಂ ಗಾಜವ್ನ್ ಬರಯಿಲೆಂ. ಆಮ್ಕಾಂ ತಾಂಕ್ಲೆಂ ನಾ. ತೆಂ ಸೊಡ್ಯಾಂ, ಮರ್ಯಾದಿಚೊ ಸತ್ಕಾರ್ ಸಯ್ತ್ ಸಾರ್ಕೆ ರಿತಿರ್ ಭಾಂದುಂಕ್ ಅಜೂನ್ ಒದಗ್ಲೆಂ ನಾ. ಹಿ ಮಂಗ್ಳುರಿ ದುರ್ದಶಾ. ಹೆ ದುರ್ದಶೆಕ್ ಅಖೇರ್ ಅಸತ್. ಲಜ್ ಆಸ್ಚಿ ನಾ.
ಕವಿತಾ ಮ್ಹಣ್ಜೆ
ಕಿತೆಂ ಮ್ಹಣುಂ? ಪದ್ ನ್ಹಯ್, ಗೀತ್ ನ್ಹಯ್, ಕಾಂತಾರ್ ನ್ಹಯ್ ಮ್ಹಣತ್ ವಚ್ಯೆತ್. ಪುಣ್ ಕವಿತಾ ಮ್ಹಣ್ಜೆ ಕಿತೆಂ? ಏಕ್ ದೀಶ್ಟ್ ಮ್ಹಣೊಂ? ತಸಲಿ ಏಕ್ ದೀಶ್ಟ್ ನಾಟಾಕಾಂತ್ ಆನಿ ನಾಟ್ಕುಳ್ಯಾಂತ್ಯ್ ಆಸಾ. ’ಭಾಂಗಾರ್ ಮನಿಸ್’, ’ಜೊರ್ಜಿ ಬುತೆಲ್’ ಇತ್ಯಾದಿ ನಾಟಕಾಂನಿ ಏಕ್ ದೀಶ್ಟ್ ಆಸಾ. ತಿ ಪಾರ್ಕುಂಚಿ, ತಜ್ವೀಜ್ ಕರ್ಚಿ ಘುಗಿದೀಶ್ಟ್. ಕವಿತೆಚಿ ದೀಶ್ಟ್ ಸರ್ಗಾಚಿ, ಆದಾಂವ್ ಬಾಪಾನ್ ಆನಿ ತ್ಯಾ ಬಾಪಾಚೆ ಬಾಯ್ಲೆನ್ ಭುಂಯ್ವೈಕುಂಟಾಂತ್ ಫಳ್ ಖಾಂವ್ಚೆಪಯ್ಲೆಂ ಜೊಡ್ಲ್ಲಿ ದೀಶ್ಟ್; ಸರ್ಜನ್ ಸಕ್ತೆಚಿ ದೀಶ್ಟ್. ತಿ ಖಂಯ್ ಥಾವ್ನ್ ಪಡ್ತಾ ಆನಿ ಖೈಂ ಪಡಾನಾ ಮ್ಹಣ್ ನಾ. ತೆ ದಿಶ್ಟಿನ್ ರಡ್ಟಾನಾ, ಹಾಸ್ತಾನಾ, ವಿಟೆತಾನಾ, ’ತೃಪ್ತಿ’ ಆನಿ ’ಶಾಂತಿ’ ಮೆಳ್ತಾ. ಮನ್ ಮನಿಸ್ ಜಾತಾ, ದೇವ್ ಸರ್ಗಾಥಾವ್ನ್ ದೆಂವ್ತಾ ಆನಿ ಕುಶಿಕ್ ಬಸ್ತಾ; ಅಪ್ಲೆ ಇಮಾಜೆಚಿ ವ್ಹಡ್ವಿಕ್ ಮ್ಹಾಂದ್ತಾ.
ಕೊಣೆಂ ಆದಿಂ ಅಶೆಂ ಸಾಂಗ್ಲ್ಲೆಂ; ’ರವಿಕ್ ದಿಸಾನಾ ತೆಂ ಕವೀಕ್ ದಿಸ್ತಾ, ಹಾಂವ್ ಚಿಂತಾಂ, ರವೀಕ್ ರಾತ್ ದಿಸಾನಾ; ದಿಸ್ಲ್ಲಿ ತರ್ ತಿಚಿ ರಾತ್ ಜಾತಿನಾ; ಕವಿಕ್ ರಾತ್ ಫರಕ್ ಯೆತಾ; ಕವಿನ್ ಮಧೆಂ ಪಡ್ಲ್ಲೆಕಡೆ ತಸಲೊ ಫರಕ್ ನಾಂಚ್ ಜಾತಾ; ಥಂಯ್ ಕವಿತಾ ಪಿಕ್ತಾ. ದೆವಾಕ್ ಬರೆಂ ಆನಿ ವಾಯ್ಟ್ ಮ್ಹಣ್ ಫರಕ್ ತೊ ದೆವಾಕ್ ನಾಡ್ಟಾ ಆನಿ ದೆಂವ್ಚಾರಾಕ್ ವೊಡ್ಟಾ. ಹೆಂ ಸಗ್ಳೆಂ ಘಡ್ಟಾ ಪಾತಾಳಾಂತ್ ನ್ಹಯ್, ಬಗಾರ್ ಭುಂಯ್ಚೆರ್; ಸರ್ಗಾಚೆ ದಿಶ್ಟೆನ್.
ವಿಲ್ಲಿ ಸಿಲ್ವಾನ್ ಬರಯಿಲ್ಲಿಂ ಹಿಂ ಉತ್ರಾಂ, ಚಾ.ಫ್ರಾ.ದೆ’ಕೋಸ್ತಾಚಾ ’ಸೊಂಶ್ಯಾಚೆ ಕಾನ್’ ಬುಕಾಚಾ ಪ್ರಸ್ತಾವನಾಂತ್ ಆಸ್ಚಿಂ, ಭೋವ್ ಅಪುರ್ಭಾಯೆನ್ ಸತಾಕ್ ಉಗ್ಡಾಪೆಂ ಕರ್ತಾತ್. ಕೊಣ್ ಸತ್ ಮಾಂದುಂ ವಾ ಕೊಣ್ ಸೊಡುಂ.
ಫುಡೆಂ ದೊ|ವಿಲ್ಲಿ ಸಿಲ್ವಾ ಲುವಿಸ್ ಮಸ್ಕರೇಞಾಚಾ ಸಾಹಿತ್ಯಾಚಿ ಖೊಡ್ ಕಾಡ್ತಾನಾ ಅಶೆಂ ಲಿಖ್ತಾ;
ಸಾಹಿತ್ಯ್ ಆನಿ ಆಮಿ
ಸಾಹಿತ್ಯಾ ಬಾಬ್ತಿನ್ ಉಲಯ್ತಾನಾಂಯ್ ಅಶೆಂಚ್ ಘಡ್ತಾ. ಅಮಿ ರಂಜನಾಖಾತಿರ್ ವಾಚ್ಲ್ಲೆಂ ಆಶಾ ದವ್ರುನ್ (ಮುಖ್ಲಿ ಖೊಡ್) ವಾಚ್ತಾಂವ್ ಆನಿ ಉಮೆದಿನ್ ಪರತ್ ವಾಚ್ತಾಂವ್ ಯಾ ನಿರಾಶೆನ್ ಸೊಡ್ತಾಂವ್ (ಪಾಟ್ಲಿ ಖೊಡ್). ಥೊಡೆಪಾವ್ಟಿಂ ಅರ್ಥ್ ಜಾಂವ್ಕ್ ನಾ ಮ್ಹಣ್ ಅರ್ಧ್ಯಾರ್ಚ್ ಕಾಬಾರ್ ಕರ್ತಾಂವ್. ಅಸಲೆಕಡೆ ಪ್ರಾಮಾಣ್ಪಣಿಂ ಬರಯಿಲ್ಲೊ ವಿಮರ್ಸೊ, ವಾಖಣ್ ವ ಠೀಕಾ ಅಮ್ಕಾಂ ಉಪ್ಕಾರ್ತಾ.
ಠೀಕೆಂತ್ಲೊ ಹರ್ಯೆಕ್ ಅಭಿಪ್ರಾಯ್ ಆಮಿ ಮಾನುನ್ ಘೆತಾಂವ್ ಮ್ಹಣೊನ್ ನ್ಹಯ್. ಪುಣ್ ಅನ್ಯೆಕ್ಲ್ಯಾಚಿ ಖೊಡ್ ವಾಚ್ಲ್ಲೆವರ್ವಿಂ ಆಮ್ಚಿ ಖೊಡ್ ಧಾರೆನ್ ಭರ್ತಾ. ಖಬ್ರಾಳ್ಯಾಂಚ್ಯೊ ರಿತಿ ಹೆರಾಂನಿ ಶಿಕ್ಲ್ಲೆ ಭಾಶೆನ್ಂಚ್ ಹಾಂಗಾಯ್ ಘಡ್ತಾ, ತಾಳ್ಮೂಳ್ ನಾತ್ಲ್ಲ್ಯಾಂಚೆರ್ ’ಗೇ’ ಉಲವ್ನ್ ನ್ಹಯ್; ಪ್ರಾಮಾಣ್ಭರಿತ್, ರುಜು ಕರುನ್ ದಾಕಯೆತ್ ತಸಲೆ ರಿತಿನ್.
ಆಮಿ ಚಡಾವತ್ ಖೊಡ್ ಕಾಡ್ಚಿ ಕಾಣ್ಯಾಂಚಿ, ಕಾದಂಬರ್ಯಾಂಚಿ, ಕವಿತಾ ಆಮ್ಚ್ಯಾ ಮಂಗ್ಳುರಿ ಸಂಯ್ಬಾಕ್ ವರ್ಗಾನಾ; ಆಮ್ಚೆ,
ಪಾದ್ರಿಂನಿ ಪೋಸ್ ಕೆಲ್ಲೆ, ಮತಿಕ್ ಆನಿ ಕಾಲೆತಿಕ್ ವೊಂಬನಾ. ತಸಲೆಕಡೆ, ಏಕ್ ಕಾವ್ಯನಾಟಕಾಚಿ ಠೀಕಾ ಮಟ್ವ್ಯಾನ್ ಕರುಂಕ್ ಹ್ಯಾ ಮುಕ್ಲ್ಯಾ ಪಾನಾಂನಿ ಹಾವೆಂ ಪ್ರಯತ್ನ್ ಕೆಲಾಂ. ತಿ ವೊಂಬತಲಿ ಮ್ಹಳ್ಳೆ ಆಶೆನ್ ನ್ಹಯ್. ವೊಂಬಲಿ ಜಾಲ್ಯಾರ್ ಸಾಹಿತ್ಯಾಂತ್ ಏಕ್ ನವೊ ಫುಡಾರ್ ಘಡ್ಯೆತ್ ಮ್ಹಳ್ಳೆ ಆಶೇನ್; ಲೆಂವ್ಟೆಪಣಾನ್ ಮ್ಹಣಾ - ಸೊಭ್ತಾ ಜಾಲ್ಯಾರ್!
ಮೆಲ್ವಿನ್ ರೊಡ್ರಿಗಸಾಚಾ ’ಮೊಗಾಪೆಳೊ’ ಕವಿತಾಜಮ್ಯಾಚಾ ಪ್ರಸ್ತಾವನಾಂತ್ ದೆ|ಚಾ.ಫ್ರಾ.ದೆ’ಕೋಸ್ತಾ ಅಶೆಂ ಬರಯ್ತಾ;
"ರೂಕ್ಝಾಡ್, ಆಲೊಪಾಲೊ, ಮೊನೀ ಮೊನ್ಜಾತ್ ಮಾತ್ ಹ್ಯಾ ನವೆಸಾಂವಾಂತ್ ಆಟಾಪ್ನಾಂತ್. ಮನಿಸ್ಯ್ ತೇ ಕೃತಿವಿಕೃತೆಂತ್ ಗುಸ್ಪಾತಾ, ಗಿನ್ಯಾನ್, ವಿಜ್ನಾನ್, ಧರ್ಮ್, ಆಚಾರ್, ದಂಧೊ, ವಯ್ವಾಟ್, ಫೌಜ್, ರಾಜ್ಕಾರಣ್ - ಅಸಲ್ಯಾ ಆಂಗ್ಣಾಂನಿ ತವಳ್ ತವಳ್ ಅಸಾಧ್ಯಾಕ್ ಸಾಧ್ಯ್ ಕರ್ಚೆ ಮನೀಸ್ ಉಭ್ಜಾತಾತ್. ತಾಂತೂಂ ಮ್ಹಜೆಂ ಅಧ್ಯಯನ್ ನಾ. ಪುಣ್ ಗೆಲ್ಯಾ ಪಾಂಚ್ತೀಸ್ ವರ್ಸಾಂ ಹೆವ್ಶಿಂ ಕೊಂಕ್ಣಿ ಕವಿತೆಚೆಂ ಅಧ್ಯಯನ್ ಹಾಂವ್ ಕರೀತ್ ಆಯ್ಲಾಂ, ಭೋವ್ ಖಾಲ್ತೆಪಣಿಂ. ಪ್ರದೇಶ್, ಪ್ರಕಾರ್, ಲಿಪಿ, ಉಚಾರ್ ಹಾಂಚೊ ಭೇದ್ ಮ್ಹಾಕಾ ಅನ್ವಯ್ಸೊಂಕ್ ನಾ. ಪ್ರದೇಶಾಂನಿ ಭೊಂವ್ಲಾಂ. ಪ್ರಕಾರಾಂಚೆಂ ವಿಶ್ಲೇಶಣ್ ಕೆಲಾಂ. ಚರಿತ್ರಾ ಚಾಳ್ಳ್ಯಾ. ಲಿಪ್ಯೊ ಶಿಕ್ಲಾಂ. ಅಚಾರ್ವಿಚಾರ್ ಗಾಳ್ಳ್ಯಾತ್. ಕೊಂಕ್ಣಿ ಕವಿತಾಜಗತ್ತಾಂತ್ಯ್ ಪ್ರಕೃತೆನ್ ಅಶೇಂಚ್ ಕೆಲ್ಲೆಂ ಭೊಗ್ಲಾಂ.
ಆಮ್ಚ್ಯಾ ಕನ್ನಡ್ ಲಿಪ್ಯೆಚ್ಯಾ ಪ್ರದೆಶಾಂತ್, ಎಕುಣೀಸ್ಶೆಂ ತಿಸಾಂವೆಳಿಂ ಶ್ರೀಮಾನ್ ಲುವಿಸ್ ಮಸ್ಕರೇಞ್ ಕವಿತೆಂತ್ ಏಕ್ ಉಂಚ್ಲ್ಯಾ ಹಂತಾಕ್ ಪಾವ್ಲ್ಲೊ. ಪ್ರಕೃತೆನ್ ತಾಕಾ ಉತ್ರಾಂ-ಭಾವನಾಂಚ್ಯಾ ಸಂಸಾರಾಕ್ ವಿಂಗಡ್ ರೀತಿನ್ ಜಲ್ಮಾಯಿಲ್ಲೊ ಹಾಂತುಂ ದುಭಾವ್ ನಾ. ಕಿತ್ಯಾಕ್ ತ್ಯಾ ಪುರ್ವೀಂ ಕಂತಿಗಾಂತ್ಲೆ ಅನಾಮಿಕ್ ಮಾತ್ ಹಾಂಗಾಚ್ಯಾ ಮಳ್ಬಾರ್ ಮಿಣ್ಕಾಲ್ಲೆ. ಮಸ್ಕರೇಞಾಚಿ ಕವಿತಾ ಅಂತ್ರಳಾರ್ ಉತರ್ಲ್ಯಾ ಉಪ್ರಾಂತ್ ಭೋವ್ ಥೊಡೆ ಆಪ್ಲ್ಯಾ ಹಾತಾಂನಿ ಉತ್ರಾಂಚೆ ದುರ್ಸುಭಾಣ್ ಕರುಂಕ್ ಸಕ್ತಾತ್, ಉರ್ಲ್ಲೆ ಖರ್ಶೆತಾತ್. ತೆ ಮಾತ್ ಅಪ್ಲಿಂ ಝಿಲ್ಪಾಂ ತಲ್ವಾರಿಂಚ್ಯೊ ಧೊಮ್ಶೀ ಜಾವ್ನ್ ದೆಖೊಂಕ್ ಸಕ್ತಾತ್, ಬಾಕಿಚೆ ಬಿಕ್ಕಾತಾತ್. ತೆ ಮಾತ್ ಕರ್ಯೆಕ್ ಭಾವನಾ ಧುಂವ್ರೆಚೆಂ ಧಾಂಪಣ್ ಯಾ ಜಳ್ತೆಂ ಆಗ್ಟೆಂ ಕರೂಂಕ್ ಸಕ್ತಾತ್, ಉರ್ಲ್ಲೆ ಜಳ್ಚಿಂ ಕೊಂಡಾಂಯ್ ಪಾಲ್ವಯ್ತಾತ್."
ಕವಿತಾಪಾಠ್ ಕಾಮಾಸಾಳಾಂತ್ ಕೊಣಾಕೀ ಕಾಂಯ್ ಬರೆಂಪಣ್ ಆಸಾ?
ಲಿಸಾಂವ್ ಜಾವ್ನ್ ’ಏಕ್ ಕವಿತಾ’ ಘೆವ್ನ್, ತಾಚೆರ್ ಸವಿಸ್ತಾರ್ ರಿತಿನ್ ಎಕಾಮೆಕಾಚೆ ವಿಚಾರ್ ಬದ್ಲುನ್, ಸಂವಾದ್ ತರ್ಕ್ ಮಾಂಡುನ್ ಉಪ್ರಾಂತ್ ಎಕಾ ನಮ್ಯಾರ್ಲೆಲ್ಯಾ ದಿಸಾ ಆಪಾಪ್ಲೆ ಪ್ರಭಂಧ್ ಪ್ರಸ್ತುತ್ ಕರ್ಚೆಮುಖಾಂತ್ರ್ ತ್ಯಾ ಲಿಸಾಂವಾಚೆರ್ ಎಕಾಮೆಕಾ ವೊಪುನ್ ಘೆತ್ಲ್ಲ್ಯಾ ಅರ್ಥಾಚೆರ್ ಅರ್ಸೊ ಧರ್ಚೊ, ಆನಿ ಹ್ಯಾ ಮುಖಾಂತ್ರ್ ಆಪ್ಲ್ಯಾ ಚಿಂತ್ಪಾಚಿ ವ್ಹಾಡಾವಳ್, ಅಪ್ಣಾನ್ ಗುಮಾನ್ ಕರ್ಚಾ ಸಂಗ್ತ್ಯಾಂಚೆರ್ ಎಕೊಡೊ ನಿಯಾಳ್ ಖಂಡಿತ್ ಜಾವ್ನ್ ಎಕಾ ವಾಚ್ಪ್ಯಾಕ್ ಬುಧ್ವಂತ್ ಜಾಂವ್ಕ್ ಕುಮೊಕ್ ಕರ್ತಾ. ಬರವ್ಪ್ಯಾಕ್ ಅಪ್ಲ್ಯಾ ಬರ್ಪಾಂಚೆರ್ ವ್ಹಾಡಾವಳ್ ಕರುಂಕ್ ಕಾರಣ್ ಜಾತಾ.
ಹಾಂತುಂ ಕಾಂಯ್ ಪೊಟ್ಟು ಕಾಣ್ಯೊ ನಾಂತ್, ಫಕತ್ ವಿಚಾರ್ ಆನಿ ವಿಮರ್ಶೆ ಮ್ಹಣ್ತಾನಾ ಜಾಂಬಾಯೊ ಯೆತಲ್ಯೊಚ್. ದೆಕುನ್ ಹೆಂ ಕಾಮ್ ಭೋವ್ ಕಶ್ಟಾಂಚೆಂ. ದೆಕುನ್ ಎದೊಳ್ ಅಸಲಿಂ ಕಾಮಾಂ ಖಂಯ್ಸರ್ಯ್ ಜಾಲ್ಲಿಂ ನಾಂತ್, ಜಾಲ್ಲಿಂ ತರ್ಯ್ ಏಕ್ ದೋನ್ ಆನಿ ಉಪ್ರಾಂತ್ ಕೆಲ್ಲ್ಯಾಂಕ್ ಆನಿ ಖೆಲ್ಲ್ಯಾಂಕ್ ಸಾಸ್ಣಾಚೊ ವಿಶೆವ್ - ಆಸೊಂ!. ಆನಿ ಕರ್ಚಿ ಗರ್ಜ್ಯ್ ಕೊಣಾಕ್ಯ್ ದಿಸ್ಲ್ಲಿನಾ. ಕರ್ನ್ ಕೊಣಾಕ್ ಕಸಲೊ ಫಾಯ್ದೊ ಜಾಯ್ತ್ ಮ್ಹಳ್ಳೆಂಯ್ ಕೊಣೆಂಯ್ ಚಿಂತ್ಲ್ಲೆಂ ನೆಣಾಂ. ದೀಸ್ಪೊಡ್ತ್ಯಾ ಗ್ರಾಸಾಖಾತಿರ್ ಸಾತ್ ದರ್ಯೆ ಉತ್ರೊನ್ ಆಯಿಲ್ಲ್ಯಾ ಚಾರ್ ಬೊಡಾಂಕ್ ಹಿ ಉಮೆದ್ ಕಶಿಗೀ ಝಳ್ಕಾಲಿ ಮ್ಹಣ್ತಾನಾ ಸುರ್ವಾತ್ ಜಾಲಿಚ್.
ಪುಣ್ ಹಿಂ ಚಾರ್ ಬೊಡಾಂ ಕಾಂಯ್ ಸಮಾಜೆಂತ್ಲೆ ಮುಂಡಾಸ್ಗಾರ್ ನ್ಹಯ್, ಖಂಚಾಯ್ ಸಂಚಾಲನಾಚೆ ಜಾಂವ್, ಪರಿಶದೆಚೆ ಜಾಂವ್, ಅಕಾಡೆಮಿಚೆ ಜಾಂವ್, ಸಾಹಿತಿಕ್ ಮಂಡಳಿಚೆ ಜಾಂವ್ ಬಿಲ್ಕುಲ್ ನ್ಹಯ್. ಚಡ್ ಕಿತ್ಯಾಕ್ ಹಾಂತ್ಲೆಂ ನೊವೊದ್ ಠಕ್ಕೆ ’ಕವಿ’ಚ್ ನ್ಹಯ್. ತರ್ ಕಿತೆಂ ಜಾಲೆಂ? ಟಿವಿಚೆರ್ ಕ್ರಿಕೆಟ್ ಪಳೆವ್ನ್ ಖೆಳ್ಗಾಡ್ಯಾಂಚಾ ಖೆಳಾವಿಶಿಂ ಸಂವಾದ್ ಚಲಂವ್ಚೆಂ ಆಮಿ ಖಂಯ್ಚಿಂ ಟೆಸ್ಟ್ ಕ್ರಿಕೆಟರಾಂ? ವಿಂಬಲ್ಡನ್ನಾ ವಿಶ್ಯಾಂತ್ ಸಂವಾದ್ ಚಲಂವ್ಚಿಂ ಆಮಿ ಕಿತ್ಲಿಂ ಟೆನ್ನಿಸ್ ರ್ಯಾಕೆಟ್ ಹಾತಿಂ ಧರ್ಲಾಂ ವಾ ಪಳೆಲಾಂ?
"ಕಾಮ್ ನಾತ್ಲ್ಲೊ ಸುತಾರಿ ಅಪ್ಲ್ಯಾ ಬುರ್ಗ್ಯಾಚೆಚ್ ಕುಲೆ
ತಾಸ್ತಾಲೊ ಖೈಂ" ಹೆಂ ಉತ್ರಾರ್ ಭೋವ್ಶಾ ಉಣ್ಯಾ ಭಾವಾಡ್ತಾಚಾ ಜಾಯ್ತ್ಯಾ ಆಮ್ಚಾ ಥೊಡ್ಯಾಂನಿ ಉಚಾರ್ಲಾಂ ಜಾವ್ಯೆತ್. ಆದಿಂ ಮಾಗಾ ರಸ್ತ್ಯಾದೆದೆಂನಿ ಮಾಂಕ್ಡಾನಾಚ್ ಸವೆಂ ಡೊಂಬರಾಟ ಚಲ್ತಾಲೊ. ಕೊಣ್ ಎಕ್ಲೊ/ಎಕ್ಲೆಂ ಬಡಯ್ತಾ ಕೋಣ್ ಎಕ್ಲೊ/ಎಕ್ಲೆಂ ಫುಂಕ್ತಾ, ಕೊಣ್ ಎಕ್ಲೊ/ಎಕ್ಲಿ ಬಸ್ವಾಕ್ ಮುಖಾರ್ ಹಾಡ್ನ್ ಯೇವ್ನ್ ಸವಾಲಾಂ ವಿಚಾರ್ತಾ ಆನಿ ಬಸ್ವಾ ’ಹೌದಾ ಬಸವಾ’ ಮ್ಹಣ್ತಾನಾ ’ಹೌದು’ ಮ್ಹಣ್ ಮಂಡೊ ಹಾಲಯ್ತಾ, ’ಅಲ್ವಾ ಬಸವಾ’ ಮ್ಹಣ್ತಾನಾ ’ಅಲ್ಲಾ’ ಮ್ಹಳ್ಳೆಪರಿಂ ಮಂಡೊ ಹಾಲಯ್ತಾನಾ ಭಂವ್ತೊಣಿಚೊ ಲೋಕ್ ತಾಳಿಯೊ ಪೆಟ್ತಾಲೊ. ಆತಾಂ ಜಿಯೆಂವ್ಚಾ ಮನ್ಶಾಂಕ್ ಪಳೆತೆಲಿ ಗತ್ ನಾತ್ಲ್ಯಾರೀ ಜಾನ್ವಾರಾಂಚಾ ಹಕ್ಕಾಂಕ್ ಝುಜ್ಚಿಂ ಧಾರಾಳ್ ಮಾಪಾನ್ ಆಸ್ಚೆವರ್ವಿಂ ಅಸಲಿಂ ಡೊಂಬರಾಟಾ ಸಂಪೊನ್ ಆಯ್ಲ್ಯಾಂತ್ - ಆಸೊಂ.
ಕಾಂಯ್ ಹೆಂ ಕವಿತಾಪಾಠ್ಯ್ ಹೆಚ್ಚ್ ವರ್ಗಾಚೆಂ ಡೊಂಬರಾಟ?
ಕೊಣಾಕ್ ಕಿತೆಂ ದೆಕುನ್ ಆಮ್ಕಾಂಯ್ ಕಿತೆಂ? ಆಮ್ಚೊ ಇರಾದೊ ಆನಿ ಶೆವೊಟ್ ಹ್ಯಾ ಕವಿತಾಪಾಠಾಕ್ ಅಮರ್ ಕರ್ಚೊ ನ್ಹಯ್, ಬಗಾರ್ ಹ್ಯಾ ಕವಿತಾಪಾಠ್ಧ್ವಾರಿಂ ಆಮ್ಚಿ ಎಕಾಮೆಕಾಚಿ ವ್ಹಾಡಾವಳ್. ಆನಿ ಭೋವ್ಶಾ ಕೊಂಕ್ಣೆಂತ್ ಯಾ ಹೆರ್ ಖಂಚಾಯ್ ಭಾಸಾಂನಿ ಜರ್ ಅಸಲೊ ಸಂವಾದ್ ಸರಾಗ್ ರಿತಿನ್ ಚಲ್ತಾ, ತೆದ್ನಾಂ ಮಾತ್ರ್ ಥಂಯ್ಸರ್ ವ್ಹಾಡಾವಳ್ ಜಾಂವ್ಕ್ ಸಕ್ತಾ.
ಕವಿತಾಚೆರ್ ಸಾಮೂಹಿಕ್ ಅಧ್ಯಯನಾಚೊ ಹೊ ಪಯ್ಲೊ ಬೂಕ್. ಸವಾಲ್ ಹಾಂಗಾ ಹೆಂ ಪಯ್ಲೆ ಪಾವ್ಟಿಂಗೀ ವ ನ್ಹಯ್ಗೀ ಮ್ಹಳ್ಳೆಂ ನ್ಹಯ್, ತರ್ಯ್ ಎದೊಳ್ ಎಕ್ಲ್ಯಾ ದೊಗಾಂನಿ ಕವಿತಾಚೆರ್ ಆಪಾಪ್ಲಿಂ ಅಧ್ಯಯನಾಂ ಪರ್ಗಟ್ಲ್ಯಾಂತ್ ಜಾಂವ್ಕ್ ಪುರೊ ಪುಣ್ ಎಕ್ಟಾಂಯ್ ಜಾವ್ನ್ ಅಧ್ಯಯನ್ ಕರುನ್ ಪ್ರಸ್ತುತ್ ಕೆಲ್ಲಿಂ ಲೇಖನಾಂ ಎಕಾ ಬುಕಾರುಪಾರ್ ಪರ್ಗಟ್ಚೆಂ ಹೆಂ ಪಯ್ಲೆ ಪಾವ್ಟಿಂ ಮ್ಹಳ್ಳೆಂ ಮ್ಹಜೆಂ ಚಿಂತಾಪ್.
ಆತಾಂ ತುಮ್ಚೆಪಯ್ಕಿ ಕೊಣಾಯ್ಕ್ಯ್ ಕಾಂಯ್ ಹಿಂ ಸಕಯ್ಲಿಂ ಸವಾಲಾಂ ಧೊಸ್ತಾತ್ ತರ್ ತಾಂಚೆರ್ ಮ್ಹಜಿ ಜಾಪ್ಯ್ ಅಶಿ ಆಸಾ;
ಎಕಾ ಕವಿತೆಕ್ ಲಿಸಾಂವ್ ಜಾವ್ನ್ ಘೆಂವ್ನ್ ತಾಚೆರ್ ಸಮೀಕ್ಶಾ/ಸಂವಾದ್ ಚಲಯ್ಲ್ಯಾರ್ ಕಿತೆಂ ಜಾತಾ?
ಬದ್ಲಾವಣ್ ಹಾಡ್ಚೆಂ ಯಾ ಸೊಡ್ಚೆಂ ತ್ಯಾ ತ್ಯಾ ಬರವ್ಪ್ಯಾಚಾ ಮನೋಗತೆಚೆರ್ ಹೊಂದ್ವೊನ್ ಆಸಾ ತರ್ಯ್ ಆಮ್ಚಾ ಅಧ್ಯಯನಾಚೊ ಇರಾದೊ ತೊ ನ್ಹಯ್, ಬಗಾರ್ ತ್ಯಾ ಲಿಸಾಂವಾ ಥಾವ್ನ್ ಆಮ್ಕಾಂ ಶಿಕೊಂಕ್ ಆಸ್ಯೆತ್ ಜಾಲ್ಲ್ಯೊ ಸಂಗ್ತ್ಯೊ, ಶಿಕ್ಯೆತ್ ಜಾಲ್ಲಿಂ ಲಿಸಾಂವಾ, ಶಿಕ್ಯೆತ್ ಜಾಲ್ಲಿಂ ಸತಾಂ ಮಾತ್ರ್ ಆಮಿ ಘೆತಾಂವ್. ಅಶೆಂ ಮ್ಹಣೊನ್ ’ಧರಣಿ ಮಂಡಳ ಮಧ್ಯದೊಳಗೆ’ ಕವಿತೆಚಾ ವಾಗಾನ್ ಕೆಲ್ಲಿ ಚೂಕ್ ಮ್ಹಣ್ ಆಮಿ ಆಮ್ಚೆ ತಾಳೆ ಪಿಂಜುನ್ ಬೊಬಾಟ್ಲ್ಯಾರ್ ಕಾಂಯ್ ತಾಂತ್ಲೊ ವಾಗ್ ಬದಲ್ತಾವೆ? ಹೆಂ ಅಣ್ವಿಂ ಚಿಂತಾಪ್ಯ್ ಆಮ್ಚಾ ಖಟ್ಟ್ಯಾಂತ್ ಬಿಲ್ಕುಲ್ ನಾ.
ಹಾಂತುಂ ಲಿಸಾಂವಾ ಜಾವ್ನ್ ಘೆತ್ಲ್ಲ್ಯಾ ಕವಿತಾಂಚೆ ಕವಿ ಅಮರ್ಗಿ?
ನಾ! - ಬಿಲ್ಕುಲ್ ನಾ. ಹಾಂತುಂ ಲಿಸಾಂವಾಂ ಜಾವ್ನ್ ಘೆತ್ಲ್ಲಿಂ ಕವಿತಾ ತ್ಯಾ ಕವಿಚೆಂ ಶ್ರೇಷ್ಟ್ ಕವಿತಾ ಮ್ಹಣ್ ಬಿಲ್ಕುಲ್ ಆಮಿ ಅಧ್ಯಯನಾಕ್ ಘೆಂವ್ಕ್ ನಾ. ಬಗಾರ್ ಎಕೆಕಾ ಪ್ರಕಾರಾಚಾ, ಎಕೆಕಾ ಚಿಂತ್ಪಾಚಾ, ಎಕೆಕಾ ಲಿಸಾಂವಾಕ್ ಆಮಿ ಎಕೆಕಾ ಅಧ್ಯಯನಾಕ್ ಘೆತ್ಲಾಂ ಶಿವಾಯ್ ಹೆರ್ ಕಸಲ್ಯಾಚ್ ಕಾರಾಣಾಂಕ್ ಲಾಗೊನ್ ನ್ಹಯ್.
ಎಚ್ಚೆಮ್ ಅಪ್ಲ್ಯಾ ಪ್ರಸ್ತಾವನಾಂತ್ ಹಿಂ ಉತ್ರಾಂ ಸುಡಾಳ್ ರಿತಿನ್ ಅಶಿಂ ಉಚಾರ್ತಾ;
"ಕಾವ್ಯಾಚಾ ಅದ್ಯಯನಾ ಸಾಂಗಾತಾ ಹ್ಯಾ ಮಾಂತಾಖಾಲ್ - ಬೂಕ್ ಸಮೀಕ್ಶಾ, ಕವಿ ಗೊಶ್ಟಿಯೀ ಚಲ್ತಾತ್. ಕೊಂಕ್ಣಿಂ ಕಾವ್ಯಾಂತ್ ಹಿ ಏಕ್ ಮಹತ್ವಾಚಿ ವಾಡಾವಳ್. ಕಾರಣ್
ಕವಿನ್ ಬರಯಿಲ್ಲೆಂ ಬೂಕಾರ್ ಛಾಪೊನ್ ಉರ್ಲ್ಯಾರ್, ಇಂಟರ್ನೆಟಾರ್ ಆಯ್ಲ್ಯಾರ್ ಮಾತ್ ಪಾವಾನಾ. ಕಾವ್ಯಾಚೊ "ಸಂವಹನ್" ಜಾಯ್ಜೆ. ಸಂತೊಸಾಚಿ ಗಜಾಲ್ ಮ್ಹಳ್ಯಾರ್, ಕೊಂಕ್ಣಿಂ ಕಾವ್ಯಾ ಚರಿತ್ರೆಂತ್ ಎದೊಳ್ ಬೋವ್ಚ್ಚ್ ಅಪ್ರೂಬ್ಶೆಂ ಚಲೊನ್ ಆಸ್ಚೆಂ ಕಾವ್ಯಾ ಸಂವಹನಾಚೆಂ ಕಾಮ್ ಕರ್ಚೆಂ ಮಿಸಾಂವ್ "ಕವಿತಾಪಾಠ್" ಸಾತ್ ದರ್ಯಾ ಭಾಯ್ರ್ ಚಲಯ್ತಾ!
ಹ್ಯಾ ಪಯ್ಲ್ಯಾ ಬೂಕಾಂತ್ ನಿವಡ್ಲೆಲ್ಯಾ ತರ್ನ್ಯಾ ತಶೆಂ ಮಾಲ್ಘಡ್ಯಾ ಕವಿಂಚ್ಯೊ ಕವಿತಾ, ಅಬಿಪ್ರಾಯೊ ಆನಿ ಕವಿಚಿಂ ಬೊಗ್ಣಾಂ ಆಸಾತ್. ಥಂಯ್ ಹಾಂಗಾ ಥೊಡ್ಯೊ ವಾಚ್ಪಾಚೊ ಚೂಕಿ ಆನಿ ಪ್ರಸ್ತುತೆಂತ್ಲಿ ಘುಸ್ಪಡ್ ಸೊಡ್ಲ್ಯಾರ್, ಹೆ ಕವಿತಾ ವರ್ಗ್ ಆಪ್ಲೇಸ್ತಕಿಂ ಪರಿಪೂರ್ಣ್ ಆಸ್ತಾನಾ, ಪರ್ತ್ಯಾನ್ ತಾಚೆರ್ ಖೊಡ್ ಕಾವ್ಯಾಚಾ ರಸ್ಗ್ರಾಯ್ಕಾಚಾ ರುಚಿಪಾನಾಕ್ ಅಡ್ಕಳ್ ಜಾಯ್ತ್.
ದೆಕುನ್ ಹೆ "ಪಾಠ್" ಆಸ್ಚೆ ಆಸಾ ತಸೆ ರಸ್ಗ್ರಾಯ್ಕಾಂಚಾ ತಾಬ್ಯಾಂತ್ ದಿಂವ್ಚೆ ಬರೆ. ಹೆ "ಪಾಠ್" ಸದ್ದ್ಯಾಕ್ ಚಲ್ಚೊ ಖಾಡಿಯೆಚೊ ಗಾಂವ್ ಆನಿ ಸಂಸಾರ್ಭರ್ ಶಿಂಪಡ್ಲ್ಯೆಲ್ಯಾ ಕೊಂಕ್ಣಿಂ ಕಾವ್ಯಾಚಾ ರಸ್ಗ್ರಾಯ್ಕಾಂಕ್ ಸಾಂಗಾತಾ ಯೇಂವ್ಕ್ ಆಸ್ಚೆ ಅಡ್ಕಳಿ ಮನಿಂ ಘೆತ್ಲ್ಯಾರ್, ಹಾಂತ್ಲ್ಯೊ ಕಾಂಯ್ ಚೂಕಿ ಸುಲಬಾಯೇನ್ ಕುಶಿಕ್ ದವರ್ಯೆತ್ ತಸಲೆ. ಕವಿತಾ ವಾಚುಂಕ್ ಆನಿ ತಾಚೆ ಅಲವ್ಕಿಕ್ ಸುಖ್ ಭೊಗುಂಕ್ ವಿದ್ವಾನ್ಚ್ಚ್ ಜಾಯ್ಜೆ ಮ್ಹಣ್ ನಾ. ಕವಿತಾಯೀ ಜೆನ್ನಾ ಚಾರ್ ಚೊವ್ಗಾಂ ಮಧೆಂ ಪಾವ್ತಾ ಆನಿ ರಸ್ಗ್ರಾಯ್ಕ್ ತಿಕಾ ಭೊಗ್ತಾ - ತೀ ಕವೀಕ್ ಸರ್ಗಿಂಚೆಂ ದಾರ್ ದಾಕಯ್ತಾ."
ಮೆಲ್ವಿನ್ ರೊಡ್ರಿಗಸಾಚಾ ಉತ್ರಾಂನಿ ಖೊಡ್ ಮ್ಹಳ್ಯಾರ್;
"ವಿಮರ್ಸೊ, ಖೊಡ್, ವಿಸ್ಕಳಾವ್ಣಿ -ಹೆ ಪುರಾಯ್ ಸಬ್ದ್ ಚಡುಣೆ ಏಕ್ಚ್ ಅರ್ಥ್ ದಿಂವ್ಚ್ಯಾ ಕುಟ್ಮಾಚೆ. ಹ್ಯಾ ಸಬ್ದಾಂಚ್ಯಾ ಅರ್ಥಾಂ ಮಧೆಂ ವೋಂಯ್ ಘಾಲುಂಕ್ ಯಾ ಗೀಟ್ ವೊಡುಂಕ್ ಕಷ್ಟ್. ಹ್ಯಾ ಸಗ್ಳ್ಯಾ ಸಬ್ದಾಂಚೊ ಮುಳಾವೊ ಅರ್ಥ್ಚ್ ’ಸಮ್ಜೊನ್ ಘೆಂವ್ಚೊ’ ಮ್ಹಣ್ ಜಾತಾ. ಹ್ಯಾ ಸಮ್ಜೊನ್ ಘೆಂವ್ಚೆ ಪ್ರಕ್ರಿಯೆವರ್ವಿಂ ಗೊಂದೊಳಾಂತ್ ಸಾಂಪ್ಡಲ್ಲ್ಯಾ ವಾಚ್ಪ್ಯಾಕ್ ಆಪ್ಣೆಂ ವಾಚ್ಲ್ಲೆಂ ಸಾಹಿತ್ಯ್ ಸಮ್ಜೊನ್ ಘೆಂವ್ಕ್ ಸಲೀಸ್ ಜಾತಾ. ತಿತ್ಲೆಂ ಮಾತ್ರ್ ನ್ಹಯ್ ತಸಲಿ ಏಕ್ ಸಮ್ಜಣಿ ಸಾಹಿತ್ಯಾಥಂಯ್ ವಾಚ್ಪ್ಯಾಚೆ ಪ್ರತಿಕ್ರಿಯೆಚೆ ಚಾಲಿಕ್ ನವಿಚ್ ದಿಶಾ ದಿತಾ. ಹ್ಯಾವರ್ವಿಂ ಏಕ್ ಬುಧ್ವಂತ್ ವಿಶ್ಲೇಶಣ್ ಕರ್ಚಿ ತಾಂಕ್ ಸಾದೊ ವಾಚ್ಪಿ ಜೊಡುನ್ ಘೆತಾ.
ಉತ್ತೀಮ್ ಕವಿ ಆಮ್ಕಾಂ ಲಾಭಾಜೆ ಜಾಲ್ಯಾರ್, ಆಮ್ಚೆಲಾಗಿಂ ಉತ್ತೀಮ್ ತಶೆಂ ಬುಧ್ವಂತ್ ವಾಚ್ಪಿ ಆಸಜೆ ಪಡ್ತಾತ್. ಎಕೆ ಭಾಶೆಂತ್ ಚಲ್ಚಿ ವಿಮರ್ಶಾಚಿ ಪ್ರಕ್ರಿಯಾಚ್ ತೆ ಭಾಶೆಂತ್ ಆಸ್ಯೆತ್ ಜಾಲ್ಲ್ಯಾ ಬುಧ್ವಂತ್ ವಾಚ್ಪ್ಯಾಂವಿಶಿಂ ಸಾಕ್ಸ್ ದಿತಾ. ಸುಮಾರ್ ವೀಸ್ ವರ್ಸಾಂ ಆದಿಂ ಹಾಂವೆಂ ಚಲಯಿಲ್ಲ್ಯಾ ಎಕಾ ಸೊಧಾ ಪ್ರಕಾರ್ ಕಾನಡಿ ಲಿಪಿಂತ್ ಪರ್ಗಟ್ ಜಾಲ್ಲ್ಯಾ ಕೊಂಕಣಿ ಕವಿತಾ ಪುಸ್ತಕಾಂಚೊ ಸಂಕೊ ಸಾತಾಂಕ್ ಮಿಕ್ವನಾತ್ಲ್ಲೊ. ಪುಣ್ ಆತಾಂ ಫಕತ್ ವೀಸ್ ವರ್ಸಾಂನಿ ಹೊ ಸಂಕೊ ಶೆಂಭರಾಂಕ್ ತೆಂಕ್ಲಾ. ಹರ್ಯೆಕ್ ಕವಿ ವಾಚ್ಪ್ಯಾಲಾಗಿಂ ಲಾಗ್ಶಿಲೊ ಸಂಬಂಧ್ ಜೊಡುಂಕ್ ಪ್ರೇತನ್ ಕರುನ್ ಆಸಾ. ಕವಿ ಚಡ್ಲ್ಲೆಬರಿ ವೆವೆಗ್ಳ್ಯಾ ಅಭಿವೆಕ್ತಿಚಿಂ ರುಪಾಂ ಬದ್ಲೊನ್ ವೆತಲಿಂ ಆನಿ ವಾಚ್ತಲ್ಯಾಕ್ ತ್ಯಾ ರುಪಾಂನಿ ಆಪ್ಣಾಚ್ಯಾ ಅಸ್ಥಿತ್ವಾಚೊ ಸೊಧ್ ಚಲಂವ್ಕ್ ಸಲೀಸ್ ಜಾತಲೆಂ. ಅಸಲೆ ಪ್ರಕ್ರಿಯೆಚೆ ಚಾಲಿಕ್ ಕಿತ್ಲಿ ಸರಾಯ್ ಲಾಬ್ತಲಿ, ತಿತ್ಲೆ ಆಮ್ಚೆ ವಾಚ್ಪಿ ಚಡ್ತಲೆ."
ಹೇಮಾಚಾರ್ಯ ಅಸಲ್ಯಾ ಕವಿತಾಚಾ ಕಾಮಾಸಾಳಾಂವಿಶಿಂ ಕಿತೆಂ ಸಾಂಗ್ತಾ?
"ಆತಾಂ ಕೊಂಕ್ಣಿ ಸಾಹಿತ್ಯಾಚಾ ಸಂಸಾರಾಚೆರ್ ದೀಷ್ಟ್ ಖಂಚವ್ಯಾಂ. ಹಾಂಗಾಸರ್ಯೀ ವರ್ಸಾಂ ಆಧಿಂ ಥಾವ್ನ್ ಮಾಗ್ಣಿಂ ಆಮಿ ಆಯ್ಕಾಲ್ಯಾಂತ್. ಕೊಂಕ್ಣೆಕ್ ಬರೊ ಪುಡಾರ್ ದೀ ದೆವಾ, ಹಿ ಭಾಸ್ ಜಿವಿ ಉರಯ್ ದೆವಾ, ಅನಿ ತಿ ಉಲಯ್ತೆಲ್ಯಾಂಕ್ ಜಿವಂತ್ ದವರ್ ದೆವಾ (ಕಿತ್ಯಾಕ್ ನವಿಂ ಜಲ್ಮೊನ್ ಯೆಂವ್ಚಿಂ ಕೊಂಕ್ಣೆಂತ್ ಉಲಯ್ತಿತ್ ಮ್ಹಳ್ಳಿ ಹಮಿದಾರಿ ನಾ!), ಕೊಂಕ್ಣೆಕ್ ಸಂವಿದಾನಾಚೆ ಆಟ್ವೆ ವೊಳೆರಿಂತ್ ಸ್ಥಾನ್ ಮೆಳಯ್ ದೆವಾ. (ಆಟ್ವೆ ವೊಳೆರಿಂತ್ ಕೊಂಕ್ಣಿ
ರಿಗೊನ್ ತೆರಾ ವರ್ಸಾಂ ಸಂಪ್ಲಿಂ, ಥೊಡೆ ಅಜೂನ್ ಮಾಗ್ತಾತ್!)
ಆಸ್ಕತ್ ಸೈಂಭಾಚೆ ಆಮಿ, ಪಕತ್ ಮಾಗೊನ್ ಖಾಂವ್ಚ್ಯಾಂತ್ ವಿಶ್ವಾಸ್ ದವರ್ತಾತ್, ಕರ್ನೆಂತ್ ನಹಿಂ. ಯಥಾ ಕರ್ನಿ ತಥಾ ಭರ್ನಿ.
ಕೊಂಕ್ಣಿ ಜಿವಿ ದವರುಂಕ್ ದೆವಾಲಾಗಿಂ ಮಾತ್ರ್ ಮಾಗ್ಲ್ಯಾರ್ ಪಾವಾನಾ, ತಿ ಜಿವಿ ದವರುಂಕ್ ಅಮಿ ಕಿತೆಂ ಕರ್ಯೆತ್ ತೆಂ ಜಿಂತುಂಕ್ ಜಾಯ್. ಹಿ ಭಾಸ್ ಸ್ವತಾಚೆ ಜಿಬೆರ್ ಪಯ್ಲಿ ಘೊಳಂವ್ಕ್ ಜಾಯ್, ಪತ್ರಾಂಚೆರ್ ಛಾಪುನ್ ಆಯ್ಲೆಲಿ ರೊಕ್ಡೆ ದೀವ್ನ್ ವಾಚುಂಕ್ ಜಾಯ್, ದುಸ್ರ್ಯಾಂನಿ ವಾಚಿಸಾರ್ಕೆಂ ವತ್ತಡ್ ಘಾಲುಂಕ್ ಜಾಯ್ (ತಾಂಕಾ ಪುಂಕ್ಯಾಕ್ ವಾಚುಂಕ್ ದೀವ್ನ್ ನಹಿಂ!)
ಅನಿ ಆತಾಂ ಪುಸ್ತಕಾಂಚಿ ಸಮೀಕ್ಶಾ ವಾ ಖೊಡ್ ಕಾಡ್ಚಿ ಕಾಮಾಸಾಳಾಂ ಮಾಂಡುನ್ ಹಾಡ್ಚಿಂ ತಾಂಚಿ ಯೆವ್ಜಣಿ ಆನಿ ತಿ ಖೊಡ್ ಪ್ರಕಟ್ ಕರ್ಚೆಂ ಸಾಹಸ್ ಆಮಿ ಹ್ಯಾ ಅದೀ ಕೊಂಕ್ಣಿ ಸಾಹಿತ್ಯಾಚಾ ಸಂಸಾರಾಂತ್ ದೆಕ್ಲೆಲೆಂ ಆನಿ ಆಯ್ಕಾಲ್ಲೆಂ ಆಸಾ ತರ್ ತೆಂ ಭೋವ್ ಉಣೆಂ. ಮಾನಾದಿಕ್ ವಿಲ್ಲಿ ದೆ’ಸೆಲ್ವಾಂನಿ, ಚಾ.ಫ್ರಾ. ಬಾಬಾನ್, ಮೆಲ್ವಿನ್ ರೊಡ್ರಿಗಸ್ ತಸಲ್ಯಾ ಕೊಂಕ್ಣಿ ಸಾಹಸಿಂನಿ ತ್ಯಾ ದಿಶೆನ್ ಹಾತಿಂ ಘೆತ್ಲೊಲೊ ವಾವ್ರ್ ಸೊಡ್ಲ್ಯಾರ್ ಖಂಚ್ಯಾಯ್ ಮಂಡಳೆನ್, ಪರಿಶದೆನ್ ಹ್ಯಾ ದಿಶೆನ್ ಚಿಂತ್ಲೆಲೆಂ ನಾ.
ಬುಕಾಚಿ ವಳೊಕ್ ಕರ್ಚಾಧಿಂ ಹ್ಯಾ ಬುಕಾಂಚ್ ಆಸ್ಚಾ ಸಾಹಿತ್ಯಾಚಿ ಗರ್ಜ್ ಕಸಲಿ ಮ್ಹಳ್ಳೆಂ ಸಮ್ಜಂವ್ಚೆಂ ಭೋವ್ ಗರ್ಜೆಚೆಂ ದೆಕುನ್ ವಯ್ಲೆ ವೆವೆಗ್ಳೆ ವಿಚಾರ್ ಆಮಿ ಎಕಾಚ್ ಪಾನಾಚೆರ್ ತೆ ವಿಣ್ಲೆ. ಆತಾಂ ಹಿ ಗರ್ಜ್ ಸಮ್ಜಾಲಿ ತರ್, ಕೊಂಕ್ಣಿ ಕವಿತಾಶೆತಾಂತ್ ಹ್ಯಾ ಬುಕಾಚೆ ಮೋಲ್ ಕಿತ್ಲೆಂ ಮ್ಹಳ್ಳೆಂ ಆಮಿಂಚ್ ತುಕುಂಕ್ ಸಕ್ತೆಲ್ಯಾಂವ್.
***************
ಆಮ್ಚಾ ಮಂಗ್ಳುರಿ ಕ್ರಿಸ್ತಾಂವ್ ಕೊಂಕ್ಣಿ ಸಾಹಿತ್ಯ್ ಆನಿ ಸಾಹಿತ್ಯ್ಕಾರಾಂವಿಶಿಂ ಕೊಂಕ್ಣೆಚೊ ಅಮರ್ ಕವಿ ಚಾ.ಫ್ರಾ ಅಶೆಂ ಲಿಖ್ತಾ;
ಕುಂಡೊ ಖಾಯರ್ಯಾಂಕ್ ಉಂಡೊ [ಚಾ.ಫ್ರಾ.ದೆ’ಕೋಸ್ತಾ]
ಬರಾಪ್ ಮ್ಹಣ್ ಸುರು ಕರ್ತಾನಾಂಚ್ ಹಾವೆಂ ಏಕ್ ಕವಿತಾ ಬರಯಿಲ್ಲಿ. ತಿ ಆತಾಂ ಖಂಯ್ ಆಸಾ ಮ್ಹಣ್ ನೆಣಾಂ, ಮಾಪಾಂನಿ ಖಂಯ್ಚೇಯ್ ಸಾಹಿತಿಕ್ ಭೋವ್ ಅಲ್ಪಿ ಆಸ್ಲ್ಲಿ ಜಾಲ್ಲ್ಯಾನ್ ಹಾಂವ್ ತಿ ಆತಾಂ ವಿಸ್ರೊನ್ ಗೆಲಾಂ.
ಪುಣ್ ಮತಿಚ್ಯಾ ಕೊನ್ಶಾಂನಿ ಆಶಾ ಆಸ್ತಾ , ಬರಯಿಲ್ಲೆಂ ಧಾ ಜಣಾಂನಿ ಪಸಂದ್ ಕರಿಜೆ ಆನಿ ತೊಂಡಾತೊಂಡಾಕ್ ಮೆಳ್ಲ್ಲ್ಯಾ ವೆಳಾರ್ ಶಾಭಾಸ್ ಮ್ಹಣಾಜೆ. ತಶೆಂ ಕಾಂಯ್ ಜಾಲೆಂನಾ. ಹಾವೆಂ ಜೆ ಕಿತೆಂ ಬರಯಿಲೆಂ ತೆಂ ಸಾಹಿತಿಕ್ ಭಾರಾಕ್ ಅಯೋಗ್ಯ್ ಅಸೊನ್, ಖಚ್ರ್ಯಾ ಸಮಾ ಆಸ್ತೆಲೆಂ ಮ್ಹಳ್ಳೆಂ ಚಿಂತಾಪ್ ಮ್ಹಜೆಂ ಜಾಲೆಂ. ತಶೆಂ ತೀ ಪಯ್ಲಿ ಕೃತಿ ಮತಿಪಡ್ದ್ಯಾವಯ್ಲಿ ಪುಸುನ್ ಗೆಲಿ.
1952 ಇಸ್ವೆಂತ್ ಬೊಂಬೊಯ್ಚಾ ರೆಡಿಯೊರ್ ಪಯ್ಲೆಚ್ ಪಾವ್ಟಿಂ ಕವಿತಾವಾಚನ್ ಮೆಳ್ಟಾನಾ ಮ್ಹಜಿ ಆಶಾ ವ್ಹಡ್ ಲಾಂಬಾಯೆರುಂದಾಯೆಚಿ ನಾತ್ಲ್ಲಿ. ದಕ್ಷೀಣ್ ಆಫ್ರಿಕಾಚ್ಯಾ ಎಕಾ ಮಂಗ್ಳುರಿ ಕ್ರಿಸ್ತಾಂವಾನ್ ಮ್ಹಜಿಂ ಕವನಾಂ ರೇಡಿಯೊಚೆರ್ ಆಯ್ಕೊನ್ ಮ್ಹಾಕಾ ಶಾಭಾಸ್ಕೆಚೆಂ ಪತ್ರ್ ಬರಯ್ಜೆ ಮ್ಹಳ್ಳಿ ಆಶಾ ಮತಿಂತ್ ಧರ್ಲ್ಲಿಚ್ ನಾ. ಬಗಾರ್ ಮ್ಹಾಕಾ ಮುಕಾಮುಕಿಂ ವಾಖಣ್ತೆಲ್ಯಾ ಮಿತ್ರಾಂನಿ ತರ್ ಆಯ್ಕಾಜೆ ಆನಿ ತಾಂಚೇರ್ ಬರೆಂ ವಾಯ್ಟ್ ಮ್ಹಣಾಜೆ ಮ್ಹಳ್ಳೆ ದುವಾಳೆ ಮಾತ್ ಆಸ್ಲ್ಲೆಚ್ಚ್.
ತೆದಾಳಾ ಹಾಂವ್ ’ಪಯ್ಣಾರಿ’ ಜಮ್ಯಾಂತ್ ಆಸ್ಲ್ಲೊಂ. ಮ್ಹಾಕಾ ರೇಡಿಯೊಚ್ಯಾ ಗೊಯಂಕಾರ್ ಅಧಿಕಾರ್ಯಾಂಲಾಗಿಂ ಶಿಫಾರಸ್ ಕೆಲ್ಲ್ಯಾ ಶ್ರೀ ಅಪೊಲಿನಾರಿಸ್ ಪಿಂತಾನ್ ತರ್ ಮ್ಹಜಿಂ ಕವನಾಂ ಆಯ್ಕಾಲಿನಾಂತ್. ಬಗಾರ್ ’ಪಯ್ಣಾರಿ’ಚ್ಯಾ ಸಂಪಾದಕಾನ್ ಧರುನ್ ಹೆರ್ ಕೊಣ್ಂಯ್ ಆಯ್ಕಲಿನಾಂತ್. ತ್ಯಾ ವೆಳಿಂ ರೇಡಿಯೊರ್ ವೊವ್ಯೊ ಮ್ಹಣೊನ್ ಏಕ್ ನಾಟಾಕ್ ಖೆಳೊನ್ ದೀಸ್ ಉಜ್ವಾಡ್ತಾನಾ ಕಾಮ್ ಕರ್ಚ್ಯಾ ಆಫಿಸಾಕ್ ಟೆಲಿಫೋನಾಂ ಯೆತಾಲಿಂ. ತ್ಯಾ ದಿಸಾ ಮ್ಹಜೊ ಅತ್ಮೊ ಪಿಂರ್ಗಲ್ಲೆಬರಿ ಕೆದಾಳಾಯ್ ಪಿಂರ್ಗಲ್ಲೊ ನಾ.
ತಾಂತ್ಲಿ ಏಕ್ ಕವಿತಾ, ’ಸಪ್ಣಾಂತ್ಲೆಂ ರಾಜ್’ ರೇಡಿಯೊಂತ್ಲ್ಯಾ ಶ್ರೀ ವಿಷ್ಣು ನಾಯಕಾನ್ ಆನಿ ಆಲ್ಫ್ರೆಡ್ ಬಾರ್ಬೋಜಾಕ್ ಇತ್ಲಿ ಪಸಂದ್ ಜಾಲಿಕೀ ತಾಣಿಂ ಮ್ಹಾಕಾ ಪರ್ತ್ಯಾಕ್ ಆಪಯ್ಲೊ. ತಿಕವಿತಾ ಕೊಂಕ್ಣಿ ಪತ್ರಾಂನಿ ಛಾಪೂನ್ ಕಾಡುಂಕ್ ಮ್ಹಜೆಲಾಗಿಂ ಪರ್ವಣ್ಗಿ ವಿಚಾರ್ಲಿ.
ಹಾಂವ್ ಥಟಾಕ್! ಎಕಾ ಕೊಂಕ್ಣಿ ಬರ್ಪ್ಯಾಚಿ ಕವಿತಾ ಪತ್ರಾಂಇ ಛಾಪೂಂಕ್
1952 ಇಸ್ವೆಂತ್ ಬೊಂಬೊಯ್ ಪರ್ವಣ್ಗಿ ಜಾಯ್ಜೆ ತರ್, ವಯ್ಜಾನ್ ದಿಲೆ ದೂದ್
ಆನಿ ಪಿಡೇಸ್ತ್ ಮಾಗ್ತಾಯ್ ದೂದ್ ಮ್ಹಳ್ಳೆಬರಿ ಜಾಲೆಂ. ಸ ಗೊಂಯ್ಕಾರಾಂನಿ ತಿ ಕವಿತಾ ಅಪಾಪ್ಲ್ಯಾ ಪತ್ರಾಂನಿ ಛಾಪ್ಲಿ. ’ಪಯ್ಣಾರಿ’ಂತ್ ಹಾಂವ್ ತ್ಯಾವೆಳಿಂ ಘಶ್ಟೊ ಕಾಡ್ಟಾನಾ ’ತಿ ಛಾಪ್’ ಮ್ಹಣ್ ಸಾಂಗ್ಚೆಂ ಹಕ್ಕಾಚೆಂ ಬದೀಕ್ ಮ್ಹಣ್ ಮ್ಹಜೆಂ ಚಿಂತಾಪ್.
ತರ್ಯ್ ತಿ ಛಾಪ್ಲಿ ನಾ. ಸಂಪಾದಕಾನ್ ಮ್ಹಳೆಂ; "ಆಮ್ಚೊ ಲೋಕ್ ಕವಿತಾ ಪಸಂದ್ ಕರಿನಾ. ತಿ ವಾಚಿನಾಸ್ತಾನಾ ಸೊಡ್ಟಲೊ".
ತಾಣೆಂ ಸಾಂಗ್ಲ್ಲೆಂ ಕಿತ್ಲೆಂ ಮ್ಹಾಕಾ ದುಕ್ಲ್ಯಾರ್ಯೀ ತೆಂ ಕಿತ್ಲೆಂ ಖರೆಂ ಮ್ಹಳ್ಳೆಂ ತೆದಾಳಾ ನೆಣಾ ಜಾಲೊಂ. ಲುವಿಸ್ ಮಸ್ಕರೇಞ್ ತವಳ್ ಜಿವಂತ್ ಆಸಾ. ಅಧೂನ್ಮಧೂನ್ ತಾಚೆಂ ನಾಂವ್ ವಿ.ಜೆ.ಪಿ ಸಲ್ಡಾಞಾಚ್ಯಾ ತೊಂಡಾರ್ ಆಯ್ಕಾಲ್ಲೆಂ, ಕಿತ್ಯಾಕ್ ಗಾಂವಾಂತ್ ತೊ ಸಲ್ಡಾಞಾಚೊ ಶೆಜಾರಿ. ಪುಣ್ ಎಕಾಯ್ ಕೊಂಕಣಿ ಬರ್ಪ್ಯಾಚ್ಯಾ ತೊಂಡಾಥಾವ್ನ್ ಹಾವೆಂ ಹ್ಯಾ ಮಹಾನ್ ಕವಿಚೆಂ ನಾಂವ್ ಆಯ್ಕಾಲ್ಲೆಂ ನಾ.
ಪುಣ್ ಏಕ್ ವಿಚಿತ್ರ್ ಗಜಾಲ್ ಘಡ್ಲಿ. ಹಾವೆಂ ತೆದಾಳಾ ಮ್ಹಜಿ ತರ್ನಿ ಜಡಾಯ್ ಗೊಂಯ್ಕಾರಾಂ ಮಧೆಂ ಫಾಂಕೂನ್ ಜಾಲ್ಲಿ. ತೆದಾಳಾ ಗೊಂಯಾಂಚ್ಯಾ ಚಳ್ವಳೆಚೊ ಬಾಪ್ ಶ್ರೀ ರವೀಂದ್ರ ಕೇಳೆಕಾರ್
ಬೊಂಬೊಂಯ್ತ್ ಮಣಿಭುವನಾಂತ್ ಆಸ್ತಾಲೊ. ವಾರ್ಧಾಂತ್ ’ಮೀರ್ಗ್’ ಮ್ಹಳ್ಳೆಂ ಕೊಂಕ್ಣಿ ಪತ್ರ್ ತೊ ಚಲಯ್ತಾಲೊ. ವಿಷ್ಣು ನಾಯ್ಕಾನ್ ತಾಕಾ ಮ್ಹಜಿ
ಕವಿತಾ, ’ಸಾದ್’ ಪತ್ರಾರ್ ಛಾಪೊನ್, ’ಮಿರ್ಗಾ’ಚೆರ್ ಛಾಪುಂಕ್ ಧಾಡ್ಲ್ಲಿ. ಪುಣ್ಯಾಂತ್ ಶ್ರೀ ಬಾಕಿಬಾಬ್ ಬೋರ್ಕರ್ ’ಪರ್ಜೆಚೊ ಆವಾಜ್’ ಪತ್ರ್
ಚಲಯ್ತಾಲೊ. ತಾಣೆಂಯ್ ತಿ ಛಾಪ್ಲ್ಲಿ ಆನಿ ಬೊಂಬೊಂಯ್ತ್ ರೇಡಿಯೊಚೆರ್ ಕವಿಸಮ್ಮೇಳಾಂತ್ ಮೆಳ್ಟಾನಾ ತಾಣೆ ಮ್ಹಜ್ಯಾ ಖಾಂದಾರ್ ಮ್ಹಾಲ್ಘಡೊ ಹಾತ್ ಚರಯಿಲ್ಲೊ. ಮನೋಹರ್ ಸರ್ದೇಸಾಯ್ ಮ್ಹಜೆ ಕವಿತೆಚೆರ್ ಪಿಸೊಚ್ ಜಾಲ್ಲೊ. ಪ್ರಶಂಸೆಚೊ ಏಕ್ ಕೊಪೊ ಮೆಳೊಂಕ್ ಇತ್ಲೊ ಭುಕೆತಾಲೊಂ - ಹಾಕಾ
ಗೊಂಯ್ಕಾರಾಥಾವ್ನ್ ಮುದೆಮುದೆ ಆನಿ ಲೊದ್ಲೊದೆ ಪ್ರಶಂಶಾ ಮೆಳ್ತಾನಾ ಕಸಲೆಂ ತರ್ಯೀ ಫುಗಾಸಾಂವ್ ಭೊಗ್ತಾಲೆಂ.
ತ್ಯಾ ದಿಸಾ ಸಾಂಜೆರ್ ಕೇಳೇಕಾರಾಖ್ ಮೆಳೊಂಕ್ ಅನ್ಯೇಕ್ ವಸ್ತಾದ್ ಆಯಿಲ್ಲೊ. ತೊ ಮಾಗಿರ್ ಮ್ಹಜೊ ಈಶ್ಟ್ ಜಾಲೊ. ಶ್ರೀ ಎವಾಗ್ರ್ ಜೋರ್ಜ್ ಫುಡ್ತುಗಲಾಚ್ಯಾ ಜಯ್ಲಾಂನಿ ಕುಸೊನ್ ಜಾಣಾ. ಸಾಹಿತ್ಯ್ ಆನಿ ಕವಿತಾ ತಾಕಾ ಕಿತ್ಲಿ ವರ್ಗತ್ ತೆಂ ತ್ಯಾವೆಳಿಂ ತರ್ ಹಾಂವ್ ನೆಣಾಂಚ್.
ರವೀಂದ್ರಬಾಬಾನ್ ಗೊವೆತಾಂತ್ಲಿ ಗುಲೊಬಿ ಫೊರಾಚೆ ಏಕ್ ಲ್ಹಾನ್ ಕಡ್ತಿಲ್ ಭಾಯ್ರ್ ಕಾಡ್ಲಿ.
"ಮ್ಹಾಕಾ ಹೆಂ ವಾಚುಂಕ್ ಯೇನಾ. ತುವೆಂ ಆಮ್ಕಾಂ ದೊಗಾಂಕ್ಯ್ ವಾಚೂನ್ ಸಾಂಗಾಜೆ" ಮ್ಹಣಾಲೊ ತೊ. ಆನಿ ಮಾಗಿರ್ ತಾಕಾ ಹೆರಾಂನಿ ದಿಲ್ಲಿ ಲುವಿಸ್ ಮಸ್ಕರೇಞಾಚಿ ತಾರೀಪ್ ಆಸಾತಶೆಂ ಸಾಂಗ್ತಾಲೊ. ಮ್ಹಾಕಾ ಲಜ್ಯ್ ದಿಸ್ಲಿ. ’ಅಬ್ರಾಂವ್ಚೆಂ ಯಜ್ನ್ದಾನ್’ ಕಾವ್ಯನಾಟಕಾಚಿ ಭೋವ್ ಪೊರ್ನಿ ಏಕ್ ಪ್ರತಿ ಮ್ಹಜ್ಯಾ ಹಾತಾಂತ್ ಆಸ್ಲ್ಲಿ. ಹಾಂವ್ ತಿ ಎದೊಳ್ ವಾಚೂನ್ ನೆಣಾಂ. ಖರೆಂ ಮ್ಹಳ್ಯಾರ್ ಸೊಳಾ ವರ್ಸಾಂಚೆ ಪಿರಾಯೆರ್ ಬೊಂಬೊಯ್ ಆಯಿಲ್ಲೊಂ. ಕೊಡಿಯಾಳಾಚ್ಯಾ ಜೆಪ್ಪುಂತ್ ಜಲಮಲಾಂ, ಮಿಲಾರ್ ಇಸ್ಕೊಲಾಂತ್ ಶಿಕಾಪ್ ಕೆಲಾಂ ತರ್ಯ್ ಲು.ಮ.ಚ್ಯಾ ಮಲ್ಲಿಕಟ್ಟ್ಯಾಕ್ ಪಾಂಯ್ ದವ್ರುನ್ ನೆಣಾಸ್ಲ್ಲೊಂ. ತ್ಯಾ ದೊಗಾಂಯ್ ಕಾನಡಿ ಲಿಪಿಥಂಯ್ ಪರ್ಕಿ ಆಸ್ಲ್ಲ್ಯಾ ಮನ್ಶಾಂಕ್ ಹಾವೆಂ ಖರಿ ಗಜಾಲ್ ಸಾಂಗ್ಲಿ ಆನಿ ವಾಚುಂಕ್ ಸುರು ಕೆಲೆಂ.
ಸಾಧಾರ್ಣ್ ಮದೆಂ ಪಾವ್ತಾನಾ, ಆನಿ ಅಬ್ರಾಂವ್ ಆಪ್ಲ್ಯಾ ಪುತಾಕ್ ಕಾತ್ರುಂಕ್ ಕಾಂಪ್ತಾನಾ ಲು.ಮ.ಚಿಂ ಅಚರ್ಯಾಂನಿ ಭರ್ಲ್ಲಿಂ ಉತ್ರಾಂ ಮ್ಹಜ್ಯಾ ತೊಂಡಾಂತೂನ್ ಗಾಜ್ತಾಲಿಂ. ಕಿತ್ಯಾಕ್ ಹಾಮ್ವ್ ಕವಿತಾವಾಚನಾಂತ್ ಕಾಂಯ್ ಅಸ್ಕತ್ ನ್ಹಯ್;
"ತುವೆಂ ಲ್ಹಾನ್ವ್ಹಡ್ ಕೆಲ್ಲೆಂ ಬೊಕ್ಡೆಚೆಂ ಪೀಲ್ ಸಯ್ತ್ಯ್
ಕಾತರ್ತಾನಾ ಮುಟಿಭಿತರ್ ಕಾಂಪತ್ ಕೊಯ್ತಿ".
ಲುವಿಸ್ ಮಸ್ಕರೇಞ್ ಮ್ಹಜ್ಯಾ ಹಾತಾಂತ್ ಕಾಂಪ್ತಾಲೊ ಮ್ಹಣೊಂ? ಯಾ ತ್ಯಾ ಕ್ರೂರ್ ಸಾಕ್ರಿಫಿಸಾಚ್ಯಾ ತಳ್ಮಳ್ಯಾಂನಿ ಮ್ಹಜೆ ಹಾತ್ ಕಾಂಪ್ತಾಲೆ ಮ್ಹಣೊಂ?
ರವೀಂದ್ರಬಾಬಾಚೆ ದೊಳೆ ವೊಲೆ ಜಾಲ್ಲೆ. ಹಾವೆಂ ವಾಚಾಪ್ ಅಖೇರ್ ಕರ್ತಾನಾ, ಫುಡ್ತುಗಲಾಚ್ಯಾ ದಾಂಡ್ಯಾಂಕ್ ಬಾಗ್ವನಾತ್ಲ್ಲೊ ಶೂರ್ ಶಿಪಾಯ್, ಎವಾಗ್ರ್ ಜೊರ್ಜ್, ಕಡೊನ್ ಮೇಣ್ ಜಾಲ್ಲೊ.
ಹಾವೆಂ ಹಿ ಕವಿತಾ ಅತ್ಮ್ಯಾಚೆ ಉಭ್ಗೊಣೆಕ್ ಆನಿ ಜಿವಿತಾಚ್ಯಾ ಎಕ್ಸುರ್ಪಣಾಂತ್ ಸಭಾರ್ ಪಾವ್ಟಿಂ ವಾಚ್ಲ್ಯಾ. ಕೊಂಕಣೀ ಉತ್ರಾಂ ಅಶಿಂ ಗುಂತಾನಾ ಮ್ಹಜೆ ತಸಲೊ ಗಳ್ತಾ;
"ತುಜೆ ನಿರ್ಮಳ್ ಅತ್ಮೊ, ಕಳೊ ತುರ್ಮಣಾಂತ್ಲೊ
ಪಿತೃಲೋಕಿಂ ಫುಲೊನ್ ಥಂಯ್ಚರ್ ಪರ್ಮಳ್ ಉಕ್ಲೊಂ"
ಮಾಗಿರ್ ನೋವ್ ವರ್ಸಾಂಚೆ ತರ್ನೆ ಧುವೆಕ್ ಹೊ ಸಾಕ್ರಿಫಿಸ್ ಹಾವೆಂ ವಾಚುನ್ ಸಾಂಗ್ಲಾ, ಆನಿ ಮಾಗೀರ್ ಆಮಿ ದೊಗಾಂಯ್ ರಡ್ಲ್ಯಾಂವ್.
ಖಂಯ್ಚ್ಯಾಗಿ ಕಾರಾಣಾನ್ ಮಂಗ್ಳುರ್ಚ್ಯಾ ಕೊಂಕಣಿ ಕ್ರಿಸ್ತಾಂವಾಂಕ್ ಕವಿತಾ ಜಾಯ್ನಾ. ತಾಂಚಿಂ ವ್ಹಡಾಂ ಮಾಂದಿನಾಂತ್. ತಾಂಚೆ ಕವಿ, ಕವಿತಾ ಬರಂವ್ಚೆಯ್, ಕವಿತೆಚೆಂ ಅಧ್ಯಯನ್ ಕರಿನಾಂತ್. ಕುಂಡೊಚ್ ಖಾವ್ನ್ ಆಸ್ಲ್ಲ್ಯಾಂಕ್ ಉಂಡೊ ರುಚಾನಾ ಮ್ಹಣ್ ಹಾಂವೆಂ ಹೆ ಕ್ರಿಸ್ತಾಂವ್ ಜಮಾತಿಲಾಗಿಂ ಕವಿತಾವಿಶಿಂ ಉಲಂವ್ಚೆಂಚ್ ಉಣೆಂ ಕೆಲಾಂ.
(ಹಿ ಖೊಡ್ ಮನಾಂತ್ ದವ್ರುನ್ ಲುವಿಸ್ ಮಸ್ಕರೇಞಾಚ್ಯಾ ಅಬ್ರಾಂವ್ಚ್ಯಾ ಯಜ್ನ್ದಾನಾವಿಶಿಂ ಬರಂವ್ಚೆಂ ತರ್, ತೆಂ ಕೊಣಾಖಾತಿರ್ ಮ್ಹಣ್ ದುಭಾವ್ ಉಟ್ತಾ
ಆನಿ ಲಿಖ್ಣೆಂತ್ಲೆ ತೀಂತ್ ಸುಕ್ತಾ.)
ಅಖ್ರೇಚೊ ಶರೊ:
ಕೊಂಕ್ಣಿ ಸಾಹಿತ್ಯ್/ಕವಿತಾವಿಶ್ಯಾಂತ್ ಕೊಂಕ್ಣೆಚಾ ವಿಧ್ವಾನಾಂಚೆ ಅಸಲೆ ವಿಚಾರ್ ನಿಜಾಯ್ಕೀ ಸಮ್ಜೊಂಕ್ ಪ್ರೇತನ್ ಕೆಲೆಂ ತರ್ ಆಮ್ಚಾನ್ ಜಾಯ್ತಿಂ ಬರಿಂ ಕಾಮಾಂ ಕರುಂಕ್ ಸಾಧ್ಯ್ ಜಾತಾ. ಆತಾಂ ಹ್ಯಾ ಬುಕಾಂತ್ ಎಕೆಕಾ ಲಿಸಾಂವಾಚೆರ್ ಅಧ್ಯಯನ್ ಕೆಲ್ಲಿಂ ಹರ್ಯೆಕ್ ಲೇಕನಾಂ ಎಕಾಚ್ ವರ್ಗಾಚಿಂ ಬಿಲ್ಕುಲ್ ನ್ಹಯ್. ಎಕಾಚ್ ಮಾಪಾಚಿಂ ನ್ಹಯ್, ಎಕಾಚ್ ಗುಂಡಾಯೆಚಿಂ ನ್ಹಯ್. ಹೆ ವಿಚಾರ್ ಸಭಾರಾಂಚೆ ಆಸ್ತಾನಾ ಹೆ ಸಗ್ಳೆ ವಿಚಾರ್ ಎಕಾಮೆಕಾಚಾ ವಿಚಾರಾಂಕ್ ತಾಳ್ ಪಡಾಜಯ್ ಮ್ಹಣ್ ನಾ. ತರ್ಯ್ ಹೆಂ ಆಮ್ಚೆಂ ಪಯ್ಲೆಂ ಮಿಸಾಂವ್ ದೆಕುನ್ ಆಮ್ಚಾ ಪಾವ್ಲಾಂನಿ ಘಡ್ಲ್ಲ್ಯಾ ಚುಕಿಂ ಥಾವ್ನ್ ಆಮಿಂ ಶಿಕ್ಚಿ ಗರ್ಜ್ ಆಸಾ. ಎಕಾ ವರ್ಸಾಧ್ಲೆ ಆಮ್ಚೆಚ್ ವಿಚಾರ್ ಆಜ್ ಕಿತ್ಲೆ ರಾವ್ಲ್ಯಾತ್ ಕಿತ್ಲೆ ಉಭೊನ್ ಗೆಲ್ಯಾತ್ ಮ್ಹಳ್ಳೆಂ ಪ್ರಾಮಾಣಿಕ್ ಅವಲೋಕನ್ ಕರ್ಚಿ ಗರ್ಜ್ ಆಸಾ, ತೆಂ ತಾಂತಾಂಚೆಂ ಕರ್ತವ್ಯ್ ಜಾವ್ನಾಸಾ.
ಕವಿತಾಪಾಠ್ ಫುಡ್ಲ್ಯಾ ದಿಸಾಂನಿ ಜರ್ ಅಸಲ್ಯಾ ಮನಾಚಾ ಸಾಹಿತಿಂಚಾ ಮನಾಂಕ್ ದಿವ್ಟಿ ಜಾಂವ್ಕ್ ಸಕತ್ ತರ್ ಮಾತ್ರ್ ಆಮಿ ಕವಿತಾಪಾಠಾಕ್ ಕಾಡ್ಚಾ ವಾಂವ್ಟಿಕ್ ಖರೊ ಅರ್ಥ್ ಆನಿ ಖರೊ ಮಹತ್ವ್ ಲಾಭ್ತಲೊ. ಹಾಚ್ಯಾಕೀ ಚಡಿತ್ ಆಮಿಂ ಕಿತೆಂಚ್ ಅಪೆಕ್ಶಾ ಕರುಂಕ್ ವೆಚೆಂಚ್ ನಾಕಾ.
ದೇವ್ ಬರೆಂ ಕರುಂ!
[2006 ಇಸ್ವೆಚಾ ಜನೆರ್ 13 ತಾರಿಕೆರ್ ಕುವೆಯ್ಟಾಂತ್
ಚಲ್ಲ್ಲ್ಯಾ ಇಕ್ರಾವ್ಯಾ ಕವಿತಾಪಾಠಾಂತ್ ಹೆಂ ಲೇಖನ್ ವಾಚುನ್
ಸಾಂಗ್ಲಾಂ]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
