ಕವಿತಾकविताPoem

ಮಧು ಆನಿ ಕಲ್ಕಾಂಡಾ ಆಂಗ್ಡಿಚೊ ತಾಂದು

ಆಮಿ ಸಗಳೆ ಮನಿಸ್ ಜಾವ್ನ್ ಜಿಯೆತಾಂವ್ ತರ್‌ಯೀ ಆಮಿ ಫಾತೊರ್ ಮನಾಚೆ, ಫಾತೊರ್ ಕಾಳಜಾಚೆ. ಫಾತೊರ್ ಸಯ್ತ್ ಮನಶಾಪಣ್ ಘೆತ್ ಪುಣ್ ಮನಿಸ್ ಮನಶಾಪಣಾಚೆರ್ ಹಲ್ಲೊ ಕರುನ್ ಜಿಯೆತಾನಾ ಭೋವ್ ಥೊಡೆಪಾವ್ಟಿಂ ಆಮ್ಚೆಂ ಕಾಳಿಜ್ ಕೊಸಾಳ್ತಾ ಆನಿ ಮತ್ ಪಿಸಾಂತುರ್ ಜಾತಾ. ಆಮ್ಚ್ಯಾ ದೇಸಾಂತ್‌ಚ್ಚ್ ಶಿಕ್ಪಿ ಮ್ಹಣ್ ನಾಂವ್ ವೆಲ್ಲ್ಯಾ ರಾಜ್ಯಾಂತ್ ಎಕಾ ಮಾನಸಿಕ್ ಪಿಡೆಚ್ಯಾ ಆದಿವಾಸಿ ಯುವಕಾಕ್ ಪಂಗಡಾನ್ ಲಗಾಡ್ ಕಾಡ್ತಾನಾ ತಾಚೆಸವೆಂ ಹ್ಯಾ ಸಂಸಾರಾಚ್ಯಾ ಸರ್ವ್ ಮನ್ಶಾಚೆಂ ಅಂತಸ್ಕರ್ನ್ ಸಯ್ತ್ ಮೊರೊನ್ ಗೆಲಾಂಗಿ ಮ್ಹಳ್ಳೆಂ ಸವಾಲ್ ಉಭೆಂ ಜಾತಾ.

ಸಮಾಜಿಕ್ ದಣ್ಸಣೆಚೆರ್ ಸದಾಂಚ್ ಆವಾಜ್ ಉಟಂವ್ಚೊ ಕವಿ ಆಂಡ್ರ್ಯೂ ಡಿ’ಕುನ್ಹಾಚಿ ಏಕ್ ಮಾರ್ಮಿಕ್ ಪುಣ್ ಹಕೀಗತ್ ಪಿಂತ್ರಾಂವ್ಚಿ ಕವಿತಾ ಹಿ. ಹ್ಯೇ ಕವಿತೆಂಚ್ ಲಿಪ್ತ್ಯೊ ಇಮಾಜ್ಯೊ ಲೆಗೂನ್ ರುದಾನ್ ಕರ್ಚ್ಯೊ ಕಾಂಯ್ ಕಾಳ್ಜಾಕ್ ಕಾನ್ ಆಸ್ಚೆ ಆಯ್ಕತಿತ್ ನ್ಹಯ್? ಹಿ ಮಧುಚಿ ಖುನ್ ನ್ಹಯ್, ಆಮಿ ಪಾತ್ಯೆಂವ್ಚ್ಯಾ ’ಮನ್ಶಾಪಣ್’ ಮ್ಹಳ್ಳ್ಯಾ ಚಿಂತ್ಪಾಚಿ ಖುನ್. ಆಮಿ ಬರೊ ಮ್ಹಣ್ಚ್ಯಾ ’ಧರ್ಮಾಚಿ’ ಖುನ್. ಹಾಚ್ಯಾಕೀ ಚಡ್ತಿಕ್ ಕಿತೆಂ ಸಾಂಗುಯೆತಾ... ತೆಂ ಸರ್ವ್ ಕವಿತಾಚ್ ಸುಟಾವೆಂ ಸಾಂಗುನ್ ವೆತಾ.

ಮಧು ಆನಿ ಕಲ್ಕಾಂಡಾ ಆಂಗ್ಡಿಚೊ ತಾಂದು

ಕಲ್ಕಾಂಡಾ ಅಂಗ್ಡಿಚೊ ತಾಂದ್ವಾಕ್

ಪಯ್ಲೆ ಪಾವ್ಟಿಂ ಸುಟ್ಕಾ ಲಾಭಲ್ಲಿ

ಭುಕೆಲ್ಲಾ ಮಧುನ್ ಮೂಟ್ ಮಾರ್‌ಲ್ಲೆ ದಿಸಾ

ಆಜ್ ಮಧುಚೊ ಅತ್ಮೊ ಸರ್ಗಾಕ್ ಪಾವ್ಲಾ

ತಾಂದು ರಾನಾಂತ್ ಶಿಂಪ್ಲಾ

ರೂಕ್ ಮೊನೊ ಸಾಕ್ಸ್ ಜಾಲಾ!

ಖುನಿಗಾರಾಂಚ್ಯಾ ಜಮ್ಯಾ ಪಾಂಯಾಂ ಪಂದಾ

ಮಸ್ತುನ್ ಗೆಲ್ಲೊ ಏಕೇಕ್ ತಾಂದು

ಮಧುಚೆಂ ಏಕೇಕ್ ದೂಕ್ ಜಾವ್ನ್

ಅಕ್ಲಾಸ್ ಸೊಡ್ನ್ ಅಸಾ...

ಕಣ್ಶೆನ್ ತಕ್ಲಿ ಪುರ್ತಿ ಬಾಗಯ್ಲ್ಯಾ

ಕಲ್ಕಾಂಡಾ ಅಂಗ್ಡಿಚಿ ತಾಂದ್ಲಾ ಗೊಣಿ

ದುಖಾಂನಿ ಭಿಜೊನ್ ಮುದೊ ಜಾಲ್ಯಾ...

ಹಂಕಾರ್ ಘಟ್‌ಚ್ ಉರ್‍ಲಾ

ಗಾಂವಾರ್ ದುಕೊಳ್ ಪಡ್ಲೊ ತರ್

ಮಧುಕ್ ದುರ್ಸಾನಾಕಾತ್!

ಗೊಣಿ ಪೀಳ್ನ್ ಘೊಟ್ ಮಾರಾತ್

ದುಖಾಂನಿಚ್ ಪೊಟ್ ಭರಾತ್!

- ಆಂಡ್ರ್ಯೂ ಎಲ್. ಡಿ’ಕುನ್ಹಾ [ಫೆಬ್ರೆರ್ 2018]

ಆಂಡ್ರು ಎಲ್. ಡಿ’ಕುನ್ಹಾ: ವೃತ್ತೆನ್ ’ಫೈನಾನ್ಸ್ ಕನ್ಸಲ್ಟೆಂಟ್’ ವಾವ್ರ್ ಕರುನ್ ಆಸ್ಚೊ ಆಂಡ್ರು ಎಲ್. ಡಿ’ಕುನ್ಹಾ ಕೊಂಕ್ಣೆಚೊ ನಾಮ್ಣೆಚೊ ಕವಿ, ಕಾಣ್ಯೆಗಾರ್. ’ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ’, ’ಅಂಜುರಾಚೆಂ ಪಾನ್’, ’ಆಯೆರಾಚೊ ಬೂಕ್’ ಮ್ಹಳ್ಳೆ ತೀನ್ ಕವಿತಾಜಮೆ ಪರ್ಗಟ್ಲ್ಯಾತ್. ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿ, ತಶೆಂ ವಿಮಲಾ ಪೈ ಪುರಸ್ಕಾರ್ ಹಾಕಾ ಫಾವೊ ಜಾಲ್ಯಾತ್. ಆಪ್ಲ್ಯಾ ಕುಟ್ಮಾಸವೆಂ ಸದ್ದ್ಯಾಕ್ ಮಂಗ್ಳುರಾಂತ್ ವಸ್ತಿ ಕರುನ್ ಅಸಾ.

ಬರವ್ಪಿ

ಆಂಡ್ರ್ಯೂ ಎಲ್. ಡಿಕುನ್ಹಾ

1984 (ಪಾಟ್ಲ್ಯಾ 42 ವರ್ಸಾಂ) ಥಾವ್ನ್ ಕೊಂಕ್ಣೆಂತ್ ಸಾಹಿತ್ಯ್ ರಚುನ್ ಆಸ್ಚೊ ಆಂಡ್ರ್ಯೂ ಎಲ್. ಡಿಕುನ್ಹಾ ಏಕ್ ಲೊಕಾಮೊಗಾಳ್ ಕವಿ. ಗಾಂವಾನ್ ಗುರ್ಪುರ್ ಕಿನ್ನಿಕಂಬ್ಳಾಚೊ ತೊ ಅತಾಂ ಇಜಯ್ ವಸ್ತಿ ಕರ್ನ್ ಆಸಾ. ದೆವಾಧೀನ್ ಡೆನಿಸ್ ಆನಿ ಮೇರಿ ಡಿಕುನ್ಹಾ ಹಾಂಚ್ಯಾ ಸಾತ್ ಭುರ್ಗ್ಯಾಂ ಪಯ್ಕಿ ತೊ ನಿಮಾಣೊ. ತಾಣೆಂ 1000 ವಯ್ರ್ ಕವಿತಾಂ, 150 ಕ್ ಮಿಕ್ವೊನ್ ಲೇಖನಾಂ ಆನಿ 30 ಮಟ್ವ್ಯೊ ಕಾಣಿಯೊ ಬರಯ್ಲ್ಯಾತ್. ’ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ’ (2004 - ಆಶಾವಾದಿ ಪ್ರಕಾಶನ್), ’ಅಂಜುರಾಚೆಂ ಪಾನ್’ (2013 - ಕವಿತಾ ಟ್ರಸ್ಟ್) ಆನಿ ’ಆಯೆರಾಚೊ ಬೂಕ್’ (2014 - ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ) ತಾಚೆ ಪ್ರಕಟಿತ್ ಕವಿತಾ ಪುಂಜೆ. ತಾಚ್ಯಾ "ಅಂಜುರಾಚೆಂ ಪಾನ್" ಪುಸ್ತಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ, AIKWO (ಅಖಿಲ್ ಭಾರತ್ ಕೊಂಕಣಿ ಬರೊವ್ಪ್ಯಾಂಚೊ ಎಕ್ತಾರ್ ಪುರಸ್ಕಾರ್), ವಿಮಲಾ ವಿ. ಪೈ ವಿಶ್ವ್ ಕೊಂಕಣಿ ಕವಿತಾ ಪುರಸ್ಕಾರ್ ಆನಿ ಡಾ. ಟಿ. ಎಮ್. ಎ. ಪೈ ಪುಸ್ತಕ್ ಪುರಸ್ಕಾರ್ ತಾಕಾ ಲಾಬ್ಲ್ಯಾತ್. ಆಯ್ಲೆವಾರ್ ತಾಚ್ಯಾ "ಉಜ್ವಾಡಾಚ್ಯೆ ವೆಂಗೆಂತ್" ಕವಿತಾ ಪುಸ್ತಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ ಪ್ರಶಸ್ತಿ ಲಾಬ್ಲ್ಯಾ. 2023 ವರ್ಸಾಚಿ ರಾಜ್ಯ್ ಮಟ್ಟಾಚಿ “ಸಂದೇಶ ಕೊಂಕ್ಣಿ ಸಾಹಿತ್ಯ್ ಪ್ರಶಸ್ತಿ” ತಾಕಾ ಲಾಬ್ಲ್ಯಾ.

ಮಂಗ್ಳುರ್ ಆಕಾಶ್‍ವಾಣಿ ಥಾವ್ನ್ ಸುಮಾರ್ 40 ಕೊಂಕ್ಣಿ ಕಾರ್‍ಯಕ್ರಮಾಂ ತಾಣೆಂ ಸಾದರ್ ಕೆಲ್ಯಾಂತ್. ಸುಮಾರ್ 38 ವರ್ಸಾಂ ಆದಿಂ ರಾಕ್ಣೊ ಪತ್ರಾರ್ ‘ಆಂದ್ರು ಮಾಮ್’ ಲಿಖ್ಣೆ ನಾಂವಾನ್ ಭುರ್ಗ್ಯಾಂಚೊ ಸಂಸಾರ್ ವಿಭಾಗ್ ತಾಣೆಂ ಚಲವ್ನ್ ವ್ಹೆಲಾ. ಆಮ್ಚೊ ಯುವಕ್ ಪತ್ರಾರ್ ನಿರ್ವಾಹಕ್ ಸಂಪಾದಕ್ ಜಾವ್ನ್ ವಾವ್ರ್ ದಿಲಾ. "ಇಜಯ್ಚೊ ಕಳೊ" ಪತ್ರಾಚೊ ಸಂಪಾದಕ್ ಜಾವ್ನ್ ವಾವುರ್‍ಲಾ. ದಾಯ್ಜಿ ದುಬಾಯ್ ಬರವ್ಪ್ಯಾಂಚ್ಯಾ ಎಕ್ತಾರಾಚೊ ಸಂಪಾದಕ್ ಜಾವ್ನ್ ವಾವ್ರ್ ದಿಲಾ. ಮಾಯ್‍ಭಾಸ್.ಕೊಮ್ ಜಾಳಿ ಜಾಗ್ಯಾರ್, ರಾಕ್ಣೊ, ದಿರ್ವೆಂ, ಉಜ್ವಾಡ್ ಪತ್ರಾಂನಿ ಕವಿತಾ ಅಂಕಣ್ ತಾಣೆಂ ಚಲಯ್ಲಾಂ. ರಾಕ್ಣ್ಯಾರ್ ತಾಚೊ "ಕಾಸ್ ಸಂಸಾರ್" ಅಂಕಣ್, ನಮಾನ್ ಜೆಜು ಬಾಳೊಕ್ ಪತ್ರಾರ್ "ಖಾಸ್ ಸಂಸಾರ್" ಅಂಕಣ್ ಅನಿ ಆಮ್ಚೊ ಸಂದೇಶ್ ಪತ್ರಾರ್ ಸಕಾಳಿಕ್ ಲೇಖನಾಂ ಸರಾಗ್ ಪ್ರಕಟ್ ಜಾವ್ನ್ ಆಸಾತ್. ತಾಣೆಂ ಆಟ್ ಪುಸ್ತಕಾಂಕ್ ಪ್ರಸ್ತಾವನ್ ಬರಯ್ಲಾಂ. ವೆವೆಗ್ಳ್ಯಾ ಕೊಂಕ್ಣಿ ಕವಿತಾ ಸ್ಪರ್ದ್ಯಾಂಚೊ, ಕೊಂಕ್ಣಿ ಕವಿತಾ ಸಾದರ್ ಸರ್ತೆಂಚೊ ತಶೆಂಚ್ ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚ್ಯಾ ಪುಸ್ತಕ್ ಪ್ರಶಸ್ತೆಚೊ ವರಯ್ಣಾರ್ ಜಾವ್ನ್ ವಾವ್ರ್ ದಿಲಾ. ಗಾಂವಾಂತ್ ಆನಿ ಪರ್ಗಾಂವಾಂತ್ ಸಬಾರ್ ಕವಿತಾಗೋಶ್ಟಿ ತಾಣೆಂ ಚಲವ್ನ್ ವೆಲ್ಯಾತ್. ಕವಿತಾಂ ವಿಶಿಂ ಸಬಾರ್ ಪ್ರಬಂಧ್ ಮಂಡನ್ ಕೆಲ್ಯಾತ್ ಆನಿ ಉಪನ್ಯಾಸ್ ದಿಲ್ಯಾತ್. “ಕವಿತಾ ಟ್ರಸ್ಟ್” ಚೊ ತೊ ಟ್ರಸ್ಟಿ ಜಾವ್ನ್ ಆಸಾ. ಕವಿತಾ.ಕೊಮ್ ಜಾಳಿ ಜಾಗ್ಯಾರ್ ಸಂಪಾದಕೀಯಾಂ ತೊ ಬರಯ್ತಾ.

All 14 pages by this writer