ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಎಚ್ಚೆಮ್ ಮ್ಹಳ್ಳ್ಯಾ ಲಿಖ್ಣೆನಾಂವಾರ್ ಕವಿತಾ ಬರಂವ್ಚೊ ಹೆನ್ರಿ ಮೆಂದೊಸ್ ಕೊಂಕ್ಣಿ ಕವಿತಾ ಶೆತಾಂತ್ ಪ್ರಸ್ತುತ್ ಕಾಳಾಚೊ ಉಂಚ್ಲೊ ಕವಿ, ವಿಮರ್ಶಕ್ ಆನಿ ಚಿಂತ್ಪಿ. ಎದೊಳ್ಚ್ ರಾಕ್ಣೊ ಸಾಹಿತಿಕ್ ಸ್ಪರ್ದೊ, ಕಾಣಿಕ್ ಕವಿ ಸ್ಪರ್ಧೊ, ದಾಯ್ಜ್ ಸಾಹಿತಿಕ್ ಸ್ಪರ್ಧೊ ಅಶೆಂ ಸಭಾರ್ ಸ್ಪರ್ಧ್ಯಾಂನಿ ಪಯ್ಲಿಂ ಇನಾಮಾಂ ಜೊಡ್ಲ್ಲ್ಯಾ ಹಾಚೆ ತೀನ್ ಕವಿತಾಜಮೆ ’ಚಲ್ಯಾಂಕ್ ಚತ್ರಾಯ್’, ’ಕಯ್ದ್ಯಾಚ್ಯೊ ಕವಿತಾ’ ಆನಿ ’ಬಾಮುಣಾಚೆಂ ಚೆಡುಂ’ ಪರ್ಗಟ್ ಜಾಲ್ಯಾತ್. ಕೊಂಕ್ಣಿ ಕವಿತಾಂಚೆರ್ ಜಾಯ್ತಿಂ ಲೇಖನಾಂ ಬರಯ್ಲ್ಯಾಂತ್. ಹೊ ಏಕ್ ಕಾಣ್ಯೆಗಾರ್, ಅಂಕಣ್ಕಾರ್ ಸಯ್ತ್. ಆಮ್ಕಾಂ ಸಭಾರ್ ವಾಚ್ಪ್ಯಾಂನಿ ಆಮ್ಕಾಂ ಎಚ್ಚೆಮಾಚಾ ಬರ್ಪಾಂ ಪರ್ಗಟ್ ಕರುಂಕ್ ವತ್ತಾಯ್ ಕೆಲ್ಲ್ಯಾನ್ ಹೊ ಕೊಂಕ್ಣಿ ಸಾಹಿತ್ಯಾಕ್ ಲಗ್ತಿ ಜಾಲ್ಲ್ಯಾ ಸಂಗ್ತೆಚೆರ್ ಹೊ ತವಳ್ತವಳ್ ದಾಯ್ಜ್.ಕೊಮ್ಚೆರ್ ಅಪ್ಲಿಂ ಬರ್ಪಾಂ ಬರಯ್ತಲೊ.
4. ಬಂಧಡ್, ಸುಟ್ಕಾ ಆನಿ ಸ್ವೇಚ್ಛಾಚಾರ್
ಹ್ಯಾ ದೇಶಾಕ್ ಸುಟ್ಕಾ ಮೆಳ್ತಾನಾ ಹಾಂವ್ ತರೀ ಜಲ್ಮಾಕ್ ಯೇಂವ್ಕ್ ನಾ ತಶೆಂ ಆಮ್ಚೆ ಜಾಯ್ತೆ ತರ್ನಾಟೆಯಿ. ಗೊರ್ವಾಂಚೆಂ ರಾಜ್ ಕಶೆಂ ಆಸ್ಲೆಂ ತೆಂ ಚರಿತ್ರೆಚ್ಯಾ ಬುಕಾಂನಿ ವಾಚುನ್ ಶಿವಾಯ್ ಭೊಗುನ್ಯಿ ಆಮ್ಕಾಂ ಕಳಿತ್ ನಾ. ಕಾಂಯ್ ಚಡ್ ಶಿಕಪ್ ನಾತ್ಲ್ಯಾರ್ಯಿ ತ್ಯಾ ಬಂದಡೆಚ್ಯಾ ಕಾಳಾರ್ ಜಿಯೆಲ್ಲ್ಯಾ ಆಮ್ಚ್ಯಾ ಮಾಲ್ಘಡ್ಯಾಂಕ್ ತ್ಯಾ ಆನಿ ಹ್ಯಾ ಕಾಳಾಮಧೆಂ ಕಿತೆಂ ಫರಕ್ ಆಸ್ಲೊ ಮ್ಹಣ್ ವಿಚಾರ್ಲ್ಯಾರ್: ಆಂಬಿಲ್ ಪೆಜೆಚೊ ತೊಚ್ ಕಾಳ್ ಬರೊ ಆಸ್ಲೊ ಮ್ಹಣ್ಯೆತ್;
ಚರಿತ್ರೆಚಿಂ ಪಾನಾಂ ಉಸ್ತಿಲಿಂ
ಎಕಾ ಶೆಕ್ಡ್ಯಾಚಿಂ
ಧಾ ದಾಕ್ಡ್ಯಾಂಚಿಂ
ತೆ ದೀಸ್ಯಿ ಅಶೆಚ್ ಆಸ್ಲ್ಲೆ
ಭುಕಿಂ ಥೊಡಿಂ ನಾಗ್ಡಿಂ
ಗಾಂವಾಂತ್ ಲಾಸ್ತಾಲಿಂ
ಘರಾಂ, ಮನಾಂ ಕಾಳ್ಜಾಂ
ದೆವಾಂಚೊ, ಧರ್ಮಾಚೊ ಧಂದೊ
ತೆದ್ನಾಂಯ್ ಚಲ್ತಾಲೊ
ಸಕ್ಕಡ್ ತಶೆಂಚ್ ಆಸಾ
ಪೊರ್ಚೆ, ಕಾಲ್ಚೆ ಆಯ್ಚೆಪರಿಂ
ಆಜ್! [ಆಜ್!, ವಲ್ಲಿ ಕ್ವಾಡ್ರಸ್, ಕಟ್ಪುತ್ಳಿ(2004-ಆಶಾವಾದಿ
ಪ್ರಕಾಶನ್)]
ಅಸಲ್ಯಾ ನಾಗ್ಡ್ಯಾ ಭುಕೆಚ್ಯಾ ಸುಟ್ಕೆಕ್ ಆನಿ ಬಂಧಡೆಕ್ ಕಿತೆಂ ಫರಕ್? ಸುಟ್ಕಾ ಮ್ಹಳ್ಯಾರ್ ದರಬಸ್ತ್ ಆಸ್ಲ್ಲ್ಯಾಂನಿ ಧಾಂಪಿಜೆ ಜಾಲ್ಲಿಂ ಮಾಣ್ಸುಗೆಚಿಂ ಪೊಂತಾಂ ಉಗ್ತಿಂ ಸೊಡುಂಕ್ ಆನಿ ಕಾಂಯ್ ನಾತ್ಲ್ಲ್ಯಾಂನಿ ಧಾಂಪುಂಕ್ ಪೆಚಾಡ್ಚೆಂ ಖಂಡಿತ್ ನ್ಹಯ್. ದೆವಾಚ್ಯಾ, ಧರ್ಮಾಚ್ಯಾ ನಾಂವಾನ್ ಧಂದೊ ಕರ್ಚೊ ಭಿಲ್ಕುಲ್ ನ್ಹಯ್.
ಕೊಣಾಕ್ ಆಯ್ಲಿ ಕಶಿ ಆಯ್ಲಿ
ಸಾತ್ತೆಚಾಳಿಸಾಚಿ ಸುಟ್ಕಾ
ಟಾಟಾ ಬಿರ್ಲಾಂಚ್ಯಾ ಬೊಲ್ಸಾಂಕ್ ಆಯ್ಲಿ
ಮನ್ಶ್ಯಾಂಕ್ ಖಾಂವ್ಚ್ಯಾ ತೊಂಡಾಂಕ್ ಆಯ್ಲಿ
ಸಾತ್ತೆ ಚಾಳೀಸಾಂಚಿ ಸುಟ್ಕಾ. [’ಸಾತ್ತೆ ಚಾಳೀಸಾಂಚಿ
ಸುಟ್ಕಾ’, ಡಾ|ಸಿದ್ದಲಿಂಗಯ್ಯ, ಕಪ್ಪು ಕಾಡಿನ
ಹಾಡು
(1983)]
ಆಜ್ ಆಮ್ಚ್ಯಾ ಜಿಲ್ಲ್ಯಾಂತ್ಚ್ ವಿಸ್ತಾರೊನ್ ಯೆಂವ್ಚ್ಯೊ ತೀನ್ ಹಿಂಸಾ ಆನಿ ತಾಂಚೆಂ ಸುರೂಪ್ ಪಳೆಯಾ. ಏಕ್, ಕೋಮುವಾದ್ ಹಿಂಸಾ. ಹೊ ದೇಶ್ ಆಮ್ಚೊ ಮಾತ್ರ್. ಹೆರ್ ಸಮುದಾಯಾಚ್ಯಾಂಕ್ ಹಾಂಗಾ ಆವ್ಕಾಸ್ ನಾ. ದುಸ್ರೆಂ, ನಕ್ಸಲ್ ಹಿಂಸಾ. ಬಂದೂಕೆಚಿ ಭಾಸ್. ತಿಸ್ರಿ: ಭ್ರಶ್ಟಾಚಾರಾಚಿ ಹಿಂಸಾ. ಪ್ರಜಾರಾಜಾಂತ್ಲಿ ಅಮಾನುಷ್ ಲಿಪ್ತಿ ಹಿಂಸಾ.
ಸುಟ್ಕೆವೆಳಾರ್ ಆಮ್ಕಾಂ ಚಡ್ ಸಂಖ್ಯಾಚ್ಯಾಂಕ್ ಏಕ್, ತಾಂಕಾಂ ಉಣ್ಯಾಂ ಸಂಖ್ಯಾಚ್ಯಾಂಕ್ ಏಕ್. ಅಶೆಂ ಭಟ್ವಾರೊ ಜಾಲೊ ತರೀ, ಚಡ್ ಸಂಕ್ಯಾಚೊ ಹಾಂಗಾ ಸಮಧಾನೆನ್ ನಾ. ಮನಾಂತ್ ಸಯನೈಡ್ ಘೆವ್ನ್ಂಚ್ ಮಧ್ಯಾನೆಚಿಂ ಭುರ್ಗಿಂ ಆತಾಂಯಿ
ಭಿತರ್ಲ್ಯಾ ಭಿತರ್ ಮುರ್ಮುರ್ತಾತ್. ಸುಟ್ಕೆ ಆದಿಂ ಆದಿವಾಸಿಂಚ್ಯಾ ಆನಿ ನಿಮ್ನ್ ವರ್ಗಾಚ್ಯಾ ನಿರ್ಗತಿಕ್ಪಣಾಕ್ ಸುಲಭಾಯೆನ್ ಗೊರ್ವಾಂಕ್ ಆನಿ ತಾಂಚ್ಯಾ ಆಡಳ್ತ್ಯಾಕ್ ಬೋಟ್ ಜೊಕ್ಚ್ಯಾ ಸವಯೆರ್ ಪಡ್ಲ್ಲ್ಯಾ ಆಮ್ಕಾಂ ಸುಟ್ಕೆಚ್ಯಾ ಪನ್ನಾಸ್ ವರ್ಸಾಂ ಉಪ್ರಾಂತ್ಯಿ ಆದಿವಾಸಿಂಕ್, ಸಮಾಜೆಚ್ಯಾ ನಿಮ್ನ್ ವರ್ಗಾಂಚ್ಯಾಂಕ್ ವಯ್ರ್ ಉಕಲ್ಚ್ಯಾಕ್ ಸಾಧ್ಯ್ ಜಾಲ್ಲೆಂಚ್ ನಾ. ಜಮೀನ್ದಾರಾಂಚೊ, ಭುಂಯ್ಕಾರಾಂಚೊ, ಭಂಡ್ವಾಳ್ಶಾಹಿಂಚೊ ಜುಲುಮ್ ದಿಸಾನ್ದೀಸ್ ಚಡೊನ್ ಯೆತಾನಾ ಸೊಡ್ದೊಡಿಚೆ ಸಗ್ಳೆ ರಸ್ತೆ ಮುಗ್ದೊನ್ ನಕ್ಸಲಾಂನಿ ಬಂದೂಕ್ ಹಾತಿಂ ಘೆತ್ಲಿ.
ತಿಸ್ರಿ ಹಿಂಸಾ ಭ್ರಶ್ಟಾಚಾರಾಚಿ. ಬ್ಯೂರೊಕ್ರೆಸಿಚಿ, ಪೂರ್ಣಚಂದ್ರ ತೇಜಸ್ವಿಚ್ಯಾ
’ತಬರನ ಕಥೆ’ಂತ್ ಯೆಂವ್ಚೆ ತಸಲಿ. ಹ್ಯಾ ಹಿಂಸೆಕ್ ಪ್ರಜಾರಾಜಾಚೆಂ ಮುಖಮಳ್ ಆಸಾ. ರಾಕೊಣ್ ಆಸಾ ಲಿಪ್ತಿ. ದಿಸಾನ್ದೀಸ್ ಹಿ ಮ್ಹಜೆ ತುಜೆ ತಸಲ್ಯಾ ಜಲ್ಮಾಚ್ಯಾ ದಾಕ್ಲ್ಯಾಕೀ ಪೊಕೊರ್ನ್ ಖಾತೇ ಆಸಾ. ಜಲ್ಮಾಚ್ಯಾ ದಾಕ್ಲ್ಯಾಕೀ, ಪಯ್ಶ್ಯಾಂ ಶಿವಾಯ್ ಕಾಗ್ದಾಂ ಹಾಲನಾಂತ್. ಹ್ಯಾ ಆನಿ ಸಕಯ್ಲೊ ವರ್ಗ್ ಘಾಣ್ಯಾಕ್ ದಿಲ್ಲ್ಯಾ ಕೊಬಾಪರಿಂ ಆಡ್ಚೊನ್ ಗೆಲಾ. ತಾಕಾ ಹೆವ್ಶಿನ್ ಬಾಂಯ್ ತೆವ್ಶಿನ್ ನಂಯ್. ಸೇನಾಪತಿ ಹಿಂದುಸ್ತಾನಿ ಪಿಂತುರಾಂತ್ ಮಾತ್ರ್ ಭಾಯ್ರ್ ಸರ್ತಾ. ಬಾಯ್ಲ್-ಭುರ್ಗಿಂ, ಸಂಸಾರ್ ಕುಟಮ್ ಆಸ್ಚೆ ನಾಕ್ ದಾಂಬೂನ್ ಧರ್ನ್ ಹಿ ಹಿಂಸಾ ಭೊಗ್ತೇ ಆಸಾತ್. ದುರಂತ್ ಮ್ಹಳ್ಯಾರ್ ತಬರಪರಿಂ ಆಮಿಂಯೀ ಗೊರ್ವಾಂಚೆಂಚ್ ರಾಜ್ ಕಿತ್ಲೆಂ ಬರೆಂ ಆಸ್ಲ್ಲೆಂ ಮ್ಹಣ್ ಸ್ವತಾಕ್ ಸಮಧಾನ್ ಕರ್ನ್ ಘೆವ್ಯೆತೆಂ ಮ್ಹಳ್ಯಾರ್ ಆಮಿ ತೆಂ ಭೊಗುಂಕ್ಯಿ
ನಾ.
ಪಯ್ಶ್ಯಾವಾಲಾಂಚ್ಯಾ ಹಾತ್ಭಾಶೆಕ್
ಕಾಳೊಕಾಂತ್ ನಾಗ್ಡಿ ಜಾಲಿ
ಕೊಣಾಕ್ ಪಳೆಂವ್ಕ್ ಮೆಳಾನಾತ್ಲಿ ಸುಟ್ಕಾ
ಸಾತ್ತೆ ಚಾಳಿಸಾಚಿ ಸುಟ್ಕಾ [’ಸಾತ್ತೆ ಚಾಳಿಸಾಚಿ ಸುಟ್ಕಾ’,
ಡಾ|ಸಿದ್ದಲಿಂಗಯ್ಯ]
ಆಜ್ ಗಲ್ಫಾಚ್ಯಾ ಬೇಶುಮಾರ್ ಜೊಡಿನಿಮ್ತಿಂ ಆಮ್ಚ್ಯಾಯಿ ತರ್ನಾಟ್ಯಾಂಚ್ಯಾ ಹಾತಾಂನಿ ಪಯ್ಶೆ ದರಬಸ್ತ್ ಖೆಳ್ತಾತ್. ದೆಕುನ್ ನಾಗ್ಡೆಂಪಣ್ಂಚ್ ಖೈ ಸುಟ್ಕಾ ಮ್ಹಣ್ ತಾಂತ್ಲ್ಯಾ ಸಬಾರಾಂನಿ ಚಿಂತ್ಲ್ಲೆಪರಿಂ ದಿಸ್ತಾ.
ಶಿಕ್ಪಾಕ್ ಸೊಡ್ನ್ ಸೊರ್ಯಾಂತ್, ಆಮಾಲಾಂತ್, ಸಿಗ್ರೆಟಿಂತ್ ಆನಿ ಚೆಡ್ವಾಂ ಫೆಶನ್, ಟಿವಿಕ್ ಲಜೆಕ್ ಘಾಲ್ಚಿಂ ವಸ್ತುರಾಂ ನೆಸೊನ್ ಮಿಸಾಕ್ ಸಯ್ತ್ ಯೇವ್ನ್ ದೆವಾಕ್ಚ್ ಲಜೆಕ್ ಘಾಲ್ತಾತ್. ದೆಕುನ್ ಆರ್ಚ್ ಬಿಸ್ಪಾಚ್ಯಾ ಮಟ್ಟಾಚ್ಯಾ ಎಕಾ ಪುರ್ವಿತಾಕ್ ಡ್ರೆಸ್ ಕೋಡಾವಿಶಿಂ ಜಾಗ್ರುತ್ಕಾಯ್ ದೀಜೆ ಪಡ್ತಾ.
ಘಡಿಭರ್ ಚಿಂತುನ್ ಪಳೆವ್ಯಾಂ:
ಗೊರ್ವಾಂಚಿ ಬಂದಡ್, ಸುಟ್ಕೆಚ್ಯಾ ದೇಶಾಂತ್ಲ್ಯೊ ಕೋಮುವಾದಾಚ್ಯೊ, ನಕ್ಸಲಾಂಚ್ಯೊ ಆನಿ ಭ್ರಶ್ಟಾಚಾರಾಚೊ ಹಿಂಸಾ ಆನಿ ಫುಡಾರಾಚ್ಯಾ ಪಿಳ್ಗೆನ್ ಸ್ವೇಚ್ಛಾಚಾರಾಚ್ಯೊ ಸುಟ್ಕಾ ಮ್ಹಣ್ ಚಿಂತ್ಲ್ಲಿ
ಭಿರ್ಮತ್ ಪರಿಗತ್ - ಹಾಂತುಂ ವಿಂಚವ್ಣ್ ಕಶಿ ಕರ್ಯೆತ್?
ಹ್ಯಾ ಪಾಟಿಥಳಾರ್ ಕಾಮಾಕ್ ಸುಟಿ, ಬಾವ್ಟೆ ಉಭಾಂವ್ಚೆಂ, ದೇಶ್ಭಾಕ್ತೆಚಿಂ ಗಿತಾಂ - ಹೆಂ ಸಗ್ಳೆಂ ಭಾಯ್ಲೆಂ ಆಚರಣ್, ದೊಂಬರಾಟ ದಿಸಾನಾ
ತುಮ್ಕಾಂ?
We are fettered within life's dungeon
What can freedom mean
To sparks embedded in the granite's veins [ - Mirza
Ghalib]
’ತಿಸ್ರೊ ದೊಳೊ’ಚೆ ಆಧ್ಲೆ ಆಂಕ್ಡೆ: 1, 2, 3
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
