क्याथरीन रोड्रिगसाच्यो कथा-जमो उग्तावण, कोंकणी कविगोश्टी आनी साधकांक मान
कटपाडी (६ सप्तेंबर २०२६) आशावादी प्रकाशनाच्या ’के.बी.एस’ (लिपिभायली कोंकणी) येवजणेखाल चोवतें पुसतक ’क्याथरीन रोड्रिगसाच्यो कथा’ उग्तावण काऱ्यें, आयतारा (सप्तेंबर ६) सकाळीं साडे था वोरांचेर, कटपाडिच्या जोन्स आर्क घरांगणांत चल्लें. नाम्नेचो तुळू साहिती मुद्दू मूडुबेळ्ळेन, आशावादी प्रकाशनान क्याथरीन रोड्रिगसाच्या ५० मोटव्या काणियांक नागरी लिपिंत लिप्यंतरण केल्लें पुसतक लोकार्पण करून ’क्याथरीन रोड्रिगस’ तुळू साहित्यांत एक व्हड नांव, कन्नड, तुळू साहित्य, नाटक शेतांत सयत जायतें योगदान दिलां देकून तिचें पुसतक लोकार्पण करुंक म्हाका खरोच अभिमान भग्ता म्हणालो.
काऱ्याच्यासुर्वातेर लोरेटा वीणामोंतेरोन सर्वांक येवकार मागोन मुद्दू मूडुबेळ्ळे, आंडऱ्यू एल. डिकुन्हा, वल्ली क्वाड्रस, क्याथरीन रोड्रिगस आनी आग्नेल रोड्रिगस हांकां वेदीक येवकार दितच सिंतिया, फ्रीडा आनी पंगडाच्यानीं प्रार्थन गीत गायलें. बाय स्वीनी रोड्रिगसान येवकार उलवप कर्तच के.बी.एस. सल्हा समितिच्या सांद्यान आंडऱ्यून एल. डिकुन्हान के.बी.एस. (कोंकणी बियोंड स्क्रिपट) विषयांत उलवन "भास जावनासा, अभिव्यक्तेचें माध्यम. मायभास अमच्या पुर्वजां थावन मेळल्ली अस्मिताय. मौकीक (तोंडा उत्रानीं) आयिल्ली. कोंकणेंत कितलेश्या साहितिंनी सेवा दिवन त्याग अर्पिला. अज काल अमचे बरवपी आनी कोंकणी सेवक भाषेच्याकी लिपिंक चड महत्व दिल्लेबरी दिसता. वेवेगळ्या लिपिंनी बरंवच्या बरवप्यांक एक सांकोव रसचें काम कांय तेंपाथावन आशावादी प्रकाशन करून असा. हें काऱ्यें तशेंच ह्या काऱ्यांत उग्तावण जावंक आसचें पुसतक के.बी.एस. येवजणेचें चोवतें पुसतक" म्हणालो.
आशावादी प्रकाशनाचो वल्ली क्वाड्रस प्रासतवीक उलोवपांत शिक्षकाच्या दिसा समेसत शिक्षकांक उल्लास पाटवन म्हणालो "हांव कोंकणी साहित्य वाचुंक शीकल्लों पांगळांत, साहित्य मात्र न्हय, हेरांक मान दिवन स्वता मान जोडची सोभीत रिवाज सयत पांगळा फिर्गजगारां थावन शिकोन आयलां; म्हज्या यूव प्रायेर एच. आर. आळव, स्टीवन आळव तसल्यां मुकेल्यां थावन शिकोंक प्रेतन केलां मात्र न्हय, तांच्या प्रभावांत हाव थोडो तेंप शंकरपूर सिवैएम-चो सांदो जावन आसलों. आशावादी प्रकाशनाखाल हांवें शेंभराच्याकी चड पुसतकां प्रकट केल्यारी तांतू नोवोद ठक्के कन्नड लिपियेचीं. धा ठक्के नागरी आनी रोमी लिपियेचीं. पूण ह्या नोवोद ठक्के पुसतकांविशीं दोन बरीं उत्रां उलवंक फुटवनासचिंच धा ठक्के नागरी आनी रोमी लिपिंत पुसतकां पर्गट केल्ल्याक उत्रानीं फात्रायतात म्हळ्ळें हास्यास्पद संगत. क्याथरीन बाय आनी केवीन डिमेल्लो तसल्या बरवप्यांचा काणियांनी ग्रामीण प्रदेशाचीं चित्रणां मेळतात."
पुसतक उग्तावपी मुद्दू मूडुबेळ्ळे "आपली मायभास तुळू तरयी कोंकणिंतच उलयलो. आनी आपूण आकाशवाणिंत वावर कर्तासताना ताच्या सांगोड्यांचो उल्लेक कर्न क्याथरीन बायेच्या साहित्य वावराक अभार मांदलो.
उपरांत नाम्नेचो विमर्शक नानू मरोल तोट्टाम हाणें सन्मान काऱ्यें चलवन वेलें; क्याथरीन रोड्रिगसाच्या साहित्यीक देणगेक आशावादी प्रकाशना तर्फेन मुद्दू मूडुबेळ्ळेन यादिसतिका आनी काणीक दिवून मान केलो. मुद्दू मूडबेळ्ळेक आग्नेल रोड्रिगसान काणीक दिली. जोसेफ क्वाड्रस (जो.क्वा) च्या कोंकणी वावराक आशावादी प्रकाशनाच्या तर्फेन स्टीवन जे. आळव पांगळा हाणें यादिसतिका आनी काणीक दिवून मान केलो. स्टीवन जे आळवक आग्नेल रोड्रिगसान काणीक दिली. उपरांत विलफ्रेड आर. पांगळाच्या कोंकणी वावराक आशावादी प्रकाशना तर्फेन आंडऱ्यू एल. डिकुन्हान यादिसतिका आनी काणीक दिवून मान दिलो. आंडऱ्यू डिकुन्हाक आग्नेल रोड्रिगसान काणीक दिली.
त्ये उपरांत रैजल फुर्टाडोन कोंकणी कविगोश्टी आनी कोंकणी कविता क्वीझ चलवन व्हरुंक बाय सलोमी मोगर्नाड हिका वेदीक आपवन तिची वळक करून दितच सलोमिच्या अध्यक्षपणार अपुर्भायेची कविगोश्टी आनी कोंकणी कविता क्वीझ चलवन वेली. डो.विजय कुमार पै कोचीन, डो.फ्लाविया क्यासतेलिनो, एलिजा फेर्नांडीस, मीना मोंतेरो, वायलेट फ्लेवी डिसोज, क्याथरीन रोड्रिगस, मुद्दू मूडुबेळ्ळे, विलफ्रेड आर पांगळा, मेलवीन वास केलराय, वल्ली क्वाड्रस आनी आंडऱ्यू एल डी कुन्हा हाणीं विंचणार कविता सादर केलीं. कोंकणी क्विझांत समजेल्या लोकांनी वांटेली जावन इनामां जोडलीं.
कटपाडी फिर्गजिचे विगार बा. राजेश पसन्न, होली क्रोस कौन्सिलिंग दिरेक्तोर बा. प्रीतम जोय मिनेजस, गोवळीक परिशद उपाध्यक्ष मानेसत हेकटर फेर्नांडीस, काऱ्यदर्शी श्रीमती तेरेजा लोबो आनी हेर सांदे हाजर आसल्ले.
क्याथरीन बायेन धिन्वास पाटवन कुमोक आनी पाटिंबो दिलेल्यांक फुलां झडां दीवन अभार मांदलो. देड वोरांक रुचीक जेवणासवें काऱ्यें संपलें. कटपाडी तशेंच लागशिल्या परिसरांतल्या देडशें लोकांनी ह्या काऱ्यांत भाग घेतलो.
कविता सादरपणां
मेलवीन जे. वास केलराय
आंडऱ्यू एल. डिकुन्हा
मुद्दू मूडुबेळ्ळे
बाप प्रीतम मिनेजस
विलफ्रेड आर पांगळा
क्याथरीन रोड्रिगस
सलोमी मोगरनाड
