ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 47. ರಾಜು ಆನಿ ತಾಚೆ ಬೋಯ್ಲ್
ಮನು ಬಾಹ್ರೇಯ್ನ್: ಮನು ಬಾಹ್ರೇಯ್ನ್ ಪ್ರಕೃತಿ ಮೊಗಾಚ್ಯಾ ಸಾಹಿತ್ಯಾಕ್ ನಾಂವಾಡ್ಲಾ. ಕಾದಂಬರಿ, ಕವಿತಾ, ಕಾಣ್ಯೊ ಬರಯ್ತಾ ತರ್ಯೀ ತಾಚಿಂ ಬರ್ಪಾಂ ಸಾಮಾಜಿಕ್ ಚಿಂತ್ಪಾಚಿಂ ತಶೆಂಚ್ ಪ್ರಕೃತೆಚ್ಯಾ ಸೊಭಾಯೆಚೆರ್ ವರ್ಣಿಲ್ಲ್ಯೊ ಜಾವ್ನ್ ಆಸ್ತಾತ್. ಕಾದಂಬರಿಕಾರ್ ಜಾವ್ನ್ ಫಾಮಾದ್ ಜಾಲ್ಲ್ಯಾ ಹಾಕಾ ’ಚಂದ್ರರೇಖಾ’ ಕಾದಂಬರಿಕ್ ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿ ಪ್ರಶಸ್ಥಿ ಲಾಭ್ಲ್ಯಾ.
ಮನು ಬಾಹ್ರೇಯ್ನ್
ಕಾಂತನ ಹಳ್ಳೆಂತ್ ಆಜ್ ದಬಾಜೊಚ್.
ಕಾರಾಣ್ ಆಜ್ ಕಂತನಹಳ್ಳೆಚಾ ರಾಜಪ್ಪ ಗೌಡಚಾ ಪುತಾಕ್ ಲಿಂಗೇ ಗೌಡಾಕ್ ಕಾಜಾರಾ ಬಾಬ್ತಿನ್ ಮಾಟೊವ್ ಘಾಲ್ಚೊ ಸಂಭ್ರಮ್. ಸಗ್ಳಿ ಹಳ್ಳಿಚ್ಚ್ ಹ್ಯಾ ಕಾರ್ಯಕ್ರಮಾಕ್ ಆಯ್ತಿ ಜಾಲ್ಯಾ. ಫಾಲ್ಯಾಂ ಹ್ಯಾ ಹಳ್ಳೆಕ್ ಮರೂರ್ ಥಾವ್ನ್ ಭೀಮನ್ನ ಗೌಡಚಿ ಧುವ್ ಜಾನಕಿ, ನವಿ ಹೊಕಾಲ್ ಜಾವ್ನ್ ಯೆತಾ. ನವ್ಯಾ ಹೊಕ್ಲೆಕ್ ಪಳಂವ್ಕ್ ಕಂತನಹಳ್ಳೆಚಿ ಪರ್ಜಾ ರಾಕೊನ್ ರಾವ್ಲ್ಯಾ. ಸಗ್ಳ್ಯಾಂಕ್ಯ್ ಸಂತೊಸ್ ಜಾಲ್ಯಾರ್ ರಾಜಪ್ಪ ಗೌಡಚಾ ಘರಾ ಕಾಮ್ ಕರ್ಚಾ ರಾಜುಕ್ ವರ್ತೊ ಸಂತೊಸ್. ತಶೆಂ ಆತುರಾಯ್. ಮಾಟೊವ್ ಘಾಲುಂಕ್ ಉರ್ಬೆಸ್ತ್ ಜಾಲ್ಲೊ ತೊಚ್ಚ್. ರಾಜು ಆಟ್ ವರ್ಸಾಂಚಾ ಪ್ರಾಯೆರ್ ಥಾವ್ನ್ ರಾಜಪ್ಪ ಗೌಡಚಾ ಘರಾ ಗುಲಾಮ್ ಗಿರಿ ಕರ್ನ್ಚ್ ಆಸಾ. ತಾಚೊ ಬಾಪಯ್ ರಾನಾಂತ್ ತಶೆಂ ಗೌಡಾಚಾ ಗಾವಾಂತ್ ಕಾಮ್ ಕರ್ನ್ ದಿಸ್ಪೊಡ್ತೊ ಗ್ರಾಸ್ ಜೊಡ್ತಾನಾ, ತಾಚಿ ಆವಯ್ ರಾಜಪ್ಪ ಗೌಡಚಾ ಘರಾಂತ್ ಕಾಮ್ ಕರ್ನ್ ಸಹಕಾರ್ ದಿತಾಲಿ. ರಾಜು ಸರ್ಶಿಲ್ಯಾ ’ಕಾನಾಕ್’ (ಕಾನ್ ಮ್ಹಳ್ಯಾರ್ ಹ್ಯಾ ಕುಶಿನ್ ರಾನ್ ಮ್ಹಳ್ಳೊ ಅರ್ಥ್) ವೊಚೊನ್ ವೋಂಯ್ ದೆಗೆನ್ ಲಾಯಿಲ್ಲ್ಯಾ ನೀಲಗಿರಿ ತೊಟಾಂತ್ ಮಾಟ್ವಾಕ್ ಜಾಯ್ ಜಾಲ್ಲೆ ಖಾಂಬೆ ಕಾತರ್ನ್ ಹಾಡ್ನ್ ಆಯಿಲ್ಲೊ. ಹ್ಯಾ ಕುಶಿಕ್ ಈಂದಾಚೆ ಮಾಡ್ ನಾಂತ್ ಜಾಲ್ಯಾರ್ಯ್ ಮಾಡಿಯಾಂಚೆ ಸೊಗೆ ಧಾರಾಳ್ ಆಸಾತ್. ರಾಜಪ್ಪ ಗೌಡಾಕ್ ಹ್ಯಾ ರಾಜುಚೆರ್ ವಿಶೇಸ್ ಮೋಗ್. ತಶೆಂ ಆಪ್ಲ್ಯಾ ಪುತಾಚೆರ್ ಕಿತೆಂಗೀ ಏಕ್ ತಾತ್ಸಾರ್. ಲಿಂಗೇಗೌಡಾಕ್ ಆನಿ ರಾಜುಕ್ ತುಕುನ್ ಪಳೆಲ್ಯಾರ್ ಜಡಾಯೆನ್ ರಾಜುಚ್ ಭೋಳ್ ದಿಸೊನ್ ಮೊಟಾಯೆನ್ ಆನಿ ಮಿಶ್ರಿತ್ ರಂಗಾನ್ ರಾಜುಚ್ಚ್ ಸೊಬ್ತಾನಾ, ಲಿಂಗೇಗೌಡ ಅಸ್ಕತ್ ದಿಸ್ತಾಲೊ. ಸಿಂಹಾಚೆಂ ಹರ್ದೆಂ ರಾಜುಚೆಂ ಜಾಲ್ಯಾರ್ ಪಾಖ್ಯಾಚೆಂ ಆಸ್ಥಿ ಪಂಜರ್ ಲಿಂಗೇಗೌಡಾಚೆಂ. ನಾತ್ನ್ಯಾ ಮುದೆ, ಕುಳಿತ್, ಬಾಕ್ರ್ಯೊ, ಮಾಸ್ಳಿ ರಾಂದ್ವಯ್ ತಶೆಂ ರಾನ್ ದುಕ್ರಾಚೆಂ ಮಾಸ್ ಖೆಲ್ಲೊ ರಾಜು ಘಟ್ಮೂಟ್ ಜಾವ್ನ್ ಸೊಬ್ತಾಲೊ. ತಶೆಂ, ಸರ್ವಾಂಕ್ ಮೊಗಾಚೊ ಜಾಲ್ಲೊ. ತಶೆ ಮ್ಹಣ್ ರಾಜುಕ್, ಲಿಂಗೇ ಗೌಡಚೆರ್ ವರ್ತೊ ಅಭಿಮಾನ್.
ಸಾಂಜ್ ಜಾತಾನಾ ಮಾಟ್ವಾಚೆಂ ಕಾಮ್ ಜಾಲ್ಲೆಂ. ಆನಿ ಹರ್ಯೆಕಾ ಖಾಂಬ್ಯಾಂಕ್ ಆಂಬ್ಯಾ ಪಾಲೊ ಗುಟ್ಲಾವ್ನ್ ಕನಕಾಂಬಾಚಿಂ ಝಡಾಂ, ತೊಟಾಂತ್ಲೆ ಕೆಂಳ್ಬೆ ಕಾತ್ರುನ್ ಉಭೆ ಕೆಲ್ಲೆ. ’ಕಾನಾ’-ಕ್ ವೊಚೊನ್ ಸಾಂಜೆರ್ ರಾಜುನ್ ಸುಂರ್ಗಿ ಫುಲಾಂಚೆ ಫಾಂಟೆಚ್ ಕಾತರ್ನ್ ಹಾಡ್ನ್ ಮಾಟ್ವಾ ಬಾಗ್ಲಾರ್ ಉಭೆ ಕೆಲ್ಲೆ. ಹಿಂ ಫುಲಾಂ ಅಧಿಕ್ ಸ್ವಾಧ್ ದಿತಾಲಿಂ ಆನಿ ಹ್ಯಾ ಫುಲಾಂಚೊ ಪರ್ಮಳ್ ಹ್ಯಾ ಸುತ್ತುರಾರ್ ಪ್ರಸಾರ್ತಾಲೊ.
ಕಾಜಾರ್ ಮ್ಹಳ್ಯಾರ್ ಕಿತೆಂ ತೆಂ ರಾಜುಕ್ ಕಳಿತ್ ಆಸಾ ಜಾಲ್ಯಾರ್ಯ್ ತಾಚಾ ಮೆಂದ್ವಾಕ್ ಚೆಡ್ವಾಂಕ್ ಲಾಗಿಂ ಕರ್ನ್ ಉಲಂವ್ಚೆಂ ರಿಗೊಂಕ್ ಆನಿಕ್ಯ್ ಪಾಂಚ್ ವರ್ಸಾಂ ಜಾಯ್ಜಯ್ ಪಡ್ತೆಲಿಂ. ಪಂಚ್ವೀಸ್ ಪಾವ್ಸಾಳೆ ಆನಿ ಗೀಮ್ ಪಳೆಲ್ಲೆ ತಾಣೆಂ. ಪಂಚ್ವೀಸ್ ವರ್ಸಾಂಚಾ ದೊಳ್ಯಾಂನಿ ತೊ ಫಾಲ್ಯಾಂ ಯೆಂವ್ಚಾ ಹೊಕ್ಲೆಕ್ ಪಳಂವ್ಕ್ ಅತ್ರೆಗ್ತಾ. ಲಿಂಗೇಗೌಡಾಕ್ ಚಿಡಾಯ್ತಾ. ಘರ್ಚಾಂ ಕಡೆ ಮೊಗಾನ್ ಆಸ್ತಾ. ಹೆಂ ಸಗ್ಳೆಂ ರಾಜುಚಿ ಆವಯ್ ಪಳೆತಾ.
ರಾಜುಕ್ ಸಾಂಬಾಳ್ನ್ ದವರ್ ಧನಿಯಾಂ ಮ್ಹಳ್ಳೆಂ ಉತಾರ್ ರಾಜಪ್ಪ ಗೌಡನ್ ಪಾಳ್ಳಾಂ. ತಶೆಂ ರಾಜುಚಿ ಆವಯ್ ನಿಂಗಿ ರಾಜಪ್ಪ ಗೌಡಾಚೆರ್ ವಿಶ್ವಾಸುನ್ ಆಸಾ..
ಮಾಟೊವ್ ತಯಾರ್ ಜಾತಾನಾ ಕೊಂಬು ಕಹಳೆಚೆ ಮನಿಸ್ ಚೆಂಡೆ, ಪಿರ್ಲುಕ್ ಘೆವ್ನ್ ಆಯ್ಲೆ. ಎಕ್ಲ್ಯಾ ಕಡೆ ಏಕ್ ಹಾರ್ಮೋನಿಯಮಾಚೊ ಡಬ್ಬೊ.
ಹೆಂ ಸಗ್ಳೆಂ ಹ್ಯಾ ಮಲ್ನಾಡಾಂತ್ ಅವಶ್ಯ್. ತಾಂಚೊಚ್ ಏಕ್ ಸಂಘ್ ಆಸ್ತಾ. ತಶೆಂ ಗೌಡಾಚಾ ಘರಾ ಆಜ್ ಕೋಂಬು , ಕಹಳೆ ವ್ಹಾಜಾಪ್ ವಾಜ್ತಾನಾ ಮಾಟವ್ ಭರುನ್ ಗಾಂವ್ಚಿಂ ಜಮೊ ಜಾತಾತ್. ಗೌಡಾಚಿಂ ತಶೆಂ ಮಲ್ನಾಡಾಂತ್ಲಿಂ ನಿಯಮಾ ಹಾಂಗಾ ಜ್ಯಾರಿ ಜಾತಾಲಿಂ. ಮುನ್ನಾ ಸಾಯ್ಬಾಚಾ ಸೈಕಲ್ ಶೊಪಾ ಥಾವ್ನ್ ಚಾರ್ ಪೆಟ್ರೊಮೆಕ್ಸ್ ಲಾಯ್ಟ್ ಆಯ್ಲೆ. ತಾಂಚೆಂಚ್ ಏಕ್ ಬೆಟ್ರೆಚೆರ್ ಚಲ್ಚೆಂ ಮೈಕ್ ಸೆಟ್ಟ್ ಕಾನಡಿ ಪದಾಂಕ್ ಪ್ರಸಾರ್ ಕರುಂಕ್ ಪಾವ್ಲೆಂ. ಲ್ಹಾನಾ ಬುರ್ಗ್ಯಾಂಚೊ ನಾಚ್ ಚಲ್ಲೊ. ತರ್ನಾಟಿಂ ಚೆಡ್ವಾಂ ದುಸ್ರ್ಯಾ ದಿಸಾಚಾ ಕಾಜಾರಾ ಸಂಬ್ರಮಾಕ್ ರಾಕೊನ್ ರಾವ್ಲ್ಲಿಂ. ಹ್ಯಾ ಮಧೆಂ ರಾಜುಚಿ ಕೂಡ್ ಸಗ್ಳ್ಯಾ ಮಾಟ್ವಾಂತ್, ಘರಾ ಭಿತರ್ ಘುಂವ್ತಾ. ಲಾಂಬ್ ಗಾಗ್ರೊ ಗಾಲ್ನ್ ಹರ್ದೆಂ ಬಾಂದಿನಾತ್ಲ್ಲಿಂ ಥೊಡಿಂ ತರ್ನಾಟಿಂ ಪಳವ್ನ್ ಹಾಸ್ತಾಲಿಂ. ’ನಿನ್ಗೆ ಯಾವಾಗಾ ಲಗ್ನ-ರಾಜಾ’... ಮ್ಹಣ್ತಾನಾ ಮ್ಹಾಕಾ ಕಿತ್ಯಾ ಕಾಜಾರ್. ಆನಿಕ್ಯ್ ಪ್ರಾಯ್ ಜಾಂವ್ಕ್ ನಾ. ತೆಂ ಪೂರಾ ಮ್ಹಜ್ಯಾ ಗೌಡಾ ಕಡೆಚ್ಚ್ ವಿಚಾರಿಜಾಯ್.... ರಾಜು ಮ್ಹಣ್ತಾನಾ ಜಮ್ಲೆಲಿಂ ಥೊಡಿಂ ಪನ್ನಾಸ್ ವರ್ಸಾಂ ವಯ್ಲಿಂ ಮಾಲ್ಗಡಿಂ ಗೌಡಚೆಂ ತಶೆಂ ರಾಜುಚೆಂ ರೂಪ್ ತಾಳ್ ಕರ್ತಾಲಿಂ. ’ನಿಂಗಿ’ ಕಿತೆಂಗೀ ಎಕಾ ಸಪ್ಣಾಂತ್ ಘುಂವ್ತಾಲಿ. ಭೊಂವ್ತಾಲಿ ಚಿಂತಾಲಿ. ದುಸ್ರ್ಯಾ ದಿಸಾ ಮರೂರ್ ಥಾವ್ನ್ ಹೊಕ್ಲೆಚೊ ವ್ಹೊರ್ ಆಯ್ಲೊ. ಕಂತನಹಳ್ಳೆಂತ್ ಏಕ್ ಫಾತ್ರಾಚೆಂ ನಂದಿ ದೀವ್ಳ್ ಆಸಾ. ತಾಂತು ದೊನ್ಯ್ ಹಳ್ಳೆಚಾ ಭಟಾಚೆಂ ಕಾಜಾರಾಕ್ ಸಂಭ್ರಮಿಕ್ ಪೂಜೆಚೆಂ ಕಾರ್ಯಕ್ರಮ್ ಆಸಾ. ಉಪ್ರಾಂತ್ ರಾಜಪ್ಪ ಗೌಡಚಾ ಮಾಟ್ವಾಂತ್ ಗಡ್ದ್ ಜೆವಾಣ್. ಕಾಜಾರಾಚೆಂ ಕಾರ್ಯೆಂ ಸಂಭ್ರಮಾನ್ ಮುಗ್ದಾತಾನಾ ಹೊಕಾಲ್ ಜಾನಕಿಚೆ ದೊಳೆ ಸರ್ವಾಂಚೆರ್ ಪಡ್ತಾತ್. ಹ್ಯಾ ಮಧೆಂ ಸುಡ್ಸುಡಾಯೆನ್ ಆಸ್ಲ್ಲೊ ರಾಜು ದಿಸ್ತಾ. ಸರ್ಶಿಂ ಉಜ್ಯಾಚಾ ಲ್ಹಾನ್ ಪೊಂಡ್ಕುಲಾಂತ್ ಭಟಾಚಿಂ ಮಂತ್ರಾಂಚಿ ಥಿಂಪಿ ಉಸಾಳ್ತಾ. ಗಾಯ್ಚೆಂ ತೂಪ್, ತೇಲ್, ಗಂಧ್, ಧುಂಪ್ ಹೆಂ ಸರ್ವ್ ಉಜ್ಯಾಂತ್ ಭಸ್ಮೊನ್ ಸಪ್ತಪದಿಚೆಂ ನಿಯಂತ್ರಣ್ ಚುಕಾನಾಸ್ತಾನಾ ತಾಳೆ ಮದ್ದಾಳೆಚೊ ಆವಾಜ್ ರಾವಾನಾಸ್ತಾನಾ ಲಿಂಗೇಗೌಡ ಆನಿ ಜಾನಕಿ ವಸ್ತುರಾಚಾ ಪೊಂತಾಕ್ ಕಟ್ ಘಾಲ್ನ್ ಉಜ್ಯಾ ಭೊಂವಾರಿ ಘುಂವೊನ್ ಕರಿಮಣಿ ಬಾಂದುನ್ ಫುಲಾಂಚೊ ಜೆಲೊ ಗಳ್ಯಾಕ್ ಘಾಲುನ್ ಹೊಕಾಲ್ ಆನಿ ನೊವ್ರೊ ಜಾಲಿಂ ಮ್ಹಣ್ ಗಟ್ಟಿ ಮೇಳಾಚೊ ಆವಾಜ್ ಕಳಯ್ತಾಲೊ. ತೆದ್ನಾಂಚ್ ಅಕ್ಷತಾಕಾಳು (ತಾಂದುಳ್) ಪಡ್ಲೊ. ಆಪ್ಲ್ಯಾ ಹೊಕ್ಲೆಕ್ ಲಿಂಗೇ ಗೌಡಾನ್ ಹಸೆ ಮಣ್ಯೆರ್ ಬಸ್ತಾನಾ ಪಳೆಲೆಂ. ತಾಕಾ ತೆಂ ಅಧಿಕ್ ಸೊಬ್ತಾಲೆಂ. ಪೂಣ್ ಜಾನಕಿ ಹ್ಯಾ ಗಾಂವ್ಚಾ ಹರ್ಯೆಕಾ ಮನ್ಶಾಕ್ ಪಳೆತಾಲೆಂ.
ಸಬಾರ್ ನಮುನ್ಯಾಚೊ ಸೊಂಡಿಯೊ...., ಪಾನ್ ಪೊಡ್ ಖಾವ್ನ್ ಪೀಕ್ ಉಡಂವ್ಚೊ ಲೋಕ್ ದಿಸ್ತಾಲೊ. ಮರೂರ್ ಥಾವ್ನ್ ಬೊಯ್ಲಾಂಚಾ ಗಾಡ್ಯೆರ್ ಕಂತನಹಳ್ಳೆಂತ್ ಪಾವ್ತಾನಾ ಮಧೆಂ ರಾನಾಂತ್ಲಿ ಸಾವ್ಳಿ ತಾಕಾ ಪಸಂದ್ ಜಾಲ್ಲಿ. ಲಾಂಬಾಯೆಚೆಂ ಪಯ್ಣ್ ತೆಂ. ಪಂದ್ರಾ ಬೊಯ್ಲಾಂಚಾ ಗಾಡಿಯೆನಿ ತಾಚೊ ವ್ಹೊರ್ ಆಯಿಲ್ಲೊ. ಕಂತನಹಳ್ಳಿ ಸುಡ್ಸುಡೀತ್ ದಿಸ್ತಾಲಿ. ಮಾಟ್ವಾಂತ್ಲ್ಯಾಂಕ್ ಪಳೆಲೆಂ. ಕಂತನಹಳ್ಳಿ ತಾಕಾ ಸೊಭಿತ್ ದಿಸ್ಲಿ. ಬರೆಂ ಪರಿಸರ್.
ಸದಾಂ ಸುಡ್ಸುಡೀತ್ ಆಸ್ಲ್ಲ್ಯಾ ತರ್ನಾಟ್ಯಾಕ್ ಪಳೆತಾಲೆಂ ತೆಂ. ನಾಂವ್ ಕಳಿತ್ ನಾ ಜಾಲ್ಯಾರ್ಯ್ ಹ್ಯಾಚ್ ಹಳ್ಳೆಚೊ ಮ್ಹಳ್ಳೆಂ ಗುಮಾನ್ ಕರಿಲಾಗ್ಲೆಂ.
"ರಾಜು..." ಲಿಂಗೇಗೌಡಾಚಾ ಬಾರೀಕ್ ಆವಾಜಾಕ್ ಜವಾಬ್ ದಿಲ್ಲ್ಯಾ ರಾಜುಕ್ ಪಳೆಲೆಂ ಜಾನಕಿನ್. ಆಪ್ಲ್ಯಾ ತಾಳಿ ಬಾಂದ್ಲ್ಲ್ಯಾ ಘೊವಾಕ್ ಆನಿ ನವ್ಕರ್ ಕಾಮ್ ಕರ್ಚಾ ಚೆಡ್ಯಾಕ್ ಪಳವ್ನ್ ಹ್ಯಾ ಘರ್ಚೊ ವಿಶ್ವಾಸ್ ಜಾನಕಿನ್ ಪಾರ್ಕುನ್ ಜಾಲ್ಲೊ. ಪಿರ್ಲುಕೆಚೊ ಆವಾಜ್ ಲಿಂಗೇಗೌಡಾಚೊ ಪರತ್ ಸಾದ್ಲೊ.
ತಿ ರಾತ್ ಪುನ್ವೆಚಿ. ಆನಿ ಎಕಾ ಮಹಿನ್ಯಾಕ್ ಚಂದ್ರಗುತ್ತಿಚೊ ಜಾತ್ರೊ ಆಸಾ. ತೆಂ ಹ್ಯಾ ಕುಳಿಯೆಕ್ ಕಳಿತ್. ಮರೂರ್, ಯಕ್ಷಿ, ಸಾರೆ ಕೊಪ್ಪ, ಗುಡಡಿ, ಸಾರೆ ಮರೂರ್, ಬೆಟ್ಟದಕುರ್ಲಿ, ಜಡೆ ಕುಳಗಾ, ತವನಂದಿ ಹ್ಯಾ ಹಳ್ಳೆಚ್ಯಾಂಕ್ ಚಂದ್ರಗುತ್ತಿಚಿ ಅಮ್ಮ ರೇಣುಕಾ ಸಾಂಬಾಳ್ತಾ ಆನಿ ರಾನ್ವಾಟ್ ವಾಟಾನಿಂ ರಾಕ್ತಾ. ತೆಂ ಹ್ಯಾ ಕುಶಿಕ್ ಜೆಯೆತೆಲ್ಯಾಂಕ್ ಕಳಿತ್. ದೆಕುನ್ ತಾಂಚಿ ವಿಶೇಶ್ ಭಕ್ತ್. ಹ್ಯಾ ಜಾತ್ರೆ ವಿಶಿಂ ಥಂಯ್ ಪಾವ್ಲ್ಲ್ಯಾಂಕ್ ಕಳಿತ್ ತಿ. ಪಯ್ಲಿ ರಾತ್ ಜಾನಕಿನ್ ಕಂತನಹಳ್ಳೆಂತ್ ಪುನ್ವೆಚಾ ಚಂದ್ರಾಚಾ ಉಜ್ವಾಡಾಂತ್ ಪಾಶಾರ್ ಕೆಲಿ. ತಿಚ್ಚ್ ರಾತ್ ಜಾನಕಿಕ್ ನಿರಾಸ್ ಜಾಲ್ಲಿ.
ಬಾವ್ಲ್ಲಿಂ ಕನಕಾಂಬಚಿಂ ಫುಲಾಂ (ಆಬೊಲಿಂ) ಎಕ್ಟಾಂಯ್ ಕರುನ್ ಜಾನಕಿನ್ ಬಾಗಿಲ್ ಉಗ್ತೆಂ ಕರುನ್ ಭಾಯ್ರ್ ಉಡಯ್ತಾನಾ ಮುಕಾರ್ ದಿಸ್ಲೊ ತಾಕಾ ರಾಜು.
ಬೊಯ್ಲಾಂಕ್ ಕುಳಿತ್ ದೀವ್ನ್ ತಾಂಚಿ ಪಾಟ್ ಪುಸುನ್, ತಾಂಕಾಂ ಧುವ್ನ್ ಖಾಣ್ ದೀವ್ನ್ ಆಸ್ತಾನಾ ರಾಜುಚೆ ಭಳಿಷ್ಟ್ ಬಾವ್ಳೆ, ಹರ್ದೆಂ, ಪಾಟ್, ವಿಣ್ಗೆ ಪಳೆಲ್ಲ್ಯಾ ಜಾನಕಿಚೆ ದೊಳೆ ರಾತಿಚಿ ನೀದ್ ಖಳ್ನ್ ಹುಲ್ಪಲ್ಯಾರ್ಯ್ ಪರ್ಜಳುಂಕ್ ಲಾಗ್ಲೆ. ಪಾಟಿಂ ಕುಡಾಕ್ ಪಳೆಲೆಂ ತಾಣೆ. ಪರತ್ ರಾಜುಕ್.
ಅಸಲೊ ಏಕ್ ಚಾಕೊರ್ ಮರೂರಾಂತ್ ಕಿತ್ಯಾಕ್ ಜಲ್ಮೊಂಕ್ ನಾ? ಚಿಂತಾ ತೆಂ, ಆನಿ ರಾಜುಕ್ಚ್ಚ್ ಪಳವ್ನ್ ರಾವ್ತಾ. ತಶೆಂ ಆಪ್ಲ್ಯಾ ಪತಿಕ್ ಚಿಂತುನ್ ಆಪ್ಲ್ಯಾ ಗತಿಕ್ ರಡ್ತಾ. ಮಸಾಳ್ ತಶೆಂ ಬಳಿಷ್ಟ್ ಆಂಗ್, ತಶೆಂ ತರ್ನಾಟ್ಪಣ್ ರಾಜುಚೆಂ.
ರೊಸಾಳ್ ಕೊಬು ಗಾಣ್ಯಾಕ್ ದೀವ್ನ್ ಉಡಯಿಲ್ಲೆಂ ಚಿಂವಡ್ ಆಪ್ಲ್ಯಾ ಘೊವಾಚೆಂ.
ಫಕ್ಕ್ ಕರುನ್ ರಾಜುಚಿ ದೀಷ್ಟ್ ಜನೆಲಾ ಕಡೆ ಗೆಲಿ. ಆಪ್ಲ್ಯಾ ಧನ್ಯಾಚಿ ಪತಿಣ್ ಜಾನಕಿ ಗೌಡಿನಿಕ್ ಪಳೆತಾನಾ ತೊ ಲಜ್ಲೊ. ಸರ್ಶಿಂ ಉಡಯಿಲ್ಲೆಂ ಬೈರಸ್ ಆಂಗಾಕ್ ಘಾಲ್ತಾನಾ, ತ್ಯಾ ಬೈರಸಾಕ್ ಸಗ್ಳೆಂ ಆಂಗ್ ದಾಂಪುಂಕ್ ಜಾಯ್ನಾಸ್ತಾಂ ಆಸ್ತಾನಾ, ವಿಶಾಲ್ ಹರ್ಧೆಂ ದಿಡ್ಡ್ಯಾ ಬರಿಂ ದಿಸ್ಲೆಂ ಜಾನಕಿಕ್. ಏಕ್ ಹಾಸೊ ದೀವ್ನ್ ತೆಂ ಭಿತರ್ ಘೆಲೆಂ. ಕಿತೆಂಗೀ ಚಿಂತುನ್ ಗೊಡ್ಶಿಂ ಚಿಂತ್ನಾಂ ತಾಚ್ಯಾ ಲಾಗಿಂ ಜಾತಾಲಿಂ. ಆಪ್ಣಾಕ್ ದಿಲ್ಲ್ಯೊ ಹಾಸೊ ಪಳವ್ನ್, ಅಪುಣ್ ಧನಿನಿಕ್ ಮೆಚ್ವಾಲಾಂ ಮ್ಹಳ್ಳೆಂ ರಾಜುಚ್ಯಾ ಗಮನಾಕ್ ವಚೊನ್ ಜಾನಕಿ ವಯ್ರ್ ಅಭಿಮಾನ್ ಭೊಗ್ಲೊ.
ಪಂಚ್ವೀಸ್ ವರ್ಸಾಂ ಪ್ರಾಯ್ ಜಾಲ್ಯಾರ್ಯ್ ಬುರ್ಗಿ ಮತ್ ತಾಚಿ. ರಾನಾ ಸುವಾತ್ಯಾಂನಿ ಭಂವ್ಲ್ಲಿ ಕೂಡ್, ರಾಜಪ್ಪ ಗೌಡ ಘರಾಚ್ ತಾಕಾ ಕಾಮಾಚೊ ಹರ್ಬೊಸ್.
ತ್ಯಾಚ್ ಖಾತಿರ್ ರಾಜಪ್ಪ ಗೌಡಾನ್ ತಾಕಾ ರಾಜು ಮ್ಹಳ್ಳೆಂ ನಾಂವ್ ಮೊಗಾನ್ ದವರುಂಕ್ ಸಾಂಗ್ಲ್ಲೆಂ. ಹ್ಯಾ ನಾಂವಾ ಆನಿ ಮೊಗಾಚಾ ಪೊಳಿಯೆಂತ್ ರಾಜಪ್ಪ ಗೌಡಚೆಂ ಮ್ಹೊಂವ್ ಆಸಾ ಮ್ಹಣ್ ಹಳ್ಳೆಂತ್ಲೆ ಥೊಡೆ ಜಿವಂತ್ ಆಸ್ಲ್ಲೆ ಮಾತಾರೆ ಗುಪೀತ್ ಉಚಾರ್ತಾಲೆ. ಹ್ಯಾ ಬೊಟಾನಿಂ ಮೆಜ್ಚ್ಯಾ ಬೊಡಾಂತ್, ತ್ರಾಣ್ ನಾತ್ಲ್ಲ್ಯಾ, ತೊಂಡಾಂತ್ ದಾಂತ್ ನಾತ್ಲ್ಲ್ಯಾ ಮ್ಹಾತಾರ್ಯಾಂಕ್ ಪಳೆತಾನಾ ನಿಂಗಿಕ್ ಆಪ್ಲ್ಯಾ ತರ್ನಾಟ್ಪಣಾಚಾ ಕುಡಿಚೆಂ ರುಪ್ಣೆಂ ಮತಿಂತ್ ಯೆತಾ.
ಬಸವಣ್ಣಾಚೊ ಜಾತ್ರೊ ಸುರು ಜಾಲ್ಲೊ ಹಪ್ತೊ ತೊ. ನವೆಂ ಹೊಕಾಲ್ ಜಾನಕಿ ಲಿಂಗೇಗೌಡಾ ಸಂಗಿಂ ಸರ್ಶಿಂ ಆಸ್ಲ್ಲ್ಯಾ ಬಸವಣ್ಣಾಚ್ಯಾ ದಿವ್ಳಾಕ್ ಗೆಲ್ಲೆಂ. ಲೊಕಾಚಿ ದಿಷ್ಟ್ ಜಾನಕಿಚೆರ್ ಪಡ್ತಾಲಿ. ಚಡ್ ಸೊಭಿತ್ ನಾ ಜಾಲ್ಯಾರ್ಯ್ ಲಕ್ಷಣಾಚೆಂ ಜಾನಕಿ. ತ್ಯಾ ಹಳ್ಳೆಚಾ ಲೊಕಾಕ್, ಚಡ್ ಕರುನ್ ಸ್ತ್ರೀಯಾಂಕ್ ಮೆಚ್ವೊನೆಚೆಂ ಜಾಲ್ಲೆಂ.
ಹಾಂಗಾ ಜಾತ್ರ್ಯಾ ವೆಳಿಂ ’ರಾಸು’ ಜಾತ್ರೊ ಆನಿ ಪಂದ್ಯಾಟ್ ಆಸಾ. ಕಂತನಹಳ್ಳೆಂತ್ಲೊ ರಾಸು (ಬೊಯ್ಲಾಂಕ್ ದಾಂವ್ಡಾಂವ್ಚೊ) ಪಂದ್ಯಾಟ್ ಪ್ರಖ್ಯಾತ್. ಹ್ಯಾ ಪಂದ್ಯಾಟಾಂತ್ ರಾಜುಚೆಂ ಪ್ರದರ್ಶನ್ ಚಡ್ತಿಕ್ ಆಕರ್ಶನ್. ಎಕಾ ಕುಶಿನ್ ರಾಸುಂಕ್ ರಾವೊನ್ ದಾಂವ್ಡಾಯ್ತಾನಾ ಅನ್ಯೇಕಾ ಕುಶಿಂನ್ ತರ್ನಾಟೆ ತ್ಯಾ ಪಾಡ್ಯಾಂಕ್ ಧರುಂಕ್ ವೆತಾತ್. ಹಾಂತು ಜಿವಾಕ್ ಆಪಾಯ್ಯ್ ಆಸ್ತಾ. ಪುಣ್ ರಾಜುಕ್ ಹೆಂ ಕಿತೆಂಚ್ ಫರಕ್ ಪಡಾನಾ. ಹರ್ಯೆಕಾ ವರ್ಸಾ ತಾಕಾ ಸಲ್ವಣಿ ಮ್ಹಳ್ಳಿ ನಾ. ತಶೆಂ ತೊ ಸ್ತ್ರೀ ಸಂಘಚಾಂಕ್ ಲಾಗ್ಶಿಲೊ. ಸರ್ವಾಂಕ್ಯ್ ರಾಜು ಜಾಯ್. ತಾಚ್ಯೆ ಖಾತಿರ್ ರಾಜಪ್ಪ ಗೌಡನ್ ದೋನ್ ಭಳಿಷ್ಟ್ ಬೊಯ್ಲಾಂಚಿ ಗಾಡಿ ತಾಕಾ ದಿಲ್ಯಾ. ತ್ಯಾ ಬೊಯ್ಲಾಂಕ್ ತೊ ಕೆದ್ನಾಂಯ್ ಮಾಲಿಸ್ ಕರ್ತಾ. ಜಾನಕಿ ಯೇವ್ನ್ ತೀನ್ ದೀಸ್ ಜಾಲ್ಲೆ. ತೀನ್ ರಾತಿ ತಾಣೆ ಲಿಂಗೇಗೌಡಾಚಾ ವೆಂಗೆಂತ್ ಪಾಶಾರ್ ಕೆಲ್ಯಾತ್. ಕೂಡ್ ತಾಚಿ ಬೀಟಿಚ್ಯಾ ಖಟ್ಲ್ಯಾರ್ ಲಿಂಗೇ ಗೌಡಾ ಸಂಗಿಂ ಪಾತ್ಳಾಯ್ಲ್ಯಾರ್ಯ್ ಮತ್ ತಾಚಿ ಬಿಟಿಚಾ ರುಕಾಚಾ ಸಾರ್ಕಿಚ್ ಆಸ್ಚಾ ರಾಜುಕ್ ನಿಯಾಳ್ತಾನಾ, ಲಿಂಗೇಗೌಡಚಿ ಘರೊವ್ಣಿ ಆಯ್ಕೊವ್ನ್ ತೆಂ ನಿರಾಸ್ತಾ. ರಾಜುಚ್ಯಾ ಶಿಳೊಣೆಕ್ ಆಸಕ್ತ್ ದಾಕಯ್ತಾ.
ಭೋವ್ ಫಾಂತ್ಯಾರ್ ದೋವ್ ಕರ್ಗೊನ್ ರಾನಾ ಕುಶಿ ಥಾವ್ನ್ ಕೊಗ್ಳಿಚಿಂ ಗಾಯಾನಾಂ ಆಯ್ಕಾತಾನಾ, ಬಾಂಗ್ರಾಳ್ಯಾ ವರ್ಣಾಚಾ ಕಿರ್ಣಾಂಕ್ ಘೆವ್ನ್ ಕಂತನಹಳ್ಳೆಂತ್ಲ್ಯಾ ರಾನಾ ಮೊಲ್ಯಾಂ ಇಡ್ಯಾಂತ್ಲ್ಯಾನ್ ಸುರ್ಯಾಚೆಂ ಯೆಣೆಂ ಜಾಂವ್ಚಾ ವಗ್ತಾರ್ ತೆಂ ಉಟ್ಲೆಂ. ಆನಿ ಜನೆಲಾ ಕುಶಿಕ್ ಪಳಂವ್ಕ್ ಲಾಗ್ಲೆಂ. ರಾಜು ತಾಕಾ ದಿಸ್ಲೊ ನಾ. ತಾಚಿ ದೀಷ್ಟ್ ಪಯ್ಸ್ ಪಯ್ಸ್ ಗೆಲಿ. ಹಳ್ಳೆಚ್ಯಾ ತಳ್ಯಾ ಕುಶಿಕ್ ಘೆಲಿ. ಆನಿ ರಾಜುಚೆರ್ ಖಂಚ್ಲಿ. ತ್ಯಾ ಮಧೆಂ ರಾನಾಂ ಕುಶಿಂತ್ಲ್ಯಾನ್ ತೀನ್ ಮೊರ್ ನಿಳ್ಶ್ಯಾ ಪಾಚ್ವ್ಯಾ ರಂಗಾಚೆಂ ನ್ಹೆಸಾಣ್ ನ್ಹೆಸ್ಲ್ಲ್ಯಾ ಬರಿ ಆಂಗ್ ಫುಲೊನ್ ವೆತಾನಾ ಹ್ಯಾ ಕುಶಿಕ್ಯ್ ಮೊರಾಚೆಂ ಸಂತಾನ್ ಆಸಾ ತೆಂ ಜಾನಕಿಕ್ ಕಳಿತ್ ಜಾಲೆಂ.. ತಳ್ಯಾ ಥಾವ್ನ್ ಯೆಂವ್ಚಾ ರಾಜುಕ್ ಪಳೆತ್ತ್ ರಾವ್ಲೆಂ ತೆಂ. ಸುರ್ಯಾಚಿಂ ಕಿರ್ಣಾಂ ಕಿತ್ಲಿಂ ತೀಕ್ಷ್ನ್ಗೀ ತಾಚ್ಯಾಕ್ಯ್ ಸೂಕ್ಷ್ಮ್ ಥರಾಚಿಂ ಚಂಚಲ್ ಚಿಂತ್ನಾಂ ಜಾನಕಿಚಿಂ. ರಾಜು ಕಡೆನ್ ಉಲಂವ್ಚೊ ಸಂದರ್ಭ್ ತೆಂ ಸೊದ್ತಾಲೆಂ ಆನಿ ರಾಕ್ತಾಲೆಂ.
ಗೌಡ ಘರಾಚ್ ರಾಜುಚೊ ನಾಸ್ಟೊ. ಆನಿ ಆಜ್ ರಾಜುಕ್ ನಾತ್ನ್ಯಾಚೊ ಮುದೊ ಆನಿ ಮಾಸ್ಳೆಚಿ ಕಡಿ ಜಾನಕಿಚ್ ಹಾಡುನ್ ಯೆತಾನಾ ಲಿಂಗೇ ಗೌಡಕ್ ಖುಶಿ ಜಾಲಿ. ಆಪ್ಲಿ ಪತಿಣ್ ಸರ್ವಾಂಕ್ಯ್ ಪಸಂದ್ ಜಾಲಿ. ತಶೆಂ ತಾಕಾ ದುಬ್ಳೊ ಆನಿ ಗ್ರೇಸ್ತ್ ಮ್ಹಳ್ಳೊ ಬೇದ್ಭಾವ್ ನಾ. ತೆಂ ಚಿಂತಾನಾ ಲಿಂಗೇಗೌಡಾಕ್ ಪಳೆಲ್ಲ್ಯಾ ಜಾನಕಿಕ್ ಕಿತೆಂಗೀ ಕಾವ್ಜೆಣಿ ಜಾತಾನಾ ಆಪ್ಲ್ಯಾ ಘೊವಾಚಾ ತೊಂಡಾಕ್ ಪಳೆಲಾಗ್ಲೆಂ.
"ವಾಡ್ ತಾಕಾ ವಾಡ್. ತೊ ಆಮ್ಚೊಚ್. ಗಟ್ಟ್ ಖಾಂವ್ದಿ. ತೊ ಆಸ್ಲ್ಲ್ಯಾನ್ ಹೆಂ ಘರ್, ಪಾಟ್ಲೆಂ ತೋಟ್ ಬರೆಂ ಭಲಾಯ್ಕೆಭರಿತ್ ಆಸಾ. ತಶೆಂ ತಾಚೆ ವಿಶಿಂ ತುಂ ಕಾಂಯ್ ದಾಕ್ಷೆನಾಕಾ. ಹೆಣೆಂ ತೊಟಾಕ್ ವೆತಾನಾ, ರಾನಾಕ್ ವೆತಾನಾ, ತುವೆಂ ರಾಜುಕ್ ಸಾಂಗಾತಾ ಘೆವ್ಯೆತ್." ಲಿಂಗೇಗೌಡನ್ ಸಾಂಗ್ಲೆಂ. ಆಪ್ಲೊ ಘೊವ್ ಕಿತ್ಲೊ ಮೊವಾಳ್ ಮ್ಹಣ್ ಜಾನಕಿ ಚಿಂತಾನಾ ರಾಜು ನಾತ್ನ್ಯಾ ಮುದ್ಯಾಕ್ ರಾಕ್ತಾಲೊ.
"ಘಟ್ಟ್ ಖಾ ರಾಜು ಆನಿ ತುಕಾ ಸದಾಂಯ್ ಹಾಂವ್ ವಾಡ್ತಾಂ" ಮ್ಹಣೊನ್ ಆಪ್ಲಿ ಕೂಡ್ ದೊಡ್ತಾನಾ ರಾಜುನ್ ದೀಷ್ಟ್ ವಯ್ರ್ ವೆಲಿ. ತಶೆಂ ಜಾನಕಿಚಾ ಗೊಮ್ಟೆ ಸಕಯ್ಲ್ಯಾ ಕುಶಿಚಾ ವಿಭಾಗಾರ್ ಖಂಚ್ಲಿ.
ದೋನ್ ರಾನಾಂಕ್ ವೆಗ್ಳೆಂ ಕರುಂಕ್ ಕೆಲ್ಲ್ಯಾ ಖಣಿಯೆಚೆಂ ಪಿಂತುರ್ ತಾಚ್ಯಾ ದೊಳ್ಯಾಂಕ್ ದಿಸ್ಲೆಂ. ವಾಡ್ಲ್ಲೆ ಮುದೆ ಹಾತಾಂತ್ ಚಿರ್ಡಿಲೆ ರಾಜುನ್. ಆನಿ ಮಾಸ್ಳೆಚಾ ಕಡಿಯೆಂತ್ ಲೊಳಯ್ಲೆ. ಆಪ್ಲ್ಯಾ ತರ್ನಾಟ್ ಪಣಾಚಾ ಶಿರೆಕ್ ಏಕ್ ಶಿರಾಂಟಿ ಮಾರ್ಲ್ಲ್ಯಾ ಬರಿ ಭಗ್ತಾನಾ ಬಾಗ್ವಾಲ್ಲ್ಯಾಜಾನಕಿನ್ ಬಾಗ್ವೊನ್ಚ್ ಪಾಲಂವ್ ಸಾಂಬಾಳುಂಕ್ ಪಳೆಲೆಂ. ತೆಂ ಹಾಸ್ಲೆಂ. ಹೆಂ ಪಳೆಂವ್ಕ್ ಲಿಂಗೇ ಗೌಡ ಗೈರ್ ಹಾಜರ್ ಜಾಲ್ಲೊ. ರಾಜುಚೆರ್ ತಾಕಾ ಬರೊ ವಿಶ್ವಾಸ್ ಆಸಾ.
ಘೊವಾಚೆಂ ಪರ್ಮಾಣ್ ಮೆಳ್ಲ್ಲ್ಯಾನ್ ತ್ಯಾಚ್ ಸಕಾಳಿಂ ಜಾನಕಿ ಆಂಬ್ಯಾ ಪಾಡಿಕ್ ರಾಜುಕ್ ಘೆವ್ನ್ ಗೆಲೆಂ. ಆಂಬೆ ಜಾಂವ್ಚೊ ವೇಳ್ ತೊ. ಬಸವಣ್ಣಚಾ ಜಾತ್ರೆಚಾ ವೆಳಿಂ ಪ್ರಥ್ವಿ ಫಳಾಭರಿತ್ ಆಸ್ತಾ. ಆತಾಂ ರಾಜು ಸಂಗಿಂ ಜಾನಕಿ ಸುಗಾಮಾಯೆಚಾ ವಾಟೆನ್ ಚಲ್ತಾನಾ, ಕೆಂಳ್ಬ್ಯಾ ತೊಟಾಂತ್ ಘುಂವ್ತಾನಾ ಗಡಾಯೆಚಾ ಬೊಂಡಿಯೆರ್ ಮ್ಹೊಂವ್ ಚಿಂವ್ಚೆ ಚಾನಿಯೆಕ್ ಪಳೆತಾ.
"ರಾಜು.... ತುಂ ಆಮ್ಚಾ ಮರೂರಾಕ್ ಯೆತಾಯ್ಗೀ? ಥಂಡ್ ವಾರ್ಯಾಕ್ ಮಧುರ್ ತಾಳೊ ವ್ಹಾಳ್ತಾನಾ ರಾಜುಚಾ ಶಿರಾಂನಿ ರಗ್ತಾವೇಗ್ ಚಡ್ತಾ. ಆಪ್ಲ್ಯಾ ಧನಿನಿ ಕಡೆ ಉಲಯಿಲ್ಲೆಂ ತಾಕಾ ವರ್ತ್ಯಾ ಅಭಿಮಾನಾಚೆಂ ಜಾಂವ್ಕ್ ಪಾವ್ತಾ.
ಬಸವಣ್ಣಾಚೊ ಜಾತ್ರೊ ಚಲ್ತಾಲೊ. ನಿಮಾಣೊ ದೀಸ್. ಜಾಯ್ತೊ ಲೋಕ್ ಕುಡ್ಸಾಲಾ. ತಶೆಂ ರಾಜು ಪಾಡ್ಯಾಕ್ ಧರುಂಕ್ ಆಯ್ತೊ ಜಾಲಾ. ತಾಣೆಂಚ್ ಪೋಸ್ ಕೆಲ್ಲೆ ಪಾಡೆ ತೆ. ದೊನ್ಯ್ ಕುಶಿನ್ ಲೊಕಾಚೊ ಬೊಬೊ. ಮಧೆಂ ಮಾತ್ಯೆಚೊ ರಸ್ತೊ. ವಿವಿಧ್ ವಸ್ತುರಾಂಚೆಂ ಪ್ರದರ್ಶನ್. ನಿಮಾಣೆ ತರ್ಯ್ ಪಾಡ್ಯಾಂಚೊ ಪಂದ್ಯಾಟ್. ಜಯ್ತ್ ರಾಜುಚೆಂಚ್. ಪುಣ್ ರಾಜುಚಾ ಕುಡಿರ್ ಘಾಮಾಚೆಂ ಜನನ್, ರಾಜಪ್ಪ ಗೌಡಾಚೆಂ ಕಾಳಿಜ್ ಮುರ್ಗೊಟ್ತಾನಾ ಜಾನಕಿಚಾ ತಾಳ್ಯಾ ಥಾವ್ನ್ ಭಿರ್ಮತಿಚೊ ಸುಸ್ಕಾರ್. ಜಾಲ್ಯಾರ್ಯ್ ತರ್ನಾಟ್ಯಾ ರಾಜುಕ್ ಹೆಂ ಕಿತೆಂಚ್ ನ್ಹಂಯ್. ನಿಂಗಿಚಿ ಆನ್ಕಿಟಿ ಮುರ್ಗಟ್ಲಿ.
ಎಕಾ ಹಪ್ತ್ಯಾನ್ ರಾಜುಚೆ ಘಾಯ್ ಗೂಣ್ ಜಾಲೆ. ಹ್ಯಾ ಮಧೆಂ ಸ್ವತಾ ಜಾನಕಿನ್ಚ್ ರಾಜುಚಾ ಪಾಟಿಕ್ ತೇಲ್ ಪುಸ್ಲೆಂ. ತಶೆಂ ಹೆ ಜಾನಕಿಚಾ ಘೊವಾಕ್ಯ್ ತಶೆಂ ಆಪ್ಲ್ಯಾ ಮಾಂವಾಂಕ್ಯ್ ಕಳಿತ್. ಚಾಕೊರ್ ಆನಿ ಧನಿನಿಚೊ ಬಾಂದ್ ತೊ. ನ್ಹಂಯ್ ಮೋಗ್ ಕರ್ನಾರಾಂಚೊ. ಯಾ ಆವಯ್ ಪುತಾಚೊ.
ಜಾಯ್ತೆ ಪಾವ್ಟಿಂ ಜಾನಕಿ ರಾನಾಂತ್ ಘುಸ್ಲಾಂ ಆಳಾಂಕ್ ಪಳಂವ್ಚಾ ಖಾತಿರ್.
ಮಹಿನ್ಯಾಚಾ ವಾಯ್ದ್ಯಾಕ್ ಜಾನಕಿಕ್ ಮರೂರಾಕ್ ದಾಡುಂಕ್ ಜಾನಕಿಚೊ ಬಾಪಯ್ ಭೀಮನ್ನ ಗೌಡ ಕಂತನಹಳ್ಳೆಕ್ ಪಾವ್ಲೊ. ತಶೆಂ ಜಾನಕಿಕ್ ದಾಡುಂಕ್ ಉಪ್ಕಾರ್ ಮಾಗಾಲಾಗ್ಲೊ.
ಘೊವ್ ಬಾಯ್ಲೆಕ್ ಸಾಂಗಾತಾ ದಾಡುಂಕ್ ಆಮಂತ್ರಣ್ ದಿಲೆಂ. ಸನ್ಮಾನಾ ಸಂಗಿಂ ಭೀಮನ್ನಾಕ್ ಪಾಟಿಂ ದಾಡ್ಲೆಂ.
"ಹ್ಯಾ ಪಾವ್ಟಿಂ ರಾಜುಕ್ ಸಂಗಿಂ ಘೆವ್ನ್ಚ್ ಯಾ.... ಮ್ಹಜ್ಯಾ ಭಾರ್ತಾರಾ...." ಜಾನಕಿಚ್ಯಾ ಕಾಳ್ಜಾ ತಾವ್ನ್ ತಾಳೊ ಉಟ್ಲ್ಲೊ. ಲಿಂಗೇ ಗೌಡಾಕ್ಯ್ ಖುಶಿ ಜಾಲ್ಲಿ.
"ಜಾಯ್ತ್... ತಾಚಿಚ್ ಗಾಡಿ ಸುಂರ್ಗಾರಾಯ್ಲ್ಯಾರ್ ಜಾಲಿ.... ಬೊಯ್ಲ್ಯ್ ತರ್ನಾಟೆ.... ರಾಜುಯ್ ತರ್ನಾಟೊ... ವೆಗ್ಗಿಂ ಪಾವ್ಯೆತಾ"
ಪಾರ್ವ್ಯಾಂಚಾ ಆವಾಜಾನ್ ಹಿ ಖಬಾರ್ ಜಾನಕಿನ್ ರಾಜುಚಾ ಕಾನಾಂತ್ ವೊಂಪ್ಲಿ.
ರಾಜುಚಾ ಕಾನಾಂತ್ ಗುಂಗುರ್ಲೊ ರಿಗ್ಲ್ಲೊ ಅನುಭವ್.
"ಭಿಯೆನಾಕಾ..... ಲಿಂಗೇ ಗೌಡಾಯ್ ಯೆತಾ. ಶಿವಾಯ್ ತುಕಾ ಆಮ್ಚೆಂ ಘರ್ ಪಳಯಿಲ್ಲ್ಯಾ ಬರಿ ಜಾತೆಲೆಂ. ಹಳ್ಳಿಯ್ ಸೊಬ್ತೆಲಿ. ಶಿವಾಯ್..... ಆಮ್ಚಾ ಹಳ್ಳೆಂತ್ಲೆಂಚ್ ತುಕಾ ಏಕ್ ಚೆಡುಂ ಪಳೆಲ್ಯಾರ್ ಜಾಲೆಂ, ತೆಂ ಲಜ್ಲೆಂ, ದೊಡ್ಲೆಂ, ವೋಂಟ್ ಚಾಬ್ಲೆ, ರಂಗ್ ಬದ್ಲಾತಾಲೊ.
"ಮ್ಹಾಕಾ ಕಾಜಾರಾಚಿ ಪ್ರಾಯ್ ಜಾಂವ್ಕ್ ನಾ ಧನಿನಿ. ಸದ್ದ್ಯಾಕ್ ಕಾಜಾರ್ಚ್ ನಾಕಾ." ಗಾಗೆಲೊ ತೊ
"ತುಜ್ಯಾ ದೊಗಾಂ ಬೊಯ್ಲಾಂಕ್ ತರ್ನಾಟ್ಪಣ್ ಯೇವ್ನ್ ಆಮ್ಚ್ಯಾ ಶಾರದೆಕ್ ವಾಸ್ರುಂ ಜಾಲಾಂ ಆನಿ ತುಂ ತೇಲ್ ಪುಸುನ್ಚ್ ಆಸಾಯ್. ಜಾಂವ್ದಿ ಕಿತೆಂಯ್ ಜಾಂವ್ ತುಕಾ ಆಮ್ಚಾ ಹಳ್ಳೆಚೆಂಚ್ ಚೆಡುಂ ಹಾಡ್ತಾಂ.
ಮರೂರಾಕ್ ವೆಚೊ ದೀಸ್ ಉದೆಲೊ. ದನ್ಪಾರಾಂ ಜೆವಾಣ್ ಜಾವ್ನ್ ಜಾಯ್ತಿ ಪೊಳಿ, ಮ್ಹೊಂವ್, ರಾಂದ್ವಯ್ ಗಾಡಿಯೆರ್ ಘಾಲುನ್ ಗಾಡ್ಯೆಕ್ ಸುಂರ್ಗಾರಾವ್ನ್ ಹೊಕಾಲ್ ಆನಿ ನೊವ್ರ್ಯಾಕ್ ಗಾಡ್ಯೆರ್ ಬಾಸೊನ್ ರಾಜಪ್ಪ ಗೌಡನ್ ಪುತಾ ಆನಿ ಸುನೆಕ್ ಮರೂರಾಕ್ ದಾಡ್ಲೆಂ. ಆನಿ ಜಾನಕಿಕ್ ಥಂಯ್ ಸೊಡುನ್ ಪುತಾಕ್ ಪಾಟಿಂ ಹಾಡ್ ಮ್ಹಣೊನ್ ರಾಜುಕ್ ರಾಜಪ್ಪಗೌಡನ್ ಹುಕುಮ್ ದಿಲಿ.
ಥಂಡ್ ವಾರ್ಯಾಂತ್, ತ್ಯಾ ರಾನಾಂತ್, ರುಕಾ ಮೊಳ್ಯಾಂತ್ಲ್ಯಾನ್, ಬೊಯ್ಲಾಂಚಾ ಗಾಡಿಯೆಚಾ ರಸ್ತ್ಯಾನ್ ಬೋಯ್ಲ್ ಗಾಡಿ ವೊಡುನ್ ವೆತಾಲೆ. ಚಾಲಕ್ ರಾಜು ಜಾಲ್ಲ್ಯಾನ್ ಮಾಲಾಕ್ ಲಿಂಗೇಗೌಡ ಆನಿ ಮಾಲ್ಕಿನ್ ಜಾನಕಿ. ಮುಕ್ಲ್ಯಾನ್ ದೋಗ್ ಬೋಯ್ಲ್, ಗಾಡಿ ಚಲಯ್ತಲೊ ರಾಜು. ಪಾಟಿಂ ಮೋವ್ ಗಜ್ಡೆರ್ ಘೊವ್ ಆನಿ ಬಾಯ್ಲ್.
ಗಾಡಿ ಚಲ್ತಾನಾ, ಕಿಣ್ಕುಳೆ ಆವಾಜ್ ಉಟಯ್ತಾನಾ, ರಾನಾಂತ್ಲ್ಯಾ ಮಾಂಕ್ಡಾಂಚಿ ಉಂಚಾಭಳಾಯ್ ಚಡ್ಲಿ. ಕಂತನಹಳ್ಳೆಂತ್ ಗಂದಾಚೆ, ಸಾಗೊಣೆಚೆ, ಬೀಟ್, ದೇವ್ದಾರಿ, ಸುಂರ್ಗಿ, ದುಂಪ್, ದಾಲ್ಚಿನಿ ರೂಕ್ ಆಸ್ಲ್ಯಾರ್ ಪರ್ಮಳ್ ಮಾತ್ರ್ ಸುಂರ್ಗಿ ಫುಲಾಂಚೊ ಯೆತಾಲೊ. ಸಗ್ಳ್ಯಾಂನಿ ರೂಕಾಚೆಂಚ್ ದರ್ಬಾರ್. ತಾಚೆ ವಯ್ರ್ ಮಾಂಕ್ಡಾಚೆಂ ಕಾರ್ಬಾರ್. ರಾನ್ವಟ್ ವಾಟ್ ಸಾದಾರ್ಣ್ ಎಕಾ ಘಂಟ್ಯಾಚಿ ಆವ್ದಿ. ಉಪ್ರಾಂತ್ ಮರೂರ್ ರಾನ್. ಹ್ಯಾ ಮಧೆಂ ಗೆಂಡ್ಲಾ ಹೊಸೂರಾಚೆಂ ರಾನ್.
ಸಾಂಜೆ ವೆಳಾರ್ ಗಾಡಿ ಮರೂರಾಂರ್ ಥಾಂಬ್ಲಿ.
ಧಾ ವೊರಾರ್ ಸಕಾಳಿಂ ಭಾಯ್ರ್ ಸರ್ಲೆಲಿಂ, ಸಾಂಜೆಚಿಂ ಪಾಂಚ್ ಜಾತಾನಾ ಮರೂರಾಕ್ ಪಾವ್ಲ್ಲೆಂ ಲೇಖ್ ಘಾಲೆಂ ಜಾನಕಿನ್.
ಜಾನಕಿಕ್ ಆವಯ್ಚಾ ಘರಾ ಸೊಡ್ನ್ ಪಾಟಿಂ ಯೇಂವ್ಕ್ ಜಾಯ್ನಾತ್ಲ್ಲ್ಯಾನ್ ಲಿಂಗೇಗೌಡ ಆನಿ ರಾಜು ಮರೂರಾಂತ್ ರಾವ್ಲೆ. ತ್ಯಾ ರಾತಿಂ ಮರೂರಾಂತ್ ಧುವೆ ಜಾಂವ್ಯಾಂಕ್ ಸನ್ಮಾನ್ ಜಾತಾನಾ ರಾಜುಕ್ಯ್ ಗೌಡಚಾ ಘರಾ ಭಿತರ್ ಜಾನಕಿನ್ ಆಮಂತ್ರಣ್ ದಿಲ್ಲೆಂ. ಖಂಚ್ಯಾಯ್ ಆಳಾಂಕ್ ಗೌಡ ಜಾತ್ ಘರಾ ಭಿತರ್ ಘೆನಾ ಆನಿ ಖಾನ್ ದೀನಾ.
ದುಸ್ರ್ಯಾ ಫಾಂತ್ಯಾರ್ ಮರೂರಾಂತ್ಲ್ಯೊ ಕೊಗ್ಳಿ ಗಾಯಾನಾಂ ಕರ್ತಾನಾ, ಗುಡಾಂತ್ಲ್ಯಾ ಕೊಂಬ್ಯಾನಿ ಸಾದ್ ಘಾಲ್ಲೊ. ಪಾಟಿಂ ವೆಚ್ಯಾ ಪಯ್ಲೆಂ ರಾಜುಕ್ ಹಾಂವ್ ಆಟ್ ದಿಸಾಂನಿ ದಾಡ್ತಾಂ ಮ್ಹಳ್ಳೊ ಉಲೊ ದಿತಾನಾ ಜಾನಕಿನ್ ಆಪ್ಲ್ಯಾ ಘೊವಾಕ್ ಯೇಂವ್ಕ್ ವತ್ತಾಯ್ ಕೆಲಿ. ತಶೆಂ ರಾಜುಕ್ ಪಳೆಲೆಂ.
"ಸಾದ್ಯ್ ಜಾಲ್ಯಾರ್ ಯೆತಾಂ. ಘರಾ ಥೊಡ್ಯಾ ಕಾಮಾನ್ ಶ್ಹೆರಾಕ್ ವಚೊಂಕ್ ಆಸಾ. ಜಾಯ್ನಾ ಜಾಲ್ಯಾರ್ ರಾಜುಕ್ ದಾಡ್ತಾಂ. ತೊ ಮಾತ್ರ್ ವಿಶ್ವಾಸಿ ಮನಿಸ್ ಆಮ್ಚೊ" ಮ್ಹಣ್ತಾನಾ ಜಾನಕಿನ್ ಲಿಂಗೇಗೌಡಾಚಾ ಪೊಲ್ಯಾಂಕ್ ಚಿಮ್ಟೊ ಕಾಡ್ಲೊ.
"ಪುಣ್ ವೇಳ್ ಜಾಲ್ಯಾರ್....?" ಎಕ್ ದುಬಾವ್ ಉಚಾರ್ಲೊ ಜಾನಕಿನ್.
"ಕಾಂಯ್ ಭಿರಾಂತ್ ನಾ. ರಾಜು ಆನಿ ತಾಚ್ಯೆ ಬೊಯ್ಲ್ ವೆಗ್ಗಿಂ ಪಾವಯ್ತೆಲೆ" ಲಿಂಗೇಗೌಡಾಚಾ ಜಾಪಿಕ್ ಜಾನಕಿನ್ ಥಿಂಪಿ ಗಿಳ್ಳಿ.
ಪಾಟಿಂ ತೆ ಕಂತನಹಳ್ಳೆಕ್ ಪಾವ್ಲೆ. ಜಯ್ತಾಚೆಂ ಪಯ್ಣ್. ಆತಾಂತಾಂ ರಾಜುಕ್ ಕಿತೆಂಗೀ ಚೆಡ್ವಾಂ ಥಂಯ್ ಆಕರ್ಶನ್ ಜಾತಾ. ಜಾನಕಿನ್ ತಾಕಾ ಚೆಡುಂ ಪಳೆತಾಂ ಮ್ಹಳಾಂ. ಖಂಡಿತ್ ಪಳೆತೆಲಿ. ರಾಜುಚೊ ಭರ್ವಸೊ.
ಆಟ್ ದೀಸ್ ಪಾಶಾರ್ ಜಾಲೆ. ಆನಿ ಆಜ್ ಅಚಾನಕ್ ಕಾಮಾನ್ ಲಿಂಗೇಗೌಡಕ್ ಶ್ಹೆರಾಕ್ ವಚೊಂಕ್ ಪಡ್ಲೆಂ. ತ್ಯಾ ದೆಕುನ್ ವೆಗ್ಗಿಂ ರಾಜುಕ್ ಗಾಡಿ ಬಾಂದಯ್ಲಿ ಮರೂರಾಕ್ ವಚೊಂಕ್.
ಬೊಯ್ಲಾಂಚಿ ಗಾಡಿ ತ್ಯಾಚ್ ವಾಟೆನ್ ದನ್ಪರಾಂ ಮರೂರಾಕ್ ಪಾವ್ಲಿ. ತಶೆಂ ಜಾನಕಿಕ್ ಪಾಟಿ ದಾಡ್ಚಿ ವಿಲೆವರಿ ಕೆಲ್ಲಿ. ಜಾಂವಯ್ ಯೆಂವ್ಕ್ ನಾ ಮ್ಹಳ್ಳಿ ಖಂತ್ ಆಸ್ಲ್ಯಾರ್ಯ್ ಪಾತ್ಯೆಣೆಚೊ ಚಾಕೊರ್ ದಾಡ್ಲಾ ಮ್ಹಳ್ಳೆಂ ಎಕ್ ಗುಮಾನ್ ಉದೆಲ್ಲೆಂ.
ಚ್ಯಾರ್ ವೊರಾರ್ ಜಾಯ್ತ್ಯೊ ಫಳ್ ವಸ್ತು, ಸಾಮಾನಾ ಸವೆಂ ಜಾನಕಿ ಗಾಡ್ಯೆರ್ ಬಸ್ಲೆಂ. ತಶೆಂ ಆಪ್ಲ್ಯಾ ಆವಯ್ ಬಾಪಯ್ಕ್ ಕಂತನಹಳ್ಳೆಕ್ ಆಮಂತ್ರಣ್ ದಿಲೆಂ.
ಹ್ಯಾ ಮಲ್ನಾಡಾಂತ್ ಪಾತ್ಯೆಣೆ ತಿತ್ಲೆಂ ಸತ್ ದುಸ್ರೆಂ ನಾ. ಹೆಂ ಸತ್ ಜಾಯ್ತೆ ಪಾವ್ಟಿಂ ದಂಡಳ್ತಾ.
ಗಾಡಿ ಪಯ್ಣಾಕ್ ಲಾಗ್ಲಿ. ಜಾನಕಿನ್ ಕಂತನಹಳ್ಳೆಕ್ ಆನಿ ಮರೂರಾಕ್ ವೆಳಾಚೊ ಆಂದಾಜ್ ಘಾಲೊ. ಮರೂರ್ ರಾನಾಂತ್ ಗಾಡ್ಯೆಚಿಂ ರೊದಾಂ ರಿಗ್ಲಿಂ. ಆನಿ ರಾಜುನ್ ವೆಗ್ಗಿಂ ವೆಗ್ಗಿಂ ಗಾಡಿ ದಾಂವ್ಡಾಯ್ತಾನಾ, ಗಾಡಿ ಸವ್ಕಾಸ್ ಚಲಂವ್ಕ್ ಜಾನಕಿನ್ ಚತ್ರಾಯ್ ದಿಲಿ.
"ಮಾರೂರಾಂತ್ಲೆಂ ರಾನ್ ಮ್ಹಕಾ ಅಂದಾಜ್ ನಾ. ಹಾಂಗಾ ರಾನ್ವಾಟ್ ಮನ್ಜಾತಿ ನಾಂತ್. ಪುಣ್ ಕಿತೆಂಗೀ ಭಿರಾಂತ್. ಆಮಿಂ ವೆಗ್ಗಿಂ ಕಂತನಹಳ್ಳೆಕ್ ಪಾವ್ಲ್ಯಾರ್ ಬರೆಂ" ರಾಜುಚೆ ಉತಾರ್ ಜಾನಕಿಕ್ ಕಿತ್ಯಾಕ್ಗೀ ಆಮ್ಚೊರಾಚೆಂ ಜಾಲ್ಲೆಂ.
ತೆಂ ಆಪ್ಲ್ಯಾ ಪತಿಕ್ ಲಿಂಗೇ ಗೌಡಾಕ್ ಚಿಂತಾ. ಆನಿ ಹ್ಯಾ ರಾಜುಕ್ ಪರತ್ ಚಿಂತಾ. ಆನಿ ಆಶೆತಾ. "ಉರುಳು ಬಿಗಿದ ಗಂಡ ಇರುಳು ಬರೀ ದಂಡ" ಮಲ್ನಾಡಾಂತ್ಲಿ ಗಾದ್ ಜಾನಕಿಕ್ ಲಾಗು ಜಾತಾಲಿ. ತ್ಯಾ ಖಾತಿರ್ ತಾಣೆ ರಾಜುಕ್ ವಿಂಚ್ಲೆಂ.
"ಅಮ್ಮಾ ಕಿತೆಂ ಚಿಂತಾಯ್? ರಾಜುನ್ ಗಾಡಿ ರಾವಯ್ಲಿ. ಆನಿ ಸಕಯ್ಲ್ ದೆಂವೊನ್ ಗಾಡ್ಯೆಚಾ ಆಡ್ಯಾಕ್ ಬಾಂದ್ಲ್ಲೊ ಲ್ಯಾಂಪ್ ಪೆಟವ್ನ್ ಗಾಡ್ಯೆಕ್ ಶಿರ್ಕಾಯ್ಲೊ.
ರಾನ್ ಸುವಾತೆನ್ ಸಾಂಜೆಚಾ ಪಯ್ಣಾಕ್ ಬೊಯ್ಲಾಂಚಾ ಗಾಡ್ಯೆರ್ ರಿವಾಜ್ ಆಸ್ತಾ. ಎಕಾದಾವೆಳಾರ್ ಗಾಡ್ಯೆರ್ ಆಸ್ಲ್ಲಿಂ ನಿದ್ಲ್ಯಾರ್ ಬೋಯ್ಲ್ ಸೀದಾ ಗಾಡಿ ವೋಡ್ನ್ ವರ್ತಾತ್. ಬೊಯ್ಲಾಂಕ್ ವಾಟ್ ಕಳಿತ್ ಆಸ್ತಾ. ಕೊಣ್ಯ್ ಶಿಕಾರೆಚೆ ಆಯ್ಲ್ಯಾರ್ ಗಾಂವ್ಚಿ ಮನ್ಶಾಂ ಪಯ್ಣ್ ಕರ್ತಾತ್ ಮ್ಹಣ್ ಚಿಂತಾತ್.
"ಕಿತೆಂ ಕರ್ತಾಯ್ ರಾಜು ಗಾಡಿ ರಾವವ್ನ್?" ಹಾಸ್ಲೆಂ ತೆಂ. ತೆಂಯ್ ಜಣಾಂ ಗಾಂವ್ಚಿ ರಿವಾಜ್.
"ಕಾಂಯ್ ನಾ. ಆನಿ ತುಮಿ ನಿದ್ಯೆತ್.... ಮ್ಹಾಕಾಯ್ ಜೋಪ್ ಆಯ್ಲ್ಯಾರ್ ಹಾಂಗಾಚ್ ಗೊಮ್ಟಿ ಆಡ್ ಗಾಲ್ಯೆತ್. ಪೂಣ್ ಮ್ಹಜ್ಯಾ ಗಾಡ್ಯೆರ್ ಮ್ಹಜ್ಯಾ ಗೌಡಚಿ ಧನಿನ್ ಆಸಾ. ಹಾವೆಂ ತಿಕಾ ಪಾವಂವ್ಕ್ ಆಸಾ. ಜವಾಬ್ದಾರಿ ಆಸಾ. ಆನಿ ತ್ಯಾ ಘರ್ಚೊ ಮೋಗ್ ಆಸಾ" ರಾಜು ಉಲಯ್ತಾಲೊ.
"ಮೊಗಾಕ್ ಜಾತ್ ನಾ, ಊಂಚ್, ನೀಚ್, ಕೀಳ್, ನಾ. ಚೆಡ್ವಾನ್ ಪಸಂದ್ ಕೆಲ್ಯಾರ್ ಖಂಯ್ಚೊಯ್ ಚೆಡೊ ತಿಕಾ ಜಾತಾ. ತಶೆಂ ತಿ ಆಪ್ಣಾಯ್ತಾ"
ರಾಜುನ್ ಗಾಡಿ ಚಾಲು ಕೆಲಿ.
"ಖಂಯ್ಚೆಂಯ್ ಏಕ್ ಜಾನಪದ್ ಗೀತ್ ಮ್ಹಣ್ ರಾಜು." ತೆಂ ರಾಜುಚ್ಯಾ ಕುಶಿಕ್ ಬಸ್ಲೆಂ.
ರಾಜುಕ್ ಕಿತೆಂಗೀ ತ್ಯಾ ರಾನಾಂತ್ ಹಿಂವ್ ಖಾಂವ್ಕ್ ಶುರು ಜಾಲೆಂ.
"ಧನಿನಿ ತುಂ.... ತುಂ... ಥಂಯ್ ಆಡ್ ಪಡ್..... ಹಾಂವ್ ಮ್ಹಾಕಾ ಕಳಿತ್ ಆಸ್ಲ್ಲೆಂ ಸಾಂಗ್ತಾಂ"
"ಪರಸಪ್ಪ ಹೆಂಡ್ತಿ ನಿಂಗಿ
ನೀರಿಗೆ ಬಂತೈತೆ. ಹೊತ್ತು ಮುಳುಗಿತು ಕತ್ತು ತಿರುಗಿತು
ನನ್ನ ನೋಡೈತೆ
ಬಾರೊ ಗುಂಡಾ ಯಾರೂ ಕಾಣೆ
ಕೊಡ್ಪಾಣಾ ಬಿದ್ದೈತು.
ಆಳಾ ಕೆರೆ, ಬಾಳಾ ಹೊತ್ತು ಕಾದು ಸುಸ್ತಾಯ್ತು.....
ಆಕೇರ್ ಕರ್ತಾನಾಂಚ್ ಜಾನಕಿನ್ ರಾಜುಕ್ ಪಾಟ್ಲ್ಯಾನ್ ಗಟ್ಟ್ ದರ್ತಾನಾ, ರಾಜುನ್ ಗಡ್ಬಡೊನ್ ಬೊಯ್ಲಾಂಚಿ ದೊರಿ ವೊಡ್ಲಿ. ಗಾಡಿ ರಾವ್ಲಿ. ರಾಜು ಕಾವ್ಜೆಲೊ. ಬೊಯ್ಲಾಂಕ್ ಕಿತೆಂ ತೆಂ ಕಳಿತ್ ಜಾಲೆಂ ನಾ.
"ಧನಿನಿ..... ಹೆಂ ಕಿತೆಂ ಕರ್ತಾಯ್? ತುಂ ಮ್ಹಜ್ಯಾ ಧನ್ಯಾಚಿ ಬಾಯ್ಲ್. " ಕಾವ್ಜೆಲೊ ತೊ.
"ಕಂತನಹಳ್ಳೆಚಿ ಸುರ್ವಾತ್ ಜಾಲ್ಯಾ. ಹೆಂ ರಾನ್ ಉತ್ರೊಂಕ್ ಅರ್ದ್ಯಾ ಘಂಟ್ಯಾಚೊ ವೇಳ್ ಆಸ್ತಲೊ. ರಾನಾಂತ್ ನರ್ ಮನಿಸ್ ಹ್ಯಾ ಕುಶಿಕ್ ಹ್ಯಾ ವೆಳಾರ್ ನಾಂತ್. ಉಪ್ರಾಂತ್ ಮೆಳ್ಚೆಂ ಹೊಸೂರ್ ರಾನ್. ತೆಂ ಉತ್ರೊಂಕ್ ಜಾಯ್ನಾತ್ಲ್ಯಾನ್ ರಾಜುನ್ ಗಾಡಿ ಹ್ಯಾ ಕುಶಿಕ್ ಘುಂವ್ಡಾಯಿಲ್ಲಿ. ಜಾನಕಿನ್ ವೇಳ್ ಕಾಡ್ಲೊ ನಾ. ಜಾನಕಿನ್ ರಾಜುಕ್ ಗಾಡ್ಯೆರ್ ವೊಡ್ಲೊ. ಆನಿ ರಾಜು ಜಾನಕಿಚಾ ಸರ್ಶಿಂ ಪಡ್ಲೊ. ಜಾನಕಿಚಿಂ ಚಿಂತ್ನಾಂ ಪಾರ್ಕಿಲಿಂ ತಾಣೆಂ. ಆತಾಂ ತಾಕಾ ಕಳಿತ್ ಜಾಲ್ಲೆಂ. ಜಾನಕಿನ್ ಕಿತ್ಯಾಕ್ ಆಪ್ಣಾಕ್ ಲಾಗಿಂ ಕೆಲ್ಲೊ ಮ್ಹಣ್. ರಾಜುಕ್ ರಾನಾಂತ್ ಜಾಂವ್ಚಿಂ ಘಡಿತಾಂ ಕಳಿತ್. ಆನಿ ಹ್ಯಾ ವರ್ವಿಂ ಜಾಯ್ತ್ಯೊ ಪಂಚೆತ್ಕಿ ಜಾವ್ನ್ ಜಾಯ್ತ್ಯಾಂಕ್ ಶಿಕ್ಶಾ ಮೆಳ್ಳ್ಯಾ. ಆನಿ ಆತಾಂ ಹಿ ಧನಿನ್, ಉಂಚ್ಲ್ಯಾ ಘರಾಣ್ಯಾಚಿ ಬಾಯ್ಲ್, ಕಾಜಾರಿ ಬಾಯ್ಲ್, ರಾಜು ಚಿಂತಾ. ಗೌಡಾಕ್ ಹೆಂ ಕಳಿತ್ ಜಾಲ್ಯಾರ್......? ತೊ ಪಂಚೆತ್ಕೆಚೆಂ ಚಿಂತಾ.
"ನಾ.... ಧನಿನಿ... ತುಂ ಹೆಂ ಕಿತೆಂ ಕರ್ತಾಯ್? ಪಂಚೆತ್ಕಿ ಜಾಲ್ಯಾರ್ ಹಾವೆಂ ......." ಭಿಯೆತಾ ತೊ.
"ಪಂಚೆತ್ಕಿ ಕರ್ಚಿ ಆಮಿ..... ತುಂ ಮ್ಹಾಕಾ ಜಾಯ್ ರಾಜು. ಮ್ಹಜೊ ಅಸ್ಕತ್ ಘೊವ್ ತಾಕಾ ಪಳೆತಾನಾ....."
ರಾಜುಕ್ ಆಪ್ಣಾಚಾ ಆಂಗಾ ವಯ್ರ್ ವೊಡ್ಲೊ ಜಾನಕಿನ್. ಗಾಡಿ ಹಾಲ್ಲಿ ಜಾಲ್ಲ್ಯಾನ್ ಬೋಯ್ಲ್ ಗಾಡಿ ವೋಡ್ನ್ ಚಲ್ತೆಚ್ ರಾವ್ಲೆ. ತಾಂಚಾ ಗೊಮ್ಟ್ಯಾಕ್ ಕಿಣ್ಕುಳೆ ಬಾಂದ್ಲ್ಯಾತ್. ಆವಾಜ್ ಮಾತ್ರ್ ಆಯ್ಕಾತಾ. ತಾಂಕಾ ಪಳಂವ್ಕ್ ದೊಳೆ ಆಸಾತ್, ಖಾಂವ್ಕ್ ತೋಂಡ್ ಆಸಾ, ಲೆವೊಂಕ್ ಜೀಬ್ ಆಸಾ, ಪುಣ್ ಉಲಂವ್ಕ್ ತಾಂಕಾ ಜಾಯ್ನಾ. ಕಿತೆಂ ಪಳೆಲಾಂ ಜಾಲ್ಯಾರ್ ಸಾಕ್ಸ್ ದೀಂವ್ಕ್ ಜಾಯ್ನಾ. ಗಾಡಿ ಮುಕಾರ್ ವೆತಾಲಿ. ಆನಿ ರಾಜು ಆನಿ ಜಾನಕಿ ಗಾಡ್ಯೆರ್ ನಿದ್ಲ್ಯಾಂತ್. ತಾಂಕಾ ನೀದ್ ಪಡೊಂಕ್ ನಾ. ರಾಜುಕ್ ಹೊ ಪಯ್ಲೊ ಅನುಭವ್, ಪುಣ್ ಜಾನಕಿ ಹ್ಯಾ ಅನುಭವಾನ್ ಪಿಕ್ಲಾಂ ತಶೆಂ ರಾಜುಕ್ ಭಗ್ತಾ. ಹಾಂಚೆಂ ಕರ್ಮ್ ಬೊಯ್ಲಾಂನಿ ಮಾತ್ರ್ ಪಳೆಜೆ. ಸಾಂಜೆ ವೆಳಾರ್ ಮಾಂಕ್ಡಾಂಚಿ ಬೊಬಾಟ್ ನಾ ಕಂತನಹಳ್ಳೆಂತ್. ರಾನಾಂತ್ ಬರೆಂ ವಾರೆಂ ವ್ಹಾಳ್ತಾಲೆಂ ಸುಂರ್ಗಿ ಫುಲಾಂಚೊ ಸ್ವಾದ್ ಪ್ರಸಾರ್ತಾಲೊ. ಕಾಳೊಕ್ ಪಡೊನ್ ಯೆತಾಲೊ. ರಾಜುಕ್ ಆನಿ ಜಾನಕಿಕ್ ಘರಾ ಪಾವೊಂಕ್ ವೇಳ್ ಆಸ್ಲ್ಲೊ. ತಶೆಂ ರಾಜುಕ್ ಪೊಟ್ಲುನ್ ದರ್ತಾನಾ ಜಾನಕಿಕ್ ತಾಚ್ಯಾ ಪತಿಚೊ ಉಡಾಸ್ ಆಯ್ಲೊ. ರಾಜುಚಿ ಏಕ್ ವೇಂಗ್, ತ್ಯಾ ಅಸ್ಕತ್ ಲಿಂಗೇ ಗೌಡನ್ ಕಿತ್ಲೆಂ ಪ್ರಯತ್ನ್ ಕೆಲ್ಯಾರ್ಯ್ ಜಾಂವ್ಚೆಂ ನಾ. ರಾಜು ಖರ್ಶೆನಾತ್ಲ್ಲೊ, ಆನಿ ಉಸ್ಮೊಡಿ ಬರಿ ಖರ್ಶೆಂವ್ಚಾ ಲಿಂಗೇಗೌಡಾಕ್ ಲೇಖ್ ಗಾಲ್ತಾ ತೆಂ.
ರಾಜು ಉಟ್ಲೊ. ಖಂತಿಷ್ಟ್ ಮುಖಮಳಾಂತ್. ತಾಚಾ ಆಂಗಾಂತ್ಲಿ ಸಕತ್ ಗೆಲ್ಲ್ಯಾ ಬರಿ ಭಗ್ಲೆಂ ತಾಕಾ.
"ಕಿತೆಂಯ್ ಭಿಯೆನಾಕಾ ರಾಜು ಹಾಂವ್ ಆಸಾಂ. ಹಾಂವ್ ತುಕಾ ಸಾಂಬಾಳ್ತಾಂ. ಮ್ಹಾಕಾ ಸುಕ್ ದಿಲ್ಲ್ಯಾ ತುಕಾ ಖಂಡಿತ್ ದೂಕ್ ದೀನಾ. ಹೆಂ ಮ್ಹಜೆಂ ಉತಾರ್." ಜಾನಕಿಚೆಂ ಉತಾರ್ ವಜ್ರಾಬರಿ ಘಟ್ ಜಾಲ್ಲೆಂ.
ಸಾಡೆ ಸಾತಾಂಕ್ ಕಂತನಹಳ್ಳಿ ರಾನ್ ಕಾಬಾರ್ ಜಾಲೆಂ. ಆಟಾಂಕ್ ತಿಂ ಗೌಡ ಘರಾ ಪಾವ್ಲಿಂ. ಜಾನಕಿ ಸಡ್ಸುಡೀತ್ ಆಸ್ಲ್ಲೆಂ. ರಾಜುನ್ ಗಾಡಿಯೆ ವಯ್ಲೊ ಥೊಡೊ ಸಾಮಾನ್ ಘರಾ ದೆಂವಯ್ಲೊ.
"ಪಯ್ಣ್ ಕಶೆಂ ಜಾಲೆಂ ಜಾನಕಿ?" ರಾಜಪ್ಪ ಗೌಡನ್ ಆಪ್ಲ್ಯಾ ಸುನೆಕ್ ವಿಚಾರ್ಲೆಂ.
"ಬರೆಂ ಸುಸ್ತು ಜಾಲಾಂಯ್, ಹೊ ರಾಜು ಗಾಡಿ ಆಂಬೊಡ್ತಾಯ್ ತಸೊಚ್. ವೆಳಾರ್ ಪಾಂವ್ಚೊ ತೊ ತುಕಾ ಕಿತ್ಲ್ಯಾ ಜತ್ನೆನ್ ಹಾಡ್ನ್ ಆಯ್ಲಾ ಪಳೆ." ಬಸ್ಸಾಚೆ ಡ್ರೈವರ್ ಸಯ್ತ್ ಹಾಡಿನಾಂತ್."
"ವ್ಹಯ್ ಮಾಂವಾಂನೊ ಹೊ ಆಸ್ಲ್ಲ್ಯಾನ್ ಧಯ್ರಾನ್ ಮ್ಹಾಕಾ ಧಾಡ್ಲಾಂ ಆನಿ ಹಾಣೆ ಹ್ಯಾ ಸಾಂಜೆ ವೆಳಾರ್ ಖಂಚೆಯ್ ಕಡೆ ಗಾಡಿ ರಾವಯ್ನಾಸ್ತಾನಾ ಆಂಬುಡ್ನ್ ಆಯ್ಲಾ." ಹಾಸ್ಲೆಂ ತೆಂ ರಾಜುಕ್ ಪಳವ್ನ್.
"ರಾಜು ತುಂ ನ್ಹಾವ್ನ್ ಯೇ. ಆಮ್ಚಾ ಗಾಂವ್ಚೆಂ ಗೊಡ್ಶೆಂ ದಿತಾಂ" ತೆಂ ಭಿತರ್ ಗೆಲೆಂ.
"ಮಾಂವಾಂನೊ ಮ್ಹಜೊ ಪತಿ ಯೇಂವ್ಕ್ ನಾಂಗೀ ?"
"ಫಾಲ್ಯಾಂ ಸಾಂಜೆರ್ ಯೆತಾ ಖಂಯ್. ಶ್ಹೆರಾಕ್ ಗೆಲ್ಯಾರ್ಮೂ......? ತಾಚ್ಯೆ ಈಶ್ಟ್.... ಕಾಮ್...." ರಾಜಪ್ಪ ಗೌಡಾನ್ ಲದಿನ್ ವಾಚ್ಲಿ. ಜಾನಕಿಕ್ ತಿ ಲದಿನ್ ಗರ್ಜ್ ದಿಸ್ಲಿ ನಾ. ನ್ಹಾವ್ನ್ ಖಾವ್ನ್ ನಿದ್ಲ್ಲ್ಯಾ ರಾಜುಕ್ ಆಪ್ಲ್ಯಾ ಧನಿನಿಚಿಂಚ್ ಚಿಂತ್ನಾಂ. ಕಾಂಯ್ ಸಾಂಗ್ಲ್ಯಾರ್ ಗೌಡ ಗುಳೊಚ್ ಗಾಲ್ನ್ ಕಾಬಾರ್ ಕರುಂಕ್ ಆಸಾ. ಭಿಯೆತಾ ತೊ. ಆನಿ ಗಾಡ್ಯೆರ್ ಜಾಲ್ಲೆಂ ಪರತ್ ಚಿಂತಾ.
ಸಾಕಾಳಿಂ ಸುರ್ಯೊ ಉದೆವ್ನ್ ವಯ್ರ್ ಗೆಲ್ಲೊ. ರಾಜುಕ್ ಕಳಿತ್ ಜಾಲೆಂ ನಾ. ರಾಜುಕ್ ಖಾಣ್ ದೀಂವ್ಕ್ ಜಾನಕಿನ್ ನಿಂಗಿಕ್ ಸಾಂಗ್ಲೆಂ. ಆವಯ್ ನಿಂಗಿ ಪುತಾ ಸರ್ಶಿಂ ಗೆಲಿ. ಪುತಾಕ್ ಪಳೆಲೆಂ ತಿಣೆಂ. ತಿಕಾ ಕಿತೆಂಗೀ ದುಬಾವ್ ಕಿರ್ಲಾಲೊ. ಸಾಟ್ ವರ್ಸಾಂಚಿ ಕೂಡ್ ತಿಚಿ.
"ಕಿತೆಂ ಜಾಲೆಂರೆ.....? ಪುರಾಸಣ್ ಜಾಲ್ಯಾಯೆರೆ.....?" ಪುತಾಚಿ ಸುಡ್ಸುಡಾಯ್ ತಿಕಾ ದಿಸ್ಲಿ ನಾ. ದುಬಾವ್ ಜಾಲ್ಯಾರ್ಯ್ ವೊಗಿ ರಾವ್ಲಿ.
ಸಾಂಜೆರ್ ಲಿಂಗೇಗೌಡ ಪಾವ್ಲೊ. ಸಗ್ಳಿ ಶ್ಹೆರಾಂತ್ಲಿ ಗಜಾಲ್ ತಾಣೆ ಜಾನಕಿಕ್ ವಿವರ್ಸಿಲಿ. ಜಾನಕಿಕ್ ಹೆಂ ಕಿತೆಂಯ್ ನಾಕಾ. ತಾಕಾ ಫಕತ್ತ್ ಹಳ್ಳಿ ತಶೆಂ ರಾಜು. ಆಪ್ಲಿ ಬಾಯ್ಲ್ ಶ್ಹೆರಾಕ್ ವೊಂದಾನಾ ತೆಂ ಕಳಿತ್ ಜಾಲೆಂ ಗೌಡಕ್. ದೀಸ್ ವೆತಾಲೆ. ಹಪ್ತೆ ಪರ್ತಾಲೆ ಮಹಿನೆ ಉಬ್ಲೆ. ತ್ಯಾ ಎಕಾ ಸಾಕಾಳಿಂ ಜಾನಕಿ ವೊಂಕ್ಲೆಂ. ಆಖ್ಖ್ಯಾ ದಿಸಾ ಖೆಲ್ಲೆಂ ಜಾಂವ್ಕ್ ನಾ ತೆಂ ಘರ್ಚಾಂನಿ ಚಿಂತಾನಾ, ನಿಂಗಿನ್ ಜಾನಕಿಕ್ ಪಳೆಲೆಂ. ಹಳ್ಳಿಚಿ ವಯ್ಜಿಣ್ ಮಳ್ಳಿ ಏಕ್ ’ಆರ್ಲುಕ್’ ತಿಕಾ ಆಸಾ. ವ್ಹಯ್...., ನಿಂಗಿನ್ ಸತ್ ಸಾಂಗ್ಲೆಂ. ಜಾನಕಿ ಆವಯ್ ಜಾಂವ್ಚಾಯ್ ಆಸಾ. ಗೌಡಗೆಲೆಂ ಕುಟಾಮ್ ಸಂತೊಸಾನ್ ಧಲ್ಲೆಂ. ಗೊಡ್ಶೆಂ ಕೆಲ್ಲೆಂ, ರಾಜುಕ್ ಪಯ್ಲೆಂ ವರುನ್ ದಿಲೆಂ ಜಾನಕಿನ್. ಪೂಣ್....
ನಿಂಗಿಕ್ ಕಿತೆಂಗೀ ಏಕ್ ದುಬಾವ್. ಕೊಡು ಕಸಾಯ್ ಪಿಯೆಲ್ಲೊ ಅನುಭವ್. ತಿ ಪುತಾ ಸರ್ಶಿಂ ಯೆತಾ. ಸುಡ್ಸುಡೀತ್ ಆಸ್ಲ್ಲೊ ಪೂತ್ ಉದಾಸ್ ಜಾವ್ನ್ಚ್ ವೆತಾ, ಸಕತ್ ಗೆಲ್ಲ್ಯಾ ಬರಿ. ಎಕ್ಸುರಿ ಚಿಂತಾ ನಿಂಗಿ. ಕಾಂಯ್ ರಾಜಪ್ಪ ಗೌಡನ್ ಆಪ್ಣಾ ಥಂಯ್ ಕೆಲ್ಲಿ ಚೂಕ್ ಹ್ಯಾ ರಾಜುನ್ ಜಾನಕಿ ವಯ್ರ್ ಕೆಲ್ಯಾಗೀ? ತರ್ನಾಟ್ಪಣಾರ್ ರಾಜಪ್ಪಗೌಡಾನ್ ತ್ಯಾ ತೊಟಾಂತ್ಲ್ಯಾ ಘರಾಂತ್ ಆಪ್ಣಾಕ್ ಆಪವ್ನ್, ಕೆಲ್ಲೆಂ ಕರ್ಮ್ ಆನಿ ತಾಚೊ ಫಳ್ ಜಾವ್ನ್ ಆಯಿಲ್ಲೊ ರಾಜು......! ಆಪ್ಲೆಂ ಪಾಪ್ ಕಳಾನಾಶೆಂ ಖಂಚ್ಯಾಗೀ ಎಕಾ ರೈತಾಕ್ ದರುನ್ ಕರಿಮಣಿ ಬಾಂದಯಿಲ್ಲೊ ಹೊ ರಾಜಪ್ಪಗೌಡ....! ಉಪ್ರಾಂತ್ ರಾಜುಚೆಂ ಜನನ್, ಎಕಾನೇಕ್ ಉಡಾಸ್ ಯೆತಾ ನಿಂಗಿಕ್. ರಾಜುನ್ ಕಿತೆಂ ತರ್ಯ್ ಕೆಲ್ಯಾರ್ಯ್, ರಾಜು ಗೌಡಚೆಂಚ್ ಸಂತಾನ್.....! ಆನಿ ಜಾನಕಿಕ್.......
ಜಾನಕಿಕ್ ಆತಾಂ ಚ್ಯಾರ್ ಮಹಿನೆ ಜಾಲ್ಯಾತ್ ಆನಿ ದೋನ್ ಮಹಿನ್ಯಾನಿಂ ತಾಕಾ ಮರೂರಾಕ್ ದಾಡುಂಕ್ ಆಸಾ. ಪಯ್ಲೆಂ ಫಳ್. ಕಾರ್ ಕರಿಜೆ. ಗಾಂವಾಂತ್ ಗಮ್ಮತ್ ಕರಿಜೆ. ಲಿಂಗೇಗೌಡ ಬಾಪಯ್ ಜಾತಾ ಮ್ಹಣ್ ಸಂತೊಸಾನ್ ಆಸ್ತಾನಾ ರಾಜು ಆನಿ ಜಾನಕಿಚೆಂ ಪಾಪಾಚೆಂ ಕ್ರತ್ಯ್ ಮಾಜ್ವೊನ್ ಗೆಲ್ಲೆಂ. ಸ್ತ್ರೀ ಆಶೆಲ್ಯಾರ್ ಕಿತೆಂಯ್ ಕರುಂಕ್ ತಿಕಾ ತಾಂಕ್ತಾ. ಹೆಂ ಜಾನಕಿನ್ ರುತಾ ಕೆಲ್ಲೆಂ.
ಜಾನಕಿ ತ್ಯಾ ಎಕಾ ಸಾಕಾಳಿಂ ಬಾಗ್ಲಾರ್ ರಾವೊನ್ ಆಪ್ಲೆಂ ಪೋಟ್ ಪುಸ್ತಾನಾ ರಾಜುಕ್ ಪಳೆತಾ. ರಾಜು ಬೊಯ್ಲಾಂಚಿ ಪಾಟ್ ಪುಸುನ್ ತಾಂಕಾಂ ಧುತಾನಾ ಬೋಯ್ಲ್ ಜಾನಕಿಕ್ ಪಳೆತಾತ್. ತಶೆಂ ರಾಜುಕ್ ಪಳೆತಾತ್. ತೆಚ್ ದೊಳೆ.... ತಿಂಚ್ ಮನ್ಶಾಂ.....! ಬೊಯ್ಲಾಂಕ್ ಕಳಿತ್. ಕಂತನಹಳ್ಳೆಂತ್ ಕೆಲ್ಲೆಂ ಪಾಪ್ ಆತಾಂ ಜಾನಕಿಚಾ ಪೊಟಾ ಭಿತರ್ ಆಸಾ. ಬೋಯ್ಲ್ ಪಳೆತಾತ್. ಪಂಚೆತ್ಕಿ ಕರುಂಕ್, ಪಳೆಲ್ಲೆಂ ಸಾಂಗೊಂಕ್ ಜಾಯ್ನಾಸ್ತಾನಾ ಕರ್ಗಾತಾತ್. ಆಪ್ಲೊ ಧನಿ ರಾಜು ಆನಿ ತಾಚೆಂ ಕಾರ್ಬಾರ್ ಚಿಂತಾತ್.
ಎಕಾ ದಡಂಗ್ ಚಾಕ್ರಾಚೆಂ ಫಳ್ ಆಪ್ಣಾ ಥಂಯ್ ವಾಡೊನ್ ಯೆತಾ ಮ್ಹಣ್ ಜಾನಕಿ ಚಿಂತ್ಲ್ಯಾರ್ಯ್ ಆಪ್ಣಾಕ್ಯ್ ಸುಕ್ ದಿಲ್ಲ್ಯಾ ರಾಜುಕ್ ವಿಸ್ರಾನಾ.
ತೆಂ ವಾಡೊನ್ ಯೆಂವ್ಚೆಂ ಫಳ್ ಚಾಕ್ರಾಚೆಂ ನ್ಹಂಯ್ ಬಗಾರ್ ತುಮ್ಚಾಚ್ ಗೌಡ ಸಂತತಿಚೆಂ ಫಳ್ ತೆಂ. ಮ್ಹಣ್ ಸಾಂಗೊಂಕ್ ನಿಂಗಿಚಿ ಜೀಬ್ ಪರ್ತಾನಾ.
ಕಂತನಹಳ್ಳೆಂತ್ಲೊ ಗೌಡಾ ಆನಿ ಲೋಕ್ ಮೆಳೊನ್ ಜಾನಕಿಕ್ ಫುಲಾಂ ಮಾಳ್ಚಿ ತಯಾರಾಯ್ ಕರ್ತಾನಾ ಸುರ್ಯೊ ಬುಡ್ತಾ. ಪರತ್ ಉದೆತಾ. ತಶೆಂ ರಾನಾಂತ್ಲೆಂ ಕರ್ಮ್ ನಿರಂತರ್ ಜಾವ್ನ್ಚ್ ವೆತಾನಾ ಮರೂರಾ ಥಾವ್ನ್ ರಾಜುಕ್ ಸೈರಿಕೆಚೊ ಪ್ರಸ್ತಾಪ್ ಯೆತಾ. ರಾಜು ಆನಿ ತಾಚೆ ಬೋಯ್ಲ್ ನಿರಂತರಿ ವಾವುರ್ನ್ಚ್ ಆಸ್ತಾತ್. ರಾಜುಚಿ ಪಂಚೆತ್ಕಿ ಜಾಂವ್ಚಿ ನಾ. ಬೋಯ್ಲ್ ತೋಂಡ್ ಸೊಡ್ಚೆ ನಾಂತ್.
************
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
