Kothapatth Xinkoll VII Ugtaunn


4 July: Ashawadi Prakashan, St.Xaviers College Mapusa, Dhempe Mohavidhealoi (Porigonnit) Miramar hanchea mukhelponnakhal, Konknni Okaddemi Gõy, Dalgado Konknni Okaddemi ani Karnataka Konknni Sahity Okaddemichea bhagidarant, Carmel College Nuvem, Fr.Agnel College Pilar, Shree Mallikarjuna College Canacona, Sorkari College Khepem ani her thoddea Collejichea sohbhatvant ayojit Kothapatth Xinkoll VII chem ugtaunn sonvara (4 July 2026) ver Bai Jane Edwin Dsouza-n korun ople sondhex dile.

Yeukar uloupant Bab Shailendra Mehta-n kotha ani Patth hea donachi gorz aicha kallar kitli mohtvachi mholl'lleacher uloup korun, 2004 isvent kuveyttant survat zal'lea ’Kothapatth’ odhyoin kamasallamni koxem 2020 isvent  digital   svorupant Gõy, Karnatak, Maharastra, Kerala matr nhoi, des-videxantlea askt‌vontank hea digital kamasallamni vantteli zaunk sondhi mell'lli mholl'lleacher sovisotar vivr dilo. Kothapatth xinklli I - VI cher zal'lea somgr odhyoyachi, toxench hea vebinaramni sador zal'lea proptrank pustokarupar sonklon zaun porgott kel'li kholayechi mahet dili.

Prostavik uloupant Dr. Chandralekha Dsouza-n "Edwin J.F. Dsouza-n oplea sahiteamukhantr konknni sahiteak ek novoch, unchlo dorzo dilo. Tachea borpamni voicharikota, adheatmikota, tatvikota toxench somaz-mukhi chintpak zagounni astali. Zamv ti viddombonatmok ritir va her. Edwin J.F. Dsouza-chea kothencher ’Kothapatth’ cher odhyoin zamvchi nizaiki bhovo opurbhayechi vinchounn" oxem mhonnon ’konknnichea bohulipichea ddijittolikoronn ani prosaronn’ konknnichea somgr sahiteak ekameka vanttun gheunk toxench somzonk ek opurbhayechi sondhi korun dita. Dekun hea proklpant sohbhagitv ghetol'lea sorv somstheank toxench vektink dhinvas dile.

Bap Luis Gomes hannim oplea uloupant "’Konknnichea bohulipichea ddijittolikoronn ani prosaronn’ cho vaur pattlea thoddea tempant boroch chalu asa ani hea vaurant axavadi prokaxonasovem somjikayechem khorar sointt jheviyrs kolejin kelam ani amcho ud'dex itloch; somgr konknni sahiteak ekameka lipim/pranteacheo goddi utroncho."

Bab Chetan Lobo-n oplea uloupant "Edwin J.F. Dsouza-chem namv aikotanant hamv bhavuk zatam, kiteak mhollear mhozo ani tacho bhand fokot sompadok-kothakar zaun matr nhoi, hamv kothakar zaunk mhaka ekaritichem preronn labhlelench Edwin J.F. Dsouza-chea kothemni. Tachea kothenchem pustok ’betlehem'’ mhaka ozun porot porot vachunk preronn dita. Hantleo choddtavo kotha seuk nemalleacher porgott zal'leo."

’Konknnichea bohulipichea ddijittolikoronn ani prosaronn’ cho solhadar Andrew L Dcunha-n oplea uloupant "Konknni bhas udel'li khonchyai pondditam thaun va vidhvanam thaun nhoi, bogar lokanthaun udel'li, lokan ozun zogasonnen samballun douroleli bhas. Tedna lipich natli, punn az hea lokam modhench udel'lea vidhvan-pondditamni lilpicheo goddi bolicheo toddi ghaleat. Punn axavadi prokaxonan ghetlolem hem mett khorench fuddarak bhovo upkarchem, dixttaveachem kam'. Konknni sahity sobhar lipimni asa, ani hem sahity ddijittol rupar ekameka sankou bhandun ekameka paumvchem misamv vortem. Oxem pollelear konknni songitak soit lipi na punn tem songit kiteak eka nirdixtt pranteant matr simit zalam? gõychem songit mongllurak zamv, mongllurantolem songit gõyank kiteak pavana? kiteak mhollear toslem vhodd mon amchelagim na. Punn kothapatth toslim odhyoin kamasallam choloun vorun hea lipi, pranteacheo goddi utron vaur korta ani tacho faido konknnik pavaxem korta."

Bai Anju Sakhardande-n oplea uloupant mhonnali; "kothapatth survater thaun dhempe mohavidhealoyachea vidhearthimni vantteli zaleant, ani hea mukhantr kon'nodd lipint kotha boroiteleancheo kotha vachunk, ani somzunk ek sondhi mell'llea ani hea sankvak asa korunk axavadi prokaxonacho motto vaur karonn. Dhempe mohavidhealoyan axavadi prokaxonasovem atam dusrem somjikayechem khorar kelam ani hacho ud'dex ’Konknnichea bohulipichea ddijittolikoronn ani prosaronn’ hea proklpak sohbhagitv korunk."

Dr. Charles Lobo-n oplea uloupant kothapatth odhyoin upkromak toxench vantteli zamvcha sorv vidhearthink hea kamasallancho faido zoddunk ulo dilo.

Bab -Willy Goyes-an oplea uloupant mhonnalo; "Edwin J.F. Dsouza-sovem sahity okaddemicho sando zaun vaur kela ani Edwin-acheo kotha kholayen odhyoin keleat. Kothapatth kamasallamni tachea kothencher sador zaunk aschim proptram khorinch zaun vidhearthink dekhibhorit zamvchant dubhavo na. Konknnichea bohulipichea ddijittolikoronn ani prosaronn’ ek bhovo moladhik yeuzonn, ani hea yeuzonnent hamv axavadi prokaxonasovem astolom."

Bab Marcel Dsouza (Machcha Milar) hannem oplea uloupant mhonnalo; "Edwin J.F. Dsouza. Boro kothakar punn boro vachpi, tachea vachpachi souy bhollvont zaunasoli. Tachea sahiteacher jeral ritin tache somkallin boroupi khoddi kaddtale ’eddvinachea sahiteant matiechi mur na’, ani hea khoddiz eddvinan zap dil'li asa ’inglix toxench her bhasemni aschem konknnint kiteak asanaye?’, oxem pollelear pot'tedari/guddachari chintpacheo, voigeanik chintpacheo ani her gunddayechea chintpacheo kadombori boromvchi survat kel'lich eddvinan."

Bai Rajashree Sail-an oplea uloupant kothapatth xinkllechea sorv vebinaramni vidhearthimni hazor ason, hea kamasallancho faido zoddcho mhonnali.

Bab Dharma Chodankar hannem kothapatth xinkllechea sorv vebinarank toxench vidhearthink sokri-i ritin bhag gheun hacho faido zoddunk ulo dilo.

Bai Vidhita Shett hinnem kothapatthachea adhlea sorv vebinaramni hazor zaun zoddol'lea maheticho ul'lek korun, khoroch zaun kothapatth ek bhovo upkarachem upkrom' - oxem mhonnali.

Bab Shailendra Mehta-n fuddlea kothapatth vebinaranchi mahet divun, dhinvasi uloup kelem.