ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಎಚ್ಚೆಮ್ ಮ್ಹಳ್ಳ್ಯಾ ಲಿಖ್ಣೆನಾಂವಾರ್ ಕವಿತಾ ಬರಂವ್ಚೊ ಹೆನ್ರಿ ಮೆಂದೊಸ್ ಕೊಂಕ್ಣಿ ಕವಿತಾ ಶೆತಾಂತ್ ಪ್ರಸ್ತುತ್ ಕಾಳಾಚೊ ಉಂಚ್ಲೊ ಕವಿ, ವಿಮರ್ಶಕ್ ಆನಿ ಚಿಂತ್ಪಿ. ಎದೊಳ್ಚ್ ರಾಕ್ಣೊ ಸಾಹಿತಿಕ್ ಸ್ಪರ್ದೊ, ಕಾಣಿಕ್ ಕವಿ ಸ್ಪರ್ಧೊ, ದಾಯ್ಜ್ ಸಾಹಿತಿಕ್ ಸ್ಪರ್ಧೊ ಅಶೆಂ ಸಭಾರ್ ಸ್ಪರ್ಧ್ಯಾಂನಿ ಪಯ್ಲಿಂ ಇನಾಮಾಂ ಜೊಡ್ಲ್ಲ್ಯಾ ಹಾಚೆ ತೀನ್ ಕವಿತಾಜಮೆ ’ಚಲ್ಯಾಂಕ್ ಚತ್ರಾಯ್’, ’ಕಯ್ದ್ಯಾಚ್ಯೊ ಕವಿತಾ’ ಆನಿ ’ಬಾಮುಣಾಚೆಂ ಚೆಡುಂ’ ಪರ್ಗಟ್ ಜಾಲ್ಯಾತ್. ಕೊಂಕ್ಣಿ ಕವಿತಾಂಚೆರ್ ಜಾಯ್ತಿಂ ಲೇಖನಾಂ ಬರಯ್ಲ್ಯಾಂತ್. ಹೊ ಏಕ್ ಕಾಣ್ಯೆಗಾರ್, ಅಂಕಣ್ಕಾರ್ ಸಯ್ತ್. ಆಮ್ಕಾಂ ಸಭಾರ್ ವಾಚ್ಪ್ಯಾಂನಿ ಆಮ್ಕಾಂ ಎಚ್ಚೆಮಾಚಾ ಬರ್ಪಾಂ ಪರ್ಗಟ್ ಕರುಂಕ್ ವತ್ತಾಯ್ ಕೆಲ್ಲ್ಯಾನ್ ಹೊ ಕೊಂಕ್ಣಿ ಸಾಹಿತ್ಯಾಕ್ ಲಗ್ತಿ ಜಾಲ್ಲ್ಯಾ ಸಂಗ್ತೆಚೆರ್ ಹೊ ತವಳ್ತವಳ್ ದಾಯ್ಜ್.ಕೊಮ್ಚೆರ್ ಅಪ್ಲಿಂ ಬರ್ಪಾಂ ಬರಯ್ತಲೊ.
ಆಧ್ಲೆ ಆಂಕ್ಡೆ
3. ಕ್ವಾಡ್ರಸಾಚೊ ಪೆಟೊ?
ಕವಿ ಬಾಬ್ ವಲ್ಲಿ ಕ್ವಾಡ್ರಸಾಚಿ ಕವಿತಾ
’ಅನ್ಯೇಕ್ ಪೆಟೊ ಮೆಲಾ ಪಳೆ’ (ದರ್ಭಾರಾಂತ್ಲಿ ಪಿಂರ್ಗೊಣ್ - ಆಶಾವಾದಿ ಪ್ರಕಾಶನ್
2006, ಪಾನ್:58) ವಾಚ್ತಾನಾ ಮ್ಹಾಕಾ ಮಾಲ್ಘಡೊ ಕಾನಡಿ ಕವಿ, ನಾಟಕಿಸ್ತ್ ಡೊ.ಚಂದ್ರಶೇಕರ ಕಂಬಾರ ಹಾಂಚೊ ’ನಾಯಿ ಕತೆ’ ನಾಟಕ್ ಜಬರ್ದಸ್ತೆನ್ ಉಡಾಸಾಂತ್ ಶಿರ್ತಾ. ಡೊ. ಕಂಬಾರ ಹಾಂಚೊ ತೆ ಆನಿ ಹೆರ್ ನಾಟಕ್ ಹಾಂವ್ ಶಿರ್ವಾಂತ್ ಕೊಲೆಜಿಂತ್ ಶಿಕ್ತಾನಾ ವಾಚುನ್ ಕಾಡ್ಲ್ಲೆ. ತೆದ್ನಾಂ ಹೆ ನಾಟಕ್ ಆಮ್ಚೊ ಇಂಗ್ಲಿಶ್ ಮೆಸ್ತ್ರಿ, ಸಂಗೀತ್ಕಾರ್ ಪ್ರೊ. ಶ್ರೀಕಾಂತ ಸೋಮಯಾಜಿನ್ ತುಳುವೆಕ್ ತರ್ಜುನ್ ನಿರ್ದೇಶುನ್ ಖೆಳಯಿಲ್ಲೊ.
ಸಾವಂತ್ರಿಚೊ ಆಮ್ಚ್ಯಾ ಜಿವಾಪ್ರಾಸ್ ಚಡ್ ಮೋಗ್ ಕರ್ಚೊ, ಆಶೆಂವ್ಚೊ ಸಾವ್ಕಾರ್, ಹಾಕಾ ಜೆದ್ನಾಂ ನಾಟಕಾಚಾ ಶಿಖರಾರ್
ಸಾವಂತ್ರಿ ಅಪ್ಣಾಕ್ ನ್ಹಯ್ ಬಗಾರ್ ಆಪ್ಲ್ಯಾ ಘರಾ ಆವಯ್ ಬಾಪುಯ್ ವಾರೆಸ್ದಾರ್ ಅಖ್ರೇಕ್ ಅಪ್ಲೆಂಚ್ ಮ್ಹಳ್ಳೆಂ ನಾಂವ್ ಸಯ್ತ್ ನಾಸ್ತಾನಾ ’ಸುಣೆಂ’ ಜಾವ್ನ್ ಜಿಯೆಂವ್ಚ್ಯಾ ತರ್ನಾಟ್ಯಾಕಡೆ ಮೆಜಾರ್ ಆಸಾ, ಆಶೆತಾ ಮ್ಹಣ್ ಕಳ್ತಾ. ತೆದ್ನಾಂ ತೊ ಫಳಾಪಳ್ ಘೆಂನ್ ವೆಚಾ ತಾಂಕಾಂ ಪಾರೊತ್ ಕರ್ನ್ ಬಸೊನ್ ಮಾರುಂಕ್ ಉಕಲ್ಲೆಲಿ ಬಂದೂನ್ ಸಕಯ್ಲ್ ಘಾಲ್ತಾ.
ಡೊ. ಕಂಬಾರಾಚಾ ನಾಟಕಾಂತ್ ’ಸುಣೆಂ’ ಜಾವ್ನ್ ಜಿಯೆಂವ್ಚಾ ಮನ್ಶ್ಯಾಕ್ ಆನಿ ಭೋವ್ಶಾ ಗಲ್ಫಾಚಾ ವ ಸಂಸಾರಾಚಾ ಖಂಚಾಯ್ ವ್ಹಡ್ ಆಧುನಿಕ್ ಶೆರಾಂತ್ (ಕಾರಣ್ ಹಾಂಗಾ ಜಿಯೆಂವ್ಚಾ ಮನ್ಶ್ಯಾಂಕ್ ದೊಳೆ, ಅತ್ಮೊ, ಜೀವ್, ಮತ್ ನಾತ್ಲ್ಯಾರ್ಯೀ ’ಸುಶೆಗ್’ ಆಸಾ. ಅಶೆಂ ಶೆರಾಂತ್
ನ್ಹಯ್ ತರ್ ಖಂಯ್ ಆಸಾ?) ರಾಜ್ ರಸ್ತ್ಯಾರ್ ಮೊರೊನ್ ಪಡ್ಲ್ಲ್ಯಾ ಕ್ವಾಡ್ರಸಾಚ್ಯಾ ಪೆಟ್ಯಾಕ್ (ಹ್ಯಾ ಬರ್ಪಾಚ್ಯಾ ಲಾಂಭಾಯೆಕ್ ಮ್ಹಜ್ಯಾ ಸಂವೇದಾಕ್ ಹಾವೆಂ ತಶೆಂ ಆಪವ್ಯೆತ್ ತರ್/ಪಯ್ಸ್ ಪಯ್ಸ್ ಕಸಲೊಯ್ ಸಂಬಂದ್ ನಾ ಮ್ಹಣ್ ದಿಸ್ಲ್ಯಾರ್ಯೀ ವಯ್ಲ್ಯಾಭಾರ್, ಕವಿ ಕ್ವಾಡ್ರಸ್ ಅಪ್ಲ್ಯಾ ಕವಿತೆಚ್ಯಾ ನಿಮಾಣ್ಯಾ ವೊಳಿಂನಿ ಕವಿಂಚ್ಯಾ (ಡೊ. ಚಂದ್ರಶೇಖರ ಕಂಬಾರ ಕವಿಯ್ ವ್ಹಯ್) ಅತ್ಮ್ಯಾಂಕ್ (ಹಾಂವ್ ಹಾಂಕಾ ಕವಿ ದೀಶ್ಟ್ ಮ್ಹಳ್ಳ್ಯಾ ಅರ್ಥಾನ್ ಘೆತಾಂ!) ಆನಿ ತಾಂಚಾ ವ್ಹೊರಾಕ್ ಆಪವ್ನ್ ಹಾಡ್ನ್ ಕಾಳ್ಜಾಂತ್ ಆಕಾಂತ್ ತುಫಾನ್ ಉಟಯ್ತಾ!
ಕೇವಲ್ ಕವಿಂಕ್ ನ್ಹಯ್, ತಾಂಚಾ ಅತ್ಮ್ಯಾಂಕ್ ನ್ಹಯ್, ತಾಂಚಾ ವ್ಹೊರಾಂಕ್ (ಎಕಾ ನಿರ್ಗತಿಕ್ ಪೆಟ್ಯಾಚಾ ಮೊರ್ನಾಕ್ ಕವಿಂಚಾ ಅತ್ಮ್ಯಾಂಕ್ ಆಪವ್ನ್ ತರೀ ಕವಿ ಬಾಬ್ ವಲ್ಲಿ ಕ್ವಾಡ್ರಸಾಕ್ ತೆಂ ಕಿತ್ಲೆಂ ಧಯ್ರ್? ತ್ಚಾ ಕವಿತಾ ತಾಂಕಿಚೆಂ ಸವಾಲ್ ಪೆಲ್ಯಾನ್ ಆಸೊಂ!)
ಆತಾಂ ಡೊ. ಕಂಬಾರಾಚಾ ಪೆಟ್ಯಾಕ್ ಆನಿ ಕ್ವಾಡ್ರಸಾಚಾ ಪೆಟ್ಯಾಕ್ ಆಸ್ಚೊ ಫರಕ್ ಆನಿ ತಾಳ್ಮೇಳ್ ಪಳೆವ್ಯಾಂ ಡೊ. ಕಂಬಾರಚೊ ಪೆಟೊ ಕ್ವಾಡ್ರಸಾಚಾ ಪೆಟ್ಯಾಪರಿಂ ಶೋಶಿತ್ಚ್ಚ್. ಆನಿ ಭೋವ್ಶಾ ತೊಯೀ ಸಾವ್ಕಾರಾಚಾ ಗುಲಾಮ್ಪಣಾಂತ್ಲೆಂ ಸುಟೊಂಕ್ ಆಶೆತಾಲೊ ಜಾವ್ಯೆತ್. ಪುಣ್ ತಾಕಾ ಕಾರಾಣ್ ಜಾಲ್ಲೆಂ ಸಾವಂತ್ರಿ ಆನಿ ತಾಚೊ ಮೋಗ್ ಕ್ವಾಡ್ರಸಾಚಾ
ಪೆಟ್ಯಾಕ್?
’ಕಿತ್ಲ್ಯಾ ವಿಶ್ವಾಸಾನ್ ದೀಸ್ ಕಾಡ್ಲ್ಲೆ ಆಸ್ಯೆತ್
ಹ್ಯಾ ಪೆಟ್ಯಾನ್ಯೀ
ಜಾಗೊಚ್ ರಾವೊನ್ ದೀಸ್ರಾತ್ ಪಾರೊತ್ ಕರುನ್
ಪರ್ಕ್ಯಾಂಕ್ ಘೊಂಕುನ್
ಅಪ್ಲ್ಯಾಂಕ್ ಕಿತ್ಲೆಪಾವ್ಟಿಂ ಶಿಮ್ಟಿ ಹಾಲಯಿಲ್ಲಿ ಜಾವ್ಯೆತ್?
ಲೆಂವ್ಟಿಂ ಹಾಡಾಂ ಚಿಂವೊನ್ ಗೊಬ್ರಾರ್ ಲೊಳೊನ್
ಆವ್ಕ್ ಸಂಪಯಿಲ್ಲೆಂ ತಾಣೆಂ’ (ದರ್ಭಾರಾಂತ್ಲಿ ಪಿಂರ್ಗೊಣ್, ಪಾನ್:
55)
ಡೊ. ಕಂಬಾರಾಚಾ ಪೆಟ್ಯಾಕ್ಯೀ, ಕ್ವಾಡ್ರಸಾ ಪೆಟ್ಯಾಕ್ಯೀ ಧನ್ಯಾಂಚಾ ಕ್ರೂರ್ಪಣಾ ಥಾವ್ನ್, ಶೋಷಣಾಥಾವ್ನ್ ಸುಟ್ಕಾ ಮೆಳ್ಟಾ. ಸಬ್ಧಿಕ್ ಅರ್ಥಾತ್ ಲಾಭ್ಚಿ ಹಿ ಸುಟ್ಕಾ ದೊನೀಂ ಪೆಟ್ಯಾಂಕ್ ವಯ್ಲ್ಯಾಬಾರ್ ಏಕ್ ಸಾರ್ಕಿ ಮ್ಹಣ್ ಭೊಗ್ಲ್ಯಾರೀ ತಾಂತುಂ ಮೊಟೊ ಆನಿ ಮಹತ್ವಾಚೊ ಫರಕ್ ಆಸಾ. ಕಂಬಾರಾಚೊ ಪೆಟೊ ಧನ್ಯಾಚಾ ಕ್ರೂರ್ಪಣಾ ಥಾವ್ನ್ ಶೋಷಿತಾ ಥಾವ್ನ್ ಸೊಟೊನ್ ಆಪ್ಲ್ಯಾ ಸಪ್ಣಾಂ ಸಂಗಿಂ ಫುಡಾರಾಚಾ ಜಿಣ್ಯೆಂತ್ ಮೆಳ್ತಾ. ಪುಣ್ ಕ್ವಾಡ್ರಸಾಚೊ ಪೆಟೊ?
ತೋ ಆಮ್ಕಾಂ ಕವಿತೆಂತ್ ಮೆಳ್ಟೊಚ್ ವಾ ತಾಚೆಂ ದರ್ಶನ್ ಜಾಂವ್ಚೆಂಚ್ ಮೊಡೆಂ ಜಾವ್ನ್. ತೆಂಯೀ ಕಶೆಂ? ’ಆನ್ಕಿಟ್ಯೊ ಚಿರೊನ್ ರಗಾತ್ ವ್ಹಾಳೊನ್ (ರಗಾತ್ ಮ್ಹಳ್ಯಾರ್ ಕ್ರಾಂತಿ ಜಾಯ್ಜಯ್ ಮ್ಹಣ್ ನಾ
ನ್ಹಯ್ವೆ?) ಕಂಬಾರಾಚ್ಯಾ ಪೆಟ್ಯಾಚಿ ಸುಟ್ಕಾ ಜಾಯ್ತ್ ತರ್ ವಲ್ಲಿ ಕ್ವಾಡ್ರಸಾಚಾ ಪೆಟ್ಯಾಚಿ ಸುಟ್ಕಾ ಸಲ್ವಣೆಚಿ, ನಿರ್ಶೆಚಿ. ಡೊ. ಕಂಬಾರಾಚೊ ಪೆಟೊ ಗುಲಾಮ್ಪಣಾಂತ್ಲೊ ಸುಟ್ಲೊ ತರ್ ಕ್ವಾಡ್ರಸಾಚೊ ಪೆಟೊ ಮಾಡ್ತಿರ್ ಮೆಲೊ. ಅಶೆಂ ಕಿತ್ಯಾಕ್? ಡೊ. ಕಂಬಾರಾನ್ ನಾಟಕ್ ಬರವ್ನ್ ವರ್ಸಾಂ ಜಾಲಿಂ. ವಲ್ಲಿಚಿ ಕವಿತಾ ಆಯ್ಚಿ. ಆಸೊಂ.
ಆತಾಂ ಉಟ್ತಾ ಸವಾಲ್ - ಕ್ವಾಡ್ರಸಾಚೊ ಪೆಟೊ ಮೆಲೊ ತರೀ ಕಶೆಂ? ಹಾಕಾ ಜಾಪ್ ಸೊಧ್ಚಿ ಕವಿತಾ (ಕವಿತಾ ಮ್ಹಳ್ಯಾರ್ ಕಿತೆಂ ಹಾಚಿ ಜಾಪ್ಯ್ ಹಿಚ್ಚ್). ಹಿ ಕವಿತೆಚಿ ಸೊಭಾಯ್ ಆನಿ ಶಿರ್ಯ್ ವ್ಹಯ್. ಆಧುನಿಕ್ ಕೊಂಕ್ಣಿ ಕಾವ್ಯಾಂತ್ ಭೋವ್ ಸಾದಿ, ಸಂಪಿ, ಸರಳ್ ಮ್ಹಣ್ ದಿಸ್ಚಿ ಕವಿತಾ ಮ್ಹಾಕಾ ’ಅಧ್ಭುತ್’ ಮ್ಹಣ್ ಭೊಗ್ತಾ ಹ್ಯಾಚ್ಚ್ ಕಾರಣಾಕ್.
ಹಾಂವ್ ತರೀ ಕವಿತಾ ಜಾಪಿ ದಿಂವ್ಚ್ಯಾಂತ್ ನ್ಹಯ್ ಸೊಧ್ಚ್ಯಾಂತ್ ಆಸಾ ಮ್ಹಣ್ ಎಕೀನ್ಪಣಿಂ ಮಾಂಧ್ತಾಂ. ತಶೆಂ ಕವಿ ಬಾಬ್ ವಲ್ಲಿ ಕ್ವಾಡ್ರಸಾಕೀ ಭೊಗ್ತಾ. ’ಹಾಂವ್ ಜಾಪಿ ಆಯ್ಕೊಂವ್ಚ್ಯಾಕೀ ಜಾಪಿ ಸೊಧ್ಚಾಂತ್ ಚಡ್ ಸಂತುಶ್ಟ್ ಜಾತಾಂ!’ (ದರ್ಭಾರಾಂತ್ಲಿ ಪಿಂರ್ಗೊಣ್, ಪಾನ್: 9). ಅಶೆಂ ತೊ ಬರಯ್ತಾ. ಜಾಲ್ಯಾರ್ಯೀ ವಲ್ಲಿ ಕ್ವಾಡ್ರಸಾಚೊ ಆತಾಂಚೊ ಪೆಟೊ ಕಸೊ ಮೆಲೊ ತಾಚಿ ಜಾಪ್ ಖುದ್ದ್ ವಲ್ಲಿಕಡೆ ನಾ, ತಸೆಂ ಆಧ್ಲೆ ಪೆಟೆ (ವ್ಹಯ್! ಅಶೆಂ ಮೆಲ್ಲೊ ಹೊ ಕಾಂಯ್ ವಲ್ಲಿಚೊ ಪಯ್ಲೊ ಪೆಟೊ ನ್ಹಯ್.
ವಲ್ಲಿಚಾ ಕವಿತೆಂತ್ ನಾಂವ್ ಭಾರಿಕಾಯೆನ್ ಪಳೆಲ್ಯಾರ್ ’ಅನ್ಯೇಕ್ ಪೆಟೊ ಮೆಲಾ ಪಳೆ’ - ಹೆಂ ಅದಿಂಯೀ ತಾಚೆ ಜಾಯ್ತೆ ಪೆಟೆ ಅಶೆಂಚ್ ಮೆಲ್ಯಾತ್ ಜಾಂವ್ಕ್ ಪುರೊ. ಅಶೆಂಚ್ ರಸ್ತ್ಯಾರ್ ರಗಾತ್ ವ್ಹಾಳವ್ನ್ ಸಮಾಜಿಕ್ ಕ್ರಾಂತಿ ಕಾಂಯ್ ಎಕಾ ಪೆಟ್ಯಾಚ್ಯಾ ರಗ್ತಾಂತ್ ಜಾಂವ್ಕ್ ಸಾಧ್ಯ್ ನಾ. ತಾಕಾ ಹಜಾರ್ ಪೆಟ್ಯಾಂಚೆಂ ರಗಾತ್ ಜಾಯ್.
ಪೆಟೊ ವಲ್ಲಿ ಕ್ವಾಡ್ರಸಾಚೊ ರಾಜ್ ರಸ್ತ್ಯಾರ್ ಅನ್ಕಿಟಿ ಚಿರೊನ್ ರಗಾತ್ ವ್ಹಾಳೊನ್ ಮೆಲ್ಲಿ ರೀತ್ ಪಳೆತಾನಾ ತಾಕಾ ಕೊಣೆಂ ಸುರಿ ಘಾಲ್ನ್ ಜಿವೆಶಿಂ ಮಾರ್ಲೊ? ಕೊಣಾಚಾ ಗಾಡಿಯೆ ಪಂದಾ ಅಕಸ್ಮಿಕ್ ಪಡ್ಲೊ? ವ ತಾಕಾ ಜಾಯ್ ಮ್ಹಣ್ ಗಾಡಿಯೆ ಪಂದಾ ಘಾಲೊ? ವ ಕೊಣೆಂ ಮಾರ್ನ್ ಹಾಡ್ನ್ ಹಾಂಗಾ ಉಡಯ್ಲೊ? ಹ್ಯಾ ಸವಲಾಂಕ್ ಜಾಪಿ ಕವಿತೆಚೊ ನಾಯಕ್ ದೀನಾ. ದಿಂವ್ಚೆಂ ತಾಚೆಂ ಕಾಮ್ಯ್
ನ್ಹಯ್. ಪುಣ್ ಪರೋಕ್ಶ್ ಥರಾನ್ ದುಭಾವಾಚಿ ಏಕ್ ಸುವಿ ಧನ್ಯಾಂಚೆರ್ ಆನಿ ಹಾರಾಮಿ ಮಾಜ್ರಾಚೆರ್ ತೊಪುನ್
ಸೊಡ್ತಾ.
’ಚೊರಿ ಕರ್ಚಾ ಮಾಜ್ರಾಕ್ ಖಾಟಿಯೆರ್ ನಿದಾವ್ನ್
ಬಾದೂರ್ ಪೆಟ್ಯಾಕ್ ಭಾಯ್ರ್ ಘಾಲುನ್
ಭಿತರ್ ಲಿಲ್ಪೊನ್ ತಮಾಸೊ ಚೊಯ್ತಾತ್ ಪಳೆ
ಪಾಲಂವಾಕ್ ಧರುನ್, ವೊಲಿಂಕ್ ಗುಟ್ಲಾವ್ನ್
ಹೆ ಸ್ವಪ್ಣಾಂನಿ ಖೆಳಿಂ ಖಾತೆಲಿ’ (ದರ್ಭಾರಾಂತ್ಲಿ ಪಿಂರ್ಗೊಣ್: ಪಾನ್:55)
ದೀಸ್ ರಾತ್ ಜಾಗೊ ರಾವೊನ್, ಪರ್ಕ್ಯಾಂಕ್ ಘೊಂಕುನ್, ಅಪ್ಲ್ಯಾಂಕ್ ಶಿಮ್ಟಿ ಹಾಲವ್ನ್, ಲೆಂವ್ಟಿಂ ಹಾಡಾಂ ಚಿಂವೊನ್, ಗೊಬ್ರಾಂತ್ ಲೊಳೊನ್, ನೀಯತ್ತೆನ್ ಆನಿ ವಿಶ್ವಾಸೆನ್ ಆಸ್ಚ್ಯಾ ಬಾದೂರ್ ಪೆಟ್ಯಾಕ್ ಭಾಯ್ರ್ ಘಾಲ್ನ್ ಚೊಟ್ಟ್ಯಾ ಹರಾಮಿ ಮಾಜ್ರಾಕ್ ಖಾಟಿಯೆರ್ ನಿದಾವ್ನ್, ಪಾಲಂವ್ ಧರ್ನ್ (ಆತಾಂ ಪಾಲಂವ್ ಖಂಯ್ ಆಸಾತ್ - ಸಗ್ಳೆ ನಾಯ್ಟಿ!) ವೊಲಿಂನಿ ರಿಗೊನ್ ಸ್ವಪ್ಣಾಂನಿ ಖೆಳಿಂ ಖಾವ್ನ್ ತಮಾಸೊ ಪಳೆಂವ್ಚಾ ಧನ್ಯಾಂಚಾ ಕ್ರೂರ್ಪಣಾಚೆರ್ ಕವಿ ವಲ್ಲಿಕ್ ಕಾಂಠಾಳೊ, ಶಿಣ್! ಪುಣ್ ಕ್ವಾಡ್ರಸಾಚಾ ಪೆಟ್ಯಾಕ್? ಕವಿತೆಂತ್ ತೊ ’ಆಮ್ಕಾಂ’ ಮೆಳ್ಚೊಚ್ ಮೊರೊನ್ ಮೊಡೆಂ ಜಾವ್ನ್.
’ಕಿತ್ಲ್ಯಾ ವಿಶ್ವಾಸಾನ್ ದೀಸ್ ಕಾಡ್ಲ್ಲೆ ಆಸ್ಯೆತ್ ಹ್ಯಾ ಪೆಟ್ಯಾನ್ಯೀ’
ಹಾಂಗಾಯೀ ನಿಸ್ಚಿತ್ ನಾ, ವಿಶ್ವಾಸಾಚೆರ್ಯೀ ದುಭಾವ್. ಹಾಚಾ ಆಧ್ಲ್ಯಾ ಪೆಟ್ಯಾಂಚೆರ್ಯೀ ಭಿರ್ಮತ್! ಹ್ಯಾ ಕವಿತೆಚಾ ನಾಯಕಾಚೊ ಹೇತು ತರ್ಯೀ ಕಿತೆಂ? ಡೊ. ಕಂಬಾರಾಚಾ ಪೆಟ್ಯಾಕ್ ಸಾವ್ಕಾರಾಚೆರ್ ಶಿಣ್ ನಾತ್ಲ್ಲೊ. ವಾ ತಸೆಂ ನಾಟಕಾಂಚಾ ಲಾಂಭಾಯೆಕೀ ಆಮ್ಕಾಂ ಭೊಗಾನಾ, ಹಾಕಾ ತೊ ಶೋಷಿತ್ ಮ್ಹಳ್ಳಿ ಮುಳಾವಿ ಜಾಣ್ವಾಯ್ಚ್ ತಾಕಾ ನಾತ್ಲ್ಲಿ - ಅಶೆಂಯೀ ಕಾರಣ್ ಆಸ್ಯೆತ್. ದೆಖುನ್ ತೊ ಸಾವ್ಕಾರಾಕ್ ಗೌರವಾನ್ ಪಳೆತಾಲೊ. ಸಾವಂತ್ರಿ ಸಾಂಗಾತಾ ಮೊಗಾಂತ್ ಪೊಳಾಪಳ್ ಘೆಂವ್ಕ್ಯೀ ತಾಕಾ ಕಾವ್ಜೆಣಿಚ್ ಭೊಗ್ತಾಲಿ. ಪುಣ್ ’ಸುಟ್ಕಾ’ ಕ್ವಾಡ್ರಸಾಚಾ ಪೆಟ್ಯಾಕೀ ಕಂಬಾರಾಚಾ ಪೆಟ್ಯಾಕೀ ಮೆಳ್ಟಾ. ವೆವೆಗ್ಳಿಚ್ಚ್ ಜಾಲ್ಯಾರೀ ಕಶಿ? ಕ್ವಾಡ್ರಸಾಚ್ಯಾ ಪೆಟ್ಯಾಕ್?
’ಆಪ್ಲ್ಯಾ ಕುಡಿಂತ್ಲ್ಯಾ ತಾಂಬ್ಡ್ಯಾ ರಗ್ತಾಕ್ ವ್ಹಾಳವ್ನ್’
ರಗಾತ್ (ತಾಂಬ್ಡೆಂ) ವ್ಹ್ಳಾನಾಸ್ತಾನಾ ’ಕ್ರಾಂತಿ’ ಮ್ಹಣ್ಜೆ ಬದ್ಲಾವಣ್ ಸಾಧ್ಯ್ ಜಾಯ್ನಾಂ. ಪುಣ್ ಸುಶೆಗಾತ್ ಪಾಶಾರ್ ಜಾಂವ್ಚ್ಯಾ ದೊಳೆ, ಅತ್ಮೊ, ಜೀವ್, ಮತ್ ಸಯ್ತ್ ನಾತ್ಲ್ಲ್ಯಾ ಮನ್ಶಾಂ ಮಧೆಂಯೀ ತಿ ಜಾಯ್ಜೆ ಮ್ಹಳ್ಳೆಂ ಸಟ್ ಕವಿಕ್ ಮಾತ್ ಪುರೊಗಿ? ಸುಶೆಗಾತ್ ಪಾಶಾರ್ ಜಾಂವ್ಚೊ ಲೋಕ್ ಕ್ವಾಡ್ರಸಾಚೊ ಪೆಟೊ ಮೆಲ್ಯಾರ್ ಕಿತ್ಯಾಕ್ ವಿಚಾರ್ತಾ?
’ಕವಿಂಚ್ ಅತ್ಮ್ಯಾಂಚೊ ವ್ಹೊರ್ ಪಳೆ
ಭಂವ್ತೊಣಿಂ ರಾವೊನ್ ಬೊಬಾಟ್ ಘಾಲ್ತಾತ್’ (ದರ್ಭಾರಾಂತ್ಲಿ ಪಿಂರ್ಗೊಣ್, ಪಾನ್:
55)
ಸುಶೆಗಾತ್ ಪಾಶಾರ್ ಜಾವ್ನ್ ವೆಚಾ ಲೊಕಾಕ್ ’ಕ್ರಾಂತಿ’ ಆನಿ ತಾಚಿ ’ಪಡ್ಸಾದ್’ ಕೆದ್ನಾಂಯ್ ದಿಶ್ಟಿಕ್ ಪಡಾನಾ. ತೊ ದಿಸ್ಚೊ ಕವಿ ದಿಶ್ಟಿಕ್ (ಅತ್ಮ್ಯಾಂಕ್) ಮಾತ್. ದೆಖುನ್ ತೆ ಏಕ್ ನ್ಹಯ್, ದೊನ್ ನ್ಹಯ್ ಹಜಾರಾಂನಿ (ವ್ಹೊರ್) ಜಮ್ಲ್ಯಾತ್. ಪುಣ್ ತಾಂಚಿ ಬೋಬ್ ಮಾತ್ ಭಿಲ್ಕುಲ್ ನಿರ್ಫಳ್, ನಿರ್ಶೆಚಿ.
’ಹಾಂಗಾ ಕ್ರಾಂತಿ ಜಾಂವ್ಚೆಪರಿಂಚ್ ನಾ
ಕ್ರಾಂತೆಚೆ ಹಾಂಗಾ ಪೋಟ್ ಫುಟೊನ್
ಅನ್ಕಿಟ್ಯೊ ಚಿರೊನ್ ಉದಾರೆಚ್ಚ್ ಪಡೊನ್
ಹೆಂ ರಂಗ್ಮಂಚ್ ಸಾಂಡುನ್ ಗೆಲ್ಯಾತ್’ (ದರ್ಭಾರಾಂತ್ಲಿ ಪಿಂರ್ಗೊಣ್, ಪಾನ್:
55)
ಹಾಂಗಾ ಕವಿತೆಚೆಂ ರೂಪಕ್ ಆಪ್ಲೆಂ ಸ್ಪಶ್ಟ್ ದರ್ಶನ್ ದಿತಾ. ಅನ್ಯೇಕ್ ತಾಳ್ಮೇಳ್. ಜಶೆಂ ಕಂಬಾರಾಚೊ ಪೆಟೊ ’ಕ್ರಾಂತಿ’ ಜಾವ್ನ್ ಜಿಕ್ತಾಗೀ ತಶೆಂ ಕ್ವಾಡ್ರಸಾಚೊ ಪೆಟೊ ಆಶಾವಾದಿ! ಜಯ್ತೆವಂತ್!! ಕ್ವಾಡ್ರಸಾಚೊ ಪೆಟೊ ಹಾಂಗಾ ಕ್ರಾಂತಿ ಸಾಧ್ಯ್ಚ್ ನಾ ಮ್ಹಣ್ಚೆ ತಿತ್ಲೊ ನಿರಾಶಾವಾದಿ! (ಹೆ ಕವಿತೆಚೊ ಬೂಕ್ ಛಾಪ್ಲ್ಲೆಂ ಪ್ರಕಾಶನ್ - ಆಶಾವಾದಿ!) ದೆಕುನ್ಂಚ್ ಜ್ಯಾ ಸಮಾಜೆಂತ್ ತಾಣೆಂ ಕ್ರಾಂತಿ ಯೆವ್ಜಿಲ್ಲಿಗೀ ತಿ ಸಮಾಜ್ (ರಂಗ್ಮಂಚ್) ತೊ ಸಾಂಡುನ್ ವೆತಾ, ವಚಾಜಯ್ ಪಡ್ಟಾ, ವ ತಾಕಾ ಸಮಾಜ್ಚ್ ಮೆಳೊನ್ ಲಘಾಡ್ ಕಾಡ್ತಾ? ಕ್ರಾಂತಿ ಖಿಮ್ಚುನ್ ಉಡಯ್ತಾ...?
ಆತಾಂ.. ಮೆಲ್ಲ್ಯಾ ಕ್ವಾಡ್ರಸಾಚಾ ಪೆಟ್ಯಾಚೆಂ ಕಿತೆಂ ಜಾಲೆಂ? ತಾಚಿ ಜಾಪ್ ವಲ್ಲಿ ದೀನಾ. ಪುಣ್ ಕಂಬಾರಾಚೊ ಪೆಟೊ ಮನಿಸ್ ಜಾವ್ನ್ ಸಾವಂತ್ರಿಕಡೆ ಕಾಜಾರ್ ಜಾವ್ನ್ ಸುಕಾಂತ್ ಜಿಯೆಲೊ ಜಾವ್ಯೆತ್ ಅಶೆಂ ಚಿಂತುಂಕ್ ಆನಿ ಪಾತ್ಯೆಂವ್ಕ್ ನಾಟಕಾಂತ್ ಧಾರಾಳ್ ಆವ್ಕಾಸ್ ಆಸಾತ್. ಕಂಬಾರಾಚಾ ಪೆಟ್ಯಾಚಿ ಸುಟ್ಕಾ ಅರ್ಥಾಪೂರ್ಣ್ ಜಾತಾನಾ ಕ್ವಾಡ್ರಸಾಚಾ ಪೆಟ್ಯಾಚಿ ಮುಕ್ತಿ ಸಯ್ತ್ ಗೂಂಡ್ ಜಾವ್ನ್ ವೆತಾ. ಕಿತೆಂ ಜಾಲೆಂ ಹ್ಯಾ ಮೆಲ್ಲ್ಯಾ
ಪೆಟ್ಯಾಚೆಂ?
’ಕೊಣೆಂಯ್ ವಿಚಾರ್ಲೆಂಚ್ ನಾ ಪಳೆ’
ಹಾಂವ್ ವಿಚಾರ್ಚೆಂ ಧರ್ಯ್ ಕರ್ತಾಂ. ಕಿತೆಂ ಜಾಲೆಂ ಹ್ಯಾ ಮೆಲ್ಲ್ಯಾ ಪೆಟ್ಯಾಚೆಂ? (ಜಾಪಿಂತ್ ಅನ್ಯೇಕ್ ಕವಿತಾ ನಾಕಾ!) ಆಸೊಂ.
ಭರ್ವಶ್ಯಾಕ್ ಆನಿ ವಿಶ್ವಾಸಾಕ್ ಪೆಟೊ ರೂಪಕ್. (As faithful as dog
ಅಶೆಂ ಮ್ಹಣ್ಚೆಂ ಆಸಾ.) ಪುಣ್ ತೊ ತಿತ್ಲೊಚ್ಚ್ ಶೋಷಿತ್. ಸಿಂಡಿಕೇಟ್ ಬ್ಯಾಂಕಾಚೊ ಘುರ್ತ್ಚ್ ವಿಶ್ವಾಸಿ ಪೆಟೊ.
HMV ಂತ್ ಸಯ್ತ್ ಪೆಟೊ ಆಸಾ. ಜಾಯ್ತ್ಯಾ ಹಿಂದಿ ಪಿಂತುರಾಂನಿ ಹೀರೊ ಸಯ್ತ್ ಜಾಲ್ಲೊ ಆಸಾ ಪೆಟೊ. ನಿಯತ್ತೆಚೊ ಪೆಟೊ ಕ್ವಾಡ್ರಸಾಕೀ ಕಂಬಾರಾಕೀ ವೆವೆಗ್ಳ್ಯಾ ರುಪಾಂನಿ ಶೋಷಿತ್ ತಶೆಂ ಸುಟ್ಕೆಕ್ ಉಲಂವ್ಚೊ ದಿಸ್ಲೊ.
ಆಧುನಿಕ್ ಕೊಂಕ್ಣಿ ಕಾವ್ಯಾಂತ್ ’ಉತ್ರೊಣ್’ ನಾ ಮ್ಹಣ್ ಹಾಂವ್ ತರೀ ಭಿತರ್ಲೆ ಭಿತರ್ ಕಳ್ವಳ್ತಾಲೊಂ. ಬಾಬ್ ವಲ್ಲಿ ಕ್ವಾಡ್ರಸಾಚೊ ನವೊ ಬೂಕ್ ’ದರ್ಭಾರಾಂತ್ಲಿ ಪಿಂರ್ಗೊಣ್’ ಹಾಂತ್ಲಿಂ ಥೊಡಿಂ ಕವಿತಾ ತರೀ (ಥೊಡಿಂಚ್) ಮ್ಹಜೆ ಅಕ್ಲಾಸ್ ನಿವಯ್ತಾತ್. ತಾಚೆರ್ ಆನಿ ತಾಚಾ ಬರ್ಪಾಂಚೆರ್ ಹೆರ್ ಭಾಸಾಂಚಾ ಸಾಹಿತ್ಯಾಚೊ ಪ್ರತ್ಯೇಕ್ ಥರಾನ್ ನವ್ಯೋತ್ತರ್ ಸಾಹಿತಾಚೊ ಪ್ರಭಾವ್ ಅಸೊಂಕ್ಯೀ
ಪುರೊ.
’ಜಿಣಿಂಚ್ ಆಮ್ಕಾಂ ಸಮ್ಜಾನಾ ತರ್ ಕವಿತಾ ಕಶಿ ಸಮ್ಜಂವ್ಚಿ?’
ಅಶೆಂ ಚಿಂತ್ಚ್ಯಾ ತಾಣೆಂ ಹ್ಯಾ ಸಂಗ್ರಹಾಂತ್ ಕೊಂಕ್ಣಿ ಕಾವ್ಯಾಂತ್ ಲಾಂಬ್ ತೇಂಪ್ ಉಡಾಸಾಂತ್ ಉರ್ಚೆ ತಸಲೆಂ ಥೊಡೆ ಮಹತ್ವಾಚೆ ಕವಿತಾ ದಿಲ್ಯಾತ್. ದಾಖ್ಲೊ:
ಪರತ್ ಪರತ್ (ಪಾನ್:17),
ಕಾಜುಲ್ಯಾಚಿಂ ಸ್ವಪ್ಣಾಂ (ಪಾನ್:31),
ಮೊನೊ ಖಾಂಬೊ (ಪಾನ್:63).
ಪುತ್ಳಿ (ಪಾನ್:48)
ಆನಿ ಕಿಡೆರೆ ಆಮಿ (ಪಾನ್:63).
ಹಾಂತ್ಲಿ ಮೊನೊ ಖಾಂಬೊ ಮ್ಹಜಾ ಕಾಳ್ಜಾಂತ್ ಮನಾಂತ್ ರೊಂಬೊನ್ ಗೆಲ್ಲಿ ಅನ್ಯೇಕ್ ಕವಿತಾ.
ಹ್ಯೇವಿಶಿಂ ಪರತ್ ಕೆದ್ನಾಂಯೀ ಸೊರ್ಕೆಲ್ಯಾರ್ ಅಶೆಂಚ್ ಬರವ್ನ್ ಕಾಡ್ಯೆತ್. ಪುಣ್ ಕಾಂಯ್ ಲೆಕಾಚಾ ಕವಿತೆಂನಿ ಅದ್ಭುತ್ ರುಪ್ಣಿಂ, ಇಮಾಜಿ, ದಿಲ್ಲ್ಯಾ ಕವಿ ಬಾಬ್ ವಲ್ಲಿನ್ ಇತ್ಲ್ಯಾಕ್ ರಾವ್ಲ್ಯಾರ್ ಭಿಲ್ಕುಲ್ ಆತ್ಮರತಿ ಜಾಯ್ತ್! ಕಿತ್ಯಾಕ್ ಹೊಗ್ಡಾವ್ನ್ ಜೊಡುಂಕ್ (ಅನ್ಭೋಗ್) ತಾಣೆಂ ಜಾಯ್ತೆಂ ಆಸಾ. ಕಾರಣ್ ಹ್ಯಾ ಜಮ್ಯಾಂತ್ ಹೆರ್ ಥೊಡೆ ಕವಿತಾ ಭಿಲ್ಕುಲ್ ಪಾತಳ್ ಅನ್ಭೋಗಾಂಚೆಂ, ಕಾವ್ಯಾ ಮಟ್ಟಾಚೆರ್ ಠಿಕಾನಾತ್ಲೆ ಕವಿತಾಚ್
ನ್ಹಯ್ ಮ್ಹಣ್ಯೆತ್ ಜಾಲ್ಲೆಯೀ ಆಸಾತ್. ಭರ್ವಶ್ಯಾಚೆ ಕವಿತಾ ದಿಂವ್ಚಿ ತಾಂಕ್ ಆಸ್ಚ್ಯಾ ಕವಿಂನಿ ಅಸಲೆ ಪಾತ್ಕಾಚೆ ಸಮಯೊ ಚುಕಯ್ಜೆ ಅಶೆಂ ಮ್ಹಜಿ ಖಾಲ್ತಿ ಅಭಿಪ್ರಾಯ್.
ನಿಮಾಣೊ ಶರೊ:
ಹಾಂವ್ ಡೊ. ಕಂಬಾರ ತಿತ್ಲೊ ಮಾಲ್ಘಡೊ ಬರವ್ಪಿಯೀ, ಬಾಬ್ ವಲ್ಲಿ ಕ್ವಾಡ್ರಸಾ ತಿತ್ಲೊ
ಜಾಂಟೊ, ವಿಶಾಲ್ ಅನ್ಭೋಗಿಯೀ ನ್ಹಯ್. ಆದಿಂಯೀ ಆತಾಂಯೀ ಮ್ಹಜ್ಯಾ ಬರ್ಪಾಂಚೆರ್ ದಾವ್ಯಾ ಚಿಂತ್ಪಾಚೊಚ್ ಪ್ರಭಾವ್ ಕಾಮ್ ಕರ್ತಾ. ಕೊಲೆಜಿಂತ್ ಶಿಕ್ತಾನಾ ದಾವ್ಯಾ ಚಿಂತ್ಪಾಚಾ ರಾಜಕೀಯ್ ಪಾಡ್ತೆಂನಿ, ಸಂಘಟನಾಂನಿ ಕಾಮ್ ಕೆಲ್ಲೆಂಯೀ ಹಾಕಾ ಕಾರಾಣ್ ಆಸ್ಯೆತ್- ಆಸೊಂ.
ಪೆಟ್ಯಾನ್ ವ ಸುಣ್ಯಾನ್ ಹ್ಯಾ ಬರವ್ಪ್ಯಾಂಕ್ ಕಶೆಂ ಮ್ಹ್ಕಾಯ್ ಸೊಡುಂಕ್ ನಾ. ಹೊಸ ದಿಗಂತಾ, ಸಾಹಿತ್ಯ ಸಾಪ್ತಾಹಿಕ
26 ಮಾಯ್
1991 ಂತ್ ಛಾಪೊನ್ ಆಯಿಲ್ಲಿ ಮ್ಹಜಿ ಕವಿತಾ ’ಶ್ವಾನ ವೃತ್ತಾಂತ’ ಂತ್ ಮ್ಹಜ್ಯಾ ಸುಣ್ಯಾಕ್ ಪಳೆಯಾಂ:
’ಜೀವಕ್ಕೆ ಜೀವ ಕೊಡುವ ಉತ್ಕೃಷ್ಟ ತಳಿಯೊಂದೊ
ಕಣ್ಣು ತೆರೆಯುವ ಮೊದಲೇ ಖರೀದಿಸಿ ತಂದು
ಮಂಚಕ್ಕೆ ಪ್ಲಾಸ್ಟಿಕ್ ಹಾಸಿ
ಪಕ್ಕದಲ್ಲಿ ಮಲಗಿಸಿ
ನಿಪ್ಪಲಿನಿಂದ ಹಾಲು ಕುಡಿಸಿರಲಿಲ್ಲವೆ ನೀವು?
ಕುತ್ತಿಗೆಗೆ ಬೆಳ್ಳಿಗೆಜ್ಜೆ ಕಟ್ಟಿ, ಮೊದಲ ಹುಟ್ಟು ಹಬ್ಬದ ದಿನ
ಮೊಂಬತ್ತಿ ಉಪ್ಪೆಂದು ಆರಿಸಿ ಕೇಕು ಕತ್ತರಿಸಿ
ಹಂಚಲಿಲ್ಲವೆ ನೀವು?
ಗೇಟಿನಲ್ಲಿ ’ನಾಯಿಯಿದೆ ಎಚ್ಚರಿಕೆ’ ಎಂಬ ಫಲಕ ಹಾಕಿ
ಅದರ ಹಿಂದೆ ನಿಂತು ನಗಲಿಲ್ಲವೇ ನೀವು?
ಸಂಜೆ ತಿರುಗಾಟಕ್ಕೆ ಮಾರುತಿಯಲ್ಲಿ ಒಟ್ಟಿಗೇ
ಕಡಲ ಕಿನಾರೆಗೆ ಹೋಗಿ ಬರಲಿಲ್ಲವೇ ನೀವು?
ಮೊನ್ನೆ ಅದು, ಬಾಯ್ತುಂಬಾ ಜೊಲ್ಲು ಸುರಿಸುತ್ತಾ
ಕಣ್ಣು ಕಾಣದೇ ಮನೆ ತುಂಬಾ ಓಡಿಸಿ
ಹೆಂಡೆಂದು ನೀರಿಗೆ ಬಿದ್ದು ಸತ್ತಾಗ
ವೈದ್ಯರಲ್ಲಿಗೆ ಓಡಿ, ಅದಕ್ಕೇ ರೇಬಿಸಾಗಿತ್ತೆಂದು
ಹೊಕ್ಕುಳಿಗೆ ಇಂಜೆಕ್ಶನ್ ಚುಚ್ಚುಸಿಕೊಳ್ಳಲು
ಎಷ್ಟು ಒದ್ದಾಡಿರಿ ನೀವು’ (ಹೊಸ ದಿಗಂತ - ಸಾಹಿತ್ಯ ಸಾಪ್ತಾಹಿಕ:
26 ಮಾಯ್
1991, ಪಾನ್:2)
ಹ್ಯಾ ಕವಿತೆಂತ್ ಕಾಂಯ್ ವಿಶೇಸ್ ಚಿಂತಾಪ್ ನಾ. ಮ್ಹಜ್ಯಾ ಸುರ್ವಿಲ್ಲ್ಯಾ ದಿಸಾಚೆಂ ಸಾದೆಂ ಚಿಂತಾಪ್. ಹಾಂಗಾ ’ತುಮಿ’ ಮ್ಹಳ್ಯಾರ್ ಸಮಾಜ್. ’ಸುಣೆಂ’ ಮ್ಹಳ್ಯಾರ್ ಭಂಡ್ವಾಳ್ಶಾಹೀ ವ ’ಬುಶ್ಟ್ಯಾ ವೆವಸ್ಥಾ’ ಸಮಾಜ್ ಅಂಧ್ಕಾರಾಂತ್ ಬುಶ್ಟ್ಯಾ ವೆವಸ್ತೆಕ್ ಕೊಂಡಾಡ್ಯಾನ್ ಪೊಸ್ತಾ. ತರೀ ಕಾಮೆಲ್ಯಾಂಕ್ ಆನಿ ನಿಮ್ನ್ ವರ್ಗಾಚಾ ಲೊಕಾಕ್ ಸರಾಕಾಪರಿಂ ದೆಖ್ಚಿಂ, ವ್ಹಾಪಾರ್ಚಿ ವೆವಸ್ತಾ ಚಡ್ ತೇಂಪ್ ಠಿಕಾನಾ. ಕೆದ್ನಾಂ ನ್ಹಂ ಕೆದ್ನಾಂ ತಿ ಕುಸ್ಕಾತಾ, ಮ್ಹಣ್ಜೆ ಸುಣ್ಯಾಕ್ ರೇಬಿಸ್ ಲಾಗ್ತಾ. ’ಕ್ರಾಂತಿ’ ಜಾತಾ. ಮಾಗಿರ್ ಸಮಾಜ್ ತರೀ ವರ್ಗ್ ಅಸಮಾನತಾ ನಾತ್ಲ್ಲಿ ಏಕ್ ನವಿ ವೆವಸ್ತಾ ಬಾಂಧುಂಕ್ ’ಇಂಜೆಕ್ಶನಾಂ’ ಬೊಂಬ್ಲೆಕ್ (ಮ್ಹಳಾರ್) ಘೆಂವ್ಕ್ ಕಿತ್ಲೆಂ ವೊದ್ದಾಡ್ತಾ?
ಹಿ ಕವಿತಾ ಬರಯ್ತಾನಾ ಹಾಂವ್ ಕಾಂಯ್ ವೀಸ್ ವರ್ಸಾಂಚೊ. ತರ್ನಾಟ್ಪಣಾಚೆಂ ಚಿಂತಾಪ್ಯೀ ತಿತ್ಲೆಂಚ್. ಪಾತಳ್. ಪುಣ್ ವಿಶೇಸ್ ಮ್ಹಳ್ಯಾರ್ ಹಿ ಕವಿತಾ ಛಾಪೊನ್ ಆಯಿಲ್ಲೆ ಪೇಪರ್ ಮಾತ್ರ್ ’ಸಂಗ್ ಪರಿವಾರಾಚೆಂ’.
ಆತಾಂ ಚಡುಣೆಂ ಪಂದ್ರಾ ವರ್ಸಾಂ ಉಪ್ರಾಂತ್ ಬಾಬ್ ವಲ್ಲಿಚಿ ಅನ್ಯೇಕ್ ಪೆಟ್ಯಾಚಿ ಕವಿತಾ ವಾಚುನ್ ಮ್ಹಾಕಾ ಡೊ. ಚಂದ್ರ ಶೇಖರ ಕಂಬಾರಾಚೊ ನಾಟಕ್ಯೀ, ಮ್ಹಜಿಚ್ಚ್ ಕವಿತಾಯೀ ಉಡಾಸ್ ಆಯಿಲ್ಲಿ ಕೇವಲ್ ಆಕಸ್ಮಿಕ್
ನ್ಹಯ್. ಮ್ಹಜ್ಯಾ ಕಾನಡಿ ಕವಿತೆಪರಿಂ ವಲ್ಲಿಚಾ ಕವಿತೆಂತೀ ವರ್ಗ್ ಅಸಮಾನತಾ ಶೋಷಣ್ ಆಸ್ಚಿ ಭಂಡ್ವಾಳ್ಶಾಹೀ ಸಮಾಜ್ ವೆವಸ್ಥಾ ಆಸಾ, ನಿಷ್ಕ್ರಿಯ್, ಹಿಜ್ಡೊ ಸುಶೆಗಾತ್ ಪಾಶಾರ್ ಜಾಂವ್ಚೊ ಲೋಕ್ ಆಸಾ. ಆನಿ ರಗ್ತಾಚಿ ಕ್ರಾಂತಿ ಆಸಾ, ಪುಣ್..
ಸುಣ್ಯಾಕ್ ಹಾವೆಂ, ಡೊ. ಚಂದ್ರಶೇಖರ ಕಂಬಾರನ್ ಆನಿ ಬಾಬ್ ವಲ್ಲಿನ್ ಪಳೆಂವ್ಚಿ ರೀತ್ ಮಾತ್ ವೆವೆಗ್ಳಿ. ದೆಖುನ್ ಆಮ್ಚಿಂ ರುಪ್ಣಿಂಯ್ ವೆವೆಗ್ಳಿಂಚ್!!
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
