ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಜಿಣ್ಯೆಂತ್ ಆಮಿಂ ನಿಜಾಯ್ಕೀ ಆಶೆಂವ್ಚ್ಯೊ ವಸ್ತು ಖಂಡಿತ್ ಜಾವ್ನ್ ಬೌತಿಕ್ ನ್ಹಂಯ್’
ಆಮಿಂ ಖೈಂ ಆಸಾಂವ್..?
ವರಸ್ : 2006
ಅಂಕೊ : 25
ಮಯ್ನೊ : ಜುಲಾಯ್
ಸಂಪಾದಕೀಯ್ - 25.
ವಲ್ಲಿ ಕ್ವಾಡ್ರಸ್
ಸಂಸಾರ್ ಪ್ರಗತೆಚಾ
ಪಾವ್ಲಾಂನಿ ಧಾಂವೊನ್ ಆಸಾ.
ಆಜ್ ಆಮ್ಚೆಲಾಗಿಂ ಬೌತಿಕ್ ಸುಖಾಚ್ಯೊ ಸಂಗ್ತ್ಯೊ ಸಗ್ಳ್ಯೊ ಆಸಾತ್ - ಕಾರ್, ಬಂಗ್ಲೊ,
ವೆವೆಗ್ಳೆಂ ನೆಸಾಪ್, ಸಮಾಜೆಂತ್ ಪ್ರತಿಷ್ಟಾ, ಕಾಮ್,
ಹುದ್ದೊ, ಅಂತಸ್ತ್ ಆನಿ ಬ್ಯಾಂಕಾಂನಿ ಪುಂಜಾವ್ನ್ ದವರ್ಲಲೊ ದುಡು.
ಪುಣ್ ಇತ್ಲೆಂ ಸರ್ವ್ ಆಸೊನ್ಯ್ ಜರ್ ಆಮಿಂ ಆಮ್ಚಾ ಅಂತಸ್ಕರ್ನಾಕ್
ಸವಾಲ್ ಕೆಲೆಂ;
"ಆಮ್ಚೆಲಾಗಿಂ ಸಮಧಾನ್ ಆಸಾ? ಆಮಿಂ ಖರೆಂಚ್ ಸುಖಿಗಿ?"
ತರ್ ಖಂಡಿತ್ ಜಾವ್ನ್ ಕಪಲಾರ್ ಮಿರಿಯೊ ಪಡ್ತಿತ್, ಮತ್ ಚಿಂತ್ಚೆಂ ರಾವಯ್ತ್, ಕಾಳಿಜ್ ಉಡ್ಚೆಂ ರಾವಯ್ತ್
ಪುಣ್ ಸವಾಲಾಕ್ ಜಾಪ್ ಲಾಭ್ಚಿನಾ. ಜಾಪ್ಚ್ ನಾತ್ಲ್ಯಾರ್
ಲಾಭ್ಚಿ ತರ್ಯ್ ಕಶಿ?
ಆಜ್
ಮನಿಸ್ ಮೀತ್ ನಾತ್ಲೆಲ್ಯಾ ವೇಗಾನ್, ಕಳಿತ್ ನಾತ್ಲ್ಲ್ಯಾ
ಶೆವೊಟಾ ತೆವ್ಶಿನ್ ಧಾಂವೊನ್ ಆಸಾ. ಕಿತ್ಯಾಕ್ ಮ್ಹಳ್ಳೆಂ ಖುದ್ದ್ ತೊಚ್ಚ್
ನೆಣಾಂ ತರ್ಯ್ ಧಾಂವ್ಣಿ ಹಾಂಗಾ ಕಡ್ಡಾಯೆಚಿ ಜಾವ್ನ್ ಕೆಲ್ಯಾ. ರಾವ್ಲ್ಲೊ
ಮನಿಸ್ ಸಂಪ್ತಾ ದೆಖುನ್ ಧಾಂವ್ಣಿ.. ಧಾಂವ್ಣಿ... ಧಾಂವ್ಣಿ....
ಹ್ಯಾ ಧಾಂವ್ಣೆಂತ್ ಮನಿಸ್ ಮನ್ಶಾಪಣಾಚಿಂ ಮೊಲಾಂ ವಿಸ್ರಲಾ,
ಸಂಬಂಧ್ ವಿಸ್ರಲಾ, ಸತ್-ನೀತ್ ವಿಸ್ರಲಾ, ಅಪ್ಲ್ಯಾ ಸೆಜಾರ್ಯಾಕ್
ಮಾತ್ರ್ ನ್ಹಂಯ್ ಸಭಾರ್ ಪಾವ್ಟಿಂ ಅಪ್ಲೆಭಿತರ್ ಅಪುಣ್ಂಚ್
ಪರ್ಕಿಸೊ ಜಾಲಾ. ಹ್ಯಾ ಪರಿಗತೆಂತ್ ನೀಜ್ ಜಾವ್ನ್ ಮನಿಸ್ ಧೊಭಿವಾಲ್ಯಾಚಾ
ಪೆಟ್ಯಾಪರಿಂ ಜಾಲಾ - ನ್ಹಂಯ್ ಘರ್ಚೊ, ನ್ಹಂಯ್ ಧೊಬಿಚೊ.
ದಿಸಾನ್ದೀಸ್ ಸಂಕೀರ್ಣ್ ಜಾತೆಚ್ಚ್ ಆಸ್ಚಾ ಮನ್ಶಾ ಚಿಂತ್ಪಾಂತ್ ಖರೆಂಚ್ ಜಾವ್ನ್ ಮನಿಸ್ ಚಿಂತುಂಕ್ ವೆಚಾಕೀ ಮೊರೊಂಕ್ ವೆಚೆಂ ಪಸಂದ್ ಕರುಂಕ್ ಲಾಗ್ಲಾ. ಹಿ ಪ್ರಗತಿ? ಹಿ ಬದ್ಲಾವಣ್? ಹೆಂ ಬದಲ್ಚಾ ಸಂಸಾರಾಚಿಂ ಖುಣಾಂ? ಕಾಳಾಧಿಂ ಹಿಚ್ಚ್ ಪರ್ಜಾ ಕಶಿ ಆಸ್ಲ್ಲಿ? ಏಕ್ ಕುಟಾಮ್ ಕಶೆಂ ಜಿಯೆತಾಲೆಂ? ಏಕ್ ಫಿರ್ಗಜ್ ಸಮಾಜ್ ಕಶಿ ಆಸ್ಲ್ಲಿ? ಕಸಲೊ ತೊ ಮಾಯಾಮೊಗ್? ಕಸಲಿಂ ತಿಂ ಸಂಬಂಧಿಂ ಮೌಲ್ಯಾಂ, ಕಸಲಿಂ ತಿಂ ಕುಟ್ಮಾಚಿಂ ಮೌಲ್ಯಾಂ?
ಎಕ್ಲ್ಯಾಚೆಂ ಬರೆಂ ಫಾಲೆಂ ಜಾತಾನಾ ತಾಚಾ
ಸೆಜಾರ್ಚೆ ಮಾತ್ರ್ ನ್ಹಂಯ್ ಸಗ್ಳ್ಯಾ ವಾಡ್ಯಾಚೆ ಜಮ್ತಾಲೆ,
ಫಿರ್ಗಜ್ ಸಮಾಜ್ ಮೆಳ್ತಾಲಿ. ಫಿರ್ಗಜೆಂತ್ ಏಕ್ ಮೋರ್ನ್
ಜಾಲೆಂ ತರ್ ಫಿರ್ಗಜ್ ಕುಟಾಮ್ ಎಕ್ವಟ್ತಾಲೆಂ, ಕೊಣ್ ಫೊಂಡ್
ಖೊಂಡ್ತಾಲೊ, ಕೊಣ್ ಮೊರ್ನಾಚಿ ಪೇಟ್ ಸಾಂಗ್ತಾಲೊ,
ಕೊಣ್ ಮೊರ್ನಾಚಿ ಗಾಡಿ ಸಾಂಗ್ತಾಲೊ ಆನಿ ಕೊಣ್ ಫಿರ್ಗೆಜ್ಯಾಂನಿ
ಖಬಾರ್ ದಿತಾಲೊ. ಬರ್ಯಾಂತ್ ತಶೆಂ ವಾಯ್ಟಾಂತ್ ಸಾಂಗಾತ್ ದಿತಾಲಿ. ತೆದ್ನಾಂ ದುಬ್ಳಿಕಾಯ್ ಜರೂರ್ ಆಸ್ಲ್ಲಿ,
ಪುಣ್ ಮಾಯಾಮೊಗ್ ಆಸ್ಲ್ಲೊ. ಎಕಾಮೆಕಾಚೊ ಹುಸ್ಕೊ ಆಸ್ಲ್ಲೊ, ಎಕಾಮೆಕಾ ಆಧಾರ್ ದಿಂವ್ಚೆಂ ಕಾಳಿಜ್ ಆಸ್ಲ್ಲೆಂ.
ಫಿರ್ಗಜ್ ಕುಟ್ಮಾ ಥಾವ್ನ್ ಕಾಜಾರ್ ಜಾವ್ನ್ ಭಾಯ್ರ್ ವೆಚೆಂ ಚೆಡುಂ
ಸಗ್ಳ್ಯಾ ಫಿರ್ಗಜ್ ಕುಟ್ಮಾಚಾಂಚಾ ದೊಳ್ಯಾಂನಿ ಉದ್ಕಾ ಥೆಂಬೆ ಉದೆಶೆಂ ಕರ್ತಾಲೆ.
ಪರ್ಗಾಂವ್ಚೆ ಕೊಣ್ಯ್ ಗಾಂವಾಕ್ ಯೆತೆಚ್ಚ್ ವೆಚಿಕ್ ಪುತಾನ್
ಪಾಟಿಂ ಪರ್ತಲ್ಲೆಪರಿಂ ಫಿರ್ಗಜ್ ಸಮಾಜ್ ತಿತ್ಲ್ಯಾಚ್ ಮಾಯಾಮೊಗಾನ್ ಮೆಳ್ತಾಲಿ,
ಸುಕ್-ದೂಕ್ ವಾಂಟುನ್ ಘೆತಾಲಿ. ಪರ್ಗಾಂವಾಕ್ ಪಾಟಿಂ ವೆಚ್ಯಾಧಿಂ ಆಮ್ಚಾ ಘರಾ ಏಕ್ ಘಡಿ ಭೆಟ್
ದೀ ಮ್ಹಣ್ ಆಡ್ದೊಸ್ ಮಾಗ್ತಾಲಿಂ. ಹಿಂ ಸರ್ವ್ ಮ್ಹಜಾ ಭುರ್ಗ್ಯಾಪಣಾಚಿಂ ಪಿಂತುರಾಂ..
ಪುಣ್ ಆಜ್ಕಾಲ್ ಯೆಂವ್ಚಾ ಹಾಫ್ತ್ಯಾಂತ್ ಕಾಜಾರ್ ತರ್ಯ್ ಕಸಲಿಚ್ ಗವ್ಜ್ ನಾ, ಕೊಣಾಕ್ಚ್ ಕಸಲೆಚ್ಚ್ ತ್ರಾಸ್ ನಾಂತ್, ಕಾಜಾರಾ ದಿಸಾ ಇಗರ್ಜೆಂತ್ ಘಾಂಟಿ ವಾಜ್ತೆಲ್ಯೊ, ವೆಳಾರ್ ಮೀಸ್ ಜಾತೆಲೆಂ, ಮಿಸಾಕ್ ಚಾರ್-ಪಾಂಚ್ ಬೊಡಾಂ ಆಸ್ತಿತ್, ಉಪ್ರಾಂತ್ ಹೊಟೆಲಾಂನಿ ರಿಸೆಪ್ಶನ್, ಕಾಜಾರಾಕ್ ಆಯಿಲ್ಲೊ ಕೊಣ್ ಅಪ್ಲೊ ಕೊಣ್ ಪೆಲೊ ಮ್ಹಳ್ಳೆಂ ಕೊಣಾಕ್ಚ್ ಪಡೊನ್ ವಚೊಂಕ್ ನಾ. ಕಾನ್ ಫುಟ್ಟಾಸರ್ ಆವಾಜ್, ಪೋಟ್ ಫುಟ್ಟಾಸರ್ ಜೇಂವ್ಕ್ ಆನಿ ಗಳೊ ಫುಟ್ಟಾಸರ್ ಪಿಯೆಂವ್ಕ್ ಆನಿ ಪೆಂಕ್ಡಾಚಿ ಖಿಳ್ ಚುಕ್ತಾ ಮ್ಹಣಾಸರ್ ಮಾಂಕ್ಡಾನಾಚ್. ಕೊಣಾಕ್ ಪಡೊನ್ ಗೆಲಾಂ ದಾದ್ಲೊ ಕೊಣಾಚೊ ಬಾಯ್ಲ್ ಕೊಣಾಚಿ ಧುವ್ ಕೊಣಾಚಿ ವಾ ಆವಯ್ ಕೊಣಾಚಿ ಮ್ಹಳ್ಳೆಂ? ಮನಿಸ್ಚ್ ಏಕ್ ಮನ್ಜಾತ್ ಜಾಲ್ಲ್ಯಾ ಹ್ಯಾ ಘಡ್ಯೆ ಥೊಡ್ಯಾಚ್ ವೊರಾಂನಿ ಸಗ್ಳೆಂ ತಿರ್ಸಾಲೆಂ.. ಕಾಜಾರ್ ಜಾವ್ನ್ ಮಯ್ನ್ಯಾ ಭಿತರ್ ಡೈವೋರ್ಸ್ ಜಾಯ್ತ್, ವ ಕೊಣ್ ಕೊಣಾಕ್ ದವ್ರುನ್ ಘೆತ್ ತೆಂ ಕಿತೆಂಯ್ ಘಡೊಂಕ್ ಸಾಧ್ಯ್..
ಕುಟ್ಮಾ ಎಕ್ವಟ್ ಫಾಸಾಳ್ಳಾ,
ಫಿರ್ಗಜ್ಯಾಂನಿ ಪರ್ಗಾಂವ್ಚಾಂಕ್ ಉಜೊ ಲಾಯ್, ಗಾಂವ್ಚೆಚ್ ಅಪ್ಲೆ ಕೊಣ್
ಪೆಲೆ ಕೊಣ್ ಮ್ಹಳ್ಳೆಂ ಪಡೊನ್ ವಚೊಂಕ್ ನಾ. ಮೀಸ್ ಜಾತೆಚ್ಚ್ ಕೊಣಾಚಿಂ
ಬಾಯ್ಕಾಂ ಆನಿ ಕೊಣಾಚಿಂ ಕಾರಾಂ ಚಾಲು ಜಾಲಿಂಚ್ ಸರ್ವಾಂಕ್ಯ್ ಆಮಿಂ
ವ್ಹಡ್ಲಿಂ/ಉಂಚ್ಲಿಂ ಮ್ಹಣ್ ಧಾಕಂವ್ಚೊ ಹೊರ್ಭೊಸ್. ಮನಿಸ್
ಮನ್ಶಾಕ್ ಪರ್ಕಿಸೊ ಜಾಲಾ. ಫಿರ್ಗಜ್ ಸಮಾಜ್ ಸೊಡ್ಯಾಂ, ಕುಟ್ಮಾಚೆಂ ಬರೆಂ ಫಾಲೆಂ ಜಾತಾನಾ
ಹಾಜರ್ ಜಾಂವ್ಕ್ ಕುಟ್ಮಾಚಾ ಸಾಂದ್ಯಾಕ್ ನಾಕಾ ಜಾಲಾಂ. ಕೊಣಾಕ್ಯ್
ಬಾಗ್ವೊಂಕ್ ನಾಕಾ.
ಆಜ್ ಮನಿಸ್ ಶಿಕ್ಪಿ ಜಾಲಾ, ತಾಚೆಲಾಗಿಂ ಪೊಯ್ಶೆ ಆಸಾತ್, ಮನ್ಶಾಸಕ್ತೆಚಿ ತಾಕಾ ಗರ್ಜ್
ನಾ.
ದಾಕ್ಡ್ಯಾಧಿಂ ಎಕಾ ಶಿಭಿರಾವೆಳಾರ್ ಮ್ಹಜಾ ಮಿತ್ರಾನ್ ಸಾಂಗ್ಲ್ಲೆಂ ಏಕ್ ಉತಾರ್ ಉಡಾಸಾಕ್ ಯೆತಾ;
"ಗಾಂವಾಂತ್ ಆವ್ರ್ ಯೆತಾನಾ ಕದ್ವಳ್ ಉದಾಕ್ ಸರ್ವ್ ಅಪ್ಣಾಸವೆಂ
ವ್ಹಾಳೊನ್ ವರ್ತಾನಾ ವ್ಹಡ್ ವ್ಹಡ್ ರೂಕ್ ಝಡಾಂಕ್
ಸಯ್ತ್ ಪರ್ತುನ್ ವೆತಾ ಪುಣ್ ಲ್ಹಾನ್ ಲ್ಹಾನ್ ಝಡಾಂ
ಮಾತ್ರ್ ವಾಂಚೊನ್ ಉರ್ತಾತ್ ಕಶಿ?" ಆನಿಂ ತಾಚಿ ಜಾಪ್ಯ್ ತೊಚ್ಚ್ ದಿತಾ;
"ಕಿತ್ಯಾಕ್ ಮ್ಹಳ್ಯಾರ್ ರೂಕ್ ಬಾಗ್ವೊಂಕ್ ನೆಣಾಂತ್, ಝಡಾಂ
ಬಾಗ್ವೊಂಕ್ ಜಾಣಾಂತ್"
ಮನಿಸ್ ಅಪ್ಣಾನ್ ಖೊಂಡ್ಲ್ಲ್ಯಾ ಫೊಂಡಾಕ್ ಅಪ್ಣಾನ್ಂಚ್
ಪಡಾಜಯ್ ಜಾಲ್ಲ್ಯಾ ಹ್ಯಾ ಪರಿಗತೆಚಿ ಬಲಿ ಜಾವ್ನ್ ಜಿಯೆಂವ್ಚೊ
ಮನಿಸ್ ಸರ್ವ್ ಥರಾಂಚಾ ಪಿಡೆಂತ್ ವಳ್ವಳ್ತಾ, ಕುಡಿಚಿ, ಮತಿಚಿ, ಕಾಳ್ಜಾಚಿ ಪಿಡಾ. ಜಿಣ್ಯೆಂತ್
ಸಾಧ್ಯ್ ಜಾಲ್ಲೆತಿತ್ಲೆಂ ಗಳ್ಸುನ್ ಅಖ್ರೇಕ್ ಸಗ್ಳೆಂ ಹೊಗ್ಡಾವ್ನ್ ಘೆತ್ಲ್ಲೊ ಅನ್ಭೋಗ್.
"ಕಿತೆಂ ಉಪ್ಕಾರ್ ಜಿಣ್ಯೆಂತ್ ಸರ್ವ್ ಜಿಕೊನ್ ಜೀವ್ ಹೊಗ್ಡಾವ್ನ್?"
ಮ್ಹಳ್ಳೆಪರಿಂ..
ಪುಣ್ ಹೆಂ ಸರ್ವ್ ಕಿತ್ಯಾಕ್ ಆನಿ ಕಶೆಂ?
ಆಮ್ಚೊ ಪುರ್ವಜ್ ಅಶಿಕ್ಪಿ ಜಾವ್ನ್ ಜಿಯೆಲ್ಲೊ, ದಿಸಾಕ್ ಏಕ್ ಜೆವಾಣ್
ಸಯ್ತ್ ಕಸ್ಟಾಂಚೆಂ ಜಾಲ್ಲಿ ಪರಿಗತ್ ಪಳೆಲ್ಲೊ. ಸಗ್ಳೊ
ದೀಸ್ ಥಂಯ್ ಹಾಂಗಾ ಕತ್ತೆ ಚಾಕ್ರಿ ಕರುನ್ ಅಪ್ಲ್ಯಾ ಬುರ್ಗ್ಯಾಂಕ್
ವ್ಹಡಾ ಕಶ್ಟಾಂನಿ ತಾಣಿಂ ವ್ಹಡ್ ಕೆಲಾಂ. ಫುಡ್ಲೆ ದಿಸಾಂನಿ
ಹಾಣಿಂ ಕಾಡ್ಲ್ಲ್ಯಾ ವಾಂವ್ಟಿಚೊ ಫಳ್ ಮೆಳೊಂಕ್ ಲಾಗ್ಲೊ,
ಪುತಾನ್ ಅಪ್ಲ್ಯಾ ಭುರ್ಗ್ಯಾಂಕ್ ತಾಣಿಂ ಅಪ್ಣಾನ್ ಕಶ್ಟ್ ಕಾಡ್ಲ್ಲೆಪರಿಂ ಕಶ್ಟ್ ಕಾಡಿನಾಯೆ
ಮ್ಹಣೊನ್ ಬರೆಂ ಶಿಕಾಪ್ ದಿಲೆಂ, ಜಾಯ್ ಜಾಲ್ಲೆಂ ಸರ್ವ್
ದಿಲೆಂ. ಆಧುನಿಕ್ ರಿತಿಚೆಂ ಸಗ್ಳೆಂ ದಿಲೆಂ, ನೆಸಾಪ್, ಶಿಕಾಪ್, ದುಡು....
ಆನಿ ಹಿಂ ಭುರ್ಗಿಂ ವ್ಹಡಾ
ಮಜೆನ್ ವ್ಹಡ್ ಜಾಲಿಂ. ತಾಂಕಾಂ ಸಗ್ಳೆಂ ಮೆಳ್ಳೆಂ ಪುಣ್ ಕುಟ್ಮಾಚಿಂ
ಮೊಲಾಂ ಮೆಳ್ಳಿಂನಾಂತ್, ಈಶ್ಟ್ ಮೆಳ್ಳೆ ಪುಣ್ ಸಂಬಂಧಾಚಿಂ
ಮೊಲಾಂ ಕಳ್ಳಿಂನಾಂತ್, ಸನದ್ ಮೆಳ್ಳಿ ಪುಣ್ ಶಿಕಾಪ್ ಮೆಳ್ಳೆಂನಾ, ದುಡು ಮೆಳ್ಳೊ
ಪುಣ್ ಸುಖ್ ಮೆಳ್ಳೆಂನಾ. ದೆಖುನ್ ಸರ್ವ್ ಥರಾಂಚ್ಯೊ
ಸವಯೊ, ಆಮಾಲ್ ಪಿಯೊಣೆಂ, ಡ್ರಗ್ಸ್.. ಆನಿ ಪಿಡಾ.. ಆವಯ್
ಬಾಪುಯ್ ಅಪ್ಲ್ಯಾ ಬುರ್ಗ್ಯಾಂಕ್ ಬರೊ ಫುಡಾರ್ ಲಾಭ್ಲೊ ತರ್ ಆಮ್ಚಾ
ಪುರ್ವಜ್ಯಾಂನಿ ಕಾಡ್ಲ್ಲೆ ಕಶ್ಟ್ ಆಮ್ಚಾ ಪಿಳ್ಗೆಕ್ ಯೇನಾತ್ಲ್ಯಾರ್
ಪುರೊ ಮ್ಹಳ್ಳಿಂ ಸರ್ವ್ ಸ್ವಪ್ಣಾಂ ಹುಲ್ಪಾವ್ನ್, ಪ್ರಾಯೆಸ್ತ್ ಆವಯ್
ಬಾಪಾಂಯ್ ವರ್ನ್ ಆಶ್ರ್ಯಾಂತ್ ಘಾಲ್ನ್ ತಿಂ ಗಲ್ಫಾಕ್, ಅಮೆರಿಕಾ,
ಆಸ್ಟ್ರೇಲಿಯಾ, ಕೆನಡಾ ವ ಯು.ಕೆಂತ್ ಅಪ್ಲಿ ಜಿಣಿ ಸಾರುಂಕ್ ಗೆಲಿಂ.
ವಯ್ರ್ ವೊತ್ಲ್ಲೆಂ ಉದಾಕ್ ಎಕಾ ದಿಸಾ ಪುಣೀಂ ಸಕ್ಲಾ ದೆಂವ್ತಾಚ್ -
ಸಂಸಾರಿ ದವ್ಲತೆನ್ ಉಡಿ ಮಾರ್ಚಿಂ ಎಕಾ ದಿಸಾ ಧರ್ಣಿರ್ ಅಪ್ಲೆ
ಪಾಂಯ್ ದವರ್ತೆಲಿಂಚ್. ಪುಣ್ ತ್ಯಾ ದಿಸಾವಿಶಿಂ ಮಾತ್ರ್ ಕೊಣಾಕ್ಚ್ ಚಿಂತುಂಕ್
ನಾಕಾ. ಆಮ್ಕಾಂ ಸೀರಿಯಲ್ಸ್ ಆಸಾತ್, ಆಮ್ಕಾಂ ಇಂಟರ್ನೆಟ್ ಆಸಾ, ಆಮ್ಕಾಂ ಪಿಕ್ನಿಕಾಂ,
ಪಾರ್ಟ್ಯೊ, ಗಮ್ಮತಾಂ ಆಸಾತ್, ಆಮ್ಕಾಂ ಫೆಸ್ತಾಂ ಆಸಾತ್, ಆಮ್ಕಾಂ ಗಮ್ಮತ್ ಕರುಂಕ್ ಆಸಾ.. ಆಮ್ಕಾಂ ವೇಳ್ ನಾ... ದೆಖುನ್ ಆಮ್ಕಾಂ ಸಗ್ಳೆಂ ಲೆಕಾಚೆಂ. ಲೆಕಾಚೆಂ ಮಾಗ್ಣೆಂ, ಲೆಕಾಚೊ ತೇರ್ಸ್, ಲೆಕಾಚೆಂ ಮೀಸ್.
ಪುಣ್ ಅಜೂನ್ ಭೋವ್ ಅಪ್ರೂಪಾಯೆನ್ ತರ್ಯೀ ಥೊಡೆಕಡೆ ಆಮ್ಚೊ ಥೊಡೊ ಲೋಕ್, ಜಾಂವ್ ದುಬ್ಳೊ - ಪುಣ್ ಆಮ್ಚಾ ಸಂಸ್ಕೃತೆಕ್ ಅಜೂನ್ ಜೊಗ್ಸಾಣೆನ್ ಸಾಂಭಾಳುನ್ ಆಸಾ, ಅಪ್ಲ್ಯಾ ಬುರ್ಗ್ಯಾಂಕ್ ತೆಚ್ಚ್ ಪರಿಂ ಮಾಯಾಮೊಗಾನ್ ವ್ಹಾಡಯ್ತಾ, ತಿಚ್ಚ್ ದೇವ್ ಭಿರಾಂತ್, ಮನ್ಶಾ ಭಿರಾಂತ್, ಕಶ್ಟ್ ಅಪ್ಲ್ಯಾ ಭುರ್ಗ್ಯಾಂಕ್ ಶಿಕಯ್ತಾ.. ಬರೊ ದೊತೊರ್, ಬರೊ ಇಜ್ನೆರ್, ಬರೊ ವಕೀಲ್ ವ ಬರೊ .. ಮಾಗಿರ್ ಜಾಯಾ, ಪುಣ್ ಪಯ್ಲೆಂ.. ಬರೊ ಮನಿಸ್ ಜಾಯಾ ಮ್ಹಳ್ಳೆಂ ಲಿಸಾಂವ್ ಅಪುರ್ಭಾಯೆನ್ ಹಿಂ ಪಾಚಾರ್ತಾತ್.
ಹಾಂಚಿಂ ಕೊಣಾಕ್ಯ್ ವಳೊಕ್
ಆಸ್ಚೆಪರಿಂ ನಾ. ಕಿತ್ಯಾಕ್ ಹಾಂಚ್ಯೊ ತಸ್ವೀರ್ಯೊ ಪತ್ರಾಂನಿ-ಸಾಯ್ಟಾಂನಿ ಯೇನಾಂತ್, ಹಾಂಕಾಂ ಸಮಾಜೆಂತ್ ಕಾಂಯ್ ಸ್ಥಾನ್-ಮಾನ್ ನಾ. ಹಾಂಚಾ ಘರಾಂನಿ ಕೊಲು
ಆಸೊಂಕ್ ಪುರೊ. ಹೆಣೆಂ ತೆಣೆಂಚೆಂ ರೀಣ್ ಆಸೊಂಕ್ ಪುರೊ.. ಹಿಂ ಮೀಟ್ ಮಿರ್ಸಾಂಗೆಂತ್ ಜೆವ್ತಿತ್, ಹಾಂಚೆಲಾಗಿಂ ಫ್ರಿಜ್ ಜಾಂವ್, ಎಸಿ ಜಾಂವ್, ಫ್ಯಾನ್ ಜಾಂವ್ ಆಸ್ಚೆಂ ನಾ..
ಭೋವ್ಶಾ ಇಗರ್ಜೆಚೆಂ ಅನ್ವಲ್ ದಿಂವ್ಚಿ ತಾಂಕ್ಯ್ ಆಸತ್ ಮ್ಹಣ್ ಹಾಂವ್ ಪಾತ್ಯೆನಾ. ಪುಣ್ ಕಾಂಯ್ ಆಸತ್ ತರ್ ಭರ್ಪೂರ್ ಮಾಯಾಮೋಗ್, ಶೆಗುಣ್, ಖಾಲ್ತೆಂಪಣ್, ಆನಿ
ಮನ್ಶಾಪಣಾಚಿಂ ಮೌಲ್ಯಾಂ..
ಆಮಿಂ ಖಂಯ್ ಆಸಾಂವ್ ಮ್ಹಣ್ ಏಕ್ ಘಡಿ ಚಿಂತ್ಯಾಂಗಿ?
ದೇವ್ ಬರೆಂ ಕರುಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
