ಡಿಜಿಟಲ್ ಕೊಂಕಣಿ ಪ್ರಸ್ತುತ್ ಆನಿ ಫುಡಾರ್

ಡಿಜಿಟಲ್ ಕೊಂಕಣಿ - ಪ್ರಸ್ತುತ್ ಆನಿ ಫುಡಾರ್

ಹ್ಯಾ ಸಂಸಾರಾಂತ್ ಕಿತೆಂಯ್ ಥಿರ್ (ಶಾಸ್ವಿತ್) ಆಸ್ಚೆಂ ಜಾವ್ನಾಸಾ ’ಬಲ್ದಾವಣ್’. ಪ್ರಗತಿಪರ್ ಚಿಂತ್ಪಾಚ್ಯಾಂನಿ ಹ್ಯಾ ಬದ್ಲಾವಣೆಕ್ ಸರಿ ಜಾವ್ನ್ ಆಮಿ ಸಯ್ತ್ ಫುಡೆಂ ಮೆಟಾಂ ಕಾಡ್ಚಿ ಗರ್ಜ್ ಅನಿವಾರ್ಯ್.

ಅಶೆಂ ಮ್ಹಣ್ತಾಸ್ತಾಂ ಆಮಿಂ ರೊದಾಂಚೆಂ (ಚಕ್ರಾಂಚೆಂ) ಅವಿಷ್ಕಾರ್ ಕೆಲ್ಲ್ಯಾ ಕಾಳಾಕ್ ವೆಚಿ ಗರ್ಜ್ ನಾ. ಪುಣ್ ತ್ಯಾ ರೊದಾಂಕ್ ವ್ಹಾಪಾರ್ನ್ ಆಮ್ಚ್ಯಾ ಪುರ್ವಜಾಂನಿ ಕೆಲ್ಲ್ಯಾ ಅವಿಷ್ಕಾರಾಂತ್ ಏಕ್ ಜಾವ್ನಾಸ್ಲಿ ’ಬಯ್ಲಾಚಿ ಗಾಡಿ’ (Bullock Cart). ಬಯ್ಲಾಂಚಿ ಗಾಡಿ ಆಮಿ ಪಳೆಲ್ಯಾ, ಮುಕ್ಲ್ಯಾನ್ ದೊನ್ ಬಯ್ಲ್, ಆನಿ ಬಯ್ಲಾಂಚ್ಯಾ ಖಾಂದಾರ್ ಝೂಂ, ಆನಿ ತ್ಯಾ ಝೂಂವಾಚೆರ್ ಗಾಡಿಯೆಚಿ ಮುಕ್ಲಿ ಕೂಸ್ ತರ್, ಅನ್ಯೇಕಾ ಕೂಸಿಚೆರ್ ಯಾತ್ರಿ ಬಸ್ತಾಲೆ, ಆಪಾಪ್ಲೆಂ ವೊಜೆಂ ದವರ್ತಾಲೆ. ಪುಣ್ ಬಯ್ಲ್ ಸದಾಂಚ್ ಗಾಡಿಯೆಚ್ಯಾ ಸಮೊರ್ ಆಸ್ತಾಲೆ ಆನಿ ತಿ ಗಾಡಿ ವೊಡುನ್ ವ್ಹರ್ತಾಲೆ ಶಿವಾಯ್ ಗಾಡಿಯೆ ಪಾಟ್ಲ್ಯಾನ್ ನ್ಹಯ್. ತಿತ್ಲಿ ಸಮ್ಜಣಿ ಆನಿ ಗಿನ್ಯಾನ್ ಆಮ್ಚ್ಯಾ ಪುರ್ವಜಾಂಕ್ ಆಸ್ಲಿ. ತಾಚೊ ಪ್ರತಿಫಳ್ ಜಾವ್ನ್ ಆಜ್ ಕೊಂಕಣಿ ಆಪ್ಟೊನ್ ದಪ್ಟೊನ್ ತರ್‌ಯೀ ಜಿವಿಚ್ ಉರ್ಲ್ಯಾ. ಹ್ಯಾ ಗಾಡಿಯೆಕ್ ಫುಡೆಂ ವ್ಹರ್ಚಿ ಜವಾಭ್ದಾರಿ ಆತಾಂ ’ಶಿಕ್ಪಿ’ ಜಾವ್ನಾಸ್ಚ್ಯಾ ಆಮ್ಚೆರ್ ಆಸಾ. ಆಮಿಂಚ್ ತೆ ಬಯ್ಲ್, ಆನಿ ತಾಂತ್ರಿಕತಾ ಏಕ್ ಝೂಂ. ದೆಕುನ್ ಹ್ಯಾ ತಾಂತ್ರಿಕತೆಕ್ ಸಾರ್ಕ್ಯೆ ರಿತಿನ್ ವ್ಹಾಪಾರ್ನ್ ಕೊಂಕಣಿ ಗಾಡಿ ಆಮಿ ಮುಕಾರ್ ವ್ಹರುಂಕ್ ಆಸಾ.

’ಡಿಜಿಟಲ್’ ಸಬ್ಧ್ ಅರ್ಥಾನ್ ವಿಸ್ತಾರ್ ಅರ್ಥಾಚೊ. ಎಕಾ ನಿರ್ದಿಶ್ಟ್ ಪ್ರಾಂತ್ಯಾಚೊ ವಾ ಸಮುದಾಯಾಚೊ ನ್ಹಯ್; ಜಾಗತಿಕ್. ಅಶೆಂ ಮ್ಹಣ್ತಚ್ ’ಕೊಂಕಣಿ’ ಮ್ಹಳ್ಯಾರ್ ಲ್ಹಾನ್/ಆಣ್ವೆಂ ಚಿಂತಪ್ ಆಮ್ಕಾಂ ನಾಕಾ. "ಕೊಂಕಣಿ ಏಕ್ ಗಿರೆಸ್ತ್ ಭಾಸ್, ಪಾಂಚ್ ಲಿಪಿಯಾಂನಿ, ಚ್ಯಾರ್ ಪ್ರಮುಕ್ ರಾಜ್ಯಾಂನಿ ಘೊಳ್ಚಿ, ಸಂಸಾರ್‌ಭರ್ ವಿಸ್ತಾರಿತ್ ಜಾಲ್ಲಿ, ಭಾರತ್ ದೆಶಾಚಿ ಏಕ್ ರಾಷ್ಟ್ರ್ ಭಾಸ್" ಅಶೆಂ ವರ್ಸಾಕ್ ಏಕ್ ಪಾವ್ಟಿಂ (ಅಗೊಸ್ತ್ 20 ತಾರಿಕೆರ್) ವೆದಿಚೆರ್ ಚಡೊನ್ ಮಾಯ್ಕಾಚೆರ್ ತಾಳೊ ಪಿಂಜುನ್ ಬೊಬಾಟುನ್, ವೆದಿಥಾವ್ನ್ ದೆಂವ್ತಚ್ ಎಕಾಮೆಕಾ ಲಿಪಿ-ಬೊಲಿ-ಪ್ರಾಂತ್ಯಾಚಿಂ ನಿಬಾಂ ಮುಕಾರ್ ಹಾಡ್ನ್ ಎಕಾಮೆಕಾಚಿಂ ಮಾಸಾಂ ಖಾಂವ್ಚೆಂ ಕಾಂಯ್ ಅಕಸ್ಮಿಕ್ ನ್ಹಯ್. ಕಿತ್ಯಾಕ್ ಆಮ್ಕಾಂ ದೊದೊನ್ ತೊಂಡಾಂ? ಎಕ್ ವೆದಿಚೆರ್, ಅನ್ಯೇಕ್ ವೆದಿಸಕ್ಲಾ? ಆಮ್ಕಾಂ ಫಕತ್ ಎಕ್ ತೊಂಡ್ ಆಸ್ತೆಂ ತರ್ ಕೊಂಕಣಿ, ಜಾಂವ್ ತಿ ಖಂಚ್ಯಾಯ್ ವಠಾರಾಂತ್ ವಾ ಖಂಚ್ಯಾಯ್ ಲಿಪಿ/ಬೊಲಿಂತ್ ಪುಣ್ ತಿ ಕೊಂಕಣಿಚ್ ನ್ಹಯ್? ಆಮ್ಚ್ಯಾ ಪಾಂಯಾಂಕ್ ಕಾಂಟೊ ತೊಪ್ಲ್ಯಾರ್ ಆಮ್ಕಾಂ ದೂಕ್ ಯೆಂವ್ಚಿ ಸಹಜ್ ನ್ಹಯ್? ಆತಾಂ ತೊ ಕಾಂಟೊ ಅಮೆರಿಕಾಂತ್ ಆಸ್ತಾನಾ ತೊಪುಂ ವಾ ಜಪಾನಾಂತ್ ಆಸ್ತಾನಾ ತೊಪುಂ ವಾ ಭಾರತಾಂತ್ ಆಸ್ತಾನಾ ತೊಪುಂ. ದೂಕ್ ತಿ ದೂಕ್ ನ್ಹಯ್? ಆತಾಂ ದೂಕ್ ತಿ ದೂಕ್ ತರ್, ಕೊಂಕಣಿ ತಿ ಕೊಂಕಣಿ ಕಿತ್ಯಾಕ್ ನ್ಹಯ್? ಆಮ್ಚೆಲಾಗಿಂ ತಾಂತ್ರಿಕತಾ ಆಸಾ, ಪುಣ್ ಆಮ್ಚ್ಯಾ ಮತಿಂತ್ಲೆಂ ಅಶೀರ್ (narrow) ಚಿಂತಪ್ ಪಯ್ಸ್ ಕರುಂಕ್ ತಾಂತ್ರಿಕತಾ ಅಜೂನ್ ಯೆಂವ್ಕ್ ನಾ. ದೆಕುನ್ ಫಕತ್ ತಾಂತ್ರಿಕತಾ ಆಸ್ಲ್ಯಾರ್ ಮಾತ್ರ್ ಪಾವಾನಾ, ತಿ ಮುಕಾರ್ ವರುಂಕ್ ಜೊಕ್ತಿ ಮನೊಗತ್ ಆಸ್ಚಿಂ ಜಾಯ್. ಹ್ಯಾ ದಿಶೆನ್ ಆಮಿ ಸದಾಂ ಆಶಾವಾದಿ ಜಾವ್ನ್ ಉರ್ಚಿ ಗರ್ಜ್ ಆಸಾ.

ಆಶಾವಾದಿ ಪ್ರಕಾಶನಾನ್ ಡಿಜಿಟಲ್ ಕೊಂಕಣಿಂತ್ ಕಾಂಯ್ ಇಲ್ಲೊ ಚಿಲ್ಲರ್ ವಾವ್ರ್ ಕೆಲಾ, ಕರುನ್ ಆಸಾ. ತಾಂತ್ಲೆಂ ಪ್ರಮುಕ್ ಮಿಸಾಂವ್ ಕೊಂಕಣಿಂತ್ಲೆಂ ವಿಂಚ್ಣಾರ್ ಸಾಹಿತ್ಯ್ ಡಿಜಿಟಲೀಕರಣ್ ಕರ್ಚೆಂ, ಜೊಗಾವ್ನ್ ದವರ್ಚೆಂ. ಫುಡಾರಾಕ್ ಉಪ್ಕಾರಾಕ್ ಪಡ್ತೆಲೆಂ ಮ್ಹಳ್ಳ್ಯಾ ಚಿಂತ್ಪಾನ್, ಮಾಯ್‌ಭಾಸೆಚೊ ಮೋಗ್ ಕೊಂಕಣಿ ಲೊಕಾಂಥಂಯ್ ಸದಾಂಕಾಳ್ ಜಿವಾಳ್ ಉರ್ತಲೊ ಮ್ಹಳ್ಳ್ಯಾ ಭರ್ವಶ್ಯಾನ್. ’ಜಲ್ಮ್ ದಿಲ್ಲ್ಯಾ ಆವಯ್ಕ್ ಪ್ರಾಯ್ವಂತಾಚ್ಯಾ ಆಶ್ರಮಾಂತ್ ಘಾಲುನ್ ವ್ಹಡಾ ಮರ್ಜೆನ್ ಜಿಯೆತೆಲ್ಯಾ ಲೊಕಾಂ ಥಾವ್ನ್ ಆವಯ್‌ಭಾಸೆಚೆರ್ ಮೋಗ್ ಉದೆತಲೊ ಕಾಯ್?’ - ಹೆಂ ಚಿಂತಪ್ ಕೊಣಾಯ್ಕೀ ’ಪಿಶೆಂಪಣ್’ ಮ್ಹಣ್ ಭಗುಂಕ್ ಪುರೊ. ಆಸುಂ ಕೊಣ್‌ಯೀ, ಕಶೆಂಯ್, ಕಿತೆಂಯ್ ಚಿಂತುಂದಿ, ಆಪಾಪ್ಲ್ಯಾ ಮತಿಚ್ಯಾ ಪ್ರಭುದ್ಧತೆಚೆರ್ ತೆಂ ಲಬ್ದೊನ್ ಆಸಾ. ಪುಣ್ ಆಮ್ಕಾಂ ತರೀ ಫುಡಾರಾವಿಶಿಂ ಆಶಾವಾದಿ ಜಾಂವ್ಕ್ ಆಸಾ. ದೆಕುನ್ ಅಸಲಿಂ ಡಿಜಿಟಲ್ ಪರಿಸಂವಾದಾಂ ಆಯೋಜಿತ್ ಕರ್ಚಿ ಗರ್ಜ್ ಆಸಾ. ಹ್ಯಾ ಪರಿಸಂವಾದಾಂತ್ ವಿಚಾರ್ ಎಕಾಮೆಕಾ ಪಾಶಾರ್ ಕರ್ಚಿ ಗರ್ಜ್ ಆಸಾ. ಒಕ್ಟೊಬರ್ ೨೫ ತಾರಿಕ್ರ್ ಚಲೊಂಕ್ ಆಸ್ಚ್ಯಾ ಹ್ಯಾ ಪರಿಸಂವಾದಾಚೆರ್ ಆಮಿ ಪ್ರಿಂಟ್ ಪುಸ್ತಕ್, ಇ-ಪುಸ್ತಕ್, ತಶೆಂಚ್ ಆ-ಪುಸ್ತಕ್ ಅಶೆಂ ತೀನ್ ಪ್ರಕಾರಾಚಿಂ ಪುಸ್ತಕಾಂ ಲೊಕಾರ್ಪಣ್ ಕರ್ಚಿ ಯೆವ್ಜಣ್ ಘಾಲ್ಯಾ. ಡಿಜಿಟಲ್ ಕೊಂಕಣಿ ವೆಗ್-ವೆಗ್ಳ್ಯಾ ಶೆತಾಂತ್ ಕಾಮ್ ಕರುನ್ ಆಸ್ಚ್ಯಾ ಥೊಡ್ಯಾಂಕ್ ಆಮಿ ಹ್ಯಾ ಪರಿಸಂವಾದಾಂತ್ ಮೆತೆರ್ ಕೆಲಾಂ. ಹ್ಯಾ ಪರಿಸಂವಾದಾಂತ್ ವಾಂಟೆಲಿ ಜಾಂವ್ಕ್ ಸರ್ವಾಂಕ್ ಆವ್ಕಾಸ್ ಆಸಾ.