ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ಏಕ್
ಜಿವಿತ್ ತುಕಾ ಆಪಯ್ತಾ
ಆವಸ್ವರ್ ಸ: ಆಲಿಯಾ
ಆಲಿಯಾ ಏರ್ ಹೊಸ್ಟೆಸ್ ಜಾಲ್ಯಾ ಉಪ್ರಾಂತ್ತಾಚ್ಯಾ ಜಿವಿತಾಚಿ ರೀತ್ಚ್ ಬದ್ಲಾಲಿ. ಆತಾಂ ತಾಕಾ ಪಯ್ಲೆಂಚಾ ತಿತ್ಲೆಂ ಚಿಂತುಂಕ್ ವೇಳ್ ನಾತ್ಲ್ಲೊ. ದಿಸಾಂದೀಸ್ ಆತ್ತಾಂ ಥಂಯ್ ಆತ್ತಾಂ ಹಾಂಗಾ ಮ್ಹಣೊನ್ ಪ್ಲೈಟಾರ್ ಇಂಡಿಯಾಚಾ ಸಭಾರ್ ಏರ್ ಪೋರ್ಟಾಂಕ್ ತಾಣೆಂ ಪಳೆಲೆಂ. ಸಭಾರ್ ನಮುನ್ಯಾಚಾ ಲೊಕಾಂ ಸಾಂಗಾತಾ ಮೆಳೊನ್ ಇಂಡಿಯಾ ಮ್ಹಳ್ಯಾರ್ ಕಿತೆಂ ಮ್ಹಣೊನ್ ಜಿವಿತಾಂತ್ ಆಪ್ಲ್ಯಾ ಶಿಕ್ಪಾನ್ ಶಿಕಯಿಲ್ಲ್ಯಾಚಾಕ್ಯ್ ಚಡಿತ್ ಮಾಫಾನ್ ಖಾಸ್ಗಿ ಥರಾನ್ ವಳ್ಕೊಂಕ್ ತೆಂ ಪಾವ್ಲೆಂ.
ಪಡ್ಲಾ, ಮುಡ್ಲಾ, ತೆನ್ಕಾ, ಬಡ್ಗಾ...., ಖಂಯ್ಚಾಯ್ ಕುಶಿಂನ್ ಗೆಲ್ಯಾರ್ಯ್ ಇಂಡಿಯಾಚಿ ಸೊಭಾಯ್ ಜಾಂವ್ ಯಾ ಹ್ಯಾ ಇಂಡಿಯಾಂತ್ ಜಿಯೆಂವ್ಚಾ ಲೊಕಾಚಿ ರೀತ್ ರಿವಾಜ್ ಜಾಂವ್ ಎಕಾ ಥಾವ್ನ್ ದುಸ್ರ್ಯಾಕ್ ತಾಳ್ ಪಡಾನಾತ್ಲ್ಲಿ.
ದೇಶ್ ಕಸೊಯ್ ಜಾಲೊ....! ಪುಣ್ ಎಕಾಚ್ ರಾಜ್ಯಾಚಾ ಭಿತರ್ಯ್ ಎಕೇಕಾ ಪ್ರಾಂತ್ಯಾಂತ್ ಜಿಯೆಂವ್ಚೊ ಲೋಕ್ ಎಕೇಕಾ ನಮುನ್ಯಾಚಾ ಆಚಾರ್ ವಿಚಾರಾಂತ್ ಜಿಯೆತಾಲೊ.
ಆಲಿಯಾ ಏರ್ ಹೊಸ್ಟೆಸ್ ಜಾಲ್ಲ್ಯಾ ಪಯ್ಲ್ಯಾ ಪಯ್ಲ್ಯಾ ದಿಸಾಂನಿ, ಸಾರಾನ್ ಆನಿ ಶಬೀರಾನ್ ತಾಂಚಾ ಧುವೆ ವಯ್ರ್ ಥೊಡಿ ಬೆಜಾರಾಯ್ ಖಂಡಿತ್ ದಾಖಯ್ಲಿ ಜಾಲ್ಯಾರ್ಯ್ ದೀಸ್ ವೆತಾಂ ವೆತಾಂ ತಾಂಕಾಂ ತೆಂ ಸದಾಂಚೆಂ ಜಾಲೆಂ. ಎಕ್ಲ್ಯಾ ದೊಗಾಂನಿ ಆಲಿಯಾಚಾ ಅಚಾನಕ್ ಏರ್ ಹೊಸ್ಟೆಸ್ ಜಾಲ್ಲ್ಯಾ ನಿರ್ಧಾರಾ ವಿಶಿಂ ಸವಾಲಾಂ ಉಡಯ್ಲಿಂ ತರ್ಯ್ ಕೊಣೆಂಯ್ ವಿರೋಧ್ ಉಲಂವ್ಚೆಂ ಧಯ್ರ್ ಘೆತ್ಲೆಂ ನಾ.
ಹಪ್ತ್ಯಾಕ್ ಏಕ್ ದೀಸ್ ಆಲಿಯಾ ಮಂಗ್ಳಾರಾಚೆಂ ಘರಾ ಆಸ್ತಾಲೆಂ. ಹೊ ತಾಚ್ಯಾ ಸುಟಿಯೆಚೊ ದೀಸ್. ತಶೆಂ ಹಪ್ತ್ಯಾಕ್ ಏಕ್ ಪಾವ್ಟಿಂ ತಾಂಚಿ ಡ್ಯೂಟಿ ಬದ್ಲಿ ಜಾತಾಲಿ. ಏರ್ ವೇಸಾಂತ್ ಆಲಿಯಾ ಆತಾಂ ಸಭಾರಾಂಕ್ ವಳ್ಕಾತಾಲೆಂ. ತಾಚ್ಯೆಪರಿಂ ಸಭಾರ್ ಚಲಿಯೊ ಆನಿ ಚಲೆ ತಾಣೆಂ ಕಾಮ್ ಕರ್ಚ್ಯಾ ವೆಸ್ಟ್ ಲೈನ್ ಏರ್ ವೇಸಾಂತ್ ದಿಸ್ಪೊಡ್ತೊ ಗ್ರಾಸ್ ಜೊಡ್ತಾಲಿಂ.
ಆಲಿಯಾಕ್ ದಿಸ್ಪೊಡ್ತ್ಯಾ ಗ್ರಾಸಾಚಿ ಕಾಂಯ್ ಪರ್ವಾ ನಾತ್ಲೆಲಿ. ಹ್ಯಾ ಖಾತಿರ್ಚ್ ತಾಣೆಂ ಏರ್ವೇಸಾಂತ್ ಸೆರ್ವೊಂಚಿ ಆಶಾ ದಾಖಯಿಲ್ಲಿಯ್ ನ್ಹಯ್. ತಾಚ್ಯಾ ಮತಿಂತ್ ಆಯಿಲ್ಲ್ಯಾ ಮೊಳಾಬಾರ್ ಉಭೊಂಕ್ ಆಶೆಂವ್ಚ್ಯಾ ಪಿಶ್ಯಾ ಆಶೆಕ್, ಆಶೆಲ್ಲ್ಯಾ ಆಲಿಯಾನ್ ಸುಫಳ್ ಕೆಲ್ಲೆಂ. ತಿತ್ಲೆಂಚ್!
ಮನ್ಶಾ ಮತ್ಯ್ ಏಕ್ ಖಾಲಿ ಕಾಗ್ದಾ ಪಾನಾ ಪರಿಂ! ಹಾಂತುಂ ಕಿತ್ಲೊಯ್ ರಂಗ್ ಭರ್ಲ್ಯಾರ್ಯ್ ತಿ ರಂಗೀನ್ ಜಾಯ್ನಾ! ಆಪ್ಲ್ಯಾ ಗರ್ಬಾಂತ್ ಭರ್ಲೆಲ್ಯಾ ರಂಗಾಂ ಥಾವ್ನ್ ತಿ ಸ್ಪೂರ್ತಿ ಜೊಡುನ್ ಆಪ್ಲ್ಯಾ ದೊಳ್ಯಾಂ ದಿಶ್ಟೆಂತ್ ರಂಗ್ರಂಗೀನ್ ಪಿಂತುರಾಂ ಮಾತ್ರ್ ದಾಖಯ್ತಾ ಶಿವಾಯ್ ತಿಂ ಪಿಂತುರಾಂ ಮಾಜ್ವಾತಾನಾ ಪರ್ತ್ಯಾಕ್ ತಿ ಮತ್ ತಶಿಚ್ಚ್ ಪಯ್ಲೆಂಚಾ ಪರಿಂ ತೆಂ ಧವೆಂ ಕಾಲಿ ಕಾಗ್ದಾ ಪಾನ್ ಜಾವ್ನ್ ಉರ್ತಾ!
ಆಲಿಯಾನ್ಯ್ ಆಪ್ಲ್ಯಾ ಮತಿಂತ್ಲ್ಯಾ ಪಿಂತುರಾಂ ಮಧೆಂ ರಂಗ್ ಭರ್ಲ್ಲೊ. ಪುಣ್ ತಾಚಿ ಮತ್ ರಂಗೀನ್ ಜಾಂವ್ಕ್ ನಾತ್ಲ್ಲಿ. ಕಾರಾಣ್, ತಾಣೆಂ ಆಪ್ಲ್ಯಾ ಜಿವಿತಾಂತ್ ಆಸಲೆ ಜಿವಿತಾಚೆ ರಂಗ್ ಪಳೆಲ್ಲೆ ಜ್ಯಾ ಜಿವಿತಾಚ್ಯಾ ರಂಗಾಂಕ್ ಕೊಣ್ಚ್ ಪಳಂವ್ಕ್ ವಚಾನಾ ತಸಲೆ! ಸರ್ವಾಂನಿ ಸಾಂಡುಂಕ್ ಆಶೆಂವ್ಚ್ಯಾ ರಂಗಾಂಕ್ ಆಲಿಯಾನ್ ಪಳಂವ್ಚೆಂ ಪ್ರಯತ್ನ್ ಕೆಲ್ಲೆಂ. ಹ್ಯಾಚ್ ಖಾತಿರ್ ಆಲಿಯಾ ಹ್ಯಾ ಸಂಸಾರಾನ್ ಜಿಯೆಂವ್ಕ್ ಆಶೆಂವ್ಚ್ಯಾ ರಂಗೀನ್ ಸಂಸಾರಾ ಥಾವ್ನ್ ಭಾಯ್ರ್ ಉರ್ಲೆಂ. ಹ್ಯಾ ರಂಗಾಂ ಪಾಟ್ಲ್ಯಾ ಜಿವಿತಾಕ್, ಆಲಿಯಾನ್ ಆಪ್ಣಾ ಭೊಂವಾರಿ, ಆಪ್ಲ್ಯಾಚ್ ಸಮಾಜೆಂತ್ ರೂಪ್ ರೂಪ್ ಪಳೆಲ್ಲೆಂ. ಅಸಲೆಂ ಆಲಿಯಾ, ಹ್ಯಾ ಸಮಾಜೆನ್ ಜಿಯೆಂವ್ಚ್ಯಾ ಆಂದ್ಕಾರಾಂತ್ಲ್ಯಾ ಜಿವಿತಾಕ್ ಕಶೆಂ ಸ್ವೀಕಾರ್ ಕರ್ತೆಲೆಂ? ತಾಕಾ ಹ್ಯಾ ಸಮಾಜೆ ವಯ್ರ್ ತಾತ್ಸಾರ್ ಆಸ್ಲ್ಲೊ. ಹ್ಯಾ ಸಮಾಜೆಚಾ ಕುತಂತ್ರಿಪಣಾ ವಯ್ರ್ ತಾಚ್ಯಾ ಮತಿಂತ್ ತೂಫಾನ್ ಆಸ್ಲ್ಲೆಂ. ಹ್ಯಾಚ್ ಖಾತಿರ್ ಆಲಿಯಾ ಅಜೂನ್ಯ್ ತೆಂಚ್ ಖಾಲಿ ಕಾಗ್ದಾ ಪಾನಾ ಸಾರ್ಕೆಂ ಜಾವ್ನ್ ಉರ್ಲೆಲೆಂ. ತಾಚ್ಯಾ ಮತಿಕ್ ಆನಿ ಆಶೆಕ್ ತಾಣೆಂ ಜಿಯೆಂವ್ಚ್ಯಾ ಹ್ಯಾ ಸಮಾಜೆಕ್ ಜಾಯ್ ಜಾಲ್ಲ್ಯಾಪರಿಂ ತಾಣೆಂ ಬದ್ಲಿಲಿ ನಾ.
ಜಶೆಂ ತಾಚ್ಯಾ ಮತಿಚಿ ಆನಿ ಆಶೆಚಿ ಬದ್ಲಾವಣ್ ಜಾಂವ್ಕ್ ನಾತ್ಲೆಲಿ ತಶೆಂ ತಾಚ್ಯಾ ವಿಚಾರಾಂನಿ ಬದ್ಲಾವಣ್ ಜಾಲಿ ನಾ. ತಾಚ್ಯಾ ವಿಚಾರಾಂನಿ ತೆಂ ಹ್ಯಾ ಸಮಾಜೆಂತ್ಲ್ಯಾ ಆಡಂಬರಾಕ್ ಆನಿ ತಾಚ್ಯಾ ಬಾಸ್ಕಳ್ಪಣಾಕ್ ಕಾಂಟಾಳೊಂಕ್ ಲಾಗ್ಲೆಂ. ತ್ಯಾ ಭಾಯ್ರ್ ಜಲ್ಮಾನ್ ಏಕ್ ಚಲಿ ಜಾವ್ನ್ ಜಲ್ಮೊನ್ ಯೇವ್ನ್ ಹ್ಯಾ ಸಮಾಜೆಂತ್ ಆಡ್ಚೊಂಚಾ ದುಸ್ರ್ಯಾ ಚಲಿಯೆಚಾ ಆಡ್ಚೊಣೆಕ್ ಸ್ಪಂದನ್ ಕರುಂಕ್ ಸಕಾನಾತ್ಲೆಲ್ಯಾ ಚಲಿಯೆ ಜಾತಿ ವಯ್ರ್ ತಾಕಾ ಚಡ್ಚ್ ಕಾಂಟಾಳೊ ಆಯ್ಲೊ. ಹ್ಯಾಚ್ ಖಾತಿರ್ ಆಲಿಯಾಕ್ ತಾಣೆಂ ಕಾಮ್ ಕರ್ಚ್ಯಾ ಏರ್ವೇಸಾಂತ್ ಜಾಲ್ಯಾರ್ಯ್ ತಾಕಾ ವಳ್ಕೊಂಚಿಂ ಸಭಾರ್ ಆಯ್ಲಿಂ ತರ್ಯ್ ಆಲಿಯಾಚ್ಯಾ ಜಿವಿತಾಂತ್ ಕೊಣ್ಯ್ ತಾಚಿಂ ಜಾವ್ನ್ ಚಿಡ್ಕೊನ್ ರಾವ್ಲಿಂ ನಾಂತ್. ಆಲಿಯಾಚಿ ಸಳಾವಳ್ ಕರ್ತಾನಾಂಚ್ ತಾಚ್ಯಾ ಸ್ವಭಾವಾಚೆಂ ದರ್ಶನ್ ಜಾಲ್ಲಿಂ ದುಸ್ರೆ ಪಾವ್ಟಿಂ ಖುದ್ದ್ ಜಾವ್ನ್ ತಾಚ್ಯೆ ಥಾವ್ನ್ ಪಯ್ಸ್ ರಾವ್ತಾಲಿಂ.
ಅಭಿಲಾಷ ಪಯ್ಲೆಂ ಪಯ್ಲೆಂ ಆಲಿಯಾಚಾ ಮಸ್ತ್ ಲಾಗಿಂ ಆಸ್ಲ್ಲೆಂ. ಆಲಿಯಾನ್ ಆಪ್ಲೆ ವಿಚಾರ್ಚ್ ಸಾರ್ಕೆ ಮ್ಹಣೊನ್ ಚಿಂತ್ಚ್ಯಾ ಆನಿ ’ಅಪುಣ್ಚ್’ ಮ್ಹಳ್ಳ್ಯಾ ಸ್ವಭಾವಾ ಥಾವ್ನ್ ತೆಂ ಥಕೊನ್ ತಾಚ್ಯೆ ಥಾವ್ನ್ ಪಯ್ಸ್ ಗೆಲ್ಲೆಂ.
ಖಂಯ್ಚರ್ ಮನಿಸ್ ಆಪುಣ್ಚ್ ಸಾರ್ಕೊ ಆನಿ ಆಪ್ಣಾಚೆಂಚ್ ಸಾರ್ಕೆಂ ಮ್ಹಣೊನ್ ಚಿಂತಾ ತೆದ್ನಾಂ ಹ್ಯಾ ಸಮಾಜೆಂತ್ಲೊ ಮನಿಸ್ ತಶೆಂ ಚಿಂತ್ಚ್ಯಾ ಮನ್ಶ್ಯಾಕ್ ಎಕ್ಸುರೊ ಕರುನ್ ಆಪ್ಲ್ಯಾಚ್ ಸಮಾಜೆಂತ್ ತಾಕಾ ಮನ್ಜಾತಿ ಪರಿಂ ಪಯ್ಸ್ ದವರ್ತಾ. ಆಲಿಯಾನ್ ಆಪ್ಣಾಚಾ ವಿಚಾರಾಂಕ್ಚ್ ಸಾರ್ಕೆಂ ಮ್ಹಣೊನ್ ಮಾಂದುನ್ ಘೆಂವ್ಚಾಕ್ ಭಳಾಧೀಕ್ ಕಾರಾಣ್ ಆಸ್ಲ್ಲೆಂ. ಜಿವ್ಯೊ ಜಿವ್ಯೊ ಸಾಕ್ಶಿ ತಾಚ್ಯಾ ದೊಳ್ಯಾಂ ಮುಕಾರ್ ಹಾಜರ್ ಆಸ್ಲ್ಲ್ಯೊ. ದಿಸ್ಪೊಡ್ತಿಂ ಘಡಿತಾಂ ತಾಚ್ಯಾ ಮುಕಾರ್ ಉಭಿಂ ಜಾತಾಲಿಂ. ಪುಣ್ ಹ್ಯಾ ಸಮಾಜೆಕ್? ಮನ್ಶ್ಯಾನ್ ಆಪ್ಣಾ ಖಾತಿರ್ ರಚ್ಲೆಲ್ಯಾ ಹ್ಯಾ ಸಮಾಜೆಕ್, ತಾಣೆಂ ರಚ್ಲಲೊ ಉದ್ದೇಶ್ಚ್ ದುಸ್ರೊ!
ಸಮಾಜ್ ಮ್ಹಳ್ಳಿ ತಿ ಫಕತ್ತ್ ಮನ್ಶ್ಯಾ ಜಾತಿಕ್ ಮಾತ್ರ್ ಲಾಗು ಜಾತಾ. ಕಿತ್ಯಾಕ್ ಮ್ಹಳ್ಯಾರ್ ಮನಿಸ್ ತಾಚ್ಯಾ ಜಲ್ಮಾನ್ ಸರ್ವ್ ಮನ್ಜಾತಿಂ ಪ್ರಾಸ್ ಚಡ್ ಭಳಾಧೀಕ್ ಆನಿ ಚಡ್ ಆಪಾಯ್ಕಾರಿ ಮನ್ಜಾತ್! ಹ್ಯಾಚ್ ಖಾತಿರ್ ತಾಣೆಂ ಆಪ್ಲ್ಯಾ ಬುದ್ವಂತ್ಕಾಯೆನ್ ಆಪ್ಣಾಕ್ ಜಿಯೆಂವ್ಕ್ ಜಾಯ್ ಮ್ಹಳ್ಳ್ಯಾ ಖಾತಿರ್ ಹಿ ಸಮಾಜ್ ರಚ್ಲ್ಯಾ! ಆಪ್ಣೆಂ ಜಿಯೆಂವ್ಕ್ ಜಾಯ್ ಮ್ಹಳ್ಳ್ಯಾ ಎಕಾಚ್ಚ್ ಉದ್ದೇಶಾನ್ ಮನಿಸ್ ಹಾಂಗಾ ಲ್ಹಾನಾಂ ಸಾಂಗಾತಾ ಲ್ಹಾನ್ ಆನಿ ವ್ಹಡಾಂ ಸಾಂಗಾತಾ ವ್ಹಡ್ ಜಾವ್ನ್ ಜಿಯೆತಾ. ಆಶೆಂ ಜಿಯೆಲ್ಲೊ ಮಾತ್ರ್ ಸಮಾಜೆಚ್ಯಾ ಖಂಯ್ಚಾಯ್ ಪಾಂವ್ಡ್ಯಾರ್ ಆಪ್ಲೆಂ ಆಸ್ಥಿತ್ವ್ ದಾಖಂವ್ಕ್ ಸಕ್ತಾ! ಆಶೆಂ ಜಿಯೆಂವ್ಕ್ ಸಕಾನಾತ್ಲಲೊ ಆಪ್ಲ್ಯಾಚ್ ಆಸ್ಥಿತ್ವಾಂತ್ ಆಪುಣ್ ಕಯ್ದ್ ಜಾತಾ ಆನಿ ಹ್ಯಾಚ್ ಸಮಾಜೆಂತ್ಲಿ ಅತ್ಯಂತ್ ಭಯಾನಕ್ ಮನ್ಜಾತ್ ಜಾವ್ನ್ ಹ್ಯಾ ಸಮಾಜೆ ಥಾವ್ನ್ ಭಾಯ್ರ್ ಉರ್ತಾ. ಆಶೆಂ ಸಮಾಜೆ ಥಾವ್ನ್ ಭಾಯ್ರ್ ಉರ್ತಾನಾ ಆಪ್ಲ್ಯಾ ಆಸ್ಥಿತ್ವಾಕ್ ರುಜು ಕರ್ಚಾ ಖಾತಿರ್ ತೊ ಆಪ್ಲ್ಯಾ ಜಿಣಿಯೆಂತ್, ಸಮಾಜೆಂತ್ ಯೋಗ್ಯ್ ಜಾಲ್ಲಿಂ ವಿವಿಧ್ ರೂಪಾಚಿಂ ಹಾತೆರಾಂ ಉಪಯೋಗ್ಸಿತಾ ಆನಿ ಆಪುಣ್ಯ್ ಹ್ಯಾ ಸಮಾಜೆಂತ್ಲೊ ಮ್ಹಣೊನ್ ದಾಖಂವ್ಕ್ ಪೆಚಾಡ್ತಾ ಶಿವಾಯ್ ಸಮಾಜ್ ತಾಕಾ ಆಪ್ಲ್ಯಾ ಮಧ್ಲೊ ಮ್ಹಣೊನ್ ಉಗ್ತ್ಯಾನ್ ಪಾಚಾರ್ನಾ!
ಆಶೆಂಚ್ ಆಲಿಯಾ ಥಂಯ್ ಘಡ್ಲೆಂ. ತೆಂ ಖಂಯ್ಚಾ ಸಮಾಜೆ ಖಾತಿರ್ ಝುಜ್ತಾಲೆಂ ತ್ಯಾಚ್ ಚಲಿಯೆ ಸಮಾಜೆನ್ ಆಲಿಯಾನ್ ಸ್ವೀಕಾರ್ ಕೆಲೆಂ ನಾ. ಆಶೆಂ ಮ್ಹಣೊನ್ ಆಲಿಯಾ ಸಲ್ವೊಣೆಕ್ ಮಾಂದುನ್ ಘೆವ್ನ್ ಕೊನ್ಶ್ಯಾಕ್ ಬಸೊನ್ ರಡ್ಚ್ಯಾ ಚಲಿಯೆ ಜಾತಿಚ್ಯಾ ಸ್ವಭಾವಾಚೆಂ ಭಿಲ್ಕುಲ್ ನ್ಹಯ್ ಆಸ್ಲ್ಲೆಂ.
ಅಭಿಲಾಷ, ಆಲಿಯಾಚಾ ವಿಶಿಂ, ತಾಚ್ಯಾ ಗೂಣಾಂ ವಿಶಿಂ ಜಾಣಾಂ ಜಾತಾನಾ, ತೆಂ ಮೌನ್ಪಣಿಂ ಆಲಿಯಾಕ್ ಎಕ್ಸುರೆಂ ಸೊಡುನ್ ದುಸ್ರ್ಯಾ ವಾಟೆಕ್ ಪರ್ತಾಲ್ಲೆಂ. ಆಶೆಂ ಜಾಲ್ಲ್ಯಾನ್ ತಾಣೆಂ ಡ್ಯೂಟಿ ಕರ್ಚಾ ಪ್ಲೈಟಾರ್, ಡ್ಯೂಟೆಚಾ ವೆಳಾರ್ ಮಾತ್ರ್ ತಾಚಿಂ ಸಾಂಗಾತಿ ಸಾಂಗಾತಿಣಿಂ ಆಲಿಯಾಕ್ ಸಾಂಗಾತ್ ದಿತಾಲಿಂ ಸೊಡ್ಲ್ಯಾರ್, ಪ್ಲೈಟಾರ್ ಥಾವ್ನ್ ತಿಂ ದೆಂವ್ಲ್ಯಾ ಉಪ್ರಾಂತ್, ಆಲಿಯಾಚಾ ಖಬ್ರೆಕ್ ಪಾಸೊನ್ ಕೊಣ್ಯ್ ವಚಾನಾತ್ಲ್ಲೆಂ. ಆಲಿಯಾಕ್ ತರ್ಯ್ ಹೆಂ ಕಾಂಯ್ ತಾಚೆಂ ಉಣೆಂಪಣ್ ಮ್ಹಣೊನ್ ತಾಕಾ ಭೊಗಾನಾತ್ಲ್ಲೆಂ. ಕಿತ್ಯಾಕ್ ಮ್ಹಳ್ಯಾರ್, ಆಲಿಯಾಕ್ ಫಾಲ್ಯಾಂ ಸಾಕಾಳಾರ್ ಉದೆಂವ್ಚಾ ಸುರ್ಯಾಚಿ ಭಿರಾಂತ್ ನಾತ್ಲ್ಲಿ. ತಾಕಾ ಹೆಂ ನ್ಹಯ್ ಜಾಲ್ಯಾರ್ ದುಸ್ರೆಂ ಕಿತೆಂಯ್ ಆಸ್ಲ್ಲೆಂ. ಆಪ್ಣೆ ಏಕ್ ಉತಾರ್ ಸಾಂಗ್ಲ್ಯಾರ್ ತಾಚ್ಯೆ ಖಾತಿರ್ ತಾಚೊ ಬಾಪಯ್ ಕಿತೆಂಯ್ ಕರುಂಕ್ ಸಕ್ತಾ ಮ್ಹಣೊನ್ ಆಲಿಯಾ ಜಾಣಾಂ. ಹ್ಯಾ ಖಾತಿರ್ ತಾಕಾ ಕೊಣಾಚಿಯ್ ಪರ್ವಾ ಜಾಂವ್ ಫಿಕಿರ್ ಜಾಂವ್ ನಾತ್ಲ್ಲಿ. ಪುಣ್ ತಾಚ್ಯಾ ಪ್ಲೈಟಾಚಾ ಸಾಂಗಾತಿಣಿಂಕ್ ತಶೆಂ ನ್ಹಯ್. ತಾಂಕಾ ಜಿವಿತಾಂತ್ ಫಾಲೆಂ ಮ್ಹಳ್ಳೆಂ ತೆಂ ರಾಕ್ಸಾ ಖಾಸ್ತಾಚೆಂ ರೂಪ್ ಘೆವ್ನ್ ತಾಂಚಾ ಮಾತ್ಯಾರ್ ಬಸ್ಲೆಲೆಂ ಆಸ್ಲ್ಲೆಂ.
ಆಲಿಯಾ ಏರ್ಹೊಸ್ಟೆಸ್ ಜಾಲ್ಲಿ ಖಬಾರ್ ನಾಸಿರಾಕ್ ಯಾ ತಾಚ್ಯಾ ಘರ್ಚಾಂಕ್ ಕಳಾನಾಸ್ತಾನಾ ಘೆಲಿ ನಾ. ನಾಸಿರಾಚಾ ಆವಯ್ನ್ ಪಯ್ಲೊ ಆಕ್ಷೇಪ್ ಕಾಡ್ಲೊ ತರ್ಯ್ ಸುಲೇಮಾನಾನ್ ತಿಕಾ ಸಮ್ಜಾಯ್ತಾನಾ ತಿಣೆ ವೊಗೆಂ ರಾಂವ್ಚೆಂ ಪಡ್ಲೆಂ.
"ಪಳೆ ಬೀಬೀ.... ನಿಖಾ ಜಾಂವ್ಚಾ ಪಯ್ಲೆಂ ತಿ ಆಲಿಯಾ ಆನಿ ತಾಚ್ಯಾ ಘರ್ಚಾಂಚಿ ಜವಾಬ್ದಾರಿ. ಆಮಿಂ ಆತಾಂ ಆಕ್ಷೇಪ್ ಕಾಡುಂಕ್ ಜಾಯ್ನಾಂ. ಆಶೆಂ ಕರ್ಚೆಂ ಬರೆಂ ನ್ಹಯ್. ತಾಚೆಂ ನಿಖಾ ಜಾವ್ನ್ ತೆಂ ಆಮ್ಚ್ಯಾ ನಾಸಿರಾ ಸಂಗಿಂ ಆಯ್ಲ್ಯಾ ಉಪ್ರಾಂತ್ ಹ್ಯಾ ಘರಾಂತ್ ಕಶೆಂ ಚಲೊಂಕ್ ಜಾಯ್ ತಶೆಂ ತೆಂ ಚಲ್ತೆಲೆಂ!" ಸುಲೇಮಾನಾನ್ ಉಚಾಂಬಳ್ ಜಾಲ್ಲ್ಯಾ ಆಪ್ಲ್ಯಾ ಬಾಯ್ಲೆಕ್ ಸಮ್ಜಾಯ್ಲೆಂ.
"ಪುಣ್ ಆಲಿಯಾಕ್ ಏರ್ಹೊಸ್ಟೆಸ್ ಜಾಂವ್ಚಿ ಗರ್ಜ್ ತರ್ಯ್ ಕಿತೆಂ?" ಸುಲೇಮಾನಾಚಾ ಸಮ್ಜಣೆಕ್ ತಾಚ್ಯಾ ಬಾಯ್ಲೆನ್ ತಕ್ಲಿ ಬಾಗಾಯ್ಲಿ ನಾ.
"ತುಂ ಕಿತೆಂ ತೆಂ ಪಯ್ಶಾಂ ಖಾತಿರ್ ಏರ್ ಹೊಸ್ಟೆಸ್ ಜಾಲಾಂ ಮ್ಹಣೊನ್ ಚಿಂತಾಯ್? ತಶೆಂ ಕಿತೆಂ ಶಬೀರಾ ಲಾಗಿಂ ಪಯ್ಶಾಂಕ್ ಬರ್ಗಾಲ್ ಪಡ್ಲಾ? ಬೆಷ್ಟೆಂ ಆಪ್ಲ್ಯಾ ಖುಶೆ ಖಾತಿರ್ ಕರ್ತಾ ಆಸ್ತೆಲೆಂ. ನಿಖಾ ಜಾವ್ನ್ ಆಯ್ಲೆಂ ಜಾಲ್ಯಾರ್, ಉಪ್ರಾಂತ್ ಘರ್, ಘೊವ್, ಭುರ್ಗಿಂ ಮ್ಹಣ್ತಾನಾ ತಾಕಾ ದುಸ್ರೆಂ ಕಾಂಯ್ ಚಿಂತುಂಕ್ ವೇಳ್ ಮೆಳ್ತಾ?" ಸುಲೇಮಾನಾನ್ ಆಪ್ಲ್ಯಾ ಬಾಯ್ಲೆಚೆಂ ತೋಂಡ್ ದಾಂಪಯ್ಲೆಂ.
ನಾಸಿರಾನ್ ಜಾಲ್ಯಾರ್ಯ್ ಹ್ಯಾ ವಿಶಿಂ ಚಡ್ ಕಾಂಯ್ ಉಮೆದ್ ದಾಖಯಿಲ್ಲಿ ನಾ. ತೊ ತಾಚ್ಯಾ ಬಿಜ್ನೆಸಾಚಾ ವಾಟೆನ್ ಚಡ್ ಮೆತೆರ್ ಆಸ್ತಾಲೊ. ಬಿಜ್ನೆಸಾಕ್ದೆಂವ್ಲೆಲ್ಯಾ ಮನ್ಶಾಚಿ ಪಯ್ಲಿ ಬಾಯ್ಲ್ ತಾಚೆಂ ಆಫೀಸ್ ತರ್ ಕರಾರ್ ಜಾವ್ನ್ ಹಾಡ್ಲೆಲಿ ಬಾಯ್ಲ್ ದುಸ್ರಿ ಬಾಯ್ಲ್. ಆಪ್ಲ್ಯಾ ನಿಖಾಚೊ ವಿಶಯ್ ಆನಿ ಆಲಿಯಾಚಾ ಪಸಂದೆಚೊ ವಿಶಯ್ ತಾಣೆಂ ಆಪ್ಲ್ಯಾ ಆವಯ್ ಬಾಪಯ್ ವಯ್ರ್ಚ್ ಸೊಡ್ಲ್ಲೊ. ಆಪ್ಲಿಂ ಆವಯ್ ಬಾಪಯ್ ಆಪ್ಣಾ ಖಾತಿರ್ ಕಿತೆಂ ಕರ್ತಾತ್ ತೆಂ ಆಪ್ಣಾಚ್ಯಾ ಬರ್ಯಾ ಖಾತಿರ್ಚ್ ಮ್ಹಣೊನ್ ತೊ ಪಾತ್ಯೆತಾಲೊ. ಹ್ಯಾ ಖಾತಿರ್ ತಾಣೆಂ ಆಲಿಯಾಚಾ ಏರ್ ಹೊಸ್ಟೆಸಾಚಾ ಕಾಮಾ ವಿಶ್ಯಾಂತ್ ಆವಯ್ನ್ ಹಾಡ್ಲೆಲ್ಯಾ ಆಕ್ಷೇಪಾಂತ್ ಹಸ್ತಕ್ಷೇಪ್ ಕೆಲೊ ನಾ.
ಹ್ಯಾ ದಿಸಾಂನಿ ಸುಲೇಮಾನಾನ್ ಆಪ್ಲ್ಯಾ ಪುತಾಚಾ ನಿಖಾ ವಿಶಿಂ ಚಿಂತ್ಲೆಂ. ಯೆಂವ್ಕ್ ಆಸ್ಚ್ಯಾ ಈದ್-ಉಲ್-ಫಿತ್ರ್ ಉಪ್ರಾಂತ್ ನಿಖಾಚೊ ದೀಸ್ ನೆಮಿಯಾರುನ್ ಪುತಾಚೆಂ ನಿಖಾ ಭಾರಿಚ್ಚ್ ಗಡ್ದಾಯೆನ್ ಕರುಂಕ್ ತೊ ಆಶೆಲೊ.
ಈದ್-ಉಲ್-ಫಿತ್ರಕ್ ಶುಭಾಶಯ್ ಪಾಟವ್ನ್ ಶಬೀರಾಚಾ ಘರಾ ಸಾಂಜೆರ್ ಆಸಾ ಕೆಲ್ಲ್ಯಾ ಜೆವ್ಣಾಚೆರ್ ಸುಲೇಮಾನಾನ್ ಪುತಾಚಾ ನಿಖಾಚೊ ಪ್ರಸ್ತಾಪ್ ಕಾಡ್ಲೊ. ಜೆವ್ಣಾ ಮೆಜಾರ್ ಸಗ್ಳಿಂ ಹಾಜರ್ ಆಸ್ಲ್ಲಿಂ. ಆಲಿಯಾನ್ ಮಂಗ್ಳಾರಾಚಿ ಆಪ್ಲಿ ಸುಟಿ ಆಜ್ ಘೆತ್ಲೆಲಿ. ದೋನ್ ಕುಟ್ಮಾಂ ಸಾಂಗಾತಾ ಮೆಳ್ತಾನಾ ಈದಾಚೊ ಸಂತೊಸ್ ದೊಡ್ತೊ ಜಾಲ್ಲೊ.
ಜೆವ್ಣಾ ಸಾಲಾಂತ್ ಜೆವ್ಣಾ ಮೆಜಾರ್ ಕುಟ್ಮಾಚಾ ಸಗ್ಳ್ಯಾ ಸಾಂದ್ಯಾನಿಂ ಸಾಂಗಾತಾ ಮೆಳೊನ್ ಖಾಣ್ ಪೀವನ್ ಸ್ವೀಕರ್ಸುಂಚಿ ರಿವಾಜ್ ಆಪ್ಲ್ಯಾ ಪೂರ್ವಜಾಂ ಥಾವ್ನ್ ಆಯಿಲ್ಲಿ ತಿ ಶಬೀರಾನ್ ಅಜೂನ್ ಪಾಳ್ಲ್ಲಿ. ಕೋಣ್ ಖಂಯ್ಚರ್ ಆಸ್ಲ್ಯಾರ್ಯ್ ಜೆವ್ಣಾ ವೆಳಾರ್ ಸಗ್ಳಿಂ ಸಾರ್ಕಿಂ ಘರಾ ಪಾವ್ತಾಲಿಂ. ಸಾಂಗಾತಾ ಬಸೊನ್ ಖಾಣ್ ಸೆವ್ಲ್ಲ್ಯಾ ಕುಟ್ಮಾಚೆರ್ ಕುಟ್ಮಾಚೆಂ ಆಶೀರ್ವಾದ್ ಆಸಾ ಮ್ಹಣೊನ್ ಶಬೀರ್ ತರ್ಯ್ ಖಂಡಿತ್ ಪಾತ್ಯೆತಾಲೊ. ಅಸಲಿಂ ಕುಟ್ಮಾ ಕೆದಿಂಚ್ ಪುಟೊನ್ ವಚಾನಾಂತ್.
"ಶಬೀರ್ ಮಿಯಾ...., ಆಯ್ಚಾ ಹ್ಯಾ ಭಾಗಿ ದಿಸಾ ಆಮ್ಚಾ ಸಂತೊಸಾಂತ್ ದೊಡ್ತೊ ಸಂತೊಸ್ ಹಾಡುಂಕ್ ಹಾಂವ್ ಖುಶಿ ವರ್ತಾಂ. ತುಂ ಕಿತೆಂ ಮ್ಹಣ್ತಾಯ್?"
ಜೆವ್ಣಾ ಮೆಜಾರ್ ಸಾರಾನ್ ಮಾಂಡುನ್ ದವರ್ಲೆಲ್ಯಾ ಜೆವ್ಣಾಚೆರ್ ದೀಷ್ಟ್ ಬೊಂವ್ಡಾಯಿತ್ತ್ ಸುಲೇಮಾನ್ ಉಲಯ್ಲೊ.
"ಹಾಂ ಜರೂರ್......! ಅಲ್ಲಾತಲಾನ್ ಖುಶಿ ವೆಲ್ಯಾರ್ ತಶೆಂಚ್ ಜಾತೆಲೆಂ!" ಶಬೀರ್ ಹಾಸೊನ್ ಸಾಂಗ್ತಾನಾ ಸಾರಾನ್ ಉಗ್ತಿ ಕೆಲ್ಲ್ಯಾ ಬಿರಿಯಾಣಿಚಾ ತೊಪ್ಲ್ಯಾಂತ್ ಬಂದ್ ಆಸ್ಲಲೊ ಬಿರಿಯಾಣಿಚೊ ಸುವಾದ್ ಖಿಣಾ ಭಿತರ್ ಜೆವ್ಣಾ ಮೆಜಾರ್ ಭರ್ಲೊ.
"ಹೈದರಾಬಾದ್ ಬಿರಿಯಾಣಿ ಅಂಕಲ್....! ಸ್ಪೆಶಲ್ ರಾಂದ್ಲ್ಯಾ ಅಮ್ಮಿನ್!" ಸಲೀಮ್ ಮಧೆಂಚ್ ಉಲಯ್ಲೊ.
"ಹಾಂ..... ಮಿಯಾ ಸಾಂಗ್..... ತುವೆಂ ಜವಾಬ್ ದೀಂವ್ಕ್ ನಾಂಯ್...!"
ಸುಲೇಮಾನಾನ್ ಶಬೀರಾಚೆರ್ ಆಪ್ಲಿ ದೀಷ್ಟ್ ಕೇಂದ್ರೀಕ್ರತ್ ಕೆಲಿ.
"ಹಾಂತು ವಿಚಾರುಂಕ್ ಕಿತೆಂ ಆಸಾ? ಆಮಿಂ ಪಯ್ಲೆಂಚ್ ಹ್ಯಾ ವಿಶಿಂ ಉಲಯ್ಲ್ಯಾಂವ್ ಆಸ್ತಾಂ.....!"
"ಜಾಲ್ಯಾರ್ಯ್.....! ಆಜ್ ತೊ ಆದ್ಲೊ ಕಾಳ್ ಉರೊಂಕ್ ನಾ ಮಿಯಾ!"
ಆಲಿಯಾ ತೆವ್ಶಿಂ ಆಪ್ಲಿ ನದರ್ ಮಾರ್ಲ್ಲ್ಯಾ ಸುಲೇಮಾನಾಚಾ ತೊಂಡಾರ್ ಹಾಸೊ ಉದೆಲ್ಯೊ.
"ಕಾಳ್ ಕೆದ್ನಾಂಯ್ ಬದ್ಲಾನಾ! ಫಕತ್ತ್ ಮನಿಸ್ ಬದ್ಲಾತಾ! ಆನಿ ಆಪ್ಲ್ಯಾ ಬದ್ಲಾವ್ಣೆಚ್ಯಾ ಗುನ್ಯಾಂವಾಕ್ ಕಾಳಾಚ್ಯಾ ಮಾತ್ಯಾರ್ ಥಾಪ್ತಾ! ತುಮಿಂ ಹ್ಯಾ ನಿಖಾಚಾ ವಿಶಿಂ ಕಿತೆಂ ಆಲೋಚನ್ ಕೆಲ್ಯಾ ತಿ ಸಾಂಗ್ಲ್ಯಾರ್......"
ಸುಲೇಮಾನಾಚಾ ಆಲೋಚನೆ ಪರ್ಮಾಣೆಂ ಯೆಂವ್ಚಾ ಮಹಿನ್ಯಾಂತ್ ನಿಖಾ ಕರಂವ್ಚೆಂ ನಿಘಂಟ್ ಜಾಲೆಂ. ಜೆವ್ಣಾ ಮೆಜಾರ್ ಅಲಿಯಾ ಜಾಂವ್ ನಾಸಿರ್ ಜಾಂವ್ ಕಾಂಯ್ಚ್ ಉಲಯ್ಲಿಂ ನಾಂತ್. ಭುರ್ಗ್ಯಾಪಣಾರ್ ಜಾಲ್ಯಾರ್ ತಾಂಚಾ ಮಧೆಂ ಬರೊ ಸಂಭಂಧ್ ಆಸ್ಲ್ಲೊ. ತಾಂಚಾ ನಿಖಾಚೆಂ ಉತಾರ್ ತಾಂಚಾ ಆವಯ್ ಬಾಪಯ್ನ್ ದಿಲ್ಯಾ ಉಪ್ರಾಂತ್ ಫುಡಾರಾಕ್ ತಿಂ ದೊಗಾಂಯ್ ಘೊವ್ ಬಾಯ್ಲ್ ಮ್ಹಣೊನ್ ಖಚಿತ್ ಜಾಲ್ಲ್ಯಾನ್ ತಾಂಚಾ ಮಧೆಂ ಲಜ್ ಮ್ಹಳ್ಳ್ಯಾ ಪಾಲ್ವಾನ್ ವೊಣೊದ್ ಉಭಿ ಕೆಲ್ಲಿ. ಹ್ಯಾ ಉಪ್ರಾಂತ್ ತಾಂಚಾ ಮಧೆಂ ಪಯ್ಲೆಂಚಾ ಸಂಬಂಧಾಚಿ ಸಳಾವಳ್ ಆಸ್ಲ್ಲಿ ಜಾಲ್ಯಾರ್ಯ್ ಫಕತ್ತ್ ಥೊಡ್ಯಾ ಉತ್ರಾಂಚಾ ಉಲವ್ಣ್ಯಾಂತ್ ಶಿವಾಯ್ ದುಸ್ರೆಂ ಚಡ್ತಿಕ್ ಕಾಂಯ್ ನಾತ್ಲ್ಲೆಂ.
ನಾಸಿರ್ ತರ್ಯ್ ಜಲ್ಮಾ ಥಾವ್ನ್ ಚಡ್ ಉಲವ್ಣ್ಯಾಚೊ ಭುರ್ಗೊ ನ್ಹಯ್ ಮ್ಹಣೊನ್ ಸಗ್ಳಿಂ ಜಾಣಾಂ ಆಸ್ಲ್ಲಿಂ. ತೆಂಯ್ ತಾಚ್ಯಾ ಶಿಕ್ಪಾ ವರೇಗ್ ತೊ ಥೊಡೊ ತರ್ಯ್ ಉಲಯ್ತಾಲೊ. ಪುಣ್ ಶಿಕಾಪ್ ಜಾವ್ನ್ ಬಾಪಾಯ್ಚಾ ಬಿಜ್ನೆಸಾಂತ್ ರಿಗ್ಲ್ಯಾ ಉಪ್ರಾಂತ್ ತಾಣೆಂ ಉಲಂವ್ಚೆಂ ಫಕತ್ತ್ ತಾಚ್ಯಾ ಬಾಪಾಯ್ಲಾಗಿಂ ಬಿಜ್ನೆಸಾಚಾ ವಿಶಿಂ ಕಾಂಯ್ ತರ್ಯ್ ಮಾಹೆತ್ ಘೆಂವ್ಕ್ ಮಾತ್ರ್....!
ಹ್ಯಾ ವಾಟೆನ್ ಆಲಿಯಾ ಸಂಪೂರ್ಣ್ ಆಪ್ಲ್ಯಾಚ್ ಸಂಸಾರಾಂತ್ ಆಸ್ತಾಲೆಂ. ಆಪ್ಲ್ಯಾ ಮತಿಂತ್ಲ್ಯಾ ತ್ಯಾ ಚಿಂತ್ನಾಂಕ್ ಆನಿ ಸವಾಲಾಂಕ್ ಸಾಂಗಾತಾ ಘೆವ್ನ್ ಎಕ್ಸುರೆಂ ಜಿಯೆಂವ್ಚಾ ಆಲಿಯಾಚೊ ಸಂಸಾರ್ಯ್ ವಿಂಗಡ್ಚ್.
ದೋನ್ ಕುಟ್ಮಾಂಚ್ಯಾನಿ, ಆಜ್, ದೋನ್ ಮನಾಂಕ್, ದೋನ್ ಕಾಳ್ಜಾಂಕ್,ಆನಿ ದೋನ್ ಕುಡಿಂಕ್ ಲಾಗಿಂ ಹಾಡುನ್ ತಾಂಕಾಂ ನವ್ಯಾ ಸಂಭಂಧಾಂತ್ ಎಕ್ವಟಾಂವ್ಕ್ ಯೆವ್ಜಿಲ್ಲೆಂ.
ಮಯ್ಪಾಸಿ ಮನ್ ಆನಿ ಮೊಗಾಚಿ ಥಂಡ್ಸಾಣ್ ಜೆದ್ನಾಂ ವರೇಗ್ ಆಸ್ತಾ ತೆದ್ನಾಂ ವರೇಗ್ ಕಸಲ್ಯಾಯ್ ರುಪಾಚೆ ಸಂಭಂಧ್ ಜಾಲ್ಯಾರ್ಯ್ ತೆ ಸಂಭಂಧಾಂತ್ ಶಾಶ್ವತ್ ಜಾವ್ನ್ ಉರ್ತಾತ್! ಮಾಯ್ಪಾಸಾಚಾ ಮನಾಂತ್ ಬರ್ಗಾಲ್ ಉಟೊನ್ ಮೊಗಾಚಾ ಥಂಡ್ಸಾಣೆಕ್ ಚಿಂವೊನ್ ಸೊಡ್ತಾನಾ ಮಾತ್ರ್ ಥಂಯ್ಚರ್ ಕಾಂಯ್ಚ್ ಉರಾನಾ. ತೆದ್ನಾಂ ಮನಿಸ್, ಫಕತ್ತ್ ನಾಂವಾಚೊ ಮನಿಸ್ ಜಾವ್ನ್ ಮಾತ್ರ್ ಉರ್ತಾ!
ಸರ್ವಾಂಚಾ ಒಪ್ಪಿಗೆಂತ್ ಆಲಿಯಾಚೆಂ ಕರಾರ್ ನಾಸಿರಾಲಾಗಿಂ ತಾಚ್ಯಾ ಕುಟ್ಮಾ ಸಂಭಂಧಾಂಚಾ ಹುಜಿರ್ ಜಾತಾನಾ ದೋನ್ಯ್ ಕುಟ್ಮಾಚಾ ಘರಾಣ್ಯಾಂತ್ ಏಕ್ ನವೆಂ ವಾತಾವರಣ್ ರುತಾ ಜಾಲೆಂ. ಕುಟ್ಮಾಚಾ ವ್ಹಡಿಲಾಂನಿ ಆಲಿಯಾಚೆಂ ಆನಿ ನಾಸಿರಾಚೆಂ ನಿಖಾ ಠರಾಯ್ಲೆಂ.
ಯೆಂವ್ಚಾ ಮಹಿನ್ಯಾಚಾ ಬಾವೀಸ್ ತಾರಿಕೆರ್ ಮ್ಹಳ್ಯಾರ್ ಭರ್ತಿ ಚಾಳೀಸ್ ಆನಿ ದೋನ್ ದೀಸ್ ಆಸ್ಲ್ಲೆ ತಾಂಚಾ ನಿಖಾಕ್!
ದೀಸ್ ಧಾಂವ್ತಾನಾ ನಿಖಾಚೊ ದೀಸ್ಯ್ ಲಾಗಿಂ ಲಾಗಿಂ ಯೇಂವ್ಕ್ ಲಾಗ್ಲೊ.
ಹ್ಯಾ ದಿಸಾಂನಿ ಆಲಿಯಾಕ್ ಆಪ್ಲ್ಯಾ ನಿಖಾ ವಿಶ್ಯಾಂತ್ ಚಡ್ ಚಿಂತುಂಕ್ ಪಡ್ತಾಲೆಂ. ಘರಾಂತ್ ಜಾಲ್ಯಾರ್ಯ್ ಸಾರಾ ಆನಿ ಶಬೀರ್ ಆಪ್ಲ್ಯಾ ಧುವೆಚ್ಯಾ ನಿಖಾಂತ್ ಕಾಂಯ್ಚ್ ಉಣೆಂಪಣ್ ಜಾಂವ್ಕ್ ನಜೊ ಮ್ಹಳ್ಳ್ಯಾ ಭಾಶೆನ್ ಸಗ್ಳಿ ತಯಾರಾಯ್ ಕರುಂಕ್ ಲಾಗ್ಲಿಂ.
ನಿಖಾಂತ್ ಎಕಾ ಕಾಳ್ಜಾನ್ ಎಕಾ ಕಾಳ್ಜಾಕ್ ಮೊಗಾನ್ ವೆಂಗುಂಕ್ ಆಸ್ಲ್ಲೆಂ. ಎಕಾ ಮನಾನ್ ಎಕಾ ಮನಾಕ್ ಸಮ್ಜೊನ್ ಘೆಂವ್ಕ್ ಆಸ್ಲ್ಲೆಂ. ಎಕಾ ಕುಡಿನ್ ಎಕಾ ಕುಡಿಕ್ ಮಾಯ್ಪಾಸಾನ್ ಸಾಂಬಾಳುಂಕ್ ಆಸ್ಲ್ಲೆಂ.
ಹ್ಯಾ ವೆಂಗ್ಚಾ, ಸಾಂಬಾಳ್ಚಾ ಆನಿಂ ಸಮ್ಜೊಂಚಾ ಜಿವಿತಾಂತ್ ವೆಳಾಚಿ, ಪಿರಾಯೆಚಿ, ಸೊಭಾಯೆಚಿ ಆನಿ ಅಂತಸ್ತೆಚಿ ಗಡ್ ನಾತ್ಲ್ಲಿ.
ಗಡ್ ನಾತ್ಲೆಲ್ಯಾ ಹ್ಯಾ ಜಿವಿತಾಚಾ ಎಕೇಕಾ ಕಾಪಾಂತ್ ತಿಂ ಕಾಪಾಂ ದಿಸ್ಪೊಡ್ತ್ಯಾ ಜಿವಿತಾಂತ್ ಘೆವ್ನ್ ಯೆಂವ್ಚ್ಯಾ ಸುಖಾ ದುಖಾಂತ್ ದೊಗಾಂಯ್ನಿ ಬರಾಬರ್ ಸಾಂಗಾತ್ ದೀವ್ನ್ ಚಲೊಂಕ್ ಆಸ್ಲ್ಲೆಂ.
ಆಶೆಂ ತಿಂ ದೋನ್ ಮನಾಂ, ದೋನ್ ಕಾಳ್ಜಾಂ, ಆನಿ ದೋನ್ ಕುಡಿ ಏಕ್ ಜಾಂವ್ಕ್ ಆಸ್ಲ್ಲೆಂ ಸಾಸ್ಣಾಚಾ ಸಾಸ್ಣಾಕ್!
ಕುಟ್ಮಾಚಾ ಸಂಭಂಧಾನ್ ಎಕಾ ಮೆಕಾ ವಳ್ಕೊಂಚಾಂತ್ ಆನಿ ನಿಖಾ ಕರುನ್ ಎಕಾಮೆಕಾ ವಳ್ಕೊಂಚಾಂತ್ ಕಿತ್ಲೊ ವ್ಯತ್ಯಾಸ್ ಆಸಾ ತೆಂ ನಾಸಿರಾಕ್ ಆನಿ ಆಲಿಯಾಕ್ ತಾಂಚೆಂ ಕರಾರ್ ಜಾಲ್ಲ್ಯಾ ದಿಸಾಚ್ ಕಳಿತ್ ಜಾಲ್ಲೆಂ.
ಥೊಡ್ಯಾ ದಿಸಾಂ ಉಪ್ರಾಂತ್ ಆಮ್ಚೆಂ ನಿಖಾ ಜಾತೆಲೆಂ. ತ್ಯಾ ಉಪ್ರಾಂತ್ ಆಮಿಂ ದೊಗಾಂ, ದೋನ್ ಪಾಕ್ಯಾ ಪಂದ್ಲಿಂ ಮನ್ಶ್ಯಾಂ, ಎಕಾ ಪಾಕ್ಯಾ ಪಂದಾ, ಎಕಾ ಘರಾ ಭಿತರ್, ಏಕ್ ದಾರ್ವಾಟೊ ಭಿತರ್ ಸರೊನ್, ಎಕಾ ಕುಡಾಚಾ ಸಾವ್ಳೆಂತ್, ಮುಖಾಮುಖಿ ರಾವೊನ್ ದೀಸ್ ಕಾಡುಂಕ್ ಆಸಾತ್ ಮ್ಹಳ್ಳೆಂ ಚಿಂತಾಪ್ ಆಲಿಯಾಕ್ ಆನಿ ನಾಸಿರಾಕ್ ಉಗ್ತ್ಯಾನ್ ಜಾಗಯ್ತಾನಾ ತಾಂಚಾ ಜಿವಿತಾ ವಿಶಿಂ ನವ್ಯಾನ್ ತಿಂ ಚಿಂತುಂಕ್ ಲಾಗ್ಲಿಂ.
ಚಿಂತ್ನಾಂ ಆನಿ ಭಗ್ಣಾಂ, ಸೊಧ್ನಾಂ ಜಾವ್ನ್ ಜಿಣ್ಯೆಚಾ ಕೊನ್ಶಾ ಕೊನ್ಶ್ಯಾಕ್ ಸೊಧುನ್ ಭೊಂವ್ತಾನಾ ನಿಖಾಚೆಂ ಜಿವಿತ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಿ ವಯ್ಲ್ಯಾಭಾರ್ ತಾಂಕಾ ಮಾಹೆತ್ ಮೆಳ್ಲ್ಲಿ. ಹ್ಯಾ ಮಾಹೆತೆಂತ್ ಥೊಡಿ ಆಶಾ, ಥೊಡಿಂ ಸಪ್ಣಾಂ, ಥೊಡಿಂ ಭಾವನಾಂ ಸಾಂಗಾತಾ ಮೆಳೊನ್ ಜಿವಿತಾಕ್ ಕಾಲಯ್ತಾನಾ ಎಕಾ ವಾಟೆನ್ ಸಂತೊಸಾಚಿಂ ಲ್ಹಾರಾಂ ಮತಿಂತ್ ಉಟೊನ್ ಮಾಯಾಗ್ ಜಾತಾಲಿಂ.
ಹ್ಯಾ ಮಧೆಂ ನಿಖಾ ಖಾತಿರ್ ಠರಾಯಿಲ್ಲೊ ದೀಸ್ ಉದೆಲೊ.
ನಾಸಿರ್, ಕಿತೆಂ ತುಂ ಆಲಿಯಾಕ್ ತುಜಿ ಪತಿಣ್ ಕರುನ್ ಘೆಂವ್ಕ್ ಕಬೂಲ್ ಆಸಾಯ್?
ವ್ಹಯ್ ಹಾಂವ್ ಕಬೂಲ್ ಆಸಾಂ!
ಆಲಿಯಾ, ಕಿತೆಂ ತುಂ ನಾಸಿರಾಕ್ ತುಜೊ ಪತಿ ಕರುನ್ ಘೆಂವ್ಕ್ ಕಬೂಲ್ ಆಸಾಯ್?
ವ್ಹಯ್ ಹಾಂವ್ ಕಬೂಲ್ ಆಸಾಂ!
ತಿತೀನ್ ಪಾವ್ಟಿಂ ದೊಗಾಂಯ್ನಿ ಮೌಲಾನಾಚಾ ಮುಕಾರ್ ಆಪ್ಲಿ ಕಬ್ಲಾತ್ ದಿತಾನಾ, ಆಲಿಯಾ ಆನಿ ನಾಸಿರ್ ದೊಗಾಂಯ್ ನಿಖಾ ಮ್ಹಳ್ಳ್ಯಾ ನವ್ಯಾ ಬಾಂದಾಂತ್ ಘೊವ್ ಆನಿ ಬಾಯ್ಲ್ ಜಾವ್ನ್ ಎಕ್ವಟ್ಲಿಂ. ಶಬೀರ್ ಆನಿ ಸುಲೇಮಾನಾಚಿಂ ಕುಟ್ಮಾಂ ಆಜ್ ಪಯ್ಲೆಂಚಾ ಪ್ರಾಸ್ ಚಡ್ ನವ್ಯಾ ಆನಿ ಚಡ್ ಘಟ್ ಬಾಂದಾಂತ್ ಲಾಗಿಂ ಆಯ್ಲಿಂ.
ಆಲಿಯಾಚಾ ನಿಖಾಕ್ ದೋನ್ಯ್ ಕುಟ್ಮಾಚಾ ತರ್ಫೆನ್ ಸಗ್ಳಿಂ ಹಾಜರ್ ಜಾಲ್ಲಿಂ. ಅಕ್ಬರ್ ಅಮೇರಿಕಾ ಥಾವ್ನ್ ಆಯಿಲ್ಲೊ. ಸುಲೇಮಾನಾಚಿಂ ಭುರ್ಗಿಂ ತರ್ಯ್ ಹಾಂಗಾಚ್ ಆಸ್ಲ್ಲಿಂ. ಕೊಲ್ಹಾಪುರಾ ಥಾವ್ನ್ ತಾಚ್ಯಾ ಸಂಭಂಧಾಚಿಂ ಆನಿ ನಾಗ್ಪುರ್ ಥಾವ್ನ್ ಶಬೀರಾಚಾ ಸಂಭಂಧಾಚಿಂ ತಶೆಂ ತಾಚ್ಯಾ ಬಾಯ್ಲೆಚಾ ಕುಟ್ಮಾಚಿಂಯ್ ಹಾಜರ್ ಜಾಲ್ಲಿಂ.
ದೋನ್ಯ್ ಕುಟ್ಮಾಂಚಾ ಗ್ರೇಸ್ತ್ಕಾಯೆ ವರ್ವಿಂ ನಿಖಾಚೊ ಸಂಭ್ರಮ್ ಬರ್ಯಾ ದಬಾಜಾನ್ ಚಲ್ಲೊ.
ನಿಖಾ ಜಾಲ್ಲ್ಯಾಚೊ ಸಂತೊಸ್ ಶಬೀರಾಚಾ ಕುಟ್ಮಾಚಾ ಹರ್ಯೆಕಾ ಸಾಂದ್ಯಾಂಚಾ ಮುಖಮಳಾರ್ ಸ್ಪಶ್ಟ್ ಕಳ್ತಾಲೊ.ತಾಂಚೆ ಪಯ್ಕಿ ರಝಿಯಾ ಚಡ್ಚ್ ಮಾಫಾನ್ ಖುಶ್ ಆಸ್ಲ್ಲೆಂ. ಕಾರಾಣ್....., ತಾಚ್ಯಾ ಭಾವಾಚೊ ಸಲೀಮಾಚೊ ಚಡ್ ಲಾಗ್ಶಿಲೊ ಈಷ್ಟ್ ಜಾವೇದ್, ಸಂಭಂಧಾನ್ ಪಳಯ್ಲೆಂ ತರ್ ತೊ ರಝಿಯಾಚಾ ಮಾಮಾಚಾ ಬಾಯ್ಲೆಚಾ ಭಯ್ಣಿಚೊ ಪೂತ್! ಪಯ್ಶಿಲೊ ಸಂಭಂಧ್ ಆಸ್ಲ್ಯಾರ್ಯ್ ಸಲೀಮ್ ಆನಿ ಜಾವೆದ್ ದೊಗ್ಯ್ ಸಾಂಗಾತಾ ಇಂಜಿನೀಯರಿಂಗ್ ಕರ್ತಾನಾ ತಾಂಚಿ ಇಷ್ಟಾಗತ್ ವಾಡ್ಲ್ಲಿ.
ಜಾವೇದ್ ಆನಿ ತಾಚೆಂ ಕುಟಾಮ್ ಮುಳಾವೆಂ ಭಟ್ಕಳ್ಚೆಂ ಜಾಲ್ಯಾರ್ಯ್ ಜಾವೇದಾಚೊ ಬಾಪಯ್ ಅಹ್ಮದಾಬಾದ್ ಸೆಟಲ್ ಜಾಲ್ಲೊ. ಮುಂಬಯಿ ಶಿಕ್ತಾನಾ ಜಾವೇದ್ ಹಾಸ್ಟೆಲಾಂತ್ ರಾವ್ತಾಲೊ ತರ್ಯ್ ಆಯ್ತಾರಾಚೆಂ ಶಬೀರಾಚಾ ಘರಾ ವಚೊನ್ ಯೆತಾಲೊ. ತೊ ವಚೊನ್ ಯೆತಾಲೊ ಮ್ಹಣ್ಚ್ಯಾಕ್ಯ್ ಶಬೀರ್ ಆನಿ ಸಾರಾಚ್ ತಾಕಾ ವತ್ತಾಯೆನ್ ಘರಾ ಆಪಯ್ತಾಲಿಂ. ಜಾವೇದ್ ಸಲೀಮಾಚೊ ಬರೊ ಈಶ್ಟ್ ಜಾಲ್ಲ್ಯಾ ನಿಮ್ತಿಂ ಆಯ್ತಾರಾಚೆಂ ಸಿನೇಮಾ ಜಾಂವ್ ರಜೆಚಾ ದಿಸಾಂನಿ ಭಾಯ್ರ್ ಭೊಂವ್ಡೆಕ್ ವೆಚೆಂ ಜಾಂವ್ ದೊಗಾಂಯ್ಚೆಂಸವಯೆಚೆಂ.
ಜಾವೇದ್ ಜಿವಾಂತ್ ಘಟ್ಮುಟ್ ಆಸೊನ್ ಲಾಂಬಾಯೆಂತ್ ಸಲೀಮಾಚಾ ಬರಾಬರಿಕ್ಚ್ ಆಸ್ಲ್ಲೊ ತರ್ಯ್ ಗೊರ್ಸಾಣ್ ಸಲೀಮಾಕ್ ಚಡ್ ಆಸ್ಲ್ಲಿ. ಪುಣ್ ತೊಂಡಾ ಲಕ್ಷಣಾಂತ್ ಮಾತ್ರ್ ಆಕರ್ಷಿತ್ ಕರ್ಚೆಂ ಮುಖಾಮಳ್ ತಾಚೆಂ. ನಿಟ್ಟ್ ಲಾಂಬ್ ರಾಂವ್ಚೆ ಕೇಸ್, ಮಾತ್ಯಾರ್ ಮಧೆಂಚ್ ಭಾಂಗ್ ಕಾಡುನ್, ತ್ಯಾ ಕೆಸಾಂಕ್ ಉಗವ್ನ್ ಬಸಂವ್ಚಿ ರೀತ್ ತಾಚ್ಯಾ ಮುಖಮಳಾಕ್ ಸೊಭಾಯ್ ದಿತಾಲಿ.
ಪ್ರಾಯೆಂತ್ ಜಾವೇದ್ ಆಲಿಯಾಚಾ ಪ್ರಾಯೆಚೊ ಜಾಲ್ಯಾರ್ಯ್ ಆಶೆಂ ಪಳಯ್ತಾನಾ ಅಕ್ಬರ್ ಆನಿ ಜಾವೇದ್ ಎಕಾಚ್ ಪ್ರಾಯೆಚೆ ಮ್ಹಳ್ಳ್ಯಾ ಪರಿಂ ದಿಸ್ತಾತ್.
ಶಬೀರಾಚಾ ಘರಾ ಯೇವ್ನ್ ವಚೊನ್ ಆಸ್ಲ್ಲ್ಯಾ ಜಾವೇದಾಕ್ ಶಬೀರಾಚಾ ಸಗ್ಳ್ಯಾ ಕುಟ್ಮಾ ಸಾಂಗಾತಾ ಬರಿ ಸಳಾವಳ್ ಆಸ್ಲ್ಲಿ.
ಆಪ್ಲೆಂ ಶಿಕಾಪ್ ಸಂಪವ್ನ್ ಲಂಡನ್ ಗೆಲ್ಲೊ ಜಾವೇದ್ ಎಕಾಚ್ಚ್ ವರ್ಸಾನ್ ಪಾಟಿಂ ಗಾಂವಾಕ್ ಆಯಿಲ್ಲೊ. ಲಂಡನ್ಚಾ ಗಾಂವಾಂತ್ ಘಂಟ್ಯಾ ಲೆಖಾರ್ ಪೌಂಡ್ ಮೆಜ್ತಾನಾ, ಥೊಡೊ ಸಿಂತಿಮೆಂತಾಳ್ ವಿಚಾರಾಚೊ ಜಾವೇದ್, ಆವಯ್ಚಾ ಭಾರಿಚ್ ಮೊಗಾಚೊ, ಎಕಾಚ್ಚ್ ವರ್ಸಾನ್ ಆವಯ್ಕ್ ಪಳಂವ್ಕ್ ಪಾಟಿಂ ಆಯಿಲ್ಲೊ.
ಗಾಂವಾಕ್ ಆಯಿಲ್ಲ್ಯಾ ಜಾವೇದಾಕ್ ಆಲಿಯಾಚಾ ನಿಖಾಂತ್ ಭಾಗ್ ಘೆಂವ್ಚೆಂ ನಶೀಬ್ ಮೆಳ್ತಾನಾ, ಅಪ್ಲ್ಯಾ ಸಂಭಂಧಾ ವರ್ನಿಂ ಚಡ್ ಜಾವ್ನ್ ಆಪ್ಲೊ ಮೊಗಾಚೊ ಈಶ್ಟ್ ಜಾಲ್ಯಾ ಸಲೀಮಾಚಾ ಭಯ್ಣಿಚಾ ನಿಖಾ ಸಂಭ್ರಮಾಂತ್, ಕುಟ್ಮಾಕ್ ಸುದಾರ್ಸುಂಚಾಂತ್ ಜಾಂವ್ ಯಾ ಸೈರ್ಯಾಂಕ್ ಸುದಾರ್ಸುಂಚಾಂತ್ ಜಾಂವ್ ಜಾವೇದ್ ಮುಕಾರ್ ಆಸ್ಲ್ಲೊ.
ಜಾವೇದಾಕ್ ಆಲಿಯಾ ಮಸ್ತ್ ಪಸಂದೆಚೆಂ ಚೆಡುಂ. ಎಕ್ಸುರ್ಪಣಿಂ ಶಾಂತ್ ಮೌನ್ ಆಸ್ಚಾ ಆಲಿಯಾಕ್ ಪಳವ್ನ್ ಜಾವೇದಾಕ್ ಕಿತ್ಯಾಕ್ಗೀ ತಾಚೆರ್ ಮನ್ ಭುಲ್ಲ್ಲೆಂ. ಭೋವ್ಚ್ ಉಣೆಂ ಉಲವ್ಣ್ಯಾಚೆಂ ಚೆಡುಂ ಆನಿ ಚಡ್ ಕಾಂಯ್ ಮೇಕ್ಅಪ್ ನಾಸ್ತಾನಾ ಆಪ್ಲ್ಯಾ ಜಲ್ಮಾ ಸೊಭಾಯೆಂತ್ಚ್ ಸೊಭಿತ್ ದಿಸ್ಚಾ ಆಲಿಯಾಚೆರ್ ಜಾವೇದಾಕ್ ಮನ್ ಆಸ್ಲ್ಯಾರ್ಯ್ ಆಲಿಯಾಚಾ ಕುಟ್ಮಾ ಸಾಂಗಾತಾ ಮೆಳ್ತಾನಾ ತಾಂಚಾ ಉತ್ರಾಂ ಥಾವ್ನ್ ತಾಣೆಂ ಆಲಿಯಾಚೆಂ ನಿಖಾ ನಾಸಿರಾ ಸಾಂಗಾತಾ ಜಾಂವ್ಚೆಂ ಆಯ್ಕಾಲ್ಲೆಂ.
ಮನ್ಶ್ಯಾ ಜಾತಿಚೆಂ ಮನ್ಯ್ ಬೆಷ್ಟೆಂ ಪಿಶೆಂ ಮನ್. ಆಲಿಯಾಕ್ ಜಾವೇದ್ ಆಪ್ಣಾಂವ್ಕ್ ಸಕಾನಾ ಮ್ಹಣೊನ್ ಜಾಣಾಂ ಆಸ್ಲ್ಯಾರ್ಯ್ ಮತಿಚಾ ಕೊನ್ಶಾಂತ್ ಆನಿ ಕಾಳ್ಜಾಚಾ ಗೂಂಡಾಯೆಂತ್ ತೊ ಆಲಿಯಾಕ್ ಚಿಂತಾಲೊ.
ಹ್ಯಾ ಮಧೆಂ ರಝಿಯಾ ಜಾವೇದಾಕ್ ಚಡ್ಚ್ ಪಸಂದ್ ಕರ್ತಾಲೆಂ. ಜಾವೇದಾಚೆಂ ತೆಂ ಹಾಸ್ತೆಂ ಮುಖಮಳ್, ಹರ್ಯೆಕಾ ವಗ್ತಾ ಏಜ್ ಘಡಿ ರಾವಾನಾಸ್ತಾನಾ ಕಾಂಯ್ ತರ್ಯ್ ಉಲವ್ಣ್ಚ್ ಹಾಸೊನ್ ಖೆಳೊನ್ ಆಸ್ಚೆಂ, ಕೊಣಾಯ್ ಸಾಂಗಾತಾ ಕಶೆಂಯ್ ತರ್ಯ್ ಬರ್ಸುಂಚೊ ತಾಚೊ ಗೂಣ್, ವ್ಹಡಿಲಾಂಕ್ ದಿಂವ್ಚೊ ಮಾನ್, ಪರ್ಕ್ಯಾಂಲಾಗಿಂ ಉಲಯ್ತಾನಾ ಉಲಂವ್ಚೆಂ ಮೊಗಾಳ್ ಉಲೊಣೆಂ ಪಳವ್ನ್ ರಝಿಯಾ ತರ್ಯ್ ಜಾವೇದಾ ವಯ್ರ್ ಪಿಶೆಂ ಜಾಲ್ಲೆಂ.
ಸಲೀಮ್ ಜಾವೇದಾ ಸಾಂಗಾತಾ ಬರ್ಸುಂಚಾ ಪರಿಂಚ್ ರಝಿಯಾ ಕಾಂಯ್ಚ್ ಮುಲಾಜ್ ನಾಸ್ತಾನಾ ಜಾವೇದಾ ಸಂಗಿಂ ಬರ್ಸಾತಾಲೆಂ. ಜಾವೇದ್ ಏಕ್ ದೀಸ್ ಖಂಡಿತ್ ಆಪ್ಣಾಚೊ ಜಾತಲೊ ಮ್ಹಳ್ಳೊ ತಾಕಾ ಭರ್ವಸೊ ಆಸ್ಲ್ಲೊ.
ಪುಣ್ ಆಜ್....?
ಆಜ್ ಆಲಿಯಾಚೆಂ ನಾಸಿರಾ ಲಾಗಿಂ ನಿಖಾ ಜಾಲ್ಲೆಂ. ತೆ ಆದ್ಲೆ ದೀಸ್ ಉಭೊನ್ ಗೆಲ್ಲೆ. ಜಾವೇದಾಚಾ ಮತಿಂತ್ಲಿ ಆಶಾ ಆಶಾ ಜಾವ್ನ್ಚ್ ಉರ್ಲ್ಲಿ.
ಆಲಿಯಾಚಾ ನಿಖಾಚಾ ಸಂಭ್ರಮಾಂತ್ ಜಾವೇದ್ ಆಪ್ಲ್ಯಾ ಹಾಸ್ತ್ಯಾ ಮುಖಮಳಾನ್ ಆಪ್ಣಾಕ್ಚ್ ಪ್ರಸ್ತುತ್ ಕರ್ತಾಲೊ ತರ್ಯ್ ಭಿತರ್ಲ್ಯಾ ಭಿತರ್ ಆಪ್ಣೆ ಸಾಸ್ಣಾಕ್ ಆಲಿಯಾಕ್ ಹೊಗ್ಡಾಯ್ಲೆಂ ಮ್ಹಣೊನ್ ಕರ್ಗಾತಾಲೊ.
ಕೊಣಾಯ್ಕ್ಯ್ ಕೊಣಾಯ್ಚೆರ್ ಮನ್ ವೊಡ್ಚೆಂ ಸಹಜ್.ಪುಣ್ ಮನ್ ವೊಡ್ಲ್ಲಿಂ ಸಗ್ಳಿಂ ಆಪ್ಣಾಚಿಂ ಜಾಯ್ನಾಂತ್. ಆಶೆಂ ಜಾಲ್ಲೆಂ ಜಾಲ್ಯಾರ್.....!
************
ಆಲಿಯಾಚೆಂ ನಿಖಾ ಜಾಲ್ಲೆಂ ಜಿವಿತ್, ತ್ಯಾ ಫುಲೊನ್ ಯೆಂವ್ಚಾ ನವ್ಯಾ ವಸಂತಾಚಾ ವೆಳಾರ್ ಖೊಲಿಯೊ ಜಡಯ್ಲೆಲೆ ವಿಣ್ಗೆ ರೂಕ್ ಆಂಕ್ರ್ಯೊ ಪುಲವ್ನ್ ಸೊಭಾಯೆನ್ ಪೃಥ್ವೆಕ್ ನವೊ ಜೀವ್ ಬಾಸಾಂವ್ಕ್ ಆಯ್ತೆ ಜಾಂವ್ಚಾ ಪರಿಂ ಆಯ್ತೆಂ ಜಾಲ್ಲೆಂ.
ದೋನ್ ಜೀವ್ ಎಕಾ ಮೆಕಾ ಭರ್ವಸೊ ಪಾಚಾರ್ತಾನಾ, ದೋನ್ ಜೀವ್ ಎಕಾಮೆಕಾ ವಯ್ರ್ ವಿಶ್ವಾಸ್ ಭಾಸಾಯ್ತಾನಾ, ತ್ಯಾ ದೋನ್ ಜಿವಾಂ ಮಧೆಂ ಕಾಂಯ್ಚ್ ಭಂಧಡ್ ಉರಾನಾ. ತ್ಯಾ ದೋನ್ ಜಿವಾಂ ಮಧ್ಲೆಂ ಪರ್ಕಿಪಣ್ ಪೊಳುನ್ ಧಾಂವ್ತಾ. ಆಶೆಂ ದೋನ್ ಜೀವ್ ಏಕ್ ಜಾತಾತ್.
ಆಲಿಯಾ ಆನಿ ನಾಸಿರ್ ತಾಂಚ್ಯಾ ಜಿವಿತಾಂತ್ ತಿಂ ಎಕಾಮೆಕಾಕ್ ಕಾಂಯ್ ನವಿಂ ಭಿಲ್ಕುಲ್ ನ್ಹಯ್ ತರ್ಯ್ ಹ್ಯಾ ತಾಣಿಂ ನಿಖಾ ಜಾವ್ನ್ ಆಪ್ಣಾಯಿಲ್ಲ್ಯಾ ಜಿವಿತಾಂತ್ ಮಾತ್ರ್ ತಿಂ ಭಿಲ್ಕುಲ್ ನವಿಂಚ್. ಆಲಿಯಾಕ್ ನಾಸಿರಾನ್ ವಳ್ಕೊನ್ ಘೆಂವ್ಕ್ ಯಾ ನಾಸಿರಾಕ್ ಆಲಿಯಾನ್ ವಳ್ಕೊನ್ ಘೆಂವ್ಕ್ ಕಾಂಯ್ ಕಷ್ಟ್ ಜಾಲೆ ನಾಂತ್.
ನಿಖಾ ಜಾಲ್ಲ್ಯಾಚ್ ಹಪ್ತ್ಯಾಂತ್ ಸುಲೇಮಾನಾನ್ ನವ್ಯಾ ಹೊಕಾಲ್ ನೊವ್ರ್ಯಾಂಕ್ ತಾಂಚ್ಯಾ ಹನಿಮೂನಾಕ್ ಮಾರಿಶಸಾಚೆಂ ಪ್ಯಾಕೇಜ್ ಬುಕ್ ಕೆಲೆಂ.
"ಬೇಟಾ...., ಬಿಜ್ನೆಸಾ ವಿಶಿಂ ತುಂ ಕಾಂಯ್ ಖಂತ್ ಕರಿನಾಕಾ. ಹಾಂವ್ ಸಾಂಬಾಳ್ತಾಂ. ಆಮ್ಚಾ ಸುನೆಚ್ಯಾ ಸಾಂಗಾತಾ ಸಂತೊಸಾನ್ ರಾವ್. ಏಕ್ ಪಾವ್ಟಿಂ ಬಿಜ್ನೆಸಾಂತ್ ರಿಗ್ಲ್ಯಾ ಉಪ್ರಾಂತ್, ಪರ್ತ್ಯಾಕ್ ಹೆ ತುಜೆ ಮೊಲಾದೀಕ್ ದೀಸ್ ತುಕಾ ಸೊಧುನ್ ಯೇನಾಂತ್!" ಹಾಸೊನ್ ಹಾಸೊನ್ಚ್ ಪುತಾ ಸುನೆಕ್ ಕಾರಾರ್ ಬಸಯ್ತಾನಾ ಸುಲೇಮಾನಾನ್ ಆಪ್ಲ್ಯಾ ಪುತಾಕ್ ಜಾಗಯ್ಲೆಂ.
"ಅಬ್ಬೂ.....! ತುಂ ತುಜ್ಯಾ ಭಲಾಯ್ಕೆಚಾ ವಿಶಿಂ ಚತ್ರಾಯ್ ಕರ್. ಅಮ್ಮೀ.....?" ನಾಸಿರ್ ಆವಯ್ಕ್ ಆನಿ ಕಿತೆಂ ಸಾಂಗೊಂಕ್ ಸೊಧ್ತಾನಾ,
"ಹಾಂವ್ ಜಾಣಾಂ ಪುತಾ! ಕಿತ್ಲೆ ಪಾವ್ಟಿಂ ತುಂ ಮ್ಹಾಕಾ ಸಾಂಗ್ತಲೊಯ್?" ನಾಸಿರಾಚಿ ಆವಯ್ ಆಪ್ಲ್ಯಾ ಪುತಾಕ್ ತಾಚ್ಯಾ ಬಾಪಾಯ್ ವಯ್ರ್ ಕಿತ್ಲೊ ಹುಸ್ಕೊ ಆಸಾ ತೆಂ ಬರ್ಯಾನ್ ಜಾಣಾಂ.
"ಅಮ್ಮೀ, ತುಂ ಜಾಣಾಂಯ್ ಅಬ್ಬೂಕ್ ಸಗ್ಳೆಂ ಉಡಾಸ್ ಆಸ್ತಾ....! ಪುಣ್ ತಾಚ್ಯಾಚ್ ವಿಶಿಂ ಮಾತ್ರ್ ತಾಕಾ ಕಾಂಯ್ಚ್ ಉಡಾಸ್ ಉರಾನಾ!"
"ತುಂ ಜಾಲ್ಯಾರ್ಯ್ ತಸೊಚ್! ತುಜ್ಯಾ ಅಬ್ಬೂಚೆಂ ಸೊಡ್. ಆಲಿಯಾಚೆಂ ಚೀಂತ್! ಆನಿ ಗೆಲ್ಲ್ಯಾ ಕಡೆನ್ ತಾಚ್ಯೆ ಸಾಂಗಾತಾ ಸಮಾಧಾನೆನ್ ರಾವ್. ತುಜ್ಯಾ ಬಿಜ್ನೆಸಾಚೊ ಪ್ರಭಾವ್ ತಾಚ್ಯೆರ್ ಘಾಲಿನಾಕಾ. ಸಮ್ಜಾಲೆಂ....?"
ಪುತಾಕ್ ದಾಡುನ್ ದಿತಾನಾ ತಿಚ್ಯಾ ಮತಿಂತ್ ದೂಖ್ ಆಸ್ಲ್ಲೆಂ. ಹರ್ಯೆಕ್ ಘಡಿ ಆಪ್ಲ್ಯಾ ಘರಾಚಾ ಆನಿ ಆಪ್ಲ್ಯಾ ಬಾಪಾಯ್ಚಾ ವಿಶಿಂ ಚಿಂತ್ಚೊ ನಾಸಿರ್ ಆತಾಂ ಪಯ್ಸ್ ವೆತಾ ಮ್ಹಣ್ತಾನಾ ಆವಯ್ಚೆಂ ಕಾಳಿಜ್ ತರ್ಯ್ ತಾಕಾ ದಾಡುನ್ ದೀಂವ್ಕ್ ಮಾಂದ್ಲೆಂ ನಾ. ನಾಸಿರ್ ಆಪ್ಣಾ ಥಾವ್ನ್ ಫಕತ್ತ್ ದೋನ್ಚ್ ಹಪ್ತ್ಯಾಂಕ್ ಪಯ್ಸ್ ವೆತಾ ಮ್ಹಣೊನ್ ಜಾಣಾಂ ಆಸ್ಲ್ಯಾರ್ಯ್ ಆವಯ್ ಪುತಾ ಮಧೆಂ ವೆಗ್ಳಾಚಾರ್ ಮ್ಹಳ್ಳೊ ತೊ ಖಂಡಿತ್ ಆಸ್ಲ್ಲೊ.
"ಪುತಾ ಆಲಿಯಾ......? ತುಂ ಆಪ್ಲಿ ಚತ್ರಾಯ್ ಕರ್ ಆನಿ ಹಾಕಾಯ್ ತಿಕ್ಕೆ ಸಾಂಬಾಳ್!"
ಆಲಿಯಾ ಆನಿ ನಾಸಿರ್ ಕಾರಾರ್ ಬಸ್ತಾನಾ ಆಪ್ಲ್ಯಾ ಸುನೆಕ್ ಜಾಗಂವ್ಕ್ ಸುಲೇಮಾನ್ ವಿಸ್ರಾಲೊ ನಾ.
ಆಲಿಯಾನ್ ಸಗ್ಳ್ಯಾಕ್ಯ್ ತಕ್ಲಿ ಹಾಲಯ್ಲಿ ಶಿವಾಯ್ ತೆಂ ಕಾಂಯ್ಚ್ ಉಲಯ್ಲೆಂ ನಾ.
ಆಲಿಯಾಕ್ ಆನಿ ನಾಸಿರಾಕ್ ಆಪ್ಲ್ಯಾ ಉಸ್ಕ್ಯಾರ್ ಘೆತ್ಲೆಲೆಂ ಕಾರ್ ಏರ್ಪೋರ್ಟಾ ತೆವ್ಶಿಂ ಧಾವೊಂಕ್ ಲಾಗ್ಲೆಂ. ಏರ್ಪೋರ್ಟಾಚಾ ವಾಟೆರ್ ಆಸ್ಲ್ಲ್ಯಾ ಆಲಿಯಾಚಿ ಮತ್ ತಾಚ್ಯಾ ನಿಖಾ ಜಾಲ್ಲ್ಯಾ ಜಿವಿತಾಕ್ ನಿಯಾಳುಂಕ್ ಲಾಗ್ಲಿ.
ಆಪ್ಲೆಂ ನಿಖಾ ಜಾಲ್ಲ್ಯಾ ದಿಸಾ ಥಾವ್ನ್ ಸುಲೇಮಾನಾಚಾ ಕುಟ್ಮಾಂತ್ ಸಂಭಂಧ್ ಜೊಡ್ಲೆಲ್ಯಾ ಆಲಿಯಾನ್ ಆಪ್ಣಾಕ್ ಒಪ್ಸುನ್ ದಿಲ್ಲ್ಯಾ ಘರಾ ಆಪ್ಣಾಚೆಂ ಪಯ್ಲೆಂ ಮೇಟ್ ದವರ್ತಾನಾ, ತ್ಯಾ ಮೆಟಾ ಸಂಗಿಂ ಆಪ್ಣಾಕ್ ಸಾಂಗಾತ್ ದೀಂವ್ಕ್ ಆಸ್ಚಾ ಹ್ಯಾ ಘರಾಂತ್ಲ್ಯಾ ಸರ್ವ್ ಮೆಟಾಂಕ್ ಪಾರ್ಕುಂಚೆಂ ಪ್ರಯತ್ನ್ ಕೆಲ್ಲೆಂ.
ಎಕಾ ಘರಾಚಾ ವಾತಾವರಣಾಂತ್ ವಾಡೊನ್ ಆಯಿಲ್ಲ್ಯಾ ಚೆಡ್ವಾಕ್, ಅನ್ಯೇಕಾ ಘರಾಚಾ ವಾತಾವರಣಾಂತ್ ಜಿಯೆಂವ್ಕ್ ಆಸ್ಲ್ಲೆಂ ಆಸ್ತಾಂ ಎಕಾ ಘರಾ ಥಾವ್ನ್ ದುಸ್ರ್ಯಾ ಘರಾಕ್ ಮೇಟ್ ಕಾಡ್ಚೆಂ ತಿತ್ಲ್ಯಾ ಕಾಂಯ್ ಸುಲಾಭಾಯೆಚೆಂ ನ್ಹಯ್. ಆಲಿಯಾನ್, ಆಜ್ ತಾಚ್ಯಾ ನೊವ್ರ್ಯಾಚಾ ಘರ್ಚ್ಯಾ ಹರ್ಯೆಕ್ಲ್ಯಾಕ್ ಸಾರ್ಕೆಂ ಸಮ್ಜೊನ್ ಘೆಂವ್ಕ್ ಆಸ್ಲ್ಲೆಂ.
ಹ್ಯಾ ಸಮ್ಜೊನ್ ಘೆಂವ್ಚಾ ಪ್ರಯತ್ನಾಂತ್ ತೆಂ ಪಯ್ಲೆಂ ಆಪ್ಲ್ಯಾಚ್ ಘೊವಾಕ್ ಸಮ್ಜಾಲೆಂ. ಆವಯ್ ಆನಿ ಬಾಪಯ್ಚಿ ದೂಖ್, ಖಂತ್ ಹುಸ್ಕೊ ಭರೊನ್ ವೊಮ್ತಾತಾಲೊ ನಾಸಿರಾಚಾ ಕಾಳ್ಜಾಂತ್. ಖಂಯ್ಚಾಯ್ ವಿಶಯಾಕ್ ಜಾಲ್ಯಾರ್ಯ್ ಅಬ್ಬೂ.... ಅಮ್ಮೀ... ಮ್ಹಣಾನಾಸ್ತಾನಾ ನಾಸಿರ್ ಉಲಯ್ನಾತ್ಲ್ಲೊ.
ಚಲಿಯೆಚಾ ದುಖಿಕ್ ಚಲೊ ಹ್ಯಾ ಸಮಾಜೆಂತ್ ತಿತ್ಲೆಂ ಕಾಂಯ್ ಸ್ಪಂದನ್ ಕರಿನಾ ಮಳ್ಳೆಂ ತೆಂ ಆಲಿಯಾ ಪಯ್ಲೆಂಚ್ ಜಾಣಾಂ ಆಸ್ಲ್ಲೆಂ. ಪುಣ್ ಆಪ್ಲೊ ಘೊವ್ ಆಪ್ಲ್ಯಾ ಆವಯ್ಕ್ ಮಾನಾನ್ ಲೆಖ್ಚೆಂ ಪಳಯ್ತಾನಾ ನಿಜಾಯ್ಕ್ಯ್ ಚಲಿಯೆಚಾ ದೂಖಾಕ್ ನಾಸಿರ್ ಸ್ಪಂದನ್ ಕರುಂಕ್ ಸಕ್ತಾ ಮ್ಹಣೊನ್ ಆಲಿಯಾಕ್ ತಾಚ್ಯಾ ನಿಖಾ ಜಾಲ್ಲ್ಯಾ ದಿಸಾಚ್ ಕಳ್ಳೆಂ ಜಾಲ್ಯಾರ್ಯ್, ತ್ಯಾ ಆಪ್ಲ್ಯಾ ನಾಸಿರಾ ಸಾಂಗಾತಾಚಾ ಪಯ್ಲ್ಯಾ ರಾತಿಂ, ಜಿವಿತಾಂತ್ಲಿ ಆಪ್ಲ್ಯಾ ಆಂಕ್ವಾರ್ಪಣಾಕ್ ಸಾಂಡ್ಚ್ಯಾ ದುಖಿಕ್ ಆಪ್ಲ್ಯಾ ಘೊವಾನ್ ಕಾಂಯ್ಚ್ ಪರ್ವಾ ಕರುಂಕ್ ನಾತ್ಲೆಲಿ ಪಳವ್ನ್, ತ್ಯಾ ಪಯ್ಲ್ಯಾ ರಾತಿಂಚ್ ಆಲಿಯಾ ಜಾಣಾಂ ಜಾಲ್ಲೆಂ ಕೀ ಆಪ್ಲೊ ಘೊವ್ ಕೊಣಾಕ್, ಖಂಯ್, ಕಿತ್ಲೆಂ, ಕಶೆಂ ಸ್ಪಂದಿಸಿತಾ!
ನಾಸಿರಾನ್, ಆಪ್ಲ್ಯಾ ಆವಯ್ ಬಾಪಯ್ ಮುಕಾರ್, ಆಲಿಯಾಚಾ ಸಂಭಂಧಾಕ್ ತಾಂಚ್ಯಾ ಬರಾಬರಿಚಾ ನದ್ರೆನ್ ಪಳಂವ್ಕ್ಚ್ ನಾತ್ಲ್ಲೆಂ. ನಾಸಿರಾಚಾ ದಿಷ್ಟೆಂತ್, ತಾಚ್ಯಾ ಬಾಯ್ಲೆಕ್ ಅಜೂನ್ ಏಕ್ ಸ್ಥಾನ್ ದಿವಂವ್ಕ್ ತೊ ಸಲ್ವಾಲ್ಲೊ.
ನಾಸಿರಾ ಉಪ್ರಾಂತ್ ಆಲಿಯಾ ತಾಚ್ಯಾಚ್ ಮಾಂಯ್ ಮಾಂವಾಂಕ್ ಸಮ್ಜಾಲೆಂ. ಸುಲೇಮಾನ್ ತರ್ಯ್ ಆಪ್ಲ್ಯಾ ಸುನೆಚಾ ತೆವ್ಶಿಂ ಥೊಡೆಂ ಗುಮಾನ್ ದಿತಾಲೊ. ಸುನೆಚಾ ನವ್ಯಾಪಣಾಚಾ ಸಂಭಂಧಾಂತ್ ಗರ್ಜ್ ಪಡ್ಚಿ ಸರ್ವ್ ಮಾಹೆತ್ ಜಾಂವ್ ಯಾ ಬೂದ್ಬಾಳ್ ಜಾಂವ್ ತೊ ಸುನೆಕ್ ದಿತಾಲೊ. ಆಲಿಯಾ ಆಪ್ಲೆಂ ಘರ್ ಸೊಡುನ್ ಆಯಿಲ್ಲ್ಯಾ ದಿಸಾ ಥಾವ್ನ್ ಸುಲೇಮಾನಾಚಾ ಘರಾ ತೆಂ ಎಕ್ಸುರೆಂ ಮ್ಹಳ್ಳ್ಯಾಪರಿಂ ಜಾವ್ನ್ ತಾಣೆಂ ಎಕ್ಸುರ್ಪಣ್ ಭೊಗಾನಾಯೆ ಮ್ಹಣೊನ್ ಖಂಯ್ಚಾಯ್ತ್ಂಯ್ ತೊ ಸುನೆಚೊ ಉಡಾಸ್ ಕಾಡ್ತಾಲೊ ತರ್ಯ್ ಆಪ್ಲ್ಯಾ ಬಾಯ್ಲೆಚಾ, ನಾಸಿರಾಚಾ ಆವಯ್ಚಾ ಹರ್ಯೆಕಾ ಉತ್ರಾಕ್ ತೊ ಖಾಲ್ತಿಮಾನ್ ಘಾಲ್ತಾಲೊ. ಆಪ್ಲ್ಯಾ ಬಾಯ್ಲೆಚಾ ಉತ್ರಾಂಕ್ ಮಿರ್ವೊನ್ ಚಲ್ಚಿ ಸಕತ್ ಸುಲೇಮಾನಾಕ್ ನಾತ್ಲೆಲಿ. ಹ್ಯಾಚ್ ಖಾತಿರ್ ಘರಾಂತ್ ಸಗ್ಳೆಂ ಆಡಳ್ತೆಂ ಸುಲೇಮಾನಾಚಾ ಬಾಯ್ಲೆಚಾ ಉತ್ರಾ ವರ್ವಿಂಚ್ ಚಲ್ತಾಲೆಂ. ಕಿತೆಂ ಜಾಲ್ಯಾರ್ಯ್ ನಾಸಿರಾಚಾ ಆವಯ್ಚಿ ಪರ್ವಣ್ಗಿ ಹರ್ಯೆಕಾ ಸಂಗ್ತೆಕ್ ಗರ್ಜ್ ಆಸ್ಲ್ಲಿ.
ನಾಸಿರಾಚಿಂ ಭಾಂವ್ಡಾಂ ಮ್ಹಳ್ಯಾರ್ ತಾಚೆ ದೋಗ್ ಭಾವ್ ಆನಿ ತ್ಯಾ ದೊಗಾಂ ಭಾವಾಂ ಪಾಟ್ಲ್ಯಾನ್ ಎಕ್ಲೆಂಚ್ ಭಯ್ಣ್.
ನಾಸಿರಾಚೊ ಪಾಟ್ಲೊ ಭಾವ್ ಆಜ಼ಾದ್. ತಾಚೆಂ ಶಿಕಾಪ್ ಜಾವ್ನ್ ಆಪ್ಲ್ಯಾಚ್ ಬಾಪಾಯ್ಚಾ ಬಿಜ್ನೆಸಾಂತ್ ತೊ ಆಪ್ಲ್ಯಾ ಬಾಪಾಯ್ಕ್ ಸಾಂಗಾತ್ ದಿತಾಲೊ. ತೊ ಆಪ್ಲ್ಯಾ ಆವಯ್ ಪರಿಂ ಘರಾಂತ್ ಹುಕುಮ್ ಚಲವ್ನ್ ಆಪ್ಲೆಂ ಘಮಂಡ್ ದಾಖಂವ್ಚಾಂತ್ ಹುಶಾರ್ ಆಸ್ಲ್ಲೊ. ಹರ್ಯೆಕ್ ಘಡಿ ಆಪ್ಲ್ಯಾ ಮತ್ಲಬಾಕ್ ಸೊಡ್ಲ್ಯಾರ್ ದುಸ್ರ್ಯಾ ಖಂಯ್ಚಾಯ್ ವಿಶಯಾಂತ್ ಹೆರಾಂ ಸವೆಂ ತೊ ಮೆತೆರ್ ಜಾಯ್ನಾತ್ಲ್ಲೊ. ತೊ ಜಾಲೊ! ತಾಚೆಂ ಕಂಪ್ಯೂಟರ್ ರೂಮ್ ಜಾಲೆಂ! ಆಜ಼ಾದ್ ಹಾಂತುಚ್ಚ್ ಮೆತೆರ್ ಆಸ್ತಾಲೊ. ತಾಕಾ ಫಕತ್ತ್ ಶೇರ್ ಮರ್ಕೆಟಿಚಾ ವಿಶಯಾಚಿ ಚಡ್ ಮಾಹೆತ್. ಆಪ್ಲ್ಯಾ ಬಾಪಾಯ್ಚಾ ಸಾಂಗಾತಾ ತಾಣೆಂ ಜೊಡ್ಲೆಲಿ ಜೋಡ್ ತಾಣೆಂ ಶೇರ್ ಮಾರ್ಕೆಟಿಂತ್ ಇನ್ವೆಸ್ಟ್ ಕೆಲ್ಲಿ. ತಕ್ಲೆಂತ್ ಹುಶಾರ್ ತರ್ಯ್ ಆಪ್ಲ್ಯಾ ಸ್ವಾರ್ಥಿ ಸ್ವಭಾವಾ ವರ್ವಿಂ ಸುಲೇಮಾನಾನ್ ಆಜ಼ಾದಾ ವಯ್ರ್ ಪಾತ್ಯೆಣಿ ದವರಿನಾಸ್ತಾನಾ ನಿಸ್ವಾರ್ಥಿ ನಾಸಿರಾಚ್ಯಾ ಹಾತಿಂ ಬಿಜ್ನೆಸ್ ಚಲಂವ್ಕ್ ತಾಚ್ಯಾ ಬಿಜ್ನೆಸಾಚೆಂ ಸುಂಕಾಣ್ ದಿಲ್ಲೆಂ.
ಸುಲೇಮಾನಾಚೊ ತಿಸ್ರೊ ಪೂತ್ ಅಕ್ಲಕ್. ಎಮ್.ಬಿ.ಎ. ಚ್ಯಾ ನಿಮಾಣ್ಯಾ ವರ್ಸಾಚೆಂ ಆಪ್ಲೆಂ ಶಿಕಾಪ್ ಶಿಕ್ತಾಲೊ ಆಸ್ತಾನಾ ಅಕ್ಲಕ್, ನಾಸಿರಾಚಾ ಘರಾಣ್ಯಾಂತ್ ಸಂಪೂರ್ಣ್ ವಿಂಗಡ್ಚ್ ಸ್ವಭಾವಾಚೊ. ಚಡ್ಚ್ ಖುಶಾಲಿ ಸ್ವಭಾವಾಚೊ ಜಾವ್ನ್ ಹರ್ಯೆಕ್ ಘಡಿ ಕಾಂಯ್ ನಾ ತರ್ ಕಾಂಯ್ ಕರುನ್ ಹಾಸಯ್ತಾಲೊ ತರ್ ಆವಯ್ಚಾ ತೊಂಡಾ ಥಾವ್ನ್ ಗಾಳಿ ಸೊಂವೆ ಬರ್ಪೂರ್ ಖಾತಾಲೊ. ’ತೆಂ ಕರಿನಾಕಾರೆ’ ಮ್ಹಳ್ಯಾರ್ ’ಆಪುಣ್ ಕರ್ತಲೊಂ’ ಮ್ಹಳ್ಲ್ಯಾ ಸ್ವಭಾವಾಚೊ. ತಾಚ್ಯಾಚ್ ಬುದ್ವಂತ್ಕಾಯೆನ್ ತೊಚ್ ಕಿತೆಂಯ್ ಕರ್ತಾಲೊ ಸೊಡ್ಲ್ಯಾರ್ ಬಾಪಾಯ್ಕ್ ಜಾಂವ್ ಆವಯ್ಕ್ ಜಾಂವ್ ಎಕಾ ನಯಾ ಪಯ್ಶಾಚೆಂ ಫಾಯ್ದ್ಯಾಚೆಂ ಕಾಂಯ್ ಚಿಂತಿನಾತ್ಲ್ಲೊ. ಸುಲೇಮಾನಾಕ್ ತರ್ಯ್ ಆಪ್ಲ್ಯಾ ತಿಸ್ರ್ಯಾ ಪುತಾ ವಯ್ರ್ ಕಾಂಯ್ಚ್ ಭರ್ವಸೊ ನಾತ್ಲ್ಲೊ.
ನಾಸಿರಾಕ್ ಎಕ್ಚ್ಚ್ ಭಯ್ಣ್ ಸಲ್ಮಾ. ತೆಂ ಘರಾಂತ್ ಭುರ್ಗ್ಯಾಂ ಪಯ್ಕಿ ನಿಮಾಣೆಂ. ಘರ್ಚಾ ಕೊಂಡಾಟ್ಯಾಕ್ ಲಾಗೊನ್ ವಾ ಎಕ್ಚ್ ಧುವ್ ಆನಿ ಎಕ್ಚ್ಚ್ ಭಯ್ಣ್ ಮ್ಹಳ್ಳ್ಯಾ ಸಳ್ಗೆನ್ ಸಲ್ಮಾ ಗೂಣಾಂನಿ ಅಕ್ಲಕಾಕ್ ಕಾಂಯ್ ಸೊಡುನ್ ದೀನಾತ್ಲ್ಲೆಂ. ಆಪ್ಲ್ಯಾ ಸೊಭಾಯೆ ತೆವ್ಶಿಂ ಚಡ್ ಧ್ಯಾನ್ ದಿಂವ್ಚೆಂ ಸಲ್ಮಾ ವೊರಾನ್ ವೊರಾಂ ಆರ್ಶ್ಯಾ ಮುಕಾರ್ ರಾವ್ತಾಲೆಂ. ಆಪ್ಣಾಕ್ಚ್ ಸೊಭಯ್ತಾಲೆಂ. ತಾಚ್ಯಾ ವಾರ್ಡ್ ರೊಬಾಂತ್ ಆಸ್ಚಾ ತಾಚ್ಯಾ ವಸ್ತುರಾಂಕ್ ಲೇಖ್ಚ್ ನಾತ್ಲ್ಲೆಂ. ಪುಣ್ ಶಿಕ್ಪಾಂತ್ ಮಾತ್ರ್ ಚಡ್ ಹುಶಾರ್ ತಕ್ಲೆಚೆಂ. ಸುಲೇಮಾನಾಚಾ ಸಗ್ಳ್ಯಾ ಭುರ್ಗ್ಯಾಂ ಪ್ರಾಸ್ ಹುಶಾರ್ಗಾಯ್ ಸಲ್ಮಾಕ್ ಚಡ್ ಆಸ್ಲ್ಲಿ. ಆಪ್ಲ್ಯಾ ವ್ಹಡ್ಲ್ಯಾ ಭಾವಾ ವಯ್ರ್ ತಾಕಾ ಕಸಲೊಗೀ ಏಕ್ ವರ್ತೊ ಅಭಿಮಾನ್. ತಾಕಾ ತೆಂ ಚಡ್ ಮಾನ್ ದಿತಾಲೆಂ. ನಾಸಿರ್ ಜಾಲ್ಯಾರ್ಯ್ ಆಪ್ಲ್ಯಾ ಭಯ್ಣಿಕ್ ಕಾಂಯ್ಚ್ ಉಣೆಂಪಣ್ ಭೊಗುಂಕ್ ದೀನಾತ್ಲ್ಲೊ. ಆಪ್ಲ್ಯಾ ಆವಯ್ ಬಾಪಯ್ ಪ್ರಾಸ್ ವ್ಹಡ್ಲೊ ಭಾವ್ಚ್ ತಾಕಾ ಸರ್ವಸ್ವ್. ಹ್ಯಾ ಎಕಾಚ್ ಇರಾದ್ಯಾಕ್ ಲಾಗೊನ್, ಆಲಿಯಾಚಾ ವಯ್ರ್ ಸಲ್ಮಾಕ್ ಅಭಿಮಾನ್.
ಫಕತ್ತ್ ದೋನ್ ದಿಸಾಂ ಭಿತರ್ ಆಲಿಯಾನ್ ತಾಕಾ ನಿಖಾ ಕರುನ್ ದಿಲ್ಲ್ಯಾ ಘರ್ಚ್ಯಾ ಸಾಂದ್ಯಾಂ ವಿಶ್ಯಾಂತ್ ಕೋಣ್ ಕಶೆಂ ಮ್ಹಳ್ಳ್ಯಾ ವಿಶಿಂ ಮಾಹೆತ್ ಆಪ್ಣಾಯ್ಲಿ. ತಶೆಂ ಆಲಿಯಾ ಆಪ್ಲ್ಯಾ ಘೊವಾಚ್ಯಾ ಹ್ಯಾ ಸಗ್ಳ್ಯಾ ಕುಟ್ಮಾಕ್ ಪಯ್ಲೆಂ ಥಾವ್ನ್ ವಳ್ಕಾತಾಲೆಂ ಜಾಲ್ಯಾರ್ಯ್ ಇತ್ಲ್ಯಾ ಲಾಗಿಂ ಥಾವ್ನ್ ತೆಂ ತಾಂಕಾ ವಳ್ಕೊನ್ ನೆಣಾಂ.
ಮನ್ಶ್ಯಾಂಕ್ ಪಾರ್ಕುಂಚಾಂತ್ ಆಲಿಯಾ ಕಾಂಯ್ ಉಣೆಂ ನಾತ್ಲ್ಲೆಂ. ತಾಚ್ಯಾ ಜಿವಿತಾಂತ್ ತಾಣೆಂ ವ್ಹಾರಾವ್ನ್ ಪಳೆಲ್ಲಿಂ ಚಿಂತ್ನಾ, ಭಾಯ್ಲ್ಯಾ ಸಂಸಾರಾಂತ್ಲಿಂ ಘಡಿತಾಂ, ತಾಕಾ ಸಂಸಾರ್ ಮ್ಹಳ್ಯಾರ್ ಕಿತೆಂ? ಆನಿ ಹ್ಯಾ ಸಂಸಾರಾಂತ್ಲೊ ಕೋಣ್ ಮನಿಸ್ ಕಸೊ ಆಪ್ಲ್ಯಾ ಕರ್ನ್ಯಾಂನಿ ಆನಿ ಉಲವ್ಣ್ಯಾಂತ್ ಆಪ್ಣಾಚಿ ವಳಕ್ ದಾಖಯ್ತಾ ಮ್ಹಣೊನ್ ತಾಕಾ ಶಿಕಯಿಲ್ಲೆಂ.
ಆಲಿಯಾ ಆನಿ ನಾಸಿರ್ ಬಸ್ಲೆಲೆಂ ಕಾರ್ ಏರ್ಪೊರ್ಟಾ ತೆವ್ಶಿಂ ಧಾಂವ್ತಾಲೆಂ.
ಹ್ಯಾ ಧಾಂವ್ಣೆಂತ್ ನಾಸಿರ್ ಕಾಂಯ್ ಉಲಯ್ಲೊ ನಾ. ತಶೆಂಚ್ ಕಾರಾಚಾ ಆರ್ಶ್ಯಾ ಥಾವ್ನ್ ಭಾಯ್ರ್ ಪಳವ್ನ್ ಆಸ್ಲೆಲ್ಯಾ ಆಲಿಯಾನ್ ಪರ್ತ್ಯಾಕ್ ಆಪ್ಲ್ಯಾ ಮತಿಕ್ ಪಾಟಿಂ ಧಾಂವ್ಡಾಯ್ಲೆಂ. ತೆಂ ನಾಸಿರಾಚಾ ಕುಟ್ಮಾಕ್ ಸಮ್ಜೊಂಕ್ ಪ್ರಯತ್ನ್ ಕರ್ತಾಲೆಂ. ನಾಸಿರಾ ಸಂಗಿಂ ತಾಚೆಂ ಜೀವನ್ ಸುಖಾಭರಿತ್ ಜಾಂವ್ಕ್ ಜಾಯ್ ಜಾಲ್ಯಾರ್ ಪಯ್ಲೆಂ ತಾಣೆಂ ತಾಕಾ ನಿಖಾ ಕರುನ್ ದಿಲ್ಲ್ಯಾ ಘರಾ ವಿಶಿಂ ಸವಿಸ್ತಾರ್ ರಿತಿರ್ ಜಾಣಾಂ ಜಾಂವ್ಕ್ ಜಾಯ್ ಆಸ್ಲ್ಲೆಂ.
"ಗುಲೊಬಾಚೆಂ ಫುಲ್ ಪಳಂವ್ಕ್ ಸಗ್ಳ್ಯಾ ಫುಲಾಂ ಪ್ರಾಸ್ ಸೊಭಿತ್ ಮ್ಹಣೊನ್, ಅಖ್ಖ್ಯಾ ಪೃಥುವೆರ್ ಅಲ್ಲಾತಲಾಕ್ ಗುಲೊಬ್ಚ್ ಫುಲಂವ್ಕ್ ಸಾದ್ಯ್ ಆಸಾ. ಪುಣ್ ತಾಣೆಂ ತಶೆಂ ಕರುಂಕ್ ನಾ.....! ಕಿತ್ಯಾಕ್ ಜಾಣಾಂಯ್? ಹರ್ಯೆಕಾ ಫುಲಾ ಥಾವ್ನ್ ಖಂಯ್ ನಾ ಜಾಲ್ಯಾರ್ ಖಂಯ್ ಮನ್ಶ್ಯಾ ಜಾತಿನ್ ಲಿಸಾಂವ್ ಶಿಕೊಂಕ್ ಆಸಾ. ತ್ಯಾ ಪಾಸೊನ್!"
ಆಲಿಯಾಕ್, ಆಪ್ಲ್ಯಾ ಭುರ್ಗ್ಯಾಪಣಾ ವಯ್ಲಿಂ, ಆಜಿಯೆಚಿಂ ಉತ್ರಾಂ ಉಡಾಸಾಕ್ ಆಯ್ಲಿಂ. ತಿಣೆಂ ಉಲಂವ್ಚಾ ಹರ್ಯೆಕಾ ಉತ್ರಾಂನಿ ರಾಜಾಂವ್ ಆಸ್ಲ್ಲೆಂ. ಜಿವಿತಾ ಸಂಗಿಂ ತ್ಯಾ ಉತ್ರಾಂಚೊ ಮತ್ಲಾಬ್ ಅಸ್ತಾಲೊ. ಆಜ್ ಆಲಿಯಾಕ್ ಹ್ಯಾ ಉತ್ರಾಂಚೊ ಮತ್ಲಾಬ್ ಸಮ್ಜೊನ್ ಆಯ್ಲೊ.
ಪುಣ್ ತ್ಯಾ ಸರೊನ್ ಗೆಲ್ಲ್ಯಾ ವಗ್ತಾರ್......?
"ನಾನೀ.... ತಿಂ ಭುರ್ಗಿಂ ರಸ್ತ್ಯಾ ದೆಗೆನ್ ಕಶಿಂ ಪಾವ್ತಾತ್? ತಾಂಕಾಂ ಮ್ಹಜೆ ಪರಿಂ ಅಬ್ಬೂ ಆನಿ ಅಮ್ಮಿ ನಾಂತ್...?"
ಆಲಿಯಾಕ್ ಘೆವ್ನ್ ಶಬೀರ್ ಆಪ್ಲ್ಯಾ ಕುಟ್ಮಾ ಸವೆಂ ಸಾಂಜೆರ್ ಭಾಯ್ರ್ ವೆತಾನಾ ರಸ್ತ್ಯಾ ದೆಗ್ಗೆಚಾ ಪುಟ್ಪಾತಿರ್ ಕಾಂಯ್ಚ್ ಪಿಕಿರ್ ನಾಸ್ತಾಂ ಖೆಳೊನ್ ಆಸ್ಲ್ಲ್ಯಾ, ಮೆಳ್ಕುಟ್ಯಾ ವಸ್ತ್ರಾಂಕ್ ಆಂಗಾರ್ ಅರ್ಧೆಂ ಗಳವ್ನ್, ಆಪ್ಲ್ಯಾ ಖೆಳಾಂತ್ ಸಂಸಾರ್ ವಿಸ್ರಾಲ್ಲ್ಯಾ ತ್ಯಾ ತೆಗಾಂ ಲ್ಹಾನ್ ಭುರ್ಗ್ಯಾಂಕ್ ಪಳವ್ನ್, ಭಿರ್ಮತ್ ಪಾವೊನ್ ಆಲಿಯಾನ್ ಆಪ್ಲ್ಯಾ ಆಜಿಯೆಕ್ ಸವಾಲ್ ಕೆಲ್ಲೆಂ.
"ಅಬ್ಬೂ ಆನಿ ಅಮ್ಮಿ ಸಗ್ಳ್ಯಾಂಕ್ ಆಸಾತ್ ಬೇಟಾ! ಹೊ ಹಾಂಚೊ ಸಂಸಾರ್....! ತುವೆಂ ರಾಂವ್ಚೊ ತುಜೊ ಸಂಸಾರ್!"
"ತಾಂಕಾಂ ಆಮ್ಚಾ ಸಂಸಾರಾಂತ್ ಕಿತ್ಯಾಕ್ ಯೇಂವ್ಕ್ ಜಾಯ್ನಾಂ?" ಆಲಿಯಾಚೆಂ ನೆಣ್ತೆಂ ಸವಾಲ್.
"ಯೇಂವ್ಕ್ ಜಾಯ್ನಾಂ? ಕೊಣೆಂ ಸಾಂಗ್ಲೆಂ ಯೆಂವ್ಕ್ ಜಾಯ್ನಾಂ? ಕೊಣಾಯ್ಕ್ಯ್ ಕೊಣಾಯ್ಚಾ ಸಂಸಾರಾಂತ್ ಯೇಂವ್ಕ್ ವಚೊಂಕ್ ಜಾತಾ! ತುಕಾಯ್ ಜಾಯ್ ಜಾಲ್ಯಾರ್ ತಾಂಚಾ ಸಂಸಾರಾಂತ್ ವಚೊಂಕ್ ಜಾತಾ. ತುವೆಂ ನ್ಹೆಸ್ಲಲೆಂ ಹೆಂ ಸೊಭಿತ್ ವಸ್ತುರ್ ಕಾಡುನ್ ತಾಂಚೆಂ ವಸ್ತುರ್ ನ್ಹೆಸೊನ್ ತುಕಾ ತಾಂಚ್ಯೆ ಸಾಂಗಾತಾ ತ್ಯಾ ಪುಟ್ಪಾತಿಚೆರ್ ಖೆಳೊಂಕ್ ಜಾತಾ?"
"........."
ಆಜಿಯೆಚಾ ಸವಾಲಾಕ್ ಆಲಿಯಾ ಚಿಂತುಂಕ್ ಪಡ್ಲೆಂ. ಎಕಾ ಕ್ಷಣಾಕ್ ಮತಿಂತ್ಚ್ ತ್ಯಾ ಭುರ್ಗ್ಯಾಂಚಾ ವಸ್ತುರಾ ವಯ್ರ್ ತಾಕಾ ಕಾಂಟಾಳೊ ಅಯ್ಲೊ. ಕಿತ್ಲೆ ದೀಸ್ ತಿಂ ನ್ಹಾಂವ್ಕ್ ನಾಂತ್ ಕೋಣ್ ಜಾಣಾಂ? ಆಪ್ಣಾಚಿ ಕಾತ್ ಕಿತ್ಲಿ ಗೊರಿ ಆಸಾ ತಿತ್ಲಿಚ್ ತಾಂಚಿ ಕಾತ್ ಕಾಳಿ ಆಸಾ. ಎಕ್ಲ್ಯಾಕ್ ತಾಚೆಂ ನಾಕ್ ಪಿಳುಂಕ್ಯ್ ವಿಸ್ರೊಣಿ ಪಡ್ಲ್ಲಿ. ತಾಚ್ಯಾ ನಾಕಾ ಥಾವ್ನ್ ದೆಂವ್ಲಲೆಂ ಕಿರ್ಮೆಂ ತಾಚ್ಯಾ ತೊಂಡಾಕ್ ವೆತಾಲೆಂ ಜಾಲ್ಯಾರ್ಯ್ ತಾಕಾ ಕಾಂಯ್ ಖಬಾರ್ ನಾತ್ಲೆಲಿ. ತಾಂಚೆ ಕೇಸ್ ಆಸ್ವೆಲಾಚಾ ಕೆಸಾಂ ಭಾಶೆನ್ ಭಿಜುಡ್ಲೆಲೆ. ಎಕ್ಲ್ಯಾಚಿ ಚಡ್ಡಿ ಪೆಂಕ್ಟಾರ್ ರಾವಾನಾಸ್ತಾನಾ, ಗಳ್ಚಾ ಚಡ್ಡೆಕ್ ಹಾತಿಂತ್ ವೊಡುನ್ ಧರುನ್ಯ್ ತಾಂಚೊ ಖೆಳ್ ಚಾಲುಚ್ ಆಸ್ಲ್ಲೊ.
ಆಲಿಯಾ ತ್ಯಾ ಭುರ್ಗ್ಯಾಂಕ್ಚ್ ಪಳೆತಾಲೆಂ.
"ಪುತಾ ಆಲಿಯಾ.... ತುಕಾ ತಾಂಚಾ ಸಂಸಾರಾಂತ್ ವಚೊಂಕ್ ಮಸ್ತ್ ಕಷ್ಟ್! ತಾಂಕಾಂ ಆಮ್ಚಾ ಸಂಸಾರಾಂತ್ ಯೆಂವ್ಕ್ ಕಷ್ಟ್! ಸಗ್ಳ್ಯಾಂಕ್ ತಾಂಚೊ ತಾಂಚೊ ಮ್ಹಳ್ಳೊ ಏಕ್ ಸಂಸಾರ್ ಆಸಾ. ತುಂ ಆಮ್ಚಾ ಸಂಸಾರಾಂತ್ ಜಲ್ಮಾಲಾಂಯ್. ತಶೆಂ ಆಸ್ತಾನಾ ತುವೆಂ ಆಮಿಂ ಚಲ್ಚ್ಯಾ ಪರಿಂ ಚಲೊಂಕ್ ಆಸಾ. ತುಕಾ ಪಳೆ ಕಿತ್ಲೆಂ ಬರೆಂ ಮೆಳ್ಳಾಂ. ತ್ಯಾ ಭುರ್ಗ್ಯಾಂಕ್ ತುಜ್ಯಾಂತ್ಲೆಂ ಕಾಂಯ್ಚ್ ಮೆಳೊಂಕ್ ನಾ. ದೆಕುನ್ ಖುದಾಚೊ ಉಪ್ಕಾರ್ ಬಾವೊಡ್....! ಖುದಾನ್ ತುಕಾ ಸಗ್ಳೆ ದಿಲಾಂ ದೆಕುನ್ ತಾಕಾ ಅರ್ಗಾಂ ದೀ.....!"
ಆಜಿಯೆಚ್ಯಾ ಉತ್ರಾಂಕ್ ಆಲಿಯಾ ಮೌನ್ಪಣಿಂ ಆಯ್ಕಾತಾಲೆಂ.
ತೆದ್ನಾಂ ತಿಚ್ಯಾ ಹ್ಯಾ ಉತ್ರಾಂನಿ ಆಸ್ಲೆಲಿ ಜಾಣ್ವಾಯ್ ನೆಣ್ತ್ಯಾ ಆಲಿಯಾಚಾ ಮತಿಕ್ ರಿಗೊಂಕ್ ನಾತ್ಲ್ಲಿ. ತೆಂ ಫಕತ್ತ್ ತ್ಯಾ ತಿಚ್ಯಾ ಉತ್ರಾಂಕ್ ಮತಿಂತ್ ಆಟಯ್ತಾಲೆಂ. ಹ್ಯಾ ತಾಚ್ಯಾ ಆಟವ್ಣೆಂತ್ ಸಭಾರ್ ಸವಾಲಾಂ ತಾಚ್ಯಾ ದೊಳ್ಯಾಂ ಮುಕಾರ್ ಉಭಿಂ ಜಾತಾಲಿಂ. ತ್ಯಾ ಸವಾಲಾಂಕ್ ತಾಚಿ ಆಜಿ ಹಾಸೊನ್ ಹಾಸೊನ್ ನೆಗಾರ್ ಕರ್ತಾಲಿ. ತ್ಯಾ ಆಲಿಯಾಚಾ ಸವಾಲಾಂಕ್ ಖುದ್ದ್ ತಿಚ್ಯಾ ಲಾಗಿಂ ಜಾವಾಬಿ ನಾತ್ಲಲ್ಯೊ. ಆಶೆಂ ಆಲಿಯಾಚಿಂ ಸವಾಲಾಂ ನೆಣ್ತಿಂ ಆನಿ ನೆಣಾರ್ಪಣಾಚಿಂ ಜಾಲ್ಲ್ಯಾನ್ ಆಲಿಯಾಕ್ ಜಾಣ್ವಾಯ್ ಭರ್ತಾನಾ ತೆಂ ಖುದ್ದ್ ಜಾವ್ನ್ ಸಗ್ಳೆಂ ಸಮ್ಜಾತೆಲೆಂ. ಆಶೆಂ ತಿ ಚಿಂತಾಲಿ. ಪುಣ್ ತಿ ಹೆಂ ನೆಣಾಂ ಆಸ್ಲ್ಲಿ ಕೀ ತಿಣೆ ನೆಣ್ತೆಂ ಮ್ಹಣೊನ್ ಚಿಂತ್ಚೆಂ ಆಲಿಯಾ ಆಪ್ಲ್ಯಾ ಮತಿಂತ್ಲ್ಯಾ ಸವಾಲಾಂ ಸಾಂಗಾತಾ ಆಪ್ಲ್ಯಾ ಭೊಂವಾರಿಕ್ ಆನಿ ಆಪ್ಣಾಕ್ ತುಕೊನ್ ಪಳೆತಾ ಮ್ಹಳ್ಳೆಂ ತೆಂ!
ಆಜ್ ಆಲಿಯಾಚೆಂ ನಿಖಾ ಜಾವ್ನ್ ತೆಂ ನಾಸಿರಾಚಾ ಘರಾ ಯೆತಾನಾ ಜಾಲ್ಯಾರ್ಯ್ ಆಶೆಂಚ್ ಘಡ್ಲೆಂ. ಆಲಿಯಾನ್ ಆಪ್ಣಾಕ್ ಆನಿ ಆಪ್ಣಾಕ್ ಒಪ್ಸುನ್ ದಿಲ್ಲ್ಯಾ ಹ್ಯಾ ಘರಾಕ್ ತುಕೊನ್ ಪಳೆತಾನಾ ತಾಕಾ ಆಪ್ಲೊ ಸಂಸಾರ್ ಆನಿ ನಾಸಿರಾಚೊ ಸಂಸಾರ್ ವಿಂಗಡ್ಚ್ ದಿಸ್ಲೊ. ತ್ಯಾ ಸವೆಂ ನಾಸಿರಾಚ್ಯಾ ಘರಾ ಜೆಯೆತೆಲ್ಯಾಂಚೊ ಸಂಸಾರ್! ಎಕೇಕ್ಲಿಂ ಎಕೇಕಾ ಸಂಸಾರಾಂತ್....!
ಆಪ್ಣೆ ಜಲ್ಮ್ ಘೆತ್ಲೆಲ್ಯಾ ಘರಾ ಕಶೆಂ ಎಕೇಕ್ಲಿಂ ಎಕೇಕಾ ವ್ಯಕ್ತಿತ್ವಾಚಿಂ ಜಿಯೆತಾಲಿಂ ತಶೆಂಚ್ ಹಾಂಗಾಸರ್ಯ್ ಹರ್ಯೆಕ್ಲಿಂ ಆಪಾಪ್ಲ್ಯಾ ವ್ಯಕ್ತಿತ್ವಾಂತ್ ಜಿಯೆತಾನಾ, ಹ್ಯಾ ಸರ್ವ್ ವ್ಯಕ್ತಿತ್ವಾಂ ಸಂಗಿಂ ಆಪುಣ್ ಕಶೆಂ ಹೊಂದೊನ್ ಜಿಯೆಂವ್ಕ್ ಪಾವ್ತೆಲಿಂ? ಆಪ್ಣೆಂ ಜಲ್ಮ್ ಘೆತ್ಲೆಲ್ಯಾ ಘರಾಚ್ ಆಪ್ಣಾಕ್ ಹೆಂ ಸಾದ್ಯ್ ಜಾಂವ್ಕ್ ನಾತ್ಲ್ಲೆಂ ತರ್ ಹಾಂಗಾ....?
ಆಲಿಯಾಚಾ ಮತಿಂತ್ ಹೆಂ ಸವಾಲ್ ಭಳಾದೀಕ್ ಜಾವ್ನ್ ಉಭೆಂ ಜಾಲ್ಲೆಂ.
ತ್ಯಾ ಆಪ್ಲ್ಯಾ ಜಲ್ಮ್ ಘೆತ್ಲೆಲ್ಯಾ ಘರಾಂತ್ ಆಪುಣ್ ಎಕ್ಸುರಿಂ ಜಾಲ್ಲಿಂ ವ್ಹಯ್! ಪುಣ್ ಹಾಂಗಾಸರ್ ಹಾಂವ್ ಎಕ್ಸುರಿಂ ನ್ಹಯ್. ಹಾಂಗಾಸರ್ ಮ್ಹಜೊ ಘೊವ್ ಆಸಾ. ಮ್ಹಾಕಾ ಸಾಂಬಾಳುಂಕ್ ಮ್ಹಜೊ ಹಾತ್ ಧರ್ಲಲೊ ಮ್ಹಜೊ ನಾಸಿರ್ ಆಸಾ. ತೊ ಸಂಗಿಂ ಆಸ್ತಾನಾ.... ತಾಣೆಂ ಮ್ಹಾಕಾ ಸಮ್ಜಾತಾನಾ.... ತಾಚ್ಯೆ ಸಾವ್ಳೆಂತ್ ಹಾವೆಂ ವಿಶೆವ್ ಘೆತಾನಾ ಮ್ಹಾಕಾ ಎಕ್ಸುರ್ಪಣ್.....? ಛೆ.... ಆಲಿಯಾನ್ ಆಪ್ಲ್ಯಾ ಘೊವಾ ವಯ್ರ್ ಆಪ್ಲೊ ಭರ್ವಸೊ ದವರ್ಲ್ಲೊ. ಜಶೆಂ ನಿಖಾ ಜಾವ್ನ್ ಯೆಂವ್ಚೆ ಹರ್ಯೆಕ್ ಚಲಿ ಆಪ್ಲ್ಯಾ ಹ್ಯಾ ಧಯ್ರಾಧೀಕ್ ಮೆಟಾರ್ ಆಪ್ಲ್ಯಾ ಘೊವಾಕ್ಚ್ ಸಂಪೂರ್ಣ್ ಪಾತ್ಯೆವ್ನ್ ಯೆತಾ ತಶೆಂ ಆಲಿಯಾನ್ ಆಪ್ಲ್ಯಾ ಮತಿಕ್ ಆನಿ ಕಾಳ್ಜಾಕ್ ಸಮಾಧಾನ್ ಆನಿ ಧಯ್ರ್ ದಿಲ್ಲೆಂ. ಪುಣ್.....?
ನಿಖಾ ಜಾವ್ನ್ ಆಯಿಲ್ಲ್ಯಾ ಆಲಿಯಾನ್ ದೋನ್ಚ್ ದಿಸಾಂ ಭಿತರ್ ಆಪ್ಲ್ಯಾ ಘೊವಾಕ್ ಆನಿಂ ತಾಚ್ಯಾ ಘರ್ಚಾಂಕ್ ಪಾರ್ಕಿಲ್ಲೆಂ. ಹ್ಯಾ ಪಾರ್ಕೊವ್ಣೆಂತ್ ತಾಣೆಂಚ್ ತಾಚ್ಯಾ ಕಾಳ್ಜಾಕ್ ದಿಲ್ಲೆಂ ಧಯ್ರ್ ಖಂಯ್ಚರ್ಗೀ ಆಪ್ಣಾಕ್ ಸೊಡುನ್ ತ್ಯಾ ಮೊಳಾಬಾರ್ ಉಭ್ತಾ ತಶೆಂ ತಾಕಾ ಜಾಲ್ಲೆಂ. ತಾಚೊ ಭರ್ವಸೊ ತುಟೊನ್ ಗೆಲ್ಲೊ. ತಾಚಿ ಪಾತ್ಯೆಣಿ ವ್ಹಾಳೊನ್ ಗೆಲ್ಲಿ. ನಿಖಾ ಜಾವ್ನ್ ಆಯ್ಲೆಲ್ಯಾ ನವ್ಯಾ ಹೊಕ್ಲೆಚಾ ಮತಿಂತ್ ಆಸೊಂಕ್ ಜಾಯ್ ಜಾಲ್ಲೊ ಸಂತೊಸ್ ಆನಿ ಖುಶಾಲ್ಕಾಯ್ ಆಲಿಯಾಚಾ ಮತಿಂತ್ ಥಾವ್ನ್ ನಪಂಯ್ಚ್ ಜಾವ್ನ್ ತೆಂ ಖಂತೀಶ್ಟ್ ಜಾಲೆಂ.
"ಆಲಿಯಾ...., ತುಂ ಹ್ಯಾ ಘರಾಕ್ ಕಾಂಯ್ ನವೆಂ ನ್ಹಯ್. ಆಮ್ಚಾ ಘರಾ ವಿಶಿಂ ತುಂ ಸಗ್ಳೆಂ ಜಾಣಾಂಯ್. ತಶೆಂ ಆಸ್ತಾನಾ......" ಕಾಲ್ಚ್ಯಾ ರಾತಿಕ್ ನಾಸಿರ್ ಆಪ್ಲ್ಯಾ ಬಾಯ್ಲೆಚೆಂ ಬಾವ್ಲೆಲೆಂ ಮುಖಮಳ್ ಪಳವ್ನ್, ಆಪ್ಲ್ಯಾ ಖಾಟಿಯೆರ್ ಬಸ್ತಾನಾ ಉಲಯಿಲ್ಲೊ.
"........."
ಆಲಿಯಾ ಕಾಂಯ್ಚ್ ಉಲಯ್ಲೆಂ ನಾ ತರ್ಯ್ ಮತಿಂತ್, ಆಪ್ಣೆ ಆಪ್ಲ್ಯಾ ಘೊವಾಕ್ ಪಾರ್ಕುನ್, ಮತಿಂತ್ ಉಟ್ಲೆಲ್ಯಾ ಸವಾಲಾಂನಿ ಬದ್ಲುನ್ ಸೊಡ್ಲೆಲ್ಯಾ ತಾಚ್ಯಾ ಮುಖಮಳಾಚಾ ಜಿನೊಸಾಕ್ ಮಾತ್ರ್ ತೆಂ ಬದ್ಲುಂಕ್ ಸಕ್ಲೆಂ ನಾ.
"ಆಲಿಯಾ..... ಕಿತೆಂ ಜಾಲೆಂ ಆತಾಂ?" ಆಪ್ಲಿ ಬಾಯ್ಲ್ ಖಂತೀಶ್ಟ್ ಜಾಲ್ಲ್ಯಾಚೊ ಮತ್ಲಾಬ್ ತಾಕಾ ಸಮ್ಜಾಲೊ ನಾ.
"ಫಾಲ್ಯಾಂ ಆಮಿಂ ಹನಿಮೂನಾಕ್ ವೆಚೆಂ ತುಕಾ ಪಸಂದ್ ನಾ?"
".........."
ಆಲಿಯಾಚೆಂ ತೆಂಚ್ ಮೌನ್.
"ಕಮಾನ್ ಆಲಿಯಾ....., ಆತಾಂ ಜಾಲಾಂ ಕಿತೆಂ ಸಾಂಗ್? ಆಮಿಂ ಹನಿಮೂನಾಕ್ ವೆಚೆಂ ತುಕಾ ಪಸಂದ್ ನಾ ಜಾಲ್ಯಾರ್ ಮ್ಹಜಿ ಕಾಂಯ್ ವತ್ತಾಯ್ ನಾ. ಮ್ಹಾಕಾ ಪಯ್ಲೆಂಚ್ ಮನ್ ನಾತ್ಲ್ಲೆಂ! ಹಾವೆಂ ಅಬ್ಬೂಕ್ ಸಾಂಗ್ಲೆಲೆಂ ಹಾಂವ್ ನಾ ಜಾಲ್ಯಾರ್ ಹಾಂಗಾ ಬಿಜ್ನೆಸ್....."
ನಾಸಿರ್ ಉಲಯ್ತಾನಾ, ಆಲಿಯಾನ್ ’ಸಟ್ಟ್’ ಕರುನ್ ಆಪ್ಲಿ ತಕ್ಲಿ ವಯ್ರ್ ಉಕ್ಲುನ್ ನಾಸಿರಾಕ್ ಪಳೆಲೆಂ.
"ತರ್ ತುಂ ಮ್ಹಜ್ಯಾ ಮೊಗಾನ್ ಹನಿಮೂನಾಕ್ ಭಾಯ್ರ್ ಸರೊಂಕ್ ನಾಂಯ್?" ಆಲಿಯಾ ಆಪ್ಲ್ಯಾ ದೊಳ್ಯಾಂಚಾ ತೀಕ್ಷ್ಣ್ ನದ್ರೆನ್ಚ್ ಉಲಯ್ಲೆಂ. ತೊಂಡಾ ಥಾವ್ನ್ ತೆಂ ಕಶೆಂ ವಿಚಾರ್ತೆಲೆಂ?
"ವಾಟ್ ಹ್ಯಾಪನ್ಡ್? ......ಕಿತೆಂ ಜಾಲೆಂ?"
ಎಕಾಚ್ಚ್ ಫರಾ ಆಲಿಯಾಚ್ಯಾ ಬದ್ಲಾಲ್ಲ್ಯಾ ಜಿನೊಸಾಚೆಂ ಕಾರಾಣ್ ಕಿತೆಂ ಮ್ಹಳ್ಳೆಂ ತೆಂ ನಾಸಿರಾಕ್ ಕಳ್ಳೆಂ ನಾ.
"ಕಾಂಯ್ ನಾ....!" ಆಲಿಯಾನ್ ವ್ಹಳೂ ಶಾಂತ್ಪಣಿಂ ಜಾಪ್ ದಿಲಿ.
ಹನಿಮೂನಾಕ್ ವೆಚೆಂ ನಾಕಾ ಮ್ಹಣೊನ್ ತೆಂ ತರ್ಯ್ ಕಶೆಂ ಸಾಂಗ್ತೆಲೆಂ? ಆಪ್ಣೆಂ ನಾಕಾ ಮ್ಹಳ್ಯಾರ್ ನಾಸಿರ್ ಖಂಡಿತ್ ಹನಿಮೂನಾಕ್ ಭಾಯ್ರ್ ಸರಾನಾ ಮ್ಹಣೊನ್ ನಾಸಿರಾಚಾ ಉಲವ್ಣ್ಯಾನ್ಚ್ ಆಲಿಯಾಕ್ ಕಳಿತ್ ಜಾಲೆಂ.
"ತಶೆಂ ಕಾಂಯ್ ನಾ. ಮ್ಹಾಕಾ...... ಘರ್ಚೊ ಉಡಾಸ್ ಆಯ್ಲೊ!"
ಮತಿಂತ್ಲ್ಯಾ ಚಿಂತ್ನಾಂಕ್ ಆಪ್ಲ್ಯಾ ಪಟ್ಕಿರ್ಯಾ ಜವಾಬೆ ಥಾವ್ನ್ ಆಲಿಯಾನ್ ಲಿಪಂವ್ಚೆಂ ಪ್ರಯತ್ನ್ ಕೆಲೆಂ.
"ಓ.ಕೆ., ತುಂ ಘರಾ ಟೆಲಿಫೋನ್ ಕರ್. ತಾಂಚೆಲಾಗಿಂ ಉಲಯ್ತಾನಾ ತುಜಿ ಮತ್ ಥೊಡಿ ಹಾಳು ಜಾತೆಲಿ! ತಶೆಂಯ್ ತುವೆಂ ಹಾಂಗಾ ಭಿಯೆಂವ್ಚಿ ಕಾಂಯ್ ಗರ್ಜ್ ನಾ!"
"ಭಿರಾಂತ್ ಕಸಲಿ? ಮ್ಹಾಕಾ ಕಾಂಯ್ ಹಾಂಗಾ ಕೋಣ್ಯ್ ನವೆಂ ನ್ಹಯ್. ಪುಣ್....!"
"ಪುಣ್ ಕಿತೆಂ?"
"ಪುಣ್ ಮ್ಹಜೊ ಸಂಭಂಧ್ ನವೊ ನಾಸಿರ್! ಹೆಂ ತುಂ ಜಾಣಾಂ ಜಾಲ್ಲೊಯ್ ಜಾಲ್ಯಾರ್.....!?"
ಆಲಿಯಾ ಫಕತ್ತ್ ಆಪ್ಲ್ಯಾ ಮತಿ ಭಿತರ್ಚ್ ಉಲಯ್ಲೆಂ ಶಿವಾಯ್ ತಾಚ್ಯಾ ತೊಂಡಾ ಥಾವ್ನ್ ತಾಚ್ಯಾ ಮತಿಂತ್ಲಿ ಜವಾಬ್ ಭಾಯ್ರ್ ಆಯ್ಲಿ ನಾ.
"ಕಾಂಯ್ ನಾ. ಸೊಡ್ ತೆಂ! ಹಾವೆಂ ಸಾಂಜೆರ್ಚ್ ಅಬ್ಬುಕ್ ಫೋನ್ ಕೆಲ್ಲೆಂ. ಆತಾಂ ಪರ್ತ್ಯಾಕ್ ತಾಂಕಾಂ......" ಆಲಿಯಾ ನಾಸಿರಾಕ್ಚ್ ಪಳವ್ನ್, ತ್ಯಾಚ್ ಖಂತಿಚಾ ಬಾವ್ಲೆಲ್ಯಾ ಮುಖಮಳಾಕ್ ಘೆವ್ನ್ ಖಾಟಿಯೆರ್ ಆಡ್ ಪಡ್ಲೆಂ. ನಾಸಿರಾನ್ಯ್ ಆಲಿಯಾಕ್ ಮೊಗಾನ್ ಕಾಂಯ್ ಸಮ್ಜಂವ್ಚೆಂ ಪ್ರಯತ್ನ್ ಕೆಲೆಂ ನಾ.
ಆಲಿಯಾ ತರ್ಯ್ ಆಪ್ಲ್ಯಾ ಘೊವಾನ್ ಆಪ್ಣಾ ತೆವ್ಶಿಂ ಚಡ್ ಧ್ಯಾನ್ ದೀಂವ್ಕ್ ಜಾಯ್ ಮ್ಹಣೊನ್ ಆಶೆತಾಲೆಂ. ಆಪ್ಲೊ ಘೊವ್ ಕಿತ್ಲೊ ಆಪ್ಣಾಚೊ ಹುಸ್ಕೊ ಕರ್ತಾ ತಿತ್ಲೊ ಚಡ್ ತೊ ಆಪ್ಣಾಚೊ ಮೋಗ್ ಕರ್ತಾ ಮ್ಹಳ್ಳೆಂ ಚಿಂತಾಪ್ ತಾಚ್ಯಾ ಮತಿಂತ್ ಆಸ್ಲ್ಲೆಂ. ದೀಸ್ಭರ್ ಕುಟ್ಮಾ ಸಾಂಗಾತಾ ಆನಿ ತಾಚ್ಯಾ ಬಿಜ್ನೆಸಾ ಸಾಂಗಾತಾ ಆಸ್ಲ್ಲೊ ನಾಸಿರ್ ರಾತಿಚಾ ವೆಳಾರ್ ತರ್ಯ್ ಆಪ್ಣಾ ಸವೆಂ ಮೊಗಾನ್ ಉಲಯ್ತೊಲೊ, ತಾಚ್ಯಾ ತ್ಯಾ ಮೊವಾಳ್ ಉತ್ರಾಂನಿ ಹಾಂವ್ ಸಂಸಾರಾಕ್ ವಿಸ್ರಾತೆಲಿಂ, ಆಪ್ಣಾಕ್ ನಾಸಿರಾ ವಯ್ರ್ ಆಪ್ಲ್ಯಾಚ್ಯಾಕ್ಯ್ ಚಡ್ ಭರ್ವಸೊ ಉದೆತಲೊ, ಹ್ಯಾ ಭರ್ವಸ್ಯಾಂತ್ ಹಾಂವ್ ಆಪ್ಣಾಕ್ಚ್ ವಿಸ್ರಾತೆಲಿಂ ಆನಿ ತೊ ಸಾಂಜೆಚೊ ಸುರ್ಯೊ ಸಂಸಾರಾಕ್ ವಿಸ್ರೊನ್ ದರ್ಯಾ ವೆಂಗೆಂತ್ ಲಿಪೊನ್ ವೆಚ್ಯಾ ಪರಿಂ ಹಾಂವ್ ನಾಸಿರಾಚಾ ವೆಂಗೆಂತ್ ಲಿಪೊನ್ ವೆತೆಲಿಂ. ತ್ಯಾ ಉಪ್ರಾಂತ್.....!
ತ್ಯಾ ಉಪ್ರಾಂತ್ ತೊ ಆನಿ ಹಾಂವ್! ಹ್ಯಾ ಸ್ರಷ್ಟೆಂತ್ ಫಕತ್ತ್ ಹಾಂವ್ ಆನಿ ತೊ. ಹಾಂವ್ ತಾಚ್ಯೆ ಖಾತಿರ್ ಆನಿ ತೊ ಮ್ಹಜ್ಯೆ ಖಾತಿರ್! ಸವ್ಕಾಸ್ ಹಾಂವ್ ಆನಿ ತೊ ಎಕಾ ಮೆಕಾ ಕಾಸೊಳಿಚಾ ಪಾನಾ ವಯ್ಲೆ ದೊವಾ ಥೆಂಬೆ ಏಕ್ ಜಾಂವ್ಚಾ ಪರಿಂ!
ತೊ ಹ್ಯಾ ಮ್ಹಜ್ಯಾ ಸಂಸಾರಾಕ್ ಸೊಭಾಯ್ ದಿತಲೊ. ಹಾವೆಂ ಪಳೆಲ್ಲ್ಯಾ ಹ್ಯಾ ಸಂಸಾರಾಕ್, ಮೆಟಾಂ ಮೆಟಾಂನಿ ಅಂತರ್ ಆಸ್ಲೆಲ್ಯಾ ಹ್ಯಾ ಸಂಸಾರಾಕ್ ತೊ ಮ್ಹಜ್ಯಾ ದೊಳ್ಯಾಂ ಮುಕಾರ್ ಸೊಭಿತ್ ದಿಸಯ್ತಲೊ. ತ್ಯಾ ಸೊಭಾಯೆಂತ್ ಹಾಂವ್ ಆನಿ ಮ್ಹಜೊ ನಾಸಿರ್, ಫಕತ್ತ್ ಆಮಿ ದೊಗಾಂ....! ಹ್ಯಾ ಸೊಭಿತ್ ಸಂಸಾರಾಂತ್....!, ತ್ಯಾ ಪಾನಾ ವಯ್ಲೆ ಥೆಂಬೆ ಲೊಳೊನ್ ವೆಚ್ಯಾ ಪರಿಂ....! ಸರ್ಗಾಚಾ ದಾರಾರ್.....! ಹಾಂವ್ ಆನಿ ಮ್ಹಜೊ ಘೊವ್.....! ಫಕತ್ತ್ ಹಾಂವ್ ಆನಿ ನಾಸಿರ್!
ಆಲಿಯಾಚಿಂ ಚಿಂತ್ನಾಂ, ಚಿಂತ್ನಾಂ ಜಾವ್ನ್ಚ್ ಉರ್ಲಿಂ. ಆಲಿಯಾನ್ ಆಶೆಲ್ಲೆಂ ನಾಸಿರಾನ್ ಸಮ್ಜೊಂಕ್ ನಾತ್ಲ್ಲೆಂ. ನಾಸಿರಾನ್ ಸಮ್ಜಾಲ್ಲೆಂ ಆಲಿಯಾನ್ ಆಶೆಂವ್ಕ್ ನಾತ್ಲ್ಲೆಂ.
ಆಲಿಯಾನ್ ಆಶೆಲ್ಲೊ ತಾಚ್ಯಾ ನಿಖಾ ಭಿತರ್ಲೊ ಸಂಸಾರ್, ತಾಕಾ, ತ್ಯಾಚ್ ತ್ಯಾ ಭಾಯ್ಲ್ಯಾ ಸಂಸಾರಾ ಪರಿಂ ದಿಸ್ಲೊ. ಹ್ಯಾ ಸಂಸಾರಾಕ್ ಆನಿ ತ್ಯಾ ಸಂಸಾರಾಕ್ ಕಾಂಯ್ಚ್ ವ್ಯತ್ಯಾಸ್ ನಾ ಮ್ಹಳ್ಳ್ಯಾ ಪರಿಂ ತಾಕಾ ಭೊಗ್ಲೆಂ.
ಆಲಿಯಾ ಬೋವ್ಶಾ ಆಪ್ಲ್ಯಾ ಘರ್ಚಾಂಕ್ ಚಿಂತುನ್ ಮತಿಂತ್ ದೂಖ್ ಘೆವ್ನ್ ಬಸ್ಲಾಂ ಆಸ್ತೆಲೆಂ. ತಾಚ್ಯಾ ದೂಕಿಂತ್ ಆಪ್ಲೆಂ ಹಕ್ಕ್ ಆಪ್ಣೆ ಚಲಂವ್ಚೆಂ ಸಾರ್ಕೆಂ ನ್ಹಯ್. ಹಾಚ್ಯಾ ಬದ್ಲಾಕ್ ತಾಣೆಂಚ್ ಮೊಗಾನ್ ತಾಚ್ಯಾ ಹಕ್ಕಾಂತ್ ವಾಂಟೊ ಘೆಂವ್ಕ್ ತಯಾರ್ ಜಾಲ್ಯಾರ್ ಚಡ್ ಬರೆಂ. ತಶೆಂಯ್ ಆಲಿಯಾ ಆತಾಂ ಮ್ಹಜಿ ಬಾಯ್ಲ್. ಆಜ್ ನ್ಹಯ್ ತರ್ ಫಾಲ್ಯಾಂ....! ತಾಂತುಂ ಕಿತೆಂ ಆಸಾ?
ದುಸ್ರೆ ಕುಶಿನ್ ನಾಸಿರ್ ಆಪ್ಲ್ಯಾ ಮತಿಕ್ ಸಮಾಧಾನ್ ದಿತಾಲೊ. ಆಶೆಂ ವೇಳ್ ಪಾಶಾರ್ ಜಾತಾನಾ ಕಾಸೊಳಿಚ್ಯಾ ಪಾನಾ ವಯ್ಲೆ ದೊವಾ ಥೆಂಬೆ ತ್ಯಾ ಪಾನಾ ವಯ್ರ್ಚ್ ಜಿರೊನ್ ಗೆಲೆ ಶಿವಾಯ್ ತ್ಯಾ ಪಾನಾ ವಯ್ಲ್ಯಾನ್ ಲೊಳೊನ್ ವಚೊನ್ ತೆ ಏಕ್ ಜಾಲೆ ನಾಂತ್.
ಹ್ಯಾ ಜಿರ್ವಣೆಂತ್ ನಾಸಿರಾ ಥಂಯ್ ಕಾಂಯ್ ಬದ್ಲಾವಣ್ ಘಡೊಂಕ್ ನಾ ಜಾಲ್ಯಾರ್ಯ್ ಆಲಿಯಾಚಾ ಮತಿಂತ್ ಮಾತ್ರ್ ಕಾಳೊಕಾನ್ ಎದೊಳ್ಚ್ ಆಪ್ಲೆಂ ಬಿಡಾರ್ ಕರುನ್ ಜಾಲ್ಲೆಂ. ಆಪ್ಲೆಂ ನವೆಂ ಜಿವಿತ್ ಆರಂಭ್ ಕರ್ಚಾ ಪಯ್ಲ್ಯಾ ಹಂತಾರ್ಚ್, ಆಪ್ಲ್ಯಾ ಘೊವಾಕ್ ಆಪ್ಣಾ ವಯ್ರ್ ಆಸ್ಚಾ ಹುಸ್ಕ್ಯಾ ವಯ್ರ್, ಆಲಿಯಾಕ್ ದುಬಾವ್ ಉದೆಲ್ಲೊ.
ಹನಿಮೂನಾಕ್ ಭಾಯ್ರ್ ಸರ್ಲೆಲ್ಯಾ ಆಲಿಯಾಕ್ ಏರ್ಪೋರ್ಟಾಚಾ ವಾಟೆರ್ ಪಾಟ್ಲ್ಯಾ ದಿಸಾಂಚೆಂ ಸಗ್ಳೆಂ ಉಡಾಸ್ ಆಯ್ಲೆಂ. ತಾಣೆಂ ಚಿಂತ್ಲೆಲೆಂ ಆನಿ ಆಶೆಲ್ಲೆಂ ಕಾಂಯ್ ಜಾಂವ್ಕ್ ನಾತ್ಲೆಲೆಂ ಜಾಲ್ಯಾರ್ಯ್ ಆಲಿಯಾಕ್ ಆಪ್ಣಾ ವಯ್ರ್ ಏಕ್ ವಿಶೇಶ್ ಭರ್ವಸೊ ಆಸ್ಲ್ಲೊ.
ಏಕ್ ಚಲಿ ಮನ್ ಕೆಲ್ಯಾರ್ ಆಪುಣ್ ಕಿತೆಂಯ್ ಕರುಂಕ್ ಸಕ್ತಾ ತೆಂ ಆಲಿಯಾ ಜಾಣಾಂ. ತಾಚ್ಯಾಚ್ ಜಿವಿತಾಂತ್ ತಾಣೆಂ ಹೆಂ ಸತ್ ರುಜು ಕರುನ್ ದಾಖಯಿಲ್ಲೆಂ. ಆಶೆಂ ಆಸ್ತಾಂ ಆಪ್ಲ್ಯಾ ಘೊವಾಕ್ ಆಪ್ಣಾ ತೆವ್ಶಿಂ ವೊಡುಂಕ್ಯ್ ಆಪ್ಣೆಂ ತಾಚ್ಯಾ ಪಾಂಯಾಂಕ್ ಪಡ್ಚಿ ಗರ್ಜ್ ನಾ. ಬಗಾರ್, ತಾಣೆಂಚ್ ಖುದ್ದ್ ಸಗ್ಳೆಂ ಸಮ್ಜೊನ್ ಆಪ್ಣಾಲಾಗಿಂ ಯೇಂವ್ಕ್ ಜಾಯ್. ಆಶೆಂ ಜಾಯ್ನಾ ಜಾಲ್ಯಾರ್ ಎದೊಳ್ಚ್ಚ್ ಆಪ್ಣೆ ಪಳವ್ನ್ ಸಮ್ಜಾಲ್ಲ್ಯಾ ಪರಿಂ ನಾಸಿರ್ ಫಕತ್ತ್ ತಾಚ್ಯಾ ಕುಟ್ಮಾಚೊ, ತಾಚ್ಯಾ ಆವಯ್ ಬಾಪಾಯ್ಚೊ ಆನಿ ಚಡ್ ಕರುನ್ ತಾಚ್ಯಾ ಬಿಜ್ನೆಸಾಚೊ ಗುಲಾಮ್ ಜಾವ್ನ್ ಮಾತ್ರ್ ಉರ್ತಲೊ ಶಿವಾಯ್ ತೊ ಖರೊಚ್ಚ್ ಆಪ್ಣಾಚೊ ಜಾಂವ್ಕ್ ಪಾಂವ್ಚೊ ನಾ. ಆಶೆಂ ಜಾಲ್ಯಾರ್.....?
ಆಲಿಯಾಚಿ ಮತ್ ತಾಕಾ ತಾಚೆಂ ಭವಿಶ್ಯ್ ಅಸ್ಪಷ್ಟ್ ರೂಪಾನ್ ದಾಖಂವ್ಕ್ ಲಾಗ್ಲಿ. ತಾಚ್ಯೆ ಸವೆಂ ಆಲಿಯಾ ಆನಿ ನಾಸಿರಾಕ್ ಘೆವ್ನ್ ಆಯಿಲ್ಲೆಂ ಕಾರ್ ಏರ್ಪೋರ್ಟಾಚಾ ದಾರಾರ್ ಉಭೆಂ ಜಾಲೆಂ.
**************
ಮೋರಿಶಸ್ ಹನಿಮೂನಾಕ್ ವೆತೆಲ್ಯಾ ಜೊಡ್ಯಾಂಕ್ ಸಾಂಗ್ಲಲೊ ಗಾಂವ್. ಸೊಭಿತ್ ಪೃಕೃತೆಚೊ, ನಿತಳಾಯೆನ್ ಭರ್ಲಲೊ ಆಪ್ಲ್ಯಾ ಭಂವ್ತಿಚಾ ದರ್ಯಾವೆಳೆಕ್ ಚಡ್ ಪ್ರಚಲಿತ್. ಲಾಂಬ್, ರೂಂದ್ನಿಟ್ಟ್ ರಾಜ್ ರಸ್ತೆ. ತ್ಯಾ ರಾಜ್ ರಸ್ತ್ಯಾಚ್ಯಾ ಹೆಂವ್ಶಿಂ ತೆವ್ಶಿಂ ರಸ್ತ್ಯಾಕ್ ಸೊಭಾಯ್ ದಿಂವ್ಚೆ ಸೊಭಾಯೆಚೆ ರೂಕ್. ರಸ್ತ್ಯಾಕ್ ತಾಂಚೆ ಥಾವ್ನ್ ಮೆಳ್ಚಿ ಸಾವ್ಳಿ......, ಏರ್ಪೋರ್ಟಾ ಥಾವ್ನ್ ಹೊಟೇಲಾಕ್ ವೆಚ್ಯಾ ವಾಟೆಚಿ ಸೊಭಾಯ್ ಪಳೆಲ್ಲೆಂ ಆಲಿಯಾ ಶಿರಿಂ ಚುಕ್ಲೆಂ. ಆಪ್ಲ್ಯಾ ಗಾಂವಾ ಭಾಯ್ಲ್ಯಾ ಜಿವಿತಾಂತ್ ತಾಣೆಂ ಪಯ್ಲ್ಯಾ ಪಾವ್ಟಿಂ ಆಸಲಿ ಸೊಭಾಯ್ ಖುದ್ದ್ ಆಪ್ಲ್ಯಾ ದೊಳ್ಯಾನಿಂ ಪಳೆಲ್ಲಿ. ಮೋರಿಶಸಾಚಿ ಸೃಷ್ಟಿಚ್ ದುಸ್ರಿ ಮ್ಹಳ್ಳ್ಯಾ ಪರಿಂ ದಿಸ್ತಾಲಿ.
ಮೋರಿಶಸಾಕ್ ಪಾವ್ಲೆಲ್ಯಾ ಪಯ್ಲ್ಯಾ ದಿಸಾ ದೊಗಾಂಯ್ ಹೊಟೆಲಾ ಥಾವ್ನ್ ಭಾಯ್ರ್ ಸರ್ಲಿಂ ನಾಂತ್. ಪಯ್ಣಾಚಾ ಪುರಾಸಾಣೆನ್ ತಾಂಕಾ ಎಕಾ ವಾಟೆನ್ ಥಕಯಿಲ್ಲೆಂ ಜಾಲ್ಯಾರ್ ದುಸ್ರ್ಯಾ ವಾಟೆನ್ ಸಗ್ಳೆಂ ಪಯ್ಣ್ಭರ್ ಆಲಿಯಾಚಾ ಮತಿನ್ ವಿಶೆವ್ ಘೆಂವ್ಕ್ ನಾತ್ಲಲೊ. ತೆಂ ನಾಸಿರಾಕ್ಚ್ ಚಿಂತಾಲೆಂ. ತಾಚ್ಯಾ ನಿಖಾಚಾ ಪಯ್ಲೆಂ ಜಿತ್ಲೆಂ ತೆಂ ಭಾಯ್ಲ್ಯಾನ್ ನಾಸಿರಾಕ್ ವಳ್ಕಾತಾಲೆಂ ತಿತ್ಲೆಂಚ್ ತೆಂ ನಿಖಾ ಜಾಲ್ಯಾ ಉಪ್ರಾಂತ್ ನಾಸಿರಾಕ್ ಭಿತರ್ಲ್ಯಾನ್ ವಳ್ಕಾಲ್ಲೆಂ. ಹ್ಯಾ ದೊನ್ಯ್ ವಳ್ಕೆಂತ್ ಮಸ್ತ್ ಅಂತರ್ ಆಸ್ಲ್ಲೊ. ಹ್ಯಾ ಅಂತರಾಕ್ ಕಾಡುನ್ ಉಡವ್ನ್ ಪರ್ತ್ಯಾಕ್ ಆಪುಣ್ ನಾಸಿರಾಕ್ ಕಸೊ ಆಪ್ಣಾಚೊ ಪುರ್ತೊ ಘೊವ್ ಕರುನ್ ಘೆಂವ್ಕ್ ಸಕಾನ್ ಮಳ್ಳೆಂಚ್ ತೆಂ ತಾಚ್ಯಾ ಸಗ್ಳ್ಯಾ ಪಯ್ಣಾಂತ್ ತೆಂ ತಕ್ಲೆಂತ್ ಆಟಾಯ್ತಾಲೆಂ.
ಪಯ್ಲ್ಯಾ ದಿಸಾ ಪಯ್ಣಾಚಿ ಪುರಾಸಣ್ ತಾಣಿಂ ಹೊಟೇಲಾಂತ್ಚ್ ರಾವೊನ್ ಕಾಡ್ಲಿ. ಮೋರಿಶಸಾಕ್ ಪಾವ್ಲ್ಲೆಂಚ್ ಕೊಣಾಯ್ಕ್ಯ್ ಭಾಯ್ಲ್ಯಾ ಸಂಸಾರಾಚಿ ಪರ್ವಾ ಆಸಾನಾ. ಆಶೆಂಚ್ ಆಲಿಯಾ ಆನಿ ನಾಸಿರ್ ಮೋರಿಶಸಾಕ್ ಪಾಂಯ್ ತೆಂಕ್ತಾನಾ ತಿಂ ಆಪ್ಲೆಂ ಆದ್ಲೆಂ ಸಗ್ಳೆಂ ವಿಸ್ರಾಲಿಂ. ಮೋರಿಶಸ್ ಗಾಂವ್ಯ್ ತಸಲೊಚ್!
ದರ್ಯಾ ವೆಳೆ ವಯ್ಲಿ ಧವಿ ಧವಿ ಭಾರೀಕ್ ನಿತಳ್ ರೇಂವ್! ನಿಳ್ಶ್ಯಾ ನಿಳ್ಶ್ಯಾ ಬಣಾಚೆಂ ದರ್ಯಾ ಉದಾಕ್...! ತ್ಯಾ ಉದ್ಕಾಚೆಂ ಶಾಂತ್ಪಣ್ ಪಳಯ್ತೆಲ್ಯಾ ದೊಳಾಂಕ್ ಆಶೆಂ ದಿಸ್ತಾಲೆಂ ಕೀ ತೆಂ ಉದಾಕ್ ದರ್ಯಾ ವೆಳೆ ಸಾಂಗಾತಾ ವ್ಹಳೂ ವ್ಹಳೂ ಮೊಗಾಖೆಳ್ ಖೆಳ್ತಾ ಜಶೆಂ! ಉಂಚಾಯೆಚಿಂ ಭವ್ಯ್ ಹೊಟೇಲಾಂ...., ತಾಂಚಿ ತಿ ಸುಂರ್ಗಾರಾಯ್, ರಾತಿಚ್ಯಾ ವೀಜ್ ದಿವ್ಯಾಂನಿ ಮೋರಿಶಸಾಕ್ ದಿಂವ್ಚಿ ತಿ ಉಜ್ವಳ್ಚಿ ಸೊಭಾಯ್.... ಆಲಿಯಾಕ್ ಮೋರಿಶಸಾಚಾ ಸೊಭಾಯೆಕ್ ಚಾಕೊಂಕ್ ದೋನ್ ದೊಳೆ ಪಾವ್ಲೆ ನಾಂತ್.
ದೋನ್ ಹಪ್ತೆ ನಾಸಿರಾನ್ ಆನಿ ಆಲಿಯಾನ್ ಸಗ್ಳ್ಯಾ ಮೋರಿಶಸಾಚಿ ಸೊಭಾಯ್ ಚಾಕ್ಲಿ. ಹ್ಯಾ ದೋನ್ ಹಪ್ತ್ಯಾಂನಿ ನಾಸಿರಾಚ್ಯಾಕ್ಯ್ ಆಲಿಯಾ ಚಡ್ ಖುಶ್ ಆಸ್ಲ್ಲೆಂ. ತ್ಯಾ ಮುಂಬಯಿಚಿಂ ಚಿಂತ್ನಾ ತಾಚ್ಯಾ ಮತಿ ಪಡ್ದ್ಯಾರ್ ಥಾವ್ನ್ ಪಯ್ಸ್ ಧಾಂವ್ಲ್ಲಿಂ. ತೆಂ ಆತಾಂ ಚಿಂತಾಲೆಂ ಜಾಲ್ಯಾರ್ ಫಕತ್ತ್ ಆಪ್ಣಾಚಾ ಆನಿ ನಾಸಿರಾಚಾ ವಿಶಿಂ ಮಾತ್ರ್. ಹನಿಮೂನಾಕ್ ಭಾಯ್ರ್ ಸರ್ತಾನಾ, ನಾಸಿರಾಚ್ಯಾ ಸ್ವಭಾವಾ ವರ್ವಿಂ ಆಲಿಯಾಕ್, ತಾಚ್ಯಾ ಫುಡಾರಾಚಾ ಜಿವಿತಾಚಿ ಬುನ್ಯಾದ್ ಹಾಲ್ತಾ ಮ್ಹಳ್ಳ್ಯಾ ಭಾಶೆನ್ ದಿಸೊಂಕ್ ಲಾಗ್ಲ್ಲಿ. ಪುಣ್ ಹ್ಯಾ ದೋನ್ ಹಪ್ತ್ಯಾಂನಿ.....?
ಹ್ಯಾ ದೋನ್ ಹಪ್ತ್ಯಾಂನಿ, ಮೋರಿಶಸಾಚಾ ಸೊಭಾಯೆ ಸಾಂಗಾತಾ ತಾಂಚಾ ಮೊಗಾಚಾ ಸೊಭಾಯೆಕ್ಯ್ ಮುಂಬಯಿ ಥಾವ್ನ್ ಪಯ್ಸ್ ಬರೆಂಚ್ ದೊಗಾಂಯ್ನಿ ಚಾಕ್ಲೆಂಜಾಲ್ಯಾರ್ಯ್ ಆಲಿಯಾನ್ ಮಾತ್ರ್, ನಾಸಿರಾಕ್ ಆಪ್ಣಾ ತೆವ್ಶಿಂ ವೊಡುನ್ ಧರ್ಚಾ ಉದ್ದೇಶಾಂತ್ ಆಪ್ಣಾಕ್ಚ್ ನಾಸಿರಾಕ್ ನವ್ಯಾ ನವ್ಯಾ ರೂಚಿನ್ ಚಾಕಯ್ಲೆಂ. ತಿಂ ದೊಗಾಂಯ್ ಮಸ್ತ್ ಖುಶ್ ಆಸ್ಲ್ಲಿಂ. ದಿಸಾಚೊ ವೇಳ್ ಕಸೊ ಧಾಂವೊನ್ ರಾತ್ ಉದೆತಾಲಿ ತೆಂ ತಾಂಕಾ ಕಳಿತ್ಚ್ ಜಾಯ್ನಾತ್ಲ್ಲೆಂ. ಮೋರಿಶಸ್ ನಿಜಾಯ್ಕ್ಯ್ ತಾಂಕಾ ಸಂಸಾರಾಂತ್ಲೊ ಸರ್ಗ್ಚ್ ಜಾಲ್ಲೊ.
ನಿಖಾ ಜಾಂವ್ಚಾ ಪಯ್ಲೆಂ ಆಲಿಯಾನ್ ನಿಖಾ ಜಾಲ್ಲ್ಯಾ ಜಿವಿತಾಂತ್ ಕಿತೆಂ ಸಗ್ಳೆಂ ಘಡ್ತಾ, ತೆಂ ಜಿವಿತ್ ಕಶೆಂ ಚಮ್ಕಾತಾ...., ತ್ಯಾ ಜಿವಿತಾಂತ್ ಎಕಾ ಚಲಿಯೆಕ್ ಕಿತ್ಲೆಂ ಸಗ್ಳೆಂ ತ್ಯಾಗ್ ಕರುಂಕ್ ಪಡ್ತಾ....., ಹೆಂ ತಾಣೆಂ ಥೊಡೆಂ ಆಪ್ಲ್ಯಾ ಜಾಣ್ವಾಯೆ ಥಾವ್ನ್, ಥೊಡೆಂ ಹೆರಾಂ ಥಾವ್ನ್, ಥೊಡೆಂ ಆಪ್ಲ್ಯಾ ಆವಯ್ಚೆಂ ಪಳವ್ನ್ ಸಮ್ಜೊನ್ ಘೆತ್ಲ್ಲೆಂ.
ನವ್ಯಾ ಜಿವಿತಾಂತ್ ಜಿಣ್ಯೆಚಾ ಹರ್ಯೆಕಾ ಪಾಂವ್ಡ್ಯಾರ್ ಖಂಯ್ ನಾ ತರ್ ಖಂಯ್ ಚಲಿಯೆನ್ ಆಪ್ಲ್ಯಾ ಘೊವಾ ಖಾತಿರ್, ಆಪ್ಲ್ಯಾ ಮಾಂಯ್ ಮಾಂವಾ ಖಾತಿರ್, ಆಪ್ಲ್ಯಾ ಭುರ್ಗ್ಯಾಂ ಖಾತಿರ್, ಆಪ್ಲ್ಯಾ ಕುಟ್ಮಾ ಖಾತಿರ್, ತಾಂಚಾ ಮರ್ಯಾದೆ ಖಾತಿರ್, ತ್ಯಾ ವಯ್ರ್ ಆಪುಣ್ ಜಲ್ಮಾಲ್ಲ್ಯಾ ಘರ್ಚಾ ಮಾನಾ ಖಾತಿರ್ ಜಿವಿತಾಚಾ ಹರ್ಯೆಕಾ ಘಡಿಯೆಂತ್ ತ್ಯಾಗ್ ಕರುಂಕ್ ಪಡ್ತಾ. ಎಕಾ ಚಲಿಯೆಕ್ ತಾಚೆಂ ನಿಖಾ ಜಾಲ್ಲೆಂ ಜಿವಿತ್, ತಾಕಾ ಏಕ್ ನವೆಂ ಜಿವಿತ್ ತಶೆಂ ಸಂಪೂರ್ಣ್ ನವ್ಯಾಸಾಂವಾಕ್ ವೆಂಗ್ಚೆಂ ಜಿವಿತ್ ಜಾವ್ನ್ ಯೆತಾನಾ ತ್ಯಾ ಪರ್ನ್ಯಾಸಾಂವಾಚಿ ಸಾವ್ಳಿ ಹರ್ಯೆಕ್ ಘಡಿ ತಿಚೊ ಪಾಟ್ಲಾವ್ ಕರುನ್ ಆಸ್ತಾ.
"ಅತೀಥ್ ಆನಿ ವರ್ತಮಾನ್ ಚಲಿಯೆಚಾ ಜಿವಿತಾಚೆ ದೋನ್ ಹಾತ್! ತ್ಯಾ ಹಾತಾನ್ ದಿಲ್ಲೆಂ ಹ್ಯಾ ಹಾತಾಕ್ ಸಂಭಂಧ್ ಜೊಡ್ತಾ ಆನಿ ಹ್ಯಾ ಹಾತಾನ್ ಘೆಂವ್ಚೆಂ ತ್ಯಾ ದಿಂವ್ಚಾ ಹಾತಾಕ್ ಸಂಭಂಧ್ ಜೊಡ್ತಾ!" ಆಶೆಂ ಆಸ್ತಾನಾ ನಿಖಾ ಜಾಲ್ಲೆಂ ಜಿವಿತ್ ಚಲ್ಯಾಕ್ ತಾಚ್ಯಾ ಜಿವಿತಾಚೆಂ ಏಕ್ ಮೇಟ್ ಜಾಲ್ಯಾರ್ ಚಲಿಯೆಕ್ ತೆಂಚ್ ತಿಚ್ಯಾ ಜಿವಿತಾಚೊ ಏಕ್ ಹಂತ್. ಹ್ಯಾ ಎಕಾ ಮೇಟಾಕ್ ಆನಿ ಹ್ಯಾ ಎಕಾ ಹಂತಾಕ್ ಮೊಳಾಬ್ ಆನಿ ಭುಂಯ್ಚಾ ತಿತ್ಲೊ ಅಂತರ್ ಆಸಾ. ಆಶೆಂ ಆಸ್ತಾನಾ ಆಪ್ಲೆಂ ನಿಖಾ ಜಾಂವ್ಚೆ ವಿಶಿಂ ಚಿಂತ್ಚೆಂ ತೆಂ ಚಲಿ, ಚಲ್ಯಾ ಪ್ರಾಸ್ ಕಿತ್ಲೆಂ ಧಯ್ರಾಧೀಕ್ ಜಾಯ್ನಾಕಾ?
ಆಲಿಯಾನ್ ಹಿಂಚ್ ಚಿಂತ್ನಾ ತಾಚ್ಯಾ ಮತಿಂತ್ ಆಟಯಿಲ್ಲಿಂ. ವ್ಹಾಳ್ಚ್ಯಾ ವಾರ್ಯಾರ್ ತೆಂ ತ್ಯಾ ವಿಮಾನಾರ್ ಮೊಳಾಬಾಕ್ ತೆಂಕೊನ್ ಉಭ್ತಾನಾ ಜಾಂವ್ ಯಾ ರಾತಿಕ್ ಆಪ್ಲ್ಯಾ ಕುಡಿಚಾ ಥಕವ್ಣೆಕ್ ತ್ಯಾ ಥಂಡ್ ಶಾವರಾಚಾ ಉದ್ಕಾ ಸವೆಂ ವ್ಹಾಳಯ್ತಾನಾ ಜಾಂವ್ ಆಲಿಯಾ ಚಲಿಯೆಚಾ ಹ್ಯಾ ಧಯ್ರಾಕ್ಚ್ ಆಟವ್ ಕರ್ತಾಲೆಂ.
ವ್ಹಾಳ್ಚೆಂ ವಾರೆಂ, ಮತಿಂತ್ಲ್ಯಾ ಚಿಂತ್ನಾಂಕ್ ಸಪ್ಣಾಂ ಜಾವ್ನ್ ಬದ್ಲುನ್, ಜಿವಿತಾಕ್ ಜಿಯೆಂವ್ಚಿ ಸೊಭಾಯ್ ತ್ಯಾ ಸೊಭಿತ್ ಕುಪಾಂ ಮಧೆಂ ದಾಖಯ್ತಾನಾ ಥಕ್ಲೆಲ್ಯಾ ಕುಡಿಕ್ ನವೊ ಉಲ್ಲಾಸ್ ಭಾಸಾಂವ್ಚೆಂ ತೆಂ ಥಂಡ್ ಶಾವರಾಚೆಂ ಉದಾಕ್, ಧಗಿಚೆ ಘಾಮಾ ಥೆಂಬೆ ಜಾವ್ನ್ ಬದ್ಲುನ್, ಜಿವಿತಾಂತ್ ಆಪ್ಣೆಂ ಕರುಂಕ್ ಜಾಯ್ ಆಸ್ಚಾ ತ್ಯಾಗಾಕ್ ಉಡಾಸ್ ಹಾಡಾಯ್ತಾಲೆಂ! ಪುಣ್ ಆತಾಂ ಹ್ಯಾ ಘಡಿಯೆ....!
ಹ್ಯಾ ಘಡಿಯೆ ಆಲಿಯಾ ಆಪ್ಲೆಂ ಆಂಕ್ವಾರ್ಪಣ್ ಸಾಂಡುನ್ ನಿಖಾ ಮ್ಹಳ್ಳ್ಯಾ ಪವಿತ್ರ್ ಬಾಂಧಾಂತ್ ಎಕ್ವಟ್ಲೆಲೆಂ, ತಾಣೆಂ ಆಟಾಯಿಲ್ಲ್ಯಾ ತ್ಯಾ ಚಿಂತ್ನಾ, ಆನಿ ಪಳೆಲ್ಲ್ಯಾ ತ್ಯಾ ಸಪ್ಣಾಂ ಥಾವ್ನ್ ಮಸ್ತ್ ಪಯ್ಸ್, ತ್ಯಾ ಮೋರಿಶಸಾಂತ್ ಆಪ್ಲ್ಯಾ ನಾಸಿರಾ ಸಂಗಿಂ ಆಸ್ತಾನಾ ಜಿವಿತಾಚ್ಯೊ ಹ್ಯೊ ಉತ್ತೀಮ್ ಘಡಿಯೊ, ಆಲಿಯಾಕ್ ಆಪ್ಲ್ಯಾ ಸಪ್ಣಾಂತ್ಲ್ಯಾ ಸರ್ಗಾ ಪ್ರಾಸ್ ಚಡ್ ಸೊಭಿತ್ ದಿಸ್ಲ್ಯೊ. ತಾಕಾ ತಾಚಿಂ ಆದ್ಲಿಂ ಚಿಂತ್ನಾಂ ಉಡಾಸ್ ಆಯ್ಲಿಂ ನಾಂತ್.
ತಾಚ್ಯಾ ದೊಳ್ಯಾಂಕ್ ಆತಾಂ ದಿಸ್ತಾಲೆಂ ಫಕತ್ತ್ ಮೋರಿಶಸ್! ತೆಂ ಅಕ್ವೇರಿಯಮ್.... ತಿಂ ಡಾಲ್ಫಿನಾಂ..... ತಿ ದರ್ಯಾ ತಡ್..... ತೆಂಚ್..... ಸಗ್ಳೆಂ ತೆಂಚ್!
ಹ್ಯಾ ವೆಳಾರ್ ಮೊರಿಶಸಾಚ್ಯಾ ತ್ಯಾ ಪಯ್ಶಿಲ್ಯಾ ಮುಂಬಯಿಂತ್.....!
ಸುಲೇಮಾನಾಚಿ ಬಾಯ್ಲ್, ನಾಸಿರಾಚಿ ಆವಯ್ ಆಲಿಯಾ ಥಂಯ್ ಸಗ್ಳ್ಯಾ ವಿಶಯಾಂತ್ ಖುಶ್ ಆಸ್ಲ್ಲಿ ಜಾಲ್ಯಾರ್ಯ್ ಆಲಿಯಾನ್ ಕಾಮ್ ಕರ್ಚಾ ವಿಶಾಯಾಂತ್ ಮಾತ್ರ್ ತಿ ಕಬೂಲ್ ನಾತ್ಲೆಲಿ. ನಿಖಾಚಾ ಸಂಭ್ರಮಾಕ್ ಆಯ್ಲೆಲ್ಯಾ ಸಭಾರ್ ಜಾಣಾಂನಿ ಆಲಿಯಾನ್ ಏರ್ಹೊಸ್ಟೆಸ್ ಜಾವ್ನ್ ಕಾಮ್ ಕರ್ಚಾ ವಿಶಿಂ ಶಿಣ್ ಉಚಾರ್ಲೆಲಿ.
"ನಿಖಾ ಜಾಂವ್ಚಾ ಪಯ್ಲೆಂ ಜಾಲೆಂ ತೆಂ ಜಾಲೆಂ. ಪುಣ್ ಆತಾಂ.....?" ಸಭಾರಾಂನಿ ತಿಕಾ ಸವಾಲ್ ಕೆಲ್ಲೆಂ.
ವ್ಹಯ್! ಆತಾಂ...? ಹ್ಯಾ ಫುಡೆಂ...? ತಿಚ್ಯಾ ಮತಿಂತ್ ಸವಾಲಾಂ ಉದೆಲ್ಲಿಂ.
ತಿಣೆಂ ಜಿಯೆಂವ್ಚಾ ಸಮಾಜೆಂತ್ ತಿಕಾ ಏಕ್ ಸ್ಥಾನ್ ಆಸ್ಲ್ಲೊ. ತಿಚ್ಯಾ ಸೆಜಾರ್ಚಾಂ ಮಧೆಂ, ಕುಟ್ಮಾಂಚಾಂಚಾ ಮಧೆಂ ತಿಕಾ ಏಕ್ ಮಾನ್ ಆಸ್ಲ್ಲೊ. ಹೊ ಮಾನ್ ಆಲಿಯಾಚಾ ಏರ್ಹೊಸ್ಟೆಸ್ ಮ್ಹಳ್ಳ್ಯಾ ಬಿರುದಾನ್ ದಿಂವ್ಚಾ ಮಾನಾ ಪ್ರಾಸ್ ಚಡ್ಚ್ ಊಂಚ್. ಹ್ಯಾ ಉಂಚಾಯೆಚಾ ಮಾನಾ ಮುಕಾರ್ ಆಪ್ಲಿ ಸುನ್ ಆಪ್ಣಾಕ್ ಸಮಾಜೆಂತ್ ಲ್ಹಾನ್ ಕರ್ತಾ ತಶೆಂ ನಾಸಿರಾಚಾ ಆವಯ್ಕ್ ಭೊಗ್ತಾಲೆಂ.
ಮತಿಂತ್ ಕರಂದಾಯ್ ಹಾಡ್ಚಾ ವಿಶಯಾಕ್ ಚಡ್ ಥೇಂಪ್ ತಿ ಆಪ್ಲ್ಯಾ ಮತಿಂತ್ಚ್ ದವರುಂಕ್ ಸಕ್ಲಿ ನಾ. ತಿಚೊ ಪೂತ್ ನಾಸಿರ್ ತಿಚ್ಯಾ ಲಾಗಿಂ ಆಸ್ಲ್ಲೊ ಜಾಲ್ಯಾರ್ ಹ್ಯಾ ವಿಶಯಾಂತ್ ಎದೊಳ್ಚ್ ತಿ ಆಪ್ಲ್ಯಾ ಪುತಾಲಾಗಿಂ ಉಲಯ್ತಿ. ಪುಣ್, ಆತಾಂ ಪೂತ್ ಸಾಂಗಾತಾ ನಾತ್ಲೆಲ್ಯಾ ವೆಳಾರ್ ಮತಿಚಾ ಕರಂದಾಯೆನ್ ತಿಕಾ ಹೊ ವಿಶಯ್ ಆಪ್ಲ್ಯಾ ಘೊವಾ ಮುಕಾರ್ ದವರುಂಕ್ ಮಜ್ಬೂರ್ ಕೆಲೆಂ.
"ಪಳೆ ಬೇಗಮ್....., ಆಲಿಯಾನ್ ಕಾಮ್ ಕರ್ಚಾ ವಿಶಯಾಂತ್ ಕಾಂಯ್ ಆಕ್ಷೇಪ್ ಹಾಡ್ಚೊ ಮ್ಹಾಕಾ ಬರೊ ಲಾಗಾನಾ. ಪುಣ್ ಹಾಂ! ತಾಚ್ಯಾ ಹ್ಯಾ ಪ್ರಸ್ತುತ್ ಏರ್ಹೊಸ್ಟೆಸಾಚಾ ಕಾಮಾ ವಿಶಯಾಂತ್ ಮಾತ್ರ್ ಆಮಿ ಉಲವ್ಯೆತಾ! ಪಳಯಾಂ......, ಖಂಯ್ಚಾಯ್ಕ್ಯ್ ತಿಂ ಘರಾ ಪಾಟಿಂ ಯೇಂವ್ದಿತ್. ಉಪ್ರಾಂತ್ ಆಮಿಂ ಸಾಗಾತಾ ಬಸೊನ್ ಉಲವ್ಯಾಂ. ಹ್ಯಾ ವಿಶಯಾಂತ್ ಆಮಿಂ ಉಲಂವ್ಚ್ಯಾಕ್ಯ್ ನಾಸಿರಾನ್ಚ್ ಆಪ್ಲ್ಯಾ ಬಾಯ್ಲೆಕ್ ಸಮ್ಜಾಯ್ಲ್ಯಾರ್ ಚಡ್ ಬರೆಂ. ನಾಸಿರಾನ್ ಸಾಂಗ್ಲ್ಯಾರ್ ತೆಂ ಖಂಡಿತ್ ಆಯ್ಕಾತೆಲೆಂ!" ಸುಲೇಮಾನಾನ್ ಆಪ್ಲಿ ಸಲಹಾ ದಿಲಿ. ಹೊ ವಿಶಯ್ ತಿತ್ಲೊ ಸಲೀಸಾಯೆಚೊ ನ್ಹಯ್ ಮ್ಹಳ್ಳೆಂ ತೊ ಜಾಣಾಂ.
"ನಾಸಿರಾನ್ ಸಾಂಗ್ಲ್ಯಾರ್ ಮಾತ್ರ್ ಕಿತ್ಯಾಕ್? ಆಮಿಂ ಸಾಂಗ್ಲ್ಯಾರ್ ಕಿತ್ಯಾಕ್ ನುಜೊ? ತಶೆಂಯ್ ಆಮಿಂ ಆಲಿಯಾಕ್ ತಾಚೆಂ ಕಾಂಯ್ ಸೊಡುಂಕ್ ಸಾಂಗಾನಾಂವ್. ನೊವ್ರ್ಯಾಚಿ, ನೊವ್ರ್ಯಾಚಾ ಘರಾಚಿ ಮಾನ್ ಮರ್ಯಾದ್ ರಾಕ್ಚೆಂ ಕಾಮ್ ತಾಚ್ಯಾ ಬಾಯ್ಲೆಚೆಂ. ಹಾಂವ್ ಹ್ಯಾ ಘರಾಚಿ ಬಾಯ್ಲ್ ಜಾವ್ನ್ ಯೆತಾನಾ ಹಾವೆಂ ಕಿತೆಂ ಸಗ್ಳೆಂ ಕೆಲ್ಲೆಂ ನಾ? ಹನಿಮೂನ್ ಮ್ಹಳ್ಳೆಂ ಆಸಾ ಮ್ಹಣೊನ್ ಮ್ಹಜ್ಯಾ ಮಾಂಯ್ ಮಾಂವಾನ್ ಜಾಂವ್ ತುವೆಂ ಜಾಂವ್ ಕಾಂಯ್ ಮ್ಹಾಕಾ ಸಾಂಗ್ಲಾಂ? ಮ್ಹಜ್ಯಾ ಕುಳಾರಾ ಹಾವೆಂ ವಚೊಂಕ್ ಜಾಯ್ ಜಾಲ್ಯಾರ್ ಪಾಸೊನ್ ಹಾವೆಂ ಕಿತ್ಲೆಂ ಭಿಯೆವ್ನ್ ಭಿಯೆವ್ನ್ ವಿನತಿ ಕರುಂಕ್ ಪಡ್ತಾಲಿ....!"
ಸುಲೇಮಾನಾಚಾ ಸಮ್ಜಣೆಚ್ಯಾ ಜವಾಬೆಕ್ ಆಯ್ಕಾಲ್ಲಿ ನಾಸಿರಾಚಿ ಆವಯ್ ತಕ್ಷಣ್ ಉಚಾಂಭಳ್ ಜಾಲಿ. ಆಲಿಯಾ ಎಕಾ ಚಲಿಯೆ ಥಾವ್ನ್ ಸುನ್ ಜಾವ್ನ್ ಪರಿವರ್ತನ್ ಜಾತಾನಾ ನಾಸಿರಾಚಿ ಆವಯ್ ಆವಯ್ ಥಾವ್ನ್ ಮಾಂಯ್ ಜಾವ್ನ್ ಪರಿವರ್ತನ್ ಜಾಲ್ಲಿ. ಘರಾ ಆಯಿಲ್ಲ್ಯಾ ಸುನೆಕ್ ತಾಚ್ಯಾ ಹಾತಾಂತ್ ಅಧಿಕಾರ್ ದಿಲ್ಯಾರ್ ಆಪ್ಣಾಚೆಂ ಕಿತೆಂ ಜಾಯ್ತ್? ಆಪ್ಣೆಂ ಉಲಂವ್ಚೆ ಕೋಣ್ಯ್ ಆಯ್ಕಾತ್? ನಾಸಿರ್ ಆತಾಂಚಾ ಪರಿಂ ಆಸ್ತಲೊ? ಕಾಂಯ್ ಪುಣಿಂ ಆಪ್ಲೊ ಪೂತ್ ತಾಚ್ಯಾ ಬಾಯ್ಲೆಚೊ ಗುಲಾಮ್ ಜಾಲೊ ಜಾಲ್ಯಾರ್?
ಬಾಯ್ಲೆಚೊ ಗುಲಾಮ್ ಜಾಲ್ಲ್ಯಾ ಪುತಾಂನಿ ಆಪ್ಲ್ಯಾ ಆವಯ್ ಬಾಪಯ್ಚಿ ಕೆಲ್ಲ್ಯಾ ಹಾಲತೆ ವಿಶಿಂ ನಾಸಿರಾಚಿ ಆವಯ್ ಸಗ್ಳೆಂ ಜಾಣಾಂ ಆಸ್ಲ್ಲಿ. ತಿಚ್ಯಾ ಮತಿಂತ್ ಉಟ್ಲೆಲ್ಯಾ ವಿಚಾರಾಕ್ ಏಕ್ ವಾಟ್ ದಾಕಯ್ತಾ ಪಾಸೊನ್ ತಿಚ್ಯಾ ಮತಿಕ್ ಸಮಾಧಾನ್ ನಾತ್ಲ್ಲೆಂ. ತಿಚ್ಯಾ ಘೊವಾನ್ ತರ್ಯ್ ತಿಚ್ಯಾ ಸವಾಲಾಕ್ ಪುರ್ತಿ ಜವಾಬ್ ದೀಂವ್ಕ್ ನಾತ್ಲೆಲಿ ಜಾಲ್ಯಾರ್ಯ್ ಆಪ್ಲೊ ಪೂತ್ ಆಪ್ಣಾಚೆಂ ಆಯ್ಕತಾಲೊ ಆನಿ ಆಪ್ಲ್ಯಾ ಪುತಾಚೊ ನಿರ್ಧಾರ್ ಆಪುಣ್ ವ್ಹಡಾ ಘಮಂಡಾನ್ ಸಗ್ಳ್ಯಾಂ ಮುಕಾರ್ ಆಪ್ಲಿಂ ಪಾಕಾಂ ಪುಲವ್ನ್ ಸಾಂಗ್ತಾನಾ, ಪುತಾಕ್ ಆನಿ ಸುನೆಕ್ ದೊಗಾಂಯ್ಕ್ಯ್ ಆಪ್ಲ್ಯಾ ಮುಟಿಂತ್ ದವರ್ಲ್ಲ್ಯಾಚಿ ಶಾಭಾಸ್ಕಿ ಘೆವ್ನ್ ಆಪುಣ್ ರಾಣಿಯೆಪಾಟಾರ್ ಆಸ್ತೆಲಿಂ ಮ್ಹಳ್ಳೆಂ ಚಿಂತಾಪ್ ನಾಸಿರಾಚಾ ಆವಯ್ಚೆಂ ಜಾಲ್ಲೆಂ.
ತಿಚ್ಯಾ ಜಯ್ತಾಕ್ ಆನಿ ಸಲ್ವಣೆಕ್ ಪಾರ್ಕುಂಕ್ ಆನಿ ಫಕತ್ತ್ ಏಕ್ ಹಪ್ತೊ ಉರ್ಲ್ಲೊ. ಎದೊಳ್ಚ್ ನಾಸಿರ್ ಆನಿ ಆಲಿಯಾ ಹನಿಮೂನಾಕ್ ಪಾವೊನ್ ಏಕ್ ಹಪ್ತೊ ಜಾಲ್ಲೊ.
ಪುತಾಂಕ್ ನಿಖಾ ಕರುನ್ ದಿಲ್ಯಾ ಉಪ್ರಾಂತ್ ಆಪ್ಲ್ಯಾ ಪುತಾಂ ವಯ್ರ್ ಆವಯಾಂಕ್ ದುಬಾವ್ ಜಶೆಂ ಧುವಾಂಕ್ ನಿಖಾ ಕರುನ್ ದಿಲ್ಯಾ ಉಪ್ರಾಂತ್ ಧುವಾಂಚೆರ್ ಆವಯಾಂಕ್ ಮೋಗ್ ಚಡ್. ಆಶೆಂಚ್ ಜಾಲೆಂ ನಾಸಿರಾಚಾ ಆವಯ್ ಥಂಯ್!
ತ್ಯಾ ಕುಶಿನ್ ಮೋರಿಶಸಾಂತ್ಲ್ಯಾ ಸೊಭಿತ್ ಸಂಸಾರಾಂತ್....!
ಆಲಿಯಾಕ್ ಆನಿ ನಾಸಿರಾಕ್ ಸಾಕಾಳಿ ಉದೆಲ್ಲೊ ದೀಸ್ ಕಸೊ ಧನ್ಫಾರ್ ಜಾವ್ನ್ ಸಾಂಜೆಕ್ ವೆಂಗ್ತಾ ತೆಂ ಕಳಾಂಚ್ ನಾತ್ಲೆಲೆಂ. ಥಂಯ್ ಹಾಂಗಾ ಮ್ಹಣೊನ್ ಮೋರಿಶಸಾಂತ್ ಭಂವ್ತಾನಾದೀಸ್ ಧಾಂವ್ತಾಲೆ.
ಹನಿಮೂನಾಚ್ಯಾ ಘಡಿಯೆಂತ್ಲ್ಯಾ ವೆಳಾಂತ್ ನಾಸಿರಾನ್ ಆಲಿಯಾಚಾ ಖಾಸ್ಗಿ ವಿಶಯಾಂತ್ ಜಾಂವ್ ಯಾ ಆಲಿಯಾನ್ ನಾಸಿರಾಚಾ ಬಿಜ್ನೆಸ್ ಜಿವಿತಾಚಾ ವಿಶಯಾಂತ್ ಜಾಂವ್ ಕಾಂಯ್ಚ್ ಪ್ರಸ್ತಾಪ್ ಕಾಡ್ಲ್ಲೊ ನಾ. ಮೋರಿಶಸಾಂತ್ ಆಸ್ತಾ ವರೇಗ್ ಆಲಿಯಾ ಆನಿ ನಾಸಿರಾಚಾ ಜಿವಿತಾಂತ್ ಫಕತ್ತ್ ತಿಂ ದೊಗಾಂ ಘೊವ್ ಆನಿ ಬಾಯ್ಲ್ ಮ್ಹಳ್ಳೊ ವಿಚಾರ್ ಸೊಡುನ್ ದುಸ್ರೆಂ ಕಾಂಯ್ ತಾಂಚಾ ಮುಕಾರ್ ಆಯಿಲ್ಲೆಂ ನಾ.
ಆಯ್ಚಾ ಸಾಕಾಳಿಂ ಹೊಟೆಲಾ ರೂಮಾ ಥಾವ್ನ್ ಘರಾ ಟೆಲಿಫೋನ್ ಕರುನ್ ಉಲಯಿಲ್ಲ್ಯಾ ಆಲಿಯಾಕ್ ಮಸ್ತ್ ಸಂತೊಸ್ ಜಾಲ್ಲೊ. ತಾಣೆಂ ಅಕ್ಬರಾಚಾ ನಿಖಾ ವಿಶ್ಯಾಂತ್ ತಾಚ್ಯಾ ಆವಯ್ ಥಾವ್ನ್ ಖಬಾರ್ ಆಯ್ಕಾಲಿ. ಅಪ್ಣಾಚೆಂ ನಿಖಾ ಜಾವ್ನ್ ಘರಾಂತ್ ಖಾಲಿ ಜಾಲ್ಲೊ ಆಪ್ಲೊ ಜಾಗೊ ಭರ್ತಿ ಕರುಂಕ್ ಆಪ್ಲ್ಯಾ ಘರಾಂತ್ ನವಿ ಸುನ್ ಯೆತಾ ತೆಂ ಕಳಿತ್ ಜಾಲ್ಲೆಂ ಆಲಿಯಾ ಸಂತೊಸಾನ್ ಭರ್ಲೆಂ. ಅಕ್ಬರ್, ತಾಚ್ಯಾ ಭಾವಾಕ್ ನಿಖಾ ಕರುನ್ ಹಾಡ್ಚೆಂ ಚೆಡುಂ ತಾಚ್ಯಾ ಕುಟ್ಮಾ ಸವೆಂ ಅಮೇರಿಕಾಂತ್ ಆಸ್ಲ್ಲೆಂ.
ಆದ್ಲ್ಯಾ ದಿಸಾ ಅಹ್ಮದಾಬಾದಾ ಥಾವ್ನ್ ಜಾವೇದ್ ಯೇವ್ನ್ ಗೆಲ್ಲಿ ಖಬಾರ್ಯ್ ಆಪ್ಲ್ಯಾ ಆವಯ್ ಥಾವ್ನ್ ಆಲಿಯಾಕ್ ಕಳ್ಳಿ. ಚ್ಯಾರ್ ದಿಸಾಂ ಉಪ್ರಾಂತ್ ಜಾವೇದ್ ಪರ್ತ್ಯಾಕ್ ಪಾಟಿಂ ಲಂಡನಾಕ್ ವಚೊಂಕ್ ಆಸ್ಲ್ಲೊ.
"ಬೇಟಾ ಆಲಿಯಾ.....?, ತುಂ ಬರೆಂ ಆಸಾಯ್ ಪುತಾ?"
ಆವಯ್ಚಾ ತಾಳ್ಯಾಂತ್ ಆಪ್ಣಾ ವಿಶಿಂ ಆಸ್ಲ್ಲೊ ಹುಸ್ಕೊ ಆಲಿಯಾಕ್ ತಿಚ್ಯಾ ತಾಳ್ಯಾಂತ್ ಜಾಂವ್ಚಾ ತರಂಗಾಚಾ ಬದ್ಲಾವಣೆಂತ್ ಸ್ಪಷ್ಟ್ ಕಳ್ತಾಲೊ. ಆಪುಣ್ ಆಪ್ಲ್ಯಾ ಕುಟ್ಮಾ ಸವೆಂ ಲಾಗಿಂ ಆಸ್ತಾನಾ ಆಪ್ಲ್ಯಾ ಕುಟ್ಮಾನ್ ಆಪ್ಣಾಕ್ ದಾಖಯಿಲ್ಲೊ ಮೋಗ್ ಸಂಪೂರ್ಣ್ ಥರಾನ್ ತೆಂ ಪಾರ್ಕುಂಕ್ ಸಕ್ಲ್ಲೆಂ ನಾ. ಕುಟ್ಮಾಂಚಾಚಾ ಮೊಗಾ ಥಾವ್ನ್ ಪಯ್ಸ್ ಜಾತಾನಾ ಮಾತ್ರ್ ತಾಂಚಾ ಮೊಗಾಚೊ ಪರ್ಮಳ್ ಆಲಿಯಾಕ್ ಸಮ್ಜಾಲ್ಲೊ.
"ಬೇಟಾ, ಆಪ್ಲಿ ಜಾಗ್ರುತ್ಕಾಯ್ ಕರ್ ಆನಿ ಸಗ್ಳೆಂ ಮೊಗಾನ್ ಸಾಂಬಾಳ್! ನಾಸಿರ್ ಬರೊ ಭುರ್ಗೊ ಪುತಾ.....!"
ಬಾಪಾಯ್ಚಿಂ ಉತ್ರಾಂ ಆಲಿಯಾಚಾ ಮತಿಂತ್ ಸಿಂತಿಮೆಂತಾಚಿಂ ಮೊಡಾಂ ಹಾಡುನ್ ತಾಚ್ಯಾ ದೊಳ್ಯಾಂ ಪಾಕ್ಳ್ಯಾಂನಿ ಥಂಡ್ಸಾಣ್ ಹಾಡಂವ್ಕ್ ಪಾವ್ಲಿಂ.
"ಹಾಂ ಅಬ್ಬೂ.... ನಾಸಿರ್ ಮಸ್ತ್ ಬರೊ! ಮ್ಹಜೆ ವಿಶಿಂ ತೊ ಮಸ್ತ್ ಚಿಂತಾ ತೊ ಮ್ಹಜೊ ಮಸ್ತ್ ಮೋಗ್ ಕರ್ತಾ....!" ಆಲಿಯಾಚೊ ತಾಳೊ ಗದ್ಗದೀತ್ ಜಾಲ್ಲೊ.
"ಹಾಂವ್ ಜಾಣಾಂ ಬೇಟಾ.....!" ಬಾಪಾಯ್ಚಾ ಉಲವ್ಣ್ಯಾಂತ್ ದಿಸೊನ್ ಯೆಂವ್ಚಿ ತೃಪ್ತಿ ತಾಚ್ಯಾ ಮತಿಚಾ ಸಮಾಧಾನೆಕ್ ಸ್ಪಷ್ಟ್ ದಾಖಯ್ತಾಲಿ. ಧುವೆಕ್ ನಿಖಾ ಕರುನ್ ದೀವ್ನ್ ಶಬೀರ್ ಸಮಾಧಾನೆಂತ್ ಆಸಾ ಮ್ಹಳ್ಳೆಂ ಆಲಿಯಾಲಾಗಿಂ ತಾಣೆಂ ಉಲಯಿಲ್ಲ್ಯಾ ಉತ್ರಾಂ ಥಾವ್ನ್ ಸ್ಪಷ್ಟ್ ಕಳ್ತಾಲೆಂ.
ಆವಯ್ ಬಾಪಯ್ ಲಾಗಿಂ ಫೊನಾರ್ ಉಲಯ್ತಾನಾ ಏಕಾ ಕ್ಷಣಾಕ್ ಆಲಿಯಾ ಆಪುಣ್ ನಾಸಿರಾ ಸವೆಂ ಮೋರಿಶಸ್ ಆಸಾಂ ಮ್ಹಳ್ಳೆಂ ವಿಸ್ರಾಲೆಂ.
ಸಾಕಾಳಿಂಚಾ ವೆಳಾರ್ ಪಯ್ಶಿಲ್ಯಾ ದರ್ಯಾಚೆಂ ಥಂಡ್ ವಾರೆಂ ಆಪ್ಣೆಂ ವಸ್ತಿ ಕರ್ಚಾ ಹೊಟೆಲಾಚಾ ರೂಮಾನಿ ಭಲಾತ್ಕಾರೆನ್ ಪ್ರವೇಶ್ ಜಾವ್ನ್, ಪಯ್ಣಾರ್ಯಾಂಚಾ ಮನಾಂಕ್ ಆಪ್ಣಾ ತೆವ್ಶಿಂ ವೊಡುನ್ ಹಾಡ್ತಾನಾ, ಕಾಲ್ಚ್ಯಾ ಸಾಂಜೆರ್ ಆಪ್ಣೆ ಪಳೆಲ್ಲ್ಯಾ ಅಸ್ತಮೆ ಸುರ್ಯಾಚಾ ಸೊಭಿತ್ ದ್ರಶ್ಯಾಕ್ ನಿಯಾಳ್ ಕರುನ್ ಉಟ್ಲೆಲೆಂ ಆಲಿಯಾ ಮೋರಿಶಸಾಂತ್ಲ್ಯಾ ಹ್ಯಾ ದಿಸಾಂಕ್ ಉಡಾಸ್ ಕಾಡ್ತಾಂ ಕಾಡ್ತಾಂ ಆಪ್ಲ್ಯಾ ಘರ್ಚಾಂಚೊ ಉಡಾಸ್ ಯೇವ್ನ್ ತಾಣೆಂ ಆಪ್ಲ್ಯಾ ಘರಾ ಫೋನ್ ಕೆಲ್ಲೆಂ. ಥೊಡ್ಯಾ ಮಿನುಟಾಂಚಾ ಪೊನಾ ವಯ್ಲ್ಯಾ ಉಲವ್ಣ್ಯಾನ್, ಆಲಿಯಾಕ್ ಮೋರಿಶಸಾಕ್ ವಿಸ್ರಾವ್ನ್, ಘರ್ಚಾ ಸಿಂತಿಮೆಂತಾನಿ ರೆವ್ಡಾಯ್ಲೆಂ ತರ್ಯ್ ತಶೆಂಚ್ ಪರ್ತ್ಯಾಕ್ ತೆಂ ಆಪ್ಲ್ಯಾ ಜಿವಿತಾಂತ್ಲ್ಯಾ ಪ್ರಸ್ತುತ್ ಘಡಿಯೆಕ್ ಪಾಟಿಂ ಆಯಿಲ್ಲೆಂ.
ಆಜ್ ಆಲಿಯಚಾ ಆನಿ ನಾಸಿರಾಚಾ ಹನಿಮೂನಾಚೊ ನಿಮಾಣೊ ದೀಸ್!
"ಆಯ್ಚಾ ರಾತಿಕ್ ಆಮಿ ಹೆಂ ಮೋರಿಶಸ್ ಸೊಡುನ್ ವಚೊಂಕ್ ಆಸಾ ಆಲಿಯಾ! ಪುಣ್ ಕಶೆಂ ವೆಚೆಂ ತೆಂ ಮ್ಹಾಕಾಚ್ ಕಳಾನಾ....!" ಆಯ್ಚಾ ಸಾಕಾಳಿಂ ನಿದೆಂತ್ಲೊ ಉಟ್ಲ್ಲೊ ನಾಸಿರ್ ಸಾಂಜೆಚೊ ಉಡಾಸ್ ಕಾಡುನ್ ಉಲಯ್ಲೊ.
ಆಲಿಯಾ ಎದೊಳ್ಚ್ ನಿದೆಂತ್ಲೆಂ ಉಟೊನ್ ತ್ಯಾ ತಾಂಚಾ ಬೆಡ್ರುಮಾಚಾ ಜನೆಲಾ ಥಾವ್ನ್ ಭಾಯ್ರ್ ಪಳವ್ನ್ ರಾವ್ಲೆಲೆಂ. ತಾಚಿ ದೀಷ್ಟ್ ಪಯ್ಶಿಲ್ಯಾ ತ್ಯಾ ದಿಸೊನ್ ಯೆಂವ್ಚಾ ದರ್ಯಾ ವಯ್ರ್ ಖಂಚ್ಲ್ಲಿ.
"ಕಿತೆಂ ಪಳೆತಾಯ್?"
ಖಾಟಿಯೆರ್ಚ್ ಬಾಯ್ಲೆ ತೆವ್ಶಿಂ ಕೂಸ್ ಪರ್ತಿಲ್ಲ್ಯಾ ನಾಸಿರಾನ್ ಸವಾಲ್ ಕೆಲೆಂ.
"ಹುಂ... ಕಾಂಯ್ ನಾ!" ಆಲಿಯಾ ಸವ್ಕಾಸ್ ಆಪ್ಲ್ಯಾ ಘೊವಾ ತೆವ್ಶಿಂ ಘುಂವ್ಲೆಂ. ತಾಚ್ಯಾ ತೊಂಡಾರ್ ಪಾತಳ್ ಹಾಸೊ ಆಸ್ಲ್ಲ್ಯೊ. ಹ್ಯಾ ಹಾಸ್ಯಾಂಚೆಂ ಕಾರಾಣ್ ನಾಸಿರಾಕ್ ಕಳೊಂಕ್ ನಾತ್ಲೆಲೆಂ.
"ಹಾಸ್ತಾಯ್ ಕಿತೆಂ? ಏಕ್ ಪಾವ್ಟಿಂ, ಪಾಟಿಂ ಮುಂಬಯಿ ಗೆಲ್ಯಾ ಉಪ್ರಾಂತ್ ತುಕಾ ಘರ್ ಆನಿ ಮ್ಹಾಕಾ ಬಿಜ್ನೆಸ್ ಮ್ಹಣ್ತಾನಾ....." ನಾಸಿರಾನ್ ತಾಚಿಂ ಉತ್ರಾಂ ಪೂರ್ಣ್ ಕೆಲಿಂ ನಾಂತ್. ತೊ ತಸೊಚ್ ತ್ಯಾ ಬೆಡ್ಡಾರ್ ವೊಮ್ತೊ ಪಡ್ಲೊ.
ಆಪ್ಲ್ಯಾ ಘೊವಾಕ್ಚ್ ಪಳೆಲ್ಲ್ಯಾ ಆಲಿಯಾನ್ ವ್ಹಳೂ ಖಾಟಿಯೆ ತೆವ್ಶಿಂ ಮೆಟಾಂ ಕಾಡ್ಲಿಂ.
ಖಾಟಿಯೆರ್ ಬಸ್ಲೆಲ್ಯಾ ಆಲಿಯಾನ್ ನಾಸಿರಾಚಾ ವಿಣ್ಗ್ಯಾ ಪಾಟಿರ್ ಆಪ್ಲಿಂ ಬೊಟಾಂ ಚರಯ್ಲಿಂ. ಎಕಾ ಖಿಣಾಕ್ ಆಪ್ಲ್ಯಾ ಆಂಗಾರ್ ಮೊವಾಳ್ ಬೊಟಾಂ ವೀಣೆಂ ಖೆಳ್ತಾತ್ ತಶೆಂ ಜಾತಾನಾ ’ಸಟ್ಟ್’ ಕರುನ್ ಹೆವ್ಶಿಂ ಲೊಳ್ಲ್ಲ್ಯಾ ನಾಸಿರಾನ್ ಅಪ್ಲ್ಯಾ ಹಾತಾನ್ ಆಲಿಯಾಚಾ ಹಾತಾಕ್ ಧರ್ಲೆಂ.
ತಿತ್ಲೆಂಚ್!
ಆಪ್ಲ್ಯಾ ಹಾತಾಕ್ ದರ್ಲೆಲ್ಯಾ ನಾಸಿರಾಕ್ಚ್ ಆಪ್ಲಿ ದೀಶ್ಟ್ ಜೊಕುನ್ ಆಲಿಯಾನ್ ಪಳೆಲೆಂ. ಥೊಡ್ಯಾ ವೆಳಾಕ್ ದೊಗಾಂಚೆ ಚ್ಯಾರ್ ದೊಳೆ ಎಕಾಮೆಕಾಚಾ ಆಂಗ್ಣಾಂತ್ ಖೆಳೊಂಕ್ ಲಾಗ್ತಾನಾ, ದೊಳ್ಯಾಂ ದಿಷ್ಟೆನ್ ವ್ಹಾಳಯಿಲ್ಲ್ಯಾ ಸ್ತುಪ್ತ್ ಆಶೆಚೊ ಗುಲಾಮ್ ಜಾಲ್ಲ್ಯಾ ನಾಸಿರಾನ್ ತಶೆಂಚ್ ಆಲಿಯಾಕ್ ಆಪ್ಣಾ ತೆವ್ಶಿಂ ವೊಡ್ಲೆಂ.
"ನಾಸಿರ್...! ವೊರಾಂ ಪಳೆ! " ಆಲಿಯಾಕ್ ಫುಡೆಂ ಉಲಂವ್ಕ್ ನಾಸಿರಾನ್ ಆವ್ಕಾಸ್ ದಿಲೊ ನಾ. ತಾಣೆಂ ಆಲಿಯಾಕ್ ಆಪ್ಣಾ ತೆವ್ಶಿಂ ವೊಡ್ಲೆಂ. ತಶೆಂಚ್ ತಾಕಾ ವೆಂಗುನ್ ತೊ ತೆವ್ಶಿಂ ಪರ್ತಲೊ.
"ಮಾಗಿರ್ ವೇಳ್ ಜಾತಲೊ ನಾಸಿರ್.....!"
ಆಪ್ಲ್ಯಾ ಘೊವಾಚೊ ಇರಾದೊ ಜಾಣಾಂ ಜಾಲ್ಲೆಂ ಆಲಿಯಾ ನಾಸಿರಾಚಾ ಬಾವ್ಳ್ಯಾಂ ಥಾವ್ನ್ ಸುಟ್ಕಾ ಜೊಡುಂಕ್ ಉಡ್ಡಾಲೆಂ. ಪುಣ್ ತಾಕಾ ಜಾಂವ್ಕ್ ನಾ.
ತಿತ್ಲೆಂಚ್!
ಸವ್ಕಾಸ್ ಆಲಿಯಾನ್ ಆಪ್ಲ್ಯಾ ಹಾತಾಂನಿ ನಾಸಿರಾಕ್ ರೆವೊಡ್ ಘಾಲೊ.
*************
ಮುಂಬಯಿ ಏರ್ಪೋರ್ಟ್!
ಆಲಿಯಾ ಆನಿ ನಾಸಿರಾನ್ ಪಯ್ಣ್ ಕರ್ಚೆಂ ವಿಮಾನ್ ಸವ್ಕಾಸ್ ಮುಂಬಯಿಚಾ ಧರ್ತೆಚೆರ್ ದೆಂವ್ಲೆಂ.
ಮುಂಬಯಿಂತ್ ದೀಸ್ ಬುಡೊನ್ ಭಂವ್ತಣಿ ದಾಟ್ ಕಾಳೊಕ್ ರಾಜ್ ಕರ್ತಾಲೊ. ಹ್ಯಾ ಕಾಳೊಕಾಂತ್ ಮುಂಬಯಿಚ್ಯಾ ರನ್ವೇ ವಯ್ಲೆ ದಿವೆ ತ್ಯಾ ರನ್ವೇಕ್ ಸೊಭಿತ್ ಸೊಭಾಯ್ ದಿತಾಲೆ.
ಎಮಿಗ್ರೇಶನ್ ಕ್ಲಿಯರೆನ್ಸ್ ಜಾವ್ನ್ ಕಸ್ಟಮ್ಸಾ ಥಾವ್ನ್ ತಿಂ ಭಾಯ್ರ್ ಆಯ್ಲಿಂ. ಏರ್ಪೊರ್ಟಾ ಭಾಯ್ರ್ ಆಯಿಲ್ಲ್ಯಾ ತಾಣಿಂ ಏರ್ಪೋರ್ಟಾ ಭಾಯ್ರ್ ಸುಲೇಮಾನಾಚಿಂ ಸೊಧ್ನಾಂ ಕೆಲಿಂ. ಮೋರಿಶಸಾ ಥಾವ್ನ್ ಪಾಟಿಂ ಯೆಂವ್ಚ್ಯಾ ವಗ್ತರ್ ನಾಸಿರಾನ್ ಆಪ್ಲ್ಯಾ ಬಾಪಾಯ್ಕ್ ಆಪ್ಣೆಂ ಮುಂಬಯಿ ಏರ್ಪೋರ್ಟಾಕ್ ಪಾಂವ್ಚೊ ವೇಳ್ ಕಳಿತ್ ಕೆಲ್ಲೊ. ಸುಲೇಮಾನಾನ್ಚ್ ಖುದ್ಧ್ ಜಾವ್ನ್ ಆಪುಣ್ ಏರ್ಪೋರ್ಟಾಕ್ ಪುತಾ ಸುನೆಕ್ ಯೆವ್ಕಾರ್ ಮಾಗೊಂಕ್ ಯೆತಾಂ ಮ್ಹಣೊನ್ ಕಳಿತ್ ಕೆಲ್ಲೆಂ. ಆಪ್ಲ್ಯಾ ಬಾಪಾಯ್ಕ್ ಸೊಧ್ಚ್ಯಾ ನಾಸಿರಾಕ್, ಪಯ್ಶಿಲ್ಯಾ ಏರ್ಪೋರ್ಟಾ ಭಾಯ್ಲ್ಯಾ ಮಂದ್ ಲೈಟಾಚಾ ಉಜ್ವಾಡಾಂತ್ ತಾಂಚೊ ಡ್ರೈವರ್ ಆರೀಫ್ ರಾವೊನ್ ಆಸ್ಲಲೊ ದಿಸ್ಲೊ.
"ಆಲಿಯಾ.....? ಆರೀಫ್ ಥಂಯ್ ಆಸಾ. ಚಲ್ಯಾಂ....!"
ಆರೀಫಾ ತೆವ್ಶಿಂ ಬೋಟ್ ಜೊಕುನ್ ಆಲಿಯಾಕ್ ದಾಖಯಿಲ್ಲೊ ನಾಸಿರ್ ಆಪ್ಲಿ ಟ್ರಾಲಿ ಲೊಟುನ್ ಮುಕಾರ್ ಚಮ್ಕಾಲೊ. ಆಲಿಯಾನ್ ತಾಚ್ಯೆ ಸಾಂಗಾತಾ ಮೆಟಾಂ ಕಾಡ್ಲಿಂ.
ತಿತ್ಲ್ಯಾರ್ ಆರೀಫ್ ತಾಂಕಾ ಪಳವ್ನ್ ತಾಂಚೆ ಲಾಗಿಂ ವೆವೆಗ್ಗಿಂ ಚಲೊನ್ ಆಯ್ಲೊ.
"ಸೊಡ್ಯಾ ಸಾಬ್..... ಹಾಂವ್ ಟ್ರಾಲಿ ಧರ್ತಾಂ!"
ಆರೀಫಾನ್ ಟ್ರಾಲಿ ಮುಕಾರ್ ಲೊಟುನ್ ವರ್ತಾನಾ ನಾಸಿರಾನ್ ಹೆವ್ಶಿಂ ತೆವ್ಶಿಂ ಪಳೆಲೆಂ. ತಾಕಾ ತಾಚ್ಯಾ ಡ್ರೈವರಾ ಶಿವಾಯ್ ತಾಚ್ಯಾ ಘರ್ಚಿಂ ಕೊಣ್ಯ್ ದಿಸ್ಲಿಂ ನಾಂತ್. ಏರ್ಪೋರ್ಟಾಕ್ ಯೆತಾ ಮ್ಹಳ್ಳೊ ಬಾಪಯ್ ತಾಕಾ ಆರಿಫಾ ಸಾಂಗಾತಾ ದಿಸ್ಲೊ ನಾ.
"ಆರೀಫ್? ಅಬ್ಬೂ ಯೇಂವ್ಕ್ ನಾ....?" ಮತಿಂತ್ಲ್ಯಾ ದುಬಾವಾಕ್ ನಾಸಿರಾನ್ ಆರಿಫಾ ಮುಕಾರ್ ದವರ್ಲೆಂ.
"ನಾ! ಆಫೀಸಾ ಥಾವ್ನ್ ತೊ ಯೆತಾನಾಚ್ ಥೊಡೊ ವೇಳ್ ಜಾಲ್ಲೊ. ತರ್ಯ್ ಸಾಯ್ಬ್ ಯೆಂವ್ಚಾರ್ ಆಸ್ಲ್ಲೊ. ವೆಗ್ಗಿಂ ಕಾರ್ ತಯಾರ್ ಕರುಂಕ್ ತಾಣೆಂ ಮ್ಹಾಕಾ ಸಾಂಗ್ಲೆಲೆಂ. ಬೋವ್ಶಾ ಅಮ್ಮೀನ್ ಇನ್ಕಾರ್ ಕೆಲೆಂ ಜಾಯ್ಜಯ್!"
"ಅಮ್ಮಿನ್ ಇನ್ಕಾರ್ ಕೆಲೆಂ....! ಕಿತ್ಯಾಕ್?" ನಾಸಿರಾಕ್ ಕಾಂಯ್ ಸಮ್ಜಾಲೆಂ ನಾ.
"ತಶೆಂ ಕಾಂಯ್ ನಾ. ತಾಚಿ ಭಲಾಯ್ಕಿ ತಿತ್ಲಿ ಬರಿ ನಾತ್ಲೆಲಿ!"
"ಕಿತೆಂ ಜಾಲೆಂ ಅಬ್ಬೂಕ್....?" ನಾಸಿರ್ ಆಮ್ಚೊರ್ಲೊ.
"ತಾಚೊ ಬ್ಲಡ್ ಪ್ರೆಶರ್ ಚಡ್ಲಾ. ಆತಾಂ ಥೊಡೊ ಬರೊ ಆಸಾ.....!"
"ಅಬ್ಬೂಚೊ ಪ್ರೆಶರ್ ಚಡ್ಲೊ? ಕಸೊ.....? ಕಿತೆಂ ಜಾಲೆಂ?" ನಾಸಿರ್ ಬಾಪಾಯ್ಚಾ ವಿಶಿಂ ಜಾಣಾಂ ಜಾಂವ್ಕ್ ದರ್ವಡ್ತಾಲೊ.
"ತುಂ ಜಾಣಾಂಯ್....!" ಆರೀಫಾನ್ ಆಪುಣ್ ಸಾಂಗೊಂ ಯಾ ನಾ ಸಾಂಗೊಂ ಮ್ಹಳ್ಳ್ಯಾ ಇರಾದ್ಯಾನ್ ತೋಂಡ್ ಉಘಡ್ಲೆಂ "..... ಅಕ್ಲಕಾ ವಯ್ರ್ ಸಾಯ್ಬಾಕ್...." ಮುಕಾರ್ ಉಲಂವ್ಕ್ ತೊ ಪಾದ್ದೆಲೊ.
"ಅಕ್ಲಕಾನ್ ಕಿತೆಂ ಕೆಲೆಂ?"
"ತಾಚೊ ಸ್ವಭಾವ್ ತುಂ ಜಾಣಾಂಯ್....!"
"ಹಾಂವ್ ಜಾಣಾಂ! ಪುಣ್ ಆತಾಂ ತಾಣೆ ಕಿತೆಂ ಕೆಲೆಂ?" ನಾಸಿರ್ ಆಪ್ಣಾಚ್ಯಾ ಬಾಪಾಯ್ಚಾ ಪ್ರೆಶರಾಕ್ ಚಡಂವ್ಕ್ ಕಾರಾಣ್ ಜಾಲ್ಲ್ಯಾ ಅಕ್ಲಕಾನ್ ಕಿತೆಂ ಕೆಲಾಂ ಮ್ಹಳ್ಳೆಂ ಆಯ್ಕೊಂಚಿ ಆತುರಾಯ್ ಆಸ್ಲ್ಲಿ.
"ಜುಹು ಹೊಟೇಲಾಂತ್ ತಾಚ್ಯಾ ಪ್ರೆಂಡ್ಸಾಂ ಸಾಂಗಾತಾ ತಾಣೆಂ ಪಾರ್ಟಿ ಕೆಲ್ಲಿ ಮ್ಹಣೊನ್ ದಿಸ್ತಾ. ಸಾಯ್ಬಾಕ್ ತೆಂ ಕಳ್ಳೆಂ!"
ಆರೀಫ್ ಆತಾಂ ಟ್ರಾಲಿ ಲೊಟುನ್ ಹಾಡ್ಚೊ ಆಪ್ಲ್ಯಾ ಕಾರಾ ಲಾಗಿಂ ಯೇವ್ನ್ ಪಾವ್ಲೊ. ಕಾರಾಚಿ ಡಿಕ್ಕಿ ಉಗ್ತಿ ಕರುನ್ ದೊಗಾಂಯ್ಚಿ ಲಗೇಜ್ ತಾಣೆಂ ಡಿಕ್ಕಿಂತ್ ಘಾಲುನ್ ಡಿಕ್ಕಿ ಬಂದ್ ಕೆಲಿ.
"ಆತಾಂ ಅಬ್ಬು ಕಸೊ ಆಸಾ?" ನಾಸಿರ್ ಆಪ್ಲ್ಯಾ ಬಾಪಾಯ್ಕ್ ಹುಸ್ಕೆಲೊ.
ಆಪ್ಲ್ಯಾ ಬಾಪಾಯ್ಕ್ ಬ್ಲಡ್ ಪ್ರೆಶರ್ ಚಡ್ ಆಸಾ ತೆಂನಾಸಿರ್ ಜಾಣಾಂ. ಹ್ಯಾ ಖಾತಿರ್ಚ್ ತೊ ಆಪ್ಲ್ಯಾ ಬಾಪಾಯ್ಕ್ ತಾಚ್ಯಾ ಬಿಜ್ನೆಸಾ ಥಾವ್ನ್ ಜಾತಾ ತಿತ್ಲೆಂ ಪಯ್ಸ್ ದವರ್ತಾಲೊ.
"ಅಕ್ಲಕ್ಯ್ ಆಸಾ ಪಳೆ ಆಲಿಯಾ........! ಹೊ ಕೆದ್ನಾಂ ಸುದಾರ್ತಲೊ ತೆಂ ಮ್ಹಾಕಾ ಕಳಾನಾ!" ತೊ ಆತಾಂ ಆಲಿಯಾ ತೆವ್ಶಿಂ ಘುಂವ್ಲೊ.
"ತುಂ ಕಾಂಯ್ ಟೆನ್ಶನ್ ಕರಿನಾಕಾ. ಥೊಡ್ಯಾಚ್ ವೆಳಾನ್ ಆಮಿಂ ಘರಾ ಪಾವ್ತಾಂವ್....!" ಆಲಿಯಾ ಉಲಯ್ಲೆಂ.
ತಿತ್ಲ್ಯಾರ್,
ನಾಸಿರಾನ್ ಕಾರಾಚೆಂ ದಾರ್ ಉಗ್ತೆಂ ಕೆಲೆಂ. ತೊ ಆತಾಂ ಕಾರಾರ್ ಬಸ್ಲೊ. ತಾಚ್ಯಾ ಲಾಗಿಂಚ್ ಆಲಿಯಾ ಬಸ್ಲೆಂ. ತಿತ್ಲ್ಯಾರ್ ಡ್ರೈವಿಂಗ್ ಸೀಟಾಚೆರ್ ಯೇವ್ನ್ ಬಸ್ಲೆಲ್ಯಾ ಆರೀಫಾನ್ ಕಾರ್ ಚಾಲು ಕರುನ್ ತೆಂ ಏರ್ ಪೋರ್ಟಾಚಾ ಪಾರ್ಕಿಂಗಾ ಥಾವ್ನ್ ಭಾಯ್ರ್ ಹಾಡುನ್ ತಾಕಾ ಆಪ್ಲ್ಯಾ ದಿಶೆ ತೆವ್ಶಿಂ ಧಾಂವ್ಡಾಯ್ಲೆಂ.
"ಸಾಬ್... ಹಾವೆಂ ಆಶೆಂ ಸಾಂಗ್ಲೆಂ ಮ್ಹಣೊನ್ ಘರಾ ವಚೊನ್ ಕಾಂಯ್ ಸಾಂಗಿನಾಕಾತ್......!" ನಮ್ರತಾಯೆನ್ ವಿನತಿ ಕೆಲ್ಲ್ಯಾ ಆರೀಫಾನ್ ಕಾರಾಚೊ ವೇಗ್ ಚಡಯ್ಲೊ. ಥೊಡ್ಯಾಚ್ ವೆಳಾನ್ ನಾಸಿರ್ ಆನಿ ಆಲಿಯಾ ತಾಂಚಾ ಘರಾ ಪಾವ್ಲ್ಲಿಂ.
ಹನಿಮೂನಾ ಥಾವ್ನ್ ಪಾಟಿಂ ಆಯಿಲ್ಲ್ಯಾ ಪುತಾ ಸುನೆಕ್ ಪಳವ್ನ್ ನಾಸಿರಾಚಿ ಆವಯ್ ಸಂತೊಸಾನ್ ಭರ್ತಾನಾ, ನಾಸಿರಾ ಲಾಗಿಂ ಆಯ್ಲೆಲ್ಯಾ ತಾಚ್ಯಾ ಭಾಂವ್ಡಾಂ ಲಾಗಿಂ ನಾಸಿರ್ ಚಡಿತ್ ಕಾಂಯ್ ಉಲಯ್ಲೊ ನಾ.
ಪಯ್ಲೆಂಚ್ ಅಕ್ಲಕಾ ವಿಶಿಂ ಜಾಣಾಂ ಜಾಲ್ಲೊ ನಾಸಿರ್ ಭಾವಾ ವಯ್ಲ್ಯಾ ರಾಗಾನ್ ಮೌನ್ ರಾವ್ಲೊ. ಎಕಾ ವಾಟೆನ್ ತಾಕಾ ಪಯ್ಣಾಚಿ ಪುರಾಸಣ್ ಜಾಲ್ಲಿ ಜಾಲ್ಯಾರ್, ತ್ಯಾ ವಯ್ಲ್ಯಾನ್ ರಾತ್ ಜಾಲ್ಲಿ. ಪೂತ್ ಆನಿ ಸುನ್ ಪಾಟಿಂ ಘರಾ ಯೆತಾತ್ ಮ್ಹಳ್ಳ್ಯಾ ಎಕಾಚ್ ನಿಬಾನ್ ಘರ್ಚಿಂ ಸಗ್ಳಿಂ ಜಾಗಿಂ ಆಸ್ಲ್ಲಿಂ ಶಿವಾಯ್ ನಾ ಜಾಲ್ಯಾರ್ ಹರ್ಶೆಂಚಾ ಪರಿಂ ಹೊ ತಾಂಚೊ ತಾಣಿಂ ನಿದ್ಚೊ ವೇಳ್. ನಾಸಿರ್ ಕಾಂಯ್ ಉಲಯ್ನಾಸ್ತಾನಾ ಆಪ್ಲೊ ಬಾಪಯ್ ನಿದ್ಲಾ ತೆಂ ಕಳೊನ್ ತೊ ಆಪ್ಲ್ಯಾ ರೂಮಾಕ್ ಚಮ್ಕಾಲೊ.
ತಿಂ ಆತಾಂ ಆಲಿಯಾ ಲಾಗಿಂ ಉಲಂವ್ಕ್ ಲಾಗ್ಲಿಂ.
ನಾಸಿರಾಚೊ ಭರ್ತಾವ್ ಪಳವ್ನ್ ನಾಸಿರಾಚಾ ಆವಯ್ಕ್ ದುಬಾವ್ ಮಾರ್ಲೊ.
ಆಪ್ಲ್ಯಾ ರೂಮಾಕ್ ಗೆಲ್ಲೊ ನಾಸಿರ್ ಭಾಯ್ರ್ ಯೇನಾ ತೆಂ ಪಳೆಲ್ಲಿ ನಾಸಿರಾಚಿ ಆವಯ್ ಸಲ್ಮಾಕ್ ತಶೆಂಚ್ ಆಲಿಯಾ ಲಾಗಿಂ ಉಲಂವ್ಕ್ ಸೊಡುನ್ ತಿ ನಾಸಿರಾಚ್ಯಾ ರೂಮಾ ತೆವ್ಶಿಂ ಚಮ್ಕಾಲಿ.
ಆಪ್ಲ್ಯಾ ರುಮಾಂತ್ಲ್ಯಾ ಖಾಟಿಯೆರ್ ನಾಸಿರ್ ಉದಾರೊಚ್ ಪಡ್ಲ್ಲೊ. ಹೆಂ ಪಳೆಲ್ಲಿ ತಿ,
"ಬೇಟಾ.... ಕಿತೆಂ ಜಿವಾಕ್ ಭಲಾಯ್ಕಿ ನಾ?" ಆಪ್ಲ್ಯಾ ಪುತಾಚೆಂ ವರ್ತನ್ ತಿಕಾ ಸಮ್ಜಾಲೆಂ ನಾ.
"ಕಾಂಯ್ ನಾ.... ಬರೆಂ ಆಸಾ!"
ಆವಯ್ಚೊ ತಾಳೊ ಆಯ್ಕೊನ್ ನಾಸಿರಾನ್ ದಾಂಪ್ಲೆಲೆ ದೊಳೆ ಉಗ್ತೆ ಕೆಲೆ. ತೊ ಆಲಿಯಾಕ್ ರಾಕ್ತಾಲೊ.
"ತರ್ ಊಟ್! ಹಾಂವ್ ಜೆವ್ಣಾಕ್ ತಯಾರ್ ಕರ್ತಾಂ....!"
"ನಾಂ ಅಮ್ಮಿ... ಪ್ಲೈಟಾರ್ ಆಮ್ಚೆಂ ಜೆವಾಣ್ ಜಾಲಾಂ. ತುಂ ಕಾಂಯ್ ಕರಿನಾಕಾ. ಮ್ಹಾಕಾ ಮಸ್ತ್ ಪುರಾಸಣ್ ಜಾಲ್ಯಾ...!" ತಾಣೆ ಆವಯ್ಕ್ ಜವಾಬ್ ದಿಲಿ.
"ತಯಾರ್ ಕರುಂಕ್ ಕಾಂಯ್ ನಾ ಬೇಟಾ...! ಸಗ್ಳೆಂ ತಯಾರ್ ಆಸಾ. ತುಮ್ಚೆ ಖಾತಿರ್ಚ್ ಹಾವೆಂ ತಯಾರ್ ಕೆಲ್ಲೆಂ!" ತಿಣೆ ವಿನತಿ ಕೆಲಿ.
"ಅಮ್ಮೀ...... ತುಕಾ ಹಾವೆಂ ಸಾಂಗ್ಲೆಂ! ಮ್ಹಾಕಾ ಜೇಂವ್ಕ್ ನಾಕಾ!" ನಾಸಿರ್ ಖಾಟಿಯೆರ್ ಥಾವ್ನ್ ಉಟ್ಲೊ ನಾ.
ನಾಸಿರಾಚಾ ಆವಯ್ಕ್ ಆಪ್ಲ್ಯಾ ಪುತಾಚೆಂ ವರ್ತನ್ ಕಾಂಯ್ ಸಮ್ಜಾಲೆಂ ನಾ. ಹ್ಯಾ ವೆಳಾರ್ ತಿಣೆಂ ಪುತಾಲಾಗಿಂ ಕಾಂಯ್ ವಿಚಾರ್ಚ್ಯಾ ಯಾ ಉಲಂವ್ಚ್ಯಾ ಪರಿಂ ನಾತ್ಲ್ಲೆಂ. ನಾಸಿರಾಚಾ ವರ್ತನಾಂತ್ ತೊ ಥಕ್ಲೆಲ್ಯಾಪರಿಂ ದಿಸ್ತಾಲೊ ಆಸ್ತಾಂ ಪುತಾಕ್ ತಶೆಂಚ್ ಸೊಡುನ್ ತಿ ಭಾಯ್ರ್ ಆಯ್ಲಿ.
"ಬಹೂ.... ನಾಸಿರಾಕ್ ಸಾಂಗ್ ಹಾಂವ್ ಜೆವಾಣ್ ಕಾಡ್ತಾಂ. ಆನಿ ತುಮಿ ವೆಗ್ಗಿಂ ನ್ಹಾವ್ನ್ ಯೆಯಾತ್!" ತಿ ಆತಾಂ ಕುಜ್ನಾ ತೆವ್ಶಿಂ ಚಮ್ಕಾಲಿ.
"ನಾಕಾ ಅಮ್ಮೀ ಆಮ್ಚೆಂ ಜೆವಾಣ್ ಜಾಲಾಂ! ತುಂ ಜೆವಾಣ್ ಕಾಡಿನಾಕಾ!" ಆಲಿಯಾನ್ ಇನ್ಕಾರ್ ಕೆಲೆಂ.
"ಬರೆಂ ತರ್....! ಹಾಂವ್ ನಿದೊಂಕ್ ವೆತಾಂ!" ನಾಸಿರಾಚಿ ಆವಯ್ ಆಪ್ಲ್ಯಾ ಕುಡಾ ತೆವ್ಶಿಂ ಚಮ್ಕಾಲಿ.
"ಸಲ್ಮಾ....? ತುಕಾ ಜೆಮ್ ಯೆತಾ ಆಸ್ತೆಲಿ. ತುಂ ನಿದೊಂಕ್ ವಚ್...! ಆಮಿಂ ಫಾಲ್ಯಾಂ ಉಲವ್ಯಾಂ. ನಾಸಿರ್ ನಿದೊಂಕ್ ಗೆಲೊ ಆಸ್ತಲೊ. ಹ್ಯಾ ಪಯ್ಣಾ ಥಾವ್ನ್ ತಾಕಾ ಮಸ್ತ್ ಪುರಾಸಣ್ ಜಾಲ್ಯಾ!"
ಸಲ್ಮಾಕ್ ಸಾಂಗೊನ್ ಆಲಿಯಾ ಆಪ್ಲ್ಯಾ ಘೊವಾಚಾ ರುಮಾಕ್ ಚಮ್ಕಾಲೆಂ.
ನಾಸಿರ್ ಭಿತರ್ ವಸ್ತುರ್ ನಿಕ್ಳಾಯ್ತಾಲೊ.
ಬೆಡ್ರೂಮಾಕ್ ಆಯಿಲ್ಲ್ಯಾ ಆಲಿಯಾನ್ ಭಿತರ್ ಆಯಿಲ್ಲೆಂಚ್ ಬೆಡ್ರುಮಾಚೆಂ ದಾರ್ ದಾಂಪ್ಲೆಂ.
ತಾಣೆಂ ಆಪ್ಲ್ಯಾ ಘೊವಾಕ್ ಪಳೆಲೆಂ. ತೊ ಬಾಪಾಯ್ಚೆಂ ಚಿಂತುನ್ ಬೆಜಾರಾಯೆರ್ ಆಸಾ ತೆಂ ಆಲಿಯಾಕ್ ಕಳ್ಳೆಂ.
"ಹ್ಯಾ ಲ್ಹಾನ್ ಲ್ಹಾನ್ ವಿಶಯಾಕ್ ಲಾಗೊನ್ ತುಂ ಇತ್ಲೆಂ ಟೆನ್ಶನ್ ಕಿತ್ಯಾಕ್ ಘೆತಾಯ್? ಭಾಯ್ರ್ ಅಮ್ಮಿಕ್ ತುಜೆಂ ತೋಂಡ್ ಪಳವ್ನ್ಚ್ ದುಬಾವ್ ಜಾಲಾ ಆಸ್ತಲೊ. ತುಂ ಕೊಣಾಯ್ಲಾಗಿಂ ಸಾರ್ಕೆಂ ಉಲಂವ್ಕ್ಯ್ ನಾಂಯ್. ತಿಂ ಉಪ್ರಾಂತ್ ಬೆಷ್ಟೆಂ ಮ್ಹಜ್ಯೆರ್ ದುಬಾವ್ ಕರುಂಕ್ ಆಸಾತ್....!" ಆಪ್ಲೆಂ ವಸ್ತುರ್ ನಿಕ್ಳಾಂವ್ಚ್ಯಾ ಆಪ್ಲ್ಯಾ ಘೊವಾಕ್ಚ್ ತದೇಕ್ ದ್ರಶ್ಟೆನ್ ಪಳಯಿತ್ತ್ ಆಲಿಯಾನ್ ಸಾಂಗ್ಲೆಂ.
"ತುಂ ಆತಾಂ ಮ್ಹಾಕಾ ಲಿಸಾಂವ್ ಶಿಕಯ್ನಾಕಾ! ಪಯ್ಲೆಂಚ್....!" ಆಲಿಯಾ ವಯ್ರ್ ನಾಸಿರ್ ರಾಗಾರ್ ಜಾಲೊ.
"ತುಂ ರಾಗಾರ್ ಕಿತ್ಯಾಕ್ ಜಾತಾಯ್? ತುಕಾ ಕಾಂಯ್ ಹ್ಯಾ ವಿಶಿಂ ಕಳ್ಚೆಂ ನಾ. ಆತಾಂ ತುಜ್ಯಾ ನಡ್ತ್ಯಾಂತ್ ಕಾಂಯ್ ತರ್ಯ್ ಬದ್ಲಾವಣ್ ಜಾಯ್ತ್ ಜಾಲ್ಯಾರ್ ತಾಕಾ ಹಾಂವ್ಚ್ ಕಾರಾಣ್ ಮ್ಹಣೊನ್ ಅಮ್ಮಿ ಆನಿ ಅಬ್ಬು ಮ್ಹಣ್ತೆಲಿಂ ಶಿವಾಯ್ ತಿ ತುಜಿ ಅಸ್ಕತ್ಕಾಯ್ ಮ್ಹಣೊನ್ ಕೊಣ್ಯ್ ಸಮ್ಜೊಂಚಿಂ ನಾಂತ್....!" ಆಲಿಯಾ ಮುಕ್ಲ್ಯಾ ಖಾಟಿಯೆರ್ ಬಸ್ಲೆಂ.
ಆಲಿಯಾಚಿಂ ಉತ್ರಾಂ ಆಯ್ಕೊನ್ ನಾಸಿರ್ ಆಲಿಯಾ ತೆವ್ಶಿಂ ಘುಂವ್ಲೊ. ತಾಣೆಂ ಆಪ್ಲೆಂ ವಸ್ತುರ್ ಎದೊಳ್ಚ್ ನಿಕ್ಳಾಯಿಲ್ಲೆಂ. ತೊ ಬಾತ್ಟವಲ್ ಸೊಧ್ತಾಲೊ. ಆಲಿಯಾಚಿಂ ಉತ್ರಾಂ ಆಯ್ಕೊನ್ ತಾಕಾ ಕಾಂಯ್ ಸಮ್ಜಾಲೆಂ ನಾ.
"ಅತ್ತಾಂ ಘರಾ ಭಿತರ್ ಸರ್ತಾ ವರೇಗ್ ತುಂ ಸಾರ್ಕೆಂ ಆಸ್ಲ್ಲೆಂಯ್. ಎಕಾಚ್ಚ್ ಫರಾ ಕಿತೆಂ ಜಾಲೆಂ ತುಕಾ? .......ದುಬಾವ್ ಆನಿ ಕಾರಾಣ್ ಮ್ಹಣೊನ್ ತುಂ ಕಿತೆಂ ಉಲಯ್ತಾಯ್? ಬೆಷ್ಟೆಂ ತಕ್ಲಿ ಪಾಡ್ ಕರಿನಾಕಾ....! ಅಬ್ಬೂನ್ ಆನಿ ಅಮ್ಮಿನ್ ತುಕಾ ಕಿತೆಂ ಕೆಲೆಂ.....?" ಆಪ್ಲ್ಯಾ ಬಾಯ್ಲೆನ್ ಉಚಾರ್ಲೆಲ್ಯಾ ವಿಚಾರಾಂಕ್ ಸಮ್ಜೊಂಚಿ ಸಕತ್ ನಾಸ್ತಾನಾ ನಾಸಿರ್ ಆಲಿಯಾಕ್ಚ್ ಪಳವ್ನ್ ರಾವ್ಲೊ.
"ತುಂ ಆತಾಂ ದೋನ್ ಹಪ್ತ್ಯಾಂ ಉಪ್ರಾಂತ್ ಪಾಟಿಂ ಘರಾ ಆಯ್ಲಾಯ್! ತುಕಾ ಬರೆಂ ಕರುನ್ ಅಮ್ಮಿ ಲಾಗಿಂ ಉಲಯಿಲ್ಲೆಂ ಜಾಲ್ಯಾರ್ ಕಿತೆಂ ಜಾತೆಂ?" ಆಲಿಯಾನ್ ಆಪ್ಲ್ಯಾ ವಿಚಾರಾಕ್ ಸೊಡುನ್ ದಿಲೆಂ ನಾ. ನಾಸಿರಾಚಾ ಹ್ಯಾ ಆಯ್ಚ್ಯಾ ವರ್ತನಾ ಥಾವ್ನ್ ತಾಚಿ ಅಮ್ಮಿ ಕಿತೆಂ ಚಿಂತೆಲಿ ತೆಂ ಆಲಿಯಾ ಜಾಣಾಂ.
"ಅಮ್ಮಿಲಾಗಿಂ.....!? ಅಮ್ಮಿಲಾಗಿಂ ಕಿತೆಂ ಉಲಂವ್ಕ್ ಆಸ್ಲ್ಲೆಂ?" ನಾಸಿರಾಚೆಂ ತೆಂಚ್ ನೆಣಾರ್ಪಣಾಚೆಂ ಸವಾಲ್.
"ಉಲಂವ್ಕ್ ಕಾಂಯ್ ನಾತ್ಲ್ಲೆಂ! ಪುಣ್......" ನಾಸಿರಾಕ್ ಕಶೆಂ ಸಮ್ಜಂವ್ಚೆಂ ತೆಂ ಆಲಿಯಾಕ್ ಕಳ್ಳೆಂ ನಾ.
"ತುಕಾ ತೆಂ ಸಮ್ಜೊಂಚೆಂ ನಾ ನಾಸಿರ್! ಚಲಿ ಜಾವ್ನ್ ಜಲ್ಮೊನ್ ಆಯಿಲ್ಲ್ಯಾಕ್ ಮಾತ್ರ್ ತೆಂ ಕಳ್ತಾ!"
ಆಲಿಯಾ ಆತಾಂ ಖಾಟಿಯೆ ವಯ್ಲೆಂ ಉಟ್ಲೆಂ. ತಾಚಿಂ ಉತ್ರಾಂ ಆಪ್ಲ್ಯಾ ಕಾನಾಂಕ್ ಪಡ್ಲ್ಯಾರ್ಯ್ ತಿಂ ಆಪ್ಣಾಕ್ ಆಯ್ಕೊಂಕ್ ನಾಂತ್ ಮ್ಹಳ್ಳ್ಯಾಪರಿಂ ಕೆಲ್ಲೊ ನಾಸಿರ್ ಬಾತ್ಟವಲ್ ಘೆವ್ನ್ ಬಾತ್ರುಮಾ ಭಿತರ್ ಘುಸ್ಲೊ.
ನಾಸಿರ್ ನ್ಹಾವ್ನ್ ಆಯ್ಲ್ಯಾ ಉಪ್ರಾಂತ್ ಆಲಿಯಾ ಬಾತ್ರುಮಾ ಭಿತರ್ ರಿಗ್ಲೆಂ.
ಹುನ್ ಉದ್ಕಾಚಾ ಶಾವರಾಂತ್ ಆಲಿಯಾಕ್ ಆಪ್ಲ್ಯಾ ಕುಡಿಕ್ ದಾಧೊಸ್ಕಾಯ್ ಭೊಗ್ಲ್ಲ್ಯಾ ಪರಿಂ ಜಾಲೆಂ. ತಾಚಿ ಮತ್ ತ್ಯಾ ಲಾಂಬ್ ಪಯ್ಣಾ ಥಾವ್ನ್ ಥಕ್ಲೆಲಿ ಆಸ್ಲೆಲಿ ತಿ ವ್ಹಳೂ ಹಾಳು ಜಾತಾನಾ ತೆಂ ಬಾತ್ ರುಮಾ ಥಾವ್ನ್ ಭಾಯ್ರ್ ಆಯ್ಲೆಂ.
ನಾಸಿರ್ ಯೆದೊಳ್ಚ್ ನಿದೆಕ್ ವೆಂಗ್ಲ್ಲೊ. ಹೆಂ ಪಳೆಲ್ಲೆಂ ಆಲಿಯಾ ಆಪ್ಲ್ಯಾ ಆಂಗಾರ್ ನೈಟಿ ವೊಡುನ್ ಬೆಡ್ರೂಮಾ ಥಾವ್ನ್ ಭಾಯ್ರ್ ಆಯ್ಲೆಂ.
ಭಾಯ್ರ್ ಸಲ್ಮಾ ಸೊಫಾಚೆರ್ ಬಸೊನ್ ಕಿತೆಂಗೀ ವಾಚ್ತಾಲೆಂ.
"ಸಲ್ಮಾ...., ತುಂ ನಿದೊಂಕ್ ನಾಂಯ್?"
"ದೊಳ್ಯಾಂಕ್ ನೀದ್ ಯೆತಾ. ಪುಣ್ ತುಕಾ ಕಾಂಯ್ ಗರ್ಜ್ ಪಡಾತ್ ಜಾಲ್ಯಾರ್ ಮ್ಹಣೊನ್ ರಾವ್ಲಿಂ. ಕಾಂಯ್ ಗರ್ಜ್ ಆಸ್ಲ್ಲೆಂ?" ಸಲ್ಮಾನ್ ಆಪ್ಲ್ಯಾ ಹಾತಿಂತ್ಲೊ ಬೂಕ್ ದಾಂಪುನ್ ತೆಂ ಉಭೆಂ ಜಾಲೆಂ.
"ನಾ..... ಕಾಂಯ್ ನಾ. ಹಾಂವ್ ಆಶೆಂಚ್ ಪಳೆಯಾಂ ಮ್ಹಣೊನ್ ಆಯ್ಲಿಂ. ನಾಸಿರ್ ನಿದ್ಲೊ. ಪ್ಲೈಟಾರ್ಯ್ ತಾಕಾ ಕಾಂಯ್ ನೀದ್ ಪಡೊಂಕ್ ನಾ. ಬರಿ ಪುರಾಸಣ್ ಜಾಲ್ಯಾ ಆಸ್ತೆಲಿ."
"ಹಾಂ! ತಾಕಾ ಪಳೆತಾನಾಚ್ ಕಾಳ್ತಾಲೆಂ! ತುಂಯ್ ನಿದೊಂಕ್ ವಚ್.... ಹಾಂವ್ ಲೈಟ್ ಕಾಡ್ತಾಂ!"ಸಲ್ಮಾ ಬಸ್ಲೆಲ್ಯಾ ಕಡೆನ್ ಥಾವ್ನ್ ಉಟ್ಲೆಂ.
"ಬರೆಂ ತರ್...! ಫಾಲ್ಯಾಂ ಉಲವ್ಯಾಂ!" ಆಲಿಯಾ ಸವ್ಕಾಸ್ ಆಪ್ಲ್ಯಾ ಬೆಡ್ರುಮಾ ತೆವ್ಶಿಂ ಚಮ್ಕಾಲೆಂ. ಖಾಟಿಯೆರ್ ಎದೊಳ್ಚ್ ನಿದೆಕ್ ವೆಂಗ್ಲ್ಲ್ಯಾ ಆಪ್ಲ್ಯಾ ಘೊವಾಕ್ಚ್ ಥೊಡೊ ವೇಳ್ ಪಳೆಲ್ಲ್ಯಾ ತಾಣೆಂ ಆಪ್ಲಿ ವೋಲ್ ಸೊಡಯ್ಲಿ. ಉಪ್ರಾಂತ್ ತಶೆಂಚ್ ತೆಂ ನಾಸಿರಾಚಾ ಬಗ್ಲೆಕ್ ಆಡ್ ಪಡ್ಲೆಂ.
**************
ಆಯ್ಚಾ ದಿಸಾ ಸಾಕಾಳಿಂ ಆಲಿಯಾ ಉಟ್ತಾನಾ, ಸುರ್ಯೊ, ತಾಚ್ಯಾ ಸಂಸಾರಾಚಿ ಸೊಭಾಯ್ ಪಳಂವ್ಚ್ಯಾ ಕಾಮಾಂತ್ ಸದಾರ್ನ್ ಆಲಿಯಾಚಾ ಉಜ್ವ್ಯಾ ಭುಜಾಚಾ ತಿತ್ಲ್ಯಾ ಹಂತಾರ್ ಪಾವ್ಲ್ಲೊ. ಕಾಲ್ಚಾ ರಾತಿಚಾ ಪಯ್ಣಾಂತ್ ಥಕ್ಲೆಲಿಂ ಆಲಿಯಾ ಆನಿ ನಾಸಿರ್ ಘರ್ಚಾ ವಾತಾವರಾಣಾಂತ್ ಬೆಜಾರಾಯೆನ್ ನಿದೆಕ್ ವೆಂಗ್ಲ್ಲಿಂ. ಆಪ್ಲೊ ಘೊವ್ ಘರ್ಚಾ ವಿಶಯಾಂತ್ ಧಯ್ರ್ ಸಾಂಬಾಳುಂಕ್ ಕಿತ್ಲೊ ಅಸ್ಕತ್ ಆಸಾ ತೆಂ ಆಲಿಯಾನ್ ಕಾಲ್ಚಾ ರಾತಿಂ ಸ್ಪಷ್ಟ್ ಪಳೆಲ್ಲೆಂ. ಆಪುಣ್ ನ್ಹಾವ್ನ್ ಯೆಂವ್ಚಾ ಆದಿಂಚ್ ನಿದೆಕ್ ವೆಂಗ್ಲ್ಲ್ಯಾ ನಾಸಿರಾಕ್ ಪಳವ್ನ್ ಕಿತ್ಲೊ ವೇಳ್ ಆಲಿಯಾಚಾ ದೊಳ್ಯಾಂಕ್ ನೀದ್ಚ್ ಆಯಿಲ್ಲಿ ನಾ. ಮೋರಿಶಸಾಂತ್ ತಾಣಿಂ ದೊಗಾಂಯ್ನಿ ಸಾಂಗಾತಾ ಸಾರ್ಲೆಲ್ಯೊ ರಾತಿ ದೊಳ್ಯಾಂಚಾ ಪರ್ದ್ಯಾ ವಯ್ರ್ ಉಪ್ಯೆವ್ನ್ ಯೆತಾನಾ ಮತಿಚಿ ಸ್ತುಪ್ತ್ ಆಶಾ ಜಾಗಿ ಜಾವ್ನ್ ಕುಡಿ ಭಿತರ್ ತಳ್ಮಳೆ ಉಟ್ಲ್ಲೆ.
ಮತಿಚಾ ಆಶೆಕ್ ಆನಿ ಕುಡಿಚಾ ತಳ್ಮಳ್ಯಾಂಕ್ ದಾಂಬುನ್ ಧರುನ್ ದೊಳ್ಯಾಂ ಮುಕಾರ್ ನೀದ್ ವೊಡುಂಕ್ ಆಲಿಯಾಕ್ ಭಾರಿಚ್ಚ್ ತ್ರಾಸ್ ಜಾಲ್ಲೆ. ತಾಚ್ಯಾ ದೊಳ್ಯಾಂ ಮುಕಾರ್ ನಿದೆನ್ ಪಾಲಂವ್ ವೊಡ್ತಾನಾ ಸಾದಾರ್ನ್ ರಾತ್ ಪಾಶಾರ್ ಜಾಲ್ಲಿ. ನಿದೆ ವಿಣೆಂ ಪಾಶಾರ್ ಜಾವ್ನ್ ಗೆಲ್ಲ್ಯಾ ಕಾಲ್ಚ್ಯಾ ರಾತಿಚಾ ವೆಳಾ ವಿಶಿಂ ಆತಾಂ ಜಾಗೆಂ ಜಾಲ್ಲೆಂ ಆಲಿಯಾ ಚಿಂತಿಲಾಗ್ಲೆಂ.
ಖಾಟಿಯೆರ್ ದೊಳೆ ಉಘಡ್ನ್ ಹೆವ್ಶಿಂ ಲೊಳ್ಲ್ಲೆಂ ಆಲಿಯಾ ಆಪ್ಲ್ಯಾ ದುಸ್ರ್ಯಾ ಕುಶಿನ್ ಆಪ್ಲೊ ಘೊವ್ ದಿಸೊನ್ ಯೇನಾಸ್ತಾನಾ ವೆತಾನಾ, ನಿದ್ಲ್ಲ್ಯಾ ಕಡೆನ್ ಥಾವ್ನ್ಚ್ ಏಕ್ ಪಾವ್ಟಿಂ ಸಗ್ಳ್ಯಾ ಬೆಡ್ರೂಮಾ ವಯ್ರ್ ನದರ್ ಮಾರುನ್, ಖಂಯ್ಚರ್ಯ್ ಆಪ್ಲೊ ಘೊವ್ ದಿಸೊನ್ ಯೇನಾಸ್ತಾನಾ ವೆತಾನಾ, ಏಕ್ ಪಾವ್ಟಿಂ ವೊಣ್ತಿ ವಯ್ಲ್ಯಾ ಗಡಿಯಾಳಾ ವಯ್ರ್ ತಾಣೆ ಆಪ್ಲಿ ದೀಷ್ಟ್ ಭೊಂವ್ಡಾಯ್ಲಿ.
ವೊರಾಂ ಸಾಕಾಳಿಂಚಿಂ ಧಾ ಜಾವ್ನ್ ತೀಸ್ ಆನಿ ದೋನ್ ಮಿನುಟಾಂ ದಾಕಯ್ತಾಲೆಂ ತೆಂ.
"ಯಾ ಅಲ್ಲಾ! ಇತ್ಲ್ಯಾ ವೆಳಾ ಪಾಸೊನ್ ಹಾಂವ್ ಅಜೂನ್ ಖಾಟಿಯೆರ್......?"
ಮನಾಂತ್ ಉದ್ಗಾರ್ಲೆಲ್ಯಾ ಆಲಿಯಾನ್ ಆಪ್ಲ್ಯಾ ಆಂಗಾ ವಯ್ಲಿ ಕಾಂಬೊಳ್ ಪಯ್ಸ್ ಲೊಟುನ್ ಖಾಟಿಯೆರ್ ಥಾವ್ನ್ ಸಕಯ್ಲ್ ದೆಂವ್ಲ್ಲೆಂ ತೆಂ ಬಾತ್ರುಮಾ ತೆವ್ಶಿಂ ಚಮ್ಕಾಲೆಂ.
ಸುಮಾರ್ ಅರ್ಧೆಂ ವೋರ್ ಲಾಗ್ಲೆಂ ಆಲಿಯಾಕ್ ಬಾತ್ರುಮಾಂತ್ ಫ್ರೆಶ್ ಜಾಂವ್ಚಾಕ್. ಬಾತ್ರುಮಾ ಥಾವ್ನ್ ಭಾಯ್ರ್ ಆಯಿಲ್ಲೆಂ ತೆಂ ಸಾರ್ಕೆ ಕೇಸ್ ಉಗವ್ನ್ ನೈಟಿ ಕಾಡುನ್ ಸಲ್ವಾರ್ ಕಮೀಜ್ ನ್ಹೆಸೊನ್, ಖಾಟಿಯೆ ವಯ್ಲಿ ಕಾಂಬೊಳ್ ದೊಡುನ್ ದವರುನ್, ಬೆಡ್ರುಮಾಚೆಂ ದಾರ್ ಉಗ್ತೆಂ ಕರುನ್ ಭಾಯ್ರ್ ಆಯ್ಲೆಂ.
ಘರಾಂತ್ ನಾಸಿರಾಚಿ ಆವಯ್ ಮಾತ್ರ್ ಸೊಡ್ಲ್ಯಾರ್ ದುಸ್ರ್ರೆಂ ಕೊಣ್ಯ್ ತಾಕಾ ದಿಸ್ಲೆಂ ನಾ. ಸಲ್ಮಾ ಆನಿ ಅಕ್ಲಕ್ ಸಾಕಾಳಿಂ ಆಪಾಪ್ಲ್ಯಾ ಕಾಲೇಜಿಕ್ ವೆತಾತ್. ಆಜ಼ಾದ್, ಬಾಪಾಯ್ಚಾ ಬಿಜ್ನೆಸಾಕ್ ಲಾಗೊನ್ ಆಫೀಸಾಕ್ ವೆತಾ. ಪುಣ್ ನಾಸಿರ್ ಆನಿ ಸುಲೇಮಾನ್..?
ಆಲಿಯಾಚಾ ದೊಳ್ಯಾಂಕ್, ತಾಚ್ಯಾ ಘರಾಂತ್ ಖಂಯ್ಚರ್ಯ್ ನಾಸಿರಾಚಿ ಜಾಂವ್ ಯಾ ಸುಲೇಮಾನಾಚಿ ಜಾಂವ್ ಕಾಂಯ್ ಝಳಕ್ ಪಡಾನಾಸ್ತಾನಾ ವೆತಾನಾ ತೆಂ ಆತಾಂ ಕುಜ್ನಾಕ್ ಆಯ್ಲೆಂ. ಕುಜ್ನಾಂತ್ ತಾಚಿ ಸಾಸುಮಾಂಯ್ ಆಪ್ಲ್ಯಾ ರಾಂದ್ಪಾಚ್ಯಾ ಕಾಮಾರ್ ಆಸ್ಲ್ಲಿ. ಆಪ್ಲ್ಯಾ ಸಾಸುಮಾಂಯ್ಲಾಗಿಂ ಗೆಲ್ಲೆಂ ಆಲಿಯಾ,
"ಅಮ್ಮಿಜಾನ್.... ಸಲಾಮ್ ಮಾಲೇಕ್ಕುಮ್!"
"ಮಾ ಆಲೇಕ್ಕುಮ್ ಸಲಾಮ್ ಬಹೂ!" ನಾಸಿರಾಚಾ ಆವಯ್ನ್ ಸುನೆಕ್ ಪಳವ್ನ್ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡ್ಲ್ಯೊ.
"ಕಶೆಂ ಆಸಾಯ್ ತುಂ?"
"ಬರಿಂ ಆಸಾ!"
"ಕಾಲ್ಚ್ಯಾ ಪಯ್ಣಾಂತ್ ತುಮಿಂ ಬರೆಂಚ್ ಥಕ್ಲೆಲ್ಯಾ ಪರಿಂ ದಿಸ್ತಾಲ್ಯಾತ್ ಜಾಲ್ಲ್ಯಾನ್, ನಿದ್ಲೆಲ್ಯಾ ತುಮ್ಕಾಂ ಹಾವೆಂ ಉಟೊಂಕ್ ನಾ!"
"ಮ್ಹಾಕಾ ವೇಳ್ ಗೆಲ್ಲೊಚ್ ಕಳೊಂಕ್ ನಾ!" "ನಾಸಿರ್.....?" ಆಲಿಯಾಚೆ ದೊಳೆ ಅಜೂನ್ ನಾಸಿರಾಕ್ ಸೊಧ್ತಾಲೆ.
"ತೊ ಅಬ್ಬೂ ಸಾಂಗಾತಾ ಆಫೀಸಾಕ್ ಗೆಲಾ!"
"ಆಫೀಸಾಕ್? ತಾಣೆಂ ಮ್ಹಾಕಾ ಸಾಂಗೊಂಕ್ಚ್ ನಾ.....!" ಆಲಿಯಾಕ್ ಆಶ್ಚರ್ಯ್ ಜಾಲೆಂ.
"ಹಾಂತುಂ ಸಾಂಗೊಂಕ್ ಕಿತೆಂ ಆಸಾ ಬಹೂ? ಬಿಜ್ನೆಸಾಚೆಂ ಕಾಮ್ ಪಳಂವ್ಚೆಂ ತಾಂಚೆಂ ಕಾಮ್ ತರ್, ಘರಾಚೆಂ ಕಾಮ್ ಪಳಂವ್ಚೆಂ ಆಮ್ಚೆಂ ಕಾಮ್!" ನಾಸಿರಾಚಿ ಆವಯ್ ಹಾಸೊನ್ ಉಲಯ್ಲಿ. ತಿಚ್ಯಾ ಉತ್ರಾಂನಿ ತಿಣೆಂ ಆಲಿಯಾಕ್ ಸಾಂಗೊಂಕ್ ಆಸ್ಚೊ ಮತ್ಲಾಬ್ ಲಿಪೊನ್ ಅಸ್ಲ್ಲೊ. ಆಲಿಯಾಕ್ ತೊ ಸಮ್ಜಾಲೊ ನಾ.
"ಜಾಲ್ಯಾರ್ಯ್..... ವೆತಾನಾ ಏಕ್ ಸಬ್ದ್ ಸಾಂಗ್ಲ್ಲೊ ಜಾಲ್ಯಾರ್....!"
"ನಾಸಿರಾಕ್ ತಾಚಿ ಗರ್ಜ್ ನಾ ಮ್ಹಣೊನ್ ದಿಸ್ಲಿ ಆಸ್ತೆಲಿ!"
ನಾಸಿರಾಚಾ ಆವಯ್ಚಿಂ ಉತ್ರಾಂ ಕಿತ್ಯಾಕ್ಗೀ ಆಲಿಯಾಚಾ ಮತಿಕ್ ಜಗ್ಲಾಣ್ಯಾ ಪರಿಂ ಮಾರ್ಲಿಂ. ಯೆದೊಳ್ ಪಾಸೊನ್ ನಿದೊನ್ ಆಸ್ಲೆಲ್ಯಾ ತಾಚ್ಯಾ ಮತಿಕ್ ನಾಸಿರಾಚ್ಯಾ ಆವಯ್ಚಾ ಹ್ಯಾ ಮತ್ಲಾಬಿ ಉತ್ರಾಂನಿ ಚಿಂತುಂಕ್ ಲಾಯ್ಲೆಂ.
"ನಾಸಿರಾಕ್ ಆಪ್ಣಾಕ್ ಸಾಂಗ್ಚಿ ಗರ್ಜ್ ನಾ ಮ್ಹಣೊನ್ ಭೊಗ್ಲೆಂ ಮ್ಹಳ್ಯಾರ್ ಹಾಂವ್ಚ್ ತಾಕಾ ಗರ್ಜ್ ನಾ ಮ್ಹಳ್ಳ್ಯಾ ಪರಿಂ! ಕಾಂಯ್ ನಾಸಿರ್....!?" ಆಲಿಯಾಚಾ ಮತಿಂತ್ ಅವ್ಯಕ್ತ್ ಸವಾಲಾಂ ಉದೆವ್ನ್ ಯೇಂವ್ಕ್ ಲಾಗ್ಲಿಂ.
"ಹಾಂವ್....! ಥೊಡಿ ಚ್ಹಾಯ್ ತಯಾರ್ ಕರುಂ?" ಆಲಿಯಾನ್ ಕುಡ್ಕ್ಯಾ ಉತ್ರಾಂಕ್ ವಿಂಚ್ಲೆಂ.
"ಹಾಂ ಖಂಡಿತ್! ಆಳೆ ತೆಂ ಚ್ಹಾಯೆಚೆಂ ಆಯ್ದಾನ್....!" ನಾಸಿರಾಚಾ ಆವಯ್ನ್ ಚಾಯೆಚೆಂ ಅಯ್ದಾನ್ ದಾಖಯ್ತಾನಾ ತೆಂ ಘೆವ್ನ್,
"ತುಂ ಪಿಯೆತೆಲಿ?" ತಾಣೆಂ ಸಾಸುಮಾಂಯ್ ತೆವ್ಶಿಂ ಘುವೊನ್ ಪಳೆಲೆಂ.
"ಊಂ...... ಬರೆಂ ಕರ್!"
ಥೊಡೆಂ ಚಿಂತ್ಲೆಲ್ಯಾ ನಾಸಿರಾಚಾ ಆವಯ್ನ್ ಸಾಂಗ್ತಾನಾ ಆಲಿಯಾನ್ ದೋನ್ ಕಪ್ಪ್ ಚ್ಹಾಯೆಕ್ ಉದಾಕ್ ದವರ್ಲೆಂ.
ಗ್ಯಾಸ್ ಸ್ಟವಾ ಮುಕಾರ್ ರಾವ್ಲೆಲ್ಯಾ ಆಲಿಯಾಚಾ ದೊಳ್ಯಾಂಕ್ ತೆಂ ಸ್ಟವಾ ವಯ್ಲೆಂ ಉದಾಕ್ ಹುನ್ ಜಾವ್ನ್ ಯೆಂವ್ಚೆಂ ದಿಸ್ತಾನಾ, ತಾಚ್ಯಾ ಮತಿಂತ್ಲ್ಯಾಚಿಂತ್ನಾಂಕ್ಯ್ ತ್ಯಾ ಉದ್ಕಾಚಾ ಉಭೆನ್ ಜಾಗಂವ್ಚ್ಯಾ ಪರಿಂ ಜಾಲೆಂ. ಥೊಡ್ಯಾಚ್ ವೆಳಾ ಪಯ್ಲೆಂ ನಾಸಿರಚಾ ಆವಯ್ನ್ ಉಲಯಿಲ್ಲಿಂ ತಿಂ ಮತ್ಲಾಬಿ ಉತ್ರಾಂ, ತಿಣೆಂ ಆಪ್ಣಾಲಾಗಿಂ ಉಲಯಿಲ್ಲಿ ತಿ ರೀತ್, ಆನಿ ಆಪ್ಲ್ಯಾ ಘೊವಾನ್ ಆಪ್ಲ್ಯಾ ಕರ್ತುಬಾನ್ ದಾಖಯಿಲ್ಲಿ ರೀತ್ ಕಿತ್ಯಾಕ್ಗೀ ಎಕಾಮೆಕಾ ತಾಳ್ ಪಡ್ತಾತ್ ತಶೆಂ ಆಲಿಯಾಕ್ ಭೊಗ್ಲೆಂ.
"ಆಪ್ಲ್ಯಾ ಘೊವಾ ಶಿವಾಯ್ ಹ್ಯಾ ಘರಾಂತ್ ದುಸ್ರೆಂ ಕಿತೆಂಯ್ ಆಪ್ಣಾಕ್ ಪಡೊನ್ ವಚೊಂಕ್ ನಾ. ಹ್ಯಾ ಘರಾಂತ್ ಆಪ್ಣಾಕ್ ಹಕ್ಕ್ ನಾಕಾ. ಪುಣ್ ನಾಸಿರ್...? ನಾಸಿರ್ ಆಪ್ಲೊ ಘೊವ್! ತಾಣೆಂ ತರ್ಯ್ ಆಪ್ಣಾ ಬರಾಬರ್ ಮ್ಹಾಕಾ.....!" ಆಲಿಯಾಚಾ ಮತಿಂತ್ ಚಿಂತ್ನಾ ಉಟ್ತಾನಾ ಗ್ಯಾಸಾ ವಯ್ರ್ ಉದಾಕ್ ಖತ್ಕತೊಂಕ್ ಲಾಗ್ಲೆಂ. ಸಾಸುಮಾಂಯ್ಲಾಗಿಂ ವಿಚಾರುನ್ ಚ್ಹಾಯ್ ಪಿಟೊ ಆನಿ ಸಾಕರ್ ಖಂಯ್ ಆಸಾ ತೆಂ ಪಳವ್ನ್, ಪ್ರಿಜ್ಜಾಂತ್ಲೆಂ ದೂದ್ ವೊತುನ್, ಚ್ಹಾಯ್ ತಯಾರ್ ಕರುನ್ ದೋನ್ ಕಪ್ಪಾಂನಿ ವೊತುನ್ ಏಕ್ ಕಪ್ಪ್ ಹಾಡುನ್ ತಾಣೆಂ ಸಾಸುಮಾಂಯ್ಕ್ ದಿಲೆಂ.
"ಬಹೂ.... ತುಂ ನಾಸ್ಟೊ ಕರ್. ಪ್ರಿಜ್ಜಾಂತ್ ಬ್ರೆಡ್ ಆಸಾ. ಬಟರ್ಯ್ ಆಸಾ ಪಳೆ. ಬಟರ್ ನಾಕಾ ಜಾಲ್ಯಾರ್ ತಾಂತಿಯಾಂ ಆಸಾತ್. ತುಕಾ ಕಿತೆಂ ಜಾಯ್ ತೆಂ ತಯಾರ್ ಕರ್!"
ಆಲಿಯಾನ್ ಆತಾಂ ಪ್ರಿಜ್ಜ್ ಉಗ್ತೊ ಕರುನ್ ಬ್ರೆಡ್ ಆನಿ ಬಟರ್ ಭಾಯ್ರ್ ಕಾಡ್ಲೊ.
"ತುಕಾ ಮಂಯ್....?" ತಾಣೆಂ ವಿಚಾರ್ಲೆಂ.
"ಮ್ಹಜೊ ಜಾಲಾ! ಚ್ಹಾಯ್ ಮಾತ್ರ್ ತೆದಾಳಾ ತೆದಾಳಾ ಪಿಯೆಂವ್ಚಿ ಸವಯ್..... ತಿಯ್ ನಾಸಿರಾಚಾ ಅಬ್ಬೂ ಥಾವ್ನ್! ತೊ ಘರಾ ಆಸ್ಲ್ಯಾರ್ ತಾಕಾ ಚ್ಹಾಯ್ ಘಡ್ಯೆ ಘಡ್ಯೆ ಜಾಯ್ ಪಡ್ತಾ. ತೊ ಕಸೊಯ್ ಪಿಯೆತಾ. ಸಾಂಗಾತಾ ಮ್ಹಾಕಾಯ್ ವತ್ತಾಯ್ ಕರ್ತಾ. ತಶೆಂ ಹಿ ಆತಾಂ ಸವಯ್ ಜಾಲ್ಯಾ....!"
ನಾಸಿರಾಚ್ಯಾ ಆವಯ್ಚಾ ಜವಾಬೆಕ್ ಆಲಿಯಾನ್ ಕಾಂಯ್ ಜವಾಬ್ ದಿಲ್ಲಿ ನಾಂ. ತೆಂ ಬ್ರೆಡ್ ಆನಿ ಬಟರ್ ಘೆವ್ನ್ ಡೈನಿಂಗ್ ಟೇಬಲಾ ತೆವ್ಶಿಂ ಚಮ್ಕಾಲೆಂ.
"ಸಗ್ಳೆಂ ಆಶೆಂಚ್ ಬಹೂ....! ಎಕ್ ಪಾವ್ಟಿಂ ಸವಯೆರ್ ಪಡ್ತಾವರೇಗ್ ಮಾತ್ರ್! ಸವಯೆರ್ ಪಡ್ಚಾ ಪಯ್ಲೆಂ ತೆಂ ಆಪ್ಣಾಚೆಂ ನ್ಹಯ್ ಮ್ಹಳ್ಳ್ಯಾ ಪರಿಂ ದಿಸ್ತಾ. ಪುಣ್ ಸವಯೆರ್ ಪಡ್ಲ್ಯಾ ಉಪ್ರಾಂತ್ ಸಗ್ಳೆಂ ಆಪ್ಣಾಚೆಂ ಮ್ಹಳ್ಳ್ಯಾ ಪರಿಂ!"
ನಾಸಿರಾಚಿ ಆವಯ್ ಆಪ್ಲಿ ಚ್ಹಾಯ್ ಘೆವ್ನ್ ಭಾಯ್ರ್ ಆಯಿಲ್ಲಿ, ಭಾಯ್ಲ್ಯಾ ಸೊಫಾಚೆರ್ ಬಸ್ಲೆಲ್ಯಾ ತಿಣೆಂ ಮುಕ್ಲ್ಯಾ ಟಿ.ವಿ. ಕ್ ಆನ್ ಕೆಲೆಂ. ತಿಚಿಂ ಉತ್ರಾಂ ಆಲಿಯಾಕ್ ಪಸಂದ್ ಜಾಲಿಂ ನಾಂತ್ ಜಾಲ್ಯಾರ್ಯ್ ತಾಣೆಂ ಕಾಂಯ್ ತೋಂಡ್ ಸೊಡ್ಚೆಂ ಧಯ್ರ್ ಘೆತ್ಲೆಂ ನಾ. ನಿಖಾ ಜಾಂವ್ಚಾ ಪಯ್ಲೆಂ ತಾಚ್ಯಾ ಆವಯ್ನ್ ಸಾರಾನ್ ತಾಕಾ ದಿಲ್ಲ್ಯಾ ಲಿಸಾಂವಾಚೊ ಉಡಾಸ್ ತಾಣೆಂ ಕಾಡ್ಲೊ. ಆಪ್ಲ್ಯಾ ಆವಯ್ಚ್ಯಾ ಘರಾಕ್ ಆನಿ ಹಾಂಗಾ ಕಿತ್ಲೊ ವ್ಯತ್ಯಾಸ್ ಆಸಾ! ಆಪುಣ್ ಆಪ್ಲ್ಯಾ ಆವಯ್ಚ್ಯಾ ಘರಾ ಸ್ವತಂತ್ರ್ ಆಸ್ಲ್ಲಿಂ ಜಾಲ್ಯಾರ್ ಹಾಂಗಾ ಆಪ್ಲ್ಯಾ ನೊವ್ರ್ಯಾಚಾ ಘರಾ ಆಪುಣ್ ಹರ್ಯೆಕಾ ವಿಶಯಾಂತ್ ಕಯ್ದಿ ಜಾವ್ನ್ ಆಸಾಂ ಮ್ಹಳ್ಳ್ಯಾಪರಿಂ ತಾಕಾ ದಿಸ್ಲೆಂ. ತಿತ್ಲೆಂಚ್! ತಾಕಾ ಆತಾಂ ಆಪ್ಲ್ಯಾ ಆವಯ್ನ್ ಆಪ್ಣಾಕ್ ದಿಲ್ಲ್ಯಾ ತ್ಯಾ ಲಿಸಾಂವಾಚೊ ಉಡಾಸ್ ಆಯ್ಲೊ. ಆಪ್ಲೆಂ ನಿಖಾ ಜಾಂವ್ಚ್ಯಾ ಪಯ್ಲೆಂ ಆಪ್ಲ್ಯಾ ಆವಯ್ನ್ ಆಪ್ಣಾಕ್ ಸಮ್ಜಾಯಿಲ್ಲಿಂ ಉತ್ರಾಂ ತಾಚ್ಯಾ ಉಡಾಸಾಚಾ ಪರ್ದ್ಯಾರ್ ಫುಲೊನ್ ರಾವ್ಲಿಂ. ಜಶೆಂ ನಿಖಾ ಜಾಂವ್ಕ್ ವೆಚ್ಯಾ ಹರ್ಯೆಕಾ ಚಲಿಯೆಕ್ ತಾಚಿ ಆವಯ್ ಆಪ್ಲ್ಯಾ ಧುವೆಕ್ ಗರ್ಜೆ ಪುರ್ತಿಂ ಲಿಸಾಂವಾಂ ದಿತಾ ತಶೆಂ ಆಲಿಯಾಚಾ ಆವಯ್ನ್ ಸಾರಾನ್ ಆಲಿಯಾಕ್ ಲಿಸಾಂವ್ ದಿಲ್ಲೆಂ.
"ಬೇಟಾ ಆಲಿಯಾ, ತುಂ ತುಜ್ಯಾ ನೊವ್ರ್ಯಾಚಾ ಘರಾ ಕಶೆಂ ಚಲ್ತಾಯ್ ಪಳೆ ತಾಚ್ಯೆ ವಯ್ರ್ ತುಜ್ಯಾ ಜಲ್ಮಾಲ್ಲ್ಯಾ ಘರಾಚಿ ಮರ್ಯಾದ್ ಉಭಿ ಜಾತಾ ಪುತಾ. ತುಜ್ಯಾ ಬರ್ಯಾಪಣಾಕ್ ನಾ ತರ್ಯ್ ತುಜ್ಯಾ ವಾಯ್ಟ್ಪಣಾಕ್ ಫಕತ್ತ್ ತುಕಾ ಮಾತ್ರ್ ನ್ಹಯ್ ತುಜ್ಯಾ ಅಬ್ಬೂಕ್ ಆನಿ ಮ್ಹಾಕಾ ಹಿ ಸಮಾಜ್ ಗುನ್ಯಾಂವ್ಕರ್ ಕರ್ತಾ. ದೆಕುನ್ ತುವೆಂ ಸದಾಂಚ್ ಜಾಗ್ರುತ್ ಆಸೊಂಕ್ ಜಾಯ್ ಪುತಾ. ತುಜ್ಯಾ ತೊಂಡಾ ಥಾವ್ನ್ ಭಾಯ್ರ್ ಪಡ್ಚೆಂ ಹರ್ಯೇಕ್ ಉತಾರ್ ಪಾಸೊನ್ ತುಜ್ಯಾ ನೊವ್ರ್ಯಾಚಾ ಘರಾ ಚಡ್ ಪ್ರಾಮುಖ್ಯ್ ಘೆತಾ. ಹಾಂಗಾಸರ್ ಹಾಂವ್ ಆನಿ ತುಜೊ ಅಬ್ಬೂ ತುಕಾ ಜಲ್ಮ್ ದಿಲ್ಲಿಂ ಮ್ಹಣೊನ್ ತುಕಾ ಸುದಾರ್ಸಿತೆಲ್ಯಾಂವ್. ಥಂಯ್ಚರ್.....!"
ಬ್ರೆಡಾಚಾ ಸ್ಲೈಸಾಕ್ ಬಟರ್ ಲಾಂವ್ಚಾ ಆಲಿಯಾಕ್ ಆಪ್ಲ್ಯಾ ಆವಯ್ಚಿಂ ಉತ್ರಾಂ ಉಡಾಸಾಕ್ ಆಯ್ಲಿಂ. ಆಪ್ಲ್ಯಾ ಆವಯ್ನ್ ಆಪ್ಣಾಕ್ ಲಿಸಾಂವ್ ದಿಲ್ಲ್ಯಾ ತ್ಯಾ ವಗ್ತಾರ್ ಆಲಿಯಾಕ್ ತ್ಯಾ ಲಿಸಾಂವಾಚೊ ಮತ್ಲಾಬ್ ಸಮ್ಜಾಲ್ಲೊ ನಾ. ತ್ಯಾ ವಗ್ತಾರ್ ತಾಣೆಂ ಹ್ಯಾ ವಿಶಯಾಕ್ ಹಳ್ವಾಯೆರ್ ಘೆತ್ಲ್ಲೆಂ. ಪುಣ್ ಆಜ್...?
"ಚಲಿಯೆಚೆಂ ಜಿವಿತ್ ಹ್ಯಾ ಸಮಾಜೆಂತ್ ಇತ್ಲೆಂಯ್ ಕಿತ್ಯಾಕ್ ಅಡ್ಚಾಲಾಂ? ತಿಕಾ ಹರ್ಯೆಕಾ ವಾಟೆನ್ ಇತ್ಲೆಂಯ್ ಕಿತ್ಯಾಕ್ ದಾಂಬುನ್ ದವರ್ಲಾಂ?" ಆಲಿಯಾಚಾ ಮತಿಂತ್ ಸವಾಲ್ ಉಟೊನ್ ಉಭೆಂ ಜಾಲೆಂ. ಹ್ಯಾ ಸವಾಲಾಕ್ ಜವಾಬ್ ದೀಂವ್ಕ್ ಆಜ್ ತಾಚಿ ಅಜಿ ಹ್ಯಾ ಸಂಸಾರಾಂತ್ ನಾತ್ಲ್ಲಿ. ತಾಚಿ ಆವಯ್ ತಾಚ್ಯಾ ಸಾಂಗಾತಾ ನಾತ್ಲೆಲಿ. ತಾಚೊ ಹಾತ್ ಧರ್ಲಲೊ ಘೊವ್ ತಾಚ್ಯೆ ಥಾವ್ನ್ ಪಯ್ಸ್ ಆಸ್ಲ್ಲೊ.
ಮತಿಂತ್ ಉಟ್ಲ್ಲ್ಯಾ ಸವಾಲಾನ್, ಆಲಿಯಾಕ್ ಆಪ್ಲ್ಯಾ ಆವಯ್ಚೊ ಉಡಾಸ್ ಹಾಡಯಿಲ್ಲ್ಯಾನ್ ಆಪ್ಲ್ಯಾ ಆವಯ್ ಲಾಗಿಂ ತಾಕಾ ಉಲಂವ್ಚೆಂ ಮನ್ ಆಯ್ಲೆಂ. ವೆವೆಗ್ಗಿಂ ತಾಣೆಂ ನಾಸ್ಟೊ ಕರುನ್ ಆಪ್ಲ್ಯಾ ಆವಯ್ಕ್ ಫೋನ್ ಘುಂವ್ಡಾಯ್ಲೆಂ. ಆವಯ್ ಲಾಗಿಂ ಉಲವ್ನ್ ಆಲಿಯಾಚಾ ಮತಿಕ್ ಥೊಡೆಂ ಸಮಾಧಾನ್ ಭೊಗ್ಲೆಂ ಜಾಲ್ಯಾರ್ಯ್ ಆಪ್ಲ್ಯಾ ಬಾಪಯ್ ಲಾಗಿಂ ಉಲಯ್ತಾನಾ ಮಾತ್ರ್ ತೆಂ ಸಿಂತಿಮೆಂತಾನಿ ಭರ್ಲೆಂ. ಲಾಗಿಂಚ್ ನಾಸಿರಾಚಿ ಆವಯ್ ಬಸ್ಲೆಲಿ ಆಸ್ಲ್ಲ್ಯಾನ್ ಹ್ಯಾ ಸಿಂತಿಮೆಂತಾಕ್ ದಾಖಂವ್ಚೆಂ ಆಲಿಯಾಕ್ ಸಾದ್ಯ್ ಜಾಲೆಂ ನಾ. ಆಪ್ಲ್ಯಾಚ್ ಘರಾಂತ್ ತೆಂ ಭಂಧಡೆಂತ್ ಆಸಾ ಮ್ಹಳ್ಳ್ಯಾ ಪರಿಂ ತಾಕಾ ಭಗ್ಲೆಂ.
ಎಕಾ ಕುಶಿಕ್ ನಾಸಿರಾಚೊ ಆನಿ ತಾಚ್ಯಾ ಆವಯ್ಚೊ ಭರ್ತಾವ್ ತಾಕಾ ಪಸಂದ್ ಜಾಂವ್ಕ್ ನಾತ್ಲ್ಲೊ ಜಾಲ್ಯಾರ್ ದುಸ್ರ್ಯಾ ಕುಶಿನ್ ಆಪ್ಲ್ಯಾ ಆವಯ್ ಬಾಪಾಯ್ನ್ ಆಪ್ಣಾಕ್ ಶಿಕಯಿಲ್ಲ್ಯಾ ಲಿಸಾಂವಾಚೊ ಉಡಾಸ್ ಆಲಿಯಾಚಾ ಮತಿಂತ್ ಝುಜ್ ಮಾಂಡ್ತಾಲೊ.
ಆಪ್ಲ್ಯಾ ಘರಾ ಪೋನ್ ಕೆಲ್ಲ್ಯಾ ಆಲಿಯಾಕ್ ಅಕ್ಬರ್ ಆನಿ ಸಲೀಮ್ ಉಲಂವ್ಕ್ ಮೆಳ್ಳೆ ನಾಂತ್. ತೆ ದೊಗ್ಯ್ ಘರಾ ನಾತ್ಲೆಲೆ. ತೆ ಭಾಯ್ರ್ ಗೆಲ್ಲೆ ಜಾಲ್ಲ್ಯಾನ್ ಆಲಿಯಾನ್ ಸಲೀಮಾಚಾ ಸೆಲ್ಪೊನಾಚಾ ನಂಬರಾಕ್ ಪೋನ್ ಕೆಲೆಂ. ರಝಿಯಾ ಕಾಲೇಜಿಂತ್ ಆಸಾ ಜಾಲ್ಲ್ಯಾನ್ ಹ್ಯಾ ವಗ್ತಾರ್ ತಾಚ್ಯೆಲಾಗಿಂ ಉಲಂವ್ಕ್ ಸಾದ್ಯ್ ನಾತ್ಲ್ಲೆಂ.
ಆಪ್ಲ್ಯಾ ಘರ್ಚ್ಯಾಂಲಾಗಿಂ ಉಲವ್ನ್ ಜಾವ್ನ್ ಆತಾಂ ಆಪ್ಲ್ಯಾ ಘೊವಾಕ್ ಪೋನ್ ಕರಿಯಾಂ ಮ್ಹಣೊನ್ ಆಲಿಯಾಕ್ ಮನ್ ಜಾಲೆಂ.
"ಅಮ್ಮಿಜಾನ್..., ನಾಸಿರಾಚೆಂ ಆಫೀಸ್ ನಂಬರ್....?" ಸಾಸುಮಾಂಯ್ ತೆವ್ಶಿಂ ಘುಂವೊನ್ ಆಲಿಯಾನ್ ವಿಚಾರ್ಲೆಂ.
ನಾಸಿರಾಚಿ ಆವಯ್ ಟಿ.ವಿ. ಸೀರಿಯಲಾಕ್ ತನ್ ಮನ್ ಏಕ್ ಕರುನ್ ಪಳವ್ನ್ ಅಸ್ಲ್ಲಿ. ಆಲಿಯಾಚಾ ಉಲವ್ಣ್ಯಾಕ್ ತಿಚೆ ಥಾವ್ನ್ ಕಾಂಯ್ ಜವಾಬ್ ಆಯ್ಲಿ ನಾ.
"ಅಮ್ಮಿಜಾನ್....?" ಆಲಿಯಾನ್ ಪರ್ತ್ಯಾಕ್ ಆಪ್ಲ್ಯಾ ಸಾಸುಮಾಂಯ್ಕ್ ಉಲೊ ದಿಲೊ.
ಆಲಿಯಾನ್ ಆಪ್ಣಾಕ್ ಆಪಯಿಲ್ಲೆಂ ಆಯ್ಕೊನ್ ನಾಸಿರಾಚಿ ಆವಯ್ ಪಾಟಿಂ ಘುಂವ್ಲಿ.
"........?"
ಕಿತೆಂ ಮ್ಹಳ್ಳ್ಯಾ ನದ್ರೆನ್ ತಿಣೆಂ ಸುನೆಕ್ ಫಕತ್ತ್ ಪಳಯ್ಲೆಂ ಮಾತ್ರ್.
"ಅಮ್ಮಿಜಾನ್....!, ಮ್ಹಾಕಾ ನಾಸಿರಾಚೆಂ ಆಫೀಸ್ ನಂಬರ್ ಜಾಯ್ ಆಸ್ಲ್ಲೆಂ!" ನಮ್ರತಾಯೆನ್ ಸಾಸುಮಾಂಯ್ ಲಾಗಿಂ ಆಲಿಯಾನ್ ವಿಚಾರ್ಲೆಂ.
ಸುನೆನ್ ತಾಚ್ಯಾ ಘೊವಾಚೆಂ ಆಫೀಸ್ ನಂಬರ್ ವಿಚಾರ್ಲ್ಲೆಂ ಆಯ್ಕೊನ್ ಏಕ್ ಪಾವ್ಟಿಂ ವೊಣೊದಿ ವಯ್ಲ್ಯಾ ಗಡಿಯಾಳಾ ವಯ್ರ್ ದೀಷ್ಟ್ ವೆಲ್ಲಿ ನಾಸಿರಾಚಿ ಆವಯ್,
"ಬಹೂ, ಆತಾಂ ನಾಸಿರ್ ಆಫೀಸಾಂತ್ ಬಿಜಿ ಆಸ್ತಲೊ. ದೋನ್ ಹಪ್ತ್ಯಾಂ ಉಪ್ರಾಂತ್ ಆಜ್ ತೊ ಆಫೀಸಾಕ್ ಗೆಲಾ. ಧನ್ಫಾರಾಂ ಘರಾ ಜೆವ್ಣಾಕ್ ಯೆತಲೊ ತೆದಾಳಾ ಉಲವ್ಯೆತ್.... ತಶೆಂ ಕಾಂಯ್ ಗರ್ಜ್ ಆಸ್ಲ್ಯಾರ್ ತುಂ ಕರ್ತಾಯ್ ಜಾಲ್ಯಾರ್ ನಂಬರ್ ದಿತಾಂ!"
ಟೆಲಿಪೋನ್ ರಿಸೀವರ್ ಕಾನಾಕ್ ದರುನ್ ನಾಸಿರಾಚಾ ಆವಯ್ಚಿಂ ಉತ್ರಾಂ ಆಯ್ಕೊಂವ್ಚೆಂ ಆಲಿಯಾ ತಶೆಂಚ್ ಸ್ತಬ್ದ್ ಜಾಲೆಂ.ತೆಂ ಆಪ್ಲ್ಯಾ ಸಾಸುಮಾಂಯ್ಕ್ಚ್ ಪಳಂವ್ಕ್ ಲಾಗ್ಲೆಂ.
ಆಪ್ಲ್ಯಾ ಘೊವಾಲಾಗಿಂ ಉಲಂವ್ಚೆಂ ಮ್ಹಾಕಾ ಹಕ್ಕ್ ನಾ? ಆಲಿಯಾಚಾ ಮುಕಾರ್ ಹೆಂ ಸವಾಲ್ ಉಟೊನ್ ಉಭೆಂ ಜಾಲೆಂ.
ಆಪ್ಲ್ಯಾ ಆದೇಶಾ ಥಾವ್ನ್ ಆಲಿಯಾಚಾ ತೊಂಡಾಚೊ ಛಾರೊ ಬದ್ಲಾಲ್ಲೊ ಪಳೆಲ್ಲಿ ನಾಸಿರಾಚಿ ಆವಯ್,
"ಬಹೂ.....? ಬಿಜ್ನೆಸ್ ಮ್ಹಣ್ತಾನಾ ಆಫೀಸಾಂತ್ ಹಜಾರ್ ರಾಟಾವಳಿ ಆಸ್ತಾತ್. ಹಜಾರ್ ಫೊನಾಂ ಯೆತಾತ್. ಹಜಾರಾಂಕ್ ಜವಾಬ್ ದೀಂವ್ಕ್ ಪಡ್ತಾ! ಆಶೆಂ ಆಸ್ತಾನಾ, ಹರ್ಯೆಕಾ ವೆಳಾರ್ ಬಿಜ್ನೆಸಾಂತ್ ಮೆತೆರ್ ಜಾಲ್ಲ್ಯಾಂಚೆಂ ಮನ್ ಎಕ್ಚ್ ಮಾಫಾಚ್ಯಾ ಸ್ಥಿಮಿತಾರ್ ಆಸಾನಾ. ತಶೆಂ ಆಸ್ತಾನಾ ತಾಂಚಾ ರಾಟಾವಳಿ ಮಧೆಂ ಆಮಿಂ ತಾಂಕಾಂ ದೊಶಿ ದಿಲ್ಯಾರ್.....!"
ಟಿ.ವಿ.ಚೊ ರಿಮೋಟ್ ಕಂಟ್ರೋಲ್ ಹಾತಿಂ ಘೆವ್ನ್ ಟಿ.ವಿ. ಭಂಧ್ ಕೆಲ್ಲಿ ನಾಸಿರಾಚಿ ಆವಯ್ ಸವ್ಕಾಸ್ ಆಲಿಯಾ ಸರ್ಶಿಂ ಆಯ್ಲಿ.
ಆಲಿಯಾ ಅಜೂನ್ ತಶೆಂಚ್ ಸ್ತಬ್ದ್ ಆಸ್ಲ್ಲೆಂ.
"ಪಳೆ ಬಹೂ.....! ಹಾಂವ್ಯ್ ತುಜ್ಯಾ ಹ್ಯಾ ವೆಳಾಂತ್ಲ್ಯಾನ್, ವೋತ್ ಆನಿ ಸಾವ್ಳಿ ಮ್ಹಳ್ಳ್ಯಾ ದೋನ್ ರುಪಾಂ ಪಂದ್ಲ್ಯಾನ್ ಪಾಶಾರ್ ಜಾಲ್ಯಾಂ. ಆಶೆಂ ಜಾಲ್ಲ್ಯಾನ್ ಮ್ಹಜ್ಯಾ ಘೊವಾ ಥಾವ್ನ್ ಹಾಂವ್ ಸಭಾರ್ ಲಿಸಾವಾಂ ಶಿಕ್ಲ್ಯಾಂ. ತುಕಾ ಮ್ಹಳ್ಯಾರ್...., ತುಂ ಹ್ಯಾ ಘರಣ್ಯಾಕ್ ನವೆಂ ಮ್ಹಣೊನ್ ಹಾವೆಂ ಮ್ಹಣ್ಚೆಂ ನ್ಹಯ್. ಬಿಜ್ನೆಸಾಚಾ ವಾತಾವರಣಾಂತ್ ತುಂ ನವೆಂ! ತುವೆಂ ತುಜೆಂ ಜೀವನ್ ಆರಂಭ್ ಕೆಲಾಂಯ್ ಮಾತ್ರ್. ಹ್ಯೊ ತುಮ್ಚ್ಯೊ ಆತಾಂಚ್ಯೊ ಭೋವ್ ನಾಜೂಕ್ ಘಡಿಯೊ. ಹ್ಯಾ ಘಡಿಯಾಂನಿ ಎಕಾಚ್ಚ್ ಉತ್ರಾನ್ ಮೋಗ್ ಉಮಾಳ್ತಾ ತರ್, ಹ್ಯಾಚ್ ಘಡಿಯೆಚಾ ಎಕಾಚ್ ಉತ್ರಾನ್ ರಾಗ್ಯ್ ಖುಬಾಳ್ತಾ! ದೆಕುನ್ ಹಾವೆಂ ತುಮ್ಚ್ಯಾ ಜಿವಿತಾಚ್ಯಾ ಬರ್ಯಾಕ್ ಸಾಂಗ್ಚೆಂ ಶಿವಾಯ್.....!"
ಆಲಿಯಾ ಸರ್ಶಿಂ ಆಯಿಲ್ಲಿ ನಾಸಿರಾಚಿ ಆವಯ್ ಆಪ್ಲ್ಯಾ ಸುನೆಕ್ ಜಿವಿತಾಚಾ ಘಡಿಯಾಂಚಿಂ ಮೊಲಾಂ ಸಾಂಗೊಂಕ್ ಲಾಗ್ಲಿ. ಆಲಿಯಾ ಸಗ್ಳೆಂ ಮತಿಕ್ ಘೆತಾಲೆಂ ಮಾತ್ರ್ ಶಿವಾಯ್ ತೆಂ ಕಾಂಯ್ ಉಲಯ್ಲೆಂ ನಾ.
ಅಜೂನ್ ಪಾಸೊನ್ ಟೆಲಿಪೋನಾಚಾ ರಿಸೀವರಾಕ್ ಆಪ್ಲ್ಯಾ ಹಾತಿಂತ್ ಧರುನ್ ರಾವ್ಲೆಲ್ಯಾ ಆಲಿಯಾಕ್ ಪಳೆಲ್ಲಿ ತಿ ವ್ಹಳೂ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡವ್ನ್,
"ಪಳೆಯಾಂ...., ಹಾಂವ್ ನಾಸಿರಾಕ್ ಪೋನ್ ಕರ್ತಾಂ!"
ಸಾಸುಮಾಂಯ್ನ್ ಸಾಂಗ್ತಾನಾ ಸವ್ಕಾಸ್ ಆಪ್ಲ್ಯಾ ಹಾತಾಂತ್ಲ್ಯಾ ಟೆಲಿಪೋನ್ ರಿಸೀವರಾಕ್ ಆಲಿಯಾನ್ ಟೆಲಿಪೋನಾಚಾ ಕ್ರೇಡಲಾ ವಯ್ರ್ ದವರ್ಲೆಂ.
"ನಾಕಾ ವ್ಹಡ್ ನಾ! ನಾಸಿರ್ ಕಸೊಯ್ ಧನ್ಫರಾಂ ಯೆತಾ ಪಳೆ!" ಆಲಿಯಾಕ್ ಆಪ್ಲ್ಯಾ ಘೊವಾಕ್ ಪೋನ್ ಕರುಂಕ್ ಮನ್ ಆಯಿಲ್ನಾಂ. ಆಪ್ಲ್ಯಾ ಸಾಸುಮಾಂಯ್ಚಿಂ ಇತ್ಲಿಂ ಉತ್ರಾಂ ಆಯ್ಕಾಲ್ಯಾ ಉಪ್ರಾಂತ್....?
"ವೇಳ್ ತೊ ಕಸೊ ಧಾಂವ್ತಾ ತೆಂ ಕಳಾನಾ ಬಹೂ!" ನಾಸಿರಾಚಿ ಆವಯ್ ಆಲಿಯಾಕ್ ಪಳವ್ನ್ ಹಾಸ್ಲಿ.
"ಯಾ ಬಹೂ!, ಧನ್ಫರಾಂ ಜೆವ್ಣಾಕ್ ಕಾಂಯ್ ತಯಾರ್
ಕರ್ಯಾಂ.....!"
ನಾಸಿರಾಚಿ ಆವಯ್ ಕುಜ್ನಾ ತೆವ್ಶಿಂ ಚಮ್ಕಾತಾನಾ ಲಾಗ್ಶಿಲ್ಯಾ
ಸೋಫಾಕ್ ವೊಣ್ಕೊನ್ ಆಸ್ಲ್ಲೆಂ ಆಲಿಯಾ ಸವ್ಕಾಸ್
ಮೆಟಾಂ ಕಾಡುನ್ ಆಪ್ಲ್ಯಾ ಸಾಸುಮಾಂಯ್ಚಾ ಪಾಟ್ಲ್ಯಾನ್
ಕುಜ್ನಾಕ್ ರಿಗ್ಲೆಂ.
ನಾಸಿರಾಚಾ ಆವಯ್ಚಾ ಎದೊಳ್ಚಾ ಭರ್ತಾವಾನ್ ಆಲಿಯಾ ಆತಾಂ
ಯಾಂತ್ರಿಕ್ ಜಾಲೆಂ. ಎದೊಳ್ ತಾಚ್ಯಾ ಸ್ಥಿಮಿತಾರ್ ಆಸ್ಲೆಲಿ ತಾಚಿ
ಮತ್ ಆತಾಂ ತಾಕಾ ಸೊಡುನ್ ಪಯ್ಸ್ ಉಭ್ಲಿ.
"ಹ್ಯಾ ಇತ್ಲ್ಯಾ ವ್ಹಡ್ಲ್ಯಾ ಘರಾಂತ್ ಆಪ್ಣಾಕ್ ಸಾಂಗಾತ್ ದಿಂವ್ಚೊ
ಆಪ್ಣಾಚೊ ಆಸ್ಚೊ ಮ್ಹಳ್ಯಾರ್ ಫಕತ್ತ್ ಆಪ್ಣಾಚೊ ಘೊವ್.
ತಾಚ್ಯೆ ವಿಣೆಂ ಹಾಂಗಾಸರ್ ಮ್ಹಾಕಾ ಸಗ್ಳೆಂ ಪರ್ಕಿ. ಸಂಭಂಧಾನ್
ಪಳಂವ್ಕ್ ಗೆಲ್ಯಾರ್ ಹ್ಯಾ ಘರ್ಚಾ ಸಾಂದ್ಯಾಂ ಸವೆಂ ಆಪ್ಣಾಕ್
ಸಂಭಂಧಾಚೊ ಸಂಭಂಧ್ ಮಾತ್ರ್ ಆಸಾ ಶಿವಾಯ್ ರಗ್ತಾ
ಸಂಭಂಧ್ ವಾ ಪಾತ್ಯೆಣೆಚೊ ಸಂಭಂಧ್ ನಾ. ಆಶೆಂ ಆಸ್ತಾನಾ
ಆಪ್ಣಾಕ್ ಆಪ್ಣಾಚೊ ಘೊವ್ ಸೊಡ್ಲ್ಯಾರ್ ಆಪ್ಣಾಕ್ ಹ್ಯಾ ಘರಾಂತ್
ದುಸ್ರೊ ಸಂಭಂಧ್ ನಾ. ತರ್ಯ್...." ಆಲಿಯಾಚಾ
ಮತಿಂತ್ ಚಿಂತ್ನಾಂ ಧಾವೊಂಕ್ ಲಾಗ್ಲಿಂ.
"ಮ್ಹಜೊ ಆನಿ ಮ್ಹಜ್ಯಾ ಘೊವಾಚೊ ಸಂಭಂಧ್.....! ದೋನ್
ಕಾಳ್ಜಾಂಚಾ ಪಾತ್ಯೆಣೆಚೊ ಸಂಭಂಧ್! ದೋನ್ ಅತ್ಮ್ಯಾಂಚಾ
ವಿಶ್ವಾಸಾಚೊ ಸಂಭಂಧ್! ದೋನ್ ಜಿಬಾಂನಿ ಉಚಾರ್ಲೆಲ್ಯಾ ಉತ್ರಾಂನಿ
ಭಾಸಾಯಿಲ್ಲೊ ಸಂಭಂಧ್!"
"ಆಪ್ಲ್ಯಾ ಘೊವಾವೀಣ್ ಹ್ಯಾ ಘರಾಂತ್ ಮ್ಹಾಕಾ ಸಂಭಂಧ್
ಆಸಾ?"
ಆಲಿಯಾಚಾ ಮತಿನ್ ಚಿಂತುಂಕ್ ಆರಂಭ್ ಕೆಲ್ಲೆಂ. ಚಿಂತ್ನಾಂ ಸಂಗಿಂ
ತೆಂ ಆತಾಂ ತಾಚ್ಯಾಚ್ ಸಂಸಾರಾಂತ್ ಉಭೊಂಕ್ ಲಾಗ್ಲೆಂ.
ತೊಚ್ಚ್ ಮೊಳಾಬ್.......!
ತಿಂಚ್ ಕುಪಾಂ.......!!
ತಿಂಚ್ ಸುಕ್ಣಿಂ.......!!!
ಸಗ್ಳಿಂ ಸ್ವತಂತ್ರ್! ಜಿವಿತಾಚಾ ತಾಂಚಾ ಹರ್ಯೆಕಾ ವಾಟೆನ್
ಸ್ವತಂತ್ರ್!! ಜಲ್ಮೊನ್ ಮೊರ್ತಾ ಪಾಸೊನ್ ಸ್ವತಂತ್ರ್!!!
ಆಪ್ಲ್ಯಾ ತಕ್ಲೆ ವಯ್ರ್ ಪಯ್ಶಿಲ್ಯಾ ಅನಂತಾಕ್
ಮನಿಸ್ ಮೊಳಾಬ್ ಮ್ಹಣೊನ್ ವೊಲಾಯ್ತಾ ಶಿವಾಯ್
ತ್ಯಾ ಮೊಳಾಬಾಕ್ ತಾಚ್ಯೆ ಥಾವ್ನ್ ಆಪ್ಡುಂಕ್ ಜಾತಾ? ತ್ಯಾ
ಮೊಳಾಬಾರ್ ಕೊಣೆಂಯ್ ಹುಕುಮ್ ಚಲಂವ್ಕ್ ಜಾತಾ?
ತಿಂ ಕುಪಾಂ ಆಪ್ಲೆಸ್ತಕಿಂ ಸೃಷ್ಟೆಚಾ ನಿಯಮಾಂಕ್ ಲಾಗೊನ್
ಜಲ್ಮಾತಾತ್ ಆನಿ ಮೊರ್ತಾತ್. ತಾಂಕಾಂ ಕೊಣ್ಯ್ ಕಾಡುನ್
ಹೆವ್ಶಿಂ ತೆವ್ಶಿಂ ದವರ್ತಾ? ಆಪ್ಣಾಕ್ ಮೋಗ್ ಆಸ್ಲ್ಲ್ಯಾ ಕುಶಿನ್
ತಿಂ ಧಾಂವ್ತಾತ್. ಮೋಗ್ ನಾ ಜಾಲ್ಲ್ಯಾ ಕುಶಿನ್ ಪಳವ್ನ್
ತಿಂ ಹೆಡಾಯ್ತಾತ್! ತಾಂಕಾಂ ಕೊಣ್ಯ್ ಕಯ್ದ್ ಕರುಂಕ್
ಸಕ್ತಾ?"
ತಿಂ ಸುಕ್ಣಿಂ! ಖಂಯ್ ಜಲ್ಮಾತಾತ್.... ಖಂಯ್ ಮೊರ್ತಾತ್.... ಖಂಯ್
ಜಿಯೆತಾತ್.... ತಿಂ ಕಾಂಯ್ಚ್ ನೆಣಾಂತ್. ವಾರ್ಯಾರ್ ಉಬ್ತಾತ್, ರೂಕಾಂನಿ
ಖೆಳ್ತಾತ್. ತಾಂಕಾಂ ಕೊಣ್ಯ್ ಲುಂವಣ್ ದವರ್ತಾ? ತಾಂಕಾಂ ಕೊಣ್ಯ್
ತುಪ್ಯಾಂನಿ ಭರುನ್ ದವರ್ತಾ?ಕಾಂಯ್ ನಾ! ತರ್....?
ತರ್, ಹ್ಯಾ ಪೃಥ್ವೆ ವಯ್ಲ್ಯಾ ಮನ್ಶ್ಯಾಕ್ ಮಾತ್ರ್
ಹೆಂ ಕಯ್ದಿಪಣ್? ಜಿವಿತಾಚಾ ಹರ್ಯೆಕಾ ಪಾಂವ್ಡ್ಯಾರ್
ಮನಿಸ್ ಕಯ್ದಿ! ಕೋಣ್ ಸಂಭಂಧಾಚೊ ತರ್ ಕೋಣ್
ಮೊಗಾಚೊ! ಕೋಣ್ ಆಮಾಲಾಚೊ ತರ್ ಕೋಣ್ ಧಾಂವ್ಣೆಚೊ!
ಹ್ಯಾ ಮನ್ಶ್ಯಾ ಜಾತಿ ಮಧೆಂ ಹಾಂವ್ಯ್ ಏಕ್ ಕಯ್ದಿ?
ಹಾವೆಂ ಮ್ಹಜ್ಯಾ ಜಿವಿತಾಚ್ಯಾ ವಾಟೆರ್ ಜೊಡ್ಲೆಲ್ಯಾ ಮ್ಹಜ್ಯಾಚ್
ಆಶೆಚ್ಯಾ ಸಂಭಂಧಾಂತ್ ಹಾಂವ್ಚ್ ಕಯ್ದಿ?
"ಟ್ರಿಣ್..... ಟ್ರಿಣ್...."
ಟೆಲಿಪೊನಾಚೊ ಆವಾಜ್ ಆಯ್ಕೊನ್ ಯೆತಾನಾ ಎಕಾಚ್ಚ್ಫರಾ
ಆಪ್ಲ್ಯಾ ಚಿಂತ್ನಾಂ ಥಾವ್ನ್ ಭಾಯ್ರ್ ಯೇವ್ನ್ ಹ್ಯಾ
ಪ್ರಸ್ತುತ್ ಪರಿಸ್ಥಿತೆಕ್ ಆಲಿಯಾ ಪಾಟಿಂ ಆಯ್ಲೆಂ.
"ಖಂಡಿತ್ ನಾಸಿರಾಚೆಂಚ್ ಟೆಲಿಪೋನ್ ಜಾಯ್ಜಯ್!"
ಮತಿಂತ್ಚ್ ಅಂದಾಜ್ ಕೆಲ್ಲ್ಯಾ ಆಲಿಯಾಕ್ ಪೊನಾ ತೆವ್ಶಿಂ ವೆಚೆಂ
ಮನ್ ಆಯ್ಲೆಂ ಜಾಲ್ಯಾರ್ಯ್ ತೆಂ ಪೊನಾ ತೆವ್ಶಿಂ ಚಮ್ಕಾಲೆಂ
ನಾ.
"ಬಹೂ........? ಹಾಂಗಾ ತಿಕ್ಕೆ ಪಳೆ....! ಹಾಂವ್ ಪೋನ್
ಕೊಣಾಚೆಂ ತೆಂ ಪಳೆತಾಂ!"
ನಾಸಿರಾಚಿ ಆವಯ್ ಪೊನಾ ತೆವ್ಶಿಂ ಚಮ್ಕಾಲಿ.
ಸ್ಟವಾಚೆರ್ ತೆಲಾಂತ್ ಪಿಯೆವ್ ಬಾಜ್ತಾಲೊ.
ತ್ಯಾ ತೆಲಾಂತ್ ಬಾಜ್ಚ್ಯಾ ಪಿಯಾವಾಚಾ ಶಿರಾಂಕ್ ಪಳೆತಾನಾ ಆಪ್ಲ್ಯಾಚ್
ಕಾಳ್ಜಾಚಾ ಶಿರಾಂಕ್ ಆಪುಣ್ ಹ್ಯಾ ತೆಲಾಂತ್ ಬಾಜ್ತಾಂ
ಮ್ಹಳ್ಳ್ಯಾ ಪರಿಂ ಆಲಿಯಾಕ್ ಜಾಲೆಂ.
ತೆಲಾಂತ್ಲ್ಯಾ ಪಿಯಾವಾಕ್ ಸಾಳ್ತಾಂ ಸಾಳ್ತಾಂ....,
"ಬಹೂ....., ನಾಸಿರಾಚೆಂ ಪೋನ್! ತುಕಾ ಉಲಂವ್ಕ್ ಜಾಯ್?"
"ನಾಕಾ!" ಆಲಿಯಾನ್ ಇನ್ಕಾರ್ ಕೆಲೆಂ.
ಆಲಿಯಾನ್ ನಾಸಿರಾಲಾಗಿಂ ಉಲಂವ್ಕ್ ಇನ್ಕಾರ್ ಕೆಲ್ಲೆಂ
ಪಳವ್ನ್ ನಾಸಿರಾಚಿ ಆವಯ್ ಆಪ್ಲ್ಯಾ ಪುತಾ ಲಾಗಿಂ ಉಲಯ್ಲಾಗ್ಲಿ.
ಪುತಾಲಾಗಿಂ ಉಲವ್ನ್ ಜಾವ್ನ್ ಥೊಡ್ಯಾ ವೆಳಾನ್ ತಿ ಕುಜ್ನಾಕ್
ಪಾಟಿಂ ಪರ್ತಾಲಿ.
ನಾಸಿರಾಚಿ ಆವಯ್ ಪರ್ತ್ಯಾಕ್ ಆಪ್ಲ್ಯಾ ಪಯ್ಲೆಂಚಾ ಕಾಮಾಕ್
ಲಾಗ್ತಾನಾ ಆಲಿಯಾ ತಿಕಾ ಮಜತ್ ಕರುಂಕ್ ಲಾಗ್ಲೆಂ. ತಿಕಾ ತೆಂ
ಮಜತ್ ಕರ್ತಾ ಕರ್ತಾನಾ.... ಪರ್ತ್ಯಾಕ್ ತಾಚಿಂ ಚಿಂತ್ನಾಂ ತಾಚ್ಯಾ
ಮತಿಂತ್ ಧಾವೊಂಕ್ ಲಾಗ್ಲಿಂ.
ಆಪ್ಲೆಂ ನಿಖಾ ಜಾಲ್ಲ್ಯಾ ದಿಸಾ ಥಾವ್ನ್, ಆಪ್ಲ್ಯಾ ಜಿವಿತಾಚಾ ಹ್ಯಾ
ನವ್ಯಾಸಾಂವಾಂತ್ ಆಜ್ ಪಯ್ಲೆ ಪಾವ್ಟಿಂ ಆಪುಣ್ ಹ್ಯಾ ಸಂಸಾರಾಂತ್
ಖಂಯ್ಚರ್ಗೀ ಕಯ್ದಿ ಜಾಲ್ಯಾಂ ಮ್ಹಳ್ಳ್ಯಾಚೊ ಆಲಿಯಾಕ್
ಆನ್ಬೋಗ್ ಜಾಲೊ. ಆಪ್ಣಾಚೊ, ಆಪ್ಲ್ಯಾ ಬಾಪಾಯ್ಚಾ ಘರಾಂತ್ಲೊ
ಸ್ವತಂತ್ರ್ ಹಾಂಗಾಸರ್ ಕೊಣೆಂಗೀ ಕಯ್ದ್ ಕೆಲಾ
ಮ್ಹಳ್ಳ್ಯಾ ಭಾಶೆನ್ ತಾಕಾ ಭೊಗ್ಲೆಂ.
ಬಾಪಾಯ್ಚಾ ಘರಾ ತೆಂ ಕೆದ್ನಾಂಚ್ ಕೊಣಾಯ್ಚಾ ಹಾತಾಖಾಲ್
ಪಡ್ಲೆಲೆಂ ಚೆಡುಂ ನ್ಹಯ್. ತಾಚ್ಯಾ ತಾಣೆಂ ಸಾರ್ಲೆಲ್ಯಾ ಆಂಕ್ವಾರ್
ಜಿವಿತಾಂತ್ ಖಂಯ್ಚರ್ಯ್ ತೆಂ ಕೊಣಾಯ್ಚಾ ಮುಕಾರ್ ಬಾಗ್ವೊನ್
ಚಲ್ಲ್ಲೆಂ ಚೆಡುಂ ನ್ಹಯ್. ಜಿವಿತಾಂತ್ ರಾಜಿ ಕರುನ್ ತಕ್ಲಿ
ಭಾಗಾವ್ನ್ ಚಲ್ಲ್ಲ್ಯಾ ಚಲಿಯಾಂಚೆಂ ಜೀವನ್ ಕಸಲೆಂ
ತೆಂ ತಾಣೆಂ ಆಯ್ಕಾಲ್ಲೆಂ ಆನಿ ಪಳೆಲ್ಲೆಂ.
"ಹ್ಯಾ ಸಂಸಾರಾಂತ್, ಚಲಿಚ್ ಚಡ್ ಜಾವ್ನ್ ಆಪ್ಲಿ ತಕ್ಲಿ ಭಾಗಾಯ್ತಾ
ಕಿತ್ಯಾಕ್?"
"ಹರ್ಯೆಕಾ ವಗ್ತಾ, ಚಲಿಚ್ ತಿಚ್ಯಾ ಜೀವನಾಂತ್
ಲ್ಹಾನ್ಪಣ್ ಭಗ್ತಾ ಕಿತ್ಯಾಕ್?"
"ಜಿವಿತಾಚಾ ಹರ್ಯೆಕಾ ಹಂತಾರ್ ಹ್ಯಾ ಚಲಿಯೆಕ್ಚ್ ಹರ್ಯೆಕ್ಲೊ
ಬಲಿ ಭೆಟಯ್ತಾ ಕಿತ್ಯಾಕ್?"
ಆಪ್ಲಿ ಮತ್ ಬಸ್ಲೆಲ್ಯಾ ಥಾವ್ನ್ ತಾಚ್ಯಾ ಮತಿಂತ್ ರಾಜ್ ಕರುನ್
ಆಸ್ಚ್ಯಾ ಹ್ಯಾ ಜವಾಬ್ ಮೆಳೊಂಕ್ ನಾತ್ಲೆಲ್ಯಾ ಸವಾಲಾಂನಿ
ಪರ್ತ್ಯಾಕ್ ಆಲಿಯಾಕ್ ಆತಾಂ ದೊಸುಂಕ್ ಆರಂಭ್ ಕೆಲೆಂ.
ಮೋರಿಶಸಾಂತ್ ದೀಸ್ ರಾತ್ ಆಪ್ಲೊ ನಾಸಿರ್ ಸದಾಂಚ್ ಆಪ್ಣಾ
ಸಾಂಗಾತಾ ಆಸ್ಲ್ಲೊ. ಆಪ್ಣಾ ಸಾಂಗಾತಾ ಉಲಯಿಲ್ಲೊ. ಆಪ್ಣಾ ಸಾಂಗಾತಾ
ಖೆಳ್ಲ್ಲೊ. ಆಪ್ಣಾ ಸಾಂಗಾತಾ ಖೆಲ್ಲೊ.... ಪಿಯೆಲ್ಲೊ... ಜೆವ್ಲ್ಲೊ.....!
ತ್ಯಾ ದೋನ್ ಹಪ್ತ್ಯಾಂನಿ ಆಪುಣ್ ಆನಿ ನಾಸಿರ್ ಸೊಡ್ಲ್ಯಾರ್
ದುಸ್ರೆಂ ಕಾಂಯ್ಚ್ ನಾತ್ಲೆಲೆಂ. ತೊ ಸಂಸಾರ್ಚ್ ದುಸ್ರೊ
ಆಸ್ಲ್ಲೊ. ತೊ ವೇಳ್ಚ್ ದುಸ್ರೊ ಆಸ್ಲ್ಲೊ! ಪುಣ್ ಆತಾಂ.....?
ಆತಾಂ ಹೊ ಸಂಸಾರ್ಚ್ ದುಸ್ರೊ ಆನಿ ಹೊ ವೇಳ್ಚ್ ದುಸ್ರೊ!
ತರ್ ಹೊ ಸಂಸಾರ್ ಆನಿ ಹೊ ವೇಳ್ ಮ್ಹಜ್ಯಾ ಜಿವಿತಾಂತ್ ಕಸೊ
ಉದೆಲೊ?
ಕುಜ್ನಾಂತ್ ಆಲಿಯಾ ತಾಚ್ಯಾ ಕುಡಿಚ್ಯಾ ರುಪಾರ್ ಹಾಜರ್ ಆಸ್ಲ್ಲೆಂ
ತರ್ಯ್ ಮತಿಂತ್ಲ್ಯಾ ಭೊಗ್ಣಾಂನಿ ತೆಂ ಯೆದೊಳ್ಚ್
ಮೋರಿಶಸ್ ಪಾವ್ಲ್ಲೆಂ. ಮೋರಿಶಸಾಂತ್ಲ್ಯಾ ದಿಸಾಂಕ್ ಆನಿ
ರಾತಿಕ್ ತೆಂ ಚಿಂತುಂಕ್ ಲಾಗ್ಲ್ಲೆಂ.
ಹಾಂಗಾಸರ್ ಮುಂಬಯಿಂತ್ ಆಪ್ಣಾಚೆಂ ಕಾಂಯ್ ನಾ. ಜೆಂ ಕಿತೆಂ
ಆಸಾ ತೆಂ ಸಗ್ಳೆಂ ಥಂಯ್ಚ್ ತ್ಯಾ ಪಯ್ಶಿಲ್ಯಾ ಮೋರಿಶಸಾಂತ್
ಆಸಾ!
ತರ್ ಹಾಂವ್ ಹಾಂಗಾ ಕಿತೆಂ ಕರ್ತಾಂ?
ಹಾವೆಂ ಆನಿ ನಾಸಿರಾನ್ ಮೋರಿಶಸಾಂತ್ ಆಸೊಂಕ್ ಜಾಯ್ ಆಸ್ಲ್ಲೆಂ!
ಹಾಂವ್ ಆನಿ ನಾಸಿರ್....!
ಫಕತ್ತ್ ಆಮಿಂ ದೊಗಾಂ....!!
ದೊಗಾಂ ಮಧ್ಲೊ ಆಮ್ಚೊ ಮೋಗ್ ಮಾತ್ರ್...!!!
"ಬಹೂ.....?"
"ಬಹೂ...ಊ...ಊ..?"
ಆಪ್ಣೆಂ ಆಲಿಯಾಕ್ ಆಪಯ್ಲ್ಯಾರ್ಯ್ ಆಲಿಯಾನ್ ಆಪ್ಣಾಕ್ ಕಾಂಯ್ ಗುಮಾನ್ ಕೆಲೆಂ ನಾ ತೆಂ ಪಳವ್ನ್ ಪರ್ತ್ಯಾಕ್ ನಾಸಿರಾಚ್ಯಾ ಆವಯ್ನ್ ಆಪ್ಲ್ಯಾ ಸುನೆಕ್ ಆಪಯ್ಲೆಂ.
ನಾಸಿರಾನ್ ಆನಿ ಆಪ್ಣೆಂ ಮೆಳೊನ್ ಮೋರಿಶಸಾಂತ್ ಸಾರ್ಲೆಲ್ಯಾ ತ್ಯಾ ಗೋಡ್ ಘಡಿಯಾಂಚೊ ಉಡಾಸ್ ಕಾಡ್ಚೆಂ ಆಲಿಯಾ, ಸಾಸುಮಾಂಯ್ಚೊ ತಾಳೊ ಆಯ್ಕೊನ್ ಎಕ್ಚ್ಚ್ ಪಾವ್ಟಿಂ ಆಪ್ಲ್ಯಾ ತ್ಯಾ ಆಶಾಡಚಾ ಉನ್ಮಾದ್ ಘಡಿಯಾಂಕ್ ಬಗ್ಲೆಕ್ ಲೊಟ್ಲ್ಲೆಂ,
"ಹಾಂ..... ಅಮ್ಮೀ ಜಾನ್.....!"
ಎಕಾ ಖಿಣಾಕ್ ಮಾತ್ರ್ ತೆಂ ಘುಸ್ಪಡ್ಲೆಂ ಜಾಲ್ಯಾರ್ಯ್ ದುಸ್ರ್ಯಾಚ್ ಖಿಣಾ ಭಿತರ್ ಆಲಿಯಾ ಆಪ್ಲ್ಯಾ ನೀಜ್ ಪ್ರಸ್ತುತ್ ಪರಿಸ್ಥಿತೆಕ್ ಪಾಟಿಂ ಆಯ್ಲೆಂ.
"ಬಹೂ....?, ಕಿತೆಂ ಚಿಂತಾಯ್? ಕಾಂಯ್ ಮತಿಚಿ ಬೆಜಾರಾಯ್ ಆಸಾ?"
"ನಾ....., ತಶೆಂ ಕಾಂಯ್ ನಾ!" ಸಾಸುಮಾಂಯ್ಚಾ ದುಬಾವಿ ಸವಾಲಾಕ್ ಆಲಿಯಾನ್ ಸೊಂಪಿ ಜವಾಬ್ ದಿಲಿ.
"ನ್ಹಯ್...., ತುಕಾ ಪಳೆತಾನಾ......!" ಆಪ್ಲ್ಯಾ ಜಿಬೆರ್ ಆಸ್ಲ್ಲೆಂ ಸಾಂಗೊಂಕ್ ನಾಸಿರಾಚಿ ಆವಯ್ ನರ್ಗಾಲಿ."ಭಲಾಯ್ಕಿ ಪುಣಿಂ.....?" ತ್ಯಾ ಉತ್ರಾಂಕ್ ದುಸ್ರ್ಯಾ ಕುಶಿನ್ ತಿಣೆಂ ಕುಡ್ಸಿಲೆಂ.
"ಕಾಂಯ್ ನಾ. ಹಾಂವ್ ಬರಿಂ ಆಸಾಂ!" ದ್ರಡತಾಯೆನ್ ಆಲಿಯಾನ್ ಜವಾಬ್ ದಿಲ್ಲಿ ಪಳವ್ನ್ ಆಪ್ಲಿ ಸುನ್ ಮತಿಚಾ ಸಂತುಲನಾಂತ್ ಬರೆಂ ಘಟ್ ಆಸಾ ಮ್ಹಳ್ಳೆಂ ತೆಂ ನಾಸಿರಾಚಾ ಆವಯ್ಕ್ ಕಳ್ಳೆಂ.
"ಬಹೂ?, ತುಂ ಏಕ್ ಕಾಮ್ ಕರ್. ತುಂ ಭಾಯ್ರ್ ವಚೊನ್ ತಿಕ್ಕೆ ಆರಾಮ್ ಕರ್. ಬೋವ್ಶಾ ತುಜಿ ಕಾಲ್ಚ್ಯಾ ಪಯ್ಣಾಚಿ ಪುರಾಸಣ್ ವಚೊಂಕ್ ನಾ ಆಸ್ತೆಲಿ....!"
ನಾಸಿರಾಚಾ ಆವಯ್ನ್ ಆಲಿಯಾಕ್ ಭಾಯ್ರ್ ದಾಡ್ಲೆಂ.
ಕುಜ್ನಾಂ ಥಾವ್ನ್ ಭಾಯ್ರ್ ಆಯಿಲ್ಲೆಂ ಆಲಿಯಾ ಭಾಯ್ಲ್ಯಾ ಸೊಫಾ ವಯ್ರ್ ಬಸ್ಲೆಂ. ಮತಿಕ್ ಕಾಂಯ್ಚ್ ವಚಾನಾಸ್ತಾನಾ ವೆತಾನಾ ತಾಣೆಂ ಟಿ.ವಿ. ಚಾಲು ಕೆಲಿ. ತಾಚೆಂ ಕಾಳಿಜ್ ಒಪ್ವಾಲೆಂ ನಾ. ಥಂಯ್ ಥಾವ್ನ್ ಉಟ್ಲೆಲೆಂ ತೆಂ ಶೀದಾ ಟೆಲಿಪೋನಾ ತೆವ್ಶಿಂ ಚಮ್ಕಾಲೆಂ.
ರಿಸೀವರ್ ಹಾತಿಂ ಧರುನ್ ತಶೆಂಚ್ ರಾವ್ಲೆಲ್ಯಾ ತಾಕಾ ಆಪ್ಲ್ಯಾ ಟೆಲಿಪೋನಾಚೊ ಉಡಾಸ್ ಆಯ್ಲೊ.
ತಿತ್ಲೆಂಚ್!
ರಿಸೀವರ್ ಥಂಯ್ಚ್ ಸಕಯ್ಲ್ ದವರುನ್ ತೆಂ ಆಪ್ಲ್ಯಾ ಬೆಡ್ರೂಮಾಕ್ ಗೆಲೆಂ.
ಆಪ್ಲ್ಯಾ ಸೆಲ್ಪೋನಾಚೆರ್ ಆಸ್ಲ್ಲ್ಯಾ ನಾಸಿರಾಚಾ ನಂಬರಾಕ್ ಕಾಡುನ್ ತಾಣೆಂ ಪೋನ್ ಡಯಲ್ ಕೆಲೆಂ. ತಾಚ್ಯಾ ಹ್ಯಾ ಸೆಲ್ಪೋನಾ ಥಾವ್ನ್ ತಾಕಾ ನಾಸಿರಾ ಲಾಗಿಂ ಉಲಂವ್ಕ್ ಸಾದ್ಯ್ ನಾತ್ಲ್ಲೆಂ. ಸೆಲ್ಪೋನ್ ಎದೊಳ್ಚ್ ’ಲೋ ಬ್ಯಾಟರಿ’ ದಾಖಯ್ತಾಲೆಂ. ಆಪ್ಣಾಚೆಂ ನಿಖಾ ಜಾವ್ನ್ ಆಯಿಲ್ಲ್ಯಾ ದಿಸಾ ಥಾವ್ನ್ ಆಲಿಯಾನ್ ಆಪ್ಲ್ಯಾ ಪೊನಾಕ್ ಉಪಯೋಗ್ ಕರುಂಕ್ ನಾತ್ಲ್ಲೆಂ.
ಟೆಲಿಪೋನ್ ಡಯಲ್ ಜಾಂವ್ಕ್ ಲಾಗ್ಲೆಂ.
"ಹಲೋ...?" ತ್ಯಾ ಕುಶಿಕ್ ನಾಸಿರಾಚೊ ತಾಳೊ.
"ನಾಸಿರ್....! ಖಂಯ್ ತುಂ? ಐ ಜಸ್ಟ್ ಕಾಂಟ್ ಸ್ಟೇ ಎಲೋನ್ ಹಿಯರ್!"
ಆಲಿಯಾಚಾ ತಾಳ್ಯಾಂತ್ ಆತುರಾಯ್ ಆನಿ ಉನ್ಮಾದ್ ದೊನ್ಯ್ ಸಾಂಗಾತಾ ವ್ಹಾಳ್ತಾಲೆ.
"ಡಾರ್ಲಿಂಗ್....., ಕಿತೆಂ ಜಾಲೆಂ?"
"ಮ್ಹಾಕಾ ತುಂ ಹಾಂಗಾ ಜಾಯ್!"
"ಆಲಿಯಾ, ವಾಟ್ ಹ್ಯಾಪನ್ಡ್?" ನಾಸಿರಾಕ್ ತ್ಯಾ ಕುಶಿಕ್ ಕಾಂಯ್ ಸಮ್ಜಾಲೆಂ ನಾ.
"ಐ ಜಸ್ಟ್ ವಾಂಟ್ ಟು ಸೀ ಯು ರೈಟ್ ನೌ....!"
"ಓ.ಕೆ... ಓ.ಕೆ.... ಆತಾಂ ಸಾಂಗ್ ಕಿತೆಂ ಜಾಲೆಂ?"
"ತುಂ ಯೆತಾಯ್ ವಾ ನಾ ಸಾಂಗ್!"
"ಯೆತಾಂ ಡಾರ್ಲಿಂಗ್. ಟ್ರೈ ಟು ಅಂಡರ್ಸ್ಟ್ಯಾಡ್.....!"
"ಮ್ಹಾಕಾ ಕಾಂಯ್ ಸಮ್ಜೊಂಕ್ ನಾಕಾ! ಆಫೀಸಾಂತ್ ಅಬ್ಬೂ ಆಸಾ... ಆಜ಼ಾದ್ ಆಸಾ.... ಇನಫ್. ತುಂ ಘರಾ ಯೇ ಪ್ಲೀಸ್!"
"ಅಮ್ಮಿ ಖಂಯ್ ಆಸಾ? ಅಮ್ಮಿನ್ ಕಾಂಯ್ ಸಾಂಗ್ಲೆಂ ತುಕಾ?" ನಾಸಿರಾಕ್ ಆತಾಂ ದುಬಾವ್ ಉದೆಲೊ.
"ತಿ ಕುಜ್ನಾಂತ್ ಆಸಾ. ತಿಣೆಂ ಕಾಂಯ್ ಸಾಂಗೊಂಕ್ ನಾ!" ಆಲಿಯಾಚಾ ಜವಾಬೆಂತ್ ಸಮಧಾನ್ ನಾತ್ಲ್ಲೆಂ.
"ತರ್ ಕಿತೆಂ ಜಾಲೆಂ ಆಲಿಯಾ? ಅಚಾನಕ್ ತುಂ ಇತ್ಲೆಂ....." ನಾಸಿರಾಚಾ ತಾಳ್ಯಾಂತ್ ಮೊವಾಳಾಯ್ ಆಸ್ಲ್ಲಿ.
"ತರ್ ತುಂ ಘರಾ ಯೇನಾಂಯ್....?" ಆಲಿಯಾಚೆಂ ಖಡಕ್ಕ್ ಸವಾಲ್. "ಸಾಕಾಳಿಂ ಆಫೀಸಾಕ್ ವೆತಾನಾ ಪಾಸೊನ್ ಮ್ಹಾಕಾ ಸಾಂಗೊಂಕ್ ನಾಂಯ್..... ತುಜೆ ಶಿವಾಯ್ ಹಾಂಗಾ ಮ್ಹಾಕಾ....." ಸವ್ಕಾಸ್ ಆಲಿಯಾಚಾ ತಾಳ್ಯಾಂತ್ ಬದ್ಲಾವಣ್ ಆಯ್ಲಿ.
"ಡಾರ್ಲಿಂಗ್...., ಡೋಂಟ್ ಬಿ ಎಕ್ಸೈಟೆಡ್! ಧನ್ಫಾರಾಂ ಜೆವ್ಣಾಕ್ ಮ್ಹಾಕಾ ಯೆಂವ್ಕ್ಚ್ ಆಸಾ. ಆತಾಂ ಥೊಡೆಂ ಕಾಮ್ ಆಸಾ. ತುಕಾ ಕಳಿತ್ ಆಸಾ ದೋನ್ ಹಪ್ತೆ ಹಾಂವ್ ಆಫೀಸಾಕ್ ಯೇಂವ್ಕ್ ನಾತ್ಲ್ಲೊಂ! ಮ್ಹಾಕಾ ಸಗ್ಳೆಂ ಪರ್ತ್ಯಾನ್ ಪಳಂವ್ಕ್ ಆಸಾ!" ನಾಸಿರಾನ್ ಆಪ್ಲ್ಯಾ ಬಾಯ್ಲೆಕ್ ಸಮ್ಜಂವ್ಚೆಂ ಪ್ರಯತ್ನ್ ಕೆಲೆಂ.
"ತರ್ ತುಂ ಯೇನಾಂಯ್!" ವಿಚಾರ್ಲ್ಲೆಂ ಆಲಿಯಾ ಥೊಡೊ ವೇಳ್ ಮೌನ್ ಜಾಲ್ಲೆಂ ತೆಂ "ಬರೆಂ ತರ್! ಹಾಂವ್ ಥೊಡೆಂ ಭಾಯ್ರ್ ವಚೊನ್ ಯೆತಾಂ!"
"ಭಾಯ್ರ್!? ಭಾಯ್ರ್ ಖಂಯ್ಚರ್....? ಘರಾ....?"
"ಘರಾ ಆತಾಂ ಕೊಣ್ಯ್ ನಾ! ಅಮ್ಮಿ ಮಾತ್ರ್ ಆಸಾ. ಹಾಂವ್ ಆಮ್ಚಾ ಏರ್ವೇಸಾಚ್ಯಾ ಆಫೀಸಾಕ್ ವಚೊನ್ ಯೆತಾಂ!"
ಏರ್ವೇಸಾಚೆಂ ನಾಂವ್ ಆಯ್ಕಾಲ್ಲೆಂಚ್ ನಾಸಿರಾಕ್ ಕಿತೆಂ ಕರ್ಚೆಂ ತೆಂ ಕಳ್ಳೆಂ ನಾ.
"ಜಾಯ್ತ್ ವಚೊನ್ ಯೇ...! ಪುಣ್ ವೆತೆಲೆಂಯ್ ಕಶೆಂ? ಆರೀಫ್ ಹಾಂಗಾ ಆಸಾ. ಹಾಂವ್ ಘರಾ ದಾಡುಂ ತಾಕಾ?"
"ಹಾಂವ್ ಟ್ಯಾಕ್ಸಿ ಕರುನ್ ವೆತಾಂ. ನೋ ಪ್ರಾಬ್ಲಮ್.....!"
"ಜಾಯ್ತ್ ತರ್! ಮಾತ್ರ್ ವೆಗ್ಗಿಂ ಯೇ ಹಾಂ....!" ನಾಸಿರಾನ್ ಸಾಂಗ್ತಾನಾ ಕಸಲ್ಯಾಗೀ ಉತ್ಸಾಹನ್ ಮ್ಹಳ್ಳ್ಯಾಪರಿಂ ಆಲಿಯಾನ್ ಟೆಲಿಪೋನಾಚೊ ಸಂಪರ್ಕ್ ತುಟಯ್ಲೊ. ವೆವೆಗ್ಗಿಂ ತೆಂ ಕುಜ್ನಾಕ್ ಆಯ್ಲೆಂ.
"ಅಮ್ಮಿಜಾನ್, ಹಾಂವ್ ಮ್ಹಜ್ಯಾ ಆಫೀಸಾಕ್ ವಚೊನ್ ಯೆತಾಂ!"
ನಾಸಿರಾಚಾ ಆವಯ್ಚಾ ಪರ್ವಣ್ಗೆಕ್ ರಾಕ್ಚೆಂ ಪ್ರಯತ್ನ್ ತಾಣೆಂ ಕೆಲೆಂ ನಾ. ’ಸಟ್ಟ್’ ಕರುನ್ ಉಲಯಿಲ್ಲೆಂ ತೆಂ ಪಟಾಪಟ್ ಆಪ್ಲ್ಯಾ ಬೆಡ್ರೂಮಾ ತೆವ್ಶಿಂ ಚಮ್ಕಾಲೆಂ.
ನಾಸಿರಾಚಾ ಆವಯ್ಕ್ ಕಾಂಯ್ಚ್ ಉಲಂವ್ಕ್ ಆವ್ಕಾಸ್ ತಾಣೆಂ ದಿಲೊ ನಾ.
ಎಕಾಚ್ ಫರಾ ಆಪ್ಲ್ಯಾ ಸುನೆನ್ ಘೆತ್ಲೆಲ್ಯಾ ನಿರ್ಧಾರಾಕ್ ಶೆರ್ಮೆವ್ನ್ ಏಕ್ ಕ್ಷಣ್ ಚಿಂತುಂಕ್ ಪಡ್ಲ್ಲಿ ನಾಸಿರಾಚಿ ಆವಯ್, ತಿಚ್ಯಾ ಮುಕಾರ್ ದುಸ್ರಿ ಕಾಂಯ್ ವಾಟ್ ದಿಸಾನಾಸ್ತಾನಾ ವೆತಾನಾ ಆಪ್ಲ್ಯಾ ಕಾಮಾಂತ್ ತಿ ಮೆತೆರ್ ಜಾಲಿ.
**************
ಸೆಲ್ಪೋನ್ ಬಂಧ್ ಕರುನ್ ಆಪ್ಲ್ಯಾ ಬಸ್ಕೆಚೆರ್ ಗಳ್ಲ್ಲೊ ನಾಸಿರ್ ಆಪ್ಲ್ಯಾ ಬಾಯ್ಲೆಚಾ ಪೊನಾ ವಯ್ಲ್ಯಾ ಸಂಭಾಶಣಾಕ್ ನಿಯಾಳುಂಕ್ ಲಾಗ್ಲೊ.
ಆಲಿಯಾಚೊ ಆಚಾನಕ್ ನಿರ್ಧಾರ್ ಆನಿ ತಾಚೊ ತೊ ಎಕಾ ವಿಚಿತ್ರ್ ಥರಾಚೊ ಭರ್ತಾವ್ ನಾಸಿರಾಕ್ ಪಸಂದ್ ಆಯ್ಲೊ ನಾ. ಆಲಿಯಾನ್ ಸಾಂಗ್ಲೆಲ್ಯಾ ಪರಿಂಸಕಾಳಿಂ ಆಪುಣ್ ಘರಾ ಥಾವ್ನ್ ಆಫೀಸಾಕ್ ಯೆತಾನಾ ಆಲಿಯಾ ನಿದೆಂತ್ ಆಸ್ಲ್ಲೆಂ. ನಿದೆಂತ್ಲ್ಯಾ ಬಾಯ್ಲೆಕ್ ಜಾಗಂವ್ಚೆಂ ನಾಕಾ ಮ್ಹಳ್ಳ್ಯಾ ಎಕಾಚ್ ಉದ್ದೇಶಾನ್ ತೊ ಆಪ್ಲ್ಯಾ ಬಾಯ್ಲೆಕ್ ಸಾಂಗಾನಾಸ್ತಾನಾಚ್ ಆಫೀಸಾಕ್ ಆಯಿಲ್ಲೊ. ಆತಾಂ ಎಕಾ ಅಚಾನಕ್ ಉದ್ವೇಗಾನ್ ಮ್ಹಳ್ಳ್ಯಾಪರಿಂ ಆಲಿಯಾನ್ ಕೆಲ್ಲ್ಯಾ ಟೆಲಿಪೋನಾ ವರ್ವಿಂ, ತಾಣೆಂ ಆಪ್ಣಾ ಸಾಂಗಾತಾ ಪೊನಾರ್ ಚಲಯಿಲ್ಲ್ಯಾ ತ್ಯಾ ಉನ್ಮಾದಾಚಾ ಸಂಭಾಶಣಾ ವರ್ವಿಂ ನಾಸಿರಾಕ್ ಎಕಾ ಥರಾಚ್ಯಾ ಬೆಜಾರಾಯೆಚೆಂ ವಾತಾವರಣ್ ಆಪ್ಲ್ಯಾ ಭಂವ್ತಣಿಂ ಉಬ್ಜಾಲಾಂ ತಶೆಂ ಭೊಗ್ಲೆಂ.
ಆಪುಣ್ ಸಾಕಾಳಿಂ ಆಫೀಸಾಕ್ ಭಾಯ್ರ್ ಸರ್ತಾನಾ, ಆಪ್ಲ್ಯಾ ಬಾಯ್ಲೆಕ್ ಆಪ್ಣೆ ನಿದೆಂತ್ಲೆಂ ಉಟಂವ್ಕ್ ನಾತ್ಲೆಲಿ ಆಪ್ಣಾಚಿ ಚೂಕ್? ನಾಸಿರಾನ್ ಆಪ್ಣಾಕ್ಚ್ ಸವಾಲ್ ಕೆಲೆಂ.
ವ್ಹಳೂ ತಾಚ್ಯಾ ದೊಳ್ಯಾಂ ಮುಕಾರ್ ಸಾಕಾಳಿಂಚೆಂ ತೆಂ ವಾತಾವರಣ್ ವ್ಹಾಳೊನ್ ಆಯ್ಲೆಂ.
ನಾಸಿರ್ ಸಾಕಾಳಿಂ ಆಫೀಸಾಕ್ ಭಾಯ್ರ್ ಸರ್ತಾನಾ.....,
ಅಪ್ಲ್ಯಾ ಗಳ್ಯಾಕ್ ಟಾಯ್ ಶಿರ್ಕಾವ್ನ್ ಬೆಡ್ರುಮಾ ಥಾವ್ನ್ ಭಾಯ್ರ್ ಯೆಂವ್ಚಾ ನಾಸಿರಾನ್ ನಿಮಾಣೆಂ ಮ್ಹಳ್ಳ್ಯಾ ಪರಿಂ ಆಪ್ಲ್ಯಾ ಬಾಯ್ಲೆ ವಯ್ರ್ ದೀಷ್ಟ್ ಭೊಂವ್ಡಾಯ್ಲಿ.
ಸಂಸಾರಾಚಿ ಫಿಕಿರ್ ನಾಸ್ತಾಂ ನಿದೆಚಾ ವೆಂಗೆಂತ್ ಆಲಿಯಾ ಲಿಪೊನ್ ಗೆಲ್ಲೆಂ. ತ್ಯಾ ತಾಚ್ಯಾ ಅಸ್ತ್ವ್ಯಸ್ತ್ ಜಾಲ್ಲ್ಯಾ ಆಂಗಾ ವಯ್ಲ್ಯಾ ನೈಟಿರ್, ನಿದೆಂತ್ ಸುಟೊನ್ ಭಿಜುಡ್ಲೆಲ್ಯಾ ತ್ಯಾ ಮಾತ್ಯಾಚಾ ಕೆಸಾಂನಿ, ನೆಣ್ತ್ಯಾಪಣಾಕ್ ಪಾಂಗ್ರುನ್ ರಾವ್ಲೆಲ್ಯಾ ಪರಿಂ ದಿಸ್ಚ್ಯಾ ತಾಚ್ಯಾ ಮುಖಮಳಾಕ್ ಪಳೆಲ್ಲ್ಯಾ ನಾಸಿರಾಕ್ ಆಪ್ಲೆಂ ಬಾಯ್ಲ್ ಮಸ್ತ್ ಸೊಭಿತ್ ದಿಸ್ಲ್ಲೆಂ. ತ್ಯಾ ಮೋರಿಶಸಾಂತ್ ಚಡಾವತ್ ಜಾವ್ನ್ ಸಕಾಳಿಂ ತಿಂ ದೊಗಾಂಯ್ ಸಾಂಗಾತಾ ಉಟ್ತಾಲಿಂ. ಥಂಯ್ ಕಾಂಯ್ ಮತಿಚಿ ಬೆಜಾರಾಯ್ ನಾತ್ಲ್ಲಿ. ವೆಳಾಚಿ ಆನಿ ದಿಸಾಚಿ ಕಾಂಯ್ ಪರ್ವಾ ನಾತ್ಲ್ಲಿ. ಏಕೇಕ್ ಪಾವ್ಟಿಂ ರಾತ್ಭರ್ ಮೊಗಾಖೆಳಾಂತ್ ಜಾಗೆಂ ಜಾವ್ನ್ ದೀಸ್ಭರ್ ನಿದೆಂತ್ ತಾಣಿಂ ವೇಳ್ ಪಾಶಾರ್ ಕೆಲ್ಲೊ ಆಸಾ. ಪುಣ್ ಮುಂಬಯಿ....?
ಮುಂಬಯಿಂತ್ ತಶೆಂ ಸಾದ್ಯ್ ನಾತ್ಲ್ಲೆಂ. ಹಾಂಗಾ ಜೀವನ್ ವಚೊಂಕ್ ಜಾಯ್ ಆಸ್ಲ್ಲೆಂ. ಹೆಂ ಜೀವನ್ ಚಲೊಂಕ್ ಜಾಯ್ ಜಾಲ್ಯಾರ್ ವೆಳಾಕ್ ಆನಿ ಕಾಳಾಕ್ ಖಾಲ್ ಜಾವ್ನ್ ಜಿವಿತಾ ಆನಿ ವೆಳಾ ಕಾಳಾ ಮಧೆಂ ರಾಜಿ ಕರುಂಕ್ ಆಸ್ಲ್ಲೆಂ.
ಸಾಕಾಳಿಂಚಾ ಆದೇಸಾರ್ ಸಂಸಾರಾಕ್ ವಿಸ್ರೊನ್ ಸೊಭಿತ್ ನಿದೆಂತ್ ಆಸ್ಲ್ಲ್ಯಾ ಆಲಿಯಾಕ್, ಖಾಟಿಯೆರ್ಚ್ ಸೊಡುನ್ ನಾಸಿರ್ ನಿದೆಂತ್ಲೊ ಉಟ್ಲ್ಲೊ. ರಾತಿಕ್ ಆಲಿಯಾ ನಾಂವ್ಕ್ ವೆತಾನಾ, ಆಪುಣ್ ಖಾಟಿಯೆರ್ ಗಳ್ಲ್ಲೊ ಮಾತ್ರ್ ಉಡಾಸ್ ತಾಕಾ. ಹ್ಯಾ ಉಪ್ರಾಂತ್, ಆಲಿಯಾ ಕಶೆಂ ಆನಿ ಕೆದಾಳಾ ನಿದ್ಲಾಂ ತೆಂ ನಾಸಿರಾಕ್ ಖಬಾರ್ಚ್ ನಾತ್ಲ್ಲಿ. ಕಾಂಯ್ ಆಪ್ಣಾವಿಣೆಂ..., ನವೆಂ ಹೊಕಾಲ್ ತೆಂ.....! ಮತಿಂತ್ಲಿಂ ಭಗ್ಣಾಂ....., ಕಾಳ್ಜಾಂತ್ಲೆ ಆತ್ರೆಗ್...... ದೊಳ್ಯಾಂತ್ಲಿ ಆಶಾ ವಿಸ್ರೊನ್ ತಾಚ್ಯಾ ದೊಳ್ಯಾಂಕ್ ಕೆದಾಳಾ ನೀದ್ ಆಯಿಲ್ಲಿ ತಿ ಕೋಣ್ ಜಾಣಾಂ? ತೆಂ ಸುಶೆಗಾತ್ ನಿದೊಂದಿ ಮ್ಹಣ್ ಚಿಂತುನ್, ಆಲಿಯಾಕ್ ಸಾಂಗಾನಾಸ್ತಾನಾಚ್ ತೊ ಆಪ್ಲ್ಯಾ ಆಫೀಸಾಕ್ ಭಾಯ್ರ್ ಸರ್ಲ್ಲೊ.
ದೋನ್ ಹಪ್ತೆ ಬಿಜ್ನೆಸಾಚಾ ಸಂಸಾರಾ ಥಾವ್ನ್ ಭಾಯ್ರ್ ರಾಂವ್ಚೆಂ ಮ್ಹಳ್ಯಾರ್, ಎಕಾ ಘಡಿಯೆಕ್ ಹಾಸೊನ್ ವಿಸ್ರೊಂಚಾ ತಸಲೆಂ ಫೊಕಾಣ್ ನ್ಹಯ್ ಆಸ್ಲ್ಲೆಂ. ಆಪ್ಲ್ಯಾ ಗೈರ್ ಹಾಜರಿಂತ್ ಆಪ್ಲೆಂ ಬಿಜ್ನೆಸ್, ಆಪ್ಲ್ಯಾ ಬಾಪಾಯ್ನ್ ಆನಿ ಭಾವಾನ್ ಸಾಂಬಾಳ್ಳಾಂ ತರ್ಯ್, ಆಪ್ಣಾಚಾ ಸಮ್ಜಣೆ ಥಾವ್ನ್ ದೋನ್ ಹಪ್ತೆ ಭಾಯ್ರ್ ಆಸ್ಲ್ಲೆ. ಹ್ಯಾ ದೋನ್ ಹಪ್ತ್ಯಾಂಕ್ ಜಾತಾ ತಿತ್ಲ್ಯಾ ವೆಗ್ಗಿಂ ನಾಸಿರ್ ಸಮ್ಜೊಂಕ್ ಚಿಂತಾಲೊ. ಹ್ಯಾಚ್ ವಿಶಯಾಂತ್ ಮೆತೆರ್ ಜಾವ್ನ್ ಆಸ್ತಾನಾ ಆಲಿಯಾನ್ ತಾಕಾ ಪೋನ್ ಕೆಲ್ಲೆಂ. ಪೋನ್ ಕೆಲ್ಲ್ಯಾ ಬಾಯ್ಲೆಚೊ, ಪೊನಾ ವಯ್ಲ್ಯಾ ಉತ್ರಾಂಚೊ ಭರ್ತಾವ್ ಪಳವ್ನ್ ನಾಸಿರ್ ಆತಾಂ ಚಿಂತುಂಕ್ ಪಡ್ಲೊ.
ಆಲಿಯಾನ್ ಎಕಾನೇಕ್ ಆಪ್ಲ್ಯಾ ಆಫೀಸಾಕ್ ವಚೊನ್ ಯೆತಾಂ ಮ್ಹಳ್ಳೊ ವಿಚಾರ್ ನಾಸಿರಾಕ್ ಸಮ್ಜಾಲೊ ನಾ.
ಹನಿಮೂನಾಚಾ ದಿಸಾಂನಿ ಜಾಲ್ಯಾರ್ಯ್ ತಾಂಚಾ ದೊಗಾಂಯ್ಚಾ ಕುಡಿಂನಿ ಎಕಾಮೆಕಾ ಪರಸ್ಪರ್ ವಳ್ಕೊನ್ ಪಳವ್ನ್ ತಾಂಕಾ ಪಾರ್ಕಿಲ್ಲೆಂ ಶಿವಾಯ್ ತಾಂಕಾ ತಾಂಚ್ಯಾ ಮತಿಂತ್ ಎಕಾಮೆಕಾಕ್ ವಳ್ಕೊನ್ ಪಾರ್ಕುನ್ ಪಳಂವ್ಚೊ ವೇಳ್ ಉಬ್ಜೊಂಕ್ ನಾತ್ಲಲೊ.
ಆಲಿಯಾನ್ ಆಪ್ಣಾ ತರ್ಪೆನ್ ಹೆಂ ಪ್ರಯತ್ನ್ ಕೆಲ್ಲೆಂ. ನಿಖಾ ಜಾವ್ನ್ ನಾಸಿರಾಚಾ ಘರಾ ಆಯಿಲ್ಲ್ಯಾ ದಿಸಾ ಥಾವ್ನ್ ತಾಣೆಂ ಹ್ಯಾ ನಾಸಿರಾಚ್ಯಾ ಘರಾಂತ್ಲ್ಯಾ ಸರ್ವಾಂಕ್ ಸಮ್ಜೊಂಚೆಂ ಪ್ರಯತ್ನ್ ಕೆಲ್ಲೆಂ. ಪುಣ್ ನಾಸಿರಾನ್ ಆಲಿಯಾಚಾ ವಿಶಿಂ ಜಾಣಾಂ ಜಾಂವ್ಚೆಂ ಪ್ರಯತ್ನ್ ಕರುಂಕ್ ನಾತ್ಲೆಲೆಂ.
"ಬೇಟಾ ಕಿತೆಂ ಚಿಂತುನ್ ಆಸಾಯ್?"
ಎದೊಳ್ ಪಾಸೊನ್ ಸಾರ್ಕೊ ಆಸ್ಲಲೊ ಆಪ್ಣಾಚೊ ಪೂತ್, ಆಪ್ಣಾಚಾ ಘರಾ ಥಾವ್ನ್ ಪೋನ್ ಆಯಿಲ್ಲೆಂಚ್ ಅಚಾನಕ್ ಚಿಂತುಂಕ್ ಪಡ್ಲ್ಲೊ ತೆಂ ಪಳೆಲ್ಲ್ಯಾ ನಾಸಿರಾಚಾ ಬಾಪಾಯ್ಕ್ ಪುತಾಚೆಂ ವರ್ತನ್ ಸಮ್ಜಾಲೆಂ ನಾ. ಥೊಡ್ಯಾಚ್ ಘಡಿಯಾಂ ಪಯ್ಲೆಂ ಆಪ್ಣಾ ಸಾಮ್ಕಾರ್ಚ್ ಆಯಿಲ್ಲ್ಯಾ ಪೋನಾರ್ ತೊ ಉಲಯ್ತಾನಾ, ತೆಂ ಪೋನ್ ಆಲಿಯಾಚೆಂ ಮ್ಹಣೊನ್ ಸುಲೇಮಾನಾಕ್ ನಾಸಿರಾನ್ ಪೊನಾರ್ ಉಲಯ್ತಾನಾಚ್ ಕಳ್ಲ್ಲೆಂ. ಹ್ಯಾ ಕುಶಿಚೆಂ, ಆಲಿಯಾ ಸಾಂಗಾತಾಚೆಂ ನಾಸಿರಾಚೆಂ ಸಂಭಾಶಣ್ಯ್ ತಾಣೆಂ ಆಯ್ಕಾಲ್ಲೆಂ. ಸುಲೇಮಾನಾಕ್ಯ್ ತೆಂ ಸಂಭಾಶಣ್ ತಿತ್ಲೆಂ ಬರೆಂ ಮ್ಹಣೊನ್ ಲಾಗೊಂಕ್ ನಾತ್ಲ್ಲೆಂ. ಪುಣ್ ನವೆಂಚ್ ಸುನ್ ಜಾವ್ನ್ ಆಯಿಲ್ಲ್ಯಾ ಆಲಿಯಾಚಾ ವಿಶ್ಯಾಂತ್ ಕಾಂಯ್ ಉಲಂವ್ಕ್ ತೊ ತಯಾರ್ ನಾತ್ಲ್ಲೊ. ಥೊಡ್ಯಾ ದಿಸಾಂ ಪಯ್ಲೆಂ ಪೂತ್ ಆನಿ ಸುನ್ ಹನಿಮೂನಾಕ್ ಮೋರಿಶಸಾಂತ್ ಆಸ್ತಾನಾ ಆಪ್ಲ್ಯಾ ಬಾಯ್ಲೆನ್ ತಿಚ್ಯಾ ಸುನೆಚ್ಯಾ ಫುಡಾರಾ ವಿಶಿಂ ಸಾಂಗ್ಲ್ಲೆಂ ತೆಂ ಸುಲೇಮಾನಾಕ್ ಉಡಾಸ್ ಆಸಾ. ಹ್ಯಾ ವಿಶಿಂ ತೊ ನಾಸಿರಾ ಲಾಗಿಂ ಉಲಂವ್ಕ್ ಚಿಂತಾಲೊ ತರ್ಯ್ ಇತ್ಲ್ಯಾ ವೆಗ್ಗಿಂ ಉಲಂವ್ಕ್ ತಾಕಾ ಮನ್ ನಾತ್ಲ್ಲೆಂ.
ಆಲಿಯಾ ಆತಾಂ ಆಪ್ಲ್ಯಾ ಘರಾಚೆಂ ಸುನ್ ತರ್ಯ್ ತೆಂ ಆತಾಂ ಆಪ್ಲ್ಯಾ ಘರಾಚಾ ಧುವೆ ಪರಿಂಚ್. ಆಪ್ಲಿ ಧುವ್ ಆಪ್ಣಾಕ್ ಸಾಂಡುನ್ ನಿಖಾ ಕರುನ್ ದಿಲ್ಲ್ಯಾ ಘರಾ ವೆತೆಲೆಂ ತೆದ್ನಾಂ ಆಮ್ಕಾಂ ಸಾಂಬಾಳಿಜಾಯ್ ಜಾಲ್ಯಾರ್ ಆಪ್ಲ್ಯಾ ಸುನೆನ್ ಮಾತ್ರ್. ಧುವ್ ಜಾಂವಯ್ ಆಪ್ಣಾಕ್ ಫಕತ್ತ್ ಪಯ್ಸ್ ಥಾವ್ನ್ ತಿಳುನ್ ವೆತೆಲಿಂ ಶಿವಾಯ್ ಆಪ್ಲೆಂ ತೋಂಡ್ ಸುಕ್ತಾನಾ ಜಿಬೆರ್ ದೋನ್ ಥೆಂಬೆ ಉದಾಕ್ ಸೊಡುಂಕ್ ಜಾಯ್ ಜಾಲ್ಯಾರ್, ಆಪ್ಲ್ಯಾ ಸುನೆನ್ ಮಾತ್ರ್ ಮ್ಹಣೊನ್ ಸುಲೇಮಾನ್ ಸ್ಪಷ್ಟ್ ಜಾಣಾಂ ಆಸ್ಲ್ಲೊ.
ಪುಣ್, ಆತಾಂ ಆಚಾನಕ್ ಆಯಿಲ್ಲ್ಯಾ ಆಲಿಯಾಚಾ ಪೋನಾ ಥಾವ್ನ್ ನಾಸಿರ್ ಚಿಂತೇಸ್ತ್ ಜಾಲ್ಲೊ ಪಳವ್ನ್, ಸುಲೇಮಾನಾಕ್ ವೊಗೊ ರಾವೊಂಕ್ ಮನ್ ಆಯ್ಲೆಂ ನಾ.
"ಆಂ....., ಕಾಂಯ್ ನಾ!" ಬಾಪಾಯ್ಚಾ ಸವಾಲಾ ಥಾವ್ನ್ ಚಿಂತ್ಪಾ ಸಾಗೊರಾಂತ್ಲೊ ಭಾಯ್ರ್ ಆಯಿಲ್ಲ್ಯಾ ನಾಸಿರಾನ್, ಆಪ್ಲ್ಯಾ ಹಾತಾಂತ್ಲ್ಯಾ ಸೆಲ್ಪೋನಾಕ್ಚ್ ಪಳವ್ನ್ ತ್ಯಾ ಸೆಲ್ಪೋನಾಕ್ ಆಪ್ಣಾ ಮುಕ್ಲ್ಯಾ ಮೆಜಾರ್ ತಾಣೆಂ ಉಡಯ್ಲೆಂ.
ಪುತಾಚಾ ಜವಾಬೆ ಥಾವ್ನ್ ಸುಲೇಮಾನ್ ಖುಶ್ ಜಾಲೊ ನಾ. ಏಕ್ ಲಾಂಭ್ ಶ್ವಾಸ್ ಸೊಡ್ಲೆಲ್ಯಾ ತಾಣೆಂ ಆಪ್ಲ್ಯಾ ಬಸ್ಕೆಕ್ ಪಾಟಿಂ ಲೊಟ್ಲೆಂ. ತೊ ಆತಾಂ ಉಟೊನ್ ನಾಸಿರಾ ತೆವ್ಶಿಂ ಆಯ್ಲೊ. ಬಾಪಯ್ ಪುತಾಚೆಂ ಆಫೀಸ್ ಎಕಾಚ್ ಕ್ಯಾಬಿನಾ ಭಿತರ್ ಆಸ್ಲ್ಲೆಂ. ಸುಲೇಮಾನಾನ್ ಬಿಜ್ನೆಸ್ ಸಗ್ಳೆಂ ನಾಸಿರಾಚಾ ಹಾತಿಂ ಸೊಡುನ್ ದಿಲ್ಯಾ ಉಪ್ರಾಂತ್ ತೊ ಚಡಾವತ್ ಜಾವ್ನ್ ಕಾನ್ಫಿಡೆನ್ಶಿಯಲ್ ಕಾಮ್ ಆಸ್ಲ್ಯಾರ್ ಮಾತ್ರ್ ಆಫೀಸಾಕ್ ಯೆತಾಲೊ ಶಿವಾಯ್ ಉರ್ಲೆಲ್ಯಾ ವಗ್ತಾರ್ ತೊ ಆಫೀಸಾಕ್ ಯೇನಾತ್ಲ್ಲೊ ಜಾಲ್ಲ್ಯಾನ್ ಸುಲೇಮಾನಾಕ್ ಪ್ರತ್ಯೇಕ್ ಕ್ಯಾಬಿನ್ ನಾತ್ಲೆಲೆಂ. ಆಪ್ಲ್ಯಾಚ್ ಕ್ಯಾಬಿನಾಂತ್ ತಾಣೆಂ ಪುತಾಕ್ ಬಸಯಿಲ್ಲೆಂ.
"ಕಿತೆಂ ಜಾಲೆಂ? ಕಾಂಯ್ ಪ್ರಾಬ್ಲೆಮ್ ಆಸಾ?" ಪುತಾಚಾ ಲಾಗಿಂ ಯೇವ್ನ್ ತಾಚ್ಯಾ ಖಾಂದಾರ್ ಹಾತ್ ದವರುನ್ ಸುಲೇಮಾನಾನ್ ವಿಚಾರ್ಲೆಂ.
"ಕಾಂಯ್ ನಾ. ಆಶೆಂಚ್....!"
"ತರ್, ಎಕ್ಚ್ ಪಾವ್ಟಿಂ ಅಚಾನಕ್ ಆಶೆಂ ಕಿತೆಂ ಚಿಂತುಂಕ್ ಪಡ್ಲೊಯ್?"
".........."
ನಾಸಿರಾನ್ ಕಾಂಯ್ ಜವಾಬ್ ದಿಲಿ ನಾ. ತೊ ಆಪ್ಲ್ಯಾ ಸೆಲ್ಪೋನಾಕ್ ಪಳಯಿತ್ತ್ ರಾವ್ಲೊ.
"ಆಲಿಯಾನ್ ಕಾಂಯ್ ಸಾಂಗ್ಲೆಂ?" ಸುಲೇಮಾನಾಕ್ ಆತಾಂ ತೋಂಡ್ ಉಘಡ್ನಾಸ್ತಾನಾ ದುಸ್ರೊ ಉಪಾಯ್ ನಾತ್ಲ್ಲೊ.
ಬಾಪಾಯ್ನ್ ಪೊನಾ ವಯ್ಲ್ಯಾ ಆಪ್ಲ್ಯಾ ಸಂಭಾಶಣಾಕ್ ಆಯ್ಕಾಲಾಂ ತೆಂ ತೊ ಜಾಣಾಂ.
"ಆಲಿಯಾ ಮ್ಹಾಕಾ ಘರಾ ಆಪಯ್ತಾಲೆಂ.....!" ನಾಸಿರಾನ್ ತೋಂಡ್ ಸೊಡ್ಲೆಂ.
"ಕಿತ್ಯಾಕ್?"
"ಖಬಾರ್ ನಾ! ತೆಂ ಉಲಯ್ತಾನಾ ಏಕ್ ಥರ್ ಆಸ್ಲ್ಲೆಂ!"
"ತುವೆಂ ವಿಚಾರುಂಕ್ ನಾಂಯ್ ಕಿತೆಂ ಜಾಲಾಂ ತೆಂ.....?"
"ವಿಚಾರ್ಲ್ಲ್ಯಾಕ್ ಆಲಿಯಾನ್ ಕಾಂಯ್ ಜವಾಬ್ ದೀಂವ್ಕ್ ನಾ!"
"ಜವಾಬ್ ದೀಂವ್ಕ್ ನಾ? ಕಿತ್ಯಾಕ್ ಲಾಗೊನ್?"
"ತೆಂಚ್ ಮ್ಹಾಕಾ ಸಮ್ಜಾನಾ......!"
"ತುಮ್ಚೆ ಮಧೆಂ ಕಾಂಯ್...?" ಸುಲೇಮಾನಾನ್ ದುಬಾವ್ ಉಚಾರ್ಲೊ.
"ತಶೆಂ ಕಾಂಯ್ ನಾ ಅಬ್ಬೂ.....!"
"ತರ್ ತುಜೊ ಉಡಾಸ್ ಅಯ್ಲೊ ಆಸ್ತಲೊ!" ನಾಸಿರಾಚ್ಯಾ ಬಾಪಾಯ್ನ್ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡ್ಲ್ಯೊ. ನವೆಂ ನಿಖಾ ಜಾಲ್ಲ್ಯಾಂಚೆ ತಳ್ಮಳೆ ತೊ ಜಾಣಾಂ ಆಸ್ಲ್ಲೊ.
"ತುಂ ಎಕ್ ಕಾಮ್ ಕರ್..... ತುಂ ಘರಾ ವಚ್!" ಬಾಪಾಯ್ನ್ ಪುತಾಕ್ ಸಲಹಾ ದಿಲಿ.
"ತೆಂ ಆತಾಂ ಘರಾ ಆಸ್ಚೆಂ ನಾ ಅಬೂ..... ತೆಂ.... ತಾಚ್ಯಾ ಏರ್ವೇಸಾಚ್ಯಾ ಆಫೀಸಾಕ್ ವಚೊನ್ ಯೆತಾಂ ಮ್ಹಣೊನ್ ಸಾಂಗ್ತಾಲೆಂ!"
"ಏರ್ವೇಸಾಚಾ ಆಫೀಸಾಕ್.....!?" ಸುಲೇಮಾನ್ ಆಶ್ಚರ್ಯಾನ್ ಉದ್ಗಾರ್ಲೊ. ತಾಚ್ಯಾ ಬಾಯ್ಲೆನ್ ತಾಕಾ ಸಮ್ಜಾಯಿಲ್ಲ್ಯಾ ತಾಚ್ಯಾ ಪ್ರಸ್ತುತ್ ಮರ್ಯಾದೆ ಮುಕಾರ್ ಆಲಿಯಾಚೆಂ ಏರ್ಹೊಸ್ಟೆಸಾಚೆಂ ಕಾಮ್ ಕಿತ್ಯಾಕ್ಗೀ ತಾಕಾ ಆಪ್ಣಾಚೆಂ ಲ್ಹಾನ್ಪಣ್ ಮ್ಹಳ್ಳ್ಯಾ ಪರಿಂ ಭೊಗ್ಲೆಂ. ತ್ಯಾ ಶಿವಾಯ್ ಆಪ್ಲ್ಯಾ ಸುನೆಕ್ ಏರ್ಹೊಸ್ಟೆಸಾಚಿ ನವ್ಕರಿ ಕರುಂಕ್ ಜಾಯ್ ಮ್ಹಳ್ಳಿ ಗರ್ಜ್ ನಾತ್ಲ್ಲಿ. ಸುಲೇಮಾನಾಚಾ ಘರಾ ಆಲಿಯಾಕ್ ಕಾಂಯ್ ಉಣೆಂ ನಾತ್ಲ್ಲೆಂ. ತರ್....?
"ಬೇಟಾ.....?, ತುಂ ಕಾಂಯ್ ವಾಯ್ಟ್ ಚಿಂತಿನಾಕಾ.....!" ಸುಲೇಮಾನ್ ಉಲಯ್ಲೊ. "......ಆಲಿಯಾಚಾ ಹ್ಯಾ ಕಾಮಾಕ್ ವೆಚ್ಯಾ ಇರಾದ್ಯಾ ವಿಶಿಂ ಮಾತ್ರ್ ಆಮಿ ಉಲಂವ್ಕ್ ಜಾಯ್. ಹಾಂವೆ ಚಿಂತ್ಲ್ಲೆ ತೆಂ ಖುದ್ದ್ ಜಾವ್ನ್ ಸಮ್ಜಾತೆಲೆಂ ಆನಿ ಆಮ್ಚಾ ಘರ್ಚಾ ಮರ್ಯಾದೆಕ್ ಆಡ್ ಜಾಂವ್ಚೆಂ ತಸಲೆಂ ಕಾಂಯ್ ತೆಂ ಕರ್ಚೆಂ ನಾ. ತಶೆಂ ಕಿತೆಂಯ್ ಜಾಲೆಂ ತರ್ಯ್ ತೆಂ ಆಮ್ಚೆಲಾಗಿಂ ಉಲಯ್ತೆಲೆಂ ಆನಿ ತುಂಚ್ ತಾಕಾ ಸಮ್ಜಯ್ತಲೊಯ್. ಕಿತ್ಯಾಕ್ ಮ್ಹಳ್ಯಾರ್, ಘೊವಾ ಬಾಯ್ಲೆ ಮಧೆಂ ತೊ ಕೋಣ್ ಜಾಲ್ಯಾರ್ಯ್ ತಿಸ್ರ್ಯಾನ್ ಮಧೆಂ ಪ್ರವೇಶ್ ಜಾಂವ್ಚೆಂ ಬರೆಂ ನ್ಹಯ್ ಮ್ಹಣೊನ್ ಚಿಂತುನ್, ಹಾಂವ್ ಆನಿ ತುಜಿ ಅಮ್ಮಿ ವೊಗಿಂಚ್ ರಾವ್ಲ್ಲಾಂವ್. ಪುಣ್ ಆತಾಂ.....? ಹೆಂ ಅಚಾನಕ್ ಆಲಿಯಾ ತಾಚ್ಯಾ ಖುಶೆ ಪರ್ಮಾಣೆ ಕರ್ಚೆಂ.....?"
"ಹಾಂವ್ ತಾಕಾ ಸಮ್ಜಾಯ್ತಾಂ ಅಬೂ.....! ತುಮಿಂ ಹ್ಯಾ ವಿಶಯಾಂತ್ ಕಾಂಯ್ ಟೆನ್ಶನ್ ಕರಿನಾಕಾತ್. ತೆಂ ಖಂಡಿತ್ ಮ್ಹಾಕಾ ಆಯ್ಕಾತೆಲೆಂ!" ನಾಸಿರಾನ್ ಭರ್ವಸ್ಯಾನ್ ಮ್ಹಳ್ಳ್ಯಾಪರಿಂ ಆಪ್ಲ್ಯಾ ಬಾಪಾಯ್ಕ್ ಸಾಂಗ್ಲೆಂ.
"ಹಾಂ...! ಹಾಂವ್ಯ್ ತಶೆಂಚ್ ಚಿಂತಾಂ....! ಪುಣ್, ಏಕ್ ವಿಶಯ್ ಉಡಾಸ್ ದವರ್ ಬೇಟಾ, ಬಾಯ್ಲೆ ವಯ್ರ್ ಹಕ್ಕ್ ಚಲಂವ್ಕ್ ವಚಾನಾಕಾ. ಮೊಗಾನ್ ತಾಕಾ ಸಮ್ಜಯ್. ತೆಂ ಖ್ಂಡಿತ್ ಸಮ್ಜತೆಲೆಂ. ತುಜ್ಯಾ ಸಮ್ಜವ್ಣೆಂತ್ ಕಾಂಯ್ ಉಣೆಂಪಣ್ ಜಾಯ್ತ್ ಜಾಲ್ಯಾರ್ ಉಪ್ರಾಂತ್ ಆಮಿಂ ಆಸಾಂವ್....! ಡೋಂಟ್ ವರ್ರಿ....!" ಮ್ಹಳ್ಳೊ ಸುಲೇಮಾನ್ ಆಪ್ಲ್ಯಾ ಬಸ್ಕೆಕ್ ಪಾಟಿಂ ಪರ್ತಾಲೊ.
ಬಾಪಾಯ್ನ್ ದಿಲ್ಲ್ಯಾ ಸಲಹಾ ಥಾವ್ನ್ ಸಮಾಧಾನ್ ಮೆಳ್ಲ್ಲೊ ನಾಸಿರ್ ಆಪ್ಲ್ಯಾ ಕಾಮಾಂತ್ ಮೆತೆರ್ ಜಾಲೊ. ಹ್ಯಾ ಮೆತೆರ್ಪಣಾಂತ್ ವೇಳ್ ಕಸೊ ಧಾಂವ್ಲೊ ತೊ ತಾಕಾಚ್ ಕಳೊಂಕ್ ನಾ.
ಆಫೀಸಾಕ್ ಆಯಿಲ್ಲ್ಯಾ ಥಾವ್ನ್ ತಾಚಿ ಮತ್ ಆಫೀಸಾಚಾ ಕಾಮಾರ್ಚ್ ರೊಂಬೊನ್ ಗೆಲ್ಲಿ ಶಿವಾಯ್ ದುಸ್ರ್ಯಾ ಖಂಯ್ಚಾಯ್ ವಿಶಯಾಂಕ್ ನಾಸಿರಾನ್ ಮತಿಚಾ ಪಡ್ದ್ಯಾರ್ ಹಾಡ್ಲ್ಲೆಂ ನಾ. ಜೆದ್ನಾಂ ವರೇಗ್ ಆಲಿಯಾಚೆಂ ಪೋನ್ ಯೆತಾ ತೆದ್ನಾಂ ವರೇಗ್ ತೊ ಆಫೀಸಾಚಾ ಕಾಮಾಸಾಳಾಂತ್ಚ್ ಮೆತೆರ್ ಜಾಲ್ಲೊ. ಆಲಿಯಾಚಾ ಟೆಲಿಪೊನಾ ವಯ್ಲ್ಯಾ ಉಲೊವ್ಣ್ಯಾ ಥಾವ್ನ್ ಥೊಡ್ಯಾ ವೆಳಾಕ್ ನಾಸಿರ್, ತಾಚ್ಯಾ ಖಾಸ್ಗಿ ಜಿವಿತಾಚಾ ಕುಶಿನ್ ಮಾಲ್ವಲೊ ತರ್ಯ್ ಬಾಪಾಯ್ನ್ ದಿಲ್ಲ್ಯಾ, ಆಪ್ಣಾಕ್ ಸೂಕ್ತ್ ಮ್ಹಣೊನ್ ದಿಸ್ಲೆಲ್ಯಾ ಸಲಹೆ ಥಾವ್ನ್ ಖುಶ್ ಪಾವೊನ್ ಪರ್ತ್ಯಾಕ್ ತೊ ಆಪ್ಲ್ಯಾ ಆಫೀಸಾಚಾ ಕಾಮಾಕ್ ಲಾಗ್ಲೊ.
ಹರ್ಶೆಂಚಾ ದಿಸಾಂನಿ ದನ್ಪರಾಂ ಜೆವ್ಣಾಕ್ ನಾಸಿರ್ ವಾ ಆಜ಼ಾದ್ ಘರಾ ವಚಾನಾಂತ್ ತರ್ಯ್, ಆಜ್ ನಾಸಿರಾ ಸಾಂಗಾತಾ ತಾಚೊ ಬಾಪಯ್ ಆಫೀಸಾಕ್ ಆಯಿಲ್ಲ್ಯಾನ್ ಆನಿ ತಾಚ್ಯಾ ನಿಮಾಣ್ಯಾ ಬಾವಾಚಾ ಅಕ್ಲಕಾಚಾ ಸುದಾರಿನಾತ್ಲೆಲ್ಯಾ ಸ್ವಭಾವಾನ್ ಹ್ಯಾ ದಿಸಾಂನಿ ಭಿಗಡ್ಲೆಲ್ಯಾ ನಾಸಿರಾಚಾ ಬಾಪಾಯ್ಚಾ ಭಲಾಯ್ಕೆ ವರ್ವಿಂ, ನಾಸಿರಾನ್ ಸಾಕಾಳಿಂ ಘರ್ ಭಾಯ್ರ್ ಸರ್ತಾನಾಂಚ್ ಆಪುಣ್ ಬಾಪಯ್ ಸವೆಂ ಧನ್ಫಾರಾಂ ಜೆವ್ಣಾಕ್ ಘರಾ ಯೆತಾಂ ಮ್ಹಣೊನ್ ಆವಯ್ಕ್ ಸಾಂಗ್ಲೆಲೆಂ.
"ಅಬೂ....., ಜೆವ್ಣಾಚೊ ವೇಳ್ ಜಾಲೊ. ಆಮಿಂ ಘರಾ ಯಾ....!" ನಾಸಿರಾನ್ ಆಪ್ಲ್ಯಾ ರಿಸ್ಟ್ ವಾಚಾಚೆರ್ ನದರ್ ಮಾರ್ಲಿ.
"ತುವೆಂ ಹ್ಯಾ ಹಪ್ತ್ಯಾಂತ್ ಆಯಿಲ್ಲ್ಯಾ ಡೆಲಿವರಿ ಇನ್ವಾಯ್ಸಾಂ ವಯ್ರ್ ನದರ್ ಮಾರ್ಲಿ?"
"ಹಾಂ! ಪುಣ್ ಮ್ಹಜ್ಯಾ, ಹಾವೆಂ ಜಾಂವ್ಕ್ ಜಾಯ್ ಮ್ಹಣೊನ್ ಚಿಂತ್ಲೆಲ್ಯಾ ತಿತ್ಲೆಂ ಇಂಪ್ರೂವ್ಮೆಂಟ್ ಮ್ಹಾಕಾ ದಿಸಾನಾ!"
"ಹಾಕಾ ಕಾರಾಣ್ ಆಮ್ಚೆಂ ಟ್ರಾನ್ಸ್ಪೋರ್ಟೇಶನ್! ಹ್ಯಾ ವಿಶಿ ಚಿಂತುಂಕ್ ಜಾಯ್!"
"ಆದ್ಲ್ಯಾ ಪಾವ್ಟಿಂಚೊ ರಿಪೋರ್ಟ್ ಪೂನಾಕ್ ದಾಡುನ್ ದಿಲಾ?"
"ರಿಪೋರ್ಟ್ ದಾಡುನ್ ದಿಲಾ. ಪುಣ್ ಹ್ಯಾ ಕಾಂಪಿಟೇಶನಾ ವರ್ವಿಂ...."
"ಓ.ಕೆ. ಹಾಂತುಂ ಚಡ್ ವರ್ರಿ ಕರ್ಚಿ ಕಾಂಯ್ ಗರ್ಜ್ ನಾ. ಪಳಯಾಂ....!" ನಾಸಿರಾನ್ ಮೆಜಾ ವಯ್ಲೆಂ ಸೆಲ್ಪೋನ್ ಆಪ್ಲ್ಯಾ ಬೊಲ್ಸಾಕ್ ಗಳಯ್ಲೆಂ.
"ಆಜ಼ಾದ್ ಆಜೂನ್ ಯೆಂವ್ಕ್ ನಾ!" ಸುಲೇಮಾನಾಕ್ ಪುತಾಚೊ ಉಡಾಸ್ ಆಯ್ಲೊ.
"ಹಾಂವ್ ತಾಕಾ ಪೋನ್ ಕರ್ತಾಂ....!"
ನಾಸಿರಾನ್ ಆಪ್ಲ್ಯಾ ಭಾವಾಕ್ ಪೋನ್ ಕೆಲೆಂ. ತಾಕಾ ಆಪುಣ್ ಬಾಪಯ್ ಸವೆಂ ಘರಾ ವೆಚೊ ವಿಶಯ್ ತಿಳ್ಸುನ್ ಜಾವ್ನ್, ತೊ ಬಾಪಾಯ್ ಸವೆಂ ಆಫೀಸಾ ಥಾವ್ನ್ ಭಾಯ್ರ್ ಪಡ್ಲೊ.
ದೊಗ್ಯ್ ಘರಾ ಪಾವ್ತಾನಾ ವೋನ್ ದೇಡ್ ಜಾಲ್ಲೆಂ. ಆಲಿಯಾ ಅಜೂನ್ ಘರಾ ಪಾವೊಂಕ್ ನಾತ್ಲ್ಲೆಂ.
"ಬೇಟಾ ನಾಸಿರ್, ಬಹೂಕ್ ಪೋನ್ ಕರುನ್ ಪಳೆ.....!"
ಸುಲೇಮಾನಾನ್ ಸಲಹಾ ದಿಲಿ.
"ಆಲಿಯಾನ್ ಆಪ್ಲೆಂ ಸೆಲ್ಪೋನ್ ವೆಲಾಂ ಆಸ್ತೆಲೆಂ? ಆಸ್ಚೆಂ ನಾ...! ಇತ್ಲೆ ದೀಸ್ ಜಾಲೆ ತಾಚೆಂ ಪೋನ್ ತಾಣೆಂ ಉಪ್ಯೋಗ್ ಕರುಂಕ್ ನಾತ್ಲೆಲೆಂ." ನಾಸಿರಾಕ್ ಆಲಿಯಾಚಾ ಪೊನಾಚೊ ಉಡಾಸ್ ಆಯ್ಲೊ.
"ಆಲಿಯಾನ್ ಆಪ್ಲೆಂ ಪೋನ್ ವೆಲಾಂ?" ತಾಣೆಂ ಆಪ್ಲ್ಯಾ ಆವಯ್ಕ್ ವಿಚಾರ್ಲೆಂ.
"ನಾ ಬೇಟಾ ಮ್ಹಾಕಾ ಖಬಾರ್ ನಾ!"
ಆಪ್ಲ್ಯಾ ಆವಯ್ಚ್ಯಾ ಜವಾಬೆ ಥಾವ್ನ್ ನಾಸಿರ್ ಆತಾಂ ಆಪ್ಲ್ಯಾ ಬೆಡ್ರುಮಾ ತೆವ್ಶಿಂ ಚಮ್ಕಾಲೊ. ಬೆಡ್ರುಮಾಂತ್ ಡ್ರೆಸ್ಸಿಂಗ್ ಟೇಬಲಾ ವಯ್ರ್ ಚಾರ್ಜಿಂಗಾಕ್ ದವರ್ಲೆಲೆಂ ಆಲಿಯಾಚೆಂ ಪೋನ್ ತಾಕಾ ದಿಸ್ಲೆಂ.
"ಬೋವ್ಶಾ ಆಲಿಯಾ ಭಾಯ್ರ್ ವೆಚಾ ವಗ್ತಾರ್ ಪೋನ್ ಚಾರ್ಜಿಂಗಾರ್ ದವರುನ್ ಗೆಲಾಂ ಆಸ್ತೆಲೆಂ!" ಚಿಂತ್ಲೆಲ್ಯಾ ನಾಸಿರಾನ್ ಆಪ್ಲ್ಯಾ ಗಳ್ಯಾಚಿ ಆಂರ್ದಾಲ್ಲಿ ಟಾಯ್ ಸದಿಳ್ ಕೆಲಿ.
*************
ನಾಸಿರ್ ಆನಿ ಸುಲೇಮಾನ್ ಘರಾ ಪಾವೊನ್ ಸುಮಾರ್ ವೀಸ್ ಮಿನುಟಾಂ ಉತಾರ್ತಾನಾ ಟ್ಯಾಕ್ಸಿಚೆರ್ ಆಯಿಲ್ಲೆಂ ಆಲಿಯಾ ಆಪ್ಲ್ಯಾ ಅಪಾರ್ಟ್ಮೆಂಟಾಚಾ ಮುಕಾರ್ ದೆಂವ್ಲೆಂ.
ದೋನ್ ವೊರಾಂ ಪಯ್ಲೆಂ ಉಡೊನ್ ಗೆಲ್ಲೊ, ತಾಚ್ಯಾ ಮುಖಮಳಾ ವಯ್ಲೊ ಸಂತೊಸ್, ಆತಾಂ ತಾಚ್ಯಾ ತೊಂಡಾರ್ ಸ್ಪಷ್ಟ್ ಫಾಂಕ್ತಾಲೊ. ಆಪಾರ್ಟ್ಮೆಂಟಾ ಮುಕಾರ್ ದೆಂವ್ಲೆಲ್ಯಾ ಆಲಿಯಾಕ್ ಮುಕ್ಲ್ಯಾ ಪಾರ್ಕಿಂಗಾರ್ ನಾಸಿರಾಚೆಂ ಕಾರ್ ಉಭೆಂ ಆಸ್ಲ್ಲೆಂ ದಿಸೊನ್ ಯೆತಾನಾ, ಆಪ್ಲೊ ಘೊವ್ ಘರಾ ಪಾವ್ಲಾ ತೆಂ ಕಳೊನ್ ಎಕ್ ಪಾವ್ಟಿಂಚ್ಯಾಕ್ ತೆಂ ಸಂತೊಸಾನ್ ಭರ್ಲೆಂ. ಆತ್ತಾಂ ಆಪ್ಣೆಂ ಭಾಯ್ರ್ ವಸೊನ್ ಆಪ್ಲೆಂ ಕಾಮ್ ಕರುನ್ ಆಯಿಲ್ಲ್ಯಾಚೊ ಸಂತೊಸ್ ಆನಿ ಘೊವ್ ಘರಾ ಆಯ್ಲಾ ಮ್ಹಣೊನ್ ಕಳಿತ್ ಜಾಲ್ಲೊ ಸಂತೊಸ್ ಸಾಂಗಾತಾ ಮೆಳೊನ್, ತಾಚ್ಯಾ ಫುಲ್ಲ್ಲ್ಯಾ ಮುಖಮಳಾ ವಯ್ಲಿ ಸೊಭಾಯ್ ದೊಡ್ತ್ಯಾನ್ ಚಡಂವ್ಚೆಂ ಪ್ರಯತ್ನ್ ಕರ್ತಾನಾ, ಆಲಿಯಾ ಹ್ಯಾಚ್ ಸಂತೊಸಾಚಾ ಮುಖಮಳಾನ್ ಘರಾ ಭಿತರ್ ಸರ್ಲೆಂ.
"ಸಲಾಮ್ ಮಾಆಲೇಕ್ಕುಮ್....!"
ಸಾಲಾಂತ್ಲ್ಯಾ ಸೋಫಾ ವಯ್ರ್ ಬಸೊನ್ ದಿಸಾಳೆಂ ಪತ್ರ್ ವಾಚ್ಚೊ ಆಪ್ಲೊ ಮಾಂವ್ ಆಲಿಯಾಕ್ ದಿಸ್ತಾನಾ ತಾಕಾ ನಮ್ರತಾಯೆನ್ ತಾಣೆಂ ವಂದನ್ ಕೆಲೆಂ.
"ಮಾ ಆಲೇಕ್ಕುಮ್ ಸಲಾಮ್!"
ಸುಲೇಮಾನಾನ್ ಸುನೆಕ್ ಪಾಟಿಂ ಶಾಂತಿ ಪಾಟಯ್ತಾನಾ ಹೆವ್ಶಿಂ ತೆವ್ಶಿಂ ಪಳೆಲ್ಲ್ಯಾ ಆಲಿಯಾಕ್, ಭಾಯ್ರ್ ಖಂಯ್ಚರ್ಯ್ ಆಪ್ಲೊ ಘೊವ್ ದಿಸೊನ್ ಯೇಂವ್ಕ್ ನಾತ್ಲ್ಲೊ ಪಳವ್ನ್ ತಾಣೆಂ ನಿಟ್ಟ್ ಆಪ್ಲ್ಯಾ ಬೆಡ್ರೂಮಾ ತೆವ್ಶಿಂ ಮೆಟಾಂ ಕಾಡ್ಲಿಂ.
ಆಪ್ಲ್ಯಾ ಆಫೀಸಾಕ್ ವೆತಾನಾ ನ್ಹೆಸ್ಲ್ಲ್ಯಾ ನ್ಹೆಸ್ಣಾಚೆರ್ಚ್ ನಾಸಿರ್ ಖಾಟಿಯೆರ್ ಉದಾರೊ ಪಡೊನ್ ಆಸ್ಲ್ಲೊ. ಬೆಡ್ರುಮಾ ಭಿತರ್ ಆಯಿಲ್ಲ್ಯಾ ಆಲಿಯಾನ್ ತಶೆಂಚ್ ಆಪ್ಳ್ಯಾ ಘೊವಾ ವಯ್ರ್ ನದರ್ ಮಾರುನ್ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡ್ಲ್ಯೊ. ತಶೆಂಚ್ ಪಾಟಿಂ ಘುಂವ್ಲ್ಲ್ಯಾ ತಾಣೆಂ ಆಪ್ಣಾ ಪಾಟ್ಲ್ಯಾನ್ ಬೆಡ್ರುಮಾಚೆಂ ದಾರ್ ದಾಂಪ್ಲೆಂ. ತೆಂ ವ್ಹಳೂ ನಾಸಿರಾ ತೆವ್ಶಿಂ ಚಮ್ಕಾಲೆಂ.
ಆಲಿಯಾ ಆಯಿಲ್ಲೆಂ ಪಳವ್ನ್ ನಾಸಿರ್ ಖಾಟಿಯೆ ವಯ್ಲೊ ಉಟೊನ್ ಬಸ್ಲೊ.
ಆಲಿಯಾಕ್ ಪಳೆಲ್ಲ್ಯಾ ನಾಸಿರಾಕ್ ಆಪ್ಲ್ಯಾ ಬಾಯ್ಲೆಚಾ ತೊಂಡಾರ್ ಉಮಾಳ್ಚೊ ಸಂತೊಸ್ ದಿಸ್ಲೊ. ಆಪ್ಲ್ಯಾ ಬಾಯ್ಲೆಚಾ ಚಿಂತ್ನಾಂನಿ ಖಾಟಿಯೆರ್ ಉದಾರೊ ಪಡ್ಲೆಲ್ಯಾ ನಾಸಿರಾಕ್ ಆತಾಂ ಆಲಿಯಾಕ್ ಆನಿ ಆಲಿಯಾಚಾ ತೊಂಡಾರ್ ಉಮಾಳ್ಚೊ ಸಂತೊಸ್ ಪಳವ್ನ್ ತಾಚ್ಯಾ ಮತಿಕ್ ಥೊಡೊ ಉಲ್ಲಾಸ್ ಭೊಗ್ಲೊ.
"ಆಲಿಯಾ.... ತುಂ!?" ನಾಸಿರಾನ್ ಉತ್ರಾಂ ವಿಂಚ್ಲಿಂ.
ಏಕ್ ಘಡಿಭರ್ ಆಪ್ಲ್ಯಾ ಘೊವಾಕ್ಚ್ ಪಳೆಲ್ಲೆಂ ಆಲಿಯಾ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡಾವ್ನ್ ನಸಿರಾಚಾ ಲಾಗಿಂ ಯೇವ್ನ್ ಬಸ್ಲೆಂ.
ಬಾಯ್ಲೆಚಾ ಪೊನಾ ವಯ್ಲ್ಯಾ ಭರ್ತಾವಾಕ್ ಆನಿ ಆತಾಂಚಾ ತಾಚ್ಯಾ ಮುಖಮಳಾ ವಯ್ಲ್ಯಾ ಸಂತೊಸಾಕ್ ಪಳೆಲ್ಲೊ ನಾಸಿರ್,
"ವಿಶಯ್ ಕಿತೆಂ ಡಾರ್ಲಿಂಗ್? ಭಾರಿಚ್ ಖುಶಿಯೆರ್ ಆಸ್ಲೆಲ್ಯಾ ಪರಿಂ ದಿಸ್ತಾಯ್!"
"ತುಕಾ ಪಳಂವ್ಕ್ ಮನ್ ಕರ್ತಾಲೆಂ. ತಶೆಂ.... ಆತಾಂ ತುಕಾ ಪಳೆಲೆಂ!" ಆಲಿಯಾ ಆಪ್ಲೆ ವೋಂಟ್ಭರ್ ಹಾಸೊ ಹಾಸ್ಲೆಂ.
"ಬರೆಂ.....! ಆತಾಂ ಪಳೆಲೆಂಯ್ ? ಮ್ಹಾಕಾ ಆತಾಂ ಭುಕ್ ಲಾಗ್ಲ್ಯಾ. ಘರಾಂತ್ ಕೊಣ್ಯ್ ಜೇಂವ್ಕ್ ನಾಂತ್. ತುಕಾಚ್ ರಾಕ್ತಾತ್. ಊಟ್! ವಚ್ ಜೆವ್ಣಾಚಿ ತಯಾರಾಯ್ ಪಳೆ.....!"
ನಾಸಿರಾಚಾ ಉತ್ರಾಂ ತಾವ್ನ್ ಆಲಿಯಾಚಾ ಆಶೆ ವಯ್ರ್ ಶೆಳೆಂ ಉದಾಕ್ ವೊತ್ಲೆಲ್ಯಾ ಪರಿಂ ಜಾಲೆಂ. ಹೆಂ ನಾಸಿರಾಕ್ ದಾಖಂವ್ಚೆಂ ಪ್ರಯತ್ನ್ ತಾಣೆಂ ಕೆಲೆಂ ನಾ. ಆಪ್ಲೊ ಘೊವ್ ಆಫೀಸಾ ಥಾವ್ನ್ ಥಕೊನ್ ಆಯ್ಲಾ ಮ್ಹಳ್ಳೆಂ ತೆಂ ಆಲಿಯಾ ಜಾಣಾಂ.
"ಊಟ್ ತರ್! ತುಜೆಂ ವಸ್ತುರ್ ಕಾಡ್!"
ಖಾಟಿಯೆ ವಯ್ಲೆಂ ಉಟ್ಲೆಲೆಂ ಆಲಿಯಾ ವೆವೆಗ್ಗಿಂ ಆಪ್ಲೆಂ ವಸ್ತುರ್ ಬದ್ಲಿ ಕರುನ್ ಭಾಯ್ರ್ ಚಲ್ಲೆಂ.
ಭಾಯ್ರ್ ನಾಸಿರಾಚಾ ಆವಯ್ನ್ ಎದೊಳ್ಚ್ ಜೆವ್ಣಾಚಿ ತಯಾರ್ ಕರುನ್ ಜಾಲ್ಲಿ.
"ಅಮ್ಮಿಜಾನ್...?, ಹಾಂವ್ ತುಕಾ ಕಾಂಯ್ ಕುಮಕ್ ಕರುಂ...?" ಆಲಿಯಾ, ಮೆಜಾರ್ ಜೆವಾಣ್ ಮಾಂಡುನ್ ದವರ್ಚಾ ಸಾಸುಮಾಂಯ್ ತೆವ್ಶಿಂ ಚಮ್ಕಾಲೆಂ.
"ಜಾಲೆಂ ಬಹೂ....! ತುಂ ನಾಸಿರಾಕ್ ಆಪಯ್!"
ತಿಣೆಂ ಮೆಜಾ ವಯ್ಲೆ ಉದ್ಕಾಚೆ ಗ್ಲಾಸ್ ಉದಾರೆ ಕಲೆ.
ತಿತ್ಲ್ಯಾರ್!
"ಟ್ರಿಣ್....ಟ್ರಿಣ್" ಘರ್ಚೆಂ ಟೆಲಿಪೋನ್ ವಾಜೊಂಕ್ ಲಾಗ್ಲೆಂ.
ಹಾತಾಂತ್ಲೆ ದಿಸಾಳೆಂ ಪತ್ರ್ ಸಕಯ್ಲ್ ದವರುನ್ ಆಪ್ಲ್ಯಾಚ್ ಲಾಗಿಂ ಆಸ್ಲ್ಲ್ಯಾ ಟೆಲಿಪೋನಾ ತೆವ್ಶಿಂ ಚಮ್ಕಾಲ್ಲ್ಯಾ ಸುಲೇಮಾನಾನ್ ಪೊನಾಚೆಂ ರಿಸೀವರ್ ಉಕ್ಲುನ್,
"ಹಲೋ...."
"........."
"ಮಾ ಆಲೇಕ್ಕುಮ್ಸಲಾಮ್ ಬೇಟಿ. ಕಶೆಂ ಆಸಾಯ್ ತುಂ? ಖಂಯ್ ಆಸಾಯ್? ಕಿತ್ಲೆ ದೀಸ್ ಜಾಲೆ.... ತುಜಿ ಕಾಂಯ್ ಖಬಾರ್ ನಾ. ಪೋನ್ ನಾ. ಆಮ್ಚೆರ್ ರಾಗಾರ್ ಆಸಾಯ್
ಕಿತೆಂ?"
ಸುಲೇಮಾನಾನ್ ತ್ಯಾ ಕುಶಿಚಾ ತಾಳ್ಯಾಕ್ ಪಾರ್ಕಿಲೆಂ.
".........."
"ಕಶೆಂ ಆಸಾಯ್? ಭಲಾಯ್ಕಿ ಕಶಿ ಆಸಾ?"
".........."
"ಹಾಂ ಅಲ್ಲಾಹ್ ಚ್ಯಾ ದಯೆನ್ ಸಗ್ಳೆ ಬರೆಂ ಆಸಾ. ಮಾಗಿರ್... ತುಜೆಂ ಸಾಂಗ್!"
".........."
"ಹಾಂ ಹಾಂ ಆಯ್ಲ್ಯಾಂತ್ . ವ್ಹಯ್.... ಕಾಲ್ ಆಯ್ಲ್ಯಾಂತ್. ತುಮ್ಚಿಂ ಘರಾ ಕಶಿಂ ಆಸಾತ್?"
".........."
"ರಾವ್ ಏಕ್ ಮಿನಿಟ್!"
ಸುಲೇಮಾನಾನ್ ಪೊನಾಚೆಂ ರಿಸೀವರ್ ಆಪ್ಲ್ಯಾ ಕಾನಾ ತಾವ್ನ್ ಸಕಯ್ಲ್ ಗಳಯ್ಲೆಂ. ತಾಚ್ಯೆ ಪಾಟ್ಲ್ಯಾನ್,
"ಬಹೂ....? ನಾಸಿರಾಕ್ ಅಮೀನಾಚೆಂ ಪೋನ್ ಆಸಾ ಮ್ಹಣೊನ್ ಸಾಂಗ್!"
ಎಕ್ಚ್ ಪಾವ್ಟಿಂ ಆಪ್ಣಾಕ್ ಆಪ್ಲ್ಯಾ ಮಾಂವಾನ್ ಆರ್ಡರ್ ದಿಲ್ಲೆಂ ಕಳೊನ್ "ನಾಸಿರ್....?" ಆಲಿಯಾನ್ ನಾಸಿರಾಕ್ ಉಲೊ ದಿಲೊ.
"ಬೇಟಿ, ಕೆದಾಳಾಯ್ ಆಶೆಂಚ್ ವೇಳ್ ಆಸ್ತಾನಾ ಘರಾ ಯೇವ್ನ್ ವಚ್!"
ಸುಲೇಮಾನ್ ಪರ್ತ್ಯಾಕ್ ಪೊನಾರ್ ಉಲಂವ್ಕ್ ಲಾಗ್ಲೊ.
"..........."
ಅಮೀನಾಚೆಂ ನಾಂವ್ ಆಯ್ಕೊನ್ ಜೆವ್ಣಾ ಮೆಜಾ ವಯ್ಲಿ ನಾಸಿರಾಚಿ ಆವಯ್ ಹಾಸೊನ್ ಹಾಸೊನ್ ಪೋನಾ ತೆವ್ಶಿಂ ಆಯ್ಲಿ.
ತಿಂಚ್ಚ್ ಸುಲೇಮಾನಾನ್ ಪಯ್ಲೆಂ ವ್ಹಾಳಯಿಲ್ಲಿಂ ಉತ್ರಾಂಚ್ ಪರ್ತ್ಯಾಕ್ ತಿಣೆಂ ವ್ಹಾಳಯ್ಲಿಂ.
ತಿಚ್ಯಾ ಮತಿಕ್ ಅಮೀನಾ ಲಾಗಿಂ ಉಲವ್ನ್ ಸಂತೊಸ್ ಜಾಲ್ಲೊ ಜಾಯ್ಜಯ್. ಪೊನಾ ಸರ್ಶಿಂ ಆಯಿಲ್ಲ್ಯಾ ನಾಸಿರಾಕ್ ತಿಣೆಂ ಪೊನಾಚೆಂ ರಿಸೀವರ್ ದಿತಾನಾ ತಿಚ್ಯಾ ತೊಂಡಾರ್ ಹಾಸೊ ಉದೆಲ್ಲ್ಯೊ ತ್ಯೊ ಆಲಿಯಾನ್ ಪಳೆಲ್ಯೊ.
ಆತಾಂ ನಾಸಿರಾಚಿ ಸರ್ತಿ.
ಪರ್ತ್ಯಾಕ್ ತೆಂಚ್ ಉಲೊಣೆಂ. ತ್ಯೊಚ್ ಹಾಸೊ. ತೊಚ್ ಸಂತೊಸ್.
ಜೆವ್ಣಾ ಮೆಜಾಚಾ ಬಸ್ಕೆಚೆರ್ ಬಸೊನ್ ಆಲಿಯಾ ಆಪ್ಲ್ಯಾ ಘೊವಾಕ್ಚ್ ಪಳೆತಾಲೆಂ.
"ಹೆಂ ಅಮೀನಾ ಮ್ಹಳ್ಳೆಂ ನವೆಂಸಾಂವ್ ಕೋಣ್?"
ಆಲಿಯಾಚಾ ಮತಿಂತ್ ಸವಾಲ್ ಉದೆಲೆಂ ತರ್ಯ್ ಆಪ್ಣಾಕ್ ಕಳಿತ್ ನಾತ್ಲೆಲ್ಯಾ ಜವಾಬೆಕ್ ಸೊಧ್ಚೆಂ ವ್ಯರ್ಥ್ ಪ್ರಯತ್ನ್ ಕರಿನಾಸ್ತಾನಾ ತಶೆಂಚ್ ತೆಂ ನಾಸಿರಾಕ್ ಪಳವ್ನ್ ರಾವ್ಲೆಂ.
ನಾಸಿರಾಚೆಂ ಪೋನಾ ವಯ್ಲೆಂ ಉಲೊಣೆಂ ಜಾತಾಚ್ಚ್ ಸಗ್ಳಿಂ ಜೆವ್ಣಾಕ್ ಬಸ್ಲಿಂ. ಜೆವ್ಣಾರ್ ಕೊಣ್ಯ್ ಕಾಂಯ್ ಉಲಯ್ಲಿಂ ನಾಂತ್. ಆಲಿಯಾನ್ ಜಾಲ್ಯಾರ್ಯ್ ಆಪುಣ್ ಏರ್ವೇಸಾಕ್ ಕಿತ್ಯಾಕ್ ಗೆಲ್ಲಿಂ ಆನಿ ಕಿತೆಂ ಜಾಲೆಂ ತೆಂ ಕಾಂಯ್ ತೆಂಯ್ ಉಲಯ್ಲೆಂ ನಾ. ಆಲಿಯಾಕ್ ಹೆಂ ಸಗ್ಳ್ಯಾಂ ಮುಕಾರ್ ಉಲಂವ್ಚೆಂ ಪಸಂದ್ಯ್ ನಾತ್ಲೆಲೆಂ.
ಆಪುರ್ಭಾಯೆನ್ ರೂಚಿಚೆಂ ಜೆವಾಣ್ ಜಾತಾಚ್, ಜೆವ್ಣಾ ಮೆಜಾ ವಯ್ಲ್ಯಾ ಆಯ್ದಾನಾಂಕ್ ಕುಜ್ನಾಂತ್ ವತ್ತರೆ ಕರುನ್ ಆಲಿಯಾ ಆಪ್ಲ್ಯಾ ಬೆಡ್ರೂಮಾಂತ್ ವಿಶೆವಾಕ್ ಗೆಲೆಂ.
ಆಲಿಯಾ ಆಪ್ಲ್ಯಾ ಬೆಡ್ರೂಮಾಕ್ ಪಾವ್ತಾನಾ ನಾಸಿರ್ ಬೆಡ್ಡಾರ್ ಉದಾರೊ ನಿದ್ಲಲೊ ತರ್ಯ್ ತಾಣೆಂ ದೊಳೆ ದಾಂಪುಂಕ್ ನಾತ್ಲ್ಲೆ. ಬೆಡ್ರೂಮಾ ಭಿತರ್ ಆಯಿಲ್ಲ್ಯಾ ಆಲಿಯಾನ್ ಸವ್ಕಾಸ್ ಆಪ್ಲ್ಯಾ ರುಮಾಚೆಂ ದಾರ್ ಭಂಧ್ ಕರುನ್ ಆಪ್ಲ್ಯಾ ಆಂಗಾ ವಯ್ಲೆಂ ವಸ್ತುರ್ ಬದ್ಲುಂಚಾಕ್ ಎಕೇಕ್ಚ್ ಆಪ್ಲ್ಯಾ ಆಂಗಾಚೆಂ ವಸ್ತುರ್ ನಿಕ್ಳಾಂವ್ಕ್ ಲಾಗ್ಲೆಂ.
ಬೆಡ್ಡಾರ್ ಆಡ್ ಪಡ್ಲ್ಲ್ಯಾ ಕಡೆನ್ ಥಾವ್ನ್ ಆಲಿಯಾಕ್ಚ್ ಪಳವ್ನ್ ಅಸ್ಲ್ಲ್ಯಾ ನಾಸಿರಾಕ್ ಆಲಿಯಾನ್ ವಸ್ತುರ್ ನಿಕ್ಳಾಯ್ತಾನಾ ದಿಸ್ಚಿ ತಾಚಿ ಭಿತರ್ಲಿ ಸೊಭಾಯ್ ಪಳವ್ನ್ ಎದೊಳ್ ತಾಚ್ಯಾ ಮತಿಂತ್ ಜಾಪಿ ಆಶೆವ್ನ್ ರಾಕೊನ್ ರಾವ್ಲೆಲಿಂ ತಿಂ ಸವಾಲಾಂ ಸವ್ಕಾಸ್ ತ್ಯಾ ಉದೆವ್ನ್ ಯೆಂವ್ಚಾ ಸುರ್ಯಾಚಾ ಧಾವೆಕ್ ಸಾಕಾಳಿಂಚೊ ಧೋವ್ ನಿತ್ಳೊನ್ ವೆಚಾ ಪರಿಂ ತಿಂ ಸವಾಲಾಂ ತಾಚ್ಯಾ ಮತಿಂತ್ ಥಾವ್ನ್ ನಿತ್ಳೊನ್ ಗೆಲಿಂ.
ನಿಜಾಯ್ಕ್ಯ್ ಆಲಿಯಾ ಮಸ್ತ್ ಸೊಭಿತ್ ಆಸ್ಲ್ಲೆಂ. ಖಾಟಿಯೆರ್ ಥಾವ್ನ್ಚ್ ಆಪ್ಲ್ಯಾ ಆಲಿಯಾಚಿ ಸೊಭಾಯ್ ಚಾಕ್ಚ್ಯಾ ನಾಸಿರಾಕ್ ಎಕಾ ಖಿಣಾಕ್ ಆಲಿಯಾ ಆಪ್ಣಾಕ್ ಲಾಬ್ಲೆಲೆಂ ಮೊಲಾಧೀಕ್ ದೆಣೆಂ ಮ್ಹಳ್ಳ್ಯಾಪರಿಂ ದಿಸೊನ್ ತೊ ಆಪ್ಲ್ಯಾ ಮನಾಂತ್ಚ್ ಸಂತೊಸ್ ಪಾವ್ಲೊ.
ಸಂಪೂರ್ಣ್ ಗೊರ್ಶ್ಯಾ ಕಾತಿರ್, ಲಾಂಬ್ ಜಿವಾಚೆಂ ಭಾರೀಕ್ ಆಲಿಯಾ, ಭರ್ಲೆಲ್ಯಾ ಹರ್ಧ್ಯಾರ್ ಫುಲೊನ್ ರಾವ್ಲೆಲ್ಯಾ ಗೊಂಡ್ಯಾ ಪರಿಂ ದಿಸ್ಚೆಂ, ಭಾರೀಕ್ ಪೋಟ್, ತ್ಯಾ ಪೊಟಾರ್, ಪರ್ಜಳುನ್ ರಾವ್ಲೆಲ್ಯಾ ಸೂರ್ಯಾಕಾಂತಿ ಫುಲಾ ಭಾಶೆನ್ ದಿಸೊನ್ ಮನ್ ಪಿಸ್ವಾಂವ್ಚಿ ಬೊಂಬ್ಲಿ, ಚಡ್ ರೂಂದ್ ನ್ಹಯ್ ಆಸ್ಲೆಲೆಂ ಹಳ್ತಾಚೆಂ ಪಾತಳ್ ಪೆಂಕಾಡ್, ತ್ಯಾ ಪೆಂಕ್ಡಾಕ್ ಸೊಭಾಯ್ ವಾಡಂವ್ಚೆ ಹಳ್ತಾಚೆ ಕುಲೆ, ವಯ್ಲ್ಯಾ ಲೈಟಾಚಾ ಉಜ್ವಾಡಾಕ್ ಝಳ್ಜಳ್ಚಾ ಪರಿಂ ದೊಳ್ಯಾಂಕ್ ದಿಸ್ಚೊ ತ್ಯೊ ಜಾಂಗೊ, ತ್ಯಾ ದೋನ್ ಜಾಂಗ್ಯಾಂ ಮಧೆಂ ಪಾಟ್ಲ್ಯಾ ಕುಶಿಲೊ ಉಜ್ವಾಡ್ ಹ್ಯಾ ಕುಶಿನ್ ಆಶಾರ್ ಪಾಶಾರ್ ಕರ್ಚಿ ಭಾರೀಕ್ ಲ್ಹಾನ್ ಓಣ್, ತ್ಯಾ ಓಣಿಚಾ ಸಕಯ್ಲ್ ಎಕಾಮೆಕಾ ತೆಂಕುನ್ ರಾವ್ಲೆಲೆ ತೆ ಪಾಂಯ್..... ಆಲಿಯಾ ಪೃಥ್ವೆ ವಯ್ಲಿ ಆಪರಿಮಿತ್ ಸೊಭಾಯ್ ಮ್ಹಳ್ಳ್ಯಾ ಭಾಶೆನ್ ನಾಸಿರಾಕ್ ದಿಸ್ಲೆಂ.
ನಾಸಿರಾ ತೆವ್ಶಿಂ ಘುಂವೊನ್ ಪಳೆಲ್ಲ್ಯಾ ಆಲಿಯಾಕ್ ಆಪ್ಲೊ ಘೊವ್ ಆಪ್ಣಾಕ್ಚ್ ಪಳವ್ನ್ ಆಪ್ಣಾಚಿ ಸೊಭಾಯ್ ಆಪ್ಲ್ಯಾ ದೊಳ್ಯಾಂನಿಚ್ ಚಾಕೊನ್ ಆಸಾ ತೆಂ ಕಳೊನ್ ತಾಚ್ಯಾ ತೊಂಡಾರ್ ಹಾಸೊ ಉದೆಲ್ಯೊ. ನಾಸಿರಾಕ್ ಪಳವ್ನ್ ತೆಂ ತಶೆಂಚ್ ರಾವ್ಲೆಂ. ಆಪ್ಲ್ಯಾ ಬಾಯ್ಲೆಕ್ ಪಳೆಲ್ಲೊ ನಾಸಿರ್ ಸಂಸಾರಾಕ್ ವಿಸ್ರಾಲ್ಲೊ.
ಆಪ್ಲೊ ಘೊವ್ ಆಪ್ಣಾಕ್ ಆಶೆತಾ ತೆಂ ಪಳವ್ನ್ ಆಲಿಯಾ ದುಸ್ರೆಂ ವಸ್ತುರ್ ನ್ಹೆಸೊಂಕ್ ಗೆಲೆಂ ನಾ. ನಾಸಿರಾಚಾ ದೊಳ್ಯಾಂನಿ ಉಪ್ಯೆಂವ್ಚಿ ಆಶಾ ಪಳೆಲ್ಲೆಂ ಆಲಿಯಾ ತಶೆಂಚ್ ಮಸ್ತ್ ಸಂತೊಸ್ಲೆಂ.
ಆಪ್ಲೊ ಘೊವ್ ಸಗ್ಳ್ಯಾಂ ಪ್ರಾಸ್ ಚಡ್ ಆಪ್ಣಾಕ್ ಆಶೆತಾ ಮ್ಹಳ್ಳ್ಯಾ ಖಚಿತ್ ಪಾತ್ಯೆಣೆಂತ್ ಎಕಾ ಬಾಯ್ಲೆಕ್ ಮೆಳ್ಚೆಂ ತೆಂ ಮಾನಸಿಕ್ ಸುಖ್ ತಾಣೆಂ ಜೊಡುನ್ ಘೆಂವ್ಚಾ ತ್ಯಾ ಕುಡಿಚಾ ಸುಖಾ ಪ್ರಾಸ್ ಚಡ್ ವರ್ತೆಂ. ಮಾನಸಿಕ್ ಸುಖ್ ನಾತ್ಲೆಲೆಂ ಬಾಯ್ಲ್ ಕುಡಿಚ್ಯಾ ಸುಖಾಚಾ ಖಂಯ್ಚಾ ಹಂತಾರ್ ಪಾವ್ಲ್ಯಾರ್ಯ್ ತೆಂ ಸುಖಿ ಆಸಾನಾ. ತಶೆಂಚ್ ಮಾನಸಿಕ್ ಸುಖಾಕ್ ಪಾವ್ಲೆಲೆಂ ಬಾಯ್ಲ್ ಕುಡಿಚಾ ಸುಖಾ ಥಾವ್ನ್ ಕಿತ್ಲೆಂ ಪಯ್ಸ್ ಆಸ್ಲ್ಯಾರ್ಯ್ ತೆಂ ಸದಾಂಚ್ ಸುಖಿ ಆಸ್ತಾ. ತಶೆಂಚ್ ಆಲಿಯಾ....!
ಘೊವಾಚ್ಯಾ ದೊಳ್ಯಾಂನಿ ಆಪ್ಣಾಕ್ ಪಳವ್ನ್ ಉಪ್ಯೆವ್ನ್ ಆಯಿಲ್ಲ್ಯಾ ಆಶೆಕ್ ತಶೆಂಚ್ ಬಾವೊನ್ ವಚೊಂಕ್ ದೀಂವ್ಕ್ ಆಲಿಯಾಕ್ಯ್ ಮನ್ ಆಯ್ಲೆಂ ನಾ. ತೆಂ ಆತಾಂ ವ್ಹಳೂ ಮೆಟಾ ವಯ್ರ್ ಮೇಟ್ ಕಾಡುನ್ ನಾಸಿರಾ ತೆವ್ಶಿಂ ಆಯ್ಲೆಂ.
ಆಪ್ಲ್ಯಾ ಆಂಗಾರ್ ಫಕತ್ತ್ ದೋನ್ ವಸ್ತುರಾಂಚಾ ತೀರಾಂನಿ ಸೊಭ್ಚೆಂ ಆಲಿಯಾ ಆಪ್ಲ್ಯಾ ದೊಳ್ಯಾಂ ಮುಕಾರ್ ಆಪ್ಣಾ ತೆವ್ಶಿಂ ಚಲೊನ್ ಯೆಂವ್ಚೆಂ ದಿಸ್ತಾನಾ ಎಕಾ ಖಿಣಾಕ್ ನಾಸಿರಾಕ್ ತಾಂಚಾ ತ್ಯಾ ಮೋರಿಶಸಾಂತ್ಲ್ಯಾ ಹನಿಮೂನಾಚೊ ಉಡಾಸ್ ಆಯ್ಲೊ.
ತೊ ಸವ್ಕಾಸ್ ಬೆಡ್ಡಾರ್ ಉಟೊನ್ ಬಸ್ಲೊ.
"ಸುಂದರ್! ತುಂ ಮಸ್ತ್ ಸೊಭಿತ್ ಡಾರ್ಲಿಂಗ್!"
ನಾಸಿರಾಚಾ ತೊಂಡಾ ಥಾವ್ನ್ ಉತ್ರಾಂ ಭಾಯ್ರ್ಸರ್ತಾನಾ ಆಲಿಯಾ ಹ್ಯಾ ಸಂಸಾರಾಕ್ ವಿಸ್ರಾಲೆಂ.
ವಸ್ತುರ್ ನ್ಹೆಸ್ಚ್ಯಾ ಕಾರಾಣಾಕ್ ಲಾಗೊನ್ ಆಲಿಯಾನ್ ಉಗ್ತೊ ಸಾಂಡ್ಲ್ಲ್ಯಾ ವಾರ್ಡ್ರೊಬಾಂತ್ಲ್ಯಾ ಆಲಿಯಾಚಾ ವಿವಿಧ್ ರಂಗಾಂಚಾ ವಸ್ತುರಾಂಕ್ ಎಕಾಚ್ ದಿಷ್ಟೆನ್ ಪಳೆತಾನಾ, ತ್ಯಾ ಪಾವ್ಸಾ ದೊಣ್ವಾಕ್ ಪಳೆಲ್ಲೊ ಆನ್ಭೋಗ್ ಜಾಂವ್ಚಾ ಪರಿಂ, ಆಲಿಯಾನ್ ಆಪ್ಲೊ ವಾರ್ಡ್ ರೋಬ್ ಉಗ್ತೊ ಕರ್ತಾನಾ ದೊಳ್ಯಾಂಕ್ ತೊಪ್ಲ್ಲ್ಯಾ ಹ್ಯಾ ಮೊಗಾ ದೊಣ್ವಾಕ್ ಪಳವ್ನ್, ರಾನಾಂತ್ಲೊ ಮೋರ್ ಪಾಕಾಂ ಫುಲವ್ನ್ ರಾಂವ್ಚಾ ಪರಿಂ ಸವ್ಕಾಸ್ ಖಾಟಿಯೆರ್ ಬಸ್ಲೆಲ್ಯಾ ಕಡೆನ್ ಥಾವ್ನ್ ನಾಸಿರ್ ಉಟೊನ್ ಉಭೊ ಜಾಲೊ.
ತಿತ್ಲೆಂಚ್!
ಉಪ್ರಾಂತ್ಲೊ ವೇಳ್ ಕೊಣಾಚೊ ಆನಿ ಕಸೊ ಮ್ಹಳ್ಳೆ ದೊಗಾಂಯ್ ನೆಣಾಂ ಆಸ್ಲ್ಲಿಂ.
ತಾಂಕಾಂ ಕೊಣಾಚಿಚ್ ಆನಿ ಕಸಲ್ಯಾಚಿಚ್ ಪರ್ವಾ ನಾತ್ಲ್ಲಿ.
ಸಂಸಾರಾಂತ್ ಫಕತ್ತ್ ಆಲಿಯಾ ಆನಿ ನಾಸಿರ್ ಮಾತ್ರ್ ಮ್ಹಳ್ಳ್ಯಾ ಪರಿಂ....!
ಹ್ಯಾ ಸಂಸಾರಾಂತ್ ತಾಂಚೆ ಶಿವಾಯ್ ತಾಂಚಾ ಭಂವ್ತಣಿಂ ಕಾಂಯ್ ತರ್ಯ್ ಆಸಾ ವ್ಹಯ್ ಜಾಲ್ಯಾರ್ ತೊ ತಾಂಚೊ ಭಳಾನ್ ವೊಡ್ಚೊ ಶ್ವಾಸ್ ಮಾತ್ರ್. ಶ್ವಾಸಾಕ್ ವೊಡ್ಚೆಂ ಭಳ್ ಆನಿ ದಿಂವ್ಚಿ ತಿ ಊಬ್ ಚಡೊನ್, ಎಕಾ ಮೆಕಾ ಆದಾಳ್ತಾನಾ ತಿಂ ದೊಗಾಂಯ್ ತಾಂಚಾಚ್ ಮೊಗಾಚಾ ಸಂಸಾರಾಂತ್ಲ್ಯಾ ಅತೀ ಊಂಚ್ ಶಿಖರಾಕ್ ಚಡ್ಲಿಂ ಆನಿ ಚಡ್ಲಿಂ. ಜೆದ್ನಾಂ ವರೇಗ್ ತ್ಯಾ ಮೊಗಾಚಾ ದರ್ಯಾಂತ್ ಉಭೊ ಆಸ್ಲಲೊ ಭರಫಾಚೊ ಗುಡೊ ಸವ್ಕಾಸ್ ತ್ಯಾ ಉಬೆಂತ್ ಕರ್ಗೊನ್ ಉದಾಕ್ ಜಾವ್ನ್ ವೆತಾ ತೆದ್ನಾಂ ವರೇಗ್!
************
[ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
ಕಾದಂಬರಿಕಾರಾಚಿಂ ಉತ್ರಾಂ: ಅವಸ್ವರ್ 1, ಅವಸ್ವರ್ 2, ಅವಸ್ವರ್ 3, ಅವಸ್ವರ್ 4, ಅವಸ್ವರ್ 5
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
