ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಬುಧ್ವಂತ್ ಲೋಕ್ ಚರಿತ್ರೆಚೆಂ ಲಿಸಾಂವ್ ಶಿಕ್ತಾ ಆನಿಂ ಬೆಕೂಫ್ ಲೋಕ್ ಚರಿತ್ರೆಕ್ ನಿಯಾಳುನ್ ವೊಗೊಚ್ಚ್ ರಾವ್ತಾ’
ಆಯ್ಚೆ ಆನಿ ಆಧ್ಲೆ ದೀಸ್
ವರಸ್ : 2005
ಅಂಕೊ : 14
ಮಯ್ನೊ : ಅಗೋಸ್ತ್
ಸಂಪಾದಕೀಯ್ - 14.
ವಲ್ಲಿ ಕ್ವಾಡ್ರಸ್
ಆಮಿಂ ಜಾಯ್ತೆಪಾವ್ಟಿಂ ಹೆಂ ಚಿಂತ್ಲಾಂ ಯಾ ಹೆರಾಂನಿ ಉಲಂವ್ಚೆಂ ಆಯ್ಕಲಾಂ ಆಸ್ಯೆತ್;
’ಕಿತ್ಲೊ ಬರೊ ಆಸ್ಲ್ಲೊ ಆಧ್ಲೊ ಕಾಳ್’, ಆಯ್ಚೆ ದೀಸ್ ಕಿತ್ಲೆ ಭಿರಾಂಕುಳ್ ನ್ಹಯ್ಗೀ?
ವಾ ’ಆಧ್ಲ್ಯಾ ಕಾಳಾಚಾ ಫಿಲ್ಮಾಂತ್ಲಿಂ ಪದಾಂ ಕಿತ್ಲಿಂ ಅಪುರ್ಭಾಯೆಚಿಂ ಆಸ್ಲ್ಲಿಂ, ಆತಾಂಚಿಂ ಪದಾಂ ಬೇಕಾರ್..’
ಸವಾಲ್ ಹಾಂಗಾ ಆಧ್ಲೆಂ ಬರೆಂಗೀ ಯಾ ಆತಾಂಚೆಂ ಬರೆಂಗೀ ಮ್ಹಳ್ಳೆಂ ನ್ಹಯ್ ಬಗಾರ್ ಏಕ್ ಘಡ್ಯೆ ಆಧ್ಲ್ಯಾ ದಿಸಾಂಚೊ ಆನಿ ಆತಾಂಚಾ ದಿಸಾಂವಿಶಿಂ ಏಕ್ ನಿಹಾಳ್ ಕರ್ಚೊ. ಆಯ್ಚಾ ದಿಸಾ ಆಮಿಂ ವ್ಹಡ್ ಜಾಲ್ಯಾಂವ್, ಹ್ಯಾ ಸಂಸಾರಾಚಾ ರಿತಿ ನೇಮಾಂ ಪ್ರಕಾರ್ ಜಿಯೆಂವ್ಕ್ ಲಾಗ್ಲ್ಯಾಂವ್, ಬರೆಂ ವಾಯ್ಟ್ ವಿಶ್ಯಾಂತ್ ಆಮ್ಕಾಂ ಬರಿ ಮಾಹೆತ್ ಆಸಾ, ಏಕ್ ಘಡಿ ಉಡಾಸ್ ಕರ್ಯಾಂ ಭುರ್ಗ್ಯಾಪಣಾರ್ ಆಯ್ಕಾಲ್ಲ್ಯಾ ಥೊಡ್ಯಾ ಪದಾಂ/ಕಂತಾರಾಂಚೊ;
’ಆಮೊರೆಚಾ ವೆಳಾರ್.. ಆಮೊರಿ ರಜಾರ್ ಕರ್ಯಾಂ.. ಆಂಜಾಂ-ಭಡ್ವ್ಯಾಂಕ್ ಸಾಂಗಾತಾ ಘೆವ್ನ್.. ಮರಿಯೆಕ್ ನಮಸ್ಕಾರ್ ಕರ್ಯಾಂ...’ ಹೆಂ ಕಂತಾರ್ ಆಮಿಂ ಭುರ್ಗ್ಯಾಪಣಾಂತ್ ಸಾಂಜೆರ್ ಆಮೊರೆಚಿ ಘಾಂಟ್ ವಾಜ್ತಚ್ ಗಾಂವ್ಕ್ ಆಸ್ಲ್ಲೆಂ.
’ಸಕ್ಕಡ್ ಸಾಂಗಾತಾ ಮೆಳ್ಯಾಂ.. ಸಕ್ಕಡ್ ಲಾಗಿಂ ಸರ್ಯಾಂ....’ ಹರ್ಯೆಕಾ ವರ್ಸಾಚಾ ಮೊಂತಿ ಫೆಸ್ತಾಚಾ ಸಂದರ್ಭಾಂನಿ ಗಾಂವ್ಕ್ ಆಸ್ಲ್ಲೆಂ ಆತಾಂಯ್ ಗಾಯ್ತಾತ್.
ಹಿಂ ಕಂತಾರಾಂ ಆಯ್ಕಾತಾಸ್ತಾನಾ ಎಕಾ ಥರಾಚೊ ಬರೊ ಅನ್ಭೋಗ್ ಜಾಂವ್ಚೊ ಸಹಜ್ ನ್ಹಯ್ಗಿ? ಫಕತ್ ಕಂತಾರಾಂ ಕಿತ್ಯಾಕ್? ಪದಾಂಚೊಯ್ ಉಡಾಸ್ ಕಾಡ್ಯಾಂ;
’ಆಮಿ ದೊಗಿ ಸೆಜಾರಾ ವೆತಾಂವ್ ಕಾಜಾರಾಕ್.. ಬಾಯ್ಲ್ ಭುರ್ಗಿಂ ತಿಂ ರೊಸಾಕ್ ಗೆಲಿಂ ಯೇವ್ನಾಂತ್ ತಿಂ ಘರಾ..’
ವ ’ಎಕ್ಕಸಕ ಎಕ್ಕಸಕ ಎಕ್ಕಸಕ್ಕಲಾ’ ಆಜ್ಕಾಲ್ಚಾ ದಿಸಾಂನಿ ಹಿಂ ಪದಾಂ ಜಾಂವ್ ಕಂತಾರಾಂ ಜಾಂವ್ ಆಸಾತ್? ಆಸಾತ್ ತರ್ ಖೈಂತರ್ಯೀ ಕೊಣಯ್ಚಿಂಯ್ ನಕ್ಲಾಂ ಕಾಡುಂಕ್ ಮಾತ್ರ್ ಮ್ಹಣ್ ಮ್ಹಜಿ ಅಭಿಪ್ರಾಯ್.
ಆಯ್ಚಾ ಕಾಳಾರ್ ಹಿಂ ಪದಾಂಚ್ ಆಸಾಜಯ್ ಮ್ಹಣ್ ಸಾಂಗ್ಚೊ ಮ್ಹಜೊ ಇರಾದೊ ನ್ಹಯ್, ಸಂಸಾರ್ ಬದಲ್ಲಾ. ಆಧ್ಲ್ಯಾ ಕಾಳಾಚಿಂ ಸಾಯ್ಕಲಾಂ ಆತಾಂ ನಾಂತ್, ಆತಾಂ ಮನಿಸ್ ಗಾಡಿಯಾಂನಿ ಭಂವ್ತಾ. ಆಧ್ಲ್ಯಾ ಕಾಳಾರ್ ಸೆಜಾರ್ಚಾ ಕೊಣಾಯ್ಕೀ ಆಪಂವ್ಕ್ ’ಕೂ’ ಮ್ಹಣ್ ಕುವೊ ಘಾಲ್ತಾಲಿಂ ಆತಾಂ ಫೊನಾಚೆರ್/ಮೊಬಾಯ್ಲಾಚೆರ್ ಏಕ್ ಮಿಸ್ಸ್ಕಾಲ್ ವ ಎಸ್ಸೆಮೆಸ್ ಕರುಂಕ್ ಸಕ್ತಾತ್. ಆನಿಂ ಹಾಕಾ ಪ್ರಗತಿ ವ ನವೆಂಸಾಂವ್ ಮ್ಹಣ್ತಾಂವ್.
ಹ್ಯಾ ಆಧ್ಲ್ಯಾ ಆನಿಂ ಆತಾಂಚಾ ದಿಸಾಂ ಮಧೆಂ ಮನಿಸ್ ಜಿಯೆತಾ ಕಿತ್ಯಾಕ್ ಹ್ಯಾ ಯುಗಾಂ ಯುಗಾಂನಿ ಕಿತೆಂಯ್ ಬದ್ಲೊಂಕ್ ನಾತ್ಲ್ಲೆಂ ಆಸಾ ತರ್ ತಿ ಭುಕ್, ಲಜ್ ಆನಿಂ ತಾನ್.
ಹೊ ಮಯ್ನೊ ಅಗೋಸ್ತಾಚೊ - ಸ್ವಾತಂತ್ರಾಚೊ. ಆನಿಂ ಆಮ್ಕಾಂ ಆಸ್ಚಾ ಸ್ವಾತಂತ್ರಾಚೊ ಉಡಾಸ್ ಕಾಡ್ಯಾಂ;
ಆಜ್ಕಾಲ್ ಆಮ್ಚಾ ಪೆಲ್ಯಾನ್ ಖಂಚೆಂ ಖಾಯ್ಜಯ್ (ಗಾಯೆಚೆಂ ಮಾಸ್ ಖಾತೆಲ್ಯಾಂಕ್ ವಿಶ್ವ ಹಿಂದು ಪರಿಶದ್ ಆಡಾಯ್ತಾ), ಖಂಯ್ಚೆಂ ಪಿಯೆಜಾಯ್ (ಸ್ಕಾಚ್ ಪಿಯೆಂವ್ಚೆಂ ಆಮ್ಚಾ ಭಾರತೀಯ್ ಸಂಸ್ಕೃತೆಚಿ ರಿವಾಜ್ ನ್ಹಯ್ ಮ್ಹಣ್ತಾ ಸ್ವದೇಶಿ ಜಾಗರಣ್ ಮಂಚ್), ಕಿತೆಂ ನೆಸಾಜಯ್ (ಸೂಟ್-ಕೋಟ್ ಬ್ರಿಟಿಶಾಂಚಿ ಮುಸ್ತಾಯ್ಕಿ ಮ್ಹಣೊನ್ ಆರ್ಎಸ್ಸೆಸ್ ಸಾಂಗ್ತಾ), ಕಿತೆಂ ಉಲಯ್ಜಾಯ್? (ಆಯ್ಲೆವಾರ್ ಥೊಡೆ ಕೊಂಕ್ಣಿ ಕಮ್ಯೂನಿಸ್ಟ್/ನಾಸ್ತಿಕ್ ಕೊಂಕ್ಣಿ ಭಾಸೆಕ್ಚ್ ನಿರ್ನಾಮ್ ಕರಿಜಾಯ್ ಮ್ಹಣ್ತಾತ್) ಖಂಯ್ಚಾ ಭಾಸೆಂತ್ ಉಲಯ್ಜಾಯ್? (ಬಿಜೆಪಿಚೊ ಏಕ್ ವಾಂಟೊ ಆಮ್ಚಾ ದೇಸಾಂತ್ ಫಕತ್ ಹಿಂದಿ ಭಾಸ್ ಉರಾಜಯ್ ಆನಿ ತಿ ಹಿಂಧುಸ್ತಾನಿ ಭಾಸ್ ಜಾವ್ನ್ ಆಸಾಜಯ್ ಮ್ಹಣ್ತಾ) ಖಂಚಾ ಧರ್ಮಾನ್ ಜಿಯೆಜಾಯ್? (ಭಾರತ್ ದೇಸ್ ಹಿಂದ್ವಾಂಚೊ ದೇಸ್ ಮ್ಹಣ್ತಾ ಆರೆಸ್ಸೆಸ್/ಭಜರಂಗ್ ದಳ್) ಕಶೆಂ ಜಿಯೆಜಾಯ್? (ಶಿವ್ಸೇನಾಚಾಂನಿ ಸಾಂಗ್ಚೆಪ್ರಕಾರ್ ಫೆಬ್ರೆರ್ ಚೊವ್ದಾ ತಾರಿಕೆರ್ ಪ್ರೇಮಿಂಚೊ ದೀಸ್ ಆಚರಣ್ ಕರ್ಚಿ ರಿವಾಜ್ ಭಾರತೀಯ್ ರಿವಾಜ್ ನ್ಹಯ್) ಕೊಣಾಚಿ ಪುಜಾ ಕರಿಜಾಯ್? ಕೊಣಾಕ್ ಮಾನ್ ದೀಜಾಯ್ ಮ್ಹಳ್ಳೆಂ ಸಯ್ತ್ ನಿರ್ಧಾರ್ ಕರ್ಚೆಂ ಕೊಣೆಂಗೀ. ಆನಿಂ ಸೂಕ್ಷ್ಮ್ ರಿತಿನ್ ಪಳೆಲೆಂ ತರ್ ಸಂಸಾರಾಂತ್ ಜಾಂವ್ಚಿಂ ಝಗ್ಡಿಂ-ಝುಜಾಂ ಯಾ ಮನಸ್ತಾಪ್ ಹೆಚ್ಚ್ ಕಾರಾಣಾಂಕ್ ಲಾಗೊನ್. ಜಾಂವ್ ತೆಂ ಇಸ್ರಾಯೆಲ್ ಪ್ಯಾಲೆಸ್ತಿನಾಚೆಂ, ಜಾಂವ್ ತೆಂ ಭಾರತ್ - ಪಾಕಿಸ್ತಾನಾಚೆಂ, ಜಾಂವ್ ತೆಂ ಭಾರತಾಭಿತರ್ಲೆಂ ಆಂತರಿಕ್ ಝುಜ್.
ಆತಾಂ ಹೆಂಚ್ ಝುಜ್ ಕೊಂಕ್ಣೆಂತ್ ಉದೆಲಾಂ - ಬೊಲಿ-ಲಿಪಿಯೆಚಾ ರುಪಾರ್. ತರ್ ಪ್ರಗತೆಚಾ ದಿಸಾಂನಿ ಜೆಯೆಂವ್ಚಾ ಹ್ಯಾ ದಿಸಾಂನಿ ಆಮಿಂ ಸ್ವತಂತ್ರ್ ಮ್ಹಣ್ ಉಡಾಸ್ ಕಾಡ್ಚಾ ವೆಳಾರ್ ಆಧ್ಲ್ಯಾ ದಿಸಾಂಚೊ ಉಡಾಸ್ ಕಾಡ್ಲೊ ತರ್ ಎಕಾ ಘಡ್ಯೆಕ್ ತರ್ಯ್ ಬರೆಂಚ್ ನ್ಹಯ್ಗಿ?
- ವಲ್ಲಿ ಕ್ವಾಡ್ರಸ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
