ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ದೋನ್
ತುಜೆಂ ಜಿವಿತ್ ತುಜಿ ವಿಂಚವ್ಣ್
ನ್ಹಂಯ್
ಆವಸ್ವರ್ ಅಟ್ರಾ: ಮಿಶೇಲ್ ರಾಯನ್ ಆಲಿಯಾ
ವಿಶಾಲ್ ಪಾಚ್ವ್ಯಾ ಮಯ್ದಾನಾರ್ ಪಡ್ಚ್ಯಾ ದಾಟ್ ಧೊವಾ ಮಧೆಂ ಚರ್ಚ್ಯಾ ಧವ್ಯಾ ಘೊಡ್ಯಾಂ ಸವೆಂ ಮಿಶೇಲ್ ಚಲೊನ್ ವೆತಾಲೆಂ. ಭಿಲ್ಕುಲ್ ಧವ್ಯಾ ಉಜ್ವಳ್ಚ್ಯಾ ವಸ್ತ್ರಾಂಚೆರ್! ತೊ ಧೋವ್, ತೆ ಘೊಡೆ, ತೆಂ ಮಿಶೇಲ್! ಸಗ್ಳೆಂಚ್ ಧವೆಂ ಧವೆಂ! ತ್ಯಾ ಧೊವಾ ಮಧೆಂ ಮಿಶೇಲಾನ್ ನ್ಹೆಸ್ಲೆಲೆಂ ವಸ್ತುರ್ ವ್ಹಳೂ ವಾರ್ಯಾರ್ ಉಭ್ತಾ ತಶೆಂ ದಿಸ್ತಾಲೆಂ. ಹೊ ಕಸಲೊ ಸಂಸಾರ್? ಹ್ಯಾ ಸಂಸಾರಾಂತ್ ಫಕತ್ತ್ ಮಿಶೇಲ್ ಮಾತ್ರ್?
"ಮಿಶೇಲ್.....?" ರಾಯನಾನ್ ಮಿಶೇಲಾಕ್ ಉಲೊ ದಿಲೊ.
ನಾ! ಮಿಶೇಲಾಕ್ ರಾಯನಾಚೊ ತಾಳೊ ಆಯ್ಕೊನ್ ಆಯ್ಲೊ ನಾ. ತೆಂ ತಶೆಂಚ್ ತ್ಯಾ ಧವ್ಯಾ ಧೊವಾ ಮಧೆಂ ಚಲ್ತಾಲೆಂ. ಆಪ್ಣಾನ್ ಮಿಶೇಲಾಕ್ ಆಪಯಿಲ್ಲೆಂ ತಾಕಾ ಆಯ್ಕೊಂಕ್ ನಾ?
"ಮಿಶೇಲ್......?" ಪರ್ತ್ಯಾಕ್ ರಾಯನಾಚೊ ತಾಳೊ ಉಟ್ಲೊ.
ತಿತ್ಲ್ಯಾರ್!
ರಾಯನಾಚೊ ತಾಳೊ ಆಯ್ಕಾಲ್ಲೆಂ ಮಿಶೇಲ್ ಎಕಾಚ್ಚ್ಫರಾ ಪಾಟಿಂ ಘುಂವ್ಲೆಂ. ಪಾಟಿಂ ಘುಂವ್ಲ್ಲ್ಯಾ ತಾಕಾ ರಾಯನ್ ದಿಸ್ಲೊ.
ಮಿಶೇಲಾಚೆಂ ತೋಂಡ್ ಪರ್ಜಳ್ತಾಲೆಂ.
ಮಿಶೇಲಾಕ್ಚ್ ಪಳಂವ್ಚ್ಯಾ ರಾಯನಾಕ್ ತಾಚೆಂ ಮಿಶೇಲ್ ಭರಫಾ ಜಾತಿಚೆಂ ಮ್ಹಳ್ಳ್ಯಾ ಪರಿಂ ದಿಸ್ಲೆಂ.
"ಮಿ...ಶೇ...ಲ್.....!" ರಾಯನಾಚಾ ಜಿಬೆರ್ ಉತಾರ್ ಫುಟ್ಲೆಂ.
ತಿತ್ಲೆಂಚ್!
ಮಿಶೇಲಾನ್ ಆಪ್ಲೆ ಹಾತ್ ಉಭಾರುನ್ ರಾಯನಾಕ್ ಆಪಯ್ಲೆಂ.
’ಮಿಶೇಲ್ ಆಪ್ಣಾಕ್ ಆಪಯ್ತಾ!’ ರಾಯನಾನ್ ಆಪ್ಲ್ಯಾ ಮಿಶೇಲಾ ತೆವ್ಶಿಂ ಧಾಂವ್ ಮಾರ್ಲಿ.
ತಿತ್ಲ್ಯಾರ್!
ಕಿತೆಂಗೀ ಪಡ್ಲ್ಲೊ ಆವಾಜ್! ತಾಚ್ಯಾ ಪಾಟ್ಲ್ಯಾನ್ ಆಪ್ಲಿ ತಕ್ಲಿ ಮಿರ್ಮಿರ್ಲೆಲ್ಯಾಪರಿಂ ಜಾವ್ನ್ ರಾಯನಾನ್ ಆಪ್ಲೆ ದೊಳೆ ಉಘಡ್ಲೆ.
ಉಗ್ತೆ ಕೆಲ್ಲ್ಯಾ ತಾಚ್ಯಾ ದೊಳ್ಯಾಂಕ್, ಬೆಡ್ರೂಮಾಚಾ ಜನೆಲಾಕ್ ವೊಡ್ಲೆಲ್ಯಾ ಕರ್ಟನಾ ಭಿತರ್ ಥಾವ್ನ್ ಭಾಯ್ಲಿಂ ಸುರ್ಯಾಚಿಂ ಕಿರ್ಣಾಂ ತೊ ನಿದ್ಲ್ಲ್ಯಾ ಬೆಡ್ರೂಮಾಂತ್ ಫಾಂಕೊನ್ ಯೇವ್ನ್ ಭಿತರ್ ರಾಜ್ ಕರುನ್ ಆಸ್ಲ್ಲ್ಯಾ ಅಂದ್ಕಾರಾಕ್ ದಾಂವ್ಡಾವ್ನ್ ಆಪ್ಲ್ಯಾ ಜಯ್ತಾಕ್ ವಾಖಣ್ತ್ ತಶಿಂ ದಿಸ್ಲಿಂ.
ದೊಳೆ ಉಗಡ್ಲ್ಲ್ಯಾ ರಾಯನಾಕ್ ಆಪ್ಲ್ಯಾ ಬೆಡ್ರೂಮಾಂತ್ ಉಜ್ವಾಡ್ಚ್ ಉಜ್ವಾಡ್ ದಿಸ್ಲೊ! ಪುಣ್.....?
ಕಿತ್ಯಾಕ್ಗೀ ತಕ್ಲಿ ಮಿರ್ಮಿರ್ಲ್ಲ್ಯಾಪರಿಂ ಜಾತಾನಾ ತಾಣೆಂ ಆಪ್ಲ್ಯಾ ಹಾತಾನ್ ಆಪ್ಲ್ಯಾ ತಕ್ಲೆಕ್ ಪೊಶೆಲೆಂ!
ತಿತ್ಲೆಂಚ್!
ತಾಣೆಂ ಆತಾಂ ಹೆವ್ಶಿಂ ತೆವ್ಶಿಂ ಪಳೆಲೆಂ. "ಮೈ ಗಾಡ್!" ತೊ ಉದ್ಗಾರ್ಲೊ.
ಆಪುಣ್ ಹಾಂಗಾ....? ಧರ್ಣಿರ್?
ವ್ಹಯ್! ರಾಯನ್ ಸಪ್ಣೆತಾಂ ಸಪ್ಣೆತಾಂ ಲೊಳೊನ್ ಧರ್ಣಿರ್ ಪಡ್ಲ್ಲೊ!
ತರ್ ಮಿಶೇಲ್......?
’ಸಟ್ಟ್’ ಕರುನ್ ತೊ ಪಡ್ಲೆಲ್ಯಾ ಕಡೆನ್ ಥಾವ್ನ್ ಉಟೊನ್ ಉಭೊ ಜಾಲೊ. ಬಗ್ಲೆಚಿ ಖಾಟ್ ಖಾಲಿ!
"ಮಿಶೇಳ್? ಮಿಶೇಲ್......?" ಆಪ್ಲ್ಯಾ ಬಾಯ್ಲೆಕ್ ತಾಣೆಂ ಉಲೊ ದಿಲೊ.
ಮಿಶೇಲಾಚಿ ಕಾಂಯ್ಚ್ ಜಾಪ್ ನಾ.
ರಾಯನಾಚಿ ನದರ್ ವೊಣ್ತಿ ವಯ್ಲ್ಯಾ ಗಡಿಯಾಳಾಕ್ ಸೊಧುನ್ ಧಾಂವ್ಲಿ.
ವೊರಾಂ ಸಾಕಾಳಿಂಚಿಂ ನೋವ್ ಜಾವ್ನ್ ವೀಸ್ ಮಿನುಟಾಂ!
ಇತ್ಲೊ ವೇಳ್ ಪಾಸೊನ್ ಆಪುಣ್ ಹ್ಯಾ ಖಾಟಿಯೆರ್ ನಿದೊನ್ ಸಪ್ಣೆವ್ನ್ ಆಸಾಂ? ಮತಿನ್ ಜಾಗಯ್ತಾನಾ ತಾಣೆಂ ಆಪ್ಣಾಚ್ಯಾ ದಾವ್ಯಾ ಹಾತಾನ್ ತಕ್ಲೆಕ್ ಪೊಶೆಲೆಂ. ತಕ್ಲಿ ಅಜೂನ್ ದುಖಿನ್ ಮಿರ್ಮಿರ್ತಲಿ. ಖಾಟಿಯೆರ್ ಥಾವ್ನ್ ತೊ ಸಕಯ್ಲ್ ಧರ್ಣಿರ್ ಗಳ್ತಾನಾ ತಾಚಿ ತಕ್ಲಿ ತ್ಯಾ ಧರ್ಣಿ ವಯ್ಲ್ಯಾ ಮಾರ್ಬಲಾಂಕ್ ಆಪ್ಟಾಲ್ಲಿ. ಆಪ್ಣಾಚಿ ಪರಿಸ್ಥಿತಿ ಪಳವ್ನ್ ಸವ್ಕಾಸ್ ತಾಣೆಂ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡ್ಲ್ಯೊ. ಹ್ಯಾ ವಗ್ತಾರ್ ಮಿಶೇಲ್ ಬೆಡ್ರೂಮಾಂತ್ ಆಸ್ಲ್ಲೆಂ ಜಾಲ್ಯಾರ್......? ವ್ಹಯ್! ಆಪ್ಣಾಚ್ಯಾ ಹ್ಯಾ ಆವ್ತಾರಾಕ್ ಪಳವ್ನ್ ಬರೆಂಚ್ ಹಾಸ್ತೆಂ! ದಾಕ್ಟೆಂ ಭುರ್ಗೆಂ ಹಾಸ್ಚ್ಯಾ ಪರಿಂ ಮ್ಹಜ್ಯಾ ಬಾವ್ಳ್ಯಾಂಕ್ ಧರುನ್ ಹಾಸೊನ್ ಹಾಸೊನ್ ಥಕ್ತೆಂ. ಪುಣ್......?
ಖಂಯ್ಚರ್ಯ್ ಮಿಶೇಲಾಚಿ ಝಳಕ್ ತಾಕಾ ದಿಸ್ಲಿ ನಾ. ಆಪ್ಣಾಕ್ ಸೊಡುನ್ ಮಿಶೇಲ್ ಖಂಯ್ ಗೆಲಾಂ? ತಾಚಿ ಮತ್ ಆತಾಂ ಸವ್ಕಾಸ್ ಪಾಟಿಂ ಧಾಂವೊನ್ ಮತಿಂತ್ಲ್ಯಾ ಸಪ್ಣಾಕ್ ಉಡಾಸ್ ಕಾಡುಂಕ್ ಲಾಗ್ಲಿ. ತ್ಯಾ ಉಡಾಸಾಂತ್ಲ್ಯಾ ಮಿಶೇಲಾಚಾ ಸಂಸಾರಾಕ್ ನಿಯಾಳುನ್ ತಾಚ್ಯಾ ತೊಂಡಾರ್ ಕಸಲೊಗೀ ಏಕ್ ಅಸ್ಪಶ್ಟ್ ಭಿರಾಂತೆಚೊ ಆಶ್ಚರ್ಯ್ ಉದೆಲೊ.
ಭಿರಾಂತೆಚೊ ಆಶ್ಚರ್ಯ್!
ಮಿಶೇಲ್ ಆನಿ ತಾಚೊ ತೊ ಧವೊ ಸಂಸಾರ್! ಸಂಪೂರ್ಣ್ ಪವಿತ್ರ್ ಮ್ಹಳ್ಳೊ ಸಂಸಾರ್!
ರಾಯನಾಚಿ ಮತ್ ಆತಾಂ ತ್ಯಾ ತಾಚ್ಯಾ ಸಪ್ಣಾಂತ್ ತಾಣೆಂ ಪಳೆಲ್ಲ್ಯಾ ಮಿಶೇಲಾಚಾ ಸಂಸಾರಾಕ್ ಆನಿ ಮಿಶೇಲಾಚಾ ಖುಶಿಯೆ ಪರ್ಮಾಣೆಂ ತಾಣೆಂ ತಾಕಾ ಕಾಲ್ಚ್ಯಾ ಸಾಂಜೆರ್ ಆಪವ್ನ್ ವೆಲ್ಲ್ಯಾ ಸಂಸಾರಾಕ್ ನಿಯಾಳುಂಕ್ ಲಾಗ್ಲಿ.
ಕಾಲ್ಚ್ಯಾ ಸಾಂಜೆರ್ ರಾಯನ್ ಆಪ್ಲ್ಯಾ ಮಿಶೇಲಾ ಸವೆಂ ಆಪ್ಲ್ಯಾ ಫಾರ್ಮ್ ಹೌಸಾಚ್ಯಾ ವಾಟೆರ್ ಆಸ್ಲ್ಲೊ. ತಿಂ ದೊಗಾಂಯ್ ಹ್ಯಾ ಫಾರ್ಮ್ಹೌಸಾಚಾ ವಾಟೆರ್ ಆಸ್ತಾನಾ ಜಿಪಾರ್ ಜಾಲ್ಲ್ಯಾ ತಾಂಚ್ಯಾ ಉಲೊಣ್ಯಾ ಮಧೆಂ ಅವ್ಚಿತ್ತ್ ಮಿಶೆಲಾನ್ ತ್ಯಾ ಪ್ರಾಯ್ವಂತಾಂಚಾ ಆಸ್ರ್ಯಾ ವಿಶಿಂ ಉಲಯ್ತಾನಾ ಮಿಶೇಲಾಕ್ ತ್ಯಾ ಆಸ್ರ್ಯಾಕ್ ವಚೊಂಕ್ ಉರ್ಭಾ ಆಸ್ಲ್ಲಿ ಪಳವ್ನ್ ಫಾರ್ಮ್ ಹೌಸಾಕ್ ಯೆಂವ್ಚ್ಯಾ ಪಯ್ಲೆಂ ತೊ ತಾಕಾ ತ್ಯಾ ಪ್ರಾಯ್ವಂತಾಂಚಾ ಆಸ್ರ್ಯಾಕ್ ಆಪವ್ನ್ ವರುನ್ ಗೆಲ್ಲೊ.
ಆಪ್ಣಾಚೆಂ ಕಾಜಾರ್ ಜಾವ್ನ್ ಮುಂಬಯಿ ಆಯ್ಲ್ಯಾ ಉಪ್ರಾಂತ್ ಮಿಶೇಲ್ ಹೆಂಚ್ ಪಯ್ಲೆ ಪಾವ್ಟಿಂ ಪ್ರಾಯ್ವಂತಾಚಾ ಆಸ್ರ್ಯಾಕ್ ವಚೊನ್ ಆಯಿಲ್ಲೆಂ.
ರಾಯನಾನ್ ಮಿಶೇಲಾಕ್ ಹ್ಯಾ ತಾಚ್ಯಾ ಭೆಟೆಂತ್ ಸಂಪೂರ್ಣ್ ವೀಕ್ಷಣ್ ಕೆಲ್ಲೆಂ. ತೆಂ ತ್ಯಾ ಆಸ್ರ್ಯಾಂತ್ ಮಸ್ತ್ ಖುಶ್ ಆಸ್ಲ್ಲೆಂ. ಜಶೆಂ ಸಭಾರ್ ಥೆಂಪಾ ಥಾವ್ನ್ ಮೆಳಾನಾಸ್ತಾನಾ ಅಚಾನಕ್ ಮೆಳ್ಲ್ಲ್ಯಾ ಲೊಕಾಂಕ್ ಪಳವ್ನ್ ತೆಂ ಮಸ್ತ್ ಖುಶ್ ಜಾಲ್ಲೆಂ. ಪ್ರಾಯ್ವಂತಾಂಚ್ಯಾ ಆಸ್ರ್ಯಾಕ್ ಪಾವ್ತಾ ಪಾಸೊನ್ ಆಪುಣ್ ತುಕಾ ಆಸ್ರ್ಯಾಕ್ ಆಪವ್ನ್ ವರ್ತಾಂ ಮ್ಹಳ್ಳೆಂ ರಾಯನಾನ್ ಮಿಶೆಲಾಕ್ ಕಳಿತ್ ಕರುಂಕ್ ನಾತ್ಲ್ಲೆಂ. ಅಚಾನಕ್ ತಿಂ ಹಾಂಗಾ ಪಾವ್ಲ್ಲಿಂ.
ಮಿಶೇಲ್ ತ್ಯಾ ಆಸ್ರ್ಯಾಂತ್ಲ್ಯಾ ಪ್ರಾಯ್ವಂತಾಂಲಾಗಿಂ ತಾಂಚಾ ಲಾಗ್ಶಿಲ್ಯಾ ಸಂಭಂಧಾಚೆಂ ಮ್ಹಳ್ಳ್ಯಾ ಪರಿಂ ಭರ್ಸಾಲೆಂ. ತಾಂಚೆ ಲಾಗಿಂ ತೆಂ ಹಾಸೊನ್ ಹಾಸೊನ್ ಉಲಯ್ತಾಲೆಂ. ತಾಂಕಾ ಆಯ್ಕಾತಾಲೆಂ. ತಾಂಕಾ ಭುಜಾವಣ್ ದಿತಾಲೆಂ. ಪಯ್ಲೆಂ ಪಯ್ಲೆಂ ಮಿಶೇಲಾಚ್ಯಾ ಹ್ಯಾ ಆಶೆಕ್ ಪಳವ್ನ್ ರಾಯನಾಕ್ ಉದಾಸ್ಪಣ್ ಭೊಗ್ಲೆಂ ಜಾಲ್ಯಾರ್ಯ್ ಮಿಶೇಲಾಚ್ಯಾ ತ್ಯಾ ಉಲೊಣ್ಯಾ ಥಾವ್ನ್ ತ್ಯಾ ಪ್ರಾಯ್ವಂತಾಂಚಾ ತೊಂಡಾರ್ ಉದೆಲ್ಲ್ಯಾ ಹಾಸ್ಯಾಂಕ್ ಪಳೆವ್ನ್ ಆನಿ ತಾಂಚ್ಯಾ ತೊಂಡಾ ಥಾವ್ನ್ ತಾಂಚ್ಯಾ ಜಿವಿತಾಚಿ ಕಾಣಿ ಆಯ್ಕೊನ್ ಮಿಶೇಲಾನ್ ರಸ್ತ್ಯಾರ್ ಜಿಪಾರ್ ಉಚಾರ್ಲ್ಲಿಂ ಉತ್ರಾಂ ಖರೆಂಚ್ ಸತ್ ಮ್ಹಳ್ಳ್ಯಾ ಪರಿಂ ರಾಯನಾಕ್ ಭೊಗ್ಲ್ಲೆಂ.
ಖರೆಂಚ್ ಹ್ಯಾ ವಾಟೆರ್ ಮಸ್ತ್ ಸಪ್ಣಾಂ ಶಿಂಪಡ್ಲ್ಲಿಂ. ಹ್ಯಾ ಸಪ್ಣಾಂಕ್ ಆಶೆವ್ನ್ ಯೆಂವ್ಚೊ ಕೊಣ್ಯ್ ನಾತ್ಲ್ಲೊ. ಹ್ಯಾ ಸಪ್ಣಾಂಕ್ ಆರಾಂವ್ಕ್ ಕೊಣಾಕ್ಯ್ ನಾಕಾ ಜಾಲ್ಲೆಂ. ಪುಣ್ ಮಿಶೇಲ್....? ಮಿಶೇಲಾಚ್ಯಾ ಉತ್ರಾಂನಿ ಆಸ್ಲ್ಲಿ ಜಾಣ್ವಾಯ್ ರಾಯನಾಚಾ ಸಮ್ಜೊಣೆಕ್ ಯೆತಾನಾ ಆಪ್ಲ್ಯಾ ಬಾಯ್ಲೆ ವಯ್ರ್ ತಾಕಾ ನಿಜಾಯ್ಕ್ಯ್ ಗೌರನ್ ಉದೆಲೊ.
ಹ್ಯಾ ವಗ್ತಾರ್ ತಾಕಾ ಖಚಿತ್ ಜಾಲೆಂ ಕೀ ತಾಚ್ಯಾ ಬಾಪಾಯ್ನ್ ಆಶೆಂಲ್ಲೆಂ ಆನಿ ಆಪ್ಣೆಂ ವಿಂಚುನ್ ಹಾಡ್ಲ್ಲೆಂ ಸಪಾಣ್ ಹೆಂಚ್ ಮಿಶೇಲ್!
ಕಾಲ್ಚ್ಯಾ ಮಿಶೇಲಾಚಾ ಸಂತೊಸಾಕ್ ಗಡ್ ನಾತ್ಲ್ಲಿ. ಆಸ್ರ್ಯಾಕ್ ವಚೊನ್ ಆಯಿಲ್ಲ್ಯಾ ವರ್ವಿಂ ತೆಂ ಫಾರ್ಮ್ಹೌಸಾಂತ್ ಸಂತೊಸಾನ್ ಆಸ್ಲ್ಲೆಂ. ತ್ಯಾ ಸಂತೊಸಾಂತ್ ತೆಂ ಆನಿ ರಾಯನ್ ದೊಗಾಂಯ್ ಕಿತ್ಲಿ ರಾತ್ ಪಾಸೊನ್ ಜಾಗಿಂ ಆಸ್ಲ್ಲಿಂ ತೆಂ ತಿಂಚ್ ನೆಣಾಂ. ಪುಣ್ ಆತಾಂ....?
ಮಿಶೇಲಾ ವಿಣೆ ರಾಯನ್ ಆಪ್ಲ್ಯಾ ಬೆಡ್ರೂಮಾಂತ್ ಎಕ್ಸುರೊ ನಿದೊನ್ ಮಿಶೇಲಾಚಾ ಸಂಸಾರಾಕ್ ಸಪ್ಣಾಂತ್ ಪಳವ್ನ್ ಆಸ್ಲ್ಲೊ!
"ಮಿಶೇಲ್.....?" ರಾಯನಾನ್ ಮಿಶೆಲಾಕ್ ಆಪಯ್ಲೆಂ.
ಮಿಶೇಲಾಚಿ ಲಾಗ್ಸಾರ್ ಥಾವ್ನ್ ಕಾಂಯ್ ಜವಾಬ್ ಆಯ್ಲಿ ನಾ. ತ್ಯಾ ಶಿವಾಯ್ ಭಾಯ್ರ್ ಥಾವ್ನ್ಯ್ ಕಾಂಯ್ ಆವಾಜ್ ಆಯ್ಕೊನ್ ಆಯಿಲ್ನಾ.
ತಾಕಾ ಕಿತ್ಯಾಕ್ಗೀ ದುಬಾವ್ ಜಾಲ್ಲ್ಯಾಪರಿಂ ಜಾಲೊ. ತೊ ಆತಾಂ ಬೆಡ್ರೂಮಾ ಥಾವ್ನ್ ಡೈನಿಂಗ್ ರೂಮಾಕ್ ಅಯ್ಲೊ. ಹಾಂಗಾಸರ್ಯ್ ಮಿಶೇಲ್ ತಾಕಾ ದಿಸ್ಲೆಂ ನಾ.
ಕಿಚನ್ ರೂಮ್, ಬಾತ್ರೂಮ್, ಸಿಟ್ಟಿಂಗ್ ರೂಮ್, ರಾಯನಾನ್ ಸಗ್ಳ್ಯಾಂನಿ ಮಿಶೇಲಾಚಿಂ ಸೊಧ್ನಾಂ ಕೆಲಿಂ. ಮಿಶೇಲಾಚೊ ಖಂಯ್ಚರ್ಯ್ ಪಾತ್ತೊ ನಾತ್ಲ್ಲೊ. ಘರಾ ಭಿತರ್ ಮಿಶೇಲ್ ಖಂಯ್ಚರ್ಯ್ ತಾಕಾ ದಿಸ್ಲೆಂ ನಾ.
"ಖಂಯ್ ಗೆಲೆಂಗಾಯ್?" ಚಿಂತ್ಲ್ಲೊ ರಾಯನ್ ದಾರ್ ಉಘಡ್ನ್ ಭಾಯ್ರ್ ಆಯ್ಲೊ. ಭಾಯ್ರ್ ಟೊಯೊಟಾ ಲ್ಯಾಂಡ್ಕ್ರೂಸರ್ ಎಕ್ಸುರೆಂ ಉಭೆಂ ಆಸ್ಲ್ಲೆಂ. ರಾತಿಚ್ಯಾ ಧೊವಾಂತ್ ಮೌನ್ ಪಣಿಂ ನ್ಹಾವ್ನ್ ರಾವ್ಲ್ಲೆಂ.
ಪಯ್ಸ್ ಪಯ್ಸ್ ಆಪ್ಣಾಚಿ ದೀಶ್ಟ್ ಧಾಂವ್ತಾ ತಿತ್ಲ್ಯಾ ಪಯ್ಸ್ ಪಾಸೊನ್ ಆಪ್ಲ್ಯಾ ದಿಶ್ಟಿಕ್ ಧಾಂವ್ಡಾಯಿಲ್ಲ್ಯಾ ತಾಚ್ಯಾ ನದ್ರೆಕ್ ಮಿಶೇಲ್ ಸಾಂಪಡ್ಲೆಂ ನಾ.
"ಮಿಶೇಲ್....?" ರಾಯನಾನ್ ಹಳ್ಟಾರ್ ಆಪಯ್ಲೆಂ.
ನಾ! ಮಿಶೇಲಾಚಿ ಕಾಂಯ್ ಜವಾಬ್ ನಾ!
ರಾಯನಾಕ್ ಆತಾಂ ದುಬಾವ್ ಮಾರ್ಲೊ. ತಾಣೆಂ ಫಾರ್ಮ್ಹೌಸಾಕ್ ತಸೊಚ್ಚ್ ಏಕ್ ಭೊಂವಾಡೊ ಕಾಡ್ಲೊ. ಕಾಂಯ್ ಫಾಯ್ದೊ ನಾ.
"ಕಾಂಯ್.....?"
ಮತಿಕ್ ಕಿತೆಂಗೀ ಝಳ್ಕಾಲ್ಲ್ಯಾ ಪರಿಂ ಜಾಲ್ಲೊ ರಾಯನ್ ತಸೊಚ್ಚ್ ಫಾರ್ಮ್ಹೌಸಾಚಾ ಉಜ್ವ್ಯಾ ಕುಶಿಕ್ ಧಾಂವ್ಲೊ. ಥಂಯ್ಚರ್ ಸ್ಲ್ಯಾಪಾಕ್ ಚಡೊನ್ ವೆಚಿಂ ಮೆಟಾಂ ಆಸ್ಲ್ಲಿಂ. ತ್ಯಾ ಮೆಟಾಂಕ್ ಚಡೊನ್ ತೊ ಸ್ಲ್ಯಾಪಾರ್ ಪಾವ್ಲೊ.
ತಾಚೆಂ ಚಿಂತಾಪ್ ಫಟ್ ಜಾಲ್ಲೆಂ. ಮಿಶೇಲ್ ಥಂಯ್ಚರ್ ನಾತ್ಲ್ಲೆಂ.
ವಿಣ್ಗೊ ಸ್ಲ್ಯಾಪ್ ಆಪ್ಣಾಕ್ ಪಳವ್ನ್ ಹಾಸ್ತಾ ತಶೆಂ ತಾಕಾ ಭೊಗ್ಲೆಂ. ತೊ ಆತಾಂ ತ್ಯಾ ಸ್ಲ್ಯಾಪಾರ್ ಹೆವ್ಶಿಂ ತೆವ್ಶಿಂ ಚಲೊಂಕ್ ಲಾಗ್ಲೊ. ಆಪ್ಲ್ಯಾ ನದ್ರೆಕ್ ಗೀದಾಚ್ಯಾ ನದ್ರೆಚಿ ಸಕತ್ ಹಾಡವ್ನ್ ತಾಣೆಂ ತ್ಯಾ ಸ್ಲ್ಯಾಪಾರ್ ಥಾವ್ನ್ ಆಪ್ಲ್ಯಾ ಭಂವ್ತಣಿಚಾ ತೊಟಾಂತ್ ಸೊಧ್ಲೆಂ.
ತಿತ್ಲ್ಯಾರ್!
ತೊಟಾಂತ್ ಪಯ್ಸ್ ಕಿತೆಂಗೀ ತಾಚ್ಯಾ ನದ್ರೆಕ್ ಝಳ್ಕಾಲ್ಲ್ಯಾ ಪರಿಂ ಜಾಲೆಂ.
ತಶೆಂಚ್ ಬಾಗ್ವೊನ್ ತ್ಯಾ ಕುಶಿನ್ ಪಳೆಲ್ಲೊ ರಾಯನ್,
"ಮಿಶೇಲ್...?" ರಾಯನಾಚಾ ತೊಂಡಾ ಥಾವ್ನ್ ಉದ್ಗಾರ್ ಸುಟ್ಲೊ.
ತಿತ್ಲೆಂಚ್!
ರಾಯನ್ ಆತಾಂ ಸ್ಲ್ಯಾಪರ್ ರಾವ್ಲೊ ನಾ.
’ದಡ್’ ’ದಡ್’ ಕರುನ್ ದೊದೋನ್ ಮೆಟಾಂ ಮ್ಹಳ್ಳ್ಯಾಪರಿಂ ದೆಂವೊನ್ ಸಕಯ್ಲ್ ಆಯಿಲ್ಲ್ಯಾ ರಾಯನಾನ್ ಆತಾಂ ತೊಟಾಂತ್ ಮಿಶೇಲ್ಲ್ ದಿಸ್ಲ್ಲ್ಯಾ ತೆವ್ಶಿಂ ಧಾಂವ್ ಮಾರ್ಲಿ.
ಸಾದಾರಣ್ ಲಾಂಭ್ ತೋಟ್ ತೆಂ. ಚಡಾವತ್ ಜಾವ್ನ್ ಸಗ್ಳ್ಯಾ ಥರಾಚ್ಯಾ ಫಳ್ ವಸ್ತುಂಚಿಂ ರೂಕ್ ಝಡಾಂ ತಾಚ್ಯಾ ತೊಟಾಂತ್ ಆಸ್ಲ್ಲಿಂ. ತೊಟಾಚ್ಯಾ ಕಾಮಾಕ್ ಮ್ಹಣೊನ್ ಏಕ್ ಮರಾಠಿ ಕುಟಾಮ್ ಆಸ್ಲ್ಲೆಂ. ಆಜ್ ಆಯ್ತಾರ್ ಜಾಲ್ಲ್ಯಾನ್ ತ್ಯಾ ಕುಟ್ಮಾಕ್ ಆಜ್ ತಾಂಚಿ ಹಪ್ತ್ಯಾಚಿ ಸುಟಿ.
"ಮಿಶೇಲ್ ಎಕ್ಸುರೆಂ ಹ್ಯಾ ತೊಟಾಂತ್ ತಿತ್ಲ್ಯಾ ಪಯ್ಸ್.....!?" ರಾಯನ್ ಮಿಶೇಲಾ ತೆವ್ಶಿಂ ಧಾಂವ್ತಾಲೊ.
ಪುಣ್ ಮಿಶೇಲ್.....?
ಮಿಶೇಲಾಕ್ ಹ್ಯಾ ಸಗ್ಳ್ಯಾಚಿ ಕಾಂಯ್ ಪರ್ವಾ ನಾತ್ಲ್ಲಿ.
ಸಾಕಾಳಿಂ ನಿದೆಂತ್ಲೆಂ ಉಟ್ಲ್ಲೆಂ ಮಿಶೇಲ್, ಆಪ್ಣಾಚೊ ಘೊವ್ ಅಜೂನ್ಯ್ ನಿದೆಂತ್ ಆಸಾ ತೆಂ ಕಳೊನ್ ಸಾಕಾಳಿಂಚಿಂ ತಾಚಿಂ ಕಾಮಾಂ ತಿರ್ಸುನ್ ಘರಾ ಥಾವ್ನ್ ಭಾಯ್ರ್ ಆಯಿಲ್ಲೆಂ.
ಘರಾ ಮುಕ್ಲ್ಯಾ ತೊಟಾಕ್ ಪಳಯ್ತಾನಾ ತಾಕಾ ಆಪ್ಲ್ಯಾ ಒಮ್ಜೂರ್ಚ್ಯಾ ತೊಟಾಚೊ ಉಡಾಸ್ ಯೇವ್ನ್ ಹ್ಯಾ ತೊಟಾಂತ್ ತಾಕಾ ಭೊಂವ್ಚೆಂ ಮನ್ ಜಾಲೆಂ. ಆಪ್ಲ್ಯಾ ಮತಿಚ್ಯಾ ಆಶೆಕ್ ಘೆವ್ನ್ ತೆಂ ಹ್ಯಾ ತೊಟಾಕ್ ದೆಂವ್ಲ್ಲೆಂ. ರಾಯನ್ ಕಸೊಯ್ ನಿದೆಂತ್ ಆಸ್ಲ್ಲೊ. ತಾಕಾ ಉಟಂವ್ಚೆಂ ಮಿಶೇಲಾಕ್ ಮನ್ ಯೇಂವ್ಕ್ ನಾ. ತಶೆಂ ತೊಟಾಂತ್ ಚಲೊನ್ ಆಯಿಲ್ಲೆಂ ಮಿಶೇಲ್ ಇತ್ಲ್ಯಾ ಫುಡೆಂ ಪಾವ್ಲ್ಲೆಂ. ಆನಿ ಆತಾಂ.....!
ಹಳ್ಟ್ ಗುಂಡಾಯೆಚ್ಯಾ ತ್ಯಾ ತಳ್ಯಾ ಗಾತ್ರಾಚಾ ಪೊಂಡಾ ಸಾಮ್ಕಾರ್ ಮಿಶೇಲ್ ಉಭೆಂ ಆಸ್ಲ್ಲೆಂ. ತ್ಯಾ ಪೊಂಡಾತ್ ತಿಳ್ಲ್ಲ್ಯಾ ಮಿಶೇಲಾಕ್ ಪರ್ನೆಂ ಜಾಲ್ಲೆಂ ಸಾರೆಂ ತ್ಯಾ ಸಾಕಾಳಿಂಚಾ ಧೊವಾಕ್ ಭಿಜೊನ್ ಥಂಯ್ ಹಾಂಗಾ ಥಂಡ್ ಜಾಲ್ಲ್ಯಾ ಪರಿಂ ದಿಸ್ತಾಲೆಂ ತೆಂ ತಾಚ್ಯಾ ದೊಳ್ಯಾಂಕ್ ಸಾಂಪಡ್ಲೆಂ. ಥೊಡ್ಯಾ ಸುವಾತ್ಯೆರ್ ತೆಂ ಸುಕೆಂಚ್ ಆಸ್ಲ್ಲೆಂ. ಬೋವ್ಶ್ಯಾ ವಯ್ರ್ ಆಯಿಲ್ಲ್ಯಾ ಜಾಂಬಾಂಚಾ ರುಕಾಚಾ ಫಾಂಟ್ಯಾನ್ ತ್ಯಾ ಧೊವಾಕ್ ಆಡಯಿಲ್ಲೆಂ ಕಾರಾಣ್ ಆಸ್ತೆಲೆಂ. ಫೊಂಡಾ ವಯ್ಲ್ಯಾ ಜಾಂಬಾಚಾ ರುಕಾಚಾ ಫಾಂಟ್ಯಾಕ್ ಪಳವ್ನ್ ಮಿಶೇಲ್ ವ್ಹಳೂ ಹಾಸ್ಲೆಂ.
ತಾಚಿ ನದರ್ ಆತಾಂ ತ್ಯಾ ಫೊಂಡಾಂತ್ ಫುಲ್ಲ್ಲ್ಯಾ ತ್ಯಾ ಹಳ್ದುವ್ಯಾ ಆನಿ ಧವ್ಶ್ಯಾ ಬಣಾಚ್ಯಾ ಕಾಟ್ ಫುಲಾಂ ವಯ್ರ್ ಖಂಚ್ಲಿ. ಫೊಂಡಾಂತ್ಲ್ಯಾ ಎಕಾ ಕೊನ್ಶ್ಯಾಂತ್ ಮಾತ್ರ್ ತಿಂ ದಿಸ್ತಾಲಿಂ. ಬೊವ್ಶ್ಯಾ ದುಸ್ರ್ಯಾ ಕುಶಿಚೆಂ ಸಾರೆಂ ಕಾಡ್ಲ್ಲೆಂ ಆಸ್ತಾಂ ತಿಂ ಝಡಾಂಯ್ ತ್ಯಾ ಸಾರ್ಯಾ ಸಾಂಗಾತಾ ಹುಮ್ಟುನ್ ಗೆಲ್ಯಾಂತ್ ಆಸ್ತೆಲಿಂ. ಮಿಶೇಲಾನ್ ಚಿಂತ್ಲೆಂ.
ಕಿತ್ಯಾಕ್ಗೀ ಮಿಶೇಲಾಕ್ ತ್ಯಾ ಝಡಾಂಚಾ ಫುಲಾಂ ವಯ್ರ್ ಮನ್ ಪಡ್ಲೆಂ.
ತಾಕಾ ತಾಚ್ಯಾ ಆಬಾಚ್ಯಾ ತೊಟಾಂತ್ಲ್ಯಾ ತ್ಯಾ ತಳ್ಯಾಂತ್ ಫುಲ್ಚ್ಯಾ ಧವ್ಯಾ ಸಾಳ್ಕಾಂಚೊ ಉಡಾಸ್ ಆಯ್ಲೊ.
ತ್ಯಾ ತಳ್ಯಾಂತ್ಯ್ ತಿಂ ಸಾಳ್ಕಾಂ ಫುಲ್ತಾಲಿಂ!
ಥಂಯ್ಚರ್ಯ್ ತ್ಯಾ ಕೊಣಾಕ್ಚ್ ನಾಕಾ ಜಾಲ್ಲ್ಯಾ ಸಾಳ್ಕಾಂ ವಯ್ರ್ ಮಿಶೇಲಾಚೆಂ ಮನ್ ವೊಡ್ತಾಲೆಂ.
ಆಜ್ ಹಾಂಗಾಸರ್ಯ್ ತಶೆಂಚ್!
ಸವ್ಕಾಸ್ ಮಿಶೇಲ್ ಆತಾಂ ತ್ಯಾ ಫೊಂಡಾಕ್ ಭೊಂವಾಡೊ ಮಾರುನ್ ತ್ಯಾ ಫೊಂಡಾಕ್ ದೆಂವೊಂಕ್ ಆಸ್ಚ್ಯಾ ಮೆಟಾಂ ತೆವ್ಶಿಂ ಚಮ್ಕಾಲೆಂ.
ಏಕ್ ಮೇಟ್ ಕಾಡುನ್ ದುಸ್ರೆಂ ಮೇಟ್ ಸಕಯ್ಲ್ ದೆಂವ್ತಾಂ ಮ್ಹಣ್ತಾನಾ!
ಎಕಾಚ್ಚ್ ಫರಾ ಆಪ್ಣಾಕ್ ಕೊಣೆಗೀ ಧರ್ಲ್ಲ್ಯಾ ಪರಿಂ ಜಾವ್ನ್ ಮಿಶೇಲಾನ್ ಭಿಯಾಂನ್ ಆಂಗ್ ಕಾಡ್ಲೆಂ. ತಾಚೆಂ ಕಾಳಿಜ್ ರಾವ್ಲ್ಲ್ಯಾ ಪರಿಂ ತಾಕಾ ಜಾವ್ನ್ ತಾಚೊ ಶ್ವಾಸ್ ಭಾಂದ್ಲ್ಲ್ಯಾ ಪರಿಂ ಜಾಲೊ.
ಮಿಶೇಲ್....? ತುಂ ಹಾಂಗಾ....?
ಕಸಲ್ಯಾಗೀ ಭಿರಾಂತೆನ್ ಮಿಶೇಲಾಚಾ ತಾಳ್ಯಾ ಥಾವ್ನ್ ಬೋಬ್ ಸುಟಾನಾಸ್ತಾನಾ ವೆತಾನಾ ತಾಚ್ಯಾ ಕಾನಾಂಕ್ ಉತ್ರಾಂ ಆಪ್ಟಾಲಿಂ.
ರಾಯನ್!
ಥೊಡಿಂಚ್ ಕ್ಷಣಾಂ!
ಮಿಶೇಲ್ ಸವ್ಕಾಸ್ ಥಂಯ್ಚ್ ಬಸ್ಲೆಂ. ಪಾಟಿಂ ಘುಂವೊನ್ ಪಳೆಲ್ಲ್ಯಾ ತಾಕಾ ರಾಯನ್ ದಿಸ್ಲೊ.
"ಹಾಂಗಾ ಎಕ್ಸುರೆಂ ಕಿತೆಂ ಕರ್ತಾಯ್.....?" ರಾಯನ್ ಖರ್ಶೆತಾಲೊ. ತೊ ಮಿಶೇಲಾಕ್ ಸೊಧುನ್ ಥಕ್ಲ್ಲೊ.
ರಾಯನಾಚಾ ಸವಾಲಾಕ್ ಮಿಶೆಲಾನ್ ತಾಕಾ ತಕ್ಲಿ ಉಭಾರುನ್ ಪಳೆಲೆಂ ಮಾತ್ರ್ ಶಿವಾಯ್ ತೆಂ ಉಲಯ್ಲೆಂ ನಾ. ತೆಂ ಆಪ್ಣಾಕ್ಚ್ ಸಾಂಬಾಳ್ಚಾ ಪ್ರಯತ್ನಾಚೆರ್ ಆಸ್ಲ್ಲೆಂ. ಥೊಡ್ಯಾಚ್ ಕ್ಷಣಾಂ ಪಯ್ಲೆಂ ಅವ್ಚಿತ್ತ್ ಯೇವ್ನ್ ಮಿಶೇಲಾಕ್ ಧರ್ಲೆಲ್ಯಾ ರಾಯನಾಚಾ ವರ್ತನಾ ಥಾವ್ನ್ ಮಿಶೇಲ್ ಭಿಯೆವ್ನ್ ಗೆಲ್ಲೆಂ.
"ತುಂ ಭಿಯೆಲೆಂಯ್ ಮಿಶೇಲ್....?"
ಮಿಶೇಲ್ ಕಾಂಯ್ಚ್ ಉಲಯ್ನಾತ್ಲ್ಲೆಂ ಪಳವ್ನ್ ರಾಯನಾನ್ ಆಪ್ಲ್ಯಾ ಬಾಯ್ಲೆಕ್ಚ್ ಪಳೆಲೆಂ. ಆಪ್ಣಾ ಥಾವ್ನ್ ಮಿಶೇಲ್ ಭಿಯೆಲೆಂ ಮ್ಹಳ್ಳೆಂ ರಾಯನಾಕ್ ಕಳ್ಳೆಂ.
"ಐ ಯಾಮ್ ಸಾರ್ರಿ ಡಾರ್ಲಿಂಗ್!" ಮಿಶೇಲಾ ತೆವ್ಶಿಂ ವ್ಹಳೂ ಬಾಗ್ವಲ್ಲ್ಯಾ ರಾಯನಾನ್ ಮಿಶೇಲಾಚಾ ಪೊಲ್ಯಾಕ್ ಉಮೊ ದಿಲೊ.
ಸವ್ಕಾಸ್ ಮಿಶೇಲ್ ಆತಾಂ ಸ್ಥಿಮಿತಾರ್ ಯೇಂವ್ಕ್ ಲಾಗ್ಲೆಂ. ಹ್ಯಾ ಸ್ಥಿಮಿತಾಕ್ ಯೆಂವ್ಚ್ಯಾ ವಾಟೆರ್ ತಾಕಾ ಥೊಡೊ ವೇಳ್ ಲಾಗ್ಲೊ.
ರಾಯನ್ ಆತಾಂ ಮಿಶೇಲಾಚಾ ಲಾಗಿಂ ಬಸ್ಲೊ. ಬೋವ್ಶ್ಯಾ ತೊಚ್ಚ್ ನೆಣಾಂ ಆಶೆಂ ಉಗ್ತ್ಯಾ ಧರ್ಣಿರ್ ಹಾಚ್ಯಾ ಪಯ್ಲೆಂ ತೊ ಕೆದಾಳಾ ಬಸ್ಲ್ಲೊ ತೆಂ!
"ಘರಾ ಸಗ್ಳೆಂ ತುಕಾ ಸೊಧ್ಲೆಂ. ತುಂ ದಿಸೊಂಕ್ ನಾಂಯ್. ಸ್ಲ್ಯಾಪಾರ್ ಥಾವ್ನ್ ತುಕಾ ಪಳೆಲೆಂ. ತಶೆಂ ಹಾಂಗಾ ಪಾವ್ಲೊಂ!"
ರಾಯನಾನ್ ಕಾರಾಣ್ ಸಾಂಗ್ಲೆಂ ತರ್ಯ್ ಮಿಶೇಲ್ ಮಾತ್ರ್ ತ್ಯಾ ಫೊಂಡಾಂತ್ಲ್ಯಾ ಕಾಟ್ ಫುಲಾಂಕ್ಚ್ ಪಳೆತಾಲೆಂ.
"ತುಕಾ ತಿಂ ಫುಲಾಂ ಜಾಯ್?" ಬಾಯ್ಲೆಕ್ ಸಮ್ಜಾಲ್ಲ್ಯಾ ರಾಯನಾನ್ ವಿಚಾರ್ಲೆಂ. "ಆಮ್ಚ್ಯಾ ಗಾರ್ಡನಾಂತ್ ಆಸಾತ್!" ತೊಚ್ ಉಲಯ್ಲೊ.
"ತುಂ ಕೆದಾಳಾ ಉಟ್ಲೊಯ್?" ಮಿಶೇಲಾಚೆಂ ಸವಾಲ್.
"ಅತ್ತಾಂ ಉಟ್ಲೊಂ ಮಾತ್ರ್!" ರಾಯನಾನ್ ಮಿಶೇಲಾಕ್ಚ್ ಪಳೆಲೆಂ. "ತುಕಾ ತಿಂ ಫುಲಾಂ ಕಾಡುನ್ ಹಾಡುಂ....?" ರಾಯನಾಕ್ ತಾಚ್ಯಾ ಬಾಯ್ಲೆಕ್ ಸಂತೊಸ್ ದೀಂವ್ಕ್ ಜಾಯ್ ಆಸ್ಲ್ಲೆಂ.
"ತಿಂ ತಶಿಂಚ್ ಬರಿಂ ದಿಸ್ತಾತ್ ರಾಯನ್! ತಾಂಕಾಂ ಹುಮ್ಟುಂಚೆಂ ನ್ಹಯ್!"
"ಮಾಗಿರ್.... ತುಂ ಫೊಂಡಾಕ್ ದೆಂವ್ತಾಲೆಂಯ್.....?"
"ಆಶೆಂಚ್ ತಾಂಕಾಂ ಲಾಗಿಂ ಥಾವ್ನ್ ಪಳವ್ನ್ ಆಪಡ್ಯಾಂ ಮ್ಹಣೊನ್ ಮನ್ ಜಾಲೆಂ!"
"ಚಲ್ ತರ್! ಹಾಂವ್ ತುಜೊ ಹಾತ್ ಧರ್ತಾಂ!" ರಾಯನ್ ಉಟ್ಲೊ. "ತುಂ ಪಡೊಂಕ್ ಆಸಾಯ್!"
"ವ್ಹಡ್ ನಾ! ನಾಕಾ ಸೊಡ್!"
ಮಿಶೇಲಾಚ್ಯಾ ಜವಾಬೆ ಥಾವ್ನ್ ರಾಯನ್ ಪರ್ತ್ಯಾಕ್ ಆಪ್ಲ್ಯಾ ಬಾಯ್ಲೆ ಲಾಗಿಂ ಬಸ್ಲೊ. ತಾಣೆಂ ಆಪ್ಲೊ ದಾವೊ ಹಾತ್ ಮಿಶೇಲಾಚ್ಯಾ ಖಾಂದಾರ್ ಘಾಲುನ್ ತಾಕಾ ಆಪ್ಣಾ ತೆವ್ಶಿಂ ವೊಡ್ಲೆಂ.
"ತುಂ ಭಿಯೆಲ್ಲೆಂಯ್ ಕಿತ್ಯಾಕ್ ಮಿಶೇಲ್? ತುಂ ಇತ್ಲೆಂ ಭಿಯೆಲ್ಲೆಂಯ್ ಪಳವ್ನ್ನ್ ಏಕ್ ಪಾವ್ಟಿಂಚ್ಯಾಕ್ ಮ್ಹಜೊ ಜೀವ್ ಉಡ್ಲೊ!" ರಾಯನಾಕ್ ಆಪ್ಲ್ಯಾ ಬಾಯ್ಲೆ ವಯ್ರ್ ಭಿರ್ಮತ್ ದಿಸ್ಲಿ.
"ಹ್ಯಾ ತೊಟಾಂತ್ ಜಿವಾಕ್ ಕಿತ್ಲೊ ಉಲ್ಲಾಸ್ ಜಾತಾ....!" ಮಿಶೇಲ್ ಆಪ್ಲಿ ತಕ್ಲಿ ಘುಂವ್ಡಾವ್ನ್ ಭೊಂವ್ತಣಿ ಪಳೆತಾಲೆಂ.
"ತುಕಾ ಹೆಂ ತೋಟ್ ಪಸಂದ್ ಜಾಲೆಂ.....?" ಮಿಶೇಲ್ ಆಪ್ಲ್ಯಾಚ್ ಸಂಸಾರಾಂತ್ ಆಸಾ ತೆಂ ರಾಯನಾಕ್ ಸಮ್ಜಾಲೆಂ.
"ಹಾಂಗಾಸರ್ ಹಿ ಪೃಥ್ವಿ ಕಿತ್ಲಿ ಶಾಂತ್! ಹಿ ಸೃಶ್ಟಿ ಕಿತ್ಲಿ ಸೊಭಿತ್! ಹೆಂ ವಾರೆಂ ಕಿತ್ಲೆಂ ನಿತಳ್! ಹೆಂ ಮೌನ್ಯ್ ಮೌನ್ ನ್ಹಯ್! ಸಕಾಳಿಂಚಾ ಉದೆವ್ನ್ ಯೆಂವ್ಚ್ಯಾ ಸುರ್ಯಾಚಾ ಗಾಯನಾ ಪರಿಂ! ಜಶೆಂ ದೆವಾಳಾಂತ್ ದೆವಾಕ್ ಹರ್ಸುಂಚೆಂ ಗಾಯನ್!"
ಮಿಶೇಲಾಚಾ ಉತ್ರಾಂನಿ ರಾಯನ್ ಸವ್ಕಾಸ್ ಆಪ್ಲ್ಯಾ ಸಂಸಾರಾ ಥಾವ್ನ್ ಮಿಶೇಲಾಚಾ ಸಂಸಾರಾಂತ್ ಪ್ರವೇಶ್ ಜಾಲೊ.
ತಾಚ್ಯಾ ಬಾಯ್ಲೆನ್ ಉಲಯಿಲ್ಲ್ಯಾ ಉತ್ರಾಂ ಥಾವ್ನ್ ತಾಕಾ ಆತಾಂ ತಾಣೆಂ ಪಳೆಲ್ಲೆಂ ತೆಂ ಸಪಾಣ್ ಉಡಾಸಾಕ್ ಆಯ್ಲೆಂ.
ಸಂಪೂರ್ಣ್ ಧವ್ಸಾಣೆಕ್ ಪಾಂಗುರ್ಲೆಲೆಂ ಸಪಾಣ್!
ಸಗ್ಳೆಂ ತೆಂಚ್!
ಜಶೆಂ ಮಿಶೇಲ್ ಹಾಂಗಾ ಉಲಯ್ತಾ!
ಭಿಲ್ಕುಲ್ ತ್ಯಾ ಸಪ್ಣಾ ಪರಿಂಚ್. ಕಾಂಯ್ಚ್ ವ್ಯತ್ಯಾಸ್ ನಾತ್ಲ್ಲೊ!
ತೆಂ ಶಾಂತ್ಪಣ್! ತಿ ಸೊಭಾಯ್! ದಾಟ್ ಹಿಮಾ ಸಾರ್ಕಿ ತಿ ನಿತಳಾಯ್! ತೆಂ ಸುಮಧುರ್ ಮೌನ್!
ರಾಯನಾಚಾ ಮತಿಕ್ ಕಸಲೊಗೀ ಉಜ್ವಾಡ್ ಫಾಂಕೊನ್ ತಾಚ್ಯಾ ಕಾಳ್ಜಾಕ್ ಥಂಡ್ಸಾಣ್ ಜಾಲ್ಲ್ಯಾ ಪರಿಂ ಜಾತಾನಾ ತೊ ಆತಾಂ ಸಂಪೂರ್ಣ್ ಮಿಶೇಲಾಚಾ ಸಂಸಾರಾಂತ್ ರಿಗ್ಲೊ.
ಹ್ಯಾ ತೊಟಾ ಮಧೆಂ ಕಾಂಯ್ ನಾ. ಸಗ್ಳ್ಯಾನಿತ್ಲ್ಯಾನ್ ಶಾಂತ್! ಸಗ್ಳೆಂಚ್ ಶಾಂತ್!
ತ್ಯಾ ಸಾರ್ಯಾ ಪಿಟ್ಯಾರ್ ಫುಲ್ಲ್ಲಿಂ ಫುಲಾಂ ಕಿತ್ಲಿಂ ಸೊಭಿತ್! ವಿಚಿತ್ರ್ ಸೊಭಾಯ್!
ಹ್ಯಾ ವಿಣ್ಗ್ಯಾ ಮಾತಿಯೆರ್ ಆಪುಣ್ ಎದೊಳ್ ಆಶೆಂ ಬಸೊನ್ ನೆಣಾಂ! ಕಿತ್ಲಿ ನಿತಳಾಯ್!
ಹೆಂ ಮೌನ್! ವಿಚಿತ್ರ್ ಸಕ್ತೆಚೆಂ ಮೌನ್! ಭುಮಿ ವೈಕುಂಠಾಂತ್ಲೆಂ ಸುಂದರ್ ಮೌನ್!
ರಾಯನಾಚಿ ಮತ್ ಸವ್ಕಾಸ್ ತಾಕಾಚ್ ವಿಸ್ರೊಂಕ್ ಲಾಗ್ಲಿ. ತೊ ಮಿಶೇಲಾಚಾ ಉತ್ರಾಂಚೊ ನಿಯಾಳ್ ಕರ್ತಾಲೊ. ತ್ಯಾ ಉತ್ರಾಂ ಪಾಟ್ಲ್ಯಾನ್ ಧಾಂವ್ತಾನಾ ರಾಯನ್ ಮಿಶೇಲಾಚಾ ಸಂಸಾರಾಂತ್ಲ್ಯಾ ಸುಖಾಕ್ ಆಪ್ಲ್ಯಾ ಕಾಳ್ಜಾಂತ್ ಅನುಭವಿಸುಂಕ್ ಲಾಗ್ಲೊ.
"ರಾಯನ್!" ಮಿಶೇಲಾನ್ ಆಪ್ಲ್ಯಾ ಘೊವಾಕ್ ಆಪಯ್ಲೆಂ ಜಾಲ್ಯಾರ್ಯ್ ರಾಯನಾಚಿ ಕಾಂಯ್ ಜವಾಬ್ ಆಯ್ಲಿ ನಾ.
"ಆಮಿ ಥೊಡೆ ದೀಸ್ ಹಾಂಗಾಚ್ ರಾವೊಂಕ್ ಜಾಯ್ನಾಂ?" ರಾಯನಾಕ್ ಮಿಶೇಲಾಚೊ ತಾಳೊ ಆಯ್ಕಾತಾಲೊ ಜಾಲ್ಯಾರ್ಯ್ ತ್ಯಾ ಉತ್ರಾಂಚೊ ಪ್ರಭಾವ್ ತಾಚ್ಯಾ ಮತಿರ್ ಪಡಾನಾತ್ಲ್ಲೊ.
"ರಾಯನ್!" ಆಪ್ಲೊ ಘೊವ್ ಆಪ್ಣಾ ಲಾಗಿಂ ಕಾಂಯ್ಚ್ ಉಲಯ್ನಾಸ್ತಾನಾ ಮೌನ್ ಆಸಾ ತೆಂ ಪಳವ್ನ್ ಎದೊಳ್ ತ್ಯಾ ಫೊಂಡಾಂತ್ಲ್ಯಾ ಸೊಭಿತ್ ಫುಲಾಂಕ್ ಪಳವ್ನ್ ಉಲಂವ್ಚೆಂ ಮಿಶೇಲ್ ಆತಾಂ ರಾಯನಾ ತೆವ್ಶಿಂ ಘುಂವ್ಲೆಂ.
ರಾಯನ್ ಶೂನ್ಯ್ ದ್ರಶ್ಟೆನ್ ತ್ಯಾ ಫೊಂಡಾಂತ್ಲ್ಯಾ ಫುಲಾಂಕ್ಚ್ ಪಳೆತಾಲೊ.
ಆಪ್ಲ್ಯಾ ಘೊವಾಚ್ಯಾ ಹ್ಯಾ ಬದ್ಲಾವಣೆಕ್ ಪಳೆಲ್ಲ್ಯಾ ಮಿಶೇಲಾನ್ ವ್ಹಳೂ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡ್ಲ್ಯೊ.
ಭೋವ್ ಸುಂದರ್ ಹಾಸೊ!
ಆತಾಂ ತಾಣೆಂ ಸವ್ಕಾಸ್ ಆಪ್ಲೊ ಹಾತ್ ಉಕ್ಲುನ್ ರಾಯನಾಚಾ ಉಸ್ಕ್ಯಾರ್ ದವರ್ಲೊ. ದುಸ್ರ್ಯಾ ಹಾತಾನ್ ರಾಯನಾಚಾ ತೊಂಡಾಕ್ ಧರುನ್ ಆಪ್ಣಾ ತೆವ್ಶಿಂ ಘುಂವ್ಡಾಯ್ಲೆಂ.
ತಿತ್ಲೆಂಚ್!
ಉಗ್ತೆ ಆಸ್ಲ್ಲೆ ರಾಯನಾಚೆ ದೊಳೆ ಏಕ್ ಪಾವ್ಟಿಂ ಧಾಂಪುನ್ ಪರ್ತ್ಯಾಕ್ ಉಗ್ತೆ ಜಾಲೆ.
"ಖಂಯ್ ಪಾವ್ಲೊಯ್ ತುಂ ರಾಯನ್....?" ಮಿಶೇಲಾನ್ ಮೊವಾಳಾಯೆನ್ ವಿಚಾರ್ಲೆಂ.
"ತುಜ್ಯಾ ದಿಶ್ಟಿಂತ್!" ರಾಯನಾನ್ ಮಿಶೇಲಾಚ್ಯಾ ದೊಳ್ಯಾಂಕ್ಚ್ ಪಳೆಲೆಂ.
"ಮ್ಹಜ್ಯಾ ದಿಶ್ಟೆಂತ್.....?" ಮಿಶೇಲ್ ವ್ಹಳೂ ಹಾಸ್ಲೆಂ. ತ್ಯೊಚ್ಚ್ ಸುಮಧುರ್ ಸುಂದರ್ ಹಾಸೊ ಜಶೆಂ ತ್ಯಾ ಫೊಂಡಾಂತ್ಲಿಂ ನಿಸ್ಕಳ್ ಫುಲಾಂ!
"ತುಜೊ ಸಂಸಾರ್ ಮಸ್ತ್ ಸೊಭಿತ್ ಆಸಾ ಮಿಶೇಲ್!" ರಾಯನ್ ಉದ್ಗಾರ್ಲೊ.
"ವ್ಹಯ್....? ತುಂ ಮ್ಹಜ್ಯಾ ಸಂಸಾರಾಕ್ ಪಾವ್ಲ್ಲೊಯ್.....?" ಮಿಶೇಲಾಕ್ ಆಶ್ಚರ್ಯ್ ಜಾಲೆಂ.
"ವ್ಹಯ್! ತುಜ್ಯೆ ಸಾಂಗಾತಾ ಹಾಂವ್ ತುಜ್ಯಾ ಸಂಸಾರಾಕ್ ಪಾವ್ಲ್ಲೊಂ! ನಿಜಾಯ್ಕ್ಯ್ ತುಜೊ ಸಂಸಾರ್ ಮಸ್ತ್ ಸೊಭಿತ್!"
"ಚಲ್! ಯಾ ಆತಾಂ" ಮಿಶೇಲ್ ಉಟ್ಲೆಂ. "ತುಕಾ ಚ್ಹಾ ಕರುನ್ ದಿತಾಂ! ಆಮಿಂ ಉಪ್ರಾಂತ್ ಉಲವ್ಯಾಂ!" ಮಿಶೇಲಾನ್ ರಾಯನಾಚಾ ಹಾತಾಕ್ ಧರುನ್ ತಾಕಾ ಉಕಲ್ಚೆಂ ಪ್ರಯತ್ನ್ ಕರ್ತಾನಾ ಸವ್ಕಾಸ್ ರಾಯನ್ ಉಟ್ಲೊ.
ರಾಯನಾನ್ ಆಪ್ಲ್ಯಾ ಜಿವಿತಾಂತ್ ಪಯ್ಲ್ಯಾ ಪಾವ್ಟಿಂ ಆಪ್ಣಾಚಾ ಸಂಸಾರಾಕ್ ವಿಸ್ರೊನ್ ದುಸ್ರ್ಯಾಚಾ ಸಂಸಾರಾಂತ್ ಪ್ರವೇಶ್ ಕರುನ್ ಪಳೆಲ್ಲೆಂ. ಆನಿ ಹೊ ಸಂಸಾರ್ ತಾಕಾ ತಾಚ್ಯಾ ಮಿಶೆಲಾ ಪರಿಂಚ್ ಮಸ್ತ್ ಸೊಭಿತ್ ದಿಸ್ಲ್ಲೊ!
**************
ಆಲಿಯಾ!
ಭಾಯ್ಲ್ಯಾಂಗ್ಣಾಚೆಂ ಚಿತ್ರೀಕರಣ್ ಸಾದಾರ್ಣ್ ಸಂಪೊನ್ ಆಯಿಲ್ಲೆಂ. ಸಾವಂತ್ ಆನಿ ತಾಚೊ ಪಂಗಡ್ ಹ್ಯಾ ದಿಸಾಂನಿ ಪಂಜಾಬ್ ಪಾವ್ಲ್ಲೊ. ಬಾಕಿ ಉರ್ಲೆಲ್ಯಾ ಥೊಡ್ಯಾಚ್ ಚಿತ್ರೀಕರಣಾಕ್ ಮಹಾರಾಷ್ಟ್ರಂತ್ಚ್ ಲೋನಾವಾಲಾಂತ್ ಚಿತ್ರೀಕರಣ್ ಕರ್ಚ್ಯಾ ವಿಶಿಂ ಸಾವಂತಾನ್ ನಿರ್ಧಾರ್ ಕೆಲ್ಲೊ. ತ್ಯಾ ಉಪ್ರಾಂತ್ ಭಿತರ್ಲ್ಯಾಂಗ್ಣಾಚೆಂ ಚಿತ್ರೀಕರಣ್!
ಹ್ಯಾ ಭಿತರ್ ಆಲಿಯಾನ್ ಆಪ್ಣಾಕ್ ಮೆಳ್ಲ್ಲ್ಯಾ ಎಕಾ ಆವ್ಕಾಸಾಕ್ ಆಪ್ಣಾಚೊ ಕರುನ್ ಘೆತ್ಲ್ಲೊ!
ಕ್ಯಾಪ್ಟನ್ ರಾಣಾ!
ಕ್ಯಾಪ್ಟನ್ ರಾಣಾಕ್ ತಾಣೆಂ ಸಾಸ್ಣಾಕ್ ತಾಚ್ಯಾ ಕ್ಯಾಪ್ಟನ್ಪಣಾ ಥಾವ್ನ್ ಕಾಡುನ್ ಉಡಯಿಲ್ಲೆಂ.
ಆಲಿಯಾಚಾ ಫಾರಿಕ್ಪನಾಚಿ ಪಟ್ಟಿ ಮಸ್ತ್ ಲಾಂಭ್ ಆಸ್ಲ್ಲಿ. ಪುಣ್ ಹರ್ಯೆಕಾಕ್ಯ್ ಜೊಕ್ತೊ ವೇಳ್ ಯೇಂವ್ಕ್ ಜಾಯ್! ತ್ಯಾ ವೆಳಾಕ್ ಸಾಂಗಾತಾ ಘೆವ್ನ್ ಆಪ್ಣಾಚೆಂ ಕಾಮ್ ಸಂಪಂವ್ಕ್ ಜಾಯ್. ಆಲಿಯಾ ಚಿಂತಾಲೆಂ.
ಹ್ಯಾ ದಿಸಾಂನಿ ತಾಣೆಂ ಸಭಾರ್ ಪಾವ್ಟಿಂ ರಾಯನಾಕ್ ಪೋನ್ ಕೆಲ್ಲೆಂ. ರಾಯನಾಚಾ ವಿಶಿಂ ತಾಣೆಂ ಖಬಾರ್ ಕಾಡ್ಲ್ಲಿ. ತಾಚೆ ಸವೆಂ ಉತ್ರಾಂನಿಂ ವೇಳ್ ಪಾಶಾರ್ ಕೆಲ್ಲೊ. ಪುಣ್ ಕೆದ್ನಾಂಯ್ ರಾಯನಾಕ್ ಆಪ್ಣಾ ವಯ್ರ್ ಮನ್ ಪಡ್ಲಾಂ ಮ್ಹಳ್ಳ್ಯಾಚೊ ದುಬಾವ್ ಪಾಸೊನ್ ಆಲಿಯಾಕ್ ಮಾರ್ಲೊ ನಾ.
ಹ್ಯಾಚ್ಚ್ ದುಬಾವಾಕ್ ಆಲಿಯಾನ್ ಇತ್ಲ್ಯಾ ದಿಸಾಂನಿ ತಾಂಚಿ ರಾಕೊನ್ ಕೆಲ್ಯಾ. ತರ್ಯ್ ಹ್ಯಾ ದುಬಾವಾಚೊ ದೀಸ್ ಉದೆವ್ನ್ ಯೇನಾ? ಕಿತ್ಯಾಕ್ ಜಾವ್ಯೆತ್? ಆಲಿಯಾ ಆಪ್ಣಾ ಇತ್ಲ್ಯಾಕ್ ಚಿಂತಾಲೆಂ. ತಾಕಾ ಹ್ಯಾ ದುಬಾವಾಚಿ ಮಸ್ತ್ ಗರ್ಜ್ ಆಸ್ಲ್ಲಿ.
"ಚಲಿ! ಚಲ್ಯಾಚೆಂ ಭಳೀಶ್ಟ್ ಲಾಚಾರ್ಪಣ್!" ಹೆಂ ಆಲಿಯಾ ಜಾಣಾಂ ಆಸ್ಲ್ಲೆಂ. ತರ್ ರಾಯನ್.....?
ರಾಯನಾನ್ ಖುದ್ದ್ ಜಾವ್ನ್ ಆಪ್ಣಾ ತೆವ್ಶಿಂ ಯೇಂವ್ಕ್ ಜಾಯ್ ಮ್ಹಳ್ಳ್ಯಾ ಆಪ್ಲ್ಯಾ ಚಿಂತ್ಪಾಂತ್ ಆಪ್ಣೆಂ ಕಾಂಯ್ ಚೂಕ್ ಆಧಾರುಂಕ್ ನಾ? ನಾ ಖಂಡಿತ್ ನಾ! ತರ್....?
ಚೂಕ್ ಖಂಯ್ ಜಾಲ್ಯಾ? ಆಲಿಯಾ ಹ್ಯಾ ದಿಸಾಂನಿ ಚಿಂತಾಲೆಂ.
ಅಸಿಸ್ಟಂಟ್ ಮ್ಯಾನೇಜರಾ ಉಪ್ರಾಂತ್ ವಿಶು ಕುಮಾರಾಚಿ ಸರ್ಥಿ! ತಿತ್ಲ್ಯಾ ಭಿತರ್ ರಾಯನಾಕ್ ಆಪ್ಣೆಂ ಘಟ್ ಕರುನ್ ಘೆಂವ್ಕ್ ಜಾಯ್! ಕಿತ್ಯಾಕ್ ಮ್ಹಳ್ಯಾರ್ ತ್ಯಾ ಉಪ್ರಾಂತ್ ಆಪ್ಣಾಚೆಂ ಝುಜ್ ಖುದ್ಧ್ ಜಾವ್ನ್ ಆಪ್ಲ್ಯಾ ಘೊವಾ ವಿರುದ್ಧ್ ಆನಿ ಇಕ್ಬಾಲ್ ಭಾಯಿಚಾ ವಿರುದ್ಧ್! ಹಾಂಗಾಸರ್ ಮ್ಹಾಕಾ ಸಾಂಗಾತ್ ದೀಂವ್ಕ್ ಸಕ್ಚೊ ಎಕ್ಲೊ ಮಾತ್ರ್ ವ್ಯಕ್ತಿ ಮ್ಹಳ್ಯಾರ್ ರಾಯನ್! ಆಲಿಯಾ ಮತಿಂತ್ಚ್ ಚಿಂತ್ನಾಂ ಆಟಯ್ತಾಲೆಂ.
ಆಪ್ಣಾಕ್ ಸಗ್ಳೆಂ ಉಗ್ತೆಂ ಘಾಲುನ್ಯ್ ರಾಯನಾಚೊ ಭರ್ವಸೊ ಹಾಂವ್ ಜಿಕ್ಲ್ಯಾಂ. ಬಾಲಿವುಡಾಕ್ ಪಾಂಯ್ ದವರ್ಚ್ಯಾಂತ್ ಹಾಂವ್ ಜಯ್ತೆವಂತ್ ಜಾಲ್ಯಾಂ. ತರ್ ರಾಯನಾಕ್ ಜಿಕ್ಚ್ಯಾಂತ್ ಆಪುಣ್ ಆಶೆಂ ಕಿತ್ಯಾಕ್ ಸಲ್ವಾಲ್ಯಾಂ?
ಆಪ್ಲ್ಯಾ, ಆಪ್ಣಾಕ್ ರಾವೊಂಕ್ ದಿಲ್ಲ್ಯಾ ಹೊಟೆಲಾಚ್ಯಾ ರುಮಾಂತ್ಲ್ಯಾ ಜನೆಲಾಚೆಂ ಕರ್ಟನ್ ದೆಗೆನ್ ಲೊಟುನ್ ಭಾಯ್ರ್ ಪಳಂವ್ಚ್ಯಾ ಆಲಿಯಾಚಾ ಮತಿಂತ್ ರಾಯನಾಚಾ ಚಿಂತ್ನಾಂನಿ ತುಫಾನ್ ಉಟ್ಲ್ಲೆಂ.
ಥೊಡೆಚ್ ದೀಸ್ ಉರ್ಲ್ಯಾತ್!
ತ್ಯಾ ಉಪ್ರಾಂತ್ ಆಪುಣ್ ಮುಂಬಯಿಂತ್ ಆಸ್ತೆಲಿಂ.
ಮುಂಬಯಿ ಮ್ಹಣ್ತಾನಾ ಆಲಿಯಾಚಾ ಕುಡಿರ್ ಭಾರೀಕ್ ಘಾಮ್ ಸುಟ್ಲೊ. ಮುಂಬಯಿಂತ್ ಖಂಯ್ಚಾಯ್ ವಗ್ತಾರ್ ಖಂಯ್ಚರ್ಯ್ ಆಪ್ಣಾಚಿ ಆನಿ ಆಪ್ಣಾಚ್ಯಾ ದುಸ್ಮಾನಾಂಚಿ ಭೆಟ್ ಜಾತೆಲಿ. ತ್ಯಾ ಭೆಟೆ ವೆಳಾರ್ ಆಪುಣ್ ಭಳಿಶ್ಟ್ ಆಸೊಂಕ್ ಜಾಯ್. ದುಸ್ಮಾನಾಂಕ್ ಜವಾಬ್ ದಿಂವ್ಚ್ಯಾ ತಿತ್ಲೆಂ ಧಯ್ರ್ ಆಪ್ಣಾಕ್ ಧಯ್ರಾಧೀಕ್ ಕರ್ತಾ. ಹ್ಯಾ ಧಯ್ರಾಕ್ ಹಾವೆಂ ಜೊಡುಂಕ್ ಸಕ್ಚೆಂ ಫಕತ್ತ್ ರಾಯನಾ ಥಾವ್ನ್! ವಿಶು ಕುಮಾರ್ಯ್ ರಾಯನಾ ಮುಕಾರ್ ಚುಕಾರಿ ಮಾರ್ತಾ. ನಾ ಜಾಲ್ಯಾರ್ ಮ್ಹಾಕಾ ಹೊ ವಿಶು ಕುಮಾರ್ ಎಕ್ಲೊಚ್ ಪಾವ್ತೊ. ಸಾವಂತ್ ರಾಯನಾ ಶಿವಾಯ್ ಏಕ್ ಕಾಡಿ ಸಯ್ತ್ ಹಾಲಂವ್ಕ್ಯ್ ಸಕಾನಾ. ತರ್ ರಾಯನ್.....!
ಆಲಿಯಾಚಿ ಮತ್ ಹರ್ಯೆಕ್ ವಾಟೆಂನಿ ಧಾಂವೊನ್ ನಿಮಾಣೆಂ ರಾಯನಾ ತೆವ್ಶಿಂಚ್ ಯೇವ್ನ್ ರಾವ್ತಾಲಿ.
ಆಪ್ಣಾಚಿ ಸೊಭಾಯ್ ಪಳವ್ನ್ ಎಕಾಚ್ ಘಡಿಯೆ ಭಿತರ್ ಕರೋಡಾಂಚೆಂ ಲುಕ್ಸಾಣ್ ಕರುನ್ ಆಪ್ಲಿ ಸಾಮರ್ಥಿ ದಾಖಯಿಲ್ಲ್ಯಾ ರಾಯನಾ ಮುಕಾರ್ ಆಪುಣ್ ಜಿಕ್ಲಿಂ ಮ್ಹಳ್ಳಿ ಖುಶಿ ಆಪ್ಣಾಕ್ ಆಸ್ಲ್ಲಿ. ಪುಣ್.....! ನಾ ಆಪುಣ್ ಜಿಕೊಂಕ್ ನಾ! ಹಾಂಗಾಸರ್ ರಾಯನ್ ಜಿಕ್ಲಾ! ತಾಚ್ಯಾ ಝುಜಾಂತ್ ಮ್ಹಾಕಾ ಮುಕಾರ್ ಘಾಲುನ್ ರಾಯನ್ ಹಾಂಗಾಸರ್ ಜಿಕ್ಲಾ! ಅಮೃತಾ, ಕುಲದೀಪ್, ಆನಿ ಇಕ್ಬಾಲಾಕ್ ಸಲ್ವವ್ನ್ ತೊ ಜಿಕ್ಲಾ!
ಮ್ಹಾಕಾ ಹಾತೆರ್ ಕರುನ್ ಬಾಲಿವುಡಾಂತ್ ರಾಯನ್ ಆಪ್ಲ್ಯಾ ಝುಜಾಂತ್ ಜಿಕ್ಲಾ. ಆನಿ ಆಪುಣ್.....?
ಸವ್ಕಾಸ್ ಆಲಿಯಾಚಾ ಆಂಗಾರ್ ಶೆಳೊ ಘಾಮ್ ಸುಟೊಂಕ್ ಲಾಗ್ಲೊ.
ಮ್ಹಜ್ಯಾ ಝುಜಾಂತ್ ಹಾವೆಂ ಜಿಕೊಂಕ್ ಜಾಯ್ ತರ್ ಮ್ಹಾಕಾ ಹಾತೆರ್ ಕರುನ್ ಘೆತ್ಲೆಲ್ಯಾ ಹ್ಯಾ ರಾಯನಾಕ್ ಪಯ್ಲೆಂ ಸಲ್ವಂವ್ಕ್ ಜಾಯ್!
ಆಲಿಯಾಚಾ ಮತಿನ್ ಪೈಸಲ್ ದಿಲೆಂ. ತಾಚ್ಯಾ ಪಾಟಾಪಟ್ ಕಿತೆಂಗೀ ಆಲಿಯಾಚಾ ಮತಿಕ್ ಝಳ್ಕಾತಾನಾ ತೆಂ ನಿಟ್ಟ್ ಭಿತರ್ ಬೆಡ್ರೂಮಾಕ್ ಗೆಲೆಂ. ಬೆಡ್ಡಾಚ್ಯಾ ಮುಕ್ಲ್ಯಾ ಆರ್ಶ್ಯಾ ಮುಕಾರ್ ಯೆವ್ನ್ ಉಭೆಂ ಜಾಲ್ಲ್ಯಾ ಆಲಿಯಾನ್ ತ್ಯಾ ಆರ್ಶ್ಯಾಂತ್ ಆಪ್ಣಾಕ್ಚ್ ಪಳೆಲೆಂ.
ಏಕ್ ಚಲೊ ಎಕಾ ಚಲಿಯೆಕ್ ಕಿತ್ಲ್ಯಾ ಸುಲಾಭಾಯೆನ್ ಸಲ್ವಯ್ತಾಗೀ ತಿತ್ಲ್ಯಾಚ್ ಸುಲಾಭಾಯೆ ಥಾವ್ನ್ ಆಪ್ಣೆಂ ಹ್ಯಾ ಚಲ್ಯಾಂಕ್ ಸಲ್ವೊಂಕ್ ಜಾಯ್! ಆಲಿಯಾಚೆಂ ಹಟ್ಟ್ ಭಳ್ ಜಾಲೆಂ.
ಸವ್ಕಾಸ್ ಆಲಿಯಾನ್ ತ್ಯಾ ಆರ್ಶ್ಯಾ ಮುಕಾರ್ ಆಪ್ಣಾಚಿಚ್ ಸೊಭಾಯ್ ಪಳೆಲಿ. ಉಣೆಂಪಣ್ ಖಂಯ್ ಆಸಾ? ರಾಯನಾಕ್ ಜಿಕೊಂಕ್ ಸಕಾನಾತ್ಲೆಲೆಂ ಉಣೆಂಪಣ್ ಖಂಯ್ ಆಸಾ?
ಆಲಿಯಾನ್ ತ್ಯಾ ಉಣ್ಯಾಪನಾಚಿಂ ಸೊಧ್ನಾಂ ಆರಂಭ್ ಕೆಲಿಂ.
ನಾಂ! ಆಪ್ಣಾ ಸವೆಂ ಖಂಯ್ಚರ್ಯ್ ತ್ಯಾ ಉಣ್ಯಾಪಣಾಕ್ ತಾಣೆಂ ದೆಖ್ಲೆಂ ನಾ.
ಸವ್ಕಾಸ್ ಆಪ್ಲ್ಯಾ ಕುಡಿ ವಯ್ಲೆಂ ಆಪ್ಣೆಂ ನ್ಹೆಸ್ಲೆಲೆಂ ಎಕೇಕ್ಚ್ ವಸ್ತುರ್ ತಾಣೆಂ ಕಾಡ್ಲೆಂ. ತಾಚ್ಯಾ ಕುಡಿಚ್ಯಾ ಕೊನ್ಶ್ಯಾ ಕೊನ್ಶ್ಯಾಂನಿ ತೆಂ ಸೊಧುಂಕ್ ಲಾಗ್ಲೆಂ. ಜಶೆಂ ರಾಯನಾನ್ ತ್ಯಾ ತಾಂಚ್ಯಾ ಪಯ್ಲ್ಯಾ ಭೆಟೆ ವೆಳಾರ್ ಆಲಿಯಾಚಾ ಕುಡಿಚ್ಯಾ ಕೊನ್ಶ್ಯಾ ಕೊನ್ಶ್ಯಾ ವಯ್ಲ್ಯಾ ಸೊಭಾಯೆಕ್ ಸೊಧುಲ್ಲೆಂ!
ತ್ಯಾ ದೀಸ್ಯ್ ರಾಯನಾನ್ ಸೊಧ್ನಾಂ ಕೆಲ್ಲಿಂ!
ಆಜ್ ಆಲಿಯಾ ತ್ಯಾಚ್ ಸೊಭಾಯೆಚ್ಯಾ ಉಣ್ಯಾಪಣಾಕ್ ಸೊಧುಂಕ್ ಲಾಗ್ಲ್ಲೆಂ!
ಖಂಯ್ ಆಸಾ ಉಣೆಂಪಣ್?
ಆಲಿಯಾ ಆತಾಂ ಸಗ್ಳೆಂಚ್ ಉಗ್ತೆಂ ಜಾಲೆಂ. ಪುಣ್ ತಾಚ್ಯಾ ದೊಳ್ಯಾಂಕ್ ತಾಚ್ಯಾ ಕುಡಿರ್ ಖಂಯ್ಚರ್ಯ್ ಉಣೆಂಪಣ್ ಮ್ಹಳ್ಳೆಂ ತೆಂ ದಿಸ್ಲೆಂ ನಾ. ತಾಚ್ಯಾ ಮತಿಕ್ ತಾಚ್ಯಾ ಸೊಭಾಯೆ ಮುಕಾರ್ ನಾ ಸಮಾಧಾನ್ ಭೊಗ್ಲೆಂ ನಾ.
ತರ್......?
ಆಲಿಯಾ ಆತಾಂ ಖಾಟಿಯೆರ್ ಬಸ್ಲೆಂ.
ತಿತ್ಲ್ಯಾರ್!
ತಾಚಿ ನದರ್ ಖಾಟಿಯೆರ್ ಪಡೊನ್ ಆಸ್ಲ್ಲ್ಯಾ ತಾಚ್ಯಾ ಸೆಲ್ಪೊನಾರ್ ಪಡ್ಲಿ.
ತಿತ್ಲೆಂಚ್!
ಕಿತೆಂಗೀ ಚಿಂತ್ಲ್ಲ್ಯಾ ಆಲಿಯಾನ್ ರಾಯನಾಕ್ ಪೋನ್ ರಿಂಗ್ ಕೆಲೆಂ.
ಸುಮಾರ್ ವೇಳ್ ಪೋನ್ ರಿಂಗ್ ಜಾವ್ನ್ ಉಪ್ರಾಂತ್ ತ್ಯಾ ಕುಶಿಂನ್ ಪೋನ್ ಕಾಡ್ಲ್ಲೊ ಆವಾಜ್!
"ಹಲೋ.....?"
ತ್ಯಾ ಕುಶಿನ್ ಉಲಯಿಲ್ಲೊ ತಾಳೊ ರಾಯನಾಚೊಚ್ ಮ್ಹಣೊನ್ ಆಲಿಯಾಕ್ ಕಳ್ತಾನಾ ತಾಚಿ ಮತ್ ಫುಲಾ ಭಾಶೆನ್ ಫುಲೊನ್ ರಾವ್ಲಿ.
"ಹಾಯ್! ಕಸೊ ಆಸಾಯ್?" ಆಲಿಯಾನ್ ಆಪ್ಲ್ಯಾ ಉತ್ರಾಂನಿ ಮಾದಕತಾ ಹಾಡ್ಲಿ.
"ಹಾಂ ಆಲಿಯಾ! ಹಾಂವ್ ಬರೊಂ ಆಸಾಂ! ತುಂ ಕಶೆಂ ಆಸಾಯ್? ಕೆದಾಳಾ ಯೆತಾತ್...?"
"ಮ್ಹಾಕಾ ರಾಕೊಣ್ ರಾವ್ಲ್ಯಾಯ್ ಕಿತೆಂ.....?" ಆಲಿಯಾಕ್ ಆಶ್ಚರ್ಯ್ ಜಾಲೆಂ. ಮತಿಂತ್ ಆಯಿಲ್ಲ್ಯಾ ಸವಾಲಾಕ್ ಕಾಂಯ್ಚ್ ಪಾಟಿಂ ಫುಡೆಂ ಚಿಂತಿನಾಸ್ತಾನಾ ತಾಣೆಂ ವಿಚಾರುನ್ ಸೊಡ್ಲೆಂ.
"ಫಿಲ್ಮಾಚಾ ಸ್ಕ್ರೀನಿಂಗಾಕ್ ಆಲಿಯಾ! ಬೈ ದಿ ವೇ.... ತುಜೆಂ ಆಕ್ಟಿಂಗ್ ಪಳಂವ್ಕ್ಯ್ ಜಾತಾ.....!"
ರಾಯನಾಚಾ ಜವಾಬೆನ್ ಆಲಿಯಾಚಾ ಆಂಗಾರ್ ಶೆಳೆಂ ಉದಾಕ್ ವೊತ್ಲ್ಲ್ಯಾ ಪರಿಂ ಜಾವ್ನ್ ತಾಕಾ ಹಿಂವ್ ಲಾಗ್ಲೆಂ. ಪಯ್ಲೆಂಚ್ ಸಗ್ಳಿಚ್ ಉಗ್ತಿ ಆಸ್ಲ್ಲ್ಯಾ ತಾಚ್ಯಾ ಕುಡಿಚ್ಯಾ ವ್ಯಾಕ್ಸ್ ಕೆಲ್ಲ್ಯಾ ಲೊಂವೆ ಮುಳಾ ಥಾವ್ನ್ ಹಿಂವ್ ತಾಚ್ಯಾ ಶಿರಾಂನಿ ರಿಗ್ಲ್ಲ್ಯಾ ಪರಿಂ ಜಾತಾನಾ ಪಯ್ಲೆಂ ತಾಚ್ಯಾ ತೊಂಡಾರ್ ಉದೆಲ್ಲೆಂ ಅಶ್ಚರ್ಯ್ ಲಜೆಚ್ಯಾ ಕಾಂಟಿಯೆಚೆಂ ಪಾನ್ ಖಿಣಾ ಭಿತರ್ ದೊಡುನ್ ವೆಚ್ಯಾ ಪರಿಂ ದೊಡುನ್ ಗೆಲೆಂ.
"ತುಂ ಬಿಜಿ ಆಸಾಯ್....?" ಆಲಿಯಾನ್ ಉಲೊಣೆಂ ಮುಂದರಿಲೆಂ. ತಾಚೆಂ ಪ್ರಯತ್ನ್ ತಾಣೆಂ ಕರುಂಕ್ಚ್ ಜಾಯ್ ಆಸ್ಲ್ಲೆಂ.
"ಹಾಂ! ಆಜ್ ಮಸ್ತ್ ಬಿಜಿ ಮ್ಹಣ್ಯೆತ್!" ರಾಯನ್ ಲೋವ್ ತಾಳ್ಯಾನ್ ಹಾಸ್ಲೊ.
"ಆಜ್ ಕಿತೆಂ?" ಆಲಿಯಾಚಾ ತಾಳ್ಯಾಂತ್ ಎಕಾಚ್ಚ್ಫರಾ ಆತುರಾಯ್ ವಾಡ್ಲಿ.
"ಆಜ್ ಮಿಶೆಲಾಚೊ ಬರ್ತ್ಡೇ!"
ತ್ಯಾ ಕುಶಿಂನ್ ಥಾವ್ನ್ ಉತ್ರಾಂ ಆಯ್ಕಾತಾನಾ ಎಕಾ ಖಿಣಾಕ್ ಆಲಿಯಾ ಸ್ತಬ್ದ್ ಜಾಲೆಂ. ಸವ್ಕಾಸ್ ತಾಚ್ಯಾ ಹಾತಾಚೆಂ ಭಳ್ ಗಳೊನ್ ಗೆಲ್ಲ್ಯಾ ಪರಿಂ ಜಾವ್ನ್ ಆಲಿಯಾಚೊ ಪೋನ್ ದರ್ಲ್ಲೊ ಹಾತ್ ತಾಚ್ಯಾ ಕಾನಾ ಥಾವ್ನ್ ಗಳೊನ್ ಸಕಯ್ಲ್ ದೆಂವ್ಲೊ.
ತಿತ್ಲೆಂಚ್!
"ಕಾಂಗ್ರಾಜುಲೇಶನ್ಸ್!" ಪರಿಸ್ಥಿತೆ ಥಾವ್ನ್ ಜಾಗೆಂ ಜಾಲ್ಲೆಂ ಆಲಿಯಾ ಪರ್ತ್ಯಾಕ್ ಆಪ್ಲ್ಯಾ ಸಂಸಾರಾಕ್ ಪಾಟಿಂ ಆಯ್ಲೆಂ.
"ಥ್ಯಾಂಕ್ ಯು!"
"ಪಾರ್ಟಿ ಪುಣಿ ದವರ್ಲ್ಯಾಯ್...?"
"ನಾ ಆಲಿಯಾ! ಮಿಶೇಲಾಕ್ ತೆಂ ಪಸಂದ್ ನಾ!"
"ಮಾಗಿರ್.....?"
"ಆಮಿಂಚ್ ದೊಗಾಂ! ಆಮಿಂಚ್ ಸೆಲೆಬ್ರೇಟ್ ಕರ್ಚೆಂ!"
"ವಂಡರ್ಫುಲ್!" ಆಲಿಯಾ ಹಾಸ್ಲೆಂ.
"ರಿಯಲ್ಲಿ! ಇಟ್ಸ್ ರಿಯಲ್ಲಿ ವಂಡರ್ಫುಲ್! ಮಿಶೇಲ್ ಇಸ್ ಜಸ್ಟ್ ಲೈಕ್ ದ್ಯಾಟ್ ಓನ್ಲೀ!"
ರಾಯನಾಚ್ಯಾ ಉತ್ರಾಂ ಥಾವ್ನ್ ಆಲಿಯಾಚಾ ಆಂಗಾರ್ ಕಿಡೆ ಮುಯೊ ಚರ್ಲ್ಲೊ ಆನ್ಭೋಗ್ ತಾಕಾ ಜಾಲೊ. ವಿಣ್ಗ್ಯಾ ತಾಚ್ಯಾ ಕುಡಿರ್ ಚರ್ಚ್ಯಾ ತ್ಯಾ ಕಿಡ್ಯಾ ಮುಯಾಂಚಾ ಆನ್ಭೋಗಾನ್ ತಾಚೆಂ ಆಂಗ್ ಹಿಂವಾಳ್ಳೆಂ.
"ಮಿಶೇಲ್!" ತೆಂ ಉದ್ಗಾರ್ಲೆಂ.
"ತುಕಾ ಉಲಂವ್ಕ್ ಜಾಯ್...?"
"ಹಾಂ..... ವ್ಹಯ್ ದೀ!"
"ತುಂ ಮಿಶೇಲಾಕ್ ಎದೊಳ್ ಮೆಳೊಂಕ್ ನಾಂಯ್. ತುಂ ಮುಂಬಯಿ ಆಯ್ಲ್ಯಾ ಉಪ್ರಾಂತ್ ತುಕಾ ಮಿಶೇಲಾ ಸಂಗಿಂ ಮೆಳಯ್ತಾಂ ಶಿ ಇಸ್ ಜಸ್ಟ್ ಲೈಕ್ ಎ ಪ್ರಿನ್ಸೆಸ್!"
"ಅಫ್ ಕೋರ್ಸ್!"
ರಾಯನಾಚಾ ಹೊಗ್ಳಾಪಾಕ್ ಆಯ್ಕಾತಾನಾ ಆಲಿಯಾಕ್ ಉಲಂವ್ಕ್ ಕಶ್ಟ್ ಮಾರ್ಲೆ. ಆಪ್ಣಾಕ್ಚ್ ಸೊಭಿತ್ ಮ್ಹಣೊನ್ ಚಿಂತ್ಚೆಂ ತೆಂ ದುಸ್ರ್ಯಾಚಾ ಸೊಭಾಯೆಚೆಂ ವರ್ಣನ್ ಆಯ್ಕಾತೆಲೆಂ ಜಾಲ್ಯಾರ್ಯ್ ಕಶೆಂ?
"ಹಲೋ.....?"
ತ್ಯಾ ಕುಶಿನ್ ಥಾವ್ನ್ ಸುಮಧುರ್ ತಾಳೊ.
"ಮಿಶೇಲ್!" ಆಲಿಯಾ ಉದ್ಗಾರ್ಲೆಂ. "ಕಂಗ್ರಾಜುಲೇಶನ್ಸ್!" ಆಲಿಯಾನ್ ಮಿಶೇಲಾಕ್ ತಾಚ್ಯಾ ಜಲ್ಮಾ ದಿಸಾಚೆ ಶುಭಾಶಯ್ ಪಾಟಯ್ಲೆ.
"ಥ್ಯಾಂಕ್ ಯು!" ಕಾಳ್ಜಾಚ್ಯಾ ಗೂಂಡಾಯೆ ಥಾವ್ನ್ ಉಟೊನ್ ಆಯಿಲ್ಲ್ಯಾ ಪರಿಂ ಖಾಲ್ತೊ ತಾಳೊ.
"ಕಶೆಂ ಆಸಾಯ್......?"
"ಬರಿಂ ಆಸಾಂ!"
"ಬರ್ತ್ಡೇ ಗಮ್ಮತ್...?"
"ತಶೆಂ ಕಾಂಯ್ ನಾ! ವೆರ್ರಿ ಸಿಂಪಲ್!"
"ಓ.ಕೆ ದೆನ್!ಸೀ ಯು ಸೂನ್!"
"ಬಾಯ್!"
ತ್ಯಾ ಕುಶಿನ್ ಮಿಶೇಲಾನ್ ಸಾಂಗ್ಲ್ಲೆಂ ಆಯ್ಕಾತಾನಾ ಆಲಿಯಾನ್ ಪೋನ್ ಡಿಸ್ಕನೆಕ್ಟ್ ಕೆಲೆಂ.
"ಮಿಶೇಲ್.....!" ಅಪ್ಲೆಸ್ತಕಿಂ ಉದಾರ್ಲ್ಲೆಂ ಆಲಿಯಾ ಸವ್ಕಾಸ್ ಹಾಸ್ಲೆಂ. ತಶೆಂಚ್ ತೆಂ ಉದಾರೆಂಚ್ ಖಾಟಿಯೆರ್ ಪಡ್ಲೆಂ.
"ತುಕಾ ಮೆಳೊಂಕ್ ಜಾಯ್ ಡಾರ್ಲಿಂಗ್! ವೆಗಿಂಚ್ ತುಕಾ ಮೆಳೊಂಕ್ ಜಾಯ್! ನಾ ಜಾಲ್ಯಾರ್ ಮ್ಹಜ್ಯಾ ಝುಜಾಕ್ ಆಧಾರ್ ನಾ!" ಆಲಿಯಾ ತಶೆಂಚ್ ಆಪ್ಲ್ಯಾ ಖಾಟಿಯೆರ್ ಉದಾರೆಂ ಉರ್ಲೆಂ.
**************
"ಮಿಶೇಲ್...!"
ಮೊಗಾನ್ ಪಿಂರ್ಗಾಲ್ಲ್ಯಾ ರಾಯನಾನ್ ಮಿಶೇಲಾಕ್ ತಾಚ್ಯಾ ಪಾಟ್ಲ್ಯಾನ್ ಥಾವ್ನ್ ವೆಡೊ ಮಾರ್ಲೊ. ಆಪ್ಲ್ಯಾ ಬಾವ್ಳ್ಯಾಂ ಮಧೆಂ ಮಿಶೇಲಾಕ್ ಹಳ್ತಾರ್ ತಾಣೆಂ ದಾಂಬುನ್ ಧರ್ಲೆಂ. ಅಚಾನಕ್ ರಾಯನಾಚಾ ಹ್ಯಾ ವರ್ತನಾಚಿ ಮಿಶೇಲಾಕ್ ರಾಕೊಣ್ ನಾತ್ಲ್ಲಿ. ತೆಂ ಆಪ್ಲ್ಯಾ ಬೆಡ್ರೂಮಾಂತ್ಲ್ಯಾ ಡ್ರೆಸ್ಸಿಂಗ್ ಟೇಬಲಾ ವಯ್ಲ್ಯೊ ವಸ್ತು ಸಾರ್ಕ್ಯೊ ಕರ್ತಾಲೆಂ. ಆಪ್ಣಾಕ್ ಆಪ್ಣಾ ಪಾಟ್ಲ್ಯಾನ್ ಥಾವ್ನ್ ಆರಾವ್ನ್ ಧರ್ಲ್ಲ್ಯಾ ಆಪ್ಲ್ಯಾ ಘೊವಾಕ್ ಆಪ್ಣಾ ಮುಕ್ಲ್ಯಾ ಆರ್ಶ್ಯಾಂತ್ ಪಳೆವ್ನ್ ತೆಂ ಹಾಸ್ಲೆಂ.
"ತುಜ್ಯಾ ಬರ್ತ್ಡೇಚಾ ಖುಶಿಯೆರ್ ಹಾವೆಂ ತುಕಾ ಕಿತೆಂ ಹಾಡ್ಲಾಂ ತೆಂ ಸಾಂಗ್ ಪಳೆಯಾಂ?" ಮಿಶೇಲಾಚಾ ಖಾಂದಾರ್ ಆಪ್ಲಿ ತಕ್ಲಿ ತೆಂಕಯಿಲ್ಲ್ಯಾ ರಾಯನಾನ್, ಮಿಶೇಲಾಚಾ ಪೊಲ್ಯಾಕ್ ಆಪ್ಲ್ಯಾ ಗಾಲಾನ್ ವ್ಹಳೂ ಘೆಶ್ಟಿಲೆಂ.
ಮುಕ್ಲ್ಯಾ ಆರ್ಶ್ಯಾಕ್ ಪಳಂವ್ಚ್ಯಾ ಮಿಶೇಲಾಕ್ ತ್ಯಾ ಆರ್ಶ್ಯಾಂತ್ ಸಗ್ಳೆಂ ದಿಸ್ತಾಲೆಂ.
"ರಾ....ಯನ್.....!" ಮಿಶೇಲ್ ಹಳ್ಟಾರ್ ಹುಳ್ವುಳ್ಳೆಂ. ತಾಕಾ ಆಪ್ಲ್ಯಾ ಪೊಲ್ಯಾಂ ಮುಳಾಂತ್ ಕಿತೆಂಗೀ ಜಾಲ್ಲ್ಯಾ ಪರಿಂ ಜಾಲೆಂ.
ಆತಾಂ ರಾಯನಾನ್ಯ್ ಹಾಸೊನ್ ತಶೆಂಚ್ ಮುಕ್ಲ್ಯಾ ಆರ್ಶ್ಯಾಕ್ ಪಳೆಲೆಂ. ಆಪ್ಣಾಚಿ ಆಪ್ಲ್ಯಾ ಮಿಶೇಲಾಚಿ ಜಿವಿ ಜಿವಿ ತಸ್ವೀರ್ ತಾಕಾ ತ್ಯಾ ಆರ್ಶ್ಯಾಂತ್ ದಿಶ್ಟಿಕ್ ಆಯ್ಲಿ. ತ್ಯಾ ತಸ್ವೀರೆಂತ್ ಲಜೆಲ್ಲ್ಯಾ ಮುಖಮಳಾಚೆಂ ಮಿಶೇಲ್ ಹರ್ಶೆಂಚಾ ಪ್ರಾಸ್ ತಾಕಾ ಮಸ್ತ್ ಸೊಭಿತ್ ದಿಸ್ಲೆಂ. ಮಿಶೇಲಾಚಿ ಸೊಭಾಯ್ ತಾಚ್ಯಾ ರುಪಾಚ್ಯಾಕ್ಯ್ ತಾಚ್ಯಾ ತ್ಯಾ ಮುಗ್ದ್ಪಣಾಂತ್ ಉಡೊನ್ ದಿಸ್ತಾಲಿ. ಮುಗ್ದ್ ಮುಖಮಳಾಚೆಂ ಮಿಶೇಲ್ ತಾಕಾ ಹರ್ಯೆಕ್ ಘಡಿ ಪಸಂದ್ ಜಾತಾಲೆಂ.
"ಡಾರ್ಲಿಂಗ್....!" ರಾಯನ್ ಹಳ್ಟಾರ್ ಉಲಯ್ಲೊ.
"ಊಂ.....!"
"ಸಾಂಗ್ ಪಳೆಯಾಂ ತುಜ್ಯಾ ಬರ್ತ್ಡೇಕ್ ಹಾವೆಂ ತುಕಾ ಕಿತೆಂ ಗಿಫ್ಟ್ ಹಾಡ್ಲಾಂ ತೆಂ...!" ರಾಯನಾನ್ ಮಿಶೇಲಾಕ್ ಆಪ್ಲ್ಯಾ ಬಾವ್ಳ್ಯಾಂ ಥಾವ್ನ್ ವಿಂಗಡ್ ಕೆಲೆಂ ನಾ. ತಾಕಾ ತೊ ತಶೆಂಚ್ ಧರುನ್ ರಾವ್ಲೊ.
"ತುಕಾ ಹಾವೆಂ ಸಾಂಗ್ಲ್ಲೆಂ ರಾಯನ್!" ಮಿಶೇಲ್ ತಶೆಂಚ್ ರಾಯನಾಚ್ಯಾ ಬಾವ್ಳ್ಯಾಂಚಾ ಭಳಾ ಭಿತರ್ ಹಳ್ಟಾರ್ ಹುಳ್ವುಳ್ಳೆಂ. ಪುಣ್ ತಾಕಾ ಸಾದ್ಯ್ ಜಾಲೆಂ ನಾ. ರಾಯನಾನ್ ತಾಕಾ ಆಪ್ಣಾ ತೆವ್ಶಿಂ ಧಾಂಬುನ್ ದರ್ಲ್ಲೆಂ.
"ತುಕಾ...." ಮಿಶೇಲ್ಚ್ ಉಲಯ್ಲೆಂ. ".....ಹಾವೆಂ ಸಾಂಗ್ಲ್ಲೆಂ ಮ್ಹಾಕಾ ಕಾಂಯ್ ಗಿಫ್ಟ್ ನಾಕಾ. ಮ್ಹಾಕಾ ಹಾಂಗಾ ಕಿತೆಂ ಉಣೆಂ ಆಸಾ ರಾಯನ್? ಸಗ್ಳ್ಯಾಂ ವರ್ನಿಂ ವರ್ತೆಂ ಜಾವ್ನ್ ತುಂ ಮ್ಹಜ್ಯಾ ಸಾಂಗಾತಾ ಆಸಾಯ್! ಹಾಚ್ಯಾ ವರ್ನಿಂ ವರ್ತೆಂ ಎಕಾ ಬಾಯ್ಲೆಕ್ ಕಿತೆಂ ಜಾಯ್. ಮ್ಹಾಕಾ ಹ್ಯಾ ಸಗ್ಳ್ಯಾಚಿ ಆಶಾ ನಾ! ಹಾಚ್ಯಾ ಬದ್ಲಾಕ್ ತುಜ್ಯಾ ಆಫೀಸಾಂತ್ ತುಜ್ಯಾ ಕಾಮಾಚಿಂ ಆಸಾತ್. ತಾಂಕಾಂ ಕೊಣಾಕ್ ಗರ್ಜ್ ಆಸಾ ತಾಂಕಾ ಥೊಡೊ ಆಧಾರ್ ದೀ. ತಿಂ ಖುಶ್ ಜಾಲಿಂ ಜಾಲ್ಯಾರ್... ತಾಂಚ್ಯಾ ತೊಂಡಾರ್ ಖುಶಿ ಉದೆಲ್ಯಾರ್, ತಾಚ್ಯಾ ಪ್ರಾಸ್ ವರ್ತೆಂ ಬರೆಂಪಣ್ ಕಾಂಯ್ ನಾ. ತಿಂ ಖುಶಿ ಜಾಲಿಂ ಜಾಲ್ಯಾರ್ ಆಮ್ಚಾಯ್ ಸಂತೊಸಾ ಖಾತಿರ್ ಮಾಗ್ತೆಲಿ. ತೆಂಚ್ ವರ್ತೆಂ ರಾಯನ್.....!" ಮಿಶೇಲಾನ್ ರಾಯನಾಕ್ ತಶೆಂಚ್ ರಾವೊನ್ ಆಸ್ಲ್ಲ್ಯಾ ಕಡೆನ್ ಹಳ್ಟಾಚೊ ಶೆರ್ಮಾಂವ್ ದಿಲೊ. ರಾಯನಾನ್ ಫಕತ್ತ್ ಆಪ್ಲ್ಯಾ ಬಾಯ್ಲೆಕ್ ಆಯ್ಕಾಲೆಂ ಮಾತ್ರ್. ತೊ ಕಾಂಯ್ಚ್ ಉಲಯ್ಲೊ ನಾ. ಯಾ ಆಪ್ಲ್ಯಾ ಬಾಯ್ಲೆಚ್ಯಾ ಉತ್ರಾಂ ಥಾವ್ನ್ ತಾಚ್ಯಾ ತೊಂಡಾಚ್ಯಾ ಛಾರ್ಯಾ ವಯ್ರ್ ಕಾಂಯ್ ಬದ್ಲಾವಣ್ ಆಯ್ಲಿ ನಾ. ತೊ ಆಪ್ಲ್ಯಾ ಮಿಶೇಲಾಕ್ ಆನಿ ತಾಚ್ಯಾ ವಿಚಾರಾಂಕ್ ಬರ್ಯಾನ್ ಜಾಣಾಂ.
ಮಿಶೇಲಾಚಾ ಹ್ಯಾ ವಿಚಾರಾ ಪಾಟ್ಲ್ಯಾನ್ ತಾಚ್ಯಾ ಆಬಾಚೊ ಹಾತ್ ಆಸ್ಲ್ಲೊ. ಆಪ್ಲ್ಯಾ ಆಜ್ಯಾನ್ ತಾಚ್ಯಾ ಕಾಮಾಗಾರಾಂ ಸಾಂಗಾತಾ ಚಲ್ಲ್ಲೆಂ ತೆಂ ಮಿಶೇಲಾನ್ ಆಪ್ಲ್ಯಾ ದೊಳ್ಯಾಂನಿ ರೂಪ್ ರೂಪ್ ಪಳೆಲಾಂ.
"ಆಫೀಸಾಂತ್ಲ್ಯಾಕ್ ದಿಂವ್ಚೆಂ ಹಾವೆಂ ದಿಲಾಂ ಡಾರ್ಲಿಂಗ್! ತುವೆಂ ಕಾಲ್ ಸಾಂಗ್ಲ್ಲೆಂಯ್ ತೆಂ ಹಾಂವ್ ಕಿತೆಂ ವಿಸ್ರಾಲೊಂ ಮ್ಹಣೊನ್ ಚಿಂತಾಯ್...? ನಿಜಾಯ್ಕ್ಯ್ ಆಜ್ ತಿಂ ಮಸ್ತ್ ಖುಶಿ ಜಾಲ್ಲಿಂ. ತಾಂಕಾಂಯ್ ತಾಣಿಂ ಮ್ಹಜ್ಯಾ ಹಾತಾ ಥಾವ್ನ್ ಆಶೆಂ ಘೆಂವ್ಚೆಂ ಪಯ್ಲೆಂ ಜಾಲ್ಯಾರ್ ಮ್ಹಾಕಾಯ್ ಮ್ಹಜ್ಯಾ ಹಾತಾ ಥಾವ್ನ್ ತಾಂಚೊ ಸಾಂಬಾಳ್ ಶಿವಾಯ್ ಆಶೆಂ ಹಾವೆಂ ಹಾತ್ ಉಕೊಲ್ನ್ ದಿಂವ್ಚೆಂ ಪಯ್ಲೆ ಪಾವ್ಟಿಂ! ಮ್ಹಾಕಾಯ್ ಬರೆಂ ಲಾಗ್ಲೆಂ!" ರಾಯನಾಚಾ ತೊಂಡಾರ್ ಹಾಸೊ ಉದೆಲ್ಯೊ.
"ತುಜೆಂ ಕಾಂಯ್ ಉಣೆಂ ಜಾಂವ್ಚೆಂ ನಾ ರಾಯನ್! ತಾಚ್ಯಾ ಪ್ರಾಸ್ ತುಕಾ ದೊಡ್ಯಾನ್ ಮೆಳ್ತೆಲೆಂ!" ರಾಯನಾಚಿಂ ಉತ್ರಾಂ ಆಯ್ಕೊನ್ ಮಿಶೇಲ್ ಖುಶಿಯೆನ್ ಭರ್ಲೆಂ. ತೆಂ ತಾಚ್ಯಾ ಕಾಮಾಗಾರಾಂ ಪಯ್ಕಿ ವಳ್ಕಾತಾಲೆಂ ಮ್ಹಳ್ಯಾರ್ ತಾಚ್ಯಾ ಘರಾಚಾ ವಾಚ್ಮ್ಯಾನಾಕ್, ಘರಾಂತ್ ಕಾಮ್ ಕರ್ಚ್ಯಾ ಶಮ್ಮಿಕ್, ಆನಿ ಆಪ್ಣಾಕ್ ಕೆದ್ನಾಂಯ್ ಎಕ್ಸುರ್ಯಾಕ್ ಭಾಯ್ರ್ ವಚೊಂಕ್ ಆಸ್ತಾನಾ ರಾಯನಾಚಾ ಆಫೀಸಾ ಥಾವ್ನ್ ಯೆಂವ್ಚ್ಯಾ ತ್ಯಾ ಡ್ರೈವರಾಕ್ ಮಾತ್ರ್. ಹ್ಯಾ ತೆಗಾಂ ಶಿವಾಯ್ ತೆಂ ಕೊಣಾಯ್ಕ್ಯ್ ವಳ್ಕಾನಾತ್ಲ್ಲೆಂ. ಪುಣ್ ಮಿಶೇಲಾಕ್ ಕಾಲ್ ರಾಯನಾನ್ ವಿಚಾರ್ಲ್ಲ್ಯಾ ವೆಳಾರ್ ತಾಕಾ ತಾಚ್ಯಾ ಒಮ್ಜೂರ್ಚ್ಯಾ ತೊಟಾಂತ್ ಕಾಮ್ ಕರ್ಚ್ಯಾ ಜಾನಕಿಚೊ ಉಡಾಸ್ ಆಯಿಲ್ಲೊ. ತ್ಯಾ ಉಡಾಸಾಕ್ ಮಿಶೇಲಾನ್ ಆಪ್ಲ್ಯಾ ಘೊವಾ ಮುಕಾರ್ ದವರ್ಲ್ಲೆಂ ಮಾತ್ರ್. ಪುಣ್ ಆತಾಂ ಆಪ್ಲ್ಯಾ ಘೊವಾನ್ ಆಪ್ಲ್ಯಾ ಉಡಾಸಾಕ್ ಕಾರ್ಯಾಳ್ ಕೆಲ್ಲೆಂ ತೆಂ ಆಯ್ಕೊನ್ ಮಿಶೇಲಾಕ್ ವರ್ತೊ ಸಂತೊಸ್ ಜಾಲೊ.
"ತುವೆಂ ಘರಾ ಪೋನ್ ಕೆಲ್ಲೆಂಯ್....?" ಮಿಶೇಲ್ ಉಲಯ್ನಾಸ್ತಾನಾ ಮೌನ್ ಅಸಾ ತೆಂ ಪಳವ್ನ್ ರಾಯನಾನ್ ವಿಚಾರ್ಲೆಂ.
"ತುಂ ಭಾಯ್ರ್ ಗೆಲ್ಲ್ಯಾ ವೆಳಾರ್ ಮಾಂಯ್ಚೆಂ ಪೋನ್ ಆಯಿಲ್ಲೆಂ!"
"ಕಿತೆಂ ಖಂಯ್.....?" ರಾಯನ್ ಜಾಣಾಂ ಆಸ್ಲ್ಲೊ ಮಿಶೇಲಾಚೊ ಸ್ವಾಸ್ ಆನಿ ಜೀವ್ ಆಪ್ಲ್ಯಾ ಆಜ್ಯಾ ಆನಿ ಆಜಿಯೆ ಥಂಯ್ ಆಸಾ.
"ಮ್ಹಾಕಾ ಬರ್ತ್ಡೇಕ್ ವಿಶ್ ಕರುಂಕ್ ಪೋನ್ ಕೆಲ್ಲೆಂ!"
"ಸಗ್ಳೆಂ ಭಲಾಯ್ಕೆಂತ್.....?"
"ವ್ಹಯ್!" ಮಿಶೇಲ್ ತಶೆಂಚ್ ಹಾಸ್ಲೆಂ.
"ತುಂ ಆಸಾ ಪಳೆ ಮಿಶೇಲ್.....!" ಮಿಶೇಲಾಕ್ ಆಪ್ಣಾ ಬರಾಬರ್ ತಶೆಂಚ್ ತ್ಯಾ ಮುಕ್ಲ್ಯಾ ಆರ್ಶ್ಯಾಂತ್ ಪಳವ್ನ್ ಆಸ್ಲ್ಲ್ಯಾ ರಾಯನಾಚಾ ಕಾಳ್ಜಾಕ್ ಕಿತೆಂಗೀ ಉಲ್ಲಾಸ್ ಜಾಲ್ಲ್ಯಾ ಪರಿಂ ಭೊಗ್ಲೊ. ಮಿಶೇಲ್ ಜರ್ ತಾಚ್ಯಾ ಕಾಳ್ಜಾ ಮನಾಂತ್ ಖುಶಿ ಆಸಾ ಜಾಲ್ಯಾರ್ ತೊ ಸಂತೊಸ್ ತಾಚ್ಯಾ ಮುಖಮಳಾರ್ ಉಗ್ತ್ಯಾನ್ ದಿಸ್ತಾಲೊ. ಜಶೆಂ ಸಾಕಾಳಿಂಚೊ ತೊ ಸುರ್ಯೊ ತ್ಯಾ ಗುಡ್ಯಾ ದೊಂಗ್ರಾ ಮಧೆಂ ಪ್ರಫುಲ್ಲಾತಾಯೆನ್ ಉದೆವ್ನ್ ಯೆತಾ ಜಶೆಂ. ಹಾ ವಗ್ತಾರ್ ಮಿಶೇಲ್ ತಾಕಾ ತ್ಯಾ ಫುಲ್ಚ್ಯಾ ಸುರ್ಯಾ ಪರಿಂಚ್ ದಿಸ್ಲೆಂ. ರಾಯನಾಕ್ ಆತಾಂ ತಡ್ವುಂಕ್ ಸಾದ್ಯ್ ಜಾಲೆಂ ನಾ. ತಾಣೆಂ ಆಪ್ಲ್ಯಾ ಮಿಶೇಲಾಕ್ ಸೊಡ್ಲೆಂ. ತಾಚ್ಯಾ ಸವೆಂ ಆಪ್ಲ್ಯಾ ಹಾತಾಂನಿ ತಾಚ್ಯಾ ಬಾವ್ಳ್ಯಾಂಕ್ ಧರುನ್ ಮಿಶೇಲಾಕ್ ಆಪ್ಣಾ ತೆವ್ಶಿಂ ಘುಂವ್ಡಾಯ್ಲೆಂ.
"ದೀಸ್ ವೆತಾಂ ವೆತಾಂ ತುಂ ಮ್ಹಾಕಾ.....!" ಮುಕಾರ್ ರಾಯನ್ ಉಲಯ್ಲೊ ನಾ. ತಾಕಾ ಕಿತೆಂ ಉಲಂವ್ಚೆಂ ಮ್ಹಳ್ಳೆಂ ತೆಂ ಕಳೊಂಕ್ ನಾ. ತೊ ಮೌನ್ ಜಾಲೊ ಆನಿ ತಸೊಚ್ಚ್ ಮಿಶೇಲಾಕ್ ಪಳಂವ್ಚಾರ್ ಪಡ್ಲೊ. ಖಂಯ್ಚರ್ಗೀ ಮಿಶೇಲಾಚ್ಯಾ ತ್ಯಾ ಮುಖಮಳಾರ್ ಆಪುಣ್ ವಿಶೆವ್ ಘೆತಾಂ ಮ್ಹಳ್ಳ್ಯಾ ಪರಿಂ ತಾಕಾ ಜಾಲೆಂ.
ಮಿಶೇಲ್ ಆಪ್ಲ್ಯಾ ಘೊವಾಚ್ಯಾ ದೊಳ್ಯಾಂಕ್ಚ್ ಪಳೆತಾಲೆಂ. ರಾಯನ್ ಹ್ಯಾ ವಗ್ತಾರ್ ಕಾಂಯ್ಚ್ ಉಲಂವ್ಕ್ ಸಕಾನಾ ಮ್ಹಳ್ಳೆಂ ತೆಂ ಜಾಣಾಂ.
"ತುಜ್ಯಾ ಮುಖಮಳಾರ್ ಮ್ಹಾಕಾ ಮ್ಹಜೊ ಸಂಸಾರ್ಚ್ ಉಟೊನ್ ದಿಸ್ತಾ ಡಾರ್ಲಿಂಗ್!" ಉದ್ಗರ್ಲ್ಲ್ಯಾ ರಾಯನಾನ್ ಮಿಶೇಲಾಕ್ ವೆಂಗ್ಲೆಂ. ತೊ ಕಿತ್ಲೊ ವೇಳ್ ತಸೊಚ್ ಆಸ್ಲ್ಲೊ ತೆಂ ತೊಚ್ಚ್ ನೆಣಾಂ. ತಾಚ್ಯಾ ಕಾಳ್ಜಾ ಮನಾಕ್ ಶಾಂತಿ ಮೆಳ್ತಾನಾ ಹಳ್ಟಾರ್ ತಾಣೆಂ ಮಿಶೇಲಾಕ್ ಸೊಡ್ಲೆಂ.
"ಸಾಂಗ್ಲ್ಲ್ಯಾಪರಿಂ ತುಜ್ಯಾ ಗಿಫ್ಟಾಕ್ ಹಾಂವ್ ವಿಸ್ರೊನ್ಚ್ ಗೆಲೊಂ!"
"ರಾ.....ಯನ್!" ಮಿಶೇಲಾನ್ ಆಪ್ಲ್ಯಾ ಗಳ್ಯಾ ಥಾವ್ನ್ ತಾಳೊ ಲಾಂಭ್ ವೊಡ್ಲೊ. ಆಪ್ಲೊ ಘೊವ್ ಪರ್ತ್ಯಾಕ್ ಪರ್ತ್ಯಾಕ್ ಘುಂವೊನ್ ಆಪ್ಣಾಕ್ ದೀಂವ್ಕ್ ಆಸ್ಚ್ಯಾ ಗಿಫ್ಟಾ ತೆವ್ಶಿಂಚ್ ಪರ್ತಾತಾನಾ ಆಪ್ಲಿ ತಕ್ಲಿ ಆಡ್ ಘಾಲುನ್ ಮಿಶೇಲಾನ್ ರಾಯನಾಕ್ಚ್ ಪಳೆಲೆಂ. ತಾಚ್ಯಾ ಉತ್ರಾಂ ಸವೆಂ ತ್ಯೊ ಮಂದ್ ಹಾಸೊ ತಾಚ್ಯಾ ವೊಂಟಾರ್ ತಶ್ಯೊಚ್ ರಾಯನಾಕ್ ತ್ಯಾ ಸಾಂಜೆಚಾ ರಂಗ್ ಬದ್ಲುಂಚಾ ದರ್ಯಾ ಉದ್ಕಾಂಕ್ ದೆವೊಂಕ್ ಆಪವ್ಣೆ ದಿತಾಲ್ಯೊ.
"ಪಳೆ ಮಿಶೇಲ್! ತುಜ್ಯಾ ಆಶೆಕ್ ಹಾವೆಂ ಆಯ್ಕಾಲಾಂ. ಆತಾಂ ಹಾವೆಂ ಮ್ಹಜ್ಯಾ ತರ್ಫೆನ್ ತುಕಾ....!" ಮಿಶೇಲಾಪರಿಂಚ್ ಆತಾಂ ರಾಯನಾಚಿಯ್ ತಕ್ಲಿ ಥೊಡಿ ಆಡ್ವಿ ಜಾಲಿ. ತಾಚ್ಯಾಯ್ ವೊಂಟಾಂನಿ ತಸಲ್ಯೊಚ್ ಮಂದ್ ಹಾಸೊ ಉದೆಲ್ಯೊ.
"ಮ್ಹಾಕಾ....?"
"ಹಾಂ! ತುಕಾಚ್ಚ್! ಮ್ಹಾಕಾ ದುಸ್ರೆಂ ಕೋಣ್ ಆಸಾ ಡಾರ್ಲಿಂಗ್?"
"ತುಕಾ ಹಾಂವ್ ಆಸಾಂ! ಮ್ಹಾಕಾ ತುಂ ಆಸಾಯ್! ಇತ್ಲೆಂ ಆಮ್ಕಾಂ ಪಾವಾನಾ.....?"
"ಡಾರ್ಲಿಂಗ್....!" ರಾಯನಾಕ್ ಆತಾಂ ರಾವೊಂಕ್ ಸಾದ್ಯ್ ಜಾಲೆಂ ನಾ. ತಾಣೆಂ ತಶೆಂಚ್ ಬಾಗೊನ್ ಮಿಶೇಲಾಚಾ ವೊಂಟಾಂಕ್ ಆಪ್ಲೆ ವೋಂಟ್ ದಾಂಬ್ಲೆ. ತ್ಯಾ ತಾಚ್ಯಾ ಕಾಳ್ಜಾಕ್ಯ್ ಜಲ್ಮಾ ಜಲ್ಮಾಚಿ ತಾನ್ ಲಾಗ್ಲ್ಲಿ ಮ್ಹಳ್ಳ್ಯಾ ಪರಿಂ ತಾಣಿಂ ಮಿಶೇಲಾಚಾ ವೊಂಟಾಂಕ್ ಆಪ್ಲ್ಯಾ ವೆಂಗೆಂತ್ ಘೆತ್ಲೆಂ.
ತಿತ್ಲೆಂಚ್!
ಹ್ಯಾ ಉಪ್ರಾಂತ್ಲೊ ತಾಂಚೊ ಸಂಸಾರ್ಚ್ ವೆಗ್ಳೊ.
ಆಪ್ಲ್ಯಾ ಫಾರ್ಮ್ಹೌಸಾಂತ್ ಆಪ್ಣೆ ಪಳೆಲ್ಲ್ಯಾ ತ್ಯಾ ಮಿಶೇಲಾಚಾ ಸಂಸಾರಾಂತ್ ರಾಯನ್ ಖಿಣಾ ಭಿತರ್ ಉಪ್ಯೆವ್ನ್ ಗೆಲೊ. ಆಪುಣ್ ಖಂಯ್ ಆಸಾಂ ಮ್ಹಳ್ಳೆಂಚ್ ತಾಕಾ ಕಳ್ಳೆಂ ನಾ. ಮಿಶೇಲಾಚೊ ಸಂಸಾರ್ಯ್ ತಿತ್ಲೊಚ್ ಸೊಭಿತ್ ಆಸ್ಲ್ಲೊ. ಥೊಡೊಚ್ ವೇಳ್....!
"ರಾ..... ರಾ....ಯನ್...!" ಮಿಶೇಲಾನ್ ಆಪ್ಲ್ಯಾ ಘೊವಾಕ್ ಆಪ್ಣಾ ಥಾವ್ನ್ ಪಾಟಿಂ ಲೊಟ್ಲೆಂ.
ಆತಾಂ ಮಿಶೇಲಾಕ್ ಸೊಡುನ್ ಹೆವ್ಶಿಂ ಆಯಿಲ್ಲ್ಯಾ ರಾಯನಾನ್ ಆಪ್ಲೆಂ ಕಬಾಟ್ ಉಗ್ತೆಂ ಕೆಲೆಂ.
ಮಿಶೇಲ್ ರಾಯನಾಕ್ಚ್ ಪಳೆತಾಲೆಂ.
ಆಪ್ಲ್ಯಾ ಕಬಟಾಂತ್ ದವರ್ಲ್ಲೆಂ ಏಕ್ ಫೈಲ್ ಕಾಡುನ್ ತೆಂ ಘೆವ್ನ್ ತೊ ಮಿಶೇಲಾ ಲಾಗಿಂ ಆಯ್ಲೊ.
ಮಿಶೇಲಾಕ್ ರಾಯನಾಚೆಂ ವರ್ತನ್ ಕಾಂಯ್ ಸಮ್ಜಾಲೆಂ ನಾ. ಘೊವಾಚ್ಯಾ ಹಾತಾಂತ್ಲೆಂ ಫೈಲ್ ಪಳವ್ನ್ ತೆಂ ತ್ಯಾ ಫೈಲಾಕ್ ಏಕ್ ಪಾವ್ಟಿಂ ಆಪ್ಲ್ಯಾ ಘೊವಾಕ್ ಏಕ್ ಪಾವ್ಟಿಂ ಪಳಂವ್ಕ್ ಲಾಗ್ಲೆಂ.
"ಮಿಶೇಲ್!" ರಾಯನ್ ಉಲಯ್ಲೊ. "ಹಾಂವ್ ಜಾಣಾಂ. ತುಜ್ಯಾ ಆಬಾನ್ ವರ್ತ್ಯಾ ಮೊಗಾನ್ ಕೆಲ್ಲಿ ಆಸ್ತ್, ಸಾಂಬಾಳುಂಕ್ ಕೊಣ್ಯ್ ನಾಂತ್ ಮ್ಹಳ್ಳ್ಯಾ ಕಾರಾಣಾಕ್ ಲಾಗೊನ್ ತುಜ್ಯಾ ಆಜ್ಯಾನ್ ತಿ ವಿಕ್ಲ್ಲಿ. ತ್ಯಾಚ್ ತುಜ್ಯಾ ಆಬಾಚ್ಯಾ ಆಸ್ತೆಕ್ ಆಜ್ ಹಾಂವ್ ಪರ್ತ್ಯಾಕ್ ತುಜ್ಯಾ ಹಾತಾಕ್ ಪಾವಯ್ತಾಂ! ಆಜ್ ಥಾವ್ನ್ ಹಿ ತುಜಿ. ಹ್ಯಾ ಆಸ್ತೆ ವಯ್ರ್ ತುಜ್ಯಾ ಮಾಂಯ್ಚಿಂ ಸಪ್ಣಾಂ ಹಾವೆಂ, ಹಾಂವ್ ತುಮ್ಚ್ಯಾ ಘರಾ ಆಸ್ತನಾ ತ್ಯಾ ಡೈನಿಂಗ್ ಟೇಬಲಾರ್ ಪಳೆಲ್ಲಿಂ. ಹ್ಯಾ ಸಪ್ಣಾಂಕ್ ಆಜ್ ಹಾಂವ್ ತುಜ್ಯಾ ಹಾತಾಕ್ ಸಮರ್ಪಿತಾಂ. ಬೋವ್ಶ್ಯಾ ತುಜ್ಯಾ ಆಬಾಕ್ ಆನಿ ಮಾಂಯ್ಕ್ ಹ್ಯಾ ತಾಂಚಾ ಪ್ರಾಯೆರ್ ಮತಿಕ್ ಶಾಂತಿ ಆನಿ ಸಮಾಧಾನ್ ಜಾತೆಲೆಂ!" ರಾಯನಾನ್ ಆಪ್ಣಾ ಮುಕಾರ್ ರೂಕ್ ಜಾವ್ನ್ ರಾವ್ಲ್ಲ್ಯಾ ಮಿಶೇಲಾಚಾ ಹಾತಾಂಕ್ ಧರುನ್ ಉಕ್ಲುನ್, ಆಪ್ಲ್ಯಾ ಹಾತಾಂತ್ಲ್ಯಾ ಫೈಲಾಕ್ ತ್ಯಾ ತಾಚ್ಯಾ ಹಾತಾಂಚೆರ್ ದವರ್ಲೆಂ.
ಮಿಶೇಲಾಕ್ ರಾಯನಾಚಾ ಉತ್ರಾಂನಿ ಅಚಾನಕ್ ಧಖೊ ದಿಲ್ಲೊ. ಮಿಶೇಲಾನ್ ಚಿಂತುಂಕ್ ನಾತ್ಲ್ಲೆಂ ರಾಯನಾನ್ ಕೆಲ್ಲೆಂ. ರಾಯನಾ ಮುಕಾರ್ ಮಿಶೇಲ್ ಜೀವ್ ನಾತ್ಲ್ಲ್ಯಾ ಪರಿಂ ಉಭೆಂ ಜಾವ್ನ್ ಆಪ್ಲ್ಯಾ ಘೊವಾಕ್ಚ್ ಪಳೆತಾಲೆಂ. ಹ್ಯಾ ಖಿಣಾಂನಿ ತೆಂ ಸಂಸಾರಾಕ್ಚ್ ವಿಸ್ರಾಲೆಂ.
"ತುಕಾ ಹ್ಯಾ ಸೃಶ್ತೆ ವಯ್ರ್..... ಹ್ಯಾ ಪೃಥ್ವೆ ವಯ್ರ್ ಮಸ್ತ್ ಮೋಗ್ ಡಾರ್ಲಿಂಗ್! ಹಿಯ್ ಏಕ್ ಲ್ಹಾನ್ ಸೃಶ್ಟಿ! ತುಜ್ಯಾ ಆಬಾನ್ ರಚ್ಲ್ಲಿ! ಹ್ಯಾ ಸೃಶ್ಟೆಕ್ ಹಾವೆಂ ಫಕತ್ತ್ ವಾಗಯ್ಲಾಂ ಮಾತ್ರ್! ಹಿ ಸೃಷ್ಟಿಯ್ ತುಜ್ಯೆ ಪರಿಂಚ್ ಮಸ್ತ್ ಸೊಭಿತ್! ಶಾಂತ್! ನಿತಳ್! ಮೌನ್!"
"ಮಿಶೇಲಾಚಾ ಹಾತಾಂತ್ ತ್ಯಾ ಚಿಕ್ಮಂಗ್ಳುರ್ಚ್ಯಾ ಎಸ್ಟೇಟಿಚ್ಯಾ ಮ್ಹಾಲಕ್ಪಣಾಚೆಂ ಫೈಲ್ ದವರಿತ್ತ್ ರಾಯನ್ ಉಲಯ್ಲೊ.
ರಾಯನಾಕ್ಚ್ ಪಳಂವ್ಚ್ಯಾ ಮಿಶೇಲಾನ್ ಆಪ್ಲ್ಯಾ ಘೊವಾಚ್ಯಾ ದೊಳ್ಯಾಂನಿ ಸಂತೊಸಾಚಿಂ ದುಖಾಂ ಪಳೆಲಿ.
ತಿತ್ಲೆಂಚ್!
ಮಿಶೇಲಾಕ್ ಆತಾಂ ತಡ್ವುಂಕ್ ಜಾಲೆಂ ನಾ.
ತಾಣೆ ರಾಯನಾಕ್ ತಶೆಂಚ್ ಆಪ್ಣಾ ತೆವ್ಶಿಂ ವೊಡುನ್ ತಾಕಾ ವೆಂಗುನ್ ಧರ್ಲೆಂ.
"ಐ ಲವ್ ಯು ರಾಯನ್!" ಮಿಶೇಲ್ ಉದ್ಗಾರ್ಲೆಂ.
**************
ವೆಸ್ಟ್ ಲೈನ್ ಏರ್ವೇಸ್ ಆಫೀಸ್!
ಹರ್ಶೆಂಚಾ ಪರಿಂಚ್ ಆಜ್ಯ್ ಅಸಿಸ್ಟಂಟ್ ಮ್ಯಾನೇಜರ್ ಮನೋಜ್ ಕುಮಾರ್ ಆಪ್ಲ್ಯಾ ಆಫೀಸಾಕ್ ಆಯಿಲ್ಲೊ ಜಾಲ್ಯಾರ್ಯ್ ಆಜ್ ತಾಚ್ಯಾ ನಡ್ತ್ಯಾಂತ್ ಆನಿ ಉಲವ್ಣ್ಯಾಂತ್ ಮಸ್ತ್ ಬದ್ಲಾವಣ್ ಆಸ್ಲ್ಲಿ. ತೊ ಆಜ್ ಮಸ್ತ್ ಆತುರಾಯೆರ್ ಆಸ್ಲ್ಲ್ಯಾ ಪರಿಂ ದಿಸ್ತಾಲೊ.
ಮನ್ಶ್ಯಾ ಮತಿಚ್ಯಾ ಪಡ್ದ್ಯಾರ್ ಭಿರಾಂತೆಚೆಂ ಏಕ್ ಕಿಟಾಳ್ ಪೆಟಾತ್ ಜಾಲ್ಯಾರ್ಯ್ ತ್ಯಾ ಕಿಟಾಳಾ ಥಾವ್ನ್ ಪೆಟೊಂಕ್ ಆಸ್ಚ್ಯಾ ಉಜ್ಯಾಚೊ ಪ್ರಭಾವ್ ತೊ ಉಜೊ ಪೆಟ್ಚ್ಯಾ ಆದಿಂಚ್ಚ್ ತ್ಯಾ ಮನ್ಶ್ಯಾಚಾ ಚಾಲ್ಚಮ್ಕಾಣೆಂತ್ ದಿಶ್ಟಿಕ್ ಪಡ್ತಾ. ಜಶೆಂ ಆಜ್......!
ಆಪ್ಲ್ಯಾ ಕ್ಯಾಬಿನಾಕ್ ಆಯಿಲ್ಲ್ಯಾ ಮನೋಜ್ ಕುಮಾರಾನ್ ಕಸಲ್ಯಾಗೀ ಉದ್ವೇಗಾನ್ ಮ್ಹಳ್ಳ್ಯಾಪರಿಂ ಆಪ್ಲ್ಯಾ ಮೆಜಾ ವಯ್ಲ್ಯಾ ಕಂಪ್ಯೂಟರಾಂತ್ ಸೊಧ್ನಾಂ ಆರಂಭ್ ಕೆಲಿಂ.
ಆಪ್ಲ್ಯಾ ದಿಶ್ಟಿಕ್ ಆಪ್ಣಾ ಮುಕ್ಲ್ಯಾ ಮೊನಿಟರಾ ವಯ್ರ್ಚ್ ಕೇಂದ್ರೀಕೃತ್ ಕರುನ್ ಮನೋಜ್ ಸೊಧ್ತಾಲೊ. ತಾಕಾ ಆಜ್ ತಾಚ್ಯಾ ಭಾಯ್ಲ್ಯಾ ಸಂಸಾರಾಚಿ ವಿಸರ್ ಪಡ್ಲ್ಲಿ.
ತಿತ್ಲ್ಯಾರ್!
ಮನೋಜ್ ಕುಮಾರಾಚೆಂ ದೊಳೆ ಪರ್ಜಳ್ಳೆ. ತಾಣೆಂ ಆಶೆಲ್ಲೆಂ ತಾಕಾ ಲಾಭ್ಲ್ಲಿ ತೃಪ್ತಿ ತಾಚ್ಯಾ ಮುಖಮಳಾರ್ ಸ್ಪಶ್ಟ್ ದಿಸೊಂಕ್ ಲಾಗ್ಲಿ. ಪುಣ್ ತಾಚ್ಯಾ ದೊಳ್ಯಾಂನಿ ಹ್ಯಾ ತೃಪ್ತೆಚಿಂ ಖುಣಾಂ ಜಾವ್ನ್ ಸಂತೊಸ್ ಉಮಾಳುನ್ ಆಯ್ಲೊ ನಾ. ತಾಚ್ಯಾ ಬದ್ಲಾಕ್ ತ್ಯಾ ದೊಳಾಂನಿ ಆತುರಾಯ್ ಚಡ್ ಜಾಲಿ.
ಮನೋಜ್ ಕುಮಾರ್ ತಾಚ್ಯಾ ಕಂಪ್ಯೂಟರಾಂತ್ ಏರ್ವೇಸಾಚ್ಯಾ ಪ್ಲೈಟ್ ಕ್ರೂ ಮೆಂಬರಾಂಚೆಂ ಫೈಲ್ ತೊ ಸೊಧ್ತಾಲೊ.
ಆಪ್ಣಾಕ್ ಮೆಳ್ಲ್ಲೆಂ ಫೈಲ್ ಓಪನ್ ಕರುನ್ ತ್ಯಾ ಫೈಲಾರ್ ತಾಣೆಂ ನದರ್ ಮಾರ್ಲಿ. ತಾಚ್ಯಾ ನದ್ರೆ ಸವೆಂ ತಾಚ್ಯಾ ಹಾತಾಂತ್ ಆಸ್ಲ್ಲೊ ಕಂಪ್ಯೂಟರಾಚೊ ಕರ್ಸರ್ಯ್ ಧಾಂವ್ತಾಲೊ.
೨೨ಟಿಜ, ೨೩ಡಿಜ, ೨೪ಣh.....! ವ್ಹಯ್! ೨೪ಣh ವ್ಯಾ ತಾರಿಕೆರ್ ತಾಣೆಂ ಸೊಧ್ಲೆಂ.
"ಪರಿಮೀತಾ... ಪರಿಮೀತಾ... ಪರಿಮೀತಾ..." ತಾಚ್ಯಾ ಸೊಧ್ನಾಂ ಸವೆಂ ತಾಚ್ಯಾ ಜಿಬೆರ್ ಆತಾಂ ವ್ಹಳೂ ಏಕ್ ನಾಂವ್ ಉಟೊನ್ ಆಯ್ಲೆಂ.
ತೊ ಸೊಧ್ತಾಲೊ!
ತಿತ್ಲ್ಯಾರ್!
"ಎಸ್!"
ಮೊನಿಟರಾ ವಯ್ರ್ ಪರಿಮೀತಾಚೆಂ ನಾಂವ್ ಪಳೆವ್ನ್ ಮನೋಜಾಚಿ ಮತಿನ್ ಉದ್ಗಾರ್ ಸೊಡ್ಲೊ.
ತಿತ್ಲೆಂಚ್!
ಸವ್ಕಾಸ್ ತ್ಯಾ ಟೇಬಲಾ ವಯ್ಲ್ಯಾ ಆಪ್ಲ್ಯಾ ಹಾತಾ ಪಂದಾ ಆಪ್ಣಾಚೊ ಹಿಶಾರೊ ಗೆಲ್ಲ್ಯಾ ಕುಶಿಂನ್ ಧಾಂವ್ಚ್ಯಾ ತ್ಯಾ ಕಂಪ್ಯೂಟರಾಚಾ ಮೌಸಾಕ್ ಸೊಡುನ್ ಮನೋಜ್ ಕುಮಾರ್ ತಸೊಚ್ ಆಪ್ಲ್ಯಾ ರಿವಾಲ್ವಿಂಗ್ ಚೇರಾಕ್ ವೊಣ್ಕಾಲೊ.
ಮೊನಿಟರಾ ವಯ್ರ್ ಖಂಚ್ಲ್ಲ್ಯಾ ತಾಚ್ಯಾ ದೊಳ್ಯಾಂಕ್ ಪಯ್ಸ್ ಥಾವ್ನ್ ಸಾರ್ಕೆಂ ದಿಸ್ತಾಲೆಂ.
"ಪರಿಮೀತಾ ಡಿಸ್ಮಿಸ್ಡ್ ಫಾರ್ ಹರ್ ರೂಡ್ ಬಿಹೇವಿಯರ್!"
ಮನೋಜ್ ಕುಮಾರಾನ್ ಪರ್ತ್ಯಾಕ್ ಪರ್ತ್ಯಾಕ್ ತೊ ರಿಪೋರ್ಟ್ ವಾಚ್ಲೊ.
"ಮೈ ಗಾಡ್!" ಮನೋಜಾನ್ ಆಪ್ಲಿ ಗೊಮ್ಟಿ ಹೆವ್ಶಿಂ ಘುಂವ್ಡಾವ್ನ್ ಪಳೆಲೆಂ.
ಆತಾಂ ತಾಚ್ಯಾ ದೊಳ್ಯಾಂನಿ ಭಿರಾಂತ್ ಉಟೊನ್ ರಾವ್ಲಿ.
"ತರ್.....?" ಆಪ್ಣಾಕ್ಚ್ ತಾಣೆಂ ಸವಾಲ್ ಕೆಲೆಂ.
ಹ್ಯಾ ಮುಕಾರ್ ಆಪ್ಣಾ ಸವೆಂ ಕಿತೆಂ ಜಾತೆಲೆಂ ಮ್ಹಳ್ಳೆಂ ತೆಂ ಸಗ್ಳೆಂ ಮನೋಜ್ ಕುಮಾರಾಚಾ ದೊಳ್ಯಾಂ ಫುಡೆಂ ತ್ಯಾ ಚಲನ್ಚಿತ್ರಾ ಪರಿಂ ದಿಸೊಂಕ್ ಲಾಗ್ಲೆಂ.
"ಆಪುಣ್ ಫಸ್ಲೊಂ!" ಎದೊಳ್ಚ್ಯಾ ಆಪ್ಲ್ಯಾ ದುಬಾವಾಕ್ ತಾಣೆಂ ದ್ರಡ್ ಕೆಲೊ.
"ಆಪ್ಣಾ ಥಾವ್ನ್ ಇತ್ಲಿ ವ್ಹಡ್ಲಿ ಚೂಕ್ ಕಶಿ ಜಾಲಿ?" ಮನೋಜಾಕ್ ಕಾಂಯ್ಚ್ ಸಮ್ಜಾಲೆಂ ನಾ.
ತಿತ್ಲ್ಯಾರ್!
ಮನೋಜ್ ಕುಮಾರಾಚ್ಯಾ ಮೆಜಾ ವಯ್ಲೆಂ ಟೆಲಿಪೋನ್ ವ್ಹಾಜೊಂಕ್ ಲಾಗ್ಲೆಂ. ತೊ ಖಂಡಿತ್ ಜಾಣಾಂ ಹೆಂ ಪೋನ್ ಖಂಯ್ ಥಾವ್ನ್ ಮ್ಹಳ್ಳೆಂ ತೆಂ!
"ಹಲೋ.....?" ಮನೋಜಾನ್ ಪೋನ್ ಕಾಡ್ಲೆಂ.
"ಮಿಸ್ಟರ್ ಮನೋಜ್ ಕುಮಾರ್....?" ಮ್ಯಾನೇಜಿಂಗ್ ಡೈರೆಕ್ಟರಾಚೊ ತಾಳೊ.
"ಎಸ್ ಸಾರ್!" ಮನೋಜ್ ವ್ಹಳೂ ಪಿಂರ್ಗಾಲೊ.
"ಕಮ್ ಟು ಮೈ ಆಫೀಸ್.....! ಇಮ್ಮೀಡಿಯಟ್ಲಿ!" ಡೈರೆಕ್ಟರಾಚಾ ತಾಳ್ಯಾಂತ್ ಆರ್ಡರ್ ಆಸ್ಲ್ಲೆಂ.
"ಎಸ್ ಸರ್!"
"ಆನಿ ಆಪ್ಣೆಂ ಕಾಂಯ್ ಕೆಲ್ಲ್ಯಾ ಪರಿಂ ನಾ!" ಮನಾಂತ್ಚ್ ಉಲಯಿಲ್ಲೊ ಮನೋಜ್, ಮ್ಯಾನೇಜಿಂಗ್ ಡೈರೆಕ್ಟರಾಚಾ ಆಫೀಸಾ ತೆವ್ಶಿಂ ಚಮ್ಕಾಲೊ.
ಥೊಡ್ಯಾ ವೆಳಾನ್ ಮನೋಜ್ ಕುಮಾರ್ ಮ್ಯಾನೇಜಿಂಗ್ ಡೈರೆಕ್ಟರಾಚಾ ಆಫೀಸಾ ಮುಕಾರ್ ಉಭೊ ಜಾಲ್ಲೊ.
"ಮೇ ಐ ಕಮಿನ್ ಸರ್?"
"ಕಮಿನ್!"
"ಹ್ಯಾವ್ ಎ ಸೀಟ್ ಮಿಸ್ಟರ್ ಮನೋಜ್!" ಮ್ಯಾನೇಜಿಂಗ್ ಡೈರೆಕ್ಟರ್ ಆಪ್ಲ್ಯಾ ಲೆದರ್ ಕುಶನ್ ಚೇರಾಕ್ ವೊಣ್ಕಾಲೊ.
ಡೈರೆಕ್ಟರಾಚಾ ಭರ್ತಾವಾಕ್ ಪಳವ್ನ್ ತ್ಯಾ ಥಂಡ್ ಏರ್ಕಂಡೀಶನಾಚ್ಯಾ ಹವ್ಯಾಂತ್ಯ್ ಮನೋಜಾಚೆಂ ಆಂಗ್ ಉಭೆಂವ್ಕ್ ಲಾಗ್ಲೆಂ.
"ಇಸ್ ಇಟ್ ಟ್ರೂ ಮಿಸ್ಟರ್ ಮನೋಜ್?" ಡೈರಕ್ಟರಾನ್ ಮನೋಜಾಕ್ಚ್ ಪಳೆಲೆಂ.
"ನೋ ಸರ್!" ಮನೋಜ್ ಭಿಯೆಲ್ಲೊ ಜಾಲ್ಯಾರ್ಯ್ ತೊ ಸತ್ ಉಚಾರುಂಕ್ ಕಾವ್ಜೆಲೊ ನಾ.
"ಪಳೆ ಮಿಸ್ಟರ್ ಮನೋಜ್....! ಡೋಂಟ್ ಬಿ ಎ ಲೈಯರ್!"
"ನೋ ಸರ್.....! ಹಾಂವ್ ಸತ್ತ್ ಸಾಂಗ್ತಾಂ!" ಮನೋಜಾನ್ ಡೈರೆಕ್ಟರಾ ಮುಖಾರ್ ಆಪ್ಲ್ಯಾ ಸಿಂತಿಮೆಂತಾಕ್ ಆಪ್ಲ್ಯಾ ತೊಂಡಾರ್ ಹಾಡ್ಚೆಂ ಪ್ರಯತ್ನ್ ಕೆಲೆಂ.
"ತರ್ ಪರಿಮೀತಾ.....?" ವಿಚಾರ್ಲ್ಲೊ ಮ್ಯಾನೇಜಿಂಗ್ ಡೈರೆಕ್ಟರ್ ಆಪ್ಲ್ಯಾ ಬಸ್ಕೆರ್ ಮುಕಾರ್ ಬಾಗ್ವಾಲ್ಲೊ "ತುವೆಂ ತಾಕಾ ಕಶೆಂ ಆಪಾಂಯ್ಟ್ಮೆಂಟ್ ಆರ್ಡರ್ ದಿಲೆಂಯ್?" ಮ್ಯಾನೇಜಿಂಗ್ ಡೈರೆಕ್ಟರ್ ತಾಕಾಚ್ ಪಳೆತಾಲೊ.
ಮನೋಜ್ ಕುಮಾರಾಲಾಗಿಂ ಕಾಂಯ್ ಜವಾಬ್ ನಾತ್ಲ್ಲಿ.
"ತುಂ ನೆಣಾಂ ಆಸ್ಲ್ಲೊಯ್ ತಾಕಾ ಆಮ್ಚ್ಯಾ ಏರ್ವೇಸಾ ಥಾವ್ನ್ ಟರ್ಮಿನೇಟ್ ಕೆಲ್ಲೆಂ ತೆಂ....?"
"........" ಮನೋಜ್ ಮೌನ್ ಆಸ್ಲ್ಲೊ.
"ತುವೆಂ ತಾಕಾ ಕಶೆಂ ಆಮ್ಚ್ಯಾ ಆರ್ಗನೈಸೇಶನಾಕ್ ಆಪಾಂಯ್ಟ್ ಕೆಲೆಂಯ್? ಸಾಂಗ್ ಮಿಸ್ಟರ್ ಮನೋಜ್....? ಪರಿಮೀತಾಚೆ ಆದ್ಲೆ ಇನ್ಫೊರ್ಮೇಶನ್ ತುಜ್ಯೆ ಲಾಗಿಂ ನಾತ್ಲ್ಲೆ....?"
"ಆಸ್ಲ್ಲೆ ಸರ್!"
"ತುವೆಂ ಪರಿಮೀತಾ ಥಾವ್ನ್ ಕಿತ್ಲೆ ಪಯ್ಶೆ ಘೆತ್ಲ್ಯಾಯ್ ......?"
"ನಾ ಸರ್! ಹಾಂವ್ ಸತ್ತ್ ಸಾಂಗ್ತಾಂ. ಹಾವೆಂ ತಾಚ್ಯೆ ಥಾವ್ನ್ ಪಯ್ಶೆ ಘೆಂವ್ಕ್ ನಾಂತ್!" ಮನೋಜ್ ಬಡ್ಬಡ್ಲೊ.
"ತರ್ ಸಾಂಗ್ ಮಿಸ್ಟರ್ ಮನೋಜ್! ತುವೆಂ ಪರಿಮೀತಾಕ್ ರೆಕಮಂಡ್ ಕರುಂಕ್ ನಾಂಯ್?"
"ಹಾವೆಂಚ್ ಕೆಲ್ಲೆಂ ಸರ್!"
"ತುಂ ತಾಕಾ ವಳ್ಕಾತಾಯ್.....?"
"ನಾ ಸರ್!"
"ತರ್ ತುವೆಂ ತಾಕಾ ಕಶೆಂ ರೆಕಮಂಡ್ ಕೆಲೆಂಯ್? ತೆಂಯ್ ತಾಚ್ಯಾ ವಿಶಿಂ ಕಾಂಯ್ಚ್ ನೆಣಾಂ ಆಸ್ತಾನಾ? ಹೆಂ ಕಶೆಂ ಸಾದ್ಯ್....?" ಮ್ಯಾನೇಜಿಂಗ್ ಡೈರೆಕ್ಟರಾನ್ ಆಪ್ಣಾಚಾ ಮುಕ್ಲ್ಯಾ ಮೆಜಾ ವಯ್ಲ್ಯಾ ಪೆನ್ನಾಕ್ ಆಪ್ಲ್ಯಾ ಹಾತಿಂ ಘೆತ್ಲೆಂ. ತೊ ಆತಾಂ ತ್ಯಾ ಪೆನ್ನಾಕ್ ತಶೆಂಚ್ ಆಪ್ಲ್ಯಾ ಬೊಟಾಂ ಮಧೆಂ ಘುಂವ್ಡಾಂವ್ಕ್ ಲಾಗ್ಲೊ.
ಡೈರೆಕ್ಟರಾಚಾ ಸವಾಲಾಂಕ್ ಕಿತೆಂ ಜವಾಬ್ ದಿತಲೊ ಮನೋಜ್? ಆಪ್ಣೆ ಪರಿಮೀತಾಕ್ ಇನ್ಪ್ಲುಯೆನ್ಸ್ ಕೆಲ್ಲ್ಯಾ ವಿಶಿಂ ಸಾಂಗ್ತಲೊ? ಯಾ ಆಪ್ಣಾಕ್ ವಿಶು ಕುಮಾರಾನ್ ಪೋನ್ ಕರುನ್ ಪರಿಮೀತಾಕ್ ಕಾಮಾಕ್ ದವರುಂಕ್ ರೆಕಮಂಡ್ ಕೆಲ್ಲೆಂ ಮ್ಹಣೊನ್ ಸಾಂಗ್ತಲೊ? ತಾಚ್ಯೆ ಲಾಗಿಂ ಜವಾಬ್ ಆಸ್ಲ್ಲಿ ಜಾಲ್ಯಾರ್ಯ್ ತ್ಯಾ ಜವಾಬೆಕ್ ಹ್ಯಾ ವಗ್ತಾರ್ ಡೈರೆಕ್ಟರಾಚಾ ಮುಕಾರ್ ದವರುಂಕ್ ತಾಕಾ ಸಾದ್ಯ್ ನಾತ್ಲ್ಲೆಂ.
"ಹಾಂವ್ ಮ್ಹಜೊ ಫಾಲ್ಟ್ ಎಕ್ಸೆಪ್ಟ್ ಕರ್ತಾಂ ಸರ್! ಬಟ್.....! ಹಾಂವ್ ಇನ್ನೊಸೆಂಟ್. ಹಾಂವ್ ಸತ್ತ್ ಸಾಂಗ್ತಾಂ ಸರ್ ಹಾವೆಂ ಪರಿಮೀತಾ ಲಾಗ್ಚೆ ಪಯ್ಶೆ ಘೆಂವ್ಕ್ ನಾಂತ್!" ಮನೋಜಾನ್ ಆಪ್ಣಾಚಿ ಚೂಕ್ ವಳ್ಕಾಲಿ ಜಾಲ್ಯಾರ್ಯ್ ಆಪ್ಣಾಚೆರ್ ಮಾಂಡ್ಲ್ಲ್ಯಾ ಆಪ್ರಾಧಾಕ್ ತಾಣೆ ವಳ್ಕೊನ್ ಘೆತ್ಲೆಂ ನಾ.
"ದಿಸ್ ಇಸ್ ಅನ್ಬಿಲೀವೇಬಲ್!" ಉದ್ಗಾರ್ಲ್ಲೊ ಡೈರೆಕ್ಟರ್, "ಆತಾಂ ಹಾಂಗಾ ಸತ್ ಕೋಣ್ ಉಲಯ್ತಾ ಮಿಸ್ಟರ್ ಮನೋಜ್...? ತುವೆಂ ಕಿತೆಂ ಕೆಲಾಂಯ್ ತೆಂ ಸಗ್ಳ್ಯಾ ಸ್ಟಾಫಾಕ್ ಖಬಾರ್ ಆಸಾ. ತ್ಯಾ ವಯ್ರ್.... ಹೆಂ ಆಲಿಯಾ ಮ್ಹಳ್ಯಾರ್ ಕೋಣ್.....?" ಡೈರೆಕ್ಟರಾನ್ ವಿಚಾರ್ಲೆಂ.
"ಆಲಿಯಾ.....? ತೆಂ ಆಮ್ಚೆಂ ಎಕ್ಸ್ ಸ್ಟಾಫ್ ಮೆಂಬರ್ ಸರ್!"
"ಸೀ ದಿಸ್....!" ಡೈರೆಕ್ಟರಾನ್ ಆಪ್ಲ್ಯಾ ಮುಕ್ಲೆಂ ಏಕ್ ಪೇಪರ್ ಕಾಡುನ್ ಮನೋಜ್ ಕುಮಾರಾಕ್ ದಾಖಯ್ಲೆಂ. "ಹಾಣೆಂ ಹೆಂ ಪಿಟಿಶನ್ ಫೈಲ್ ಕೆಲಾಂ! ತುಜ್ಯಾ ವಿಶಿಂ! ಆಮ್ಚ್ಯಾ ಆರ್ಗನೈಸೇಶನಾನ್ ತಾಕಾ ಟರ್ಮಿನೇಟ್ ಕೆಲ್ಲೆಂ...? ತೆಂಯ್ ತಾಚೊ ಫಾಲ್ಟ್ ನಾಸ್ತಾನಾ.....? ಹ್ಯಾ ವಿಶಯಾಂತ್ ತುವೆಂ ಜನರಲ್ ಮ್ಯಾನೇಜರಾಕ್ ಇನ್ಫೋರ್ಮ್ ಕಿತ್ಯಾಕ್ ಕರುಂಕ್ ನಾಂಯ್....? ಹೆಂ ಆಮ್ಚ್ಯಾ ಆರ್ಗನೈಸೇಶನಾಂತ್ ಕಿತೆಂ ಸಲ್ತಾ ಮಿಸ್ಟರ್ ಮನೋಜ್?" ಡೈರೆಕ್ಟರ್ ಪಿಸಾಂತುರ್ ಜಾಲ್ಲ್ಯಾ ಭಾಶೆನ್ ಉಲಯ್ಲೊ.
"ಐ ಯಾಮ್ ಸಾರ್ರಿ ಸಾರ್! ಇಟ್ ವಾಜ಼್ ಮೈ ಮಿಸ್ಟೇಕ್!"
"ಸೋ....! ಯು ಆರ್ ಎಕ್ಸೆಪ್ಟಿಂಗ್ ಯುವರ್ ಫಾಲ್ಟ್?"
"ಹ್ಯಾ ಉಪ್ರಾಂತ್ ಆಶೆಂ ಜಾಂವ್ಚೆಂ ನಾ ಸರ್!"
"ಐ ಹ್ಯಾವ್ ಕ್ಯಾನ್ಸಲ್ಡ್ ಪರಿಮೀತಾಸ್ ಅಪಾಂಯ್ಟ್ಮೆಂಟ್ ಆರ್ಡರ್! ನೌ....., ಯು ಪ್ಲೀಸ್ ಗೋ ಎಂಡ್ ಸೆಂಡ್ ಮಿ ಯುವರ್ ರಿಸಿಗ್ನೇಶನ್ ಲೆಟರ್!" ಡೈರೆಕ್ಟರಾನ್ ಆರ್ಡರ್ ಕೆಲೆಂ.
"ಸರ್! ಪ್ಲೀಸ್ ಬಿಲೀವ್ ಮಿ ಸರ್! ಹಾಂತುಂ ಮ್ಹಜಿ ಕಾಂಯ್ ಚೂಕ್ ನಾ. ಹೆಂ ಮ್ಹಾಕಾ ಮ್ಹಜ್ಯಾ ಕಾಮಾ ಥಾವ್ನ್ ಕಾಡುಂಕ್ ತ್ಯಾ ಆಲಿಯಾನ್ ವಿಣ್ಲ್ಲೆಂ ಜಾಳ್! ಸರ್... ಪ್ಲೀಸ್ ಸರ್!" ಮನೋಜಾಚೊ ತಾಳೊ ಗದ್ಗದೀತ್ ಜಾಲೊ.
"ಜರ್ ತರ್ ತುಂ ನಿರಫ್ರಾಧಿ ಜಾಲ್ಯಾರ್ ತುಂ ಕೊಣಾಕ್ ಆಫ್ರಾಧಿ ಕರ್ತಾಯ್....?"
ತೊ ಆತಾಂ ಮ್ಯಾನೇಜಿಂಗ್ ಡೈರೆಕ್ಟರಾಚಾ ಸಾವಾಲಾಕ್ ಕಿತೆಂ ಜಾಪ್ ದಿತಲೊ? ಆಲಿಯಾಕ್ ಆಪ್ಣೆಂ ವಿಶು ಕುಮಾರಾಚಾ ಎಕಾಚ್ ಎಕಾ ದಸ್ಕತೆಚ್ಯಾ ಆಧಾರಾನ್ ಏರ್ವೇಸಾ ಥಾವ್ನ್ ಟರ್ಮಿನೇಟ್ ಕೆಲ್ಲೆಂ? ತೆಂಯ್ ತಾಚಿ ಕಾಂಯ್ಚ್ ಚೂಕ್ ನಾಸ್ತಾನಾ.....! ಆತಾಂ ಹೆಂಚ್ ಆಲಿಯಾ ಆಪ್ಣಾ ವಯ್ರ್ ಫಾರಿಕ್ಪಣ್ ಘೆಂವ್ಕ್ ತ್ಯಾಚ್ ಆಪ್ಣೆಂ ತಾಚ್ಯಾ ಸಾಂಗಾತಾ ಖೆಳ್ಲ್ಲ್ಯಾ ಖೆಳಾಕ್ಚ್ ಆಧಾರ್ ಘೆವ್ನ್ ಉಲ್ಟೊ ಖೆಳ್ ಖೆಳ್ತಾ? ತೊ ಕಿತೆಂ ಸಾಂಗ್ತಲೊ?
ತ್ಯಾ ದೀಸ್ ಆಪ್ಣಾಚ್ಯಾ ಆಫೀಸಾಂತ್ ಹೊಚ್ಚ್ ಖೆಳ್ ಚಲ್ಲ್ಲೊ!
ವ್ಹಯ್! ತ್ಯಾದೀಸ್ ಮ್ಯಾನೇಜಿಂಗ್ ಡೈರೆಕ್ಟರಾಚಾ ಜಾಗ್ಯಾರ್ ಆಪುಣ್ ಆಸ್ಲ್ಲೊಂ. ಆನಿ ಮ್ಹಜ್ಯಾ ಜಾಗ್ಯಾರ್ ಆಲಿಯಾ ಆಸ್ಲ್ಲೆಂ.
ಪುಣ್ ಆಜ್.....?
ಆಜ್ ಮಜ್ಯಾ ಜಾಗ್ಯಾರ್ ಹೊ ಮ್ಯಾನೇಜಿಂಗ್ ಡೈರೆಕ್ಟರ್ ಆನಿ ಆಲಿಯಾಚಾ ಜಾಗ್ಯಾರ್ ಹಾಂವ್!
ತ್ಯಾ ದಿಸಾಯ್ ಆಶೆಂಚ್ ಘಡ್ಲ್ಲೆಂ! ತ್ಯಾ ದಿಸಾ ಆಸೊಚ್ ಏಕ್ ಖೆಳ್ ಚಲ್ಲ್ಲೊ. ಪುಣ್ ಆಲಿಯಾ ಮೌನ್ಪಣಿ ತ್ಯಾ ದೀಸ್ ಆಪ್ಣಾಚಾ ಆಫೀಸಾ ಥಾವ್ನ್ ಭಾಯ್ರ್ ಗೆಲ್ಲೆಂ. ಆಜ್ಯ್ ಹಾಂಗಾಸರ್ ಖೆಳ್ ಚಲ್ಲಾ! ಆನಿ ಆಪುಣ್.....?
ವ್ಹಯ್! ಕಾಲ್ಚ್ಯಾ ಸಾಂಜೆರ್ ಆಲಿಯಾನ್ ಆಪ್ಣಾಕ್ ಪೋನ್ ಕರುನ್ ಸಾಂಗ್ಲ್ಲ್ಯಾ ಪರಿಂಚ್ ಜಾಲ್ಲೆಂ.
ತ್ಯಾ ದೀಸ್ ಆಲಿಯಾನ್ ’ಉಫ್’ ಪಾಸೊನ್ ಕರಿನಾಸ್ತಾನಾ ತ್ಯಾ ಮ್ಹಜ್ಯಾ ಆಫೀಸಾ ಥಾವ್ನ್ ಭಾಯ್ರ್ ಮೆಟಾಂ ಕಾಡ್ಲ್ಲಿಂ. ಪುಣ್ ಆಜ್! ಆಜ್ ಹಾಂವ್ ಹಾಂಗಾ ವಿನತಿ ಕರ್ತಾಂ! ಭಿಕ್ ಮಾಗ್ತಾಂ! ಕಾಲ್ಚ್ಯಾ ಸಾಂಜೆರ್ ಆಲಿಯಾನ್ ಪೊನಾರ್ ಸಾಂಗ್ಲ್ಲ್ಯಾಪರಿಂಚ್!
"ಮಿಸ್ಟರ್ ಮನೋಜ್ ಕುಮಾರ್! ಯು ಮೇ ಗೋ ನೌ!" ಮ್ಯಾನೇಜಿಂಗ್ ಡೈರೆಕ್ಟರಾನ್ ಸಾಂಗ್ತಾನಾ ಮತಿಂತ್ಲ್ಯಾ ಆಲಿಯಾಚಾ ಉತ್ರಾಂಕ್ ಅನಿ ತ್ಯಾ ಘಡಿತಾಂಕ್ ಉಡಾಸ್ ಕಾಡೀತ್ತ್ ಮನೋಜ್ ಕುಮಾರ್ ಡೈರೆಕ್ಟರಾಚಾ ಆಫೀಸಾ ಥಾವ್ನ್ ಭಾಯ್ರ್ ಚಲ್ಲೊ.
ಹೆಂ ಆಲಿಯಾನ್ ಕಶೆಂ ಕೆಲೆಂ ಮ್ಹಳ್ಳೆಂ ಮಾತ್ರ್ ಮನೋಜ್ ಕುಮಾರಾಕ್ ಸಮ್ಜೊಂಕ್ ಸಾದ್ಯ್ ಜಾಲೆಂ ನಾ.
*****************
[ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
ಕಾದಂಬರಿಕಾರಾಚಿಂ ಉತ್ರಾಂ: 1, 2, 3, 4, 5, 6, 7, 8, 9, 10, 11, 12, 13, 14, 15, 16, 17
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
