ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್
ಕಥಾಪಾಠ್ - 1
ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ.
ಬೂಕ್: ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ.
ಲೇಖಕ್: ವಲ್ಲಿ ಕ್ವಾಡ್ರಸ್, ಅಜೆಕಾರ್.
ಪ್ರಸ್ತಾವನ್: ಮಿಕ್ಮ್ಯಾಕ್ಸ್.
ಪ್ರಕಾಶಕ್: - ಆಶಾವಾದಿ ಪ್ರಕಾಶನ್
ಮುಖ್ಪಾನ್: ಎಡ್ಡಿ ಸಿಕೇರ್, ಖತಾರ್.
ವಿಮರ್ಶ್ಯಾ/ಸಮೀಕ್ಶಾ/ಅಭಿಪ್ರಾಯ್ ಲೇಖನಾಂ
ಎಚ್ಚೆಮ್ [ವಿಮರ್ಸೊ: ಜಾಂಬ್ಳಾಂಚೊ ರೂಕ್]
ಕ್ಲೆರೆನ್ಸ್ ಕೈಕಂಬ/ಮಸ್ಕತ್ [ವಿಮರ್ಸೊ: ಬಾಂಯ್]
ಗಿಬ್ಬಾ ಕುಲ್ಶೇಕರ್/ಕುವೇಯ್ಟ್ [ಅಭಿಪ್ರಾಯ್]
ಸ್ಟೇನ್ ಅಗೇರಾ ಮುಲ್ಕಿ/ದುಭಾಯ್ [ವಿಮರ್ಸೊ: ಏಕ್ ಕ್ರಿಕೆಟ್ ಹೀರೊ]
ಎಡ್ವಿನ್ ಜೆ. ಎಫ್. ಡಿ’ಸೋಜ್, ಮಂಗ್ಳುರ್ [ಅಭಿಪ್ರಾಯ್]
ಸಿಜ್ಯೆಸ್ ತಾಕೊಡೆ, ಖತಾರ್ [ಅಭಿಪ್ರಾಯ್]
ಮೆಲ್ವಿನ್ ಜೆ. ವಾಸ್ ಕೆಲರಾಯ್/ಕುವೇಯ್ಟ್ [ವಿಮರ್ಸೊ: ಖಣ್]
ಪ್ರಿಯಾ ಸಿಕ್ವೇರಾ ಫೆರಾರ್/ಕುವೇಯ್ಟ್ [ಸಮೀಕ್ಶಾ: ಖಣ್]
ಆಸ್ಟಿನ್ ಡಿ’ಸೋಜ್ ಪ್ರಭು ನಂತೂರ್/ಚಿಕಾಗೊ [ಸಮೀಕ್ಶಾ]
ಅಶುಂತಾ ಪಿರೇರಾ ಗಂಟಾಲ್ಕಟ್ಟೆ/ಯುಕೆ [ಸಮೀಕ್ಶಾ: ಕುಡ್ಡೊ]
ಬರವ್ಪ್ಯಾಚಿಂ ಉತ್ರಾಂ - ವಲ್ಲಿ ಕ್ವಾಡ್ರಸ್, ಅಜೆಕಾರ್
ಕಥಾಪಾಠ್ - 1. ರೂಕ್ ಏಕ್ ರೂಪ್ ಅನೇಕ್ [ವಿಮರ್ಸೊ] - ಎಚ್ಚೆಮ್
ಎಚ್ಚೆಮ್: ’ಎಚ್ಚೆಮ್’ ಲಿಖ್ಣೆನಾಂವಾರ್ ಕೊಂಕ್ಣಿ ಕವಿತಾಶೆತಾಂತ್ ಫಾಮಾದ್ ಜಾಲ್ಲೊ ಕವಿ ಹೆನ್ರಿ ಮೆಂದೊನ್ ಏಕ್ ಕವಿ ಮಾತ್ರ್ ನ್ಹಂಯ್ ಆಸ್ತಾಂ, ಏಕ್ ಅಂಕಣ್ಕಾರ್, ಕಾಣ್ಯೆಗಾರ್, ಚಿಂತ್ಪಿ ಆನಿ ಉಂಚ್ಲೊ ವಿಮರ್ಶಕ್. ತಾಚಿಂ ಕವಿತಾಚಿಂ ಅಧ್ಯಯನ್ ಲೇಖನಾಂಕ್ ಜಾಯ್ತಿಂ ಅಧ್ಯಯನ್ ಕರುನ್ ಆಸಾತ್. ಎದೊಳ್ಚ್ ಹಾಚಾ ಮಟ್ವ್ಯಾ ಕಾಣ್ಯಾಂಚೊ ಜಮೊ ’ದೆವಾಕ್ ಸೊಡ್ಲಲೊ ಪಾಡೊ’ ಪರ್ಗಟ್ ಜಾಲಾ. ಜಾಯ್ತ್ಯಾ ಸಾಹಿತಿಕ್ ಸ್ಪರ್ಧಾಂನಿ ಇನಾಮಾಂ ಜಿಕ್ಲ್ಲೊ ಹೊ ಪ್ರಸ್ತುತ್ ಮಂಗ್ಳುರಾಂತ್ ವಾವ್ರ್ ಕರುನ್ ಆಸಾ ತಶೆಂಚ್ ಕೊಂಕ್ಣಿ ಸಾಹಿತ್ಯಾಕ್ ಲಾಗ್ಶಿಲ್ಯಾನ್ ಪಾರ್ಕುನ್ ಆಸಾ.
ಮ್ಹಾ ಆಶಾವಾದಿ ವಲ್ಲಿ ಕ್ವಾಡ್ರಸ್ ಅಜೆಕಾರ್ ಹಾಚೊ ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ (ಆಶಾವಾದಿ ಪ್ರಕಾಶನ್ 2005) ಮ್ಹಣ್ಟಾನಾ ಫಕತ್ತ್ ಉಡಾಸಾಕ್ ಯೆಂವ್ಚೊ ಆರ್.ಕೆ.ನಾರಾಯಣ್ ಆನಿ ತಾಚೊ ಮಾಲ್ಗುಡಿಂತ್ಲೊ ಸ್ವಾಮಿ. ತಾಕಾ ತರ್ಯ್ ಮಾಲ್ಗುಡಿಂತ್ ಗಾಂವ್ಭರ್ ಈಷ್ಟ್, ಕಂಗಾಲ್ - ಕುಕ್ಕೆಹಳ್ಳಿಂತ್ ಆಸ್ಚ್ಯಾ ಜೀವ್-ನಿರ್ಜೀವ್ ಜೀವಿಂ ಪಯ್ಕಿ ಎಕ್ಲೊ. ಕಂಗಾಲ್ ಕುಕ್ಕೆಹಳ್ಳೆಂತ್ ಖಂಯ್ ಥಾವ್ನ್ ಕಸೊ ಆನಿ ಕೆದಾಳಾ ಪಡ್ಲೊ ಮ್ಹಳ್ಳೆಂ ಖುದ್ದ್ ತೊಯ್ ನೆಣಾಂ.. ಪಡ್ಲೊ ಮಾತ್ ನ್ಹಯ್ ಕಶೆಂ ತಾಚೆಂ ನಾಂವ್ಯ್ ತಾಚೆರ್ ಪಡ್ಲೆಂ ಮ್ಹಳ್ಳೆಂ ಕುಕ್ಕೆಹಳ್ಳೆಂತ್ ಮಿಸ್ತೆರ್ಚ್ ಜಾವ್ನಾಸ್ಲ್ಲೊ (ಕಾಣಿ: ಖಣ್ - ಪಾನ್:15). ಹಿ ಗತ್ ಭಿಲ್ಕುಲ್ ದೇವನೂರ್ ಮಹಾದೇವಾಚಾ ಅಮಾಸಾಚಿ ’ಅವನ ಮೇಲೆ ಆ ಹೆಸರು ನಿಂತಿದೆ’ ಆಸೊಂ!.
ಆಧುನಿಕ್ ಇಂಗ್ಲಿಶ್ ಸಾಹಿತಾಂತ್ ಖುಶ್ವಂತ್ ಸಿಂಗ್, ಶೋಭಾ ಡೇ ಚಾಲ್ತೆರ್ ಆಸ್ಚಾ ಹ್ಯಾ ಕಾಳಾರ್ ಜಾಯ್ತ್ಯಾಂಕ್ ಆರ್.ಕೆ.ನಾರಾಯಣ್ ವಿಸರ್ ಪಡ್ಲಾ ಜಾಂವ್ಕ್ ಪುರೊ. ಪುಣ್ ಆಜ್ಯ್ ಹಾಯ್ಸ್ಕೂಲಾಂನಿ, ಕೊಲೆಜಿಂನಿ
ಭುರ್ಗಿಂ ತಾಚ್ಯೊ ಕಾಣ್ಯೊ ಸಾಹಿತ್ಯಾಂತ್ ಶಿಕ್ತಾತ್. ತಾಚ್ಯೊ ಕಾಣ್ಯೊ ವಿಶೇಸ್ ಸಾಹಿತಾಚಾ ಗುಂಡಾಯೆಚೊ ನ್ಹಂಯ್ ತರ್ಯೀ, ತಾಣೆಂ ಭಾಂಧುನ್ ದಿಂವ್ಚೊ ಅನ್ಭೋಗಾಂಚೊ ಸಂಸಾರ್ ತಸೆಂ ಮಾತ್ಯೆಚೊ ವಾಸ್ ಖಂಯ್ಯೀ ಕೃತಕ್ ವಾ ಕಪಟಿ ಭಿಲ್ಕುಲ್ ಲಾಗಾನಾ. ತಾಚ್ಯೊ ಕಾಣ್ಯೊ ವಾಚ್ತಾನಾ ಪ್ರಕೃತೆಚಾ ಪಾಸ್ಳೆಂತ್ ಖೆಳ್ಲ್ಲೆಪರಿಂ ಮತ್ ಪ್ರಫುಲ್ಲಿತ್ ಜಾತಾ. ನ್ಯೂಸ್ ಪ್ರಿಂಟ್ ಬರವ್ಪಿ ಮ್ಹಣ್ ಹಾವೆಂ ಖಾಸ್ಗೆನ್ ಮಾಂದ್ಚಿ ಶೇಭಾ ಡೇ ಜ್ಯೆಂ ಮಲ್ಲಿಕಾ ಶ್ಹೆರಾವತ್ ಪಡ್ದ್ಯಾರ್ ಉಗ್ತೆಂ ಕರ್ನ್ ಧಾಖವ್ನ್ ಕರ್ತಾ ತೆಂ ರೀಮ್ ರೀಮ್ ಕಾಗ್ದಾಂನಿ ಬರವ್ನ್ ಕರ್ತಾ. ನವ್ಯಾ ಸಾಹಿತ್ಯಾಂತ್ ಸೆಕ್ಸ್ ಇಮಾಜಿಂಚೊ ವಾಪಾರ್ ಬರೊಚ್ಚ್ ಆಸಾ ತರ್ಯ್ ಸೆಕ್ಸ್ ಮಾತ್ ಬರವ್ನ್ ವಿಖ್ಲ್ಯಾರ್ ತಿ ಪಯ್ಶೆ ಕರ್ಚಿ ಗಿರಾಂತ್ ಜಾತಾ ಶಿವಾಯ್ ಸೃಜನ್ಶೀಲತಾ ಜಾಯ್ನಾ. ಆಅರುಂಧತಿ ರೋಯ್ ಜಿಣ್ಯೆ ಅನ್ಭೋಗ್ ಕೃತಿಯೆಂತ್ ದಾಕಲ್ ಕರ್ನ್ ವೆತಾನಾ ಅಶೆಂ ಜಾಯ್ನಾಶೆಂ ಕಾಳ್ಜಿ ಘೆತಾ ದೆಖುನ್ ತಿ ಶೋಭಾ ಡೇ ಪರಿಂ ನ್ಯೂಸ್ ಪ್ರಿಂಟ್ ರಾಯ್ಟರ್ ಜಾಯ್ನಾ. ಸೆಕ್ಸಿ ಸರ್ದಾರ್ ಮ್ಹಣ್ ನಾಂವ್ ವೆಲ್ಲೊ ಖುಶ್ವಂತ್ ಸಿಂಗ್ ಪತ್ರಿಕೋಧ್ಯಮ್ ಆನಿ ಸಾಹಿತ್ ಕೆನ್ನಾಂಯೀ ಭರ್ಸಾನಾ ದೆಖುನ್ ತಾಚಾ ಸೃಜನ್ಶೀಲ್ ಬರ್ಪಾಕ್ ರೂಚ್ ಆಸಾ, ಆಸೊಂ. ಹಿ ಚರ್ಚಾ ಹೆರ್ ಖಂಯ್ಯೀ ಕರ್ಯಾಂ.
ಆತಾಂ ವಲ್ಲಿಚಾ ಕಂಗಾಲಾಕ್ ಆನಿ ನಾರಾಯಣಾಚಾ ಸ್ವಾಮಿಕ್, ವಲ್ಲಿಚಾ ಕುಕ್ಕೆಹಳ್ಳಿಕ್ ಆನಿ ನಾರಾಯಣಾಚಾ ಮಾಲ್ಗುಡಿಕ್ ಪಯ್ಸ್ ಪಯ್ಸ್ ಕಸಲೊಯ್ ಸಂಬಂಧ್ ನಾ. ಪುಣ್ ನಾರಾಯಣ್ ಕಶೆಂ ಮಾಲ್ಗುಡಿ ಮ್ಹಳ್ಳಿ ಏಕ್ ಮಿಶ್ಟಿಕ್ ಹಳ್ಳಿ ಬರ್ಪಾಂತ್ಚ್ ಉಭಿ ಕರ್ನ್ ದಿಲಿಗೀ ತಸ್ಲೆಂ ಏಕ್ ಪ್ರಾಮಾಣೀಕ್ಪ್ರೇತನ್ ವಲ್ಲಿನ್ ಕೊಂಕ್ಣೆಂತ್ ಕುಕ್ಕೆಹಳ್ಳಿ ಉಭಾರ್ಚೆವಿಶಿಂ ಕೆಲಾಂ ಮ್ಹಣೊಂ? ಶಂಕರ್ನಾಗ್ ಹಾಣೆಂ ಮಾಲ್ಗುಡಿ ವಯ್ರ್ ಸಿರಿಯಲ್ ಕರ್ನ್ ತೆಂ ಅಖ್ಖ್ಯಾ ದೇಸಾಂತ್ ಫಾಮಾದ್ ಜಾಲೆಂ, ಜಯ್ತೊ ಲೋಕ್ ಶಂಕರ್ನಾಗಾಕ್ ಮಾತ್ ವಳ್ಕಾತಾ ಆರ್.ಕೆ.ನಾರಾಯಣಾಕ್ ನ್ಹಂಯ್ - ಹೆಂ ದುರಂತ್ ನಾರಾಯಣ್ಯೀ, ವಲ್ಲಿಯೀ ಆಪಾಪ್ಲೆ ಹಳ್ಳ್ಯೊ ’ಫ್ಯಾಂಟಸಿ ಪಾರ್ಕ್’ ಜಾಯ್ನಾತ್ಲ್ಲೆಪರಿಂ ಕಿತ್ಲೆ ತೇಂಪ್ ಸಾಂಭಾಳುಂಕ್ ಸಕ್ತಿತ್ ತೆಂ ವಾಚ್ಪ್ಯಾಂಚೆರ್ ಹೊಂದೊನ್ ಆಸಾ. ತಿ ವಿಶಯ್ ವೆಗ್ಳಿ.
ಕುಕ್ಕೆಹಳ್ಳೆಂತ್ ಆಂಬ್ಯಾರೂಕ್ ಆಸಾ, ಪಟೇಲ್ ಆಸಾ, ಕಾಮಿಲ್ ಕಾಮ್ತಿ ಆಸಾ, ತಾಣೆಂ ಲಾಯಿಲ್ಲೊ ಜಾಂಬ್ಳಾಂಚೊ ರೂಕ್ ಆಸಾ, ದೊಣ್ಪೊ ಆಸಾ, ಬಾಲ್ತಾಜರ್ ಆಸಾ, ತಾಕಾ ಬಲಿ ಘೆತ್ಲ್ಲಿ ದರಬಸ್ತ್ ಉದ್ಕಾಚಿ ಬಾಂಯ್ ಆಸಾ. ಜಶೆಂ ಬಾಲ್ತಾಜಾರಾಕ್ ಮಾಂಯ್ ಜಿಯೆಂವ್ಕ್ಯೀ, ಮೊರೊಂಕ್ಯೀ ಕಾರಾಣ್ಗಿ ತಶೆಂ ಕಾಮಿಲ್ ಕಾಮ್ತಿಕ್ ಜಾಂಬ್ಳಾಚೊ ರೂಕ್, ಕಿತ್ಲ್ಯಾ ಧಾರುಣಾಯೆನ್, ಆಪ್ಲ್ಯಾ ಜಿಣ್ಯೆಚೆ ಸಗ್ಳೆ ಅತ್ರೆಗ್, ಆಶಾ, ಸಾಕ್ರಿಫಿಸ್ ಬಾಲ್ತಾಜಾರಾಚಿ ಬಾಂಯ್ ಗ್ರಾಸಿತಾಗೀ ಜಾಂಬ್ಳಾಚೊ ರೂಕ್ ತಿತ್ಲ್ಯಾಚ್ ಸೊಸ್ಣಿಕಾಯೆನ್ ಕಾಮಿಲ್ ಕಾಮ್ತಿಚೆಂ ಸರ್ವ್ ದೌಜನ್ಯ್ ಅತ್ತ್ಯಾಚಾ ಸೊಸುನ್ ರಾವ್ತಾ.
’ಹ್ಯಾ ರುಕಾನ್ಯೀ ಜಾಯ್ತ್ಯೊ ಬಲಿಯೊ ಚೊಯ್ಲ್ಯಾತ್. ತ್ಯಾಚ್ ರುಕಾಮುಳಾಂತ್ ಜಾಯ್ತ್ಯಾ ಆಮಾಸೆ ರಾತಿಂ ಪ್ರದುವಾರ್ ಚಲ್ಲಾ ಮ್ಹಣ್ ಮ್ಹಾನ್ ಮನ್ಶಾಂ ಥಾವ್ನ್.. ಸುಕ್ಣಿಂ ಮಾತ್ ನ್ಹಂಯ್, ಹುಂಬ್ಲೆಯ್ ಚಡ್ಲ್ಯಾತ್’
(ಕಾಣಿ:
ಜಾಂಬ್ಳಾಂಚೊ ರೂಕ್, ಪಾನ್ : 72-73). ಅಸಲಿಂ ವೈರುಧ್ಯಾಂ ಕುಕ್ಕೆಹಳ್ಳೆಂತ್ ಮಾತ್ ನ್ಹಂಯ್ ಏಕ್ ನಾಗರಿಕ್ ಸಮಾಜೆಂತ್ ಪಳೆಂವ್ಕ್ ಮೆಳ್ಟಾತ್. ಕುಕ್ಕೆಹಳ್ಳಿ ವಾ ಮಾಲ್ಗುಡಿ ತಾಕಾ ಅಪ್ವಾದ್ ಕಾಂಯ್ ನ್ಹಂಯ್. ವಲ್ಲಿನ್ ಪ್ರಸ್ತಾವನಾಂತ್ ಬರಯಿಲ್ಲೆಪರಿಂ ’ಮ್ಹನ್ಯಾ ಕುಕ್ಕೆಹಳ್ಳೆನ್ ಮ್ಹಜ್ಯಾ ಕಾಣ್ಯಾಂನಿ ಜಲ್ಮ್ ಘೆತ್ಲ್ಲೊ ಅಜೀಕ್ ಚಡುಣೆಂ ಪಂದ್ರಾ ವರ್ಸಾಧಿಂ’ (ಸಪಣ್ ಆನಿ
ಸತಾ ಮಧ್ಲೊ ಕಂಗಾಲ್ - ಪಾನ್: 9). ಕಿತೆಂಚ್ ನ್ಹಂಯ್ ಜಾಲ್ಲೊ ಏಕ್ ವ್ಯಕ್ತಿ ಕಂಗಾಲ್ ಜಾತಾನಾ, ಹಾಂವ್ ತುಂ ಸಮಾಜೆಂತ್ಲೊ ಕೊಣ್ಯೀ, ಕುಕ್ಕೆಹಳ್ಳಿ ಮ್ಹಳ್ಯಾರ್ ಅಜೆಕಾರ್, ಬೊಳಿಯೆ, ಅತ್ತೂರ್, ಪುತ್ತೂರ್, ಸಾಲೆತ್ತೂರ್ ವ ಸಂಸಾರಾಂತ್ಲಿ ಖಂಚೀಯ್ ’ಊರ್’ ಜಾವ್ಯೆತಾ (ಸಪಣ್ ಆನಿ ಸತಾ ಮಧ್ಲೊ ಕಂಗಾಲ್, ಪಾನ್:11)
ಜಾಂಬ್ಳಾ ರುಕಾಚಾ ಕಾಣಿಯೆಂತ್ ಕುಕ್ಕೆಹಳ್ಳಿ ಎಕುಣ್ಚಾಳಿಸ್ ವರ್ಸಾಂ ಆಧಿಂ ಕಶೆಂ ಆಸ್ಲ್ಲಿ ತಾಂತ್ಲಿ ಸಂಸ್ಕೃತಿ ಆನಿ ನಾಗರಿಕತಾ ಕಶಿ ವಾಡ್ಲಿ ಆನಿ ಆಜ್ ಅರ್ಬನ್ ಜಾವ್ನ್ ಕಶಿ ಆಸಾ, ಹಾಚೆಂ ಚಿತ್ರಣ್ ಆಸಾ. ಆತಾಂ ಆಧುನಿಕ್ ಲವ್ಕಿಕ್ ಸುಕಾ ಪಾಟ್ಲ್ಯಾನ್ ಧಾಂವ್ಚ್ಯಾ ಸಮಾಜೆಚೆಂ ದುರಂತ್ ಪಳೆಯಾ, ಅಪ್ಣಾಕ್ ಮನ್ಶಾಂ ಸಾರ್ಕೆಂ ಮನಿಸ್ ಕೆಲ್ಲಿ ಕುಕ್ಕೆಹಳ್ಳಿ, ತಾಚ್ಯಾ ಬದ್ಲಾಕ್ ಉತ್ರಾಂ ನಾತ್ಲ್ಲಾ ಜಾಂಬ್ಳಾರುಕಾಕ್ ಆನಿ ತಾಚಾ ರಾಕ್ವಲೆಕ್ ಸೊಡ್ನ್ ಸುಶೆಗಾತ್ ಪೆಂಟೆಂತ್ ರಾವ್ತಾ. ಆಪ್ಣಾಕ್ ಏಕ್ ಘಾಸ್ ಸಾರತುಕಾಯೆಚೆಂ ಶಿತ್ ದೀನಾತ್ಲ್ಯಾರೀ ಬಾಲ್ತಾಜಾರ್ ಕುಕ್ಕೆಹಳ್ಳಿ ಸೊಡುಂಕ್ ತಯಾರ್ ನಾ. ವ್ಯಂಗ್ಯ್ ಮ್ಹಳ್ಯಾರ್ ತಾಣೆಂ ತಾಚಾ ಭುಂಯ್ತ್ ಪಿಕಯಿಲ್ಲಿಂ ಮೊಗಿಂ, ದುದಿಂ, ಕುವಾಳೆ, ಕೆಂಳ್ಬ್ಯಾಚೆ ಶಿರತ್ಯೊ ಸಯ್ತ್ ಕಾಮಿಲ್ ಕಾಮ್ತಿ ಆಸ್ಚ್ಯಾ ಪೆಂಟೆಕ್ ವೆತಾತ್. ತರ್ಯ್ ಬಾಲ್ತಾಜಾರಾಚೊ ಜೀವ್ ಮೆಳೊಂಕ್ ಆಸ್ಚ್ಯಾ ಬಾಂಯ್ಚ್ಯಾ ಉದ್ಕಾ ಝರಿಂತ್ ತಶೆಂ ಕಾಮಿಲ್ ಕಾಮ್ತಿಚಾ ಜಾಂಬ್ಳಾರುಕಾಚಾ ಕುಕ್ಕೆಹಳ್ಳಿಚಾ ಭುಂಯ್ತ್ ರಿಗೊನ್ ಗೆಲ್ಲ್ಯಾ ಪಾಳಾಪಾಳಾಂತ್. ಖಿಣಾ ಖಿಣಾಂಕ್ ಜಾಂಬ್ಳಾರೂಕ್ ಕಾಮ್ತಿಚೆ ಕುಕ್ಕೆಹಳ್ಳೆಂತ್ ಹಾಜ್ರಿ ಧಾಖಯ್ತೇ ವೆತಾ.
ವಲ್ಲಿ ಕ್ವಾಡ್ರಸ್ ಸಂಯ್ಬಾನ್ ಕವಿ (ಚ್ಯಾರ್ ಮುಖಾಂ, ಕಟ್ಪುತ್ಳಿ, ದರ್ಭಾರಾಂತ್ಲಿ ಪಿಂರ್ಗೊಣ್ ತಾಚೆ ತೀನ್ ಕವಿತಾಜಮೆ). ತಾಣೆಂ ಕವಿತಾ ಬರಂವ್ಚೆ ಪಯ್ಲೆಂ ತಾಚೆಕಡೆ ಕುಕ್ಕೆಹಳ್ಳಿ ಆಸ್ಲ್ಲಿ ದೆಖುನ್ ತಾಣೆಂ ಕಾದಂಬರಿಯೊ, ಮಟ್ವ್ಯೊ ಕಾಣಿಯೊ ಬರಯ್ಲ್ಯೊ. ’ಕತೆಚೆಂ ವಿರ್ಗಳಾಯಿಲ್ಲೆಂ ರೂಪ್ಚ್ ಕವಿತಾ’ ಅಶೆಂ ಮ್ಹಣ್ತಾ ಮೆಲ್ವಿನ್ ರೊಡ್ರಿಗಸ್. ತಶೆಂ ಮ್ಹಣ್ ಹರ್ ಕಾನ್ಯಾಂಗಾರ್ ಕವಿಯ್ ಜಾತಾ. ಪುಣ್ ಹಾಂಗಾ ಕಾಣ್ಯಾಂಗಾರ್ ಅಪ್ಲ್ಯಾ ಕಾಣಿಯಾಂನಿ ಉಭೆ ಕರ್ಚ್ಯೊ ಇಮಾಜಿ ಪಳೆಯಾ;
ತ್ಯೊ ಖಂಯ್ಚ್ಯಾಯ್ ಕವಿತೆಕ್ ಸೊಡ್ನ್ ದಿತಾತ್? ದಾಕ್ಲ್ಯಾಕ್; ಜಾಂಬ್ಳಾಂಚೊ ರೂಕ್. ಕಾಮಿಲ್ ಕಾಮ್ತಿ ಕುಕ್ಕೆಹಳ್ಳೆಕ್ ಆಯಿಲ್ಲೊ ಮಲ್ನಾಡಾಥಾವ್ನ್. ಯೆತಾನಾ ಕುಕ್ಕೆಹಳ್ಳೆಕ್ ಏಕ್ ಜಾಂಬ್ಳಾರುಕಾಚಿ ರೊಂಪಿ ಹಾಡ್ನ್ ಆಯ್ಲೊ (ಹಾಂಗಾ ರೊಂಪಿ ನವಿ ರಾಜಕೀಯ್ ಪಾಡ್ತ್ ಯಾ ಸಂಘಟನ್). ತೊ ಕುಕ್ಕೆಹಳ್ಳೆಂತ್ ದಾಕಲ್ ಜಾಂವ್ಚಾ ಘಡ್ಯೆಯ್ ವೆಳಾರ್ ಥಂಯ್ ಎದೊಳ್ಚ್ ಏಕ್ ಜಯ್ತ್ ಆಂಬ್ಯಾರೂಕ್ ಆನಿ ಪಟೇಲ್ ಆಸ್ತಾ (ಅನ್ಯೇಕ್ ರಾಜಕೀಯ್ ಪಾಡ್ತ್ - ಆಂಬ್ಯಾರೂಕ್). ಕಾಮಿಲ್ ಕಾಮ್ತಿಚಾ ಯೆಣ್ಯಾನ್ಂಚ್ ಆಂಬ್ಯಾರುಕಾಕ್ ಘಡ್ಗಡೊ ಮಾರ್ತಾ. ತೊ ಹಳ್ತಾರ್ ಮೊರ್ತಾ. ಜಾಂಬ್ಳಾರೂಕ್ ವಾಡೊನ್ ಯೆತಾನಾ ಆಪ್ಲ್ಯಾ ಸಯ್ತಾನಾಚೊ ಫಾತೊರ್ ಸಯ್ತ್ ಲೋಕ್ ತಾಚೆ ಅಡಿಯೆಕ್ ಹಾಡ್ತಾ (ಮ್ಹಣ್ಜೆ ಲೋಕ್ ತಾಂಚಿ ನಿಷ್ಟತಾ (ಸಯ್ತಾನ್ ವ ಭುತ್ ಪಾತ್ಯೆಣೆಚೊ ಸಂಕೇತ್) ಕಾಮ್ತಿಚಾ ಪಾಡ್ತೆಕ್ ಶಿಫ್ಟ್ ಕರ್ತಾ). ಜ್ಯಾ ದಿಸಾ ಆಂಬ್ಯಾರೂಕ್ ಪುರ್ತೊ ಮೊರ್ತಾ ತ್ಯಾ ದಿಸಾ ಕುಕ್ಕೆಹಳ್ಳೆಂತ್ ಪಟೇಲ್ ನಪಂಯ್ಚ್ ಜಾತಾ. ಹಿ ನಪಂಯ್ಚ್ ಕೇವಲ್ ಬೌತಿಕ್ ನ್ಹಂಯ್. ವಾಸ್ತವಾನ್ ತಾಚಾ ಪಾಡ್ತೆಚಿ ಆನಿ ಕುಕ್ಕೆಹಳ್ಳೆಂತ್ ಅಸ್ಮಿತಾಯೆಚಿ. ಪಟೆಲ್ ನಿರ್ನಾಮ್ ಜಾವ್ನ್ ವೆತಾನಾ ಜಾಂಬ್ಳಾರೂಕ್ ಏಕ್ ಸ್ವಾಮ್ಯಾನ್ ಕುಕ್ಕೆಹಳ್ಳೆಂತ್ ವಾಡೊನ್ ರಾವ್ತಾ. ಪಟೇಲ್ - ಆಂಬ್ಯಾರೂಕ್, ಕಾಮಿಲ್ ಕಾಮ್ತಿ - ಜಾಂಬ್ಳಾ ರೂಕ್. ಸಯ್ತಾನಾಚೊ ಫಾತೊ - ಲೊಕಾಚಿ ನಿಷ್ಟತಾ; ಹಿ ಪ್ರತಿಮಾಂಚಿ ಆನಿ ರೂಪಕಾಂಚಿ ಶಿಂಕಳ್ ವಲ್ಲಿ ಕ್ವಾಡ್ರಸ್ ತಸಲ್ಯಾ ಕವಿಕ್ ಮಾತ್ ಕಾಣ್ಯೆಂನಿ ಹಾಡ್ಚಿ ತಾಂಕ್ ಆಸಾ. ತೊ ಸಂಯ್ಬಾನ್ ಕವಿ ದೆಖುನ್ ತಾಕಾ ಹೆಂ ಸಾಧ್ಯ್.
ಜಶೆಂ ಆಂಬ್ಯಾಚಾ ರುಕಾಚಿ ಪಡ್ಣಿ ಪಟೇಲಾಚಿ ಪಡ್ಣಿ ಜಾಲಿಗಿ ತಶೆಂ ಜಾಂಬ್ಳಾರುಕಾಚಿ ವ್ಹಾಡಾವಳ್ ಕಾಮ್ತಿಚೆಂ ಕುಕ್ಕೆಹಳ್ಳೆಂತ್ ಚಡೊನ್ ಯೆಂವ್ಚೆಂ ಬಳ್ ಸಂಕೇತ್ ಜಾವ್ನ್ ಯೆತಾತ್. ತಶೆಂ ತೊ ಥಂಯ್ ನಾ ಜಾಲ್ಯಾರೀ ಚಾರ್ ಸುತ್ತುರಾಂತ್ ಪಾಳಾಂ ರೊಂಬವ್ನ್ ಕುಕ್ಕೆಹಳ್ಳೆಂತ್ಲ್ಯಾ ಲೊಕಾಚಿ ಪಾತ್ಯೆಣಿ ಜೋಡ್ನ್ ವೆಚೆಂಯೀ. ಪಟೆಲಾನ್ ಕಾಮಿಲ್ ಕಾಮ್ತಿಕ್ ಲಗಾಡ್ ಕಾಡುಂಕ್ ವಾ ನಿರ್ನಾಮ್ ಕರುಂಕ್ ಕರ್ಚಿಂ ಹರ್ ಪ್ರೇತನಾಂ ಜಾಂಬ್ಳಾಚಾ ರೊಂಪಿಯೆಕ್ ಜಿವೆಶಿಂ ಮಾರುಂಕ್ ಹುಮ್ಟುನ್ ಉಡಂವ್ಕ್ ಕರ್ಚಿಂ ಪ್ರೇತನಾಂಚ್ ಜಾತಾತ್. ಕಾಮಿಲ್ ಕಾಮ್ತಿಚೊ ವೆಕ್ತಿತ್ವ್ ಹಳ್ಟಾರ್ ಇತ್ಲೊ ವ್ಹಾಡೊನ್ ರಾವ್ಲೊಗೀ ಕುಕ್ಕೆಹಳ್ಳೆಚೊ ಲೋಕ್ ತಾಕಾ ದೇವ್ ಮಾಂಧುಂಕ್ ಲಾಗ್ಲೊ (ಹಾಂಗಾ ಜಾಂಬ್ಳಾರೂಕ್ ಮ್ಹಳ್ಯಾರ್ ಕಾಮಿಲ್ ಕಾಮ್ತಿ - ಕಾಮಿಲ್ ಕಾಮ್ತಿ ಮ್ಹಳ್ಯಾರ್ ಜಾಂಬ್ಳಾಂಚೊ ರೂಕ್). ಹ್ಯಾ ಪಾಟಿಥಳಾರ್ ಕಾಮಿಲ್ ಕಾಮ್ತಿ;1. ದೆವಾಸ್ಪಣಾಚೊ ಮನಿಸ್,
2. ಸಮಾಜ್ ಸುಧಾರಕ್ ಜಾವ್ನ್ ವಾಡೊನ್ ರಾವ್ತಾ ಕಶೆಂ ಮ್ಹಳ್ಯಾರ್..
1. ಸಯ್ತಾನಾಚೊ ಫಾತೊರ್ ಆಸ್ಚ್ಯಾ ರುಕಾಕ್ ಘಡ್ಗಡೊ ಮಾರ್ತಾನಾ ಹಿ ರೊಂಪಿ ಲಾಯಿಲ್ಲೊ ದೆಖುನ್ ದೆವಾಸ್ಪಣಾಚೊ ಮನಿಸ್.
2. ಸುಕ್ಣಿಂ ಸಾವ್ಜಾಂಕ್ ಘೊಂಟೆರ್ ಬಾಂಧುಂಕ್ ಆವ್ಕಾಸ್ ಜಾಂವ್ದಿ (ಮ್ಹಣ್ಜೆ ಘರ್ದಾರ್ ನಾತ್ಲ್ಲ್ಯಾ ನಿರ್ಗತಿಕ್ ಲೊಕಾಕ್ ಕುಕ್ಕೆಹಳ್ಳೆಂತ್ ಮಜತ್ ಕೆಲಿ) ಮ್ಹಳ್ಳ್ಯಾ ನದ್ರೆನ್ ಹಿ ರೊಂಪಿ ಲಾವ್ನ್ ಮನ್ಶಾಪಣಾಚೊ ಮನಿಸ್.
3. ದೊಣ್ಪ್ಯಾ ಭಂವಾರಿಂ ಜಮೊ ಜಾಲ್ಲ್ಯಾ ಮೆಳ್ಯಾ ಉದ್ಕಾಕ್ ನಿತಳ್ ಕರ್ಚ್ಯಾ ಇರಾದ್ಯಾನ್ ಝಡ್ ಲಾವ್ನ್ - ಸಮಾಜ್ ಸುಧಾರಕ್.
ರೂಕ್ ಏಕ್! ರುಪಾಂ ಅನೇಕ್!! ಎಕಾ ಕವಿಕ್, ಕ್ವಾಡ್ರಸಾ ತಸಲ್ಯಾ ಕವಿಕ್ ಸೊಡ್ಲ್ಯಾರ್, ಇತ್ಲಿಂ ರುಪಾಂ ಪಳೆಂವ್ಕ್ ಕೊಣಾಕ್ ಸಾದ್ ಆಸಾ? ಹಾಂಗಾ ಕಾಮ್ತಿ ಮ್ಹಳ್ಯಾರ್ ಜಾಂಬ್ಳಾರೂಕ್, ಜಾಂಬ್ಳಾ ರೂಕ್ ಮ್ಹಳ್ಯಾರ್ ಕಾಮ್ತಿ ದಾಕ್ಳ್ಯಾಕ್;
’ಜಾಂಬ್ಳಾಚೊ ರೂಕ್ ಆನಿ ಕಾಮ್ತಿ ಎಕಾಮೆಕಾಚೆ ವಿಸ್ವೆ ಕಶೆಂ ಭಗ್ತಾಲೆಂ’ (ಕಾಣಿ: ಜಾಂಬ್ಳಾಚೊ ರೂಕ್, ಪಾನ್:
72)
ಆತಾಂ.. ಎಕುಣ್ಚಾಳಿಸ್ ವರ್ಸಾಂ ಉಪ್ರಾಂತ್ ರೂಕ್ ವಾಡ್ಲಾ, ತಾಕಾಯ್ ಕಾಮ್ತಿಕ್ಯ್ ಪಿರಾಯ್ ಜಾಲ್ಯಾ, ರುಕಾರ್ ಆತಾಂ ಸುಕ್ಣ್ಯಾಂ ಸಾವ್ಜಾಂನಿ ಮಾತ್ ನ್ಹಂಯ್ ಹುಂಬ್ಲ್ಯಾಂನಿಂಯ್ ಪಟ್ಟಾಂ ಭಾಂದ್ಲ್ಯಾಂತ್. ಹೆ ಕಾಮಿಲ್ ಕಾಮ್ತಿಚೆಂ ಅನ್ಯೇಕ್ ರೂಪ್. ಜಶೆಂ ’ಹ್ಯಾಚ್ ರುಕಾಮುಳಾಂತ್ ಜಾಯ್ತ್ಯಾ ಆಮಾಸೆರಾತಿಂ ಪ್ರದುವಾರ್ ಚಲ್ಲಾ - ಮ್ಹಾನ್ ಮನ್ಶಾಂ ಥಾವ್ನ್’ (ಕಾಣಿ:
ಜಾಂಬ್ಳಾಚೊ ರೂಕ್, ಪಾನ್: 72) ದೆಖುನ್ ರೂಕ್ಯ್ ಹಳ್ಟಾರ್ ನಿಸ್ತೇಜ್ ಆನಿ ನಿರ್ವೀರ್ಯ್ ಜಾತೇ ಯೆತಾ.
ಆತಾಂ ಸುರು ಜಾತಾ ಕಾಣಿ ಯೇಂವ್ಕ್ ಆಸ್ಚ್ಯಾ ವಾ ಕುಕ್ಕೆಹಳ್ಳೆಂತ್ ಪಾಲೆಂವ್ಕ್ ಆಸ್ಚಾ ಅನ್ಯೇಕಾ ರೊಂಪಿಯೆಚಿ. ಆತಾಂ ಪರಿಗತ್ ಬದ್ಲೊನ್ ಆಯ್ಲ್ಯಾ. ಕಾಮ್ತಿ ವಿರೋಧ್ ಶಿಕ್ಪಿ ಮನಿಸ್ ಥೊಡೆ ತರೀ ಎಲಿಸಾಂವಾ ಝುಜೊಂಕ್ ಲಾಗ್ಲ್ಯಾತ್. ಮ್ಹಳ್ಯಾರ್ ಜಾಂಬ್ಳಾಚಾಚ್ ರೊಂಪಿಯೆ ಥಾವ್ನ್ ತಾಚಾ ಅಸ್ತಿತ್ವಾಕ್ ಧಖೊ ಆಸಾ. (ಮ್ಹಣ್ಜೆ ತಾಚ್ಯಾಚ್ ಜಾತಿ ಥಾವ್ನ್) ದೆಖುನ್ ಕಾಮ್ತಿ ಏಕ್ ಮಂದಿರ್ ಭಾಂದ್ಚಿ ಯೆವ್ಜಣ್ ಘಾಲ್ತಾ, ರಾಜಕಾರಿಣಿ ತೊ ರಾಜಕಾರಣಿ. ತಾಚಿ ವಿಕೃತ್ ಮತ್ ಕಶಿಯೀ ಕಶಿ
ಕಾಮ್ ಕರ್ತಾ ಪಳೆಯಾ. ಜೆನ್ನಾಂ ಹೆರ್ ಖಂಯ್ಚಿಯೀ ದಾಳ್ ಶಿಜಾನಾ ತೆನ್ನಾಂ ಧರ್ಮ್ ಜಾತಿಚಿ ದಾಳ್ ಶಿಜ್ತಾ. ಏಕ್ ಹುಶಾರ್ ಹೆಳ್ಲ್ಲೊ ರಾಜಕಾರಣಿ ಇತ್ಲೆಂ ಬರ್ಯಾನ್ ಜಾಣಾ ದೆಖುನ್ ಕಾಮ್ತಿಯೀ ಸಗ್ಳ್ಯಾ ಆಪ್ಲ್ಯಾ ಕಪಟ್ಪಣಾನ್ ಭರೊನ್ ದೆವಾಳ್ ಭಾಂದ್ಚಿ ತಯಾರಿ ಕರ್ತಾ. ನಿಸ್ತೇಜ್ ಜಾವ್ನ್ ಯೆಂವ್ಚಾ ರುಕಾಂತೀ ಅಪ್ಲಿ ದಾಳ್ ಶಿಜಯ್ತಾ, ತಾಚೊ ಪುರ್ತೊ ಫಾಯ್ದೊ ಜೊಡ್ತಾ.
ಜರ್ ರೂಕ್ ಮೆಲೊ, ಸಯ್ತಾನಾಚೊ ಫಾತೊರ್ (ಮ್ಹಣ್ಜೇ ಲೊಕಾಚಿ ಪಾತ್ಯೆಣಿ, ನಿಷ್ಟತಾ) ದುಸ್ರ್ಯಾ ರುಕಾಮುಳಾ ಶಿಫ್ಟ್ ಜಾಂವ್ಚಿ ಸಾಧ್ಯತಾ ಆಸಾ ಹೆಂ ಕಾಮ್ತಿಕ್ ನಾಕಾ. ಕಾರಾಣ್ - ಹಾಚೆ ವರ್ವಿಂ ತೊ ಪಟೆಲಾಪರಿಂ ನಿರ್ನಾಂ ಜಾತಲೊ. ಜರ್ ದೀವ್ಳ್ ಭಾಂದುನ್ ಘಾಲೆಂ ರೂಕ್ ಫಾಲ್ಯಾಂ ಮೆಲ್ಯಾರೀ ಲೊಕಾ ನಿಷ್ಟಾ (ಸಯ್ತಾನಾಚೊ ಫಾತೊರ್ ದೆವಾಳಾಭಿತರ್ ಫಿಛಾರ್ ಜಾಲಾ ಆಸ್ತಾಂ) ಹಾಲ್ಚೆಪರಿಂ ನಾ. ಎಕಾ ರಾಜಕಾರಣಿಕ್ ಹಾಚೆಶಿವಾಯ್ ದುಸ್ರೆಂ ಕಾಂಯ್ ನಾಕಾ. ಜಾಯ್? ಆತಾಂ ಕೊಣೆಂ ಹೆರ್ ರೊಂಪಿ ಲಾಯ್ಲ್ಯಾರೀ ಕುಕ್ಕೆಹಳ್ಳೆಂತ್ ತಾಕಾ ನವ್ಯಾನ್ ಸಯ್ತಾನಾಚೆ ಫಾತೊರ್ ತಲಾಸ್ ಕರಿಜಾಯ್ ಪಡ್ತೆಲೆ. ತಾಚಿ ಭಿರಾಂತ್ ಸಯ್ತ್ ಕಾಮ್ತಿಕ್ ಆತಾಂ ನಾ. ಮೊರೊನ್ ವೆಚಾ ರುಕಾಂತೀ ತಾಕಾ ಅಪ್ಲೆಂ ಸ್ವಾರ್ಥ್ ಮಾತ್ ದಿಸ್ತಾ.
ಕಾಮಿಲ್ ಕಾಮ್ತಿ ಏಕ್ ಬೂರ್ಶ್ವಾ ಸಾವ್ಕಾರ್. ದುಡು ಆಸಾ ತಾಚೆಕಡೆ. ಹಿಕ್ಮತ್ ಆಸಾ, ಪವರ್ ಆಸಾ ದೆಖುನ್ ತಾಣೆಂ ಜಾಂಬ್ಳಾ ರೂಕ್ ಜತನ್ ಕರ್ಚ್ಯಾಂತೀ ದೌಜನ್ಯ್ ಆಸಾ, ಇತ್ಲ್ಯಾಕೀ ರೂಕ್ ಕೊಣ್? ಸಮಾಜೆಚೆಂ ಪ್ರತೀಕ್ಚ್.
ತಾಚೆ ವಿರೋಧ್ ಆವಾಜ್ ಉಟಯಿಲ್ಲೆ ಕೊಣ್ಂಚ್ ಬರ್ಕತೆನ್ ಜಿಯೆಲ್ಲೆ ನಾಂತ್ (ಪಾನ್:
71) ಪಟೆಲಾಬರಿಂ. ತಾಕಾ ಕುಕ್ಕೆಹಳ್ಳೆಚೆಂ ಬರೆಂಪಣ್ ಪಡೊನ್ ವಚೊಂಕ್ ನಾ. ತಾಕಾ ತಾಂಚೆ ವೋಟ್ ಜಾಯ್. ತ್ಯೇ ಖಾತಿರ್ ಜಾಂಬ್ಳಾರೂಕ್ ತಾಕಾ ಕಾಟೆಂ ಥಂಯ್ ದೆವುಳ್ ತೊ ತಾಚೆಂ ವೋಟ್ ಬ್ಯಾಂಕ್ ಸಾಸ್ಣಾಕ್ ಕರುಂಕ್ ಆಶೆತಾ. ಖುದ್ದ್ ಶ್ಹೆರಾಂತ್ ರಾವ್ಲ್ಯಾರೀ.
ವಲ್ಲಿ ತಸಲೊ ಕವಿ ಮಾತ್ ಎಕಾ ಗಾಂವಾಂತ್ಲೆಂ ಬುರ್ಶೆಂ ರಾಜಕಾರಣ್, ಥಂಯ್ಚ್ಯಾ ಫುಡಾರ್ಯಾಂಚೆಂ ವಿಕೃತ್ ಮನ್, ದೇವ್ ದೆಂವ್ಚಾರಾಂಕ್ ಮುಕಾರ್ ದವರ್ನ್ ಖೆಳ್ಚೆ ನಾಟಕ್, ಆನಿ ಸಾದ್ಯಾ ಲೊಕಾನ್ ಮಾಂಕೊಡ್ ಜಾಂವ್ಚೆಂ ಪರಿಣಾಮ್ಕಾರಿ ಭೊಗುನ್ ತೀವೃತೆನ್ ತೆಚ್ಚ್ ವರ್ಣುಂಕ್ ಸಕ್ತಾ.
ಕುಕ್ಕೆಹಳ್ಳೆಂತ್ ಪಟೇಲ್, ಮಾದೇವ್ ಭೊಟ್, ಕಾಮಿಲ್ ಕಾಮ್ತಿ ತಸಲೊ ಉಚ್ಛ್ ವರ್ಗ್ ಮಾತ್ ನ್ಹಂಯ್, ಬಾಲ್ತಾಜಾರ್, ಕಂಗಾಲ್ ತಸಲೊ ಸಮಾಜೆಂತ್ಲೊ ನಿಮ್ನ್ ವರ್ಗ್ಯ್ ಜಿಯೆತಾ. ಎಕಾ ಬಾಂಯ್ಚ್ಯಾ ಝರಿಚಾ ಉದ್ಕಾಕ್ ಆನಿ ಎಕಾ ವೆಳೆಚಾ ಜೆವ್ಣಾಕ್ ತೆ ಕಶ್ಟಾತಾತ್. ಹ್ಯಾ ಗಿರೇಸ್ತ್ ದುಬ್ಳ್ಯಾಂಚಾ ಖಣಿತ್ ಪಡೊನ್ ತೆ ಅಶೆ ಘಸ್ಟತಾತ್ಗೀ ಎಕಾ ಜಾಂಬ್ಳಾರುಕಾಪರಿಂ ಉತ್ರಾಂ ಕಾಡುನ್ ಕೊಣೆಂ ವೆಲಾಂ ಜಶೆಂ ಮೊನೆ ಜಾತಾತ್..
ಆತಾಂ ಖಣ್ಯೆಂತ್ ಪಡ್ಲ್ಲ್ಯಾ ಕಂಗಾಲಾಕ್ಚ್ ಪಳೆವ್ಯಾಂ.. ಏಕ್ ತರ್ ತೊ ಕೊಣ್, ಖಂಯ್ ಥಾವ್ನ್ ಆಯ್ಲೊ, ಕಿತೆಂ ಜಾತ್ ಕೊಣಾಕ್ ಕಳಿತ್ ನಾ, ಕುಕ್ಕೆಹಳ್ಳೆನ್ ಮಲ್ನಾಡ್ ದೆಂವೊನ್ ಆಯಿಲ್ಲ್ಯಾ ಕಮ್ತಿಕ್ ಕಶೆಂ ಕಂಗಾಲಾಕೀ ಕಸಲೋಯೀ ಭೇದ್ ಲೆಖಿನಾಸ್ತಾನಾ ಆಪ್ಲ್ಯಾ ಗೊಪಾಂತ್ ಘೆತ್ಲಾಂ. ತೊ ದಿವ್ಳಾಂತ್ ನಿದ್ತಾ, ಥಂಯ್ಚ್ ಥೊಡೆಂ ಕಾಮ್ ಕರ್ತಾ. ಜಾತ್ರ್ಯಾ ದಿಸಾ ತೊ ಕಾಮಿನ್ ಕಾಮ್ತಿ ತಸಲ್ಯಾ ರಾಜಕಾರಿಣಿನ್ ಉದ್ಕಾ ನಳಾಂಕ್ ಮ್ಹಣ್ ಖೊಂಡಯಿಲ್ಲ್ಯಾ ಖಣಿಯೆಂತ್ ಪಡ್ಟಾ, ಕುಕ್ಕೆಹಳ್ಳೆಂತ್ ಕೊಣ್ ಮನಿಸ್ ತಾಕಾ ಉಕ್ಲುಂಕ್ ನಾ, ಆಸ್ಲ್ಯಾರೀ ತಾಂಕಾ ತಾಂಚೊ ಅಂತಸ್ತ್, ಭಿರಾಂತ್, ಜಾತ್ ಸೊಡಿನಾ. ಅಧಿಕಪ್ರಸಂಗಿ ಚಿಂತಾತ್ ತೊ ಪಿಯೆಲಾ, ಮುಖ್ರಿಕ್ ತಾಕಾ ಮಜತ್ ಕೆಲ್ಯಾರ್ ಗಾಂವಾರ್ ಜಾತಿಕಾತಿಚೆ ದಂಗೆ ಜಾತಿತ್ ಮ್ಹಳ್ಳಿ ಭಿರಾಂತ್, ಮೆಸ್ತ್ರಿಕ್ ಆಪ್ಲ್ಯಾ ಧವ್ಯಾ ಪುಡ್ವ್ಯಾಚೆರ್ (ಫುಡ್ವೆಂ ಮರ್ಯಾದಿಚೆಂ ರೂಪಕ್) ಖತಾಂ ಪಡ್ತಿತ್ ಮ್ಹಣ್ ಆಕಾಂತ್, ದಿವ್ಳಾಚಾ ಪುಜಾರಿಕ್ ತೊ ಮಾಸ್ಮಾಸ್ಳಿ ಖಾತಾ ಸೊರೊ ಪಿಯೆತಾ ದೆಖುನ್ ಕಾಂಠಾಳೊ, ಆನಿ ತಾಕಾ ಆಪಡ್ಲ್ಯಾರ್ ಅಪ್ಲಿ ಜಾತ್ ಭಶ್ಟ್ ಮ್ಹಳ್ಳಿ ಖಂತ್. ಭೊಟಾಂಚಾ ಪೊರಾಂಕ್ ಮಾಸ್ ಖಾತಾ ಮ್ಹಳ್ಳಿ ಕಾವ್ಜೆಣಿ. ಕಿರಿಸ್ತಾಂವ್ ಶಿಕವ್ಣ್ದಾರಾಂಕ್ ತೊ ಏಕ್ ದೃಶ್ಟಾಂತ್ ಮಾತ್, ಇಸ್ಕೊಲಾಚಾ ಟಿಚೆರಿಕ್ ಮಾಗ್ಣೆಂ ರಜಾರಾಂತ್ ಪಿರಾಣ್, ಪಾರ್ಪೊಳ್ ಚೆಡ್ಯಾಂಕ್ ಕಾಂಯ್ ಫಾರುಂಕ್ ಮೆಳತ್ಗಿ ಇತ್ಲ್ಯಾಚೊ ಜೋಪ್!
ಕುಕ್ಕೆಹಳ್ಳೆಂತ್ ಅಸಲಿ ಏಕ್ ಗತ್ ಯೇಂವ್ಕ್ ಕಾರಾಣ್ ಕೊಣ್? ಉದ್ಕಾ ನಳಾಕ್ ಮೆಳ್ಲ್ಲೆ ಮೆಳ್ಲ್ಲೆಕಡೆ ಖೊಂಡುನ್ ಘಾಲ್ಚೆ ಕಾಮಿಲ್ ಕಾಮ್ತಿ, ಮಾದೇವ್ ಭೊಟಾತಸಲೆ ರಾಜಕಾರಣಿ ವಾ ಕಂಗಾಲ್ ಖುದ್ದ್? ಹೆಂ ಹರ್ ನಾಗರಿಕ್ ಸಮಾಜೆಂತ್ ಘಡ್ತಾ. ಕುಕ್ಕೆಹಳ್ಳೆಂತ್ ಮಾತ್ ನ್ಹಂಯ್ - ಆಸೊಂ.
ಆತಾಂ ಬಾಲ್ತಾಜರಾಚಿ ಗತ್ ಕಾಂಯ್ ವೆಗ್ಳಿ ನ್ಹಂಯ್. ಸಾತ್ ಎಕ್ರೊ ಜಾಗ್ಯಾರ್ ಏಕ್ ಮಾತ್ ಬರ್ಯಾ ಉದ್ಕಾಝರಿಚಿ ಬಾಂಯ್ ಖೊಂಡ್ಚಿಚ್ ಆಪ್ಲ್ಯಾ ಜಿಣ್ಯೆಚೊ ಶೆವೊಟ್ ತಶೆಂ ತೊ ಜಿಯೆಲೊ. ಕಿತೆಂ ಕಿತೆಂ ಕೆಲ್ಯಾರೀ ತಾಚೆಕರ್ನಾಂ ತಾಚೆಂ ಸಪಣ್ ಖರೆಂ ಜಾಯ್ನಾ. ಜೆನ್ನಾಂ ತೆಂ ಪೂತ್ ಕರ್ತಾ ಸಾಕಾರ್ ಜಾತಾ ತೆನ್ನಾಂ ಹಕೀಗತ್ ವೆಗ್ಳೆಂಚ್ ರಾಕ್ಸಾರೂಪ್ ಘೆವ್ನ್ ತಾಚ್ಯಾ ದೊಳ್ಯಾಂ ಸಮೊರ್ ಉಭೆಂ ಜಾತಾ. ಉದ್ಕಾಝರಿಚಾ ಬಾಂಯ್ಚೆ ಆನಿ ಫಳಾಧಿಕ್ ಜಾಗ್ಯಾಚೆ ವಾಂಟೆ. ಬಾಂಯ್ಚಿ ಉದ್ಕಾಝರ್ಚ್ ಬಾಲ್ತಾಜಾರಾಚಾ ಜಿಣ್ಯೆಚಿ ನೀಜ್ ಅವನತಿ ಜಾವ್ನ್ ತಾಕಾ ತಿ ಬಲಿ ಘೆತಾ. ಕಾಣ್ಯೊ ಲಾಂಭಾಯೆಕ್ ’ಬಾಂಯ್’ ಏಕ್ ಸಾಂಕೇತಿಕತಾ ಜಾವ್ನ್ ಉರ್ತಾ. ಜಶೆಂ ಕಾಮಿಲ್ ಕಾಮ್ತಿಕ್ ಜಾಂಬ್ಳಾಚೊ ರೂಕ್ ಜೀವ್ ದಾತಾರ್ ತಶೆಂ ಬಾಲ್ತಾಜಾರಾಜ್ ಬಾಂಯ್ ಜೀವ್ ಸಂಪವ್ಣಾರ್ ಜಾತಾ. ದೊನೀಂ ಸಂಗ್ತಿ ರೂಪಕಾಂ, ರೂಕ್, ಬಾಂಯ್, ವೆವೆಗ್ಳ್ಯಾ ವರ್ಗಾಂನಿ ಉಂಚ್ಲ್ಯಾ ಆನಿ ಸಕಯ್ಲ್ಯಾ ವೈರುಧ್ಯಾತ್ಮಕ್ ಕಾಮಾಂ ಕರ್ತಾತ್.
ಮನ್ಶಾಪಣ್ ಸಯ್ತ್ ವೆಪಾರ್ ಜಾಲ್ಲ್ಯಾ ಕುಕ್ಕೆಹಳ್ಳೆಂತ್ ಕಂಗಾಲಾಕ್ ಕುಡ್ಡೆಂಪಣ್ಂಚ್ ಮಾರ್ಮಿಕ್ ಮುಗ್ಧತಾ ಆನಿ ಅಲವ್ಕಿಕ್ ಸುಖ್ ಕಿತ್ಯಾ ಭೊಗ್ತಾ? (ಕಾಣಿ:
ಕುಡ್ಡೊ)
ಕುಕ್ಕೆಹಳ್ಳೆಂತ್, ದುಬ್ಳಿಕಾಯ್ ಆಸಾ, ಗಿರೇಸ್ತ್ಕಾಯ್ ಆಸಾ, ದೇವ್ ದೆಂವ್ಚಾರ್ ಆಸಾ, ಮನ್ಶಾ ಹಾಂಕಾರ್ ಆಸಾ, ರುಕಾಚೆರ್ ಆನಿ ಮನ್ಶಾಚಾ ಘಾಯಾಚೆರ್ (ಘಾಯ್) ರಾಜಕಾರಣ್ ಕರೆಚೊ ಭುರ್ಸೊ ರಾಜಕಾರಣ್ ಆಸಾ. ಆನಿ ಹೆಂ ಸಗ್ಳೆಂ ಅಪ್ಲ್ಯಾ ಮಾಂತ್ರಿಕ್ ಮುಗ್ಧತೆನ್ ದಾಕಲ್ ಕರ್ನ್ ದಿಂವ್ಚೊ ಕಂಗಾಲ್ (ಮಾಲ್ಗುಡಿಚೊ ಸ್ವಾಮಿ ಜಶೆಂ) ಆಸಾ. ಪುಣ್ ಆರ್.ಕೆ.ನಾರಾಯಣಾಚಾ ಸ್ವಾಮಿಕ್ ಆನಿ ಹ್ಯಾ ನಿರ್ಗತಿಕ್ ಕಂಗಾಲಾಕ್ ಜಮೀನ್ ಅಂತ್ರಳಾಚೊ ಫರಕ್ ಆಸಾ, ಸ್ವಾಮಿಚಾ ವೆಕ್ತಿತ್ವಾಂತ್ ಪಳೆಂವ್ಕ್ ಮೆಳ್ಚಿ
Consistency (ಸಾಂದ್ರತಾ, ಏಕ್ ರೂಪತಾ) ಕಂಗಾಲಾಚಾ ವೆಕ್ತಿತ್ವಾಂಕ್ ಭಿಲ್ಕುಲ್ ಪಳೆಂವ್ಕ್ ಮೆಳಾನಾ, ತೊ ಎಕೆಕಾ ಕಾಣ್ಯೆಂತ್ ಎಕೆಕಾ ರುಪಾರ್ ಪ್ರಕಟ್ ಜಾತಾ. ಹಾಂತುಂ ವಲ್ಲಿಚಿ ಅಸ್ಕತ್ಕಾಯ್ ನಾ. ಬಗಾರ್ ತಾಣೆಂ ಹಿಚ್ಚ್ ವೈವಿಧ್ಯತಾ ಅಪ್ಲಿ ತಾಂಕ್ ಕರ್ನ್ ಘೆಂವ್ಚೆಂ ಪ್ರಾಮಾಣಿಕ್ ಪ್ರೇತನ್ ಕೆಲಾಂ. ಪುಣ್...
ಸಂಕಲನಾಂತ್ ಕಾಣ್ಯೊ ವಾಚಪ್ ವೆತಾನಾ ಘುಸ್ಪಡ್ತಾ ಆಸ್ತಾಂ ನಿರ್ಗತಿಕ್ ದಿವ್ಳಾಂತ್ ಕಾಮ್ ಕರ್ನ್ ಆಸ್ಚೊ ಕಂಗಾಲ್ ಕ್ರಿಕೆಟ್ ಖೆಳ್ಟಾ, ಇಲ್ಲ್ಯಾ ವೆಳಾನ್ ಖಣ್ಯೆಂತ್ ಪಡ್ತಾ, ಅನ್ಯೇಕ್ ಘಡ್ಯೆ ಕುಡ್ಡೊ ಜಾತಾ, ಅನ್ಯೇಕಾ ಘಡ್ಯೆ ಘಾಯಾಕ್ ಬ್ಯಾಂಡೇಜ್ ಘಾಲ್ತಾ. ಹಿ ವೆಕ್ತಿತ್ವಾಚಿ ವಿವಿಧತಾ ವ್ಹಯ್. ಪುಣ್ ಎಕಾಚ್ಚ್ ಕಥಾಪುಂಜಾಂತ್ ಘುಸ್ಪಡಾಯ್ತಾ. ವಲ್ಲಿನ್ ಹ್ಯೊ ಸಗ್ಳ್ಯೊ ಕಾಣ್ಯೊ ವೆವೆಗ್ಳ್ಯಾ ಕಾಳಾರ್ ಬರಯಿಲ್ಲ್ಯೊ ಜಾಂವ್ಕ್ ಪುರೊ. ವೆಕ್ತಿತ್ವಾಂತ್ಲೆಂ ಹೆಂ ವೇರಿಯೇಶನ್ ಸೊಡ್ಲ್ಯಾರ್ ಹೊ ಆಯ್ಬ್ ನಾತ್ಲ್ಲೊ ಏಕ್ ಅಪ್ರೂಪಾಚೊ ಸಂಗ್ರಹ್. ಹಾಂತುಂ ಬರಯ್ಣಾರಾಚಿಯ್ ಚೂಕ್ ನಾ, ಕಾಣಿಯೊ ಸಂಗ್ರಹಾಂತ್ ವಾಚ್ತಾನಾ ವಾಚ್ಪ್ಯಾಕ್ ತ್ಯಾ ವಾತಾವರಣಾಂತ್ಲೆಂ ಭಾಯ್ರ್ ಯೇಂವ್ಕ್ ಇಲ್ಲೊ ವೇಳ್ ಲಾಗ್ತಾ ಖರೆಂ.
ಆತಾಂ ಕಂಗಾಲ್, ಕಾಮಿಲ್ ಕಾಮ್ತಿ, ಮಾದೇವ್ ಭೊಟ್ ಆನಿ ಬಾಲ್ತಾಜಾರ್ ಸೊಡ್ಲ್ಯಾರ್ ಕುಕ್ಕೆಹಳ್ಳೆಂತ್ ಕೊಣ್ನಾ ಅಶೆಂ ನ್ಹಂಯ್. ಪುಣ್ ಕುಕ್ಕೆಹಳ್ಳೆಚಿಂ ದೋಣ್ ರುಪಾಂ ಆಸಾತ್. ಏಕ್: ಕಂಗಾಲ್ ಆನಿ ತಾಕಾ ಶೀದಾ ಲಗ್ತಿ ಜಾಲ್ಲೆಂ, ದುಸ್ರೆಂ: ಕಂಗಾಲಾಚಾ ಪರಿಧೆಭಾಯ್ಲೆಂ. ತಾಂತುಂ ರೊನಿ, ಮಂಗಲ್ದಾಶ್ ಶಾಸ್ತ್ರಿ, ಅಂತು, ಚಾರ್ಲಿ ಸಯ್ತ್ ಆಸಾತ್. ’ಸುಳಿ’, ’ಎಕಾ ಪಿಂದ್ಲೆಲ್ಯಾ ಪಾನಾಚಿ ಕಥಾ’, ’ಸಕ್ಸೆಸ್ ಫಾರ್ಮುಲಾ’, ’ಅದ್ರಶ್ಯ್ ಸಕತ್’ ಹ್ಯಾ ಕಾಣಿಯಾಂನಿ ಕಂಗಾಲ್ ನಾ. ಪುಣ್ ಕುಕ್ಕೆಹಳ್ಳಿ ಆಸಾ. ಹ್ಯೇವಿಶಿಂ ದುಸ್ರ್ಯಾ ಭಾಗಾಂತ್ ಬರಯ್ತಾಂ. ತೇ ಪರ್ಯಾಂತ್ ಕಂಗಾಲಾಚಾ ಕೊಶೆಡ್ದಾಂತ್ ಕುಕ್ಕೆಹಳ್ಳೆಚೊ ಪಿರಾಣ್ ಸೊದ್ಚೆಂ ಕಾಮ್ ಕರ್ಯಾಂ.
ಕಥಾಪಾಠ್ - 1. ಕಾಣಿ: ಬಾಂಯ್ [ವಿಮರ್ಸೊ] - ಕ್ಲೆರೆನ್ಸ್ ಕೈಕಂಬ
ಕ್ಲೆರೆನ್ಸ್ ಕೈಕಂಬ: ಕೊಂಕ್ಣಿ ಸಾಹಿತ್ಯಾಂತ್ ಏಕ್ ಭಳ್ವಂತ್ ಕಾಣ್ಯೆಗಾರ್ ಆನಿ ಮಟ್ವ್ಯಾ ಕಾಣ್ಯಾಂನಿ ಅಪ್ಲಿಚ್ ಮ್ಹಳ್ಳಿ ಶೈಲಿ ಆಸೊನ್ ಕಾಣ್ಯೊ ಬರಂವ್ಚಾ ಹಾಚಾ ಮಟ್ವ್ಯಾ ಕಾಣ್ಯಾಂಚೊ ಬೂಕ್ ’ಸುಟ್ಕಾ’ ಆಯ್ಲೆವಾರ್ ಪರ್ಗಟ್ ಜಾಲಾ. ಪುಣ್ ಕೊಂಕ್ಣಿ ಸಾಹಿತ್ಯಾಕ್ ತೊ ಸಭಾರ್ ವರ್ಸಾಂ ಥಾವ್ನ್ ದೇಣ್ಗಿ ದೀವ್ನ್ ಆಯ್ಲಾ. ಏಕ್ ಬರಿ ನದರ್, ಗೂಂಡ್ ಚಿಂತಾಪ್ ಆನಿ ವಿಶ್ಲೇಶಣ್ ಕರ್ಚಿ ಶ್ಯಾಥಿ ಹಾಚಾ ಬರ್ಪಾಂಕ್ ಆಸಾ ಮ್ಹಣ್ ಹಾಚಿಂ ಪ್ರಭುದ್ದ್ ಬರ್ಪಾಂ ಗೊವಾಯ್ ದಿತಾತ್. [ಬಾಂಯ್ ಮಟ್ವಿ ಕಾಣಿ ವಾಚುಂಕ್ ಹಾಂಗಾಸರ್ ಭೆಟ್ ದಿಯಾ]
ಮಟ್ವ್ಯಾ ಕಾಣಿಯಾಂಕ್ ಬರಂವ್ಚೆಂ ಆನಿ ವಾಸ್ಚೆಂ ಮಾತ್ ಕಾಮ್ ಕರ್ನ್ ಆಸ್ಲ್ಲ್ಯಾ ಮ್ಹಜ್ಯಾ ತಸಲ್ಯಾನ್ ಮಟ್ವ್ಯಾ ಕಾಣಿಯಾಂಚಿ ವೊರಾವ್ಣಿ ಕರುನ್ ವಿಮರ್ಸೊ ಬರಯ್ತಾನಾ, ತಕ್ಲಿ ಇಲ್ಲಿ ಚಡ್ ಆಟಯ್ಜಾಯ್ ಪಡ್ತಾ ತಶೆಂ ಭಗ್ತಾ ಆನಿ ಹ್ಯಾ ವೆಳಿಂ ಕಾಳ್ಜಾ ಗುಡಾಂತ್ಲೆಂ ಕಾಳಿಜ್ ಥೊಡೆಂ ಮಿರ್ಂಇರ್ತಾ ಮ್ಹಣ್ಯೆತ್. ತಸೆಂ ಮ್ಹಣ್ಚೆಂ ತರ್ ವಿಮರ್ಸೊ ಕರುಂಕ್ ವೆಚ್ಯಾ ಮಟ್ವ್ಯಾ ಕಾಣಿಯೆಕ್ ವಾಟ್ಚ್ಯಾ ಫಾತ್ರಾಚೆರ್ ವಾಟುನ್, ಹಜಾರ್ ವಾಂಟೆ ಕರುನ್, ಝಡ್ತೆಚೆಂ ವಾಗ್ಮೂಲ್ ದೀಂವ್ಕ್ ಹಾಂವ್ ಉಭೊ ನಾ ತಶೆಂಚ್ಚ್ ಕಾಣಿ ಬರಯ್ತೆಲ್ಯಾಕ್ ಲೊಣಿಯೆಚೊ ಲೇಪ್ ಸಾರವ್ನ್ ವಾಜ್ಪಾ ಮೇಳಾಸವೆಂ ಧುಂಪಂವ್ಕ್ ಹಾಂವ್ ಸಕ್ಚೊಂನಾ.
ಕಾಣಿಯೆಚ್ಯಾ ಲಾಂಬಾಯೆಕ್ ಕಾಣಿಯೆ ಸಾಂಗಾತಾ ತಿಚೊ ವಾಟ್ಸುರಿ ಜಾವ್ನ್, ಕಾಣಿಯೆಚೊ ಜೀವ್ ಮ್ಹಜ್ಯಾ ಜೀವಾಂತ್ ಭರುನ್, ಕಾಣಿಯೆಚ್ಯಾ ವ್ಹಾಳ್ಯಾಂತ್ ಹಾವ್ಂಚ್ ವಾಂಟೆಲಿ ಜಾವ್ನ್, ತಿಚೆರ್ ತೀಕ್ಷ್ಣ್ ವಾಕ್ರಾ ನದರ್ ಮಾರುನ್, ಕರ್ಲ್ ಕಾಡುನ್ ಗಿರೊಪ್ ಉಸವ್ನ್ ಮ್ಹಜ್ಯಾ ಶಾತಿಯೆ ಭಿತರ್ ಮ್ಹಜ್ಯಾ ಚಿಂತ್ನಾಂನಿಂ ಭಗ್ಲ್ಲೆಂ ಸಬ್ಧಾಂನಿಂ ಉಸವ್ನ್ ಹೊ ವಿಮರ್ಸೊ ಹಾಂವ್ ಬರಯ್ತಾಂ ಮ್ಹಣ್ ಸಾಂಗ್ಚ್ಯಾ ತಿತ್ಲೆಂ ಧಯ್ರ್ಯ್ ಮ್ಹಾಕಾ ನಾ ತರ್ಯ್ ತಶೆಂ ಕರುಂಕ್ ಮ್ಹಜ್ಯಾ ಶಾತಿಯೆiಭಿತರ್ಲೆಂ ಸಾದೆಂ ಪ್ರೇತನ್ ಹಾಂವ್ ಕರ್ತಾಂ..
ಂಹಜ್ಯಾ ಚಿಂತ್ಪಾಪ್ರಕಾರ್ ಮಟ್ವಿ ಕಾಣಿ ಮ್ಹಣ್ತಾನಾ ಭಂವಾರಿಂಚ್ಯಾ ಮನ್ಶಾ ಜೀವನಾಚೆಂ ಕುಸ್ಕುಟ್ ಚಿತ್ರ್ ಯಾ ಕುರ್ಕುರಿತ್ ಘಡಿತ್ ಲೇಖಕಾನ್ ಆಪ್ಲ್ಯಾ ಮತಿ ಪಡ್ದ್ಯಾಚೆರ್ ಚಿಂತುನ್, ಆಟವ್ನ್, ಮೊಳುನ್, ಸೊಡವ್ನ್, ಉಪ್ರಾಂತ್ ಸಂಪ್ಯಾ ಉತ್ರಾಂನಿ ಎಕಾ ಕಾಗ್ದಾ ಫಾಳಿಯೆರ್ ನಿರ್ಧಾರಿತ್ ಫಾಯ್ನೆಲಾ ಭಿತರ್ ಮಾಖುನ್, ವಾಚ್ತೆಲ್ಯಾಕ್ ಉರ್ಭೆಚ್ಯಾ
ಉಮ್ಯಾಂನಿ ಭರುನ್, ಉಮಾಳ್ಯಾಂಚ್ಯಾ ಹುಮೆದಿನ್ ಸುಂರ್ಗಾರಾವ್ನ್, ಕಾಣಿ ಮುಕಾರುನ್ ವೆಚ್ಯಾ ಹರ್ಯೇಕಾ ಘಡಿಯೆ ಆಶೆ ಅತ್ರೆಗಾಚಿಂ ಫಿಂತಾಂ ಫುಲವ್ನ್, ಉನ್ಂಆದಾಚೆ ಪುಡ್ಪುಡಿತ್ ಪೊಟ್ರೆ ಧಾಖಂವ್ಚಿ ಎಕಾ ಉತ್ರಾಂ ಶಿಂಖಳ್.
ಅಸಲಿ ಏಕ್ ಕಾಣಿ, ಮಾನಾಯ್ ವಲ್ಲಿ ಕ್ವಾಡ್ರಸಾನ್ ಬರಯಿಲ್ಲ್ಯಾ "ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ" ಹ್ಯಾ ಬುಕಾ ಸಂಗ್ರಹಾಂತ್ಲಿ "ಬಾಂಯ್" ಮ್ಹಣ್ ವಳ್ಕೊನ್ ಆನಿ ವಿಂಚುನ್ ಹೊ ಹಾಂವ್ ಕತಾಪಾಠ್ ಸುರು ಕರ್ತಾಂ.
’ಕತಾಪಾಠ್’ ಮ್ಹಳ್ಯಾರ್ ಟೀಕಾ ವ ಖೊಡ್ ಹಾಚೊ ವ್ಹಾಳೊ ಮ್ಹಣ್ ಹಾಂವ್ ಸಾಂಗಾನಾ ಬಗಾರ್ ವಿಮರ್ಸ್ಯಾಂಚೊ ಸುವಾಳೊ ಮ್ಹಣ್ ವೊಪ್ತಾಂ. ಏಕ್ ನಿತಳ್, ಸ್ವಾಭಾವಿಕ್ ಆನಿ ಪಕ್ಷ್ಪಾತ್ ನಾತ್ಲ್ಲೆಂ ವಿಮರ್ಶಾತ್ಮಕ್ ಲೇಖನ್. ಹ್ಯಾ ವಿಮರ್ಶ್ಯಾ ಉಪ್ರಾಂತ್ ಮ್ಹಾಕಾ, ತುಕಾ ಆನಿ ಜಾಯ್ತ್ಯಾ ಕಾಣಿಯೊಂ ಬರಯ್ತೆಲ್ಯಾಂಕ್ ಬರೆಂ ಜಾಲ್ಯಾರ್ ಹೊ ಕತಾಪಾಠ್ ಆಸಾ ಕೆಲ್ಲ್ಯಾಂಚೊ ಆನಿ ಮ್ಹಜೊ ವಾವ್ರ್ ಥೊಡೊ ಪುಣೀ ಫಳಾಧಿಕ್ ಜಾಲೊ ಮ್ಹಣ್ ಆರ್ಥ್.
’ಬಾಂಯ್’ ಕಾಣಿಯೆಚೊ ವಿಮರ್ಸೊ ಕರ್ಚ್ಯಾ ಫುಡೆಂ, ಆಖ್ಖ್ಯಾ ವಿಮರ್ಶ್ಯಾಚೆ ಧೋನ್ ಭಾಗ್ ಕರ್ತಾಂ:-
ಪಯ್ಲೊ; ಕಾಣಿಯೆಚೆಂ ಊಂಚ್ಪಣ್ ಉಭಾರುನ್ ಲೇಖಕಾಚ್ಯಾ ಚೆಪ್ಯಾರ್ ಶಾಭಾಸ್ಕೆಚಿಂ ಪಾಕಾಂ ಮಾಕ್ಚಿಂ.
ದುಸ್ರೊ; ಕಾಣಿಯೆಂತ್ ದಿಸ್ಚೆಂ ಉಣೆಂಪಣ್ ಉಚಾರುನ್, ಲೇಖಕಾನ್, ಹಾವೆಂ ಆನಿ ಜಾಯ್ತ್ಯಾ ಲೇಖಕಾಂನಿ ಅಪ್ಲ್ಯಾ ಬರ್ಪಾಂನಿ ತಿ ಜಾಗ್ರುತ್ಕಾಯ್ ಸಾಂಭಾಳುನ್ ವರ್ಚಿ. ಜಾಯ್ತ್ಯಾ ಪಾವ್ಟಿಂ, ವಿಮರ್ಶ್ಯಾಂತ್ ಪಯ್ಲೊ ಭಾಗ್ ಚಡ್ ಆಸ್ಚೊ ದಿಸ್ತಾ, ಮ್ಹಳ್ಯಾರ್ ಕಾಣಿ ಬರಿ ಆಸ್ಲ್ಲಿ ಚಡ್ ದಿಸ್ತಾ, ತಶೆಂ ಜಾಲ್ಯಾರ್ ತ್ಯಾ ವಿಶಿಂ ಚಡ್ ಬರಂವ್ಚ್ಯಾಂತ್ ಕಾಂಯ್ ಚೂಕ್ ನಾ. ಮ್ಹಜ್ಯಾ ಚಿಂತ್ಪಾ ಪ್ರಕಾರ್ ಕಾಣಿಯೆಚೆಂ ಚಡ್ ಬರೆಂಪಣ್ ಯಾ ಊಂಚ್ಪಣ್, ವಿಮರ್ಸೊ ವಾಚ್ತೆಲ್ಯಾಂಕ್ ಚಡ್ ಬರೆಂಪಣ್ ಜಾತಾ. "ಹಿ ಇತ್ಲಿ ಬರಿ ಕಾಣಿ - ತರ್ ಹ್ಯಾ ಕಾಣಿಯೆಬರಿಚ್ಚ್ ಹಾಂವೆಂಯ್ ಕಾಣಿ ಬರಯ್ಜಾಯ್" ಮ್ಹಳ್ಳಿಂ ಚಿಂತ್ನಾಂ ನವ್ಯಾ ಬರಯ್ಣಾರಾಂ ಥಂಯ್ ಕಿರ್ಲಾತಾತ್. ಹ್ಯಾಚ್ಚ್ ಪ್ರಕಾರ್ ಉಣೆಂಪಣ್ ಆಸಾ ತರ್ ತೆಂ ಬರಯ್ಜಾಯ್ ಆನಿಂ ಬರಯಿಲ್ಲ್ಯಾ ವರ್ವಿಂ ಕಾಣಿ ಬರಯ್ತೆಲ್ಯಾಕ್ ಚಡ್ ಬರೆಂಪಣ್ ಜಾತಾ.
ಪಯ್ಲ್ಯಾ ಭಾಗಾಚೆಂ ಹಾಂವ್ ತೀನ್ ವಾಂಟೆ ಕರ್ತಾಂ.
ಪಯ್ಲೊ - ಕಾಣಿಯೆಚೊ ಆರಂಭ್ ವಾ ಸುರ್ವಾತ್ ಯಾ ಬುನ್ಯಾದ್
ದುಸ್ರೊ - ಕಾಣಿಯೆಚೊ ಜೀವ್ ಯಾ ವ್ಹಾಳೊ
ತಿಸ್ರೊ - ಸಂಪವ್ಣಿ ಯಾ ’ಕ್ಲೈಮ್ಯಾಕ್ಸ್’
ಕಾಣಿಯೆಚೊ ಆರಂಭ್:
ಘಡ್ಘಡೊ ಯೆತಾನಾ ಪಾವ್ಸ್ ಯೆಂವ್ಚೊ ಜಾಲೊ ಮ್ಹಣ್ಚ್ಯಾಬರಿ, ಕಾಣಿಯೆಚೊ ಆರಂಭಾಚೊ ಆಡಂಬರ್ ಆಖ್ಖ್ಯಾ ಕಾಣಿಯೆಂತ್ ಆಸ್ಯೆತ್ ಜಾಲ್ಲ್ಯಾ ಕಾಣಿಯೆಚ್ಯಾ ಸಂಘರ್ಶಾಕ್ ಆನಿ ಸ್ಪಂದನಾಚ್ಯಾ ಸ್ವರೂಪಾಚೊ ಸ್ಪರ್ಸ್ ದಿತಾ. ಸುರ್ವಾತೆಚ್ಯಾ ಉತ್ರಾಂನಿ ಆಖ್ಖ್ಯಾ ಕಾಣಿಯೆಚೆಂ ರೂಪ್ ಉಜಾರ್ ಕೆಲೆಂ ತರ್ ಕಾಣಿಯೆ ಗೊಲಿಯಾತಾಚೆಂ ಭಳ್ ಮೆಳ್ತಾ. ಹ್ಯಾ ಬುನ್ಯಾದೆಚ್ಯಾ ಉತ್ರಾಂಚೆರ್ ಕಸಲ್ಯಾ ರಿತಿಚಿ ಕಾಣಿ ವಾಚ್ಪ್ಯಾಕ್ ವಾಚುಂಕ್ ಮೆಳಾತ್ ಮ್ಹಳ್ಳೆಂ ಲೇಖಕ್ ಖಾತ್ರಿ ಕರ್ತಾ.
"ಬಾಲ್ತಾಜಾರ್ ಸೊಜಾಕ್ ಬಾಪಾಯ್ನ್ ಕರ್ನ್ ದವರ್ಲ್ಲೊ ಸಾತ್ ಏಕ್ರೆ ಜಾಗೊ ಆಸ್ಲ್ಲೊ ತರ್ಯ್ ಕುಮೇರಿಚ್ಯಾ ಪೊಕಾ ಪಿಂತಾಚ್ಯಾ ವಿಧ್ವಿ ಧುವೆಚ್ಯಾ ಮೊಗಾರ್ ಪಡೊನ್ ಗಾಂವಾರ್ ನಾಲಿಸಾಯ್ ಜಾಲ್ಲ್ಯಾ ಕರುಂಕ್ ಬಾಪಾಯ್ ಗಾಬ್ರುನ್ ತಾಕಾ ಘರಾಂತ್ಲೊ ಭಾಯ್ರ್ ನಿಕ್ಳಾಯಿಲ್ಲೊ."
ಬಾಂಯ್ ಕಾಣಿಯೆಂತ್ ಏಕ್ ಘಣ್ಗಣಿತ್ ಸುರ್ವಾತ್ ದೀವ್ನ್, ಲೇಖಕಾನ್ ಗಾಂವ್ಚ್ಯಾ ಘರಾಣ್ಯಾಚೆಂ ಪಿಂತುರ್ ಕಾಣಿಯೆಂತ್ ಉದೆವ್ನ್ ಯೆಂವ್ಚೆಂ ಸುರ್ವಾತೆರ್ಚ್ಚ್ ಖರೋಖರ್ ಜಾವ್ನ್ ಧಾಕಯ್ಲಾಂ. ಹಿ ಕಾಣಿ
ಆಮ್ಚ್ಯಾ ಆತಾಂಚ್ಯಾ ಕಾಳಾ ವರ್ನಿ ಚಿಕ್ಕೆ ಪಯ್ಲೆಂಚ್ಯಾ ಕಾಳಾಚಿ ಕೊಣ್ಣಾ ಮ್ಹಳ್ಳೆಂ ಚಿಂತಾಪ್ ಸುರ್ವಾತೆಚಿಂ ಉತ್ರಾಂ ವಾಚ್ತಾನಾಂಚ್ ವಾಚ್ಪ್ಯಾಚ್ಯಾ ಮತಿಂತ್ ಉದೆತಾತ್. ಭಾವನಾಂಚೊ ಸಂಘರ್ಷ್, ಘರಾಣ್ಯಾಂನಿ ಮರ್ಯಾದಿಚೊ ಸಂಕೇತ್ ಜಾವ್ನ್ ಪುತಾಕ್ ಧಾಂವ್ಡಾಂವ್ಚ್ಯಾ ಸಕ್ತೆಚಿ ವಳಕ್, ಕಾಣಿ ಕುಟ್ಂಆ ಶಾಸ್ತ್ರಾಚೆರ್ ಭಾಂಧುನ್ ಹಾಡ್ಲೆಲಿ ಜಾವ್ನಾಸ್ತೆಲಿ ಮ್ಹಳ್ಳೊ ಶರೊ ಸಾರ್ಕೊ ವಾಚ್ಪ್ಯಾಕ್ ಮೆಳ್ತಾ.
ಹ್ಯಾ ಸುರ್ವಾತೆಂತ್ ಆಕಾಸ್ಚ್ಚ್ ಧರ್ಣಿಚೆರ್ ಹಾಡ್ಚೆಂ ಭಳಾಧಿಕ್ ಪ್ರೇತನ್ ಲೇಖಕ್ ಕರ್ತಾ ಮ್ಹಳ್ಯಾರ್ ಕಾಣಿಯೆಕ್ ಹಜಾರ್ ಶೆಂಕಾರಿಂ ಪುಲ್ಲ್ಲ್ಯಾ ಬರಿ ಜಾಯ್ತ್. ಏಕ್ ಕುಟ್ಂಆ ಝುಜ್ಚ್ಚ್ ಯೆಂವ್ಚ್ಯಾರ್ ಆಸಾ ಮ್ಹಳ್ಳೊ ಹಿಶಾರೊ ಲೇಖಕ್ ಹಾಂಗಾಸರ್ ದಿತಾ.
ಆನಿ ಅಶೆಂ ಮ್ಹಣ್ಚೆಂ ತರ್ ಹಿ ಸುರ್ವಾತ್ - ಬಾಂಯ್ ತಸಲ್ಯಾ ಕಾಣಿಯೆಕ್ ಸಹಜ್ಲ್ಲಿ ಆನಿ ಸಂಪಿ.
ಕಾಣಿಯೆಚೊ ಜೀವ್ ಯಾ ವ್ಹಾಳೊ:
ಆರಂಭಾ ತಾವ್ನ್ ಆಖ್ರೇಕ್ ಮೆಳ್ಚಿ ಸಂಪವ್ಣಿ ವಾಂಟ್ಯಾಂ ಮ್ಹಣಾಸರ್ ಮಧೆಂ ಮೆಳ್ಚ್ಯಾ ಕಾಣಿಯೆಚ್ಯಾ ವ್ಹಾಳ್ಯಾಕ್ ಕಾಣಿಯೆಚೊ ಜೀವ್ ಯಾ ಮಧ್ಲೊ ಭಾಗ್ ಯಾ ಪರ್ಮಳಿಕ್ ವ್ಹಾಳೊ ಮ್ಹಣ್ಯೆತ್.
ಮಟ್ವ್ಯಾ ಕಾಣಿಯೆಚೊ ಮಧ್ಲೊ ಭಾಗ್ ವಿಮರ್ಸೊ ಕರ್ತಾನಾ, ಆಖ್ಖಿ ಕಾಣಿ ಆಂಇಂ ವ್ಹಜನ್ ಕರುನ್ ಪಳಯ್ತಾಂವ್. ತಶೆಂ ಕಾಣಿಯೆಚೊ ಚಡ್ತಿಕ್ ಜೀವ್ ಆಸ್ಚೊಚ್ಚ್ ಹ್ಯಾ ಭಾಗಾಂತ್. ಸಗ್ಳೆಂ ಸತ್ವ್, ತತ್ವ್ ಆನಿ ಕಾಣಿಯೆಚಿ ಸೊಭಾಯ್ ಪಳೆಂವ್ಕ್ ಮೆಳ್ಚಿಚ್ಚ್ ಹ್ಯಾ ವಾಂಟ್ಯಾಂತ್. ಕಾಣಿ ಬರಿ ಯಾ ಪಾಡ್ ಮ್ಹಳ್ಳೊ ನಿರ್ಧಾರ್ ಘೆಂವ್ಚೊಯ್ ಹ್ಯಾ ವಾಂಟ್ಯಾ ವರ್ವಿಂ. ದೆಕುನ್, ಹ್ಯಾ ವಾಂಟ್ಯಾಚೊ ಸೂಕ್ಷ್ಂ ರಿತಿನ್ ವಿಮರ್ಸೊ ಕರ್ಯಾಂ.
ಹ್ಯಾ ಮಧ್ಲ್ಯಾ ವಾಂಟ್ಯಾಚೊ ವಿಮರ್ಸೊ ಕರ್ತಾನಾ, ಏಕೇಕ್ ಸುತ್ ಮೆಕ್ಳೆಂ ಕೆಲ್ಲ್ಯಾ ಭಾಶೆನ್ ವಿಂಗಡ್ ವಿಂಗಡ್ ಜಾವ್ನ್
ಆಮಿ ಸಮೀಕ್ಷಾ ಕರ್ಯೆತಾ.
ವ್ಹಾಳೊ : ಮಟ್ವ್ಯಾ ಕಾಣಿಯೆಚೊ ಮಧ್ಲೊ ವಾಂಟೊ
ಥಂಡ್ ಆನಿ ಘಮಂಡ್ ನ್ಹಂಯ್ಚ್ಯಾ ಉದ್ಕಾಬರಿ ವ್ಹಾಳೊಂಕ್ ಜಾಯ್. ಕಾಲಯಿಲ್ಲ್ಯಾ ಗೋಡ್ ಚುರ್ಣಾಚ್ಯಾ ಪೊವಾಬರಿ ರುಚಿಕ್. ವೊಡ್ತಾಂತ್ಲ್ಯಾ ಫುಲಾಂಬರಿ ರಂಗಾಳ್. ಮೊಂವಾಬರಿ ಸ್ವಾದಿಕ್.
’ಬಾಂಯ್" - ಕಾಣಿ ಘಮಂಡಾಯೆನ್ ಆರಂಭ್ ಜಾಲ್ಲ್ಯಾ ಉಪ್ರಾಂತ್ ತಾಚ್ಯಾ ಮಧ್ಲೊ ಜೀವ್ ಗಂಗಾ ನಂಯ್ ಬರಿ ಸುಗಮಾಯೆನ್ ವ್ಹಾಳ್ತಾ. ನಿತಾಳಾಯೆನ್ ಆನಿ ನಿರಂತರ್ ಜಾವ್ನ್ ಮುಕಾರ್ಸುನ್ ವೆತಾ. ತಂಡ್ ಆನಿ ಸರಾಗ್. ತ್ಯಾ ವ್ಹಾಳ್ಯಾಂತ್ ಲೇಖಕಾನ್ ವಾಚ್ಪ್ಯಾಕ್ ಆಪ್ಲ್ಯಾ ಕಾಳ್ಜಾಕ್ ಆರಾವ್ನ್ ಧರುನ್ ಮುಕಾರ್ ವೆಲಾಂ ಮ್ಹಣ್ ಉಚಾರುಂಕ್ ಕಾಂಯ್ ದಾಕ್ಷೆಣ್ ಜಾಯ್ನಾ.
ಬಾಲ್ತಾಜಾರ್ ಸೊಜಾಚ್ಯಾ ಜಿಣಿಯೆಚಿಂ ಪಾನಾಂ, ಬಾಪುಯ್ ಸರ್ಲ್ಯಾ ನಂತರ್ ಘಾಟಾರ್ ತಾವ್ನ್ ಗಾಂವಾಕ್ ಆಯಿಲ್ಲ್ಯಾ ಉಪ್ರಾಂತ್ ಏಕಾ ಪಾಟ್ಲ್ಯಾನ್ ಏಕ್ ಜಾವ್ನ್ ನಿರಂತರ್ ಹಾಂಗಾಸರ್ ವ್ಹಾಳೊನ್ ವೆತಾತ್. ಕಾಣಿಯೆಂತ್ ಬಾಲ್ತಾಜಾರ್ ತಸಲ್ಯಾಚ್ಯಾ ಸಾದ್ಯಾ ಆನಿ ನೈಜ್ ಕಾಲೆತಿಚ್ಯಾ ಏಕಾ ಕುಟ್ಮಾಚಿ
ಜೀವನ್ ಚರಿತ್ರಾಚ್ಚ್ ಮಟ್ವ್ಯಾನ್ ಪುಣ್ ನಾಜೂಕಾಯೆನ್ ಲೇಖಕ್ ವರ್ಣಿತಾ ಆನಿ ತಶೆಂ ಕರ್ಚ್ಯಾಂತ್ ಜಯ್ತೆವಂತ್ ಜಾಲಾ. ಘಡಿತಾಂ ಪಾಟ್ಲ್ಯಾನ್ ಘಡಿತಾಂ ಮಾಂಡುನ್ ಯೆತಾನಾ, ಆತುರಿತ್ ಜೀವನ್ ಶಿಂಖಳ್ ಘುಂತುಂಕ್ ಲೇಖಕ್ ಜಯ್ತೆವಂತ್ ಜಾಲಾ.
ಭಾಸ್ : ಮಧ್ಲ್ಯಾ ಭಾಗಾಂತ್ ಚಡಾವತ್ ಜಾವ್ನ್ ಭಾಸ್ ಉಗ್ತ್ಯಾನ್ ದಿಸ್ತಾ ಕಿತ್ಯಾಕ್ ಹೊ ಭಾಗ್ ವ್ಹಡಾ ಜಿನ್ಸಾಚೊ. ಮಟ್ವಿ ಕಾಣಿ ಚಡಾವತ್ ಜಾವ್ನ್ ಸಾದ್ಯಾ ವಾಚ್ಪ್ಯಾಕ್ ಮ್ಹಣ್ ತಯಾರ್ ಜಾತಾ ಜಾಲ್ಲ್ಯಾನ್ ಹಾಂತು ಉಂಚ್ಲೆಂ ಸಾಹಿತಿಕ್ ಮಟ್ಟ್, ಸಮ್ಜೊಂಕ್ ಕಶ್ಟ್ ಜಾಂವ್ಚಿಂ ಉತ್ರಾಂ ದಿಸೊಂಕ್ ಸಾದ್ ನಾ ಯಾ ದಿಸೊಂಕ್ ನಜೊ. ಕಾಣಿಯೆಂತ್ ಭಾಸ್ ಸಾಧಿ ಆಸ್ಲ್ಲೆ ತಿತ್ಲಿ ಸಾದ್ಯಾ ವಾಚ್ಪ್ಯಾಕ್ ಚಡ್ ಗುಂಡಾಯೆನ್ ಸಮ್ಜಾತಾ. ಲೊಣ್ಚ್ಯಾಚಾ ಕಡಿಯೆಚೊ
ಥೆಂಬೊ ಜಿಬೆರ್ ಪಡ್ಲ್ಲ್ಯಾ ತಕ್ಷಣ್ ರೂಚ್ ಕಳ್ಲ್ಲ್ಯಾ ಬರಿ.
"ಬಾಂಯ್" ಕಾಣಿಯೆಂತ್ ವಾಪಾರ್ಲ್ಲಿ ಭಾಸ್ ಬೋವ್ ನಾಜೂಕ್ ಆನಿ ಸಾದಿ. ಹ್ಯಾ ವರ್ವಿಂ ಕಾಣಿಯೆಚೆಂ ವ್ಹಜಾನ್ ಹಜಾರ್ ವಾಂಟ್ಯಾನ್ ವರ್ತೆಂ ಜಾಲಾಂ. ಸಾಧಿ ಆನಿ ಸಂಪಿ ಕೊಂಕ್ಣಿ ಭಾಸ್ ವಾಪಾರ್ಲ್ಲ್ಯಾ ನದ್ರೆನ್ ದೆಖ್ಲೆಂ ತರ್ ಹ್ಯಾ ಕಾಣಿಯೆಚೆಂ ವರ್ತೆಂಪಣ್ ದಿಸೊನ್ ಯೆತಾ. ಚಡಾವತ್ ಜಾವ್ನ್ ಅಪ್ರೂಪ್ ವಾಚುಂಕ್ ಮೆಳ್ಚೆ ಗಾಂವ್ಚೆ ಸಾದೆ ಸಬ್ಧ್ ಹಾಂಗಾಸರ್ ಉಪ್ಯೊಗ್ ಕೆಲ್ಯಾತ್. ಕಂಡ್ಯೊ, ಭಾಟಿಯ್ಯೊ, ದುದಿಂ, ಗೊಸಾಳಿಂ ಅಸಲೆ ಸಬ್ಧ್ ವಾಚ್ತಾನಾ ಅಂತರ್ಜಾಳಾಚೆರ್ ಕಾಣಿ ವಾಚ್ಪ್ಯಾಕ್ಯ್ ಏಕ್ ಪಾವ್ಟಿಂ ಆಮ್ಚ್ಯಾ ಗಾಂವ್ಚ್ಯಾ ಧರ್ತೆಚೊ ಪರ್ಮಳ್ ಯೆತಾಚ್ಚ್.
ಇಂಗ್ಲೀಶ್ ಸಬ್ಧ್ ಹಾಂಗಾಸರ್ ವಾಪರುಂಕ್ಚ್ಚ್ ನಾಂತ್. ಆಜ್ಕಾಲ್ ಜಾಯ್ತ್ಯಾ ಕಾಣಿಯಾಂನಿ ಇಂಗ್ಲೀಸ್ ಸಬ್ಧ್ ವಾಪರ್ಚ್ಯಾಬರಿ ಹಾಂಗಾಸರ್ ತಶೆಂ ಜಾಯ್ನಾಶೆಂ ಲೇಖಕಾನ್ ಮಿನತ್ ಕೆಲ್ಯಾ. ಜಾಯ್ತ್ಯಾ ಜಣಾಂನಿ ’ಡಾಕ್ಟರ್’ ಮ್ಹಣ್ ಬರಂವ್ಚ್ಯಾ ಕಡೆ ಹಾಂತುಂ ’ದೊತೊರ್’ ಮ್ಹಣ್ ಲಿಖ್ಲಾಂ. ತಸೆಂ ಪರ್ದೆಶಿ ಉತ್ರಾಂ ಹ್ಯಾ ಕಾಣಿಯೆಂತ್ ನಾಸ್ತಾನಾ, ಅಪುಟ್ ಕೊಂಕ್ಣಿ ಧರ್ತೆ ವಯ್ಲಿ ಕಾಣಿ ತಶೆಂ ಭಗ್ತಾ.
ಪಾತ್ರ್, ರುಪ್ಣಿಂ ಆನಿ ನಾಂವಾಂ ವಿಂಚವ್ಣ್ : ಸಂಪಿ ಆನಿ ಜಾಯ್ ಪುರ್ತೆ ಪಾತ್ರ್ ಜಾಗ್ರುತ್ಕಾಯೆನ್ ವಿಂಚವ್ಣ್ ಕೆಲ್ಯಾರ್ ಕಾಣಿಯೆಚೆಂ ರೂಪ್ ವಾಡ್ತಾ. ಪಾತ್ರಾಂಕ್ ದಿಂವ್ಚಿಂ ನಾಂವಾಂ ತ್ಯಾ ತ್ಯಾ ಕಾಣಿಯೆಚ್ಯಾ ಸನ್ನಿವೇಶಾಂಕ್ ಸೂಕ್ತ್ ಜಾಲ್ಲಿಂ ಜಾಂವ್ನ್ ಆಸೊಂಕ್ ಜಾಯ್. ಗಾಂವ್ಚ್ಯಾ ಲೊಕಾಂಚಿ ಜಿಣಿ ಪಿಂತ್ರಾಯ್ತಾನಾ ಗಾಂವ್ಚಿಂ ನಾಂವಾಂ ತರ್ ಪರ್ದೇಶಿ ಗಾಂವಾಂತ್ಲೆಂ ಚಿತ್ರ್ ಕಾಣಿಯೆಧ್ವಾರಿಂ ದಿತಾನಾ ತ್ಯಾ ಪ್ರಮಾಣೆಂ ಆಧುನಿಕ್ ನಾಂವಾಂ ಆಸ್ಲ್ಯಾರ್ ಬರೆಂ.
"ಬಾಂಯ್" ಕಾಣಿಯೆಂತ್ ಲೇಖಕಾನ್ ಕಾಣಿಯೆಚ್ಯಾ ಪಾತ್ರ್ಧಾರಾಂಕ್ ವಿಂಚ್ತಾನಾ ಭೋವ್ ಜಾಗ್ರುತ್ಕಾಯ್ ಕೆಲ್ಯಾ ಮ್ಹಣ್ ಸುಡಾಳ್ ದಿಸ್ತಾ. ಗಾಂವ್ಚೊ ಬಾಲ್ತಾಜಾರ್, ಪೊಕಾ ಪೀಂತ್, ಗಾಬ್ರು, ಮಾಗ್ಗಿ, ಪುಲ್ಲು ಅಶಿಂ ನಾಂವಾಂನಿಂಚ್ಚ್ ಮಂಗ್ಳುರ್ಚ್ಯಾ ಏಕಾ ಹಳ್ಳೆಕ್ ವರ್ಣಿತಾ ತಶೆಂ ವಾಚ್ಪ್ಯಾಂಕ್ ಭಗ್ತಾ.
ಸನ್ನಿವೇಶಾಂ : ಮಟ್ವಿ ಕಾಣಿ ವಿವಿದ್ ಸನ್ನಿವೇಶಾಂಚೆಂ ಸಮ್ಮಿಲನ್. ಹರ್ಯೆಕ್ ವಿವಿಧ್ ಸನ್ನಿವೇಶ್ ಏಕಾಮೆಕಾಚ್ಯಾಂಚೊ ಗಾಂಚ್ ರಚ್ತಾ ಆನಿ ಆಖ್ರೇಕ್ ಪುಡ್ಪುಡಿತ್ ಆನಿ ಆಕರ್ಶಿಕ್ ಕಾಣಿ ಜಾತಾ. ಹರ್ಯೇಕಾ ಸನ್ನಿವೇಶಾಂಚೆಂ ಪ್ರದರ್ಶನ್ ಜಾತಾನಾ ತಾಕಾ ಲಗ್ತಿಂ ಜಾಲ್ಲಿಂ ಭಗ್ಣಾಂಯ್ ಪಿಂತ್ರಾಯ್ಲಿಂ ತರ್ ಸನ್ನಿವೇಶಾಂಕ್ ದೊಡೊ ಆಲಂಕಾರ್ ಯೆತಾ.
ಆತಾಂ, ಬಾಂಯ್ ಕಾಣಿಯೆಂತ್ ಕಿತೆಂ ಕೆಲಾಂ ಪಳೆಯಾಂ. ಹಾಂಗಾಸರ್ ಜಾಯಿಂ ಲ್ಹಾನ್ ಲ್ಹಾನ್ ಸನಿವೇಶಾಂ ಆಸಾತ್. ಹರ್ಯೇಕಾ ಸನ್ನಿವೇಶಾಂಕ್ ತ್ಯಾ ತ್ಯಾ ರಿತಿಂಚೊ ಭಗ್ಣಾಂಚೊ ಉಜಾರ್ಯ್ ಜಾಲಾ. ಆನಿ ದೋನ್ ಏಕಾ ಮೆಕಾಕ್ ತಾಳ್ ಪಡ್ಚಿಂ ಸನ್ನಿವೇಶಾಂ ಘೆತಾಂ. ಬಾಲ್ತಾಜಾರಾಚಿ ಆವಯ್ ಸೆವ್ರಿ ಅಂತರ್ತಾ ಆನಿ ತೊಡ್ಯಾ ವರ್ಸಾಂ ಉಪ್ರಾಂತ್ ಪತಿಣ್ ಮಾಗ್ಗು ಸರ್ತಾ. ದೊನೀಂ ದುಖಾಂಚಿಂ ಸನ್ನಿವೇಶಾಂ. ಪುಣ್, ಲೇಖಕಾನ್ ಹಾಂಗಾಸರ್ ಉತ್ರಾಂಚಿ ಹಿಕ್ಮತ್ ವ್ಹಾಪಾರ್ಲ್ಯಾ. ಆವಯ್ ಮೆಲ್ಯಾವೆಳಿಂ ಬಾಲ್ತಾಜಾರಾಕ್ ಆಕಾಂತ್ ಜಾಯ್ನಾ. ಪುಣ್, ಮಾಗ್ಗು ಸರ್ತಾನಾ ತೊ ಕಂಗಾಲ್ ಜಾತಾ. ಆಜ್ಕಾಲ್ ಸರ್ವಾಂ ಮಧೆಂ ಆಸ್ಚಿಂ ಭಗ್ಣಾಂ, ದೋನ್ ಸನ್ನಿವೇಶಾಂಧ್ವಾರಿಂ ಲೇಖಕಾನ್ ಚತುರ್ಪಣಿಂ ಪಿಂತ್ರಾಯ್ಲ್ಯಾಂತ್.
ಅಪುಟ್ ಮನ್ಶಾಪಣಾಚ್ಯಾ ಚಿಂತ್ಪಾಕ್ ಸಾದ್ಯಾ ಉತ್ರಾಂನಿ ಸಾದ್ಯಾ ವಾಚ್ಪ್ಯಾಕ್ ಸಯ್ತ್ ಆರ್ತ್ ಜಾಂವ್ಚ್ಯಾಬರಿ ಹಿ ಕಾಣಿ ರೂಪಿತ್ ಜಾಲ್ಯಾ. ಆಖ್ಖಿ ಕಾಣಿ ಏಕ್ ಸಾದ್ಯಾ ಪುಣ್ ಗ್ರೇಸ್ತ್ ಉತ್ರಾಂಚೆಂ ಭಂಡಾರ್ ಮ್ಹಳ್ಯಾರ್ ಚೂಕ್ ಜಾಂವ್ಚಿ ನಾ.
ಸಂಪವ್ಣ್ ಯಾ ’ಕ್ಲೈಮ್ಯಾಕ್ಸ್’
ಕಾಣಿಯೆಚೆಂ ಅಂತ್ಯ್ ಏಕಾಚ್ಚ್ಫರಾಂ ಆನಿ ಜಬರ್ದಸ್ತ್ ಸನ್ನಿವೇಶಾಂತ್ ಆಖೇರ್ ಜಾಲೆಂ ತರ್ ಕಾಣಿ ವಾಚ್ಪ್ಯಾಚ್ಯಾ ಮತಿಂತ್ ಮಸ್ತ್ ಕಾಳ್ ಉರ್ತಾ. ಸಂಪವ್ಣ್ ಬರ್ಯಾಪಣಾನ್ ಜಾವ್ಯೆತಾ ಯಾ ದುಖಾಚ್ಯಾ ಘಡಿತಾಂಚೆಂ ಯಾ ವಾಚ್ಪ್ಯಾನ್ಂಚ್ ಆಖೇರ್ ಮತಿಂತ್ ಚಿಂತ್ಚೆಂಯ್ ಆಸ್ಯೆತಾ.
’ಬಾಂಯ್’ ಕಾಣಿಯೆಚಿ ಸಂಪವ್ಣ್ ಕಶಿ ಜಾತಾ ಪಳೆಯಾಂ;
ವಚೊನ್ ಏಕ್ಲ್ಯಾನ್ ಬಾಂಯ್ಕ್ ತಿಳ್ತಾನಾ ಕಿತೆಂ ಪಳೆತಾ? ಉಗ್ತ್ಯಾ ದೊಳ್ಯಾಂತ್ ವಯ್ರ್ ದೀಶ್ಟ್ ಲ್ಹಾವ್ನ್ ಜೀಬ್ ಭಾಯ್ರ್ ಘಾಲ್ಲಿ ಬಾಲ್ತಾಜಾರಾಚಿ ವಿದ್ರೂಪ್ ಕೂಡ್ ತ್ಯೇ ಬಾಂಯ್ತ್ ಉಪ್ಯೆತಾಲಿ.
’ಬಾಂಯ್’ ತಸಲ್ಯಾ ಕಾಣಿಯೆಕ್ ಹಾಚ್ಯಾಕೀ ವರ್ತೆಂ ಅಂತ್ಯ್ ವಾ ’ಸಂಪವ್ಣ್’ ದೀಂವ್ಕ್ ಜಾಯ್ತ್ ಮ್ಹಣ್ ಹಾಂವ್ ಚಿಂತಿನಾ. ಸಂಪೆ ಆನಿ ವಾಚ್ಪ್ಯಾಚ್ಯಾ ಚಿಂತ್ನಾಂನಿ ಭಿರ್ಮತೆಚಿಂ ಮೊಡಾಂ ಹಾಡ್ಚೆಂ ಸನ್ನಿವೇಶಾನ್ ಕಾಣಿ ಅಂತ್ಯ್ ಜಾತಾ. ಬಾಂಯ್ ಜಾಯ್ ಮ್ಹಣ್ ವರ್ಸಾಂ ವರ್ಸಾಂ ಥಾವ್ನ್ ಆಶೆವ್ನ್ ಆಸ್ಲ್ಲೊ ಬಾಲ್ತಾಜಾರ್, ಭುರ್ಗ್ಯಾಂನಿ ಜಾಗ್ಯಾ ಖಾತಿರ್ ಝಗ್ಡೆಂ ಕರ್ಚೆಂ ಪಳೆಂವ್ಕ್ ಜಾಯ್ನಾಸ್ತಾನಾ, ತ್ಯಾಚ್ಚ್ ಬಾಂಯ್ತ್ ಆಪ್ಲೊ ಜೀವ್ ದಿತಾ. ಶಾಭಾಸ್ಕೆಚಿ ಸಂಪವ್ಣಿ ಕಾಣಿ ಜಾಯ್ತೊ ಕಾಳ್ ವಾಚ್ಪ್ಯಾಚ್ಯಾ ಮತಿಂತ್ ಉರಾಶೆಂ ಕರ್ತಾಚ್ಚ್.
ಆತಾಂ ಯೆತಾ ದುಸ್ರೊ ಭಾಗ್, ಕಾಣಿಯೆಂತ್ಲೊ ಉಣ್ಪಣ್ ದಾಖಂವ್ಚೊ. ಹ್ಯಾಚ್ಚ್ ಥೊಡ್ಯಾ ದಿಸಾಂಧಿಂ, ಮ್ಹಜ್ಯಾ ಏಕಾ ಬರ್ಪಿ ಮಿತ್ರಾನ್ ಮ್ಹಾಕಾ ಕಳಯಿಲ್ಲೆಂಕೀ ಆಂಕಾಂ ಧುಂಪಂವ್ಕ್ ಮಾತ್ ಕಳಿತ್ ಆನಿಂ ಅಶೆಂ ಧುಂಪಯ್ತಾನಾ ಆಮಿಂ ರಾಜಿಕೀಯ್ ಮನ್ಶಾಂಬರಿ ದಿಸ್ತಾಂ ಮ್ಹಣ್. ಮ್ಹಜಿಂ ಸವಾಲಾಂ ಹಿಂ - ಬರೆಂ ಆಸ್ಲ್ಲೆಂ ಬರೆಂ ಆಸಾ ಮ್ಹಣ್ ಸಾಂಗ್ಚೆಂ ಧುಂಪಂವ್ಚೆಂಗೀ? ಬರೆಂ ಆಸ್ಲ್ಲೆಂ ಬರೆಂ ಆಸಾ ಮ್ಹಣ್ ಉಚಾರುಂಕ್ ಸಕ್ಡಾಂಕ್ ತಾಂಕ್ ಆಸಾಗೀ? ಜಾಯ್ತೆಂ ಬರೆಂ ಆಸ್ಲ್ಲ್ಯಾಂತ್ ಇಲ್ಲೆಂಶೆಂ ಊಣ್ಪಣ್ ದಿಸ್ಲೆಂ ತರ್ ತೆಂ ಉಬಾರುನ್ ಧಾಕವ್ನ್, ಬರೆಂಪಣ್ ಊಣ್ಪಣಾಚ್ಯಾ ಸಾವ್ಳೆಂತ್ ಲಿಪಾಶೆಂ ಕರ್ಚೆಂ ಸಮಾಂಗೀ? ಮ್ಹಜ್ಯಾ ಚಿಂತ್ಪಾ ಪ್ರಕಾರ್, ಖಂಚಾಯ್ ವಸ್ತುಂತ್, ಕಾಣಿಯೆಂತ್, ಮನ್ಶಾ ಥಂಯ್ ಯಾ ಕಾರ್ಯಾಂತ್ ಬರೆಂ ಆಸ್ಲ್ಲೆಂ ಉಗ್ತ್ಯಾನ್ ಉಚಾರ್ಲೆಂ ತರ್ ತೆದೊಳ್ ವರೇಗ್ ಬರೆಂ ಕರಿನಾತ್ಲ್ಲ್ಯಾಕ್ ಬರೆಂ ಕರುಂಕ್ ಹುಮೆದ್ ಮೆಳ್ತಾ ಆನಿಂ ಬರೆಂ ಕೆಲ್ಲ್ಯಾಕ್ ಶಾಭಾಸ್ಕಿ.
"ಬಾಂಯ್" ಕಾಣಿಯೆಂತ್ ಹಾಂವೆ ಅಸೆಂಚ್ ಕರ್ಯಾಂ. ಬರೆಂಪಣ್ ಆಸ್ಲ್ಲೆಂ ಉಚಾರುಂಯಾ ತ್ಯಾ ವರ್ವಿಂ ನವ್ಯಾ ಆನಿಂ ಪರ್ನ್ಯಾಂ ಕಾಣಿಯೆಗಾರಾಂಕ್ ಆಮಿಂ ಆಸೆಂಚ್ಚ್ ಕರಿಜಾಯ್ ಮ್ಹಣ್ ಭಗೊಂಧಿ. ಅಸಲಿಚ್ಚ್ ಕಾಣಿ (ಹಿಚ್ಚ್ ನ್ಹಂಯ್!!!) ಬರಂವ್ಚಿ ಹುಮೆದ್ ಉದೆಂವ್ಧಿ. ಏಕ್ ನವಿ ವಾಟ್ ದಿಸೊಂದಿ. ಊಣ್ ದಾಕಯಿಲ್ಲ್ಯಾ ವರ್ವಿಂ ಕಾಣಿಯೆಗಾರಾಕ್ ತಾಚಿ ಚೂಕ್ ದಾಖವ್ನ್ ದಿಂವ್ಚೆಂ ಪ್ರೇತನ್ ಮಾತ್ರ್ ಜಾತಾ ನ್ಹಂಯ್? ತರ್ಯ್ ಊಣ್ ಧಾಕಂವ್ಕ್ ಆಮಿಂ ಪಾಟಿಂ ಸರ್ಚೆಂ ನಾಕಾ.
ಬಾಂಯ್ ಕಾಣಿಯೆಂತ್ ಊಣ್ಪಣ್ ಸೊಧುಂಕ್ ಕೆಲ್ಲ್ಯಾ ಮ್ಹಜ್ಯಾ ಪ್ರೇತನಾಂತ್ ಹೆ ಥೊಡೆ ಅವ್ಗುಣ್ ಮೆಳ್ಳೆ ಮ್ಹಣ್ ಹಾಂವ್ ಚಿಂತ್ತಾಂ ಆನಿಂ ತೆ ಹಾಂವ್ ಜೆರಾಲ್ ಕಾಣಿಯಾಂಕ್ಯ್ ದಿತಾಂ (ಮ್ಹಜ್ಯಾ ಕಾಣಿಯಾಂ ಥಂಯ್ ತಸಲೆ ಯಾ ತಾಚ್ಯಾಕೀ ಚಡ್ ಅವ್ಗುಣ್ ದಿಸ್ತಾತ್ ಕಿತ್ಯಾಕ್ ತೆ ಜಾಯ್ ಮ್ಹಣ್ ಕರ್ಚೆಂ ನ್ಹಂಯ್ ಪುಣ್, ಜಾಂವ್ಚೆ)
ಏಕ್ ವಚನ್ ಆನಿಂ ಬಹುವಚನ್ ಹಾಂಚೊ ಉಪ್ಯೊಗ್ : ಏಕ್ ವಚನ್ ಆನಿಂ ಬಹುವಚನ್ ಉಪ್ಯೋಗ್ ಕರ್ತಾಂ ಥೊಡೆಪಾವ್ಟಿಂ ಘುಸ್ಪಡ್ ಜಾತಾ ಆನಿಂ ಬಾಂಯ್ ಕಾಣಿಯೆಂತ್ ಥೊಡೆಕಡೆ ಹೆಂ ದಿಸೊನ್ ಯೆತಾ. ಎಕ್ರೊ - ಏಕ್ ವಚನ್ ಜಾಲ್ಯಾರ್ ಎಕ್ರೆ - ಸಬ್ಧ್ ಬಹುವಚನಾಕ್ ವಾಪರಿಜಾಯ್. ತೀನ್ ಗಾಯೊ ಮ್ಹಣ್ಚ್ಯಾಕೀ ತೆಗಿ ಗಾಯೊ ಮ್ಹಳ್ಯಾರ್ ಬರೆಂ.
ಪರತ್ ಪರತ್ ಯೆಂವ್ಚೆ ಸಬ್ದ್: ಥೊಡೆಪಾವ್ಟಿಂ ಕಳಿತ್ ನಾತ್ಲ್ಲ್ಯಾ ಬರಿ ಏಕಾಚ್ಚ್ ರೀತಿಚೆ ಸಬ್ಧ್ ಏಕಾ ವಾಕ್ಯಾಂತ್ ಯಾ ಪಾಟಾಪಾಟ್ ದೋನ್ ವಾಕ್ಯಾಂನಿಂ ಯೆತಾತ್. ತೆ ಸಬ್ದ್ ಚುಕಯ್ಲೆ ತರ್ ಭಾಸೆಚಿ ಸೊಭಾಯ್ ಚಡ್ತಾ. ಬಾಂಯ್ ಕಾಣಿಯೆಂತ್ ಸಾಂಗ್ಚೆಂ ತರ್ ಅಶೆಂ ಮ್ಹಳ್ಳೊ ಸಬ್ಧ್ ಕಾಣಿಯೆಚ್ಯಾ ಸುರ್ವೆರ್ ದುಸ್ರ್ಯಾ ಅನಿಂ ತಿಸ್ರ್ಯಾ ವಾಕ್ಯಾಂತ್ ಯೆತಾ. ತಾಚ್ಯಾ ಬದ್ಲಾಕ್ "ತ್ಯಾ ವರ್ವಿಂ", "ಆನಿಂ" ಅಸಲೆ ಸಬ್ದ್ ವಾಪರ್ಯೆತ್ ಮ್ಹಣ್ ಮ್ಹಜೆಂ ಚಿಂತಾಪ್.
ಕನ್ನಡ ಯಾ ಇಂಗ್ಲೀಶ್ ಸಬ್ಧಾಂಚೊ ಪ್ರಭಾವ್: ಆಮಿಂ ಜಾಯ್ತ್ಯೊ ಭಾಸೊ ವಾಪಾರ್ತಾಂವ್ ಆನಿಂ ಕಾನಡಿ ಭಾಸ್ ಆಮ್ಚ್ಯಾ ಜೀವನಾಂತ್ ಜಾಯ್ತಿ ಉಪ್ಯೊಗ್ ಜಾತಾ ಜಾಲ್ಲ್ಯಾನ್ ತಾಚೊ ಪ್ರಬಾವ್ ಆಮ್ಚ್ಯಾ ಕೊಂಕ್ಣಿ ಲಿಖ್ಣೆಂತ್ ಆಸ್ತಾ. ಬಾಂಯ್ ಕಾಣಿಯೆಂತ್ ಅಸಲೆ ಸಬ್ಧ್ ಚಡ್ ನಾಂತ್ ತರ್ಯ್ ಏಕಾ ಜಾಗ್ಯಾರ್ "ವಸ್ತ್ರಾಂ" ಮ್ಹಣ್ ಬರಂವ್ಚ್ಯಾಕೀ ವಸ್ತುರಾಂ ಮ್ಹಳ್ಳೊ ಸಬ್ಧ್ ವಾಪರ್ಲ್ಲೊ ತರ್ ಬರೆಂ ದಿಸ್ತೆಂ.
ಅಸ್ವಾಭಾವಿಕ್ ಘಡಿತಾಂ : ಥೊಡೆಪಾವ್ಟಿಂ ಬರವ್ಪ್ಯಾಕ್ ಸ್ವಾಭಾವಿಕ್ ಮ್ಹಣ್ ದಿಸ್ಚಿಂ ಘಡಿತಾಂ ವಾಚ್ತೆಲ್ಯಾಕ್ ಅಸ್ವಾಭಾವಿಕ್ ಮ್ಹಣ್ ದಿಸ್ತಾತ್ ಆನಿಂ ಆಸ್ತಾತ್. ಬಾಂಯ್ ಕಾಣಿಯೆಂತ್ ತಸಲೆಂ ಏಕ್ ಘಡಿತ್ ಸಾಂಗ್ಚೆಂ ತರ್ ಗಾಂವ್ಚ್ಯಾ ಧಾ ಜಣಾನಿಂ, ಸೆಜಾರ್ಚ್ಯಾಂನಿ ಮೆಳೊನ್ ಬಾಂಯ್ ಖೊಂಡ್ಚಿ. ಬಾಂಯ್ ಖೊಂಡ್ಚೆಂ ಕಾಮ್ ಏಕ್ ವ್ಯಾವಹಾರಿಕ್, ಕಶ್ಟಾಂಚೆಂ ಆನಿಂ ತಾಂತ್ರಿಕ್ಪಣ್ ಮಿಸ್ಳೊನ್ ಆಸ್ಚೆಂ ಜಾಲ್ಲ್ಯಾ ವರ್ವಿಂ ತ್ಯಾ ಕಾಮಾಂತ್ ಹೆಳ್ಲ್ಲ್ಯಾ ಮನ್ಶಾಂನಿ ತೆಂ ಕಾಮ್ ಕರಿಜಾಯ್ ಸೊಡ್ನ್ ಸೆಜಾರ್ಚ್ಯಾನಿಂ ನ್ಹಂಯ್. ಸೆಜಾರ್ಚ್ಯಾನಿಂ ಬಾಂಯ್ ಖೊಂಡ್ಚೆಂ ಸನ್ನಿವೇಶ್ ಹಾಡ್ಚಾಕೀ ಏಕಾ ಪುತಾನ್ ಬೆಂಕಾಂತ್ಲೆಂ ರೀಣ್ ಕಾಡುನ್, ಬಾಂಯ್ ಖೊಂಡ್ಲಿ ಮ್ಹಣ್ ಮಾಂಡುನ್ ಹಾಡ್ಲ್ಲೆಂ ತರ್ ಹೊ ವಾಂಟೊ ಚಡ್ ವಾಜ್ಬಿ ದಿಸ್ತೊ, ಸ್ವಾಭಾವಿಕ್ ದಿಸ್ತೊ.
ವಿಮರ್ಶ್ಯಾಚ್ಯಾ ಅಂತ್ಯಾಕ್ ಸಾಂಗ್ಚೆಂ ತರ್ ವಲ್ಲಿ ಕ್ವಾಡ್ರಾಸಾಚಿ ಬಾಂಯ್ ಕಾಣಿ ಏಕ್ ಬರಿ, ಅಪುರ್ಭಾಯೆಚಿ ಆನಿಂ ಆತುರಿತ್ ಕರ್ಚಿ ಕಾಣಿ. ತಾಕಾ ಮುಕ್ಲ್ಯಾ ವಾವ್ರಾಂತ್ ದೇವ್ ವಿಂಚ್ಣಾರ್ ಆಶೀರ್ವಾದಾಂ ಆಟಿಚ್ಯಾ ಪಾವ್ಸಾಬರಿ ವೊತುಂದಿ ಮ್ಹಣ್ ಮ್ಹಜೆಂ ಖಾಲ್ತ್ಯಾ ಕಾಳ್ಜಾಚೆಂ ಮಾಗ್ಣೆಂ.
ಕಥಾಪಾಠ್ - 1. ಪಾವ್ಲಾಂ ಧಾಂವ್ಣಿ ಜಾಂವ್..- ಗಿಬ್ಬಾ ಕುಲ್ಶೇಕರ್/ಕುವೇಯ್ಟ್
ಗಿಬ್ಬಾ ಕುಲ್ಶೇಕರ್: ಕೊಂಕ್ಣಿ ಸಾಹಿತ್ಯಾಂತ್ ಏಕ್ ಮಾಲ್ಘಡೊ ಕಾಣ್ಯೆಗಾರ್, ಹಾಣೆಂ ಎದೊಳ್ ಬರಯಿಲ್ಲ್ಯೊ ಮಟ್ವ್ಯೊ ಕಾಣ್ಯೊ ಕಾಂಯ್ ಪನ್ನಾಸ್ ತರ್ಯ್ ಪಾಟ್ಲ್ಯಾ ಪಾಂತ್ತೀಸ್ ವರ್ಸಾಂ ಥಾವ್ನ್ ತವಳ್ ತವಳ್ ಬರವ್ನ್ ಆಯ್ಲಾ. ಚಡ್ತಾವ್ ಹಿಂದಿ ಸಾಹಿತ್ಯ್ ಖಾಯ್ಸ್ ಕರ್ಚಾ ಹಾಣೆಂ ಖಾಯ್ಸ್ ಕರ್ಚೊ ಪ್ರಕಾರ್ ಸಮಾಜಿಕ್/ಪತ್ತೇದಾರಿ.
ಇತರ್ ಭಾಸಾಂಚಾ ಸಾಹಿತ್ಯಾ ಮುಖಾರ್ ಆಮ್ಚೆಂ ಕೊಂಕ್ಣಿ ಸಾಹಿತ್ಯ್ ಖಂಚ್ಯಾ ಪಾಂವ್ಡಾರ್ ಆಸಾ?
ಏಕ್ ವಾಜ್ಬಿ ಸವಾಲ್.
ಜಾಪ್ ಹಾವೆಂ ದಿಂವ್ಚಿ ತರ್, ಆಮ್ಚ್ಯಾ ಬರವ್ಪ್ಯಾಂನಿ ಪ್ರಯತನ್ ಚಾಲು ದವರ್ಲಾಂ, ಸಲ್ವಣಿ ಮ್ಹಳ್ಳಿ ಸಾವ್ಳಿ ಮಾಜ್ವೊನ್ ಗೆಲ್ಯಾ, ವರ್ತುಲಾ ಥಾವ್ನ್ ಭಾಯ್ರ್ ಆಯ್ಲ್ಯಾತ್ ತಿಂತೆರ್ ಧರ್ಲ್ಲೆ ಹಾತ್. ಮೋಗ್, ಇಗರ್ಜ್, ಪಾದ್ರಿ, ಸಂಗ್ ವಾ ಬಸ್ಸ್ ಸ್ಟೋಪಾ ಪಯ್ಲೊ ಮೋಗ್ ಮ್ಹಳ್ಳ್ಯಾ ವರ್ತುಲಾ ಭಿತರ್ ಆಮ್ಚೆ ಬರವ್ಪಿ ಕಥಾವಸ್ತು ಸೊಧುನ್ ಆಸ್ಲ್ಲೆ ತೆ, ವರ್ತುಲಾ ಥಾವ್ನ್ ಭಾಯ್ರ್ ಯೇವ್ನ್ ಕಥಾ ವಸ್ತು ವಿಂಚುಂಕ್ ಲಾಗ್ಲ್ಯಾತ್ ಆನಿ ಸೊಭಿತ್ ಅರ್ಥಾಭರಿತ್, ಲಿಸಾಂವಾದಾಯೆಕ್, ಮನೋರಂಜನ್ ದಾಯೆಕ್ ಕಾಣ್ಯೊ ಲಿಖುಂಕ್ ಪ್ರಯತ್ನ್ ಕರುನ್ ಆಸಾತ್.
’ಹಾಂವ್ ಪರತ್ ಸಾಂಗ್ತಾಂ, ಫಕತ್ತ್ ಪ್ರಯತ್ನ್ ಚಾಲು ಆಸಾ
ಸಲ್ವಣಿ ಆಮ್ಚ್ಯಾ ಬರವ್ಪ್ಯಾಂಚಾ ರಗ್ತಾಂತ್ ನಾ.
ದೊಂಗ್ರಾ ವಯ್ಲೊ ಫಾತೊರ್ ಭೋವ್ ಪಯ್ಸ್ ಆಸಾ, ಭೋವ್ ಉಂಚಾಯೆರ್ ಆಸಾ
ತೊ ಆಮ್ಚ್ಯಾ ಬರವ್ಪ್ಯಾಂನಿ ಆಪ್ಣಾಂವ್ಕ್ ಆಸಾ.’
ಇತರ್ ಭಾಸಾಂಚಾ ಸಾಹಿತ್ಯಾನ್ ದಿಲ್ಲೆಂ ಶರ್ತ್ ನಿರ್ಫಳ್ ಕೆಲಾಂ ಮ್ಹಳ್ಳಿ ರುಜ್ವಾತ್ ತ್ಯಾ ದೊಂಗ್ರಾ ವಯ್ಲ್ಯಾ ಫಾತ್ರಾ ವಯ್ರ್ ಲಿಖುಂಕ್ ಆಸಾ.
ಆತಾಂ ಹಾಂವ್ ಉಗ್ತ್ಯಾನ್ ಸಾಂಗ್ತಾ - ಕಾಳ್ಜಾಚಾ ಉಮಾಳ್ಯಾಂನಿ ಭರೊನ್ ಸಾಂಗ್ತಾಂ, ತೊ ದೊಂಗ್ರಾವಯ್ಲೊ ಫಾತೊರ್ ಆಪ್ಣಾಂವ್ಕ್, ತ್ಯಾ ಫಾತ್ರಾ ವಯ್ರ್ ರುಜ್ವಾತ್ ಲಿಖುಂಖ್ ಆನಿ ಬಾವ್ಟೊ ಉಭಾರುಂಕ್ ಪಾವ್ಲಾಂ ಕಾಡ್ಲ್ಯಾಂತ್ ಮಾನೆಸ್ತ್ ವಲ್ಲಿ ಕ್ವಾಡ್ರಸಾನ್.
’ಕಂಗಾಲ್ ಆನಿ ಕುಕ್ಕೆಹಳ್ಳಿ’ ಹ್ಯಾ ಭಾರಾ ಕಾಣಿಯಾಂಚಾ ಪುಸ್ತಕಾನ್ ಕೊಂಕ್ಣೆಂತ್ ಏಕ್ ಚರಿತ್ರಾ ರಚ್ಲ್ಯಾ.
ಕಂಗಾಲ್ ಹಾಂವ್ ಜಾಲೊಂ. ಕುಕ್ಕೆಹಳ್ಳೆಂತ್ ಜಿಯೆಲೊಂ, ಜಾತ್ರ್ಯಾಕ್ ಗೆಲ್ಲ್ಯಾ ಲೊಕಾಂ ಪಯ್ಕಿ ಎಕ್ಲೊಂ ಹಾಂವ್ ಜಾಲೊಂ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications