ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ಎಕ್ ನದರ್: ’ಬೊಂಗೊ’ಗೀ ತುಳು ಭಾಶೆಚೊ ’ಮುಂಗೊ’? - ಚಿದಾನಂದ್, ಮಂಗ್ಳುರ್.
ದಿಸಾನ್ದೀಸ್ ಕೊಂಕ್ಣೆಚಿ ವ್ಹಾಡವಳ್ ಪಳಯ್ತಾನಾ ಭೋವ್ ವರ್ತೊ ಸಂತೊಸ್ ಜಾತಾ. ತಾಂತುಂಯೀ ಕೊಂಕ್ಣೆಕ್ ’ಇಸ್ಕೊಲಾಂನಿ’ ಘಾಲ್ನ್ ನಿಜಾಯ್ಕಿ ಫುಡಾರ್ ದಾಖಯ್ಲೊ ಆನಿ ಆಮ್ಚ್ಯಾ ತಸಲ್ಯಾಂಚೆಂ ಶೆಂಕಾರೆಂ ಫುಲಯ್ಲೆಂ ಮ್ಹಣ್ಯೆತ್.
ಪುಣ್, ನಾಟಕ್ ಕಲೆಚಿ ಪರಿಗತ್ ಪಳೆತಾನಾ ಗಳ್ಯಾಂತ್ ಆಡಾಂಬೊ ಶಿರ್ಕಾಲ್ಲ್ಯಾಪರಿಂ ಭೊಗ್ತಾ.
ಪಾಟ್ಲ್ಯಾ ದಿಸಾಂನಿ ಮ್ಹಾಕಾ "ತೊ ಮ್ಹಾಕಾ ನಾಕಾ" ನಾಟಕ್ ಪಳೆಯ್ತಾನಾ ಎಕ್ ಪ್ರಯತ್ನ್ ಝಳ್ಕಾಲೆಂ........ "ಮಂಗ್ಳುರ್ ಕೊಂಕಣ್ಸ್, ದುಬಾಯ್" ಹಾಂಕಾಂ ಆನಿ ಶ್ರೀ ಮನುಕ್ ಹಾಂವ್ ಮ್ಹಜ್ಯಾ ಮಾನಾಚೆಂ ಚೆಪೆಂ ಉಕಲ್ತಾಂ.
ದೆ. ರಮಾನಂದ್ ಚೂರ್ಯ ತಸೆಂ ದೆ. ಚಾ. ಫ್ರಾ. ದೆ’ಕೋಸ್ತಾನ್ ಕೊಂಕ್ಣಿ ನಾಟಕ್ ಕಲಾ ಬರ್ಯಾನ್ ಕೊಸುನ್ ಫಳಾಧಿಕ್ ತಸೆಂ ಭಳಾಧಿಕ್ ಕೆಲ್ಯಾ ತೆಂ ಹರ್ಧೆಂ ಬಡವ್ನ್ ಸಾಂಗ್ಯೆತ್.
ತಾಂಚೆ ಪಾಟ್ಲ್ಯಾನ್ ಶ್ರೀಎಡ್ಡಿ ಸಿಕೇರ್, ದೆ.ಮಿಕ್ಮೆಕ್ಸ್, ಶ್ರೀ ಶಾನ್ ಬೊಂದೆಲ್ ಆನಿ ಥೊಡೆ.
ಮಾನೆಸ್ತ್ ವಾಲ್ಟರ್ ಡಿ’ಸೋಜಾನ್ ನಿಜಾಯ್ಕಿ ಕೊಂಕ್ಣಿ ರಂಗ್ಮಂಚಾಕ್ ಜೀವ್ ದಿಲೊ.
ತಾಣೆಂ ದೆ.ಚಾ.ಫ್ರಾ. ಉಪ್ರಾಂತ್ ಕೊಂಕ್ಣೆಕ್ ಬರ್ಯಾ ನಿರ್ದೇಶಾಕಾಂಕ್ ದೀವ್ನ್ ವ್ಹಡ್ ಉಪ್ಕಾರ್ ಕೆಲೊ ತೆಂ ಭೋವ್ ಥೊಡೆ ಜಾಣಾಂತ್. ಆನಿ ತ್ಯಾ ವರ್ವಿಂ ಶ್ರೀ ಅರುಣ್ ರಾಜ್, ದೆ.ಜೊರ್ಜಿ ಪೀಂತ್, ಜೆರಿ, ಲ್ಯಾನ್ಸಿ, ಮ್ಯಾಕ್ಸಿ..... ಸಬಾರ್ ಉಬ್ಜಾಲೆ. (ಹಾಚಿ ಶಾಭಾಸ್ಕಿ ’ಮಾಂಡ್ ಸೊಭಾಣ್’ ಸಂಸ್ಥ್ಯಾಕ್ ಫಾವೊ ಜಾತಾ). ಅನುವಾದ್, ಅಧಾರಿತ್ ನಾಟಕಾಂ ಬರವ್ನ್ ಸಭಾರಾನಿ ಆಧುನಿಕ್ ಕೊಂಕ್ಣೆಕ್ ಗ್ರೇಸ್ತ್ ಕೆಲಾಂ. ಶ್ರೀ ಮ್ಯಾಕ್ಸಿಮ್ ಲುದ್ರಿಗ್, ರಿಚ್ಚಿ ಪಿರೇರ್, ರೊನಿ ಕ್ರಾಸ್ತಾ, ಸನ್ನಿ ಎ. ಡಿ ಸೋಜ್, ಲಾರೆನ್ಸ್ ಕಮಾನಿ...... ಇತ್ಯಾದಿ ಆಧುನಿಕ್ ನಾಟಕ್ ಕಲೆಕ್ ಎಕಾ ಮಟ್ಟಾರ್ ಹಾಡ್ಚೆಂ ಪ್ರಯಾತ್ನ್ ಕೆಲಾಂ. ಉರ್ಲ್ಲ್ಯಾಂನಿ ಆಪಾಪ್ಲೆಂ ಸಾಧನ್ ಕೆಲಾಂ.
ಆತಾಂ..... ’ಬೊಂಗೊ’ ವಿ.ಸಿ.ಡಿ. ನಾಟಕ್ ಪಳೆವ್ನ್ ಹಾಂವ್ ಶಿರಿಂ ಚುಕ್ಲ್ಲ್ಯಾ ಉಪ್ರಾಂತ್ ಕಾಂಯ್ ತರೀ ಮ್ಹಜೆಂ ಭಗಾಪ್ ಕೊಂಕ್ಣೆಚ್ಯಾ ಬರ್ಯಾಪಣಾಚ್ಯಾ ನದ್ರೆನ್ ಬರಂವ್ಕ್ ಮನ್ ಕೆಲೆಂ.
ಉಂಚ್ಲ್ಯಾ ಕಲಾಕರಾಂಚೆಂ, ತಾಲೆಂತಾಂಚೆಂ, ಸಮರ್ತೆಚೆಂ ಪ್ರದರ್ಶನ್ ಜಾಂವ್ಚೊ ಎಕ್ ಆವ್ಕಾಸ್ ಹೊಗ್ಡಾಯ್ಲ್ಯಾಪರಿಂ ಮ್ಹಾಕಾ ಭಗ್ಲೆಂ.
ಬರೊ ಫುಡಾರ್ ಆಸ್ಚ್ಯಾ ಪಂಗ್ಡಾಕ್ಯೀ ಬರ್ಯಾ ಮಾರ್ಗದರ್ಶನಾಚಿ ಗರ್ಜ್ ಆಸ್ತಾ.
ಮ್ಹಾಕಾಯೀ ಎಕ್ ಸ್ವಪಾಣ್ ಆಸಾ.... ಕೊಂಕ್ಣೆಂತ್ ಎಕ್ ಬರೊ ಹವ್ಯಾಸಿ ಪಂಗಡ್ ಆಸೊನ್ ತಾಣಿಂ ಸಂಸಾರ್ಭರ್ ಕೊಂಕ್ಣೆಚೊ ಭಾವ್ಟೊ ಘೆಂವ್ನ್ ಭಂವಾಜಯ್ ಮ್ಹಣೊನ್. ಕೊಂಕ್ಣಿ ಪದಾಂ ಆನಿ ಸಂಗೀತ್ ಭಂವ್ತಾ ತರ್ ಖಂಡಿತ್ ಕೊಂಕ್ಣಿ ಊಂಚ್ಲ್ಯಾ ನಾಟಕ್ ಪಂಗ್ಡಾಕ್ಯೀ ಭಿಲ್ಕುಲ್ ಆವ್ಕಾಸ್ ಆಸಾ. ಹಾಂವೆಂ ಕಾಫಿಕಾಡ್, ಪಡೀಲ್ ಆನಿ ಕೊಡಿಯಲ್ಬಯ್ಲ್ ಹಾಂಚೆ ನಾಟಕ್ ಪಳೆಯ್ಲ್ಯಾತ್ ಮಾತ್ರ್ ನ್ಹಯ್ ತಾಂಚೆಲಾಗಿಂ ಉಲವ್ನ್ಂಯೀ, ಮೆಳೊಂನ್ಯೀ ಜಾಣಾಂ.
ಆಜ್ ತುಳು ನಾಟಕ್ ಇತ್ಲ್ಯಾ ಊಂಚ್ ರಿತಿನ್ ಲೊಕಾಚ್ಯಾ ಜಿಬೆರ್ ಆಸ್ಲ್ಯಾರೀ ರಾಜ್ಯ್ ಮಟ್ಟಾಚ್ಯಾ ಹಂತಾಕ್ ಕಿತ್ಯಾಕ್ ಪಾವೊಂಕ್ ನಾಂ ಮ್ಹಳ್ಳ್ಯಾ ಸವಾಲಾಕ್ ಕೋಣ್ ಜಾಪ್ ದೀತ್ ತೆಂ ಹಾಂವ್ ನೆಣಾಂ.
ಆಸೊಂ.....
ತೀನ್ ಸಿ.ಡಿ.ಂತ್ ಬೊಂಗೊ ನಾಟಕ್ ತುಳು ನಾಟಕಾಚೆಂ ಬೆಕೂಫ್ಪಣ್ ಆಧಾರಿತ್, "ಅಸಲ್" ಮ್ಹಳ್ಳಿ ಖ್ಯಾತಿ ಘೆಂವ್ನ್ ಆಕರ್ಸುಂಕ್ ಪ್ರಯತ್ನ್ ಕೆಲಾಂ.
ನಿರ್ದೇಶಕ್ ಸಂಪೂರ್ಣ್ ಸಲ್ವಾಲಾಂ. ಉಲವ್ಣ್ಯಾಚಿ ರೀತ್, ಕುಡಿಚಿ ಭಾಸ್, ಜೀವಾಚಿ ಭಾಸ್, ಪ್ಲೇಸ್ಮೆಂಟ್, ಎಕಾಮೆಕಾ ಸಂಬಂದ್, ಪೋಝ್(ವಿರಾಮ್)...... ಇತ್ಯಾದಿ. ಹಾಸಂವ್ಚ್ಯಾಖಾತಿರ್ಚ್ ಸನ್ನಿವೇಶ್ ಫಕತ್ತ್ ಪ್ರೇಕ್ಷಕಾಂಕ್ ಮಾಂಕೊಡ್ ಕರ್ಚೆಂ ಪ್ರಯತ್ನ್ ಉಟೊನ್ ದಿಸ್ತಾ.
ಫಕತ್ತ್ "ಆಕ್ಟಿಂಗ್" ಕರ್ಚೆಂ ಪ್ರಯಾತ್ನ್ ಕೆಲಾಂ ಶಿವಾಯ್ "ಪರ್ಫೊಮೆಂನ್ಸ್" ಮ್ಹಳ್ಯಾರ್ ಕಿತೆಂ ನೆಣಾಂಗೀ ಮ್ಹಳ್ಳ್ಯಾಪರಿಂ ಭಗ್ತಾ.
ಸಾದ್ಯಾ ಪ್ರೇಕ್ಷಕಾಕ್ ಟಾಯ್ಮ್ ಪಾಸ್ ಜಾವ್ನ್ ರುಚ್ಲೊ ತರೀ ತೆಂ ಕೊಂಕ್ಣೆಚೆಂ ಭವಿಶ್ಯ್ ನ್ಹಯ್.
ನಾಟಕ್ ಬರೆಯ್ತಾಲ್ಯಾಂನಿ ಜಿಣ್ಯೆಂತ್ ಥೊಡೆ ಪಾವ್ಟಿಂ ಪುಣೀ ಬರೆ ನಾಟಕ್ ಪಳಂವ್ಚೆಂ ಪ್ರಯತ್ನ್ ಕರಿಜಾಯ್. ಶೇಕ್ಸ್ಪಿಯೆರಾಚೆ, ಬ್ರೇಕ್ಟ್ಚೆ, ಚೆಕೋವಾಚೆ.... ಸೊಡ್ಯಾಂ ಲಂಕೇಶಚೆ, ಕಾರಂತಾಚೆ, ಕಾರ್ನಾಡ್, ಅಕ್ಷರ, ಪ್ರಸನ್ನ, ಸಿಂಹಚೆ.... ತೆಂ ನಾಂ ತರ್ ನೀನಾಸಂ ತಿರುಗಾಟಾಚೆ, ಆಭಿವ್ಯಕ್ತಚೆ ನಾಟಕ್ ಪಳೆಯ್ಜಾಯ್.
ಹಾಸ್ಯ್ ನಾಟಕ್ ಒಟ್ರಾಶೆ ಹಾಸೊಂಕ್ ಪ್ರಯಾತ್ನ್ ಕೆಲ್ಲ್ಯಾವರ್ವಿಂ ಪ್ರೇಕ್ಷಕಾಂಚಿಂ ಮನಾಂ ಜಿಕ್ಚೆಂ ಪ್ರಯತ್ನ್ ಕರ್ಯೆತ್ ಶಿವಾಯ್ "ಕೊಂಕ್ಣೆನ್ ಬರೊ ನಾಟಕ್" ದಿಲ್ಲ್ಯಾಪರಿಂ ಜಾಯ್ನಾಂ.
ಆಮಿಂ ನಾಟಕ್ ಕಲೆಂತ್ ಪಾಟಿಂ ನಾಂವ್. ತುಳು ನಾಟಕಾಚ್ಯಾ ಮೆರೆರ್ ಚಲ್ಚಿ ಗರ್ಜ್ ನಾ. ತಾಂಚ್ಯ್ಯಾ ಕಲಾಕರಾಚ್ಯಾ ನಟನಾಚಿ "ಕೊಪಿ" ಕರ್ಚೆಂ ಆಮ್ಚೆಂ ಉಣೆಂಪಣ್. ನಿರ್ದೇಶಕನ್ ಜಾಯ್ ಪುರ್ತಿ ತರ್ಭೆತಿ ಘೆಂವ್ಚಿ ಗರ್ಜ್ ಜಾವ್ನಾಸಾ.
"ಬೊಂಗೊ" ನಾಟಕ್ ಕಲಾಕರಾಂಕ್ ಪಳೆಯ್ತಾನಾ...... ಆಮ್ಚ್ಯಾ ಲಾಗಿಂ ದೆಣ್ಯಾವಂತಾಚೆಂ ಭಂಡಾರ್ ಆಸಾ ತೆಂ ಸ್ವಷ್ಟ ಜಾತಾ. ತರೀ ಬರ್ಯಾ ನಿರ್ದೇಶಕಾಚೊ ಬರ್ಗಾಲ್ ಆಸಾ ತೆಂ ಖಂಡಿತ್ ರುಜು ಜಾತಾ. ನಾಟಕ್ ಬರಯ್ಣಾರಾನ್ ಆಪ್ಲಿ ನದರ್ "ತುಳು" ಭಾಯ್ರ್ ವಿಶೇಸ್ ರೀತಿನ್ ಘಾಲ್ಲ್ಯಾಪರಿಂ ದಿಸಾನಾ. ಬರೊ ನಟ್ ಸಭಾರ್ ಪಾವ್ಟಿಂ ಬರೊ ಬರವ್ಪಿ ಜಾಯ್ನಾ.
"ಬೊಂಗೊ" ನಾಟಕ್ ತುಳು ನಾಟಕಾಚೊ "ಮುಂಗೊ". ಆಮಿಂ ಪ್ರಗತಿ ಕರಿಜಾಯ್ಗೀ ವ ಆಸ್ಲ್ಲ್ಯಾ ಮಟ್ಟಾಚ್ಯಾಕೀ ಸಕ್ಲಾ ದೆಂವಾಜಾಯ್?
ಹೆಂ ಹಾಂವ್ ಶೆಳೆಂ ಉದಕ್ ವೊತ್ತಾಂ ವ ಖೊಡಿ ಕಡ್ತಾಂ ಮ್ಹಣ್ ಶಿಣ್ ಉಚಾರಿನಾಕಾತ್. ಆಮ್ಚ್ಯಾ ಆಭಿವೃದ್ದೆಕ್ ತಿಧ್ವಣ್ ಆನಿ ಬದ್ಲಾವಣ್ ಗರ್ಜೆಚಿ ಮ್ಹಣ್ ಮ್ಹಾಕಾ ಭಗ್ತಾ.
ಬರವ್ಪ್ಯಾಕ್ ಆನಿಕೀ ನಾಟಕ್ ಲಿಖ್ಣೆ ಜಾಣ್ವಾಯ್ ಗರ್ಜೆಚಿ ಜಾವ್ನಾಸಾ. ಉಂಚ್ಲ್ಯಾ ಮಟ್ಟಾಚೆ ನಾಟಕ್ ವಾಚ್ಲ್ಯಾರ್, ಪಳೆಯ್ಲ್ಯಾರ್ ಖಂಡಿತ್ ಎಕ್ ಕೊಂಕ್ಣೆಂತ್ ಎಕ್ ಫುಡಾರ್ ಆಸ್ಚೊ ನಾಟಕ್ ಬರಂವ್ವಿ ಜಾಂವ್ಚಿಂ ಲಕ್ಷಣಾಂ ದಿಸ್ತಾತ್.
ಆಜ್ ತುಳು ನಾಟಕ್ ಲೊಕಾ ಮೊಗಾಳ್ ಜಾಲ್ಯಾತ್ ಮ್ಹಣ್ ಆಮಿಂ ಖುಶಿ ಪಾವ್ತಾವ್ ತರೀ.... ದುಸ್ರ್ಯಾ ಭಾಸಾಂ ಬರಾಬರ್ ರಾಜ್ಯ್, ರಾಷ್ಟ್ ಆನಿ ಆಂತರಾಷ್ಟೀಯ್ ಮಟ್ಟಾಕ್ ರಾಂವ್ಚೆಂ ಲಕ್ಷಣ್ ಬಿಲ್ಕುಲ್ ಝಳ್ಕಾನಾ.
ಮಾತ್ರ್ ನ್ಹಯ್ ಹಾಸ್ಯ್ ನಾಟಕ್ ಫಕತ್ತ್ ಲೊಕಾಕ್ ಬರೆಂ ಕರ್ನ್ ಹಾಸಂವ್ಕ್ ಸೊಡ್ಲ್ಯಾರ್, ಭಾಶೆಚ್ಯಾ ಗ್ರೇಸ್ತ್ಕಾಯೆಕ್ ಉಪ್ಕಾರ್ಚೆಂ ಬಿಲ್ಕುಲ್ ನ್ಹಯ್. ತಿತ್ಲೆಂಚ್ ನ್ಹಯ್ ಖಂಚ್ಯಾಯ್ ಭಾಶೆಚ್ಯಾ ಸ್ಪರ್ದ್ಯಾಕ್ ಆರ್ಹತಾ ಆಸ್ಚೆಯೀ ನ್ಹಯ್. (ಹೊ ಆನ್ಭವ್ ರಾಷ್ಟ್ ಮಟ್ಟಾಚ್ಯಾ ನಾಟಕ್ ಸ್ಪರ್ದ್ಯಾಕ್ ಘೆಲ್ಲ್ಯಾ ವೆಳಾ ಮ್ಹಾಕಾ ಜಾಲಾ.)
ಆಮ್ಕಾ ಜಾಯ್ ಗಂಭೀರ್ ವಿಶೆಯಾಂಚೆರ್ಯ್, ಗಂಭೀರ್ ರೀತಿನ್ ಹಾಸಂವ್ಚೆ ಮೆಲೊ ಡ್ರಾಮಾ. (ದೆ.ಚಾ.ಫ್ರಾ, ಚೂರ್ಯಾ, ಶ್ರಿ ವಾಲ್ಟರಾಪರಿಂ) ಆಮಿಂ ಕೆದ್ನಾಂ ಬರ್ಯಾ ನಾಟಕಾಂ ಬಾಬ್ತಿಂ ಆಟೊವ್ ಕರ್ತೆಲ್ಯಾಂವ್??? ಫಕತ್ ಹ್ಯಾಚ್ ರಿತಿನ್ ತುಮಿಂ ಕರ್ಚೆಂ ಸಾರ್ಕೆಂ ಮ್ಹಣ್ ಚಿಂತಾತ್ ತರ್ ಮ್ಹಜೊ ಆಕ್ಷೇಪ್ ನಾಂ. ಪುಣ್ ಹಾಂವೆಂ ದಾಂಟ್ಟಾಲ್ಲ್ಯಾ ಫಾತ್ರಾಕ್ ತುಮಿಂಯೀ ದಾಂಟ್ಟೊನ್ ಪಡೊಂಕ್ ನ್ಹಜೊ ಮ್ಹಳ್ಳಿ ಮ್ಹಜಿ ಆಶಾ.
"ಅಸಲ್" ಕಲಾಕರಾಂನಿ ಗಂಭೀರ್ ರೀತಿನ್ ಚಿಂತ್ಚಿ ಗರ್ಜ್ ಆಸಾ. ಕುಚುಲ್ಯೊ ಕರ್ನ್ ಚಡ್ ವೇಳ್ ಹಾಸಂವ್ಕ್ ಜಾಯ್ನಾ. ಬದ್ಲಾಕ್ ಚಿಂತುನ್, ಚಿಂತುನ್ ಆಪ್ಲ್ಯಾಸ್ತಕಿಂ ನಾಟಕ್ ಸಂಪ್ಲ್ಯಾ ಉಪ್ರಾಂತ್ಯೀ ಹಾಸ್ಚ್ಯಾಪರಿಂ ಜಾಯ್ಜಾಯ್.
ಮ್ಹಜೊ ಆಶಾವಾದ್ ಖುಶಿ ಜಾಲೊ ಜೆದ್ನಾಂ "ಮಾಂಡ್ ಸೊಭಾಣ್" ಸಂಸ್ಥ್ಯಾ ದ್ವಾರಿಂ ಉಭ್ಜಾಲ್ಲ್ಯಾ "ಕಲಾಕುಲ್" ಪಂಗ್ಡಾಕ್ ಪಳವ್ನ್ ಆನಿ ಮೆಳೊನ್. ಸಗ್ಳ್ಯಾ ಕೊಂಕ್ಣಿ ಮುಳಾಚಿಂ ತರ್ನಿ, ತರ್ನಿಂ ಭುರ್ಗಿಂ.... ಖಂಡಿತ್ ಮ್ಹಜೆಂ ಸ್ವಪಾಣ್ ಜ್ಯಾರಿ ಕರ್ತೆಲಿಂ ಮ್ಹಳ್ಳೊ ಮ್ಹಜೊ ಆಶಾವಾದ್.
"ಕೊಂಕ್ಣೆಚೊ ಫುಡಾರ್" ಜಾವ್ನಾ ಆಸ್ಚ್ಯಾ ಹ್ಯಾ ಪಂಗ್ಡಾಕ್ ಹಾಂವ್ ಸರ್ವ್ ಜಯ್ತಾ ಮಾಗ್ತಾಂ.
ದಯಾಕರ್ನ್ ಎಕ್ ಪಾವ್ಟಿಂ ಭೋವ್ ತರ್ನ್ಯಾ ಕೊಂಕ್ಣಿ ಕಲಾಕರಾಕ್ ಪಳೊಂವ್ನ್ ಸಕ್ಡಾಂನಿ ಸಂತೊಸ್ ಪಾಂವ್ಚೊ.
ಚಿದಾನಂದ್, ಮಂಗ್ಳುರ್.
(ವಿ.ಸೂ. ಹೆಂ ವಾಚುನ್ ತರಿ ಚಡ್ ಆನಿ ಚಡ್ ಜಣ್ ವಿ.ಸಿ.ಡಿ. ಘೆವ್ನ್ ಪಳೆಯಾ.)
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
