ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ - ಕ್ರೀಮ್ ಬಿಸ್ಕಿಟ್
ಸ್ಟೇನ್ ಅಗೇರಾ: ಕೊಂಕ್ಣಿ ಸಾಹಿತ್ಯಾಂತ್ ಏಕ್ ಫಾಮಾದ್ ನಾಂವ್, ಏಕ್ ಭಳ್ವಂತ್ ಕಾಣ್ಯೆಗಾರ್, ಕಾದಂಬರಿಕಾರ್. ಥ್ರಿಲ್ಲರ್ ಕಾಣ್ಯೊ ಬರಂವ್ಚಾಂತ್ ನಾಮ್ಣೆಚೊ ಜಾಲ್ಲೊ ಸ್ಟೇನ್ ಅಗೇರಾನ್ ಅಡೇಯ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ತಾಚಾ ಕಾಣ್ಯಾಂಚೊ ಜಮೊ ’ತಾಂಬ್ಡಿ ಮಿರ್ಸಾಂಗ್’ ಆಯ್ಲೆವಾರ್ ಪರ್ಗಟ್ ಜಾಲಾ. ಹ್ಯಾ ಬುಕಾಕ್ 2006 ಇಸ್ವೆಚೊ ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ತಿ ಲಾಭ್ಲ್ಯಾ. ಹಾಣೆಂ ಆಪ್ಲ್ಯೊ ವಿಂಚ್ಣಾರ್ ಕಾಣ್ಯೊ ಇಂಗ್ಲಿಶಾಂತ್ ತರ್ಜಣ್ ಕೆಲ್ಯಾತ್ ತಶ್ಂಚ್ ’Womens Era’ ಪತ್ರಾಂತ್ ತ್ಯೊ ಪರ್ಗಟ್ಲ್ಯಾತ್.
ಹೆರ್ ಕಾಣ್ಯೊ: ಪ್ರೆಶರ್ ಕುಕ್ಕರ್, ಗುಣಾಕಾರ್, ಅಸ್ಥಿರ್ ಮೆಟಾಂ, ಹಿಭಿಸ್ಕಸ್, ನಿರಾಸ್, ಉಮೊ
ಸ್ಟೇನ್ ಅಗೇರಾ
ಘರ್ಚಾ ಅಂಗ್ಣಾಂತ್ ಉಬೆಂ ರಾವೊನ್ ಇಸ್ಕಾಲಾಕ್ ವೊಚೊಂಕ್ ಮೆಟಾಂ ಕಾಡ್ಚಾ ತೇಗಾಂ ಲಾನ್ ನೆಣ್ತ್ಯಾ ಭುರ್ಗ್ಯಾಂಕ್ ವೆರೊನಿಕಾ ಜಾಯ್ತೊ ವೇಳ್ ಪಳೆವ್ನ್ ರಾವ್ಲಿ. ದೋಗಾಂ ಚೆಡ್ವಾಂ ಮಾಲ್ಗಡೆಂ ಜೆಸ್ಸಿ, ನಿಮಾಣೆಂ ಟ್ರೆಸ್ಸಿ ಆನಿ ಮಧ್ಲೊ ಐವನ್. ಜೆಸ್ಸಿ ಪಾಂಚ್ವೆ ಕ್ಲಾಸಿಂತ್ ತರ್ ಐವನ್ ತಿಸ್ರೆಂತ್ ಆನಿ ಟ್ರೆಸ್ಸಿ ಪಯ್ಲೆಂ ಶಿಕ್ತಾಲೆಂ. ಹಳ್ಳೆ ಭಿತರ್ ಲಾಗ್ಶಿಲ್ಯಾ ಸರ್ಕಾರಿ ಇಸ್ಕಾಲಾಂತ್ ಸಾತ್ವೆ ಪರ್ಯಾಂತ್ ಶಿಕ್ಪಾಚಿ ವ್ಯವಸ್ಥಾ ಆಸ್ಲ್ಲಿ. ಉಪ್ರಾಂತ್ ಹೈಸ್ಕೂಲಾಕ್ ಟೌನಾಕ್ ವೆಚೆಂ ಅವಶ್ಯ್ ಜಾತಾಲೆಂ. ಅರ್ಥಿಕ್ ಮಟ್ಟ್ ಉತ್ತೀಮ್ ತರ್ ಸಿಸ್ಟರಾಂಚೆಂ ಕೊನ್ವೆಂಟ್ ಇಸ್ಕಾಲ್, ಬಾಕಿಚಾಂಕ್ ಸ್ವಾಭಾವಿಕ್ ಜಾವ್ನ್ ಸರ್ಕಾರಿ ಇಸ್ಕಾಲ್.
’ಅಪ್ಣಾಚಾ ಭುರ್ಗ್ಯಾಂನಿ ಕೊನ್ವೆಂಟ್ ಇಸ್ಕಾಲಾಂತ್ ಶಿಕಾಜಾಯಿ.’ ಹೆಂ ಉತಾರ್ ವೆರೊನಿಕಾಚಾ ಕಾನಾಂತ್ ಅಪ್ಶೆಂಚ್ ಘಾಜ್ಲೆಂ. ಘಡಿಭರ್ ಶೆರ್ಮೆಮ್ನ್ ತಿಣೆ ಘುಂವೊನ್ ಪಳೆಲೆಂ, ಕೋಣ್ಂಚ್ ನಾತ್ಲ್ಲೆ.
ಚಡಿತ್ ಚಿಂತುನ್ ಮಾನಸಿಕ್ ಭಾಂದ್ಪಾಸ್ ಆಶೆನಾಸ್ತಾನಾ ವೆರೊನಿಕಾ ಘರ್ಚಾ ಕಾಮಾಕ್ ಲಾಗ್ಲಿ. ಇಸ್ಕಾಲ್ ಚಡ್ ಪಯ್ಸ್ ನಾತ್ಲ್ಲೆಂ, ಭುರ್ಗಿಂ ಜೆವ್ಣಾಕ್ ದನ್ಪರಾಂ ಘರಾ ಯೆತಾಲಿಂ ಆನಿ ಉಪ್ರಾಂತ್ ಪರತ್ ಇಸ್ಕಾಲಾಕ್ ವೆತಾಲಿಂ. ಅಂಗ್ಣಾಂತ್ ಆಸ್ಚಾ ಬಾಂಯ್ ಥಾವ್ನ್ ತಿಣೆ ಸರಾಗ್ ಉದಾಕ್ ವಾವಯ್ಲೆಂ ಆನಿ ನಾಣ್ಯೆಚೆಂ ಭಾಣ್ ಭರ್ಲೆಂ. ಅಂಗಾಣ್ ಜಾಡುನ್ ಧುಳ್ ಉಬಾನಾತ್ಲ್ಲೆ ಪರಿಂ ಉದಾಕ್ ಶಿಂಪ್ಡಾಯ್ಲೆಂ. ಮಾಡಾ ಮೂಳಾಂತ್ ಆಸ್ಚಾ ಬಾಲ್ದೆಂನಿ ಉದಾಕ್ ಭರ್ನ್ ವಸ್ತುರ್ ಹುಂಬಳ್ಳೆಂ. ವಸ್ತುರ್ ಪೀಳ್ನ್ ದೊರಿಯೆರ್ ಸುಕಾತ್ ಘಾಲ್ನ್ ತಿ ರಾಂದ್ಪಾಚಾ ಕಾಮಾಕ್ ಲಾಗ್ಲಿ.
ಇತ್ಲ್ಯಾರ್ ವೊರಾಂ ಸಕಾಳಿಂಚಿಂ ಇಕ್ರಾ ಉತ್ರಾಲ್ಲಿಂ. ಜೆವಾಣ್ ತಯಾರ್ ಕರುಂಕ್ ತಿಚೆ ಹುಜ್ರಿಂ ದೇಡ್ ವೊರಾಚೊ ವೇಳ್ ಆಸ್ಲ್ಲೊ. ನಾರ್ಲ್ ಕಾಂತುನ್ ಸಾಂಬರ್ ಭರ್ಸುನ್ ತಿಣೆ ಸುಕ್ಯಾ ಲೇಪೆಂಚಿ ಕಡಿ ಕರುಂಕ್ ಅಳೆನ್ ವಾಟ್ಲೆಂ. ಶಿತಾಕ್ ಉದಾಕ್ ತಾಪಂವ್ಕ್ ದವರ್ಲೆಂ ಆನಿ ತಾಂದುಳ್ ನೆರಾಯ್ಲೊ. ನೆರಾಯಿಲ್ಲೊ ತಾಂದುಳ್ ಖತ್ಕತ್ಯಾ ಉದ್ಕಾಕ್ ಘಾಲ್ನ್ ತಿಣೆ ರಾಂದ್ಣೆಚೊ ಉಜೊ ಫುಂಕ್ಲೊ. ಕೊನ್ಶಾಕ್ ಪಡೊನ್ ಆಸ್ಚಿ ಏಕ್ ಖಾಲಿ ಕ್ರೀಮ್ ಬಿಸ್ಕಿಟೆಚಾ ಕಾಗ್ದಾಚಿ ಪೆಕೆಟ್ ತಿಣೆ ರಾಂದ್ಣಿಂತ್ ಉಡಯ್ಲಿ. ಕಾಗಾದ್ ಭಗ್ ಹುಲ್ಪೊನ್ ಖಿಣಾನ್ ಗೊಬೊರ್ ಜಾಲೆಂ.
ವೊರಾಂಕ್ ಪಾವ್ಣೆ ಏಕ್ ಜಾತಾನಾ ಆವಾಜ್ ಕರ್ನ್ ’ಮಾಮ್ಮಿ’ ಮಣ್ ಧಾಂವೊನ್ ಆಯಿಲ್ಲ್ಯಾ ಭುರ್ಗ್ಯಾಂಕ್ ತಿಣೆ ವಾಡ್ಲೆಂ. ಅರ್ಧ್ಯಾ ವೊರಾ ಉಪ್ರಾಂತ್ ಜೆವಾಣ್ ತಿರ್ಸುನ್ ಭುರ್ಗಿಂ ಪಾಟಿಂ ಇಸ್ಕಾಲಾಚಾ ವಾಟೆಕ್ ಲಾಗ್ಲ್ಲಿಂ. ಭುರ್ಗಿಂ ಗೆಲ್ಲ್ಯಾ ತಿ ಜೆವ್ಲಿ ಆನಿ ತಿಣೆ ಕುಜ್ನಾಚಿ ನಿತಳಾಯಿ ಕೆಲಿ. ತವಳ್ ದನ್ಪರಾಂಚಿಂ ದೋನ್ ವೊರಾಂ. ಪುರಾಸಾಣೆಕ್ ಆಸ್ರೊ ಜಾವ್ನ್ ದನ್ಪರಾಂ ಇಲ್ಲೊಸೊ ವೇಳ್ ನಿದ್ಚೆಂ ತಿಕಾ ಸವೊಯೆರ್ ಪಡ್ಲ್ಲೆಂ. ಉಪ್ರಾಂತ್ ಉಟೊನ್ ನಾಣ್ಯೆಚಾ ರಾಂದ್ಣೆಕ್ ಉಜೊ ಘಾಲ್ನ್ ಉದಾಕ್ ತಾಪಂವ್ಕ್ ಆಸ್ಲ್ಲೆಂ.
ದಾರಾಚಿ ಖಿಳ್ ಘಾಲ್ನ್ ತಿ ಆಲ್ತಾರಿಚಾ ಮಧ್ಲ್ಯಾ ಕುಡಾಂತ್ ಹುಸ್ಕಾರ್ ಸೊಡ್ನ್ ಮಾಂದ್ರೆರ್ ಪರ್ತಾಲಿ. ಖಿಣಾ ಭಿತರ್ ತಿಕಾ ಝೆಮ್ ಆಯ್ಲಿ. ದೊಳೆ ನಿದೇಕ್ ವಿಲೀನ್ ಜಾವ್ನ್ ಥೊಡಿಂಚ್ ಕ್ಷಣಾಂ ಜಾಲ್ಲಿಂ, ತಿ ಆಚಾನಕ್ ಉಡೊನ್ ಪಡ್ಲಿ. ಲಾಂಬ್ ನಿದೆ ಥಾವ್ನ್ ಜಾಗ್ ಜಾಲ್ಲ್ಯಾ ಪರಿಂ ತಿಕಾ ಭೊಗ್ಲೆಂ. ಘಡಿಯಾಳ್ ದೆಕ್ತಾನಾ ವೊರಾಂ ಫಕತ್ ದೋನ್ ಜಾವ್ನ್ ಧಾ ಮಿನುಟಾಂ ಜಾಲ್ಲಿಂ. ಮಾಂದ್ರೆರ್ ಆಡ್ ಪಡೊನ್ ಫಕತ್ ಧಾ ಮಿನುಟಾಂ ಪಾಶಾರ್ ಜಾಲ್ಲಿಂ ತರ್ ಜಾಗ್ ಕಶಿ ಜಾಲಿ? ತಿಣೆ ಕೂಸ್ ಪರ್ತಿಲಿ.
ಟಕ್ ಟಕ್...ಟಕ್ ಟಕ್.... ದಾರಾಕ್ ಠೊಕೆ ಮಾರ್ಲ್ಲೊ ಆವಾಜ್. ಕೋಣ್ ಪನ್ವತಿ ದನ್ಪರಾಂ ಧೊಸುಂಕ್ ಆಯ್ಲಾ? ತಿಣೆ ಮತಿಂತ್ ಯೆಟ್ಲೆಂ ಆನಿ ಉಬೆಂ ಜಾವ್ನ್ ಕಾಪಾಡ್ ತಸೆಂ ಪಾಲಂವ್ ಸಾರ್ಕೊ ಕೆಲೊ. ಸಾಲಾಕ್ ಯೇವ್ನ್ ದಾರ್ ಉಗ್ತೆಂ ಕರ್ತಾನಾ ತಿಚೆಂ ಸರ್ವಾಂಗ್ ಝಿಮ್ ಜಾಲೆಂ.
"ತುಂ?" ತಿಚೆ ವೋಂಟ್ ಸವ್ಕಾಸ್ ಕಾಂಪ್ಲೆ.
"ಕಶೆಂ ಆಸಾಯಿ ತುಂ? ಭುರ್ಗಿಂ ಕಶಿಂ ಆಸಾತ್?" ತ್ಯಾ ದಾದ್ಲ್ಯಾಚೊ ಪರಿಚಿತ್ ಸ್ವರ್ ಚೊವ್ದಾ ಮಹಿನ್ಯಾಂ ನಂತರ್ ತಿಣೆ ಆಜ್ ಆಯ್ಕಾಲೊ.
ಚೊವ್ದಾ ಮಹಿನೆ! ಚೊವ್ದಾ ಮಹಿನೆ ಅದ್ರಶ್ಯ್ ಜಾವ್ನ್ ಆಜ್ ಪಾಟಿಂ ಪರ್ತಾತಾನಾ ಅತ್ರೇಗ್ ಆನಿ ಉಮಾಳ್ಯಾಂನಿ ಅಪ್ಣಾಚಿ ರೆಸ್ಪೆರಾಚಿ ಭಾಯ್ಲ್ ವೇಂಗೆಂತ್ ಘೆತೆಲಿ ಮಣ್ ಕಾಶ್ಮೀರ್ ಸೋಜ್ ಸಮ್ಜಾಲ್ಲೊ. ತಶೆಂ ಘಡ್ಲೆಂ ನಾ. ಪೊಲ್ಯಾಚೆ ಫೊಂಡ್, ಪುರ್ವಾಲ್ಲೆ ದೊಳೆ, ವಾಡ್ಲ್ಲೆಂ ಖಾಡ್, ಕರ್ಪಾಲ್ಲೆ ಕೇಸ್ ಆನಿ ಮೆಳೆಂ ನೆಸಾಣ್ ಪಳೆವ್ನ್ ಬಹುಶಾ ತಿ ಕಾಂಟಾಳ್ಳಿ ಜಾಯ್ಜಾಯಿ. ತೊ ನಿರಾಸ್ಲೊ ತರೀ ತಾಣೆ ಅಪ್ಮಾಕ್ ಮತಿಂತ್ ಸಮಧಾನ್ ಕೆಲೆಂ. ಖಾಡ್ ತಾಸುನ್ ನಾವ್ನ್ ಆಯ್ಲೊಂ ತರ್ ಸರ್ವ್ ಸಮಾ ಜಾತೆಲೆಂ ಮಣ್ ತೊ ಭರ್ವಸ್ಲೊ. ಥಕಾಟ್ ಧೊಸ್ತಾಲಿ ಜಾಲ್ಲ್ಯಾನ್ ವಾಣೊ ನಿಕ್ಳಾವ್ನ್ ಪೇಟ್ ಸಕ್ಲಾ ದವರ್ನ್ ತೊ ಇಜಿಛೇರಾರ್ ಬಸ್ಲೊ.
"ಹಿ ಸ್ಥಿತಿ ಕರ್ನ್ ಘೆತ್ಲ್ಯಾಯಿ ತುಂವೆ?" ವೆರೊನಿಕಾ ಆಕ್ಲಾಸ್ಲಿ. "ಚೊವ್ದಾ ಮಹಿನ್ಯಾಂನಿ ಮಜೊ ಆನಿ ಭುರ್ಗ್ಯಾಂಚೊ ತುಕಾ ಉಡಾಸ್ ಜಾಲೊನಾ? ಆಮ್ಕಾಂ ಅಸಹಯಕ್ ಸೊಡ್ನ್ ಘಾಲುಂಕ್ ತುಜೆಂ ಕಾಳಿಜ್ ಕಶೆಂ ವೊಪ್ಲೆಂ ತೆಂ ಸಾಂಗ್."
"ಚೊವ್ದಾ ಮಹಿನೆ!" ಕಾಶ್ಮೀರ್ ಸೊಜಾಚೊ ಸ್ವರ್ ಗದ್ಗದೀತ್ ಜಾವ್ನ್ ತೊ ಉಲೊಂಕ್ ಕಷ್ಟಾಲೊ.
ಘೊವಾಚಾ ದೊಳ್ಯಾಂತ್ಲಿಂ ದುಕಾಂ ಪಳೆವ್ನ್ ವೆರೊನಿಕಾನ್ ಉಸ್ಪೊನ್ ಯೆಂವ್ಚಾ ಸವಾಲಾಂಚಾ ವತ್ತಡಾಚೆರ್ ಖಾಡುಂ ಘಾಲೆಂ.
"ತುಂವೆ ಪಯ್ಲೆಂ ನಾವ್ನ್, ಜೇವ್ನ್ ವಿಶೆವ್ ಘೆಂವ್ಚೊ ಬೊರೊ." ತಿಣೆ ಸಲಹಾ ದಿಲಿ. "ಮಾಗಿರ್ ಸರ್ವ್ ಉಲೊವ್ಯೆತ್."
ತಾಣೆ ತಕ್ಲಿ ಹಾಲವ್ನ್ ದುಕಾಂ ಫುಸ್ಲಿಂ.
"ಹಾಂವ್ ನಾಣ್ಯೆಚೆಂ ಉದಾಕ್ ಹುನ್ ಕರ್ತಾಂ. ತುಂ ಆರಾಮ್ ಕರ್." ತಿ ಘುಂವೊಂಕ್ ತಯಾರ್ ಜಾಲಿ.
"ತುಂ ಜಾಣಾಂಯಿ ಮಾಕಾ ಥಂಡ್ ಉದ್ಕಾಂತ್ ನಾಂವ್ಚಿ ಸವೊಯಿ ಆಸಾ." ಅಪ್ಣಾಚಿ ಸವೊಯಿ ತಿ ಕಶೆಂ ವಿಸ್ರಾಲಿ ಮಣ್ ತಾಕಾ ವಿಜ್ಮಿತ್ ಜಾಲೆಂ. ಚೊವ್ದಾ ಮಹಿನೆಂ ಮಟ್ವಿ ಆವ್ದಿ ನಯ್, ಜಾಯ್ತೆಂ ವಿಸ್ರಾಂವ್ಕ್ ಸಕ್ತಾ. ಸವ್ಕಾಸ್ ಸರ್ವ್ ಸಮಾ ಜಾತೆಲೆಂ ಮಣ್ ತೊ ಭರ್ವಸ್ಲೊ.
"ಸಿಮಾಂವ್ ಆನಿ ತಾಚೆಂ ಕುಟಾಮ್ ಕಶೆಂ ಆಸಾ? ತೊ ಆಜೂನ್ ಪ್ರಿಂಟಿಂಗ್ ಪ್ರೆಸ್ಸಾಂತ್ ಕಾಮ್ ಕರ್ತಾ?" ತಾಚಾ ಖಾಸ್ ಈಷ್ಟಾಚೊ ಉಡಾಸ್ ಆಯ್ಲೊ ತಾಕಾ.
ಸಿಮಾಂವಾ ಸಂಗಿಂ ತಾಚಿ ಈಷ್ಟಾಗತ್ ಆಖ್ಖ್ಯಾ ಹಳ್ಳೆಂತ್ ಪ್ರಖ್ಯಾತ್. ಜಿಣ್ಯೆಂತ್ ಕಿತೆಂ ಕಷ್ಟ್ ಆಯ್ಲ್ಯಾರ್ಯಿ ಏಕಾಮೆಕಾಚಾ ಕುಟ್ಮಾಕ್ ಸೊಡ್ನ್ ಘಾಲುಂಕ್ ನಜೊ ಮಣೊನ್ ತಾಣಿಂ ಅಪ್ರೂಪ್ಶೆಂ ಕಂಟ್ರಿ ಮಾರ್ತಾನಾ ಭಾಸಾಯಿಲ್ಲೆಂ ಆಸಾ. ಭಾಸಾವ್ಣಿ ವೇಳಾ ಸಂಗಿಂ ಪೊಕೊಳ್ ಜಾಲಿ? ಅಪ್ಣಾಚೆಂ ಆನಾಥ್ ಕುಟಾಮ್ ವೊಜೆಂ ಮಣೊನ್ ಸೊಡ್ನ್ ಘಾಲೆಂ ಅಪ್ಲೆ ಏಕಾಚ್ ಮೊಗಾಚಾ ಈಷ್ಟಾನ್?
ತಿ ಜಾಪ್ ದೀನಾಸ್ತಾನಾ ಭಿತರ್ ಗೆಲಿ. ಅಪ್ಲ್ಯಾ ಪೆಟೆಂತ್ ಉಸ್ತುನ್ ತಾಣೆ ರೇಜರ್ ವಿಂಚ್ಲೆಂ. ಭಾಯ್ಲ್ ಕುಡಾ ಥಾವ್ನ್ ಪಾಟಿಂ ಯೆತಾನಾ ತಿಚೆ ಹಾತಿಂ ತುವಾಲೊ, ಪರ್ನಿ ಲುಂಗಿ ಆನಿ ಬನಿಯಾನ್ ಆಸ್ಲ್ಲೆಂ. ವೆರೊನಿಕಾನ್ ದಿಲ್ಲ್ಯೊ ವಸ್ತು ಘೆವ್ನ್ ಕಾಶ್ಮೀರ್ ನಾಣ್ಯೆಕ್ ಗೆಲೊ. ಪಂದ್ರಾ ಮಿನುಟಾಂ ಉಪ್ರಾಂತ್ ಖಾಡ್ ಕಾಪುನ್ ಆನಿ ಮಾತ್ಯಾರ್ ನಾವ್ನ್ ತೊ ನಾಣ್ಯೆ ಥಾವ್ನ್ ಭಾಯ್ರ್ ಯೆತಾನಾ ಮಾತ್ಸಿ ನಿತಳಾಯಿ ಪಾಟಿಂ ಆಯಿಲ್ಲಿ. ಭಾಯ್ಲೆನ್ ಕುಜ್ನಾ ಥಾವ್ನ್ ವಾಡ್ನ್ ಹಾಡ್ಲ್ಲೆಂ ಜೆವಾಣ್ ತೊ ಜೆಂವ್ಲೊ.
"ಚೊವ್ದಾ ಮಹಿನ್ಯಾಂನಿ ಕಿತ್ಲೆಶ್ಯಾ ಪಾವ್ಟಿಂ ಹ್ಯಾ ರುಚಿಕ್ ಕಡಿಯೆಚಿ ರುಚ್ ಚಾಕೊಂಕ್ ಹಾಂವ್ ಚಡ್ಪಡ್ಲೊಂ ಜಾಣಾಂಯಿ?" ಕಾಶ್ಮೀರ್ ಸೋಜಾನ್ ಬೊಟಾಂ ಲೆಂವ್ಲಿಂ.
"ಮಾಲ್ಗಡ್ಯಾಂನಿ ದಿಲ್ಲ್ಯಾ ಸುವಾತೆರ್ ಮಾಡಾತೋಟ್ ಆನಿ ಸಾಗೊಳಿ ಸಾಂಬಳ್ನ್ ಕಷ್ಟಾಂನಿ ತರೀ ಆರಾಮಾರ್ ದೀಸ್ ಕಾಡ್ಯೆತ್ ಆಸ್ಲ್ಲೆ." ಕಾಶ್ಮೀರ್ ಸೋಜ್ ಉದಾಕ್ ಪಿಯೊನ್ ಪಾಟಿಂ ಇಜಿಛೇರಾಚೆರ್ ಗಳ್ಳೊ. "ಭುರ್ಗಿಂ ವಾಡೊನ್ ಯೆತಾತ್, ತಾಂಕಾಂ ಕೊನ್ವೆಂಟ್ ಇಸ್ಕಾಲಾಕ್ ಘಾಲುಂಕ್ ಆಸಾ, ಉಪ್ರಾಂತ್ ಕೊಲೇಜಿಚೆಂ ಶಿಕಾಪ್ ದೀಂವ್ಕ್ ಆಸಾ ಆನಿ ಹಿಂ ಸಪ್ಣಾಂ ಕಾರ್ಯಗತ್ ಜಾಯ್ಜಾಯಿ ತರ್ ಪಯ್ಶೆ ಜಮೊ ಕರಿಜಾಯಿ ಮಣ್ಚಾ ಕಿಡಿನ್ ಆಮ್ಕಾಂ ಕಾಂತಯ್ಲೊ. ಸಾಗೊಳೆಚೆಂ ವೊಜೆಂ ಸಾಂಬಳುಂಕ್ ತುಂ ವೊಪ್ಲೆಂಯಿ ಆನಿ ಹಾಂವ್ ಗಲ್ಫಾಕ್ ಪಾವ್ಲೊಂ ತರ್ ಉತ್ಪತ್ತ್ ಚಡ್ತೆಲಿ ಮಣೊನ್ ಆಮಿ ಚಿಂತ್ಲೆಂ. ಆಮ್ಚೊ ಇರಾದೊ ಸಿಮಾಂವ್ಕ್ ಕಳಯ್ಲೊ. ಸಿಮಾಂವ್ಕ್ಯಿ ಸಮಾ ದಿಸ್ಲೆಂ. ಧೈರಾನ್ ಮುಕಾರ್ ಸರ್, ದೇವ್ ಆಸಾ ಆನಿ ಆಮಿ ಜಿಕ್ತೆಲ್ಯಾಂವ್ ಮಣೊನ್ ತೊ ಭರ್ವಸ್ಲೊ. ಪಾಸ್ಪೋರ್ಟ್ ಹಾತಿಂ ಮೆಳ್ತಾಚ್ ಚೊವ್ದಾ ಮಹಿನ್ಯಾ ಆದಿಂ ಗಲ್ಫಾಚಾ ಏಜೆಂಟಾಂಕ್ ಮೆಳೊಂಕ್ ಹಾಂವ್ ತುಮ್ಕಾಂ ಸರ್ವಾಂಕ್ ಆದೇವ್ಸ್ ಮಾಗೊನ್ ಮುಂಬೈ ಪಾವ್ಲೊಂ. ಆಶೆಂ ಆರಂಭ್ ಜಾಲಿ ಮಜಾ ಜಿಣ್ಯೆಚಿ ಅತ್ಯಂತ್ ಭಯನಕ್ ಖುರ್ಸಾ ವಾಟ್."
ಕಾಶ್ಮೀರ್ ಸೋಜಾನ್ ಏಕ್ ದೀರ್ಘ್ ಶ್ವಾಸ್ ಸೊಡ್ಲೊ. ಚೊವ್ದ್ಯಾ ಮಹಿನ್ಯಾಚಾ ಖುರ್ಸಾ ವಾಟೆಂತ್ ತೊ ಜಾಯ್ತೊ ಲಾಚಾರ್ ಜಾಲಾ ಮಣ್ ತಾಚೆಂ ವದನ್ ಆನಿ ಉಸ್ವಾಸ್ ಸ್ಪಷ್ಟ್ ಕಳಿತ್ ಕರ್ತಾಲಿಂ. ವೆರೊನಿಕಾಕ್ ಕಿತೆಂ ಪ್ರತಿಕ್ರಿಯಾ ದಿಂವ್ಚಿ ಮಣ್ ಸುಸ್ತಾಲೆಂನಾ.
"ಬಪ್ಪನಾಡ್ಚಾ ವಿಜಯ್ ಶೆಟ್ಟಿಚೆಂ ಹೊಟೆಲ್ ಸಿವ್ರಿಂತ್ ಆಸ್ಲ್ಲೆಂ." ತಾಣೆ ಮುಕಾರ್ಸಿಲೆಂ. "ವಳಕ್ ದಾಕವ್ನ್ ಹಾಂವ್ ತಾಕಾ ಮೆಳೊಂಕ್ ಗೆಲೊಂ. ತಾಚಾ ಹೊಟ್ಲಾಂತ್ ಕಾಮ್ ಕರ್ಚೆ ಚೆರ್ಕೆ ರೈಲ್ವೆ ಪಾಟ್ಯೆಲಾಗಿಂ ಆಸ್ಚಾ ಏಕಾ ಭುರ್ಶ್ಯಾ ಝೊಪ್ಡ್ಯಾಂತ್ ವಸ್ತಿ ಕರ್ತಾಲೆ. ವಿಜಯ್ ಶೆಟ್ಟಿನ್ ಮಾಕಾ ಭಾಡೆಂ ದೀವ್ನ್ ಥಂಯ್ಸರ್ ರಾವೊಂಕ್ ಪರ್ವಣ್ಗಿ ದಿಲಿ ಆನಿ ಭಾಡೆಂ ಜಾವ್ನ್ ತಿನ್ಶಿಂ ರುಪಯಿ ಘೆತ್ಲೆ. ಥಂಯ್ ಥಾವ್ನ್ ಹಾಂವ್ ಗಲ್ಫ್ ಏಜೆಂಟಾಂಚಾ ಬೊಂಟೆಕ್ ಲಾಗ್ಲೊಂ. ಹೆ ಏಜೆಂಟ್ ಗೀದಾಚಾ ಕಾಸ್ತಾಚೆ. ತೀಸ್ ಥಾವ್ನ್ ಪನ್ನಾಸ್ ಹಜಾರ್ ಕ್ಯಾಶ್ ನಾಸ್ತಾನಾ ಉಲೊಂಕ್ ಸಮೇತ್ ತಯಾರ್ ನಾತ್ಲ್ಲೆ."
"ತವಳ್ ಮುಂಬೈ ಥಾವ್ನ್ ಏಕ್ ದೋನ್ ಚೀಟಿ ತುಂವೆ ಬರಯಿಲ್ಲ್ಯೊಯಿ, ಪುಣ್ ಕಷ್ಟಾಂ ವಿಶಿಂ ಕಿತೆಂಚ್ ಲಿಖ್ಲೆಂನಾಂಯಿ." ತಿಣೆ ಉಡಾಸ್ ಕೆಲೊ.
"ತುಮಿ ಖಂತಿಚಾ ಪಿಡೆಕ್ ಬಲಿ ಜಾಂವ್ಚೆಂ ನಾಕಾ ಮಣೊನ್ ಹಾಂವೆ ಕಿತೆಂಚ್ ಬರಯ್ಲೆಂನಾ, ಮಜೆ ಇತ್ಲ್ಯಾಕ್ ಕಷ್ಟ್ ಸೊಸ್ಲೆ." ತಾಣೆ ಖೊಂಕ್ಲಿ ಕಾಡ್ನ್ ತಾಳೊ ಸದಿಳ್ ಕೆಲೊ. "ಗಲ್ಫಾಚಿ ವಾಟ್ ಧರಿನಾಸ್ತಾನಾ ಹಾಂವ್ ಪಾಟಿಂ ಪರ್ತೊಂಚೊನಾ ಮಣ್ಚಾ ಹಟ್ಟಾಕ್ ವಳಗ್ ಜಾಲೊಂ. ಹಾತಿಂ ಆಸ್ಚೆ ಪಯ್ಶೆ ಖಾಲಿ ಜಾತಾನಾ ಕೋಣಾಯ್ಚೆ ಹಾತ್-ಪಾಂಯ್ ಧರ್ನ್ ಟ್ರೇಯ್ನಿರ್ ಥಂಡ್ ಪೀವನ್ ವಿಕ್ಚಾ ಕಾಮಾಕ್ ಲಾಗ್ಲೊಂ. ತವಳ್ ಮಜೊ ಮುಂಬೈ ಪಾವೊನ್ ಚೊವ್ತೊ ಮಹಿನೊ. ಆವ್ಚಿತ್ ಏಕಾ ಮಾರೆಕಾರ್ ಘಟನಾಚೊ ಹಾಂವ್ ಶಿಕಾರ್ ಜಾಲೊಂ. ಏಕಾ ರಾತಿಂ ಕಾಮ್ ಅಕೇರ್ ಕರ್ನ್ ವಡಾಲಾ ಥಾವ್ನ್ ಸಿವ್ರಿ ಪಾಟಿಂ ಯೆತಾಲೊಂ. ಸಿವ್ರಿ ದೆಂವ್ತಾನಾ ಪೋಲಿಸಾಂನಿ ಮಾಕಾ ವೆಡೊ ಮಾರ್ಲೊ. ತಾಣಿಂ ಮಜೆಂ ನಾಂವ್ ಕಿತೆಂ ಮಣ್ ವಿಚಾರ್ಲೆಂ. ನಾಂವ್ ಕಾಶ್ಮೀರ್ ಮಣ್ತಾನಾ ಹಾಂವ್ ಕಾಶ್ಮೀರ್ ಥಾವ್ನ್ ಚುಕೊನ್ ಆಯಿಲ್ಲೊ ಆತಂಕ್ವಾದಿ ಮಣೊನ್ ಲೊಕಪ್ಪಾಕ್ ಘಾಲೊ ಆನಿ ಭಾಯ್ರ್ ಕೋಣಾಂಯಿ ಲಾಗಿಂ ಸಂಪರ್ಕ್ ಕರುಂಕ್ ಆವ್ಕಾಸ್ ದಿಲೊನಾ. ಆದ್ಲೆ ವರ್ಸಾ ಮುಂಬೈಚಾ ಲೋಕಲ್ ಟ್ರೇಯ್ನಿಂನಿ ಭೈಂದರ್ ಥಾವ್ನ್ ಮಾತುಂಗಾ ಸ್ಟೇಶನಾ ಪರ್ಯಾಂತ್ ಇಕ್ರಾ ಮಿನುಟಾಂನಿ ಸಾತ್ ಬೊಂಬ್ ಸ್ಪೋಟಿತ್ ಜಾಲ್ಲೆ. ಹ್ಯಾ ಕಠೋರ್ ಕರ್ತುಬಾಂ ಪಾಟ್ಲ್ಯಾ ಆರೋಪ್ಯಾಂ ಪಯ್ಕಿ ಎಕ್ಲ್ಯಾಚೆಂ ಸಾರ್ಕೆಂ ಮಜಾ ತೋಂಡಾಕ್ ತಾಳ್ ಪಡ್ತಾ ಮಣೊನ್ ಪೋಲಿಸಾಂನಿ ಮಜೆರ್ ಚಾರ್ಜ್ಶೀಟ್ ತಯಾರ್ ಕೆಲಿ."
"ಮಳ್ಯಾರ್ ತುಂ ಜೈಲಾಂತ್ ಆಸ್ಲ್ಲೊಯಿ?" ಹಾಂಕ್ರೆಲಿ ವೆರೊನಿಕಾ.
ಕಾಶ್ಮೀರ್ ಸೋಜಾನ್ ಸವ್ಕಾಸ್ ತಕ್ಲಿ ಹಾಲಯ್ಲಿ ಆನಿ ಭಿಜ್ಲ್ಲೆ ದೊಳೆ ತಸೆಂ ನಾಕ್ ಫುಸ್ಲೆಂ.
"ಚೂಕ್ ಆಧಾರಿನಾಸ್ತಾನಾ ಅಪ್ರಾಧ್ ಕರಿನಾಸ್ತಾನಾ ಏಕ್ ವಜಾನ್ಭರಿತ್ ಖುರಿಸ್ ಹಾಂವೆ ಜಾಯ್ತೆ ಮಹಿನೆಂ ವಾವಯ್ಲೊ." ತೊ ಹುಸ್ಕಾರ್ಲೊ. "ಗೆಲೆತ್ಯಾ ಹಫ್ತ್ಯಾಂತ್ ಖರೊ ಅಪ್ರಾಧಿ ಸಾಂಪಡ್ತಾಚ್ ಫರಾಮಶೆನ್ ಮಾಕಾ ಭಿತರ್ ಘಾಲಾ ಮಣ್ ಸರ್ಕಾರಾನ್ ಇಲ್ಶೆಶಾ ಪಯ್ಶಾಂಚೊ ಪರಿಹಾರ್ ದೀವ್ನ್ ಕಾಲ್ ಸುಟ್ಕಾ ದಿಲಿ. ಹಾಂವ್ ಶೀದಾ ಗಾಂವಾಂಕ್ ಆಯ್ಲೊಂ. ಹ್ಯಾ ಆನ್ಬೋಗಾ ಉಪ್ರಾಂತ್ ಚುಕೊನ್ ತರೀ ಹ್ಯಾ ಹಳ್ಳೆ ಥಾವ್ನ್ ಭಾಯ್ರ್ ಮೇಟ್ ದವರ್ಚೊನಾ ಮಣ್ ಹಾಂವೆ ನಿಚೆವ್ ಕೆಲಾ."
"ಹಾಂವೆ ತುಜಿ ಆಶಾ ನಿಜಾಯ್ಕಿ ಸೊಡ್ಲ್ಲಿ." ವೆರೊನಿಕಾಚಾ ದೊಳ್ಯಾಂತ್ಲಿಂ ದುಕಾಂ ಪೊಲ್ಯಾರ್ ಗಳ್ಳಿಂ.
"ಚೊವ್ದಾ ಮಹಿನ್ಯಾಂನಿ ಹರ್ಯೆಕ್ ಮಿನುಟ್ ಆನಿ ಹರ್ಯೆಕ್ ಸೆಕುಂಡ್ ಹಾಂವೆ ತುಮ್ಚೊ ನಿಯಾಳ್ ಕರ್ನ್ ದೀಸ್ ಕಾಡ್ಲ್ಯಾತ್. ಮೊರ್ಚಾ ಪಯ್ಲೆಂ ಮಜಾ ಭಾಯ್ಲ್ ಭುರ್ಗ್ಯಾಂಚೆರ್ ಏಕ್ ದೀಷ್ಟ್ ಘಾಲುಂಕ್ ಆವ್ಕಾಸ್ ದೀ ದೆವಾ ಮಣ್ ಹಾಂವ್ ಮಾಗೊನ್ ಆಸ್ಲ್ಲೊಂ." ತಾಣೆ ಮುಕಾರ್ ಸರೊನ್ ವೆರೊನಿಕಾಚಿಂ ದುಕಾಂ ಫುಸ್ಲಿಂ. ಲಾಗಿಂ ವೋಡ್ನ್ ಗೊಪಾಂತ್ ಘೆಂವ್ಕ್ ತೊ ಅತ್ರೆಗ್ಲೊ. ಆದ್ಲಿ ಸಳಾವಳ್ ಜೀವ್ ಕರುಂಕ್ ಸಕಾನಾಸ್ತಾನಾ ತಿಂ ಪಯ್ಸಾಪಯ್ಸ್ ರಾವ್ಲಿಂ.
"ತುಂ ಜಾಯ್ತೊ ಥಕ್ಲಾಯಿ." ವೆರೊನಿಕಾ ಮಣಾಲಿ. "ಮಾಗಿರ್ ಉಲೊವ್ಯೆತ್. ಭಿತರ್ ಸೊಡಯಿಲ್ಲಿ ಮಾಂದ್ರಿ ಆಸಾ, ಜಾಯ್ಪುರ್ತೊ ವಿಶೆವ್ ಕಾಣ್ಗೆ. ಮುಕ್ಲ್ಯಾ ಏಕಾ ವೊರಾ ಭಿತರ್ ಇಸ್ಕಾಲಾಕ್ ಗೆಲ್ಲಿಂ ಭುರ್ಗಿಂ ಯೆತೆಲಿಂ. ಮಾಕಾ ಭಾಣಾಕ್ ಉಜೊ ಘಾಲುಂಕ್ ಆಸಾ."
ತಿಣೆ ತಾಚಿ ಪೇಟ್ ಉಕಲ್ನ್ ಭಿತರ್ ವೆಲಿ. ತಾಣೆ ಪಾಟ್ಲಾವ್ ಕೆಲೊ. ಆಲ್ತಾರಿಚಾ ಕುಡಾಂತ್ ಮಾಂದ್ರೆರ್ ಬಸೊನ್ ತಾಣೆ ಘುಂವೊನ್ ವೆಚಾ ವೆರೊನಿಕಾಚೊ ಹಾತ್ ಧರ್ಲೊ. ತಿಚೊ ಪಾಲಂವ್ ಆಧಾರ್ ಚುಕೊನ್ ಹಾತಾರ್ ಥಾವ್ನ್ ಸಕ್ಲಾ ಗಳ್ಳೊ. ತಾಚಿ ನದರ್ ತಿಚಾ ಉಬಾರ್ ಭಾಜ್ವೆರ್ ಚರ್ಲಿ. ಕಾಶ್ಮೀರ್ ಸೋಜಾಚಾ ಶಿರಾಂನಿ ಅವೇಶ್ ಭರೊನ್ ಆಯ್ಲೊ.
"ಏಕ್ ಸವಾಲ್ ವಿಚಾರುಂ?" ವೆರೊನಿಕಾನ್ ದಾವ್ಯಾ ಹಾತಿಂ ಪಾಲಂವ್ ವಯ್ರ್ ಕರ್ನ್ ಭಾಜ್ವೆರ್ ಪಾಂಗುರ್ಲೊ.
"ಕಿತೆಂ?" ತೊ ಚಡ್ಪಡ್ಲೊ.
"ಘರ್ ಸೊಡ್ತಾಚ್ ಚೊವ್ದಾ ಮಹಿನ್ಯಾಂನಿ ತುಂವೆ ಪರ್ಕಿ ಸ್ತ್ರೀಯೆಚೊ ಸಹವಾಸ್ ಕೆದಾಳಾಯಿ ಕರುಂಕ್ನಾಂಯಿ?" ತಿಣೆ ದಾಕ್ಷೇಣ್ ನಾಸ್ತಾನಾ ವಿಚಾರ್ಲೆಂ.
ವೆರೊನಿಕಾ ಅಪ್ಣಾಚೆರ್ ದುಬಾವ್ ಕರ್ತಾ? ಥಟಾಕ್ಲೊ ಕಾಶ್ಮೀರ್ ಸೋಜ್. ಚೊವ್ದಾ ಮಹಿನ್ಯಾಂನಿ ಅಪುಣ್ ಮನಾಂತ್ ಆನಿ ಕರ್ನೆಂತ್ ನಿಸ್ಕಳ್ ಉರ್ಲೊಂ ಮಣ್ ಕಶೆಂ ಸಾಬೀತ್ ಕರ್ನ್ ದಾಕಂವ್? ಜಿಣ್ಯೆಂತ್ ಘಡ್ಲ್ಲೆಂ ಆನಾಹುತ್ ಸಾಂಗ್ತಾಚ್ ಸರ್ವ್ ಸಮಾ ಜಾತೆಲೆಂ ಮಣ್ ತಾಣೆ ಚಿಂತ್ಲ್ಲೆಂ. ಭಾಯ್ಲೆಚಾ ಹ್ಯಾ ಏಕಾ ಸವಾಲಾನ್ ತಾಚೆಂ ಶಿಂತಿಂದ್ ಹಾಲಯಿಲ್ಲೆಂ.
ಹಿ ಕಸಲಿ ನವಿ ಪರೀಕ್ಷಾ? ದೆವಾ ತುಜಿ ಖುಶಿ ತರ್ ಹಿ ಕಾಲ್ಸ್ ಅಪ್ಣಾ ಥಾವ್ನ್ ನಿವಾರ್..... ತಾಣೆ ಸವ್ಕಾಸ್ ತಿಚೊ ಹಾತ್ ಸೊಡ್ಲೊ. ತಿ ಪಾಟ್ ಕರ್ನ್ ಭಾಯ್ರ್ ಗೆಲಿ. ಚಿಂತ್ನಾಂನಿ ರೆವ್ಡಾಲ್ಲ್ಯಾ ತಾಕಾ ಸವ್ಕಾಸ್ ನಿದೆನ್ ಗ್ರಾಸಿಲೊ. ಚಿತ್ರ್-ವಿಚಿತ್ರ್ ಸಪ್ಣಾಂನಿ ತಾಕಾ ಧೊಸ್ಲೆಂ. ಜಾಗ್ ಜಾತಾನಾ ಅಪುಣ್ ಮುಂಬೈ ಜೈಲಾಂತ್ ಆಸಾಂ ಯಾ ಗಾಂವಾಂತ್ ಘರಾ ಆಸಾಂ ಮಣ್ ಸಮ್ಜೊಂಕ್ ತಾಕಾ ವೇಳ್ ಲಾಗ್ಲೊ. ಅಪುಣ್ ಘರಾ ಆಸ್ಚಿ ಏಕ್ ಖರಿ ಗಜಾಲ್ ಜಾವ್ನಾಸಾ ಆನಿ ಹೆಂ ಸಪಾಣ್ ನಯ್ ಮಣ್ ಚಿಂತುನ್ ತಾಕಾ ದಾಧೊಸ್ಕಾಯಿ ಭೊಗ್ಲಿ.
ಭಾಯ್ರ್ ಭುರ್ಗ್ಯಾಂನಿ ಉಲಯಿಲ್ಲೊ ಆವಾಜ್ ಆಯ್ಕಾಲೊ ತಾಕಾ. ಬಹುಶಾ ಇಸ್ಕಾಲಾ ಥಾವ್ನ್ ತಿಂ ಪಾಟಿಂ ಪರ್ತಾಲ್ಲಿಂ. ತಾಂಚೆರ್ ಏಕ್ ದೀಷ್ಟ್ ಘಾಲುಂಕ್ ತೊ ದರ್ವಡ್ಲೊ. ದೊಳೆ ಘಷ್ಟುನ್ ಆಂಗ್ ಸದಿಳ್ ಕರ್ನ್ ತೊ ಉಬೊ ಜಾಲೊ. ಕೊನ್ಶಾಕ್ ಆಸ್ಚಿ ಅಪ್ಲಿ ಲಾನ್ ಪೇಟ್ ಉಗ್ತೆಂ ಕರ್ನ್ ತಾಣೆ ತೀನ್ ಕ್ರೀಮ್ ಬಿಸ್ಕಿಟೆಂಚೊ ಪೆಕೆಟ್ಸ್ ಭಾಯ್ರ್ ಕಾಡ್ಲ್ಯೊ. ಕಾಶ್ಮೀರ್ ಸೋಜಾಕ್ ಲಾನ್ ಥಾವ್ನ್ ಕ್ರೀಮ್ ಬಿಸ್ಕಿಟ್ ಮಳ್ಯಾರ್ ಖೂಬ್ ಪಸಂದ್. ತೊ ಲಾನ್ ಆಸ್ತಾನಾ ತಾಚೊ ಬಾಪಯಿ ಅಪ್ರೂಪ್ ಕಾಮಾನ್ ಶಹರಾಕ್ ಗೆಲ್ಲ್ಯಾ ವೇಳಾರ್ ಭುರ್ಗ್ಯಾಂ ಖಾತಿರ್ ಕ್ರೀಮ್ ಬಿಸ್ಕಿಟ್ ಹಾಡ್ನ್ ಯೆತಾಲೊ ಆನಿ ಹ್ಯಾ ಬಿಸ್ಕಿಟೆಂಚಾ ಆಶೆನ್ ತಿಂ ಸರ್ವ್ ಭುರ್ಗಿಂ ಬಾಪಯ್ನ್ ಶಹರಾ ಥಾವ್ನ್ ಪಾಟಿಂ ಪರ್ತುಂಕ್ ರಾಕೊನ್ ರಾವ್ತಾಲಿಂ..... ಹ್ಯಾಚ್ ಉಡಾಸಾಚೊ ಏಕ್ ವಾಂಟೊ ಜಾವ್ನ್ ಮುಂಬೈ ಥಾವ್ನ್ ಗಾಂವಾಕ್ ವೆಚಾ ಸರ್ಕಾರಿ ಬಸ್ಸಾರ್ ಚಡ್ಚಾ ಪಯ್ಲೆಂ ಉಡಾಸಾನ್ ತಾಣೆ ಅಪ್ಲೆ ಭುರ್ಗ್ಯಾಂ ಖಾತಿರ್ ಉಡಾಸಾನ್ ಕ್ರೀಮ್ ಬಿಸ್ಕಿಟೆಂಚೊ ಪೆಕೆಟ್ಸ್ ಮೊಲಾಕ್ ಘೆತ್ಲ್ಲ್ಯೊ. ಭುರ್ಗಿಂ ಖಾಯ್ಸ್ ಕರ್ತೆಲಿಂ ಮಣ್ ತೊ ಪಾತ್ಯೆಲ್ಲೊ.
ಬಿಸ್ಕಿಟ್ ಪೆಕೆಟ್ಸ್ ವಿಂಚುನ್ ತೊ ಸಾಲಾಕ್ ಆಯ್ಲೊ. ಭುರ್ಗಿಂ ಆಜೂನ್ ಇಸ್ಕಾಲಾಚಾ ನೆಸ್ಣಾರ್ ಸೊಭ್ತಾಲಿಂ.
"ಕೋಣ್ ಆಯ್ಲಾ ಪಳೆ." ವೆರೊನಿಕಾನ್ ಭುರ್ಗ್ಯಾಂಕ್ ತಿಳ್ಸಿಲೆಂ. "ಪಪ್ಪಾಚಿ ವಳಕ್ ತುಮ್ಕಾಂ ಮೆಳ್ಳಿ? ಬೆಸಾಂವ್ ಮಾಗಾ ಪಳೆಯಾಂ."
"ಬೆಸಾಂವ್ ದೀ ಪಪ್ಪಾ." ಜೆಸ್ಸಿ ಹಾತ್ ಜೋಡ್ನ್ ಮುಕಾರ್ ಆಯ್ಲೆಂ.
ಕಾಶ್ಮೀರ್ ಸೋಜಾನ್ ಉಮಾಳ್ಯಾ ಭೊಗ್ಣಾಂನಿ ಜೆಸ್ಸಿಕ್ ಬೆಸಾಂವ್ ದೀವ್ನ್ ಲಾಗಿಂ ವೊಡ್ಲೆಂ. ಐವನ್ ಆನಿ ಟ್ರೆಸ್ಸಿ ಲಜೆನ್ ಆವಯ್ಚಾ ಕಾಪ್ದಾ ಪಾಟ್ಲ್ಯಾನ್ ರೆವ್ಡಾಲ್ಲಿಂ.
"ಹಾಂಗಾಸರ್ ಪಳೆಯಾ ಭುರ್ಗ್ಯಾಂನೊ." ತೊ ಮಯ್ಪಾಸಾನ್ ಹಾಸ್ಲೊ. "ಹಾಂವೆ ತುಮ್ಚೆ ಖಾತಿರ್ ಕಿತೆಂ ಹಾಡ್ಲಾಂ ಪಳೆಯಾ."
ಐವನ್ ಆನಿ ಟ್ರೆಸ್ಸಿ ಆಶೆನ್ ಕಿತೆಂ ಹಾಡ್ಲಾಂ ಮಣ್ ತಿಳುಂಕ್ ಲಾಗ್ಲಿಂ.
"ಕ್ರೀಮ್ ಬಿಸ್ಕಿಟ್-ಗಿ?" ಐವನ್ ಕ್ಷುಲಕ್ಷ್ಪಣಿಂ ಮಣಾಲೊ. "ಸಿಮಾಂವ್ ಅಂಕಲ್ ಕೆದಾಳಾಯಿ ಹಾಡ್ನ್ ದಿತಾ. ಮಾಮ್ಮಿಕ್ ಮಾತ್ರ್ ಕ್ರೀಮ್ ಬಿಸ್ಕಿಟ್ ಮಳ್ಯಾರ್ ಭಾರಿ. ಸಿಮಾಂವ್ ಅಂಕಲಾನ್ ಮಾಮ್ಮಿಕ್ ಭಿತರ್ ಕುಡಾಕ್ ವ್ಹರ್ನ್ ಘುಟಾನ್ ಬಿಸ್ಕಿಟ್ ಖಾವಯ್ತಾನಾ ಹಾಂವೆ ಪಳೆಯ್ಲಾಂ!"
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
