ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮಟ್ವಿ ಕಥಾ: ಮೆಟಾಂ
ಜೊರ್ಜಿ ಪೀಂತ್ ಆಯ್ಕೊಳ್: ಕೊಂಕ್ಣಿ ಸಾಹಿತ್ಯಾಂತ್ ಮ್ಹಾಕಾ ಹಾಚಿ ಸಳಾವಳ್ ಜಾಲ್ಲಿ ತಾಚಾ ಅಖ್ರೇಚಾ ಥೊಡ್ಯಾ ವರ್ಸಾಧಿಂ ತರ್ಯ್ ಹಾಂವೆಂ ಕಾಳ್ಜಾ ಮನಾನ್ ಏಕ್ ಪ್ರಾಮಾಣಿಕ್ ಸಾಹಿತಿ, ಚಿಂತ್ಪಿ ಮ್ಹಣ್ ಮಾಂಧುನ್ ಘೆತ್ಲ್ಲ್ಯಾ ಭೋವ್ ಥೊಡ್ಯಾಂ ಪಯ್ಕಿ ಹೊ ಎಕ್ಲೊ. ಆಮಿಂ ಜಾಯ್ತೆಪಾವ್ಟಿಂ ಎಕಾಮೆಕಾ ರಾಗ್ ಕೆಲಾ ತರ್ಯ್ ಎಕಾಮೆಕಾ ಥಂಯ್ ಗೌರವ್ ಆನಿ ಅಭಿಮಾನ್ ದವರ್ಲಾ. ಹಿ ಭೋವ್ಶಾ ತಾಚಾ ಹೆರ್ ಪಂಚ್ವೀಸ್ ಕಾಣ್ಯಾಂ ತಸಲಿಚ್ಚ್ ಆನಿ ತೆಚ್ಚ್ ಪರಿಪಕ್ವ್ ವಿಚಾರಾಂಚಿ, ತಿಚ್ಚ್ ಮನಿಸ್ ಆನಿ ಜಾತ್-ಕಾತ್ ಮ್ಹಳ್ಳ್ಯಾ ಪರ್ಧ್ಯಾ ಮಧೆಂ ಶಿರ್ಕಾಲ್ಲಿ, ತುಕಾ ಜರೂರ್ ರುಚ್ತೆಲಿ ಮ್ಹಣ್ ಪಾತ್ಯೆತಾಂ..
ದೆ|ಜೊರ್ಜಿ ಪೀಂತ್ ಆಯ್ಕೊಳಾಚ್ಯೊ ಹೆರ್ ಮಟ್ವ್ಯೊ ಕಾಣ್ಯೊ: ಅವಾಜ್, ಕೊರ್ಗೊರ್ಲೆಂ
ಜೊರ್ಜಿ ಪೀಂತ್ ಆಯ್ಕೊಳ್
[10-08-1956 - 11-05-2003]
ನಶಿಬಾಕ್ ದುರ್ಸೊಂ? ಜಲ್ಮ್ ದಿಲ್ಲ್ಯಾ ಆವಯ್ ಬಾಪಾಯ್ಕ್ ದುರ್ಸೊಂ? ವ ರಚ್ಲ್ಲ್ಯಾ ರಚ್ಣಾರಾಕ್ ದುರ್ಸೊಂ ಮ್ಹಾಕಾ ಕಳಾನಾತ್ಲ್ಲೆಂ. ಆಯ್ದಾನಾಂಚಿ ರಾಸ್ ಪಡ್ಲ್ಲಿ. ರಾತ್ ಮಧ್ಯಾನ್ ಉತಾರ್ಲ್ಲಿ: ವ್ಹಯ್ ಕುಜ್ನಾಚ್ಯಾ ಘಡಿಯಾಳಾರ್ ಫಾಂತ್ಯಾಚಿಂ ದೋನ್ ವೊರಾಂ. ಆನಿ ಸಗ್ಳಿಂ ಆಯ್ದಾನಾಂ ಧುವ್ನ್ ಘಾಲ್ನ್ ಕೂಜ್ನ್ ನಿತಳ್ ಕರ್ನ್ ವಚೊನ್ ನಿದಾಜೆ. ಸಕಾಳಿಂ ಸಾಡೆ ಪಾಂಚ್ ವೊರಾಂಚೆರ್ ಉಟಾಜೆ. ಆಜ್ ಕಾಂಯ್ ದೋನ್ ವೊರಾಂಚಿ ನೀದ್ ಮೆಳ್ಳಿ ತರ್ ನಶೀಬ್ ಮ್ಹಣಾಜೆ. ಹಾಂವೆಂ ಲಿಕ್ವಿಡ್ ಸೋಪ್ ಆಯ್ದನಾಂತ್ ವೊತ್ಲೊ ಆನಿ ಘಾಸ್ಚ್ಯಾರ್ ಪಡ್ಲಿಂ. ಆಂವ್ಸರಾನ್ ವೆಗಿಂ ವೆಗಿಂ.
ತ್ಯಾ ಎಕಾ ದಿಸಾಯೀ ಹಾಂವ್ ಬಾಂಯ್ಚ್ಯಾ ಕಾಟ್ಯಾಲಾಗಿಂ ಆಯ್ದಾನಾಂ ಧುವ್ನ್ ಆಸ್ತಾನಾಂಚ್ ತೊ ಆಯಿಲ್ಲೊ. ಕೊಣ್ ಕಿತೆಂ ಕಳಿತ್ ನಾತ್ಲ್ಲ್ಯಾನ್ ಹಾಂವ್ ಮುಲಾಜ್ ನಾಸ್ತಾನಾ ಉಲಯಿಲ್ಲಿಂ. ಕೊಣ್ ಜಾಣಾಂ ಕೊಣ್ ತೊ? ಮಾಂಯ್ ತರೀ ಆತ್ತಾಂ ಯೆತಾಂ ಮ್ಹಣೊನ್ ಪೆಂಟೆಕ್ ಗೆಲ್ಲಿ ಎದೊಳೀ ಆಯಿಲ್ಲಿನಾಂ. ಮ್ಹಾಕಾ ಅಶೆಂ ಪರ್ಕಿ ಚೆಡ್ಯಾಂಲಾಗಿಂ ಉಲಂವ್ಚೆಂ ಮ್ಹಳ್ಯಾರ್ ಜಾಯ್ನಾಂ. ಹಿ ಚೆಡ್ಯಾಂಚಿ ಜಾತ್ಚ್ ತಶಿ. ಪಯಿಲ್ಲೆಂ ಹಾಂಚಿ ದೀಶ್ಟ್ ಹರ್ಧ್ಯಾರ್ ವೆತಾ. ಮಾಗಿರ್ ಮುಸ್ಕರಾರ್.
"ಕೊಣ್ ಜಾಯ್ ಆಸ್ಲ್ಲೆಂ? ಮಾಂಯ್ ಘರಾ ನಾಂ. ಮಾಗಿರ್ ಯೇ. ತಿ ಪೆಂಟೆಕ್ ಗೆಲ್ಯಾ, ಆತ್ತಾಂ ಯೆತೆಲಿ." ಘುಸ್ಪೊಡೊನ್ ಕಿತೆಂಗೀ ಪಟಪಟ ಕರ್ನ್ ಸಾಂಗೊನ್ ಸೊಡ್ಲ್ಲೆಂ ಹಾಂವೆಂ. ತಿತ್ಲ್ಯಾರ್ ತಾಚಿ ದೀಶ್ಟ್ ಮ್ಹಜ್ಯಾ ಮುಸ್ಕರಾರ್ ಪಾವ್ಲ್ಲಿ ಆನಿಂ ಕಿಸ್ಕ್ ಕರ್ನ್ ಹಾಸ್ಲ್ಲೊ ತೊ. ತೊ ತಾಚೊ ಹಾಸೊ ಪಳೆವ್ನ್ ಮ್ಹಜ್ಯಾ ದೊಂಪ್ರಾಗಾಂಟಿಂಚ್ಯೊ ಖಿಳಿ ಕಾಂಪೊಂಕ್ ಲಾಗ್ಲ್ಲ್ಯೊ. ಹರ್ಧ್ಯಾಭಿತರ್ ಪಿಸೊಳಿಂ ಉಭೊಂಕ್ ಲಾಗ್ಲ್ಲಿಂ. ಸಾಂಗಾತಾಚ್ ರಾಗ್ಯೀ ಆಯಿಲ್ಲೊ.
"ಕಿತೆಂ ಹಾಸ್ತಾಯ್ ತುಂ? ಮ್ಹಜ್ಯಾ ತೊಂಡಾರ್ ಕಿತೆಂ ಮಾಂಕೊಡ್ ದಿಸ್ತಾಯೆ ತುಕಾ?" ಸಣ್ಸಣೊನ್ಂಚ್ ವಿಚಾರ್ಲ್ಲೆಂ ಹಾಂವೆಂ.
"ನಾಂ ಮಾಂಕೊಡ್ ನ್ಹಯ್, ಕರಿ ದಿಸ್ತಾ. ಆನಿಂ ತುಜ್ಯಾ ತೊಂಡಾರ್ ತಿ ಕರಿಯೀ ಸೊಭ್ತಾ." ಸಾಂಗೊನ್ ಪರ್ತೆಕ್ ಹಾಸ್ಲ್ಲೊ ತೊ. ಹಾಂವೆಂ ಕುಂಡ್ಲೆಂ ವಿಸ್ರೊನ್ ಬಾಜ್ವೆಚ್ಯಾ ಹಾತಾಕ್ ಪುಸುಂಕ್ ಸಾಧನ್ ಕರ್ತಾನಾ, ಹಾತಾಂತ್ಲೆಂ ಕುಂಡ್ಲೆಂ ನಿಸ್ರೊನ್ ಪಡೊನ್ ಫುಟ್ಲ್ಲೆಂ. ವಯ್ ತ್ಯಾ ಕುಂಡ್ಲ್ಯಾಬರಿಚ್ ತ್ಯಾ ಘಡಿಯೆಹಾವ್ನ್ ಮ್ಹಜ್ಯಾ ಜಿಣ್ಯೆಕೀ ಫುಟ್ ಆಯಿಲ್ಲಿ. ಹಾಂವ್ ಕಂಗಾಲ್ ಜಾವ್ನ್ ಹಾತಾಂತ್ ಕುಂಡ್ಲ್ಯಾಚ್ಯೊ ಕಯ್ಲ್ಯೊಚ್ ಪಳೆವ್ನ್ ರೂಕ್ ಜಾಲ್ಲೆ ತೆದಾಳಾಚ್ ಮಾಂಯ್ ಯೇವ್ನ್ ಪಾವ್ಲ್ಲಿ.
"ಕೋಣ್ರೆ ಪುತಾ, ಯೇ ಭಿತರ್ ಯೇ ಬಸ್." ಹ್ಯಾ ಘೊಡ್ಯಾನ್ ತುಕಾ ಭಿತರ್ ಬಸೊಂಕೀ ಸಾಂಗ್ಲೆಂನಾಂಗೀ ಯೇ ಯೇ" ಮ್ಹಣಾತ್ತ್ ತಾಕಾ ಆಪವ್ನ್ ಘೆವ್ನ್ ಘರಾ ಭಿತರ್ ಗೆಲ್ಲಿ. "ಸದ್ದ್ಯಾಕ್ ಹಿಚೆ ಪುರ್ಪುರೆ ಚುಕ್ಲೆ" ಮ್ಹಳ್ಳ್ಯಾ ಖುಶೇನ್ ಕಯ್ಲೆಚೆ ಕುಡ್ಕೆ ಮಾಡಾಮುಳಾಂತ್ಲ್ಯಾ ಶೆಣೆತಾಂ ಪಂದಾ ಲಿಪವ್ನ್ ದವರ್ನ್ ಉದ್ಕಾಚೊ ಕೊಳ್ಸೊ ಘೆವ್ನ್ ಹಾಂವ್ ಪಾಟ್ಲ್ಯಾ ಬಾಗ್ಲಾಂತ್ಲ್ಯಾನ್ ಭಿತರ್ ಗೆಲ್ಲಿಂ. ಕಿತೆಂ ಉಲಯ್ತಾತ್ ತೆಂ ಆಯ್ಕಾಜೆನಿಯೆ? ಪುಣ್ ಮ್ಹಾಕಾ ಆಯ್ಕೊಂಕ್ ಆವ್ಕಾಸ್ಚ್ ಮೆಳ್ಳೊ ನಾ. ಮಾಂಯ್ ಬೋಬ್ ಮಾರಿಲಾಗ್ಲಿ.
"ವಯ್ಗೋ ಏಕ್ ಚ್ಯಾ ಕರ್ನ್ ಹಾಡ್ಗೋ" ಹಾಂವ್ ಚ್ಯಾ ಕರ್ನ್ ವರ್ನ್ ಗೆಲಿಂ ಆನಿ ತಾಕಾ ದಿಲಿ.
"ಅಳೆಗೋ, ಹೊ ಮ್ಹಜ್ಯಾ ಕುಳಾರ್ಚ್ಯಾ ಸೆಜಾರಾಚ್ಯಾ ಬಾವ್ತಿಸಾಮಾಚೊ ಪೂತ್. ಗಲ್ಫಾಂತ್ ಆಸಾ. ರಜೆರ್ ಆಯ್ಲಾ ಆನಿ ಸಯ್ರಿಕ್ ಸೊಧುನ್ ಹಾಂಗಾ ಆಯ್ಲಾ. ಕಿತೆಂ ಮ್ಹಣ್ತಾಯ್ಗೋ?" ಮಾಂಯ್ಚೆಂ ಉಲವ್ಣೆಂ ಶೀದಾ. ಪುಣ್ ಮ್ಹಾಕಾ ಮಾತ್ರ್ ಮ್ಹಜೆಂ ಕಾಳಿಜ್ ತಾಳ್ಯಾಂತ್ ಆಯಿಲ್ಲೆಬರಿ ಭಗ್ಲ್ಲೆಂ.
ಎಕಾ ಮಹಿನ್ಯಾಂತ್ ಆಮ್ಚೆಂ ಕಾಜಾರ್ ಜಾಲ್ಲೆಂ
ದುಸ್ರ್ಯಾ ಮಹಿನ್ಯಾಂತ್ ತಾಚಿ ಕಂಪೆನಿ ಬಂದ್ ಜಾಲ್ಲಿ
ತಿಸ್ರ್ಯಾ ಮಹಿನ್ಯಾಂತ್ ತಾಚಿ ಸೊರ್ಯಾಚಿ ರೂಚ್ ದಿಸೊನ್ ಆಯಿಲ್ಲಿ
ತೊ ಪರ್ತೆಕ್ ಗಲ್ಫಾಕ್ ಗೆಲೊನಾ. ಏಕ್ ರಿಕ್ಷಾ ಘಾಲ್ನ್ ಘೊಳಾಲಾಗ್ಲೊ. ನಾಡಾಂತ್ ರಿಕ್ಷಾಚಿ ಜೋಡ್ ಖಂಯ್ ಪುರೊ? ಹಾಂವೆಂ ಥೊಡಿಂ ಫುಲಾಂ ಝಡಾಂ ದವರ್ಲ್ಲಿಂ. ಬಿಡಿ ಭಾಂದುಂಕ್ ಧರ್ಲಿ. ತಾಚ್ಯಾ ಜೊಡಿಚೆ ಪಯ್ಶೆ ತಾಚ್ಯಾ ಸೊರ್ಯಾಕ್ಚ್ಚ್ ಜಾತಾಲೆ.
ಹ್ಯಾ ಮಧೆಂ ಪಾಟಾಪಾಟ್ ದೊಗಾಂ ಭುರ್ಗಿಂ ಜಾಲಿಂ.
ರಗಾತ್ ಹಾತಾಚೆಂ ಬೋಟ್ ಶಿಧ್ತಾನಾ ಮ್ಹಾಕಾ ಜಾಗ್ ಜಾಲಿ. ವೊರಾಂ ಪಳೆಲಿಂ ಅಡೇಜ್ . ಹಾತಾಕ್ ಜೆವ್ಣಾಚ್ಯಾ ಚುರಿಯೆಕೀ ವಾಕ್ರಾಚಿ ಧಾರ್ ಜಾಯ್. ಪಾಟ್ಲ್ಯನ್ ಆವಾಜ್ ಜಾಲೊ. ಪಳೆತಾನಾ ಮದಾಮೆಚೆಂ ಧಾ ವರ್ಸಾಂ ಥಾವ್ನ್ ಆಸ್ಚೆಂ ಮೇಯ್ಡ್ ತಾಮ್ಳಾಂಚೆಂ ಟ್ರೇ ಭರ್ನ್ ಗ್ಲಾಸ್ ಹಾಡ್ನ್ ’ಮದಾಮ್ ಮದಾಮ್’ ಮ್ಹಣೊನ್ ತೊಂಡಾಂತ್ಲ್ಯಾನ್ ಲೊಣಿಂಚ್ ಗಳವ್ನ್ ಮದಾಮೆಕ್ ಆಪ್ಲ್ಯಾ ಮುಟಿ ಭಿತರ್ ದವರ್ಲಾಂ. ಆತಾಂ ವಚೊನ್ ನಿದ್ಲೆಂ ತರ್ ಸಕಾಳಿಂ ಸಾತಾಂಕ್ ಮದಾಮೆಕ್ ಚ್ಯಾ ದೀಂವ್ಕ್ ಉಟ್ತಾ. ಜೆಮೆಂವ್ಚ್ಯಾ ದೊಳ್ಯಾಂಕ್ ಉದಾಕ್ ಮಾರ್ನ್ ಪರ್ತೆಕ್ ಆಯ್ದಾನಾಂ ಘಾಸ್ಚ್ಯಾರ್ಚ್ ಪಡ್ಲಿಂ.
ಸಟ್ಟ್ ಕರ್ನ್ ಭುರ್ಗ್ಯಾಂಚೊ ಉಡಾಸ್ ಆಯ್ಲೊ. ಮ್ಹಜ್ಯಾ ದೊಳ್ಯಾಂಚ್ಯಾ ಖಾಂಚಿಂನಿ ದುಃಖಾಂ ಪಾಜ್ರೊಂಕ್ ಲಾಗ್ಲಿಂ. ಕಿತ್ಲೆಂ ಸಾಧನ್ ಕೆಲ್ಯಾರೀ ತಾಂಚೊ ಉಡಾಸ್ ಘಡ್ಯೆ ಘಡ್ಯೆ ಕಿತ್ಯಾಕ್ ಯೆತಾ ತೆಂ ಸಮ್ಜಾನಾಂ ಮ್ಹಾಕಾ. ಹೊ ಸೊರೊ ಪಿಯೆವ್ನ್ ರಿಕ್ಷಾ ಆಡ್ ಘಾಲ್ನ್ ಮೆಲೊ. ಪುಣ್ ಹ್ಯಾ ಭುರ್ಗ್ಯಾಂಕ್ ಮ್ಹಜ್ಯಾ ತಾಬೆಂತ್ ಸೊಡ್ನ್ ಗೆಲೊ.
ಫುಲಾಂಚ್ಯಾ ಝಡಾಂನಿ ಆನಿಂ ಬಿಡಿಯೊ ಬಾಂಧುನ್ ಕಶೆ ತರೀ ದೀಸ್ ವೆತಾಲೆ. ಹಾಂವ್ ಎಕ್ಸುರಿಂ ಜಾಲ್ಲಿಂ. ಮಾಂಯ್ಕ್ ಆಸ್ರ್ಯಾಂತ್ ರಾವವ್ನ್ ಭಾವಾನ್ ಘರ್ ವಿಕ್ಲ್ಲೆಂ. ಮ್ಹಾಕಾ ಕುಳಾರ್ ನಾತ್ಲ್ಲೆಂ. ಮಾಂಯ್ ಮಾಂವ್ ತರೀ ಪಯ್ಲೆಂಚ್ ನಾತ್ಲ್ಲಿಂ. ಏಕ್ ದೀಸ್ ದೆರಾನ್ ಘರಾಚೆ ವಾಂಟೆ ಕರುಂಕ್ ಘರ್ ಜಾಗೊ ವಿಕ್ತಾನಾ ಹಾಂವೆಂ ಭಾಡ್ಯಾಚೆಂ ಘರ್ ಸೊಧ್ಚೆಂ ಪಡ್ಲ್ಲೆಂ. ಚ್ಯಾರ್ ಫುಲಾಂ ಝಡಾಂಚೊ ಆಸ್ರೊ ಆಸ್ಲ್ಲೊ ತೊಯೀ ಚುಕ್ಲ್ಲೊ. ತೆಣೆಂ ಬಿಡಿಯಾಂಕ್ ಜಾಯ್ತಿ ಧುಮ್ಟಿ ಖೊಲೆ ಮೆಳಾನಾತ್ಲ್ಲೆ. ಜಾಯ್ತೆ ಪಾವ್ಟಿಂ ಹಾಂವ್ ಉಪಾಶಿಂ ರಾವೊನ್ ಭುರ್ಗ್ಯಾಂಕ್ ವಾಡ್ಲ್ಲೆಂ ತೆದಾಳಾ ತಿಂ ಧಾಕ್ಟುಲಿಂ ಭುರ್ಗಿಂ ’ತೂಂಯೀ ಜೇವ್ ಮಾಂಯ್’ ಮ್ಹಣೊನ್ ರಡ್ತಾನಾ ಹಾಂವ್ ಕಂಗಾಲ್ ಜಾತಾಲಿಂ.
ದುಸ್ರಿ ವಾಟ್ ನಾಸ್ತಾನಾ ಕೂಲಿಚ್ಯಾ ಕಾಮಾಕ್ ವಚೊಂಕ್ ಧರ್ಲೆಂ. ತೆದಾಳಾ ಕಳ್ಳೆಂ ಮ್ಹಾಕಾ - ಎಕಾ ವಿಧವ್ ಬಾಯ್ಲೆನ್ ಹ್ಯಾ ಸಮಾಜೆಂತ್ ದೀಸ್ ಪಾಶಾರ್ ಕರ್ಚಿ ಕಿತ್ಲ್ಯಾ ಕಶ್ಟಾಂಚೆಂಗೀ ಮ್ಹಳ್ಳೆಂ. ಆಂಕ್ವಾರ್ಯಾಂಕ್, ವಿಧುರಾಂಕ್ ಆನಿ ಕಾಜಾರ್ಯಾಂಕ್ ಜಾಲ್ಯಾರೀ ಫುಲಾಂಚೊ ಪರ್ಮಳ್ ಜಾಯ್ ಆಸ್ಲ್ಲೊ. ಪುಣ್ ಫುಲಾಝಡಾಚೊ ಪೋಸ್ ಕರ್ಚೆಂ ಕೊಣಾಕೀ ನಾಕಾ ಆಸ್ಲ್ಲೆಂ.
ಹಾಂವ್ ಥಕ್ಲ್ಲಿಂ
ಸಗ್ಳ್ಯೊ ವಾಟೊಯೀ ಧಾಂಪ್ಲ್ಲ್ಯೊ. ಸರ್ವ್ ಆಕ್ಕಾಡೆ ಬಂದ್ ಜಾಲ್ಲೆ.
ತ್ಯಾ ಎಕಾ ರಾತಿಂ, ಸ್ಟೂಲಾಚೆರ್ ರಾವೊನ್ ಪಕ್ಕಾಸ್ಯಾಕ್ ದೊರಿಯೆಚೆಂ ಏಕ್ ಪೋಂತ್ ಭಾಂದ್ಲ್ಲೆಂ. ದುಸ್ರ್ಯಾ ಪೊಂತಾಕ್ ಪಾಸ್ ತಯಾರ್ ಕರ್ತಾನಾ ಭುರ್ಗ್ಯಾನ್ ಆವಾಜ್ ಕೆಲ್ಲೊ.
"ಮಾಂಯ್ ಮ್ಹಾಕಾ ಭುಕ್ ಲಾಗ್ತಾ ಮಾಂಯ್" ಮ್ಹಾಕಾ ಕಿತೆಂ ಕರ್ಚ್ಂ ಕಳ್ಳೆಂನಾ. ತಾಕಾ ಪೋಟ್ಭರ್ನ್ ಉದಾಕ್ ಭರವ್ನ್ ನಿದಾವ್ನ್, ಹಾಂವೆಂ ಸಗ್ಳಿ ರಾತ್ ಪಾಶಾರ್ ಕೆಲ್ಲಿ.
ಹಾತಾಂತ್ಲೆಂ ಡಿಶ್ಶ್ ನಿಸ್ರೊನ್ ನಿಸ್ರೊನ್ ಉರ್ಲೆಂ. ವೊರಾಂ ತೀನ್ ಜಾಲ್ಲಿಂ. ನೀದ್ ಕಠಿಣಾಯೆನ್ ಯೆತಾಲಿ. ಹ್ಯಾ ಸಾಯ್ಭಿಣಿಚಿ ದಿವಾನಿಯಾ ಜಾಯ್ತ್ ತರ್, ಎಕಾ ಫಾಂತ್ಯಾ ಥಾವ್ನ್ ಅನ್ಯೇಕಾ ಫಾಂತ್ಯಾ ಪರ್ಯಾಂತ್ ಘೊಳೊನ್ ಘೊಳೊನ್ ಪಾಟ್ ಪೆಂಕಾಡ್ ಏಕ್ ಜಾತಾ. ಜಾಂವ್ದಿ ಕಶೆಂಯೀ ದೋನ್ ವರ್ಸಾಂ ಕಾಬಾರ್ ಜಾವ್ನ್ ಯೆತಾತ್ ಆನಿಂ ಥೊಡೆಚ್ ದೀಸ್ ಉರ್ಲ್ಯಾತ್.
ಮ್ಹಜಿಂ ಭುರ್ಗಿಂ ಆಸ್ರ್ಯಾಂತ್ ಕಶಿಂ ಆಸಾತ್ ಕೊಣ್ ಜಾಣಾಂ? ಹಾಂವೆಂ ತಾಂಕಾಂ ಸೊಡ್ನ್ ಯೆತಾನಾಂ ದೊದೋನ್ ಜೊಡಿ ಪಿಂಜ್ಕರ್ ಮುಸ್ತಾಯ್ಕಿ ಮಾತ್ರ್ ತಾಂಚೆಲಾಗಿಂ ಆಸ್ಲ್ಲಿ. ದೆವಾನ್ ಕಿತ್ಯಾಕ್ ಮ್ಹಜೆ ತಸಲ್ಯಾಕ್ಚ್ಚ್, ತಸಲ್ಯಾ ಆಂಜಾಳ್ ಗುಣೇಸ್ತ್ ಭುರ್ಗ್ಯಾಂಕ್ ದಿಲಾಂ? ತಿಂ ಕೊಣಾ ತರೀ ಆಸ್ಪತ್ದಾರಾಚ್ಯಾ ಘರಾಂತ್ ಜಲ್ಮಾಲ್ಲಿಂ ತರ್ ಕಿತ್ಲಿಂ ಸೊಭ್ತಿಂ ಆಸ್ಲ್ಲಿಂ? ಆತಾಂ ತಾಂಚ್ಯಾ ಖಾಂವ್ಚ್ಯಾ ಜೆಂವ್ಚ್ಯಾ ಪ್ರಾಯೆಚೆರ್ ತಾಂಕಾಂ ಆಸ್ರ್ಯಾಚೆಂ ತರ್ನ್ ಪೇಜ್ ಫಾವೊ ಜಾಲ್ಯಾ ತರೀ ಕಿತ್ಯಾಕ್? ತಾಣೆಂ ಕಿತೆಂ ಗುನ್ಯಾಂವ್ ಕೆಲಾ? ತ್ಯಾ ದೊಗಾಂಯ್ ಭುರ್ಗ್ಯಾಂಚೊ ಹಾಸೊ ಉಡಾಸ್ ಯೆತಾನಾ ಮ್ಹಜೆಂ ಕಾಳಿಜ್ ಶಿಂದ್ತಾ. ತಾಣಿಂ ಭುಕೆನ್ ದೊಳ್ಯಾಂತ್ ದುಃಖಾಂ ಭರೊನ್ ಆಸ್ಲ್ಯಾರೀ ರಡಾನಾಸ್ತಾಂ ರಾವೊಂಕ್ ಸಾಧನ್ ಕರ್ಚೆಂ ಪಿಂತುರ್ ದೊಳ್ಯಾಂ ಮುಖಾರ್ ಯೆತಾನಾ ಸಗ್ಳೆಂಯೀ ಸೊಡ್ನ್ ಧಾಂವ್ಯಾಂ, ತಾಂಕಾಂ ವೆಂಗೆಂತ್ ಘೆವ್ನ್ ರಡ್ಯಾಂ ತಶೆಂ ಭಗ್ತಾ.
ನವೊ ವಿಗಾರ್ ಆಯಿಲ್ಲೊ. ಭಾಂಗಾರ್ ಮನಿಸ್. ತಾಕಾ ಕೊಣೆಂಗೀ ಮ್ಹಜಿ ಗಜಾಲ್ ಸಾಂಗ್ಲ್ಲ್ಯಾಕ್, ತಾಣೆಂಚ್ ತಾಚ್ಯಾ ಎಕಾ ವಳ್ಕಿಚ್ಯಾ ಮನ್ಶ್ಯಾಲಾಗಿಂ ವಿಚಾರ್ನ್ ವಿಜಾ ಹಾಡಯಿಲ್ಲಿ. ಭುರ್ಗ್ಯಾಂಕ್ ಆಸ್ರ್ಯಾಂತ್ ದವರ್ಚಿ ವ್ಯವಸ್ಥಾಯ್ ಕೆಲ್ಲಿ. ಆನಿಂ ಹಾಂವ್ ಗಲ್ಫಾಕ್ ಪಾವ್ಲ್ಲಿಂ. ಹಜಾರ್ ಸ್ವಪ್ಣಾಂ ಘೆವ್ನ್ ಆಯಿಲ್ಲಿಂ. ಮ್ಹಜ್ಯಾ ಭುರ್ಗ್ಯಾಂಕ್ ಬರೆಂ ವಸ್ತುರ್, ಪೊಟ್ಭರ್ ಜೆವಾಣ್ ಆನಿ ಬರೆಂ ಶಿಕಾಪ್ ದಿವಯ್ತೆಲಿಂ ಮ್ಹಣೊನ್ ಸಪ್ಣೆಲ್ಲಿಂ. ದೆವಾಕ್ ಹಜಾರ್ ಅರ್ಗಾಂ ದೀವ್ನ್ ಆಯಿಲ್ಲಿಂ.
ಕಾಯ್ಲಿಂತ್ ಥಾವ್ನ್ ಉಜ್ಯಾಂತ್ ಪಡ್ಲ್ಲಿಂ. ಭಿಕೆಚೊ ಸಾಂಬಾಳ್, ಘರ್ಚಿ ನಿತಳಾಯ್ ಕರ್ಚಿ ಕರ್ನ್ ರಾಂದಾಪ್. ದಿಸಾಕ್ ಅಟ್ರಾ ವೊರಾಂ ಘೊಳ್ಲ್ಯಾರೀ ಮದಾಮೆಚೆ ಸೊವೆ ಶಿರಾಪ್ ಆನಿ ಗಾಳಿ. ಹ್ಯಾ ತಮಿಳ್ ಮೇಯ್ಡಾಚಿ ರಾಣಿಯೆ ಮರ್ಜಿ. ಧನಿನೆನ್ ಫರ್ಮಾಂವ್ಚ್ಯಾಕೀ ಹಾಣೆಂ ಫರ್ಮಾಂವ್ಚೆಂ ಚಡ್. ವಯ್ಲ್ಯಾನ್ ತಾಕಾ ಮಾಪ್ಳಿ ಡ್ರಾಯ್ವರಾಚೊ ಸಂಬಂಧ್.
ತಿಂ ಕಿತೆಂಯೀ ಕರುಂ ಹಾಂವ್ ಮ್ಹಜೆಂ ಕಾಮ್ ಕರ್ತಾಲಿಂ. ಹೆ ಪಾವ್ಟಿಂ ಗಾಂವಾಕ್ ಗೆಲ್ಲಿಂ ಕೊಣಾಚೆ ತರೀ ಹಾತ್ಪಾಂಯ್ ಧರ್ನ್ ದುಸ್ರ್ಯಾ ಖಂಚ್ಯಾ ತರೀ ಬೊಂಗ್ಲ್ಯಾಂತ್ ಯೆತೆಲಿಂ. ಅಶೆಂ ಚಿಂತುನ್ ಮ್ಹಜಿ ದೂಃಖ್ ಆನಿ ದುಃಖಾಂ ಧಾಂಬುನ್ ಧರ್ನ್ ಘೊಳೊನ್ ಆಯಿಲ್ಲಿಂ.
ಯೆತಲಿಂ ಪುತಾ, ತುಮ್ಚೆಲಾಗಿಂ ಯೆತಲಿಂ. ತುಮ್ಕಾಂ ಪೊಟ್ಲುನ್ ಧರ್ತೆಲಿಂ.
ಕುಜ್ನಾಭಾಯ್ರ್ ಬೋಬ್ಚ್ ಆಯ್ಕಾಲಿ. ಮದಾಮ್ ತಾಳೊ ಪಿಂದುನ್ ಬೊಬಾಟ್ತಾಲಿ. ಪಾಟಿಂ ಘುಂವೊನ್ ಪಳೆತಾಂ ತರ್ ಮಾಪ್ಳಿ ಡ್ರಾಯ್ವರಾಚೊ ಕೊಲ್ಲರ್ ಧರ್ನ್ ವೋಡ್ನ್ ಹಾಡ್ತಾಲಿ. ಸಾಂಗಾತಾ ತಮ್ಳಾಂಚೆಂ ಮೇಯ್ಡ್. ಗಜಾಲ್ ಕಿತೆಂ ಸಮ್ಜಾನಾಸ್ತಾಂ ಹಾಂವ್ ದೊಳೆ ಸೊಡ್ನ್ ಪಳಂವ್ಚ್ಯಾರ್ಚ್ ಪಡ್ಲಿಂ.
"ಹೊ ಸರ್ವೆಂಟಾಚ್ಯಾ ಕುಡಾಕ್ ಕಿತ್ಯಾಕ್ ಆಯಿಲ್ಲೊ?" ಮದಾಮ್ ಬೊಬಾಟ್ಲಿ.
"ತಾಕಾ ಮೆಳೊಂಕ್ ಮದಾಮ್" ತಮ್ಳಾಂಚ್ಯಾನ್ ಮ್ಹಜ್ಯಾ ಕುಶಿನ್ ಬೋಟ್ ಜೊಕ್ಲೆಂ.
ಹಾಂವ್ ಪಡ್ತಾನಾ ಮ್ಹಜ್ಯಾ ಭುರ್ಗ್ಯಾಂಚಿಂ ರಡ್ಕುರಿಂ ತೊಂಡಾಂ ಮ್ಹಜ್ಯಾ ದೊಳ್ಯಾಂ ಮುಖಾರ್ ಆಯ್ಲಿಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
