ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಮರ್ಶ್ಯಾ ಲೇಖನ್ - 2
ಬೂಕ್: ಕವಿತಾಪಾಠ್ ಭಾಗ್-1 [ಅಧ್ಯಯನ್ ಲೇಖನಾಂ]
ಸಂಪಾದಕ್: ವಲ್ಲಿ ಕ್ವಾಡ್ರಸ್
ಪ್ರಕಾಶಕ್: ಆಶಾವಾದಿ ಪ್ರಕಾಶನ್
ಆಟಾಪ್ಲೆಲಿಂ ಬರ್ಪಾಂ/ಕವಿತಾಂ:
ಮೆಲ್ವಿನ್ ಜೆ. ವಾಸ್, ಪ್ರಿಯಾ ಸಿಕ್ವೇರಾ, ಜೊಮೆಲ್ ಬೊಂದೆಲ್, ವಲ್ಲಿ ಕ್ವಾಡ್ರಸ್, ಹೆನ್ರಿ ಲುವಿಸ್, ಡೇವಿಡ್ ಲುವಿಸ್, ಕ್ಯಾರಲ್ ಮಾರ್ಟಿಸ್, ಐಡಾ ಡಿ’ಸಿಲ್ವಾ, ಸಿರಿಲ್ ಪೆರಿಸ್, ಲೆಸ್ಲಿ ನೊರೊಞ್.
ಮೆಲ್ವಿನ್ ಪಿಂಟೊ, ನೀರುಡೆ
ಹ್ಯಾ ಪಾಠಾಂತ್ ಥೊಡೊ ವಿಮರ್ಸೊಯೀ ಆಸಾ!
ಕೊಂಕ್ಣೆಂತ್ ವಿಮರ್ಶಾತ್ಮಕ್ ಸಾಹಿತ್ಯಾಚೊ ದುಕೊಳ್ ಆಸಾ ತೆಂ ಖರೆಂ. ತಶೆಂ ಮ್ಹಣ್ ವಿಮರ್ಶಕ್ ಅಪ್ಶೆಂಚ್ ಉಭ್ಜಾನಾಂತ್. ಥೊಡೆಪಾವ್ಟಿಂ ತೆ ಮಿನತೆನ್ ವಿಮರ್ಶಕ್ ಜಾತಾತ್ ಯಾ ಬರವ್ಪ್ಯಾಂ ಮದ್ಲ್ಯಾ ಥೊಡ್ಯಾಂಕ್ ವಿಮರ್ಶಕ್ ಜಾಂವ್ಚೆಬರಿ ಕೊಣೆ ತರೀ ವಾಟ್ ದಾಕಯ್ಜೆ ಪಡ್ತಾ. ತಸಲೆಂ ಏಕ್ ಪ್ರಾಮಾಣಿಕ್ ಪ್ರಯತ್ನ್ ಪಾಟ್ಲ್ಯಾ ಎಕಾ ವರ್ಸಾಥಾವ್ನ್ ’ಆಶಾವಾದಿ’ ಪ್ರಕಾಶನಾಚೊ ವಾಂಗ್ಡಿ ವಲ್ಲಿ ಕ್ವಾಡ್ರಸ್ ಕರುನ್ ಆಸಾ, ತೇಂಯೀ ಭಾಯ್ಲ್ಯಾ ಗಾಂವಾಂತ್. ತಸಲ್ಯಾ ತಾಚ್ಯಾ ಆನಿ ತಾಚ್ಯಾ ಕಾಲೆತಿಚ್ಯಾ ಸಾಂಗಾತ್ಯಾಂಚ್ಯಾ ಪ್ರಯತ್ನಾಚೊ ಫಳ್ ಜಾವ್ನ್ ಭಾಯ್ರ್ ಆಯ್ಲಾ ’ಕವಿತಾಪಾಠ್’.
ಹ್ಯಾ ಪುಸ್ತಕಾವಿಶಿಂ ಕಿತೆಂಯ್ ಬರಂವ್ಚೆ ಆದಿಂ ಅಸಲ್ಯಾ ಎಕಾ ಸಾಹಸಾಕ್ ದೆಂವ್ಲ್ಲ್ಯಾ ಸರ್ವಾಂಕ್ ಶಾಭಾಸ್ಕಿ ಪಾಟಯ್ನಾ ತರ್ ಹಾಂವ್ ಸುರಾತಿ ಜಾಂವ್ಕ್ ಆಸಾಂ.
ಹ್ಯಾ ಸಂಗ್ರಹಾಂತ್ ಪಾಂಚ್ ಕವಿತೆಂಚೆಂ ಶಿಂದಾಪ್ ಕರ್ನ್ ರೂಚ್ ಚಾಕ್ಚೆಂ ಪ್ರಯತ್ನ್ ಕೆಲಾಂ ಬರವ್ಪ್ಯಾಂನಿ. ವಲ್ಲಿ ಕ್ವಾಡ್ರಸಾನ್ ಸಾಂಗ್ಚೆಪ್ರಕಾರ್ ಹಾಂಗಾಸರ್ ಬರವ್ಪ್ಯಾಂನಿ ಲಿಕ್ಲ್ಲಿಂ ಲೇಕನಾಂ ವಿಮರ್ಸೊ ನ್ಹಯ್. ತರ್ ಆನಿ ಕಿತೆಂ ಮ್ಹಳ್ಳೆಂ ಸವಾಲ್ ಉಭ್ವೊಂವ್ಚೆಂ ವಾಜ್ಬಿ. ಮ್ಹಜೆ ಸಮ್ಜಣೆ ಪ್ರಕಾರ್ ಕವಿತಾ ವಾಚುನ್ ಬರವ್ಪ್ಯಾನ್ ಅಪ್ಣಾಕ್ ಕವಿತಾ ಕಶಿ ಅರ್ಥ್ ಜಾಲ್ಯಾ ತಶೆಂ ಉಮಾಳ್ಲ್ಲಿಂ ಭೊಗ್ಣಾಂ ಲಿಖ್ಲ್ಯಾಂತ್. ಥಂಯ್ ಹಾಂಗಾ, ಥೊಡ್ಯಾ ಲೇಕನಾಂನಿ ತರ್ಯೀ, ವಿಮರ್ಶಾಚಿ ಝಳಕ್ ಆಸಾ ತೆಂ ಮಾತ್ರ್ ನೆಗಾರುಂಕ್ ಜಾಯ್ನಾ.
’ವಿಮರ್ಸೊ’ ಕರುಂಕ್ ವಿಂಚ್ಲ್ಲ್ಯಾ ಕವನಾವಿಶಿಂ ದೋನ್ ಉತ್ರಾಂ ನಾಂತ್. ತಿಂ ಸರ್ವ್ ಕೊಂಕ್ಣೆಂತ್ ಆಯ್ಲೆವಾರ್ ಆಯಿಲ್ಲಿಂ ವಿಂಚ್ಣಾರ್ ಕವನಾಂ (ವಾಟ್, ಬಾಂಯ್, ಕಯ್ದ್ಯಾಚಿ ಕವಿತಾ, ಸಲ್ವಣ್, ಆಜ್). ಹ್ಯಾ ಸರ್ವ್ ಕವನಾಂಚೆಂ ವಿಶೇಸ್ ಲಕ್ಶಣ್ ಮ್ಹಳ್ಯಾರ್ ತಿಂ ವಿವಿಧ್ ರಿತಿಂಚೆ ಅರ್ಥ್ ಸಹೃದಯಿ ಥಂಯ್ ಉಭ್ಜಂವ್ಕ್ ಸಕ್ತಾತ್. ತ್ಯಾಚ್ ದೆಕುನ್ ತಿಂ ವಿವಿಧ್ ವಾಚ್ಪ್ಯಾಂಕ್ ವಿವಿಧ್ ರಿತಿಂ ಆವಡ್ತಾತ್ ಆನಿ ವಿವಿಧ್ ಭೊಗ್ಣಾಂ ಉಮಾಳಾಯ್ತಾತ್. ತಶೆಂ, ಹ್ಯಾ ಸಂಗ್ರಹಾಂತ್ ಭಾಗ್ ಘೆತ್ಲ್ಲ್ಯಾ ಬರವ್ಪ್ಯಾಂನಿ ಖಂಚಿ ಮತಿ-ದೀಶ್ಟ್
(perspective) ಧ್ವಾರಿಂ ಕವಿತಾ ಪಳೆಲ್ಯಾ ತೆಂ ಆಮಿ ಪಾರ್ಕಿಯೆತ್.
"Beauty lies in the eyes of the
beholder", (ಸೊಭಾಯ್ ಕಿತೆಂ ಮ್ಹಣ್ ಪಳೆಲ್ಲೆ ದೊಳೆ ನಿರ್ಧಾರ್ ಕರ್ತಾತ್!) ಮ್ಹಣ್ತಾ ಇಂಗ್ಲಿಶ್ ಕವಿ ಶೆಲ್ಲಿ. ತಶೆಂ ಎಕಾ ಕವಿತೆಚಿ ರೂಚ್ಯೀ ವಾಚ್ಪ್ಯಾನ್ ತಿ ಕಶಿ ಆಸ್ವಾದನ್ ಕೆಲ್ಯಾ ಮ್ಹಳ್ಳ್ಯಾಂತ್ ಹೊಂದೊನ್ ಆಸಾ.
ಫ್ರೆಡ್ಕುಮಾರಾಚಿ ’ಸಲ್ವಣ್’ ಕವಿತಾ ನಿಜಾಯ್ಕೀ ಕಾಳ್ಜಾಕ್ ಆವಡ್ಚಿ ಮಾರ್ಮಿಕ್ ಕವಿತಾ. ಜಿ ಹಾಂಗಾಚ್ಯಾ ಬರವ್ಪ್ಯಾಂನಿ ಖರಿಚ್ ಪಾರ್ಕಿಲ್ಯಾ, ವಿವಿಧ್ ಅರ್ಥ್ ಸೊಧ್ಲ್ಯಾತ್. ತರಿಕೀ ಸರ್ವ್ ಅರ್ಥ್ ಕವಿತೆಕ್ ನ್ಯಾಯ್ ದಿತಾತ್ ಮ್ಹಣ್ ಸಾಂಗ್ಚೆಂ ಕಶ್ಟ್.
ಮೆಲ್ವಿನ್ ರೊಡ್ರಿಗಸಾಚಿ ’ವಾಟ್’ ಕವಿತಾ ಏಕ್ ಬಂಡಾಯ್ ಕವಿತಾ ಕಶಿ ಪಿಂತ್ರಾಯ್ತಾ ವಲ್ಲಿ ಕ್ವಾಡ್ರಸ್. ಮ್ಹಾಕಾ ಕಿತ್ಯಾಕ್ಗೀ ಹೆಂ ಒಪುನ್ ಘೆಂವ್ಕ್ ಕಶ್ಟ್ ಮಾರ್ತಾತ್. ಬಂಡಾಯ್ ಜೆದ್ನಾ ಉಭ್ಜಾತಾ ತೆದ್ನಾಂ ಏಕ್ ಕವಿ ಸಮಾಜೆಚಿ ಅನೀಕ್, ಅನ್ನ್ಯಾಯ್, ಪೊಕೊಲ್ಪಣಾ ವಿರ್ಡೊ ತಾಳೊ ಉಟಯ್ತಾ ಆನಿ ಉತ್ರಾಂಚ್ಯಾ ಸಂಘರ್ಶಾಕ್ ದೆಂವೊನ್ ಕ್ರಾಂತೆಕ್ ಬುನ್ಯಾದ್ ಘಾಲ್ತಾ. ವಾಟ್ ಕವಿತೆಂತ್ ಕವಿ ಅಪ್ಣಾ ಭಿತರ್ಚ್ ಆಸಾ - ಅಪ್ಣೆಂ, ಅಪ್ಣಾಖಾತಿರ್ ರುತಾ ಕೆಲ್ಲ್ಯಾ ವಾಟೆವಿಶಿಂ ಸಾಂಗ್ತಾ. ತಶೆಂ ಹಿ ಏಕ್ ಬಂಡಾಯ್ ಕವಿತಾ ಮ್ಹಣ್ಚೆವಿಶಿಂ ಮ್ಹಾಕಾ ಮ್ಹಜೆಚ್ ದುಭಾವ್ ಆಸಾತ್.
ಪಾಂಚ್ಯೀ ಕವಿತೆಂನಿ ಸಭಾರ್ ಇಮಾಜ್ಯ್, ಪ್ರತಿಮಾಂ ಆಸಾತ್ ವ್ಹಯ್, ತಶೆಂ ಮ್ಹಣ್ ಹರ್ಯೆಕ್ ಸಬ್ಧ್ಯೀ ಏಕ್ ಇಮಾಜ್ ಯಾ ಪ್ರತಿಮಾ ಖಂಡಿತ್ ನ್ಹಯ್. ಥೊಡೆಕಡೆ ಬರವ್ಪ್ಯಾಂನಿ ನಾತ್ಲ್ಲ್ಯೊ ಇಮಾಜ್ಯೊ, ಪ್ರತಿಮಾಂ ಸೊಧ್ಚೆಂ ಪ್ರಯತ್ನ್ ಕೆಲ್ಲೆಂ ದಿಸ್ತಾ!
’ಕವಿತಾಪಾಠ್’ ತಸಲೆಂ ಪ್ರಯತ್ನ್ ಮುಕಾರುನ್ ವಚಾಜಯ್ ಖಂಡಿತ್. ಪುಣ್ ಹ್ಯಾ ಲೇಖನಾಂನಿ ಚಡಿತ್ ವೃತ್ತಿಪರಾಯ್ ಜಾಯ್ಜಯ್ ಕೊಣ್ಣಾ! ಫಕತ್ತ್ ಭೊಗ್ಣಾಂ, ಚಿಂತ್ನಾಂನಿಂಚ್ ತೃಪ್ತಿ ಪಾವ್ಲ್ಯಾರ್ ಮಾತ್ರ್ ವಿಮರ್ಶಾ ಸಾಹಿತ್ ಘಡಾನಾ ಮ್ಹಳ್ಳೆಂಯೀ ಮತಿಂತ್ ದವ್ರಿಜೆ. ಥೊಡಿ ತರ್ಭೆತಿ, ಚಡಿತ್ ವಿಮರ್ಶಾ ವಾಚಪ್ ಗರ್ಜೆಚೆಂ.
ಹ್ಯಾ ಸಂಗ್ರಹಾಕ್ ಪ್ರಸ್ತಾವನ್ ಕಶಿಂ ಆಸ್ಚಿಂ ತಿನ್ಯೀ ಲೇಕನಾಂ (ಮೆಲ್ವಿನ್ ರೊಡ್ರಿಗಸ್, ಎಚ್ಚೆಮ್ ಪೆರ್ನಾಲ್ ಆನಿ ಹೇಮಾಚಾರ್ಯ) ಸಂಗ್ರಹಾಚ್ಯಾ ಪ್ರವೇಶಾಕ್ ವಾಚ್ಪ್ಯಾಕ್ ಬರಿಂಚ್ ತಯಾರ್ ಕರ್ತಾತ್.
[ಹೆಂ ವಿಮರ್ಶ್ಯಾ ಲೇಖನ್ ’ಮಿತ್ರ್’ ಹಾಫ್ತ್ಯಾಳ್ಯಾಚೆರ್ ಪರ್ಗಟ್ಲಾಂ]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
