वयट हौस

जागतीक राजकीय परिगत आज देशाच्या हळ्ळे हळ्ळेंनी पाववंक वेग-वेगळीं माध्यमां कारण. हीं माध्यमां सयत ’अपलो मुनाफो’ पयलें हातेर करून हाका वेग-वेगळे रंग दितात. आनी ताचो परिणाम जावन आज समाजेचो तीर तिर्कूट जाल्ल्याचो परिणाम आमी भगून आसांव. कोणायक‌यी समधान म्हळ्ळें ना, एकामेका सगळे दुस्मानकायेंत, हग्यान तशेंच मोस्रान दीस काडचें सदांचें जालां. कांय एक तेंप आसलो; हेरांच्या दुकिंत दूक पांवचो, हेरांच्या संतोसांत संतोस पांवचो लोक समाजेंत चडीत मापान आसलो. पूण आयच्या काळार ती परिगत उल्टी जाल्या देकून हेरांच्या दुकांत संतोस पांवचें तशेंच हेरांच्या संतोसांव मोस्रान भर्चें मेटां मेटांनी दिसोन येता.

रोनालड मोंतेरो एक विभिन्न कथाकार म्हणून ताच्यो एकेक कथा गवाय दितात. ही कथा सांकेतीक रितीन जागतीक राजकीय पिंतुराक समाजेंत कितल्या सोभीत रितीन आर्सो धर्ता म्हळ्ळें काणी वाचून गेल्लेपरीं कळता. कोंकणिंत कथाकार उणें जावन गेल्यात पूण डिजिटल माध्यमान थोड्यांक तर‌यी परत कथा बरंवच्या वाटेक परत वोडन हाडलां तें खरेंच दाधोसकायेचें.

वयट हौस

White House

वोरां सकाळिंचीं ०५.०५ जाल्लीं. दोळे गसटून कषटांनी म्हळ्ळ्या बरीं केवीन खटल्यार थावन उटलो. टऱ्याक सूट न्हेसोन धा मिनुटांनी भितर तो जोगिंग कर‍चे खातीर रसत्याक देंवलो. दुबाय थावन रजेर गांवांक आयिल्ल्या उपरांत सदांच्या दिस्पडते थावन तो निस्राल्लो. ह्या विशीं काल्च्या सांजेर ग्लासाक तिस्रो पेग्ग वोत्ताना बायलेन चत्राय दिल्ली.

गांवच्या मातियेचो पर्मळ‌च विंगड तो. गलफाचीं रेंवेंत जीव नात‌ल्लो भुर्ग्यापणाच्या दिसांनीं नाचोन खेळ‌ल्ल्या सुवातेर जायती बदलावण जाल्ली. मातियेचीं रसत्याक डामर पड‌ल्लो तरी थंय थंय उदेवन आयिल्ल्या व्हड व्हड फोंडकुला थावन तांबडी माती आपलें असतित्व पाचार‍तालें.

ह्या लांब वेळांत मेटां मेटांनी बदलाप जळकातालें. जिणियेच्या संघरषांत आदल्या दिसांची ताका विसर पड‌ल्ली. कामाच्या राटावाळ्यांनी तो संसार विस्राल्लो. कामा निमतीं सबार राषट्रां तो भोंव‌ल्लो तरी हाच्ये मधें आपल्याच मांय गांवांक तो पर्की जाल्लो. गलफा थावन गांवांक देंव‌ल्ली खबार आयकोन गीदाबरीं धावणी मार‍च्या इन्सुरेन्स एजेंटां थावन तशेंच आवकास सोधून रीण विचार‍तेल्यां थावन चुकारी मार‍चें इराद्यान उज्वाडचे आदिंच जोगिंग संपवंक ताणें चिंत‌ल्लें. सकाळिंचीं शेळोर वार‍या सवें सूऱ्यो तांबड्या रंगांत मोडांक चीर‍न म्हळ्ळे बरीं दिगंताक चडतालो. ताचीं तीं रंगाळ कीर्णां पाचव्या धर्तेक वेंग्ताना केविनाच्या जिवांत एका थराचो उल्लास भोगलो.

प्रथवेच्या सोभायेचेर थंय हांगा अत्याचार जाल्लो तरी बदलावणेची गर्ज आस‌ल्ली. तवळचें क्रिकेट खेळचें मैदानांत टेरेसाचीं घरां उबीं जाल्लीं.

हळ्ळी ‘हळ्ळी’ जावन उरोंक नां. हळ्ळेक गांवच्या रूपाचो संद्राप आयिल्लो. हो वेगिंच्च्याक बदलाल्या बरीं नां. सबार वर‍सां लाग्तालीं म्हळ्ळें केविनाचें चिंताप सत जावनास‌ल्लें. तीं सबार वर‍सां उत्रोन गेल्लीं तें केविनाच्या गमनांत गेल्लेंच नां.

सांजेच्या जेवणा पयलें केविनाच्या आवयन सबार‌शी माहेत दिल्ली. जेमियाब, मार्काब, फेलिसाबा, बेज्मियाब आनी रेन्नी अशें संवाद भोव कुतूहलबरीत जावनास‌ल्लो. हाचे संवें सोर‍याच्या ग्लासांत च्यार पेग्ग खाली जाल्लेच कळवंक नात‌ल्लें.

एका गुंवडे संगीं देंवणेर उज्व्या देगेन आस‌ल्लें जेमियाबाचें घर कोलवाचें घर माज्वोन आतां टेरेसाचें जाल्लें. वर‍सां आदीं गोर‍वां येनाशें सार‍या रुकाचो, बोडियांनीं बांद‌ल्लो अकाडो वचोन आज सिमिटेचो दोरो उबो जाल्लो. जेमियाबाचो पूत जेरी पंद्रा वर‍सां थावन दुबायांत इलेकट्रिशियनाचीं काम कर‍तालो. गलफाच्या दुडवान जेमियाबा थंय उदर्गत हाड‌ल्ली शेण काड‌ल्ल्या आंगणांत ’इंटर‌लोक’ लागयिल्ले.

सकाळिंचें वोत तीक्ष्ण जावनास‌ल्लें!!!

MAR HABA

रसत्याच्या दाव्याक आसच्या मार्काबाच्या दोर‍या वयलो हो बोर्ड भोव परिचीत. स्टीलाच्या दाट अक्षरांनी वणदीर लावन सबाराशीं वर्सां जाल्लीं. अशें मेळ्ळ्यार अर‍भी बाशेंत स्वागत म्हणोन मार्काबान्ंच सांग‌ल्लें. सबार वर‍सां तो कुवेयटांत शेखां गेल्ल्या घरांत ड्रावर जावन काम केल्ल्यांत. शेखांच्या घरांनीं घडचें तसले सबार काणियो ताचेलागीं आस‌ल्ल्यो. आरबी चेडवांक तो ’हसती पिलां’ म्हणोन उल्लेख कर‍तालो तरी केवीन आनी ताचे सांगाती मार्काबाचे शिर्पुट्यो सोभीत धुवांक पळेवंक गेटी मुखार उमकाळताले.

बोर्डा वयलें ’H’ अक्षर झडोन पड‌ल्लें. या कोणी तरी पोली भुर्ग्यांनीं निकळायिल्लें जावंक पुरो. केवीन आपलेसतकीं हासोंक लागलो गलफ राषट्राचेर आनी आपल्या नावांचेर मार्काबाक आस‌ल्लें घमंड हांगासर उटोन दिसतालें. बायलेच्या नांवां संगीं जोडून या भुर्ग्यांच्या नांवां मेळवन घर‍चीं नांवां दवर‍च्या ह्या काळार मार्काबाची विभिन्नता चिंतून केवीन मती भितर‌च गुणगुणलो. संसाराच्या खंच्या मुल्यार पावल्यारी असलें एक क्यारेकटर सगळ्यांनियी आसता! केविनाचें मुखलीं मेटां थोडीं जडायेचीं जालीं. कदमां अडचल्ल्याबरी भोगलें. सदीळ जाल्ले मोच्यांचे नाडे अर्सुंक तो बाग्वताना धर्तेचो पर्मळ ताच्या नाकाचीं फुडां उसवंक लागलो. आजून तो पर्मळ माज्वोंक नात‌ल्लो! वर‍सां आदलीं सिंतिमेंतां आतां ताचें भुर्ग्यापणाचे कितलेशे दीस हांगासर पाशार जाल्लें!!! उज्व्या कुशीन रेगन पिंटो आनी दाव्या कुशीन रेन्नी लोबोन रेगनाच्या घराचेर दीषट उबारून पळेंवची सकत केविना थंय नात‌ल्ली. भुर्ग्यापणाचो अधीक मोगाचो ईषट आज सिंगापूर पाव‌ल्लो!

पयशे, अंतसत आनी हुद्दो आपणावच्या धांवणेंत ताणें लागशिल्या संबंधांक तुटयिल्लें

शिंपडोन गेल्ल्या इषटागतिच्या गांचांक मेळवंक जायतीं पेस‌बूक आनी वाटसप तसलीं माध्यमां आस‌ल्लीं. पूण तुटायिल्ल्या गांचांक पर्त्यान गांटावंक तीं असफल जाल्लीं!

तीं सांगातां चोरियां इसकोलाक चक्कर मारून पळेयिल्लीं पिंतुरां...

वांटून खेल्लीं तीं आंगडिचीं आड खाणां...

पयले पावटीं सांगातां चाक‌ल्ली ती बियरिची रूच... रेगना मारिफात रेन्नी थंय वाडयिल्ली ती सळावळ रेन्निचो हात पयल्या पावटीं आपल्या हातांत घेताना जाल्लो तो अनभोग!!

पयल्या पावटीं रेन्निच्या गालार दिल्ल्या उम्याचो स्वाद!! केविनाच्या दोळ्यां मुखार पिंतुरां बरीं उदेलीं!! केविनान जिण्येच्या हऱ्येका पांवड्यार नवें संबंध रच‌ल्लें आनी पर्न्यांक कचऱ्यांत उडयिल्ले!!

रेन्निचो बापूय बेब्दो तोमस मळबाक चोयतालो!!! रेन्नी सौदी अरेबियांत सबार वर‍सां काम करून गावांक आयिल्ली खबर आसल्यारी ताका मेळचें धैयर पावलें नां! घाम कपलार थावन निरंतरी देंवतालो. सिकेरामाच्या ’White House’ मुखार रावोन ताणें सिग्रेट जळयली.

’White House’ चेर नदर मार‍ताना सबार तेंपा थावन ताणें पात्येवन आयिल्लें राजांव आज सत म्हणोन रुजू जालें. वेळारोदाची पर्तवणी!!!

बोरियांनी भर‌ल्ल्या सिग्रेटिच्या धुंवरान ताका चिंत्पाक अस्पद करून दिल्लो. एका काळार गांवांक सरी जावन दूदाबरीं धव्या आयील पेंयटांत पर्जळचें ’ White House’ आज बदलोन लोणिये बरीं मंद जाल्लें.

जयत गेटिचेर पोड‌ल्लो भांग्राळो रंग माती खावन येंवच्या लोंकडाक चिडकोन रावोंक सकलोनां. तवळच्या कालार अपरूप पळेवंक मेळचे विदेशी डूम लायटा फुटोन आनी मोडोन वायरांचेर उमकाळताले. नाजूक रितीर मारबलार कांतायिल्लीं हेनरी सिकवेरा धूळ आनी पावसा संगीं जगडन म्हळ्ळ्याबरीं श्हेळो मांड‌ल्ल्या कुंद्या मधें अपलें असतित्व उरंवचें प्रयत्न कर‍न आसा तशें दिसतालें.

सदांच बंध आस‌ल्ल्या गेटी पाटल्यान गर्जोंच्या सुण्यांचो आवाज नपंयच जालो! बंद गेटी उग्त्यो जाल्ल्यो! वठारांत एकल्या कडेन मात्र आस‌ल्लें नवेंच कार आतां पर्नें जाल्लें!

बुरुजा बरीं उबें आस‌ल्लें घर आतां आदीं मागां कोलवाच्या आनी नळ्यांच्या घरा थावन बदलाल्ल्या टेरिसाच्या सुत्तुरांच्या घरांनी धाड घाल्ले बरी भास जातालें. तार‍वाटी सिकेरामाच्या जिण्येची नक्षाच बदलालिगाय? राक्साखासताच्या पेट्याची घर्जोणी केदाळा थांबली?

व्हय राजांव सार्कें जावनास‌ल्लें!!!

आदीं ग्रेसत आस‌ल्ले क्रमेण आपलो वैभव होगडायिल्ले. उंचायेर राज कर‍तेले कितलेशे धर्णीक शेवटाल्ले उन्नत हुद्द्यार आस‌ल्ले अधोगतीक पाव‌ल्लीं निदर्शनां भंवतीं जायतीं आस‌ल्लीं.

अधानक म्हळ्ळेबरीं अमेरिकाचें चित्रण केविना मुखार उदेलें बहुशा ’ White House’ च्या नांवां वर्वीं जांवकी पुरो.

केवीन गलफाचीं सर्व राषट्रां भोंव‌ल्लो. उदेंतिंची राषट्रां पऱ्यांत ताणें पळयिल्लीं. ताचें काम‌च अंतर‌राषट्रीय मट्टाचें जावनास‌ल्लें. सिंगापूर आनी दुबायांतलीं दिगंताक चुंबन दिंवचीं बांदपां ताणें हर्शें म्हळ्ळ्याबरीं पळयिल्लें. दुबायांतल्या त्या बंजर मरुभूमिंत धरोण फुटोन मळबाबरीं ताच्या दोळ्यां मुखार जयत माळयांचीं बांदपां अळम्याबरीं उदेवन येताना ताणें साक्स दिल्ली. पंचवीसा वर्नी चडीत राषट्रां भोंव‌ल्लो अनभोग आस‌ल्लो तरी अमेरिका विणें तें अधुरें दीस‌ल्लें.

अमेरिका प्रगतेंत सर्वां प्रास ऊंच!!! तांत्रिकतेचें भंडार सर्व क्षेत्रांत एक मेट मुखार!! पूण!?

थंयसर पाव‌ल्ले तवळ ताका निराशा भोग‌ल्ली. ताणें अपेक्षा केल्लें कितेंच नवेसांव ताच्या दोळ्यांक जळकालें नां. ’Manhatten’ च्या बांदपा मदले रसते ताका पर्नें दिसलें. बांदपांची उंचाय प्रसतूत काळार सामान्य दिसली. ’Brokline’ न्हंयचो प्रख्यात सांकोव कूळूर‍च्या संख्या थावन कितेंच विबीन म्हण ताका भगलें नां! वेळ बदलाल्लो!!

पन्नास शेंबर वर‍सा आदीं संसार बंजर आसताना आतां दोळ्यां मुखार दिसची प्रगती तवळ हांगासर आस‌ल्ली म्हणोन पार्कुंक तो सकलो ना!

हांगाच्या नागरीकतेची ग्रेसत‌काय संसाराच्या ऊर‌ल्ल्या देशांच्याची कितल्याकी मुखार आसा म्हळ्ळें केविनाच्या गमनाक गेलें नां. तो वर्तमानांत आस‌ल्लो!!!

ल्हान राषट्रांनी उबीं केल्लीं कांक्रिटाची रानां झिळमिळताना न्यूयार्का शहराच्या बांदपांनी रंग होगडायिल्लो!! बिल्कूल सिकेरामाच्या ’ White House’ च्या वणदी बरीं. सूऱ्यो तेज जावन येतालो. वेळ उतर‍न वेतालो. फरलांगो पयस चिक्केशें उबार गुड्या सुवातेर दोन घरां दिसतालीं.

इस्रायेल‌गार बेज्मियाब आनी पावोसतीन बाय!! पयसा थावन पळेताना एकामेकाक लागोन आस‌ल्ल्या बरीं दिसतालें तरी हांचे मधें अंतर भाव चड आस‌ल्लो. वर‍सां आदी थावन चलोन आयिल्ली हांचे मदली लडाय आजून थांबोंक नात‌ल्ली. हांचें हें झगडें फकत्त ह्या वठराक मात्र सीमीत जावन नात‌ल्लें.

गाळी, शिरापा थावन कोयती आनी दांडे पऱ्यांत! फिर्गज पाद्री थावन बिस्पाच्या दफ्तरा म्हणासर!! पंचायता थावन पोलीस स्टेशना पऱ्यांत!! फकत कोडतिचीं मेटां चडचें एक बाकी ऊर‌ल्लें. इस्रायेल‌गार बेज्म्याबान आपलो जागो फार‍ला. जागो मेजताना शिंतऱ्यांनी भितर घाला म्हणोन फावोसतीन‌बाय‌चें कंपलैंट जावनास‌ल्लें.

इस्रायेलाक आदेवस मागोन आयिल्ल्याउपरांत थंयच्या अनभोगांत आपल्या जाग्यार आधुनीक तांत्रिकतेंत कृषी कर‍चें पळेवन फावोसतिनाक मोसोर म्हणोन बेज्म्याबाची पीऱ्याद.

पागोराक तेंकून माडा रोंपियो दवर‍ल्यांत आपल्या पाक्सार नारल पडोन नळे फुटतात म्हणोन फावोसतिनाचें रुदान तर पड‌ल्लीं मोडलां आनी नारल चोरी कर‍ता म्हणोन बेज्म्याबाचीं दुरां!

पेट्याक विकाळ खाण दीवन जिविशीं मारला म्हण पावोसतिनान बेज्म्याबाचेर गंभीर आरोप घाल्लो तर गोर्वांच्या गोट्या थावन येंवचें म्हेळें उदक आपल्या पागोरा मुळांत व्हाळोंक दिला म्हणोन बेज्म्याबाचो गालाटो!!

कितलेश्या वर‍सां थावन एक न्हय तर अन्येका कारणांत झगडें! सुत्तुरांतलीं फावोसतिनाक गुप्तीं सांगात दितालीं तरी उग्त्यान बेज्म्यबाच्या तोंडाक पडचें धऱ्या कोणायकी नात‌ल्लें. सांजेच्या उलवण्यांत केविनाच्या आवयन हाचेविशीं सांग‌ल्लें. आनी ह्या निमतीं विगारान दूसऱ्या मिसा उपरांत वाड्यागारांची जमात आपयिल्ली. अशें केविनाच्या आवयन आदल्या रातीक‌च दूसऱ्या दिसाचें रांदून दवर‌ल्लें.

तक्रार!!! तर्क आनी इत्यर्थ!!!

इस्रायेल‌गार आनी पावोसतिना मधें!!!

वोरां १२:३५ दनपराचीं...!!

माती पडोंक हांची सदांची करांदाय केविनाची मांय कपाला वयलो घाम कापडाच्या पालवांत पुसून मेटां चडालागली.

’खंयसर पावलें तुमचें मीटिंग?’ केविनाक गांवच्या राजकीयांत अछानक म्हळ्ळ्या बरीं आसक्त उदेली. दुबाय‌गार जेमियाब चूप!!

कुवेयट‌गार मार्काबाची जीब बंध! सिंगापूर‌गार फेलिसाबाक वोगेच‌च बसोंक बायलेची ताकीद दिल्ली दिसता.

सौदिगार‍न रेन्नी मोबायलार खेळतालें. बापय तोमासाक काल्चें पिर्वोंक नात‌ल्लें दिसता दोळे पिळी पिळी कर्न पळेतालो केविनाची मांय पुर्पुरात्त वेताली.

तुवें अशें दुबाय‌गार, कुवेयट‌गार म्हणोन सर्वांक वोलायल्यार तिंय तुका ’गलफागार‍न’ म्हणोन आपयतलीं. तुजो एकलो पूत दुबायांत तर दुस्रो बायरेयनांत आनी तिस्रो मसकत आसा न्हय‌गी? केविनान‌यी आवयक सोडन दिलें नां.

फावोसतीन उजो वोंक्तालें इस्रायेल‌गार मुंगुसाबरीं गुसू गुसू कर‍न घड्येक एक पावटीं वोटाचेर दीषट घाल्तालो. विगार मटवें मागणें करून भुर्ग्यांची दोतोर‍न आसा म्हणोन गुर्कार सिकेरामाच्या हातांत ओप्पोन दीवन चुकारी मार‍न धांवलो.

सिकेराम... गुर्कार! केविनाच्या आवयन दीर्घ श्वासासंगीं मुखार्सिलें.

सिकरेमान गत्तान दाट मिशियो वोळायल्यो! खांद्या वयलें निस्राल्लें शाल दोन पावटीं सार्कें केलें. तीन पावटीं धव्या मुंडुचे मिरियो मेचल्यो आनी धव्या शर्टाचे बुतांव सार्के केले. एकामेका थंय सोड‌दोड दाखंवचे विशीं फावोसतिनाक आनी इस्रायेल‌गाराक समजोंवच्या वग्ता हाताच्या बोटांचे च्यार मुदियो झळकावंक विस्रालो नां तिच्या उत्रांनी व्यंग्य आस‌ल्लें. सिकेराम नासताना हांगासर कितेंच चलाना. कोणी मेल्ल्यार फोंड खोंडुंक चामादोराक पऱ्यांत हुकूम सिकेरामा थावन्ंच! इगर्जेचे नारल काडुंक सयत ताणें सांग‌ल्ल्या बरी तोच गुर्कार तोच आडळतेदार. तितलें मात्र न्हय आसतां ह्या वर‍साच्या फिर्गज फेसताक तोच फिर्जेंत! हेनरी सिकरेरिचेंच राज केविनाची आवय पुर्पुरोन्ंच वेताली.

सकाळिंच्या पेपर‌वाल्याच्या कांपिणेक केवीन जागो जालो. केविनाची मांय च्हायेच्या कप्पासवें फोनार काल्च्या मीटिंगा विशीं गजाली कर‍ताली.

अखरेक खंयसर पावलें? धर्णी वयलें दिसाळें उबार‍न केविनान आवयक सवाल केलें.

काल सांजेर काळोक पडताना दुबाय‌गार जेमी. कुवेयट‌गार मार्कू, सिंगापूर‌गार फेलीस आनी सौदिगार‍न रेन्नी मेळोन फावोसतिनाक धैऱ्य दितालीं कंय सर्वां सांगातां मेळोन इस्रायेल‌गाराक गाळी येटतालीं कंय. पंचायताक सांगावन पर्त्यान जागो मेजवन फार‌ल्लो जागो पाटीं घेवंक सलहा दितालीं. खंय तक्रार वैयक्तीक जाल्ल्यान उग्त्यान सहकार दिवंक जायना तरी नैतीक कुमकेचो भर्वसो दिलो कंय. केविनाची आवय पुस्पुसली.

आनी तुजो इस्रायेल‌गार? केविनान‌यी आवाज तगसिलो. ताचें स्कूटर सिकेरामाच्या आंगणांत वेळ रातीं पऱ्यांत आस‌ल्लें कंय. एका वोरा पऱ्यांत रातीं सिकेरामागेर दिवो जळतालो कंय. इस्रायेल‌गार आनी सिकेराम रात‌भर पियेवन मजा मार‍ताले कंय केविनाच्या आवय कडेन सर्व खबरो पाव‌ल्ल्यो.

तें सर्व काटांत पडोंदी आयच्या दिसाळ्यार कसली खबार? केविनाचें गमन दिसाळ्याचेर आसल्लें पळेवन आवयन विचार‍लें. केवीन वाचित्त गेलो!! आनी आवय आयकात्त रावली...

पालेसतिनाच्या हमास उग्रांच्या पंगडान इस्रायेलाचेर तिनश्यां वयर मिसायलांनी हम्लो केलो. हाचे वर्वीं इस्रायेलांत वसती कर‍न आसच्या तेरा जणांचो जीव उबलो. प्रती जवाब जावन इस्रायेलान फालेसतिनाच्या गाजा प्रांताचेर तीवर हल्लो केलो. जायतो लुक्साण जालो. तिनश्यां वयर लोकांनी आपलो जीव होगडायलो. मध्य प्राच्यांतल्या मुसलीं राषट्रांनी इस्रायेलाचेर तीवर खंडन केलें आनी फालेसतिनाक पाटिंबो दिलो! अमेरिकान मधें पडोन तुर्तान झूज रावोंक जाय आनी प्रांत्यांत शांती रुता करुंक सर्व गलफ राषट्रांनीं ओत्ताय केली!!!

[जुलाय, २०२१]