ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 21. ಆವಾಜ್!
ಜೊರ್ಜಿ ಪೀಂತ್ ಆಯ್ಕೊಳ್: ಕೊಂಕ್ಣಿ ಸಾಹಿತ್ಯಾಂತ್ ಮ್ಹಾಕಾ ಹಾಚಿ ಸಳಾವಳ್ ಜಾಲ್ಲಿ ತಾಚಾ ಅಖ್ರೇಚಾ ಥೊಡ್ಯಾ ವರ್ಸಾಧಿಂ ತರ್ಯ್ ಹಾಂವೆಂ ಕಾಳ್ಜಾ ಮನಾನ್ ಏಕ್ ಪ್ರಾಮಾಣಿಕ್ ಸಾಹಿತಿ, ಚಿಂತ್ಪಿ ಮ್ಹಣ್ ಮಾಂಧುನ್ ಘೆತ್ಲ್ಲ್ಯಾ ಭೋವ್ ಥೊಡ್ಯಾಂ ಪಯ್ಕಿ ಹೊ ಎಕ್ಲೊ. ಆಪ್ಲ್ಯಾ ಬರ್ಪಾಂನಿ ವಿಚಾರಾಂಚೊ ವ್ಹಾಳೊ ವ್ಹಾಳಂವ್ಚಿ ಶ್ಯಾಥಿ ಆಸ್ಚೊ ಕೊಂಕ್ಣೆಂತ್ಲೊ ಅಪ್ರೂಪ್ ಸಾಹಿತಿ ಆನಿ ಗೂಂಡ್ ಚಿಂತ್ಪಿ. ಆವಾಜ್ ಕಾಣಿ ಏಕ್ ಕಾಣ್ಯೆಗಾರ್ ಆನಿ ತಾಚೆಂ ಭಿತರ್ಲೆಂ ವ್ಯಕ್ತಿತ್ವ್ ಜೆದ್ನಾಂ ಮುಖಾಮುಖಿ ಜಾತಾತ್ ತೆದ್ನಾಂ ಕಿತೆಂ ಜಾತಾ ಮ್ಹಳ್ಳೆಂ ಅಪುರ್ಭಾಯೆನ್ ಪಿಂತ್ರಾಯ್ತಾ.
[ಹಿ ದೆ|ಜೊರ್ಜಿ ಪೀಂತ್ ಆಯ್ಕೊಳ್ ಹಾಚಿ ಬುಕಾರುಪಾರ್ ಪರ್ಗಟ್ ಜಾಲ್ಲಿ ಪಯ್ಲಿ ಮಟ್ವಿಕಾಣಿ, ತಾಚಾ ಜನನಾಚಾ 51ವ್ಯಾ ವರ್ಸಾಚಾ ಉಡಾಸಾನ್ ಹಾಂಗಾಸರ್ ಪರ್ಗಟ್ ಕೆಲ್ಯಾ.]
ಜೊರ್ಜಿ ಪೀಂತ್
[10-08-1956-11-05-2003]
ಹೊ ತಾಳೊ, ಹೊ ಆವಾಜ್ ಮ್ಹಜ್ಯಾನ್ ಸೊಸುಂಕ್ ಜಾಯ್ನಾಂ. ಕೆದ್ನಾ ಆವ್ರಾಚ್ಯಾ ಉದ್ಕಾಚ್ಯೆ ಗಾಝೆನ್, ಕೆದ್ನಾ ಉಂದ್ರಾನ್ ಕಾಂತ್ಳಿ ಕಾಂತಂವ್ಚೆ ಕಾಂತವ್ಣೆನ್, ಕೆದ್ನಾ ಮಾತ್ಯಾಂತ್ಲ್ಯೆ ಉವೆನ್ ಖೊರ್ಪುಂಕ್ ಲಾಂವ್ಚೆ ಖೊರ್ಜೆನ್ ದೊಸಿತ್ ಆಸ್ತಾ. ಥೊಡೆ ಪಾವ್ಟಿಂ ಪಳ್ಳೆಂತ್ ಬಾಂಗ್ ದಿಂವ್ಚೆ ತೀಕ್ಶ್ಣಾಯೆನ್, ತರ್ ಥೊಡೆ ಪಾವ್ಟಿಂ ದಿವ್ಳಾಂತ್ಲ್ಯಾ ಫಾಂತ್ಯಾಚ್ಯಾ ರಣರಾಚೆ ಮೊವಾಳಾಯೆನ್, ಕೆದ್ನಾ ತುವಾಲ್ಯಾ ಶೆರ್ಮಾಂವಾಚ್ಯಾ ಗೊರೊಜಾನ್ ತರ್ ಆನಿ ಕೆದ್ನಾಂ ಕುಮ್ಸಾರಿಂತ್ಲ್ಯಾ ಬೂದ್ಬಾಳಿಚ್ಯಾ ಪುಸ್ಪುಸ್ಯಾಂನಿ ಹೊ ಆವಾಜ್ ಮ್ಹಾಕಾ ಧೊಸಿತ್ ಆಸಾ.
ಹಾಂವ್ ಜಾಣಾಂ, ಪಯ್ಲ್ಯಾ ಕುಮ್ಗಾರಾಚ್ಯೆ ದೊತೊರ್ನೆ ಉಪ್ರಾಂತ್ ಬರೆಂ ಕಿತೆಂ, ವಾಯ್ಟ್ ಕಿತೆಂ, ನಿತಳ್ ಕಿತೆಂ, ಮ್ಹೆಳೆಂ ಕಿತೆಂ, ಅಪ್ವಂತ್ ಕಿತೆಂ, ಹಳ್ಶಿಕ್ ಕಿತೆಂ, ಪಾತಾಕ್ ಕಿತೆಂ ಪೂನ್ ಕಿತೆಂ, ಮ್ಹಳ್ಳ್ಯಾ ಸಂಗ್ತಿಂಚೆಂ ಫರಕ್ ಸಮ್ಜತಾಂ ಜಲ್ಮ್ ಘೆತ್ಲ್ಲೊ ಹೊ ಆವಾಜ್ ಮ್ಹಜ್ಯೆ ಜಿಣ್ಯೆಚ್ಯಾ ಸರ್ವ್ ದಿಸಾಂನಿ, ಛೆಕ್ ದಿಸಾಂನಿ ಖಂಯ್ ಹಾಂವ್, ಮ್ಹಜ್ಯೆ ಜಿಣ್ಯೆಚ್ಯಾ ಹರ್ಯೆಕಾ ಖಿಣಾಂತ್, ಘಡಿಯೆಂತ್ ಧೊಸುನ್ಚ್ ಆಸಾ.
ಹಾಂವ್ ಜಾಣಾಂ ಹೊ ಬಂದ್ ಜಾಯ್ಜೆ ತರ್ ಮ್ಹಾಕಾ ಆಸ್ಚ್ಯೊ ತೀನ್ ವಾಟೊ. ಏಕ್ ಹಾಂವೆಂ ಪಯ್ಲ್ಯಾ ಕುಮ್ಗಾರಾಚ್ಯಾ ಪಯ್ಲೆಂ ಆಸ್ಲ್ಲ್ಯೆ ಮನೋಸ್ಥಿತೆಕ್ ಪಾಟಿಂ ಪಾವಾಜೆ. ಬರ್ಯಾ ಆನಿ ವಾಯ್ಟಾ ಮಧ್ಲೊ, ಎವೆ ಆನಿ ಸರ್ಪಾ ಮದ್ಲೊ, ಆದಾಂವ್ ಆನಿ ಎಪ್ಪಲಾ ಮಧ್ಲೊ ಫರಕ್ ವಿಸ್ರಜೆ. ಪುಣ್ ಹೆಂ ಸಾದ್ಯ್ ನಾ, ದುಸ್ರ್ಯಾನ್ ತ್ಯಾ ಆವಾಜಾಕ್ ಕಾನ್ ದಿಂವ್ಚೆಂಚ್ ಬಂದ್ ಕರಿಜೆ ಪುಣ್ ತೆಂಯೀ ಸಾಧ್ಯ್ ನಾ. ಸೆಜಾರ್ನಿನ್ ಖಂಚಿಯ್ ಖಬರ್ ಸಾಂಗೊಂಕ್, ’ಹಾಚಿ ಏಕ್ ಗಜಾಲ್ ಭಾರಿ ವಿಶೇಸ್ ಮುಂಗೇ’ ಮ್ಹಣೊನ್ ಬುನ್ಯಾದ್ ಘಾಲ್ತಾನಾ ಖಂಚೆಯ್ ಬಾಯ್ಲೆನ್ ಪಾಟ್ ಘಾಲ್ನ್ ವೆಚೆಂ ಸಾದ್ಯ್ ನಾ. ತಿ ಗತ್ ಜಾಲ್ಯಾ ಮ್ಹಜಿ. ಆನಿ ತಿಸ್ರ್ಯಾನ್ ದೊರಿಗೀ, ಬಾಂಯ್ಗಿ, ವಾ ಸಂಕ್ಪಾಶಣ್ಗೀ ಸೊದಿಜೆ. ಪುಣ್ ಸದ್ದ್ಯಾಕ್ ಪರಿಗತ್ ತಿತ್ಲಿ ಗಂಬೀರ್ ದಿಸಾನಾ.
ಹ್ಯಾ ಆವಾಜಾವರ್ವಿಂ ಕಿತೆಂ ಕರ್ಚೆಂಯೀ ಕಶ್ಟಾಂಚೆಂ ಜಾಲಾಂ. ಆನಿ ಸಗ್ಳ್ಯಾ ವರ್ನಿ ಹ್ಯಾ ಆವಾಜಾಕ್ ನಾಂವ್ ದಿಂವ್ಚೆಯೀ ತ್ರಾಸ್ ಜಾಲ್ಯಾತ್. ಭುರ್ಗ್ಯಾಂಕ್ ತರ್ಯೀ ಕೊಣಾ ಸಾಂತಾಚೆಂ ನಾಂವ್ ದವರ್ತಾಲೆ, ಗುರ್ವಾಸಾರ್ ಆಯ್ಲೊ ಮ್ಹಣ್ತಾನಾ ಘರಾಂತ್ ನಾ ತರ್, ಕಾತೊಲಿಕಾಂಚೆಂ ಪಂಚಾಂಗ್ ಹಾಡ್ನ್ ಉಮ್ಕಾಳಾಯ್ತಾಲೆ, ಭುರ್ಗ್ಯಾಚ್ಯಾ ಜಲ್ಮಾ ದಿಸಾಚೊ ಶಾರೊತಿ ಸಾಂತ್ ಕೊಣ್ ತೆಂ ತಕ್ಶಣಾ ಕಳ್ಚ್ಯಾ ಖಾತಿರ್.
ಕಾಳ್ ಬದಲ್ತಾನಾ ನವೀಕರಣ್ ಉದೆತಾನಾ ದೇಶೀ ನಾಂವಾಂಚಿ ವೋಡ್ ಆಯ್ಲಿ, ಗುರ್ವಾರ್ ಬಾಯ್ಲೆಕ್ ತೊರಾಂಚಿ ಆಶಾ ಆಯಿಲ್ಲೆಬರಿ, ತಶೆಂಚ್ ಆಸ್ಲ್ಲೆಂ ತರ್ ಸೊಬ್ ಆಸ್ತಿ. ಪುಣ್ ಕಾಳ್ ರಾವ್ಲೊನಾ ಬದ್ಲಾಲೊ. ಆನ್ಕಿಟಿ, ಕಾಳಿಜ್, ಪೊಪಿಸ್, ಊಂಡ್, ಮಾಸ್, ರಗತ್ ಆನಿ ಹಾಡಾಂ ಸಗ್ಳೆಂಯೀ ಗಾಂವ್ಚಾಚ್ ಏಕ್ ಮೂಟ್ ಮಾತ್ಯೆಥಾವ್ನ್, ಸರ್ವೆಸ್ಪರಾಚಾ ಅಚರ್ಯಾಂನಿ ಜೀವ್ ಘೆವ್ನ್ ಆಯಿಲ್ಲೆಂ ತರೀ ತಾಕಾ ವೊಲಾಂವ್ಕ್ ಗೊರ್ಶೆ ಕಾತಿಚ್ಯಾಂ ಹಿಂವಾಳ್ಯಾ ಗಾಂವ್ಚಿಂ ನಾಂವಾಂ ಆಮ್ಕಾಂ ವಚೊನ್ ಪಾಶ್ಚಾತ್ತೀಕರಣ್ ಪಾಶಾರ್ ಜಾತಾನಾ, ಪಾಸ್ಚಾತೀಕರಣಾಚೆಂ ನವೀಕರಣ್ ಉದೆವ್ನ್ ಯೇವ್ನ್ ಆತಾಂ ಆವಯ್ ಬಾಪಾಯ್ಚ್ಯಾ ನಾಂವಾಂತ್ಲಿಂ ಅಕ್ಶರಾಂ ಜೊಡಿ ಕರ್ನ್ ಸಂಕೀರ್ಣ್ ನಾಂವಾಂಚಿ ಘಡಾವಳ್ ಜಾತೆಚ್ ಆಸಾ. ತಶೆಂ ಆಸ್ತಾಂ ಹಾಂವ್ ಹ್ಯಾ ಆವಾಜಾಕ್ ಕಿತೆಂ ನಾಂವ್ ದೀಂವ್ ಮ್ಹಾಕಾ ಕಳಾನಾ. ಮನ್ ಮ್ಹಣೊಂ? ಪುಣ್ ಹೊ ಆವಾಜ್ ಮನ್ ನ್ಹಂಯ್, ಅಂತಸ್ಕರ್ನ್ ಮ್ಹಣೊಂ? ಪುಣ್ ತೆವಾಂ ಹೊ ಆವಾಜ್ಚ್ ಮ್ಹಾಕಾ ತುಕ್ಲಾಯ್ತಾ.
"ಕಿತೆಂ? ಮ್ಹಾಕಾ ಮಣಿಯಾಂಚೆಂ ನಾಂವ್ ದಿತಾಯ್? ಧೊವ್ಸಾಣೆಚಿ ತುಜಿ ಪಿಸಾಯ್ ತೆದ್ನಾಂ ವೆತಲಿ?" ಸವಾಲ್ ಕರ್ತಾ. ಹ್ಯಾ ಆವಾಜಾಲಾಗಿಂ ಸವಾಲಾಂ ಮಾತ್ ಆಸಾತ್. ಜಾಪಿ ಸೊಧುಂಕ್ ಮ್ಹಾಕಾಚ್ ಆಂಬುಡ್ತಾ. ದೂದ್ ಕಾಡ್ನ್ ಜಾಲ್ಲ್ಯಾ ಉಪ್ರಾಂತ್, ಆಪ್ಲೊ ಚರವ್ ಸೊಧುಂಕ್ ಮೊಶಿಕ್ ಗುಡ್ಯಾಕ್ ಆಂಬುಡ್ಲ್ಲೆಪರಿಂ. ಕೆದ್ನಾ ಚಿಂತಾಂ ಆಮ್ಚೆ ಆಂಗ್ಲೋರಿಯನಾಂಚೆಂ ಶಯ್ಲೆನ್ ಹಾಕಾ ಕಾನ್ಕನ್ಸ್ ಮ್ಹಣೊನ್ ಆಪಂವ್? ಪುಣ್ ತೆದ್ನಾ ಹೊ ಆವಾಜ್ ಕಿಡ್ಕಿಡ್ತಾ,
"ತುಜಿ ಅಸ್ಮಿತಾಯ್ ಖಂಯ್ ಆಸಾ? ತುಂ ಆಪ್ಣಾಕ್ಚ್ ನಾಡ್ಕಾರ್ ಮ್ಹಣ್ತಾಯ್ ಆನಿ ನಾಂವ್ ಪರ್ಯಾಂತ್ ಪರ್ಕಿ ಸೊಧ್ತಾಯ್?" ಮ್ಹಾಕಾ ಸಗ್ಳೆಂ ಆಂಗ್ ಜಳ್ತಾಶೆಂ ಭಗ್ತಾ.
"ತಿ ಪ್ರಗತಿ" ಹಾಂವ್ ಬೊಬಾಟ್ತಾಂ. "ಆಜ್ ಪಳೆ ಕಾಚ್, ಕುತಾಂವ್ ತೊಡೊಪ್ ವಚೊನ್, ಸೂಟ್, ಕೋಟ್ ಆಯ್ಲಾ. ಮಾಲ್ತಿ, ಮಾಲ್ತುರ್ ವಚೊನ್ ಪ್ಲೇಟಿ, ಕಪ್ಪಾಂ ಆಯ್ಲ್ಯಾಂತ್, ಹರ್ಯೆಕೆ ಸಂಗ್ತಿಂತ್ ವರ್ತಿ ಪ್ರಗತಿ ಜಾಲ್ಯಾ. ಪಳೆ ಘರಾಂತ್ಲ್ಯೊ ಸವ್ಲತಾಯೊ, ಫ್ಯಾನ್, ಫ್ರಿಜ್, ಗ್ರಾಂಯ್ಡರ್, ಟಿವಿ, ಡಿವಿಡಿ, ಕಂಪ್ಯೂಟರ್, ಇಂಟರ್ನೆಟ್..." ಪುಣ್ ಆವಾಜ್ ಕಿಡ್ಕಿಡ್ತಾತ್ ವೆತಾ, ಭುರ್ಗ್ಯಾಂನಿ ಎಕಾಮೆಕಾ ಕುಚಿಲ್ಯೊ ಕರ್ನ್ ಹಾಸ್ಲ್ಲೆಬರಿ.
"ವ್ಹಯ್ ವ್ಹಯ್ ವ್ಹಯ್. ಮುಕಾರ್ ಸಾಂಗ್ ಪಿಜ್ಜಾ, ಪೆಪ್ಸಿ-ಕ್ಕ್, ಬರ್ಗರ್, ನಾಯ್ಕಿ, ಅಡಿಡಾಸ್, ಬೆನಟನ್. ಆಂಬಿಲೆ ಥಾವ್ನ್ ಕೋಲಾಕ್ ಪ್ರಗತಿ, ಆಯುರ್ವೇದಾಥಾವ್ನ್ ಸರ್ಜರಿಕ್ ಪ್ರಗತಿ ನ್ಹಂಯ್ಗಿ?" ಆವಾಜ್ ವ್ಹಡಾ ತಾಳ್ಯಾನ್ ಹಾಸ್ತಾ ಕಿತೆಂಗೀ ಸಾಂ ಮಿಂಗೆಲಿನ್ಚ್ ಯೇವ್ನ್ ವಡ್ಲೆಂ ಫೊಕಣ್ ಸಾಂಗ್ಲ್ಲ್ಯಾ ಜಿನ್ಸಾರ್. ಹಾಂವ್ ಗುಸ್ಪಡ್ತಾಂ, ವೊಗೊಚ್ ಜಾತಾಂ ಜಿಬೆಚ್ಯೆ ಬಾಯ್ಲೆಚ್ಯಾ ತರ್ಕಾ ಮುಕಾರ್ ದೊನ್ಯೀಗಡೆ ಹಾತ್ ದವರ್ನ್ ವೊಗೊಚ್ ಬಸ್ಚೆಬರಿ. ಪುಣ್ ಆವಾಜ್ ವೊಗೊಚ್ ಜಾಯ್ನಾ. ಪುಸ್ಪುಸ್ತೆತ್ ವೆತಾ, ಕುಳಾರಾ ಆಯಿಲ್ಲೆ ಧುವೆಕ್ ತಾಚ್ಯೆ ಆವಯ್ನ್ ಕುಮ್ಸಾರ್ ಕರ್ಚೆಬರಿ.
"ತುಜೆಲಾಗಿಂ ಜಾಪ್ ನಾ ನ್ಹಂಯ್ಗಿ? ಮ್ಹಳ್ಯಾರ್ ತುಂ ಸಲ್ವಾಲೊಯ್?" ಹೆಂ ಸವಾಲ್ ಮ್ಹಾಕಾ ಥಂಡ್ಗಾರ್ ಕರ್ತಾ. ಆಮಾಲಾಚ್ಯೆ ನಿದೆಂತ್ಲೆಂ ಉಟ್ಲ್ಲ್ಯಾ ಪಿಂವ್ಡ್ಯಾನ್ ಥಂಡ್ಗಾರ್ ಜಾಂವ್ಚೆಬರಿ. ವ್ಹಯ್, ಹಾಂವ್ ಸಲ್ವಾತೆಚ್ ಆಯ್ಲಾಂ. ಕೆದಾಳಾ ಹಾಂವ್ ಜಿಕ್ಲೊಂ ಮ್ಹಣೊನ್ ಚಿಂತುಂಕ್ ಲಾಗ್ಲಾಂ ಆನಿ ಜಿಬೆಚಿ ರೂಚ್ ಪಳೆಂವ್ಚ್ಯಾ ಪಾಂವ್ಡ್ಯಾಕ್ ಪಾವ್ಲಾಂ ತೆದ್ನಾಂ ಹಾಂವ್ ಸಲ್ವೊನ್ಂಚ್ ಆಯ್ಲಾಂ. ಆನಿ ಹರ್ಯೆಕ್ ಪಾವ್ಟಿಂಯೀ ಮ್ಹಾಕಾ ಹ್ಯಾಚ್ ಆವಾಜಾನ್ ಸಲ್ವಯ್ಲಾಂ, ಮ್ಹಜೆಂ ದುರ್ಭಾಗ್ಪಣ್, ಮ್ಹಜ್ಯಾಚ್ ಮುಕಾರ್ ಉಗ್ತಾಡಾಕ್ ಧರ್ಲಾಂ, ದರ್ಯಾವೆಳೆರ್ ಜಿರ್ಲ್ಲೆ ಬಾಂಗ್ಡೆ ಸುಕಯಿಲ್ಲ್ಯಾಬರಿ. ಆನಿ ತ್ಯೆ ಸಲ್ವಣೆಂತ್ ಹಾಂವ್ ಚುರ್ಚುರ್ಲಾಂ. ಹಾವೆಂ ಹ್ಯಾ ಆವಾಜಾಕ್ ಕಾನ್ ದಿಲ್ಲೆ ಚಡ್ ಜಾಲೆಂಗಾಯ್? ಮ್ಹಜ್ಯಾ ಕೆಪ್ಪ್ಯಾ ಸಾಂಗೊಡ್ಯಾಂಕ್, ಅಮಿಗಾಂಕ್, ವಾಂಗ್ಡ್ಯಾಂಕ್ ದೆಕ್ತಾನಾ ಮ್ಹಾಕಾ ಕಳ್ಟಾ, ತಾಣಿಂ ತಾಂಚಾ ಹ್ಯಾ ಆವಾಜಾಕ್ ಕಾನ್ಚ್ ದೀನಾತ್ಲೆಲ್ಯಾನ್ ತಾಂಕಾಂ ಜಿವಿತಾನ್ ಜಾಯ್ ತೆಂ ಸಗ್ಳೆಂ ದಿಲಾಂ. ಪುಣ್ ಆವಾಜಾಕ್ ಕಾನ್ ದಿಲ್ಲ್ಯಾ ಮ್ಹಾಕಾ ಸಲ್ವಣಿ. ಫಕತ್ ಸಲ್ವಣಿ. ಮೆಟಾ ಮೆಟಾಕ್ ಸಲ್ವಣಿ ಆನಿ ಸಲ್ವಣಿ ಮಾತ್.
"ಹಾಕಾ ತುಂ ಸಲ್ವಣಿ ಮ್ಹಣ್ತಾಯ್ ಪಿಶ್ಯಾ?" ಪರತ್ ಉಡ್ತೆಂ ಸವಾಲ್ ಆವಾಜಾಚೆಂ, ವಕಿಲಾಚ್ಯಾ ಕಾತರ್ ಸವಾಲಾಬರಿ. ಹಾಂವ್ ಪರತ್ ಗುಸ್ಪಡ್ತಾಂ, ಸಾಸ್ಪತಾಂ, ಕಶ್ಟಾತಾಂ, ದಡ್ಬಡ್ತಾಂ, ಉದ್ಕಾಥಾವ್ನ್ ಕಾಡ್ನ್ ಧರ್ಣಿರ್ ಉಡಯಿಲ್ಲ್ಯಾ ಪಿರ್ತೊಳಾಬರಿ.
ಹಿಚ್ ಸದಾಂಚಿ ಗಾಜ್, ಹಿಚ್ ಸದಾಂಚಿ ಲಜ್, ಕಾಳಿಜ್ ಕಾಂತಂವ್ಚಿ ಕಾಂತವ್ಣಿ, ಥೊಥೊಡೆಂಚ್ ಇರಂವ್ಚಿ ಝರವ್ಣಿ.
ಆನಿ ಹಾಂವ್ ಕಾಣಿ ಬರಂವ್ಕ್ ಬಸ್ತಾಂ. ತೆದ್ನಾ ಆವಾಜ್, ಕಾತ್ಕುತ್ಲಿ ಲಾಗ್ಲ್ಲೆಬರಿ ಉಚಾಂಬಳ್ ಜಾತಾ.
"ವಿಶಯ್ ಕಿತೆಂ ಘೆತಾಯ್ ಪಿಶ್ಯಾ?" ತಾಚ್ಯಾ ಸವಾಲಾಂಚ್ಯೆ ಶಿಂಕ್ಳೆಂತ್ಲೆಂ ಆನಿ ಏಕ್ ಸವಾಲ್.
"ಮೊಗಾಚೊ" ಮ್ಹಜೊ ನಿರ್ದಾರ್ ಮಟ್ವ್ಯಾನ್ ಉಚಾರ್ತಾಂ.
"ತರ್ ನಿರಾಶಿ ಮೊಗಾಚೊಚ್ ಆಸ್ತಲೊ." ಜಿಲಿಕ್ ಫಾತೊರ್ ಮಾರ್ನ್ ಹಾಸ್ಲ್ಲೆಬರಿ ಆವಾಜ್ ಹಾಸ್ತಾ. "ಮೊಗಾವಿಶಿಂ ತುಂ ಕಶೆಂ ಜಾಣಾಂಯ್ ಪಿಶ್ಯಾ?" ಮ್ಹಾಕಾ ರಾಗ್ ಯೆತಾ ಹಾಂವ್ ಜಾಪ್ ದೀನಾ.
"ತುಜ್ಯಾ ಮೊಗಾಚೊ ಅನ್ಭೋಗ್ ಕಿತ್ಲೊ?" ಪರತ್ ಕಾಳಿಜ್ ಹಲ್ಕಂದಾಂವ್ಚೆಂ ಸವಾಲ್. "ಕೆದ್ನಾಂಯ್ ತುವೆಂ ಸಂಪುರ್ಣಾಯೆಚ್ಯಾ ಮೊಗಾಚೊ ಅನ್ಭೋಗ್ ಕೆಲ್ಲೊ ಆಸಾ? ತರ್ನಾಟ್ಪಣಾರ್, ಭುರ್ಗೆ ಮತಿರ್ ಕೊಣಾ ಎಕ್ಲ್ಯಾಕ್ ಪಸಂದ್ ಕರ್ನ್ ತಾಚೊ ಸಾಂಗಾತ್ ಆಶೆಲ್ಲೊಯ್, ತಾಚ್ಯೆ ವೆಂಗೆ ಉಭೆಂತ್ ರಾನಾಂ ಮೊಲಿಂ ಮಸ್ತುಂಚಿಂ ಸಪ್ಣಾಂ ದೆಕ್ಲ್ಲಿಂಯ್? ಸಾಂಗಾತಾ ತಾರಾಂ ಖುಂಟ್ತೆಲ್ಯಾಂವ್, ರಾವ್ಳೆರಾಂ ಬಾಂದ್ತೆಲ್ಯಾಂವ್ ಮ್ಹಳ್ಳಿಂ ಕಲ್ಪನಾಂ ಕೆಲ್ಲಿಂಯ್. ವ್ಹಡ್ಲಿ ಮಾಂಯ್ಚ್ಯೆ ಕಾಣಿಯೆಂತ್ಲ್ಯಾ ಕುವರಾ ಆನಿ ಕುವರ್ನಿಬರಿ ಸುಖಾ ಸಂತೊಸಾನ್ ಜಿಯೆಂವ್ಚಿಂ ರಂಗ್ರಂಗಾಳ್ ಪಿಂತುರಾಂ ಮತಿಂತ್ ವಿಣ್ಲ್ಲಿಂಯ್? ಪುಣ್ ಕಿತೆಂ ಜಾಲೆಂ?" ಮ್ಹಜ್ಯಾ ಮನಾಚೆ ಕಿಸ್ಪೊರ್ ಕರ್ನ್ ವಿಚಾರ್ಲೆಂ ಹ್ಯಾ ಆವಾಜಾನ್ - ನಿಸ್ತ್ಯಾಕ್ ಗರ್ಯಾಂಚೊ ಕಿಸ್ಪೊರ್ ಕೆಲ್ಲೆಬರಿ.
"ಕಿತೆಂಚ್ ಜಾಂವ್ಕ್ ನಾ" ಹಳೂ ಜಾಪ್ ದಿಲಿ ಹಾವೆಂ.
"ತರ್ ಮೊಗಾವಿಶಿಂ ಕಿತೆಂ ಕಾಣಿ ವಿಣ್ತಲೊಯ್? ತಿಂಚ್ ಬಾಳ್ಪಣಾಚ್ಯಾ ಕಲ್ಪನಾಂಕ್ ವ್ಹಡ್ಲಿಮಾಂಯ್ಚ್ಯಾ ಕಾಣ್ಯಾಂಚಿ ಪಾಸ್ಕಿ ದೀವ್ನ್ ವೊಳ್ತಲೊಯ್? ತುವೆಂ ಮೋಗ್ ಮ್ಹಣೊನ್ ಚಿಂತ್ಲ್ಲ್ಯಾ ತುಜ್ಯಾ ಕಲ್ಪನಾಂಚ್ಯೆ ಪಿಂತ್ರಾವ್ಣೆಕ್ ವಿಸ್ತಾರಾವ್ನ್, ಹೆಂಚ್ ಸತ್, ಮೋಗ್ ಮ್ಹಳ್ಯಾರ್ ಅಸೊಚ್ ಮ್ಹಣೊನ್ ಪಾತ್ಯೆಸಾರ್ಕೆಂ ಕರ್ತಲೊಯ್?"
ಫಾಣೆರಿಚೆಂ ಮೂಳ್ಚ್ ಹುಂಬಳ್ಲ್ಲೆಬರಿ ಮ್ಹಜೆಂ ಮೂಳ್ಚ್ ಹುಂಬಳ್ಳೆಂ ಆವಾಜಾನ್.
"ಕಾಣಿ ಮ್ಹಣ್ತಾನಾ ಕಲ್ಪನ್ ಜಾಯ್ಚ್. ಕಲ್ಪನ್ ನಾಸ್ತಾಂ ಕಾಣಿ ಕಶಿ ಜಾತೆಲಿ? ಆನಿ ಖಂಯ್ಚರ್ ಕಲ್ಪನಾಕ್ ಆವ್ಕಾಸ್ ಆಸಾ, ಥಂಯ್ಸರ್ ಅನ್ಭೋಗಾಚಿ ಕಿತೆಂ ಗರ್ಜ್?" ಹಾವೆಂ ಪಾಟಿಂ ಸವಾಲಾಂ ವಿಚಾರ್ಲಿಂ, ಜಾಪ್ ಯೆಂವ್ಚಿ ನಾ ತೆಂ ಜಾಣಾಂಸ್ಲ್ಯಾರೀ.
"ಮ್ಹಳ್ಯಾರ್ ಅನ್ಭೋಗಾವಿಣೆ, ಫಕತ್ ಕಲ್ಪನಾಚ್ಯಾ ಬಳಾರ್, ಕಿತೆಂ ತರ್ಯೀ ಕಾಣಿ ವಿಣುನ್, ತೆಂಚ್ ಸತ್ ಮ್ಹಳ್ಳೆಂ ಪಾತ್ಯೆಶೆಂ ಕರ್ಚೊ ತುಜೊ ಉದ್ದೇಶ್?" ಹಾವೆಂ ಚಿಂತ್ಲ್ಲೆಬರಿಚ್ ಆವಾಜಾನ್ ಉಡ್ತೆಂ ಸವಾಲ್ ಕೆಲೆಂ.
"ಮ್ಹಾಕಾ ತಸಲೊ ಉದ್ದೇಶ್ ನಾ. ಮ್ಹಜೊ ಉದ್ದೇಶ್ ಮ್ಹಜ್ಯೆ ತಾಂಕಿ ಆನಿ ಸಮ್ಜಣೆ ಪ್ರಕಾರ್ ವಾಚ್ತೆಲ್ಯಾಕ್ ಮನೋರಂಜನ್ ದಿಂವ್ಚೊ" ಹಾವೆಂ ಚಿಕ್ಕೆ ತಾಪೊನ್ಚ್ ಜಾಪ್ ದಿಲಿ. ಹಾವೆಂ ಕಿತ್ಲೆಂ ತಾಪ್ಲ್ಯಾರೀ ಮ್ಹಜೊ ಆವಾಜ್ ತಾಪಾನಾ. ಶಾಂತ್ ಬರ್ಫಾಬರಿ ವಾ ಧ್ಯಾನಾಕ್ ಬಸ್ಲ್ಲ್ಯಾ ಧ್ಯಾನಿಬರಿ.
"ಮನೋರಂಜನಾಚ್ಯಾ ನಾಂವಾನ್, ಕಲ್ಪನಾಚ್ಯಾ ಆಧಾರಾನ್ ಸತ್ ಆಸ್ಲ್ಲೆಂ ಕಶೆಂ ಘಾಸ್ಲ್ಯಾರೀ ಜಾತಾ?" ಪರತ್ ಸವಾಲ್. ಮ್ಹಜೆಂ ಶಿಂತಿದ್ ಕದ್ವಳ್ಳೆಂ.
"ಸತ್ ಸತ್ ಸತ್. ಕಿತೆಂ ಸತ್ ಆನಿ ಕಿತೆಂ ಫಟ್? ಕಿತೆಂ ಸತ್ ಆನಿ ಕಿತೆಂ ಕಲ್ಪನಾ? ಸತಾಚಿ ಲವ್ಚಿಕಾಯ್ ವಿಸ್ತಾರ್ಲ್ಯಾರ್ ತಿಚ್ ಕಲ್ಪನಾ ನ್ಹಂಯ್ಗಿ?" ಚಾಳ್ವಲ್ಲ್ಯಾ ಹಾಂವೆಂ ಪಾಟಿಂ ಸವಾಲ್ ಕೆಲೆಂ.
"ಸತಾಕ್ ಲವ್ವಿಕಾಯ್ ಆಸಾಗಿ?" ಬರ್ಪಾಪ್ರಾಸ್ ಥಂಡ್ ಸವಾಲ್. ಹಾಂವ್ ನಿರ್ಲೆಲೊಂ, ಸಲ್ವಾಲೊಂ, ಕಡ್ವರ್ಲೊಂ. "ಕಿತೆಂ ಸತ್ ಮ್ಹಣೊನ್ ವಿಚಾರ್ತಾಯ್? ಮೊಗಾವಿಶಿಂ ತುಕಾ ಆಸ್ಚಿ ಕಲ್ಪನಾ ಸೊಡ್ಲ್ಯಾರ್ ಮೊಗಾವಿಶಿಂ ತುಂ ಕಿತೆಂಚ್ ನೆಣಾಂಯ್ ಮ್ಹಳ್ಳಿ ಗಜಾಲ್ ಸತ್ ನ್ಹಂಯ್ಗಿ?" ಭೊರ್ಯಾವಯ್ರ್ ಭೊರ್ಕುಟಿ, ಘಾಯಾವಯ್ರ್ ಮೀಟ್, ಮಾರಾವಯ್ರ್ ಥಾಪಡ್. ಕಿತೆಂ ಜಾಪ್ ದಿತಲೊಂ?
"ಜರೀ ಸತಾಕ್ ಆನಿ ಅನ್ಭೊವಾಕ್ ಚಿಡ್ಕೊನ್ ಬಸ್ಲ್ಯಾರ್ ಕಾಣಿ ಕಶಿ ಜಾತಲಿ?" ನಿರಾಶೆಚೆಂ ಸವಾಲ್ ಮ್ಹಜೆಂ.
"ಸತ್ ಆನಿ ಅನ್ಭೋಗಾಚ್ಯಾ ಮೊಳಿಂತ್ ಕಿತ್ಯಾಕ್ ಬರಿ ಕಾಣಿ ಜಾಂವ್ಕ್ ನ್ಹಜೊ?"
ಸವಾಲ್ ಆವಾಜಾಚೆಂ ಮ್ಹಾಕಾ ಮ್ಹಜಿ ತಕ್ಲಿ ಖಂಯ್ಚಾ ತರ್ಯ್ ಫಾತ್ರಾರ್ ಧಾಡಾಯಾಂ ತಶೆಂ ಭೊಗ್ಲೆಂ.
"ಪುಣ್ ಅನ್ಭೋಗಿ ಕಥಾಕಾರಾಂನಿ ಸಾಂಗ್ಚೆಂ ಹಾವೆಂ ಆಯ್ಕಲಾಂ, ಕಾಣಿ ಬರಯ್ಜೆ ತರ್ ವಾ ಕಿತೆಂಯ್ ಬರಯ್ಜೆ ತರ್, ಅನ್ಭೋಗಾಚಿ ಗರಜ್ ನಾ. ಫಕತ್ ಚಿಂತಪ್ ಆನಿ ಕಲ್ಪನಾ ಸಕತ್ ಆಸ್ಲ್ಯಾರ್ ಪಾವ್ತಾ ಮ್ಹಣೊನ್. ಹಾಂವೆಂ ಜಾಲ್ಯಾರೀ ಬರಂವ್ಚೆಂ ತ್ಯಾಚ್ ನೆಮಾ ಪ್ರಕಾರ್. ಅನ್ಭೋಗ್ ಕ್ರಮೇಣ್ ಅಪ್ಲೇಸ್ತಕಿಂಚ್ ಯೆತಾ ನ್ಹಂಯ್ಗಿ?"
ಕಿತೆಂಗೀ ಜಾಯ್ತ್ಯಾ ತೆಂಪಾನ್ ಪಯ್ಲೆ ಪಾವ್ಟಿಂ ಆವಾಜ್ ಮೋವ್ ಪಡ್ಲೊ. ಪುಣ್ ತಾಚಿಂ ಸವಾಲ್ ತಯಾರ್ಚ್ ಆಸ್ಲ್ಲಿಂ.
"ಕಿತೆಂಚ್ ಅನ್ಭೋಗ್ ನಾತ್ಲ್ಲ್ಯಾ ವಿಶಯಾಚೆರ್ ತುವೆಂ ಕಿತ್ಲೆಂ ಬರಯ್ಲ್ಯಾರೀ ಕಿತೆಂ ಫಾಯ್ದೊ?" ಹಾಂವ್ ವೊಗೊಚ್ ರಾವ್ಲೊಂ ಸವಾಲಾಂಚ್ಯಾ ಮುಖ್ಲೆ ಶಿಂಕ್ಳೆಕ್ ರಾಕೊನ್.
"ಚಿಂತ್ಯಾಂ ತುಂ ಎಕಾ ಮಣಿಯಾರ್ಯಾಂವಿಶಿಂ ಪಳೆವ್ನ್ ತಾಚ್ಯಾ ಆಧಾರಾರ್ ತುಜಿ ಕಾಲ್ಪನಿಕತಾ ವಾಡವ್ನ್ ಬರಯ್ತಾಯ್ ನ್ಹಂಯ್ಗಿ? ತಾಚ್ಯಾ ಎಕ್ಸುರ್ಪಣಾ ವಿಶ್ಯಾಂತ್ ತಾಚ್ಯಾ ಲಿಪ್ತ್ಯಾ ಭಗ್ಣಾಂವಿಶ್ಯಾಂತ್, ತಾಚ್ಯಾ ಆಂತರಿಕ್ ಸಂಘರ್ಶಾ ವಿಶ್ಯಾಂತ್ ತುಂ ಕಿತೆಂ ಜಾಣಾಂಯ್? ಕಿತೆಂ ಬರಂವ್ಕ್ ಸಕ್ತಾಯ್? ತುಂ ಆನಿ ತುಜೆ ತಸಲೆ ಉಗ್ತ್ಯಾನ್ ದಿಸ್ಚೆಂ ಏಕ್ಚ್ ಆಯಾಮ್ ಘೆವ್ನ್ ತಾಕಾ ಪಾಕ್ಳ್ಯೊ, ಪಾಕಾಟೆ ಆನಿ ಫಾಂಟೆ ದೀವ್ನ್ ಬರಯ್ತೆಚ್ ವೆತಾನಾ ಆನ್ಯೇಕ್ ಆಯಾಮ್ ಲಿಪ್ತೆಂ ಆಸ್ಲ್ಲೆಂ ತೆಂ ಅನಿಕ್ಯೀ ಲಿಪೊನ್ ಗುಂಡಾಯೆಂತ್ಚ್ ರೊಂಬೊಂಕ್ ಕಾರಾಣ್ ಜಾತಾ ನ್ಹಂಯ್ಗಿ? ಫಕತ್ತ್ ಮಾಹೆತಿಚ್ಯಾ ಆದಾರಾನ್ ಖಂಚ್ಯಾಯ್ ವಿಶ್ಯಾಂತ್ ಕಿತ್ಲೆಂಯ್ ಬರವ್ಯೆತ್ ವ್ಹಯ್, ಆನಿ ಚಡಾವತ್ ಆಸ್ಚೆಂ ತಸಲೆಂ ಬರಪ್ಯೀ ವ್ಹಯ್ ಪುಣ್ ಹ್ಯಾ ವರ್ವಿಂ ಕೊಣಾಕ್ ಕಿತ್ಲೊ ಫಾಯ್ದೊ ಜಾತಾ? ತುಕಾಚ್ ಕಿತೆಂ ತರ್ಯ್ ಫಾಯ್ದೊ ಜಾತಾ? ತುಜಿ ವ್ಹಾಡಾವಳ್ ಜಾತಾ? ವಾ ಫಕತ್ ಮಾಹೆತ್ ಮಾತ್ ತುಜ್ಯಾ ಮೆಂದ್ವಾಂತ್ ಜಮ್ತಾ? ಕಾರ್ಯಾನ್ ವಾಪಾರ್ನಾತ್ಲ್ಲಿ ಮಾಹೆತ್ ಕಶಿ ಉಪ್ಕಾರ್ತಾ?" ಸವಾಲಾಂಚಿ ಶಿಂಕಳ್ಚ್ ಮ್ಹಜೆ ಮುಕಾರ್ ಉಬಿ ಜಾಲಿ.
ಖಂಯ್ಚಾಕ್ ಜಾಪ್ ದೀಂವ್ ಖಂಯ್ಚೆಂ ಸೊಡುಂ ಸಮ್ಜಾಲೆಂನಾ. ಹಾಂವ್ ಮೌನ್ಂಚ್ ಉರ್ಲೊಂ. ಮ್ಹಜೊ ಆವಾಜ್ ವ್ಹಾಳೊನ್ಚ್ ಗೆಲೊ, ಪಾವ್ಸಾಂತ್ ಕದ್ವಳ್ ಉದಕ್ ವ್ಹಾಳಾಂತ್ ವ್ಹಾಳ್ಚೆಬರಿ.
"ಎಕಾ ಬುಧ್ವಂತ್ ಆಂಕ್ವಾರ್ ಮನ್ಶಾನ್ ಕಾಜಾರ್ಯಾಂವಿಶಿಂ ಕಾಜಾರಿ ಜಿವಿತಾವಿಶಿಂ ಪುಸ್ತಕಾಂ ಬರಂವ್ಚೆಂ ಸಾಧ್ಯ್ ಆಸಾ, ಬರಯಿಲ್ಲೆಂಯ್ ಧಾರಾಳಾಯೆನ್ ಆಸಾ. ಪುಣ್ ಅಸಲಿಂ ಸಾಮಾನ್ಯ್ ಸುತ್ರಾಂ ಆನಿ ಸುಚಯಿಲ್ಲಿಂ ತಂತ್ರಾಂ, ಸಮಸ್ಯಾವೆಳಿಂ ಕಿತ್ಲ್ಯಾ ಜೊಡ್ಯಾಂಕ್ ಉಪ್ಕಾರ್ಲ್ಲಿಂ ಆಸಾತ್? ರಾಗಾಚ್ಯಾ ನಿಯಂತ್ರಣಾವಿಶಿಂ ದಾರಾಳ್ ಮಾಹೆತ್ ಆಸ್ಲ್ಲೊ ಮನಿಸ್ ಆಪ್ಣಾಕ್ ರಾಗ್ ಯೆತಾನಾ ವಾಪ್ರುಂಕ್ ಸಕ್ತಾಗಿ? ಪುಣ್ ಅಪ್ಲೊ ರಾಗ್ ನಿಯಂತ್ರಣ್ ಕರ್ಚೊ ಅನ್ಭೋಗ್ ಆಸ್ಚೊ ಮನಿಸ್ ತಶೆಂ ಕರುಂಕ್ ಸಕ್ತಾ ಮಾತ್ ನ್ಹಂಯ್ ಹೆರಾಂಕೀ ಶಿಕಂವ್ಕ್ ಸಕ್ತಾ ನ್ಹಂಯ್ಗಿ?" ಎಕಾಚ್ಫರಾ ಮ್ಹಾಕಾ ಕಿತೆಂಗೀ ಮೆಳ್ಲ್ಲೆಪರಿಂ ಭೊಗ್ಲೆಂ.
"ಮಾಹೆತ್ ನಾಸ್ತಾಂ ಅನ್ಭೋಗ್ ಜೊಡ್ಚೊ ಕಸೊ? ಆನ್ಭೋಗಾ ಖಾತಿರ್ ಮಾಹೆತ್ ಗರ್ಜ್ ಆಸಾ ನ್ಹಂಯ್ಗಿ?" ಹಾಂವೆಂ ಜಯ್ತಾನ್ ಮ್ಹಜೆಂ ಬುಧ್ವಂತ್ ಸವಾಲ್ ಉಡಯ್ಲೆಂ.
"ಹೆಂ ಸವಾಲ್ ಕೊಂಬಿ ಪಯ್ಲೆಂ ವಾ ತಾಂತಿಂ ಪಯ್ಲೆಂ ಮ್ಹಳ್ಳೆಬರಿ ಜಾತಾ ನ್ಹಂಯ್ಗಿ?" ಆವಾಜಾನ್ ಮ್ಹಾಕಾ ಸಂದಿಗ್ದಾಂತ್ ಘಾಲೊ. ದಾವ್ಯಾ ಪಾಂಯಾಂಚಿ ವ್ಹಾಣ್ ದಾವ್ಯಾ ಪಾಂಯಾಕ್ಚ್ ಸೊಭ್ತಾ ಶಿವಾಯ್ ಉಜ್ವ್ಯಾ ಪಾಂಯಾಂಕ್ ಒಂಬ್ವಾನಾ ನ್ಹಂಯ್ಗಿ?" ತಶೆಂಚ್ ಮಾಹೆತ್ ಆನಿ ಅನ್ಭೋಗಾಚಿ ಅದ್ಲಿಬದ್ಲಿ ಕೆಲ್ಯಾರೀ ಅಪಾರ್ತ್ಚ್ ಜಾತಾ ನ್ಹಂಯ್ಗಿ?" ಹ್ಯಾ ಸವಾಲಾಕ್ ಮ್ಹಾಕಾ ಜವಾಬ್ ಝಳ್ಕಾಲಿನಾ ತರ್ಯೀ ನಿಸ್ರೊಂಚಿ ವಾಟ್ ಝಳ್ಕಾಲಿ.
"ಹೆಂ ಆಂಬ್ಯಾರ್ ಥಾವ್ನ್ ಕುಂಬ್ಯಾರ್ ಉಡ್ಲ್ಲೆಬರಿ ಜಾಲೆಂ. ಆಸೊಂ ತಶೆಂ ತರ್ ಹಾಂವ್ ವಿಡಂಬನ್ ಬರಯ್ತಾಂ." ಹಾವೆಂ ವಿಶಯ್ಚ್ ಘುಂವ್ಡಾಂವ್ಚೆಂ ಸಾದನ್ ಕೆಲೆಂ.
ಆವಾಜಾಚೊ ಖಳ್ಕಳೊ ಆವಾಜ್ ಉಟ್ಲೊ ಖತ್ಕತ್ಚ್ಯಾ ಆದ್ನಾಪರಿ.
"ತುಜೆ ಥಂಯ್ ತಿತ್ಲೆಂ ಎಕೀನ್ಪಣ್ ಆಸಾಗಿ?" ಸವಾಲ್ ಆಯ್ಕೊನ್ ಉಡೊನ್ ಪಡ್ಲೊಂ ಹಾಂವ್ ಕಾಂಯ್ ಸಿಸ್ರಿಚ್ಯೆ ಪಾಟೆರ್ಚ್ ಬಸ್ಲಾಂ ಮ್ಹಳ್ಳೆಬರಿ.
"ವಿಡಂಬನಾಕ್ ಆನಿ ಎಕೀನ್ಪಣಾಕ್ ಕಿತೆಂ ಸಂಬಂಧ್?" ಮ್ಹಜಿ ಗುಸ್ಪಡ್ ಉಚಾರ್ಲಿ ಹಾವೆಂ.
"ವಿಡಂಬನ್ ಮ್ಹಣ್ತಾನಾ, ಖುಶಾಲಿ ರುಪಾರ್ ಖಂಚೆಯ್ ಸಂಗ್ತಿಚೊ ವಿಮರ್ಸೊ ವಾ ಠಿಕಾ ಕರ್ಚಿ ಮ್ಹಳ್ಳಿ ಸಂಗತ್ ಮಾಂದುನ್ ಘೆಂವ್ಚಿ ತರ್, ತುಜೆ ಥಂಯ್ ಎಕೀನ್ಪಣ್ ನಾಸ್ತಾನಾ ತುವೆಂ ವಿಡಂಬನ್ ಬರಂವ್ಚೆಂ ಕಶೆಂ?" ಸಂಕೀರ್ಣ್ ಸವಾಲ್ ಆವಾಜಾಚೆಂ.
"ಪುಣ್ ವಿಡಂಬನಾಕ್ ವಾ, ಬರೆಂ, ವಿಮರ್ಸೊ ವಾ ಠಿಕಾಚ್ ಮ್ಹಣ್ಯಾಂ, ಹಾಚೆಖಾತಿರ್ ಎಕೀನ್ಪಣಾಚಿ ಕಿತೆಂ ಗರ್ಜ್? ಅಶ್ಟಮೆಕ್ ಆನಿ ಇಮಾನ್ ಸಾಯ್ಭಾಕ್ ಕಸಲೊ ಸಂಬಂಧ್? ಜೆಂ ಕಿತೆಂ ದೊಳ್ಯಾಂ ಹುಜ್ರಿಂ ದಿಸ್ತಾ, ತೆಂ ಸಾರ್ಕೆಂ ಮ್ಹಣೊನ್ ಭೊಗಾನಾ ತೆದ್ನಾ ವಿಮರ್ಸೊ ವಾ ಠಿಕಾ ಕರ್ಚ್ಯಾಂತ್ ಕಿತೆಂ ಚೂಕ್? ತ್ಯಾ ಖಾತಿರ್ ಎಕೀನ್ಪಣ್ ಕಿತೆಂ ಗರ್ಜೆಚೆಂ?"
"ಮ್ಹಣ್ತಚ್, ತುವೆಂ ಖಂಚೀಯ್ ಸಂಗತ್ ಸಾರ್ಕಿ ನ್ಹಯ್ ಮ್ಹಣೊನ್ ಮಾಂದ್ತಾನಾ, ತುಜೆಂ ಚಿಂತಪ್ ಸಾರ್ಕೆಂ ಮ್ಹಣೊನ್ ಮಾಂದುನ್ ಘೆತ್ಲ್ಲೆಬರಿ ಜಾತಾ ನ್ಹಂಯ್ಗಿ? ಕಿತೆಂಚ್ ಎಕೀನ್ಪಣ್ ನಾಸ್ತಾನಾ ತುವೆಂ ಖಂಚೆಯ್ ಸಂಗ್ತಿಂತ್ ತುಜೆಂ ಚಿಂತಪ್ ಸಾರ್ಕೆಂ ಮ್ಹಣೊನ್ ಮಾಂದುನ್ ಘೆಂವ್ಕ್ ಸಾಧ್ಯ್ ಆಸಾಗಿ?" ಹ್ಯಾ ಸವಾಲಾಂಚೆ ದಾವೆಂತ್ ಹಾಂವ್ ಕಾಂಯ್ ಪಿಸೊ ಜಾತಾ ತಶೆಂ ಭೊಗ್ಲೆಂ ಮ್ಹಾಕಾ.
"ಖಂಚೀಯ್ ಸಂಗತ್ ಮ್ಹಜ್ಯಾ ಚಿಂತ್ಪಾ ಪ್ರಕಾರ್ ಸಾರ್ಕಿ ವ ಚೂಕ್ ಮ್ಹಣೊನ್ ಹಾವೆಂ ಮಾಂದುನ್ ಘೆಂವ್ಕ್ ಮ್ಹಜೆಥಂಯ್ ಆಸ್ಚೆಂ ಥೊಡೆಂ ತರ್ಯಿ ಎಕೀನ್ಪಣ್ ಪಾವಾನಾಂಗಿ?" ಹಾಂವೆಂ ಪಾಟಿಂ ಸವಾಲ್ ಘಾಲೆಂ.
"ಪುಣ್ ತುಜೆಥಂಯ್ ಕಿತ್ಲೆಂ ಎಕೀನ್ಪಣ್ ಆಸಾ?" ಆವಾಜಾಚೊ ಹಾಸೊ ಸಾದ್ಲೊ ಪಾವ್ಸಾಳ್ಯಾಂತ್ ಪಾದ್ಯಾಥಾವ್ನ್ ದೆಂವ್ಚ್ಯಾ ಪಾವ್ಳ್ಯಾಂಬರಿ. "ತುಂ ಕಿತೆಂ ಅಪ್ಲೆಂ ಎಕೀನ್ಪಣ್ ಮ್ಹಣೊನ್ ಚಿಂತಾಯ್ ತೆಂ ತುವೆಂ ಹೆರಾಂಕ್ ಶೆರ್ಮಾಂವ್ ದೀಂವ್ಕ್ ಜಮವ್ನ್ ದವರ್ಲೆಲಿಂ ಆದರ್ಶಾಂ ಆನಿ ತತ್ವಾಂ ನ್ಹಂಯ್ಗಿ? ಹೆರಾಂಕ್ ಬೊಟಾಂ ಜೊಕ್ಚೆಂ ಅಪ್ಲ್ಯಾಚ್ ಜಿಣ್ಯೆಂತ್ ವಾಪಾರ್ಚೆಂ ಸಾಧನ್ ಕೆಲಾಂಯ್ಗಿ ವಾ ಮನ್ ತರ್ಯ್ ಆಸಾಗಿ?" ಹಾಂವ್ ಕಿತೆಂಚ್ ಸಾಂಗೊಂಕ್ ಸಕ್ಲೊಂನಾ. ಆವಾಜಾನ್ಚ್ ಫುಡೆಂ ವ್ಹೆಲೆಂ.
"ತುಜೆಥಂಯ್ ಎಕೀನ್ಪಣ್ಚ್ ನಾಸ್ತಾನಾ ಖಂಚೆಯ್ ಸಂಗ್ತಿಚೆರ್ ಠಿಕಾ ಕರ್ಚಿ ಅವ್ವಲ್ ದುರ್ಭಾಗ್ಪಣ್ ನ್ಹಂಯ್ಗಿ?" ಲೊಂಕ್ಡಾ ಚಣ್ಯಾ ತಸಲೆಂ ಸವಾಲ್.
"ತರ್ ಹಾವೆಂ ವಿಡಂಬನ್ ತರ್ಯ್ ಬರಂವ್ಕ್ ನಜೊಗಿ?"
"ತುಜೆ ಥಂಯ್ ಅಪ್ಲೆಂ ಎಕೀನ್ಪಣ್ ವಾಡವ್ನ್ ಘೆಂವ್ಚಿ ಆವ್ಸ್ ಆಸಾಗಿ?"
ಆವಾಜಾಚೆಂ ಪ್ರತಿಸವಾಲ್.
"ಖಂಡಿತ್ ಜಾವ್ನ್ ಆಸಾ. ಮಾತ್ ನ್ಹಂಯ್ ಮ್ಹಜ್ಯಾ ತಿಂತೆರಾ ಥಾವ್ನ್ ಕಿತೆಂ ತರ್ಯಿ ಬರೆಂಪಣ್ ಉದೆಜೆ ಮ್ಹಳ್ಳಿ ಆವ್ಸ್ಯೀ ಆಸಾ."
ಹಾವೆಂ ಭಾಗೆವಂತ್ಪಣಾಚೊ ವೇಸ್ ಪಾಂಗುರ್ಲೊ.
"ವಾಡಾವಳೆಚಿ ದೂಕ್ ಸೊಸ್ಚೆಂ ಮನ್ ಆನಿ ತಾಂಕ್ ಆಸಾಗಿ?"
"ದೂಕ್ ನಸ್ತಾನಾ ವಾಡಾವಳ್ ಸಾಧ್ಯ್ ನಾಂಗಿ?" ಹಾವೆಂ ಅಸ್ಕತ್ ಆಶೆಚೆಂ
ಸವಾಲ್ ಕೆಲೆಂ.
"ದೂಕ್ ನಾಸ್ತಾನಾ ವಾಡಾವಳ್ ಸಾಧ್ಯ್ ಆಸಾಗಿ?" ಅನ್ಯೇಕ್
ಸಂಕೀರ್ಣ್ ಸವಾಲ್.
ಹಾವೆಂ ಮ್ಹಜೆ ಸೊಸ್ಣಿಕಾಯೆಚ್ಯಾ ನಿಮಾಣ್ಯಾ ಪಾಂವ್ಡ್ಯಾಕ್
ಪಾವ್ಲ್ಲೊಂ. ನಿದೆಚೊ ವೇಳ್ ಉತರ್ಲ್ಲೊ.
"ಕಾಣಿ ಜಾಂವ್ ವಾ ಕಿತೆಂಯೀ ಬರಯ್ನಾಂ ತರ್ ಕಾಂಯ್ಚ್
ನಷ್ಟ್ ನಾ. ಹ್ಯಾ ಸವಾಲಾಂಚೆಂ ವೊಜೆಂ ವ್ಹಾವವ್ನ್ ಕಿತೆಂಯ್ ಬರಂವ್ಚೆಂ
ಮ್ಹಜ್ಯಾನ್ ಸಾಧ್ಯ್ಯ್ ನಾ." ನಿರ್ದಾರಾಕ್ ಪಾವ್ಲೊಂ.
"ರಾವ್" ಆವಾಜಾಚೊ ತಾಳೊ ಗಾಜ್ಲೊ. "ಮ್ಹಳ್ಯಾರ್ ಸಲ್ವೊಂಚ್ಯಾ ಆದಿಂಚ್
ಸಲ್ವಣಿ ಮಾಂದುನ್ ಘೆತ್ಲಿಯ್? ಸಾದನಾ ಆದಿಂಚ್ ಪರಿಣಾಮಾಚೊ ನಿರ್ದಾರ್ ಘೆತ್ಲೊಯ್?" ಆವಾಜಾನ್ ಕೊಂಕ್ಲೆಂ ಭುರ್ಗ್ಯಾನ್
ಪೊಸ್ಕಾಟೊ ಕೊಂಕ್ಲ್ಲೆಬರಿ.
"ಮ್ಹಜ್ಯಾನ್ ಸಾಧ್ಯ್ ನಾ. ಸಾಧನ್ ಆನಿ ಪರಿಣಾಮಾಚಿ ಗಜಾಲ್
ಮ್ಹಾಕಾ ಪಡೊನ್ ವಚೊಂಕ್ ನಾ." ಕಂಗಾಲಾಯೆನ್ ಹಾತ್
ಪಾಪುಡ್ಲೆ.
"ತುಜ್ಯಾನ್ ಸಾಧ್ಯ್ ನಾ ತೊ ನಿರ್ದಾರ್ ಘೆತ್ಲೊಯ್ ಖಂಯ್ಚ್ಯಾ ಆದಾರಾಚೆರ್? ತುವೆಂ ಕಿತೆಂ ತರೀ
ಸಾಧನ್ ಕರ್ನ್ ತ್ಯಾ ಆದಾರಾಚೆರ್ ತುಂ ತಸಲ್ಯಾ ನಿರ್ದಾರಾಂಕ್ ಆಯ್ಲೊಯ್?"
ಸವಾಲ್ ಆವಾಜಾಚೆಂ. ಕಿಡಿ ಖಾವ್ಪಿ ಸುಕ್ಣ್ಯಾನ್ ರುಕಾಕ್ ಬೊಂಚಾಯಿಲ್ಲೆಬರಿ.
"ನಾ, ಸಾದನ್ ಕರ್ಚಿ ಹುಮೆದ್ಯೀ ಮ್ಹಜೆ ಥಂಯ್ ಉರ್ಲಿನಾ."
ಹಾಂವೆಂ ಸಲ್ವಣೆಚ್ಯೆ ಪಿಂರ್ಗೊಣೆನ್ ಜಾಪ್ ದಿಲಿ.
"ಕಿತ್ಯಾಕ್? ತುಕಾ ತುಜ್ಯಾ ಸಾದನಾಚ್ಯಾ ಪರಿಣಾಮಾಚೆರ್ ದುಬಾನ್ ಭೊಗ್ತಾ ದೆಕುನ್? ತುವೆಂ
ಸಾದನ್ ಕರ್ಚೆಮ್ ಆದಿಂಚ್ ಪರಿಣಾಮ್ ನಿರ್ದಾರ್ ಕೆಲಾಯ್
ನ್ಹಂಯ್ಗಿ? ಆನಿ ತ್ಯಾ ವರ್ವಿಂ, ಸಾಧನ್ ಕರ್ಚಿ ತುಜಿ ಹುಮೆದ್ ನಿವ್ಲಿ
ನ್ಹಂಯ್ಗಿ?" ಆವಾಜ್ ಸತ್ಚ್ ಉಲಯ್ತಾಲೊ ಆನಿ ಸತ್ ಕೆದ್ನಾಂಯ್ ದುಕಾಳ್.
ಮ್ಹಜ್ಯಾ ಕಾಳ್ಜಾಚೆಂ ಖೊವಂಚ್ ಜಿವೆಂ ಜಾಲೆಂ.
"ಪರಿಣಾಮಾಚೊ ಅಂದಾಜ್ ಕರ್ಚೊ ಚೂಕ್ಗಿ?" ಹಾವೆಂ ಪಾಟಿಂ
ಸವಾಲ್ ಕೆಲೆಂ.
"ಪರಿಣಾಮಾಚೊ ಕಿತೆಂ ಮಹತ್ವ್?" ಜರೀ ತುಜೆಂ ಸಾದನ್ ನಿತಳ್ ಆನಿ ತುಜ್ಯೆ ತಾಂಕಿಪುರ್ತೆಂ ಆಸಾ ತರ್
ಪರಿಣಾಮ್ ತೆಂ ಸಾದನ್ ಕರ್ಚೆಂ ಪ್ರಕ್ರಿಯೆಂತ್ ಆಸಾ ಶಿವಾಯ್, ತ್ಯೆ
ಪ್ರಕ್ರಿಯೆಚ್ಯಾ ಪರಿಣಾಮಾಚೆರ್ ನಾ ನ್ಹಂಯ್ಗಿ? ಜರೀ ತುಜ್ಯಾ
ಸಾಧನಾಂತ್ ತುಕಾ ತೃಪ್ತಿ ಮೆಳ್ಳಿ ತರ್ ತ್ಯಾ ಸಾದನಾಚೊ
ಪರಿಣಾಮ್ ಕಿತೆಂ ಜಾಲ್ಯಾರೀ ತುಕಾ ತಾಚಿ ಪರ್ವಾ ಕಿತ್ಯಾಕ್?"
ಎಕಾಚ್ಫರಾ ಮ್ಹಜ್ಯೆ ಮತಿಂತ್ ಝಗ್ಲಾಣೆಂ ಝಗ್ಲಾಯ್ಲೆಂ. ಮ್ಹಜ್ಯಾ ಕಾಳ್ಜಾಚೆಂ ಕೊವಂಚ್ ಝಡ್ಲೆಂ, ಮತಿ ಪಡ್ದ್ಯಾರ್ ಲ್ಹಾನ್ ಬುರಾಕ್ಚೊ ಜಾವ್ನ್ ಅಶೀರ್ ಉಜ್ವಾಡಾಧಾರ್ ಭಿತರ್ ತಿಳ್ತಾ ತಶೆಂ ಭೊಗ್ಲೆಂ.
ಆತಾಂ ಮ್ಹಾಕಾ ಸಮ್ಜಾಲೆಂ. ಸಲ್ವಣ್ ಆನಿ ಜಯ್ತ್ ವಿಂಗಡ್ ವಿಂಗಡ್ ನ್ಹಂಯ್, ಸಲ್ವಣೆಂತ್ ಜಯ್ತ್ ಆಸಾ ಆನಿ ಜಯ್ತಾಂತ್ ಸಲ್ವಣ್.
ಹ್ಯ್ ಪಾವ್ಟಿಂ ಹಾಂವ್ ಸಲ್ವೊಂಚೊಂನಾ ಕಿತ್ಯಾಕ್ ಸಲ್ವಣ್ ಪರ್ಯಾಂತ್ ಜಯ್ತ್ಚ್ ಜಾವ್ನಾಸಾ.
ಹಾಂವ್ ಕಾಣಿ ಬರಂವ್ಕ್ ಬಸ್ಲೊಂ.
ಕಥಾಝರ್
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
