एच. आर. आळवचें ’केनरांत बदलाल्लें जिवीत आनी हेर लेखनां’ पुसतक लोकार्पण
केनरांत बदलाल्लें जिवीत आनी हेर लेखनां पुसतक कोंकणेचें व्हड दायज जातलें म्हणालो मोकळीक केल्लो आलबर्ट डबल्यू. डिसोजा
एच. आर. आळवन लीखल्ल्या केनरांत बदलाल्लें जिवीत आनी हेर लेखनां पुसतकाचें मोकळीक काऱ्यें अकटोबर १ तारिकेर मंगळुरांतल्या दायजी वरलड प्रधान दफ्तरांत चल्लें. मुंबयच्या प्रिंटानिया ख्यातेचो उद्यमी, मोडेल शेड्यूलड ब्यांकाचो अध्यक्ष, पालघरांतल्या सैंट जोन उंचल्या शिकपा संस्थ्यांचो स्थापक आनी महाराषट्र कोंकणी भाषा मंडळाचो अध्यक्ष आलबर्ट डबल्यू. डिसोजान पुसतक मोकळीक केलें.
आलबर्टान उलवन - मंगळूर दियेसेज एकीकृत आसताना अख्ख्या दियेसेजिचो युवजण मुकेली, दियेसेजिचा गोवळीक परिषदेचो पयलो चुनायीत लायीक काऱ्यदर्शी आनी अरध्या शतमाना वयल्या आवदे थावन कोंकणी पत्रांनी सराग बरयित्त आसच्या लेखक एच. आर. आळव हाचीं लेखनां हांव वाचुन्ंच आयलां. बोरिविंतल्या आमच्या मौंटव्यूव मेंगलूर स्टोरस आंड कोलड स्टोरेजाक गांवचे जायते ग्राहक आसात. त्यापयकीं थोडे दिवो हफ्त्याळ्यार सराग येंवच्या एच. आर. आळवचा बरपांची होगळाप उचारतात. राज्य शासत्रांत एंए,, कानून आनी इंजिनियरिंग विषयांनी शिकप आसच्या आळवचीं लेखनां माहेतेचीं आनी आसक्त उटंवचीं आसतात. ह्या खातीर तीं बोरिंच खायस जातात. ताचा मरियाडस प्रकाशनाचा मुकांत्र फायस केल्ल्या २५ लेखनांचो संग्रह केनरांत बदलाल्लें जिवीत आनी हेर लेखनां पुसतक उग्तावण करुंक व्हड अभिमान भग्ता म्हळें.
पुसतकाचा लेखनांविशीं उलयिल्ल्या आलबर्टान - एच. आर. आळव आनी हांव - आमी दोगी मुळान ग्रामीण प्रदेशांतले कृषीक. केनरांत बदलाल्लें जिवीत आनी हेर लेखनां पुसतकांत मूळ केनरांतल्या (स्थापन १८००) बदलाल्ल्या जिविताविशीं प्रमूक लेखनासवें, ग्रामीण जिवीत, रैतांनी भगून आसचे कषट - संकषट, स्वातंतऱ्य चळवळ, महात्मा गांधिचे विचार, प्रजापरभुत्व आनी तें उरंवची गर्ज, महत्वाचें मतदान, पंचवारषीक योजनां, खाण, दूद आनी मासळे बाबतिची क्रांती, ब्रिटीष काळा थावन आतां पऱ्यांत भारतांतले शिकपा निती, आवय - बापयचें महत्व आसल्या आनी हेर विषयांचेर २५ लेखनां आसात. अक्रेचें लेखन - व्हडिलांनी भूरग्यांची आसक्त समजाजय हें बारावी पऱ्यांत शिकचीं भूरगीं आसच्या व्हडिलांनी आवश्य जावन वाचिजाय जाल्ल्या तसलें म्हळें.
मुकारून ताणे सांगलें पुसतक रुपार छापो जाल्लें साहित्य जायतितलीं वर्सां अमर जावन उर्ता. तांतुंयी सरव काळाक लग्ती जावन लीखल्लें साहित्य केदिंच पर्नें जायना. कोंकणेंत ह्या नमून्याचें पुसतक एदोळ आयिल्ल्याविशीं हांव नेणा. विवीध विषयांचेर माहेत आटापचें पुसतक कोंकणी समाजेक दिल्ल्या लेखकान लोका मेचवणेचो वावर केला म्हळें. बहुमानां दिवंकयी हें पुसतक उपकार्ता म्हण अभिपराय उचारल्ल्या ताणे म्हज्या संपर्काक येंवच्या मंगळुरी कोंकणी लोकाक हें पुसतक पाववंक मिनत घेतलों म्हळें.
बुकाचा वीकऱ्या बाबतीन माहेत आटापच्या ब्रोशराचें उग्तावण केल्ल्या मंगळूर एं.सी.सी. ब्यांकाचो अध्यक्ष अनील लोबोन उलवन एच. आर. आळव १९८१-८४व्या वर्सांत दियेसेजिचा सिवैएं संघटनांत अध्यक्ष आसल्लो. हांव २००४-२००५व्या वर्सांतलो अध्यक्ष. आमकां तो तेदाळा आनी आतांयी रोल मोडेल जावनासा. २००६-०७व्या वर्सा एंएलसी ऐवन डिसोजाचा अध्यक्षपणाचा दियेसेज ऐसिवैएं भांगारोत्सव समितेंत एच. आर. आळवन विशेष मिनतेचो वावर दिल्लो. आमच्या समाजेंत ताका बोरो गौरव आसा म्हळ्ळ्या अनिलान पुसतक प्रतियांचा बाबतीन व्यवहार एंसिसी ब्यांकांत चलंवचो आमकां अभिमानाची गजाल. मरियाडस प्रकाशनाक आनी ग्राहकांक आमची बरी सेवा मेळतली म्हण सांगोन लेखकाक आनी ताचा कुटमाक तशें प्रकाशनाक बरें मागलें.
दायजिवरलड संस्थापक आनी सीईओ वाल्टर नंदळिकेन पुसतक मोकळीक काऱ्याचें अध्यक्ष स्थान घतल्लें. आपल्या अध्यक्षीय उत्रांनी आपणाक ल्हान थावन काणियों, कवनां, लेखनां बरंवची हुमेद आसल्ली. ९व्या क्लासिंत आसताना मटवी काणी बरयिल्ली. ती एका पाटल्यान एका पत्राक दाडल्यारी खंयसरयी प्रगट जालिना. आमचो युवक महिन्याळें पत्र स्तापन करन तें चलवन आसल्ल्या एच. आर. आळवक दाडल्ल्या वेळार ताणे ती तुर्तान फायस केल्ली. ह्यावर्वीं म्हाका हुमेद येवन हांवें उपरांत बरयिल्ल्यो जायत्यो काणियों, कवनां, लेखनां कोंकणिंतल्या पत्रांनी फायस जाल्यांत. म्हजो आतांचो वावर वेळ मागचो न्हय तर हांव बरपा क्षेत्रांत फुडें वेतों. मंगळूर आकाशवाणिंत हुद्देदार जावनासल्ल्या कन्सेपटा फेर्नांडिसान म्हाका आकाशवाणीक आपवन रेकोर्ड करन म्हजी काणी प्रसार केल्ली. हांवें दायजी दुबय वेबसैट सुर्वात कर्ताना ह्या जोड्यान म्हाका आधारासवें प्रोत्साह दिल्लो. ह्या जोड्याक हांव अभारी जावनासां म्हळें.
आपल्या बरपां मुकांत्र कोंकणी समाजेंत परिचीत जावनासच्या एच. आर. आळवचें नवें पुसतक केनरांत बदलाल्लें जिवीत आनी हेर लेखनां आमच्या दायजी वरलड स्टुडियोंत मोकळीक जांवची संतोसालानी अभिमानाची गजाल. हें पुसतक कोंकणी लोकाक माहेत आनी मार्गदर्शन दिंवच्यांत सुफळ जांवच्यांत दुभाव ना म्हळें.
आर्ध्या शतमानावयल्या आवदे थावन एच. आर. आळवचीं बरपां फायस करन आयिल्ल्या राकणो हफ्त्याळ्या पत्राचो संपादक मा|बाप रूपेश माडता आनी पुसतकांतलीं लेखनां तिद्वून, सुध्रावन आकरषीत रितीन सजवन छापून दिल्ल्या मंगळुरांतल्या अस्सिसी प्रेस्साचो दिरेक्तोर तशें सेवक महिन्याळ्याचो संपादक मा|बा| चेतन लोबो कापुचीन - हे मानाचे सयरे जावनासल्ले. तांचा संस्थ्यांक ह्या वेळार पयली प्रती दिली.
सुर्वेर लेखक आनी मरियाडस प्रकाशनाचो म्हालक एच. आर. आळवन हाजर जाल्ल्या सरवांक स्वागत केलो. आपल्या प्रसतावन उत्रांनी भूरग्यापणा थावन युवकपणाक उत्रोन येताना आपणाक मुकेल्पणांत प्रेरीत केल्ल्या कन्नड अक्षर मालेंतल्या आ थावन आरंभ जांवच्या तेगांक ताणे वंदिलें. ते जावनासात - आसकर (फेर्नांडीस), आसटीन (डिसोज प्रभू) आनी आलबर्ट (विलफ्रेड डिसोज). आपलो इषट म्हळ्ळ्याबरी आसलेल्या बिस्प बाजील सालवदोर डिसोज आनी १९७२ इस्वे थावन आपणाक राकणो पत्रार येवकार दिल्ल्या संपादक बाप मारक वालडर - हांकां कृतज्ञता अर्पिली.
नवें पुसतक केनरांत बदलाल्लें जिवीत म्हळ्ळ्या शिरोनांवार / माताळ्यार आसल्यारी, फकत केनराक सीमीत नासताना कर्नाटक आनी भाgता भंवारीं भंवलां. मनश्यां संबंधां कुशीन घुंवला. ह्या पुसतकांतलीं थोडीं लेखनां एदोळ राकणो, उज्वाड, दिवो, सेवक, दिर्वें आनी हेर छाप्याचा पत्रांनी आनी वीज कोंकणी ई-हफ्ताळ्यार फायस जाल्लीं आसात. पूण बुका रुपाक हाडताना लेखनांनी थोडी वा जायती बदलावण करन लेखनां सर्वय काळाक उपकाराशें केल्यांत. थोडीं नवीं लेखनां पुसतका खातीरच लिखल्यांत. धार्मीक आनी राजकीय परिधे थावन भायर आसात.
१९७२ इस्वे थावन आपलीं बरपां फायस केल्ल्या आनी आजून फायस कर्न आसच्या सर्व पत्रांचा संपादकांक आनी वाचल्ल्या वाचप्यांक प्रणाम अर्पिले. आपल्या साहितीक वावरांत सदांच प्रोत्साहीत कर्न कुमक दिंवच्या आनी केनरांत बदलाल्लें जिवीत आनी हेर लेखनां पुसतक भायर येवंक कारण जाल्ल्या पतीण कन्सेपटा फेर्नांडीस आनी भूरगीं हरष आळव आनी हीरा आळवक ताणे धिन्वास म्हळें.
बेंगळूर आकाशवाणी केंद्राची निवृत सहायक निर्देशकी कन्सेपटा फेर्नांडिसान काऱ्यें निर्वहण करन निमाणे उपकार आटयलो. हरष आळव आनी हीरा आळवन सयऱ्यांक फुलां दिलीं. मुंबय - पालघरांतल्या सैंट जोन्स क्यांपसाचो रेजिसट्रार डा. चारल्स पायस, केंद्र साहित्य अकाडेमी प्रशसती
विजेत कवी मेलवीन रोड्रिगस, चलनचित्र निर्देशक स्ट्यानी बेळ, कोंकणी लेखक प्रवीण तावरो, विन्सी पिंटो, रोनालड नजरेत आनी हेर उपस्थीत आसल्ले.
मरियाडस प्रकाशनाचीं आदलीं पुसतकां
०१. ’म्हजे अङओ दीस’ (२००७)
- ऐसिवैएं संघटनांतल्या १४ वर्सांचा वावराचो विवर
- लेखक: एच. आर. आळव
०२. ’वज्रां’ (२००९)
- ३५०० चुटकुल्यांचो पुंजो
- कवी: डो. आसटीन डिसोजा प्रभू
०३. ’सातें’ (२०१०)
- बारा मटव्या काणियांचो पुंजो
- लेखकी: क्याथरीन रोड्रिगस, कटपाडी
एच. आर. आळवचें प्रसतूत पुसतक:
केनरांत बदलाल्लें जिवीत आनी हेर लेखनां
- केनरा जिल्ल्यासवें कर्नाटक, भारताक लग्तीं २५ लेखनां. केनरा जिल्ल्यांत जाल्ली बदलावणे बाबतिचें विशेष लेखन. लेखकाचा स्व-अनभोगाचेर लीखल्लें ’व्हडिलांनी भूरग्यांची आसक्त समजाजाय’ - बारावी (पियुसी) पऱ्यांत शिकचीं बूरगीं आसच्या समेसतांनी वाचिजायच जाल्लें लेखन.
हांचा शिवाय हेर लेखनां : संसारांत घडची जेराल बदलावण, बिडारां, हवामान
बदलावणे विषयार (चार लेखनां), स्वातंतऱ्य चळवळेविशीं (दोन), महात्मा गांधिचा तत्वांचेर (दोन), भारताचा विविधतेर (एक), प्रजापरभुत्वां विषयांत आनी भारताचा प्रजापरभुत्वाचेर (चार), देशाची ग्रामीण प्रगती, भारत देशाचा प्रगतेचेर होंद्वोन (सात), ब्रिटीष काळा थावन शिकपा नितिचेर, देंवल्ली वाचपा ताने विशीं एक, आवय -बापयच्या महत्वाविशीं दोन, प्रवासोद्यमाचेर दोन आशीं लेखनां आसात.
लेखकाचें बाळपण, शिकप, वावरा जिवीत, स्व-उद्यमांत, बरपा क्षेत्रांतलो वावर, आकाशवाणी काऱ्यक्रमां, नाटक क्षेत्र, पत्रांचें स्थापन आनी स्मरण अंक्यांविशीं, संघ संस्थ्यांनी केल्लो वावर - प्रत्येक जावन सिवैएं, कथोलीक सभेचा स्थापनांतलो आनी उपरांतल्या धा वर्सांचो वावर, गोवळीक परिषद पयलो चुनायीत काऱ्यदर्शी, पांगळा फिर्गजेंत, रोटरी - रोटरयाकटांत, नागरीक समिती, मंगळुरांत म्याको दिरेक्तोर, सैंट जोसेफ इंजिनियरिंग कोलेजिचा स्थापनांत, जिल्ला प्रवासोध्यम समितेंत आनी जेराल समाजेंत काऱ्यीं संघटन आनी निधी जमावण, देश - विदेशांतलो प्रवास आनी काऱ्यक्रमां, कुटमा जिवीत - ह्या आनी हेर विषयांचेर आटापची विसकृत व्यक्ती परिचय दिल्या. लेखकाचें शिकप, सामाजीक वावराचो प्रभाव बरपां बरंवच्यांत प्रेरीत केल्ल्याचें दर्शन जाता. लेखनां बेळशेंवच्या वा आपलें महत्व होगडांवचा रितीर नासताना वर्सांची - वर्सां निरंतर बाळवोंचा रितीर आसात.
पुसतक ह्या संग्तिंक उप्योगाचें जाता:
जेराल माहेतीक, इनामां दिवंक, भाषण स्पर्ध्यांचा विषयांक, भाषणांक गर्जेची माहेत आपणावंक, इसकोलांनी / कोलेजिंनी कोंकणी शिकवंक आनी हेर गर्जांक मसत उपकाराचें जांवच्यांत दुभाव ना.
पुसतक प्रतियो मंगळूर, उडुपी (शंकरपूर) आनी बेंगळुरांत कोंकणी पुसतकां विक्रापाचा सदांच्या
सुवातेंनी मेळतात. पुसतक भारतांतल्या खंयच्यायी सुवातेक स्पीड पोसटा मरिफात दडची विलेवारी आसा. ह्या बाबतीन प्रकाशकाचा मोबायल / वाटसप ९१०८८६८८०३ संख्याक संपरक कऱ्येता,
पुसतक मेळचे जागे:
मंगळुरांत - जेरोसा कंपेनी, मिलार इगर्जे सामकार,
हंपनकट्टा फोन: +९१-८२४ - २४२३८७०, वाटसप: ९७४१६९४५२७
शंकरपूर (उडुपी): रोविजा शोप, है पोंयट,
पांगळा इगर्जे सामकार, शंकरपूर. मोबायल: ९७४०८४४८७९
बेंगळुरांत: एशियन ट्रेडिंग कोर्पोरेशन (एटिसी)
फोन: +९१- ८२४- २५४९२९९९ / २५४९१९९९
प्रकाशकांचो संपरक: वाटसप - +९१ ९१०८८६८८०३,
एका प्रतियेचें मोल: रू. २००/-
उग्तावणे दिसाच लागीं १५० प्रतियांचो विक्रो जाला वा बुकिंग जाल्यात. प्रतियो जटपट विक्रो जावन वेचो संभव आसल्ल्यान आसक्तेवंतांनी जाता तितल्या वेगीं प्रती मोलाक घेतल्ली बरी.
