ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
"ಎಕಾ ಕವಿನ್ ಫಕತ್ತ್ ಜಾಗ್ವಣ್ ದಿವ್ಯೆತಾ" - ವಿಲ್ಫ್ರೆಡ್ ಒವೆನ್
ಕವಿತಾ, ಕವಿ, ಪ್ರಶಸ್ತಿ ಆನಿ ನಾಂವ್
ವರಸ್ : 2006
ಅಂಕೊ : 26
ಮಯ್ನೊ : ಅಗೋಸ್ತ್
ಸಂಪಾದಕೀಯ್ - 26.
ವಲ್ಲಿ ಕ್ವಾಡ್ರಸ್
’ಕೊಂಕ್ಣಿ ಕುಟಾಮ್ ಬಾಹ್ರೇಯ್ನ್’ ಹಾಣಿಂ ವರ್ಸಾನ್ ವರಸ್ ದಿಂವ್ಚಿ ಸಾಹಿತಿಕ್ ಪ್ರಶಸ್ಥಿ ಹ್ಯಾ ವರ್ಸಾ ಕವಿ ಮೆಲ್ವಿನ್ ರೊಡ್ರಿಗಸಾಕ್ ದಿಲಿ. ಕೊಂಕ್ಣಿ ಕವಿತಾಶೆತಾಂತ್ ಉರ್ಭೆಂತ್ ವಾವ್ರ್ ಕೆಲ್ಲ್ಯಾ ಮೆಲ್ವಿನ್ ರೊಡ್ರಿಗಸಾನ್ ಫಕತ್ತ್ ಕವಿತಾಶೆತ್ ಮಾತ್ರ್ ನ್ಹಂಯ್, ಕೊಂಕ್ಣೆಕ್ ಲಗ್ತಿ ಜಾಲ್ಲ್ಯಾ ಸಭಾರ್ ಹೆರ್ ವರ್ಗಾಂನಿಂಯ್ ವಾವ್ರ್ ಕೆಲಾ ತೆಂ ಭೋವ್ ಥೊಡ್ಯಾಂಕ್ ಮಾತ್ರ್ ಕಳಿತ್ ಆಸ್ಯೆತ್. ಜಾಂವ್ ತೊ ಕೊಂಕ್ಣಿ ಸಬ್ಧಾಂಕ್ ಎಕ್ಟಾಂಯ್ ಕರುಂಕ್ ಗಾಂವಾರ್ ಗಾಂವ್ ಭಂವ್ಲ್ಲೊ ವಾವ್ರ್, ಜಾಂವ್ ಕೊಂಕ್ಣಿ ಪತ್ರಾಚೆಂ ಸಹ-ಸಂಪಾದಕ್ಪಣ್ ಕೆಲ್ಲೊ ವಾವ್ರ್, ಜಾಂವ್ ಕಾನಡಿ ಭಾಸೆಂತ್ಲ್ಯಾ ಕಾಣ್ಯಾಂಕ್ ಕೊಂಕ್ಣೆಕ್ ಅಣ್ಕಾರ್ ಕೆಲ್ಲೊ ವಾವ್ರ್, ಜಾಂವ್ ’ಪ್ರಗತಿ ಪ್ರಕಾಶನ್’ ಹಾಂತುಂ ಕೆಲ್ಲೊ ವಾವ್ರ್.
ಅಂತರ್ಜಾಳಿಚೆರ್ ಕೊಂಕ್ಣಿ ಸಾಹಿತ್ಯಾಚಿ ಕೃಶಿ ಸುರು ಜಾಲ್ಲಿ ಆಯ್ಲೆವಾರ್ ಮ್ಹಣ್ಯೆತಾ. ಪೊಟಾಚಾ ಗ್ರಾಸಾಖಾತಿರ್ ಅಪ್ಲೊ ಮಾಂಯ್ಗಾಂವ್ ಸೊಡ್ನ್ ಪಯ್ಸ್ ಪಾವ್ಲ್ಲ್ಯಾ ಮಂಗ್ಳುರ್ಗಾರಾಂಕ್ ಹೆಂ ಖರೆಂಚ್ ಜಾವ್ನ್ ದೆವಾನ್ ದಿಲ್ಲೆಂ ದೆಣೆಂ ಜಶೆಂ ಜಾತಾನಾ ನವೆ ಜಶೆಂ ಕುರ್ವೊನ್ ಬಸ್ಲೆಲೆ ಬರವ್ಪಿ ಸಯ್ತ್ ಜೆಮೆಂತ್ಲೆ ಉಟೊನ್ ಪರತ್ ಪೆಣೆರ್ ಧರಿಲಾಗ್ಲೆ ಆನಿ ಬರಂವ್ಕ್ ಲಾಗ್ಲೆ. ಅಶೆಂ ಎಕಾ ಉಪ್ರಾಂತ್ ಏಕ್ ಮ್ಹಣೊನ್ ಅಂಕಣಾಂ, ಸಾಯ್ಟಾಂ ಸುರು ಜಾಲಿಂ ಆನಿ ಪತ್ರಾಂ ಸಯ್ತ್. ಖರೆಪಣಿಂ ಕೊಂಕ್ಣೆಕ್ ಹಾಂತು ಕಿತ್ಲೊ ಫಾಯ್ದೊ ಜಾತಾ ವ ಜಾಲಾ ಮ್ಹಳ್ಳೆಂ ತರ್ಕ್ ಸದ್ದ್ಯಾಕ್ ಸೊಡ್ಲೆಂ ತರ್ ಕೊಂಕ್ಣೆಂತ್ ಭೋವ್ಶಾ ಎದೊಳ್ ಪರ್ಯಾಂತ್ ಇತ್ಲೆಂ ಕಾರ್ಯಾಳ್ ರಿತಿನ್ ವಾವ್ರ್ ಚಲ್ಲ್ಲೊಚ್ ನಾ.
ಚ್ಯಾರ್ ವರ್ಸಾಂ ಅಧಿಂ ಮೆಲ್ವಿನಾನ್ ’ಕುಪಾಂ ಪೊಂದ್ಲಿಂ ಮುಖಾಂ’ ಬುಕಾಂತ್ ಮ್ಹಜೆಂ ಏಕ್ ಕವಿತಾ ಪರ್ಗಟ್ ಕರುಂಕ್ ಆಸಾ ದೆಖುನ್ ಮ್ಹಜಿ ಸಾಹಿತಿಕ್ ಪರಿಚಯ್, ತಾಚೆಸವೆಂ ಮ್ಹಾಕಾ, ತ್ಯಾ ಬುಕಾಚ್ಯೊ ಕಿತ್ಲ್ಯೊ ಪ್ರತಿಯೊ ಅಮಾನತ್ ಕರುಂಕ್ ಆಸಾತ್ ತಾಚೊ ದುಡು (ಉಣ್ಯಾರ್ ಉಣೆ ಧಾ ಪ್ರತಿಯೊ ಅಮಾನತ್ ಕರುಂಕ್ ಆಸ್ಲ್ಲ್ಯೊ) ಧಾಡುಂಕ್ ಪತ್ರ್ ಧಾಡ್ಲೆಂ, ಹಾವೆಂ ತಶೆಂಚ್ ಕೆಲೆಂ.
ದೋನ್ ವರ್ಸಾಂ ಉಪ್ರಾಂತ್ ಪರತ್ ತಸಲೆಂಚ್ ಪತ್ರ್ ಮೆಲ್ವಿನಾ ಥಾವ್ನ್ ಆಯ್ಲೆಂ ’ವಲ್ಲಿ ತುವೆಂ ಆಧ್ಲೆಪಾವ್ಟಿಂ ದುಡು ದಿಲಾಯ್ ದೆಖುನ್ ಹ್ಯಾ ಪಾವ್ಟಿಂ ತುವೆಂ ದುಡು ದೀಜಾಯ್ ಮ್ಹಣ್ ನಾ, ಪುಣ್ ತುಜಿ ಏಕ್ ಕವಿತಾ ’ಕಾಳೊಕಾಂತ್ಲಿಂ ಕಾಂತಾರಾಂ’ ಬುಕಾಂತ್ ಪರ್ಗಟ್ ಕರ್ತಾಂ ದೆಖುನ್ ತುಜಿ ಸಾಹಿತಿಕ್ ಪರಿಚಯ್ ಧಾಡ್’. ಪುಣ್ ಹಾವೆಂ ಮ್ಹಜ್ಯಾ ಪರಿಚಯೆ ಸವೆಂ ದೋನ್ ಹಜಾರ್ ರುಪಯ್ ಧಾಡ್ನ್ ಅಶೆಂ ಬರಯ್ಲೆಂ; ’ಆದ್ಲೆ ಪಾವ್ಟಿಂ ತುವೆಂ ಬೂಕ್ ಪರ್ಗಟ್ತಾನಾ ತುವೆಂ ಪೊಯ್ಶೆ ದಿಲ್ಲೆಯ್ ಮ್ಹಣ್ ಹ್ಯಾ ಪಾವ್ಟಿಂಯ್ ತೊ ಪ್ರೆಸ್ಸಾಚೊ ತುಕಾ ಪೊಯ್ಶೆ ದೀನಾಕಾ ಮ್ಹಣ್ತಾ ಮ್ಹಣ್ ಹಾಂವ್ ಪಾತ್ಯೆನಾ ದೆಖುನ್ ಸರ್ವಾಂಪರಿಂ ಹಾಂವ್ಯ್ ಎಕ್ಲೊಂ ಮ್ಹಣ್ ಮಾನುನ್ ಘೆ. ಹೊಚ್ಚ್ ಬೂಕ್ ಕುವೆಯ್ಟಾಂತ್ ಉಗ್ತಾವಣ್ ಕರಯ್ಲೊ (ಉಗ್ತಾವಣಾಚ್ಯೊ ಪ್ರತಿಯೊ ಹಾವೆಂ ಖುದ್ದ್ ಮೋಲ್ ದೀವ್ನ್ ಹಾಡ್ಲ್ಲ್ಯೊ ಆನಿ ತ್ಯಾ ಮುಖೆಲ್ ಸಯ್ರ್ಯಾಂನಿ ವೆಲ್ಯೊ - ತೆಂ ಆಸೊಂ).
ಆಧ್ಲ್ಯಾ ವರ್ಸಾ ಹಾವೆಂ ಮ್ಹಜಾ ಮತಿಂತ್ ಆಸ್ಲ್ಲಿ ಏಕ್ ಆಶಾ ಸುಫಳ್ ಕರ್ಚಾಕ್ ಇಕ್ರಾ ಕವಿಂಚಾ ಕವಿತಾಂಚೊ ಏಕ್ ಬೂಕ್ ಕಾಡುಂಕ್ ಚಿಂತ್ಲೆಂ. ಹ್ಯಾ ಇಕ್ರಾ ಕವಿಂ ಪಯ್ಕಿ ಪಾಂಚ್ ಮಾಲ್ಘಡೆ ಆನಿ ಸ ತರ್ನಾಟೆ. ಆನಿ ತರ್ನಾಟೆ ಚಡಾವತ್ ಮ್ಹಜಾ ಮೊಗಾಚೆ ಆನಿ ಭೋವ್ಶಾ ಮ್ಹಾಕಾ ಸಮ್ಜತೆಲೆ ಮ್ಹಳ್ಳ್ಯಾ ಇರಾದ್ಯಾನ್ ಹಾವೆಂ ಎಕ್ಲ್ಯಾನ್ ಪಾಂಚ್ ಹಜಾರ್ ರುಪ್ಯಾಂಚೊ ಏಕ್ ಪೋಶಕ್ ಹಾಡ್ಚಿ ವಿಲೇವಾರಿ ಕೆಲಿ ತರ್ ಹೆಂ ಯೋಜನ್ ಮ್ಹಜ್ಯಾನ್ ಪೊಂತಾಕ್ ಪಾವಂವ್ಕ್ ಸಾಧ್ಯ್ ಮ್ಹಣ್ ವಿನತಿ ಕೆಲಿ. ಪುಣ್ ಕೊಣಾಯ್ಕೀ ಕಸಲಿಚ್ ಬಂದಡ್ ನಾತ್ಲ್ಲಿ. ಸ ಜಣಾಂ ಪಯ್ಕಿ ತೆಗಾಂಕ್ ಮಾತ್ರ್ ಹೆಂ ಸಾಧ್ಯ್ ಜಾಲೆಂ ಆನಿ ಬೂಕ್ ಪರ್ಗಟೊನ್ ಆಯ್ಲೊ ಆನಿ ಹಾವೆಂ ದಿಲ್ಲ್ಯಾ ಭಾಸೆಫರ್ಮಾಣೆ ಸರ್ವ್ ಇಕ್ರಾ ಕವಿಂಕ್ ಪಂಚ್ವೀಸ್ ಬುಕಾಂಚ್ಯೊ ಪ್ರತಿಯೊ ಸಂಭಾವನ್ ರುಪಾರ್ ಧಾಡ್ಲ್ಯೊ (ತಾಂತುಂ ಎಕ್ಲ್ಯಾ ದೊಗಾಂನಿ ಬೂಕ್ ಪಾವ್ಲ್ಲ್ಯಾಕ್ ಏಕ್ ಸಬ್ಧ್ ಬರಂವ್ಕ್ಯ್ ಮನ್ ಕೆಲೆಂ ನಾ - ತೆಂ ಆಸೊಂ).
ಥೊಡ್ಯಾ ದಿಸಾಂನಿ ಮ್ಹಾಕಾ ಆಯ್ಕೊಂಕ್ ಮೆಳ್ಳೆಂ ’ವಲ್ಲಿ ಪೊಯ್ಶೆ ಘೆತಾ ಆನಿ ಬೂಕ್ ಛಾಪ್ತಾ’. ಆಮ್ಚೊ ಥೊಡೊ ಲೋಕ್/ಥೊಡೆ ಬರವ್ಪಿ ತೆ ಖುದ್ದ್ ಬರೆಂ ಕರುಂಕ್ ಸಕಾನಾಂತ್ ಮಾತ್ರ್ ನ್ಹಂಯ್ ಹೆರಾಂಚೆಂ ಬರೆಂ ಪಳೆಂವ್ಕ್ಯ್ ಸಕಾನಾಂತ್.
ಆಮ್ಚಾ ಜಿಣ್ಯೆಂತ್ ಆಮಿ ಸಂಸಾರಾಕ್ ಜಾಪಿ ದೀವ್ನ್ಂಚ್ ಬೊಸ್ಲ್ಯಾಂವ್ ತರ್ ಆಮ್ಚೆಲಾಗಿಂ ಬರಿಂ ಕಾಮಾಂ ಕರುಂಕ್ ವೇಳ್ ಕಸೊ ಮೆಳ್ಚೊ? ಅಶೆಂಚ್ ಹಾವೆಂ ಆಯ್ಲೆವಾರ್ ಶೆಂಭೊರ್ ಕವಿಂಚಾ ಕವಿತಾಂಕ್ ಪರ್ಗಟ್ ಕರ್ಚೆಂ ಯೆವ್ಜಣ್ ಘಾಲ್ನ್, ಚಡುಣೆಂ ಸಾಠ್ ಕವಿಂಕ್ ಇಮೇಯ್ಲಾರ್ ಸಂಪರ್ಕ್ ಕರ್ನ್ ತಾಂಚಿ ಸಾಹಿತಿಕ್ ಪರಿಚಯ್ ಮಾಗ್ಲಿ, ತಾಚೆಸವೆಂ ಕೊಣಾಕ್ ಕಿತ್ಲೆ ಬೂಕ್ ಅಮಾನತ್ ಕರುಂಕ್ ಆಸಾತ್ ತೆಂ ಆತಾಂಚ್ ಕಳಂವ್ಕ್ ಉಪ್ಕಾರ್ ಮಾಗ್ಲೊ. ಪುಣ್ ಹಾಂತುಂ ಜಾಪ್ ಬರಂವ್ಕ್ ಮನ್ ಕೆಲ್ಲೆ ಫಕತ್ತ್ ಅಟ್ರಾ ಕವಿ. ಎಕ್ಲ್ಯಾ ಮಹಾನ್ ಸಾಹಿತಿನ್ ಮ್ಹಾಕಾ ಅಶೆಂ ಸಾಂಗ್ಲೆಂ "ಎದೊಳ್ ಪರ್ಯಾಂತ್ ವಂತಿಗ್ಯೊ ಘೆವ್ನ್ ಕಂತಿಗ್ಯೊ ಪರ್ಗಟ್ತಲೊ ಮೆಲ್ವಿನ್ ಎಕ್ಲೊ ಆಸ್ಲ್ಲೊ, ಪುಣ್ ಆತಾಂ ತುಂಯ್ ಉದೆಲೊಯ್ಗಿ?" - ಪಳೆಯಾ ಕಿತ್ಲೆಂ ನಿಶ್ಟುರ್ ಉತಾರ್!
ಬೂಕ್ ಪರ್ಗಟ್ ಕರ್ಚೆಂ ಕಾಮ್ ತಿತ್ಲೆಂ ಸಲೀಸಾಯೆಚೆಂ ನ್ಹಂಯ್ ಮ್ಹಣ್ ಹಾಂವ್ ತರ್ಯ್ ಪಾತ್ಯೆತಾಂ. ತೇಂಯ್ ಹೆರಾಂಚೆ ಬೂಕ್ ಪರ್ಗಟ್ ಕರ್ಚೆಂ ಖರೆಂಪಣಿಂ ’ವಾಟೆರ್ ವೆಚಾ ವಾಗಾ ಮ್ಹಾಕಾ ಯೇವ್ನ್ ಖಾಗಾ’ ಮ್ಹಳ್ಳೆಪರಿಂ. ಕೊಣಾಕ್ ಹೆಂ ನಾಂವಾಖಾತಿರ್ ಮ್ಹಣ್ ದಿಸೊಂಕ್ ಪುರೊ, ಕೊಣಾಕ್ ಹೆಂ ಪೊಯ್ಶ್ಯಾಂ ಖಾತಿರ್ ಮ್ಹಣ್ ದಿಸೊಂಕ್ ಪುರೊ. ಆನಿ ಕೊಣಾಕ್ ಹೆಂ ಗರ್ಜೆಕ್ ಮ್ಹಣ್ ದಿಸೊಂಕ್ ಪುರೊ. ಸವಾಲ್ ತಿ ಗರ್ಜೆಕ್, ಮರ್ಜೆಕ್ ವಾ ಖೊರ್ಜೆಕ್ ಮ್ಹಳ್ಳೆಂ ನ್ಹಂಯ್ - ಆಮ್ಚೆಂ ಚಿಂತಾಪ್ ಕಿತ್ಲೆಂ ಮ್ಹೆಳೆಂ ಆಸಾ ಮ್ಹಳ್ಳೆಂ. ಹ್ಯಾ ಮ್ಹೆಳ್ಯಾ ಚಿಂತ್ಪಾಂತ್ ಆಮಿ ಕಿತ್ಲ್ಯೋಯ್ ರೆತಿರ್ಯೊ ಕರ್ನ್, ಕಿತ್ಲಿಂಯ್ ಕೊಂತಾಂ ತೇರ್ಸ್ ಕರ್ನ್ ಕಾಂಯ್ ನಿತಳ್ ಜಾಂವ್ಕ್ ಸಾಧ್ಯ್? ಭೋವ್ಶಾ ಕೊಂತ್ಚ್ ಮ್ಹೆಳೆಂ ಜಾಂವ್ಕ್ ಆಸಾ..
ತರ್ಯ್ ಹ್ಯಾ ಸರ್ವ್ ನಿಸ್ಕುಚಾರಾಂಕ್ ಆಯ್ಕೊನ್, ಸೊಸುನ್, ಜಿರವ್ನ್, ಖಿರವ್ನ್ ಜೊ ಫುಡೆಂ ಚಲೊಂಕ್ ಸಕ್ತಾ ತೊಚ್ಚ್ ಜಯ್ತಾಚೊ ಮುಕುಟ್ ಜೊಡುಂಕ್ ಸಕ್ತಾ. ಖರಿ ಕವಿತಾ ಜಾವ್ನಾಸಾ ಎಕಾ ಕವಿಚಾ ಅಂತಸ್ಕರ್ನಾಚೊ ತಾಳೊ. ಜಶೆಂ ವಿಲ್ಫ್ರೆಡ್ ಒವೆನ್ ಮ್ಹಣ್ತಾ "ಎಕಾ ಕವಿನ್ ಫಕತ್ತ್ ಜಾಗ್ವಣ್ ದಿವ್ಯೆತಾ" - ತಶೆಂ ಕವಿ ಅಪ್ಲ್ಯಾ ಅಂತಸ್ಕರ್ನಾಕ್/ಕಾಳ್ಜಾಕ್ ಉಘಡೊನ್ ಚಲ್ತಚ್ ರಾವ್ತಾ.
ಥೊಡ್ಯಾ ಮಯ್ನ್ಯಾಧಿಂ ದುಭಾಂಯ್ತ್ ಹಾಂವ್ ಮೆಲ್ವಿನ್ ರೊಡ್ರಿಗಸಾಚಾ ಕವಿತಾಗೋಶ್ಟಿಕ್ ಗೆಲ್ಲೆವೆಳಾರ್ ಮೆಲ್ವಿನಾನ್ ಉಚಾರ್ಲ್ಲಿ ಏಕ್ ಶಿಣ್ ಜಾವ್ನಾಸ್ಲ್ಲಿ "ಆಜ್ಕಾಲ್ ಕೊಂಕ್ಣೆಂತ್ ಪ್ರಶಸ್ತ್ಯೊ/ಪುರಸ್ಕಾರ್ ಏಕ್ ಲೋಬ್ಬಿ ದಿತಾ ಯಾ ದಿವಯ್ತಾ". ಹೆಂ ಫಕತ್ತ್ ಕೊಂಕ್ಣೆಕ್ ಮಾತ್ರ್ ನ್ಹಂಯ್ ಹೆರ್ ಭಾಸಾಂನಿಂಯ್ ಆಸಾ. ಪರಿಗತ್ ಅಶಿ ಆಸ್ತಾನಾ ಸಭಾರ್ ಪಾವ್ಟಿಂ ಕೊಣಾಕ್ಯ್ ಕಸಲಿಯ್ ಪ್ರಶಸ್ತಿ ಲಾಭ್ತಾನಾ ಸಂತೊಸ್ ಜಾಯ್ನಾ. ಪುಣ್ ಭೋವ್ ಥೊಡೆಪಾವ್ಟಿಂ ಕೊಣಾಯ್ಕೀ ಕಸಲೀಯ್ ಪ್ರಶಸ್ಥಿ ಲಾಭ್ತಾನಾ ಭೋವ್ ಸಂತೊಸ್ ಜಾತಾ. ಆತಾಂ ಖರೆಂಪಣಿಂ ಸಾಂಗೊಂ ತರ್ ಮೆಲ್ವಿನ್ ರೊಡ್ರಿಗಸಾಕ್ ಹಿ ಪ್ರಶಸ್ಥಿ ಖರೆಂಪಣಿ ಲಾಭಾಜಾಯ್ ಜಾಲ್ಲಿ ಆನಿ ಹಾಂತುಂ ಹ್ಯಾ ಪ್ರಶಸ್ತೆಚೆಂ ಮೋಲ್/ಗೌರವ್ ಚಡ್ಲೊ ಮ್ಹಣ್ ಹಾಂವ್ ಮಾಂಧ್ತಾಂ.
ದೇವ್ ಬರೆಂ ಕರುಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
