ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾದಾಯ್ಜ್ - 7
ವಿಕ್ಟರ್ ರೊಡ್ರಿಗಸ್, ಅಂಜೆಲೊರ್
ಘುಂವ್ಲ್ಲೊ ಭಾಲೊ
ನಾಂವ್ : ವಿಕ್ಟರ್ ರೊಡ್ರಿಗಸ್
ಲಿಖ್ಣೆ ನಾಂವಾಂ : ವಿಕ್ಟರ್ ರೊಡ್ರಿಗಸ್ ಆಂಜೆಲೊರ್, ಬಾಹ್ರೇಯ್ನ್, ವಿರೊ.
ಜನನ್ : 08 ಫೆಬ್ರೆರ್ 1944.
ಜಲ್ಮಾಲ್ಲೊ ಗಾಂವ್ : ಆಂಜೆಲೊರ್.
ವಿಕ್ಟರ್ ರೊಡ್ರಿಗಸ್
ವಳೊಕ್:
ಆಪ್ಣಾಯಿಲ್ಲಿಂ ಇನಾಮಾಂ/ಪ್ರಶಸ್ತ್ಯೊ ;
’ಸಿಸ್ಟರ್ ಜೂಲಿಯೆಟ್’ (ವಳಕ್ ಆನಿ ಝಳಕ್, ಕಥಾ ಸ್ಪರ್ಧ್ಯಾಂತ್ ಬಹುಮಾನಿತ್)
’ಸಮಧಾನ್ ತುಮ್ಕಾಂ ದುಬ್ಳ್ಯಾಂನೊ’ (ಝೆಲೊ)
’ನರ್ಸ್ ರೋಜಾ’ (ಝೆಲೊ)
ಬಿರುದೊ :
’ಸೆಂಚುರಿ ರೈಟರ್’ (ಪಯ್ಣಾರಿ)
’ಶ್ರೇಷ್ಟ್ ಲೇಖಕ್’ (ಪಯ್ಣಾರಿ)
’ಕಾದಂಬರಿ ಸಾಮ್ರಾಟ್’ (ಪಯ್ಣಾರಿ)
’ಕೊಂಕ್ಣಿ ಸಾಹಿತ್ಯ್ ಸಾಮ್ರಾಟ್’ (ಜನವಾಹಿಣಿ)
’ಕೊಂಕ್ಣೆಂತ್ಲೊ ಹೀರೊ’ (ಪಯ್ಣಾರಿ)
ಪ್ರಶಸ್ತ್ಯೊ ಆನಿಂ ಪುರಸ್ಕಾರ್ :
’ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿ ಥಾವ್ನ್ ಪ್ರಶಸ್ತಿ’ 2000 - 2001 ಇಸ್ವೆಚಿ.
’ಕರ್ನಾಟಕ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿ ಥಾವ್ನ್ ’ಜಾತಿ ಭಾಯ್ಲೆಂ ಕಾಜಾರ್’ ಪ್ರಶಸ್ತಿ’ 2001 - 2002 ಇಸ್ವೆಚಿ.
ಬುಕಾರುಪಾರ್ ಪರ್ಗಟ್ ಜಾಲ್ಲೆಂ ಸಾಹಿತ್ಯ್ :
’ಫುಡಾರಾಚಿ ದೆಸ್ವಾಟ್’ (1990 ಇಸ್ವೆಂತ್ ’ಆಕಾಸ್ ಪ್ರಕಾಶನ್’)
’ಜಾತಿ ಭಾಯ್ಲೆಂ ಕಾಜಾರ್’ (1998 ಇಸ್ವೆಂತ್ ’ಪಯ್ಣಾರಿ ಪ್ರಕಾಶನ್’)
’ಭಾಂಗಾರಾಚಿ ಇಸ್ತ್ರಿ’ (2001 ಇಸ್ವೆಂತ್ ’ವೀಣಾ ಪ್ರಕಾಶನ್’)
’ಭಲಾಯ್ಕೆ ದಾಯ್ಜ್’ (1974 ಇಸ್ವೆಂತ್ ’ಸ್ವ - ಪ್ರಕಾಶನ್’) (1977 ಇಸ್ವೆಂತ್ ದುಸ್ರೊ ಛಾಪೊ - ’ಕೆನರಾ ಕಮ್ಯುನಿಕೇಶನ್ ಸೆಂಟರ್’) (1999 ಇಸ್ವೆಂತ್ ತಿಸ್ರೊ ಛಾಪೊ ’ದೇವ್ನಾಗರಿ ಲಿಪಿಯೆಂತ್’ ವಿವೇಕ ಪ್ರಗತಿ)
’ಅರ್ವಿಲಿ ಖುರ್ಸಾವಾಟ್’ - ಧಾರ್ಮಿಕ್ ಬೂಕ್ (2000 ಇಸ್ವೆಂತ್ ’ವಿವೇಕ ಪ್ರಗತಿ’)
ಸಾಂಕಳ್ ಕಾಣ್ಯೊ/ಕಾದಂಬರಿ :
’ಬೊಂಗ್ಲ್ಯಾಂತ್ಲಿ ಖುನ್’ ’ಝೆಲೊ’ಚೆರ್ 1968 ಇಸ್ವೆಂತ್ (5 ಅವಸ್ವರ್)
’ಮಾಯಾಕಾಚೆಂ ಭುಂಯಾರ್’ ’ಕಾಣಿಕ್’ಚೆರ್ 1970 ಇಸ್ವೆಂತ್ (43 ಅವಸ್ವರ್) (ದುಸ್ರೆಪಾವ್ಟಿಂ)-’ಕಾಣಿಕ್’ಚೆರ್ 1981 ಇಸ್ವೆಂತ್ (43 ಅವಸ್ವರ್)
’ವಿಧಿಚಾ ದಾವ್ಲೆಂತ್’ ’ಮಿತ್ರ್’ಚೆರ್ 1971 ಇಸ್ವೆಂತ್ (62 ಅವಸ್ವರ್) (ದುಸ್ರೆಪಾವ್ಟಿಂ)-’ಕಾಣಿಕ್’ಚೆರ್ 2000 ಇಸ್ವೆಂತ್ (43 ಅವಸ್ವರ್)
’ಮಾಡ್ತಿರ್ ಸುನ್’ ’ಪಯ್ಣಾರಿ’ಚೆರ್ 1972 ಇಸ್ವೆಂತ್ (6 ಅವಸ್ವರ್)
’ಫುಡಾರಾಚಿ ದೆಸ್ವಾಟ್’ - ’ಪಯ್ಣಾರಿ’ಚೆರ್ 1972 ಇಸ್ವೆಂತ್ (8 ಅವಸ್ವರ್)
’ಅಂಧ್ಕಾರಾಚಾ ಖಂಧ್ಕಾಂತ್’ - ’ಪಯ್ಣಾರಿ’ಚೆರ್ 1973 ಇಸ್ವೆಂತ್ (81 (ದುಸ್ರೆಪಾವ್ಟಿಂ)-’ಉದೆವ್’ಚೆರ್ 1989 ಇಸ್ವೆಂತ್ (81 ಅವಸ್ವರ್)
’ಶಿರಾಪಾಚಿ ಬಲಿ’ - ’ಪಯ್ಣಾರಿ’ಚೆರ್ 1975 ಇಸ್ವೆಂತ್ (127 ಅವಸ್ವರ್) (ದುಸ್ರೆಪಾವ್ಟಿಂ)- ’ಪಯ್ಣಾರಿ’ಚೆರ್ 2000 ಇಸ್ವೆಂತ್ (127 ಅವಸ್ವರ್)
’ರಗ್ತಾಚಿ ಬೊಬಾಟ್’ - ’ಪಯ್ಣಾರಿ’ಚೆರ್ 1980 ಇಸ್ವೆಂತ್ (124 (ದುಸ್ರೆಪಾವ್ಟಿಂ) - ’ರಾಕ್ಣೊ’ಚೆರ್ 2000 ಇಸ್ವೆಂತ್ (124 ಅವಸ್ವರ್)
’ಡೊನ್ ಮ್ಯಾಕ್ಸ್’ - ’ಪಯ್ಣಾರಿ’ಚೆರ್ 1982 ಇಸ್ವೆಂತ್ (64 ಅವಸ್ವರ್) (ದುಸ್ರೆಪಾವ್ಟಿಂ) - ’ಆಮ್ಚೊ ಸಂದೇಶ್’ಚೆರ್ 2000 ಇಸ್ವೆಂತ್ (64 ಅವಸ್ವರ್)
’ದೇವ್ ಬರೆಂ ಕರುಂ’ - ’ಕಾಣಿಕ್’ಚೆರ್ 1984 ಇಸ್ವೆಂತ್ (33 ಅವಸ್ವರ್)
’ಪ್ರತೀಕಾರ್’ - ’ಪಯ್ಣಾರಿ’ಚೆರ್ 1986 ಇಸ್ವೆಂತ್ (198 ಅವಸ್ವರ್)
’ಚಾರ್ಲ್ಸ್ ಶೋಭ್ರಾಜ್’ - ’ಪಯ್ಣಾರಿ’ಚೆರ್ 1986 ಇಸ್ವೆಂತ್ (18 ಅವಸ್ವರ್)
’ಪಾಪ್ ಆನಿ ಶಿರಾಪ್’ - ’ಪಯ್ಣಾರಿ’ಚೆರ್ 1991 ಇಸ್ವೆಂತ್ (219 ಅವಸ್ವರ್)
’ಭಾಂಗಾರಾಚಿ ಇಸ್ತ್ರಿ’ - ’ಉಮಾಳೊ’ಚೆರ್ 1992 ಇಸ್ವೆಂತ್ (25 ಅವಸ್ವರ್)(ದುಸ್ರೆಪಾವ್ಟಿಂ) - ’ಪಯ್ಣಾರಿ’ಚೆರ್ 2000 ಇಸ್ವೆಂತ್ (25 ಅವಸ್ವರ್)
’ಹಾಂವ್ ಫಾರಿಕ್ಪಣ್ ಘೆತೆಲಿಂ’ - ’ಉಮಾಳೊ’ಚೆರ್ 1992 ಇಸ್ವೆಂತ್ (25 ಅವಸ್ವರ್)
’ದೇವ್ ಪಳೆತಾ’ - ’ರಾಕ್ಣೊ’ಚೆರ್ 1998 ಇಸ್ವೆಂತ್ (24 ಅವಸ್ವರ್)
’ಫಾರಿಕ್ಪಣ್’ - ’ರಾಕ್ಣೊ’ಚೆರ್ 1998 ಇಸ್ವೆಂತ್ (24 ಅವಸ್ವರ್)
’ಚುಕೊನ್ ಗೆಲ್ಲ್ಯೊ ಶೆಳಿಯೊ’ - ’ಪಯ್ಣಾರಿ’ಚೆರ್ 2000 ಇಸ್ವೆಂತ್ (32 ಅವಸ್ವರ್)
’ಜಿವಿತಾಚಿ ದೆಸ್ವಾಟ್’ - ’ಆಮ್ಚಿ ಮಾಯ್’ಚೆರ್ 2001 ಇಸ್ವೆಂತ್ (40 ಅವಸ್ವರ್)
’ರಾವಣ್ ರಾಜ್ಯಾಂತ್ಲೊ ವೀರಪ್ಪನ್’ - ’ಪಯ್ಣಾರಿ’ಚೆರ್ 2002 ಇಸ್ವೆಂತ್.
ಹಾಸ್ಯ್ ಕಾಣ್ಯೊ ಸಾಂಕಳ್ ಕಾಣ್ಯೆ ರುಪಾರ್ :
’ವಿದೇಶಿ ಗಾಂವ್ಕಾರ್ ಸ್ವದೇಶಾಕ್ ಯೆತಾನಾ’ - ’ಪಯ್ಣಾರಿ’ಚೆರ್ 1986 ಇಸ್ವೆಂತ್.
’ಮಾಚ್ಚು ಬಾಯೆಚೆಂ ಕುಮ್ಸಾರ್’ - ’ಪಯ್ಣಾರಿ’ಚೆರ್ 1976 ಇಸ್ವೆಂತ್.
’ಮಾಚ್ಚು ಬಾಯೆಚೆಂ ಕುಮ್ಸಾರ್’ - ’ಉದೆವ್’ಚೆರ್ 1989 ಇಸ್ವೆಂತ್.
’ಮಾಚ್ಚು ಬಾಯೆಚೆಂ ಕುಮ್ಸಾರ್’ - ’ಪಯ್ಣಾರಿ’ಚೆರ್ 2001 ಇಸ್ವೆಂತ್.
’ಬಾರ್ಕೂರ್ಚೊ ಬಾರ್ಬೊಜ್’ - ’ಪಯ್ಣಾರಿ’ಚೆರ್ 1979 ಇಸ್ವೆಂತ್.
’ಗರ್ಭೇಸ್ತ್ ಜಾಲ್ಲೊ ಬಾರ್ಬೊಜ್’ - ’ಪಯ್ಣಾರಿ’ಚೆರ್ 1995 ಇಸ್ವೆಂತ್.
’ಗ್ರೇಂಡ್ ಎಕ್ಸ್ಚೇಂಜ್ ಸೆಂಟರ್’ - ’ಪಯ್ಣಾರಿ’ಚೆರ್ 2000 ಇಸ್ವೆಂತ್.
ನಾಟಕ್ :
’ಕುಮ್ಸಾರಿಂತ್ಲೊ ಘುಟ್’ 1989.
’ಮ್ಹಜೊ ಪೂತ್ ಪಾದ್ರಿ ಜಾತಾ’
’ಸೈರಿಕೆಚಿ ಕಿತಾಪತಿ’
’ಬಾರ್ಕುರ್ಚೊ ಬಾರ್ಬೊಜ್’
ವಿವಿದ್ ವಿಶ್ಯಾಂಚೆರ್ ಲೇಖನಾಂ: ಚಡುಣೆಂ 1000.
ಕವಿತಾಂ/ಪದಾಂ: ಚಡುಣೆಂ 50.
ಸಂದರ್ಶನಾಂ: ಚಡುಣೆಂ 10.
ಅಂಕಣ್/ವ್ಹೋಳ್ :
’ಕಾಣಿಕ್’ ಪತ್ರಾಚೆರ್ 1984 ಇಸ್ವೆಂತ್ ಸವಾಲಾಂ - ಜಾಪಿ ವಿಭಾಗ್ ಚಲಯ್ಲಾ.
ಜಿಣ್ಯೆ ಚರಿತ್ರಾ: ’ಮಾ| ಬಾ| ಮರಿಯಾಣ್ ಫೆರ್ನಾಂಡಿಸ್’ - 1968 ಇಸ್ವೆಂತ್.
’ಮೊ| ಸಿಲ್ವೆಸ್ಟರ್ ಮಿನೇಜ್’ - 1969 ಇಸ್ವೆಂತ್.
ವೆಕ್ತಿತ್ವ್ :
ಏಕ್ ಬರವ್ಪಿ ಕೆದ್ನಾಂಯ್ ಸಾದ್ಯಾ ಮನ್ಶಾಚಾಕೀ ವೆಗ್ಳೊಚ್ ಜಾವ್ನ್ ಆಸ್ತಾ ಮ್ಹಣ್ತಾನಾ ವಿಕ್ಟರ್ ರೊಡ್ರಿಗಸ್ಯೀ ಕಾಂಯ್ ತಾಂತ್ಲೊ ವೆಗ್ಳೊ ನ್ಹಯ್. ಪಳೆಂವ್ಕ್ ತೊ ಗಂಬೀರ್ ದಿಸ್ತಾ ತರ್ಯೀ ತಾಚೆಂ ಚಿಂತಾಪ್ ಸಾದೆಂ. ಪುಣ್ ತಾಚೊ ಕಾಣ್ಯೊ ಸಾದ್ಯೊ ಮ್ಹಣೊಂಕ್ ಜಾಯ್ನಾ. ವಾಚ್ಪ್ಯಾಂಕ್ ಕಶೆಂ ಆತುರಾಯೆನ್ ರಾಕಾಶೆಂ ಕರಿಜಯ್ ಮ್ಹಳ್ಳೆಂ ತೊ ಬರ್ಯಾನ್ ಜಾಣಾ. ಲಾಂಭ್ ಕಾಣ್ಯೊ ಬರಂವ್ಚೊ ಉಸ್ತಾದ್ ತರ್ಯೀ ತಾಚಾ ಕಾಣ್ಯಾಂನಿ ತಾಣೆಂ ದವರ್ಚೆ ಗಾಂಚ್ ಭೋವ್ ಅಪುರ್ಭಾಯೆಚೆ ಜಾವ್ನಾಸಾತ್. ತಾಚಾ ಕಾಣ್ಯಾಂನಿ ಕೊರ್ಟಾಚೆಂ ಪಿಂತುರ್ ತೊ ಅಶೆಂ ಪಿಂತ್ರಾಯ್ತಾ ಮ್ಹಳ್ಯಾರ್ ಹಾಂವ್ ಲ್ಹಾನ್ ಭುರ್ಗೊ ಆಸ್ತಾನಾ, ತಾಚೆವಿಶ್ಯಾಂತ್ ಆಯ್ಕಾಲ್ಲೆಂ ’ವಿಕ್ಟರ್ ರೊಡ್ರಿಗಸ್ ಏಕ್ ವಕೀಲ್’ ಮ್ಹಣ್.
ಚಿಂತಾಪ್ :
ವಿಕ್ಟರ್ ರೊಡ್ರಿಗಸಾಚಾ ಚಡ್ತಾವ್ ಕಾಣ್ಯಾಂನಿ ಹಾವೆಂ ಪಾರ್ಕಿಲ್ಲೆಂ ಚಿಂತಾಪ್ ಜಾವ್ನಾಸಾ ’ಫಾರಿಕ್ಪಣ್’ - ಕ್ರಿಸ್ತಾಂವ್ ಧರ್ಮಾಚಾ ಮೂಳ್ ಚಿಂತ್ಪಾಕ್ ಹೆಂ ಚಿಂತಾಪ್ ಉಲ್ಟೆಂ ದಿಸೊಂಕ್ ಪುರೊ. ತರ್ಯೀ ತಾಚಾ ಕಾಣ್ಯಾಂನಿ ಹೆಂ ’ಫಾರಿಕ್ಪಣಾಚೆಂ’ ಚಿಂತಾಪ್ ಚುಕಾನಾಸ್ತಾಂ ವಾಚುಂಕ್ ಮೆಳ್ತಾ. ಸಮಾಜೆಂತ್ ಫಾರಿಕ್ಪಣಾಚೆಂ ಚಿಂತಾಪ್ ಖಾಯ್ಸ್ ಕರ್ಚಾಂಕ್ ಅಸಲ್ಯೊ ಕಾಣ್ಯೊ ಭಾರಿಚ್ ರುಚ್ತಾತ್ ಮ್ಹಳ್ಳ್ಯಾಕ್ ಪತ್ರಾಂನಿ ಪರ್ಗಟ್ ಜಾಂವ್ಚೊ ತಾಚೊ ಕಾಣ್ಯೊ ವಾಚುಂಕ್ ಅತ್ರೆಗ್ಚಾ ವಾಚ್ಪ್ಯಾಂಕ್ ಪಳೆತಾನಾಂಚ್ ಸುಸ್ತಾತಾ. ತಾಚಾ ಕಾಣ್ಯಾಂನಿ ವಾಚುಂಕ್ ಮೆಳ್ಚಿ ಅನ್ಯೇಕ್ ಸೊಭಿತ್ ಸಂಗತ್ ಖಂಯ್ಚಿಗೀ ಮ್ಹಳ್ಯಾರ್ ’ಲೋಸ್ಟ್ ಆಂಡ್ ಫೌಂಡ್’ ಫಾರ್ಮುಲಾ. ಜಶೆಂ ಹಿಂದಿ ಫಿಲ್ಮಾಂನಿ ಮನ್ಮೋಹನ್ ದೇಸಾಯ್ ಹಾಣೆಂ ಅಪ್ಲ್ಯಾ ಚಡ್ತಾವ್ ಫಿಲ್ಮಾಂನಿ ಹೆಂಚ್ ಸೂತ್ರ್ ಉಪ್ಯೋಗ್ ಕೆಲೆಂ, ತಶೆಂ ವಿಕ್ಟರ್ ರೊಡ್ರಿಗಸಾಚಾ ಕಾಣ್ಯಾಂನಿಯೀ ಅಸಲೆಂಚ್ ಸೂತ್ರ್ ಝಳ್ಕತಾ. ಪುಣ್ ತಾಣೆ ಸಾಂಬಾಳ್ಚೆ ಗಾಂಚ್ ಮಾತ್ರ್ ಭೋವ್ ಸೊಭಿತ್. ಜಾವ್ಯೆತ್ ಶಿರಾಪಾಚಿ ಬಲಿ, ಶಿಪಾರಾಪಾಚೊ ವಾಂಟೊ, ರಗ್ತಾಚಿ ಬೊಬಾಟ್, ಪ್ರತಿಕಾರ್, ಭಾಂಗಾರಾಚಿ ಇಸ್ತ್ರಿ ಯಾ ಹೆರ್ - ಹರ್ಯೆಕಾ ಕಾಣ್ಯಾಂನಿ ವಾಚುಂಕ್ ಮೆಳ್ಚೆಂ ಸಮಾನ್ ಚಿಂತಾಪ್ ’ಫಾರಿಕ್ಪಣ್’.
ಮಟ್ವ್ಯೊ ಕಾಣ್ಯೊ :
ವಿಕ್ಟರ್ ರೊಡ್ರಿಗಸಾಚೆಂ ನಾಂವ್ ಜಿತ್ಲೆಂ ಕೊಂಕ್ಣಿ ಕಾದಂಬರಿಯಾಂನಿ ಗಾಜ್ಲಾಂಗೀ ತಿತ್ಲೆಂ ಮಟ್ವ್ಯಾ ಕಾಣ್ಯಾಂನಿ ಗಾಜೊಂಕ್ನಾ ಜಾವ್ಯೆತಾ, ತರ್ಯೀ ಕೊಂಕ್ಣೆಂತ್ ತಾಣೆಂ ಬರ್ಯೊ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್ ಮ್ಹಳ್ಳ್ಯಾಕ್ ತಾಚಿ ಹಿ ಕಾಣಿಂಚ್ ರುಜ್ವಾತ್. ತಾಚೊ ಚಡ್ತಾವ್ ಮಟ್ವ್ಯೊ ಕಾಣ್ಯೊ ಎಕಾ ಘಡಿತಾಚೆರ್/ಘಟನಾಚೆರ್ ಬರಯಿಲ್ಲ್ಯೊ ಜಾವ್ಯೆತ್ ಮ್ಹಳ್ಳೊ ದುಭಾವ್ ತಾಚೊ ಚಡ್ತಾವ್ ಮಟ್ವ್ಯೊ ಕಾಣ್ಯೊ ವಾಚ್ತಾನಾ ಸುಸ್ತಾತಾ. ಘುಂವ್ಲ್ಲೊ ಭಾಲೊ ಅಸಲಿಚ್ ಕಾಣಿ ಜಿ ವಾಚ್ಪ್ಯಾಂಕ್ ಸಂತೊಸ್-ಸಮಧಾನ್ ದಿಂವ್ಚೆ ತಸಲಿ.
ಕಥಾದಾಯ್ಜ್ - 7 . ಘುಂವ್ಲ್ಲೊ ಭಾಲೊ
ಬಾಹ್ರೆನ್ಗಾರ್-ಕುವೈಟ್ಗಾರ್ ದುಡ್ವಾದಾರ್ ಮ್ಹಳ್ಳ್ಯಾ ಸಾಂಗ್ಣೆಖಾಲ್ ಆಪ್ಣಾಚೆಂಯೀ ನಾಂವ್ ತ್ಯಾ ಪಟ್ಟೆಂತ್ ಮೆಳೈಜಾಯ್, ಸುಖಾನ್ ಜಿಯೆಜಾಯ್ ಮ್ಹಳ್ಳ್ಯಾ ಉದ್ದೇಶಾನ್ ಗಾಂವಾಂ ಥಾವ್ನ್ ಶ್ರೀಮಾನ್ ಪೊಕಾ ಸಿಕೇರ್ ಥೊಡ್ಯಾ ವರ್ಸಾಂ ಆದಿಂ ಬಾಹ್ರೆನ್ ಪಾವ್ಲ್ಲೊ. ಆಪ್ಲ್ಯಾ ಜೊಡಿನ್ ತಾಚೆಂ ಕುಟಾಂಭ್ ಸುಖಾ-ಸಂತೊಸಾನ್ ಜಿಯೆತಾಲೆಂ. ಮಹಿನ್ಯಾವಾರ್ ತೊ ಪೊಯ್ಶೆ ಧಾಡ್ತಾಲೊ. ಆನಿ ಥೊಡೆ ಉರವ್ನ್ ಪುಡಾರಾಕ್ ಜಮಯ್ತಾಲೊ. ಬಾಯ್ಲ್ ಭುರ್ಗಿಂ ತಾಚಿಂ ದಾಧೊಸ್ಕಾಯೆನ್ ಜಿಯೆತಾಲಿಂ. ಗಾಂವಾಕ್ ಧಾಡ್ಚೆ ಧಾಡ್ನ್ ಉರ್ಲ್ಲೆ ತಾಣೆ ಬಾಹ್ರೆನಾಂತ್ಲ್ಯಾ ಎಕಾ ಬೆಂಕಾಂತ್ ಎಕೌಂಟ್ ಉಗ್ತೆಂ ಕರ್ನ್ ಪೊಯ್ಶೆ ಜಮವ್ನ್ ಆಯಿಲ್ಲೊ. ವರ್ಸಾಂ ಮಹಿನ್ಯಾಂಕ್ ಪಾಟಿಂ ಘಾಲ್ನ್ ಧಾಂವ್ತಾನಾ ಪೊಕಾ ಸಿಕೆರಿನ್ ಬಾಹ್ರೆನಾಂತ್ ಪಾಂಚ್ ವರ್ಸಾಂ ಧಾಂವ್ಡಾಯ್ಲಿಂ.
ಹ್ಯಾ ಪಾಂಚ್ ವರ್ಸಾಂನಿ ಗಾವಾಂತ್ ತಾಚೆಂ ಕುಟಾಂಬ್ ತಾಂಕಿವಂತ್ ಜಾವ್ನ್ ಯೆತಾನಾ ಹಾಂಗಾಸಾರ್ ಬೆಂಕಾಂತ್ ಪೊಕಾ ಸಿಕೇರಿಚೊ ೮೦ ಹಜಾರ್ ರುಪಯ್ ಜಮೊ ಜಾಲೊ. ಹೊ ದುಡು ಗಾಂವಾಕ್ ವ್ಹರ್ನ್ ಸ್ವಂತ್ ಏಕ್ ಬೊಂಗ್ಲೊ, ಜೊ ಬಾಹ್ರೆನಾಂತ್ಲ್ಯಾ ಶ್ಹೆಕಾಂಚ್ಯಾ ಬೊಂಗ್ಲ್ಯಾ ಭಾಷೆನ್ ಬಾಂದ್ತಾಲೊಂ ಮ್ಹಳ್ಳ್ಯಾ ಆಶೆನ್ ಲೆಕ್ಕಾಚಾರ್ ಘಾಲುನ್ ಆಸ್ಲ್ಲ್ಯಾ ತಾಣೆ ಆಪ್ಲಿ ಇಚ್ಛಾ ಬಾಯ್ಲೆಕ್ ತಿಳ್ಸುನ್ ಮುಂಗಡ್ ಸೂಚನ್ ಧಾಡ್ಲೆಂಕೀ ಏಕ್ ವ ದೋನ್ ಎಕ್ರೆ ಖಾಲಿ ಸುವಾತ್ ಖಂಯ್ಸರೀ ಆಸ್ಲ್ಯಾರ್ ಪಳೆವ್ನ್ ದವರ್. ಘೆವ್ನ್ ಏಕ್ ಘರ್ ಭಾಂದಿಜಾಯ್.
ಭಾಡ್ಯಾಚ್ಯಾ ಘರಾಂತ್ ಬಾಹ್ರೆನ್ಗಾರಾನ್ ರಾಂವ್ಚೆಂ ಉಣೆಪಣ್ ಮ್ಹಣ್ ಭಗ್ಲ್ಲ್ಯಾ ಪೊಕಾ ಸಿಕೆರಿನ್ ಕೆಲ್ಲಿ ಆಲೋಚನ್ ಕಾಂಯ್ ವಾಯ್ಟ್ ನಹಿಂ. ಘೊವಾಚಿ ಖುಶಿ ಬಾಯ್ಲ್ ಧಾದೋಶಿ. ತಿ ಕಿತ್ಯಾ ನಾಕಾ ಮ್ಹಣಾತ್? ಉಟಾಉಟಿಂ ತಿಣೆ ಪೆಂಕ್ಟಾಕ್ ಪಾಲಂವ್ ಬಿಗ್ದಿಲೊಚ್. ಆಜ್ಚ್ ಬೊಂಗ್ಲೊ ಬಾಂದ್ಲೊ ಆನಿ ಫಾಲ್ಯಾಂಚ್ ರಾಣಿ ಜಾಲಿಂ ಮ್ಹಳ್ಳ್ಯಾ ತಿತ್ಲ್ಯಾ ಹೆಮ್ಮ್ಯಾಚ್ಯಾ ಭರ್ಮಾಕ್ ತಿ ಪಾವ್ಲಿ. ಮ್ಹಜೊ ಘೊವ್ ಬಾಹ್ರೆನ್ಗಾರ್ ಮ್ಹಳ್ಳೆಂ ಹೆಮ್ಮೆ ತಿಕಾ ಸಹಜ್ ಭಗ್ಚೆಂ ತೆಂ ನವಾಲ್ ನಹಿಂ. ಉಟಾಉಟಿಂ ತಿಣೆ ಸಾಧನ್ ಕರ್ನ್ ಖಾಲಿ ಭಾರಾ ಎಕ್ರೆ ಜಾಗೊ ಪಳೆವ್ನ್ ಘೊವಾಕ್ ಬರೈಲೆಂಚ್. "ವೆಗಿಂ ಪೊಯ್ಶೆ ಧಾಡ್. ಹಾಂವ್ ತೊ ಸ್ವಾಧೀನ್ ಕರ್ನ್ ಘೆತಾಂ."
ಕಾಗದ್ ವಾಚುನ್ ಪೊಕಾ ಸಿಕೇರಿಚೊ ತಕ್ಲೊ ಸರ್ಗಿಂಚಾ ದಾರಾರ್ಚ್ ಆದಾಳ್ಳೊ. ಆತಾಂ ಪೊಯ್ಶೆ ಧಾಡಿಜಾಯ್, ವೆಗ್ಗಿಂ ಧಾಡಿಜಾಯ್ ಮ್ಹಣ್ ಆಲೋಚನ್ ಕರ್ತಾಸ್ತಾನಾಂಚ್ ಆವ್ಚಿತ್ತ್ ಏಕ್ ಮನಿಸ್ ತಾಕಾ
"ಆಪುಣ್ ಬಾಹ್ರೆನಾಂತ್ ಫಲಾಣ್ಯಾ ಕಂಪೆನಿಂತ್ ಕಾಮಾರ್ ಆಸಾಂ. ಮಸ್ತ್ ವರ್ಸಾಂ ಥಾವ್ನ್ ಜಿಯೆತಾಂ, ಆನಿ ಆಪುಣ್ ಗಾಂವಾಂತ್ ಮಂಗ್ಳುರ್ಚೊ...." ಇತ್ಯಾದಿ ವಳಕ್ ಸಾಂಗ್ತಾನಾ ಪೊಕಾ ಸಿಕೇರಿಕ್ ಗಾಂವ್ ಭಾವಾಚಿ ಇಷ್ಟಾಗತ್ ಕರ್ಚಾಂತ್ ದುಬಾವ್ ಭಗ್ಲೊನಾ. ಧೊವೆಂ ದಿಸ್ಲ್ಲೆಂ ದೂಧ್ಚ್ ಮ್ಹಣ್ ಪಾತ್ಯೆಂವ್ಚೊ ಪೊಕಾ ಸಿಕೇರ್ ಆಪ್ಲೆಂ ಸತ್ತಿ ಮನ್ ದಾಕವ್ನ್ ತಾಚಿ ಇಷ್ಟಾಗಾತ್ ಕರುಂಕ್ ಮುಖಾರ್ ಸರ್ಲೊ. ಗಾಂವ್ಭಾವ್ ಮ್ಹಣ್ತಾನಾ ಸಹಜ್ ಪರ್ಗಾಂವಾಂತ್ ಎಕಾಮೆಕಾ ಥಂಯ್ ಆಕರ್ಶಣ್ ಭಗ್ತಾ.
ಇಸ್ಟಾಗಾತ್ ದಾಟ್ ಜಾತಾನಾ ಪೊಕಾ ಸಿಕೇರಿನ್ ಆಪ್ಣೆಂ ಗಾವಾಂತ್ ಹಾತಿಂ ಘೆಂವ್ಕ್ ಚಿಂತ್ಲ್ಲ್ಯಾ ಯೋಜನಾಚೊ ಮಟ್ವೊ ವಿವರ್ಯೀ ದಿಲೊ. ತ್ಯಾ ಶಿವಾಯ್ ಮೊಗಾಚೊ ಈಸ್ಟ್ ಮನ್ವೆಲ್ ಲೋಬ್ ಸಾಂಗಾಲಾಗ್ಲೊ ಕೀ "ಯೆಂವ್ಚ್ಯಾ ಹಪ್ತ್ಯಾಂತ್ ಆಪುಣ್ ದೋನ್ ಮಹಿನ್ಯಾಂಚ್ಯಾ ರಜೆರ್ ಗಾಂವಾಕ್ ಯೆತಾಂ ತುಜೆಂ ಕಾಂಯ್ ವ್ಹರೊಂಕ್ ಆಸ್ಲ್ಯಾರ್ ದೀ. ತುಜಾ ಘರಾ ಪಾವಿತ್ ಕರ್ತಾಂ" ಮ್ಹಣ್ ತೊ ಜಾವ್ನ್ ಸಾಂಗ್ತಾನಾ ಪೊಕಾ ಸಿಕೇರಿಕ್ ಏಕ್ ಆಲೋಚನ್ ಆಯ್ಲಿ. ಹೊ ಗಾಂವಾಕ್ ವೆತಾ ತರ್ ಪೊಯ್ಶೆ ಹಾಚೆಚ್ಲಾಗಿಂ ದಿಲೆ ತರ್ ಹೊ ವ್ಹರ್ನ್ ಮ್ಹಜಾ ಬಾಯ್ಲೆಕ್ ದೀತ್. ಬೆಂಕಾ-ಪೊಸ್ಟಾ ಮುಖಾಂತ್ರ್ ಧಾಡ್ತಾನಾ ಥೊಡೆ ಪಾವ್ಟಿಂ ವೆಳಾರ್ ಪಾವಾನಾಂತ್. ತಶೆಂ ಆಸ್ತಾಂ ಹಾಚೆಲಾಗಿಂ ದಿಲೆ ಜಾಲ್ಯಾರ್ ವೆಗ್ಗಿಂ ಪಾವ್ತೆಲೆ. ಶಾಭಿತಾಯೆನ್ ಮೆಳ್ತೆಲೆ ಮ್ಹಳ್ಳ್ಯಾ ಚಿಂತ್ಪಾನ್ ಪೊಕಾ ಸಿಕೇರಿನ್ ಮನ್ವೆಲ್ ಲೊಬಾಕ್ ಅಸೆಂ ಸಾಂಗ್ಲೆಂ -
"ತರ್ ತುಜೆಲಾಗಿಂ ಏಕ್ ಉಪ್ಕಾರ್ ಮಾಗ್ತಾಂ. ಜಡಾಯೆಚ್ಯೊ ವಸ್ತು ಹಾಂವ್ ಕಾಂಯ್ ತುಜೆಲಾಗಿಂ ದೀನಾ. ಮ್ಹಜೆ ಸಾಟ್ ಹಜಾರ್ ರುಪಯ್ ತುಜೆಲಾಗಿಂ ದಿತಾಂ ತೆ ತುಂ ಮ್ಹಜಾ ಬಾಯ್ಲೆಕ್ ಪಾವಿತ್ ಕರ್. ತಾಣೆ ಏಕ್ ಜಾಗೊ ಪಳೆವ್ನ್ ದವರ್ಲಾ.
’ತುಂ ಗಾಂವಾಕ್ ವೆಗ್ಗಿಂ ಪೊಯ್ಶೆ ಧಾಡ್’ ಮ್ಹಣ್ ಬರೈಲ್ಲೆಂ ತಾಣೆ. ಆತಾಂ ವೆತಾಯ್ ಆನಿ ವ್ಹರ್ತಾಯ್ ಮ್ಹಣ್ತಾನಾ ಮ್ಹಾಕಾ ಬರೆಂಚ್ ಜಾಲೆಂ."
ಕಿತೆಂಗೀ ಆಲೊಚನ್ ಕರ್ನ್ ಮನ್ವೆಲಿನ್
"ಹೊ ತೆಂ ಕಾಂಯ್ ವಿಶೇಸ್ ನಹಿಂ. ಸಾಟ್ ಹಜಾರ್ ಕಿತ್ಯಾಕ್ ಸಾಟ್ ಲಾಖ್ ದಿಲ್ಯಾರೀ ಹಾಂವ್ ವ್ಹರ್ನ್ ಪಾವಿತ್ ಕರ್ತಾಂ. ಮ್ಹಾಕಾಯೀ ಮ್ಹಜೆಯೀ ಪೊಯ್ಶೆ ವ್ಹರೊಂಕ್ ಆಸಾತ್. ಸಾಂಗಾತಾಚ್ ಡ್ರಾಫ್ಟ್ ಕರಿನ್ ಜಾಲ್ಯಾರ್ ತೊಂದ್ರ್ಯಾವಿಣೆ ವ್ಹರ್ಯೆತ್. ತ್ಯಾವಿಶಿಂ ತುಂ ಚಿಂತಾ ಕರಿನಾಕಾ. ತೆಂ ಕಾಮ್ ಮ್ಹಜೆರ್ ಪಾವ್ಲೆಂ." ಮ್ಹಣ್ ಭಾಸ್ ದಿಲ್ಲಿಚ್. ಪೊಕಾ ಸಿಕೇರಿಕ್ ’ವ್ಹರ್ತೊ ಆನಂದ್ ಭಗ್ಲೊ.
ತ್ಯಾಚ್ ಪ್ರಕಾರ್ ಮನ್ವೆಲ್ ಲೋಬ್ ಗಾಂವಾಕ್ ವೆಚಾ ಆದ್ಲ್ಯಾ ದೀಸ್ ಸಕಾಳಿಂ ಸಾಟ್ ಹಜಾರ್ ರುಪೈ ಮನ್ವೆಲಿಲಾಗಿಂ ದೀವ್ನ್ ತಾಚೊಯೀ ವಿಳಾಸ್ ಘೆವ್ನ್ ಆಪ್ಲ್ಯಾ ಘರ್ಚೊಯೀ ವಿಳಾಸ್ ದೀಲಾಗ್ಲೊ. ಸಾಂಗಾತಾಚ್ "ಹೆಂ ತುಜಾ ಭುರ್ಗ್ಯಾಂಕ್ ವ್ಹರ್ನ್ ದಿ" ಮ್ಹಣ್ ಮೊಲಾಧಿಕ್ ದೋನ್ ವ್ಹಡ್ ಚೊಕ್ಲೆಟಾಂಚೆ ಡಬ್ಬೆಯೀ ದಿಲೆ. ದುಡು ಆನಿ ಡಬ್ಬೆ ಘೆವ್ನ್ ಮನ್ವೆಲ್ ಲೋಬ್ ಚಲ್ಲೊ. ಬೆಂಕಾಕ್ ವಚೊನ್ ಸಗ್ಳಿ ಏಕ್ಚ್ ಡ್ರಾಫ್ಟ್ ತಾಣೆ ಕೆಲಿ ಆಪ್ಲ್ಯಾ ನಾಂವಾರ್. ಆನಿ ದುಸ್ರ್ಯಾ ದೀಸ್ ತೊ ಭಾರತಾಕ್ ಉಬ್ಲೊ. ಪೊಕಾ ಸಿಕೇರಿನ್ ಬಾಯ್ಲೆಕ್ ಕಾಗದ್ ಬರೈಲೆಂ
"ಫಲಾಣ್ಯಾ ನಾಂವಾಚ್ಯಾ ಮನ್ಶ್ಯಾಲಾಗಿಂ ಹಾವೆಂ ಸಾಟ್ ಹಜಾರ್ ರುಪೈ ಧಾಡ್ಲಾ. ತೊ ಘರಾ ಹಾಡ್ನ್ ದಿತೊಲೊ. ಮೆಳ್ತಚ್ ಮ್ಹಾಕಾ ಜಾಪ್ ಬರೈ. ಆನಿ ಕೂಡ್ಲೆ ತೊ ಜಾಗೊ ಸ್ವಾಧೀನ್ ಕರ್ನ್ ಘೆ." ಗಾಂವಾಂತ್ ಬಾಯ್ಲ್ ರಾಕ್ತಾ ಘೊವಾಚೊ ಈಷ್ಟ್ ೬೦ ಹಜಾರ್ ರುಪೈ ಹಾಡ್ತಾ ಮ್ಹಣ್. ಬಾಹ್ರೆನಾಂತ್ ಘೊವ್ ರಾಕ್ತಾ ಘೊವ್ ಬಾಯ್ಲೆ ಥಾವ್ನ್ ಪೊಯ್ಶೆ ಮ್ಹೆಳ್ಳೆ ಮ್ಹಳ್ಳಿ ಜಾಪ್ ಕೆದಾಳಾ ಯೆತಾ ಮ್ಹಣ್. ಜಾಗ್ಯಾಚೊ ಧನಿ ಚಿಂತಾ ಪೊಕಾ ಸಿಕೇರಿಚಿ ಬಾಯ್ಲ್ ಜಾಗೊ ಕೆದಾಳಾ ಘೆತಾಂ ಮ್ಹಣ್. ದೀಸ್ ಧಾಂವ್ಲೆ. ಹಫ್ತೆ ಉಬ್ಲೆ. ಮಹಿನೊ ಧಾಂವೊನ್ ಆಯ್ಲೊ. ಬಾಯ್ಲೆ ಥಾವ್ನ್ ಪೊಕಾ ಸಿಕೇರಿಕ್ ಕಾಗದ್ ಆಯ್ಲೆಂ ಕೀ
"ತುವೆಂ ಧಾಡ್ಲ್ಲೆ ಪೊಯ್ಶೆಯೀ ನಾಂತ್, ತೊ ಮನಿಸ್ಯೀ ನಾ" ಪೊಕಾ ಸಿಕೇರಿಕ್ ಹಾಂಗಾ ಹರ್ಧ್ಯಾಂತ್ ಕಾಳಿಜ್ ಗುಡ್ಗುಡ್ಯಾ ನಾರ್ಲಾಬರಿ ಹಾಲೊಂಕ್ ಧಡ್ದೊಡೊಂಕ್ ಸುರು ಜಾಲೆಂ. ಕೂಡ್ಲೆ ತಾಣೆ ಮನ್ವೆಲ್ ಲೊಬಾಚಾ ಎಡ್ರೆಸಾರ್ ಕಾಗದ್ ಬರೊವ್ನ್ ಘಾಲೆಂ.
ಪೊಯ್ಶೆ ಪಾವಿತ್ ಕರಿನಾತ್ಲ್ಲ್ಯಾವಿಶಿಂ ತಾಣೆ ಶಿಣ್ಯೀ ಪಾಚಾರ್ಲ್ಲೊ. ಪುಣ್ ಮನ್ವೆಲ್ ಲೋಬ್ ತ್ಯಾ ಎಡ್ರೆಸಾರ್ಚ್ ನಾ ಜಾಲ್ಯಾರ್, ಕಾಗದ್ ತಾಕಾ ಕಸೆಂ ಮೆಳ್ಚೆಂ? ಪಂದ್ರಾ ದಿಸಾಂನಿ ತೆಂಚ್ ಕಾಗಕ್ ಪೊಕಾ ಸಿಕೇರಿಕ್ ಪಾಟಿಂಚ್ ಆಯ್ಲೆಂ. ಹಾಂಗಾಸರ್ ಪೊಕಾ ಸಿಕೇರಿಕ್ ಭ್ಯೆಂ ವಿಶೇಸ್ ಜಾಲೆಂ. ತಕ್ಶಣ್ ತಾಣೆ ಆಪ್ಲ್ಯಾ ಬಾಯ್ಲೆಕ್ ಮನ್ವೆಲಿಚೊ ವಿಳಾಸ್ ದೀವ್ನ್ ಮನ್ವೆಲಿಚಿ ಖಬಾರ್ ಕಾಡ್ಚಾಕ್ ಕಾಗದ್ ಬರೈಲೆಂ. ಸಾಂಗಾತಾಚ್ ದುಸ್ರ್ಯಾಚ್ ದಿಸಾ ತೊ ಮನ್ವೆಲ್ ಕಾಮ್ ಕರ್ನ್ ಆಸ್ಲ್ಲ್ಯಾ ಕಂಪೆನಿಕ್ ಸೊಧುನ್ ವಚೊನ್ ಮನ್ವೆಲಿವಿಶಿಂ ಖಬಾರ್ ಕಾಡ್ತಾನಾ
"ಮನ್ವೆಲ್ ಲೋಬ್ ಗಾಂವಾಕ್ ಗೆಲ್ಲೊ ದೋನ್ ಮಹಿನ್ಯಾಂಚಾ ರಜೆರ್ ನಹಿಂ, ಬಗಾರ್ ಕಂಪೆನಿಕ್ ತಾಣೆ ಧಗೊ ದಿಲ್ಲ್ಯಾನ್ ಕಂಪೆನಿನ್ ತಾಕಾ ಸಾಸ್ಣಾಚಿ ರಜಾ ದೀವ್ನ್ ತಾಕಾ ತಾಚೆಂ ಸರ್ವಿಸ್ ರದ್ಧ್ ಕರ್ನ್ ಪಾಟಿಂ ಧಾಡ್ಲಾ." ಮ್ಹಣ್ ಸಾಂಗ್ತಾನಾ ಪೊಕಾ ಸಿಕೇರಿಕ್ ಪಾಯಾಮುಳಾಂತ್ಚ್ ಯಮ್ಕೊಂಡ್ ದಿಸ್ಲೆಂ ತರ್ ವಿಶೇಸ್ ನಹಿಂ. ಪೊಕಾ ಸಿಕೇರ್ ಸಗ್ಳೊಚ್ ಸೈರ್ಭೈರ್ ಜಾಲೊ. ಗಾಂವಾಂತೂನ್ ಸಿಕೇರಿಕ್ ಬಾಯ್ಲೆಚಿ ಜಾಪ್ ಆಯ್ಲಿ.
"ಆಪ್ಣೆಂ ಯಾ ವಿಳಾಸಾಕ್ ವಚೊನ್ ಖಬಾರ್ ಕಾಡ್ಲಿ. ಪುಣ್ ತೊ ಫಟ್ಕಿರೊ ವಿಳಾಸ್. ತ್ಯಾ ವಿಳಾಸಾಕ್ ತ್ಯಾ ನಾಂವಾಚೊ ಮನಿಸ್ಚ್ ನಾ. ತುವೆಂ ಕಿತೆಂ ಮ್ಹಣ್ ಚಿಂತುನ್ ತಿತ್ಲೆ ಪೊಯ್ಶೆ ತಾಚೆಲಾಗಿಂ ದಿಲ್ಲೆಯ್. ಆಜ್ಕಾಲ್ ಬಾಪುಯ್ ಪುತಾಕ್ ಪಾತ್ಯೆನಾ ಆವಯ್ಕ್ ಧುವೆಚೆರ್ ವಿಶ್ವಾಸ್ ನಾ. ತಸೆಂ ಆಸ್ತಾಂ ಪರ್ಕಿ ಮನ್ಶಾಕ್ ತುವೆಂ ಸಾಟ್ ಹಜಾರ್ ರುಪೈ ಕಿತೆಂ ಮ್ಹಣ್ ದಿಲೊಯ್...." ಇತ್ಯಾದಿ ಬಾಯ್ಲೆಚಿಂ ರಾಜಾಂವಿಕ್ ಉತ್ರಾಂ ಪೊಕಾ ಸಿಕೇರಿಕ್ ಸತ್ ಮ್ಹಣ್ ಭಗ್ಲೆಂ.
’ಆಪುಣ್ ಬಾಯ್ಲೆಚ್ಯಾ ನಾಂವಾರ್ ಡ್ರಾಫ್ಟ್ಚ್ ತಾಚೆಲಾಗಿಂ ಧಾಡ್ನ್ ದಿತೊಂ ಆಸ್ಲ್ಲೊಂ. ಕಸಲೆಂ ಹೆಡ್ಪೊಣ್ ಆಪ್ಣೆಂ ಕೆಲೆಂ. ಪಾಂಚ್ ವರ್ಸಾಂಚಿ ಜೋಡ್ ಮ್ಹಜಿ ವ್ಹಾಳ್ಯಾಕ್ ಗೆಲಿಗಾಯ್?’ ಚಿಂತುನ್ ಪೊಕಾ ಸಿಕೇರ್ ರಡ್ಲೊ. ತರಿಪುಣ್ ಪ್ರಯತನ್ ತಾಣೆ ಸಾಂಡ್ಲೆಂ ನಾ, ತೊ ಪರತ್ ಮನ್ವೆಲ್ ಕಾಮ್ ಕರ್ನ್ ಆಸ್ಲ್ಲ್ಯಾ ಕಂಪೆನಿಕ್ ಗೆಲೊ. ಮೆನೆಜರಾಕ್ ಹಕೀಗತ್ ತಿಳ್ಸುನ್ ತಾಚೊ ಖರೊ ವಿಳಾಸ್ ಕಂಪೆನಿ ಥಾವ್ನ್ ಘೆವ್ನ್ ಸ್ವಾಧೀನ್ ಕೆಲೊ, ಆನಿ ಕೂಡ್ಲೆ ತಾಣೆ ಸರ್ಕಾರಾಚಿ ಮಜತ್ ಘೆವ್ನ್ ಸಂಬಂಧ್ ಜಾಲ್ಲ್ಯಾ ಪೊಲಿಸ್ ಅಧಿಕಾರಿಂಕ್ ಅರ್ಜಿ ಬರವ್ನ್ ವಿಳಾಸಾ ಸಂಗಿಂ ಧಾಡ್ಲಿ.
ಪೊಲಿಸ್ ಸೊಧ್ನಾಂಕ್ ಭಾಯ್ರ್ ಸರ್ಲೆ. ಗಾಂವಾಕ್ ಯೇವ್ನ್ ಪಾವ್ಲ್ಲ್ಯಾ ಮನ್ವೆಲ್ ಲೋಬೊನ್ ವೇಳ್ ಪಾಡ್ ಕೆಲೊನಾ, ಡ್ರಾಫ್ಟ್ ಹಾಡ್ಲೆಲ್ಯಾನ್ ತಾಣೆ ತಿ ವಾಟಾಂವ್ಕ್ ಆಸ್ಲ್ಲಿ. ತಾಚಾ ಎಕೌಂಟಾಕ್ ಘಾಲ್ನ್ ತಾಣೆ ೬೦ ಹಜಾರ್ ರುಪಯ್ ಕಾಡ್ಲೆ. ಆನಿ ಘರಾ ವ್ಹರ್ನ್ ಆಪ್ಲ್ಯಾ ಬಾಯ್ಲೆಲಾಗಿಂ ದಿಲೆ. ಕಾರಣ್, ತಾಬೆಂತ್ ದವರ್ಲ್ಯಾರ್ ಆಪುಣ್ ಸಾಂಪ್ಡಾನ್ ಸಿಕೇರ್ ಕಾಂಯ್ ವಗೊ ಬಸ್ಲೊ ತರ್ ಬರೆಂ. ನಾಂ ತರ್ ಅಪಾಯ್.
ದೆಕುನ್ ಬಾಯ್ಲೆಚಾ ತಾಬೆಂತ್ ದಿಲ್ಯಾರ್ ತಿಚ್ಯಾ ನಾಂವಾರ್ ಬೆಂಕಾಂತ್ ಘಾಲೆ ತರ್ ಗುಪಿತ್ ಉರ್ತೆಲೆ. ಮ್ಹಜೆಲಾಗಿಂ ಬೆಂಕಾಂತ್ ಫಕತ್ತ್ ಆಟ್ಶಿಂ ರುಪೈ ಮಾತ್ರ್ ಆಸಾ ತೊ ಪೈಲೆಂಚೊ ಮ್ಹಣ್ತಚ್ ಮ್ಹಜೆರ್ ಕಾಂಯ್ ಅಪ್ರಾದ್ ಪಡಾನಾ. ತ್ಯಾ ಶಿವಾಯ್ ಸಿಕೇರಿನ್ ಮ್ಹಜೆಲಾಗಿಂ ಪೊಯ್ಶೆ ದಿಲ್ಯಾತ್ ಮ್ಹಳ್ಳ್ಯಾಕ್ ರುಜ್ವಾತ್ ನಾ. ದೀಂವ್ಕ್ಚ್ ನಾ ಮ್ಹಣ್ಚೆಂ. ಹ್ಯಾ ಆಲೋಚನೆರ್ ತಾಣೆ ಖೆಳ್ ಖೆಳೊಂಕ್ ಚಿಂತ್ಲೆಂ. ಪುಣ್ ಮನ್ಶ್ಯಾಕ್ ಫಟೈಲ್ಯಾರೀ ದೆವಾಕ್ ಭನಾಂವ್ಕ್ ಜಾಂವ್ಚೆಂನಾ ಮ್ಹಳ್ಳೆಂ ಮನ್ವೆಲಿಕ್ ಕಳ್ತಾನಾ ವೇಳ್ ಉತ್ರೊಂಕ್ ಆಸ್ಲ್ಲೊ ತಾಚಾ ಮಂದ್ ಸಮ್ಚೊಣೆಕ್ ಬೇಂಕ್ ವ್ಯವಹಾರಿಕ್ ಪದ್ದತಿಚಿ ಮಾಹೆತ್ ನಾ ಜಾಲ್ಲಿ ಕಾರಣ್ ತಾಚೆಂ ಉಣೆ ಶಿಕಾಪ್. ಪುಣ್ ಸಿಕೇರಿನ್ ಬುಧ್ವಂತ್ಕಾಯ್ ವಾಪಾರ್ನ್ ಆಪ್ಲೊ ಖರೊ ವಿಳಾಸ್ ಸಲೀಸಾಯೆನ್ ಸೊಧುನ್ ಕಾಡ್ನ್ ಪುಡ್ಲಿ ಬಂದಬಸ್ತ್ ಕೆಲ್ಯಾ ಮ್ಹಳ್ಳೆಂ ಮನ್ವೆಲ್ ನೆಣಾ ಜಾಲ್ಲೊ. ಎಡ್ರೆಸ್ ಸೊಧುನ್ ಪೊಲಿಸ್ ಆಯ್ಲೆಚ್. ಮನ್ವೆಲಿಚಿ ತನ್ಕಿ ಕೆಲಿಚ್. ಮನ್ವೆಲ್ ಸಂಪೂರ್ಣ್ ನಿರಾಪ್ರಾದಿ ಮ್ಹಣ್ ಭಾಸಿಲಾಗ್ಲೊ.
ಪೊಲಿಸ್ ವಗೆ ರಾವ್ಲೆನಾಂತ್, ತಾಚೆಂ ಬೇಂಕ್ ಎಕೌಂಟ್ ತಪಾಸಣ್ ಕೆಲೆಂ ಆನಿ ಹ್ಯಾ ವೆಳಿಂ sಸಾಟ್ ಹಜಾರ್ ರುಪೈ ಬೆಂಕಾಂತ್ ಡ್ರಾಫ್ಟ್ ಘಾಲ್ನ್ ಪರತ್ ಕಾಡ್ಲ್ಲೊ ದಾಖ್ಲೊ ರುಜ್ವಾತೆಕ್ ಯೆತಾನಾ ಮನ್ವೆಲಿನ್ ಚುಕಾರಿ ಮಾರ್ಲಿ. ತೊ ಲಿಪ್ಲೊ. ಮನ್ವೆಲ್ ಲೋಬಾಚಿ ಬಾಯ್ಲ್ ಕಾತ್ತು ಏಕ್ ಧಗಲ್ಭಾಜಿ ಸ್ರೀ ಮಾತ್ರ್ ನಹಿಂ ವಾಯ್ಟ್ ಚಾಲಿಕ್ ಸ್ವಾಗತ್ ದಿಲ್ಲಿ ನಾರಿ ಜಾವ್ನಾಸ್ಲ್ಲಿ. ಘೊವ್ ಪರ್ಗಾಂವಾಂತ್ ಆಸ್ತಾನಾ ತಿಣೆ ಗಾವಾಂತ್ ’ಬೊಂಗ’ ಮ್ಹಳ್ಳ್ಯಾ ಎಕಾ ಅಕಥೊಲಿಕ್ ದಾದ್ಲ್ಯಾಚಿ ಸಳಾವಳ್ ಕೆಲ್ಲಿ ಆನಿ ವಾಯ್ಟ್ ಸಂಬಂಧ್ ದವರ್ನ್ ಘೆತ್ಲ್ಲೊ. ಮನ್ವೆಲಿಕ್ ತೆಗಾಂ ಚೆಡ್ವಾಂ ಭುರ್ಗಿಂ.
ಮಾಲ್ಘಡ್ಯಾಕ್ ಕಾಜಾರ್ ಜಾತೆಚ್ ಮನ್ವೆಲಿಕ್ ಬಾಹ್ರೆನ್ಚಿ ವಿಜಾ ಆಯಿಲ್ಲಿ. ಬೆಬ್ದೊ ಆನಿ ಲಫಂಗ್ ಜಾವ್ನಾಸ್ಲ್ಲ್ಯಾ ಘೊವಾಕ್ ಕಾಂಟಾಳ್ಲ್ಲಿ ಬಾಯ್ಲ್ ಕಾತ್ತು ತೊ ಬಾಹ್ರೆನ್ ಗೆಲ್ಲ್ಯಾಂತ್ ಧಾದೋಶಿ ಜಾಲ್ಲಿ. ಘೊವ್ ಮನ್ವೆಲ್ ಬಾಹ್ರೆನ್ ಗೆಲ್ಲೊಚ್ ಗಾಂವಾಂತ್ಲ್ಯಾ ಸೆಜಾರಿ ಬೊಂಗಾಕ್, ಕಾತ್ತುಕ್ ಬಾಜಾರಿ ಊಬ್ ದಿಂವ್ಚ್ಯಾಕ್ ಸಲೀಸ್ ಜಾಲ್ಲೆಂ. ಆನಿ ತಿಕಾ ಮನ್ವೆಲಿ ಪ್ರಾಸ್ ಬೊಂಗಾ ಚಡ್ ಮೊಗಾಚೊ ಜಾಲ್ಲೊ ಆನಿ ತಾಂಚೆಂ ಬಾಜಾರಿ ಜೀವನ್ ಚಲಾತ್ತ್ ಆಸ್ಲ್ಲೆಂ. ಪ್ರಸ್ತುತ್ ಘೊವ್ ಆತಾಂ ಬಾಹ್ರೆನಾಂತ್ಲಿ ಚಾಕ್ರಿ ಸೊಡ್ನ್ ಆಯಿಲ್ಲೊ ಮಾತ್ರ್ ನಹಿಂ ದುಡು ಚೊರಿಯೆಚಾ ಅಪ್ರಾದಾಕ್ ಸಾಂಪಡ್ಲೆಲ್ಯಾನ್ ತಿಕಾ ಘೊವಾ ಥಂಯ್ ಚಡ್ ತಿರಸ್ಕಾರ್ ಭಗುಂಕ್ ಸುರು ಜಾಲೊ.
ಪೊಲಿಸ್ ತಾಚ್ಯಾ ಪಾಟಿಕ್ ಲಾಗ್ಲ್ಲೆ. ಪುಣ್ ಮನ್ವೆಲ್ ದಿಸಾಚೆಂ ದಿಸಾನಾತ್ಲ್ಲೊ ರಾತಿಚೆಂ ಆಸಾ ನಾತ್ಲ್ಲೊ. ಅಪ್ರೂಬ್ ತೊ ರಾತಿಚೆಂ ಚುಕಾಮುಖಿಂ ಯೆತಾಲೊ. ಬಾಯ್ಲೆಚಿ ಬಗಲ್ ಘೆತಾಲೊ ಆನಿ ಫಾಂತ್ಯಾ ಫಾಂತ್ಯಾರ್ ಪೊಳ್ತಾಲೊ. ಪೊಲಿಸಾಂನಿ ಹಠ್ ಧರ್ಲೆಂ. ಕಾತ್ತುಕ್ ಧಮ್ಕುನ್ ಭೆಷ್ಟಾಯ್ಲೆಂ. ಪುಣ್ ತಿ ಸಾಂಗೊಂಕ್ ಸಕ್ಲಿನಾ. ಪೊಲಿಸ್ ವಗೆ ರಾವ್ಲೆನಾಂತ್. ಆತಾಂ ಕಾತ್ತುನ್ ಏಕ್ ಆಲೋಚನ್ ಕೆಲಿ. ತಿ ಜಾಣಾ ಘೊವಾನ್ ಸಾಟ್ ಹಜಾರ್ ರುಪೈ ಪೆಲ್ಯಾಕ್ ಧಗೊ ದೀವ್ನ್ ಹಾಡ್ಲ್ಲೆ ಮ್ಹಣ್. ಆನಿ ಆತಾಂ ತೆಂ ಸಾಟ್ ಹಜಾರ್ ರುಪೈ ಆಪ್ಣಾಚ್ಯಾ ತಾಬೆಂತ್ ಆಸಾತ್ ಆಸ್ತಾಂ ಭಿರಾಂತ್ ನಾ. ಘೊವಾಕ್ ಕಾಮ್ ಕಸೆಂಯೀ ನಾ.
ಆಜ್ ವ ಫಾಲ್ಯಾಂ ಪೊಲಿಸ್ ಹಾಕಾ ಧರ್ತಲೆಚ್. ಸಾಟ್ ಹಜಾರ್ ರುಪೈ ಸರ್ಕಾರ್ ಸ್ವಾಧೀನ್ ಕರ್ನ್ ಘೆತಲೊ ಆನಿ ಸಂಬಂಧ್ ಜಾಲ್ಲ್ಯಾಕ್ ಪಾಟಿಂ ದಿತಲೊ. ಹಾಕಾ ಜಯ್ಲಾಂತ್ ಬಸಯ್ತೆಲೆ. ಪೊಯ್ಶೆಯೀ ವೆತೆಲೆ. ಮುಖಾರ್ ಖರ್ಚ್, ನಶ್ಟ್ ಶಿವಾಯ್ ಹ್ಯಾ ಘೊವಾ ವರ್ವಿಂ ಆದಾಯ್ ನಾ. ವಯ್ಲ್ಯಾನ್ ಹೊ ಗಾಂವಾಂತ್ ಆಸ್ತಾನಾ ರಾತಿಚೆಂ ಬೊಂಗಾ ಸಾಂಗಾತಾ ಮಝಾ ಮಾರುಂಕ್ಯೀ ವಾಂದೆ ದೆಕುನ್ ಏಕ್ ಮಾರೆಕಾರ್ ಉಪಾಯ್ ತಿಣೆ ಹಾತಿಂ ಘೆತ್ಲೊ. ಆನಿ ಬೊಂಗಾಕ್ ತಿಣೆ ಮಾಂಡಾವಾಳ್ ತಿಳ್ಸಿಲಿ. ತ್ಯಾ ಪ್ರಕಾರ್ ತ್ಯಾ ಎಕಾ ರಾತಿಂ ಮನ್ವೆಲ್ ಲೋಬ್ ಆಪ್ಲ್ಯಾ ಘರಾ ಭಿತರ್ ಕಾತ್ತುನ್ ತಾಕಾ ಮನಿಸ್ ಧಾಡ್ನ್ ಸೂಚನ್ ದಿಲೆಂ. ರಾತಿಕ್ ಘೊವಾಕ್ ಕಾತ್ತುನ್ ಘಟ್ಟ್ ಸೊರೊ ದೀವ್ನ್ ಟಾಯ್ಟ್ ಕೆಲೊ. ಉಪ್ರಾಂತ್ ಎಕಾ ಕಾಗ್ದಾಚೆರ್ ತಾಚೆಕರ್ನಾ ಬಲತ್ಕಾರಾನ್ ಹ್ಯಾ ಪರಿಂ ಬೊಂಗಾನ್ ಆನಿ ತಿಣೆ ಮೆಳೊನ್ ಬರಂವ್ಕ್ ಲಾಯ್ಲೆಂ
" ಮ್ಹಾಕಾ ಆನಿ ಪೊಕಾ ಸಿಕೇರಿಕ್ ಕಾಂಯ್ಚ್ ಸಂಬಂಧ್ ನಾ. ತಾಕಾ-ಮ್ಹಾಕಾ ಪಳೆವ್ನ್ ಮಾತ್ರ್ ವಳಕ್ ಶಿವಾಯ್ ಇಷ್ಟಾಗತ್ ನಾ. ತಾಣೆ ಮ್ಹಜೆಲಾಗಿಂ ಪೊಯ್ಶೆ ದೀಂವ್ಕ್ ನಾಂತ್. ವ ತಿ ಖಬಾರ್ಚ್ ಮ್ಹಾಕಾ ಸಾಂಗೊಂಕ್ನಾ. ಹೊ ಭೆಸ್ಟೊಚ್ ಫಟ್ಕಿರೊ ಬದ್ಲಾಮ್ ಮ್ಹಜೆರ್ ಘಾಲಾ. ಹ್ಯಾ ನಿಮ್ತಿಂ ನಿರಾಪ್ರಾಧಿ ಹಾಂವ್ ಪೊಲಿಸಾಂಚ್ಯಾ ಕ್ರೂರ್ ಶಿಕ್ಷೆಕ್ ಬಲಿ ಜಾವ್ನ್ ವಳ್ವಳೊಂಕ್ ಕಬೂಲ್ ನಾ. ದೆಧಿಸ್ವ್ರಾರ್ ಜಾವ್ನ್ ಹಾಂವೆಂ ಮ್ಹಜ್ಯಾ ಸ್ವತಃಚೆ ಖುಶೆನ್ ಹೊ ಜೀವ್ಘಾತ್ ಕರ್ಚೊ. ಮ್ಹಜಾ ಮೊರ್ನಾಕ್ ಹಾಂವ್ಂಚ್ ಕಾರಣ್ ಶಿವಾಯ್ ಹೆರ್ ಕೋಣ್ಂಚ್ ನಹಿಂ...."
ದಸ್ಕತ್ ಕಾತ್ತುನ್-ಬೊಂಗಾನ್ ಮನ್ವೆಲಿ ಕರ್ನಾ ಹೆಂ ಬಲತ್ಕಾರಾನ್ ಬರವ್ನ್ ಘೆತಚ್ ತಾಕಾ ತಾಣಿ ಮಾಳಿಯೆರ್ ವ್ಹೆಲೊ, ಬಾಗ್ಲಾಮ್ ಜನೆಲಾಂ ಬಂಧ್ ಕರ್ನ್ ಮನ್ವೆಲಿಚಿ ಗೊಮ್ಟಿ ಚಿರ್ಡುನ್ ಕಾತ್ತುನ್ ಆನಿ ಬೊಂಗಾನ್ ಮನ್ವೆಲಿಕ್ ಲಗಾಡ್ ಕಾಡ್ಲೊ. ಪ್ರಾಣ್ ಸಂಪೂರ್ಣ್ ಉಬ್ತಚ್ ಥಂಯ್ಚ್ ಅಡ್ಯಾಕ್ ಏಕ್ ದೊರಿ ಬಾಂದುನ್ ಮೊಡ್ಯಾಚ್ಯಾ ಗಳ್ಯಾಕ್ ಪಾಸ್ ಬಿಗ್ದುನ್ ಮೊಡೆಂ ಉಮ್ಕಾಳೊಂಕ್ ಸೊಡ್ಲೆಂ. ಆನಿ ಮುಖಾರ್ಚ್ ತೆಂ ಕಾಗದ್ ದವರುಂಕ್ ತಿಂ ವಿಸ್ರಾಲಿನಾಂತ್.
ಉಜ್ವಾಡ್ತಚ್ ಕಾತ್ತುಚ್ಯೊ ಉಪ್ರಾಟ್ಯೊ ಬೊಬೊ ವಾಡ್ಯಾಕ್ ಹಾಲೈತಾನಾ ಸೆಜಾರಿ ಕುಡ್ಸಾಲೆ. ಉಮ್ಕಾಳ್ಚೆಂ ಮೊಡೆಂ ಪಳೆವ್ನ್ ಸರ್ವ್ ಅಕ್ಲಾಸ್ತಾನಾ ಖಬಾರ್ ಪಾವೊನ್ ಪೊಲಿಸ್ ಶಿಂಬಂಧಿ ಆಯ್ಲಿ. ಹೆಡ್ ಕಾನ್ಸ್ಟೇಬಲ್ ರುಕ್ಮಯ್ಯ ಚುರುಕ್ ತಕ್ಲೆಚೊ ಮನಿಸ್.
ಪಾಸ್ ಬಿಗ್ದಾಲ್ಲ್ಯಾ ಮೊಡ್ಯಾಚ್ಯಾ ಗೊಮ್ಟ್ಯಾ ಥಾವ್ನ್ ಮಾಳ್ಯಾಚೆಂ ಅಡೆಂ ಕಿತ್ಲ್ಯಾ ಉಬಾರಾಯೆನ್ ಆಸಾ ಮ್ಹಳ್ಳೆಂ ಪಾರ್ಕಿಲೆಂ ತಾಣೆ. ೧ ೧/೨ ಫಿಟಿ ಭಿತರ್ಲೊ ಉಬಾರಾಯೆಚೊ ಅಂತರ್ ಆಸ್ಲ್ಲೊ. ಹೊ ಅಂತರ್ ದೆಖ್ಲ್ಲೊಚ್ ತಾಕಾ ಖಚಿತ್ ಜಾಲೆಂ ಕೀ ಹೊ ಜೀವ್ಘಾತ್ ನಹಿಂ, ಬಗಾರ್ ಖುನ್ ಮ್ಹಳ್ಳೆಂ. ಕಿತ್ಯಾ ಜೀವ್ಘಾತ್ ಕರ್ಚಾ ಮನ್ಶ್ಯಾಕ್ ಆಪ್ಲೊ ಜೀವ್ ತುಟ್ಚಾ ವೆಳಾರ್ ಕೂಡ್ ಧಡ್ಬಡ್ತಾನಾ ಜೀವಾಚ್ಯಾ ಅಕ್ಲಾಸಾಕ್ ತೊ ಬಚಾವೆಚಿ ವಾಟ್ ಜರೂರ್ ಆಶೆತಾಚ್. ಆನಿ ತ್ಯಾ ವೆಳಿಂ ತಾಚೆ ಪಾಯ್ ಧರ್ಣಿಕ್ ತೆಂಕೊಂಕ್ ಸಕಾನಾಂತ್ ಜಾಲ್ಯಾರೀ ಹಾತಾಂನಿ ತೊ ದಡ್ಭಡೊನ್ ರಕ್ಷಣೆಚೊ ಆಶ್ರಯ್ ಸೊದ್ತಾಚ್, ತಸೆಂಚ್ ಮನ್ವೆಲ್ ಲೋಬೊಯೀ ಜಿವಾಚಾ ಅಕ್ಲಾಸಾಕ್ ದಡ್ಬಡ್ತಾನಾ ತಾಚೆ ಹಾತ್ ಜರೂರ್ ವಯ್ಲೆಂ ಅಡೆಂ ಸೊದುಂಕ್ ಸಕ್ತೆಲೆಚ್. ಆನಿ ತೊ ಖಂಡಿತ್ ಧರ್ತೊ, ಆನಿ ವಾಂಚ್ತೊ. ಪುಣ್ ಹೊ ಮೆಲೊ ಮ್ಹಣ್ತಾನಾ ತೊ ಪೈಲೊಚ್ ಮೆಲಾ, ಮ್ಹಣ್ಚೆ ತಾಕಾ ಜಿವ್ಶಿಂ ಮಾರ್ನ್ ಉಮ್ಕಾಳಾಯ್ಲಾ ಮ್ಹಳ್ಳೆಂ ಶೆಂಬೊರ್ ಠಕ್ಕೆಂ ರುಜು ಕರ್ತಾಲೆಂ ತೆಂ ದ್ರಶ್ಯ್. ಕಾತ್ತು ಹಾಂಗಾ ಚುರುಕ್ ಜಾಲ್ಲಿ. ಶೆಂಬೊರಾಂಚಾ ನೊಟಾಂಚಿ ಏಕ್ ಹಳ್ತಾಚಿ ಅಟ್ಟಿ ಕಾತ್ತುನ್ ಹೆಡ್ಕಾನ್ಸ್ಟೇಬಲ್ ರುಕ್ಮಯ್ಯಚ್ಯಾ ಹಾತಾಂತ್ ವಳೂ ದಿಂವೈಲಿ.
"ಫರಾಮಸ್ ಘಡ್ಲಿ, ಧಾಂಪುನ್ ವ್ಹರ್." ಹಜಾರಾಂಚೆಂ ಬಂಡಲ್ ಮ್ಹಣ್ತಾನಾ ರುಕ್ಮಯ್ಯ ಕಿತ್ಯಾ ಜಾಯ್ತ್ ಮ್ಹಣಾನಾ? ತಾಚ್ಯೊ ಮಿಶ್ಯೊ ಪುಲ್ಲ್ಯೊ. ಮೆಜಾವೈಲೆಂ ಕಾಗದ್ ತಾಣೆ ಹಾತಿಂ ಘೆತ್ಲೆಂ. ನೀತ್ ಧಾಂಪ್ಲಿ ದುಡ್ವಾನ್.
ಪುಣ್ ಶಿರಾಪ್ ಧಾಂಪೊನ್ ಗೆಲೊನಾ. ಪೆಲ್ಯಾಕ್ ಕೆಲ್ಲೊ ಘಾತ್ ಆಪ್ಣಾಕ್ಚ್ ಫಾವೊ ಜಾಲೊ. ಪೆಲ್ಯಾಕ್ ಮಾಂಡ್ಲ್ಲೊ ಪಾಸ್ ಆಪ್ಲ್ಯಾಚ್ ಗಳ್ಯಾಕ್ ಬಿಗ್ದಾಲೊ. ಪೊಕಾ ಸಿಕೇರಿಚೆ ಕಷ್ಟಾಂಚಿ ಜಾವ್ಯೆತ್ ವಿಶ್ವಾಸಾನ್ ಮನ್ವೆಲಿಲಾಗಿಂ ತಾಣೆ ದಿಲ್ಲೆ. ಮನ್ವೆಲಿನ್ ಅಪಹರ್ಸಿಲೆ ತರಿ ತಾಕಾ ಖಾಂವ್ಕ್ ಮೆಳ್ಳೆನಾಂತ್. ಬಗಾರ್ ಮೆಳ್ಳೊ ದೊರಿಯೆಚೊ ಗಳ್ಪಾಸ್ ಮಾತ್ರ್, ಆಪ್ಲ್ಯಾಚ್ ಖಾಸ್ ಬಾಯ್ಲೆ ಥಾವ್ನ್. ಪೊಕಾ ಸಿಕೇರಿಚೊ ಸಾಟ್ ಹಜಾರ್ ರುಪಯ್ ನಾಂವ್ ನಾಸ್ತಾಂ ಗೆಲೊ.
ನಿರ್ಭಾಗಿ ತೊ ನಿರಾಶಿ ಜಾಲೊ. ತರ್ ತಾಚೆಯೀ ತೆ ಕಷ್ಟಾಂಚೆ ನಹಿಂ ಜಾಲ್ಲೆ ಆಸ್ಯೆತ್ಗಾಯ್? ದೇವ್ ಜಾಣಾ. ವ್ಹಯ್ ಮನ್ವೆಲ್ ಲಗಾಡ್ ಜಾಲೊ. ತರ್ ತೊ ಸಾಟ್ ಹಜಾರ್ ರುಪೈ ಸ್ವಾಧೀನ್ ಕರ್ನ್ ಘೊವಾಕ್ ಲಗಾಡ್ ಕಾಡ್ಲ್ಲ್ಯಾ ಬಾಯ್ಲೆಕ್ ಕಾತ್ತುಕ್ ತರೀ ಸುಖ್ ಮೆಳ್ಳೆಂಗೀ. ಕುಂಪಾದ್ರ್ ಬೊಂಗಾ ಆತಾಂ ಸದಾಮ್ ಮಜಾ ಮಾರುಂಕ್ ಯೇಂವ್ಕ್ ಲಾಗ್ಲೊ. ಕಾತ್ತುಲಾಗಿಂ ದುಡು ಆಸಾ, ತೆಂ ತಾಕಾ ಕಳಿತ್ ಆಸಾ. ಬರೀ ಮಜಾ ಜಾಲಿ. ದುಡು ಜೊಡುಂಕ್ ಕಷ್ಟ್. ಖರ್ಚುಂಕ್ ನಹಿಂ.
ತೊ ಶಿರಾಪಾಚೊ ದುಡು ಉರ್ಲೊನಾ. ಕಸೊ ಖರ್ಚಾಲೊಗೀ ದೇವ್ ಜಾಣಾ, ಜಾಯ್ ತಿತ್ಲಿ ಮಝಾ ಮಾರ್ನ್ ಬೊಂಗಾನ್ಯೀ ಕಾತ್ತುಕ್ ಲಾತ್ ದಿಲಿ. ಕಾತ್ತುಕ್ ಆತಾಂ ಕೋಣ್ಯೀ ವಳ್ಕಾನಾ. ದುಡ್ವಾನ್ ನೀತ್ ಲಿಪಯ್ಲ್ಯಾರೀ ಮನ್ಶ್ಯಾಂಚ್ಯಾ ಸಮ್ಜೊಣೆನ್ ಸತಾಕ್ ಫಟ್ ಕರುಂಕ್ ನಾ. ಸೆಜಾರಿ ಜಾಣಾ ಜಾಲೆ ಕೀ ಕಾತ್ತುನ್ ಬೊಂಗಾ ಕರ್ನಾ ಘೊವಾಕ್ ಲಗಾಡ್ ಕಾಡೈಲೊ. ಪೊಲಿಸಾಂಕ್ ಲೋಂಚ್ ದೀವ್ನ್ ನೀತ್ ಧಾಂಪಯ್ಲಿ ಮ್ಹಣ್. ವಾಡೊನ್ ಯೆಂವ್ಚಾ ತರ್ನಾಟ್ಯಾ ಧುವಾಂಕ್ ಸೈರಿಕೊ ಲಾಗ್ಲ್ಯೊನಾಂತ್. ಬಿಡಿಯೊ ಬಾಂದುನ್ ಚೆಡ್ವಾಂನಿ ಜೀವನ್ ಸಾರುಂಕ್ ಸುರು ಕರ್ತಾನಾ, ಜೋಡ್ ಪಾವಾನಾ ಜಾವ್ನ್ ಆವಯ್ನ್ ಧುವಾಂಕ್ ವಾಯ್ಟ್ ಕಸಬಾಚಾ ವ್ಯಾಪ್ತಿಚಿ ರೂಚ್ ದಾಖವ್ನ್ ತಿಣೆಂಚ್ ಧುವಾಂಕ್ ಗ್ರಾಯ್ಕ್ ಸೊಧುನ್ ಹಾಡ್ನ್ ದಿಲೆ.
ಆನಿ ಆಜ್ ಆತಾಂ ಪ್ರಸ್ತುತ್ ತೆಂ ಘರ್ ಅನೈತಿಕ್ ದಂದ್ಯಾಚೆಂ ಘರ್ ಜಾಂವ್ಕ್ ಪಾವ್ಲಾಂ. ಆನಿ ತೊ ಬೊಂಗಾ ಕಿತೆಂ ಸುಖ್ ಭೊಗ್ತಾ? ಹಾತಾ ಪಾಯಾಂಕ್ ಕೋಡ್ ಲಾಗೊನ್, ಮುಂರ್ಟೆಲ್ಲಿಂ ಬೊಟಾಂ, ಕರ್ಪಾಲ್ಲೆಂ ಮುಸ್ಕಾರ್, ವಿದ್ರೂಪ್ ಶರೀರ್, ಘಾಣೆಡ್ಡಿ ಕೂಡ್ ಘೆವ್ನ್ ಪಿಶ್ಯಾಂಬರಿ ರಸ್ತ್ಯಾಂನಿ ಭಂವ್ತಾ. ಭಿಕ್ ಮಾಗೊನ್ ಕೆಲ್ಲ್ಯಾ ಕರ್ಮಾಚೊ ಫಳ್ ಖಾತಾ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
