ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಕೊಂಕ್ಣಿ ಆವಯ್ ಕೊಣಾಗೆರ್ ಆಸಾ? ಕೊಣ್ ತಿಕಾ ಪೊಸ್ತಾ? ಕೊಣ್ ತಿಚೆ ಸ್ವತಾಚೆ/ ಪೊಸ್ಕೆ ಪೂತ್? ಖಂಚ್ಯಾ ಗಾಂವಾಂತ್ ತಿ ವಸ್ತಿ ಕರ್ನ್ ಆಸಾ?’
ಆಮ್ಚಿ ಭಾಗೆವಂತ್ ಜಿಣಿ ಆನಿ ಪೊಜ್ಡೆಂಪಣ್
ವರಸ್ : 2007
ಅಂಕೊ : 38
ಮಯ್ನೊ : ಅಗೋಸ್ತ್
ಸಂಪಾದಕೀಯ್ - 38.
ವಲ್ಲಿ ಕ್ವಾಡ್ರಸ್
ಎದೊಳ್ ಮ್ಹಣಾಸರ್ ಜೆಮೆವ್ನ್, ಘೊರೆವ್ನ್ ಆಸ್ಲ್ಲ್ಯಾ ಥೊಡ್ಯಾಂಕ್ ವಿಲ್ಸನ್ ಕಟೀಲಾನ್ ಆಯ್ಲೆವಾರ್ ಆಪ್ಲ್ಯಾ ’ಕವಿಕ್ ಖಂಯ್ ಪುರ್ಲಾ’ ಮ್ಹಳ್ಳ್ಯಾ ಲೇಖನಾಂತ್ ಉಟಯಿಲ್ಲೆಂಚ್ ಥೊಡಿಂ ನಿದೆಂತ್ಚ್ಚ್ ಉಲಯ್ಲಿಂ, ಬೊಬಾಟ್ಲಿಂ ಆನಿ ಕೆದಾಂತ್ ದೆಂಕ್ಳೆ ಉಡಿ ಮಾರ್ಚೆಪರಿಂ ಉಡಿ ಮಾರಿಲಾಗ್ಲಿಂ ತರ್ಯೀ ಹರ್ಶೆಂಚೆಪರಿಂ ಆಮಿಂ ಪಳೆಂವ್ಕ್ ಮಾತ್ರ್ ಸಕ್ತಾಂವ್ ಶಿವಾಯ್ ವೊರಾಂವ್ಕ್, ಪಾರ್ಕುಂಕ್ ವಾ ತಜ್ವೀಜ್ ಕರುಂಕ್ ಸಕಾನಾಂವ್ ಮ್ಹಣ್ ಪರತ್ ರುಜು ಕೆಲೆಂ.
ಭೋವ್ ಬರೆಂ ಲೇಖನ್ ತೆಂ ಜಾವ್ನಾಸ್ಲೆಂ ತರ್ಯೀ ಕೊಣೆಂ ಮ್ಹಳೆಂ ತೆಂ ಲೇಖನ್ ಬರಯಿಲ್ಲ್ಯಾ ಕವಿನ್ ಥೊಡ್ಯಾ ತೆಂಪಾದಿಂ ವಾಚ್ಲೆಲೆಂ ಕವಿತಾ ’ಪೊಜ್ಡೆಂ’ ಮ್ಹಣ್. ಹಾಂಗಾಸರ್ ಸವಾಲ್ ಕೊಣ್ ವಯ್ರ್ ಆನಿ ಕೊಣ್ ಕೊಯ್ರ್ ಮ್ಹಣ್ ನ್ಹಂಯ್. ಕೊಣ್ ಅಪ್ವಂತ್ ಆನಿ ಕೊಣ್ ಫಟ್ಟಿಂಗ್ ಮ್ಹಣ್ ನ್ಹಂಯ್. ಸವಾಲ್ ಇತ್ಲೆಂಚ್;
ಪೊಜ್ಡೆಂಪಣ್ ಮ್ಹಳ್ಯಾರ್ ಕಿತೆಂ? ಆನಿ ಖಂಚ್ಯಾಕ್ ಪೊಜ್ಡೆಂ ಮ್ಹಣ್ಚೆಂ?
ಥೊಡ್ಯಾಚ್ಚ್ ತೆಂಪಾದಿಂ ಆಯ್ಚಾ ಕಾಳಾರ್ ಫಿಲ್ಮಾಂನಿ ದಿಸೊನ್ ಯೆಂವ್ಚಾ ಕ್ರೂರ್ ದೃಶ್ಯಾಂಚೆರ್ ಭಾಸಾಭಾಸ್ ಚಲ್ಲಿ. ತಾಂತುಂ ಕೊಣೆಂ ಮ್ಹಳೆಂ ಮೆಲ್ ಗಿಬ್ಸನಾಚೆಂ ’ದ ಪ್ಯಾಶನ್ ಆಫ್ ಕ್ರೈಸ್ಟ್’ ಖರೆಂಚ್ ಏಕ್ ಕ್ರೂರ್ ಹಿಂಸೆಕ್ ಪಿಂತ್ರಾಂವ್ಚೆಂ ಮ್ಹಣ್. ಪುಣ್ ತೆಂ ಪಿಂತುರ್ ಭಾಗೆವಂತ್ ಮ್ಹಣ್ಚೆಯ್ ತಿತ್ಲ್ಯಾಚ್ ಮಾಪಾನ್ ಆಸ್ಲೆ. ಅಶೆಂ ಭಾಸಾಭಾಸ್ ಜಾತಾಸ್ತಾಂ ಮಧೆಂಚ್ ಏಕ್ ಸವಾಲ್ ಉದೆಲೆಂ; ಖಂಚ್ಯಾಕ್ ಹಿಂಸಾ ಮ್ಹಣ್ಚಿ? ಕ್ರೂರತಾ ಮ್ಹಣ್ಚಿ? ಹಾತ್ ಖಾತರ್ಚ್ಯಾಕ್? ಪಾಂಯ್ ಮೊಡ್ಚ್ಯಾಕ್? ಗೊಮ್ಟಿ ಖಾತರ್ಚ್ಯಾಕ್? ವಾ ಚುರಿ ಘಾಲ್ಚ್ಯಾಕ್?
ಹೆಚ್ಚ್ಪರಿಂ ಮಿಕ್ಮ್ಯಾಕ್ಸ್ ಜಿವಂತ್ ಆಸ್ತಾನಾ ಎಕಾ ಕೊಂಕ್ಣಿ ಕಾರ್ಯಾವಿಶಿಂ ಮ್ಹಾಕಾ ಸಾಂಗೊನ್ ಅಶೆಂ ಮ್ಹಣಾಲೊ, ಸಂಗೀತ್ ಸಾಮ್ರಾಟ್ ಹೆನ್ರಿಚಿಂ ಥೊಡಿಂ ಪದಾಂ; ’ಯೇ ಯೇ ಕಾತ್ರಿನಾ’, ’ಆಮಿ ದೊಗಿ ಸೆಜಾರಿ’, ’ಚಂದ್ರೆಮ್ ಉದೆವ್ನ್ ಆಯ್ಲೊ’..... ಪುಣ್ ಹ್ಯಾ ಕಾರ್ಯಾಂತ್ ಲೊಕಾನ್ ಪರತ್ ಪರತ್ ’ವನ್ಸ್ ಮೋರ್’ ಮ್ಹಳ್ಳೆಂ ಪದ್ ’ಆಮ್ಶೆಂ ಆನಿ ತಿಕ್ಶೆಂ.. ಲೊಣ್ಚೆಂ...’ ಪದಾಕ್. ಕಿತ್ಯಾಕ್ ಮ್ಹಳ್ಯಾರ್ ತಾಂಕಾಂ ಅಖ್ರೇಚೊ ಸಬ್ಧ್ ಪೊಜ್ಡ್ಯಾ ಸಭ್ದಾಪರಿಂ ಆಯ್ಕಾಲೊ ಕಂಯ್. ದೆಕುನ್ ಲೊಕಾಂಚೊ ಬೊಬೊಚ್ಚ್ ಬೊಬೊ ಕಂಯ್. ಹಾಂಗಾಸರ್ ಸವಾಲ್ ತೊ ಸಬ್ಧ್ ಪೊಜ್ಡೊ ವ್ಹಯ್ ವಾ ನ್ಹಂಯ್ ಮ್ಹಳ್ಳೊ ನ್ಹಂಯ್.
ತೆಚ್ಚ್ಪರಿಂ ಆಮ್ಚೊ ಕೊಂಕ್ಣಿ ಲೋಕ್ ಕವಿತಾಂಕ್ ಕಿತ್ಲೊ ಸಮ್ಜತಾ ವ ಅರ್ಥ್ ಕರ್ತಾ ಮ್ಹಳ್ಳೆಂ ಸರ್ವಾಂಕ್ ಕಳಿತ್ ಆಸಾ. ಆಮ್ಚೊ ಲೋಕ್ ಪೃಥ್ವೆ ಥಾವ್ನ್ ಚಂದ್ರೆಮಾಕ್ ಉಡ್ಚಿ ವಾಟ್ ಕಿತ್ಲಿ ಲಾಂಬ್ ಆಸಾ ಮ್ಹಳ್ಳಿ ಮೆಜುಂಕ್ ಸಕ್ತಾ ಪುಣ್ ಆದಾಂವ್ ಖೆಲ್ಲೆಂ ಫಳ್ ಖಂಚ್ಯಾ ರುಕಾಚೆಂ ಮ್ಹಣ್ ಸಮ್ಜೊಂಕ್ ಸಕಾನಾ. ಸುರ್ಯಾಚಾ ವೊತಾಚಿ ಸಕತ್ ಮಾಪುಂಕ್ ಸಕ್ತಾ ಪುಣ್ ಯೆವೆಕ್ ನಾಡ್ಲ್ಲೊ ತೊ ಸೊರೊಪ್ ಖಂಚೊ ಮ್ಹಣ್ ಸಮ್ಜೊಂಕ್ ಸಕಾನಾ. ಬಿಬಿಸಿ ಂತ್ಲ್ಯಾ ಹಾರ್ಡ್ ಟೊಕಾಚೆಂ ವಾರ್ಜಿಕ್ ಸಮ್ಜೊಂಕ್ ಸಕ್ತಾ ಪುಣ್ ಕವಿತಾ ಸಮ್ಜೊಂಕ್ ಸಕಾನಾ. ತೆಂ ಪ್ರೇತನ್ ಕರುಂಕ್ಯೀ ವಚಾನಾ - ಆಸೊಂ.
ಅಸಲ್ಯಾ ಪರಿಗತೆಂತ್ ಎಕಾ ಕವಿನ್ ಅಪ್ಲೆಂ ಕವಿತಾ ವಾಚ್ತಾನಾ ಥೊಡಿ ಜವಾಭ್ದಾರಿ ಘೆಂವ್ಚಿ ಅವಶ್ಯ್. ಕಿತ್ಯಾಕ್ ಮ್ಹಳ್ಯಾರ್ ತಾಚಿ ಕವಿತಾ ಆಯ್ಕತಲೊ ಲೋಕ್ ಪಂಡಿತ್ ವಾ ವೇದಾಂತ್ ಜಾಣಾರಿ ನ್ಹಂಯ್. ಬಗಾರ್ ಸಾದೊ ಲೋಕ್. ತಾಂಕಾಂ ತುಜ್ಯೊ ಇಮಾಜ್ಯೊ ಸಮ್ಜೊಂಚ್ಯಾಕೀ, ತಾಂತ್ಲ್ಯಾ ಉತ್ರಾಂಚೊ ದೊಡೊ ಅರ್ಥ್ ಜಿಕುನ್ ಧರ್ತಾ. ಹೆಂ ಬರೆಂಗೀ ವಾ ವಾಯ್ಟ್ಗೀ ಮ್ಹಣ್ ಹಾಂವ್ ಸಾಂಗಾನಾ - ಪುಣ್ ಹಿ ಹಕೀಗತ್. ಆತಾಂ ತುಮಿಂಚ್ ಸಾಂಗಾ, ಕವಿತಾಗೋಶ್ಟಿಂತ್ ಎಚ್ಚೆಮಾಚಿಂ ಕವಿತಾ ಕಿತ್ಲ್ಯಾಂಕ್ ಸಮ್ಜತಾತ್? ತಾಚ್ಯೆ ಬದ್ಲಾಕ್ ಸಿಜ್ಯೆಸ್ ತಾಕೊಡೆಚಿಂ ಕವಿತಾ ಆಯ್ಕೊಂಕ್ ಲೋಕ್ ಅಪ್ಲೊ ಜೀವ್ಚ್ ಕಾನ್ ಕರ್ನ್ ರಾವಾನಾಂಗಿ?. ಹಾಂತುಂ ಲೊಕಾಂಕ್ ದುರ್ಸೊನ್ ಫಾಯ್ದೊ ನಾ. ಪುಣ್ ಜರ್ ಅಸಲಿಂ ಕವಿತಾ ಜರ್ ಕವಿಂಚ್ಯಾ ಕಾಮಾಸಾಳಾಂನಿ ವಾಚುನ್ ಸಾಂಗ್ಲಿಂ ತರ್ ತಿ ಭೋವ್ ಸೊಭ್ತಾ.
ಏಕ್ ಪತಿ ಆನಿ ಪತಿಣ್ ಸಾಂಗಾತಾ ನಿದ್ಚೆಂ ಕಾಂಯ್ ಪೊಜ್ಡೆಂ ನ್ಹಂಯ್ - ಖರೆಂ. ಪುಣ್ ತಿಂ ಪತಿ ಪತಿಣ್ ಉಗ್ತ್ಯಾ ರಸ್ತ್ಯಾಚೆರ್ ನಿದ್ತಿತ್ ತರ್ ತಾಕಾ ಪಳೆಂವ್ಚಾ ಲೊಕಾಂನಿ ಸಮ್ಜಾಜಯ್ ಮ್ಹಣ್ಚೆಂ ಸಾರ್ಕೆಂ? ಹೆಂ ಚಿಂತಾಪ್ ಆಮ್ಚಾ ಕವಿಂಚಾ ತಕ್ಲೆಕ್ ರಿಗಾನಾ ತರ್ ಭೋವ್ ದುರ್ಭಾಗ್ಪಣ್ ಆಮ್ಚೆಂ. ಕಿತ್ಯಾಕ್ ಎ.ಟಿ ಲೊಬಾಚ್ಯಾ ಎಕಾ ಕವಿತೆಂತ್ ಸಾಂಗ್ಲ್ಲೆಪರಿಂ;
’ಜರ್ ರುಕಾಚಿಂ ಪಾನಾಂ ಸುಕ್ತಿತ್ - ತಾಂತುಂ ನಿರಾಸ್ ಕಾಂಯ್ ನಾ
ಪುಣ್ ಜರ್ ರುಕಾಚಿಂ ಪಾಳಾಂ ಸುಕ್ತಿತ್ - ತೊ ರೂಕ್ ವಾಂಚೊನ್ ಫಾಯ್ದೊ ನಾ’
ಹಾಂಗಾಸರ್ಯೀ ಹೆಂಚ್ ಚಿಂತಾಪ್ ಮತಿಕ್ ಯೆತಾ. ವಾಚ್ಪಿ/ಲೋಕ್ ಕವಿತಾಂಕ್ ಸಮ್ಜಾನಾಂ ತರ್ ರುಕಾಚಿಂ ಪಾನಾಂ ಸುಕ್ಲ್ಲೆಪರಿಂ. ಪುಣ್ ಕವಿಂಕ್ ಜರ್ ಸಮ್ಜಾನಾ ತರ್ ರುಕಾಚಿಂ ಪಾಳಾಂ ಸುಕ್ಲ್ಲೆಪರಿಂ. ಹಿ ಜವಾಭ್ದಾರಿ ಹರ್ಯೆಕಾ ಕವಿಚಿ ಜಾವ್ನಾಸಾ. ಅಪುಣ್ ಖಂಚ್ಯಾ ಸುವಾತೆರ್, ಕಸಲೆಂ ಕವಿತಾ ವಾಚ್ತಾಂ ಮ್ಹಳ್ಳೆಂ ಕವಿನ್ ಸಮ್ಜೊನ್ ಘೆಂವ್ಚಿ ಗರ್ಜ್. ಕಿತ್ಯಾಕ್ ಮ್ಹಳ್ಯಾರ್ ಆಮ್ಚೊ ಲೋಕ್ ಭಾಗೆವಂತ್. ಆಮಿ ಜಿಯೆಂವ್ಚಿ ಸಮಾಜ್ ಹಿಪೋಕ್ರೆತ್ ಸಮಾಜ್, ಸಾಂಗೊಂಕ್ ಏಕ್ ಕರುಂಕ್ ಅನ್ಯೇಕ್. ಹಸ್ತಿಪರಿಂ; ಧಾಖಂವ್ಕ್ ಆಸ್ಚೆ ದಾಂತ್ ವೆಗ್ಳೆ, ಚಾಬೊಂಕ್ ಆಸ್ಚೆ ದಾಂತ್ ವೆಗ್ಳೆ. ಆಮ್ಚಾ ಜಿಣ್ಯೆಂತ್ ಆಮಿ ಕಿತ್ಲೇಂಯ್ ಪೊಜ್ಡೆಂ ಉಲಂವ್ಕ್, ಪೊಜ್ಡಿ ಜಿಣಿ ಜಿಯೆಂವ್ಕ್ ಆಮಿ ಪಾಟಿಂ ಸರಾನಾಂವ್ ತರ್ಯೀ ಆಮ್ಕಾಂ ಆಮ್ಚೆಂ ಸಾಹಿತ್ಯ್ ಭಾಗೆವಂತ್ಚ್ ಜಾಯ್.
ಹೆಂ ಸಾಂಗ್ತಾಸ್ತಾಂ ಮ್ಹಾಕಾ ಅಜೀಕ್ ವೀಸ್-ಭಾವಿಸ್ ವರ್ಸಾಧಿಂ ’ಉಬ್ಬ ಮೂಡ್ಬಿದ್ರಿ’ನ್ ’ಝೆಲೊ’ ಪತ್ರಾಚೆರ್ ಬರಯಿಲ್ಲ್ಯಾ ಎಕಾ ಮಟ್ವ್ಯಾ ಕಾಣ್ಯೆಚೊ ಉಡಾಸ್ ಯೆತಾ. ತ್ಯಾ ಕಾಣ್ಯೆಂತ್ ಪಾಶ್ಚಾತ್ಯ್ ಸಂಸ್ಕೃತಿಚೆರ್ ಆರ್ಸೊ ಧರ್ಚೆಂ ಸೊಭಿತ್ ಚಿಂತಾಪ್ ಆಸ್ಲೆಂ. ಸದಾಂನೀತ್ ಎಕಾ ಕುಟ್ಮಾಚಿಂ ಎಕೆಕ್ಲಿಂಚ್ ಜಾವ್ನ್ ಘರಾ ಭಾಯ್ರ್ ವೆತಾತ್, ಪಾರ್ಟಿ, ಕ್ಲಬ್ ಮ್ಹಣೊನ್ ಪಿಯೊವ್ಣ್ಯಾಂತ್, ಆಮಾಲಾಂತ್ ತಾಂಚೆಂ ತಾಂಚೆಂ ಸುಖ್ ಭಗುನ್ ರಾತಿಂ ಪಾಟಿಂ ಯೆತಾತ್. ಹ್ಯಾ ಮಧೆಂ ಎಕಾ ದಿಸಾ ಫಾಂತ್ಯಾರ್ ಎಕಾ ಆವಯ್ಕ್, ಆಧ್ಲ್ಯಾ ಪಾಟಿ ಘರಾ ಯೆತಾನಾ ತಿಕಾ ಕ್ಲಬ್ಬಾಂತ್ ತಿಚೆಸವೆಂ ಲೈಂಗಿಕ್ ಸುಖ್ ಭಗ್ಲ್ಲ್ಯಾ ದಾದ್ಲ್ಯಾಚಿ ಪರ್ಸ್ ಅಪ್ಲ್ಯಾ ಬೆಗಾಂತ್ ಆಸ್ಚಿ ದಿಸ್ತಾ. ತಿ ಸುಟವ್ನ್ ಪಳೆತಾನಾ ತಾಂತುಂ ತಿಚ್ಯಾಚ್ ಪುತಾಚಿ ತಸ್ವೀರ್ ದಿಸೊನ್ ಯೆತಾ.
ಹಿ ಕಾಣಿ ಪೊಜ್ಡಿ ವಾ ನ್ಹಂಯ್ ಮ್ಹಳ್ಳೆಂ ಸವಾಲ್ ಹಾಂವ್ ಹಾಂಗಾಸರ್ ಕರಿನಾ - ತೆಂ ಗರ್ಜೆಭಾಯ್ಲೆಂ. ಪುಣ್ ಹ್ಯಾ ಕಾಣ್ಯೆನ್ ಭೋವ್ ವ್ಹಡ್ ವಿವಾದ್ ಉಭ್ಜಾಯ್ಲೊ. ಭೋವ್ಶಾ ಪತ್ರಾಕ್ ತೊಚ್ಚ್ ವಿವಾದ್ ಜಾಯ್ ಆಸ್ಲೊ ಜಾಯ್ಜಯ್. ಕೊಣೆಂ ಮ್ಹಳೆಂ ಬರವ್ಪ್ಯಾಚೆಂ ಮುಳಾವೆಂ ಚಿಂತಾಪ್ ಪೊಜ್ಡೆಂ ಮ್ಹಣ್, ಆನಿ ಕೊಣೆಂ ಮ್ಹಳೆಂ ಕಾಣಿ ಪೊಜ್ಡಿ ಮ್ಹಣ್.
ಅಶೆಂ ಪಳೆಂವ್ಕ್ ಗೆಲ್ಯಾರ್ ಹ್ಯಾ ಸಂಸಾರಾಂತ್ ಬರೆಂ ಆನಿ ವಾಯ್ಟ್ ಮ್ಹಣ್ ದೆವಾನ್ ಖಂಚೆಂಚ್ ರಚುಂಕ್ ನಾ. ತೆಂ ಮನ್ಶ್ಯಾನ್ ಅಪ್ಲ್ಯಾ ಸ್ವಾರ್ಥಾ ಖಾತಿರ್, ಸಮಾಜಿಕ್ ಕಾಯ್ದೆ ಕಾನುನಾಂ ರಚ್ಲ್ಯಾಂತ್. ಆನಿ ತ್ಯಾ ತ್ಯಾ ಮನ್ಶ್ಯಾಕ್ ಅಪ್ಲ್ಯಾ ಮತಿಂತ್ ಆಸ್ಚೆಪರಿಂ ಖಂಚೆಂ ಪೊಜ್ಡೆಂ, ಕಿತ್ಲೆಂ ಪೊಜ್ಡೆಂ ಮ್ಹಣ್ ದಿಸ್ತಾ. ಜಾಂವ್ಕ್ ಪುರೊ ಹೆಂ ಹೆರಾಂಚಿ ಅಸ್ಕತ್ಕಾಯ್. ಪುಣ್ ಪ್ರಜಾಪ್ರಭುತ್ವಾಂತ್ ಜಿಯೆಂವ್ಚಾ ಆಮ್ಕಾಂ ಹರ್ಯೆಕಾ ಸ್ವಾತಂತ್ರ್ ಜರೂರ್ ಆಸಾ. ಪುಣ್ ತಾಚೊ ಮತ್ಲಬ್ ಹೊ ನ್ಹಂಯ್ಕೀ, ಕಿತೇಂಯ್ ಉಲವ್ಯತ್ ವಾ ಕಶೇಂಯ್ ಉಲವ್ಯೆತ್ ಮ್ಹಳ್ಳೊ.
ಮ್ಹಜ್ಯಾ ಜಿಣ್ಯೆಂತ್ ಪಳೆಯಿಲ್ಲೆಂ ಮ್ಹಜ್ಯಾಚ್ಚ್ ಎಕಾ ವಳ್ಕಿಚ್ಯಾ ವೆಕ್ತಿಚೆಂ ಜಿವಿತ್ ಪಿಂತ್ರಾಂವ್ಕ್ ಹಾವೆಂ ’ಪಾಟಿಂ ಗಾಂವಾಕ್’ ಕಾದಂಬರಿ ಬರಯಿಲ್ಲಿ. ಹಿ ಎಕ್ಲ್ಯಾಚಿ ಮಾತ್ರ್ ನ್ಹಂಯ್, ಸಭಾರಾಂಚಿ ಜಿಣಿ ಜಾಲ್ಲಿ ಕಾಣಿ ತರ್ಯೀ, ಆಮ್ಚೆ ಥೊಡೆ ಹಿಪೊಕ್ರೆತ್ ಭಾಗೆವಂತ್ ಥೊಡೆ ಮ್ಹಣಾಲೆ ’ಚರ್ಬೆಲ್ಲಿ ಬಾಯ್ಲ್’, ಆನಿ ಕಿತೆಂ ಅನಿ ಕಿತೆಂ. ಹೆಂ ಹಿಪೊಕ್ರೆತ್ಪಣ್ ನಾಸ್ತಾಂ ಆನಿ ಕಿತೆಂ? ಕಿತ್ಯಾಕ್ ಮ್ಹಳ್ಯಾರ್ ಹಿ ಜಾವ್ನಾಸ್ಲಿ ಏಕ್ ಕಾಣಿ ಮಾತ್ರ್. ಪುಣ್ ಸತ್ ಸಾಂಗ್ಚೆಂ ತರ್ ಹಾಂತುಂ ಹಾಂವ್ ಶಿಕ್ಲ್ಲೆಂ ಲಿಸಾಂವ್ ಇತ್ಲೆಂಚ್; ಜೆದ್ನಾಂ ಏಕ್ ’ಬೆಕೂಫ್’ ಪಂಡಿತಾಂಚೆ ಸಮೊರ್ ವಾದ್ ಮಾಂಡುನ್ ವಾ ಏಕ್ ’ವಿಧ್ವಾನ್’ ಬೆಕುಫಾಂ ಸಮೊರ್ ವಾದಾಕ್ ದೆಂವ್ಲ್ಯಾರ್ ದೊನಾಂಯ್ಚೊಯ್ ಪರಿಣಾಮ್ ಏಕ್ಚ್ಚ್.
ಅಸಲ್ಯಾ ಪರಿಗತೆಂತ್ ಉಡಿ ಮಾರ್ನ್ ಆಮ್ಚಾಚ್ ಪೆಂಕ್ಡಾಚಿ ಖಿಳ್ ಮೊಡ್ನ್ ಘೆಂವ್ಕ್ ಪಡ್ತೆಲೆಂ ಶಿವಾಯ್ ಸಮಾಜ್ ಸೊಧ್ರೊಂಚಿನಾ. ಹಾಂ! ಫುಡೆಂ ಕವಿತೆವಿಶಿಂ ಉಲಂವ್ಕ್ ಲೋಕ್ ಅನಿಕ್ಯೀ ಭೆಂಯೆಂವ್ಕ್ ಆಸಾ. ಆನಿ ಅಸಲ್ಯಾ ಪರಿಗತೆಂತ್ ಅಸಲ್ಯಾ ಉಣ್ಯಾ ಭಾವಾಡ್ತಾಚ್ಯಾ ಲೊಕಾಂಕ್ ಸಮ್ಜಾಂವ್ಕ್ ವೆಚೆಂ ನಿಜಾಯ್ಕೀ ಬೇಕೂಫ್ಪಣ್ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್. ಆನಿ ಹ್ಯಾ ಬೇಕೂಫ್ಪಣಾಕ್ ದೆಂವ್ಲ್ಯಾಂವ್ ತರ್ ಕಿತೆಂ ಜಾತಾ ಮ್ಹಳ್ಳೆಂ, ಮಿರ್ಜಾ ಘಾಲಿಬಾಚ್ಯಾ ಉತ್ರಾಂನಿ ಸಾಂಗ್ತಾಂ;
’ಸಂಸಾರಾಂತ್ ಬೇಕೂಫಾಂಚಿ ಕಾಂಯ್ ಉಣೆಂಪಣ್ ನಾಂ
ಎಕ್ಲ್ಯಾಕ್ ಸೊಧುನ್ ಗೆಲ್ಯಾರ್ ಹಜಾರ್ ಮೆಳ್ತಾತ್’
ಹಾಂಗಾಸರ್ ಆಮಿಂ ಖಂಚೆಂ ಪೊಜ್ಡೆಂ ಖಂಚೆಂ ನ್ಹಂಯ್ ಮ್ಹಣ್ ಉಡಿ ಮಾರ್ಚಾಂಕ್ ಏಕ್ ಸವಾಲ್ ಕರ್ತಾಂ; ಆಮ್ಚಾ ಸಮಾಜೆಂತ್ ವೆವೆಗ್ಳ್ಯಾ ರಿತಿರ್ ವಾಯ್ಟ್, ಅನೀತ್ ಜಾತಾನಾ ಆಮಿ ಕಿತ್ಯಾಕ್ ಘೊರೆವ್ನ್ ಜಿಯೆತಾಂವ್? ತೆದ್ನಾಂ ಆಮ್ಚಿ ಲಿಖ್ಣಿ ಕಿತ್ಯಾಕ್ ಝರಾನಾ? ತಿ ಆಮ್ಚಿ ನೀದ್ ಕಿತ್ಯಾಕ್ ಸುಟಾನಾ?
ತ್ಯಾ ನಿದೆಂತ್ ಖೊಟ್ ಮಾರ್ಚಿಂ ಕೊಣೀಂ ನಾಸ್ತಾಂನಾ?
- ವಲ್ಲಿ ಕ್ವಾಡ್ರಸ್, ಅಜೆಕಾರ್
About us | Feedback | Contact us
Copyright ©
2004 DAAIZ.COM All rights reserved.
Page concept, designed and maintained by Ashawadi Publications
