ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಭೊಗ್ಸಾಣೆ
ಹೆಂ ವಾರ್ಜಿಕ್ ಹರ್ಶೆಂಚೆಂ, ಕಾಲ್ಚೆಂ, ಆಯ್ಚೆಂ, ಫಾಲ್ಯಾಂಚೆಂ, ತವಳ್ತವಳ್ ಮತಿಚಾ ಪಡ್ದ್ಯಾಚೆರ್
ಖಂಚೊನ್ ಯೆಂವ್ಚೆಂ ಲಿಸಾಂವ್, ಬೆಸಾಂವ್ ಯಾ ತೆಸಾಂವ್...
ತವಳ್ತವಳ್ - 3 . ಭೊಗ್ಸಾಣೆ
ಕ್ಲಾರಾ ಫೆರ್ನಾಂಡಿಸ್
ಅಮ್ಚ್ಯಾ ಜಿವಿತಾಂತ್ ಕಸಲೆಂಯ್ ಆನ್ವಾರ್ ಯೆತಾನಾ ಪಯ್ಲೆಂ ದೆವಾಚೊ ಉಗ್ಡಾಸ್ ಕಾಡ್ತಾಂವ್ ಅನಿಂ ದೆವಾಲಾಗಿಂ ಬೊಗ್ಸಾಣೆಂ ಮಾಗ್ತಾಂವ್. ಆಮಿಂ ತಾಕಾ ಪಳೆಂವ್ಕ್ ನಾಂ ತರ್ಯೀ ’ದೆವಾ ಮ್ಹಾಕಾ ಬೊಗ್ಸಿ’ ಮ್ಹಣ್ತಾಂವ್. ಆಮಿಂ ನೆಣಾಂವ್ ದೆವಾನ್ ಆಮ್ಕಾಂ ಬೊಗ್ಸಿಲಾಂ ಯಾ, ನಾಂ. ಪುಣ್ ಆಮ್ಚೆ ಪಾತ್ಯೆಣೆ ವರ್ವಿಂ ಆಮಿಂ ಆಮ್ಕಾಂಚ್ ’ದೆವಾನ್ ಮ್ಹಕಾ ಬೊಗ್ಸಿಲಾಂ’ ಮ್ಹಣ್ ಸಮಧಾನ್ ಕರ್ತಾಂವ್. ಆಮಿಂ ದೆಖಾನಾತ್ಲ್ಲ್ಯಾ ರಚ್ನಾರಕಡೆನ್ ಬೊಗ್ಸಾಣೆ ಮಾಗೊಂಕ್ ಕಿತ್ಲೆಂ ಸುಲಭ್ ನೈಂ?
ಹೆಂಚ್ ಬೊಗ್ಸಾಣೆ ಆಮಿಂ, ಆಮ್ಚ್ಯಾ ದೊಳ್ಯಾಂ ಮುಖಾರ್ ಆಸ್ಚ್ಯಾ ಇಷ್ಟಾ-ಇಷ್ಟಿನಿಂ, ರಗ್ತಾ ಸಂಬಂದಾಚ್ಯಾ ಬಾವ್-ಭಯ್ಣಿಂಕ್, ಜಲ್ಮ್ ದಿಲ್ಲ್ಯಾ ಮಾಂಯ್-ಬಾಬಾಕ್, ಅಮಿಂ ಜಲ್ಮ್ ದಿವ್ನ್ ಲ್ಹಾನ್-ವ್ಹಡ್ ಕೆಲ್ಲ್ಯಾ ಬುರ್ಗ್ಯಾಂ ಕಡೆನ್ ಮುಖಾ-ಮುಖ್ ಕಿತ್ಲೆ ಪಾವ್ಟಿಂ ಮಾಗ್ಲಾಂ ಯಾ ಮಾಗ್ಚೆಂ ಪ್ರಯತನ್ ಕರ್ತಾಂವ್. ವ್ಹಯ್, ಹ್ಯಾ ’ಬೊಗ್ಸಾಣೆ’ ಉತ್ರಾಂತ್ ಜಾಯ್ತೊ ಆರ್ಥ್ ಆನಿಂ ಜಡಾಯ್ ಆಸಾ. ಏಕಾ ಫಾತ್ರಾಚಿ ತರ್ಯೀ ಜಡಾಯ್ ತುಕ್ಯೆತ್ ಪುಣ್ ಬೊಗ್ಸಾಣೆಚಿ ನೈಂ. ಜಾಯ್ತೆ ಪಾವ್ಟಿಂ ಹಾಂವೆಂ ಚಿಂತ್ಲ್ಲೆಂ ಆಸಾ ಆಮಿಂ ಏಕಾಮೆಕಾಕ್ ಬೊಗ್ಸುಂಕ್ ಕಿತ್ಯಾಕ್ ತಯಾರ್ ನಾಂವ್?
ಆಮ್ಚೊ ರಚ್ನಾರ್ ಇತ್ಲೊ ದಯಾಳ್ ಅನಿಂ ಬೊಗ್ಸಾಣೆಚೊ ದರ್ಯೊ ತರ್, ಆಮಿಂ ತಾಚಿ ರಚ್ನಾಂ, ದುಳಿ ಥಾವ್ನ್ ಜಲ್ಮ್ ಘೆತ್ಲ್ಲಿಂ ಅನಿಂ ಧುಳಿಕ್ ಪಾಟಿಂ ವೆಚಿ ಆಮ್ಚಿ ಕೂಡ್, ಜಿವಾಂತ್ ಆಸ್ಚೆ ದುಸ್ರೆ ವ್ಯಕ್ತಿ ಲಾಗಿಂ ಬೊಗ್ಸಾಣೆಂ ಮಾಗೊಂಕ್ ಯಾ ಬೊಗ್ಸುಂಕ್ ಕಿತ್ಯಾಕ್ ಘಳಾಯ್ ಯಾ ಇನ್ಕಾರ್ ಕರ್ತಾ!!
ವ್ಹಯ್, ಜಾಯ್ತೆ ಪಾವ್ಟಿಂ ಆಮಿಂ ಸಾಂಗ್ತಾಂವ್ ’ಹಾಂವ್ ಮೆಲ್ಯಾರ್ಯೀ ತಾಕಾ ಭಿಲ್ಕುಲ್ ಬೊಗ್ಸುಂಚಿ ನಾಂ, ತಾಣೆಂ ಕೆಲ್ಲೆಂ ಕೆದ್ನಾಂಚ್ ವಿಸ್ರೂಂಚಿ ನಾಂ’. ತರ್ ಬೊಗ್ಸಾಣೆ ಮ್ಹಳ್ಯಾರ್ ಕಿತೆಂ? ಆಮಿಂ ದೆವಾಲಾಗಿಂ ಅಮ್ಚಿ ಪಾತ್ಕಾಂ ಬೊಗ್ಸಿ ಮ್ಹಣ್ತಾನಾ ಆಮ್ಕಾಂ ಉಣೆಂಪಣ್ ಬೊಗಾನಾ. ಕಿತ್ಯಾಕ್ ಅಮ್ಕಾಂ ಭರ್ವಸೊ ಆಸಾ ಆಮ್ಚೊ ರಚ್ನಾರ್ ಭೋವ್ ಕಾಕುಳ್ತ್ದಾರ್ ಅನಿಂ ಬೊಗ್ಸಾಣೆಚೊ ಶಿಂವೊರ್ ತೊ.
ಹೆಂಚ್ ಚಿಂತಾಪ್ ಆಮ್ಕಾಂ ಕಿತ್ಯಾಕ್ ಯೇನಾ ಆಮಿಂ ಜಿವಿತ್ ಆಸ್ಲ್ಲ್ಯಾ ಮನ್ಶ್ಯಾಂ ಲಾಗಿಂ ಬೊಗ್ಸಾಣೆ ಮಾಗ್ಲ್ಯಾರ್ಯಿ ಆಮ್ಕಾಂ ತಾಚೆ ಥಾವ್ನ್ ನ್ಹಯ್ ತರ್, ದೆವಾ ಥಾವ್ನ್ ತರ್ಯೀ ಬೊಗ್ಸಾಣೆ ಫಾವೊ ಜಾತೆಲೆಂ ಮ್ಹಣ್. ನಾಂ, ಅಮ್ಕಾಂ ಮುಖಾಮುಖಿ ಬೊಗ್ಸಾಣೆ ಮಾಗೊಂಕ್ ನಾಕಾ, ಕಿತ್ಯಾಕ್ ಅಮ್ಕಾಂ ದುಸ್ರ್ಯಾಂ ಮುಖಾರ್ ಲ್ಹಾನ್ ಜಾಂವ್ಚೆಂ ಕಿತ್ಯಾಕೀ ಪಸಂದ್ ನಾಂ.
ಅಲಿಸ್ಬಾಯ್ ಏಕ್ ದೆವೊತ್ ಮ್ಹನಿಸ್. ಸದಾಂ ಫಾಂತ್ಯಾರ್ ಉಟೊನ್ ತಿ ಮಿಸಾಕ್ ವೆತಾಲಿ. ಸೆಜಾರ್ಚ್ಯಾಂಕ್ ಬಾರಿ ಮೊಗಾಚಿ. ಸೆಜಾರಾ ಕಿತೆಂಯ್ ಘಡತ್ ತರ್ ಪಯ್ಲೆಂ ಅಲಿಸ್ಬಾಯೆಕ್ ಖಬಾರ್ ಯೆತಾಲಿ. ಕಿತ್ಯಾಕ್ ಮ್ಹಳ್ಯಾರ್ ತಿ ಸರ್ವಾಂಕ್ ಏಕ್ ’ಕುಮ್ಕೆಚೊ ಸಾಗೊರ್’ ಜಾವ್ನ್ ಆಸ್ಲ್ಲಿ. ಪೂಣ್ ಕಿತೆಂ ಫಾಯ್ದೊ. ತಿಣೆಂ ತಿಚ್ಯಾ ಮೊಗಾನ್ ಅನಿಂ ಕೊಂಡಾಟ್ಯಾನ್ ಪೊಸುಲ್ಲ್ಯಾ ಎಕಾಚ್ಚ್ ಚೆಡ್ವಾಕ್, ಹಿಂದ್ವಾಂಚಾ ಚೆಡ್ಯಾಲಾಗಿಂ ಕಾಜಾರ್ ಜಾಲ್ಲ್ಯಾಕ್, ತಾಕಾ ಕುಟ್ಮಾ ಥಾವ್ನ್ಂಚ್ ಬಾಯ್ರ್ ಘಾಲ್ಲೆಂ ನೈಂ ಬಗಾರ್ ತಾಕಾ ತಿಣೆಂ ಅಶೆಂ ಸಾಂಗ್ಲ್ಲೆಂ ’ಹಾಂವ್ ಮೆಲ್ಯಾರ್ಯೀ ಮ್ಹಜ್ಯಾ ಘರ್ಚೆಂ ಮೇಟ್ ಯಾ ಮ್ಹಜ್ಯಾ ಫೊಂಡಾಲಾಗಿಂ ತುಂವೆಂ ಯೆಂವ್ಚೆಂ ನಾಕಾ, ಕಿತ್ಯಾಕ್ ಹಾಂವ್ ತುಕಾ ಕೆದಿಂಚ್ ಬೊಗ್ಸುಂಚಿ ನಾಂ.’
ಹಾಂಗಾಸರ್ ಲೊಕಾಮೊಗಾಳ್ ಅಲಿಸ್ಬಾಯ್ ಸಂಸಾರಾಂತ್ ಸಗ್ಳಿಂ ಬರಿಂ ಕಾಮಾ ಕರುಂಕ್ ತಯಾರ್ ಅಸಾ ಪೂಣ್ ಅಪ್ಲ್ಯಾಚ್ಚ್ ಬುರ್ಗ್ಯಾಕ್ ಬೊಗ್ಸುಂಕ್ ತಯಾರ್ ನಾ. ಕಿತ್ಯಾಕ್ ತಿಚೊ ಸ್ವಾಭಿಮಾನ್ ತಿಕಾ ಜಾಗಯ್ತಾಲೊ ಅಸ್ತಲೊ. ಮನ್ಶ್ಯಾಚಿ ಕೂಡ್ ರಗ್ತಾ ಮಾಸಾಚಿ ಜಾಲ್ಲ್ಯಾನ್ ಅಮ್ಕಾಂ ರಚ್ನಾರಾ ಬರಿಂ ಜಿಯೆಂವ್ಕ್ ಕಸ್ಟ್ ಪುಣ್ ಶೆಂಬೊರ್ ಠಕ್ಕ್ಯಾಂತ್ ದೋನ್ ಠಕ್ಕೆ ತರಿ ತಾಚೆಬರಿಂ ಜಿಯೆಂವ್ಚೆಂ ಪ್ರಯತನ್ ಕರ್ಯೆತ್. ಅಮಿಂ ಏಕಾಮೆಕಾಕ್ ಬೊಗ್ಸುಂಕ್ ಕಿತ್ಯಾಕ್ ಪಾಟಿಂ ಸರ್ತಾಂವ್?
ಕಾರಣ್?
ದುಸ್ರೆಂ ಕಿತೆಂಚ್ ನೈಂ ಬಗಾರ್ ಆಮ್ಚೆಂ ಜಿವಿತ್ ಊಂಚ್ ಆನಿಂ ಚಿಂತಪ್ ಕೀಳ್ ಜಾಲಾಂ. ಜಾಯ್ತೆ ಪಾವ್ಟಿಂ ಆಮಿಂ ಮ್ಹಣ್ತಾಂವ್ ’ವ್ಹಯ್ ಹಾಂವೆ ತಾಕಾ ಬೊಗ್ಸಿಲಾಂ ಪೂಣ್ ತೊ ದೀಸ್ ಮಾತ್ರ್ ಹಾಂವ್ ಅಖೇರ್ ಪರ್ಯಾಂತ್ ವಿಸ್ರೊಂಚಿ ನಾಂ’. ತರ್ ಹಾಂಗಾಸರ್ ಹಾಂವೆಂ ’ತಾಕಾ’ ಬೊಗ್ಸಿಲಾಂ ಮ್ಹಣ್ ಕಶೆಂ ಸಾಂಗ್ಚೆಂ.
ಅಮಿಂ ಏಕಮೆಕಾಕ್ ಬೊಗ್ಸಿತಾನಾ ಸಾಂಗಾತಾ ತ್ಯಾ ಘಡಿತಾಕ್ ಲಾಗುಂ ಜಾಲ್ಲಿಂ ಉತ್ರಾಂ ವಿಸ್ರೊಂಚೆಂ ಚಡ್ ಘರ್ಜೆಚೆಂ. ಜಶೆಂ ಅಮ್ಕಾಂ ಅಮ್ಚ್ಯಾ ಜಿವಾಚೆರ್ ಜಾಲ್ಲೊ ಘಾಯ್ ಮಾಜ್ವೊಂಕ್ ಮುಲಾಮ್ ಗರ್ಜೆಚಿ, ತಶೆಂಚ್ ಜಿವಿತಾಂತ್ ಘಡ್ಲ್ಲಿಂ ಕೊಡು ಘಡಿತಾಂ ಮಾಜ್ವೊಂಕ್, ತೆಂ ಘಡಿತ್ ವಿಸ್ರೊಂಕ್ ಮಾಗ್ಣ್ಯಾಚಿ ಮುಲಾಮ್ ಗರ್ಜೆಚಿ. ಆಮಿಂ ಕೊಣಾಯ್ಕಿ ಬೊಗ್ಸಿತಾನಾ ಸಾಂಗಾತಾ ತ್ಯಾ ಮನ್ಶ್ಯಾ ಪಾಸತ್ ಮಾಗ್ಚೆಂಯ್ ಗರ್ಜೆಚೆಂ.
ಏಕಾ ಮನ್ಶ್ಯಾಕ್ ಬೊಗ್ಸುನ್, ತ್ಯಾಚ್ಚ್ ಮನ್ಶ್ಯಾಚೆಂ ವೀಸ್ ವರ್ಸಾಂ ಆದಿಂ ಕೆಲ್ಲಿಂ ಕರ್ತುಂವಾ ಉಸ್ತುನ್ ಕಾಂಯ್ ಫಾಯ್ದೊ ನಾ. ಹಾಂವ್ ಏಕ್ ಧಾರ್ಮಿಕ್ ಭಯ್ಣ್ ನೈಂ ಬಗಾರ್ ಜಿವಿತಾಚಿ ಕೊಡ್ಸಾಣ್ ಅನಿಂ ಆಮ್ಸಾಣ್ ಚಾಕೊನ್, ಬರ್ಯಾಪಣಾಚಾ ಗೊಡ್ಸಾಣೆಚೆಂ ಪೀವನ್ ಸೊಧ್ಚಿ ಸಾಮಾನ್ಯ್ ವ್ಯಕ್ತಿ. ಥೊಡೆ ಪಾವ್ಟಿಂ ಹಾಂವ್ ಚಿಂತ್ತಾ ’ಅಮಿಂ ಎಕಾಮೆಕಾಕ್ ಬೊಗ್ಸಿನಾಸ್ತಾಂ, ದೆವಾಲಾಗಿಂ ಕಶೆಂ ಬೊಗ್ಸಾಣೆ ಮಾಗ್ಚೆಂ. ದೇವ್ ಆಮ್ಕಾಂ ಬೊಗ್ಸಿತೊಲೊ? ಯಾ ಅಮಿಂ ದೆವಾಲಾಗಿಂ ಅಶೆಂ ಸಾಂಗೊಂಕ್ ಜಾತಾ? ’ದೆವಾ ಹಾಂವೆಂ ತಾಕಾ ಬೊಗ್ಸುಂಕ್ ನಾ, ಪೂಣ್ ತುಂ ಮ್ಹಕಾ ಬೊಗ್ಸಿ ಹಾಂವೆಂ ತಾಕಾ ಬೊಗ್ಸಿನಾತ್ಲ್ಲ್ಯಾಕ್’. ಆಮಿಂ ಎಕಾಮೆಕಾಕ್ ಬೊಗ್ಸಿತಾನಾ, ತೆಂ ಘಡಿತ್ ಆಮಿಂ ಕೆದಾಳಾಯ್ ವಿಸ್ರೊಂಸೊ ಆವ್ಕಾಸ್ ಸೊಧುನ್ ಕಾಡಿನಾಂವ್. ತೆಂ ಘಡಿತ್ ಆಮಿಂ ನಾಕಾ ಮ್ಹಳ್ಯಾರ್ಯೀ ಮತಿಂತ್ ಕಾಂತಯಿತ್ತ್ ಆಸ್ತಾ. ಕಿತ್ಯಾಕ್ ಆಮ್ಕಾಂ ಬೊಗ್ಸಾಣ್ಯಾಚಿ ಖರಿ ವಳಕ್ ನಾಂ.
ಬೊಗ್ಸಾಣೆ ಜಾವ್ನಾಸಾ ಆಮಿಂ ಖಾಲಿ ತೊಂಡಾಥಾವ್ನ್ ನೈಂ ಪೂಣ್ ಕಾಳ್ಜಾಚಾ ಗೂಂಡಾಯೆ ಥಾವ್ನ್ ಉಚಾರ್ಚೊ ಅರ್ಥಾಭರಿತ್ ಸಬ್ಧ್. ಆಮಿಂ ಎಕಾಮೆಕಾಕ್ ಬೊಗ್ಸಿಲಾಂ ತರ್, ಅಮ್ಚ್ಯಾ ರಾಗಾಕ್ ಲಘು ಜಾಲ್ಲೆಂ ಘಡಿತ್, ಉತ್ರಾಂ ಯಾ ದ್ವೇಶ್ ವಿಸ್ರೊಂಚೆಂ ಚಡ್ ಗರ್ಜೆಚೆಂ. ಹಾಂವ್ ಸಾಂಗಿನಾ ಅಮಿಂ ಎಕಾ ಮೆಕಾಚೆ ಪಾಂಯ್ ಧರ್ನ್ ಯಾ ನಾಕ್ ಗಸ್ಟುನ್ ಬೊಗ್ಸಾಣೆ ಮಾಗಾಜಾಯ್ ಮ್ಹಣ್.
ಥೊಡೆ ಪಾವ್ಟಿಂ ಆಮಿಂ ಬೊಗ್ಸಾಣೆ ಮಾಗ್ತಾಂವ್ ಪುಣ್ ವಿರುದ್ದ್ ಮ್ಹನಿಸ್ ತೋಂಡ್ ವಾಂಕ್ಡೆಂ ಕರುನ್, ತುಕಾ ಬೊಗ್ಸುಂಚಾಕ್ಯೀ ತುಜೆಂ ನಾಂವ್ ಬೆಷ್ಟೆಂಚ್ ಪಾಡ್ ಕರ್ತಾ. ಕಾಂಯ್ ವ್ಹಡ್ ನಾಂ. ಜಶೆಂ ಉದಾಕ್ ವೊಡ್ತಾನಾ ಆಮಿಂ ರಾಜು ಲಾಂಬ್ ಸೊಡ್ತಾಂವ್, ತಶೆಂ ತ್ಯಾ ಮನ್ಶ್ಯಾಂಕ್ ಆಮಿಂ ಸೊಡ್ನ್ ಸೊಡುಂಕ್ ಜಾಯ್ ಅನಿಂ ಹ್ಯಾ ಮನ್ಶ್ಯಾಂ ಖಾತಿರ್ ಆಮಿಂ ಪ್ರತ್ಯೇಕ್ ಥರಾನ್ ಮಾಗೊಂಕ್ ಜಾಯ್.
ಸತ್ ಕೆದ್ನಾಂಯ್ ಬುಡಾನಾ. ಹಾಂಗಾಸರ್ ತುಜೆ ಥೈಂ ಬರೆಂಪಣ್ ಜಾತೆಲೆಂ. ವಿರೋದ್ ಮನ್ಶ್ಯಾನ್ ತುಕಾ ಬೊಗ್ಸುಂಕ್ ನಾಂ ತರ್ಯೀ, ತುಕಾ ದೆವಾನ್ ಬೊಗ್ಸಿಲಾಂ. ಹೆಂ ಸತ್ ಆಮಿಂ ಸದಾಂಚ್ ಜಾಣಾ ಜಾಂವ್ಕ್ ಜಾಯ್.
ಸಾಂಗೊಂಕ್ ಬಾರಿ ಸುಲಭ್ ಪುಣ್ ಕರ್ನ್ಯಾಂನಿ ಕರುಂಕ್ ಭಾರಿ ಕಷ್ಟಾಂಚೆ ನೆಂ? ವ್ಹಯ್, ಪೂಣ್ ಆಮಿಂ ಪ್ರಯತನ್ ಕೆಲ್ಯಾರ್ ಸಗ್ಳೆಂ ಸುಲಭ್ ಜಾತಾ. ತರ್ ಅಮಿಂ ಏಕಾಮೆಕಾಕ್ ಬೊಗ್ಸುಂಕ್ ಶಿಕ್ಯಾಂ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
