ಎಡ್ವಿನ್ ಜೆ.ಎಫ್.ಡಿಸೊಜಾಚ್ಯಾ ವೆಂಚೀಕ್ ಕಥಾಂಚೆಂ ಆಕಲನ್

ಎಡ್ವಿನ್ ಜೆ.ಎಫ್.ಡಿಸೊಜಾಚ್ಯಾ ವೆಂಚೀಕ್ ಕಥಾಂಚೆಂ ಆಕಲನ್ (- ಧರ್ಮ ಚೊಡಣಕಾರ್)

ಮಂಗಳುರಿ ಕಥಾಕಾರ್ ಎಡ್ವಿನ್ ಜೆ. ಎಫ್. ಡಿಸೊಜಾ ಎಕ್ ಶ್ರೆಷ್ಟ್ ಕಥಾಕಾರ್ ಆನಿ ಕಾದಂಬರೀಕಾರ್ ಜಾವ್ನ್ ಆಸಾ. ಕನ್ನಡ್, ಇಂಗ್ಲೀಶ್ ಆನಿ ಕೊಂಕಣಿ ಸಾಹಿತ್ಯಾಚ್ಯಾ ಮಳಾರ್ ಆಪಲೆಂ ಮ್ಹತ್ವಾಚೆಂ ಯೊಗದಾನ್ ತಾಂಣಿ ದಿಲಾಂ. ತಾಚ್ಯಾ ಕಾಂಯ್ ವೆಂಚೀಕ್ ಕಥಾಂಚೆಂ ಆಕಲನ್ ಕೆಲ್ಯಾ ಉಪರಾಂತ್ ಕಾಂಯ್ ವಿಶೆಶ್ ಗಜಾಲಿ ಜಾಣವಲ್ಯೊ. ತಾಚೆಂಚ್ ಮುಲ್ಯಮಾಪನ್ ಹಾಂಗಾ ಕರಪಾಚೊ ಯತ್ನ್ ಆಸಾ. ತಾಚ್ಯಾ ಚಾರ್ ಕಥಾಂಚೆಂ ಆಕಲನ್ ಕೆಲೆ ಉಪರಾಂತ್ ಎಕ್ ಆಸ್ವಾದಕ್ ಹ್ಯಾ ನಾತ್ಯಾನ್ ಅಶೆಂ ಸ್ಪಶ್ಟ್ ಜಾತಾ ಕಿ ತಾಚ್ಯಾ ಕಥಾಂನಿ ಪರಿಪಕ್ವತಾ ದಿಸ್ತಾ. ರಾಷ್ಟ್ರೀಯ್ ಆನಿ ಅಂತರರಾಷ್ಟ್ರೀಯ್ ಕಥಾಂ ಕಡೆನ್ ತಾಚ್ಯಾ ಕಥಾಂಚಿ ಸರ್ ಕರೂಂ ಯೆತಾ. ಭಾರತೀಯ್ ಕಥಾ ಸಾಹಿತ್ಯಾಚೆಂ ಪ್ರತಿನಿಧಿತ್ವ್ ಕರಪಿ ಅಶ್ಯೊ ತಾಚ್ಯೊ ಹ್ಯೊ ಕಥಾ ಜಾವ್ನ್ ಆಸಾತ್. ತಾಚಿ ನದರ್ ಮುಳಾವಿ ಆನಿ ಸರ್ವಸಾಮಾನ್ಯ್ ಮನಶಾಚೊ ಥಾವ್ ಘೆವಪೀ. ಹಾಕಾಚ್ ಲಾಗೂನ್ ವಾಚಪ್ಯಾಚ್ಯಾ ಕಾಳಜಾ-ಮನಾಂತ್ ತ್ಯೊ ಸಹಜಪಣಾನ್ ರಿಗತಾತ್. ಪ್ರತಿಭಾವಂತ್ ಸಾಹಿತ್ಯಿಕಾಚಿ ಹಿ ಎಕ್ ವಿಶೆಶತಾಯ್ ಜಾವ್ನ್ ಆಸಾ.
ಕಥಾಂಚಿ ಶೈಲಿಅ ಆನಿ ಲೆಖನ್ ತಂತ್ರಾಕ್ ತಾಂಣಿ ಜಿತಲೆಂ ಮ್ಹತ್ವ್ ದಿಲಾಂ ತಿತಲೆಂಚ್ ಆಶಯಾಕೂಯ್ ದಿಲ್ಲೆಂ ಆಸಾ. ಕಥೆಚೆಂ ವಾತಾವರಣ್ ತಯಾರ್ ಕರಪಾಚಿ ತಾಚಿ ತಾಂಕ್ ಜಬರದಸ್ತ್ ಆಸಾ. ಕಥೆಚೆಂ ವಾತಾವರಣ್ ಕಥೆಚ್ಯಾ ಆಶಯಾಂತ್ ಇತಲೆಂ ಭರಸೂನ್ ಗೆಲ್ಲೆಂ ಆಸಾ ಕಿ ತೆಂ ಆಮಿ ವೆಗಳೆಂ ಕರೂಂಕ್ ಶಕನಾತ್. ದೆಖೀಕ್, ಮಾತಯೆಚೆಂ ಪೊನ್ನೆಂ ಬಿರಾಡ್ ಮೊಡೂನ್ ಕಾಂಕ್ರಿಟಾಚೆಂ ಬಿರಾಡ್ ಬಾಂದಪ್ ಹಿ ಆಯಚ್ಯಾ ಕಾಳಾಂತಲಿ ಸಗಳ್ಯಾಂಚ್ ಜಾಣಾಂಚಿ ಇತ್ಸಾ ‘ಎಕ್ ಕೊಪ್ ಹುನೊನಿ ಕೊಫಿ’ ಕಥೆಂತ್ ಸಹಜಪಣಾನ್ ಆಯಲ್ಯಾ. ಹೆ ಕಥೆಂತ್ ಪೊರಣ್ಯಾ ಮಾತಯೆಚ್ಯಾ ಘರಾಂತಲ್ಯಾ ಆನಿ ನವ್ಯಾ ಕಾಂಕ್ರಿಟಚ್ಯಾ ಘರಾಂತಲ್ಯಾ ಘಡಾಮೊಡೀಂಚೆಂ ಜಬರದಸ್ತ್ ವಾತಾವರಣ್ ನಿರ್ಮಾಣ್ ಕೆಲ್ಲೆಂ ಆಸಾ. ‘ಬಣ್ಣಕಡ್ಡಿ’ ಕಥೆಂತ್ ಸುರವಾತೆಕ್ ಜೊನಾಚ್ಯಾ ಗರೀಬ್ ಘರಾಚೆಂ, ಗಾಂವಚೆ ಶಾಳೆಚೆಂ ಆನಿ ಮೈದಾನಾಚೆರ್ ಪಾಯಪಾಂ ಮಾಂಡೂನ್ ದವರಿಲ್ಲ್ಯಾನ್ ಜಾಲ್ಲೆ ಘಟನೆಚೆಂ ಬಾರೀಕಸಣೆನ್ ಚಿತ್ರಣ್ ಕರಪಿ ವಾತಾವರಣ್, ತಶೆಂಚ್ ‘ಕಾಗ್ದಾಚಿ ಸ್ತ್ರೀ’ ಕಥೆಂತ್ ಸಿಗ್ನಲಾಚೆರ್ ಪೆಪರ್ ವಿಕಪಿ ಭುರಗ್ಯಾಚೆಂ ಚಿತ್ರಣ್ ಆನಿ ಗಾಡಯೆಂತ್ ಬಶಿಲ್ಲೆ ಬಾಯಲೆಚೆಂ ಜಾಲ್ಯಾರ್ ‘ಮೊತೀಕ್ ಎಕ್ ಪಾಟೊ’ ಹೆ ಕಥೆಂತ್ ಘರಾಂತಲೆಂ ಆನಿ ಘರಾ ಭಾಯಲೆಂ ವಾತಾವರಣ್ ಲೆಖಕಾನ್ ಬರೆ ತರೆನ್ ಚಿತ್ರಾಯಲ್ಲೆಂ ಆಸಾ.
ಚಾರೂಯ್ ಕಥಾಂಚೊ ಆಶಯ್ ಬರೆ ತರೆನ್ ಮಾಂಡಿಲ್ಲೊ ಆಸಾ. ಖಂಯಚ್ಯಾಯ್ ಕಥಾಕಾರಾಚೆಂ ಮೊಲ್ ಆಂಖತಾತ್ ತೆಂ ತಾಂಚ್ಯಾ ಕಥಾಂಚ್ಯಾ ಆಶಯಾ ವೆಲ್ಯಾನ್. ಸಂವಸಾರಾಚೊ ಅಣಭವ್ ಆನಿ ಸಾಹಿತ್ಯಾಚೊ ಸಖೊಲ್ ಅಭ್ಯಾಸ್ ಆಶಿಲ್ಲೊ ಲೆಖಕೂಚ್ ಅಸಲೆ ಆಶಯ್ ಹಾತಾಳಪಾಕ್ ಶಕತಾ. ತಾಚ್ಯಾ ಆಶಯಾಕ್ ಪ್ರತಿಭೆಚಿ ನದರ್ ಆಸಾ. ಭೊಂವತಣಚ್ಯಾ ಸಮಾಜಾಂತಲ್ಯಾನ್ ಆಪಣಾಕ್ ಜಾಯ್ ತೊ ವಿಶಯ್, ಪಾತ್ರಾಂ ಸೊದೂನ್ ಕಾಡೂನ್ ತಾಂಚೀಂ ಸುಖಾಂ-ದುಖಾಂ ಸಮಜೂನ್ ಘೆವ್ನ್, ತಾಂಚೆ ಕಡೆನ್ ಎಕರೂಪ್ ಜಾವಪಾಚಿ ತಾಂಕ್ ತಾಚ್ಯಾಂತ್ ಆಸಾ. ಸಮಾಜಾಂತಲೀಂ ಧೊಗಾಂ-ಪೆಂಗಾಂ ಪಳೊವ್ನ್ ತೊ ದುಖಾವತಾ, ಸೂಖ್ ಪಳೊವ್ನ್ ಸುಖಿ ಜಾತಾ, ಭೌಸಾಚ್ಯೊ ವ್ಯಥಾ, ತಾಂಚೆ ಹಾವೆಸ್, ಇತ್ಸಾ ಮಾಂಡಪಿ ತಾಂಚ್ಯಾ ವಾಸ್ತವೀಕ್ ಕಥಾಂಚೆ ಆಶಯ್ ಅಶೆ ತರೆನ್ ಮುಖಾರ್ ಆಯಲ್ಯಾತ್. ‘ಬಣ್ಣಕಡ್ಡಿ’ ಹೆ ಕಥೆಚೊ ಆಶಯ್ ಸಾಂಕೆತೀಕ್ ರುಪಾನ್ ಮಾಂಡಿಲ್ಲೊ ಆಸಾ. ಕ್ರೆಯೊನ್ಸಾಂಚೊ ವಾಪರ್ ಕರೂನ್ ಎಕಾ ಕುಲಕಾರ್ ಗರೀಬ್ ಮನಶಾಚೊ ಆಪಲ್ಯಾ ಭುರಗ್ಯಾಕ್ ಬರೊ ಫುಡಾರ್ ದಿವಪಾಚೊ ಹಾವೆಸ್ ಹಾಂಗಾ ದಿಶ್ಟಿ ಪಡಟಾ. ಆಪಲ್ಯಾ ಪುತಾಕ್ ಇಂಗ್ಲೀಶ್ ಮಿಡಯಾಮಾಂತ್ ಶಿಕೊವ್ನ್ ಘರಾಬ್ಯಾಚೊ ಫುಡಾರ್ ಪರ್ಜಳೀತ್ ಕರಪಾಚಿ ಆವಯ್-ಬಾಪಾಯಚಿ ಇತ್ಸಾ ಆನಿ ತೆಚ್ ಇತ್ಸೆ ಆಡ್ ವಚಪಿ ಆಯಚೊ ವಯಲೊ ಸಮಾಜ್ ಆನಿ ತಾಂಚಿ ಮಾನಸೀಕತಾ ಹೆಂ ಕಥೆಂತ್ ದಾಖಯಲ್ಯಾ. ‘ಮೊತೀಕ್ ಎಕ್ ಪಾಟೊ’ ಹೆ ಕಥೆಚೊ ಆಶಯ್ ಗಾಂವಠಿ ಕುತ್ರ್ಯಾ ಭೊಂವತಣಿ ಗುಂಥಿಲ್ಲೊ ಆಸಾ. ಜರೀಯ್ ಹೊ ಕುತ್ರೊ ವಿಸ್ವಾಸೂ ಆಸಲೊ ತರೀಯ್ local ಆಶಿಲ್ಲ್ಯಾನ್, ಬ್ರಿಡೀಚ್ಯಾ ಕುತ್ರ್ಯಾಂ ಮುಖಾರ್ ತಾಚೊ value ಶುನ್ಯ್ ಆಸಾ. ಪಿತೃಸ್ತಾಕ್ ಸಮಾಜಾಚೊ ದರಾರೊ ಹೆ ಕಥೆಂತ್ ದಿಶ್ಟಿ ಪಡಟಾ. ‘ಕಾಗದಾಚಿ ಸ್ತ್ರೀ’ ಕಥೆಂತ್ ಎಕ್ ಅನಾಥ್ ಭುರಗ್ಯಾಚೆಂ ಚಿತ್ರಣ್ ಕರತಾನಾ, ಆಪಲ್ಯಾ ಜಿವಿತಾಂತ್ ಪುರಾಯ್ ಸಮಾಧನ್ ಮೆಳೊವಪಾಕ್ ಆಶೆಲ್ಲ್ಯಾ ಭುರಗ್ಯಾಚೊ ಆಶಯ್ ಕಥೆಂತ್ ಆಯಲಾ. ತಾಕಾ ದಿಸ್ತಾ ಕಾಳೆ ಕಾರೀಂತ್ ಬಶಿಲ್ಲಿ ಸ್ತ್ರಿ ತಾಚ್ಯಾ ಜಿವಿತಾಂತ್ ಬದಲ್ ಹಾಡಪಾಕ್ ಶಕತಾ. ಪೂಣ್ ತಿ ಸ್ತ್ರಿ ಜಣೂ ಕಾಯ್ ಕಾಗದಾ ವಯಲಿ ಸ್ತ್ರಿ ಆಶಿಲ್ಲ್ಯಾಚೊ ಆಭಾಸ್ ಲೆಖಕ್ ಆಮಕಾಂ ವಾಚಕಾಂಕ್ ಕರೂನ್ ದಿತಾ. ತಶೆಂಚ್ ‘ಎಕ್ ಕೊಪ್ ಹುನೊನಿ ಕೊಫಿ’ ಹೆ ಕಥೆಂತ್ ಮಾತಯೆಚೆಂ ಬಿರಾಡ್ ಸೊಡೂನ್ ಕಾಂಕ್ರಿಟಾಚ್ಯಾ ಬಿರಾಡಾಂತ್ ಪಾವತಕೂಚ್ ಆಧುನೀಕ್ ಜಿಣೆಪದ್ದತೀಕ್ ಲಾಗೂನ್ ಜಾಲ್ಲ್ಯಾ ಬದಲಾಂಚೆಂ ಸಮಾಜೀಕ್ ಕಥಾನಕ್ ಕಥೆಂತ್ ಆಯಲಾಂ, ಜಾಕಾ ಲಾಗೂನ್ ಪುತಾ-ಸುನೆಚ್ಯಾ ಯಾಂತ್ರೀಕ್ ಧುನಿಯೆಂತ್ ಜಾಣ್ಟೆ ಮಾಂಯಕ್ ನಾತ್ಯಾಂತಲಿ ಹುನಸಾಣ್, ಮೊಗ್ ಆನಿ ಮಾಯಪಾಸ್ ಮೆಳನಾ. ನವ್ಯಾ ಬಿರಾಡಾಂತ್ ಸಗಳೀಂ ಜಾಣಾಂ ಆಸೂನ್ ಲೆಗೀತ್ ತಿಕಾ ನಾತ್ಯಾಂತಲ್ಯಾ ಮಾಯೆಚೊ ಧಗ್ ಫಾವೊ ಜಾಯನಾ. ಕಾಂಕ್ರಿಟಾಚ್ಯಾ ಬಿರಾಡಾಂತ್ ದರ್ ಎಕೆ ವಸ್ತೂಕ್ ಆಪಲಿ ಸುವಾತ್ ಆಸೂನ್ ಲೆಗೀತ್ ಹೆ ಆವಯಕ್ ಆಪಲಿ ಸುವಾತ್ ನಾಸ್ತಾ. ಅಶೆ ತರೆನ್ ಹುನೊನಿ ಕೊಫಿಚ್ಯಾ ನಿಮತಾನ್ ತಿಚೆಂ ಎಕಟೆಪಣ್ ದರ್ಶಯಲಾಂ. ಆಯಜ್ ಆಮಕಾಂ ವ್ಹಡ್-ವ್ಹಡ್ ಇಮಾರತಿ ಉಬಾರಿಲ್ಲ್ಯೊ ದಿಶ್ಟಿ ಪಡಟಾತ್ ಪೂಣ್ ತ್ಯಾ ಇಮಾರತೀಂನಿ ಆಪುಲಕಿ ನಾ. ತ್ಯೊ ಮನಶಾಕ್ ಲಾಗೀಂ ಕರಚ್ಯಾ ಬದಲಾ ತಾಂಕಾಂ ತ್ಯೊ ಪಯಸ್ ಕರತಾತ್. ಎಕಾಂತಾಕ್ ಬಳಿ ಪಡಿಲ್ಲೆ ಆವಯಚೊ ಆಶಯ್ ಹೆ ಕಥೆಂತ್ ಆಯಲಾ. ಹ್ಯಾ ಕಥಾಂಚೆ ಆಶಯ್ ಇತಲೆ ಸಮೃಧ್ದ್ ಆಸಾತ್ ಕಿ ಆಸ್ವಾದಕ್ ತೆ ಆಡನದರ್ ಕರೂಂಕ್ ಶಕನಾತ್.
ಸುಚಕತಾಯ್, ಪ್ರತಿಕಾಂ ಆನಿ ಪ್ರತಿಮಾ ಹ್ಯಾ ಕಥಾಂನಿ ಆಯಲ್ಯಾತ್. ‘ಬಣ್ಣಕಡ್ಡಿ’ ಕಥೆಂತ್ ಲೆಖಕ್ ಪಾಯಪಾಚ್ಯಾ ಮಾಧ್ಯಮಾಂತಲ್ಯಾನ್ ಎಕ್ ಸುಂದರ್ ರೂಪಕ್ ಘಡಯತಾ. ಹೀಂ ಪಾಯಪಾಂ ಮ್ಹಣಲ್ಯಾರೂಚ್ ಮನಶಾಚ್ಯಾ ಜಿವಿತಾಂತಲಿ ಪ್ರಗತೀಚಿ ಆನಿ ಉದರಗತೀಚಿ ಶಿಡೀ. ಜೊನ್ ಹೊ ಕುಲಕಾರಾಚೊ ಭುರಗೊ ಹಿ ಶಿಡಿ ಚಡಪಾಚೊ ಯತ್ನ್ ಕರತಾ ಪೂಣ್ ಸಂವಸಾರಾಂತಲೆ ಪ್ರಸ್ಥಾಪೀತ್ ಲೊಕಾಂಚೆ ಮಾನಸಿಕತೆ ಆಡ್ ಹೊ ಯತ್ನ್ ತಾಚ್ಯಾ ಆಂಗಾರ್ ಯೆತಾ. ಹೆ ಕಾಣಯೆಂತ್ ಪ್ರತಿಕಾತ್ಮಕ್ತಾ ದಿಸ್ತಾ. ಹ್ಯೊ ರಂಗಾಳ್ ಕಾಡಯೊ ಮ್ಹಣಲ್ಯಾರೂಚ್ ತ್ಯಾ ಭುರಗ್ಯಾಚ್ಯಾ ಜಿವಿತಾಂತ್ ಆಶೆಚೀಂ ರಂಗಾಳ್ ಚಿತ್ರಾಂ ಚಿತ್ರಾವಪಿ ಮಾಧ್ಯಮ್. ಪೂಣ್ ಸಮಾಜೀಕ್ ಮತ್ಸರಾಚ್ಯಾ ಕಾಳಖಾಂತ್ ಹ್ಯೊ ಕಾಡಯೊ ಪಿಂಟೊಚ್ಯಾ ಘರಾಂತ್ ರಂಗಾಳ್ ಚಿತ್ರಾಂ ಚಿತ್ರಾವಪಾಕ್ ಫಾಟೀಂ ಪಡಟಾತ್. ತ್ಯಾ ಪಾಯಪಾಂಕ್ ಲಾಗಿಲ್ಲೆಂ ತಾಂಬಡೆ ಖತ್ ಸಕಯಲ್ಯಾ ವರ್ಗಾಚ್ಯಾ ಬಲಿದಾನಾಚ್ಯಾ ಕರೂಣ್ ವಾಸ್ತವಾಚೆಂ ಪ್ರತೀಕ್ ಜಾವ್ನ್ ಆಸಾ. ಹೆ ಕಾಣಯೆಚ್ಯಾ ಆದಾರಾನ್ ಕಥಾಕಾರಾನ್ ವಾಸ್ತವಾಚೆರ್ ಬೊಟ್ ದವರೂನ್, ಗರಿಬಾಂಚೀಂ ರಂಗಾಳ್ ಸಪನಾಂ ಘೆವ್ನ್ ಮುಖಾರ್ ಚಲತಲ್ಯಾ ಭುರಗ್ಯಾಂಚೆರ್ ಹೊ ಸಮಾಜ್ ಕಶೆ ತರೆನ್ ಆಪಲಿ ಕ್ರೂರತಾ ದಾಖಯತಾ ತೆಂ ಸ್ಪಶ್ಟ್ ಕೆಲಾಂ.
ತೆಚ್ ತರೆನ್ ‘ಮೊತೀಕ್ ಎಕ್ ಪಾಟೊ’ ಹೆ ಕಥೆಂತ್ ಪಾಟೊ ಹೆಂ ಮಾನಾಚೆಂ ಆನಿ ಪ್ರತಿಶ್ಠೆಚೆಂ ಪ್ರತೀಕ್. ತಾಕಾಚ್ ಲಾಗೂನ್ ತೊ ಪಾಟೊ ಮೆಳೊವಪಾಚೆ ಆಶೆನ್ ಮೊತಿ ಆಪಲಿ ಜೀಣ್ ವಗಡಾಯತಾ. local ಪೆಟೆ ಹೆ ಗರಿಬೀಚೆಂ ಪ್ರತೀಕ್ ಜಾಲ್ಯಾರ್ ಭಾಯಲ್ಯಾ breed ಚೆ ಪೆಟೆ ಹೆ ಮೊಠೆಪಣಾಚೆಂ ಪ್ರತೀಕ್ ಜಾವ್ನ್ ಕಥೆಂತ್ ಆಯಲಾಂ. ‘ಕಾಗ್ದಾಚಿ ಸ್ತ್ರೀ’ ಕಥೆಂತ್ ಕಾರೀಂತಲಿ ಸ್ತ್ರಿ ಹಿ ಗಿರೆಸ್ತಕಾಯೆಚೆಂ ಪ್ರತೀಕ್ ಜಾಲ್ಯಾರ್ ಪೆಪರ್ ವಿಕಪಿ ಅನಾಥ್ ಭುರಗೊ ಹೆಂ ಗರಿಬೀಚೆಂ ಪ್ರತೀಕ್ ಜಾವ್ನ್ ಆಯಲಾಂ. ಹಿ ಸ್ತ್ರಿ ಉಚ್ಚ್ ವರ್ಗಾಚ್ಯಾ ಪೊಕಳ್, ಕೊರಡ್ಯಾ ಆನಿ ಜೀವ್ ನಾಶಿಲ್ಲ್ಯಾ ಪ್ರತಿಶ್ಠೆಚೆಂ ಪ್ರತೀಕ್ ಆಸಾ, ಜಿಕಾ ಗರೀಬಾಂಚ್ಯಾ ಭಾವ್ನಾಂಚಿ ಕಸಲೀಚ್ ಕದರ್ ನಾ. ‘ಎಕ್ ಕೊಪ್ ಹುನೊನಿ ಕೊಫಿ’ ಹೆ ಕಥೆಂತ್ ತೆಂ ಕೊಪ್ ಉದಾರತಾಯೆಚೆಂ ಆನಿ ಆತ್ಮಿಯತಾಯೆಚೆಂ ಪ್ರತೀಕ್ ಜಾವ್ನ್ ಆಸಾ.
ಹ್ಯೊ ಸಗಳ್ಯೊ ಕಥಾ ಗಾಂವ್ ಆನಿ ಶಾರಿ ಜೀಣ್ ಚಿತ್ರಾವಪೀ. ‘ಬಣ್ಣಕಡ್ಡಿ’ ಪುರಾಯಪಣೆನ್ ಗ್ರಾಮೀಣ್ ಜಿಣೆಚೆಂ ಚಿತ್ರಣ್ ಕರಪಿ ತರ್ ‘ಕಾಗ್ದಾಚಿ ಸ್ತ್ರೀ’ ಆನಿ ‘ಮೊತೀಕ್ ಎಕ್ ಪಾಟೊ’ ಹ್ಯೊ ಪುರಾಯ್ ಶಾರಿ ಜಿಣೆಚೆರ್ ಆದಾರೀತ್ ಕಥಾ ಆಸಾತ್. ‘ಎಕ್ ಕೊಪ್ ಹುನೊನಿ ಕೊಫಿ’ ಹಿ ಗಾಂವ್ ಆನಿ ಗಾಂವಾಂತ್ ಜಾವಪಿ ಆಧುನಿಕೀಕರಣ್ ದಾಖೊವಪಿ ಕಥಾ. ಎಕ್ ಬರೊ ಕಥಾ ಲೆಖಕ್ ಮ್ಹಣೂನ್ ತಾಚಿ ಜಾಣೀವ್ ಆಧುನೀಕ್ ಆಸಾ. ತೆಚ್ ತರೆನ್ ಗಾಂವಚ್ಯಾ ದೆಶಿ ಸಂಸ್ಕಾರಾಂತಲ್ಯಾನ್ ತಾಚಿ ಜಾಣೀವ್ ಘಡತ್ ಗೆಲ್ಲಿ ಆಶಿಲ್ಲ್ಯಾನ್, ಶಾರಿ ಜಿಣೆಚೆಂ ದರ್ಶನ್ ಘಡಯತಾನಾ, ಗಾಂವಗಿರ್‍ಯಾ ವಾತಾವರಣಾಂತ್ ಘಡಪಿ ಗ್ರಾಮೀಣ್ ಸಂಸ್ಕೃತಾಯೆಚೆಂ ಚಿತ್ರಣ್ ತಾಚ್ಯಾ ಕಥಾಂನಿ ದಿಸ್ತಾ. ಲೆಖಕಾಚಿ ದೃಶ್ಟಿ ಫಕ್ತ್ ವ್ಯಕ್ತೀ- ಕೆಂದ್ರೀತ್ ನಾ ತರ್ ವ್ಯಕ್ತೀಚ್ಯಾ ಜಿಣೆಂತಲ್ಯೊ ಘಡಣುಕೊ ಸಮಾಜೀಕ್ ಪರ್ಯಾವರಣಾಂತೂಚ್ ಘಡತ್ ಆಸ್ತಾತ್, ಹೆಂ ಭಾನ್ ಲೆಖಕಾಕ್ ಆಸಾ. ತಾಕಾ ಲಾಗೂನ್ ತಾಚ್ಯೊ ಕಥಾ ವ್ಯಕ್ತೀಚೆ ಭಾವ್ನಾತ್ಮಕ್ ಪ್ರಸ್ನ್ ಮಾಂಡಟಾ ಆಸ್ತಾನಾ ತ್ಯಾ ಪ್ರಸ್ನಾ ಫಾಟಲ್ಯಾನ್ ಪ್ರತ್ಯಕ್ಷ್ ವಾ ಅಪ್ರತ್ಯಕ್ಷಪಣಾನ್ ಸಮಾಜೀಕ್ ಕಾರಣಾಂಚ್ ಆಶಿಲ್ಲೀಂ ದಿಸ್ತಾತ್. ತಾತೂಂತ್ ಸಮಾಜಾಚ್ಯೊ ರುಢೀ, ನಿತೀ, ಕಲ್ಪನಾ, ಶ್ರಧ್ದಾ, ಸಮಜ್, ಪರಂಪರಾ ಹ್ಯೊ ವ್ಯಕ್ತಿ ಜಿಣೆಂತಲ್ಯಾ ಭಾವ್ನಾಂಚ್ಯಾ ಸಂಘರ್ಶಾಂತಲ್ಯಾನೂಚ್ ನಿರ್ಮಾಣ್ ಜಾತಾತ್ ಹೆಂ ಹ್ಯಾ ಕಥಾಂನಿ ದಿಶ್ಟಿ ಪಡಟಾ. ತಾಚಿ ಕಥಾ ಸಮಾಜೀಕ್ ಪರ್ಯಾವರಣಾಂತೂಯ್ ಘಡತ್ ಗೆಲ್ಲಿ ಆಸಾ. ದೆಖೀಕ್, ತೊ ಪ್ರಸ್ನ್ ಮಾಗೀರ್ ಜೊನಾಚ್ಯಾ ಸ್ವಾಭಿಮಾನಾಚೊ ಆಸೂಂ, ಅನಾಥ್ ಭುರಗ್ಯಾಚೆ ಭಾವ್ನೆಚೊ ಆಸೂಂ ವಾ ತೆ ಜಾಣ್ಟೆ ಮಾಯಚೊ ಆಸೂಂ ವಾ ಪೆಟ್ಯಾಚೊ ಆಸೂಂ.
ತಾಚ್ಯೊ ಕಥಾ ವಾಸ್ತವೀಕ್ ಆಸಾತ್. ಸರ್ಜನಶೀಲ್ ಸಾಹಿತ್ಯಕಾರ್ ಹೆರ್ ಬರೊವಪ್ಯಾಂ ಪರಸ್ ವೆಗಳೊ ಆಸ್ತಾ. ದುಸರ್‍ಯಾಂಚೆಂ ದೂಖ್ ಪಳೊವ್ನ್ ತೊ ಕಳವಳಟಾ, ಜೆಂ ವಾಯಟ್ ಆಸಾ ತೆಂ ಪಳೊವ್ನ್ ತಾಕಾ ತಿಡಕ್ ಯೆತಾ, ಜೆಂ ಶ್ರೆಶ್ಠ್ ಆಸಾ, ಪುಜ್ಯ್ ಆಸಾ ತಾಚ್ಯಾ ಮುಖಾರ್ ತೊ ಬಾಗವತಾ. ಹೆಂ ಸಗಳೆಂ ಆಪಲ್ಯಾ ಲೆಖನಾಂತಲ್ಯಾನ್ ತೊ ಅಶೆ ತರೆನ್ ಮಾಂಡಟಾ ಕಿ ವಾಚಪಿ ಅಂತರ್ಮೂಖ್ ಜಾವ್ನ್ ವಾಚತಾತ್, ತಾಕಾ ತ್ಯೊ ಆಪಲ್ಯೊ ಕಶ್ಯೊ ದಿಸ್ತಾತ್. ಆಶಯಾ ಕಡೆನ್, ಪಾತ್ರಾಂ ಕಡೆನ್ ತೊ ಎಕರೂಪ್ ಜಾತಾ ಆನಿ ಹಾಚೆಂ ಮುಖೆಲ್ ಕಾರಣ್ ಮ್ಹಣಲ್ಯಾರ್ ಕಥಾಂನಿ ಆಯಿಲ್ಲೀಂ ವಾಸ್ತವೀಕತಾ. ಬಾಬ್ ಎಡ್ವಿನ್ ಡಿಸೊಜಾಚ್ಯೊ ಸಗಳ್ಯೊ ಕಥಾ ವಾಸ್ತವೀಕ್ ಜಿಣೆಚೆರ್ ಆದಾರಿಲ್ಲ್ಯೊ ಆಸಾತ್. ಮನಶಾಚಿ ಶೊಕಾಂತಿಕಾ, ಮನೊವೃತ್ತೀ, ವಾಗಣೂಕ್ ಆಪಲ್ಯಾ ಕಥಾಂನಿ ಚಿತ್ರಾವಪಪಾಚೊ ಯತ್ನ್ ತಾಂಣಿ ಕೆಲಾ.
ಹ್ಯಾ ಕಥಾಂನಿ ಭೂಂಯ್ ಆನಿ ಭಾಶೆಕ್ ಕಥಾಕಾರಾನ್ ಮ್ಹತ್ವ್ ದಿಲ್ಲೆಂ ಆಸಾ. ‘ಬಣ್ಣಕಡ್ಡಿ’ ಕಥೆಂತ್ ಆಪಲಿ ಭೂಂಯ್ ಆನಿ ಭಾಶೆ ವಿಶೀಂ ಆಶಿಲ್ಲೆಂ ಮೊಠೆಪಣ್ ಲೆಖಕಾನ್ ದಾಖಯಲಾಂ. ಆಪೂಣ್ ವ್ಹಡ್ ಜಾವಚ್ಯಾ ಹಾವೆಸಾನ್ ಆಪಲಿ ಮಾಂಯಭಾಸ್ ಸೊಡೂನ್ ಪರಕಿ ಇಂಗ್ಲೀಶ್ ಭಾಸ್ ಆಪಣಾಯಲ್ಲ್ಯಾನ್ ಲೆಖಕಾಕ್ ವಾಯಟ್ ದಿಸ್ತಾ. ಇತಲೆಂಚ್ ನ್ಹಯ್ ತರ್ ಆಪಲೊ ಗಾಂವ್, ಗಾಂವಚೆಂ ಸೈಮ್, ನ್ಹಂಯ್, ತಳಿ ಆನಿ ಬಾಂಯೊ ಉದಕಾಚಿ ಪಾಯಪಲಾಯಣ್ ಆಯಿಲ್ಲ್ಯಾನ್ ಕಶೆ ತರೆನ್ ನಶ್ಟ್ ಜಾವಂಕ್ ಪಾವಲ್ಯಾತ್ ಹಾಚೆಂಯ್ ದೂಖ್ ಲೆಖಕಾಕ್ ಜಾತಾ. ಆಪಲಿ ಮೂಳ್ ಸಂಸ್ಕೃತಾಯ್ ಆನಿ ಘರ್-ದಾರ್ ಮೊಡೂನ್ ಉಥಳ್ ಪುರೊಗಾಮಿ ವಿಚಾರಾಂಚೊ ರಾಕ್ಷಸ್ ಆಮಚ್ಯಾ ಘರಾಂನಿ ಪಾವಿಲ್ಲ್ಯಾಚೆಂ ದೂಖ್ ತೊ ಮಾಂಡಟಾ.
ಹ್ಯಾ ಕಥಾಂನಿ ಬಾಯಲಾಂಚ್ಯೊ ಸಮಸ್ಯಾ ಮಾಂಡಪಾಚೊ ಯತ್ನ್ ಲೆಗೀತ್ ಜಾಲ್ಲೊ ಆಸಾ. ಪುರುಶಾತ್ಮಕ್ ಸಮಾಜವೆವಸ್ಥೆ ಮುಖಾರ್ ಹತಬಲ್ ಜಾಲ್ಲ್ಯಾ ಬಾಯಲಾಂಚೆಂ ಪ್ರತಿನಿಧಿತ್ವ್ ಕರಪಿ ಸ್ತ್ರಿ ಆಮಕಾಂ ‘ಮೊತೀಕ್ ಎಕ್ ಪಾಟೊ’ ಕಥೆಂತ್ ದಿಶ್ಟಿ ಪಡಟಾ, ಜಾಲ್ಯಾರ್ ಆಪಲ್ಯಾಚ್ ಘರಾಂತ್ ಎಕಲೆಪಣಾನ್ ಜಗಪಿ ಎಕೆ ಆವಯಚೆಂ ವಾಸ್ತವ್ ‘ಎಕ್ ಕೊಪ್ ಹುನೊನಿ ಕೊಫಿ’ ಕಥೆಂತ್ ಪ್ರಭಾವೀಪಣಾನ್ ಮಾಂಡಲಾಂ. ಆಯಚ್ಯಾ ಸಮಾಜಾಚ್ಯೊ ಸಮಸ್ಯಾ, ಬಾಯಲಾಂಚೆರ್ ಜಾವಪಿ ಅನ್ಯಾಯ್, ಅತ್ಯಾಚಾರ್ ಹ್ಯಾ ಕಥಾಂನಿ ದಿಸೂನ್ ಯೆತಾ.
ಆತ್ಮನಿವೆದೀ, ತೃತೀಯ್ ಪುರುಶಿ ನಿವೆದನ್ ಆನಿ ಸಂವಾದ್ ವಾಪರೂನ್ ಆಪಲಿ ಕಥಾ ಶೈಲಿ ಪ್ರಭಾವಿ ಕರಪಾಚೊ ಯತ್ನ್ ಕಥಾಕಾರಾನ್ ಕೆಲ್ಲೊ ಆಸಾ.
ಸಗಳ್ಯಾ ಕಥಾಂಚೊ ಅಂತ್ ದುಖಾನ್ ಜಾಲೊ ತರೀಯ್ ತಾಂಚೊ ಶೆವಟ್ ಲೆಖಕ್ ವಾಚಕಾಂಚೆರ್ ಸೊಡಟಾ. ‘ಬಣ್ಣಕಡ್ಡಿ’ ಕಥೆಂತ್ ಪಾಯಪಾಂಕ್ ಲಾಗಿಲ್ಲೆಂ ಖತ್ ವಾ ‘ಎಕ್ ಕೊಪ್ ಹುನೊನಿ ಕೊಫಿ’ ಕಥೆಂತ್ ಪೆಟಯಲ್ಲಿ ಕಾಡಿ ವಾ ಮೊತೀಚ್ಯಾ ಗಳ್ಯಾಂತ್ ಘಾತಿಲ್ಲೊ ಪಾಟೊ ವಾ ಕಾರೀಂತ್ ಬಶಿಲ್ಲೆ ಬಾಯಲೆಚ್ಯಾ ಮನಾಂತಲೆ ಭಾವ್ ಹೆ ವಾಚಕಾಂಕ್ ಕಥೆಚೊ ಶೆವಟ್ ಥಾರಾವಪಾಕ್ ಮೆಕಳೀಕ್ ದಿತಾತ್. ಬರಿ ಕಥಾ ಹಿ ಸಗಳೆಂಚ್ ಸಾಂಗಚೆ ಪರಸ್ ಸುಚಕತಾಯೆನ್ ವಾಚಕಾಂಕ್ ನಿರ್ಣಯ್ ಘೆವಪಾಕ್ ಪ್ರವೃತ್ತ್ ಕರತಾ ಆನಿ ಅಪ್ರತ್ಯಕ್ಷಾಂತ್ ತಾಂಕಾಂಯ್ ಕಥೆ ಭಿತರ್ ಆಸಪಾವ್ನ್ ಘೆತಾ. ‘ಕಾಗ್ದಾಚಿ ಸ್ತ್ರೀ’ ಹಿ ಕಥಾ abstract ಕಥೆಚೊ ಪ್ರಕಾರ್ ಆಶಿಲ್ಲ್ಯಾ ಕಾರಣಾನ್ ವಾಚಕಾಕ್ ಕೆಂದ್ರ್ ಸ್ಥಾನಾರ್ ದವರೂನ್ ತಿ ಬರಯಲ್ಲಿ ಆಸಾ.
ಸಗಳ್ಯಾ ಕಥಾಂನಿ ಜಬರದಸ್ತ್ ಸಂಘರ್ಶ್ ಪಳೊವಪಾಕ್ ಮೆಳಟಾ. ಹೊ ಸಂಘರ್ಶ್ ಗರೀಬ್-ಗಿರಿಸ್ತಾಂ ಮದಲೊ ಜಾವಂ, ಸಕಯಲೊ ವರ್ಗ್ ಆನಿ ವಯಲ್ಯಾ ವರ್ಗಾಂ ಮದಲೊ ಜಾವಂ, ಆಪಲೆ ಪ್ರತಿಶ್ಠೆಚೊ ವಾ ಸ್ವಾಭಿಮಾನಾಚೊ ಜಾವಂ, ಜನಾವರಾಂಚೊ ಜಾವಂ, ಮನಶಾಚ್ಯಾ ಭಾವ್ನಾಂ ಮದಲೊ ಜಾವಂ, ನಾತ್ಯಾಂತಲೊ ಜಾವಂ, ಖೊಟೆ ಪ್ರತಿಶ್ಠೆಚೊ ಜಾವಂ, ಪಿಳಗ್ಯಾಂ ಮದಲೊ ಜಾವಂ, ವಿಚಾರಸರಣೆ ಮದಲೊ ಜಾವಂ, ಸಂಸ್ಕಾರಾಂ ಮದಲೊ ಜಾವಂ ವಾ ಸೈಮಾಚೊ ಜಾವಂ, ಅಶೆ ತರೆಚೊ ಪ್ರಬಳ್ ಸಂಘರ್ಶ್ ಸಗಳ್ಯಾ ಕಥಾಂನಿ ಆಯಿಲ್ಲೊ ದಿಶ್ಟಿ ಪಡಟಾ.
ಶೆವಟಾಕ್ ಎಕ್ ಗಜಾಲ್ ವಾಯಟ್ ದಿಸ್ತಾ, ಆದಲ್ಯಾ ಕಾಳಾ ವಯಲ್ಯಾ ಅನ್ಯಾಯ್ ಸಹನ್ ಕರಪಿ ಬಾಯಲಾಂಚೆಂ ಚಿತ್ರಣ್ ಕಥಾಂನಿ ಆಯಲಾಂ ಪೂಣ್ ಆಯಚಿ ಆಧುನೀಕ್ ಬಾಯಲ್ ಮನೀಸ್ ಹೆಂ ಮುಕಾಟ್ಯಾಂನಿ ಸಹನ್ ಕರಪಿ ಆಸಾ ಕಾಯ್ ನಾ?, ಹಾತೂಂತ್ ದುಬಾವ್ ದಿಸ್ತಾ. ತೆಚ್ ತರೆನ್ ‘ಕಾಗ್ದಾಚಿ ಸ್ತ್ರೀ’ ಹಿ ಕಥಾ ತಶೆಂಚ್ ಕಥೆಂತಲ್ಯೊ ಭಾವ್ನಾ ಸಮಜುಪಾಕ್ ಕಳಾವ್ ಲಾಗತಾ. ಹ್ಯೊ ಸಗಳ್ಯೊ ಕಥಾ ವಾಚಕಾಂಚೆರ್ ನಿಶ್ಚಿತೂಚ್ ಪರಿಣಾಮ್ ಕರತಾತ್. ತೆಚ್ ತರೆನ್ ವಾಚಕಾಂ ಮದೀಂ ತಿವ್ರ್ ಸಂವೆದನಾ ಜಾಗೃತ್ ಕರತಾತ್. ಜಿಣೆಚ್ಯಾ ಜ್ಯಾ ಘಟಿತಾಂ ವಿಶೀಂ ಲೆಖಕಾಕ್ ಸಾಂಗಪಾಚೆಂ ಆಸಾ ತೆಂ ತ್ಯಾ ಘಟಿತಾಂ ಕಡೆನ್ ಪ್ರಾಮಿಣೀಕ್ ರಾವ್ನ್, ಕಲ್ಪನಾ ಆನಿ ಅತಿಶಯೊಕ್ತೀಚೊ ವಾಪರ್ ನ್ ಕರತಾ, ತಾಂಣಿ ಸಾಂಗಲಾಂ, ಜಾಕಾ ಲಾಗೂನ್ ವಾಚಕಾಂಚಿ ಜಾಣೀವ್ ಅದೀಕ್ ಸಮೃದ್ಧ್ ಜಾಲ್ಯಾ. ಹ್ಯಾ ಕಥಾಂತಲ್ಯಾನ್ ಲೆಖಕಾಕ್ ಜೆಂ ಸಾಂಗೂಂಕ್ ಜಾಯ್ ತಾಚೊ ಜಿವಂತ್ ಪ್ರತ್ಯಯ್ ವಾಚಕಾಂಕ್ ಯೆತಾ.
ಸಂದರ್ಭ್:
೧. ಡಿಸೊಜಾ, ಎಡ್ವಿನ್ ಜೆ. ಎಫ್. ಬಣ್ಣಕಡ್ಡಿ, ಮೊತೀಕ್ ಎಕ್ ಪಾಟೊ, ಕಾಗ್ದಾಚಿ ಸ್ತ್ರೀ, ಎಕ್ ಕೊಪ್ ಹುನೊನಿ ಕೊಫಿ.
೨. ಸರದೆಸಾಯ್, ಪ್ರಾ. ಲಕ್ಷ್ಮಣರಾವ್. ಕಥಾಶಿಲ್ಪ್. ಜಾಗ್ ಪ್ರಕಾಶನ್, ೧೯೭೭.
೩. ಕ್ವಾದ್ರೂಶ್, ವಲ್ಲೀ. ಚಲ್ ದೊನ್ ಚಂದ್ರಾಂಕ್
೪. ಬುಡಕುಲೆ, ಕಿರಣ್. ಅಕ್ಷರ್ ಸರಿತಾ. ಬಿಂಬ್ ಪ್ರಕಾಶನ್, ೨೦೦೯.
೫. ನಾಗವೆಂಕಾರ್, ಹರಿಶಚಂದ್ರ್. ಆಸ್ವಾದನ್. ಕಾಲಿಕಾ ಪ್ರಿಂಟರ್ಸ್, ೧೯೮೭.
೬. ಸಂಪಾದನ್- ಗೊವಾ ಕೊಂಕಣಿ ಅಕಾದಮೀ, ಸಾಹಿತ್ಯಶಿಲ್ಪ್. ೧೯೫೯.