ಕವಿತಾकविताPoem

ಪ್ರೈಮ್ ಟಾಯ್ಮ್ [ಆಂಡ್ರು ಎಲ್. ಡಿ’ಕುನ್ಹಾ]

[ಕವಿತಾ] ಪ್ರೈಮ್ ಟಾಯ್ಮ್ [ಆಂಡ್ರು ಎಲ್. ಡಿ’ಕುನ್ಹಾ]

ಆಮಿಂ ಆಮ್ಕಾಂ ದೇವ್ ಸಮೆಸ್ತಾಂಕ್. ದೆಕುನ್ ಝುಜ್ ವಾ ಲಡಾಯ್, ಕೊಣೆಂ ಕೊಣಾಕ್ ಮಾರ್ಲಾಂ ವಾ ಚಿರ್ಲಾಂ ತೆಂ ಕೊಣಾಕ್ ಕಿತೆಂ ಪಡೊನ್ ಗೆಲಾಂ?. ಝುಜ್ ವಾ ದೊಂಬಿ ಖಂಚ್ಯಾಯ್ ಸಮಾಜೆಕ್ ಭಲಾಯ್ಕೆಚೆಂ ನ್ಹಯ್. ಹಾಂತುಂ ಜಾಂವ್ಚೆಂ ಲುಕ್ಸಾಣ್ ಫಕತ್ ದುಡ್ವಾನ್ ಮಾಪ್ಚೆಂ ನ್ಹಯ್, ಬಗರ್ ಮನ್ಶಾಪಣಾಕ್ ಜಾಂವ್ಚೆಂ ಲುಕ್ಸಾಣ್ ಉತ್ರಾಂವ್ಕ್ ಉತ್ರಾಂ ಮೆಳ್ಚಿಂ ನಾಂತ್.

’ಝುಜ್’ ಆಮ್ಕಾಂ ಸರ್ವಾಂಕ್ ಲಾಗ್ಶಿಲ್ಯಾನ್ ಅನ್ಭೋಗ್ ಕರುಂಕ್ ಮೆಳೊಂಕ್ ನಾ ದೆಕುನ್ ಆಮ್ಕಾಂ ತಾಚೊ ಪರಿಣಾಮ್ ಕಳಿತ್ ನಾ. ಪುಣ್ ಝುಜಾಚ್ಯಾ ವೆಳಾರ್ ಪರ್ಗಾಂವಾಂತ್ ಕಾಮ್ ಕರ್ನ್ ಆಸ್ಚೊ ಆಮ್ಚೊ ಕಾಂಯ್ ಲೋಕ್ ಝುಜ್ ಮ್ಹಳ್ಯಾರ್ ಕಿತೆಂ ಮ್ಹಣ್ ಭೋವ್ ಲಾಗ್ಶಿಲ್ಯಾನ್ ಸಮ್ಜೊನ್ ಆಯ್ಲಾ. ಪುಣ್ ಕೊಂಕಣಿ ಸಾಹಿತ್ಯಾಂತ್ ತೊ ಅನ್ಭೋಗ್ ಆಯಿಲ್ಲೊ ಭೋವ್ ಉಣೊ. ಪುಣ್ ಉಣ್ಯಾಂತ್ಲ್ಯಾ ಉಣ್ಯಾಂತ್ ಸಯ್ತ್ ಕವಿ ಆಂಡ್ರ್ಯೂಚ್ಯೊ ಕಾಂಯ್ ಥೊಡ್ಯೊ ಕವಿತಾ ಆನಿ ಕಥಾ ಹಾಂವೆಂ ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂನಿ ವಾಚ್ಲ್ಯಾತ್. ಜಾಂವ್ ಅಮೀನಾಚ್ಯಾ ರುಪಾರ್, ಜಾಂವ್ ಹೆರ್ ಭುರ್ಗ್ಯಾಚ್ಯಾ ರುಪಾರ್; ಜ್ಯೊ ಇರಾಕಾನ್ ಕುವೆಯ್ಟಾಚೆರ್ ಝುಜ್ ಮಾಂಡುನ್ ಆಸ್ಲೆವೆಳಾರ್ ಜಾಲ್ಲ್ಯಾ ಅಮಾಯಕ್ ಭುರ್ಗ್ಯಾಂಚ್ಯಾ ಖುನಿಚೆರ್ ಬರಯಿಲ್ಲ್ಯೊ ಕವಿತಾ/ಕಥಾ. ಕೊರೊನಾಚ್ಯಾ ವೆಳಾರ್ ಸಯ್ತ್ ಆಂಡ್ರ್ಯೂನ್ ಬರಯಿಲ್ಲಿ ಕವಿತಾ ’ಪೆನ್ನು ಬೇಕಾ ಪೆನ್ನು (ಉಜ್ವಾಡಾಚ್ಯೆ ವೆಂಗೆಂತ್ ಪುಸ್ತಕಾಂತ್ ಆಸಾ)’ ಜಾಂವ್, ಆನಿ ಆತಾಂ ಹಾಂಗಾಸರ್ ’ಪ್ರೈಮ್ ಟಾಯ್ಮ್’ ಸಯ್ತ್ ಅಸಲ್ಯಾಚ್ ತಾಳೊನ್ ನಾಸ್ಚ್ಯಾ ಮಾಸೂಮ್ ಭುರ್ಗ್ಯಾಂಚೆಂ ರುದಾನ್.

ಹಿ ಕವಿತಾ ಕಾಂಯ್ ಕಿತೆಂ ಸಾಂಗೊನ್ ವೆತಾ. ಕಂಯ್‌ಗಿ ಶಾಬೀತಾಯೆನ್ ಆನಿ ಮಜೇನ್ ಜಿಯೆಂವ್ಚೆ ಲೀಡರ್ ಜೆದ್ನಾಂ ಝುಜ್ ಮಾಂಡ್ತಾನಾ ಅನಿ ಕಂಯ್‌ಗಿ ಜಿಯೆವ್ನ್ ಆಸ್ಚಿಂ ಟಿವಿಚೆರ್ ತಿ ಭಾತ್ಮಿ ಪಳೆತಾತ್. ಸಮಸ್ಸೊ ಕಸೊ ಜಾಂವ್ಚೊ ಜೆದೊಳ್ ಪಾಸೊನ್ ಅಪ್ಣಾಕ್ ತಾಚೊ ಪ್ರಭಾವ್ ಪಡಾನಾ ಜಾಯ್ತ್?. ಏಕ್ ಕವಿತಾ ರಸಿಕ್ ಜಾವ್ನಾಸ್ಚ್ಯಾಕ್ ಹಿ ಕವಿತಾ ಖರಿಚ್ ಜಾವ್ನ್ ಲಾಂಬ್ ಕಾಳ್ ಪರ್ಯಾಂತ್ ಮತಿಚ್ಯಾ ಪಡ್ದ್ಯಾಂತ್ ಖಂಚೊನ್ ಉರ್ತಲಿ ಮ್ಹಣ್ಚ್ಯಾಕ್ ದುಭಾವ್ ನಾ.

[ಕವಿತಾ] ಪ್ರೈಮ್ ಟಾಯ್ಮ್ [ಆಂಡ್ರು ಎಲ್. ಡಿ’ಕುನ್ಹಾ]

ಪ್ರೈಮ್ ಟಾಯ್ಮ್

ಪ್ರೈಮ್ ಟಾಯ್ಮ್ ವ್ಹಾಳ್ತಾ ರಗ್ತಾಬರಿ

ಉಜೊ

ಧುಂವೊರ್

ಭುರ್ಗೊ ಪಳೆತಾ.

"ಪಪ್ಪಾ... ಕೊಣ್ ತರಿ ಲೀಡರ್

ವೀಡಿಯೋ ಗೇಮ್ ಖೆಳ್ತಾ?"

ಬಾಪುಯ್ -

ಅಸಹಾಯಕ್ಪಣಾಚೊ ಅಸ್ತಮೆಂತ್

ಮೌನ್

ಟಿವಿ ಪಡ್ದ್ಯಾರ್

ಝಗ್ಲಾಣೆ

ಕ್ಣಿಪಣ್ ಉಟ್ತಾ, ವಿಸ್ಫೋಟ್

ಏಕ್ ಶ್ಹೆರ್ ಸೊರ್ಮೊಣ್!

"ಡಾಡಾ, ಕಿತ್ಯಾಕ್ ವಿಡಿಯೊ ಗೆಮಾಪರಿಂ

ದಿಸ್ತಾ ಹೆಂ.?"

ಬಾಪುಯ್ ಟಿವಿಚೊ ಆವಾಜ್ ಉಣೊ ಕರ್ತಾ.

ಪೂಣ್ ಪಾವನಾ.

ಭುರ್ಗ್ಯಾ ಕಾಳ್ಜಾಂತ್

ಕಿತೆಂ ತರಿ ಮೊಡ್ಚೊ ಆವಾಜ್

ಜೊ ಖಂಯ್ಚೊಚ್ ಬಟನ್ ದಾಬ್ಲ್ಯಾರ್

ಪರ್ತುನ್ ಘಡ್ಸುಂಕ್ ಜಾಯ್ನಾ!.

ಭುರ್ಗೊ ಘಾಯೆಲ್ಯಾ ಭುರ್ಗ್ಯಾಕ್ ಪಳೆತಾ

ರಡ್ತಾ!

“ಅನ್ ಡು ಕರ್,

ರಿ-ಸೆಟ್ ಕರ್ ಡಾಡಾ ಪ್ಲೀಜ್”!

- ಆಂಡ್ರು ಎಲ್. ಡಿ’ಕುನ್ಹಾ [ಮಾರ್ಚ್, 2026]

ಬರವ್ಪಿ

ಆಂಡ್ರ್ಯೂ ಎಲ್. ಡಿಕುನ್ಹಾ

1984 (ಪಾಟ್ಲ್ಯಾ 42 ವರ್ಸಾಂ) ಥಾವ್ನ್ ಕೊಂಕ್ಣೆಂತ್ ಸಾಹಿತ್ಯ್ ರಚುನ್ ಆಸ್ಚೊ ಆಂಡ್ರ್ಯೂ ಎಲ್. ಡಿಕುನ್ಹಾ ಏಕ್ ಲೊಕಾಮೊಗಾಳ್ ಕವಿ. ಗಾಂವಾನ್ ಗುರ್ಪುರ್ ಕಿನ್ನಿಕಂಬ್ಳಾಚೊ ತೊ ಅತಾಂ ಇಜಯ್ ವಸ್ತಿ ಕರ್ನ್ ಆಸಾ. ದೆವಾಧೀನ್ ಡೆನಿಸ್ ಆನಿ ಮೇರಿ ಡಿಕುನ್ಹಾ ಹಾಂಚ್ಯಾ ಸಾತ್ ಭುರ್ಗ್ಯಾಂ ಪಯ್ಕಿ ತೊ ನಿಮಾಣೊ. ತಾಣೆಂ 1000 ವಯ್ರ್ ಕವಿತಾಂ, 150 ಕ್ ಮಿಕ್ವೊನ್ ಲೇಖನಾಂ ಆನಿ 30 ಮಟ್ವ್ಯೊ ಕಾಣಿಯೊ ಬರಯ್ಲ್ಯಾತ್. ’ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ’ (2004 - ಆಶಾವಾದಿ ಪ್ರಕಾಶನ್), ’ಅಂಜುರಾಚೆಂ ಪಾನ್’ (2013 - ಕವಿತಾ ಟ್ರಸ್ಟ್) ಆನಿ ’ಆಯೆರಾಚೊ ಬೂಕ್’ (2014 - ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ) ತಾಚೆ ಪ್ರಕಟಿತ್ ಕವಿತಾ ಪುಂಜೆ. ತಾಚ್ಯಾ "ಅಂಜುರಾಚೆಂ ಪಾನ್" ಪುಸ್ತಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ, AIKWO (ಅಖಿಲ್ ಭಾರತ್ ಕೊಂಕಣಿ ಬರೊವ್ಪ್ಯಾಂಚೊ ಎಕ್ತಾರ್ ಪುರಸ್ಕಾರ್), ವಿಮಲಾ ವಿ. ಪೈ ವಿಶ್ವ್ ಕೊಂಕಣಿ ಕವಿತಾ ಪುರಸ್ಕಾರ್ ಆನಿ ಡಾ. ಟಿ. ಎಮ್. ಎ. ಪೈ ಪುಸ್ತಕ್ ಪುರಸ್ಕಾರ್ ತಾಕಾ ಲಾಬ್ಲ್ಯಾತ್. ಆಯ್ಲೆವಾರ್ ತಾಚ್ಯಾ "ಉಜ್ವಾಡಾಚ್ಯೆ ವೆಂಗೆಂತ್" ಕವಿತಾ ಪುಸ್ತಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ ಪ್ರಶಸ್ತಿ ಲಾಬ್ಲ್ಯಾ. 2023 ವರ್ಸಾಚಿ ರಾಜ್ಯ್ ಮಟ್ಟಾಚಿ “ಸಂದೇಶ ಕೊಂಕ್ಣಿ ಸಾಹಿತ್ಯ್ ಪ್ರಶಸ್ತಿ” ತಾಕಾ ಲಾಬ್ಲ್ಯಾ.

ಮಂಗ್ಳುರ್ ಆಕಾಶ್‍ವಾಣಿ ಥಾವ್ನ್ ಸುಮಾರ್ 40 ಕೊಂಕ್ಣಿ ಕಾರ್‍ಯಕ್ರಮಾಂ ತಾಣೆಂ ಸಾದರ್ ಕೆಲ್ಯಾಂತ್. ಸುಮಾರ್ 38 ವರ್ಸಾಂ ಆದಿಂ ರಾಕ್ಣೊ ಪತ್ರಾರ್ ‘ಆಂದ್ರು ಮಾಮ್’ ಲಿಖ್ಣೆ ನಾಂವಾನ್ ಭುರ್ಗ್ಯಾಂಚೊ ಸಂಸಾರ್ ವಿಭಾಗ್ ತಾಣೆಂ ಚಲವ್ನ್ ವ್ಹೆಲಾ. ಆಮ್ಚೊ ಯುವಕ್ ಪತ್ರಾರ್ ನಿರ್ವಾಹಕ್ ಸಂಪಾದಕ್ ಜಾವ್ನ್ ವಾವ್ರ್ ದಿಲಾ. "ಇಜಯ್ಚೊ ಕಳೊ" ಪತ್ರಾಚೊ ಸಂಪಾದಕ್ ಜಾವ್ನ್ ವಾವುರ್‍ಲಾ. ದಾಯ್ಜಿ ದುಬಾಯ್ ಬರವ್ಪ್ಯಾಂಚ್ಯಾ ಎಕ್ತಾರಾಚೊ ಸಂಪಾದಕ್ ಜಾವ್ನ್ ವಾವ್ರ್ ದಿಲಾ. ಮಾಯ್‍ಭಾಸ್.ಕೊಮ್ ಜಾಳಿ ಜಾಗ್ಯಾರ್, ರಾಕ್ಣೊ, ದಿರ್ವೆಂ, ಉಜ್ವಾಡ್ ಪತ್ರಾಂನಿ ಕವಿತಾ ಅಂಕಣ್ ತಾಣೆಂ ಚಲಯ್ಲಾಂ. ರಾಕ್ಣ್ಯಾರ್ ತಾಚೊ "ಕಾಸ್ ಸಂಸಾರ್" ಅಂಕಣ್, ನಮಾನ್ ಜೆಜು ಬಾಳೊಕ್ ಪತ್ರಾರ್ "ಖಾಸ್ ಸಂಸಾರ್" ಅಂಕಣ್ ಅನಿ ಆಮ್ಚೊ ಸಂದೇಶ್ ಪತ್ರಾರ್ ಸಕಾಳಿಕ್ ಲೇಖನಾಂ ಸರಾಗ್ ಪ್ರಕಟ್ ಜಾವ್ನ್ ಆಸಾತ್. ತಾಣೆಂ ಆಟ್ ಪುಸ್ತಕಾಂಕ್ ಪ್ರಸ್ತಾವನ್ ಬರಯ್ಲಾಂ. ವೆವೆಗ್ಳ್ಯಾ ಕೊಂಕ್ಣಿ ಕವಿತಾ ಸ್ಪರ್ದ್ಯಾಂಚೊ, ಕೊಂಕ್ಣಿ ಕವಿತಾ ಸಾದರ್ ಸರ್ತೆಂಚೊ ತಶೆಂಚ್ ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚ್ಯಾ ಪುಸ್ತಕ್ ಪ್ರಶಸ್ತೆಚೊ ವರಯ್ಣಾರ್ ಜಾವ್ನ್ ವಾವ್ರ್ ದಿಲಾ. ಗಾಂವಾಂತ್ ಆನಿ ಪರ್ಗಾಂವಾಂತ್ ಸಬಾರ್ ಕವಿತಾಗೋಶ್ಟಿ ತಾಣೆಂ ಚಲವ್ನ್ ವೆಲ್ಯಾತ್. ಕವಿತಾಂ ವಿಶಿಂ ಸಬಾರ್ ಪ್ರಬಂಧ್ ಮಂಡನ್ ಕೆಲ್ಯಾತ್ ಆನಿ ಉಪನ್ಯಾಸ್ ದಿಲ್ಯಾತ್. “ಕವಿತಾ ಟ್ರಸ್ಟ್” ಚೊ ತೊ ಟ್ರಸ್ಟಿ ಜಾವ್ನ್ ಆಸಾ. ಕವಿತಾ.ಕೊಮ್ ಜಾಳಿ ಜಾಗ್ಯಾರ್ ಸಂಪಾದಕೀಯಾಂ ತೊ ಬರಯ್ತಾ.

All 13 pages by this writer