ಕವಿತಾकविताPoem

ಸೊಧುಂಕ್ ಕುಮೊಕ್ ಕರಾ (- ವಲ್ಲಿ ಕ್ವಾಡ್ರಸ್)

[ಕವಿತಾ] ಸೊಧುಂಕ್ ಕುಮೊಕ್ ಕರಾ (- ವಲ್ಲಿ ಕ್ವಾಡ್ರಸ್)

ಹ್ಯಾ ಸಂಸಾರಾಂತ್ ಸುರ‍್ಯೊ, ಚಂದ್ರ್-ತಾರಾಂ, ದರ‍್ಯೊ ಸೊಡ್ನ್, ಚಡ್ತಿಕ್ ಬದ್ಲುನ್ ಆಸಾ. ಅಶೆಂ ಮ್ಹಣತಾತ್ ಜಾಣಾರಿ; ’ಹ್ಯಾ ಸಂಸಾರಾಂತ್ ಥಿರ್ ಆಸ್ಚೆಂ ಜಾವ್ನಾಸಾ - ಬದ್ಲಾವಣ್’, ಆನಿ ಹ್ಯಾ ಬದ್ಲಾವಣೆಂತ್ ಸತಾಚಿಂ ರುಪಾಂ, ನಿತಿಚಿಂ ಕಾಪಾಂ, ಮನ್ಶಾಪಣಾಚಿಂ ಕುಪಾಂ ಸಗಳೆಂ ಬದ್ಲುನ್ ಆಸಾ. ಆನಿ ಹ್ಯಾ ಬದ್ಲಾವಣೆಚೆಂ ಮೂಳ್ ಕಾರಣ್ ಕಿತೆಂಯ್ ಆಸುಂ. ಪುಣ್ ಏಕ್ ಜಿವೆಂ ಸತ್ ಮ್ಹಳ್ಯಾರ್ ಮನ್ಶಾಪಣಾಚೆಂ ವ್ಯಾಖ್ಯಾನ್ ಸಯ್ತ್ ಬದ್ಲುನ್ ಆಸಾ ದೆಕುನ್ ಪರ‍್ಗಾಂವಾಂತ್ಲೊ ಕೊಣ್ ಅಪ್ಲ್ಯಾ ಮಾಂಯ್‌ಗಾವಾಕ್ ಪಾವ್ತಾನಾ ನಿರಾಸ್‌ಪಣಾಂತ್ ತೊವ್ತಾ. ಎಕಾ ತೆಂಪಾರ್ ಸಾರ್ಕೊ ರಸ್ತೊ ನಾತ್ಲೊ, ಗಾಡಿ-ಬಸ್ಸಾಂ ನಾತ್ಲಿಂ, ದೆಕುನ್ ತ್ಯಾ ವೊತಾಂತ್ ಸಯ್ತ್ ಮಯ್ಲಾಂ ಚಲುನ್ ವೆಚಿಂ ಮನ್ಶಾಂ ಆಸ್ಲಿಂ. ಎಕಾಮೆಕಾ ಮೆಳ್ಚಿಂ ಸೆಜಾರ‍್ಚಿಂ, ವ್ಹಳ್ಕಿಚಿಂ, ಸಯ್ರಿಂ-ಧಯ್ರಿಂ ಎಕಾಮೆಕಾ ಮಯ್ಪಾಸ್ ದಾಕಂವ್ಚೆಂ ಆಸ್ಲೆಂ.

ಆತಾಂ ರಸ್ತೆ ಆಸಾತ್, ಗಾಡಿ ಆಸಾ, ಬಂಗ್ಲೆ ಆಸಾತ್, ಮನಿಸ್ ಆಸಾ ಪುಣ್ ತೆಂಪಾದ್ಲೊ ಮಯ್ಪಾಸ್ ಉಭ್ಲಾ ದೆಕುನ್ ಕವಿ ಎಕೀನ್‌ಪಣಾಂತ್ ಘರಾನ್ ಘರ್ ಭಂವುನ್ ಎಕಾ ತೆಂಪಾದಿಂ ಆಸ್ಲೊ ಗರೀಬ್ ಗಾಂವ್ ಆತಾಂ ಶೆರ್ ಜಾಲ್ಲ್ಯಾ ಸುವಾತೆನ್ ಅಪ್ಲ್ಯಾ ಮಾಯ್‌ಗಾಂವಾಕ್ ಸೊಧುನ್ ಭಂವ್ತಾನಾ ತಾಕಾ ಹ್ಯಾ ಗಾಂವಾಂತ್ ಸಗ್ಳಿಂ ಪರ್ಕಿಂಚ್ ಕಶಿಂ ದಿಸ್ತಾನಾ ’ಅಖೇರಿಕ್ ಪೊಳುನ್ ಗೆಲ್ಲ್ಯಾ ಆಪ್ಲ್ಯಾಂಚಿ ದಿಶಾ ಸೊಧುನ್ ಭಂವ್ತಾ, ಬಾಬಾನ್ ವ್ಹಳ್ಕಲ್ಲ್ಯಾ ಸತಾ-ನೀತಿನ್ ಪೊಳ್‌ಲ್ಲಿ ದಿಶಾ ಸಮ್ಜುಂಕ್ ಸೊಧ್ತಾ, ಬಾಬ್-ಮಾಂಯ್ಚೊ ಹುನುನ್ ಮಾಯಾಮೊಗ್ ಜಿರೊನ್ ಗೆಲ್ಲ್ಯಾ ಸುವಾತೆಕ್ ಸೊಧ್ಚೆಂ ದಿಸುನ್ ಯೆತಾನಾ ಅಖೇರಿಚ್ಯಾ ಪಂಗ್ತೆಂತ್ ಕಾಂಯ್ ಆಧುನಿಕತಾ, ತಾಂತ್ರಿಕ್ ಸಕತ್ ಗಳ್ಸುನ್ ತುಟೊನ್ ಪಡ್ಲೆಲ್ಯಾ ಗಾಂಚಾಕ್ ಗಡ್ಸುಂಕ್, ಮನ್ಶಾಪಣಾಕ್ ಪುರ್‌ಲ್ಲ್ಯಾ ಫೊಂಡಾಕ್ ದೆದೆಸ್ಪೊರ್ ಜಾವ್ನ್ ಸೊಧುನ್ ’ಮ್ಹಾಕಾ ಮನ್ಶಾಪಣಾಕ್ ಪುರ್‌ಲ್ಲೊ ಫೊಂಡ್ ದಾಕಯಾ, ಹಾಂವ್ ಮನ್ಶಾಪಣಾಚೆಂ ಡಿ.ಎನ್.ಎ. ಕಾಡುನ್ ಪರತ್ ಮನ್ಶಾಪಣಾಕ್ ಜಿವೆಂ ಕರುಂಕ್ ಪ್ರೇತನ್ ಕರ‍್ತಾಂ’ ಅಶೆಂ ಮೆಳ್‌ಲ್ಲ್ಯಾ ಮೆಳ್‌ಲ್ಲ್ಯಾಂಲಾಗಿಂ ಹಾಕ್ ಬೋಬ್ ಕರ್ಚೆಂ ದಿಸುನ್ ಯೆತಾ. ಕವಿತೆಚ್ಯಾ ಅತ್ಮ್ಯಾಕ್ ಪಳೆಂವ್ಚೆಂ ತುಜೆರ್ ಸೊಡ್ತಾಂ.

[ಕವಿತಾ] ಸೊಧುಂಕ್ ಕುಮೊಕ್ ಕರಾ (- ವಲ್ಲಿ ಕ್ವಾಡ್ರಸ್)

ಸೊಧುಂಕ್ ಕುಮೊಕ್ ಕರಾ

ಮಾಂಯ್‌ಗಾಂವಾಕ್ ಪಾವ್ಲಾಂ, ನಿರಾಸ್‌ಪಣಾಂತ್ ತೊವ್ಲಾಂ

ಎಕೀನ್‌ಪಣಾನ್ ಸೊಧುನ್ ಘರ್ ಘರ್ ಭಂವ್ಲಾಂ

ಮಾಂಯ್‌ಯೀ ಝಳ್ಕನಾ, ಆಧ್ಲೊ ಗಾಂವ್‌ಯೀ ದಿಸಾನಾ

ಬಂಗ್ಲ್ಯಾಂನಿ ಜಿಯೆಂವ್ಚ್ಯಾ ಜಾಣಾರ‍್ಯಾಂನೊ

ತುಮಿ ಕಾಂಯ್ ಜಾಣಾಂತ್ ತರ್ ಮ್ಹಾಕಾ ಸಾಂಗಾ

ಮ್ಹಜ್ಯಾ ಗಾಂವಾಕ್ ಹ್ಯಾ ಶೆರಾಂತ್ಲೊ ಕೊಣೆಂ ವೆಲಾ

ವೊತಾಕ್ ಖೊಂಡ್ತಾಸ್ತಾಂ, ಹ್ಯಾ ಖಡ್ಪಿ ಜಾಗ್ಯಾಚೆರ್, ಬಾಬ್ ಸಾಂಗ್ತಾಲೊ;

ಸತ್ ಕೆದಿಂಚ್ ಮೊರಾನಾ ಪುತಾ ನೀತ್ ಕೆದಿಂಚ್ ಬಾವಾನಾ

ಬಾಬಾಚ್ಯಾ ಘಾಮಾ-ರಗ್ತಾಂತ್ ಉದೆಲ್ಲ್ಯಾ ಶೆತಾಂ-ಭಾಗಿಂತ್

ಬಾಬಾಕ್‌ಚ್ ಕಾಡುನ್ ಕಂಯ್ ಪಯ್ಶಿಲ್ಯಾ ಆಶ್ರ್ಯಾಂತ್ ಉಡಯ್ಲಾ

ತುಮಿ ಕಾಂಯ್ ಜಾಣಾಂತ್ ತರ್ ಮ್ಹಾಕಾ ಸಾಂಗಾ

ಬಾಬಾನ್ ವ್ಹಳ್ಕಲ್ಲೆಂ ಸತ್-ನೀತ್ ಪೊಳ್‌ಲ್ಲಿ ದಿಶಾ ಸಮ್ಜುಂಕ್ ಆಯ್ಲಾಂ

ಕೊಡ್ಕ್ಯಾಂತ್ಲ್ಯಾ ಮೊಡ್ಕೆಂತ್ ಶಿಜ್‌ಲ್ಲಿ ಪೇಜ್

ಬಾಬಾ ಮಾಂಯ್ಚ್ಯಾ ಮೊವಾಳಾಯೆಪರಿಂಚ್ ಹುನುನ್

ತ್ಯಾಚ್ ಪೆಜೆಂತ್ ಮನ್ಶಾಂ ಗಾಯೊ ಪೆಟೆ ಮಾಜ್ರಾಂ ದಾದೊಸ್

ಆತಾಂ ರಾವ್ಳೆರಾ ಭಾಂದ್ಪಾಂತ್ ನರ್ ಮನೀಸ್ ನಾ

ತುಮಿ ಕಾಂಯ್ ಜಾಣಾಂತ್ ತರ್ ಮ್ಹಾಕಾ ಸಾಂಗಾ

ಬಾಬ್-ಮಾಂಯ್ಚೊ ಮೋಗ್ ಜಿರೊನ್ ಗೆಲ್ಲ್ಯಾ ಸುವಾತೆಕ್ ಸೊಧುನ್ ಆಸಾಂ

ವಿಗ್ಯಾನಾಂತ್ ಸಗ್ಳೆಂ ಪಾಟಿಂ ಮೆಳ್ತಾ ಕಂಯ್

ನ್ಯೂರೊ ನೆಟ್‌ವರ್ಕಾಚ್ಯಾ ತುಟ್ಲೆಲ್ಯಾ ಗಾಂಚಾಕ್ ಪರತ್ ಘಡ್ಸಿತಾಂ

ಅಖೇರಿಕ್ ಗೆಲ್ಲ್ಯಾ ಆಪ್ಲ್ಯಾಂಚಿ ದಿಶಾ ತರ್‌ಯೀ ದಾಕಯಾ

ಫೊಂಡ್ ಉಸ್ತುನ್ ಡಿಎನೆಕ್ ಸೊಧುನ್ ಕಾಡ್ತಾಂ

ತುಮಿ ಕಾಂಯ್ ಜಾಣಾಂತ್ ತರ್ ಮ್ಹಾಕಾ ಸಾಂಗಾ

ಮನ್ಶಾಪಣಾಕ್ ಪುರ್‌ಲ್ಲ್ಯಾ ಫೊಂಡಾಕ್ ಸೊಧುನ್ ದಿಯಾ

- ವಲ್ಲಿ ಕ್ವಾಡ್ರಸ್. [ಎಪ್ರಿಲ್, 2022]

ಬರವ್ಪಿ

ವಲ್ಲಿ ಕ್ವಾಡ್ರಸ್

1984 ಇಸ್ವೆ ಥಾವ್ನ್ ಸಾಹಿತ್ಯಿಕ್ ವಾವ್ರ್ ಕರುನ್ ಆಸಾ. ಕಥಾಕಾರ್, ಕವಿ, ಕಾದಂಬರಿಕಾರ್, ವಿಮರ್ಶಕ್, ಸಂಪಾದಕ್, ಪ್ರಕಾಶಕ್ ತಶೆಂಚ್ ತರ್ಜಣ್/ಲಿಪ್ಯಂತರಣಾಚೊ ವಾವ್ರ್ ಕರುನ್ ಆಸಾ. ಕಾಣಿಕ್ (1988-1991), ದಾಯ್ಜ್.ಕೊಮ್ (2003-2013), ಪಯ್ಣಾರಿ.ಕೊಮ್ (2015 ಥಾವ್ನ್), ಕೊಂಕಣ್‌ಗಾರ್ ಪ್ರಕಾಶನ್ (2020-2024), ಆಶಾವಾದಿ ಪ್ರಕಾಶನ್ (2000 ಥಾವ್ನ್) ಸಂಪಾದಕ್ ಜಾವ್ನಾಸಾ. ಕನ್ನಡ, ನಾಗರಿ ತಶೆಂಚ್ ರೊಮಿ ಲಿಪಿಂನಿ ಬರಯ್ತಾ.

ಪುಸ್ತಕಾ ರುಪಾಚ್ಯೊ ಕಾದಂಬರಿ; ಸಂಘರ್ಷ್ (1991), ತುಂ ಮ್ಹಜೆಂ (1988), ಪಾಟಿಂ ಗಾಂವಾಕ್ (2002).

ಮೊಟ್ವ್ಯಾ ಕಾಣಿಯಾಂಚಿಂ ಪುಸ್ತಕಾಂ; ಆಶಾವಾದಿ (2001), ಖಿಳೊ (2003), ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ (2005), ಸತಾಂ ಆನಿ ಖತಾಂ (2005), ಬಂಧ್ (2017), ಸಾಂಕವ್ (2020, ನಾಗರಿಂತ್) ಮಾಯಾನಗರಿ (2022), WFH ಆನಿ ಹೆರ್ ಕಥಾ (2024), ಕವಿತೆಚಿಂ ಪುಸ್ತಕಾಂ ಚ್ಯಾರ್ ಮುಖಾಂ (2002), ಕಟ್‌ಪುತ್ಳಿ (2003), ದರ್ಭಾರಾಂತ್ಲಿ ಪಿಂರ್ಗೊಣ್ (2005), ಬಜಾರ್ (2017), ಭಿತರ್ಲೊ ಕವಿ (2021),

ಕವಿತಾ ಅಧ್ಯಯನಾಚಿಂ ಪುಸ್ತಕಾಂ; ಕವಿತಾಪಾಠ್ (2005), ದರ್ಯಾಕ್ ಉದಕ್ (2006), ಕಾಳೊಕ್ ನಾತ್ಲೊ ಗಾಂವ್ (2007), ಮುಗ್ದನಾತ್ಲಿಂ ಗಿತಾಂ (2017), ಸುಕ್ತಿ ಭರ್ತಿ (2019). ಕವಿತಾಪಾಠ್ ಮ್ಹಳ್ಳಿಂ ಕವಿತೆಂಚೆರ್ ಅಧ್ಯಯನಾಚಿಂ 50 ವಯ್ರ್ ಕಾಮಾಸಾಳಾಂ ಚಲಯ್ಲ್ಯಾಂತ್.

ಸಂಪಾದಕೀಯಾಂಚಿಂ ಪುಸ್ತಕಾಂ; ಮೊಳ್ಬಾವಯ್ಲಿಂ ಸಪ್ಣಾಂ (2005), ಮುಖಾಮುಖಿ (2017), ಪಡ್ಸಾದ್ (201)

ಕವಿತಾ ಸಂಕಲನಾಚಿಂ ಪುಸ್ತಕಾಂ; ಮೊತಿಯಾಂ ಆನಿ ತಾರಾಂ (2005), ತಿಂತೆರಾಂತ್ ಪಿಂತುರಾಂ (2006), ಉತ್ರಾಂತ್ ಸೂತ್ರಾಂ (2006), ಮಯ್ಲಾ ಫಾತೊರ್ (2020).

ಕಥಾ ಸಂಕಲನಾಂಚಿಂ ಪುಸ್ತಕಾಂ; ವಿಸಾವ್ಯಾ ಶೆಕ್ಡ್ಯಾಚ್ಯೊ ಕಾಣಿಯೊ (2006), ಸುರ್ಯೊ ಉದೆತಾ (2019), ಸುರ್ಯೊ ಉದೆಲಾ (2024), ಕಥಾ ಅಧ್ಯಯನಾಚಿಂ ಪುಸ್ತಕಾಂ; ಕಥಾವಿಹಾನ್ (2025), ಕಥಾಪಾಠ್ (2025), ಚಲ್ ದೋನ್ ಚಂದ್ರಾಂಕ್ (2025), ಸಾಳಕಾಚ್ಯಾ ಸಿರಿವಂತಾಚ್ಯೊ ಕಥಾ (2025), ಕಥನ್ (2026). ಕಥಾಪಾಠ್ ಮೊಟ್ವ್ಯಾ ಕಾಣಿಯಾಂಚೆರ್ 50 ವಯ್ರ್ ಕಾಮಾಸಾಳಾಂ ತಶೆಂಚ್ ವೆಬಿನಾರಾಂ ಚಲಯ್ಲ್ಯಾಂತ್.

ಭಾರತೀಯ್ ಸರ್ಕಾರಾಚ್ಯಾ ಸಂಸ್ಕೃತಿ ವಿಭಾಗ್ (CCRT) ಥಾವ್ನ್ (The Cultural Aspects of Sidhdhis in Karnataka) ಸಂಶೊಧನಾಂಕ್ ಸೀನಿಯರ್ ಫೆಲೊಶಿಪ್ (2019-2021) ಲಾಭ್ಲಾಂ. ದಿವೊ ಸಾಹಿತ್ಯಿಕ್ ಪುರಸ್ಕಾರ್ (2003), ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿಚಿಂ ಉತ್ತೀಮ್ ಪುಸ್ತಕಾಂ (2005, 2006, 2018), ಮಥಾಯಸ್ ಕುಟ್ಮಾಚೊ ಕವಿತಾ ಟ್ರಸ್ಟ್ ಪುರಸ್ಕಾರ್ (2019), ವಿಶ್ವ ಕೊಂಕಣಿ ಕೇಂದ್ರಚ್ಯಾ ವಿಮಲಾ ವಿ. ಪೈ. ಫೌಂಡೆಶನಾಚೊ ಪುರಸ್ಕಾರ್, ಸಂಧೇಶ ಪುರಸ್ಕಾರ್ (ಕೊಂಕಣಿ ಸಾಹಿತ್ಯ್, 2023), ದಾಯ್ಜಿ ದುಭಾಯ್ ಸಾಹಿತ್ಯಿಕ್ ಪುರಸ್ಕಾರ್ (2023), ಕೊಂಕಣಿ ಅಕಾಡೆಮಿ ಗೊಂಯ್ ಥಾವ್ನ್ ಮಾಧವ್ ಮಂಜುನಾಥ್ ಕೊಂಕಣಿ ಸೇವಾ ಪುರಸ್ಕಾರ್ (2023) ಲಾಭ್ಲ್ಯಾತ್.

All 79 pages by this writer