ಕವಿತಾकविताPoem
ಕೆನ್ನಾಂ ಪುಣಿ ಉಟ್ತೆಲ್ಯಾತ್... (- ವಿಲ್ಮಾ ಬಂಟ್ವಾಳ್)
[ಕವಿತಾ] ಕೆನ್ನಾಂ ಪುಣಿ ಉಟ್ತೆಲ್ಯಾತ್... (- ವಿಲ್ಮಾ ಬಂಟ್ವಾಳ್)
ಥೊಡ್ಯಾಚ್ ತೆಂಪಾದಿಂ ಮನ್ಶಾಕುಳಾನ್ ಪಳೆವ್ನ್ ಆಯಿಲ್ಲ್ಯಾ ಬದ್ಲಾವಣೆಂತ್ ಕಿತ್ಲೆಂ ಸರ್ವ್ ಬದಲ್ಲಾಂ. ಹಿ ಕವಿತಾ ಆಯ್ಚ್ಯಾ ಡಿಜಿಟಲ್ ಕಾಳಾಚ್ಯಾ ಶಿಕ್ಷಣ್ ವೆವಸ್ತೆಚ್ಯಾ ಪಾಠ್ಭುಂಯ್ಚೆರ್ ವಿಣ್ಲಲಿ ತರ್ಯೀ ಹಿ ಕವಿತಾ ಸಭಾರ್ ಶೆತಾಂನಿ ಲಾಗು ಜಾಂವ್ಚೆತಸಲಿ. ಏಕಾ ವಾಟೆನ್ ಸತ್, ನೀತ್, ನಯ್ತಿಕತಾ, ಶಿಸ್ತ್ ಆನಿ ಗಿನ್ಯಾನ್ ತರ್ ಅನ್ಯೇಕಾ ವಾಟೆನ್ ಹ್ಯಾ ಸರ್ವಾಂಕ್ ತುಕ್ಲಾವ್ನ್, ಹ್ಯಾ ಸರ್ವಾಂಚ್ಯಾ ಅಸ್ತಿತ್ವಾಚೆರ್ ಸವಾಲ್ ಉಟವ್ನ್ ಮಿರಂವ್ಚೆಂ ಅಸತ್, ಅನೀತ್, ಅನಯ್ತಿಕತಾ, ಅಶಿಸ್ತ್ ತಶೆಂಚ್ ಅಗ್ಯಾನ್ ಆನಿ ದೊಳ್ಯಾಂ ಸಮೊರ್ ಹೆಂ ಸರ್ವ್ ಘಡುನ್ ಆಸಾ ತರ್ಯೀ ಮೊನೊ ಜಾವ್ನ್ ಜೆಮೆಂವ್ಚೊ ಲೋಕ್ ಕೆದ್ನಾಂ ತರ್ಯೀ ಉಟತ್ಕಾಯ್ ಮ್ಹಳ್ಳೆಂ ಸವಾಲ್ ಮತಿಂತ್ ಉಭ್ಜಾಂವ್ಚಿ ಶ್ಯಾಥಿ ಹ್ಯಾ ಕವಿತೆಚಿ. ಪುಣ್ ಅಖೇರಿಕ್ ತರ್ಯೀ ಭರ್ವಸೊ ಸಾಂಡುನ್ ಜಿಯೆನಾಯೆ ಜಾಲ್ಲ್ಯಾನ್ ಹೆಂ ಸವಾಲ್ ಅಧುರೆಂಚ್ ಉರ್ತಾ. (ಅಕ್ತೋಬ್ರ್ 4 ತಾರಿಕೆರ್ ಆಸಾ ಕೆಲ್ಲ್ಯಾ ಅಂತರ್ರಾಶ್ಟ್ರೀಯ್ ಡಿಜಿಟಲ್ ಕೊಂಕಣಿ ಕವಿಗೋಶ್ಟಿಂತ್ ಸಾದರ್ ಕೆಲ್ಲಿ ಕವಿತಾ ಹಿ ಜಾವ್ನಾಸಾ)
[ಕವಿತಾ] ಕೆನ್ನಾಂ ಪುಣಿ ಉಟ್ತೆಲ್ಯಾತ್... (- ವಿಲ್ಮಾ ಬಂಟ್ವಾಳ್)
ಕೆನ್ನಾಂ ಪುಣಿ
ಉಟ್ತೆಲ್ಯಾತ್...
ತಾಂಚ್ಯಾ ದೊಳ್ಯಾನಿಂ ತೀಳ್ನ್
ಪಳೆವ್ನ್ ಉಚಾರಿನಾತ್'ಲ್ಲೆಂ
ಸಮ್ಜೊಂಚ್ಯಾ ಆಮ್ಕಾಂ ಆಜ್, ಕಠೀಣ್ ಶಿಕ್ಷಾ. ತುಮಿ
ವಿಡಿಯೊ ಬಂದ್ ಕರ್ನ್ ನಿದ್ಲ್ಯಾರೀ, ಹಾಂವ್ ಶಿಕಯ್ತೇ
ಆಸಾಂ ಕೆನ್ನಾಂ ಪುಣಿ ಉಟ್ತೆಲ್ಯಾತ್ ಮ್ಹಳ್ಳ್ಯಾ
ಭರ್ವಶ್ಯಾನ್. ಕಾಂಯ್ ಮಾಂ-ಬಾಪ್ ಮ್ಹಾಕಾ ಚೊಯ್ತಾತ್ ಆಸ್ತೆಲಿಂ ಮಧೆಂ ಮಧೆಂ. ಆದ್ಲ್ಯಾ
ಗುರುಚೆರ್ ಆಸ್'ಲ್ಲಿ
ಪಾತ್ಯೆಣಿ ಆಮ್ಚೆರ್ ಖಂಯ್ ಆಸಾ? ಮ್ಹಾಕಾ ಹಾಚಿ
ಪರ್ವಾ ನಾ. ಹಾಂವ್ ಶಿಕಯ್ತೇ ಆಸಾಂ ಕೆನ್ನಾಂ ತರೀ
ಉಟ್ತೆಲ್ಯಾತ್ ಮ್ಹಳ್ಳ್ಯಾ ಭರ್ವಶ್ಯಾನ್. ತುಮ್ಚೆ ಮಧೆಂ ಥೊಡೆ ಕೀರ್ ಆಸಾತ್ ಸಗ್ಳೆಂ ಜಿಕುನ್
ಧರ್ತಾತ್. ತಾಳಿಯೊ ಜೊಡುನ್ ಘೆತಾತ್. ಪುಣ್
ಕೆನ್ನಾಂಯ್ ಘುಡಾ ಥಾವ್ನ್ ಭಾಯ್ರ್ ಯೇಂವ್ಕ್ ಸಕನಾಂತ್. ಹಾಂವ್ ಶಿಕಯ್ತೇ ವೆತಾಂ, ಕೆನ್ನಾಂ ತರೀ ಉಟ್ತೆಲ್ಯಾತ್ ಮ್ಹಳ್ಳ್ಯಾ ಭರ್ವಶ್ಯಾನ್. ತುಮ್ಚೆ ಮಧೆಂ ಥೊಡೆ
ಕೊಲೆ ಆಸಾತ್ ಪಾರ್ಪೊಳ್ ತರೀ ಬುದ್ವಂತ್. ಕೆನ್ನಾಂಚ್ ಸಲ್ವನಾಂತ್. ತುಮ್ಚಾಯೀ ಬುದ್ವಂತ್ಕಾಯೆಕ್ ಏಕ್ ವಾಟ್ ದಾಕಂವ್ಚಿ ಗರ್ಜ್ ಆಸಾ. ಹಾಂವ್ ಶಿಕಯ್ತೇ
ವೆತಾಂ, ಕೆನ್ನಾಂ ತರೀ ಉಟ್ತೆಲ್ಯಾತ್ ಮ್ಹಳ್ಳ್ಯಾ
ಭರ್ವಶ್ಯಾನ್. ತುಮ್ಚೆ ಮಧೆಂ ಥೊಡೆ ಚುಕೊನ್
ಗೆಲ್ಯಾತ್. ಮಾಂ-ಬಾಪಾ ಥಾವ್ನ್'ಯೀ ಪಯ್ಸ್ ಪಾವ್ಲ್ಯಾತ್. ನೊವಾನ್ನೊಯ್ ಬಕ್ರ್ಯಾಂ ವರ್ನಿಂ ತುಮಿ ಮ್ಹಾಕಾ ಚಡ್ ಧೊಸ್ತಾತ್. ಹಾಂವ್ ಶಿಕಯ್ತೇ ಆಸಾಂ, ಗೊವ್ಳ್ಯಾಚ್ಯಾ ತಾಳ್ಯಾಕ್ ಪುಣಿ ಆಯ್ಕಾಶ್ಯಾತ್
ಮ್ಹಣೊನ್. ಕೆನ್ನಾಂ ತರೀ ಉಟ್ತೆಲ್ಯಾತ್ ಮ್ಹಣೊನ್.
-
ವಿಲ್ಮಾ ಬಂಟ್ವಾಳ್.
[ಒಕ್ಟೊಬ್ರ್, 2020]
ವಿಲ್ಮಾ ಬಂಟ್ವಾಳ್:
ಬೆಂಗ್ಳುರಾಂತ್ ಸಹ-ಪ್ರಾಧ್ಯಾಪಕ್ ಜಾವ್ನ್ ವಾವ್ರ್
ಕರ್ಚ್ಯಾ ಹಿಕಾ 2013 ಇಸ್ವೆಚೊ ಕಿಟಾಳ್ ಯುವ ಪುರಸ್ಕಾರ್
ತಶೆಂಚ್ ಸಾಹಿತ್ಯ್ ಅಕಾಡೆಮಿಚೊ ಯುವಪುರಸ್ಕಾರ್ (ಮುಕ್ಡಿಂ;
2018) ಲಾಭ್ಲಾ. ಸಭಾರ್ ಕವಿಗೋಶ್ಟಿಂನಿ ಹಿಣೆಂ
ವಾಂಟೊ ಘೆತ್ಲಾ.
© 2020 ವಿಲ್ಮಾ ಬಂಟ್ವಾಳ್ · ಪಯ್ಣಾರಿ · ಆಶಾವಾದಿ ಪ್ರಕಾಶನ್ ಸರ್ವ್ ಹಕ್ಕಾಂ ರಾಕೊನ್ ದವರ್ಲ್ಯಾಂತ್.
More in Poinnari
ಕವಿತಾकविताPoem Feb 2025
ಧಾಳ್ಯೊ [ಡೊ. ಝೀಟಾ ಲೋಬೊ]
ಕವಿತಾकविताPoem Nov 2016
ಎಕಾ ಫೊಂಡಾಚಿ ಕಥಾ
ಕವಿತಾकविताPoem Jun 2020
ಬದ್ಲಾವಣ್ (- ವಿಲ್ಮಾ ಬಾರೆಟ್ಟೊ)
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.